ಮೋಗ್ ಮ್ಹಳ್ಯಾರ್ ಕಿತೆಂ?

ಹ್ಯಾ ದಿಸಾಂನಿ ಕೊರೊನಾ ಬರಿ ‘ಲವ್ ಜಿಹಾದ್’ ಸಯ್ತ್ ರಾಜ್ ಕರುನ್ ಆಸಾ. ದೊನೀ  ಜಾಂವ್ಕ್ ಮನಿಸ್  ಕಾರಣ್. ಕೊರೊನಾ ಕೊಣಾಯ್ಕೀ ಸೊಡಿನಾಸ್ತಾನಾ, ಜಾತ್ – ಧರ್ಮ್, ಲ್ಹಾನ್ – ವ್ಹಡ್ ಯಾ ಪ್ರಾಯ್ ಪಳೆನಾಸ್ತಾನಾ ನಾಸ್ ಕರ್ತಾ. ಪೂಣ್ ಲವ್ ಜಿಹಾದ್ ಸಂಬಂದಾಂಕ್, ಮೊಗಾಕ್‌ಚ್ ನಾಸ್ ಕರ್ತಾ. ಮೊಗಾರ್ ಪಡೊನ್ ಕಾಜಾರ್ ಜಾಂವ್ಚೆಂ ನವೆಸಾಂವ್ ನ್ಹಯ್. ರೊಮಿಯೊ – ಜೂಲಿಯೆಟ್, ಲೈಲಾ – ಮಜ್ನೂ ಹಾಂಚಾ ವಿಶ್ಯಾಂತ್ ಆಮಿ ಆಯ್ಕಾಲಾಂ. ರಾಮಾಯಣ್, ಮಹಾಭಾರತ್, ಒಡಿಸ್ಸಿ ಯಾ ಇಲಿಯಡ್ ಮೊಗಾ ಖಾತಿರ್‌ಚ್ ಜಾಲ್ಲೆಂ. ಅಶೆಂ ಮೊಗಾನ್ ಕಾಜಾರ್ ಜಾತಾನಾ ಥೊಡಿಂ ಅನ್ಯ್ ಧರ್ಮಾಕ್, ಜಾತಿಕ್ ಮತಾಂತರ್ ಜಾತಾತ್. ಥೊಡಿಂ ಘರ್, ಗಾಂವ್ ಸಯ್ತ್ ಪೋಳ್ನ್ ಧಾಂವ್ತಾತ್. ಥೊಡಿಂ ವ್ಹಡಿಲಾಂಚಾ, ಕುಟ್ಮಾಚಾ ಗೌರವಾಕ್ ಬಲಿ ಜಾವ್ನ್ ಖುನಿ ಜಾವ್ನ್ ಮೊರ್ತಾತ್.ಹಾಕಾ ’ಗೌರವಾಚಿ ಖುನಿ’ (honor killing) ಮ್ಹಣ್ತಾತ್. ಥೊಡಿಂ ಕಾಜಾರ್ ಜಾಂವ್ಕ್ ಆಡ್ಕಳಿ ಯೆತಾನಾ, ಜೀವ್ಘಾತ್ ಕರ್ತಾತ್.

ಹ್ಯಾ ವಿಶ್ಯಾಂತ್ ಆಮಿ ಆಜ್ ವೆಗಿಂಚ್ ಜಾಣಾಂ ಜಾತಾಂವ್. ಫೇಸ್ ಬುಕ್, ವಾಟ್ಸಪ್ ಆನಿ ಹೆರ್ ಮಾಧ್ಯಮಾಂ ದ್ವಾರಿಂ ಖಬಾರ್ ಉಜ್ಯಾ ಬರಿ ಪೆಟ್ತಾ. ಫಟ್ ಖಬರ್ ಆಜ್ ಕಾಲ್ ಸತಾಕ್ ಲಿಪಯ್ತಾ ಮ್ಹಳ್ಳೆಂ ಅಮಿ ಜಾಣಾಂವ್. ಕೊಣಾಕ್ ಪಾತ್ಯೆಂವ್ಚೆಂ, ಕೊಣಾಕ್ ನ್ಹಯ್, ಖಂಯ್ಚೆಂ ಸತ್ ಯಾ ಫಟ್ ಮ್ಹಳ್ಳೆಂಚ್ ಸಮ್ಜಾನಾಸ್ತಾನಾ ಅಸಮಧಾನ್, ಭೇದ್ – ಭಾವ್, ಹಗೆಂ, ದ್ವೇಷ್, ಮನಸ್ತಾಪ್, ಲಡಾಯ್, ಖುನಿ, ಲುಕ್ಸಾಣ್ ಇತ್ಯಾದಿ ಸದಾಂಚ್ ಪಳೆಂವ್ಕ್, ಚಡ್ ಜಾವ್ನ್ ಆಯ್ಕೊಂಕ್ ಮೆಳ್ತಾ.

ಶತಮಾನಾಂ ಥಾವ್ನ್ ಮೋಗ್ ಜೀವಂತ್ ಆಸಾ. ಚರಿತ್ರಾ ಪಳೆತಾನಾ ಆಮ್ಕಾಂ ಮೊಗಾ ಖಾತಿರ್ ಆನಿ  ಮೊಗಾ ವರ್ವಿಂ ಕಿತೆಂ ಪೂರಾ, ತಶೆಂ  ಪಾಡ್ ಜಾಲಾಂ ಮ್ಹಣ್ ಕಳ್ತಾ.  ತರ್, ಮೋಗ್ ಮ್ಹಳ್ಯಾರ್ ಕಿತೆಂ? ‘ಮೊಗಾರ್ ಪಡ್ಚೆಂ’ ಆನಿ ‘ಮೋಗ್ ಕರ್ಚೆಂ’ ಮ್ಹಳ್ಳ್ಯಾಂತ್ ವ್ಯತ್ಯಾಸ್ ಕಸಲೊ? ಮೋಗ್ ಕಿತ್ಲೆ ಥರಾಚೆ ಆಸಾತ್ … ?

ಆದಿಂ ನಾತ್ಲೆಲೆಂ ಆಧುನಿಕ್ ಕಾಳಾಚೆಂ ಇನ್ಸ್ಟೆಂತ್ ನೂಡಲ್ಸ್, ಇನ್ಸ್ಟೆಂಟ್ ಕೊಫಿ, ಫಾಸ್ಟ್ ಫುಡ್, ಹೈ ಸ್ಪೀಡ್ ನೆಟ್ ವರ್ಕ್, ಇನ್ಸ್ಟೆಂಟ್ ಲೋನ್, ಇನ್ಸ್ಟೆಂಟ್ ಬ್ಯಾಂಕಿಂಗ್ ಇತ್ಯಾದಿ ‘ತುರಂತ್’ ತಶೆಂ ಮೆಳ್ಚೆಂ ಜಿಣ್ಯೆಕ್ ಯಾ ಮೊಗಾಕ್ ಲಾಗು ಜಾಯ್ನಾ. ಜಿಣಿ ಯಾ ಮೋಗ್ ಇನ್ಸ್ಟೆಂಟ್ ನ್ಹಯ್. ಮರಣ್ ವ್ಹಯ್. ಬರೆಂ ಹಳೂ ಆನಿ ಸವ್ಕಾಸ್ ಯೆತಾ ( ಜಲ್ಮ್, ಬರಿ ಸವಯ್ ಇತ್ಯಾದಿ). ಪೂಣ್ ಪಾಡ್ ವೆಗಿಂಚ್ ಯೆತಾ (ಮರಣ್, ಪಾಡ್ ಸವಯೊ ಇತ್ಯಾದಿ).

ರೋಮ್ ಶಹರ್ ಏಕಾ ದಿಸಾನ್ ಭಾಂದುಂಕ್ ನಾ ಮ್ಹಳ್ಳಿ ಏಕ್ ಸಾಂಗ್ಣಿ ಆಸಾ. ತಿ ಮೊಗಾಕೀ ಲಾಗು ಜಾತಾ. ಮೊಗಾಚೊ ಸಂಬಂಧ್ ಜೊಡುಂಕ್ ದೃಡತಾ ಜಾಯ್. ಮೋಗ್ ಏಕ್ ಸಮರ್ಪಣ್ (commitment). ಮೊಗಾರ್ ಪಡ್ಚ್ಯಾಂನಿ ಚಡಾವತ್ ಭಾವನಾತ್ಮಕ್ ಜಾಂವ್ಚೆಂ ಚಡ್. ಆಪ್ಣಾಕ್‌ಚ್ ಫಟಿ ಮಾರುನ್ ಸತಾಕ್ ಹರ್ದೆಂ ದೀಂವ್ಕ್ ಭಿಯೆಂವ್ಚೆಂ ಚಡ್. ಪೂಣ್ ಮೋಗ್ ಖರ‍್ಯಾನ್ ಕಾಳಿಜ್ ವಾಂಟುನ್ ಘೆಂವ್ಚೆಂ ಪ್ರಾಮಾಣಿಕ್‌ಪಣಾಚೆಂ ಬಂದನ್. ಹಾಂಗಾ ಮೋಗ್ ವಾಂಚ್ತಾ. ಕಿತ್ಯಾಕ್ ಮೋಗ್ ಏಕ್ ಇನಾಮ್ ಜಶೆಂ. ಮೊಗಾನ್ ಯೆತಾನಾ, ಮೊಗಾನ್ ಘೆಜಾಯ್. ಮೋಗ್ ಫಕತ್ ಏಕ್ ‘ಗರ್ಜ್’ ಜಾವ್ನ್ ಉರ್ಲ್ಯಾರ್  ವೆಗಿಂಚ್ ಮರ್ತಾ.

ಮೋಗ್ ‘ದಿಂವ್ಚೊ’ ಜಾಯ್ಜಾಯ್. ಆನಿ ಹೆಂ ಜಾಂವ್ಕ್ ವೇಳ್ ಲಾಗ್ತಾ. ಮೋಗ್ ಜಿವೊಚ್ ಜಾಲ್ಲ್ಯಾನ್ ತೊ ಹಳೂ, ಸವ್ಕಾಸ್ ವ್ಹಡ್ ಜಾತಾ. ಖರೊ ಮೋಗ್ ದೀಂವ್ಕ್ ಆನಿ ಘೆಂವ್ಕ್ ಧೈರ್ ಜಾಯ್,ಪಾತ್ಯೆಣಿ ಜಾಯ್ ಆನಿ ಆಶೆಂ ಜಾಂವ್ಕ್ ಖಂಡಿತ್ ವೇಳ್ ಜಾಯ್.

ತರ್, ಹಾಂವ್ ಮೊಗಾರ್ ಆಸಾಂ ಮ್ಹಣ್ ಮ್ಹಾಕಾ ಕಸೆಂ ಕಳ್ತಾ?

ಮೊಗಾರ್ ಆಸ್ಚೆಂ ಕಳೊಂಕ್ ಥೊಡೆ ಹಿಶಾರೆ ಅಸಾತ್ ಆನಿ ಹೆ ಸಾರ್ವತ್ರಿಕ್ ಜಾವ್ನಾಸಾತ್. ಏಕ್ ಹಿಶಾರೊ – ಹಾಂಗಾಸರ್ ಮೋಗ್ ಏಕಾ ತರ್ಫೆನ್ ನ್ಹಯ್, ದೊಗಾಂಯ್ ತರ್ಫೆನ್ ಖರೊ ಜಾವ್ನಾಸ್ತಾ. ಇನಾಮ್ ಮ್ಹಳ್ಳ್ಯಾಕ್ ಆರ್ಥ್ ದಿತಾ. ಖರೊ ಮೋಗ್ ದಿಂವ್ಚೊ ಮಾತ್ರ್ ನ್ಹಯ್, ಘೆಂವ್ಚೊಯ್ ಜಾವ್ನಾಸಾ. ಆಸೆಂ ಜಾತಾನಾ ನಿರಾಸ್, ಬೆಜಾರಾಯ್, ಕಷ್ಟ್, ಇರಾರಾಯ್ ಇತ್ಯಾದಿ ನಾ ಮ್ಹಣೊಂಕ್ ಜಾಯ್ನಾ. ಹಾಂಚ್ಯಾ ಮಧೆಂಚ್ ಮೋಗ್ ಉದೆತಾ ಆನಿ ವಾಡ್ತಾ. ಮಾನಸಿಕ್ ತಜ್ಞ್ ಚಡಾವತ್ ಯುವಕ್ – ಯುವತಿ, ‘ಹಾಂವ್ ಮೊಗಾರ್ ಆಸಾಂ’ ಮ್ಹಣ್ ಮ್ಹಾಕಾ ಕಸೆಂ ಕಳ್ತಾ? ಮ್ಹಳ್ಳೆಂ ಸವಾಲ್ ವಿಚಾರ್ತಾತ್ ಮ್ಹಣ್ ಸಾಂಗ್ತಾತ್. ತರ್ ಹ್ಯಾ ಸವಾಲಾಕ್ ಜಾಪ್ ಕಸಲಿ?

ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂನಿ ಕೆಲ್ಲ್ಯಾ ಸರ್ವೆ – ಸಮೀಕ್ಷಾಂ ಪ್ರಕಾರ್ ಹ್ಯಾ ಸವಾಲಾಕ್ ಜಾಪ್ ಸಾತ್ ಜಾಪಿ ಆಸಾತ್.

• ಶಾರೀರಿಕ್ ಅನುಭವ್ : ಮೊಗಾರ್ ಆಸಾಂವ್ ಮ್ಹಣ್ತೆಲ್ಯಾಂಚಿಂ ಚಡಾವತ್ ಕೂಡಿಚಿ ಲೋಂವ್ ಉಭಿ ಜಾತಾ , ಗಳ್ಯಾಂತ್ ಥಿಂಪಿ ಸುಕ್ತಾ, ಹಾತ್ ಘಾಮೆಂವ್ಚೆ, ‘ಬೈ’ ಮ್ಹಣ್ತಾನಾ ದೊಳ್ಯಾಂನಿ ದುಖಾಂ ಯೆಂವ್ಚಿಂ, ಇತ್ಯಾದಿ ಅನುಭವ್ ಜಾತಾ ಮ್ಹಣ್ತಾತ್. ಏಕಾಮೆಕಾಚಾ ಕೂಡಿಂತ್ ಸಕಾರಾತ್ಮಕ್ ಪ್ರತಿಕಿಯಾ ಆಸ್ತಾ.
• ಭಾವನಾತ್ಮಕ್ ಅನುಭವ್ : “ಆಮಿ ಸಾಂಗಾತಾ ಆಸ್ತಾನಾ ಮೊಸ್ತು ಹಾಸ್ತಾಂವ್” ಮ್ಹಣ್ ಪ್ರೇಮಿ ಸಾಂಗ್ತಾತ್. ಏಕಾಮೆಕಾಕ್ ಪಳೆತಾನಾ ತೋಂಡಾರ್ ಆಪಾಪಿಂಚ್ ಹಾಸೊ ಯೆತಾತ್ ಆನಿ ಏಕಾಮೆಕಾಕ್ ಬಾಯ್ ಮ್ಹಣ್ ಆದೇವ್ಸ್ ಮಾಗ್ತಾನಾ ತೋಂಡ್ ಸಾವ್ಳೆತಾ. “ಏಕಾ ಥರಾಚೆಂ ಎಕ್ಸುರ್ ಪಣ್ ಭಗ್ತಾ” ಮ್ಹಳ್ಳಿ ಜಾಪ್ ಮೆಳ್ತಾ.
• ಸಕಾರಾತ್ಮಕ್ ಖಂತಿಚೊ ಅನುಭವ್:  ಮೊಗಾರ್ ಆಸ್ಚ್ಯಾಂಕ್ ಏಕಾಮೆಕಾ ವಿಶ್ಯಾಂತ್ ಸಕಾರಾತ್ಮಕ್ ಹುಸ್ಕೊ, ಖಂತ್ ಆಸ್ತಾ. “ಸಾಂಬಾಳುನ್ ಗಾಡಿ ಚಲಯ್”, “ಟೇಕ್ ಕೇರ್”, “ಬೀ ಕೇರ್ ಫುಲ್” ಇತ್ಯಾದಿ ಉತ್ರಾಂ ಪ್ರೇಮಿ ಉಲಯ್ತಾತ್. ಇಲ್ಲಿಶಿ ಶೆಳ್ ಜಾಲ್ಯಾರೀ ವ್ಹಡ್ ಖಂತ್ ತಾಂಕಾ ಭಗ್ತಾ. ಅಸಲೊ ಹುಸ್ಕೊ ಯಾ ಹಿ ಖಂತ್ ಮೊಗಾರ್ ಆಸ್ಚ್ಯಾಂಕ್ ಸ್ವಾಭಾವಿಕ್ ಆನಿ ಸಾಮಾನ್ಯ್.
• ‘ತುಜ್ಯೆ ವಿಣೆಂ ಜಿಣಿ ಅಧುರಿ’ ಮ್ಹಳ್ಳೊ ಅನುಭವ್:  ಹೆಂ ಥೊಡೆಂ ಕೃತಕ್ ಮ್ಹಣ್ ಭೊಗ್ಲ್ಯಾರೀ ಮೋಗ್ ಕರ್ಚ್ಯಾ ಪ್ರೇಮಿಂ ವಿಶ್ಯಾಂತ್ ನೀಜ್ ಜಾವ್ನಾಸಾ.  ಏಕಾಮೆಕಾ ಸಾಂಗಾತಾ ಮುಖ್ಲಿ  ಜಿಣಿ ಜಿಯೆಂವ್ಚಾ ವಿಶ್ಯಾಂತ್ ಹುಸ್ಕೊ ಆಸ್ತಾ.
• ಏಕ್‌ಚ್ ಮ್ಹಳ್ಳೊ ಅನುಭವ್:  ಆಮಿ ದೊಗೀ ವಿಂಗಡ್ ವ್ಯಕ್ತಿ ನ್ಹಯ್ ಬಗಾರ್ ಏಕ್‌ಚ್ ಮ್ಹಳ್ಳೆಂ ಚಿಂತಾಪ್ ಯೆತಾ. ಹಾಂಗಾಸರ್ ಆಪ್ಲೆಂಚ್ ಸ್ವಾರ್ಥ್ ಉಣೆಂ ಜಾವ್ನ್ ಸಾಂಗಾತಿ ವಿಶ್ಯಾಂತ್ ಹುಸ್ಕೊ ಚಡ್ ಜಾತಾ. ಸಾಂಗಾತಿಚಿ ಸೊಡ್ – ದೊಡ್, ಆಚಾರ್ – ಉಚಾರ್, ಪಸಂದ್ – ನಾಪಸಂದ್ ಇತ್ಯಾದಿಚೆರ್ ಆಸಕ್ತ್ ಉದೆತಾ.

•  ಪೂರ್ವ್‌ಗ್ರಹಿತ್ ಮೊಗಾಚೊ ಅನುಭವ್: ಚಡಾವತ್ ಹಾಂಚಾ ತಕ್ಲೆಂತ್ ಏಕಾಮೆಕಾ ವಿಶ್ಯಾಂತ್‌ಚ್ ಚಡ್ ಆನಿ ಚಡ್ ಉಗ್ಡಾಸ್ ಯೆತಾ, ಕೆದಾಳಾ ಪರ್ತುನ್ ಭೆಟ್ತಾಂವ್, ಫೊನಾರ್ ಉಲಯ್ತಾಂವ್, ಸಂದೇಶ್ ವಾಚ್ತಾಂವ್, ಇತ್ಯಾದಿಚ್ ಮತಿಂತ್ ಆಸ್ತಾ. ಏಕಾಮೆಕಾಚಿ ಸೆಲ್ಫಿ ಕಾಡ್ನ್ ‘ಕಸೆಂ ದಿಸ್ತಾಂ’? ‘ಕಸಿಂ ದಿಸ್ತಾಂ?’ ಇತ್ಯಾದಿ ವಿಚಾರ್ಚೆಂ ಸಾಮಾನ್ಯ್.
• ‘ಮೋಗ್’ ಮ್ಹಳ್ಳೊ ಅನುಭವ್:  ಹೊ ಅನುಭವ್ ಫಕತ್ ತೊಂಡಾ ಉತ್ರಾಂನಿ ಮಾತ್ರ್ ನ್ಹಯ್, ಬಗಾರ್ ಕೂಡಿಚಾ ಹಾವ್ ಭಾವಾನಿ, ತಕ್ಲೆಂತ್ಲ್ಯಾ ಚಿಂತ್ಪಾಂನಿ, ಕಾಳ್ಜಾಂತ್ಲ್ಯಾ ಭಾವನಾಂನಿ ಝಳ್ಕತಾ. ಹಾಂಕಾಂ ಪಳೆವ್ನ್ ಹೆರಾಂಕೀ ‘ಹಿಂ ಮೊಗಾರ್ ಆಸಾತ್’ ಮ್ಹಳ್ಳೆಂ ಕಳ್ತಾ. “ಹಾಂವ್ ತುಜೊ ಮೋಗ್ ಕರ್ತಾಂ” ಮ್ಹಣ್ ಉಲವ್ಣೆಂ ಸುರು ಜಾತಾ.

ಖರೊ ಮೋಗ್ ಆನಿ ನಕ್ಲಿ ಮೊಗಾಚಿಂ ಲಕ್ಷಣಾಂ ಕಸಲಿಂ?

ಖರೊ ಮೋಗ್ ಸೊಡ್ ದೊಡ್ ಕರ್ನ್ ಸಾಂಗಾತ್ ಉರಯ್ತಾ ಜಾಲ್ಯಾರ್, ನಕ್ಲಿ ಮೋಗ್ ಲ್ಹಾನ್ಶ್ಯಾ ಸಂಗ್ತಿಂಕ್ ಲಾಗೊನ್ ಲಡಾಯ್ ಕರುನ್ ಪಯ್ಸ್ ವೆಚೆಂ ಪ್ರಯತನ್ ಕರ್ತಾ. ಖರೊ ಮೋಗ್ ಸಂಬಂಧ್ ವಾಡಯ್ತಾ, ಕಷ್ಟ್, ಸಮಸ್ಯಿಂ ಆಸ್ಲ್ಯಾರೀ ನವ್ಯಾ ಅನುಭವಾಕ್, ಸ್ವಪ್ಣಾಂಕ್, ಫುಡಾರಾಕ್ ಆಶೆತಾ. ನಕ್ಲಿ ಮೋಗ್ ನಕಾರಾತ್ಮಕ್ ಚಿಂತ್ತಾ ಆನಿ ನವೆಂ, ಬದ್ಲಾವಣ್ ಆನಿ ಫುಡಾರಾ ವಿಶಿಂ ದೊಳೆ ಧಾಂಪ್ತಾ.

ಪ್ರಾಮಾಣಿಕ್ಪಣ್ ನೀಜ್ ಮೊಗಾ ಥಂಯ್ ಆಸ್ಲ್ಯಾರ್, ನಕ್ಲಿ ಮೊಗಾಂತ್ ಫಸೊವ್ಣಿ ದಿಸ್ತಾ. ಖರೊ ಮೋಗ್ ಎಕಾಮೆಕಾಕ್ ಗೌರವ್, ಮಾನ್ ತಸೆಂ ಮರ್ಯಾದಿನ್ ಪಳೆತಾ. ನಕ್ಲಿ ಮೋಗ್ ಏಕಾಮೆಕಾ ವಿಶಿಂ ದುಭಾವಾನ್ ಪಳೆವ್ನ್, ಹರ್ಯೆಕಾ ಸಂಗ್ತಿಂಕ್ ನಕಾರಾತ್ಮಕ್ ಆರ್ಥ್ ಲಾಯ್ತಾ. ಶಾರೀರಿಕ್ ಆಕರ್ಷಣ್, ವೈಯಕ್ತಿಕ್ ಲೈಂಗಿಕ್ ಆಶಾ ಸಹಜ್ ಜಾವ್ನ್ ಖರೊ ಮೋಗ್ ಆಟಾಪ್ತಾ.  ಪೂಣ್, ನಕ್ಲಿ ಮೋಗ್ ‘ಮೊಗಾವಿಣೆಂ’ ಹೆಂ ಏಕ್ ಕಾರ್ಯೆಂ ಮ್ಹಣ್ ಮಾಂದ್ತಾ. ಏಕಾಮೆಕಾಕ್ ಸಮ್ಜಣೆನ್ ಚಲವ್ನ್ ಕುಟಾಮ್ ಆನಿ ಸಂಬಂಧ್ ಖರೊ ಮೋಗ್ ವಾಡ್ತಾ ಜಾಲ್ಯಾರ್ ನಕ್ಲಿ ಮೋಗ್ ಚೂಕ್ ಸಮ್ಜಣೆನ್ ಸಕ್ಕಡ್ ಭಿಗ್ಡಾಯ್ತಾ.

► ಉಬ್ಬಾ, ಮೂಡ್ ಬಿದ್ರಿ