ಬ್ರೇಸ್ತಾರಾ, 23 ದಸೆಂಬರ್ 2021 ವೆರ್ ಮಂಗ್ಳುರ್ಚೊ ಧರ್ಮಾಧ್ಯಕ್ಶ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾನ್ ಮಾದ್ಯಮಾಚ್ಯಾ ಪ್ರತಿನಿಧಿ ಮುಕಾಂತ್ರ್ ಧರ್ಮ್ಪ್ರಾಂತ್ಯಾಚಾ ಭಾವಾಡ್ತ್ಯಾಂಕ್ ಆನಿ ಸರ್ವಜಣಿಕಾಂಕ್ ನತಾಲಾಂಚೆ ಶುಭಾಶಯ್ ಪಾಟಯ್ಲೆ. ಶುಭಾಶಯ್ ಪಾಟಯ್ತಾನಾ ಧರ್ಮಾಧ್ಯಕ್ಷಾನ್ ಪ್ರಸ್ತುತ್ ಸಮಾಜಿಕ್ ಪರಿಗತೆಂತ್ ಬೆಪಾರ್ವೊ( Indifference ) ದ್ವೇಶಾ ಪ್ರಾಸ್ ಸಮಾಜೆಕ್ ಮಾರೆಕಾರ್ ಮ್ಹಣ್ ಖಂತ್ ಉಚಾರ್ಲಿ. ಧರ್ಮಾಧ್ಯಕ್ಷಾನ್ ದಿಲ್ಲೊ ದಾಕ್ಲೊ ದೀವ್ನ್ ಸಾಂಗ್ಚೆಂ ತರ್ ” ಮೋಗ್ ಕರ್ತೆಲ್ಯಾಂಕ್ ಕಾಳ್ಜಾಂತ್ ಜಾಗೊ ಆಸ್ತಾ, ದ್ವೇಶ್ ಕರ್ತೆಲ್ಯಾಂಕ್ ಮನಾಂತ್ ಜಾಗೊ ಆಸ್ತಾ. ಪೂಣ್ ಬೆಪಾರ್ವೊ ಕರ್ತೆಲ್ಯಾಂಕ್ ಜಾಂವ್ ಕಾಳ್ಜಾಂತ್, ಜಾಂವ್ ಮನಾಂತ್ ಜಾಗೊಚ್ ಆಸಾನಾ. ಬೆಪರ್ವ್ಯಾಕ್ ಬಲಿ ಜಾಂವ್ಚೊ ಮನಿಸ್ ಜೀವಂತ್ ಆಸೊನೀ ಮೆಲ್ಲೆಪರಿಂ. ಕಿತ್ಯಾಕ್ ಮ್ಹಳ್ಯಾರ್ ಜೊ ಬೆಪಾರ್ವೊ ಕರ್ತಾ ತಾಚೆ ನದ್ರೆಂತ್ ತೋ ಅಸ್ಥಿತ್ವಾಂತ್ಚ್ ಆಸಾನಾ”
ಅಸಲಿ ಏಕ್ ಪ್ರಾಮಾಣಿಕ್ ಖಂತ್ ಜಾಹೀರ್ ಕರ್ತಾನಾ ಧರ್ಮಾಧ್ಯಕ್ಷಾನ್ ಪ್ರಭುತ್ವಾಕ್ ಪರೋಕ್ಷ್ ಥರಾನ್ ಸವಾಲ್ ಕರುನ್ ವಿಚಾರ್ಲೆಂ ” ಸ್ವಚ್ಚ್ ಭಾರತ್, ಗೋ ಗ್ರೀನ್ ಮ್ಹಣ್ ಉಲಯ್ತಾತ್. ಸಗ್ಳೆಂ ಬರೆಂಚ್. ಪೂಣ್ ದ್ವೇಶ್ ಆನಿ ಬೆಪಾರ್ವೊ ನಾತ್ಲ್ಲೆಂ ಸ್ವಚ್ಛ್ ಮನ್ ಆನಿ ನಿತಳ್ ಕಾಳಿಜ್ ಕಿತ್ಯಾಕ್ ದಿಸಾನಾ?”
ಪ್ರಭುತ್ವಾಕ್ ಜಾಗ್ವಣ್ ದೀವ್ನ್ ಧರ್ಮಾಧ್ಯಕ್ಷಾನ್ ” ಕಾಳ್ಜಾಂತ್ಲೊ ದ್ವೇಶ್ ಆನಿ ಮನಾಂತ್ಲೊ ಬೆಪಾರ್ವೊ ಹೆರಾಂಕ್ ಜಳಂವ್ಚ್ಯಾ ಪಯ್ಲೆಂ ಸ್ವತಾಕ್ ಗೊಬೊರ್ ಕರ್ತಾ. ಬೆಪಾರ್ವ್ಯಾನ್ ಅಂತಸ್ಕಾರ್ನ್ ಮೆಲ್ಯಾರ್ ಮನಿಸ್ ಫಕತ್ ಚಲ್ಚೆಂ ಮೊಡೆಂ ಜಾತಾ ತಿತ್ಲೆಂಚ್” ಮ್ಹಣ್ತಾನಾ ಮ್ಹಾಕಾ ಬೆಳ್ಗಾಂವ್ ಬಿಸ್ಪ್ ಅ|ಮಾ| ದೊ| ಡೆರಿಕ್ ಫೆರ್ನಾಂದಾನ್ ಆಯ್ಲೆವಾರ್ ಟೆಲಿವಿಶನ್ ಚ್ಯಾನೆಲಾರ್ ಮ್ಹಳ್ಳಿಂ ಉತ್ರಾಂ ಉಡಾಸಾಕ್ ಆಯ್ಲಿಂ ” ಫುಡಾರಾಂತ್ ದೇವ್ ತುಮ್ಚ್ಯಾ ಪಕ್ಷೆನ್ ಆಸ್ಚೊ ನಾ”
ದೇವ್ ಮನಿಸ್ ಜಾಲೊ ಮ್ಹಣ್ಚಿಂ ದೇವ್ಶಾಸ್ತಿರಾಚಿಂ ವ್ಹಡ್ ಸಮೀಕರಣಾಂ ಎಕಾ ಖಿಣಾಕ್ ಕುಶಿಕ್ ದವರುನ್, – ನಾಗರಿಕತಾ ನೊಂದಾವ್ಣೆಚ್ಯಾ ಕಾಟ್ಕಯೆಮಧೆಂ ಜೆಜುಚೊ ಜಲ್ಮ್, ಫಕತ್ ತೀನ್ ವರ್ಸಾಂಚಿಂ ತಾಚಿ ಪರ್ಗಟ್ ಜಿಣಿ, ತಾಣೆ ಕೆಲ್ಲಿ ಪರ್ಜೆಚಿ ಪರ್ವಾ ಆನಿ ವಾಂಟ್ಲ್ಲೊ ಮೋಗ್ – ಇತ್ಲೆಂಚ್ ಲೆಕಾಕ್ ಘೆತ್ಲ್ಯಾರೀ, ದೋನ್ ಹಜಾರ್ ವರ್ಸಾಂ ಉಪ್ರಾಂತ್, ಜ್ಯಾ ಸಮಾಜಿಕ್ ಸಂದರ್ಭಾರ್ ಭಾರತಾಚಿ ಪರ್ಜಾ ಆಜ್ ಜಿಯೊನ್ ಆಸಾ, ತೀಯ್ ಜೆಜುಚ್ಯಾ ಕಾಳಾಚ್ಯಾ ನಾಗರಿಕತಾ ನೊಂದವ್ಣೆಚ್ಯಾ ಸಂಕಷ್ಟಾಂತ್ಲ್ಯಾನ್ ಆನಿ ಕಾಟ್ಕಾಯೆಂತ್ಲ್ಯಾನ್ ಪಾಶಾರ್ ಜಾವ್ನ್ ನಾಂಗೀ ? ಪ್ರತೇಕ್ ಜಾವ್ನ್ – ಭಾರತಾಂತ್ಲಿ ಧರ್ಮಿಕ್ ಉಣ್ಯಾಸಂಕ್ಯಾತ್ ಪರ್ಜಾ. ನಾಗರಿಕತಾ ನೊಂದಾವ್ಣೆಚೆಂ ರೂಪ್ ಆನಿ ಕಾಯ್ದ್ಯಾಚೆಂ ಸುರುಪ್ ವೆಗ್ಳೆಂ ಜಾವ್ನ್ ಆಸೊಂಕ್ ಪುರೊ, ದೊನ್ ಹಜಾರ್ ವರ್ಸಾಂ ಉಪ್ರಾಂತೀ ಇಜಾ ತೀಚ್ ಭೊಗುಂಕ್ ಮೆಳ್ತೇ ಆಸಾಮೂ ? ಆನಿ ಆತಾಂ, ಬೊರ್ಯಾ ವಯ್ರ್ ಭೊರ್ಕುಟಿ ಜಶೆಂ ಪ್ರದೇಶಾಂತ್ಲ್ಯಾ ಸರ್ಕಾರಾನ್, ಪ್ರತ್ಯೇಕ್ ಜಾವ್ನ್ ಕರ್ನಾಟಕಾಂತ್ಲ್ಯಾ ಕ್ರೀಸ್ತಾಂವ್ ಲೊಕಾಕ್ ‘ನತಾಲಾಂಚಿ ಕಾಣಿಕ್’ ಜಶೆಂ ಮತಾಂತರ್ ನಿಶೇದ್ ಕಾಯ್ದೊ ಭೆಟ್ ದಿಲಾ.
ಆರ್ಚ್ ಬಿಸ್ಪ್ ಅ|ಮಾ| ದೊ| ಪೀಟರ್ ಮಚಾದೊನ್ ರಾಜ್ಯಾಚಾ ಮುಕೆಲ್ ಮಂತ್ರಿಕ್, ಪಾಟ್ಲ್ಯಾ ಸಬಾರ್ ಮಯ್ನ್ಯಾಂ ಪಾಸುನ್, ಪತ್ರಾ ಪಾಟ್ಲ್ಯಾನ್ ಪತ್ರಾಂ ಬರಯ್ಲಿಂ. ಬಿಸ್ಪಾಂಚ್ಯಾ ಮಂಡಳೆ ಸಾಂಗಾತಾ ಖುದ್ ವಚೊನ್ ಮುಕೆಲ್ ಮಂತ್ರಿಕ್ ಮೆಳ್ಳೊ. ಪತ್ರಿಕಾ ಗೋಷ್ಠಿ ಆಪವ್ನ್ ಮಾದ್ಯಮಾಂ ಮುಕಾಂತ್ರ್ ಕಳ್ವಳೆ ಸಾಂಗ್ಲೆ, ಸಾಂಕೇತಿಕ್ ಪ್ರತಿಭಟನಾಂ ಕೆಲಿಂ – ಉಹುಂ!
ಮುಕೆಲ್ ಮಂತ್ರಿ ಆನಿ ಸರ್ಕಾರಾ ಥಾವ್ನ್ ಫಕತ್ ಆನಿ ಫಕತ್ – ವಿ ಡೋಂಟ್ ಕೇರ್!
ಹಾಚೊ ಸರಳ್ ಆನಿ ಶೀದಾ ಅರ್ಥ್ – ದೊ| ಸಲ್ದಾನ್ಹಾನ್ ಸಾಂಗ್ಲ್ಲೆಪರಿಂ – ಬೆಪಾರ್ವೊ! Indifference!!!
ಆತಾಂ ಉದೆತಾ ಸವಾಲ್ – ತರ್, ಕರ್ನಾಟಕಾಂತ್ಲ್ಯಾ ಪ್ರಭುತ್ವಾಕ್ ಕ್ರಿಸ್ತಾಂವ್ ಪರ್ಜೆಚೆರ್ ಮೋಗ್ ನಾ?
ಮ್ಹಜೆ ಪರ್ಮಾಣೆ, ನಾ ಮೋಗ್ ! ನಾ ರಾಗ್ !! – ದೊನೀ ನಾ! ಕ್ರೀಸ್ತಾಂವ್ ಪರ್ಜಾ ಕರ್ನಾಟಕಾಚ್ಯಾ ಪ್ರಭುತ್ವಾಕ್ ದೊ| ಸಲ್ದಾನ್ಹಾನ್ ಸಾಂಗ್ಲ್ಲೆಪರಿಂ ಲೆಕಾಕ್ಚ್ ನಾಂ! ಜೀವ್ ಆಸ್ಲ್ಯಾರೀ, ಮೆಲ್ಯಾರೀ – ಪರ್ವಾಚ್ ನಾ! ಜರಿ ಪರ್ವಾ ಆಸ್ಲ್ಲಿ – ಆರ್ಚ್ ಬಿಸ್ಪಾನ್ ಇತ್ಲಿಂ ಪತ್ರಾಂ ಬರಯ್ತಾನಾ, ಖುದ್ ವಚೊನ್ ಭೆಟ್ತಾನಾ, ಪ್ರಭುತ್ವಾಥಾವ್ನ್ ಏಕ್ ತರೀ ಜಾಪ್ ಯೆತಿ. ಆರ್ಚ್ ಬಿಸ್ಪಾಚ್ಯಾ ಇತ್ಲ್ಯಾ ಪತ್ರಾಂಕ್ ಫಕತ್ “ಮನವಿ ಮೆಳ್ಳ್ಯಾ” ಮ್ಹಣ್ ಮುಕೆಲ್ ಮಂತ್ರಿಚ್ಯಾ ದಫ್ತರಾಂತ್ ದಾಂಬ್ಲ್ಲಿ ಮ್ಹೊರ್ ಮಾತ್ ಜಾಪ್ಗೀ ? ?
ತರ್ ಹಾಂಚ್ಯಾ ಮುಕೆಲ್ಯಾಂನಿ, ಎಲಿಸಾಂವ್ ಮಾತ್ಯಾರ್ ಯೆತಾನಾ ಧರ್ಮಾಧ್ಯಕ್ಶಾಲಾಗಿಂ ಧಾಂವೊನ್ ಯೇವ್ನ್ ಬೆಸಾಂವ್ ಘೆಂವ್ಚೆಂ ಆನಿ ಆತಾಂ ಟಿ. ವಿ ಚ್ಯಾನೆಲಾಂನಿ ಮದರ್ ತೆರೆಜಾಕ್ ಧರುನ್ ಕ್ರೀಸ್ತಾಂವಾಂನಿ ಕರ್ಚಿ ಭಲಾಯ್ಕೆ ಆನಿ ಶಿಕ್ಪಾ ಸೆವಾ ಸಗ್ಳೆ ಮತಾಂತರಾಚ್ಯೊ ಹಿಕ್ಮತ್ಯೊ ಮ್ಹಣ್ಚೆಂ ಕಿತ್ಯಾಕ್?
ಹೆ ಸಗ್ಳೊ ಫಕತ್ – ರಾಜಕೀಯ್ ನಾಟಕ್ ಮಾತ್! – ಫಕತ್ ಎಲಿಸಾಂವ್ ಜಿಕೊಂಕ್ ವಾ ಆಡಳ್ತ್ಯಾಂತ್ಲಿ ಅಸಾಮರ್ಥಿ ಧಾಂಪುಂಕ್!
ವಿಪರ್ಯಾಸ್ ಪಳಯಾ – ಉಣ್ಯಾಸಂಕ್ಯತಾಂಕ್ ಧರ್ನ್ ಸಗ್ಳೆ ಅಜ್ ಫಕತ್ ಮತಾಂತರಾ ವಿಶ್ಯಾಂತ್ ಮಾತ್ ಉಲಯ್ತಾತ್. ವರ್ಸಾಂ ಪಾಸುನ್ ರುಪಯಾ ಭಿತರ್ ಅಸ್ಲ್ಲೆಂ ಕಾಡಿಯಪೆಟೆಚೆಂ ಮೋಲ್ ಸಯ್ತ್ ಕಿತ್ಲೆಂ ವಾಡ್ಲಾಂ ಮ್ಹಣ್ ಕೊಣಾಕ್ ಖಬರ್ ಆಸಾ? ಎಕಾಣೆಂ ಮೊಳ್ಬಾಕ್ ತೆಂಕ್ಲ್ಲ್ಯಾ ಮಾರ್ಗಾಯೆ ವಿಶ್ಯಾಂತ್ ಕೋಣ್ ತರೀ ಉಲಯ್ತಾತ್ ? ರಾಂದ್ಪಾ ಗ್ಯಾಸ್ ಸಿಲಿಂಡರಾಚೆಂ ಮೋಲ್ ಹಜಾರಾಂಕ್ ತೆಂಕ್ಲಾಂ. ರಗ್ತಾ ದಾಬ್, ಸಾಕ್ರಿಪಿಡೆಚ್ಯಾ ಒಕ್ತಾಂಚಿಂ ಮೊಲಾಂ ಸಯ್ತ್ ಅರ್ವಾಸ್ ವಾಡ್ಲ್ಯಾಂತ್. ಆನಿ ಹಾಚೊ ಮಾರ್ ಕೊಣಾಕ್ ಬಸ್ಲಾ? ಫಕತ್ ಉಣ್ಯಾಸಂಕ್ಯಾಚ್ಯಾಂಕ್ ಮಾತ್ ನಯ್! – ಸಗ್ಳ್ಯಾಂಕ್!
ಏಕ್ ಪ್ರಾಯೋಗಿಕ್ ದಾಕ್ಲೊ ದಿಂವ್ಚೊ ತರ್ – ಪಾಟ್ಲ್ಯಾ ದಿಸಾಂನಿ ದಿಸಳ್ಯಾ ಪತ್ರಾರ್ ಆಮ್ಚ್ಯಾ ಸಂಸ್ಥ್ಯಾಕ್, ಕಾಮಾಕ್ ಮನಿಸ್ ಜಾಯ್ ಮ್ಹಣ್ ಏಕ್ ವರ್ಗಿಕೃತ್ ಜಾಹೀರಾತ್ ಛಾಪ್ಲೆಂ. ಆಯಿಲ್ಲ್ಯಾ ಫೊನಾಂ ಪಯ್ಕಿ ಫಕತ್ ಧಾ ಠಕ್ಕೆ ಫೊನಾಂ – ಉಣ್ಯಾಸಂಕ್ಯಾತಾಂಚಿಂ! ಹಾಚೊ ಅರ್ಥ್ – ಆಜ್, ನೊವೊದ್ ಠಕ್ಕೆ ಬಹುಸಂಖ್ಯಾತ್ ಲೋಕ್ ಬೆಕಾರಾಯೆಂತ್ ವ್ಹಳ್ವಳ್ತಾ. ಥೊಡೆ ದುಕಾಂ ಗಳಯ್ತಾತ್. “ಖಂಯ್ಚೆಂಯ್ ಜಾಯ್ತ್ , ಏಕ್ ಕಾಮ್ ದಿಯಾ ಸರ್” ಮ್ಹಣ್ ಪರಾತ್ತಿತಾತ್. ಆನಿ ಅಸಲ್ಯಾ ಎಕಾ ಸಂದಿಗ್ದ್ ಕಾಳಾರ್ ಗರ್ಜೆಭಯ್ಲೊ ಕಾಯ್ದೊ ಹಾಡುನ್ – ಕ್ರೀಸ್ತಾಂವ್ ಸಂಸ್ಥ್ಯಾಂನಿ ಗರ್ಜೆವೊಂತಾಂಕ್ ಶಿಕ್ಪಾ ಶುಲ್ಕಾಂತ್ ಮೆಳ್ಚಿ ರಿಯಾಯ್ತಿ, ಕಾಮಾಂಯ್ ಮೆಳಾನಾತ್ಲೆಪರಿಂ ಕೆಲಿಂಮೂ ? ಕಾಯ್ದ್ಯಾಚಿ ಪ್ರತಿ ವಾಚ್ಲ್ಯಾರ್ – ಶಿಕ್ಪಾಶುಲ್ಕಾಂತ್ ರಿಯಾಯ್ತ್, ಕಾಮ್ ದಿಂವ್ಚೆಂ ಪಯ್ಸ್, ಹೆರ್ ಪಾತ್ಯೆಣೆಚ್ಯಾ ಭಾವಾಂಲಾಗಿಂ ಉಲಯ್ಲ್ಯಾರೀ ಜಯ್ಲಾಕ್ ವೆಚಿ ಪರಿಸ್ಥಿತಿ ಯೇತ್ ಮ್ಹಳ್ಳೊ ಶಿರ್ಶಿರೊ ಚರ್ತಾ.
ಖರೆಂಚ್ – ದೊ| ಸಲ್ಡಾನ್ಹಾನ್ ಮ್ಹಳ್ಳೆಪರಿಂ ಪ್ರಭುತ್ವಾಚ್ಯಾ ಮನಾಂ ಕಾಳ್ಜಾಂತ್ ಭರೊನ್ ಗೆಲ್ಲೊ ಹೊ ಬೆಪಾರ್ವೊ ಹೆರಾಂಕ್ ಜಳಂವ್ಚೆ ಪಯ್ಲೆಂ, ಏಕ್ ದೀಸ್, ತಾಂಕಾಂಚ್ ಗೊಬೊರ್ ಕರ್ತಾಲೊ ತೆಂ ಖಂಡಿತ್! ಆನಿ ಹಾಂಚ್ಯಾ ಕಾಳ್ಜಾ – ಮನಾಂತ್ ಭರೊನ್ ಗೆಲ್ಲೊ ಬೆಪಾರ್ವೊ ಲಾಸುನ್ ಗೊಬೊರ್ ಕರುಂಕ್ ಹೆರ್ ಪಾತ್ಯೆಣೆಚ್ಯಾಂಚಿಂ ಗರ್ಜ್ ಪಡ್ಚಿ ನಾ. ಬೆಕಾರ್ ಪಡೊನ್, ಭುಕೆನ್ ವ್ಹಳ್ವಳ್ಚೆ ಪಾತ್ಯೆಣೆ ಭಿತರ್ಲೆಚ್ ತೆಂ ಕಾಮ್ ಕರ್ನ್ ಸೊಡ್ತಾಲೆ. ಬೆಳ್ಗಾಂವ್ ಬಿಸ್ಪಾನ್ ಸಾಂಗ್ಲ್ಲೊ ದೇವ್ ಆಸಾ ವಾ ನಾ, ಕಳಿತ್ ನಾ. ಪುಣ್ ಫುಡಾರಾಂತ್, ಜಿವಾವಿರೋದಿ ಕಾಯ್ದೆ, ಕರ್ತುಬಾಂ ಕರ್ತೆಲ್ಯಾಂಚ್ಯಾ ಪಾಡ್ತಿನ್ ದೇವ್ ಸೊಡ್ಯಾಂ, ಕಾಳ್ಯೀ ರಾಂವ್ಚೊ ನಾ ಮ್ಹಳ್ಳೆಂ ಮಾತ್ ಖಂಡಿತ್.
ಸಂಸಾರ್ಭರ್ ವಿಸ್ತಾರ್ಲೆಲ್ಯಾ ಆಮ್ಚ್ಯಾ ವಾಚ್ಪ್ಯಾಂಕ್, ಬರಯ್ಣಾರಾಂಕ್ ಆನಿ ಸತಾಚ್ಯಾ ಪಾಡ್ತಿನ್ ವಾವುರ್ಚ್ಯಾ ಆಮ್ಚ್ಯಾ ಮಾದ್ಯಮಾಕ್ ಕಸಲಿಚ್ ಆಪೇಕ್ಷಾ ಮನಾಂತ್ ದವರಿನಾಸ್ತಾನಾ ಪಾಟಿಂಬೊ ದಿಂವ್ಚ್ಯಾ ಬರ್ಯಾ ಮನಾಚ್ಯಾ ಮನ್ಶ್ಯಾಂಕ್ ಭಾಗಿ ನತಾಲ್ ಆನಿ ಭರ್ವಶ್ಯಾಚೆಂ ನವೆಂ ವರಸ್!
ನವ್ಯಾ ವರ್ಸಾಂತ್ ಸಗ್ಳ್ಯಾಂಚೆಂ ಬರೆಂ ಜಾಂವ್.
– ಎಚ್ಚೆಮ್ ಪೆರ್ನಾಲ್
ಸಂಪಾದಕ್ / ಪ್ರಕಾಶಕ್
`ಬೆಪಾರ್ವೊ’ ಕಿತ್ಯಾಕ್?
ವರ್ಸಾಂ ಆದಿಂ, ಉಣೆ ಫೀಸ್ ಘೆಂವ್ಚಿಂ ಉಂಚ್ಲ್ಯಾ ಮಟ್ಟಾಚಿಂ ಇಸ್ಕೊಲಾಂ-ಕೊಲೆಜಿ ಕ್ರಿಸ್ತಾಂವಾಂಚಿಂ ಆಸ್ಲಿಂ. ಫುಂಕ್ಯಾಕ್ ವಾ ಉಣ್ಯಾ ದರಿರ್ ವಯ್ಜಕೀಯ್ ಚಿಕಿತ್ಸಾ ಲಾಬಂವ್ಚೆ ಕ್ರಿಸ್ತಾಂವ್ ಭಲಾಯ್ಕೆ ಸಂಸ್ಥೆ ಆಸ್ಲೆ. ಸರ್ವ್ ಹಾಂಚೊ ಫಾಯ್ದೊ ಜೊಡ್ತಾಲಿಂ. ಆಜ್ ಹ್ಯಾ ದೊನೀ ಶೆತಾಂನಿ ಕ್ರಿಸ್ತಾಂವಾಂಕ್ ವಿಚಾರ್ಚೊ ಕೊಣೀ ನಾ. ಹೆರ್ ಸಮಡ್ತಿಚ್ಯಾಂನಿ ಲಕ್ಸುರಿ ಆನಿ ಹೈ-ಫೈ ಶಿಕ್ಪಾ ಸಂಸ್ಥೆ ಬಾಂಧ್ಲ್ಯಾತ್ ಆನಿ ಥೊಡೆ ಸಂಸ್ಥೆ ಫುಂಕ್ಯಾಕ್ ಶಿಕಪ್, ಚಿಕಿತ್ಸಾ, ಜೆವಣ್ ಆನಿ ಹೆರ್ ಸೆವಾ ದೀವ್ನ್ ಆಸಾತ್. ತರ್ ಗರ್ಜೆಕ್ ಪಡನಾತ್ಲ್ಯಾ ಕ್ರಿಸ್ತಾಂವಾಂಚಿ ‘ಪರ್ವಾ’ ಕಿತ್ಯಾಕ್ ಕರಿಜೆ?
ದುಸ್ರ್ಯಾನ್, ಕ್ರಿಸ್ತಾಂವ್ ರಾಜಕೀಯ್ ಜಾಗೃತಿ ನಾತ್ ಲ್ಲೆ. ವೋಟ್ ಘಾಲುಂಕ್ ದಿಲ್ಲಿ ರಜಾ ರೆತಿರೆಕ್ ವಾ ಪಿಕ್ನಿಕಾಕ್ ವಚುಂಕ್ ವಾಪರ್ಚೆ ಮ್ಹಳ್ಳೆಂ ಆಡಳ್ತೆಂ ಚಲಯ್ತೆಲ್ಯಾಂಕ್ ಕಳಿತ್ ಆಸಾ. ತ್ಯಾ ಶಿವಾಯ್, ವೋಟ್ ಘಾಲುಂಕ್ ಯೆಂವ್ಚೆ ಚಾರ್ ಮಾಂಡೆಯ್ ಆಪ್ಣಾಚ್ಯೆ ಪಾಡ್ತಿಕ್ ವೋಟ್ ಘಾಲಿನಾಂತ್ ಮ್ಹಣ್ ಆಜ್ ಆಡಳ್ತೆಂ ಚಲಯ್ತೆಲೆ ಜಾಣಾಂತ್. ದೆಕುನ್ ಹಾಂಕಾಂ ಕಾನ್ ಹಾಲಂವ್ಚ್ಯಾ ಬದ್ಲಾಕ್, ಬಹುಸಂಕ್ಯಾತ್ ವೋಟ್ ಬ್ಯಾಂಕ್ ಸಾಂಬಾಳ್ನ್ ವ್ಹೆಲ್ಯಾರ್, ಚುನಾವಾಂತ್ ಸಲೀಸಾಯೆನ್ ಜಿಕ್ಯೆತ್ ಮ್ಹಣ್ ತೆ ನಖ್ಖಿ ಜಾಣಾಂತ್. ಲಾಬ್ ನಾತ್ಲೆಥಂಯ್ ಕಿತ್ಯಾಕ್ ಇನ್ವೆಸ್ಟ್ ಕರಿಜೆ ಮ್ಹಳ್ಳೆಂ ತಾಂಚೆಂ ಚಿಂತಾಪ್ ಯಿ ರಾಜಾಂವಿಕ್ ನ್ಹಯ್?