“ಆಪ್ಲ್ಯಾ ಜಿವಿತಾವ್ಧೆಂತ್ ಕೊಂಕ್ಣಿ ಭಾಶೆಕ್ ವಿಶೇಸ್ ಸೆವಾ ದೀವ್ನ್ ಪೋಸ್ ಕೆಲ್ಲ್ಯಾಂ ಪಯ್ಕಿ ಸ್ವರ್ಗೀಯ್ ಕೆ. ಕೆ. ಪೈ ಮಾಮ್ ಪ್ರಮುಕ್. ಕೊಂಕ್ಣಿ ಭಾಸ್ ಆನಿ ಸಮಾಜ ಬದ್ದಲ್ ತಾಂಚ್ಯಾ ಕಾಳ್ಜಾಂತ್ ಗೂಂಡ್ ಮೋಗ್ ಆಸ್ಲ್ಲೊ. ಕೊಂಕ್ಣಿ ಭಾಶೆಚ್ಯಾ ಉದರ್ಗತೆ ಖಾತಿರ್ ನಿರ್ಣಾಯಕ್ ವರ್ಸಾಂನಿ ತಾಂಚಿ ವಾಂವ್ಟ್ ವಾಖಣ್ಚೆ ತಸಲಿ. ತಾಂಚೆಥಂಯ್ ಕೊಂಕ್ಣಿ ಭಾಶೆ ಬದ್ದಲ್ ಆಸ್ಲ್ಲೊ ಮೋಗ್ ಆಮ್ಚ್ಯಾಯ್ ಕಾಳ್ಜಾಂನಿ ಜಾಗಂವ್ಚೆಂ ಪ್ರೇತನ್ ಕರುಂಕ್ ಜಾಯ್” ಮ್ಹಣಾಲೊ ಶಾಳಾಂನಿ ಕೊಂಕ್ಣಿ ಶಿಕ್ಪಾ ಉಪಕ್ರಮಾಚೊ ಮುಕೆಲಿ ಡೊ| ಕಸ್ತೂರಿ ಮೋಹನ್ ಪೈ.
ಡೊ| ಪೈ, ಸ್ವರ್ಗೀಯ್ ಕೆ.ಕೆ. ಪೈ ಹಾಂಚ್ಯಾ ಮರ್ಣಾಚ್ಯಾ 13 ವ್ಯಾ ವರ್ಸುಗೆ ದಿಸಾ, ವಿಶ್ವ ಕೊಂಕ್ಣಿ ಕೇಂದ್ರಾಚ್ಯಾ ಪ್ರವೇಶ್ ದ್ವಾರಾರ್ ಆಸ್ಚ್ಯಾ ತಾಂಚ್ಯಾ ಪ್ರತಿಮೆಕ್ ಫುಲಾಂ- ಝೆಲೊ ಅರ್ಪುನ್ ತೋ ಉಲಯ್ತಾಲೊ.
ವಿಶ್ವ ಕೊಂಕ್ಣಿ ಕೇಂದ್ರಾಚೊ ಖಜಾಂಚಿ ತಶೆಂ ಮಾಜಿ ಬ್ಯಾಂಕರ್ ಶ್ರಿ ಬಿ. ಆರ್. ಭಟ್ ಹಾಣಿ ಕೆ.ಕೆ. ಪೈ ಹಾಂಚೆ ಸಾಂಗಾತಾ ಖರ್ಚಿಲ್ಲ್ಯೊ ಘಡಿಯೊ ಉಡಾಸ್ ಕಾಡುನ್ ಮ್ಹಳೆಂ ” ಕೆ. ಕೆ. ಪೈ ಮಾಮ್ ಫಕತ್ ಕೊಂಕ್ಣಿ ಭಾಶೆಚೊ ಮಾತ್ ನಯ್, ಮನ್ಶ್ಯಾ ಮೋಗಿ ಜಾವ್ನಾಸ್ಲೊ. ಉಡುಪಿಂತ್ ಏಕ್ ಬಾಪುಯ್ ಅಪ್ಲ್ಯಾ ಕುಟ್ಮಾಕ್ ಸಾಂಡುನ್ ಗೆಲ್ಲೆ ತವಳ್ ತ್ಯಾ ಕುಟ್ಮಾಚ್ಯಾ ಆಟ್ ಜಣಾಂ ಭುರ್ಗ್ಯಾಂಕ್ ಶಿಕಪ್/ ತರ್ಭೆತಿ ಆನಿ ಸಿಂಡಿಕೇಟ್ ಬ್ಯಾಂಕಾಂತ್ ಕಾಮ್ ದೀವ್ನ್ ಜಿವಿತ್ ಬಾಂದುನ್ ದಿಲ್ಲೆಂ ಘಡಿತ್ ಮ್ಹಜ್ಯಾ ದೊಳ್ಯಾಂ ಮುಕಾರ್ ಯೆತಾ. ಅಸಲಿಂ ಜಾಯ್ತಿಂ ಮನ್ಶ್ಯಾಮುಖಿಂ ಕಾಮಾಂ ಕರುನ್ ತೋ ಆಮ್ಕಾಂ ಆದರ್ಶ್ ಜಾಲಾ”
ಸುರ್ವೆರ್ ವಿಶ್ವ ಕೊಂಕ್ಣಿ ಕೇಂದ್ರಾಚೊ ಅಧ್ಯಕ್ಷ್ ಸಿಎ ನಂದಗೋಪಾಲ ಶೆಣೈ ಹಾಣಿ ಪ್ರತಿಮೆಕ್ ಫುಲಾಂ-ಝೆಲೊ ಅರ್ಪುನ್ ಮಾನ್ ಕೆಲೊ. ಹ್ಯಾ ಸಂದರ್ಭಾರ್ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ವಿಜೇತ್ ಕವಿ ತಶೆಂ ವಿಶ್ವ ಕೊಂಕಣಿ ಕೇಂದ್ರಾಚೊ ಟ್ರಸ್ಟಿ ಶ್ರಿ ಮೆಲ್ವಿನ್ ರೊಡ್ರಿಗಸ್, ವಿಶ್ವ ಕೊಂಕ್ಣಿ ಕೇಂದ್ರಾಚೊ ಸಿಇಒ ಶ್ರಿ ಗುರುದತ್ತ ಬಂಟ್ವಾಳ್ಕರ್, ಶ್ರೀಮತಿ ಸಹನಾ ಕಿಣಿ ಆನಿ ಪತ್ರ್ಕರ್ತ್ ಎಚ್ಚೆಮ್, ಪೆರ್ನಾಲ್ ಹಾಜರ್ ಆಸ್ಲೆ.
