ಉದ್ಕಾ ವ್ಹಾಳಾಚ್ಯಾ ಆವಾಜಾ ಮಧೆಂ… ಚಲಿಯಾಂಚೊ ರಂಗೀನ್ ತಾಳ್ಯಾಂ ಆವಾಜ್ ಆವಾಜೊನ್ ಆಸ್‌ಲ್ಲೊ.
ವ್ಹಾಳಾ ಭಂವ್ತಿಂಚಿಂ ಆಸ್ಪಾಸ್ಟ್ಯಾ ಘರಾಂಚ್ಯೊ ಚಲಿಯೊ… ಕೊಳ್ಶ್ಯಾ ಸಂಗಿ ಉದ್ಕಾ ಖಾತಿರ್ ವ್ಹಾಳಾಲಾಗಿಂ ಯೇವ್ನ್ ಆಸ್ತಾಂ… ಎಕಾಮೆಕಾ ಉಲೊವ್ನ್ ಹಾಸೊನ್, ಬಿಂದಾಸ್ ಬೋಬ್ ಉಟಯ್ತ್ ಯೆಂವ್ಚೊ ಆವಾಜ್ ತೊ.
ಸದಾಂಚೆಪರಿಂ ಬಿಂದಾಸ್ ಥರಾನ್ ಬೊಬೊ ಹಾಸೊ ಉಟೊವ್ನ್ ತಿಂ ವ್ಹಾಳಾ ಲಾಗಿಂ ಪಾವ್ತಾಸ್ತಾನಾಂ…ಎಕಾಎಕಿ ತಾಂಚಿ ನದರ್ ವ್ಹಾಳಾ ದೆಗೆನ್ ಉದಾರೊಚ್ಚ್ ನಿದೊನ್ ಆಸ್ಚ್ಯಾ ತರ್ನಾಟ್ಯಾಚೆರ್ ಪಡ್ಲಿ! ಖಿಣಾನ್ ತಾಂಚೊ ಆವಾಜ್ ಥಂಬ್ಲೊ. ತಾಂಚೆಂ ನದ್ರೆಂತ್…
ಧಡಂಗ್…ಸಂಪೂರ್ಣ್ ವಿಣ್ಗೊ…ಪುರುಶ್ !
ಸುರ್ಯಾ ಕಿರ್ಣಾಂ ಥಾವ್ನ್ ಚುಕೊವ್ನ್ ಘೆಂವ್ಕ್, ಫಕತ್ ತೊಂಡಾಚೆರ್ ಬಾತ್ ಟವೆಲ್ ಆಸ್‌ಲ್ಲೊ. ಉರ್‌ಲ್ಲೊ ಸಗ್ಳೊ…ತಕ್ಲೆ ಥಾವ್ನ್ ಪಾಂಯಾ ತುದ್ಯೆ ಪರ್ಯಾಂತ್ …ವಿಣ್ಗೊ!
ಹ್ಯಾ ಉಗ್ತ್ಯಾ ಪಾಚ್ವ್ಯಾ ಪರಿಸರೆಂತ್…ಅಸಲೆಂ ದೃಶ್ಯ್ ನಿರೀಕ್ಶಿತ್ ಕರಿನಾತ್ಲೆಲ್ಯಾಂ ತಾಂಚ್ಯಾ ಮಧ್ಲ್ಯಾ ಥೊಡ್ಯಾಂಚೆ ತೊಂಡ್ ದೊಳೆ ಉಗ್ತೆಚ್ಚ್ ಉರ್ತಾಸ್ತಾಂ…ಥೊಡ್ಯಾಂಚೆ ಕೊಳ್ಶೆ ನಿಯಂತ್ರಣ್ ಚುಕೊನ್ …ಧರ್ಣಿರ್ ಗಳ್ಳೆ!
ಥೊಡ್ಯಾ ಸೆಕುಂದಾಂ ನಂತರ್… ಥೊಡ್ಯೊ ಕಸಲ್ಯಾಗೀ ಶಾರೀರಿಕ್ ಉದ್ವೇಗಾಚ್ಯಾ ಆತುರಾಯೆರ್ ತೆಣೆಂ ಹೆಣೆಂ ಪಳೆಲಾಗ್ಲಿಂ. ಆನಿ ಕೊಣಾಯ್ಚಿಚ್ ಜಾಗ್ ಮಾಗ್ ನಾತ್ಲೆಲ್ಯಾ ಧಯ್ರಾರ್ ತಿಂ…ಘಾಡ್ ನಿದೆರ್ ಆಸ್ಚ್ಯಾ ತಾಚ್ಯಾ ಸರ್ಶಿಂ ಆಯ್ಲಿಂ…ಬೋವ್ ಸರ್ಶಿಂ ಆಯ್ಲಿಂ.
ಹ್ಯಾವೆಳಾ ಏಕ್ ಘಡಿ ತ್ಯಾ ವಿಣ್ಗ್ಯಾ ಕುಡಿ ಥಂಯ್ ತಾಂಚಿ ಕುತೂಹಲ್ ದೀಶ್ಟ್ ಚರೊಂಕ್ ಲಾಗ್ಲಿ. ಅಸಲ್ಯಾ ವೆಳಾ…ತಾಚೆಂ ಧಾಪ್ಲೆಲೆಂ ಮುಸ್ಕರ್ ಪಳೆಂವ್ಚ್ಯಾ ಆತುರಾಯೆರ್ ಎಕ್ಲಿ ಚಲಿ ಆಪ್ಲೊ ದರ್ವಡಿ ಹಾತ್ ತ್ಯಾ ತರ್ನಾಚ್ಯಾಚ್ಯಾ, ತೊಂಡ್ ಧಾಂಪ್ಲೆಲ್ಯಾ ಬಾತ್ ಟವೆಲಾಚೆರ್ ಘಾಲೊ. ಆನಿ ಟವೆಲ್ ಉಗ್ತೊ ಕರ್ತಾಂ ಮ್ಹಣ್ತಾಂ…
ಹೊ ಎಕಾಚ್ಚಾಣೆಂ ಜಾಗೊ ಜಾಲೊ!.
ತ್ಯಾ ಘಡ್ಯೆ ಏಕ್ ಪಾವ್ಟಿಂ … ಆಪುಣ್ ಖಂಯ್?! …ಕಿತೆಂ?! …ಮ್ಹಣ್ ಮತಿಕ್ ಯೇನಾಸ್ತಾಂ…ಘುಸ್ಪೊಡೊನ್ ಆಸ್ತಾಂ, ಯಾಂತ್ರಿಕ್ ಥರಾನ್ ತಾಚೊ ಹಾತ್ ತಾಚ್ಯಾ ವಿಣ್ಗ್ಯಾ ಕುಡಿರ್ ಭೊಂವೊಂಕ್ ಲಾಗ್ಲೊ. ತವಳ್ ಸಟ್ಟ್ ಕರುನ್ ತಾಕಾ ಆಪ್ಲೆಂ ವಿಣ್ಗೆಂಪಣ್ ಜಗ್ಲಾಲೆಂ!
ಆನಿ ತ್ಯಾಚ್ಚ್ ಕ್ಶಣಾಂ ತಾಣೆಂ ಆಪ್ಲ್ಯಾ ಮುಸ್ಕಾರಾರ್ ಆಸ್‌ಲ್ಲೊ ಬಾತ್ ಟಾವೆಲ್ ಎಕಾಚ್ಚಾಣೆಂ ಕಾಡ್ಲೊ. ತವಳ್‌ಚ್ಚ್ … ಸುರ್ಯಾ ಕಿರ್ಣಾಂ ತಾಚ್ಯಾ ದೊಳ್ಯಾಂಚೆರ್ ಧಾಡ್ ಘಾಲ್ತಾಸ್ತಾನಾಂ…
ಆಪ್ಲೊ ಉಜ್ವೊ ಹಾತ್ ತಾಣೆಂ ದೊಳ್ಯಾಂಕ್ ಆಡ್ ಧರ್ಲೊ. ಆನಿ ತಕ್ಶಣ್ ಉಟೊನ್ ಬಸ್ಚೆಂ ಪ್ರೇತನ್ ಕರಿಲಾಗ್ಲೊ. ತ್ಯಾಚ್ಚ್ ಘಡ್ಯೆ…ಉಜ್ವಾಡ್ಲೆಲ್ಯಾ ಉಜ್ವಾಡಾಂತ್ ತಾಣೆಂ ದೆಕ್ಲೆಂ.
ಆಪ್ಣಾಕ್ ಪಾಟ್ ಕರುನ್ ‘ಕಿಸಿಕಿಸಿ’ ಹಾಸ್ಯಾಂ ಆವಾಜಾಮಧೆಂ ಧಾಂವುನ್ ಆಸ್ಚ್ಯೊ…ಚಲಿಯೊ.
ಹೆಂ ಪಳೆತಾಂ…ಪ್ರಸ್ತುತ್ಚಿ ಆಪ್ಣಾಚಿ ವಿಣ್ಗಿ ಗಜಾಲ್…ತಾಚ್ಯಾ ಗಮನಾಕ್ ಯೇಂವ್ಕ್ ತಾಕಾ ಥೊಡಿಂ ಸೆಕುಂದಾಚ್ಚ್ ಜಾಯ್ ಪಡ್ಲಿಂ. ತ್ಯಾ ಉಗ್ತ್ಯಾ ಪರಿಸರೆಂತ್ …
‘ಚಲಿಯೊ! ಆನಿ ಆಪುಣ್ ಉಗ್ತೊ…ವಿಣ್ಗೊ !.’
ತ್ಯಾಘಡ್ಯೆ ಪರತ್… ‘ಹೆಂ ಕಶೆಂ?!…ಕಸೊ ಆನಿಂ ಕಿತ್ಯಾಕ್ ಹಾಂಗಾಸರ್ ಪಾವ್ಲೊಂ?! ‘…ಹೆಂ ಮತಿಕ್ ಧೊಸುನ್ ಆಸ್ತಾಂ…ತಾಕಾ…
ಆದ್ಲ್ಯಾ ದಿಸಾ… ‘ಹಾಂವ್ ಸಾಂಗಿನ್ ತರ್…!’ ಮ್ಹಣ್ ಕ್ಲೋಡಿಯಾಕ್ ಬ್ಲ್ಯಾಕ್ ಮೇಯ್ಲ್ ಕರುನ್… ನಂತರ್ ಕೂಡ್ ನಿತಳ್ ಕರ್ಚ್ಯಾಕ್ …ಹ್ಯಾ ವ್ಹಾಳಾಕ್ ಆಯಿಲ್ಲೊ. ಆನಿ ಸಗ್ಳೊಚ್ಚ್ ವಿಣ್ಗೊ ಜಾವ್ನ್ ವ್ಹಾಳಾಂತ್ ಉಡ್‌ಲ್ಲೊ.
ಉಪ್ರಾಂತ್ ನಿತಳ್ ಜಾಲ್ಯಾ ಕುಡಿರ್… ವ್ಹಾಳಾ ತಡಿರ್ ವಿಣ್ಘೊಚ್ಚ್ ಆಡ್ ಪಡ್‌ಲ್ಲೊ. ಆನಿ ಅಸಲ್ಯಾ ವೆಳಾ…ಬ್ಲ್ಯಾಕ್-ಮೇಯ್ಲ್ ಐವಜಾನ್ ಮುಕ್ಲ್ಯಾ ಯಶಸ್ವೀ ಜಿವಿತಾವಿಶಿಂ ಚಿಂತ್ನಾಂ ಆರಾಯ್ತ್ ಆಸ್ತಾಂ…ಆಪುಣ್ ನಿದೆಕ್ ಶರಣಾಗತ್ ಜಾಲ್ಲೆಂ ತೆಂ ತಾಕಾ ಕಳಿತ್‌ಚ್ಚ್ ಜಾಲೆಂನಾಂ.
ಆನಿಂ ಆತಾಂ … ಹ್ಯಾ ಚಲಿಯಾಂ ಮುಕಾರ್ ಆಪುಣ್ ಪುರ್ತೊ ವಿಣ್ಗೊ!
ಆತಾಂ ಸಂಪೂರ್ಣ್ ಖರ‍್ಯಾ ಗಜಾಲೆ ಥಂಯ್ ಪಾವ್ತಾಸ್ತಾಂ … ಖಿಣಾನ್ ತೊ … ವಿಜ್ಮಿತೆ ಚಿಂತ್ನಾಂನಿಂ ತ್ಯಾ ಚಲಿಯಾಂಪರಿಂ … ತೊಯೀ ಲಜೆಂತ್ ಬುಡ್ಲೊ! ಆನಿ ವೆವೆಗ್ಗಿಂ ಉಟ್ಲೊ. ದುಸ್ರೆಚ್ಚ್ ಘಡ್ಯೆ … ತೊಂಡಾಕ್ ಧಾಂಪುನ್ ಆಸ್ಚೊ ಬಾತ್ ಟವೆಲ್ ಕಾಡ್ನ್ ವಿಣ್ಗ್ಯಾಪೆಂಕ್ಡಾಕ್ ರೆವ್ಡಾಂವ್ಕ್ ಲಾಗ್ಲೊ.
ಪೂಣ್ ತ್ಯಾಚ್ಚ್ ಆಯಿನ್ನ್ ಘಡ್ಯೆ … ಹಾಚೆಂ ವಿದ್ರೂಪ್ ಮುಖಮಳ್ ಪಳೆಲ್ಲಿಂ ಚಲಿಯಾಂ ಪೈಕಿಂತ್ಲಿ ಥೊಡಿಂ ಚಲಿಯೊ ವಿಜ್ಮಿತೆಚ್ಯಾ ಭಿರಾಂತೆನ್ ಥಟಕ್ಕ್ ಜಾತಾಸ್ತಾಂ … ಆನಿ ಥೊಡಿಂ … “ಮಾಂ…ಮಾಂಯ್…!” ಮ್ಹಣ್ ಆಕಾಂತೆ ಬೊಬಾಟ್ ಮಾರುನ್…ಧಾಂವೊಂಕ್ ಲಾಗ್ಲ್ಯೊ.
ವೊಟ್ಟಾರೆ…ಸಗ್ಳಿಂ ಭಿರಾಂತೆ ತಾಳೊ ಕಾಡುನ್…ದೊಳೆಂ ರುಂದಾವ್ನ್ ಧಡ್ಧಡ್ಯಾ ಕಾಳ್ಜಾನ್ ದಾಂವೊನ್ ಆಸ್ತಾಂ…ತಾಂಚೆಂ ನದ್ರೆ ಮುಕಾರ್…
ಗೊಮ್ಟೆ ಸಕಯ್ಲ್ ಸುಂದರ್ ದಶ್ಟ್ ಪುಶ್ಟ್ ಕೂಡ್. ಚಲಿಯೆಕ್ ಭುಲೊಂವ್ಚಿ ತಸಲಿ ಕೂಡ್. ಪೂಣ್ ಗೊಮ್ಟೆ ವಯ್ರ್…ಕಾಳ್ಜಾಕ್ ಕಠಿಣ್ ಭೆಂ ಉಟಂವ್ಚಿ ಭಯಾನಕ್ ವಿದ್ರೂಪ್ … ವಿಕಾರ್ ಮುಖಮಳ್! ಥೊಡಿಂಚ್ಚ್ ಘಡಿಯೊ …
ತ್ಯಾ ಮಧೆಂ…ವ್ಹಾಳಾಂತ್ಲ್ಯಾ ಉದ್ಕಾ ಗಾಜ್ ಆವಾಜ್ ಕರಿತ್ತ್ ಆಸ್ಲೆಲ್ಯಾ ತ್ಯಾಎಕಾ ಆಯಿನ್ನ್ ಘಡ್ಯೆ….
‘ಭಸಾಲ್ಲ್…’ ಮ್ಹಳ್ಳೊ ವ್ಹಡ್ ಏಕ್ ಆವಾಜ್ ಆವಾಜ್ಲೊ!
ಕೋಣ್‌ಗೀ ಉದ್ಕಾಕ್ ಪಡ್ಲೊಲೊ ಉದ್ಕಾಚೊ ಆವಾಜ್!. ಖಿಣಾನ್ ರಿಶಭಾಚಿ ಆಕಾಂತೆ ದೀಶ್ಟ್ ತ್ಯಾಕುಶಿನ್ ಬದ್ಲಾಲಿ! ಘಡ್ಯೆನ್ ಚುರುಕ್ ಜಾಲೊ. ಚುರುಕ್ ಜಾಯ್ಜಾಯ್ ಪಡ್ಲೆಂ! ಥಂಯ್ಸರ್…
ವ್ಹಾಳಾಂತ್ ಏಕ್ ಚಲಿ…ಉದ್ಕಾಂತ್ ಬುಡೊನ್ ಉಟೊನ್ ಬಚಾವೆ ಖಾತಿರ್ ಹಾತ್ ಪಾಂಯ್ ಮಾರುನ್ ಆಸ್‌ಲ್ಲಿ. ಆಕ್ಲಾಸಾಚಿ ಬೊಬಾಟ್ ತಿ ಮಾರುನ್ ಆಸ್‌ಲ್ಲಿ!
ಆತಾಂ ಹಾಣೆಂ ವೇಳ್ ಕಾಡ್ಲೊನಾಂ. ಖಿಣಾನ್ ತೊ ತಿಚ್ಯಾ ಬಚಾವೆಕ್ ವ್ಹಾಳಾ ಕುಶಿಕ್ ಅಮ್ಸರಿ ಲಾಗ್ಲೊ. ಆನಿ ಪಾಟಿಂ ಮುಕಾರ್ ಪಳೆನಾಸ್ತಾಂ…ತಾಣೆಂ ಉದ್ಕಾಕ್ ಉಡಿ ಮಾರ್ಲಿಚ್ಚ್. ತ್ಯಾ ಘಡ್ಯೆ ಪರತ್…‘ಭಸಾಲ್ಲ್!’…ಆವಾಜಾ ಬರಾಬರ್ ಉದ್ಕಾ ರಾಸ್ ವಯ್ರ್ ಉಸ್ಳಾತಾನಾಂ…
ತೊ ವ್ಹಾಳಾಂತ್ ಹಾತ್ ಪಾಂಯ್ ಮಾರುನ್…ಉದ್ಕಾಂತ್ ಆಕಾಂತ್ ಅಕ್ಲಾಸಾನ್ ಧಡ್ಭಡೊನ್ ಆಸ್ಚ್ಯಾ ಚಲಿಯೆಸರ್ಶಿಂ ಉಪ್ಯೆಂವ್ಕ್ ಲಾಗ್ಲೊ.
ಥೊಡ್ಯಾಚ್ಚ್ ಸೆಕುಂದಾನಿಂ…ತೊ ತಿಚ್ಯಾ ಬೊವ್ ಲಾಗಿಂ ಪಾವ್ಲೊ. ಆನಿ ತಕ್ಶಣಾಂಚ್ಚ್ …ತಿಚ್ಯಾ ಹಾತಾಂಕ್ ಧರುಂಕ್ ದಾವ್ಲಿ ಮಾರಿಲಾಗ್ಲೊ. ಖಿಣಾನ್ ತಾಚಿ ಮೂಟ್ ತಿಚ್ಯಾ ನಾಜೂಕ್ ಬಾವ್ಳ್ಯಾಂಚೆರ್ ಬಸ್ತಾಸ್ತಾಂ…ವೆವೆಗ್ಗಿಂ ತೊ ತಿಕಾ …ತಡಿ ಸರ್ಶಿಂ ವೊಡಿತ್ತ್ ಹಾಡಿಲಾಗ್ಲೊ.
ತಡಿಕ್ ಪಾವ್ತಾಂ…ಸಗ್ಳಿಚ್ಚ್ ನಿಸ್ತೇಜ್ ಜಾಲ್ಲ್ಯಾ ಚಲಿಯೆಕ್ ಉದ್ಕಾ ಥಾವ್ನ್ ತಡಿ ವಯ್ರ್ ಘಾಲ್ಚ್ಯಾ ಅಮ್ಸೊರಾರ್…ತಿಚ್ಯಾ ಕುಲ್ಯಾಂಚೆರ್ ಹಾತ್ ವ್ಹೆಲೊ. ಆನಿ ತಿಕಾ ಬಳಾನ್ ಉಕ್ಲೊನ್ ಧರುನ್, ತಡಿ ಥಾವ್ನ್ ವಯ್ರ್ ಘಾಲಿಲಾಗ್ಲೊ!
ಆತಾಂ … ಸಗ್ಳಿಚ್ಚ್ ಭಿಜೊನ್ ಮುದೊ ಜಾಲ್ಲಿ ತಿ ಚಲಿ … ತಡಿಚೆರ್ ಮೊಮ್ತೆಂ ಉದಾರೆಂ ಜಾವ್ನ್ ಉಸ್ಳಾತಾನಾಂ…ಪೆಂಕ್ಡ್ಡಾ ಪರ್ಯಾಂತ್ ವಿಣ್ಗೆ ದಿಸ್ಚ್ಯಾ ತಿಚ್ಯಾ ಝಾಂಗಾಂ ಥಾವ್ನ್…ಸಟ್ಟ್ ಕರುನ್ ಹಾಣೆಂ ಆಪ್ಲಿ ದೀಶ್ಟ್ ಬದ್ಲಿಲಿ. ಆನಿ ವ್ಹಾಳಾ ಥಾವ್ನ್ ಆಪುಣ್ ವಯ್ರ್ ಯೆಂವ್ಚ್ಯಾಕ್, ವ್ಹಾಳಾ ದೆಗೆಲ್ಯಾ ರುಕಾ ಪಾಳಾಕ್ ಧರಿಲಾಗ್ಲೊ. ಆನಿ ಬಳ್ ಘಾಲುನ್ ವಯ್ರ್ ಆಯ್ಲೊ.
ಹ್ಯಾವೆಳಾ ಭಿಜ್ಲೆಲೆಂ ವಸ್ತುರ್ ಕುಡಿಕ್ ಚಿಡ್ಕೊನ್…ವಿಣ್ಘೆಂಚ್ಚ್ ದಿಸ್ಚಿ ತಿ ಚಲಿ ಆಪ್ಲ್ಯಾ ವಿಶ್ವ್ಯಾಂಕ್ ಹಾಚ್ಯಾ ದಿಶ್ಟೆ ಥಾವ್ನ್ ಲಿಪೊಂವ್ಚ್ಯಾಕ್ ಉರ್ಡೊನ್ ಆಸ್‌ಲ್ಲೆಂ. ಹೆಂ ಗಮನಾಕ್ ಹಾಡ್ತಾಂ … ಘಡ್ಯೆನ್ ಹಾಣೆಂ ತಿಕಾ ಪಾಟ್ ಕೆಲೆಂ.
ಆನಿ ವೆವೆಗ್ಗಿಂ ಆಪ್ಲೊ ಪೆಂಕ್ಡಾ ವಯ್ಲೊ ಬಾತ್ ತುವಾಲೊ ಕಾಡ್ನ್, ಆಪುಣ್ ವಿಣ್ಘೊ ಜಾತಾ ಮ್ಹಳ್ಳೆಂ ಬೆಪಾರ್ವೊ ಕರುನ್… ತ್ಯಾ ಚಲಿಯೆಚೊ ಮಾನ್ ರಾಕೊಂಕ್ ತೊ ಆಪ್ಲೊ ಬಾತ್ ಟವೆಲ್, ತಿಚ್ಯಾ ಆಂಗಾರ್ ಉಡಯ್ಲಾಗ್ಲೊ.
ತ್ಯಾ ಘಡ್ಯೆ ದೋನ್ ವಿಣ್ಗೆ ಕುಡಿ … ಆಪ್ಲೆ ವಿಣ್ಗೆ ವಿಶ್ವೆ ಲಿಪೊಂವ್ಚ್ಯಾ ಅಮ್ಸರೆರ್ ಧಡ್ಭಡೊಂಕ್ ಲಾಗ್ತಾನಾಂ…
ತೊ ಅಮ್ಸರಿ ಅಮ್ಸರಿಂ ಪ್ಯಾಂಟ್ ಆಪ್ಲ್ಯಾ ಪಾಂಯಾಂಚೆರ್…ವೊಡೊಂಕ್ ಲಾಗ್ಲೊ. ಆನಿ ಚಲಿ… ಆಪ್ಲ್ಯಾ ಆಂಗಾರ್ ಪಡ್ಲೊಲೊ ತೊ ವ್ಹಡ್ ಬಾತ್ ಟವೆಲ್, ಆಪ್ಲ್ಯಾ ಕುಡಿಕ್ ಗುಟ್ಲಾಂವ್ಕ್ ಉರ್ಡೊಂಕ್ ಲಾಗ್ಲಿ!
ತವಳ್‌ಚ್ಚ್ … ಆಪುಣ್ ಹ್ಯಾ ತರ್ನಾಟ್ಯಾವರ್ವಿಂ ಬಚಾವ್ ಜಾಲ್ಲ್ಯಾಂ ಮ್ಹಳ್ಯಾ ಹುಮೆದೆಚ್ಯಾ ಉದ್ವೇಗಾರ್…ತಿ ಚಲಿ ಮ್ಹಣಾಲಿ…
“ನೀಜ್ ಜಾವ್ನ್ ವ್ಹಾಳಾಂತ್…‘ಹಾಂವ್ ಮೆಲಿಂಚ್ಚ್ ಮ್ಹಣ್ ಚಿಂತ್‌ಲ್ಲೆಂ.!” ಆನಿ ಖರ್ಶೆವ್ಣೆ ಮಧೆಂ ವಿಚಾರಿಲಾಗ್ಲೆಂ…“ಕೊ…ಕೋಣ್ ತುಂ…?!”
………………………….
“ಹಾಂವ್ ಕೋಣ್ ತೆಂ … ಮ್ಹಾಕಾ ಸಾಂಗುಂಕ್ ನಾಕಾ.” ತಕ್ಶಣಾಂಚ್ಚ್ ಜಾಪ್ ದೀಲಾಗ್ಲೊ ತೊ ಪ್ಯಾಂಟಾಚೆಂ ‘ಝಿಪ್ಪ್’ ವೊಡುನ್. ಆನಿ ಮುಂದರುನ್ ಮ್ಹಣಾಲೊ… “ಆನಿ ಮಾಕಾಯೀ… ‘ತುಂ ಕೋಣ್?!’ ಮ್ಹಳ್ಳೆಂ ಕಳಿತ್ ಜಾಂವ್ಕೀ ನಾಕಾ. ಅಸಲಿ ಎಕಾ ಘಡ್ಯೆಚಿ ವಳಕ್ ಮುಕಾರ್ಸುನ್ ಗೆಲಿ ತರ್…ಖಂಡಿತ್ ಜಾವ್ನ್ ಹೆಂ ತುಕಾ ಅಪಾಯೆಚೆಂ. ಆನಿಂ ತುಂವೆಂ ಅಪಾಯೆಕ್ ಸಾಂಪಡ್ಚೆಂ ಮಾಕಾ ನಾಕಾ.”
“ಪೂಣ್ ಮಾಕಾ ಜಾಯ್.” ತಕ್ಶಣ್ ಮ್ಹಣಾಲೆಂ ತೆಂ. “ಮಾಕಾ ಬಚಾವ್ ಕೆಲ್ಲ್ಯಾಕ್ ಹಾಂವೆಂ ವಿಸ್ರುಂಚೆಂ ತರೀ ಕಶೆಂ?!. ಆನಿ ತಸಲೆಂ… ಚಲಿಯೀ ಹಾಂವ್ ನ್ಹಂಯ್.!”
ಚಲಿಯೆಚಿ ಹಿ ಜಾಪ್ … ತಾಕಾ ತಿಚೆ ಥಂಯ್ ಮಾತ್ಸೆಂ ಆಕರ್ಶಿತ್ ಕರುಂಕ್ ಸಕ್ಲಿ.!. ಆನಿ ತ್ಯಾಘಡ್ಯೆ ತೊ ತಿಕಾಚ್ಚ್ ಪಳೆಂವ್ಚಾರ್ ಪಡ್ಲೊ. ಪೂಣ್ ಅಶೆಂ ತೊ ಪಳೆತ್ತ್ ಆಸ್ತಾಂ … ತ್ಯಾ ಮೌನತೆಂತ್ ಸಟ್ಟ್ ಕರುನ್ ತಾಕಾ ಕ್ಲೋಡಿಯಾಚೊ ಉಗ್ಡಾಸ್ ಆಯ್ಲೊ.
ಹ್ಯಾ ಉಗ್ಡಾಸಾವರ್ವಿಂ ತಾಚಿಂ ಚಿಂತ್ನಾಂ ಮಾತ್ಸೆಂ ಬದ್ಲುನ್ … ತಾಣೆಂ ಯೋಜಿತ್ ಕೆಲ್ಲ್ಯಾ ಆಪ್ಲ್ಯಾ ಫುಡಾರಾಚ್ಯಾ ಜಿವಿತಾ ಥಂಯ್ ಬದ್ಲಾತ್ತ್ ಗೆಲಿಂ.
ಅಶೆಂ ತಿಂ ದೊಗಾಂಯೀ ಆಪಾಪ್ಲ್ಯಾ ವೆವೆಗ್ಳ್ಯಾ ಚಿಂತ್ಪಾಂಚ್ಯಾ ಮೌನತೆಂತ್… ಮಿಸ್ಳಾತ್ತ್ ಗೆಲಿಂ.
ಚಲಿ … ರಿಶಭಾಚ್ಯಾ ಆಕರ್ಶಣೆರ್ ತಾಚ್ಯಾ ಚಿಂತ್ಪಾಂತ್ ಮಿಸ್ಳೊನ್ ಗೆಲ್ಲೆಂ ತರ್ …
ರಿಶಭ್ … ಕಾರ್ಡಿಯಾನ್ ಆನಿಂ ಫೆಡ್ರಿಕಾಚ್ಯಾ ಚಿಂತ್ಪಾಂ ವರ್ತುಲಾಂತ್ ರಿಗೊನ್ ಗೆಲ್ಲೊ.
ತ್ಯಾ ಘಡ್ಯೆ … ಆಪುಣ್ ಹ್ಯಾಆದಿಂ ಜಿಯೆಲ್ಲ್ಯಾ ಹೆರಾಂನಿಂ ಕಾಂಟಾಳ್ಚ್ಯಾ ನಿಂದಾ ಕರುನ್ ಹಿಣ್ಸುಂಚ್ಯಾ ತ್ಯಾ ಧೆಧೆಸ್ಪರಿತ್ ಜಿವಿತಾ ಥಾವ್ನ್ … ಫುಡೆಂ ಸಂಪೂರ್ಣ್ ತೆಂ ವಿಸ್ರೊನ್ ಬದ್ಲುನ್ ಜಿಯೆಂವ್ಚ್ಯಾ ಮುಕ್ಲ್ಯಾ ಜಿವಿತಾವಿಶಿಂ ಮೆಟಾಂ ಘಾಲಿತ್ತ್ ವೆತಾಲೊ.
ಹ್ಯಾ ಚಿಂತ್ಪಾ ಥಳಾರ್… ಪ್ರಥಮ್ ಜಾವ್ನ್ ಕಾರ್ಡಿಯಾನಾಕ್ … ಆನಿಂ ನಂತರ್ ಫೆಡ್ರಿಕಾಚ್ಯಾ ಕಾಳ್ಜಾ ಮತಿಕ್ ಫಾರಿಕ್ಪಣಾಚಿ ಭಾಲಿ ರೊಂಬೊಂವ್ಚ್ಯಾ ಅಮ್ಸರಿ ಹುಮೆದೆರ್ ಉಪ್ಯೆವ್ನ್ ಆಸ್‌ಲ್ಲೊ.
ಆಪ್ಲ್ಯಾ ಆನಿ ಕ್ಲೋಡಿಯಾಚ್ಯಾ ಮಿಲನಾವಿಶಿಂ … ಕಾರ್ಡಿಯಾನಾನ್ ಕೆಲ್ಲ್ಯಾ ಬೆಫಿಕೆರೆವರ್ವಿಂ ಆಪ್ಲ್ಯಾ ಮೊಗಾಕ್ ಸಲ್ವೊಣಿ ಲಾಭ್ಲೆಲ್ಯಾಕ್ ತಾಚೆರ್ ತಾಕಾ ಬರೆಂಚ್ಚ್ ಶಿಣ್ ಆಸ್-ಲ್ಲೆಂ.
ತರೀ ಫೆಡ್ರಿಕಾನ್ ಆಪ್ಲ್ಯಾ ಕಠೋರ್ ಕಾಳ್ಜಾನ್ ಎಸಿಡಾ ಘಾಯೆವೆಳಾ, ಕಾರ್ಡಿಯಾನಾನ್, ಪರ್ದ್ಯಾ ಪಾಟ್ಲ್ಯಾನ್ ರಾವೊನ್ ದಿಲ್ಲ್ಯಾ ಮಜತೆಚ್ಯಾ ಹಾತಾಂಕ್ ಉಪ್ಕಾರ್ ಪಾಟಾಯ್ಜೆ ಜಾಲ್ಲ್ಯಾ ಬರ‍್ಯಾ ಮನಾನ್ ತೊ ತಾಚೆ ಥಂಯ್ ಮಾತ್ಸೆಂ ಮೋವ್ ಜಾಲ್ಲೊ. ಆನಿಂ ಹ್ಯಾವರ್ವಿಂ…
ಕಾರ್ಡಿಯಾನಾನ್ ತಾಚೆ ಥಂಯ್ ದಾಕಯಿಲ್ಲೆಂ ಬೆಫಿಕೆರ್ಪಣ್ … ತಾಣೆಂ ತಾಕಾ ಕೆಲ್ಲ್ಯಾ ಉಪ್ಕಾರ್ಪಣಾನ್ ಧಾಂಪೊವ್ನ್ ವ್ಹೆಲ್ಲೆಂ.!.
ಪೂಣ್ ಫೆಡ್ರಿಕಾಕ್ ದಿಂವ್ಚ್ಯಾ ಫಾರಿಕ್ಪಣಾಚಿ ದಾವ್ ಮಾತ್ರ್ … ರಿಶಭಾ ಥಂಯ್ ವಾಡೊನ್‌ಚ್ಚ್ ಆಸ್‌ಲ್ಲೆಂ. ಹ್ಯಾವಿಶಿಂ ತಾಚ್ಯಾ ಫಾರಿಕ್ಪಣಾನ್ ತಾಕಾ ಜಾಗೆಂಚ್ಚ್ ದವರ್‌ಲ್ಲೆಂ!
ಅಸಲ್ಯಾ ವೆಳಾ … ಆಪ್ಣೆಂ ರೂಪಿತ್ ಕರುಂಕ್ ಯೆವ್ಜಿಲ್ಲ್ಯಾ ತ್ಯಾ ನವ್ಯಾ ಜಿವಿತಾಂತ್ … ಪ್ರಸ್ತುತ್ ಅನಿರೀಕ್ಶಿತ್ ಥರಾನ್ ಪ್ರವೇಶ್ ಜಾಲ್ಲಿ … ಚಲಿಯೀ ತಾಚೆಂ ಮತಿಂ ಜಗ್ಲಾತ್ತ್ ಆಸ್‌ಲ್ಲಿ!
‘ಎಕಾ ಜೀವನ್ಮರಣ್ ಘಡಿತಾ ವರ್ವಿಂ, ಅನಿರೀಕ್ಶಿತ್ ಥರಾನ್ ಉದೆಲ್ಲೆಂ ಘಡ್ಯೆಚೆಂ ಆಕರ್ಶಣ್ … ಮುಕಾರ್ ಹ್ಯಾ ಚಲಿಯೆಚ್ಯಾ ಜಿವಿತಾಚೆರ್ ಅಪಾಯ್ ಉದೆಂವ್ಚೆಂ ಸಾಧ್ಯಾತಾ ಆಸಾ!…ಹೆಂ ಜಾಂವ್ಕ್ ನೊಜೊ…
ಆಪ್ಣಾಚ್ಯಾ ಕಾಳ್ಜಾಂತ್ … ಕ್ಲೋಡಿಯಾಚ್ಯಾ ಮೊಗಾ ವೆಗ್ಳಾಚಾರಾವರ್ವಿಂ ವರ್ವಿಂ ಉದೆಲ್ಲೊ , ಮೊಗಾ ಹುಲೊಪ್ … ಖಂಡಿತ್ ಜಾವ್ನ್ ಹ್ಯಾ ಚಲಿಯೆಚಾ ಜಿವಿತಾಂತ್ ಉದೆಂವ್ಕ್‌ಚ್ಚ್ ನಜೊ!
ಚಲಿಯೆನ್ ಆಪ್ಣಾಚೊ ಕರ್ಚೊ ಮೋಗ್ … ಯಾ ಇಶ್ಟಾಗತ್ … ಕಸಲೆಂಯೀ ತೆಂ ಜಾಂವ್ … ಕೃಮೇಣ್ ತೊ ಎಕಾಮೆಕಾಚ್ಯಾ ವೆಗ್ಳಾಚಾರಾಕ್ ಬುನ್ಯಾದ್ ಘಾಲುನ್ … ಹ್ಯಾ ಮುಗ್ಧ್ ಚಲಿಯೆನ್ ತ್ಯಾ ಮೊಗಾ ಸಲ್ವೊಣೆಚ್ಯಾ ಉಜ್ಯಾಂತ್ ಜಳೊಂಕ್ ನಜೊ!’ ಅಸಲ್ಯಾ ಚಿಂತ್ನಾಂನಿಂ ತೊ ಆಸ್ತಾನಾಂಚ್ಚ್…
ತಿ ಚಲಿ… ರಿಶಭಾಚ್ಯಾ ಬೋವ್ ಲಾಗಿಂ ಪಾವ್‌ಲ್ಲಿ. ಆನಿಂ ತೊ …
ಆಪ್ಣೆಂ ತಿಕಾ ಕೆಲ್ಲಿ ಬಚಾವೆಚಿ ಕರ್ನಿಂ…ಆನಿ ಮಾಕಾ ವಿಸರ್ ಮ್ಹಣ್ ಉಚಾರುಂಕ್ ವೋಂಟ್ ಉಗ್ತೆ ಕರ್ತಾಂ ಮ್ಹಣ್ತಾಂ… ಚಲಿಯೆಚೊ ಮೊವಾಳ್ ಹಾತ್ ತಾಚ್ಯಾ ವಿಕಾರ್ ವಿದ್ರೂಪ್ ಮುಖಮಳಾಚ್ಯಾ ಘಾಂಯಾಚ್ಯಾರ್ ಬಸ್ಲೊ! ಆನಿ ಮೊಗಾ ಹುಸ್ಕ್ಯಾನ್ ಸವ್ಕಾಸ್ ತೆ ಘಾಯ್ ತೆಂ ಪೊಶೆಂವ್ಕ್ ಲಾಗ್ಲೆಂ!
ಹ್ಯಾ ಹುಸ್ಕೊ ಮಿಸ್ಳಾಲ್ಲ್ಯಾ ಮೊವಾಳ್ ತಾಚ್ಯಾ ಸ್ಪರ್ಶಾಂತ್, ಆಸ್ಲೆಲಿಂ ಕಸಲಿಂಗೀ ವಿಚಿತ್ರ್ ಸಕತ್ … ಹಾಚ್ಯಾ ಕಾಳ್ಜಾಕ್ ಥಳಾಕ್ ಮಾರೊನ್ ತಾಚ್ಯಾ ಭೊಗ್ಣಾಂಕ್ ಜಾಗಂವ್ಕ್ ಲಾಗ್ಲಿಂ!
ಎಕಾಎಕಿ ಉದೆಲ್ಲೆಂ ಹೆಂ ತಾಚೆಂ ಅನಿರೀಕ್ಶಿತ್ ವರ್ತನ್ … ‘ಹೆಂ ಖಂಡಿತ್ ಜಾವ್ನ್ ಏಕ್ ಧೈರಾಧಿಕ್ ಚಲಿ!’ ಮ್ಹಳ್ಳೆಂ ತಾಚ್ಯಾ ಮತಿಕ್ ಖಂಚಯ್ಲಾಗ್ಲೆಂ.
ಹ್ಯಾ ವೆಳಾ ಚಲಿಯೆಚೆ ದೊಳೆ ದುಕಾಂನಿಂ ಭರೊನ್ … ಕಾಂಪ್ಚೊ ಮೋವ್ ಹಾತ್ … ಹಾಚ್ಯಾ ಮುಖಮಳಾಚ್ಯಾ ಘಾಯಾಂಚೆ ಮಾವ್ ಪೊಶೆಂವ್ಕ್ ಲಾಗ್ಲೊ.
ಹ್ಯಾವೆಳಾ ರಿಶಭಾಕ್ ಸಭಾರ್ ತೆಂಪಾಂಚ್ಯಾ ತಾಚ್ಯಾ ಕರಾಳ್ ಜಿವಿತಾಂತ್ ಆಪ್ಣಾಕ್ ಮೆಳ್‌ಲ್ಲೊ ಹೊ … ‘ ಪ್ರಪ್ರಥಮ್ ಮೋಗ್… ಅಪ್ರೂಬ್ ಹುಸ್ಕೊ!’ ಮ್ಹಣ್ ಭೊಗಾಲಾಗ್ಲೆಂ!!
ತ್ಯಾಘಡ್ಯೆ ಯಾಂತ್ರಿಕ್ ಥರಾನ್ ತೊ … ಕ್ಲೋಡಿಯಾಕ್… ಆನಿ ಹ್ಯಾ ಚಲಿಯೆಕ್ … ಮತಿಂತ್‌ಚ್ಚ್ ತುಕೊಂಕ್ ಲಾಗ್ಲೊ.
‘ಆಪ್ಣೆಂ ಕಾಳ್ಜಾ ಥಾವ್ನ್ ಖರೊ ನಿಶ್ಕಳಂಕ್ ಮೋಗ್ ಕೆಲ್ಲೆಂ … ಕ್ಲೋಡಿಯಾ … ಆಪ್ಲ್ಯಾ ಘಾಯಾಂನಿ ವಿದ್ರೂಪ್ ಜಾಲ್ಲ್ಯಾ ಮುಖಮಳಾಕ್ ಪಳೆವ್ನ್ … ಕಠಿಣ್ ಬಿರ್ಮೊತೆನ್ ಭರ್ಲೆಂ ವ್ಹಯ್. ತರೀ, ಆಪ್ಣಾಂ ಥಂಯ್ ಕಸಲೊಯೀ ಮೋಗ್ ಹುಸ್ಕೊ ತಾಣೆ ದಾಖಯಿಲ್ಲೊ ನಾಂ! ಫಕತ್ತ್ ಬಿರ್ಮೊತ್. ಶಿವಾಯ್ ನಾಂ ಮೊಗಾ ಸಾವ್ಳಿ!
ಎಸಿಡ್ ಘಾಯಾಂ ವರ್ವಿಂ ಆಪ್ಲ್ಯಾ ಮುಖಮಳಾಚಿ ವಳಕ್ ಪಾರ್ಕುಂಚ್ಯಾಂತ್ ಸಲ್ವೊನ್ … ಫಕತ್ ದುಬಾವ್ … ಅಪಧಯ್ರ್, … ತಶೆಂಚ್ಚ್ ಆಪ್ಣಾ ಥಾವ್ನ್ ಪಯ್ಸಾ ಪಯ್ಸ್ ರಾಂವ್ಚೊ ಮನೋಭಾವ್ ಮಾತ್ರ್ ತಾಚೆಂ ಥಂಯ್ ಸ್ಪಶ್ಟ್ ಥರಾನ್ ಹಾಣೆಂ ಪಾರ್ಕಿಲ್ಲೊ!
ಪೂಣ್ ಹ್ಯಾ ಮುಗ್ಧ್ ಚಲಿಯೆನ್ … ತ್ಯಾಚ್ಚ್ ಎಸಿಡ್ ಘಾಯಾಂಕ್ ಪೊಶೆವ್ನ್ ಮೊಗಾ ಹುಸ್ಕೊ ದಾಕಂವ್ಚೆಂ ಧೈರ್ ಘೆತ್‌ಲ್ಲೆಂ.!
ಅಸಲ್ಯಾ ಚಿಂತ್ನೆರ್ ತೊ ಆಸ್ತಾಂ … ಚಲಿಯೆಚೊ ಕ್ಶೀಣ್ ತಾಳೊ ಹಾಕಾ ಜಾಗಯ್ಲಾಗ್ಲೊ…
“ಹೆ ಘಾಯ್ ತುಕಾ ಕಶೆಂ ಜಾಲೆ.?!”
“ಜಾಲ್ಲೆಂ ನ್ಹಂಯ್ … ಕೆಲ್ಲೆ!. ವಿಶ್ವಾಸ್ ಘಾತ್ ಕೆಲ್ಲ್ಯಾ ಆಪ್ತ್ ಇಶ್ಟಾನ್ ಕೆಲ್ಲೆಲಿಂ ಕ್ರೂರ್ ಖತಾಂ ಹಿಂ.!.”
“ದೆವಾ ಮ್ಹಜ್ಯಾ…ಆಪ್ತ್ ಇಶ್ಟಾನ್ …?!”
“ಹುಂ… ಕೊಣಾಯ್ಕೀ ಮ್ಹಜಿ ವಳಕ್ ಮೆಳಾನಾತ್ಲೆಲೆಪರಿಂ ಕರ್ಚೊ ಎಸಿಡಾ ಘಾಯ್ ತಾಣೆಂ ಮಾಕಾ ದಿಲೊ. ಸೊಡ್ಯಾಂ ಹ್ಯೊ ಸಗ್ಳ್ಯೊ ಕೀಳ್ ಗಜಾಲಿ. ಹ್ಯೊ ಫಕತ್ತ್ ಉಲೊವ್ನ್ ವೇಳ್ ಪಾಡ್ ಕರ್ಚ್ಯೊ ಗಜಾಲಿ …” ಆನಿ ತೊ ಮುಂದರುನ್ ಮ್ಹಣಾಲೊ …
“ಆತಾಂ ಆಮ್ಚಿ ಹಿ ಸಳಾವಳ್ ಅಶಿಚ್ಚ್ ಮುಂದರುನ್ ವ್ಹರುಂಕ್ ಮ್ಹಾಕಾ ನಾಕಾ. ಅಸಲ್ಯಾ ಸಳಾವಳೆವರ್ವಿಂ ತುಜ್ಯಾ ಜಿವಿತಾರ್ ಮೊಗಾ ಹುಲೊಪಾಚೊ ಉಜೊ ಪೆಟ್ತೊಲ್ಲೊಚ್ಚ್. ಹ್ಯಾ ವರ್ವಿಂ ಜಿವಿತಾ ಪರ್ಯಾಂತ್ ತುಂವೆಂ ದುಖಾ ಧೆಧೆಸ್ಪರಾಚ್ಯಾ ಆಘಾತೆಚ್ಯಾ ಅಪಾಯೆಂತ್ ಶಿರ್ಕೊಂಚೆ ಮ್ಹಾಕಾ ನಾಕಾ.!.
ಹೆಂ ಆಯ್ಕಾತಾಂ … ಘಡ್ಯೆನ್ ತಿ ಚಲಿ ಮತಿಂತ್‌ಚ್ಚ್ … ‘ಜರ್ ಆಪ್ಣಾಚ್ಯಾ ಮೊಗಾ ಹುಲೊಪಾವಿಶಿಂಚಿ ಭೊಗ್ಣಾಂ ಹಾಕಾ ಆಸಾತ್ ತರ್… ಮ್ಹಾಕಾ ತಾಚೆರ್ ಆಸ್ಲೆಲಿಂ ಮೊಗಾ ಹುಸ್ಕ್ಯಾಚಿ ಭೊಗ್ಣಾಂ ‘ತಾಕಾಯೀ ಮ್ಹಜೆ ಥಂಯ್ ಖಂಡಿತ್ ಆಸಾತ್!’ ಮ್ಹಳ್ಳೆಂ ಜಾಲೆಂ.’
ಅಶೆಂ ತೆಂ ಚಿಂತುನ್ ಆಸ್ತಾಂ … ತಾಣೆಂ ಪಳೆಲೆಂ … ತೊ ಅಮ್ಸರಿಂ ಅಮ್ಸರಿಂ ಬನಿಯನ್ ಆನಿ ಜಾಕೆಟ್ ನ್ಹೆಸುನ್ ಆಸ್‌ಲ್ಲೊ. ತಕ್ಶಣ್ ತೆಂ ಮ್ಹಣಾಲೆಂ …
“ಹೊ ಟವೆಲ್ ಮ್ಹಾಕಾ ಜಾಯ್ … ತುಜ್ಯಾ ಉಗ್ಡಾಸಾಕ್…!.” ಆಂಗಾರ್ ಪಾಂಗೊರ್ನ್ ಆಸ್ಲೊಲೊ ರಿಶಭಾನ್ ಆಪ್ಣಾಕ್ ದಿಲ್ಲೊ ತಾಚೊ ಬಾತ್ ಟವೆಲ್ ದಾಕವ್ನ್.
ತಾಣೆಂ ಪಳೆಲೆಂ. ಪೂಣ್ ಹಾಕಾ ತೊ ಕಿತೆಂಯೀ ಉಲಯ್ಲೊ ನಾ. ಫಕತ್ತ್ ಏಕ್ ಪಾವ್ಟಿಂ ತಾಚೆಂ ಥಂಯ್ ವಿಭಿನ್ನ್ ದಿಶ್ಟೆನ್ ಪಳೆಲಾಗ್ಲೊ.
ನಂತರ್ ತಾಚಿಂ ಉತ್ರಾಂ ಆಯ್ಕೊಂಕ್ ನಾತ್ಲೆಲ್ಯಾಪರಿಂ ಕರುನ್ ತೊ ಬಾಗ್ವಾಲೊ … ಆನಿ ಧರ್ಣಿ ವಯ್ಲೊ ಸರಳ್ ವಿಂಚಿಲಾಗ್ಲೊ.
ಆನಿ ಚಲಿಯೆ ಥಾವ್ನ್ ಚಡಿತ್ ಕಿತೆಂಚ್ಚ್ ಆಯ್ಕೊಂಕ್ ನಾಕಾಸ್ತಾಂ … ತೊ ತಿಕಾ ಪಾಟ್ ಕರಿಲಾಗ್ಲೊ.
ಪೂಣ್ ಚಲಿ ಹಾಚಿಂ ಭೊಗ್ಣಾಂ ಪಾರ್ಕುಂಕ್ ಸಕ್ಲಿ ನಾ. ತರೀ ಆಪ್ಲೆಂ ಪ್ರೇತನ್ ತಿಣೆಂ ಸೊಡ್ಲೆಂ ನಾಂ.
ತೆಂ ಮ್ಹಣಾಲೆಂ …
“ಹಾಂವ್…ರೆಕೀನಾ. ರೆಕೀನಾ ಮ್ಹಜೆಂ ನಾಂವ್.”
ತ್ಯಾಘಡ್ಯೆ ತಾಚ್ಚ್ಯಾ ಮನಾಂತ್ ವಯ್ರ್ ವಯ್ರ್ ಜಗ್ಲೊಂಕ್ ಲಾಗ್ಲೆಂ…
‘ರೆಕೀನಾ … ರೆ … ಕೀ … ನಾ’!…
ಆನಿ ಹೆಂ ‘ರೆಕೀನಾ’…ಮತಿಂ ಜಾಗ್ಲಾತ್ತ್ ಆಸ್ತಾಂ…ತಾಣೆಂ ಆಪ್ಣಾಚೊ ಸರಳಾ ಆವಾಜ್ ಪರತ್ ಉಟಯ್ಲೊ.
‘ಟಂಯ್…ಟಂಯ್…’
ತವಳ್‌ಚ್ಚ್ ರೆಕಿನಾಚೊ ತಾಳೊ ಪರತ್ ಆವಾಜ್ಲೊ …
“ಹಾಂವ್ ರೆಕೀನಾ … ತುಕಾ ರಾಕೊನ್ ರಾವ್ತಾಂ …!”
ಹಿಂ ಉತ್ರಾಂ ಏಕ್ ಪಾವ್ಟಿಂಚ್ಯಾಕ್ ತಾಚ್ಯಾ ಮೆಟಾಂಕ್, ಆನಿ ತ್ಯಾ ಸರಳಾಕ್ … ಮುಕಾರ್ ವೆಚಾಕ್ ಅಡ್ಕಳ್ ಹಾಡಿಲಾಗ್ಲಿಂ. ತರೀ ತ್ಯಾವೆಳಾ … ಕ್ಲೋಡಿಯಾನ್ ತಾಕಾ ಕೆಲ್ಲ್ಯಾ ಕಾಳ್ಜಾ ಘಾಯಾಚೊ ಉಗ್ಡಾಸ್ ಯೆತಾಸ್ತಾಂ, ತೊ ಏಕ್ ಪಾವ್ಟಿಂ ದಂದ್ವ್ ಭಗ್ಣಾಂನಿಂ ಚಡ್ಪಡೊಂಕ್ ಲಾಗ್ಲೊ.
ತರೀ … ತಾಣೆಂ ಪರತ್ ಆಪ್ಲ್ಯಾ ನಿರ್ಧಾರಾಕ್‌ಚ್ಚ್ ಥಿರ್ ನಿಚೆವಾಚಿ ಮ್ಹೊರ್ ಮಾರ್ಲಿ. ಆನಿ ಘಟ್ ಮನಾನ್ … ಸರಳಾ ಆವಾಜ್ ಉಟಯ್ಲೊ. ಆನಿ ಪರತ್ ಆಪ್ಲಿಂ ಮೆಟಾಂ ಮುಂದರುಂಕ್ ಲಾಗ್ಲೊ.
‘ಟಂಯ್… ಟಂಯ್…’…
♥ ♥ ♥
ವ್ಹಾಳಾ ದೆಗೆರ್ ಆವಾಜುನ್ ಆಸ್ಲೊಲೊ ಹೊ ಸರಳಾಂ ಆವಾಜ್ … ತಿಸ್ರ್ಯಾ ದಿಸಾ … ಕಾರ್ಡಿಯಾನಾಚ್ಯಾ ಆಫಿಸಾ ಮುಕಾರ್ ಆವಾಜ್ ದೀಲಾಗ್ಲೊ. ಹೊ ಆವಾಜ್ ಕಾರ್ಡಿಯಾನಾಂಚ್ಯಾ ಕಾನಿಂ ಮಾರ್ತಾನಾಂ … ಕಾರ್ಡಿಯಾನ್ …
‘ಕಾಂಯ್ ರಿಶಭ್…?!’ ಮ್ಹಳ್ಳ್ಯಾ ದುಬಾವೆ ಚಿಂತ್ನಾಂ ಬರಾಬರ್ ಆಪ್ಲ್ಯಾ ಕ್ಯಾಬಿನಾ ಥಾವ್ನ್ ಭಾಯ್ರ್ ಆಯ್ಲೊ. ಆನಿ ಆತುರಾಯೆನ್ ವಯ್ರ್ ಥಾವ್ನ್ ರಸ್ತ್ಯಾಕ್ ದೀಶ್ಟ್ ಘಾಲಿಲಾಗ್ಲೊ. ಥಂಯ್ಸರ್ ಪಳೆತಾಂ …
ರಿಶಭಾಚಿ ಸರಳಾಂ ಆವಾಜಾಸಂಗಿ ಮುಂದರುನ್ ಆಸ್ಚಿಂ ಪಾವ್ಲಾಂ … ತಾಚಿಂ ಆಫಿಸಾ ಮೆಟಾಂ ಚಡಾತ್ತ್ ಆಸ್‌ಲ್ಲಿಂ. ತವಳ್ ಏಕ್ ಪಾವ್ಟಿಂ ಕಾರ್ಡಿಯಾನ್ ಹಾಚೆಂ ಬಿರ್ಮತ್ ಭರಿತ್ ಅಸಾಯೆಕ್ಪಣ್ ಚಿಂತೊನ್ … ಚುರ್ಚುರ್ಲೊ.
ನಂತರ್ ತಾಚ್ಯಾ ವಯ್ಲ್ಯಾ ಕಠಿಣ್ ಹುಸ್ಕ್ಯಾ ಚಿಂತ್ನಾನಿಂ … ಪಾಟಿಂ ಕ್ಯಾಬಿನಾಕ್ ಗೆಲೊ. ಆನಿ ರಿಶಭಾಚ್ಯಾ ಯೆಣ್ಯಾಕ್ ರಾಕೊಂಕ್ ಲಾಗ್ಲೊ.
ತ್ಯಾ ವೆಳಾ ಎಕಾಎಕಿ ತಾಚಿ ಮತ್ … ಸಟ್ಟ್ ಕರುನ್ ರಿಶಭಾ ವಯ್ಲ್ಯಾ ಮೊವಾಳಾಯೆ ಥಾವ್ನ್ ರಿಶಭಾಚ್ಯಾ ಕ್ರೋಧ್ ಭರಿತ್ ಕಾಲೆತೆವಿಶಿಂ ಭೆಶ್ಟಾಂವ್ಕ್ ಲಾಗ್ಲೆಂ.
‘ತೊ ಖೈಂಚ್ಯಾಯೀ ಘಡ್ಯೆ … ಕಿತೆಂಯೀ ಕರಿತ್!’… ಮ್ಹಳ್ಳ್ಯಾ ದುಬಾವೆರ್ ಆಸ್ತಾಂ … ತಾಚಿಂ ಆದ್ಲ್ಯಾ ಭಿರಾಂಕುಳ್ ಕರ್ನ್ಯಾಂಚೆಂ ಭಿರಾಂತ್ ತಾಚ್ಯಾ ಮತಿಂ ಘುಂವಾತ್ತ್ ಲಾಗ್ಲಿಂ! ತವಳ್‌ಚ್ಚ್ ಆಫಿಸಾ ದಾರ್ ಉಗ್ತೆಂ ಜಾಲೆಂ.
ದಾರಾರ್… ರಿಶಭ್!.
ತ್ಯಾ ಘಡ್ಯೆ … ಏಕ್ ಪಾವ್ಟಿಂ ದೊಗಾಂಯ್ಚ್ಯೊ ದಿಶ್ಠಿಂ ಎಕಾಮೆಕಾ ಆಪ್ಟೊಂಕ್ ಲಾಗ್ಲ್ಯೊ.
ತವಳ್ ಕಾರ್ಡಿಯಾನ್ ಯಾಂತ್ರಿಕ್ ಥರಾನ್ ಮ್ಹಣಾಲೊ … “ರಿಶಬ್ … ತುಂ ಬದ್ಲಾಲಾಯ್.”
“ಖಂಡಿತ್ ಜಾವ್ನ್ ಹಾಂವ್ ಬದ್ಲಾಲಾಂ. ಘಾತ್ಕ್ಯಾ ಫೆಡ್ರಿಕ್ ಪರತ್ ಪರತ್ ಮಾಕಾ ವಯ್ರ್ ವಯ್ರ್ ಮತಿ ಕುಡಿಕ್ ಘಾಯ್ ಕರುನ್ ಕೆಲ್ಲ್ಯಾ ವಿಶ್ವಾಸ್ ಘಾತ್ಕಿ ಕರ್ನ್ಯಾಂನಿಂ … ನಿರಾಸ್ ಜಾಲ್ಲೊಂ … ಧೆಧೆಸ್ಪರ್ ಜಾಲ್ಲೊಂ ಹಾಂವ್ … ಆತಾಂ ಬದ್ಲುಂಕ್ ಪ್ರೇತನ್ ಕರುನ್ ಆಸಾ.”
“ಬರೊ ನಿಚೆವ್ ತುಜೊ.”
“ಹುಂ … ಯೆದೊಳ್ ಹಾಂವ್…‘ಮ್ಹಜೆಂ ಜಿವಿತಾ ಆಶಾ ಆಕಾಂಕ್ಶಾ ಸಂಪಾದ್ಲಾಂ. ಹ್ಯಾ ಸಂಸರಾಂತ್ ಮ್ಹಜಿ ಮ್ಹಳ್ಳಿಂ ಕೊಣ್‌ಚ್ ನಾಂತ್!’ ಮ್ಹಳ್ಳೊ ಜಿಗುಪ್ಸೆಚೊ ‘ಶೆಲೊ’ ಪಾಂಗುರ್ನ್ ಜಿಯೆಲೊಂ.
ಅಸಲ್ಯಾವೆಳಾ ಕೊಣಾಕ್ ಪಾತ್ಯೆಜಾಯ್ … ಕೊಣಾಕ್ ಪಾತ್ಯೆನಜೊ … ಮ್ಹಳ್ಯಾ ಸಂಸಾರಾಂತ್ ಧೆಧೆಸ್ಪರಾಕ್ ಶಿರ್ಕೊನ್ ಸಂಸಾರಾಕ್ ಕಾಂಟಾಳ್ಳೊಂ. ಆನಿ ಬಚಾವೆಕ್ ಕಿತೆಂಚ್ಚ್ ವಿಂಚೊವ್ಣ್ ದಿಸಾನಾಸ್ತಾಂ ಅಸಹಾಯೆನ್ … ಭಿಜುಡ್ ಜಾಲ್ಲೊ ಹಾಂವ್ …
ಸಂಸಾರಾಕ್ ದೊಳೆ ಧಾಂಪುನ್ … ಕೊಣಾಚಿಚ್ಚ್ ಕಸಲಿಚ್ಚ್ ಪರ್ವಾ ಕರಿನಾಸ್ತಾಂ ರಸ್ತ್ಯಾಂನಿಂ ಭಂವೊನ್ … ಮನ್ಜಾತೆ ಪರಿಂ ಜಿಯೆಲೊಂ!”
“ಕಿತೆಂಯೀ ಜಾಂವ್ ತುಂವೆಂ ಧಯ್ರ್ ಸಾಂಡ್ಚೆಂ ನ್ಹಂಯ್ ಆಸ್‌ಲ್ಲೆಂ.” ಮದೆಂಚ್ಚ್ ಮ್ಹಣಾಲೊ ಕಾರ್ಡಿಯಾನ್. .
“ಹ್ಯಾ ಸಮಾಜೆನ್ ಮ್ಹಜೆಂ ಧಯ್ರ್ ಮೊಡ್ಲೆಂ. ಮ್ಹಜ್ಯಾ ಹ್ಯಾ ಕಠೋರ್ ಸಲ್ವೊಣೆಚೊ ಫಾಯ್ದೊ ಸಮಾಜೆನ್ ಘೆತ್ಲೊ. ಆನಿ ಮ್ಹಾಕಾ … ವಿಶ್ವಾಸ್ ಘಾತ್ , ವಂಚನ್ , ಕೀಳ್ ನಿಂದಾ ಕರುನ್ … ಅಸಲ್ಯಾ ಸರ್ವ್ ಕ್ರೂರ್ ಭಾಲ್ಯಾಂನಿಂ ಮ್ಹಜ್ಯಾ ಕಾಳ್ಜಾಕ್ ಪಾಪ್ಸಿಲೆಂ. ಆನಿ ಮ್ಹಾಕಾ ನಿರಾಶೆ ವಯ್ರ್ ನಿರಾಶ್ ಮೆಳಾಶೆಂ ಕರುನ್ ಮಾಕಾ ಖಂದ್ಕಾಕ್ ಆಪ್ಟಿಲೆಂ.
… ಪೂಣ್ ಆತಾಂ ಹಾಂವ್… ತಾಂಚ್ಯಾ ಕ್ರೂರತೆಚ್ಯಾ ಕೀಳ್ ವರ್ತನೆಕ್ ಪಾಟಿಂ ಜವಾಬ್ ದೀಂವ್ಕ್ … ಮ್ಹಜ್ಯಾ ಧೆದೆಸ್ಪರಾಕ್ ಮಸ್ತುನ್ ಬದ್ಲಾಲಾಂ. ಕೊಣೆಂ ತ್ಯಾ ಭಾಲ್ಯಾಂನಿಂ ಮ್ಹಾಕಾ ಪಾಪ್ಸಿಲೆಂ, ತಾಂಕಾ ಪಾಟಿಂ ತಸ್ಲ್ಯಾಚ್ಚ್ ಭಾಲ್ಯಾಂನಿ ಜವಾಬ್ ದೀಂವ್ಕ್ ಆಯ್ತೊ ಜಾವ್ನ್ ಆಯ್ಲಾಂ”.
“ಮ್ಹಳ್ಯಾರ್?!..”.ತಾಚ್ಯಾ ಮಾರ್ಮಿಕ್ ಉತ್ರಾಂಚೊ ಅರ್ಥ್ ಕರುಂಕ್ ಸಖಾನಾಸ್ತಾಂ ಕಾರ್ಡಿಯಾನಾಚ್ಯಾ ಕಪಾಲಾರ್ ಮಿರಿಯೊ ಉದೆಲ್ಯೊ
“ತೆಂ ತುಕಾ ಮುಕಾರ್ ಸಮ್ಜಾತೆಲೆ. ಆತಾಂ ಹಾಂವ್ … ತುಜ್ಯಾ ವಿಶಾಲ್ ಮನಾಚೊ ಉಪ್ಕಾರ್ ಬಾವ್ಡುಂಕ್ … ತುಜೆ ಸರ್ಶಿಂ ಆಯ್ಲಾಂ.”
ಹೆಂ ಆಯ್ಕಾತಾಂ ಯೆದೊಳ್ ತಾಚ್ಯಾ ಕಠಿಣ್ ಉತ್ರಾಂಚೆರ್ ಮಿಸ್ಳೊನ್ ಗೊಂದೊಳಾಂತ್ ಶಿರ್ಕಾಲ್ಲೊ ಕಾರ್ಡಿಯಾನ್ … ಹೆಂ ಆಯ್ಕೊನ್ ಥೊಡೊ ವೇಳ್ ಮೌನ್ ಜಾಲೊ. ನಂತರ್ ತಾಚ್ಯಾ ವಯ್ಲ್ಯಾ ಭಿರ್ಮೊತೆಚಿ … ಹುಸ್ಕ್ಯಾಚಿ, ಗಡ್ ತುಟೊನ್ ಸವಾಲ್ ಕರಿಲಾಗ್ಲೊ …
“ಅಸಲ್ಯಾ ತುಜ್ಯಾ ತ್ಯಾ ಭಯಾನಕ್ ಕಿರ್ಕೊಳ್ ಸ್ಥಿತೆರ್ … ತುಕಾ ಮ್ಹಜೊ ಉಗ್ಡಾಸ್ ಯೇಂವ್ಕ್ ನಾಂಗೀ … ಯಾ ಮ್ಹಜೆರ್‌ಯೀ ಪಾತ್ಯೆಣಿಂ ನಾಂ ಜಾಲಿಂ?”
ಆತಾಂ ಏಕ್ ಘಡಿ ರಿಶಬ್ … ಕಾರ್ಡಿಯಾನಾಚೆರ್ ಆಪ್ಲಿ ದೀಶ್ಟ್ ರೊಂಬೊವ್ನ್ ಮ್ಹಣಾಲೊ …
“ಮ್ಹಜ್ಯಾಚ್ಚ್ ಕಾಳ್ಜಾ ಭಂವಾರಿ ರಾತ್ ದೀಸ್ ಭಂವೊನ್ ಆಸ್ಚ್ಯಾ ಕ್ಲೋಡಿಯಾನ್ ಮಾಕಾ ಘಾತ್ ಕೆಲೊ. ಅಸಲ್ಯಾವೆಳಾ…
ಜರ್ ತಸಲೆಂ ಕ್ಲೋಡಿಯಾ … ಮ್ಹಾಕಾ ವಿಸರ್ತಾ ಮ್ಹಣ್ತಾಂ … ಆನಿ ಕೊಣಾಕ್ ಮ್ಹಣ್ ಹಾಂವ್ ಪಾತ್ಯೆಂವ್?!”.
“ರಿಶಭ್ … ತಾಂಚಿ ತಾಂಚಿ ಅಸಹಾಯೆಕತಾ ತಿಂ ತಿಂ ಜಾಣಾಂತ್. ಹಾಂವ್ ತುಕಾ ಸಾಂಗ್ತಾಂ … ಪ್ರಥಮ್ ಜಾವ್ನ್ ತುಂ ತ್ಯಾ ಮೊಗಾಚ್ಯಾ ಸುಳಿಯೆಥಾವ್ನ್ ಭಾಯ್ರ್ ಯೆ. ತಿ ಸುಳಿ ತುಕಾ ಅಪಾಯೆಕ್ ವಡ್ನ್ ವ್ಹರ್ತಾ. ದೆಕುನ್ ಹ್ಯಾ ಮುಕಾರ್… ಎದೊಳ್ ತುಂ ‘ಆಪುಣ್ ‘ರಿಶಭ್…!’ ಮ್ಹಣ್ ಹರ್ದೆಂ ಬಡೊವ್ನ್ ಜಿಯೆಲ್ಲಿ ಧೈರಾಧಿಕ್ ಜಿಣಿ … ತುಂ ತುಜ್ಯಾ ಮುಕ್ಲ್ಯಾ ಜಿವಿತಾಂತ್ ರೂಪಿತ್ ಕರುನ್ ಜಿಯೆ. ಮ್ಹಜೊ ಪುರ್ತೊ ಸಹಕಾರ್ ತುಜೆ ಥಂಯ್ ಆಸ್ತೊಲೊ.”
“ಸರ್ … ಬೆಜಾರ್ ಕರಿನಾಕಾತ್.” ತಕ್ಶಣ್ ಮ್ಹಣಾಲೊ ರಿಶಭ್ … “ಏಕ್ ಹಾಂವ್ ಸಾಂಗುಂ … ಹ್ಯಾ ಆದಿಂ ಕ್ಲೋಡಿಯಾ ಆನಿ ಮ್ಹಜ್ಯಾ ಮೊಗಾ ವಿಶ್ಯಾಂತ್ ತುಮಿಂ ದಿಲ್ಲಿಂ ತಿಂ ಅಸಲಿಂಚ್ಚ್ ಭರ್ವೊಶ್ಯಾಚಿಂ ಉತ್ರಾಂ … ಆತಾಂ ಮ್ಹಾಕಾ ತುಮಿಂ ದಿಂವ್ಚ್ಯಾ ಹ್ಯಾ ಸಹಕಾರಾಚಾ ಉತ್ರಾಂಚೆರ್ ಭರ್ವೊಸೊ ಹಾಡಿನಾಂತ್. ತೆಂ ಪಾತ್ಯೆಂವ್ಕ್ ದುಬಾವೆಚೆಂ ಖತ್ ಅಡ್ಕಳ್ ಘಾಲುನ್ ಆಸಾ.!.”
ಹಿಂ ತಾಚಿಂ ಕಡಕ್ಕ್ ಉತ್ರಾಂ ಕಾರ್ಡಿಯಾನಾಚ್ಯಾ ಕಾಳ್ಜಾ ಥಳಾಕ್ ವಯ್ರ್ ವಯ್ರ್ ಮಾರುಂಕ್ ಲಾಗ್ತಾನಾಂ … ತಾಕಾ ತಿಂ ಜಿರೊಂವ್ಕ್ ಅಸಾಧ್ಯ್ ಜಾಲೆಂ. ಖಿಣಾನ್ ತಾಣೆಂ ಆಪ್ಲಿ ದೀಶ್ಟ್ ತಾಚೆ ಥಾವ್ನ್ ಚುಕಯ್ಲಿ. ಆನಿ ಮ್ಹಣಾಲೊ…
“ಹೊ ಕಾರ್ಡಿಯಾನ್ … ಕೆನ್ನಾಂಯೀ ಸಲ್ವೊಣೆಕ್ ಶರಣಾಗತ್ ಜಾಲ್ಲೊ ವೆಕ್ತಿ ನ್ಹಂಯ್. ತೊ ಸಲ್ವೊಣೆಂತ್ ಜೀಕ್ ವಿಂಚ್ಚೊ ವೆಕ್ತಿ. ತುಜ್ಯಾ ತ್ಯಾ ಮೊಗಾ ಗಜಾಲೆಂತ್ ಹಾಂವ್ ಸಲ್ವಾಲ್ಲೊಂ ವ್ಹಯ್. ಪೂಣ್ ತ್ಯಾ ಸಲ್ವೊಣೆಂತ್ ಜೀಕ್ ವಿಂಚೊಂಕ್ ಆನಿಕೀ ವೊದ್ದಾಡೊನ್ ಆಸಾ. ಪೂಣ್ ತುಂ…
… ತುಂ ತುಜ್ಯಾ ಸಲ್ವೊಣೆಕ್ ಫುಡ್ ಕರುಂಕ್ ಸಖಾನಾಸ್ತಾಂ … ತ್ಯಾ ಸಲ್ವೊಣೆಂತ್‌ಚ್ ಉಪ್ಯೆವ್ನ್ ಆಸಾಯ್. ತ್ಯಾ ಧೆಧೆಸ್ಪರಾಚ್ಯಾ ಪರಿಣಾಮಾನ್ ತುಂ ಫಾರಿಕ್ಪಣಾಕ್ ವೆಂಗೊನ್ ವೊದ್ದಾಡುನ್ ಆಸಾಯ್!”
“ತೆಂ ತುಮ್ಚೆಂ ಚಿಂತಾಪ್. ಕಿತೆಂಯೀ ಜಾಂವ್ … ಹಾಂವ್ ಸಾಂಗ್ತಾಂ … ‘ತುಮಿಂ ಕಾರ್ಡಿಯಾನ್!…ಆನಿ ಹಾಂವ್ ರಿಶಭ್.’!!.
… ತುಮಿಂ ಸಲ್ವೊಣೆಕ್ ಫುಡ್ ಕರ್ಚಿ ರೀತ್ ವಿಂಗಡ್. ಆನಿಂ ಹ್ಯಾ ರಿಶಭಾನ್ ಫುಡ್ ಕರ್ಚಿ ರೀತ್ ವಿಂಗಡ್!.”
“ಒ.ಕೆ.ರಿಶಭ್. ಹಾಂವ್ ತುಕಾ ವೊಪ್ತಾಂ … ಪೂಣ್ ಹಾಂವ್ ಮ್ಹಜೆಂಚ್ಚ್ ರಾಜಾಂವ್ ಮುಂದರುನ್ ವ್ಹರ್ತಾಂ. ತರೀ ಹೆರಾಂಕ್ ಪಾತ್ಯೆನಾತ್ಲೆಲ್ಯಾ ತುಕಾ ಹಾಂವ್ ಏಕ್ ಜಾಗ್ರೂತ್ ದಿತಾಂಕೀ …
ತುಜ್ಯಾ ರಾಜಾವೆಂತ್ ಆಸ್ಚೆಂ ಫಾರಿಕ್ಪಣ್ … ತೆಂ ಕೆನ್ನಾಂಯೀ ತುಕಾಚ್ಚ್ ಅಪಾಯೆಚೆಂ!.”.
ಹೆಂ ಆಯ್ಕಾಲ್ಲೊ ರಿಶಭ್ … ಹೆಂ ಆಯ್ಕೊನ್ ಆಪ್ಣಾಂವ್ಕ್ ಸಖಾನಾಸ್ತಾಂ … ಏಕ್ ಘಡಿ ಮೌನ್ ಜಾಲೊ. ಉಪ್ರಾಂತ್ ಕಿತೆಂಚ್ಚ್ ಸಭ್ಧ್ ಕಾಡಿನಾಸ್ತಾಂ … ಧರ್ಣಿರ್ ದವರ್ಲೊಲೊ ಸರಳ್ ವಿಂಚಿಲಾಗ್ಲೊ … ಆನಿ ಮ್ಹಣಾಲೊ …
“ಕಿತೆಂಯೀ ಜಾಂವ್ … ಪೂಣ್ ಮ್ಹಜ್ಯಾ ಕ್ಲೋಡಿಯಾಕ್ ಕೆನ್ನಾಂಯೀ ಅಪಾಯ್ ಜಾಲೆಂ ತರ್ … ಹೊ ರಿಶಭ್ ಥಂಡ್ ರಾಂವ್ಚೊ ವೆಕ್ತಿ ನ್ಹಂಯ್. ತವಳ್ ಹ್ಯಾ ರಿಶಭಾಚೆಂ ಫಾರಿಕ್ಪಣ್ ಜಾಗೆಂ ಜಾತೆಲೆಂಚ್ಚ್!..
ಆನಿಂ ತ್ಯಾ ವಿಶ್ವಾಸ್ ಘಾತ್ಕಿ ಫೆಡ್ರಿಕಾಚ್ಯಾ ತಕ್ಲೆರ್ … ಹ್ಯಾ ರಿಶಭಾಚಿ ಫಾರಿಕ್ಪಣಾಚಿ ತಲ್ವಾರ್ … ಹರ್ಯೆಕ್ ಘಡಿ ಮ್ಹಳ್ಳೆಪರಿಂ ಉಮ್ಕಾಳೊನ್ ಆಸ್ತೆಲಿ!.” ಉತ್ರಾಂ ಬರಾಬರ್ … ದುಸ್ರೆಚ್ಚ್ ಘಡ್ಯೆ …
ಕ್ಯಾಬಿನಾಂತ್ ಸರಳಾಂ ಆವಾಜ್ ಉಟ್ಲೊ. ತವಳ್‌ಚ್ಚ್ … ಕಾರ್ಡಿಯಾನಾಚೊ ತಾಳೊಯೀ ಆವಾಜ್ಲೊ …
“ರಿ…ಶಭ್…”
ರಿಶಭಾನ್ ಪಾಟಿಂ ಪಳೆಲೆಂ … ತವಳ್ ತಾಕಾ ಪಳೆವ್ನ್ ಆಸ್ಚೊ ಕಾರ್ಡಿಯಾನ್ ಮ್ಹಣಾಲೊ …
“ಕಿತೆಂಯೀ ಜಾಂವ್ ತುಜ್ಯಾ ಗರ್ಜಾಂತ್ ಮ್ಹಾಕಾ ವಿಸ್ರಾನಾಕಾ.”
“ಸರ್ … ಫಾರಿಕ್ಪಣಾವಿಶಿಂ ಸಹಕಾರ್ ನಾಕಾ. ತಸಲ್ಯಾ ಗಜಾಲೆಂನಿಂ ಹಾಂವ್ ಎಕ್ಲೊಂ … ಆನಿ ಎಕ್ಲೊಂಚ್ಚ್ ಆಸ್ತೊಲೊಂ! ಪೂಣ್ ತ್ಯಾ ಫಾರಿಕ್ಪಣಾಂ ವರ್ವಿಂ ಜಾಲ್ಲ್ಯಾ ಪರಿಣಾಮಾಂತ್ …ಜರ್ ಗರ್ಜ್ ಪಡಾತ್ ತರ್…
… ಖಂಡಿತ್ ಜಾವ್ನ್ ಉಗ್ಡಾಸ್ ಕಾಡ್ತಾಂ … ಮ್ಹಜ್ಯಾ ‘ಸರ್ ಕಾರ್ಡಿಯಾನಾನ್’ ಮ್ಹಜ್ಯಾ ಎಸಿಡಾ ಘಾಯಾ ಶುಶ್ರೂಶೆಕ್ ಪರ್ದ್ಯಾ ಪಾಟ್ಲ್ಯಾ ನ್ ರಾವೊನ್ … ಕೆಲ್ಲ್ಯಾ ನಿತಳ್ ಪ್ರಮಾಣಿಕ್ ಸಹಕಾರಾಚಿ.”
“ತಶೆಂ ತರ್ … ರಿಶಭ್ … ತುಜೊ ಕಾರ್ಡಿಯಾನ್ ತುಜ್ಯಾ ಬರ‍್ಯಾಕ್ ಹಾಂವ್ ಸಾಂಗ್ತಾಂ … ಆನಿ ಜಾಗಯ್ತಾ … ತುಂ ತ್ಯಾ ವಿಶ್ವಾಸ್ ಘಾತ್ಕಿ ಫೆಡ್ರಿಕಾಚೆಂ ಫಾರಿಕ್ಪಣ್ ವಿಸರ್. ಜರ್ ತ್ಯಾ ಫಾರಿಕ್ಪಣಾಂತ್ ಕಾಂಯ್ ತುಂ … ”
“ಸರ್…” ಮಧೆಂಚ್ಚ್ ಉಸ್ಮಡ್ಲೊ ರಿಶಭ್ … ‘ತುಮ್ಚ್ಯಾ ರಿಶಭಾನ್ ’ ಕರ್ಚೆಂ ಫಾರಿಕ್ಪಣ್ … ಪರ್ದ್ಯಾ ಪಾಟ್ಲ್ಯಾನ್ ರಾವೊನ್ ಕರ್ಚೆಂ ಫಾರಿಕ್ಪಣ್! ಜಶೆಂ ತುಮಿಂ ಪರ್ದ್ಯಾ ಪಾಟ್ಲ್ಯಾನ್ ರಾವೊನ್ ಕೆಲ್ಲ್ಯಾ ಶುಶ್ರೂಶೆ ಪರಿಂ…”
ಹೆಂ ಆಯ್ಕೊನ್ ಕಾರ್ಡಿಯಾನ್ ತಾಚೆಯಿತ್ಲ್ಯಾಕ್ ಘುಣ್ಘುಣ್ಲೊ … “ಪರ್ದ್ಯಾ ಪಾಟ್ಲೆಂ … ಪರ್ದ್ಯಾ ಪಾಟ್ಲೆಂ ಫಾರಿಕ್ಪಣ್.!”
ಮುಂದರುನ್ ಆಸಾ. . .
