ಕ್ರಿಸ್ಮಸಾಚಿ ಮದ್ಯಾನೆ ರಾತ್…
ರಾಯಾನ್ ಪೀಟರಾಚ್ಯಾ ಘರಾ ‘ಜಿಮ್ ರೀವ್ಸ್ ಕ್ರಿಸ್ಮಸ್ ಕ್ಯಾರೆಲ್’ ವ್ಹಾಜಾತ್ತ್ ಆಸ್‌ಲ್ಲೆಂ.
ಅಸಲ್ಯಾವೆಳಾ…ಇಗರ್ಜೆಂತ್ ಕ್ರಿಸ್ಮಸಾಚ್ಯಾ ಮಿಸಾಚಿ ಘಾಂಟ್ ವ್ಹಾಜಾಲಾಗ್ಲಿ. ಹಿ ಮಿಸಾಚಿ ಘಾಂಟ್ ರಾಯಾನ್ ಆನಿ ಜೊವಿಟಾಚ್ಯಾ ಕಾನಿಂ ಆವಾಜೊನ್ ಆಸ್ತಾಂಚ್ಚ್…
ರಾಯಾನಾಚ್ಯಾ ಘರ್ಚ್ಯಾ ದಾರಾರ್ … ಸಾಂತಾಕ್ಲೊಸಾಚಿ ಕಾಂಪಿಣ್ ಆವಾಜೊಂಕ್ ಲಾಗ್ಲಿ!. ತ್ಯಾ ಪಟಾಪಟ್ ಡೋರ್ ಬೆಲ್ಲ್…!
‘ಕ್ರೀಂ,,,ಕ್ರೀಂ’…
‘ಹ್ಯಾ ರಾತಿಂ ಕೋಣ್?!’ ಮ್ಹಳ್ಳಿ ವಿಜ್ಮಿತೆ ನದರ್ ರಾಯಾನ್ … ಜೊವಿಟಾ ಥಂಯ್ ಘಾಲ್ತಾಸ್ತಾಂ … ಜೊವಿಟಾಚ್ಯಾ ಕಪಾಲಾರ್ ಮಿರಿಯೊ ಉದೆಲ್ಯೊ.! ದುಸ್ರೆ ಘಡ್ಯೆ …
“ಆಯ್ಲೊಂ…” ಮ್ಹಣಾಲೊ ರಾಯಾನ್…“ಹಾಂವ್ ಕೋಣ್ ಮ್ಹಣ್ ಪಳೆವ್ನ್ … ತಾಕಾ ಧಾಡ್ನ್ ಯೆತಾಂ. ತುಂ ಮಾಂಡಾವಳ್ ಮುಂದರ್ಸಿ” ಮ್ಹಣ್ ಮುಕ್ಲ್ಯಾ ದಾರಾಲಾಗಿಂ ಮೆಟಾಂ ಘಾಲುಂಕ್ ಲಾಗ್ಲೊ. ತವಳ್ ಚ್ಚ್ ನವಿ ಹೊಕಾಲ್ ಜೊವಿಟಾ…
ರಾತ್ಚೆಂ ತೆಂ ಕ್ರಿಸ್ಮಸ್ ಆಚರಣ್ ಕ್ಯಾಂಡ್ಲಾಂಚ್ಯಾ ಉಜ್ವಾಡೆಂತ್ ಆಚರ್ಸುಂಕ್ ಮೇಜ್ ಮಾಂಡುಂಕ್ ಲಾಗ್ಲೆಂ. ತಾಂಚೆಂ ಕ್ರಿಸ್ಮಸ್ ಮೀಸ್ ತ್ಯಾ ಸಾಂಜೆರ್ ಜಾಲ್ಲ್ಯಾನ್ … ಆತಾಂ ತ್ಯಾ ಮದ್ಯಾನೆ ರಾತಿಂ … ತೆಂ ….
ಮೆಜಾರ್ ಮಧೆಂ ಕೇಕ್ … ತಾಚ್ಯಾ ದೆಗೆನ್ ವಾಯ್ನ್ ಆನಿ ಸ್ಕೋಚ್ ಬೊತ್ಲಿ … ಗ್ಲಾಸ್ … ಅಶೆಂ ಸಗ್ಳೆಂ ತೆಂ ಮಾಂಡಿತ್ತ್ ಆಸ್ತಾಂ … ರಾಯನ್ ದಾರಾಲಾಗಿಂ ಪಾವ್ಲೊ. ಆನಿ ದಾರ್ ಉಗ್ತೆಂ ಕರಿಲಾಗ್ಲೊ. ತವಳ್ ತಾಚೆ ಮುಕಾರ್…
ಧಡಂಗ್ ವ್ಹಡ್ ಜಿವಾಚೊ ತಾಂಬ್ಡೊ ದೊಗ್ಲೊ ಘಾಲ್ಲೊ ಸಾಂತಾಕ್ಲೋಸ್ ಉಬೊ ಆಸ್ಲ್ಲೊ. ಎಕ್‌ಚ್ಚ್ ಸೆಕುಂದ್ …
ಪಳೆತಾ ಪಳೆತಾನಾಂಚ್ಚ್ ತಾಚೊ ಉಜ್ವೊ ಪಾಂಯ್ ಹಾಚ್ಯಾ ದಾರಾ ಭಿತರ್ ರಿಗ್ಲೊ!
ಆನಿ ದುಸ್ರೆ ಘಡ್ಯೆ … ಜಬರ್ದಸ್ತೆನ್ ಮ್ಹಳ್ಳೆಪರಿಂ ತೊ ತಾಂಬ್ಡ್ಯಾ ದೊಗ್ಲ್ಯಾಚೊ ತಶೆಂ ಮುಖಮಳ್ ಭರ್ ಧೊವೆಂ ಲಾಂಬ್ ಖಾಡಾಚೊ ಸಾಂತಾಕ್ಲೊಸ್ ಭಿತರ್ ಪಾವ್ಲೊ. ಆನಿ ಹಾಕಾ ಬೆಫಿಕೆರ್ ಕರುನ್ ಸೋಫಾಚೆರ್ ಬಸ್ಲೊ!. ಆನಿ…
“ಹೆಪ್ಪಿ ಕ್ರಿಸ್ಮಸ್” ಮ್ಹಣ್ ವಿಶ್ ಕರಿಲಾಗ್ಲೊ.
ಆತಾಂ ವಳಕ್ ಆಪ್ಣಾಂವ್ಕ್ ಅಸಾಧ್ಯ್ ಜಾಲ್ಲೊ ರಾಯಾನ್ …‘ಹೊ ಅಪರಿಚಿತ್ ಕೋಣ್?!’ ಮ್ಹಣ್ ಏಕ್ ಪಾವ್ಟಿಂ ಥಟಕ್ಕ್ ಜಾಲೊ ಆನಿ…ತ್ಯಾ ಮಿಸ್ತೆರಾ ಘಡ್ಯೆ…ತೊ ಪಾಟಿಂ ವಿಶ್ ಕರುಂಕ್ ವಿಸರ್ಲೊ. ತವಳ್‌ಚ್ಚ್ ಸಾಂತಾಕ್ಲೊಸಾಚೆ ವೋಂಟ್ ಉಗ್ತೆ ಜಾಲೆ.
“ರಾಯಾನ್…” ದಾಟ್ ಕರ್ಕಶ್ ಘಮಂಢ್ ತಾಳೊ ಹಾಕಾ ಭಿರಾಂತೆಚಿ ಲೇಪ್ ದೀಲಾಗ್ಲೊ, “ಆದ್ಲ್ಯಾ ವರ್ಸಾ ಆಯ್ಚ್ಯಾ ಹ್ಯಾ ಕ್ರಿಸ್ಮಸಾ ದಿಸಾ ತುಜೆಂ ಕ್ರಿಸ್ಮಸ್ ಆಚರಣ್ ಖಂಯ್ಸರ್ ಕರುನ್ ಆಸ್ಲೊಯ್.?!”
ಎಕಾಎಕಿ ಹೆಂ ಅನಿರೀಕ್ಶಿತ್ ಸವಾಲ್ ಆಯ್ಕೊನ್ … ತಾಚಿ ಕಾಳ್ಜಾ ಶಿರ್ ಕಾಂಪೊಂಕ್ ಲಾಗ್ಲಿ. ಆನಿ ಚಿಂತಿನಾತ್ಲೆಲ್ಯಾ ಹ್ಯಾ ಸವಾಲಾ ವರ್ವಿಂ … ಹಾಚೊ ತೊಂಡಾ ಛಾರೊ ಸಟ್ಟ್ ಕರುನ್ ಬದ್ಲುಂಕ್ ಲಾಗ್ಲೊ! ಆನಿ ತವಳ್ ಹಾಚ್ಯಾ ಮತಿಂ ಉದೆಲ್ಲೆಂ ತೆಂ…
‘ಆದ್ಲ್ಯಾ ವರ್ಸಾಚೆಂ ಘಡಿತ್…!’ ಕಿತ್ಯಾಕ್‌ಗೀ .. .ಹೊ ಸಾಂತಾಕ್ಲೊಸ್ ಕಾಂಯ್ ಪೊಲಿಸ್ ಡಿಪಾರ್ಟ್ ಮೆಂಟಾಚೊ ಡಿಟೆಕ್ಟಿವ್?! ಮ್ಹಣ್ ತಾಕಾ ಭೆಶ್ಟಾಯ್ತಾನಾ … ಹೊ ಸಗ್ಳೊಚ್ ಘಾಮೆಂವ್ಕ್ ಲಾಗ್ಲೊ.!
ತಾಚಿ ತಾಂಬ್ಡಿ ತೊಪಿ … ಧೊವ್ಯಾ ನಕ್ಲಿ ಖಾಡಾನ್ ಭರೊನ್, ಫಕತ್ ದೊಳೆ ಮಾತ್ರ್ ದಿಸ್ಚೆ … ವಳಕ್ ಪಾರ್ಕುಂಕ್ ಅಸಾಧ್ಯ್ ಜಾಲ್ಲೆಂ ಮುಖಮಳ್ … ಪಳೆತಾಂ ಹಾಚೆಂ ಧಡ್ಧಡೆ ದೊಡ್ತೆ ಜಾಲೆ.
ಹ್ಯಾವೆಳಾ … ಹಾಚೆರ್‌ಚ್ಚ್ ದೀಶ್ಟ್ ಖಂಚುನ್ ಆಸ್ಚೊ ಸಾಂತಾಕ್ಲೊಸ್ ಯೀ … ಹಾಚಿ ಹರ್ಯೆಕ್ ಚಾಲ್ ತಜ್ವೀಜ್ ಥರಾನ್ ಪಾರ್ಕಿತ್ತ್ ಆಸ್ಲ್ಲೊ!. ಅಸಲ್ಯಾ ವೆಳಾ…
ರಾಯಾನಾಕ್ ಚಡಿತ್ ಚಿಂತುಂಕ್ ಆವ್ಕಾಸ್ ದೀನಾಸ್ತಾಂ … ಥಟ್ಟ್ ಕರುನ್ ತಾಣೆಂ ದುಸ್ರೆಂ ಸವಾಲ್ ಘಾಲೆಂ.
“ತುಂ ಸೆವ್ಲಿಲಾಕ್ ವೊಳ್ಕಾತಾಯ್?”
‘ಸೆವ್ಲಿಲಾ…!’ ಹೆಂ ಆಯ್ಕಾತಾಂ ಆತಾಂ ತಾಕಾ ತೊ ಉಬಿ ಆಸ್ಚಿ ಧರ್ನ್ ಕೊಸ್ಳಾಲ್ಲ್ಯಾ ಪರಿಂ ಜಾಲೆಂ. ಆನಿಂ ತೊ ಗಾಗೆಲೊ …“ಕೊ … ಕೋಣ್ … ಕೋಣ್ ತೆಂ … ಸೆ ಸೆ … ಸೆವ್ಲಿಲಾ?”.!
“ಸೆಸೆ … ಸೆವ್ಲಿಲಾ ನ್ಹಂಯ್ … ಸೆವ್ಲಿಲಾ … ಜೆಂ ಆದ್ಲ್ಯಾ ಕ್ರಿಸ್ಮಸಾ ಮಧ್ಯಾನೆ ರಾತಿಂ ನಪಂಯ್ಚ್ ಜಾಲ್ಲೆಂ!.”
“ಹಾಂವ್ ಕಿತೆಂಯೀ ನೆಣಾಂ … ಆನಿ ತಾಚೆ ವಿಶಿಂ ಮ್ಹಜೆಲಾಗಿಂ ಕಿತ್ಯಾಕ್ ವಿಚಾರ್ತಾಯ್ ಮ್ಹಳ್ಳೆಂಯೀ ಮಾಕಾ ಕಳಿತ್ ಜಾಯ್ನಾಂ.”
“ತುಜೆ ಲಾಗಿಂ ಕಿತ್ಯಾಕ್ ವಿಚಾರ್ತಾಂ ಮ್ಹಳ್ಯಾರ್ … ತ್ಯಾ ರಾತಿಂ ಸೆವ್ಲಿಲಾ … ತುಜೆ ಸಂಗಿಂ ಆಸ್‌ಲ್ಲೆಂ!.”
ಹೆಂ ಆಯ್ಕಾತಾನಾಂ ರಾಯನಾಚ್ಯಾ ತಳ್ಮಾಟ್ಯಾಕ್ ತೊಣ್ಕ್ಯಾನ್ ಮಾರ್ಲೆಲೆ ಪರಿಂ ಜಾಲೆಂ! ಆನಿ ಹ್ಯಾವೆಳಾ ಆಪ್ಣಾಚೆರ್ ಖಂಚೊನ್ ಆಸ್ಲೆಲಿ ಸಾಂತಾಕ್ಲೊಸಾಚಿ ತೀಕ್ಶ್ಣ್ ದೀಶ್ಟ್ … ಹಾಚ್ಯಾನ್ ಫುಡ್ ಕರುಂಕ್ ಜಾಲೆನಾಂ. ಆನಿಂ ತೊ ತಾಚೆ ಮುಖಾಮುಖಿ ರಾವೊಂಕ್ ಸಖಾನಾಸ್ತಾಂ ಚಡ್ಪಡುನ್ ಆಸ್ತಾಂ …
ತವಳ್‌ಚ್ ಭಿತರ್ ಥಾವ್ನ್ ಜೊವಿಟಾ ಭಾಯ್ರ್ ಆಯ್ಲೆಂ.
“ಮೇಡಮ್ ಹೆಪ್ಪಿ ಕ್ರಿಸ್ಮಸ್”… ತಾಕಾ ಪಳೆಲ್ಲೆಂಚ್ಚ್ ಸಾಂತಾಕ್ಲೋಸ್ ವಿಶ್ ಕರುಂಕ್ ಉಬೊ ಜಾಲೊ. ತವಳ್‌ಚ್ ಜೊವಿಟಾ ಆನಿ ಸಾಂತಾಕ್ಲೊಸ್ ಮುಖಾಮುಖಿಂ ಜಾಂವ್ಚ್ಯಾ ಹ್ಯಾ ಪರಿಗತೆರ್ … ‘ಮುಕಾರ್ ಕಿತೆಂ ಜಾಯ್ತ್?! … ಹೊ ಕಸಲೆಂ ಉಲಯ್ತ್?! … ಕಾಂಯ್ ಸೆವ್ಲಿಲಾ ವಿಶಿಂ?!’ … ಮತ್ಲಬಿ ಉತ್ರಾಂ ಉಲವ್ನ್ …
ಆಪ್ಣಾಕ್ ಶಿರಿಗುಂಡಿಕ್ ಘಾಲಿತ್.?!’ ಮ್ಹಳ್ಳ್ಯಾ ಘಡ್ಭಡೆರ್ … ಕಾಳಿಜ್ ಪೊಕೊರ್ಚಿ ಹಿ ಪರಿಗತ್ ಚುಕೊಂವ್ಕ್ ತ್ಯಾಚ್ಚ್ ಖಿಣಾ … ರಾಯನ್ ಆಪ್ಲೆಂ ತೋಂಡ್ ಉಗ್ತೆಂ ಕರಿಲಾಗ್ಲೊ …
“ಜೊವಿಟಾ … ಹಾಂವ್ ಆನಿ ಸಾಂತಾ … ಥೊಡೊ ವೇಳ್ ಹಾಂಗಾಚ್ಚ್ ಭಾಯ್ರ್ ವೊಚೊನ್ ಯೆತಾಂವ್ …” ಮ್ಹಳ್ಳ್ಯಾ ಉತ್ರಾಂ ಬರಾಬರ್ ಸಾಂತಾಕ್ಲೊಸಾ ಸಂಗಿಂ ಭಾಯ್ರ್ ಮೇಟ್ ದವರುಂಕ್ ಅಮ್ಸರ್ಲೊ. ತವಳ್‌ಚ್ ಸಾಂತಾಕ್ಲೊಸ್ ಮ್ಹಣಾಲೊ…
“ಮೇಡಮಾಕ್ ಸಾಂಗ್ … ತಿಣೆಂ ತುಕಾ ರಾಕ್ಚೆಂ ನಾಕಾ ಮ್ಹಣ್…!”
ಹೆಂ ಆಯ್ಕಾತಾಂ ರಾಯಾನ್ ಏಕ್ ಪಾವ್ಟಿಂ ಶಿರಿಂ ಚುಕ್ಲೊ!. ‘ಹೊ ಕಸಲಿ ಮಾಂಡಾವಳ್ ಮಾಂಡುನ್ ಆಯ್ಲಾ!’ ಮ್ಹಳ್ಳೆಂ ದುಬಾವೆ ಚಿಂತಾಪ್ ಮತಿಕ್ ಕಠಿಣ್ ಧೊಸುಂಕ್ ಲಾಗ್ಲೆಂ. ಪೂಣ್ ತ್ಯಾ ಘಡ್ಯೆ …
ಎಕಾ ಕುಶಿನ್ ಜೊವಿಟಾ ದುಸ್ರ್ಯಾ ಕುಶಿನ್ ಮಿಸ್ತೆರಾಚೊ ಸಾಂತಾಕ್ಲೊಸ್…ಹಾಂಚೆಂ ಮಧೆಂ ಕಾತ್ರಿಂತ್ ಶಿರ್ಕಾಲ್ಯಾಪರಿಂ ಚಡ್ಪಡೊನ್ ಆಸ್ಲೊಲೊ ರಾಯನ್ … ಉಪಾವ್ ನಾಸ್ತಾಂ … ಗಾಗೆಲೊ…
“ಜೊ … ಜೊವಿಟಾ ತುಂ ದಾರ್ ಧಾಂಪ್ … ಆಯ್ಲೊಂ…”
***
ದೊಗೀ ಮೌನ್ಪಣಾರ್ ಚಲಾತ್ತ್ ಆಸ್‌ಲ್ಲೆ. ಹ್ಯಾ ವೆಳಾ…
‘ಕಿತೆಂ…ಖಂಯ್…?!’ ಮ್ಹಳ್ಳೆಂ ಕಿತೆಂಚ್ಚ್ ಕಳಾನಾತ್ಲೊಲೊ ರಾಯನ್ … ಥಂಯ್ ಹಾಂಗಾ ಮೆಳ್ಚೊ ಕಾಳೊಕ್ … ತಶೆಂ ಲಾಯ್ಟಾ ಪ್ರಕಾಸ್ ಉತ್ರೊನ್ ಚಲಾತ್ತ್ ರಾವ್ಲೊ. ಲಾಂಬ್ ರಸ್ತೆ … ಚಡ್ಣಿಂ ದೆಂವ್ಣಿಂ … ಘುಂವ್ಡ್ಯೊ … ಹೆಂ ಸರ್ವ್ ಉತ್ರೊನ್ ನಿಮಾಣೆಂ ‘ರಿವರ್ ಸೈಡ್’ ವಾಟೆಕ್ ಪಾವ್ಲೊ.
ಹ್ಯಾವಾಟೆಕ್ ಪಾಂಯ್ ದವರ್ತಾಂ ತಾಚ್ಯಾ ಮತಿಂ ಸಟ್ಟ್ ಕರುನ್ ಸೆವ್ಲಿಲಾ ಜಗ್ಲಾಲೆಂ! ಆನಿ ತಾಚೆಂ ಹರ್ಧೆಂ ಬರೆಂಚ್ಚ್ ಧಡ್ಧಡುಂಕ್ ಲಾಗ್ಲೆಂ.
“ಹ್ಯಾ ಜಾಗ್ಯಾಚೊ ಉಗ್ಡಾಸ್ ಆಸಾಮೂ?!”…ಪಯಿಲ್ಲ್ಯಾ ಪಾವ್ಟಿಂ ಮೌನ್ಪಣ್ ಮೊಡ್ಲೆಂ ಸಾಂತಾಕ್ಲೊಸಾನ್.
ಹೆಂ ಆಯ್ಕಾತಾಂ … ರಾಯನಾಚೆ ಧಡ್ಧಡೆ ದೊಡ್ತೆ ಜಾಲೆ. ಪುರ್ತೊ ಘಾಮೆಲ್ಲೊ ತೊ…‘ನಾಂ ಮ್ಹಣಾನ್ ತರ್…ಸೆವ್ಲಿಲಾವಿಶಿಂ ಸವಾಲಾಂ ಘಾಲುನ್ ಹೊ ದುಬಾವಾಕ್ ಒಳಗ್ ಜಾತೊಲೊ!’ ಮ್ಹಳ್ಲ್ಯಾ ಚಿಂತ್ನಾನ್ ಸಟ್ಟ್ ಕರುನ್ ಮ್ಹಣಾಲೊ…
“ಹ್ಯಾ ಜಾಗ್ಯಾಕ್ ಕೆನ್ನಾಂಯೀ ಹಾಂವ್ ಯೆತಾಂ.”
“ನಾಂ… ತುಂ ಕೆನ್ನಾಂಯೀ ಯೆನಾಂಯ್. ಕೆನ್ನಾಂಯೀ ಯೆಂವ್ಚೆಂ ಹಾಂವೆಂ. ತುಂ ಆದ್ಲ್ಯಾ ಕ್ರಿಸ್ಮಸ್ ದಿಸಾ ಉಪ್ರಾಂತ್ ಹಾಂಗಾಸರ್ ಯೇನಾತ್ಲೊಯ್. ಪೂಣ್ ಹಾಂವ್ ಸದಾಂ ಮ್ಹಳ್ಳೆಪರಿಂ ಯೆತೊಲೊಂ.” ಹೆಂ ಆಯ್ಕಾತಾಂ ರಾಯನ್ ಏಕ್ ಪಾವ್ಟಿಂ ತಾಕಾಚ್ಚ್ ಪಳೆಂವ್ಕ್ ಪಡ್ಲೊ.
“ನಪಂಯ್ಚ್ ಜಾಲ್ಲ್ಯಾ ಸೆವ್ಲಿಲಾಕ್ ಸೊಧುನ್ ಯೆತಾಲೊಂ!.”
ಸಾಂತಾ ಮುಂದರುನ್ ಮ್ಹಣ್ತಾಸ್ತಾಂ … ರಾಯನಾನ್ ಆಪ್ಲೆಂ ಮುಖಮಳ್ ತಾಚೆ ಥಾವ್ನ್ ಲಿಪಯ್ಲೆಂ. ತವಳ್‌ಚ್ ತೊ ಪರತ್ ಮ್ಹಣಾಲೊ …
“ಎಕಾ ಮಹಿನ್ಯಾ ಆದಿಂ ಪರ್ಯಾಂತ್ … ಹಾಂವ್ ಸೆವ್ಲಿಲಾ ಮೆಳಾತ್ ಮ್ಹಳ್ಳ್ಯಾ ಭರ್ವಶ್ಯಾರ್ … ತಾಚ್ಯಾ ಸೊದ್ನೆರ್ ಆಸ್‌ಲ್ಲೊಂ. ಆನಿ ಹಾಂಗಾಸರ್ ಯೀ ತ್ಯಾಚ್ಚ್ ಸೊದ್ನೆರ್ ತವಳ್ ತವಳ್ ಯೆತೇ ಆಸ್‌ಲ್ಲೊಂ.” ಹೆಂ ತೊ ಮ್ಹಣಾತ್ತ್ ಆಸ್ತಾಂ…
‘ನೀಜ್ ತರ್ ಹೊ ಕೋಣ್?!’ ಮ್ಹಳ್ಳ್ಯಾ ಚಿಂತ್ನಾನ್ ರಾಯನಾಚೊ ಭಿರಾಂತೆ ಮಿಸ್ತೆರ್ ಚಡೊಂಕ್ ಲಾಗ್ಲೊ.!. ತವಳ್‌ಚ್ ತೊ ಸಾಂತಾಕ್ಲೊಸ್ ಮುಂದರುನ್ ಮ್ಹಣಾಲೊ …
“ಮಹಿನ್ಯಾ ಆದಿಂ ತುಜೆಂ ಕಾಜಾರ್ ಜಾಲ್ಲೆಂ ಮ್ಹಜ್ಯಾ ಗಮನಾಕ್ ಯೆತಾಸ್ತಾಂ … ಸೆವ್ಲಿಲಾ ವಿಶಿಂ ಆಸ್ಲ್ಲೊ ಮ್ಹಜೊ ಭರ್ವಸೊ…ಅಸ್ಕತ್ ಜಾಯ್ತ್ ಆಯ್ಲೊ. ಆನಿ ಸೆವ್ಲಿಲಾವಿಶಿಂ ಚಿಂತುಂಕ್ ಅಸಾಧ್ಯ್ ಜಾಲ್ಲಿಂ ಚಿಂತ್ನಾಂ ಮ್ಹಜೆ ಥಂಯ್ ಜಾಗಿಂ ಜಾಲಿಂ!.
ಚಿಂತ್ನಾಂ … ‘ಸೆವ್ಲಿಲಾ ಜಿವಂತ್ ಆಸಾ ವಾ ನಾಂ!’ ಮ್ಹಳ್ಳೆಂ. ದೆಕುನ್ ಆಜ್…
‘ಸೆವ್ಲಿಲಾ ಥಂಯ್ ನೀಜ್ ಜಾವ್ನ್ ಕಿತೆಂ…ಘಡ್ಲಾಂ ?!’ ಮ್ಹಳ್ಳೆಂ ಸೊಧುನ್ ಜಾಣಾಂ ಜಾಂವ್ಕ್ ಹಾಂವ್ ತುಜ್ಯಾ ಘರ್ಚಿಂ ಮೆಟಾಂ ಚಡೊಂಕ್ ಲಾಗ್ಲೊಂ. ದೆಕುನ್…
ಆತಾಂ ತುಂ ಮಾಕಾ ಜಾಪ್ ದಿ…” ದಬಾವ್ ಘಾಲಿಲಾಗ್ಲೊ ಸಾಂತಾಕ್ಲೊಸ್.
“ಹಾಂವ್ ಕಿತೆಂ ಮ್ಹಣ್ ಜಾಪ್ ದೀಂವ್…ಮ್ಹಜೆ ಥಾವ್ನ್ ತುಂ ಕಿತೆಂ ಆಶೆತಾಯ್ ಮ್ಹಳ್ಳೆಂ ತೆಂ ಹಾಂವ್ ನೆಣಾಂ.” ಧಯ್ರ್ ಆರಾವ್ನ್ ಜಾಪ್ ದಿಲಿ ರಾಯನಾನ್.
“ರಾಯನ್… ಹಾಂವ್ ನೆಣಾಂ ಆಸ್ಲೆಲ್ಯಾ…‘ಸೆವ್ಲಿಲಾ ನಪಂಯ್ಚ್ ಜಾಲ್ಲ್ಯಾವಿಶಿಂ’ ಮ್ಹಾಕಾ ಸಾಂಗ್.!”
“ಮ್ಹಳ್ಯಾರ್…?!”
“ಮ್ಹಳ್ಯಾರ್…ತೆಂ ಜಿವಂತ್ ಆಸಾ…ವಾ ನಾಂ?!”
“ತೆಂ…ತೆಂ…” ಏಕ್ ಘಡಿ ಮೌನ್ ಜಾಲೊ ತೊ. ನಂತರ್…“ತೆಂ ಮಜೆಲಾಗಿಂ ಕಿತ್ಯಾಕ್ ವಿಚಾರ್ತಾಯ್?”
“ತೆಂ ತೆಂ…ಕಿತ್ಯಾ ಮ್ಹಳ್ಯಾರ್…ನಿಮಾಣ್ಯಾ ಪಾವ್ಟಿಂ ಆದ್ಲ್ಯಾ ಕ್ರಿಸ್ಮಸ್ ದಿಸಾ…ತೆಂ ತುಜೆ ಸಂಗಿಂ ಆಸ್‌ಲ್ಲೆಂ.”
“ದೆಕುನ್…?!” ತಕ್ಶಣ್ ಪಾಟಿಂ ಸವಾಲ್ ಕೆಲೆಂ ರಾಯಾನಾನ್ ಬಚಾವೆಚಿ ವಾಟ್ ಸೊಧುನ್.
“ಪಡ್ಪೊಶ್ಯಾ ತರ್ ತುಜೆಂ ‘ದೆಕುನ್?’ ಮ್ಹಳ್ಳೆಂ ಸವಾಲ್…ಸೆವ್ಲಿಲಾ ತುಜೆಂ ಸಂಗಿಂ ಆಸ್‌ಲ್ಲೆಂ ಖರೆಂ ಮ್ಹಣ್ ಸಾಕ್ಸ್ ದಿತಾ. ಆತಾಂ ಲಾಯ್ನಿಕ್ ಯೆ ಆನಿ ಸಾಂಗ್ … ತ್ಯಾ ದೀಸ್ ತ್ಯಾ ನಂತರ್ ಕಿತೆಂ ಜಾಲೆಂ?!”.
ಹಾಚೆಂ ಕಾಳಿಜ್ ಉಡೊನ್ ಪಡ್ಚ್ಯಾ ತಸಲೊ ಘಮಂಡ್ ಊಂಛ್ ತಾಳೊ ಕಾಡ್ಲೊ ಸಾಂತಾಕ್ಲೊಸಾನ್ … ಆಪ್ಲೊ ಹಾತ್ ತಾಚೆಂ ಥಂಯ್ ಉಭಾರ್ನ್.!
ಆತಾಂ ತಾಚ್ಯಾ ಆಕ್ರಮಣಾಚ್ಯಾ ದಬಾವೆಕ್ ಶಿರ್ಕೊನ್, ಆಪ್ಣೆಂ ಬಚಾವೆಕ್ ವಿಂಚ್‌ಲ್ಲೆಂ ತೆಂ…‘ದೆಕುನ್?!’ ಸವಾಲ್‌ಚ್ ಆಪ್ಣಾಕ್ ಜಾಳಾಕ್ ಶಿರ್ಕಾಯಿಲ್ಲೆಂ ಮತಿಕ್ ಆಪ್ಟಾತಾನಾಂ… ‘ಆನಿ ಹಾಚೆ ಲಾಗಿಂ ಸಾಂಗಿನಾಸ್ತಾಂ ಉಪಾವ್ ನಾಂ!’ ಮ್ಹಣ್ ಸವ್ಕಾಸ್ ಆಪ್ಲೆ ಕಾಂಪ್ಚೆ ವೋಂಟ್ ವೆಗ್ಳೆ ಕರಿಲಾಗ್ಲೊ…
“ತ್ಯಾ ನಂತರ್ ಆಮಿಂ ಕಾರಾರ್ ಬಾರಾಕ್ ಗೆಲ್ಯಾಂವ್. ಥಂಯ್ಸರ್ ಬಿಯರ್ ಪಿಯೆಲ್ಯಾಂವ್.”
“ರಾಯನ್! …ಫಟ್ ಮಾರಿನಾಕಾ!!…ಪರತ್ ಜಡಾಯೆಚ್ಯಾ ತಾಳ್ಯಾಸಂಗಿ ತಾಣೆಂ ಆಪ್ಲೊ ಜಡಾಯೆಚೊ ಹಾತ್ ತಾಚ್ಯಾ ಖಾಂದ್ಯಾರ್ ದವರ್ಲೊ.
ಥಂಯ್ಸರ್ ತುಂವೆಂ ಬಿಯರ್ ಬೊತ್ಲಿ ಮೊಲಾಕ್ ಘೆತ್ಲ್ಯೊಯ್. ಆನಿಂ ಥಂಯ್ ಥಾವ್ನ್ ತುಮಿಂ ಭಾಯ್ರ್ ಪಡ್ಲ್ಯಾತ್. ಪೂಣ್ ಥಂಯ್ಸರ್ ಪಿಯೆಂವ್ಕ್ ನಾಂತ್. ಅಶೆಂ ತುಮಿಂ ಗೆಲ್ಲ್ಯಾ ನಂತರ್…
ಸೆವ್ಲಿಲಾಕ್ ಕೊಣೆಂಯೀ ಪಳೆಲ್ಲೆಂ ನಾಂ!.”
ಹೆಂ ಆಯ್ಕಾತಾಂ ಭಿತರ್ಲ್ಯಾ ಭಿತರ್ ಕಾಂಪೊಂಕ್ ಲಾಗ್ಲೆಲ್ಯಾ ರಾಯನಾಚ್ಯಾ ಮತಿಂ…ಸೆವ್ಲಿಲಾಚೆಂ ಅತ್ಯಾಚಾರಾಚೆಂ ಘಡಿತ್ ವಯ್ರ್ ವಯ್ರ್ ಜಗ್ಲೊಂಕ್ ಲಾಗ್ಲೆಂ!.
ತಾಚಿ ತಿ ಅಸಹಾಯೆಕ್ ಉರ್ಡೊಣಿ…ತೆ ಹಾತ್ ತಾಚಿ ಭಾಯ್ಲಿ ವಸ್ತುರಾಂ ನಿಕ್ಳಾವ್ನ್, ಭಿತರ್ಲ್ಯಾ ಕನಿಶ್ಟ್ ವಸ್ತುರಾರ್ ಆಸ್‌ಲ್ಲೆಂ ತೆಂ …ತ್ಯಾ ಲೈಂಗಿಕ್ ಕರ್ನೆ ವಿರುಧ್ಧ್ ಝುಜ್ಚೆಂ ತೆಂ ಭಯಾನಕ್ ದೃಶ್ಯ್…ರಾಯನಾಚಿ ಕೂಡ್ ಬಾರಿಕಾಯೆನ್ ಕಾಂಪೊಂಕ್ ಲಾಗ್ಲೊ. ತವಳ್‌ಚ್… ಸಾಂತಾಕ್ಲೊಸಾಚೊ ತಾಳೊ ತಾಕಾ ಹಾಲವ್ನ್ ಜಾಗಯ್ಲಾಗ್ಲೊ…
“ಕಿತ್ಲ್ಯೊ ಬಿಯರ್ ಬೊತ್ಲಿ ತುಂವೆಂ ತ್ಯಾ ಬಾರಾಂತ್ ಘೆತ್‌ಲ್ಲ್ಯೊಯ್ ?”.
“ಧಾ… ಧಾ ಬಿಯರ್” .
“ತಶೆಂ ತರ್ ಫಕತ್ ತುಮ್ಕಾಂ ದೊಗಾಂಕ್…ಧಾ ಬಿಯರ್?!…ಧಾ ಬಿಯರ್ ದೊಗಾಂ ಖಾತಿರ್ ಜಾಯ್ ಪಡ್ಲ್ಯೊಗೀ?!”…ಪರತ್ ಸಾಂತಾಕ್ಲೊಸ್ ಭಿರಾಂತೆಚೊ ದಬಾವ್ ಘಾಲುನ್ ಜೊರಾನ್ ವಿಚಾರಿಲಾಗ್ಲೊ.
“ನಾಂ.” ತಕ್ಶಣ್ ಭಿರಾಂತೆಚಿ ಯಾಂತ್ರಿಕ್ ಜವಾಬ್ ರಾಯನಾ ಥಾವ್ನ್ ಉಸಳ್ಳಿ.
“ತರ್ ಕಿತ್ಯಾ ಧಾ ಬಿಯರ್ ಘೆತ್ಲಿಯ್.?” ಪಟಾಪಟ್ ಸವಾಲ್ ಸಾಂತಾಕ್ಲೊಸಾಚೆಂ.
“ತ್ಯಾ ದೀಸ್… ಸೆವ್ಲಿಲಾ ಧರ್ನ್ ಆಮಿ ಚವ್ಗ್ ಜಣ್ ಆಸ್‌ಲ್ಲ್ಯಾಂವ್.” ನರ್ಗೊನ್ ಜವಾಬ್ ದೀಲಾಗ್ಲೊ ರಾಯನ್.
“ಕೋಣ್ ತೆ ಉರ್‌ಲ್ಲೆ ದೋಗ್?!”
“ಸ್ಟೀವನ್ ಆನಿ ಕೆವಿನ್.”
“ಫಟಿಂಗಾ … ತಾಂಚೆ ಸಂಗಿ ಮೇಳ್ನ್ ತ್ಯಾ ಮುಗ್ಧ್ ಸೆವ್ಲಿಲಾಚೆಂ ನಿಸ್ಕಳ್ಪಣ್ ತುಂವೆಂ ಲುಟ್ಲೆಂಯ್ …. ಬ್ಯಾವರ್ಶ್ಯಾನೊಂ…” ತೊ ಗಾಳಿ ದೀತ್ತ್ ರಾವ್ಲೊ. ಹ್ಯಾವೆಳಾ ತಾಚಿ ಕ್ರೋಧಾಚಿ ಸಾಯ್, ವರ್ತನ್…ಪಳೆವ್ನ್ ಹಾಚ್ಯಾ ಪೆಂಕ್ಟಾಂತ್ ಬರ್ಫ್ ಚರೊಂಕ್ ಲಾಗ್ಲೆಂ.
“ಬಲತ್ಕಾರ್!… ತುಮಿಂ ತೆಗಾಂನಿಂ ಸೆವ್ಲಿಲಾಚೆರ್ ಬಲತ್ಕಾರ್ ಕೆಲೆಂ.” ತೊ ರಾಗಾನ್ ವೋಂಟ್ ಚಾಬ್ತಾಸ್ತಾನಾಂ…ತಾಣೆಂ ಆಪ್ಲ್ಯಾ ಹಾತಾನ್ ರಾಯನಾಚ್ಯಾ ಗೊಮ್ಟೆಕ್ ಧರ್ಲೆಂ.
ತ್ಯಾಘಡ್ಯೆ ತಾಚ್ಯಾ ಹಾತಾಚ್ಯಾ ಮುಟಿಚೊ ಭಾಂದ್ ಹಾಕಾ ಉಸ್ವಾಸ್ ಬಾಂದ್ಲೆಲ್ಯಾಪರಿಂ ದಾಂಬುನ್ ಆಸ್ತಾನಾಂ …ತಾಣೆಂ ಪರತ್ ಸವಾಲ್ ಕೆಲೆಂ…
“ಆತಾಂ ತೆ ಉರ್‌ಲ್ಲೆ ದೋಗ್ ಬ್ಯಾವರ್ಶಿ … ಖಂಯ್ಸರ್ ಆಸಾತ್ ?”…
“ಕೆ…ಕೆವಿನ್ ಆನಿ ಸ್ಟೀವನ್. ತೆ ದೊಗೀ …
ಕೆವಿನ್ ರೋಲಾ ಫ್ಲ್ಯಾಟಾಂತ್ ಆಸ್ಚ್ಯಾ ಜೋಯ್ನ್ ಪಿ.ಜಿ. ಸೆಂಟರಾಂತ್… ಆನಿ ಸ್ಟೀವನ್ ತಾಚ್ಯಾಚ್ಚ್ ಘರಾ.” ಜಾಪ್ ದಿಲಿ ರಾಯನಾನ್ ಬಾಂದ್ಪಾಸಾ ಥಾವ್ನ್ ಸುಟೊಂಕ್.
ಆತಾಂ ಏಕ್ ಘಡಿ ಸಾಂತಾಕ್ಲೊಸ್ ಮಾವ್ನ್ ಜಾಲೊ. ಆನಿಂ ತ್ಯಾ ಮಾವ್ನಾಂತ್ ಭಯಾನಕ್ ಚಿಂತ್ನಾಂ ಧಾಂವಾತ್ ಆಸ್ಲಿಂ. ಥೊಡ್ಯಾಚ್ಚ್ ಸೆಕುಂದಾನಿಂ ಥಟ್ಟ್ ಕರುನ್ ತೊ ವಿಚಾರಿಲಾಗ್ಲೊ…
“ಆತಾಂ ಹ್ಯಾ ಆಯಿನ್ನ್ ಘಡ್ಯೆ ತೆ ಖಂಯ್ಸರ್ ಆಸಾತ್ ಮ್ಹಣ್ … ಫೋನ್ ಕರುನ್ ವಿಚಾರ್.”
“ತೆ ಡಿಂಪಲ್ ರೆಸೋರ್ಟಾಂತ್ ಕ್ರಿಸ್ಮಸ್ ಆಚರಣ್ ಕರುನ್ ಆಸಾತ್.” ತಾಚ್ಯಾ ಹಾತಾಂತ್ ಉಸ್ಮೊಡೊನ್ ಆಸ್ಚೊ ರಾಯನ್ ಪುಸ್ಪುಸ್ಲೊ. “ಆಜ್ ಸಾಂಜೆರ್ ಮೀಸ್ ಜಾತಚ್ ಆಮಿಂ ಎಕಾಮೆಕಾ ವಿಶ್ ಕರ್ನ್ ಉಲಯಿಲ್ಲ್ಯಾಂವ್. ತೆ ರೆಸೋರ್ಟಾಕ್ ವೆತಾಂವ್ ಮ್ಹಣಾಲೆ. ಆನಿಂ ಹಾಂವೆಂ ಜೊವಿಟಾ ಸಂಗಿಂ…ಸೆಲೆಬ್ರೇಟ್ ಕರುಂಕ್ ಚಿಂತ್ಲೆಂ.”
ಅಶೆಂ ತೊ ಮ್ಹಣ್ತಾಸ್ತಾಂ…ಸಾಂತಾಕ್ಲೊಸಾನ್ ತಾಚ್ಯಾ ಗೊಮ್ಟೆ ವಯ್ಲಿ ಮೂಟ್ ಸಡಿಳ್ ಕೆಲಿ. ತರೀ…ತಾಚೆ ದೊಳೆ ಮಾತ್ರ್ ಹಾಚೆರ್‌ಚ್ಚ್ ಖಿಳೊನ್ ಆಸ್‌ಲ್ಲೆ. ಹ್ಯಾವೆಳಾ …ತೊ ಮತಿಂತ್ ಕಸಲ್ಯಾಗೀ ಗೂಂಡ್ ಚಿಂತ್ನಾಂನಿಂ ಆಸಾ ಮ್ಹಣ್ ರಾಯನಾನ್ ಪಾರ್ಕಿಲೆಂ.
ಹೊ ಸಾಂತಾ …‘ಕಸಲ್ಯಾ ಖಾತಿರ್ … ಕಸಲೆಂ ಸ್ಕೆಚ್ಚ್ ಘಾಲುನ್ ಆಸಾ.?!’ ಮ್ಹಳ್ಳೆಂ ಕಾಳಿಜ್ ಶಿರ್ಶಿರಾಂವ್ಚೆಂ ಸವಾಲ್ ರಾಯನಾಚ್ಯಾ ಮತಿಂ ಘುಂವಾತ್ತ್ ಆಸ್ತಾನಾಂ … ತೊ ಸಗ್ಳೊಚ್ ಗಳೊನ್ ಗೆಲೊ. ತ್ಯಾಚ್ಚ್ ವೆಳಾ … ಸಾಂತಾಕ್ಲೊಸ್ ವಿಚಾರಿಲಾಗ್ಲೊ …
“ತಾಂಚ್ಯಾ ಲಾಗಿಂ ಕಾರ್ ಆಸಾಮೂ?”
“ವ್ಹ … ವ್ಹಯ್ … ಸ್ಟೀವನಾಚ್ಯಾ ಕಾರಾರ್ ತೆ ಥಂಯ್ಸರ್ ಗೆಲ್ಯಾತ್.” ಭಿರಾಂತೆಚಿ ಕ್ಶೀಣ್ ಜಾಪ್ ರಾಯಾನಾಚಿ.
“ಒ.ಕೆ. ಆತಾಂ ತಾಂಕಾ ಫೋನ್ ಕರ್…ಆನಿ ಹಾಂಗಾಚ್ ಹ್ಯಾ ತಳ್ಯಾಲಾಗಿಂ ತಾಂಕಾ ಆಪಯ್.” ಸಾಂತಾಕ್ಲೊಸಾನ್ ಆಪ್ಲ್ಯಾ ಸ್ಕೆಚ್ಚಾಚ್ಯಾ ಆರಂಭೆಕ್ ಬುನ್ಯಾದ್ ಘಾಲಿ.
“ಪೂಣ್ … ತೆ … ಥಂಯ್ಸರ್ ಕ್ರಿಸ್ಮಸ್ ಆಚರುನ್ ಆಸ್ತಾಂ…”
“ಪೂಣ್ ಗೀಣ್ ಕಾಂಯ್ನಾ…” ಮಧೆಂಚ್ಚ್ ಬಡ್ಬಡ್ಲೊ ಸಾಂತಾಕ್ಲೊಸ್. “ತಾಂಕಾಂ… ‘ಹಾಂಗಾಸರ್ ಹ್ಯಾಚ್ಚ್ ತಳ್ಯಾ ಸರ್ಶಿಂಚ್ಚ್ ಕ್ರಿಸ್ಮಸ್ ಆಚರಣ್ ಕರ್ಯಾಂ’… ಮ್ಹಣ್ ಸಾಂಗೊನ್ ತಾಂಚೆ ಮನ್ ಬದ್ಲಿಶೆಂ ಕರ್ ಆನಿ ಆಪಯ್. ಆನಿ ತಿ ತುಜಿ ಜವಾಬ್ದಾರಿ.” ರಾಯನಾಚೆರ್ ದೊಳೆ ಖಂಚೊವ್ನ್ ಮ್ಹಣಾಲೊ ತೊ. ಆನಿ ಪರತ್ ಮುಂದರುನ್ ಮ್ಹಣಾಲೊ…
“ರಾಯನ್… ಮ್ಹಾಕಾ ಏಕ್ ಆಶಾ…ತುಮಿಂ ತೆಗಾಂಯ್ನೀ ಏಕ್ ಜಾವ್ನ್ ಹಾಂಗಾಸರ್ ಪರತ್ ಮೆಳಾಜಾಯ್ ಮ್ಹಳ್ಳಿ ಆಶಾ.!.”
ಹೆಂ ಆಯ್ಕಾತಾಂ, ರಾಯನಾಚೆಂ ಆಂಗ್ ಶಿಶರ್ಶಿರೊಂಕ್ ಲಾಗ್ಲೆಂ…‘ಯೆದೊಳ್ ಹಾಂವ್ ಹಾಚ್ಯಾ ವಿಕಾರ್ ಜುಲುಮೆಚ್ಯಾ ಶಿರಿಗುಂಡಿಂತ್ ಶಿರ್ಕೊನ್ ಆಸಾ. ಆತಾಂ ತಾಂಕಾಯೀ ಅಸಲಿಚ್ ಆಪಾಯೆಚಿ ಸಾವ್ಳಿ ರಾಕೊನ್ ಆಸಾ…!’ ಮ್ಹಳ್ಳೆಂ ಭಿರಾಂತೆನ್ ತಾಣೆಂ ಮೊಬಾಯ್ಲ್ ಭಾಯ್ರ್ ಕಾಡ್ಲೆಂ. ಆನಿ ಮೊಬಾಯ್ಲ್ ನಂಬ್ರಾಂ ದಾಂಬ್ತಾಸ್ತಾಂ…
ತವಳ್‌ಚ್ಚ್ ಸಟ್ಟ್ ಕರುನ್, ಸಾಂತಾಕ್ಲೊಸಾಚ್ಯಾ ಹಾತಾಂ ಥಾವ್ನ್ ಬಚಾವಿ ಜೊಡ್ಚಿ ಆಲೊಚೆನ್ ಮತಿಕ್ ಘುಸ್ಲಿ!
‘ಕೆವಿನ್ ಆನಿ ಸ್ಟೀವನ್ ಹಾಂಗಾಸರ್ ಪಾವ್ಲೆಲ್ಯಾ ತವಳ್ … ಆಮಿ ತೇಗ್ ಜಾತಾಂವ್. ಆನಿ ಹೊ ಎಕ್ಲೊ!.
ಅಸಲ್ಲ್ಯಾ ತ್ಯಾ ಆಯಿನ್ನ್ ಘಡಿಯೆ … ಯೋಗ್ಯ್ ಆವ್ಕಾಸಾಕ್ ದಾವ್ಲಿ ಮಾರ್ಚೆಂ. ಆನಿ ಮೆಳ್ಳೆಲ್ಲ್ಯಾ ಆವ್ಕಾಸಾಚೊ ಫಾಯ್ದೊ ಜೊಡುನ್ … ಹಾಚೆರ್ ಆಮ್ಚೆಂ ತೆಗಾಂಚೆಂ ಬಳ್ ಉಪಯೋಗ್ಸುನ್, ಬಲತ್ಕಾರಾನ್ ಹಾಚೆ ಥಾವ್ನ್ ಸುಟ್ಕಾ ಘೆಂವ್ಚಿ. ಆನಿ ಸ್ಟೀವನ್ ಆಯ್ಲೆಲ್ಯಾ ಕಾರಾರ್ ಪೋಳ್ನ್ ಧಾಂವ್ಚೆಂ.!’
***
ಕಾರಾಚೊ ಪ್ರಕಾಸ್ … ತಳ್ಯಾಚಾ ಉದ್ಕಾಂತ್ ಜಗ್ಲಾಣ್ಯಾಪರಿಂ ಪ್ರಕಾಸ್ ದಿತಾಸ್ತಾಂ … ಕಾಳೊಕಾಂತ್ ಲಿಪೊನ್ ಆಸ್ಚೊ ಸಾಂತಾಕ್ಲೊಸ್ ಚುರುಕ್ ಜಾಲೊ.!.
ಆನಿ ತೊ ಆನಿಕೀ ಕಾಳೊಕಾಂತ್ಲ್ಯಾ ಆಡೊಸಾಕ್ ಗೆಲೊ. ತವಳ್ ರಾಯಾನ್ ಯೆದೊಳ್‌ಚ್ ಸಾಂತಾಕ್ಲೊಸಾನ್ ಸಾಂಗ್ಲೆಲ್ಯಾಪರಿಂ ಮಾತ್ಸೆಂ ಮುಕಾರ್ ವೆಚ್ಯಾಕ್ ಮೇಟ್ ದವರಿಲಾಗ್ಲೊ.
ಆತಾಂ ತ್ಯಾ ಗಾಡ್ ಕಾಳೊಕಾಂತ್ಲೆ ತೆ ದೊಗೀ …ಸಾಂತಾಕ್ಲೊಸ್ ಆನಿ ರಾಯಾನ್…
ಆಪಾಪ್ಲ್ಯಾ ಯೋಜನೆಚ್ಯಾ ಅವಿಶ್ಕಾರಾಚೆರ್ ಮಗ್ನ್ ಜಾವ್ನ್ ಆವ್ಕಾಸಾಕ್ ರಾಕೊನ್ ಆಸ್‌ಲ್ಲೆ.
ಸಾಂತಾ ಆಪ್ಣೆಂ ಮಾಂಡ್ಲೊಲೊ ಪಾಸ್ ಘಾಲ್ಚ್ಯಾಕ್…ತಯಾರ್ ಕರ್ನ್ ಆಸ್ಲ್ಲೊ ತರ್…
ರಾಯನ್ ತಾಚ್ಯಾ ಪಾಸಾ ಥಾವ್ನ್ ಚುಕೊವ್ನ್ ಘೆವ್ನ್ ಪೊಳಾಪಳ್ ಘೆಂವ್ಚ್ಯಾ ತಯಾರೆರ್ ಆಸ್ಲ್ಲೊ.!
ಅಸಲ್ಯಾ ಪರಿಗತೆರ್…ಯೆಕಾಚ್ಚಾಣೆಂ ಸಾಂತಾಕ್ಲೊಸಾಚೊ ಜಡ್ ಹಾತ್…ರಾಯಾನಾಚ್ಯಾ ಭುಜಾರ್ ಬಸ್ಲೊ!. ಆನಿ ಗಂಭೀರ್ ಪುಸ್ಪುಸೊ ತಾಳೊ ಕಾಡ್ನ್ ಮ್ಹಣಾಲೊ…“ತುಜೆಂ ಮೊಬಾಯ್ಲ್ ಹೆವ್ಶಿನ್ ದಿ.”
ತ್ಯಾಘಡ್ಯೆ … ಉಪಾವ್ ನಾಸ್ತಾಂ ಮೊಬಾಯ್ಲ್ ಯಾಂತ್ರಿಕಾಯೆನ್ ಸಾಂತಾಕ್ಲೊಸಾಚ್ಯಾ ಹಾತಿಂ ಹಸ್ತಾಂತರ್ ಕರ್ತಾಸ್ತಾಂ… ‘ಆಪ್ಲ್ಯಾ ಬಚಾವೆ ಯೋಜನೆಕ್ ಹಿ ಏಕ್ ಸಲ್ವೊಣಿ?!’ ಮ್ಹಳ್ಳೊ ದುಬಾವ್ ತಾಕಾ ಕಠಿಣ್ ಥರಾನ್ ಧೊಸುಂಕ್ ಲಾಗ್ಲೊ.
ತಿತ್ಲ್ಯಾರ್ ಸ್ಟೀವನಾಚೆಂ ಮಾರುತಿ ವ್ಯಾಗನರ್ ಹಳ್ತಾರ್ ಚರೊನ್ ಮುಕಾರ್ ಯೇವ್ನ್ ತ್ಯಾ ಕಾಳಾಕಾಂತ್ ರಾಯನಾಚ್ಯಾ ಮುಕಾರ್ ಯೇವ್ನ್ ರಾವ್ಲೆಂ.
ಆತಾಂ ಕಾಳಾಕಾಂತ್ ಉಬೆ ಆಸ್ಚೆ ಹೆ ದೊಗೀ ವಿವಿಂಗಡ್ ಆವ್ಕಾಸಾಕ್ ರಾಕೊನ್ ಆಸ್‌ಲ್ಲೆ.
ರಾಯನಾ ಪಾಟ್ಲ್ಯಾನ್ ಲಿಪೊನ್ ಆಸ್ಚೊ ಸಾಂತಾಕ್ಲೊಸ್ … ಕಾರಾ ಭಿತರ್ಲೊ ಕೋಣ್ ಪಯ್ಲೊ ಭಾಯ್ರ್ ಯೆತಾ…ಆನಿ ತಾಚೆರ್ ಕಶೆಂ ಜಗ್ಲಾಣ್ಯಾ ವೇಗಾನ್ ಆಕ್ರಮಣ್ ಕರ್ಚೆಂ?!…ಮ್ಹಳ್ಳ್ಯಾ ಆವ್ಕಾಸಾಕ್ ರಾಕೊನ್ ಆಸ್ಲ್ಲೊ ತರ್…
ರಾಯನ್… ದಾರ್ ಉಗ್ತೆಂ ಜಾಲ್ಲೆಂಚ್…ಏಕ್ ಪಾವ್ಟಿಂ ಕಾರಾ ಭಿತರ್ ರಿಗುನ್ ಸಾಂತಾಕ್ಲೊಸಾಚ್ಯಾ ಹಾತಾಂ ಥಾವ್ನ್ ಸುಟ್ಕಾ ಆಪ್ಣಾಂವ್ಕ್ ಮೆಳ್ಚ್ಯಾ ಆವ್ಕಾಸಾಕ್ ರಾಕೊನ್ ಆಸ್ಲ್ಲೊ!.
ಅಸಲ್ಯಾ ಪರಿಗತೆರ್ ರಾಯನ್ ಕಾರ್ ರಾವ್‌ಲ್ಲೆಂಚ್ಚ್ ಎಕಾಚ್ಚಾಣೆಂ ಚುರುಕ್ ಜಾಲೊ. ಆನಿಂ ಅಮ್ಸೊರಿಂ ಪಾವ್ಲಾಂನಿ…ಎಕಾಚ್ಚಾಣೆಂ ಭಿತರ್ ರಿಗ್ಚ್ಯಾ ಪ್ರೇತನಾರ್ ಪಡ್ಲೊ. ತ್ಯಾ ಆಯಿನ್ನ್ ಘಡ್ಯೆ…
ರಾಯಾನಾಚ್ಯಾ ಚುರುಕಾಯೆರ್ ದುಬಾವ್ಲೊಲೊ ಸಾಂತಾಕ್ಲೊಸ್…ಖಿಣಾನ್ ರಾಯಾನಾಚ್ಯಾ ಚುರುಕಾಯೆಕ್ ಮಿರ್ವೊನ್ ರಾಯಾನಾಚ್ಯಾ ಪಾಟ್ಲ್ಯಾನ್ ಬೋವ್ ಸರ್ಶಿಂ ಪಾವ್ಲೊ. ಆನಿ ಘಳಾಯ್ ಕರಿನಾಸ್ತಾಂ ರಾಯಾನಾಕ್ ಬಳಾನ್ ಏಕ್ ಧಕ್ಕೊ ದಿಲೊ.
ಆನಿ ಯೆದೊಳ್‌ಚ್ಚ್ ಉಗ್ತೆಂ ಆಸ್ಲೆಲ್ಯಾ ಕಾರಾಚ್ಯಾ ಪಾಟ್ಲ್ಯಾ ದಾರಾ ಭಿತರ್ ತಾಕಾ ಲೊಟ್ಲೊ. ಆನಿ ಆಪುಣೀ ತ್ಯಾಚ್ಚ್ ಚುರುಕಾಯೆನ್ ಕಾರಾ ಭಿತರ್ ರಿಗ್ಲೊ.!.
ಹೆಂ ಅನಿರೀಕ್ಶಿತ್ ಘಡಿತ್ ರಾಯನಾ ಸಂಗಿ…ಮುಕ್ಲ್ಯಾ ಸಿಟಿರ್ ಆಸ್ಚ್ಯಾ ತಾಂಕಾ ದೊಗಾಂಯ್ಕೀ ಧಿಘ್ಭ್ರಾಂತ್ ಕರಿಲಾಗ್ಲೆಂ. ನಂತರ್…ಸಾಂತಾಕ್ಲೊಸಾನ್ ಘಳಾಯ್ ಕೆಲಿನಾ. ಶೀದಾ ಗಜಾಲಿಕ್ ದೆವ್ಲೊ.
“ಸ್ಟೀವನ್…” ಮ್ಹಣಾಲೊ ತೊ … ತುಂ ಸೆವ್ಲಿಲಾಕ್ ವೊಳ್ಕಾತಾಯ್?”
ಆಪ್ಣೆಂ ನಿರೀಕ್ಶಾ ಕರಿನಾತ್ಲೆಲೆಂ ಸವಾಲ್ ಆಯ್ಕೊನ್ ಏಕ್ ಪಾವ್ಟಿಂ ತೊ ಘುಸ್ಪಡೆಕ್ ಒಳಗ್ ಜಾಲೊ ತರೀ… ತಕ್ಶಣ್ ಮ್ಹಣಾಲೊ…
“ನಾಂ…ಕೋಣ್ ಸೆವ್ಲಿಲ್?!”…
“ಆನಿಂ ತುಂ ಕೇವಿನ್…?” ತಕ್ಶಣ್ ದುಸ್ರೆಂ ಸವಾಲ್ ಕೆವಿನಾಕ್ ವಿಚಾರಿಲಾಗ್ಲೊ ಸಾಂತಾ.
‘ಹೊ ಬಹುಶ್ಹಾ ಪೊಲಿಸ್ ಡಿಟೆಕ್ಟಿವ್!’ ಮ್ಹಣ್ ಯೆದೊಳ್‌ಚ್ ಅಂದಾಜ್ ಕೆಲ್ಲ್ಯಾ ಕೆವಿನಾನ್ ಖಿಣಾನ್ ಫಟ್ ಮಾರ್ಲಿ.
“ನಾಂ ಹಾಂವ್ ವೊಳ್ಕಾನಾಂ…”
“ಒ.ಕೆ. ತುಮಿಂ ದೊಗೀ ವಳ್ಕಾನಾಂತ್. ಆನಿ ರಾಯನ್…ತುಂ ಸೆವ್ಲಿಲಾಕ್ ಘೆವ್ನ್ ಹಾಂಗಾಸರ್…ಹ್ಯಾ ತಳ್ಯಾ ಸರ್ಶಿಂ ಆಯಿಲ್ಲೊಯ್ ಮ್ಹಣ್ ಯೆದೊಳ್‌ಚ್ ಒಪ್ಲಾಯ್. ವ್ಹಯ್ ಮೂ?”
ಹೆಂ ಆಯ್ಕಾತಾಂ ರಾಯನ್ ಖಿಣಾನ್ ಥಂಡ್ ಜಾಲೊ. ಆನಿ ಜಾಪ್ ದೀಂವ್ಕ್ ಚಡ್ಪಡುಂಕ್ ಲಾಗ್ಲೊ. ತವಳ್‌ಚ್ ಸಾಂತಾಕ್ಲೋಸಾನ್ ಭೆಶ್ಟಾವ್ಣೆಚೊ ಜೊರಾನ್ ಆವಾಜ್ ದಿಲೊ…
“ವ್ಹಯ್ ಗೀ ನೈಂ…ಜಾಪ್ ದೀ ”.
“ವ್…ವ್ಹಯ್ …” ಉಡೊನ್ ಪಡ್‌ಲ್ಲೊ ರಾಯನ್ ಎಕಾಚ್ಚಾಣೆಂ ಉಸ್ಮಡ್ಲೊ. ತವಳ್‌ಚ್ ಸಾಂತಾನ್ ಮುಂದರಿಲೆಂ…
“ಆನಿ ಸೆವ್ಲಿಲಾಚಿ ವಳಕ್ ನಾ ಮ್ಹಣ್ತೆಲ್ಲ್ಯಾ ತುಮಿಂ…ಸ್ಟೀವನ್ ಆನಿಂ ಕೆವಿನ್…
ತುಮಿಂ ಹ್ಯಾ ವಿಶ್ವಾಸಿ ಘಾತ್ಕಿ…ಪಡ್ಪೊಶಿ ರಾಯಾನಾಕ್ ಪಾತ್ಯೆವ್ನ್ ಆಯ್ಲೆಲ್ಯಾ ತ್ಯಾ ಮುಗ್ಧ್ ಸೆವ್ಲಿಲಾಚೆರ್ ಬಲತ್ಕಾರ್ ಚಲಯ್ಲೊ!.
ತಾಚೊ ನಿಮಾಣೊ ಉಸ್ವಾಸ್ ಆಸ್ಚ್ಯಾ ಪರ್ಯಾಂತ್ ತಾಚ್ಯಾ ಜಿವಾಚೆರ್ ತುಮ್ಚೊ ಲೈಂಗಿಕ್ ಹೊರ್ಬೊಸ್ ತುಮಿ ನಿವೊಯ್ಲೊ…” ತಾಚೊ ಕಠಿಣ್ ಕ್ರೋಧಾಚೊ ತಾಳೊ ಕಾರಾ ಭಿತರ್ ಭಯಾನಕ್ ಆವಾಜಾನ್ ಮುಂದರುನ್ ಆಸ್ ಲ್ಲೊ!
ಪೂಣ್ ಹೆಂ ಆಯ್ಕೊಂಚ್ಯಾ ಸ್ಥಿತೆರ್ ತೆ ತೆಗೀ ನಾತ್ ಲ್ಲೆ.!. ಕಠಿಣ್ ಥರಾನ್ ಕಾಂಪೊನ್ ಆಸ್ಲೆಲೆ ತೆ ತ್ಯಾಘಡಿಯೆ ಸಗ್ಳೆಚ್ಚ್ ಅಸ್ಕತ್ ಜಾಲ್ಲೆ.!!. ಭಿರಾಂತೆ ನದ್ರೆನ್ ತೆ ಎಕಾಮೆಕಾ ಪಳೆವ್ನ್ ಭಿಂಯಾನ್ ಕಡ್ಕಡೊನ್ ಆಸ್ತಾಂ … ಎಕಾಚ್ಚಾಣೆಂ … ಸಾಂತಾಕ್ಲೊಸಾಚೊ ಗ್ಲೌಜ್ ಘಾಲ್ಲೊ ಬಳಾದಿಕ್ ಹಾತ್…
ಡ್ರೈವರ್ ಸಿಟಿರ್ ಆಸ್ಚ್ಯಾ ಸ್ಚೀವನಾಚ್ಯಾ ಗೊಮ್ಟೆರ್ ಬಸ್ಲೊ!.
ಆತಾಂ ಹ್ಯಾ ತಾಚ್ಯಾ ಅನಿರೀಕ್ಶಿತ್ ಆಕ್ರಮಣಾನ್ ಉಸ್ವಾಸ್ ಬಾಂದ್ಲೆಲೆಲ್ಯಾಪರಿಂ ಜಾವ್ನ್ ಧಡ್ಭಡುಂಕ್ ಲಾಗ್‌ಲ್ಲೊ ಸ್ಟೀವನ್…ದುಸ್ರೆಘಡ್ಯೆ ಜೀವನ್ಮರಣಾರ್ ಹಾತ್ ಪಾಂಯ್ ಮಾರಿಲಾಗ್ಲೊ.!. ತ್ಯಾಚ್ಚ್ ಘಡ್ಯೆ…ಸ್ಟೀವನಾಚ್ಯಾ ದೆಗೆಲೊ…
ಕೆವಿನ್…ಖಿಣಾನ್…
ಕಾರಾ ಭಿತರ್ಲ್ಯಾ ಭಿರಾಂಕುಳ್ ಆವಾಜಾಕ್ … ಬಚಾವೆಚ್ಯಾ ಧಾಂವ್ಣೆ ಖಾತಿರ್ ಸಟ್ಟ್ ಕರುನ್ ಕಾರಾಚ್ಯಾ ಬಾಗ್ಲಾಕ್ ಹಾತ್ ವ್ಹರಿಲಾಗ್ಲೊ. ತಿತ್ಲೆಂ ಮಾತ್ರ್ ತೊ ಜಾಣಾಂ … ದುಸ್ರೆಚ್ಚ್ ಘಡ್ಯೆ …
ಸಾಂತಾಕ್ಲೊಸಾಚೊ ದಾವೊ ಹಾತ್ … ವೀಜ್ ವೆಗಾನ್ ತಾಚ್ಯಾ ಗೊಮ್ಟೆ ಭಂವ್ತಿ ಭಳಾನ್ ರೆವೊಡ್ಲೊ.!.
ಆನಿಂ ಆತಾಂ ಥೊಡ್ಯಾಚ್ಚ್ ಸೆಕುಂದಾಂ ಆದಿಂ ಕಾರಾ ಭಿತರ್ ಜಾಲ್ಲೊ … ಜಿವನ್ಮರಣಾಚೊ ಭಿರಾಂಕುಳ್ ಆವಾಜ್ ಆತಾಂ ಪರತ್ ಜಾಂವ್ಕ್ ಲಾಗ್ಲೊ…
ಆನಿ ನಿಮಾಣೆಂ… ಸ್ಟೀವನಾಪರಿಂ ವಳ್ವಳ್ಯಾಂನಿ ಜೀವ್ ಸೊಡ್ಚಿ ಸ್ಥಿತಿ…ಕೆವಿನಾಚಿಯೀ ಜಾಲಿ!.
ಹೆಂ ಸಗ್ಳೆಂ ಏಕ್ ದೋನ್ ಮಿನುಟಾಂ ಭಿತರ್ ಘಡುನ್ ಗೆಲೆಂ. ಆತಾಂ ಕಾರ್ ಸಗ್ಳೆಂ ಮೌನಾಂತ್ ಬುಡೊನ್ ಕಾರಾ ಭಿತರ್ ಫಕತ್ತ್ ಸಾಂತಾಚೊ ದೀರ್ಘ್ ಖರ್ಶೆವ್ಣೆಚೊ ಆವಾಜ್ ಉಟೊನ್ ಆಸ್ತಾಂ…
ರಾಯನಾಕ್ ಆಪ್ಲಿ ಮರಣಾ ಸಾವ್ಳಿ ವಯ್ರ್ ವಯ್ರ್ ಧೊಸುಂಕ್ ಲಾಗ್ಲಿ.!.
ಹ್ಯಾ ಭಿರಾಂಕುಳ್ ಪರಿಗತೆರ್ … ರಾಯಾನಾಕ್ …‘ಹೊ ಅಪರಿಚಿತ್ ವೆಕ್ತಿ … ಡಿಟೆಕ್ಟಿವ್ ಖಂಡಿತ್ ನ್ಹಂಯ್…!.ತಶೆಂ ತರ್…‘ಹೊ ಕೋಣ್?!’ ಮ್ಹಣ್ ಮತಿಂ ಧೊಸುನ್ ಆಸ್ತಾಂ … ಅಸಹಾಯೆಕೆನ್ ಬುಡ್ಲೊಲೊ ತೊ..ಕುಡಿಂತ್ ಅಸ್ಕತ್ ಆನಿ ಮತಿಂತ್ ನಿಸ್ತೇಜ್ ಜಾಲೊ.!. ತ್ಯಾಚ್ಚ್ ವೆಳಾ…
ಸಾಂತಾಕ್ಲೊಸಾನ್ ತಾಕಾ ಫರ್ಮಾಂವ್ಚೊ ಗಂಭೀರ್ ತಾಳೊ…ತಾಕಾ ಎಕಾಚ್ಚಾಣೆಂ ಉಡೊನ್ ಪಡಾಶೆಂ ಕೆಲೊ…
“ದೇಂವ್…ಸಕ್ಲಾ…ದೆಂವ್…”. ಉತ್ರಾಂ ಬರಾಬರ್ ಸಾಂತಾಕ್ಲೊಸಾನ್…ತಾಕಾ ಕಾರಾ ಥಾವ್ನ್ ಧರ್ನ್ ವೋಡ್ನ್ ಭಾಯ್ರ್ ಹಾಡ್ಲೊ!. ಆನಿ ಡ್ರೈವರ್ ಸಿಟಿ ದೆಗೆಲೆಂ…ಕಾರಾಚೆಂ ಬಾಗಿಲ್ ವೋಡ್ನ್ ಉಗ್ತೆ ಕೆಲೆಂ. ತವಳ್…ಸಾಂತಾಚ್ಯಾ ಕ್ರೋಧಾಚಿ ಗಂಭೀರತಾ ತಾಕಾ ಆಪ್ಲ್ಯಾ ಮರ್ಣಾಚೊ ದರ್ವಾಟೊ ದಾಕಯ್ಲಾಗ್ಲಿ!.
ತವಳ್‌ಚ್ಚ್ … ಕಾರಾಚ್ಯಾ ಡ್ರೈವರ್ ಸಿಟಿ ದೆಗೆಲೆಂ ಬಾಗಿಲ್ ವೋಡ್ನ್ ಉಗ್ತೆಂ ಕೆಲೆಂ.
‘ಡಭ್ಭ್’
ಆತಾಂ ಬಾಗ್ಲಾಕ್ ವೊಣ್ಕೊನ್ ಆಸ್ಚಿ ಸ್ಟೀವನಾಚಿ ನಿರ್ಜೀವ್ ಕೂಡ್ … ದರ‍್ಣಿರ್ ಗಳ್ಳಿ!.
ತ್ಯಾಚ್ಚ್ ಘಡ್ಯೆ ಸಾಂತಕ್ಲೊಸಾನ್ … ಆಪ್ಲೊ ತಾಂಬ್ಡೊ ವ್ಹಡ್ ದೊಗ್ಲೊ ಆಪ್ಲ್ಯಾ ಆಂಗಾ ಥಾವ್ನ್ ನಿಕ್ಳಾಂವ್ಕ್ ಆರಂಭಿಲೆಂ. ಹೆಂ ಪಳೆವ್ನ್…‘ಮುಕಾರ್ ಕಿತೆಂ?!’ ಮ್ಹಳ್ಳೆಂ ರಾಯನಾಕ್ ಸಮ್ಜಾನಾಸ್ತಾಂ…ತೊ ಘುಸ್ಪಢ್ ಗೊಂದೊಳಾರ್ ಉರ್ಲೊ. ತವಳ್‌ಚ್…
ಸಾಂತಾ ಮ್ಹಣಾಲೊ… “ಸ್ಟೀವನಾಕ್ ಹೊ ‘ಸಾಂತಾಕ್ಲೊಸ್ ದಗ್ಲೊ’ ಶಿರ್ಕಾಯ್. ಆನಿ ತಾಕಾ ಉಕ್ಲೊನ್ ಡ್ರೈವರ್ ಸಿಟಿರ್ ಪರತ್ ಬಸಯ್.” ಉತ್ರಾಂ ಬರಾಬರ್ ಸ್ಟೀವನಾಕ್ ತಾಂಬ್ಡೊ ದೊಗ್ಲೊ ನ್ಹೆಸಂವ್ಚ್ಯಾಕ್ ರಾಯಾನಾ ಸಂಗಿ ತೊಯೀ ಮೆಳ್ಳೊ. ತವಳ್ ತೊ ಸಾಂತಾ … ಪುಸ್ಪಸೊನ್ ಆಸ್ಲ್ಲೊ…
“ಜೊವಿಟಾ ಪೊಲಿಸಾಂಕ್ … ‘ಹೊ ಸ್ಟೀವನ್ ಸಾಂತಾಕ್ಲೋಸ್ ಜಾವ್ನ್ ತುಜ್ಯಾ ಘರಾ ರಿಗ್‌ಲ್ಲೊ ಮ್ಹಣ್ ಸಾಂಗ್ತೆಂಲೆಂ.!.”
ಆತಾಂ ಸಗ್ಳೊಚ್ಚ್ ಕಠಿಣ್ ಥರಾನ್ ಕಾಂಪೊನ್ ಆಸ್ಚ್ಯಾ ರಾಯನಾನ್ ಕಾಂಪ್ಚ್ಯಾ ಹಾತಾಂನಿ ಸ್ಟೀವನಾಚಿ ನಿರ್ಜೀವ್ ಕೂಡ್ ಕಾರಾರ್ ಬಸಂವ್ಕ್ ಆರಂಭ್ ಕೆಲೆಂ. ಹೆಂ ಸಗ್ಳೆಂ ಚಾರ್ ಪಾಂಚ್ ಮಿನುಟಾಂನಿಂ ಅಕೇರ್ ಜಾತಾಸ್ತಾಂ … ತವಳ್‌ಚ್…
ರಾಯನ್ … ಸಾಂತಾಕ್ಲೊಸಾ ಕುಶಿನ್ ಘುಂವ್ಲೊ. ಆನಿ ಆಪ್ಲೆ ಹಾತ್ ಜೊಡಿಲಾಗ್ಲೊ…
“ಸರ್…ಸರ್…ಪ್ಲೀಜ್ ಮ್ಹಾಕಾ ಮಾಫ್ ಕರ್…ಪ್ಲೀಜ್..ಸರ್…” ಆಪ್ಲ್ಯಾ ಜಿವಾಚಿ ಭಿಕ್ ಮಾಗಿಲಾಗ್ಲೊ ತೊ.
“ರಾಯನ್”…ಮ್ಹಣಾಲೊ ತೊ… “ ತಶೆಂ ತರ್ ಸೆವ್ಲಿಲಾ ತ್ಯಾ ಆಪ್ಲ್ಯಾ ಅತ್ಯಾಚಾರ್ ಘಡ್ಯೆ…ಕಿತ್ಲೆ ಪೊರಾತ್ತುನ್ ಆಸ್‌ಲ್ಲೆಂ ಕೊಣ್ಣಾ…ತ್ಯಾ ದುಕೆಂತ್ ಕಿತ್ಲೆಂ ಉರ್ಡಾಲಾಂ ಕೊಣ್ಣಾ…?!.”
ಹ್ಯಾವೆಳಾ…ಆತಾಂ ತಾಂಬ್ಡೊ ದೊಗ್ಲೊ ನಾತ್ಲೊಲ್ಯಾ…ಫಕತ್ ಧೊವೆಂ ಖಾಡ್ ಭರ್ಲೊಲ್ಯಾ ಸಾಂತಾಕ್ಲೊಸಾಚ್ಯಾ ದೊಳ್ಯಾಂ ಖಾಂಚಿಂನಿ ದುಖಾಂ ದೆಂವ್ಚಿಂ ರಾಯನಾನ್ ಪಳೆಲೆಂ.!. ತ್ಯಾ ಘಡ್ಯೆ ತೊ … ಗಂಭೀರ್ ಮಾವ್ನಾಂತ್ ಬುಡೊನ್ ಆಸ್ಲ್ಲೊ.
‘ಕೆವಿನ್ ಆನಿ ಸ್ಟೀವನಾಕ್ … ತಾಂಕಾ ದೊಗಾಂಯ್ಕೀ ಮಾರ್ಚ್ಯಾ ಆದಿಂ ಅಸೊಚ್ಚ್ ಮೌನ್ ಆಸ್ಲ್ಲೊ.!.’ ಹೆಂ ಮರ್ಣಾ ಭಿರಾಂತೆರ್ ಆಸ್ಚ್ಯಾ ರಾಯಾನಾಕ್ ಜಗ್ಲೊನ್ ಆಸ್ತಾಂ … ಸಾಂತಾಕ್ಲೊಸಾನ್ ತಾಕಾ ಜಾಗೈಲೆಂ…
“ಆತಾಂ ಹೆಂ ಕಾರ್ ಲೊಟುನ್ ತಾಳ್ಯಾಂತ್ ಘಾಲುಂಕ್ ಜಾಯ್ … ಯೆ ಕಾರಾ ಪಾಟ್ಲ್ಯಾನ್ ರಾವ್ ಆನಿ ಕಾರ್ ಲೊಟುಂಕ್ ಮೇಳ್”.
ಥೊಡ್ಯಾ ಸೆಕುಂದಾನಿಂ … ತಾಂಚ್ಯಾ ಬಳಾನ್ .. .ತೆಂ ವ್ಯಾಗ್ನಾರ್ ಹಳ್ತಾರ್ ಚರೊನ್ ವೊಚೊನ್ ತಳ್ಯಾ ಲಾಗಿಂ ಪಾವ್ಲೆಂ.
ದುಸ್ರೆ ಘಡ್ಯೆ ವ್ಹಡ್ ಆವಾಜಾನ್ ಉದ್ಕಾಂತ್ ಪಡ್ತಾಸ್ತಾಂ … ತೆಂ ತಳೆಂ ಸಗ್ಳೆಂ ಖದ್ವಳೊನ್ ವೆತಾಸ್ತಾಂ … ತೆಂ ಮೌನ್ ವಾತಾವರಣ್ ವ್ಹಡ್ ಆವಾಜಾನ್ ಖದ್ವಳೊನ್ ಗೆಲೆಂ! ಆನಿಂ ತೆಂ ಕಾರ್ ಹಳ್ತಾರ್ ಥೊಡೆಂ ಥೊಡೆಂಚ್ಚ್ ತಳ್ಯಾಂತ್ ಬುಡೊಂಕ್ ಲಾಗ್ಲೆಂ. ಹೆಂ ಪಳೆತ್ತ್ ಆಸ್ಲ್ಲೊ ಸಾಂತಾ ಮ್ಹಣಾಲೊ…
“ಆತಾಂ ಹೆಂ ಮರ್ಡರ್ … ಎಕ್ಸಿಡೆಂಟ್ ಮ್ಹಣ್ ಜಾಲೆಂ!.”
ಅಶೆಂ ತೊ ಮ್ಹಣಾತ್ತ್ ಆಸ್ತಾಂ … ಉದ್ಕಾಂತ್ ಬುಳ್ಬುಳೆ ಉಟೊನ್ ಆಸ್ಚೆಂ ಹೆಂ ಘಡಿತ್ ಪಳೆತ್ತ್ ಆಸ್ಲೆಲ್ಯಾ ರಾಯನಾ ಪಾಟ್ಲ್ಯಾನ್ … ತೊ ಮಾಜ್ರಾ ಪಾಂಯಾನಿಂ ಚರೊಂಕ್ ಲಾಗ್ಲೊ. ಆನಿ ದುಸ್ರೆಚ್ಚ್ ಘಡ್ಯೆ … ಎಕಾಚ್ಚಾಣೆಂ ತಾಣೆಂ ಪಾಂಯ್ ಉಕಲ್ಲೊ … ಆನಿ ಏಕ್ ಬಳಾದಿಕ್ ಖೊಟ್ ರಾಯಾನಾಚ್ಯಾ ಪೆಂಕ್ಟಾರ್ ಘಾಲಿ!.
‘ಭಸಾಲ್ಲ್…!’
ಕಾರಾಚ್ಯಾ ಆವಾಜಾ ನಂತರ್ ಪರತ್ ಏಕ್ ವ್ಹಡ್ ಆವಾಜ್ ತಳ್ಯಾಂತ್ ಉಟ್ಲೊ.! ದುಸ್ರ್ಯಾ ಘಡ್ಯೆ…
ಕೆವಿನ್ ಆನಿ ಸ್ಟೀವನ್ ಕಾರಾಂತ್ ಜಿವನ್ಮರಣಾಂತ್ ಉರ್ಡೊನ್ ಆಸ್ಲೆಲೆ ಪರಿಂ ಆತಾಂ…
ರಾಯನ್ … ಗೂಂಡ್ ತಳ್ಯಾಚ್ಯಾ ಉದ್ಕಾಂತ್ ಜಿವನ್ಮರಣಾಂತ್ ಚಡ್ಪಡೊಂಕ್ ಲಾಗ್ಲೊ!. ಆನಿಂ ತ್ಯಾವೆಳಾ…
ಆದ್ಲ್ಯಾ ಕ್ರಿಸ್ಮಸಾ ವೆಳಾ ಸೆವ್ಲಿಲಾಚೆಂ ಅತ್ಯಾಚಾರ್ ಪಳೆಲ್ಲೆಂ ತೆಂ ತಳೆಂ … ಆತಾಂ … ಅತ್ಯಾಚಾರ್ ಕೆಲ್ಲೆಲ್ಯಾಂಕ್ ಗಿಳಿತ್ತ್ ಗೆಲೆಂ!. ಆನಿಂ ಹೆಂ ಭಯಾನಕ್ ಘಡಿತ್…
ತಳ್ಯಾ ದೆಗೆರ್ ತ್ಯಾ ಅಂದ್ಕಾರಾಂತ್ ಉಬೊ ರಾವೊನ್ … ಪಳೆತ್ತ್ ಆಸ್ಲ್ಲೊ ಸಾಂತಾ … ಎಕಾಚ್ಚಾಣೆಂ ಬೊಬಾಟುಂಕ್ ಲಾಗ್ಲೊ…
“ಹೆಂ ಮ್ಹಜ್ಯಾ ಧುವೆಚೆಂ ಫಾರಿಕ್ಪಣ್ ! …ಫಾರಿಕ್ಪಣ್!! ಮಾಕಾ ಮಾಫ್ ಕರಾ …ಮಾಕಾ ಮಾಫ್ ಕರಾ!!!.”
ತ್ಯಾವೆಳಾ ತಳ್ಯಾಂತ್ ಬುಳ್ಬಳೆ ಉಟೊನ್‌ಚ್ ಆಸ್‌ಲ್ಲೆ! …
ಆನಿಂ … ತ್ಯಾ ಮೌನ್ ಗಾಡ್ ಅಂದ್ಕಾರಾಚ್ಯಾ ವಾತಾವರಣಾಂತ್ … ಸಾಂತಾಚೊ ತಾಳೊ … ಪಾಟಿಂ ಆಯ್ಕಾತೇ ಆಸ್ಲ್ಲೊ …
ಮಾಫ್ ಕರಾ … ಮಾಫ್ ಕರಾ … ಮಾಫ್ ಕರಾ … ಕರಾ … ಕರಾ…!!
ಸೆವ್ಲಿಲಾ ಮ್ಹಜೆಂ ಧುವ್ … ಮ್ಹಜೆಂ ಧುವ್ … ಧುವ್ … ಧುವ್ … ಧು… ಧು… ಧು…!!!.
► ರೋನ್ ರೋಚ್ ಕಾಸ್ಸಿಯಾ.
