ಸಕಾಳಿಂ ಉಟೊನ್ ಹಾಂವೆಂ ಮ್ಹಳೆಂ “ಪೋಯ್ರ್ ದಸೆಂಬ್ರ್ ಬಾವೀಸ್ ತಾರಿಕೆರ್ ‘ಮೆಥಮ್ಯಾಟಿಕ್ಸ್ ಡೇ’ ಆಸ್ಲೊ ಖಂಯ್ ಸಾಯ್ಬಿಣಿ” ಮ್ಹಣ್ತಾನಾ ತೆಂ ಇಲ್ಲೆಂ ಹಾಸ್ಲೆಂ. ಮ್ಹಾಕಾ ಪಳೆವ್ನ್ ತೆಂ ಮ್ಹಣಾಲೆಂ “ತುಕಾ ಲೆಕ್ಕ ಭೋವ್ ಚಡ್ ಸುಲಭ್ ಆನಿ ಸಲೀಸ್ ನೇ .. ಪುಣ್ ಮಾಕಾ ಲೆಕ್ಕ ಕಳಾನಾಬಾ..”
“ವ್ಹಯ್.. ಮಾಕಾ ಖುಶಿ ಜಾತಾ. ತುಕಾಯೀ ಖುಶಿ ಜಾಯ್ಜೆ ಮ್ಹಜ್ಯಾ ಕಾಳ್ಜಾ ಕುಡ್ಕ್ಯಾ…”
“ನಾ.. ಹಾಂವ್ ಮೆಥಮ್ಯಾಟಿಕ್ಸಾಂತ್ ಜೀರೊ… ತುಂ ಹೀರೊ”
“ಅಳೇಬಾ.. ಜೀರೊ ಆಮಿಂಚ್ ಭಾರತೀಯಾಂನಿ ಸೊಧುನ್ ಕಾಡ್’ಲ್ಲೆಂ. ದೆಕುನ್ ಆಮಿ ಹೀರೊ..”
“ತುಕಾ ಚಡ್ ಪಸಂದ್ ಜಾಲ್ಲೆಂ ಮ್ಯಾಥಮೆಟಿಕ್ಸ್ ಖಂಚೆಂ ಬಾ?” ತೆಂ ವಿಚಾರಿ
“ಮ್ಹಜೆಂ ಫೇವರಿಟ್ ಎಕ್’ಚ್ಚ್… ವನ್ ಪ್ಲಸ್ ವನ್ ಈಜ್ ಇಕ್ವಲ್ ಟು ಇಲೆವೆನ್…” ಹಾಂವ್ ಕಿಡ್ಕಿಡೊನ್ ಹಾಸ್ಲೊಂ. ಹೆಂ ಆಯ್ಕೊನ್ ಕಾಳ್ಜಾ ಕುಡ್ಕೊ ಮ್ಹಜಿ ಪಾಟ್ ಧರುನ್ ಧಾಂವೊನ್ ಆಯ್ಲೆಂಚ್. “ತುಕಾ ಎಕ್’ಚ್ಚ್ ಪಿಶೆಂ.. ಕ್ರಿಕೆಟ್ ಟೀಮ್ ಭಾಂದ್ಚೆಂ” ತಾಕಾ ಆತಾಂ ಮ್ಯಾಥಮೇಟಿಕ್ಸ್ ಘಡ್ಯೆನ್ ಆರ್ಥ್ ಜಾಲ್ಲೆಂ.
“ತುಜೆಂ ಎಕ್’ಚ್ಚ್ ಪೆಂಪಾರೆಂ ಸದಾಂಯ್” ತಾಣೆಂ ಗಾಲ್ ವೊಲೆ ಕೆಲೆ.
“ಅಳೇಬಾ ತೆಂ ಸೊಡ್… ನವ್ಯಾ ವರ್ಸಾಚೆಂ ನವೆಂ ನವೆಂ.. ಕಿತೆಂಯ್ ಹಾಚೆ ಆದಿಂ ಕೆಲಾಂ.. ಆನಿ ಕಾಂಯ್ ಥೊಡೆಂ ನವೆಂ ನವೆಂ ಆಸಾ ತರ್ ಸಾಂಗ್ ಮ್ಹಜ್ಯಾ ಕಾಳ್ಜಾ..”
“ಆದಿಂ ಪೂರಾ ಮಧ್ಯಾನೆ ರಾತಿಂ ಮೀಸ್, ಆಬಾಕ್ ಹುಲ್ಪಾಂವ್ಚೆಂ ಆಸ್ಲೆಂ. ಆತಾಂ ದಿಸಾಕ್’ಚ್ಚ್ ಮನ್ಶ್ಯಾಕ್ ಜಿವೆಂಚ್ ಹುಲ್ಪಾಯ್ತಾತ್… ರಾತ್ ಭರ್ ಡ್ಯಾನ್ಸ್ ಪಾರ್ಟಿ ಆಸ್ತಾಲಿ. ಬಾರಾಂ ಭರ್ತಾಲಿಂ. ಆತಾಂ ಧಾ ವರಾರ್ ಪೂರಾ ಬಂಧ್. ನವೆಂ ವರಸ್ ತರ್ನ್ಯಾಂಕ್ ಖರಸ್ ಹಾಡ್ತಾ”
“ಆಮಿಂ ಪಯ್ಲೆಂ ನವೆಂ ವರಸ್ ಬೀಚಾಂತ್ ಆಚರಣ್ ಕೆಲ್ಲೆಂ ಕಿತ್ಲೆಂ ಸೂಪರ್ ನೆ ಮಾ…?”
“ತೆನ್ನಾಂ ಬೀಚಾರ್ ಲೊಳ್’ಲ್ಲೆಂ… ಆತಾಂ ಭಿಚಾಣ್ಯಾರ್’ಯೀ ನಾ…ವ್ಹಯ್ಗಾ ಮ್ಹಣ್ತಾನಾ…” ಹಾಂವ್ ಕೆಂಕಾರ್ಲೊಂ..
“ಪಯ್ಲೆಂ ಪೂರಾ ಬರೆಂ ಆಸ್ಲೆಂ ಬಾ… ಆತಾಂ ತೆಂ ಪೂರಾ ನಾ ಮ್ಹಜ್ಯಾ ಕಾಳ್ಜಾ ಕುಡ್ಕ್ಯಾ… ನವ್ಯಾ ವರ್ಸಾಚೆಂ ನಿಚೆವ್ ಆಸಾತ್ ಆನಿ ತೆ ಪೂರಾ ಸರ್ಕಾರಾಚ್ಯಾ ಹಾತಾಂತ್ ಆತಾಂ ಆಸಾತ್ ಬಾ!”
“ತೆಂ ಕಶೆಂ? ಮಾಕಾ ತುಜೆಂ ಕಾಂಯ್ ಸಮ್ಜಾನಾ..”
“ಅಳೇಮಾ.. ಸರ್ಕಾರಾ ವಿರೋಧ್ ಆಮಿಂ ಭಾರತ್ ಬಂಧ್ ಯಾ ದೇಶ್ ವ್ಯಾಪಿ ಚಳ್ವಳ್ ಕೆಲ್ಯಾರ್ ಸರ್ಕಾರಾಕ್ ಎಕಾ ದಿಸಾಕ್ ಕಿತ್ಲೊ ನಷ್ಟ್ ಜಾತಾ ತುಂ ಜಾಣಾಂಯ್?”
“ವ್ಹಯ್ ಬಾ… ಹಾತಾಚೊ ಸರ್ಕಾರ್ ಆಸ್ತಾನಾ ಏಕ್ ದೀಸ್ ದೇಶ್ ವ್ಯಾಪಿ ಬಂಧ್ ಕೆಲ್ಯಾರ್ ಸರ್ಕಾರಾಕ್ ದೋನ್ ಹಜಾರ್ ಕೊರೊಡ್ ರುಪಯ್ ನಷ್ಟ್ ಜಾತಾಲೊ ಖಂಯ್.. ಮೌನ ಮೋಹನ ಸಾಂಗ್ತಾಲೊ
“ಆತಾಂ ಸರ್ಕಾರಾನ್ ಜರ್ ದೇಶ್ ವ್ಯಾಪಿ ತಾಣಿಂಚ್ ಬಂಧ್ ಕೆಲ್ಯಾರೀ ಕಾಂಯ್ ನಷ್ಟ್ ನಾ ಖಂಯ್.. ಲಾಭ್’ಚ್ಚ್ ಲಾಭ್ ಖಂಯ್…”
“ತೆಂ ಕಶೆಂ?”
“ದೆಕುನ್ ನೆಂ ಆತಾಂ ಕೊರೊನಾಚ್ಯಾ ನಾಂವಾರ್ ವರ್ಸ್ ಭರ್ ಪೂರಾ ಬಂಧ್ ಖಂಯ್, ನಾಯ್ಟ್ ಕರ್ಫ್ಯೂ ಖಂಯ್, ದೇವ್ ಆನಿ ದೆವಾಳ್ ಬಂದ್ ಕರುಂಕ್ ಜಾಯ್ ಖಂಯ್, ಬಾರ್ ಆನಿ ವೈನ್ಸ್ ಜಿವಾಳ್ ದವ್ರುಂಕ್ ಜಾಯ್… ಕಾಂಯ್ ನಷ್ಟ್ ನಾ ಖಂಯ್…”
“ಶ್ಶೇ… ಹ್ಯಾ ನವ್ಯಾ ವರ್ಸಾ ಮಧ್ಯಾನೆರ್ ಮೀಸ್ ಕೆಲ್ಯಾರ್ ಕಿತೆಂ ನಷ್ಟ್ ಖಂಯ್? ತರ್ ಸಾಂಗ್ ಮಾಕಾ ಕಿತ್ಲ್ಯಾ ವೆಳಾ ಮ್ಹಣಾಸರ್ ಉಗ್ತೆಂ ದವರಿಯೆತ್ ಖಂಯ್?”
“ಹಾಂ.. ಧಾ ವ್ಹರಾಂ ಮ್ಹಣಾಸರ್ ಬಾರ್ ಆನಿ ವೈನ್ಸ್ ಉಗ್ತೆಂ ದವರಿಯೆತ್…”
“ತುಜಿಂ ಕರ್ಮಾಂ… ಹಾಂವೆಂ ಇಗರ್ಜೆ ವಿಶಿಂ ವಿಚಾರ್ಲೆಂ. ತರ್ ತುಂ ನವ್ಯಾ ವರ್ಸಾ ಸೊರೊ ಸೊಡ್ಚೊ ನಿಚೆವ್ ಕರಿನಾಂಯ್”
“ಸರ್ಕಾರ್ ಕಶೆಂ ಸಾಂಗ್ತಾ ತಶೆಂ ಮ್ಹಜೆ ನಿಚೆವ್… “
“ತರ್ ಇಸ್ಕೊಲಾಂತ್, ಭುರ್ಗ್ಯಾಂಕ್ ಪರೀಕ್ಷಾ, ಆನಿ ಟೀಚರಾಂಕ್ ನವ್ಯಾ ವರ್ಸಾಕ್ ಕಾಂಯ್ ನವೆಂಸಾಂವ್ ಆಸಾಗೀ?”
“ಹಾಂ ಆಸಾ.. ಟೀಚರಾಂಕ್ ಇಸ್ಕೊಲ್ ಆಸಾ.. ಸಾಂಬಾಳ್ ನಾ. ಭುರ್ಗ್ಯಾಂಕ್ ಪರೀಕ್ಷಾ ನಾ, ರಿಜಲ್ಟ್ ಆಸಾ…”
“ನವ್ಯಾ ವರ್ಸಾ ಕೊರೊನಾ, ಒಮ್ರಿಕಾನ್, ಕಶೆಂ ರಾವಾತ್ ಬಾ?”
“ರಾಜಕೀಯ್ ವೋಟ್, ಮೇಳ ಆನಿ ಜಾತ್ರೆ ಆಸ್ತಾನಾ ಕೊರೊನಾ ಭಿಂಯಾನ್ ಪಯ್ಸ್ ಧಾಂವ್ತಾ ಖಂಡಿತ್… ನತಾಲ್, ಈದ್ ಯೆತಾನಾ ಫಾಸ್ಟ್ ಪಾಟಿಂ ಧಾಂವೊನ್ ಯೆತಾ..”
“ತೆಂ ಕಶೆಂ?”
“ಕೊರೊನಾ “ನಾನ್ ವೆಜ್’ ನೆಂ.. ಜೀವ್ ಆಸ್ಲ್ಯಾಂಕ್ ಮಾತ್ರ್ ಖಾತಾ… ಗೊತ್ತುನಾಂಯೇ ತುಕಾ?”
“ತರ್ ಹ್ಯಾ ಪಾವ್ಟಿಂ ನವ್ಯಾ ವರ್ಸಾಕ್ ನವೊ ನಿಚೆವ್ ಕಿತೆಂ ಕರ್ಚೊ ಮ್ಹಜ್ಯಾ ಕಾಳ್ಜಾ?”
“ಆಜ್ ಥಾವ್ನ್ ಆಮಿಂ ದಿಸಾಕ್ ಏಕ್ ಪಾವ್ಟಿಂ ನಿಚೆವ್ ಕಾಣ್ಘೆಜೆ… ಆಸ್ತಾನಾ ಧಾದೊಶಿ ನಾ ಜಾಲ್ಲ್ಯಾ ದಿಸಾ ಉಪಾಶಿಂ ರಾವಾಜೆ. ರಾತಿಂ ಕರ್ಫ್ಯೂ ಆಸ್ತಾನಾ ದಿಸಾಕ್ ಗಮ್ಮತ್ ಕರಿಜೆ… ರಾತಿಂ ವೊಮ್ತೆಂ ನಿದಾಜೆ… “
“ತಶೆಂ ಜಾಯ್ನಾ ಕಾಳ್ಜಾ…”
“ಕಿತ್ಯಾಕ್ ಜಾಯ್ನಾ.. ಮಧ್ಯಾನೆ ರಾತಿಂ ತುಕಾ ವಚೊನ್ ಕೊತ್ತಂಬ್ರಿ ಪಾಲೊ ಹಾಡುಂಕ್ ಆಸಾಯೇ?”
“ಕಾಳ್ಜಾ…” ಕುಡ್ಕೊ ಪಾದ್ದೆವ್ನ್ ಮ್ಹಣಾಲೆಂ “ಕೊನ್ಪಿರಿ ಸೊಪ್’ಯೀ ನಾ, ಪೊಲಿಸಾಂನಿ ಸೂಪ್ ಕರ್ಚೊಯೀ ನಾಕಾ.. “
“ತರ್ ಕಿತೆಂ ಕರ್ಯಾಂ?”
“ಹ್ಯಾ ಪಾವ್ಟಿಂ ಆಮಿಂ ದೊಗಾಂಯ್ ವೊಟಾಕ್ ರಾವ್ಯಾಂ” ತಿಣೆಂ ಮ್ಹಣ್ತಾನಾ ಮ್ಹಜೆಂ ಕಾಳಿಜ್ ಭರೊನ್ ಆಯ್ಲೆಂ. ಹಾಂವೆಂ ಮ್ಹಳೆಂ. “ಬರಿ ಖಬಾರ್ ಆಸಾ. ಸಾರೊಣೆಚೊ ಘುರ್ತ್ ಆಸ್ಚ್ಯಾ ಪಾಡ್ತಿಂತ್ ವೋಟಾಕ್ ರಾವಜೆ. ಸಕ್ಕಡ್ ಪಾಡ್ತಿಚ್ಯಾಂಕ್ ಹ್ಯಾ ಪಾವ್ಟಿಂ ಝಾಡುಂಕ್ ಸಲೀಸ್ ಖಂಯ್. ಜಾಣಾಂಯೇ ತುಂ? ಪಂಜಾಬಾಂತ್ ಸಾರೊಣ್ ಆತಾಂ ಝಾಡ್ನ್ಂಚ್ ಆಸಾ..”
“ತಶೆಂ ಝಾಡು ಮಾರ್ಚೊ ಆಸ್ಲ್ಯಾರ್ ತಾಕಾ ಆಮ್ಗೆರ್ ಆಪವ್ನ್ ಹಾಡ್ನ್ ಯೇ ಬಾ… ಮಾಕಾ ಆತಾಂ ಪೆಂಕ್ಟಾ ದುಕಿನ್ ಸಮಾ ಬಾಗ್ವೊಂಕೀ ಜಾಯ್ನಾ… ಸಾರ್ಕೆಂ ಝಾಡುಂಕೀ ಜಾಯ್ನಾ..” ಮ್ಹಣ್ತಾನಾ ವೊಣ್ತಿ ವಯ್ಲೆಂ ವೋಚ್ ಢಣ ಡಣ ಡಣ ಮ್ಹಣ್ ಬಾರಾ ಪಾವ್ಟಿಂ ವಾಜ್ಲೆಂ.
► ಪಂಚು ಬಂಟ್ವಾಳ್.
