ಎಕ್ಲೊ ಮೆಲಾ ಆನಿ ತಾಚೆ ಭೊಂವ್ತಿಲ್ಯಾ ಸಿಂತಿಮೆಂತಾಂಕ್ ಬಗ್ಲೆಕ್ ಲೊಟುನ್ ವಿಚಾರಾಚೆ ಅತ್ಮೆ ಮೊಡ್ಯಾಭೊಂವ್ತಿಂ ಪಾಸಾಯೊ ಮಾರ್ತಾಶೆಂ ಭೊಗ್ತಾ, ಕವಿತಾ ವಾಚ್ತಾನಾ. ಕೋಣ್ ತೊ ಮೆಲ್ಲೊ? ತೇಂಯ್ ಕುಡಾಂತ್ಲ್ಯಾ ಬಾರೀಕ್ ವಾರ್ಯಾಕ್ ಸಯ್ತ್ ನೆಗಾರುನ್ ? ಮೂಟ್ ಬಿಗ್ದುನ್ಚ್ ಆಸ್ಲ್ಲೊ? ಕಾಂಯ್ ಕ್ರಾಂತಿಕಾರಿ? ವೆವಸ್ತೆಚ್ಯಾ ವಿರೋದ್ ಝುಜ್ಲ್ಲೊ? ಜಾಂವ್ಕೀ ಪುರೊ.. ಪುಣ್ ಇತ್ಲೆಂ ಮಾತ್ರ್ ನಕ್ಕಿ ಕೀ ತೊ ಕವಿತೆಂತ್ಲ್ಯಾ ನಾಯಕಾಕ್ ಲಾಗ್ಶಿಲೊ. ದೆಕುನ್ ಕವಿತೆಂತ್ಲೊ ನಾಯಕ್ ಅಸಲಿಂ ಮರ್ಣಾಂ ಜಾಂವ್ಚಿಂ ಆಡಾಂವ್ಕ್ ಬೊಂಬ್, ಬಂದುಕೆಂಕ್ ಹುಮ್ಟುನ್ ಉಡಂವ್ಚಿ ಖಂತ್ ಉಚಾರ್ತಾ. ಎಕಾ ಮೊಡ್ಯಾಕ್ ಆಪ್ಲ್ಯಾ ಖಾಂದಾರ್ ಘೆತ್ಲ್ಲಿ ಹಿ ಕವಿತಾ ಸಗ್ಳ್ಯಾಂನಿ ಶಾಂತಿ, ಅಹಿಂಸಾ ರಾಜ್ ಕರುಂದಿ ಮ್ಹಳ್ಳ್ಯಾ ಚಿಂತ್ಪಾಕ್ ಉಸ್ವಾಸ್ ಫುಂಕ್ತಾ. ಮಿಸ್ತೆರಾಭರಿತ್ ಪೂಣ್ ಬೋವ್ ಮಾರ್ಮಿಕ್ ಕವಿತಾ.
ತುಂ ವೆಚ್ಯಾ ಪಯ್ಲೆಂ
ತಶೆಂ ಜಾಂವ್ಕ್ ನಜೊ ಆಸ್ಲೆಂ…
ಕಾಳೊಕಾ ಕುಡಾಂತ್ಲ್ಯಾ ತ್ಯಾ
ಬಾರೀಕ್ ವಾರ್ಯಾಕೀ ತುವೆಂ ನೆಗಾರ್ಲೆಂಯ್…
ತುವೆಂ ಬಿಗ್ದಿಲ್ಲಿ ತುಜ್ಯಾ ಹಾತಾಚಿ ಮೂಟ್
ಆನಿಕೀ ತಶಿಚ್ ಆಸಾ…
ತಾಚೆ ಭಿತರ್ಲೆಂ ಮ್ಹಜೆಂ ಸಪಣ್
ಎದೊಳ್ ಕುಸೊನ್ ಕಿರ್ಲೊನ್
ವ್ಹಡ್ ರೂಕ್ ಜಾಲಾಂ…
ತಾಳೊ ಉತ್ರೊನ್ ಯೇನಾತ್ಲ್ಯಾ
ತುಜ್ಯಾ ಅಸ್ಪಶ್ಟ್ ಉತ್ರಾಂಕ್ ಹಾಂವ್
ಆನಿಕೀ ಡಿಕೋಡ್ ಕರೀತ್ ಆಸಾಂ…
ತೆಂ ಪುನರ್ಜಿವಿತಾ ವಿಶಿಂ
ಜಾಂವ್ಕ್ ಪುರೊ…
ತುಜ್ಯಾ ತ್ಯಾ ನಿರ್ಜೀವ್ ಪಾಂಯಾಂಕ್
ರೆಂವೊಡ್ ಮಾರ್ನ್ ಉಮೊ ದಿತಾನಾ ಪುಣಿ
ತಿತ್ಲೊ ನಿರ್ಭಾವುಕ್ ಜಾಂವ್ಕ್ ನಜೊ ಆಸ್ಲೆಂ,
ಅಳೆ…
ತುವೆಂ ನೆಗಾರ್ಲ್ಲ್ಯಾ ತ್ಯಾ ವಾರೆಂ-
ಉಜ್ವಾಡಾ ಸಂಗಿ ಹಾಂವ್ ರಾಕ್ತೇ ಆಸಾಂ…
ಸುಕ್ಲ್ಲ್ಯಾ ಧರ್ಣಿಂತ್ ಕಿರ್ಲೊಂವ್ಚ್ಯಾ
ಬೊಂಬ್ ಬಂದುಕೆಂಕ್ ಕಿತ್ಲೆಂ ಮ್ಹಣ್
ಹುಮ್ಟುನ್ ಕಾಡುಂ?
ತುಜ್ಯಾ ಮೊಗಾಚೊ ತಾಂಬ್ಡೊ ರಂಗ್
ಆನಿ ಪುಣಿ ಧವೊ ಜಾಂವ್ದಿ…
