“ಗಿರೆಸ್ತ್ ಆನಿಕೀ ಚಡ್ ಗಿರೆಸ್ತ್ ಜಾತಾತ್” ಐಪೇಡಾರ್ ಕಿತೆಂಗಿ ವಾಚುನ್ ಆಸ್‍ಲ್ಲಿ ಮ್ಹಜಿ ಯೆಜ್ಮಾನ್ ಉದ್ಗಾರ್ಲಿ.
“ಅತಾಂ ಕಿತೆಂ ಜಾಲೆಂ?” ವಿಚಾರಿ ಹಾಂವ್, “ಕೊಣೆಂ ಕಿತೆಂ ಫೊರ್ವಾರ್ಡ್ ಕೆಲಾಂ?” ಪೇಸ್‍ಬುಕ್ ಆನಿಂ ವಾಟ್ಸಪ್, ಹಿಂ ದೋನ್ ಮದಾಮೆಚಿಂ ಪಾತಿಯೆಣೆಚಿಂ ಮೂಳಾಂ. ಖಂಯ್ಚ್ಯಾಯೀ ವಿಷಯಾರ್ ಮಾಹೆತ್ ಜಾಯ್ ತರ್, ತಿ ಹ್ಯಾ ದೋನ್ ಯುನಿವರ್ಸಿಟಿಂಕ್ ಭೆಟ್ ದೀತಾ. ಜಶೆಂ, ಹಾಂವ್ ವಿಕಿಪೀಡಿಯಾಕ್ ಭೆಟ್ ದಿತಾಂ ವ ಗೂಗಲ್ ಕರ್ತಾಂ.
“ಪಳೆ, ಹಿ ಖಬೊರ್ ವಾಚ್. ಒಕ್ಸ್‍ಫೇಮ್ ರಿಪೊರ್ಟ್: ಭಾರಿಚ್ ಪಾತಿಯೆವ್ಯೆತ್ ತಸ್ಲೊ. 2021 ಇಸ್ವೆಂತ್, ಆಮ್ಚ್ಯಾ ದೇಸಾಂತ್ 84% ಘರಾಣ್ಯಾಂಚಿ ಆಮ್‍ದಾನಿ 84% ಪಡ್ಲಿ. ಕೊರೊನಾಚೊ ಕಾಳ್ ನೇ? “
“ವಯ್, ಕೊರೊನಾಚ್ಯೆಂ ದುಸ್ರೆಂ ಲ್ಹಾರ್ ಭಿರಾಂಕುಳ್ ಆಸ್ಲೆಂ-ಮೂ? ಕಿತ್ಲೆಶಿಂ ಕಾಮಾಂ ಗೆಲಿಂ. ಸ್ವಂತ್ ಲ್ಹಾನ್‍ಸೊ ದಂಧೊ ಕರ್ನ್ ಆಸ್ಲೆಲ್ಯಾಂಚಿಂ ಬಿಜ್ನೆಸಾಂಚ್ ಬಂಧ್ ಪಡ್ಲಿಂ.”
“ಅಸಲ್ಯಾ ಮಾರೆಕಾರ್ ಕಾಳಾರ್ ತರೀ, ದೇಸಾಂತ್ ಮ್ಹಾ-ಕರೋಡ್ಪತಿಂಚೊ ಆಂಕ್ಡೊ 102 ಥಾವ್ನ್ 142 ಜಾಲೊ. ಕೊಣಾಚಿ ಜೋಡ್ ಚಿತ್ಲಾಚ್ಯಾ ವೇಗಾನ್ ಚಡ್ಲಿ. ಆನಿಂ ಜಾಯಿತ್ತ್ಯಾಂಚಿ ಜೋಡ್ ಥಳ್ ನಾತ್ಲೆಲ್ಯಾ ಬಾಂಯ್ತ್ ಪಡ್ಲಿ.”
“ದೇಸಾಂತ್ ಅಸಮಾನತಾ ಇತ್ಲಿ ವಾಡ್ಲ್ಯಾ ಕಿ ಸಾಂಗ್ಚ್ಯೆಂ ನಾಕಾ. ಪುಣ್, ಮೋದಿ ಸರ್ಕಾರಾಕ್ ಕಾಂಯ್ ಪಡೊನ್ ಗೆಲಾಂ-ಗೀ? ತೊ ಆನಿಂ ಅಮಿತ್ ಶಾ “ಹಮ್ ದೊ” ಸರ್ಕಾರ್. ಅಂಬಾನಿ ಆನಿಂ ಅದಾನಿ, “ಹಮಾರೆ ದೊ”.
“ತುಂ ಆಜ್ ರಾಹುಲ್ ಗಾಂಧಿಚಿ ಭಾಸ್ ಉಲಯ್ತಾಯ್-ಮೂ? ಕಾಲ್ ಮ್ಹಣಾಸಾರ್, ತುಕಾ ಮೋದಿ ಬರೊ‍ಚ್ ರುಚ್ತಾಲೊ. ಯುಪಿಂತ್ ಸದ್ದ್ಯಾಕ್ ಚುನಾವ್ ಆಸಾತ್ ದೆಕುನ್ ಬಾಜಪಾಚ್ಯೆ ಥೊಡೆ ಮಂತ್ರಿ ಆನಿಂ ಎಮ್ಮೆಲೆ ದಳ್ ಬದ್ಲಿ ಕರ್ನ್ ತಾಂಬ್ಡಿ ತೊಪಿಯೆವಾಲ್ಯಾಚ್ಯೆ ಪಾಡ್ತಿಂತ್ ಭರ್ತಿ ಜಾವ್ನ್ ಆಸಾತ್. ತಶೆಂ ತುಂಯೀ-ಗೀ ಕಿತೆಂ?” ಮ್ಹಜ್ಯಾ ತಾಳ್ಯಾಂತ್ ಇಲ್ಲೆಂಶೆಂ ವ್ಯಂಗ್ಯ್ ಆಸ್ಲೆಂ.
“ಹಾಂವ್ ಕೆನ್ನಾಂಯೀ ಸತಾಚಿ ಪಾಡ್ತ್ ಘೆತಾಂ. ಮ್ಹಾಕಾ ಹಿ ವ ತಿ ಪಾಡ್ತ್ ಮ್ಹಣ್ ನಾಂ. ಕಿತ್ಯಾಕ್, ಹಾಂವ್ ಕಾಂಯ್ ಪೊಲಿಟಿಕ್ಸಾಂತ್ ನಾಂ. ಮ್ಹಕಾ ಕಿತೆಂ ಸಾರ್ಖೆಂ ಮ್ಹಣ್ ದಿಸ್ತಾ ತೆಂ ಶೀದಾ ಸಾಂಗ್ತಾಂ. ಘುಂವ್ಡಾಂವ್ಚ್ಯೆಂ ವ ಫಿರಾಂವ್ಚ್ಯೆಂ ನಾಂ. ಕಾಳೆಂ ನಾಗ್ಡೆಂ ದಿಸ್ತಾ ತರೀ ಗೊರೆಂ ಮ್ಹಣ್ ಭಾಸ್ಚಿ ಸವಯ್ ನಹಿಂ ಮ್ಹಜಿ.” ಕೋಣಾಕ್ ಹಿಶಾರೊ ಕರ್ತಾಗಾಯ್ ಮದಾಮ್? ತಿಚಿಂ ಕೊಡು ಉತ್ರಾಂ ಒಪ್ಪುನ್ ಘೆತ್ಲ್ಯಾರ್, ಮ್ಹಾಕಾಚ್ ಲಜ್.
“ವಯ್ ಹಬಾ. ತುಕಾ ಡಿಪ್ಲಮೆಸಿ ಕಿತೆಂ ಮ್ಹಣ್ ಕಳಿತ್ ನಾಂ. ಕಿತ್ಯಾಕ್, ಘರಾ ಭಾಯ್ರ್, ಚ್ಯಾರ್ ಜಣಾಂ ಸಾಂಗಾತಾ ತುಂವೆಂ ಕಾಂಯ್ ಕಾಮ್ ಕೆಲ್ಲೆಂ ನಾಂ ಪಳೆ!”.
“ಸತ್ ಉಲಯ್ತೆಲ್ಯಾಕ್ ಡಿಪ್ಲಮೆಸಿ ಕಿತ್ಯಾಕ್? ತುಜೊ ಇಷ್ಟ್ ಎಚ್ಚೆಮ್ ತಾಚ್ಯಾ ಎಕಾ ಕಾವ್ಯಾಂತ್ ಅಶೆಂ ಮ್ಹಣ್ತಾ :
ಕವಿತಾ ಆಸುಂಕ್‍ಚ್ ಜಾಯ್,
ಕಸಾಯ್‍ಗಾರಾಚ್ಯಾ ಪಾಜ್ಲೆಲ್ಯಾ ಕೊಯ್ತ್ಯಾ ಪರಿಂ
ಮಾರ್ ಏಕ್ – ಕುಡ್ಕೆ ದೋನ್
ಹಾಡಾಂಯೀ ತಾಸೊನ್ ವೆಚ್ಯೆ ಪರಿಂ.
ಕ್ಲೀಯರ್ … ಕಟ್!!!
ಕವಿತಾಚ್ ನಹಿಂ, ಭಾಸಾಭಾಸ್ ಸಯ್ತ್ ತಶಿ‍ಚ್. ಶೀದಾ ಕಾಳ್ಜಾಕ್ ಭಾಲೊ ಲಾಗಜೆಚ್!”
ಆತಾಂ ಎಚ್ಚೆಮಾಕ್‍ಯೀ ಮಧೆಂ ಹಾಡ್ಲೆಲ್ಯಾ ಉಪ್ರಾಂತ್, ಹಾಂವ್ ಕಿತೆಂ ಮ್ಹಣೊಂ? ವೊಗೊ ರಾವ್ಲೊಂ ಆನಿಂ ಮದಾಮ್ ಮುಖಾರ್ ಕಸಲೊ ಬೊಂಬ್ ಘಾಲ್ತಾಗೀ ಮ್ಹಣ್ ರಾಕೊನ್ ರಾವ್ಲೊಂ.
“ವಯ್, ಕೊರೊನಾಚ್ಯೆ ವೊಸ್ಯಾ ಪಿಡೆಂತ್ ಹಜಾರಾಂನಿಂ ನಹಿಂ ಲಾಖಾಂನಿಂ ಆಮ್ಚೊ ಲೋಕ್ ವಳ್ವಳ್ಳೊ. ಆಸ್ಪತ್ರೆಂತ್ ಖಟ್ಲಿಂ ನಾಂತ್; ಮೆಡಿಕಲ್ ಒಕ್ಸಿಜೆನ್ ನಾಂ; ಮೊಡಿಂ ದವ್ರುಂಕ್ ಮೊರ್ಚುವರಿಂತ್ ಫ್ರೀಜರಾಂ ನಾಂತ್; ಆನಿಂ ಹುಲ್ಪಾಂವ್ಕ್ ಅಗ್ಟಿಂ ನಾಂತ್. ಕಸಲೆ ಕರುಣಾಜನಕ್ ಗ್ರಾಚ್ಚಾರ್ ಆಮ್ಚ್ಯೆ. ಹ್ಯೆ ಅವಸ್ತೆ ಮಧೆಂ, ಮೋದಿ ಸರ್ಕಾರಾನ್ ಭಲಾಯ್ಕೆ ವಿಬಾಗಾಚಿ ಬಜೆಟ್ 10% ಕಟ್ಟ್ ಕರ್ಚಿ-ಗೀ?” ಮದಾಮೆನ್ ಮುಕಾರುನ್ ಮ್ಹಳೆಂ.
“ವ್ಹಯ್ ಹಬಾ. ಸರ್ಕಾರಾನ್ ತರೀ ಕಿತೆಂ ಕರ್ಚ್ಯೆಂ? ಚೊರುಂಕ್ ವೆಚ್ಯೆಂ ಯೇ? GST ಕಲೆಕ್ಶನ್ ಕಿತ್ಲೆಂ ಪಡ್ಲೆಂ ಖಬರ್ ಆಸಾಯೆ ತುಕಾ? ಬಿಜ್ನೆಸಾಂಚಿಂ ಆನಿಂ ಉತ್ಪಾದನ್ ಕರ್ಚ್ಯಾ ಕೊರ್ಪೊರೇಟ್ ಕಂಪ್ಣ್ಯಾಂಚಿ ಜೋಡ್ ಲೆಗುನ್ ಪಡ್ಲಿ ನೇ? ಮ್ಹಣ್ತಚ್, ಕೊರ್ಪೊರೇಟ್ ಟ್ಯೆಕ್ಸ್ ಕಲೆಕ್ಶನ್ ಲೆಗುನ್ ಉಣೆಂ ಜಾತಾ ನೇ?” ಸರ್ಕಾರಾ ತರ್ಫೆನ್ ವಾದ್ ಮಾಂಡ್ಲೊ ಹಾಂವೆಂ.
“ತುಂ ಹೆಂ ಹೋಸ್-ಹವಸಾಂತ್ ಆಸೊನ್ ಮ್ಹಣ್ತಾಯ್ಗೀ? ವ ಹಿ ತುಜಿ ಡಿಪ್ಲಮಸಿ? ಸರ್ಕಾರಿ ವಕಾಲತ್ ಕರ್ತಾಯ್ ತರ್, ಮ್ಹಕಾ ಹೆಂ ಸಾಂಗ್: ಮೋದಿ ಸರ್ಕರಾನ್ ಕೊರ್ಪೊರೇಟ್ ಟ್ಯೇಕ್ಸ್ ದರ್ 22% ಕ್ ದೆಂವಂವ್ಕ್ ನಾಂ ವೇ? ತಿ ಪಯ್ಲೆಂ 30% ಆಸ್‍ಲ್ಲಿ ಮೂ? ಆಮ್ಚಿ ಖಾಸ್ಗಿ ಇನ್ಕಮ್ ಟ್ಯೆಕ್ಸ್ ರಿಯಾಯ್ತ್ ದೀವ್ನಾ-ಮೂ? ಕಿತ್ಯಾಕ್?” ಮದಾಮೆಚಿಂ ಉಳ್ಟಿಂ ಸವಾಲಾಂಚ್ ಸವಾಲಾಂ.
“ತುಂವೆಂ Rich Dad, Poor Dad” ಬೂಕ್ ವಾಚಿಜೆ. ಅಂಬಾನಿ ಆನಿಂ ಅದಾನಿ ತಸ್ಲೆ ವ್ಹಡ್ ಕಾರ್ಬಾರಿ ಲೋಕಾಕ್ ಕಾಮಾಂ ದೀತಾತ್. ಆಮ್ಚ್ಯಾ ದೇಸಾನ್ ಪ್ರಗತಿ ಕರಿಜೆ ತರ್, ಕಾಮಾಂ ದಿತೆಲ್ಯಾಂಚಿ ಗರ್ಜ್ ಕಾಮಾಂ ಸೊದ್ತೆಲ್ಯಾಂ ಪ್ರಾಸ್ ಚಡ್ ಆಸಾ. ಲೋಕಾನ್ ಆಪ್ಲಿ ರವಯ್ಯ ಬದ್ಲಿ ಕರಿಜೆ. ಗಿರೆಸ್ತ್ ಜಾಂವ್ಚ್ಯೆಂ ಪಾತಕ್ ನಹಿಂ. ಜೆಜುನ್ ಸಾಂಗೊಂಕ್ ನಾಂಗೀ: ಕೊಣಾಕಡೆಂ ಆಸಾ, ತಾಕಾ ಚಡಿತ್ ದಿತೆಲೆ? ದೆಕುನ್, ತಾಂಚೊ ಟ್ಯೇಕ್ಸ್ ಉಣೊ ಕೆಲಾ. ದುಬ್ಳೊ ದುಬ್ಳೊಚ್ ಜಾವ್ನ್ ಉರ‍್ತಾ ಕಿತ್ಯಾಕ್? ಆಪ್ಣೆಂ ಗಿರೇಸ್ತ್ ಜಾಯ್ಜೆ ಮ್ಹಳ್ಳೊ ಉಜೊ ತಾಚ್ಯಾ ಭಿತರ್ ಜಳಾನಾಂ.”
” ಒಕ್ಸ್‍ಫೇಮ್ ವರ್ದೆ ಪ್ರಮಾಣೆಂ, ಹ್ಯಾ ವ್ಹರ್ಸಾ ಭಾರತಾಂತ್ ಸಕಯ್ಲ್ಯಾ ದರ್ಜೆಚ್ಯಾ ಲೋಕಾಚಿ ಒಟ್ಟು ಆಸ್ತ್-ಬದಿಕ್ ಕೇವಲ್ 6%. ಆನಿಂ ಶೆಂಬೊರ್ ಮ್ಹಾ-ಕರೋಡ್‍ಪತಿಂಚಿಂ ಒಟ್ಟು ಆಸ್ತ್-ಬದಿಕ್ 57 ಲಾಖ್ ಕರೋಡಾಂಕ್ ಮಿಕ್ವತಾ. ಹೊ ನ್ಯಾಯ್ ನಹಿಂ. ಸರ್ಕಾರಾನ್ ಸಮಾಜಿಕ್ ನ್ಯಾಯ್ ರುತಾ ಕೆಲೊನಾಂ, ತರ್ ವೆಗಿಂಚ್ ಕ್ರಾಂತಿ ಜಾಂವ್ಚ್ಯೆ ದೀಸ್ ಯೆತೆಲೆ. ಸಂಸಾರಾಚಿ ಚ್ಯರಿತ್ರಾ ಆಮ್ಕಾಂ ತಶೆಂ ಶಿಕಯ್ತಾ.”
“ದುಬ್ಳ್ಯಾಂಕ್ ಲುಟುನ್, ಮ್ಹಾ-ಕರೋಡ್‍ಪತಿ ಜಾಯ್ನಾಂತ್. ತೆ ತಾಂಚ್ಯೆ ದೃಷ್ಟಿ ವರ್ವಿಂ, ಸ್ಪಷ್ಟ್ ಮಿಸಾಂವಾಂ ವರ್ವಿಂ, ಆನಿಂ ದೀಸ್-ರಾತಿಚ್ಯೆ ಮಿನತೆ ವರ್ವಿಂ ಗಿರೇಸ್ತ್ ಜಾಲ್ಯಾತ್. ಆಮ್ಚ್ಯಾ ನಂಬರ್ ವನ್ ಗಿರೆಸ್ತ್ ಮನ್ಶ್ಯಾಂಚೆಂ, ಮುಕೇಶ್ ಅಂಬಾನಿಚ್ಯೆಂ, ಉದಾಹರಣ್ ಧರ‍್ಯಾಂ. ತಾಚೊ ಬಾಪೈ, ಧಿರುಭಾಯ್ ಅಂಬಾನಿ ಏಕಾ ಕೂಡಾಚ್ಯೆ ಚಾಲಿಂತ್ ರಾವ್ತಲೊ. ಯೆಮೆನಾಂತ್ ಪೆಟ್ರೊಲ್ ಪಂಪಾಂತ್ ಎಟ್ಟೆಂಡರ್ ಜಾವ್ನ್ ಘೊಳ್ತಲೊ. ಥೊಡೆ ಪಯ್ಶೆ ಉರವ್ನ್, ಪಾಟಿಂ ಮುಂಬೈ ಅಯ್ಲೊ ಆನಿಂ ಸುತ್ ವಿಕ್ಚೊ ಚಿಲ್ಲರ್ ದಂಧೊ ಸುರು ಕೆಲೊ. ತಾಚಿ ಜನ್ಮ್-ಕಥಾ ಹರ್ಯೆಕ್ಲ್ಯಾನ್ ವಾಚುಂಕ್ ಜಾಯ್. ವಾಚುಂಕ್ ತ್ರಾಸ್ ಭಗ್ತಾ ತರ್, ಗುರು ಮ್ಹಳ್ಳೆಂ ಹಿಂದಿ ಫಿಲ್ಮ್ ಪಳೆಲ್ಯಾರ್ ಜಾಲೆಂ.”
“ಗಿರೆಸ್ತ್ಕಾಯೆ ವಿಷಿಂ ಮ್ಹಜಿ ಫಿಲೊಸೊಫಿ ಆಜ್-ಕಾಲ್ಚಿ ನವಿ ನಹಿಂ. ಹಾಂವ್ ಕೊಲೆಜಿಂತ್ ಭರ್ತಿ ಜಾತನಾಂ, ಕಟೀಣ್ ದುಬ್ಳೊ ದೆಕುನ್ ಸಮಾಜ್‍ವಾದ್ ಮ್ಹಕಾ ವೊಂಬ್ವಾತಲೊ. ಉಪ್ರಾಂತ್, ಫಿಲೊಸೊಫರ್ Ayn Rand ಚ್ಯೆಂ ಸಾಹಿತ್ ವಾಚುಂಕ್ ಮೆಳ್ಳೆಂ. ತಿಚಿ We the living, Fountainhead ಆನಿಂ Atlas shrugged ಕಾದಾಂಬರಿ ಮ್ಹಕಾ ಭಾರಿಚ್ ಆವಡ್ಲ್ಯೊ. ಹಾಂವ್ ಕೊಲೆಜಿಂತ್ ನಿಮಾಣ್ಯಾ ವ್ಹರ್ಸಾಂತ್ ಆಸ್ತಾನಾಂ, ವಾಸು ವಾಲೆನ್ಸಿಯಾ ಮ್ಹಳ್ಳ್ಯಾ ಕೊಂಕ್ಣಿ ಸಾಹಿತಿಚಿ “ಹಾಂವ್ ಜಿಯೆತಾಂ” ಕಾದಂಬರಿ ವಾಚುಂಕ್ ಮೆಳ್ಳಿ. ಅಸಲ್ಯಾ ಸಾಹಿತಾ ವರ್ವಿಂ, ಮ್ಹಜೆಂ ದೃಷ್ಟಿಕೋಣ್ ಬದ್ಲಾಲೆಂ. Equality ಮ್ಹಳ್ಯಾರ್ ಉಂಚ್ ರೂಕಾಚಿ ತಕ್ಲಿ ಕಾತ್ರುನ್ ಮಟ್ವೊ ಕರ್ಯೆತ್. ಅಶೆಂ ಕೆಲ್ಲ್ಯಾನ್ ಮಟ್ವೆಂ‍ಪಣ್ ಮ್ಹಣ್ಜೆ ದುಬ್ಳಿಕಾಯ್ ವಾಡವ್ಯೆತಾ ಶಿವಾಯ್ ಉಂಚಾಯ್ ಮ್ಹಣ್ಜೆ ಗಿರೆಸ್ತ್ಕಾಯ್ ನಹಿಂ. ಹೆಂ ವಾಜ್ಬಿ ಮ್ಹಣ್ ಮ್ಹಕಾ ಸಮ್ಜಾಲೆಂ.”
“ತುಂ ಆತಾಂ ಇಲ್ಲೊಸೊ ಗಿರೆಸ್ತ್ ಜಾಲಾಯ್ ದೆಕುನ್ ಕರೋಡ್‍ಪತಿಂಚಿ ವಕಾಲಾತ್ ಕರ್ತಾಯ್. ಏಕಾ ಕುಟ್ಮಾಕ್ ಜಿಯೆಂವ್ಕ್ ಏಕುಣ್‍ತೀಸ್ ಮಾಳಿಯೆಂಚ್ಯೆಂ 17,000 ಕರೋಡ್ ತಿತ್ಲೆಂ ಮೊಲಾಧಿಕ್ ರಾವ್ಳೆರ್ ಜಾಯ್-ಗೀ? ಏಕ್ ಚ್ಯಾಯೆಚ್ಯೆಂ ಕೋಪ್ ತೀನ್ ಲಾಖಾಂಚ್ಯೆಂ ಜಾಯ್ಗೀ? ಚ್ಯಾಯೆಚಿ ರೂಚ್ ಕೊಪಾಚ್ಯಾ ಮೊಲಾ ವಯ್ರ್ ಹೊಂದ್ವೊನ್ ಆಸಾಗೀ? ಅಸಲಿ ಅಶ್ಲೀಲ್ ಗಿರೆಸ್ತ್ಕಾಯ್ ಖಂಯ್ಚಿ ಫಿಲೊಸೊಫಿ ವಾಪ್ರುನ್ ತುಂ ಸಮರ್ಥನ್ ಕರ್ತಾಯ್ ತೆಂ ಮ್ಹಕಾ ಸಮ್ಜನಾಂ. ಆನಿಂ ಮ್ಹಕಾ ಸಮ್ಜೊಂಕೀ ನಾಕಾ.”
ಮದಾಮೆನ್ “ಫುಲ್ ಸ್ಟೊಪ್” ಘಾಲೊ. ತುಜ್ಯಾ ಕಢೆಂ ಉಲಯ್ಲ್ಯಾರ್, ಮ್ಹಕಾ ಜೆವಾಣ್ ಮೆಳ್ತಾಯೆ? ಹಾಂವ್ ಆಜ್ ದುಕ್ರಾ ಮಾಸ್ ರಾಂದ್ತಾಂ ಆನಿಂ ಬುಡವ್ನ್ ಖಾಂವ್ಕ್ ಪಾನ್ಪಳೆ ಕರ್ತಾಂ ಮ್ಹಣೊನ್ ಕುಜ್ನಾಕ್ ಗೆಲಿ.
► ಫಿಲಿಫ್ ಮುದಾರ್ಥ್
Effective article
Because of these OXfam reports government stopped the FCRA approval for Oxfam. If they stay their reports would heart the government. Similar thing happened with Green Peace group in India. I had a very bad experience at the Mumabi Airport recently. A ordinary coffee and a bottle of water costed me Rs 300/- and the lady at the counter was so audacious that she will not accept a credit/debit card but only cash or digital transfer. This is where our customer service had landed us. And now we have a Indain UN representative who has raised an issue “Hinduphobia” and for the first time we started hearing this. We were aware of ” Islamophobia”. Hope we don’t get Christianphobia or any new phobia.
ಭಾರತ್ ಬದಲ್ಲಾಂ, ಸಗ್ಳೆಂಚ್ ಖದ್ವಳ್ಳಾಂ! ಹಿಂದುತ್ವ ಮ್ಹಳ್ಳ್ಯಾ ಬೊಂದೆರಾಖಾಲ್ ಸಂಸಾರಾಂತ್‍ಚ್ಚ್ ನಾಸ್‍ಲ್ಲ್ಯಾ ಧರ್ಮಾಕ್ ಮಾನ್ ದೀವ್ನ್, ಹೆರಾಂಕ್ ಸರ್ವಾಂಕ್ ಅಕ್ಮಾನ್ ಕರ್ನ್, ತಾಂಚೆಂ ನಿಸ್ಸಂತಾನ್ ಆಶೇವ್ನ್ ಆಜ್ ಹೆ ಮೋದಿ ಭಕ್ತ್ ದೇಶಾಂತರ್ ಭುರ್ನಾಸ್ ಕಾಮಾಂ ಕರುನ್ಂಚ್ ಆಸಾತ್. ಮುಸ್ಲಿಮ್-ಕ್ರೀಸ್ತಾಂವ್ ವಿರೋಧಿ ಜಾವ್ನಾಸ್ಚೆ ಹೆ ಬುದ್ಧಿಹೀನ್ ಮಾನವ್, ಅಶಿಕ್ಪ್ಯಾಂಕ್ ಪಯ್ಶೆ ಖಾವವ್ನ್ ತಾಂಚ್ಯಾ ಪಾಡ್ತಿಂತ್ ಕಾಮ್ ಕರುನ್ ತಾಂಚೊ ಶೆವಟ್ ಜೊಡುಂಕ್ ಪ್ರಯತ್ನ್ ಕರೀತ್ ಆಸಾತ್.
ಏಕ್ ಶಿಕಾಪ್ ನಾಸ್ಚೊ ಪ್ರದಾನ್ ಮಂತ್ರಿ ಜಾಲ್ಯಾರ್ ಕಿತೆಂ ಬರೆಂಪಣ್ ಏಕಾ ಅಭಿವೃದ್ಧಿ ಪಥಾರ್ ರಾವ್‍ಲ್ಲ್ಯಾ ದೇಶಾಕ್? ಕಾಂಯ್ಚ್ ನಾ, ಕಿತ್ಯಾ ತೊ ಗಾದಿಯೆರ್ ಬಸ್‍ಲ್ಲ್ಯಾ ಹಂಕಾರಾನ್ ಹ್ಯಾ ದೇಶಾಚೆಂ ಸತ್ತ್ಯನಾಶ್ ಕರುಂಕ್ ಪಾವ್ಲಾ. ವಿದೇಶಾಂನಿ ಹಾಚೆಂ ಹಣೆಬರಾಪ್ ಪಳೆವ್ನ್ ಲೋಕ್ ಥುಕ್ತಾ, ಹೆರ್ ಭಾರತೀಯಾಂಕ್ ಹೀನ್ ಕರ್ತಾ.
ಜರ್ ಆಜ್ ಭಾರತ್ ಪ್ರಗತಿಪರ್ ದೇಶ್ ಜಾವ್ನ್ ಬದ್ಲುಂಕ್ ಜಾಯ್ ತರ್ ಪ್ರಥಮತ್ ಡೆಲ್ಲಿಂತ್ಲೊಸರ್ಕಾರ್ ಜರೂರ್ ಬದ್ಲುಂಕ್ ಜಾಯ್, ಲೋಕಾನ್ ಸಾಂಗಾತಾ ಮೆಳೊನ್ ಮೋಡಿ-ಅಮಿತ್-ಯೋಗಿ ಸರ್ಕಾರಾಂಕ್ ಘರಾ ಧಾಡುಂಕ್ ಜಾಯ್. ನ್ಹಂಯ್ ತರ್ ಎದೊಳ್ ವರೇಗ್ ಜಾಲ್ಲೆಂ ಭಾರತಾಂತ್ಲೆಂ ಬರೆಂಪಣ್ ನಿರ್ಣಾಮ್ ಜಾತೆಲೆ ತೆಂ ಖಂಡಿತ್. ಅಸೆಂ ಜಾಯ್ನಾ ಜಾಂವ್!
In the context of economics and Indian politics there is enough content in the article to think and digest. It is nice to see that author used example and reference from Konkani literature to support the subject.
Thank you for the effective article.
I love the conversation Philip.The satire is worth noting and reading.The reader need to open up the heart and mind to understand the politics and economics involved in the argument.After all you have widely read,travelled and exposed yourselves to shape your thought process.
Pray the enlightened lead the way for a better world to live for everybody.
Short, yet mighty powerful kind of realistic conversation. Author has put forth few interesting aspects such as rare philosophy of rich and poor and distinguishing lines. Glad to note worthy reading personality developing and food for thought kind of books and relevant authors. Surprised to note our own konkani writers in that cadre! All in all an action packed page!
Nice article 👍
ಹಾಂವ್ ಕೆನ್ನಾಂಯ್ ಸತಾಚಿ ಪಾಡ್ತ್ ಘೆತಾಂ ಮ್ಹಣೊನ್ ಮದಾಮೆನ್ ಮುದಾರ್ಥಾಚೆಂ ತೊಂಡ್ ಬಂಧ್ ಕೆಲ್ಲೆಂ ಆನಿ ಹಾಣೆ ‘ಪಂದಾ ಪಡ್ಲ್ಯಾರೀ’ ನಾಕ್ ವಯ್ರ್ ಮ್ಹಣಾನಾತ್ಲೆಂ ಬರೆಂ ರುಚ್ಲೆಂ. ಆನಿ ಮುಕಾರ್ ಮುದಾರ್ಥಾನ್ ತಿಚೆ ಥಾವ್ನ್ ಶಿಕ್ಚೆ ದೀಸ್ ಆಯ್ಲ್ಯಾರೀ ಆಯ್ಲೆ!
ಸಮಾಜ್ ವಾದ್ , ಲೋಹಿಯಾವಾದ್ ಬೋವ್ಶ್ಯಾ ಸತ್ತರಾವ್ಯಾ ದಶಕಾಂತ್ಲ್ಯಾ ಸಾಮಾನ್ಯ್ ವರ್ಗಾಚಾ ಕೊಲೆಜ್ ವಿದ್ಯಾರ್ಥಿಂಕ್ ಪ್ರಚೋದನ್ ಕೆಲ್ಲಿ ಫಿಲಾಸೊಫಿ. ಪೊಟಾ ಗ್ರಾಸಾ ಖಾತಿರ್ ಕೊಲೆಜ್ ಅರ್ಧ್ಯಾರ್ ಸೊಡ್ನ್ ಹಾಂವ್ ಖಂಯ್ ಖಂಯ್ ಪಾವೊನ್ ರಜೆರ್ ಪಾಟಿಂ ಯೆತಾನಾ ಮ್ಹಜೆ ಖಾಸ್ ಮಿತ್ರ್ ಸಗ್ಳೆ ರೈತ ಚಳುವಳಿ, ದಲಿತ ಚಳುವಳಿ, ವಿಚಾರ್ ವಾದ್ ಅಸಲ್ಯಾ ಕ್ರಾಂತ್ ಕಾರಿ ಚಳ್ವಳೆನಿಂ ಬುಡೊನ್ ಗೆಲ್ಲೆ. ಮ್ಹಾಕಾ ಖಬಾರ್ ಮೆಳ್ತಾಲಿ: ಮಿತ್ರಾನಿಂ, ಅಬ್ರಹಾಂ ಟಿ. ಕೊವೂರಾಕ್ ಹಾಸನ್ ಹಾಡವ್ನ್ ಮೂಢ್ ಪಾತ್ಯೆಣೆಂ ವಿಶಿಂ ಝಜ್ ಮಾಂಡ್ ಲ್ಲೆಂ, ರೈತ್ ಸಂಘಾಚಾ ಸರಳ್ ರೆಗ್ರ್ಯಾಂ ಫರ್ಮಾಣೆ ಕಾಜಾರಾಂ, ಅಂತರ್ ಜಾತ್ ಕಾಜಾರಾಂ… ಹೆಂ ಸರ್ವ್ ಘಡೊನ್ ಆಸ್ಲ್ಯಾ ವಗ್ತಾ ಫಕತ್ ಪೊಟಾ ಗ್ರಾಸಾ ಖಾತಿರ್ ಹಾಂವ್ ಝಜಾ ತಳಾಂತ್ ನಾಂ ನೇ ಮ್ಹಣೊನ್ ಹಾಂವ್ ಚರ್ಚುರ್ತಾಲೊಂ. ಸಮಾಜಿಕ್ ಬದ್ಲಾವಣ್ ಹಾಡುಂಕ್ ಸಕ್ಚ್ಯೊ ಹ್ಯೊ ಸರ್ವ್ ಚಳ್ವಳ್ಯೊ ಆಜ್ ಪಳೆತಾನಾ vested intrests ಜಾಲ್ಯಾತ್. ವಸೂಲಿ ಚಳ್ವಳ್ಯೊ ಜಾಲ್ಯಾತ್.
ಪವಿತ್ರ್ ಪುಸ್ತಕಾಚೆಂ ವ್ಯಾಖ್ಯಾನ್ ಕರ್ಚೆ ತಿತ್ಲಿ ಜಾಣ್ವಾಯ್ ಮ್ಹಾಕಾ ನಾ. ಪುಣ್ ಹೆಂ ಮ್ಹಾಕಾ ವಿರೋಧಾಭಾಸ್ ಮ್ಹಣ್ ಭಗ್ತಾ:
ಎಕ್ಲೊ ಗ್ರೇಸ್ತ್ ಆಪ್ಣೆ ಸಾಸ್ಣಿಕ್ ಜಿಣಿ ಜೊಡಿಜೆ ತರ್ ಹಾಂವೆ ಕಿತೆಂ ಕರ್ಯೆತ್ ಮ್ಹಣ್ತಾನಾ ಜೆಜು ತಾಕಾ ಕಿತೆಂ ಕರ್ಯೆತ್ ಮ್ಹಣ್ ಸಾಂಗ್ತಾ. ಹೆಂ ಸರ್ವ್ ಹಾಂವ್ ಕರುನ್ ಆಸಾಂ ಮ್ಹಣೊನ್ ತೊ ಸಾಂಗ್ತಾ. ತರ್, ತುಜಿ ಸರ್ವ್ ಆಸ್ತ್ ವಿಕುನ್ ದುಬ್ಳ್ಯಾಂಕ್ ವಾಂಟ್, ಹಾಚಾಕೀ ವ್ಹರ್ತೆಂ ಇನಾಮ್ ತುಕಾ ಸರ್ಗಿಂ ಮೆಳ್ತೆಲೆಂ ಮ್ಹಣೊನ್ ತಾಕಾ ಸಾಂಗ್ತಾ.
ದುಸ್ರ್ಯಾ ಎಕಾ ಸಂದರ್ಭಾರ್ ಎಕ್ಲಿ ಸ್ತ್ರೀ ಜೆಜುಕ್ ಬೋವ್ ಮೊಲಾಧಿಕ್ ತೆಲಾಂತ್ ಮಾಖಾಣ್ತಾ. ಜೆಜುಚಾ ಶಿಸಾಂಕ್ ಅಸಲೆಂ ಏಕ್ indulgence ಏಕ್ಜೆಜುಚಾ ಶಿಕವ್ನೆಚೆಂ ವಿರೋಧಾಭಾಸ್ ಕಶೆಂ ದಿಸ್ತಾ . ಇತ್ಲ್ಯಾ ಮೊಲಾಚಾ ತೆಲಾಂತ್ ಕಿತ್ಲೇಶೆ ದುಬ್ಳೆ ಉದ್ದಾರ್ ಜಾತೆ. ಜೆಜುನ್ ಅಶೆಂ ಕರುಂಕ್ ಅವ್ಕಾಸ್ ದೀಂವ್ಕ್ ನೊಜೊ ಅಸ್ಲೆಂ ಮ್ಹಣೊನ್ ತೆ ಪ್ರತಿಭಟನ್ ಯೀ ಕರ್ತಾತ್. ಜೆಜು ತಾಂಕಾ ಮ್ಹಣ್ತಾ:
” Why are you bothering this woman? She has done a beautiful thing to me. ‘The poor you will always have with you, but you will not have me.”
ಜೆಜುಚಾ ತ್ಯಾ emotional ಜಾಫಿಕ್ ಸರ್ವ್ ಶಿಸ್ ಥಂಡ್ ಜಾತಾತ್.