ವಿಶ್ವ ಕೊಂಕ್ಣಿ ಕೇಂದ್ರಾಂತ್ ಬಸ್ತಿ ವಾಮನ್ ಮಾಮಾಕ್ ಭಾವಪೂರ್ಣ ಶೃದ್ದಾಂಜಲಿ

“ಕೊಂಕಣಿ ಸಮಾಜ್ ಮುಕಾರ್ ಯೇವ್ಕಾ, ಕೊಂಕಣಿ ಚೆರ್ಡುವಾಂನಿ ಮುಕಾರ್ ಯೇವ್ಕಾ ಮ್ಹಳ್ಳೊ ಎಕೂಚ್ ಉದ್ದೇಶ್ ದವರೂನ್ ವಾಮನ್ ಮಾಮಾನ್ ಕೊಂಕಣಿ ಸಮಾಜ್ ಮುಕಾರ್ ಹಾಡುಂಕ್ ಮಸ್ತ್ ಕಾಮ್ ಕೆಲಾಂ. ಖಂಯ್ಚಾಯ್ ಪಾತ್ಯೆಣೆಚೆ, ಖಂಯ್ಚ್ಯಾಯ್ ಪ್ರದೇಶಾಚೆ ಜಾಂವ್ ಕೊಂಕ್ಣಿ ಮಾತೃಭಾಷೆಚೆ ಮ್ಹಳ್ಯಾರ್ ಆಮಿ ಏಕ್ ಕೊಂಕ್ಣಿ ಸಮಾಜ್ – ಹೊ ಜಾವ್ನಾಸ್ಲೊ ತಾಚೊ ದಿಶ್ಟಾವೊ. ಸಂಸಾರ್‌ಭರ್ ಆಸ್ಚ್ಯಾ ಕೊಂಕ್ಣಿ ಭಾಷಿಕಾಂಕ್ ಸಾಂಗಾತಾ ಹಾಡ್ನ್ ಏಕ್ ಸುದೃಡ್ ಕೊಂಕಣಿ ಸಮಾಜ್ ಬಾಂದ್ಚೆಂ ಜಾವ್ನಾಸ್ಲೆಂ ತಾಚೆಂ ಮಿಸಾಂವ್” ಮ್ಹಣಾಲೊ ಪದ್ಮಶ್ರೀ ಟಿ. ವಿ. ಮೋಹನದಾಸ ಪೈ, ವಿಶ್ವ ಕೊಂಕಣಿ ಕೇಂದ್ರಾಚೊ ಪೋಶಕ್/ ಮಾರ್ಗದರ್ಶಕ್. ತೋ ಜನೆರಾಚ್ಯಾ 2 ತಾರಿಕೆರ್ ಸ್ವರ್ಗೆಸ್ತ್ ಜಾಲ್ಲೊ ವಿಶ್ವ ಕೊಂಕ್ಣಿ ಕೇಂದ್ರಾಚೊ ಸ್ಥಾಪಕ್ ವಿಶ್ವ ಕೊಂಕ್ಣಿ ಸರ್ದಾರ್ ಬಸ್ತಿ ವಾಮನ್ ಶೆಣೈ ಹಾಂಕಾ ಶೃದ್ದಾಂಜಲಿ ಸಮರ್ಪುಂಚ್ಯಾ ಸಭೆಂತ್ ವಿಡಿಯೊ ಕೊನ್ಪರೆನ್ಸಾ ಮುಕಾಂತ್ರ್ ಉಲಯ್ತಾಲೊ.

“ಬಸ್ತಿ ವಾಮನ್ ಮಾಮಾಚ್ಯೊ ಅಲೊಚೆನ್ಯೊ ಆನಿ ಸಪ್ಣಾಂ ಪೂರ್ಣ್ ಕರ್ಚೆಂ ಕಾಮ್ ಆಮಿ ಕರುಂಕ್ ಜಾಯ್, ಪ್ರತ್ಯೇಕ್ ಜಾವ್ನ್ ಕೊಂಕ್ಣಿ ಸಮಾಜಾಂತ್ಲ್ಯಾ ತರ್ನ್ಯಾಂಕ್ ಮುಕಾರ್ ಹಾಡ್ಚೆಂ ಕಾಮ್ ಜಾಂವ್ಕ್ ಜಾಯ್. ತವಳ್ ಮಾತ್ ತಾಚ್ಯಾ ಆತ್ಮ್ಯಾಕ್ ತೃಪ್ತಿ ಜಾತಾ. ಬಸ್ತಿ ವಾಮನ್ ಮಾಮ್ ಖಂಯ್ ವಚೊಂಕ್ ನಾ. ತೋ ಹಾಂಗಾಚ್ ವಿಶ್ವ ಕೊಂಕ್ಣಿ ಕೇಂದ್ರಾಂತ್ ಆಸಾ. ಆಮಿ ಕಿತೆಂ ಕರ್ತಾಂ ತೇಂ ದೆವಾಚ್ಯಾ ಘರಾ ಬಸುನ್ ಸಗ್ಳೆಂ ಪಳಯ್ತಾ. ಆಮಿ ಬರೆಂ ಕಾಮ್ ಕರ್ತಾನಾ ಆಮ್ಕಾಂ ತೋ ಉಜ್ವಾಡ್ ದಿತಾ. ಆಮಿ ಚುಕಿಚೆಂ ಕಾಮ್ ಕೆಲ್ಯಾರ್ ತಾಕಾ ಖಂಡಿತ್ ಬೆಜಾರ್ ಜಾತಾ. ಬಸ್ತಿ ವಾಮನ್ ಮಾಮ್ ಕೊಂಕಣಿ ಸಮಾಜಾಂತ್ ಹಾಂವೆ ಪಳಯಿಲ್ಲೊ ಬೋವ್ ಉಂಚ್ಲೊ ಮುಕೆಲಿ. ತಾಚೆಂ ಆದರ್ಶ್ ಘೆವ್ನ್ ಆಮಿ ಮುಕಾರ್ ಚಲೊಂಕ್ ಆಸಾ. ಹ್ಯಾ ಮಿಸಾಂವಾಂತ್ ಮ್ಹಜೊ ಸಂಪೂರ್ಣ್ ಸಹಕಾರ್ ಹಾಂವ್ ಭಾಸಾಯ್ತಾಂ” ಮ್ಹಣ್ ಟಿ.ವಿ. ಮೋಹನದಾಸ್ ಪೈ ಹಾಣಿ ಆಪ್ಲಿಂ ಭೊಗ್ಣಾಂ ಉಚಾರ್ಲಿಂ.

ಸಾಂಜೆಚ್ಯಾ 4 ವ್ಹರಾಂಚೆರ್ ಸುರ್ವಾತ್ಲೆಲ್ಯಾ ಶೃದ್ದಾಂಜಲಿ ಸಭೆಂತ್, ಹಾಜರ್ ಆಸ್ಲೆಲ್ಯಾ ಸರ್ವಾಂನಿ ವಿಶ್ವ ಕೊಂಕ್ಣಿ ಕೇಂದ್ರಾಚ್ಯಾ ಮುಕೆಲ್ ದಾರ್ವಾಟ್ಯಾರ್ ದವರ್ಲೆಲ್ಯಾ ಬಸ್ತಿ ವಾಮನ್ ಶೆಣೈ ಹಾಂಚ್ಯಾ ಜಯ್ತ್ ತಸ್ವಿರೆಕ್ ಫುಲಾಂ ಪಾಕ್ಳ್ಯೊ ಅರ್ಪುಂಚೆಂ ಸವೆಂ ನಮಾನ್ ಪಾಟಂವ್ಚೆಂ ಸವೆಂ ಕಾರ್ಯಕ್ರಮ್ ಆರಂಬ್ ಜಾಲೆಂ. ಉಪ್ರಾಂತ್ ಸಭಾಂಗ್ಣಾಂತ್ ಉತ್ರಾಂ – ನಮಾನ್ ಕಾರ್ಯೆಂ ಮುಕಾರುನ್ ಗೆಲೆಂ.

ವಿಶ್ವ ಕೊಂಕ್ಣಿ ಕೆಂದ್ರಾಚೊ ಅಧ್ಯಕ್ಷ್ ಸಿಎ ನಂದಗೋಪಾಲ್ ಶೆಣೈ ಮ್ಹಣಾಲೊ “ದಿವಾಳಿ ಪರ್ಬೆಚ್ಯಾ ದಿಸಾಂನಿ ಜಲ್ಮಾಕ್ ಆಯಿಲ್ಲೊ ವಾಮನ್ ಮಾಮ್ ಆಪ್ಲ್ಯಾ ನಾಂವಾತೆಕಿದ್ ತ್ರಿವಿಕ್ರಮ ಜಾವ್ನ್ ಜಿಯೆಲೊ. ಕೊಂಕಣಿ ಸಮಾಜ್ ಸುಂದರ್ ಜಾವ್ಕಾ, ಸುದೃಡ್ ಜಾವ್ಕಾ ಮ್ಹಳ್ಳೆಂ ತಾಚೆಂ ಮಿಸಾಂವ್ ವಿಶ್ವ ಕೊಂಕ್ಣಿ ಕೇಂದ್ರಾ ಮುಕಾಂತ್ರ್ ಜ್ಯಾರಿ ಕರ್ಚೆಂ ವಚನ್ ಹಾಂವ್ ಹ್ಯಾ ವೆಳಾರ್ ದಿತಾಂ”

ಬಸ್ತಿ ವಾಮನ್ ಮಾಮಾಚ್ಯಾ ಉಡಾಸಾಕ್ ಸಗ್ಳ್ಯಾಂನಿ ಉಭೆ ರಾವೊನ್ ಎಕಾ ಮಿನುಟಾಚೆಂ ಮಾವ್ನ್ ಸಾಂಬಾಳ್ಳೆಂ.

ಬಸ್ತಿ ವಾಮನ್ ಶೆಣೈ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಅಧ್ಯಕ್ಷ್ ಜಾವ್ನಾಸ್ತಾನಾ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿಚೊ ಅಧ್ಯಕ್ಷ್ ಜಾವ್ನಾಸ್ಲೊಲೊ ವಿದ್ವಾಂಸ್ ಪ್ರೊ| ಬಿ.ಎ. ವಿವೇಕ ರೈ ಹಾಣಿ ಬಸ್ತಿ ವಾಮನ್ ಶೆಣೈ ಸಾಂಗಾತಾ ಖರ್ಚಿಲ್ಲೆ ಘಡ್ಯೊ ಉಡಾಸ್ ಕಾಡುನ್, “ವಾಮನ್ ಅವ್ತರಾಂತ್ ತೀನ್ ಮೆಟಾಂನಿ ಸಂಸಾರ್ ಏಕ್ ಕೆಲ್ಲ್ಯಾ ದೆವಾಪರಿಂ, ವಾಮನ್ ಮಾಮಾನ್ ತೀನ್ ಎಕ್ರೆ ಜಾಗ್ಯಾಂತ್ ಕೊಂಕ್ಣಿ ಸಂಸಾರ್ ಏಕ್ ಕೆಲೊ. ಚಾಳಿಸಾಂ ವಯ್ರ್ ಕೊಂಕ್ಣಿ ಸಮುದಾಯಾಂಕ್ ತಾಣೆ ಹಾಂಗಾಸಾರ್ ಎಕ್ಟಾಂವ್ಚೆಂ ಪ್ರೇತನ್ ಕೆಲಾಂ. ತೋ ಫಕತ್ ಸಾದೊ ಸಾಂತ್ ನ್ಹಯ್, ಏಕ್ ಸಾಧಕ್ ಸಾಂತ್” ಮ್ಹಣ್ ಅಭಿಪ್ರಾಯ್ ಉಚಾರ್ಲಿ.

ವಿಶ್ವ ಕೊಂಕಣಿ ಕ್ಷಮತಾ ಅಕಾದೆಮಿಚೊ ಮಾರ್ಗದರ್ಶಕ್ ಜ್ಯೀತಿ ಲ್ಯಾಬೊರೇಟರಿಸ್ ಸಿಇಒ ಉಲ್ಲಾಸ್ ಕಾಮತ್ ಹಾಣಿ “ಬಸ್ತಿ ಮಾಮಾ ವರ್ವಿಂಚ್ ಮ್ಹಾಕಾ ಕೊಂಕ್ಣೆಚಿ ಲಾಗ್ಶಿಲ್ಯಾನ್ ಒಳಕ್ ಜಾಲಿ. ಟಿ.ವಿ.ಮೋಹನದಾಸ ಪೈ ಹಾಣಿ ಸಾಂಗ್‌ಲ್ಲೆಪರಿಂ ಬಸ್ತಿ ಮಾಮಾಚೆಂ ಮಿಸಾಂವ್ ವಿಶ್ವ ಕೊಂಕಣಿ ಕೇಂದ್ರಾ ಮಾರಿಫಾತ್ ಮುಕಾರ್ ವರ್ಚ್ಯಾಕ್ ಹಾಂವ್ ಬದ್ ಆಸಾಂ” ಮ್ಹಣ್ ಉತರ್ ದಿಲೆಂ.

ಹ್ಯಾ ಸಂದರ್ಭಾರ್ ಬಸ್ತಿ ಮಾಮಾಕ್ ಮಾವ್ಳೊ ಲೆಕುನ್ ಸದಾಂಚ್ ತಾಕಾ ಸಾಂಗಾತ್ ದಿಲ್ಲೊ ಚಾಲಕ್ ಅಬ್ದುಲ್ ರೆಹಮಾನ್ ಹಾಂಕಾ ವಿಶ್ವ ಕೊಂಕ್ಣಿ ಕೇಂದ್ರಾಚೊ ಅಧ್ಯಕ್ಷ್ ಸಿಎ ನಂದಗೋಪಾಲ ಶೆಣೈ ಹಾಣಿ ಶೊಲ್ ಘಾಲುನ್ ಸನ್ಮಾನ್ ಕೆಲೊ.

ಯಕ್ಷಗಾನ್ ವಿದ್ವಾಂಸ್ ಡೊ| ಎಂ. ಪ್ರಭಾಕರ್ ಜೋಶಿ, ಕ.ಸಾ.ಪ ಮುಕೆಲಿ ಪ್ರದೀಪ್ ಕುಮಾರ್ ಕಲ್ಕೂರ, ಕರ್ನಾಟಕ್ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಅಧ್ಯಕ್ಶ್ ಡೊ| ಜಗದೀಶ ಪೈ, ವಿಶ್ವ ಕೊಂಕಣಿ ಕೇಂದ್ರಾಚೊ ಉಪಾಧ್ಯಕ್ಷ್ ಗಿಲ್ಬರ್ಟ್ ಡಿ’ಸೊಜಾ, ಸಂಶೋಧಕ್ ಡೊ| ವೈ ರವೀಂದ್ರನಾಥ ರಾವ್, ಎಚ್. ಆರ್. ಆಳ್ವ, ಮುರಲಿ ಕಡೆಕಾರ್, ಬಸ್ತಿ ವಾಮನ್ ಶೆಣೈ ಸೇವಾ ಪುರಸ್ಕಾರ್ ಸಮಿತಿಚೊ ಮುಕೆಲಿ ಸಿ.ಡಿ. ಕಾಮತ್, ವಿಶ್ವ ಕೊಂಕಣಿ ವಿದ್ಯಾರ್ಥಿ ವೇತನ ನಿಧಿಚೊ ಮುಕೆಲಿ ಪ್ರದೀಪ್ ಪೈ, ಭಾರತಿ ಶೇವಗೂರ್, ಮಂಗ್ಳುರ್ ವಿಶ್ವವಿದ್ಯಾಲಯಾಚ್ಯಾ ಕೊಂಕಣಿ ಅಧ್ಯಯನ ಪೀಠಾಚೊ  ಡೊ| ಜಯವಂತ ನಾಯಕ್, ವಿಶ್ವ ಕೊಂಕಣಿ ಸ್ತ್ರೀ ಶಕ್ತಿ ಮಿಶನಾಚಿ ಗೀತಾ ಕಿಣಿ  ಆನಿ ಹೆರಾಂನಿ ಉತ್ರಾಂ ನಮಾನ್ ಪಾಟಯ್ಲೊ ತರ್, ಕವಿ ಮೆಲ್ವಿನ್ ರೊಡ್ರಿಗಸ್, ಸ್ಮಿತಾ ಶೆಣೈ ಆನಿ ಜ್ಯೂಲಿಯೆಟ್ ಮೊರಾಸ್ ಹಾಣಿ ಕವಿತೆ ರುಪಾರ್ ನಮಾನ್ ಪಾಟಯ್ಲೊ.

ಶ್ರೀಮತಿ ಶಕುಂತಲಾ ಆರ್. ಕಿಣಿ ಹಾಣಿ ಕಾರ್ಯೆಂ ಚಲವ್ನ್ ವೆಲೆಂ.  ಡೊ| ವೈಷ್ಣವಿ ಕಿಣಿ ಹಿಣೆ ಶಕುಂತಲಾ ಆರ್ ಕಿಣಿ ಹಿಣೆ ಬರವ್ನ್, ವಾಸಂತಿ ಆರ್ ನಾಯಕ್ ಹಿಣೆ ಸಂಗೀತ್ ದಿಲ್ಲೆಂ ಕೊಂಕ್ಣಿ ಆಶಯ್ ಗೀತ್ ಗಾಯ್ಲೆಂ.

ಕೊಂಕ್ಣಿ ಸಂಘ್ ಸಂಸ್ಥ್ಯಾಚೆಂ ಹುದ್ದೆದಾರ್, ವೆವೆಗ್ಳ್ಯಾ ಸಮುದಾಯಾಚೆಂ ಮುಕೆಲಿ, ಸಾಹಿತಿ, ಕಲಾಕಾರ್ ಆನಿ ಬಸ್ತಿ ಮಾಮಾಚೆ ಅಭಿಮಾನಿ – ಅಶೆಂ ಜಾಯ್ತೆ  ಶೃದ್ದಾಂಜಲಿ ಕಾರ್ಯಾಕ್ ಹಾಜರ್ ಆಸ್ಲೆ.

ತಸ್ವಿರ‍್ಯೊ : ಅನ್ನು, ಮಂಗ್ಳುರ್