ಭೊಶಿ ಭಂವ್ಡಾಯ್ತಾನಾ ಆತಾಂ ಪರತ್ ‘ಬಿಸ್ಪ್’ ಜಾಯ್ ?

ಮಂಗ್ಳುರಾಂತ್ ಕೊಂಕ್ಣಿ ಸಾಹಿತ್ಯ್ ಆನಿ ಸಾದರ್ ಕಲೆ ಖಾತಿರ್ ವಾವುರ್ಚೆ ಜಾಯ್ತೆ ಸಂಸ್ಥೆ ಆಸಾತ್.  ಥೊಡೆ ಮಾಲ್ಘಡೆ, ಥೊಡೆ ತರ‍್ನೆ. ಥೊಡೆ ನೋಂದಾಯಿತ್, ಥೊಡೆ ಖಾಸ್ಕಿ. ಹ್ಯಾ ಪಯ್ಕಿ ಏಕ್ ಸಂಸ್ಥೊ – ಜಾತ್ ಕಿರಿಸ್ತಾಂವಾಂಚೊಂ.

ಎಕಾ ಕೊಂಕ್ಣಿ ಸಂಸ್ಥ್ಯಾಕ್ ಜಾತ್ ಕಿರಿಸ್ತಾಂವಾಂಚೊಂ ಮ್ಹಣ್ ಧರ್ಮಾಚ್ಯಾ ನಾಂವಾನ್ ಫುಕಾರ್ಚೆಂ ಖಂಡಿತ್ ವಾಜ್ಬಿ ನ್ಹಯ್! ಪೂಣ್, ಜ್ಯಾ ಸಂಸ್ಥ್ಯಾಂತ್, ಬಿಸ್ಪ್, ಪಾದ್ರಿ, ಮಾದ್ರಿ ಆನಿ ಲೋಬ್ ನಾ ಜಾಲ್ಯಾರ್ ಆಳುಂಯ್ ಶಿಜಾನಾ ಜಾಲ್ಯಾರ್ ತಸಲ್ಯಾ ಸಂಸ್ಥ್ಯಾಕ್ ಜಾತ್ ಕಿರಿಸ್ತಾಂವ್ ಮ್ಹಣ್ ಫುಕಾರ್ನಾಸ್ತಾನಾ ನಿರ್ವೊಗ್ ನಾ. ಸಂಸ್ತ್ಯಾಚೆಂ ಕ್ರೀಸ್ತಾಂವ್ಪಣ್ ಕಿತ್ಲ್ತ್ಯಾ ವಿಪ್ರೀತ್ಕಾಯೆಕ್ ಪಾವ್ಲಾಂ ಮ್ಹಳ್ಯಾರ್ – ಆತಾಂ ದುಡು ಮಾಗ್ಚಿ ಭೊಶಿ ಭಂವ್ಡಾಂವ್ಕ್ ಹ್ಯಾ ಸಂಸ್ಥ್ಯಾಕ್ ಬಿಸ್ಪ್  ಜಾಯ್ ಪಡ್ಲಾ!

ಕಾಂಯ್ ನಜೊ, ಬಿಸ್ಪಾಂಕ್, ಪಾದ್ರಿಂಕ್, ಮಾದ್ರಿಂಕ್ ಆನಿ ತಾಂಚ್ಯಾ ಲೊಬಾಕ್ ಮುಕಾರ್ ದವರುನ್ ಮಾಗ್‌ಲ್ಲ್ಯಾಂಕ್ ಅಫ್ರಾದ್ ಕಾಂಯ್ ನಾ. ಬಿಸ್ಪ್ ಸಾಯ್ಬಾಂಕ್ ಮುಕಾರ್ ದವರ್ನ್ ಆಮ್ಚ್ಯಾ ಸಮಾಜೆಕ್ ಕಾಸಾಕ್ ಉಪ್ಕಾರಾಕ್ ಪಡಾನಾತ್ಲೆ ಮುಕೆಲಿ ಲೊಕಾಲಾಗಿಂ ವೋಟ್ ಮಾಗ್ತಾನಾ, ಕೊಂಕ್ಣೆ ಖಾತಿರ್ ವಾವುರ್ಚ್ಯಾ ಎಕಾ ಸಂಸ್ಥ್ಯಾನ್ ಬಿಸ್ಪಾಕ್ ವಾ ಪಾದ್ರಿಂ – ಮಾದ್ರಿಂಕ್ ಮುಕಾರ್ ದವರುನ್, ಕೊಂಕ್ಣೆ ಖಾತಿರ್ ಚಾರ್ ಕಾಸ್ ದಾನ್ ಮಾಗ್‌ಲ್ಲ್ಯಾಂತ್ ವ್ಹಡ್ಲೊ ಗುನ್ಯಾಂವ್ ಕಾಂಯ್ ಜಾಯ್ನಾ!

ಪೂಣ್, ಪೂಣ್, ಫೂಣ್ . . .

ಆಜ್ ಬಿಸ್ಪಾಚ್ಯೊ ತಸ್ವಿರ‍್ಯೊ ದಾಕವ್ನ್ ಕೊಂಕ್ಣೆ ಖಾತಿರ್ ದುಡು ಮಾಗ್ಚ್ಯಾ ಸಂಸ್ಥ್ಯಾಚೊ ಸ್ಥಾಪಕ್ ತಶೆಂ ಖಾಯಮ್ ಹುದ್ದೆದಾರಾನ್, ಹ್ಯಾಚ್ ಮಂಗ್ಳುರ್ ಬಿಸ್ಪಾಚೆರ್, ಬೆಬುನ್ಯಾದ್ ಆನಿ ಫಟ್ಕಿರೆ ಅರೋಪ್ ಮಾಂಡುನ್ ಬಿಸ್ಪಾಚೊ ಮಾನ್ ಭಂಗಯಿಲ್ಲೊ ನಂಯ್ಗೀ ? ಹಾಂಗಾಸರ್ ದಿಲ್ಲೆ ದಾಕ್ಲೆ ಪಳಯಾ. ಪ್ರೆಸ್ ಕೊನ್ಫರೆನ್ಸ್ ಆಪವ್ನ್ ಪರ್ಗಟ್ ಮಾದ್ಯಮಾಂನಿ ಮಾಂಡ್‌ಲ್ಲೆ ಫಟ್ಕಿರೆ ಆರೋಪಾಂಚಿಂ ಪಟ್ಟಿ ಪಳಯಾ …

ಪಯ್ಲೊ ಗಂಬೀರ್ ಆರೋಪ್ – ಮಂಗ್ಳುರ್ ದಿಯೆಸೆಜಿಚೊ ಬಿಸ್ಪ್, ಮ್ಹಳ್ಯಾರ್ ಕಥೊಲಿಕ್ ಧರ್ಮ್‌ಪ್ರಾಂತ್ಯಾಚೊ ಧರ್ಮಾಧ್ಯಕ್ಷ್ ಮಂಗಳೂರಿನ ಅತೀ ದೊಡ್ಡ ಭೂಮಾಲೀಕ ಖಂಯ್ ! ಮ್ಹಳ್ಯಾರ್ – ಬೋವ್ ವ್ಹಡ್ ಜಮೀನ್ದಾರ್ ! ತವಳ್ ಅ|ಮಾ| ದೊ| ಲುವಿಸ್ ಪಾವ್ಲು ಸೊಜ್ ಮಂಗ್ಳುರ್ಚೊ ಧರ್ಮಾಧ್ಯಕ್ಷ್ ಆಸ್ಲೊ ಆನಿ ಆತಾಂ ತ್ಯಾ ಜಾಗ್ಯಾರ್ ಅ|ಮಾ| ದೊ| ಪೆದ್ರು ಪಾವ್ಲು ಸಲ್ಡಾನ್ಹ್ ಧರ್ಮಾಧ್ಯಕ್ಷ್ ಆಸಾ. ಚತ್ರಾಯ್ ಆಸುಂ –  ಆರೋಪ್ ಮಾಂಡ್‌ಲ್ಲೊ ಆನಿ ಮ್ಹಳ್ಳೆಂ “ಬಿಷಪ್ ಮಂಗಳೂರಿನ ಅತೀ ದೊಡ್ಡ ಭೂ ಮಾಲೀಕ!” ಅಲೋಶಿಯಸ್ ಪಾವ್ಲು ಡಿ’ಸೊಜಾ ಮ್ಹಣ್ ಮ್ಹಣೊಂಕ್ ನಾ. ದೆಕುನ್ ಪ್ರಸ್ತುತ್ ಬಿಸ್ಪಾನ್ “ತೆಂ ತಾಕಾ ಮ್ಹಳ್ಳೆಂ , ಮ್ಹಾಕಾ ಮ್ಹಣೊಂಕ್ ನಾ” ಮ್ಹಣ್ ಹಾತ್ ಧುವ್ನ್ ಘೆಂವ್ಕ್ ಜಾಯ್ನಾಂತ್! ಆರೋಪ್ ಮಾಂಡ್‌ಲ್ಲೊ ಶೀದಾ ಹುದ್ದ್ಯಾಚೇರ್, ವೆಕ್ತಿಚೇರ್ ನಯ್! ಆನಿ ಹುದ್ದೊ ತರೀ ಖಂಯ್ಚೊ ? ದಿಯೆಸೆಜಿಚ್ಯಾ ಪರಮೋಚ್ಚ್ ವ್ಹಡಿಲಾಚೊ ಅರ್ಥಾತ್ ಬಿಸ್ಪಾಚೊ!

ದುಸ್ರೊ ಆರೋಪ್ ಪಳಯಾ – ಹ್ಯಾ ಮನ್ಶ್ಯಾಚಾ ಪುರ್ವಜಾಂಕ್ ರಾವೊಂಕ್ ಬಿಡಾರ್ ದಿತಾಂವ್ ಮ್ಹಣ್ ಆಶಾ ದಾಕವ್ನ್ ಮತಾಂತರ್ ಕೆಲ್ಲೆಂ ಖಂಯ್! ಆತಾಂ, ಮತಾಂತರ್ ನಿಶೇದ್ ಕಾನುನ್ ಜ್ಯಾರಿಯೆಕ್ ಆಯ್ಲೆಂ ಜಾಲ್ಯಾರ್ ಬಿಸ್ಪಾಚೆರ್, ದಿಯೆಸೆಜಿಚೆರ್ ಮತಾಂತರ್ ನಿಶೇದ್ ಕಾನುನಾಖಾಲ್ ಪ್ರಕರಣ್ ದಾಖಲ್ ಜಾಲ್ಯಾರೀ ಜಾಲೆಂ ! ಥೊಡ್ಯಾ ಸಂದರ್ಬಾಂನಿ ಹಾಂವೆ ವರ್ಸಾಂ ಆದಿಂ ಹೈಪೊಥೆಟಿಕಲೀ ಬರಯಿಲ್ಲೆಂಯ್ ಸತ್ ಜಾಲಾಂ. ಮ್ಹಜೆಲಾಗಿಂ ದೃಶ್ಟಾಂತಾಂ ಆಸಾತ್. ದೆಕುನ್ ಆಜ್ ಕಾಲ್ ಖಂಯ್ಚೀಯ್ ಗಜಾಲ್ ನಿರ್ಲಕ್ಷ್ ಕರುಂಕ್ ಜಾಯ್ನಾ. ದೆಕುನ್ ಬಿಸ್ಪಾನ್ ಆನಿ ದಿಯೆಸೆಜಿಕ್ ಸಂಬಂದ್ ಜಾಲ್ಲ್ಯಾಂನಿ ಆಪ್ಲಿ ಭದ್ರತಿ ಪಳೆವ್ನ್ ಘೆಂವ್ಚಿ ಬರಿ ಮ್ಹಣ್ ಮ್ಹಾಕಾ ದಿಸ್ತಾ.

ತಿಸ್ರೊ ಆನಿ ಮಹಾ ಆರೋಪ್ – ತವಳ್ ಮಂಗ್ಳುರ್ಚೊ ಬಿಸ್ಪ್ ಆತಾಂ ನಿವೃತ್ತ್ ಅ| ಮಾ| ಲುವಿಸ್ ಪಾವ್ಲು ಸೊಜ್ ನಿವೃತ್ತೆ ಉಪ್ರಾಂತ್ ರಾವೊಂಕ್ ಸತ್ರಾ ಕೊರೊಡ್ ರುಪ್ಯಾಂಚಾ ಖರ್ಚಾರ್ ಐಶಾರಾಮಿ ಬೊಂಗ್ಲೊ ಬಾಂದ್ತೇ ಆಸಾ!

ಹ್ಯಾ ಭಾಯ್ರ್ ಕ್ರೀಸ್ತಾಂವ್ ಕುಟ್ಮಾಂಕ್ ಬಿಡಾರಾಂತ್ಲಿಂ ಉಟವ್ನ್ ಕಮರ್ಶಿಯಲ್ ಕೊಂಪ್ಲೆಕ್ಸ್ ಬಾಂದ್ಚಿ ಮಾಂಡಾವಳ್ ಆಸಾ, ಇತ್ಯಾದಿ ಆರೊಪ್‌ಯೀ ಆಸ್‌ಲ್ಲೆ. ಮಾತ್ ನಯ್, ಮಾತ್ರಧರ್ಮಾಕ್ ಪಾಟಿಂ ವೆತಾಂವ್ ಮ್ಹಣ್ ದಿಯೆಸೆಜಿಚ್ಯಾ ವ್ಹಡಿಲಾಂಕ್ ಉಗ್ತ್ಯಾನ್ ಧಮ್ಕೀಯ್ ದಿಲ್ಲಿ ! ಹಾಂಗಾಸರ್ ಸಕಯ್ಲ್ ದಿಲ್ಲೊ ದಾಕ್ಲೊ ಪಳಯಾ …

ಹೆಂ ಜಾವ್ನ್ ಆಜಿಕ್,  ಭರ್ತ್ ಚಾರ್ ವರ್ಸಾಂ ಜಾಲಿಂ. ಹ್ಯಾ ಆವ್ಧೆಂತ್ ಮಂಗ್ಳುರ್ ದಿಯೆಸೆಜಿಕ್ ನವೊ ಬಿಸ್ಪ್ ನೇಮಕ್ ಜಾಲೊ. ಅ| ಮಾ| ದೊ| ಲುವಿಸ್ ಪಾವ್ಲು ಸೊಜ್ ನಿವೃತ್ತ್ ಜಾಲೊ. ಆನಿ ಆತಾಂ, ನಿವೃತ್ತ್ ಬಿಸ್ಪ್ ಲುವಿಸ್ ಪಾವ್ಲು ಸೊಜ್ ಜೆಪ್ಪು ಸೆಮಿನರಿಚ್ಯಾ ಎಕಾ ಲ್ಹಾನ್ ಕುಡಾಂತ್ ವಸ್ತಿ ಕರುನ್ ಆಸಾ. ತಾಚೆಲಾಗಿಂ ಅತ್ಯಾಧುನಿಕ್ ಫೊನ್ ನಾ. ವಾಹನ್ ನಾ, ಚಾಲಕ್ ನಾ. ಖಂಯ್ಸರೀ ವಚೊಂಕ್ ಆಸಾ ಜಾಲ್ಯಾರ್ ಸಾಂಗಾತಿ ಪಾದ್ರ್ಯಾಬ್ ತಾಕಾ ಆಪವ್ನ್ ವರ್ತಾತ್. ತರ್ ಖಂಯ್ ಗೆಲೊ ಖಂಯ್ – ತಾಣೆ ನಿವೃತ್ತೆ ಉಪ್ರಾಂತ್ ರಾವೊಂಕ್ ರುಪಯ್ ಸತ್ರಾ ಕೊರೊಡ್ ಖರ್ಚಾರ್ ಬಾಂದ್‌ಲ್ಲೊ ಐಶಾರಾಮಿ ಬೊಂಗ್ಲೊ ?

ನೇಶನ್ ವಾಂಟ್ಸ್  ಟು ನೊ !

ಆತಾಂ, ಇತ್ಲೆ ಸಗ್ಳೆ ಆರೋಪ್ ದಿಯೆಸೆಜಿಚೆರ್ ಆನಿ ದಿಯೆಸೆಜಿಚ್ಯಾ ನಿಶ್ಪಾಪಿ ಗೊವ್ಳ್ಯಾಚೆರ್ ಮಾಂಡುನ್, ಆತಾಂ ಕೊಂಕ್ಣೆಚ್ಯಾ ನಾಂವಾನ್ ದುಡು ಮಾಗ್ಚಿ ಭೊಶಿ ಭಂವ್ಡಾಯ್ತಾನಾ ತ್ಯಾಚ್ ಬಿಸ್ಪಾಚಿ ತಸ್ವೀರ್ ಪಯ್ಲ್ಯಾನ್ ಪಯ್ಲೆಂ ದಾಕವ್ನ್ ದಾನ್ ಮಾಗ್ತಾತ್‌ಮೂ ? ಲಜ್ ದಿಸಾನಾ ? ವಾಟ್ಸಾಪಾರ್ ತೀನ್ ತೆ ಚ್ಯಾರ್ ಗ್ರೂಪಾಂನಿ ಪಾಸಾಯೊ ಮಾರುನ್  ಮ್ಹಾಕಾ ಆಯಿಲ್ಲೆಂ ಕ್ಲಿಪ್ ಪಳಯಾ. ಅಡ್ವಾನಿ, ಯಡ್ಯೂರಪ್ಪಾಚ್ಯಾ ತಸ್ವಿರೆ ಪಾಟ್ಲ್ಯಾನ್ ಸಯ್ತ್ ತ್ಯಾಚ್ ಸತ್ರಾ ಕರೊಡಾಂಚೊಂ ಬೊಂಗ್ಲೊಂ ಬಾಂದ್ತಾ ಮ್ಹಣ್ ಆರೋಪ್ ಮಾಂಡ್‌ಲ್ಲ್ಯಾ ಬಿಸ್ಪಾಚಿ ಜಯ್ತ್ ತಸ್ವೀರ್ ಆಸಾ. ( ವಿಡಿಯೊಂತ್ಲಿ  ನಿಮಾಣಿ ತಸ್ವೀರ್ ಪಳಯಾ)

ವರ್ತ್ಯಾ ಬೆಜಾರಾಯೆಚಿ ಗಜಾಲ್ ಮ್ಹಳ್ಯಾರ್, ಲಜೆಚಿ ಶಿರ್ – ತೆವ್ಶಿಲ್ಯಾಂಕ್ ಮಾತ್ ನಯ್, ಹೆವ್ಸಿಲ್ಯಾ ಥೊಡ್ಯಾಂಕ್‌ಯೀ ನಾಂ ತಶೆಂ ದಿಸ್ತಾ. ಆನಿ ಅಸಲೆ ಚಿಂತ್ಪಾಕ್ ಏಕ್ ಸ್ಪಶ್ಟ್ ಪಾಟಿಚೊ ಖಣೊ ನಾತ್‌ಲ್ಲೆ ಯಾಜಕ್ ಪಾದ್ರಿವರ್ಗಾಂತ್ ಆಸಾತ್ ಮ್ಹಳ್ಯಾ ಕಾರಣಾಕ್ ಲಾಗೊನ್, ಭಾವಾಡ್ತಿ  ಲೋಕ್ ಆಜ್ ಪಾದ್ರಿವರ್ಗಾಕ್, ಲೊಬಾಗಾರಾಂಕ್ ಪಾತ್ಯೆನಾ.  ಅಸಲ್ಯಾ ಥೊಡ್ಯಾ ಯಾಜಕಾಂ ನಿಮ್ತಿಂ ಸ್ಪಶ್ಟ್ ಚಿಂತಪ್ ಆಸ್ಚ್ಯಾ ಪಾದ್ರ್ಯಾಬ್ಯಾಂಕೀ ಮರ್ಯಾದ್ ಮೆಳ್ತೇ ನಾ ಮ್ಹಳ್ಳಿ ಗಜಾಲ್ ನಿಜಾಯ್ಕೀ ಬೆಜಾರಾಯೆಚಿ!

ಆತಾಂ . . . ಮಂಗ್ಳುರ್ಚೊ ಬಿಸ್ಪ್ ಅತೀ ದೊಡ್ಡ ಭೂ ಮಾಲೀಕ ಮ್ಹಣ್ ಪ್ರೆಸ್ ಕೊನ್ಫರೆನ್ಸ್ ಆಪವ್ನ್, ಪರ್ಗಟ್ ಥರಾನ್ ದಿಯೆಸೆಜಿಚ್ಯಾ ಪರಮೋಚ್ಚ್ ವ್ಹಡಿಲಾಕ್ ಅಕ್ಮಾನ್ ಕೆಲ್ಯಾ ಉಪ್ರಾಂತೀ ಥೊಡೆ ಪಾದ್ರಿ, ದಿಯೆಸೆಜಿಚೆರ್, ದಿಯೆಸೆಜಿಚ್ಯಾ ಪರಮೋಚ್ಚ್ ವ್ಹಡಿಲಾಚೆರ್ ಫಟ್ಕಿರೆ ಆರೋಪ್ ಮಾಂಡುನ್, ಪರ್ಗಟ್ ಅಕ್ಮಾನ್ ಕೆಲ್ಲ್ಯಾಚ್ಯಾ ಅಂಗ್ಣಾಕ್ ವಚೊನ್ ಘಾಂಟ್ ಹಾಲವ್ನ್, ಸತ್ಕಾರ್ ಘೆವ್ನ್ ಆಯ್ಲೆ. ಹೆ ವಿಶಿಂ ಹಾಂವೆ ತವಳ್‌ಚ್ ದಿಯೆಸೆಜಿಚ್ಯಾ ವ್ಹಡಿಲಾಂಲಾಗಿಂ ಮ್ಹಜೊ ಆಕ್ಶೇಪ್ ಉಚಾರ್‌ಲ್ಲೊ ಆಸಾ. ಹಾಂಗಾಸರ್ ದಿಲ್ಲಿ ತಸ್ವೀರ್ ಪಳಯಾ . . . ಸವಿಸ್ತಾರ್ ಖಬ್ರೆಕ್ ದಯಾಕರುನ್ ತಸ್ವಿರೆ ಸಕಯ್ಲ್ ದಿಲ್ಲೊ  ಖಬ್ರೆಗಾಂಚ್ ಚಿಚಾಯಾ.

Mangaluru: Art will strengthen only when one gets trained – Fr Wilfred Prakash D’Souza

ಎಕಾ ಪಾದ್ರಿನ್ ಘಾಂಟ್ ಹಾಲಂವ್ಕ್ ವೆಚೆಂಚ್ ತಡವ್, ಮಾಗೀರ್ ‘ನಾ ಮುಂದು, ತಾ ಮುಂದು’ ಮ್ಹಣ್ ತಸಲ್ಯಾ ವರ್ಗಾಚೆ ಪಾದ್ರಿ ಆಂಗ್ಣಾಕ್ ವಚೊನ್, ಘಾಂಟ್ ಹಾಲಂವ್ಕ್ ಎಕಾ ಪಾಂಯಾರ್ ಉಬೆ ಜಾತಾತ್. ಆಜ್ ಕಾಲ್ ಸಮಾಜೆಂತ್ ಘಡ್ಚಿಂ ಥೊಡಿಂ ಘಡಿತಾಂ ಪಳಯ್ತಾನಾ, ಮ್ಹಾಕಾ ಭೊಗ್ಚೆಂ ಆಸಾ, – ದುಡ್ವಾಕ್ ಮಡೆಂಯ್ ತೋಂಡ್ ಉಗ್ತೆಂ ಕರ್ತಾಂ ಮ್ಹಳ್ಳಿ ಮಾಲ್ಘಡ್ಯಾಂಚಿಂ ಗಾದ್ ಆಜ್, ಫೊಟೊ, ಪ್ರಚಾರ್, ವೆದಿ ಆನಿ ಉಲಂವ್ಕ್ ಮೈಕ್ ಮೆಳ್ತಾ ಜಾಲ್ಯಾರ್ ಮಡೆಂಯ್ ಉಟೊನ್ ಉಭೆಂ ರಾವ್ತಾ ಮ್ಹಣ್ ಬದ್ಲಿಯೆತ್ ಕೊಣ್ಣಾ!

ಆತಾಂ ಸವಾಲ್, ಹೆ ಪಾದ್ರಿ ದಿಯೆಸೆಜಿಚೆ. ಆನಿ ಬಿಸ್ಪ್ ತಾಂಚೊ ಪರಮೋಚ್ಚ್ ವ್ಹಡಿಲ್. ಆನಿ ವ್ಹಡಿಲಾಕ್ ಅಕ್ಮಾನ್ ಮ್ಹಳ್ಯಾರ್ ಸಗ್ಳ್ಯಾ ಪಾದ್ರಿವರ್ಗಾಕ್ ಅಕ್ಮಾನ್. ಹ್ಯಾ ಪಾದ್ರಿಂನಿ ಆಪ್ಲ್ಯಾ ಪರಮೋಚ್ಚ್ ವ್ಹಡಿಲಾಕ್ ಪರ್ಗಟ್ ಥರಾನ್ ಅಕ್ಮಾನ್ ಕೆಲ್ಲ್ಯಾಚಾ, ದಿಯೆಸೆಜಿಚ್ಯಾ ಪರಮೋಚ್ಚ್ ವ್ಹಡಿಲಾಚೆರ್ ಫಟ್ಕಿರೊ ಆರೋಪ್ ಮಾಂಡ್‌ಲ್ಲ್ಯಾಚಾ ಆಂಗ್ಣಾಕ್ ವಚೊನ್, ಸತ್ಕಾರ್ ಘೆವ್ನ್ ಯೆತಾನಾ, ಏಕ್ ಘಡಿಭರ್ ತರೀ ಚಿಂತ್ಲೆಂಗಿ ? ತ್ಯಾ ವೆದಿಕ್ ವೆಚೆ ಪಯ್ಲೆಂ ವ್ಹಡಿಲಾಚಿ ಪರ್ವಣ್ಗಿ ಘೆತ್ಲಿಗೀ ? ಸೊಡ್ಯಾಂ – ಆಪಯಿಲ್ಲೊ ಮನಿಸ್ – ” ತುಮ್ಚೇರ್ ಆನಿ ದಿಯೆಸೆಜಿಚೆರ್ ಫಟ್ಕಿರೆ ಆರೋಪ್ ಮಾಂಡುನ್ ಹಾಂವೆ ಚೂಕ್ ಆದಾರ್ಲಿ, ಹೊ ಮ್ಹಜೊ ಅಫ್ರಾದ್, ಹೊ ಮ್ಹಜೊ ಮಹಾ ಅಫ್ರಾದ್ ” ಮ್ಹಣ್ ಹ್ಯಾ ಪಾದ್ರಿಲಾಗಿಂ ಸುಟಾವೆಂ ಕುಮ್ಸಾರ್ ತರೀ ಜಾಲೊಗೀ ? ಚೂಕ್ ಮಾಗ್ಲಿಗೀ ? ಪಶ್ಚಾತ್ತಾಪ್ ಉಚಾರ್ಲೊಗೀ ?

ಮಂಗ್ಳುರ್ಚ್ಯಾ ಬಿಸ್ಪಾಚೆರ್ ಮಾಂಡ್‌ಲ್ಲೆ ಆರೋಪ್ ಪರ್ಗಟ್ ಆನಿ ಪಬ್ಲಿಕ್ ಜಾಲ್ಲ್ಯಾನ್, ಪಬ್ಲಿಕ್ ವಾಂಟ್ಸ್ ಟು ನೋ!

ಅಕ್ಮಾನ್ ಕೆಲ್ಲ್ಯಾಚಾ ಆಂಗ್ಣಾಕ್ ವಚೊನ್ ಸತ್ಕಾರ್ ಘೆವ್ನ್ ಆಯಿಲ್ಲ್ಯಾ ಯಾಜಕಾಂಲಾಗಿಂ ವಿಚಾರ್ನ್, ದಿಯೆಸೆಜಿಚ್ಯಾ ಭಾವಾಡ್ತಿ ಲೊಕಾಕ್ ಕಳಂವ್ಚೊ ಕಾಯ್ದೊ ಮಂಗ್ಳುರ್ಚ್ಯಾ ಬಿಸ್ಪಾಕ್ ಬಾಂದ್ತಾ. ಉಡಾಸ್ ಅಸೊಂ – ಮಂಗ್ಳುರಿ ಕ್ರ‍ಿಸ್ತಾಂವ್ ಸಮುದಾಯಾಕ್ ಭಾಯ್ಲ್ಯಾ ದುಸ್ಮಾನಾಂ ಪ್ರಾಸ್ ಭಿತರ್ಲೆ ದುಸ್ಮಾನ್‌ಚ್ ಚಡ್ ಆಸಾತ್. ಎಕ್ಲ್ಯಾನ್ ಫಟ್ಕಿರೆ ಆರೋಪ್ ಮಾಂಡ್ಲೆ, ವ್ಹಡಿಲಾಚೊ ಮಾನ್ ಕಾಡ್ಲೊ, ದಿಯೆಸೆಜಿನ್ ಕಾಂಯ್ಚ್ ಕ್ರಮ್ ಘೆತ್ಲೆಂ ನಾ. ಕಾಂಯ್ ವ್ಹಡ್ ನಯ್. ಪೂಣ್ ಆತಾಂ, ದಿಯೆಸೆಜಿಚೆ ಪಾದ್ರಿಚ್ ಕಾಂಯ್ ಘಡಾನಾತ್ಲೆಪರಿಂ ಫಟ್ಕಿರೆ ಆರೋಪ್ ಮಾಂಡ್ಲೆಲ್ಯಾಚ್ಯಾಚ್ ಆಂಗ್ಣಾಕ್ ವಚೊನ್ ಸತ್ಕಾರ್ ಘೆವ್ನ್ ಯೆತಾತ್ ತರ್ ? ದಿಯೆಸೆಜ್ ಆನಿ ದಿಯೆಸೆಜಿಚೆ ವ್ಹಡಿಲ್ – ಭಾವಾಡ್ತಿ ಲೊಕಾಕ್ ಆನಿ ಸರ್ವಜಣಿಕಾಂಕ್ ಕಿತೆಂ ಸಂದೇಶ್ ಪಾಶಾರ್ ಕರ್ತಾತ್ ? ಆಪ್ಲ್ಯಾ ದಿಯೆಸೆಜಿಚ್ಯಾ  ಪಾದ್ರಿಂಚೆರ್, ವ್ಹಡಿಲಾಂಕ್ ಕಾಂಯ್ಚ್ ಕಂಟ್ರೋಲ್ ನಾಂಗೀ ? ದಿಯೆಸೆಜಿಚಿಚ್ಯಾ ಬಿಸ್ಪಾಚೆರ್ ಕೊಣೆಂಯ್ ಕಿತೇಂಯ್ ಆರೋಪ್ ಮಾಂಡ್ಯೆತ್‌ಗೀ ?

ಲೊಕಾಚೊ ಉಡಾಸ್ ಉಣೊ ಮ್ಹಣ್ ದಿಸ್ತಾ ಜಾಂವ್ಕ್ ಪುರೊ, ಪೂಣ್ ವಾಸ್ತವಾಂತ್ ತಶೆಂ ನಾ.

ಯೆ ಪಬ್ಲಿಕ್ ಹೈ . . . ಸಬ್ ಜಾನ್‌ತೀ ಹೈ.

ಮಂಗಳೂರಿನ ಅತೀ ದೊಡ್ಡ ಭೂ ಮಾಲೀಕ ಆಸ್‌ಲ್ಲೊ, ಪುರ್ವಜಾಂಕ್ ಮತಾಂತರ್ ಕೆಲ್ಲೊ, ನಿವೃತ್ತೆ ಉಪ್ರಾಂಕ್ ಜಿಯೆಂವ್ಕ್ ಐಶರಾಮಿ ಬೊಂಗ್ಲೊ ಬಾಂದ್‌ಲ್ಲೊ ಬಿಸ್ಪ್ , ಆತಾಂ ಎಕಾಣೆಂ ದುಡು ಮಾಗೊಂಕ್ ಭೊಶಿ ಘೆವ್ನ್ ಭಾಯ್ರ್ ಸರ್ತಾನಾ ಪರ್ತ್ಯಾನ್ ಕಸೊ ಬರೊ ಮನಿಸ್ ಜಾಲೊ ?

ಆಡ್ಕುಲೊಗೋ ಬುಡ್ಕುಲೊ ( ಸಂಗ್ರಹ್ : ಸೊಂಶಾಚೆ ಕಾನ್. ಪ್ರಗತಿ ಪ್ರಕಾಶನ್. ಪಾನ್ : 70) ಕವಿತೆಂತ್ ಸ್ವರ್ಗೀಯ್ ಚಾ. ಫ್ರಾ ದ ಕೋಸ್ತಾನ್ ವಿಚಾರ್‌ಲ್ಲೆ ಪರಿಂ ವಿಚಾರ್ಚೆಂ ಪಡ್ತಾ –

ಕಸೊ ? ಕಸೊ ? ಕಸೊ ?

– ಎಚ್ಚೆಮ್