ಅಧಿಕೃತ್ ಅಂಕ್ಡೆ ನಾಂತ್ ಪೂಣ್ ಅಮ್ಚ್ಯಾ ದೇಸಾಂತ್ ದೋನ್ ಕರೋಡ್ ಕ್ರಿಪ್ಟೊ ನಿವೆಷಿ ಆಸಾತ್. ತಾಂಚಿ ಪುಂಜಿ ಚಾಳಿಸ್ ಹಜಾರ್ ಕರೋಡಾಂಕ್ ಮಿಕ್ವತಾ. ಹೊ ಅಂದಾಜ್ Blockchain and Crypto Assets Council (BACC) ಮ್ಹಳ್ಳ್ಯಾ ಕ್ರಿಪ್ಟೊ-ಕರೆನ್ಸಿ ಉದ್ಯೊಗಾಚ್ಯಾ ಸಂಘಟಣಾನ್ ದಿಲಾ. ಖಬ್ರೆ ಪ್ರಮಾಣೆಂ ಇಂಡಿಯಾಂತ್ 10.07 ಕರೋಡ್ ಕ್ರಿಪ್ಟೊ-ನಿವೇಷಿ ಆಸೊನ್ ಸಂಸಾರಾಂತ್ ಆಮಿಂ ಪಯ್ಲ್ಯಾ ಜಾಗ್ಯಾರ್ ಅಸಾಂವ್. ದುಸ್ರೆಂ ಅಮೆರಿಕಾ (2.74 ಕರೋಡ್), ತಿಸ್ರೆಂ ರಶ್ಯಾ (1.74 ಕರೊಡ್) ಆನಿಂ ಚವ್ತೆಂ ನೈಜೀರಿಯಾ (1.30 ಕರೋಡ್).
ದೆಕುನ್, ಆಮ್ಚ್ಯೆ ಆರ್ಥಿಕ್ ವ್ಯವಸ್ತೆಚ್ಯೆ ರಾಕ್ವಲಿ ಕ್ರಿಪ್ಟೊ-ಕರೆನ್ಸಿ ಬಾಬ್ತಿನ್ ಸಬಾರ್ ಕಾಳಾ ಥಾವ್ನ್ ಭಾಸಾಭಾಸ್ ಕರಿತ್ತ್ ಅಯ್ಲ್ಯಾತ್. ಕೇಂದ್ರ್ ಸರ್ಕಾರಾನ್ ಆಪ್ಲಿ ಪಾರ್ಲಿಮೆಂಟ್ ಸಮಿತಿ ನೆಮ್ಲೆಲಿ ತಾಣಿಂ ರಿಪೊರ್ಟ್ ದಿಲಾ ದೆಕುನ್, ಪಾರ್ಲಿಮೆಂಟಾಚ್ಯಾ ಹಿಂವಾಳ್ಯಾ ಅಧಿವೇಶನಾಂತ್ The Cryptocurrency and Regulation of Official Digital Currency Bill, 2021 ಮಾಂಡ್ಚೊ ಎಜೆಂಡಾ ಆದ್ಲ್ಯಾ ಹಫ್ತ್ಯಾಂತ್ ಜಾಹೀರ್ ಕೆಲಾ. ಹೊ ಕಾಯ್ದೊ ಮಂಜೂರ್ ಜಾತಚ್ ಆಮ್ಚಿ ಅಧಿಕೃತ್ ಡಿಜಿಟಲ್ ಕರೆನ್ಸಿ Central Bank Digital Currency (CBDC) ಬಜಾರಾಂತ್ ಘಾಲ್ಚಿ ತಯಾರಿ ರಿಜರ್ವ್ ಬ್ಯೇಂಕ್ ಒಫ್ ಇಂಡಿಯಾ ಕರ್ನ್ ಆಸಾ.
ಆಯ್ಲೆವಾರ್ ಸಿಡ್ನಿ ಡಯಲೊಗ್ ಮ್ಹಳ್ಳ್ಯಾ ವರ್ಚುವಲ್ ಅಧಿವೇಶನಾಂತ್ ಪ್ರಧಾನಿ ನರೆಂದ್ರ ಮೋದಿ ಮ್ಹಣಾಲೊ: “ಕ್ರಿಪ್ಟೊ-ಕರೆನ್ಸಿ ಚುಕಿಚ್ಯಾ ಹಾತಿಂ ಪಡೊಂಕ್ ನಜೊ. ಆಮ್ಚಿ ಯುವ-ಪೀಡಿ ವಾಯ್ಟ್ ವಾಟೆನ್ ವಚೊಂಕ್ ನಜೊ. ಸರ್ವ್ ಪ್ರಜಾ-ಪ್ರಭುತ್ವ್ ರಾಷ್ಟ್ರಾಂನಿಂ ಸಾಂಗಾತಾ ಮೆಳೊನ್ ಹ್ಯಾ ವಿಷಿಂ ಫಾವೊತಿಂ ಮೆಟಾಂ ಘೆಜೆ. ಪಿಳ್ಗೆಂತ್ ಏಕ್ಚ್ ಪಾವ್ಟಿಂ ಪರಿವರ್ತನ್ ಜಾಂವ್ಚ್ಯಾ ಕಾಳಾಂತ್ ಆಮಿಂ ಆಸಾಂವ್”.
ಸರ್ಕಾರಾಚಿ ನೀದ್ ಬಿಗ್ಡಾಂವ್ಚಿ ಹಿ ಕ್ರ್ರಿಪ್ಟೊ-ಕರೆನ್ಸಿ ಮ್ಹಳ್ಯಾರ್ ಕಿತೆಂ ತೆಂ ಪಯ್ಲೆಂ ಜಾಣಾಂ ಜಾಂವ್ಯಾಂ.
ಆರ್ಥಿಕ್ ವ್ಯವಸ್ತೆಂತ್ ಪರಿವರ್ತನ್ ಹಾಡ್ಚಿ ಕ್ರಿಪ್ಟೊ-ಕರೆನ್ಸಿ ಮ್ಹಳ್ಯಾರ್ ಕಿತೆಂ?
“ಕ್ರಿಪ್ಟೊಸ್” ಮ್ಹಳ್ಳ್ಯಾ ಗ್ರೀಕ್ ಭಾಶೆಚ್ಯಾ ಮೂಳಾ ಥಾವ್ನ್ ಆಯ್ಲೆಲ್ಯಾ ಹ್ಯಾ ಸೊಬ್ದಾಚೊ ಅರ್ಥ್ ಜಾವ್ನಾಸಾ, “ಲಿಪಯ್ಲೆಲೆಂ ವ ಗುಪಿತ್” ಮ್ಹಣ್. ದೆಕುನ್, ಕ್ರಿಪ್ಟೊ-ಕರೆನ್ಸಿ ಮ್ಹಳ್ಯಾರ್ ಗುಪ್ತಿ-ದುಡು.
ವಯ್ಲ್ಯಾ ಪಿಂತುರಾಂತ್ ಥೊಡ್ಯಾಂ ಕ್ರಿಪ್ಟೊ-ನಾಣ್ಯಾಂಚಿ ಚಿಹ್ನ್ ದಿಲ್ಯಾಂತ್. ಪ್ರಸ್ತುತ್, ಲಗ್ಬಗ್ ಸ ಹಜಾರ್ ಕ್ರಿಪ್ಟೊ-ನಾಣಿಂ ಬಜಾರಾಂತ್ ಆಸಾತ್. ಪಯ್ಲಿ ಆನಿಂ ಪ್ರಮುಖ್ ಕ್ರಿಪ್ಟೊ-ಕರೆನ್ಸಿ ಜಾವ್ನಾಸಾ, ಬಿಟ್ಕೋಯ್ನ್ (BTC).
ಬಿಟ್-ಕೋಯ್ನಾಚಿ ಸುರ್ವಾತ್ 2008 ಒಕ್ಟೊಬ್ರ್ ಮಹಿನ್ಯಾಂತ್ ಸಾತೊಶಿ ನಾಕಾಮೊಟೊನ್ ಪರ್ಗಟ್ಲೆಲ್ಯಾ “Bitcoin: A Peer-to-Peer Electronic Cash System” ಪತ್ರಾ ಥಾವ್ನ್ ಜಾಲಿ. ಬ್ಲೊಕ್-ಚೇಯ್ನ್ ಮ್ಹಳ್ಳಿ ನವೆಸಾಂವಿ ತೆಕ್ನೊಲೊಜಿ ತಾಣೆಂ ಆವಿಸ್ಕಾರ್ ಕೆಲಿ. ತಾಣೆಂ ರಚ್ಲಲೊ ಪಯ್ಲೊ ಬ್ಲೊಕ್ ಜೆನೆಸಿಸ್ ಬ್ಲೊಕ್ ಮ್ಹಣ್ ನಾಂವಡ್ಲಾ.
ಬ್ಲೊಕ್ ರಚ್ಚ್ಯಾ ಕಾಮಾಕ್ “ಖುದಾಯಿ” (mining) ಮ್ಹಣ್ ನಾಂವ್ ಪಡ್ಲೆಂ. ಹ್ಯಾ ರಚ್ಣೆಚ್ಯೆಂ ಸೊಫ್ಟ್-ವೇರ್ open-source code ಜಾಲ್ಲ್ಯಾನ್ ಕೋಡಿಂಗ್ ಶಿಕ್ಪ್ಯಾಕ್ ನವೆ ಬ್ಲೊಕ್ ರಚುಂಕ್ ಸಾಧ್ಯ್ ಆಸಾ. ಹೊ ನವೊ ಬ್ಲೊಕ್ ಮಾತ್ರ್ ಬಿಟ್-ಕೋಯ್ನ್ ನೆಟ್-ವರ್ಕಾರ್ ಪರ್ಗಟುನ್ ಜೆನೆಸಿಸ್ ಬ್ಲೊಕಾ ಪರ್ಯಾಂತ್ ಲಿಂಕ್ ಕರಿಜೆ ದೆಕುನ್ ಹ್ಯಾ ತೆಕ್ನೊಲೊಜಿಕ್ ಬ್ಲೊಕ್-ಚೇಯ್ನ್ ಮ್ಹಣ್ ನಾಂವ್ ದಿಲಾಂ.
open-source code ಮ್ಹಣ್ತಚ್, ಹಾಚ್ಯೆಂ ಮೂಳಾವೆಂ ಸಂಕಲ್ಪನ್ ವಾಪ್ರುನ್ ಪಾಟ್ಲ್ಯಾಂ 13 ವರ್ಸಾಂನಿಂ ಸ ಹಜಾರಾಂಕ್ ಮಿಕ್ವೊನ್ ಕ್ರಿಪ್ಟೊ-ನಾಣಿಂ ಆನಿಂ ಕ್ರಿಪ್ಟೊ-ಟೊಕನ್ ಮ್ಹಣ್ ಕ್ರಿಪ್ಟೊ-ಕರೆನ್ಸಿ ವಿಕ್ರಾಪಾಕ್ ಪಡ್ಲ್ಯಾತ್. ಇತಿರಿಯಮ್ (Ether), Cardano, Solana ಇಂಡಿಯಾಂತ್ ವಿನಿಮಯ್ ಜಾಂವ್ಚ್ಯಾಂ ಥೊಡ್ಯಾಂ ಕ್ರಿಪ್ಟೊ-ಕರೆನ್ಸಿ ಪಯ್ಕಿಂ ನಾಂವಾಡ್ದಿಕ್.
ಕ್ರಿಪ್ಟೊ : ದುಡು – ಆದಿಂ, ಆಜ್ ಆನಿಂ ಫಾಲ್ಯಾಂ.
ಸಗ್ಳಿ ಜಿಣಿ ಆಮಿಂ ದುಡು ಜೊಡುಂಕ್ ಖರ್ಚಿತಾಂವ್; ಪೂಣ್, ದುಡು ಕಿತೆಂ ಮ್ಹಣ್ ಚಡ್ತಾವ್ ಜಣಾಂಕ್ ಕಳಿತ್ ನಾಂ. ದುಡು ಕಿತೆಂ ಮ್ಹಣ್ ಸಮ್ಜೊಂಕ್ ಆಮ್ಚ್ಯಾ ಕಡೆಂ ವೇಳ್ ನಾಂ.
ಆದಿಂ ಮಾಗಾ ಥಾವ್ನ್ ಮ್ಹಜ್ಯಾ ಬಾಳ್ಪಣಾ ಪರ್ಯಾಂತ್ ವಸ್ತ್-ವಿನಿಮಯ್ (barter) ವ್ಯವಸ್ತಾ ಲೋಕಾಮೋಗಾಳ್ ಜಾವ್ನಾಸ್ಲಿ. ಕೆಲ್ಶಿ, ಸುತಾರ್, ದೋಣ್ಕಾರ್, ಲೋಹಾರ್, ಮೊಗೊರ್ಲಿಂ, ಇತ್ಯಾದಿ ಸೆವಾ ದಿತೆಲ್ಯಾಂಕ್ ಭಾತ್ ವ ತಾಂದುಳ್ ಕೂಲ್ ಜಾವ್ನ್ ದಿತೆಲ್ಯಾಂವ್. ಸರ್ಕಾರಿ ದುಡ್ವಾಚಿ ಘರ್ಜ್ ಮಾತ್ರ್ ಹಳ್ಳೆ ಭಾಯ್ರ್, ಮ್ಹಣ್ಜೆ ಬಸ್ಸಾರ್ ಪಯ್ಣ್ ಕರುಂಕ್, ಅಸ್ಪತ್ರೆಂತ್ ಚಿಕಿತ್ಸಾ ಘೆಂವ್ಕ್ ಇತ್ಯಾದಿ. ಅಶೆಂ ವಸ್ತ್-ವಿನಿಮಯ್ ಏಕ್ ಠೋಸ್ ದುಡು ಮ್ಹಣೊಂಕ್ ಜಾಯ್ನಾ ಕಿತ್ಯಾಕ್ ಸಕ್ಟಾಂ ಕಡೆಂ ತಾಂದುಳ್ ನಾಂ ವ ಹರ್ಯೆಕ್ಲ್ಯಾಕ್ ನಂಯ್ ಉತ್ರಾಜೆ ಮ್ಹಣ್ ನಾಂ.
ಜಿಣ್ಯೆಚ್ಯಾ ಜೆರಾಲ್ ಉಪ್ಯೊಗಾ ಖಾತಿರ್ ರಾಯಾಂನಿಂ ಆನಿಂ ಸರ್ಕಾರಾಂನಿಂ “ಪಯ್ಶೆ” ರಚ್ಲೆ. ಬಾಂಗರ್, ರುಪೆಂ, ತಾಂಬೆ, ಕಾಶೆಂ, ಪಿತುಳ್, ನಿಕೆಲ್, ಮಿಲಾವ್ ಇತ್ಯಾದಿ ಧಾತುಂಚಿಂ ನಾಣಿಂ ಆಪ್ಲ್ಯಾ ಮುಸ್ಕರ್ ಆನಿಂ ದಸ್ಕತೆ ಖಾಲ್ ಮುದ್ರಿತ್ ಕೆಲಿಂ. ಚೀನಿ ರಾಜ್ವಟ್ಕೆಂತ್ ಕಾಗ್ದಾಚೊ ಆವಿಶ್ಕಾರ್ ಜಾಲೊ ತೆದ್ನಾಂ, ರಾಯಾಂನಿಂ ಆನಿಂ ಸರ್ಕರಾಂನಿಂ ಕಾಗ್ದಾಚ್ಯೆ ನೋಟ್ ಪ್ರಿಂಟ್ ಕೆಲೆ. ನೋಟಾರ್ ’face value” ಆನಿಂ ಅಧಿಕೃತ್ ದಸ್ಕತ್ ಆಸ್ಲಿ ಸಾಂಗಾತಾಚ್, “ಹ್ಯಾ ನೋಟಾಚಿ ಬದ್ಲೆಕ್ ಬಾಂಗರ್ ದಿತೆಲ್ಯಾಂವ್” ಮ್ಹಳ್ಳಿ ಭಾಸವ್ಣಿ. ಕಿತ್ಲ್ಯಾ ಸರ್ಕರಾಂನಿಂ ಹಿ ಭಾಸವ್ಣಿ ಪಾಳ್ಳ್ಯಾ ತೆಂ ಸಕ್ಟಾಂಕ್ ಕಳಿತ್ ಆಸಾ. ಕೋಣೆಂಯೀ ಸರ್ಕಾರಾ ಕಢೆಂ ನೊಟಾ ಬದ್ಲೆಕ್ ಬಾಂಗರ್ ಮಾಗ್ಲೆಲೆಂ ಹಾಂವ್ ನೆಣಾಂ. (ಪೂಣ್, ಮೋದಿನ್ ಅನಾಣಿಕರಣ್ ಕರ್ತನಾಂ ಲೋಕಾಕ್ ಸರ್ಕಾರಾ ವಯ್ರ್ ಆಸ್ಚೊ ಭಾರ್ವಾಸೊ ಲೆಗುನ್ ಮೊಡ್ಲೊ ತೆಂ ಹಾಂವ್ ಜಾಣಾಂ).
ಧಾತುಚಿಂ ನಾಣಿಂ ಆಸ್ಲಿ ದುಡು (real money). ಕಾಗ್ದಾಚ್ಯೆ ನೋಟ್ ಕೇವಲ್ ವ್ಯವಸ್ತ-ಪತ್ರ್ (fiat money). ಹ್ಯಾ ದುಡ್ವಾಕ್ ಆಂತರಿಕ್ ಮೋಲ್ ನಾಂ. ಹೊ ದುಡು intrinsic money ನಹಿಂ ಕಿತ್ಯಾಕ್, ಕಿತ್ಲೆ ನೋಟ್ ಛಾಪ್ಲೆ ತಿತ್ಲೆಂ ಆಸ್ತ್-ಬದಿಕ್ (ಬಾಂಗರ್, ರುಪೆಂ ಇತ್ಯಾದಿ) ಸರ್ಕಾರಾ ಕಡೆಂ ಆಸಾ ಮ್ಹಣ್ ಖಾತ್ರಿ ನಾಂ. ಹೆ ಕೇವಲ್ political money ಆನಿಂ ಹೆ ಪಯ್ಶೆ ತೀನ್ ಕಾಮಾಂ ಕರ್ತಾತ್: 1) ಅಸ್ತ್-ಬದಿಕಾಚ್ಯೆಂ ಮೋಲ್ ಬಾಂದ್ತಾತ್, 2) ವಿನಿಮಯ್ ಕರ್ಚೆಂ ಲೇಕ್ ದವರ್ತಾತ್ 3) ಪಾವ್ತಿ ಸಾಧನ್ ಮ್ಹಣ್ ವ್ಯಾಪಾರಿ ವಾಪರ್ತಾತ್. ಹಿಂ ತೀನ್ ಕಾಮಾಂ ಜಾಗತಿಕ್ ಆರ್ಥಿಕ್ ವ್ಯವಸ್ತೆಚ್ಯೆ ಭದ್ರತೆಕ್ ಆನಿಂ ಸ್ಥಿರತೆಕ್ ಘರ್ಜ್ಯೆಚಿಂ.
ಕಂಪ್ಯೂಟರಾಂ ಆನಿಂ ಅಂತರ್-ಜಾಳಿ ಆಯಿಲ್ಲ್ಯಾ ಉಪ್ರಾಂತ್, ತಶೆಂ ಇಂಟರ್-ನೇಟ್ ಸ್ಪೀಡ್ ವ್ಹಡ್ ಮಾಪಾನ್ ವಾಡ್ಲೆಲ್ಯಾ ವರ್ವಿಂ, ಡೆಬಿಟ್ ಕಾರ್ಡ್, ಕ್ರೆಡಿಟ್ ಕಾರ್ಡ್, ನೆಟ್-ಬ್ಯೇಂಕಿಂಗ್, UPI, ಖಾಸ್ಗಿ wallet ತಸ್ಲಿಂ ಪಾವ್ತಿ ಸಾದಾನಾಂ ಆಯ್ಲಿಂ. ಹೊ ಖರೊಚ್ ಡಿಜಿಟಲ್ ದುಡು. ಆನಿಂ ಆತಾಂ, ಕ್ರಿಪ್ಟೊ-ಕರೆನ್ಸಿ ಡಿಜಿಟಲ್ ದುಡ್ವಾಚ್ಯೆಂ ಆಧುನಿಕ್ ಆವಿಶ್ಕಾರ್. ಹೊ, ಆಯ್ಚೊ ಆನಿಂ ಫಾಲ್ಯಾಂಚೊ ದುಡು. ಹಾಂಗಾ ವಯ್ರ್ ದಿಲ್ಲೆಂ ಪಿಂತುರ್ ಆದ್ಲ್ಯಾ, ಆತಾಂಚ್ಯಾ ಆನಿಂ ಯೆಂವ್ಕ್ ಆಸ್ಚ್ಯಾ ಕಾಳಾಚ್ಯಾ “ದುಡ್ವಾಚ್ಯೆಂ” ವಿವರಣ್ ದಿತಾ, ಹ್ಯಾ ಪಿಂತುರಾಂತ್ Math Money (Item 7) ಪಳೆಯಾ:
ಬಿಟ್-ಕೊಯ್ನ್ ತಸ್ಲ್ಯಾಂ ಕ್ರಿಪ್ಟೊ-ಕರೆನ್ಸಿಚ್ಯೆಂ ತತ್ವ್-ಶಾಸ್ತಿರ್ ಕಿತೆಂ?
1. ಬಿಟ್-ಕೊಯ್ನ್ ರಚ್ತನಾಂ, ನಾಕಾಮೊಟೊನ್ ತಾಚ್ಯಾ ಪಾಟ್ಲೆಂ ತತ್ವ್-ಶಾಸ್ತಿರ್ ಪರ್ಗಟ್ಲೆಂ. ಕಾಗ್ದಾ-ಪತ್ರ್ ದುಡ್ವಾಚ್ಯೆಂ ಮೂಳ್, ಸೆಂಟ್ರಲ್ ಬ್ಯೆಂಕಾಂ ವಯ್ರ್ ವಿಶ್ವಾಸ್. ಕಿತ್ಲ್ಯಾಂ ಸೆಂಟ್ರಲ್ ಬ್ಯೆಂಕಾಂನಿಂ ಆಪ್ಲಿ ಕರೆನ್ಸಿ ಬುಡಂವ್ಕ್ ನಾಂ? (ದಾಖ್ಲ್ಯಾಕ್, 1951 ಇಸ್ವೆಂತ್ ಏಕ್ ಗ್ರಾಮ್ ಬಾಂಗಾರಾಚ್ಯೆಂ ರುಪಿಯಾಂನಿಂ ಮೋಲ್ ಕಿತ್ಲೆಂ ಆಸ್ಲೆಂ? ಆನಿಂ ಆತಾಂ 2021 ಇಸ್ವೆಂತ್?) ರುಪಿಯಾಚ್ಯೆಂ ಮೋಲ್ ಪಾತಾಳಾಕ್ ದೆಂವಯ್ಲಾಂಮೂ, ತರ್ ವಿಶ್ವಾಸ್ ಖಂಯ್ ಆಸಾ?
2. ಬಿಟ್-ಕೋಯ್ನ್ ರಚುಂಕ್ ತಾಣೆಂ ಏಕ್ ಗಡ್ ಘಾಲಿ. 21 ಮಿಲಿಯನ್ ಬಿಟ್-ಕೋಯ್ನ್ ಮಾತ್ರ್ ರಚ್ಯೆತ್. 2021 ಫೆಬ್ರೆರ್ ಪರ್ಯಾಂತ್, 19 ಮಿಲಿಯನ್ ಮಿಕ್ವೊನ್ ಬಿಟ್-ಕೋಯ್ನ್ ರಚ್ಲ್ಯಾಂತ್. ಆನಿಂ 2 ಮಿಲಿಯನ್ ರಚ್ತಚ್, ಮೀತ್ ಮಿರ್ವೊಂಕ್ ಜಾಯ್ನಾ ದೆಕುನ್ ವಿಶ್ವಾಸ್ ಕಾಯಾಮ್ ಉರ್ತಲೊ ಮ್ಹಣ್ ತಾಚ್ಯೆಂ ಚಿಂತಪ್.
3. ನಾಕಾಮೊಟೊ ಪ್ರಮಾಣೆಂ, ಹೆಂ ನವೆಸಾಂವ್ ವ್ಯಕ್ತಿಂಕ್ ಸ್ವತಾಚಿ ಜವಾಬ್ದಾರಿ ಖುದ್ದ್ ವಯ್ಸುಂಕ್ ಸ್ವತಂತ್ರ್ ದಿತಾ. ಆಪ್ಣಾಚ್ಯೆಂ ಬರೆಂ ವ ವಾಯ್ಟ್ ಖುದ್ದ್ ಸಮ್ಜಾಜೆ. ಕೋಣಾಚೊ, ಪ್ರತ್ಯೆಕ್ ಜಾವ್ನ್ ಸರ್ಕಾರಿ ಅಧಿಕಾರಿಂಚೊ, ಸೆನ್ಸರ್ ಕರ್ಚೊ ಕಂಟ್ರೊಲ್ ನಾಸ್ತಾನಾನಾಂ.
4. ಬಿಟ್-ಕೋಯ್ನ್ ಖರಿಚ್ ಜಾಗತಿಕ್ ಕರೆನ್ಸಿ. ದೆಸಾಚ್ಯೊ ಗಡಿ ಹಾಕಾ ಲಾಗು ಜಾಯ್ನಾಂತ್. ಮನ್ ಆಸ್ಲೆಲ್ಯಾನ್ ಕೋಣೆಂಯೀ ಅಧಿಕೃತ್ ಪರ್ವಣ್ಗಿ ಘೆನಸ್ತಾನಾಂ ಹ್ಯಾ “ಡಿಜಿಟಲ್ ಆಸ್ತ್-ಬದಿಕಾಚೊ” ಮಾಲಿಕ್ ಜಾವ್ಯೆತ್. ಸಾಧ್ಯ್ ಜಾಲ್ಯಾರ್ ಖುದ್ದ್ ಹಿಂ ಕ್ರಿಪ್ಟೊ-ನಾಣಿಂ ರಚ್ಯೆತ್.
5. ಸಮ-ವಯಸ್ಕ್ ಥಾವ್ನ್ ಸಮ-ವಯಸ್ಕಾ ಮಧ್ಲಿ (peer-to-peer) ವಿನಿಮಯ್ ಕರ್ಚಿ ಡಿಜಿಟಲ್ ತೆಕ್ನೊಲೊಜಿ ಸಾಧಾರ್ಣ್ ಬೋವ್ ಸೊಂಪಿ ಜಾಲ್ಯಾ ದೆಕುನ್ ಸಾಧ್ಯಾ ಮನ್ಷ್ಯಾಂಕ್ ಲೆಗುನ್ ಹಿ ಕರೆನ್ಸಿ ವಾಪ್ರುಂಕ್ ಸಾಧ್ಯ್.
ಬಿಟ್-ಕೋಯ್ನ್ mining ಕರ್ಚ್ಯೆಂ ಕಶೆಂ?
1. ಹಾಕಾ ವ್ಹಡ್ ಪವರಾಚಿಂ ಮ್ಹಾ-ಪ್ರೊಸೆಸರ್ ಆಸ್ಚಿಂ ಹೈ-ಸ್ಪೀಡ್ ಕಂಪ್ಯುಟರಾಂ ಜಾಯ್. ಹೈ-ಸ್ಪೀಡ್ ಇಂಟರ್ನೆಟ್ ಕನೆಕ್ಶನ್ ಜಾಯ್. ಬಿಟ್-ಕೊಯ್ನ್ ಸೊಫ್ಟ್-ವೆರ್ ಜಾಯ್.
2. ಭಾರಿಚ್ ಸಂಕೀರ್ಣ್ ಗಣಿತ್ ಸವಲಾಂಕ್ ಜಾಪಿ ಸೊಧುಂಕ್ ಜಾಯ್ ತಸ್ಲಿ ಶ್ಯಾಥಿ ಆನಿಂ ಪಿಸಾಯ್ ಜಾಯ್. ಜಾಪಿ ಸ್ವೀಕಾರ್ ಜಾಲ್ಲ್ಯಾ ವೆಳಾ, ಬಿಟ್-ಕೋಯ್ನ್ ರಿವಾರ್ಡ್ ಲಾಬ್ತಾ. ಹಿಂ ರಿವಾರ್ಡ್ ಜಾವ್ನ್ ಲಾಭ್ಲೆಲಿಂ ಬಿಟ್-ಕೋಯ್ನ್ ಹ್ಯಾ ಖುದಾಯ್ಗಾರಾಚಿಂ.
3. ಬಿಟ್-ಕೋಯ್ನ್ ಬ್ಲೊಕ್-ಚೇಯ್ನ್ ತೆಕ್ನೊಲೊಜಿ ವಾಪ್ರಿತಾ. ದೆಕುನ್, latest updated block-chain public ledger download ಕರುಂಕ್ ಜಾಯ್. ಅಪ್ಣೆಂ ರಚ್ಲೆಲ್ಯಾ ಬಿಟ್-ಕೋಯ್ನಾಚಿ ಕೊಪಿ ಬ್ಲೊಕ್-ಚೇಯ್ನ್ ಲೆಜರಾಂತ್ ಚಿಟ್ಕಾಯ್ಜೆ ಪಡ್ತಾ. ತ್ಯಾ ಖಾತಿರ್ ಆಪ್ಲಿಚ್ ಕ್ರಿಪ್ಟೊ-ವೊಲೆಟ್ ಎಕಾಂವ್ಟ್ ಉಗ್ತೆಂ ಕರಿಜೆ ಪಡ್ತಾ. ಹ್ಯಾ ವೊಲೆಟಾಕ್ ಚಾವಿ (key) ಮೆಳ್ತಾ ತಿ ಸಾಂಬಾಳುಂಕ್ ಜಾಯ್. ಚಾವಿ ಭಾಯ್ರ್ ಪಡ್ಲ್ಯಾರ್, ವೊಲೆಟಾಕ್ ಎಂಟ್ರಿ ನಾಂ. ಮ್ಹಣ್ಜೆ ಬಿಟ್-ಕೋಯ್ನ್ ಗೆಲೆಚ್.
4. ಹ್ಯಾ ಕಂಪ್ಯುಟರಾಂಕ್ ಆನಿಂ ಪ್ರೊಸೆಸಾಕ್ ವ್ಹಡ್ ಮಾಫಾನ್ ವೀಜ್ ಜಾಯ್. ವಯ್ಲ್ಯಾನ್ ಹಿಂ ಪ್ರೊಸೆಸರಾಂ ಕಠೀಣ್ ಗರ್ಮಿ (heat) ಆನಿಂ ಆವಾಜ್ ಕರ್ತಾತ್. ದೆಕುನ್ ಫಾವೊತಿಂ ಏರ್-ಕಂಡಿಶನ್ ಆನಿಂ ಆವಾಜ್ ಕಂಟ್ರೊಲ್ ಕರ್ಚಿಂ ಸಾಧನಾಂ ಘಾಲ್ಲಿಂ ಲ್ಯೇಬಾಂ ಜಾಯ್. ಹೊ ಏಕ್ ವ್ಹಡ್ ಮಾರ್ಗಿ ವ್ಯವಸಾಯ್.
ಸರ್ಕಾರಿ ಅತರ್ವಣಾಂ ಆನಿಂ ಕ್ರಿಪ್ಟೊ-ಕರೆನ್ಸಿಚೊ ಫುಡಾರ್:
1. ಕ್ರಿಪ್ಟೊ-ಕರೆನ್ಸಿ ಮೈನಿಂಗ್ ಕರ್ತೆಲೆ ಚಡ್ತಾವ್ ಚೀನಿ ಆಸ್ಲೆ. ಪೂಣ್, ಹ್ಯಾ ಮಾಯ್ ಮಹಿನ್ಯಾಂತ್ ಚೀನಿ ಸರ್ಕಾರಾನ್ ಹ್ಯಾ ದಂಧ್ಯಾಕ್ ಬಂದಡ್ ಘಾಲಿ. ಕ್ರಿಪ್ಟೊ-ವಿನಿಮಯ್ ಪ್ಲೆಟ್-ಫೊರ್ಮಾಂಕ್ ಬ್ಯೆಂಕಿಂಗ್ ಆನಿಂ ಹೆರ್ ಆರ್ಥಿಕ್ ಸೇವಾ ದೀಂವ್ಕ್ ಆಡ್ವಾರ್ಲೆಂ. ಸರ್ವ್ ಥರಾಚಿಂ ಕ್ರಿಪ್ಟೊ-ಕರೆನ್ಸಿ ನಿಷೇದ್ ಕೆಲಿ. ತಶೆಂ ತರ್ಯೀ ಸರ್ಕಾರಿ ಕಂಟ್ರೊಲ್ ಹ್ಯೆ ವೃತ್ತಿಚ್ಯೆರ್ ಆಯ್ಲೊ.
2. ತುರ್ಕಿ, ಮೊರೊಕ್ಕೊ, ಬಾಂಗ್ಲಾದೇಸ್, ಆನಿಂ ಚೀನ್ ಸರ್ಕಾರಾಂನಿಂ ಕ್ರಿಪ್ಟೊ-ಕರೆನ್ಸಿ ಆಡ್ವಾರ್ಲ್ಯಾ. ರಶ್ಯಾ ಆನಿಂ ಎಜಿಪ್ತಾಂತ್ ಹ್ಯಾ ವ್ಯಾಪಾರಾಚ್ಯೆರ್ ಥೊಡೀ ಬಂದಡ್ ಆಸಾ.
3. 2018 ಅಪ್ರೆಲಾಂತ್ ರಿಜರ್ವ್ ಬ್ಯೆಂಕ್ ಒಫ್ ಇಂಡಿಯಾನ್ ಏಕ್ ಸರ್ಕುಲರ್ ದಿಲೆಂ ಆನಿಂ ಹ್ಯಾ ವ್ಯಾಪಾರಾಕ್ ಕಸ್ಸಲಿಂ ಬ್ಯೆಂಕಿಂಗ್ ಸವ್ಲತ್ ಲಾಭಂವ್ಕ್ ನಜೊ ಮ್ಹಣ್ ತಾಕಿದ್ ಘಾಲಿ. ತವಳ್, ಥೊಡಿಂ ಕ್ರಿಪ್ಟೊ-ಎಕ್ಸ್ಚೆಂಜ್ ಬಂಧ್ ಪಡ್ಲಿಂ. ಥೊಡಿಂ ಸುಪ್ರೀಮ್ ಕೊಡ್ತಿಕ್ ಗೆಲಿಂ. 2020 ಮಾರ್ಚ್ಯಾಂತ್ ಕೊಡ್ತಿನ್ ಹೆಂ ಸರ್ಕುಲರ್ ಪಾಟಿಂ ಕಾಡಯ್ಲೆಂ. ತಾಚ್ಯಾ ಉಪ್ರಾಂತ್, ಹೊ ವ್ಯಾಪಾರ್ ದಿಡೀರ್ ವಾಡ್ಲೊ. ದೆಕುನ್ ಸರ್ಕಾರ್ ಜಾಗೊ ಜಾಲೊ.
4. 2021 ಸುರ್ವೆರ್ ಥಾವ್ನ್ ಕೇಂದ್ರ್ ಸರ್ಕಾರಾನ್ ಹೊ ವ್ಯಾಪಾರ್ ಆಡ್ವಾರುಂಕ್ ಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ ಚಿಂತ್ಪ್ಯಾಂಚಿ ಅಭಿಪ್ರಾಯ್ ಘೆಂವ್ಕ್ ಸುರು ಕೆಲಿ. ಪಾರ್ಲಿಮೆಂಟ್ ಸಮಿತಿ ಘಡ್ಲಿ. ಪೂಣ್, ತಕ್ಶಣ್ ಕಸ್ಸಲೆಂ ಕಾನುನಿ ಮೇಟ್ ಕಾಡ್ಲೆಂ ನಾಂ. ಗರ್ಮೆಚ್ಯಾ ಪಾರ್ಲಿಮೆಂಟ್ ಅಧಿವೇಶನಾಂತ್ ಬಿಲ್ಲ್ ಮಾಂಡ್ಲೆನಾಂ. ಹ್ಯಾಚ್ ನವೆಂಬ್ರ್ 22 ವ್ಯೆರ್ ಹಿಂವಳ್ಯಾ ಅಧಿವೇಶನಾಂತ್ ಪಯ್ಲೆಂ ಉಲ್ಲೇಕ್ ಕೆಲ್ಲೆಂ ಬಿಲ್ಲ್ ಹಾಡ್ತಲೊ ದೆಕುನ್ ಇಂಡಿಯಾಂತ್ ಬಿಟ್-ಕೊಯ್ನ್ ಬಾಜಾರಿ ಮೋಲ್ ವಯ್ರ್ ಸಕ್ಲಾ ವಚೊಂಕ್ ಲಾಗ್ಲೆಂ. ಅತಾಂ ಲಗ್ಬಗ್ 50 ಲಾಖ್ ರುಪಯ್ ಆಸಾ.
5. ರಿಜರ್ವ್ ಬ್ಯೆಂಕಾನ್ ಆಪ್ಲಿಚ್ CBDC ಜಾಹೀರ್ ಕರ್ಚಿ ಮಾಂಡಾವಳ್ ಸುರು ಕೆಲ್ಯಾ. ವರ್ಸ್ ಸಂಪ್ತನಾಂ, ಹಿ ಡಿಜಿಟಲ್ ಕರೆನ್ಸಿ ಬಜಾರಾಂತ್ ಯೆತೆಲಿ. ತವಳ್, ಬಿಟ್-ಕೋಯ್ನ್ ತಸ್ಲ್ಯಾಂ ಸರ್ವ್ ಖಾಸ್ಗಿ ಕ್ರಿಪ್ಟೊ-ಕರೆನ್ಸಿಂಚೊ ವ್ಯಾಪಾರ್ ಕಾಯ್ದ್ಯಾ-ಭಾಯ್ರ್ ಜಾತಲೊ.
6. ಪ್ರಸ್ತುತ್, CoinSwitch Kuber ಆನಿಂ CoinDCX ಹೆ ದೋನ್ ವಿನಿಮಯ್ app ವ್ಹಡ್ ಮಾಫಾನ್ ದಂಧೊ ಕರ್ತಾತ್. ಪಯ್ಲೆಂ ಆಟ್ರಾ ಮಹಿನ್ಯಾಂ ಪಯ್ಲೆಂ ಅಸ್ತಿತ್ವಾಂತ್ ಆಯ್ಲೆಂ, ತಾಕಾ 11 ಮಿಲಿಯನ್ ಗಿರಾಯ್ಕ್ ಆಸಾತ್. ದುಸ್ರೆಂ 14 ಮಹಿನ್ಯಾಂ ಪಯ್ಲೆಂ ಸುರು ಜಾಲೆಂ, ತಾಕಾ 10 ಮಿಲಿಯನ್ ಗಿರಾಯ್ಕ್ ಆಸಾತ್. ಹಿಂದಿ ಫಿಲ್ಮ್ ನಟ್, ಕ್ರಿಕೆಟ್ ಖೆಳ್ಗಾಡಿ ತಸ್ಲ್ಯಾಂ ಸಮಾಜಿಕ್ ಪ್ರಭಾವಿ ಮನ್ಷ್ಯಾಂಕ್ ಹ್ಯೊ ಕ್ರಿಪ್ಟೊ-ಕರೆನ್ಸಿ ವಿನಿಮಯ್ ಕಂಪ್ಣ್ಯೊಂ ಇಸ್ತಿಹಾರ್ ಕರುಂಕ್ ವಾಪ್ರಿತಾತ್. ಟಿವಿ, ಡಿಜಿಟಲ್ ತಶೆಂ ಸಂಪ್ರದಾಯಿಕ್ ಮಾಧ್ಯಮಾಂನಿಂ ಯೆಂವ್ಚಿಂ ಹಿಂ ಇಸ್ತಿಹಾರಾಂ ಆಮ್ಚ್ಯಾ ಯುವ-ಪೀಡಿಕ್ ಕ್ರಿಪ್ಟೊ-ಮಾರ್ಕೆಟಿಕ್ ವೋಡ್ತಾತ್.
7. ಕಾಯ್ದ್ಯಾ-ಭಾಯ್ರ್ ವೇಶ್ಯಾ-ಗಿರಿ, ಅಶ್ಲೀಲ್ ಚಿತ್ರಾಂ, ಜೂವಾ, ಮಟ್ಕಾ, ಸಟ್ಟಾ ಬಜಾರ್, ಮಾಧಕ್ ವಕ್ತಾಂ, ಇತ್ಯಾದಿ “ಪಾತ್ಕಿ” ದಂದೆ ಧರ್ಣಿ ಪಂದಾ ಚಲ್ತಾತ್. ಖಾಸ್ಗಿ ಕ್ರಿಪ್ಟೊ-ಕರೆನ್ಸಿ ಹ್ಯಾಂ ಪಾತ್ಕಿ ದಂದ್ಯಾಂಚ್ಯೆ ಲಿಸ್ಟಿಂತ್ ಮೆಳೊಂಕ್ ಪುರೊ. ಪ್ರತ್ಯೆಕ್ ಜಾವ್ನ್, ಕಾಳ್ಯಾ ದುಡ್ವಾಚೊ ವಯ್ವಟ್, money laundering ತಸ್ಲ್ಯಾಂ ಕ್ರಿಮಿನಲ್ ಕರ್ಮಾಂನಿಂ ಹ್ಯೋ ಕ್ರಿಪ್ಟೊ-ಕರೆನ್ಸಿ ಉಪ್ಕಾರಾಕ್ ಪಡ್ತೆಲ್ಯೊ.
ಬಿಟ್ಕೋಯ್ನಾಚಿಂ ಚ್ಯಾರಿತ್ರಿಕ್ ಮೊಲಾಂ ಆನಿಂ FOMO
ಹಾಂಗಾ ದಿಲ್ಲೆಂ ಚಾರ್ಟ್ ಬಿಟ್ಕೊಯ್ನಾಚಿಂ ಪಾಟ್ಲ್ಯಾ ಆಟ್ ವರ್ಸಾಂಚಿಂ ಚ್ಯಾರಿತ್ರಿಕ್ ಮೋಲಾಂ ದಾಕಯ್ತಾ. ಪಯ್ಲ್ಯಾ ಚ್ಯಾರ್ ವರ್ಸಾಂನಿಂ ಲಗ್ಬಗ್ ಸಮತಳ್ (Flat) ವಾಡಾವಳ್ ಆಸ್ಲಿ. 2017 ಇಸ್ವೆ ಥಾವ್ನ್ ತಕ್ಲಿ ಘುಂವಳ್ ಯೆಂವ್ಚ್ಯೆ ಪರಿಂ ಮೋಲ್ ಚಡತ್ತ್ ಗೆಲೆಂ ಆನಿಂ ಹ್ಯಾ ವರ್ಸಾ ಆಕಾಸಾಕ್ ತೆಂಕ್ಲೆಂ. ಸಾಂಗಾತಾಚ್ , ಅಸ್ತಿರತಾ (volatility) ಪಳೆಯಾ. ಪಾತಿಯೆಂವ್ಕ್ ಜಾಯ್ನಾ ತಸ್ಲಿ.
2017 ದಸೆಂಬ್ರ್ 17ವ್ಯೆರ್, ಮೊಲಾಂ ವಯ್ರ್ ವೆಚ್ಯೆಂ ಪಳೆವ್ನ್, ಹೊರ್ಬೊಸಾನ್ ಜರ್ ಏಕ್ BTC ಲಗ್ಬಗ್ 19,167 ಡೊಲರ್ ದೀವ್ನ್ ಘೆತ್ಲೆಂ ಆನಿಂ ತಾಚ್ಯಾ ಉಪ್ರಾಂತ್ ದಿಡೀರ್ ಕರ್ನ್ ಮೋಲ್ 1,000 ಡೊಲರಾಕ್ ಪಡ್ತಾನಾ, ಭಿಂಯೆವ್ನ್ ಶೆಳೊ ಘಾಮ್ ಸುಟೊನ್ ವಿಕುನ್ ಸೊಡ್ಲೆಂ ತರ್ ಕಿತ್ಲೆಂ ಲುಕ್ಸಾಣ್ ಜಾಲೆಂ ತೆಂ ಲೇಕ್ ಘಾಲಾ. ಲಗ್ಬಗ್ 18,000 ಡೊಲರ್ ಮ್ಹಣ್ಜೆ 13 ಲಾಖ್ ರುಪಯ್ ಬಾಂಯ್ತ್ ಉಡಯಿಲ್ಲ್ಯಾ ಪರಿಂ! ತ್ಯಾ ನಿವೇಷಿಚಿ ಮನೋಸ್ತಿತಿ ಚಿಂತುನ್ ಪಳೆಯಾಂ.
ಅನ್ಯೇಕ್ ಕೂಸ್ ಪಳೆಯಾಂ. ಕೊರೊನಾ ಮ್ಹಾ-ಮಾರಿ ವರ್ವಿಂ ಆಸ್ತ್-ಬದಿಕಾಚಿಂ (tangible assets) ಆನಿಂ ಮಾಲಾಂಚಿಂ (commodities) ಮೋಲಾಂ ದಿಡೀರ್ ಕರ್ನ್ ಪಡ್ಲಿಂ ಮೂ. 2020 ಮಾರ್ಚ್ 17ವ್ಯೆರ್, ಲಗ್ಬಗ್ 4,945 ಡೊಲರ್ ಆಸ್ತಾನಾ ಜರ್ ಏಕ್ BTC ಘೆತ್ಲೆಂ ಆನಿಂ ತೆಂ 2021 ಜನೆರ್ 4ವ್ಯೆರ್ ವಿಕ್ಲೆಂ ತರ್ ಕಿತ್ಲೊ ಲಾಭ್ ಜಾಲೊ? ಏಕುಣ್ವೀಸ್ ಮಹಿನ್ಯಾಂನಿಂ ಬಸ್ಲ್ಲ್ಯಾ ಕಡೆಂಚ್ ಲಗ್ಬಗ್ 29,500 ಡೊಲರ್ ಜೋಡ್ ಜಾಲಿಮೂ. ಬಾಂಗರ್, ಕಚ್ಚಾ-ತೆಲಾ ತಸ್ಲಿ ಸಾಮಗ್ರಿ, ಕಂಪ್ಣೆಚ್ಯೆ ಹಿಷೆ, ಮುಟುವಲ್ ಫಂಡ್, ಬೊಂಡ್ಸ್ ಇತ್ಯಾದಿ ಆಸ್ತ್-ಬದಿಕ್ ಕೇವಲ್ ದೊಡಿಂ ಜಾಂವ್ಚ್ಯೆ ಆವ್ದೆಂತ್ ಬಿಟ್ಕೋಯ್ನಾಚ್ಯೆಂ ಮೋಲ್ 700% ವಾಡ್ಲೆಂ ತೆಂ ಸರ್ಗಾ ಥಾವ್ನ್ ಪಡ್ಲೆಲೆಂ ಮನ್ನಾ ಮ್ಹಣ್ಯೆತ್!
ತಶೆಂ ಘಟ್ ಕಾಳ್ಜಾಚ್ಯಾ ನಿವೆಷಿನ್ ತೆಂ ಏಕ್ BTC ಆಜೂನ್ ಸಾಂಬಳ್ನ್ ದವರ್ಲೆಂ ತರ್, ತಾಚ್ಯೆಂ ಮೋಲ್ ಹ್ಯಾಚ್ ನವೆಂಬ್ರ್ 8ವ್ಯೆರ್ 68, 581 ಡೊಲರಾರ್ ಬಸ್ತಾನಾ ಕಿತ್ಲೊ ಮುನಾಫೊ ಜಾತೊ ಆಸ್ಲೊ ತೆಂ ಚಿಂತುನ್ ಪಳೆಯಾಂ. ಖಂಡಿತ್ ತಕ್ಲಿ ಘುಂವಳ್ ಯೆತೆಲಿ!
ಅಸಲ್ಯಾ ಅಸ್ತಿರ್ ಬಜರಾಂತ್, ಅಬ್ಳೆಶಿ ಜಾಂವ್ಚೆಂ ಸಹಜ್. ಆಪ್ಣಾಕ್ ಬಸ್ಸ್ ಚುಕ್ತಾ ಮ್ಹಳ್ಳೆಂ ಭ್ಯೆಂ. FOMO : Fear Of Missing Out. ಕಿತ್ಲ್ಯಾಂನಿಂ 68, 581 ಡೊಲರ್ (ಲಗ್ಬಗ್ 51 ಲಾಖ್ ರುಪಯ್) ಯೆಟುನ್ ಘೆತ್ಲಾಂ ಆಸ್ತೆಲೆಂ. ಹೆಂ ವರ್ಸ್ ಸಂಪ್ತನಾಂ, 100,000 ಡೊಲರ್ ಜಾಂವ್ಕ್ ಪುರೊ ಆನಿಂ 2030 ಇಸ್ವೆಂತ್ 500,000 ಡೊಲರ್ ಜಾಂವ್ಕ್ ಪುರೊ ಮ್ಹಣ್ ಬೊಲ್ಮೆಂ ಸಾಂಗ್ತೆಲೆ ಲೆಗುನ್ ಆಸಾತ್. ತಾಂಕಾಂ ಪಾತಿಯೆತೆಲೆಯೀ ಆಸಾತ್! ಕ್ರಿಪ್ಟೊ-ಕರೆನ್ಸಿ ಏಕ್ ವ್ಹಡ್ ಬುಳ್ಬುಳೊ ಮ್ಹಣ್ತೆಲೆ ಜಾಯಿತ್ತೆ ಜಾಣಾರಿ ಪುಣ್ ಆಸಾತ್.
ನಾಕಾಮೊಟೊಚ್ಯೆಂ ಸಪಣ್ ಖರೆಂ ಜಾಲೆಂ ಮ್ಹಣ್ಯೆತ್. ಸ್ವಂತ್ ಕರ್ಮಾಂಚಿ ಜವಾಬ್ದಾರಿ ಆಪಾಪ್ಲಿ. ಆಪ್ಲೆ ಪಯ್ಶೆ, ಆಪ್ಣಾಕ್ ಜಾಯ್ ತಶೆಂ ನಿವೇಷ್ ಕರ್. ಕೋಣಾಚಿ ಅಡ್ಕಳ್ ನಾಂ. ಲಾಭ್ ಜಾಲ್ಯಾರ್ ಬೊರೆಂ, ದೇವ್ ಪಾವ್ಲೊ. ಪುರಾ ಬುಡ್ಲೊ ತರ್, ಗಳ್ಪಾಸ್ ಘೆಂವ್ಚಿ ಗತ್ ಯೆತೆಲಿ. ತಶೆಂ ವ್ಹಡ್ ದುಡ್ವಾ-ವಾಲೆ ಘೊಡ್ಯಾಂಚ್ಯೆರ್ ಬೆಟ್ಟಿಂಗ್ ಕರ್ತಾತ್, ತಶೆಂ ಹೊ ಕ್ರಿಪ್ಟೊ-ಕರೆನ್ಸಿಚೊ ಉನ್ಮಾದ್! ಮೋದಿನ್ ಜಾಗ್ವಣ್ ದಿಲ್ಲ್ಯಾ ಪರಿಂ ಆಮ್ಚ್ಯಾ Gen-Z ಯುವ-ಪೀಡಿಕ್ ವಾಯ್ಟಾಂತ್ ಶಿರ್ಕಾಂವ್ಕ್ ಸಾಧ್ಯ್ ಆಸಾ.
ಕ್ರಿಪ್ಟೊ-ಕರೆನ್ಸಿ ಬಜಾರಾಂತ್ ನಿವೇಷ್ ಕರ್ಯೆತ್ಗೀ?
ಆಮ್ಚ್ಯಾ ದೇಸಾಂತ್ 20 ಮಿಲಿಯನ್ ನಿವೆಷಿ ಯೆದೊಳ್ಚ್ ಹ್ಯಾ ವ್ಯಾಪಾರಾಂತ್ ಆಸಾತ್, ತಾಂಚಿ ಪ್ರಾಯ್ ಏವೆರೆಜ್ 25 ವರ್ಸಾಂ. 55% ನಿವೇಷಿ ಲ್ಹಾನ್ ಶೆರಾಂತ್ಲೆ. ಬೊಂಬಯ್, ದಿಲ್ಲಿ ತಸ್ಲ್ಯಾಂ ಮ್ಹಾ-ಶೆರಾಂತ್ಲೆ ಕೇವಲ್ 45%. ಹ್ಯಾಂ ತರ್ನ್ಯಾಂ ನಿವೇಷಿಂಕ್ ಹಿಷ್ಯಾ-ಬಾಜಾರಾಚಿ ಮಾಹೆತ್ ನಾಂ. ತಾಣಿಂ ಕಂಪ್ಣೆಂಚ್ಯೆಂ ಹಿಶೆ, ಮುಚುವಲ್ ಫಂಡ್, ಸರ್ಕಾರಿ ಬೊಂಡ್ಸ್, ಸವರಿನ್ ಗೊಲ್ದ್ ಬೊಂಡ್ಸ್ ಇತ್ಯಾದಿ ಅಸ್ತ್-ಬದಿಕ್ ಮೊಲಾವ್ನಾ. ಶೀದಾ, ಕ್ರಿಪ್ಟೊ-ಕರೆನ್ಸಿಚೊ ವ್ಯಾರ್ ಕರುಂಕ್ ಲಾಗ್ಲ್ಯಾತ್. ಜಾಯಿತ್ತ್ಯಾಂಚ್ಯೆಂ ಹಾತ್ ಹುಲ್ಪೊನ್ ವೆಚಿ ಪರಿಸ್ತಿತಿ ಯೆತೆಲಿ. ತವಳ್, ದುರ್ಸೊಂಚ್ಯೆಂ ಕೊಣಾಕ್? ಏಕ್ ಪಾವ್ಟಿಂ ಕೆಲ್ಲೊ ವ್ಯಾರ್ ಪಾಟಿಂ ಕಾಡುಂಕ್ ಜಾಯ್ನಾ. ಕಾಂಯ್ ಚೂಕ್ ವ್ಯಾರ್ ಜಾಲೊ, ತೊ ದುಡು ಬುಡ್ಲೊಚ್. ರಿಫಂಡ್ ಮ್ಹಳ್ಳೊ ಸಬ್ದ್ ನಾಂ – ಹ್ಯಾ ಕ್ರಿಪ್ಟೊ- ಡಿಕ್ಶನರಿಂತ್. ದೆಕುನ್, ಸಾವದಾನ್. ಆಮಿತಾಭ್ ಬಚ್ಚನಾನ್ ಸಾಂಗ್ಚ್ಯೆ ಪರಿಂ: RBI केह्त हे सतक करो, जागूत रहो. लुक्साण से बचके रहो!
► ಫಿಲಿಪ್ ಮುದಾರ್ಥ್
ಕ್ಲಿಷ್ಟ್ ವಿಷಯ್ ಸೊಂಪೆಪಣಿ ವಿವರಾಯಿಲ್ಲ್ಯಾಫಿಲಿಪ್ ಮುದಾರ್ಥಾಕ್ ದೇವ್ ಬರೆಂ ಕರುಂ. ಕಾಂಯ್ಚ್ tangible backing ನಾಸ್ತಾಂ ಫಕತ್ ವಿಸ್ವಾಸಾಚೆರ್ ಚಲ್ಚೊ ವಯ್ವಾಟ್ ಬುಳ್ಬುಳ್ಯಾ ಬರಿ ಕಿತ್ಲೊ ತೇಂಪ್ ಚಲಾತ್ ಗಾಯ್!. ಫಿಲಿಪ್ ಮುದಾರ್ಥಾನ್ ವಸ್ತುಸ್ಥಿತಿ ವಾಚ್ಪ್ಯಾ ಸಾಮ್ಕಾರ್ ದವರ್ಲ್ಯಾ ವ್ಹಯ್ ಸಾಂಗಾತಾ ಲಿಪ್ತಿ ಚೆತಾವ್ಣಿಯ್ ದಿಲ್ಯಾ. ಅಬ್ಲೇಸಾಂತ್ ಪಡ್ ಲ್ಲ್ಯಾಂಕ್ ತಿ ದಿಸಾತ್ ಗಾಯ್?
Thank you for the timely article on crypto currency. It is a complex subject to write. – Well Done Sir.
In the context of technology Central Bank Digital Currency (CBDC) is a welcoming step, I am sure most of the countries will introduce similar steps and this will have detrimental impact on these crypto currencies. Data indicated, specially the ‘Future Money’ diagram in the article is interesting. Like ‘Euro’ in Europe, why cannot there be a regulated Universal/International currency ?
Nice to note the updated version of the KITTAL website, specially allowing the ‘spelling check, copy and paste’ function in ‘Leave a Reply’
ಬಿಟ್ ಕೋಯ್ನ್ಸಾಂ ವಿಶಿಂ ಲ್ಹಾನ್ ಲ್ಹಾನ್ ಗಾಂವ್ಚೆಂ ತರ್ನಾಟೆಯೀ ಉಲಂವ್ಕ್ ಲಾಗೊನ್ ಅಪ್ಣೆ ಇತ್ಲೆ ಹಜಾರ್ ಬಿಟ್ ಕೋಯ್ನ್ಸಾಂನಿ ನಿವೇಷ್ ಕೆಲ್ಲೆ ಆಜ್ ತಾಚಿ ವಾಡಾವಳ್ ಇತ್ಲಿ ಜಾಲ್ಯಾ ಮ್ಹಣೊನ್ ಉಲಯ್ತಾನಾ, ಹೆಂ ಕಸಲ್ಯಾ ಥರಾಚೆಂ ಇನ್ವೆಸ್ಟ್ಮೆಂಟ್ ಹಾಂವ್ ಅಜ್ಯಾಪ್ಲೊಂ. ಹ್ಯಾ ವಿಶಿಂ ಬೋವ್ ಸಂಪಿ ಜಾಣ್ವಾಯ್ ಜೊಡುಂಕ್ ಕೆಲ್ಲೆಂ ಪ್ರಯತನ್ ಯೀ ಮ್ಹಜಾ ವಾಂಟ್ಯಾಕ್ ‘ಕಬ್ಬಿಣದ ಕಡಲೆಕಾಯಿ’ ಜಾಲ್ಲೆಂ.
ಫಿಲಿಪ್ಪಾನ್ ಬಿಟ್ ಕೋಯ್ನ್ಸಾಂ ವಿಶಿಂ ಜಾತಾ ತಿತ್ಲ್ಯಾ ಸರಳ್ ರಿತಿನ್ ವಿವರ್ಸಿಲಾಂ ತರೀ ಹೆಂ ಪುರ್ತೆಂ ಸಮ್ಜೊಂಕ್ ಕಂಪ್ಯೂಟರ್ ಗ್ಯಾನ್, ತಾಚಾ ಪರಿಬಾ಼ಷೆಚಿ ಜಾಣ್ವಾಯ್ ಗರ್ಜ್ ಮ್ಹಣ್ ದಿಸ್ತಾ.
ಇತ್ಲೊ ಸಂಕೀರ್ಣ್ ವಿಷಯ್ ಕೊಂಕ್ಣೆಂತ್ ಪ್ರಸ್ತುತ್ ಕೆಲ್ಲ್ಯಾ ಫಿಲಿಪ್ಪಾಕ್ ಶಬಾಸ್ಕಿ ಫಾವೊ.
ತಶೆಂಚ್, ಹ್ಯಾಚ್ ಸಂದರ್ಭಾರ್ , ಕಿಟಾಳ್ ಜಾಳಿ ಜಾಗ್ಯಾಚೆಂ ವಿನ್ಯಾಸ್ ಬದ್ಲಿ ಕರ್ನ್ ನವೆ ನವೆ ಪ್ರಯೋಗ್ ಕರುನ್ ಆಸ್ಚಾ ಹೆಚ್ಚೆಮಾಕ್ ಯೀ ಥಮ್ಸ್ ಅಪ್.
ಕ್ರಿಪ್ಟೊ ಕರೆನ್ಸಿ ವಿಶಿಂ ಮಾತ್ರ್ ನ್ಹಹಿಂ, ದುಡ್ವಾ ವಿಶಿಂಯ್ ಹೆಂ ಏಕ್ ಉತ್ತೀಮ್ ಲೇಖನ್ ಮ್ಹಣ್ಯೆತ್. ದುಡು ಏಕ್ ಸಕತ್ ಮ್ಹಣ್ಯೆತ್. ಸಕತ್ ಗರ್ಜ್ ಅಸಾ ಪುಣ್ ತಿ ಸಕತ್ ಅಪ್ಣಾಂವ್ಚ್ಯಾ ಖಾತಿರ್ ಗರ್ಜೆ ಭಾಯ್ಲಿ ಕುಸ್ತಿ ಕಠಿಣ್ ಲುಕ್ಸಾಣ್ ಕರುಂಕ್ ಪಾವ್ತಾ. ಹಾಂವ್ ಹೆಂ ಲೇಖನ್ ಬರಯ್ತಾನಾ ಬಿಟ್ಕೊಯ್ನ್ ೧೧% ಘಡ್ಯೆನ್ ಪಡ್ಲಾಂ. ಶಿಸ್ತ್, ಸಾರ್ಕೆಂ ವಿಧಾನ್, ಸಮ್ಜಣಿ ವಿನಿಯೋಗ್ ಕರ್ತಾನಾ ಗರ್ಜೆಚಿ. ನಾಂ ತರ್ ಕಷ್ಟಾಂನಿ ಜೊಡಲ್ಲೊ ದುಡು ಘಡ್ಯೆನ್ ಲುಕ್ಸಾಣ್ ಜಾತಾ. ಪಾಟ್ಲಾ ದೋನ್ ವರ್ಸಾಂ ಥಾವ್ನ್ ಬೆಂಕಾಚ್ಯಾ ಡೆಪೊಸಿಟಾಚಿ ವ್ಹಾಡ್ ಉಣಿ ಜಾಲ್ಯಾ ಮ್ಹಣ್ ಲೋಕ್ ವಟ್ರಾಸಿ ವಿನಿಯೋಗ್ ಕರ್ನ್ ಅಸಾ. ವಿನಿಯೋಗ್ ಕರ್ತೆಲ್ಯಾಂನಿ ಅಪುಣ್ ಕಿತ್ಲಿ ರಿಸ್ಕ್ ಘೆಂವ್ಕ್ ಸಕ್ತಾಂ ತೆಂ ಪಯ್ಲೆಂ ಪಾರ್ಕುಂಚಿ ಗರ್ಜ್ ಅಸಾ. ನಾ ತರ್ ಮಾರ್ಕೆಟ್ ಪಡ್ತಾನಾ ಭಲಾಯ್ಕಿಯ್ ಭಿಗಡ್ತಾ. ವಿನಿಯೋಗಾ ವೆಳಿಂ ಭಿರಾಂತ್ ಅನಿ ಅಬ್ಲೆಸ್ ಅಸಲ್ಯಾ ಭೊಗ್ಣಾಂಚೆರ್ ನಿಯಂತ್ರಣ್ ಸಾಂಬಾಳ್ಚೆಂ ಗರ್ಜೆಚೆಂ. ಮಾನೆಸ್ತ್ ಫಿಲಿಪ್ ಮುದಾರ್ಥಾನ್ ಸಕಾಳಿಕ್ ಲೇಖನ್ ದಿಲಾಂ.
This is certainly a complicated topic. Philip has explained it in common man’s language. Despite ban India is top in Crypto currency deals. Quite common compared to prevailing practices. Most are ready when they learn ‘Apna Kithna?’ Most politicians are game for such practices. It is a bubble for sure and people made huge profit investing in Crypto, especially in last couple of years. No one knows whether it is saturated and when the bubble will burst? People embraced risk made fortune in recent past. Author has opined towards caution thoughts needs to to be practiced before youth burn their fingers.
ಮೊಗಾಳ್ ಫಿಲಿಪ್ ಮುದಾರ್ಥಾ, ತುಜಿ ಲಿಖ್ಣಿ ಪ್ರಸ್ತುತ್ ಸಂಗ್ತಿಂಚೆರ್ ಬರೊಚ್ಚ್ ಆರ್ಸೊ ದಾಖಯ್ತಾ. ತುಜೆಂ ಲೇಖನ್ ಸಾಧ್ಯಾ ಲೋಕಾಕೀ ಹ್ಯಾ ಏಕಾಚ್ಛಾಣೆ ಸರ್ಗಾಕ್ ಚಡ್ಲ್ಲ್ಯಾ ಕ್ರಿಪ್ಟೊ ನಾಣ್ಯಾಂ ವಿಶ್ಯಾಂತ್ ಸಂಕ್ಷಿಪ್ತ್ ರೀತಿಚೆ ಮ್ಹಾಹೆತ್ ಆಮ್ಕಾಂ ದಿತಾ. ಹ್ಯಾ ನಾಣ್ಯಾಂಚೆಂ ಮೋಲ್ ಏಕಾಚ್ಛಾಣೆ ಸರ್ಗಾಕ್ ಚಡ್ಲಾಂ ಆನಿ ಸಭಾರಾಂಕ್ ಮಿಲಿಯಾಧಿಪತಿ ಕರುಂಕ್ ಪಾವ್ಲಾಂ. ಹೆಂ ಮಾತ್ರ್ ಕೆದೊಳ್ ಪರ್ಯಾಂತ್ ಅಸೆಂಚ್ ಉರಾತ್ ವ ಕೆನ್ನಾಂ ಪಂಕ್ಚರ್ ಜಾಲ್ಲ್ಯಾ ಟಯಾರಾಪರಿಂ ಧರ್ಣಿಕ್ ತೇಂಕಾಂತ್ ತೆ ಸಾಂಗೊಂಕ್ ಅಸಾಧ್ಯ್. ತುಜ್ಯೆ ಲಿಖ್ಣೆ ಥಾಂವ್ನ್ ಆನಿಕೀ ಸಭಾರ್ ಅಸಲಿಂ ಲೋಕಾಕ್ ಉಪ್ಕಾರಾಕ್ ಪಡ್ಚಿಂ ಲೇಖನಾಂ ಯೇಂವ್ನ್ ವಾಚ್ಪ್ಯಾಂಚ್ಯಾ ಮತಿಂಕ್ ತುಂ ಪ್ರಕಾಶ್ ಫಾಂಖಯ್ತೊಲೊಯ್ ಮ್ಹಣ್ ಮ್ಹಾಕಾ ಅಖಂಡ್ ಭರ್ವಾಸೊ ಆಸಾ. ತುಕಾ ಸರ್ವ್ ಬರೆಂ ಮಾಗ್ತಾಂ.