ಬಾರ್ಕೂರ್ಚೊ ಸುಪುತ್ರ್, ದೆಕಿಭರಿತ್ ಜಿಣಿ ಜಿಯೆವ್ನ್ ಆದರ್ಶ್ ಜಾಲ್ಲೊ ಕಾಪುಚಿನ್ ಯಾಜಕ್ ದೆವಾಚೊ ಸೆವಕ್ ‘ಆಮ್ಚೊ ಪಾದ್ರ್ಯಾಬ್’ ಫಾ| ಆಲ್ಫ್ರೆಡ್ ರೋಚ್ ಹಾಂಕಾಂ ಸಾಂತ್ ಮ್ಹಣ್ ಪಾಚಾರುಂಕ್ ಉಡುಪಿ ದಿಯೆಸೆಜಿನ್ ಹ್ಯಾ ವರ್ಸಾ ದಸೆಂಬ್ರ್ ಮಯ್ನ್ಯಾಂತ್ ಸುರು ಕರ್ಚ್ಯಾ ಪ್ರಕ್ರಿಯೆಚ್ಯಾ ಉಗ್ತಾವಣ್ ಸುವಾಳ್ಯಾಚೆಂ ತಶೆಂಚ್ ಫಾ| ರೋಚ್ ಹಾಂಚ್ಯಾ ಸರ್ಗಿಂ ಪಯ್ಣಾಚ್ಯಾ ಪಂಚ್ವೀಸಾವ್ಯಾ ವರ್ಸಾಚ್ಯಾ ಸಂಸ್ಮರಣ್ ಕಾರ್ಯಾಚೆಂ ಅಧಿಕೃತ್ ಆಮಂತ್ರಣ್ ಪತ್ರ್ ಉಗ್ತಾವಣ್ ಕಾರ್ಯೆಂ ಸೊಮಾರಾ, ನವೆಂಬ್ರಾಚ್ಯಾ 15 ತಾರಿಕೆರ್, ಆಮ್ಚೊ ಪಾದ್ರ್ಯಾಬ್ ಫಾ| ರೋಚ್ ಜಲ್ಮೊನ್ ವ್ಹಡ್ ಜಾಲ್ಲ್ಯಾ ಮುಡಾದುಕುದ್ರು ಮಾಲ್ಘಡ್ಯಾ ಘರಾಂತ್ ಸಾಂಜೆಚ್ಯಾ ಪಾಂಚ್ ವ್ಹರಾರ್ ಸಂಪನ್ನ್ ಜಾಲೆಂ.
ಫಾ| ರೋಚ್ ಹಾಂಚ್ಯಾ ಕುಟ್ಮಾಚೆ ಲಾಗ್ಶಿಲೆ ಸಾಂದೆ, ಬ್ರಹ್ಮಾವರ್ ಭಾಗೆವೊಂತ್ ಕುಟ್ಮಾಚ್ಯಾ ಫಿರ್ಗಜೆಚೊ ವಿಗಾರ್ ಮಾ| ಬಾ| ವಿತೊರ್ ಫೆರ್ನಾಂದ್, ಕಾಪುಚಿನ್, ಫಾ| ಆಲ್ಫ್ರೆಡ್ ರೋಚ್ ಸಾಂತಿಪಣಾಚ್ಯಾ ಪ್ರಕ್ರಿಯೆಚ್ಯಾ ಮಿಸಾಂವಾಚೊ ಮುಕೆಲಿ ಮಾ| ಬಾ| ಸಾಂತಾ ಲೊಪೆಜ್, ಕಾಪುಚಿನ್, ಮಾ| ಬಾ| ರೋಹನ್ ಲೋಬೊ, ಮಾ| ಬಾ| ಆನ್ಸ್ಟನ್ ಫೆರ್ನಾಂದ್ ತಶೆಂ ಜಾಯ್ತೆ ಹೆರ್ ಯಾಜಕ್ ಭಾವಾಂನಿ ಆನಿ ಕರುಣಾಲಯ ಕೊವೆಂತಾಚ್ಯಾ ಧರ್ಮ್ ಭಯ್ಣಿಂನಿ ಕಾರ್ಯಾಂತ್ ವಾಂಟೊ ಘೆತ್ಲೊ. ಮಟ್ವ್ಯಾ ಮಾಗ್ಣ್ಯಾವಿಧಿ ಸಾಂಗಾತಾ ತೇರ್ಸ್ ಭೆಟಯ್ಲೊ.
ಬಾರ್ಕೂರ್ ಫಿರ್ಗಜೆಚೊ ವಿಗಾರ್ ಮಾ| ಬಾ| ಫಿಲಿಫ್ ನೇರಿ ಆರಾನ್ಹಾ ಹಾಣಿ, ದಸೆಂಬ್ರಾಚ್ಯಾ 27 ತಾರಿಕೆರ್, ಸೊಮಾರಾ ಆಮ್ಚೊ ಪಾದ್ರ್ಯಾಬ್ ಫಾ| ಆಲ್ಫ್ರೆಡ್ ರೋಚ್ ಹಾಂಚಿ ಸಮಾಧಿ ಆಸ್ಚ್ಯಾ ಬ್ರಹ್ಮಾವರ್ ಭಾಗೆವೊಂತ್ ಕುಟ್ಮಾಚ್ಯಾ ಇಗರ್ಜೆಂತ್ ಸಕಾಳಿಂಚ್ಯಾ 10 ವ್ಹರಾರ್, ಉಡುಪಿ ದಿಯೆಸೆಜಿಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಜೆರಾಲ್ಡ್ ಐಸಾಕ್ ಲೋಬೊ ಹಾಂಚ್ಯಾ ಪ್ರಧಾನ್ ಯಾಜಕ್ಪಣಾರ್ ಚಲ್ಚ್ಯಾ ಸಂಭ್ರಮಿಕ್ ಮಿಸಾಚ್ಯಾ ಬಲಿದಾನಾಚೆಂ ಆನಿ ತೆ ಉಪ್ರಾಂತ್ ಫಾ| ರೋಚ್ ಹಾಂಚ್ಯಾ ಸಾಂತಿಪಣಾಚ್ಯಾ ಪ್ರಕ್ರಿಯೆಕ್ ದಿಯೆಸೆಜಿ ಹಂತಾರ್ ಚಾಲನ್ ದಿಂವ್ಚ್ಯಾ ಮಹತ್ವಾಚಾ ಕಾರ್ಯಾಚೆಂ ಆಮಂತ್ರಣ್ ಪತ್ರ್ ಉಗ್ತಾಯ್ಲೆಂ.
ಉಡುಪಿ ದಿಯೆಸೆಜಿಚೊ ಧರ್ಮಾಧ್ಯಕ್ಷ್ ದಸೆಂಬ್ರಾಚ್ಯಾ 27 ವೆರ್, ಮಿಸಾಚ್ಯಾ ಬಲಿದಾನಾ ಉಪ್ರಾಂತ್, ಬಾರ್ಕೂರ್ಚೊ ಸುಪುತ್ರ್, ಆಮ್ಚೊ ಪಾದ್ರ್ಯಾಬ್ ಫಾ| ಆಲ್ಫ್ರೆಡ್ ರೋಚ್ ಹಾಂಕಾ ಸಾಂತ್ ಮ್ಹಣ್ ಪಾಚಾರ್ಚ್ಯಾ ಪ್ರಕ್ರಿಯೆಕ್ ಅಧಿಕೃತ್ ಥರಾನ್ ಸಮಿತಿ ಘಡ್ತಾಲೊ ಆನಿ ಪ್ರಕ್ರಿಯೆಕ್ ಚಾಲನ್ ದಿತಾಲೊ. ಉಪ್ರಾಂತ್ ಆಮ್ಚೊ ಪಾದ್ರ್ಯಾಬ್ ಫಾ| ಆಲ್ಪ್ರೆಡ್ ರೋಚ್ ಹಾಂಚ್ಯಾ ಸಮಾಧಿಥಳಾಚೆರ್ ಮಾಗ್ಣ್ಯಾವಿಧಿ ಚಲ್ತಲಿ.
ಬಾರ್ಕೂರ್ ಫಿರ್ಗಜೆಗಾರಾಂಕ್, ಉಡುಪಿ ದಿಯೆಸೆಜಿಚ್ಯಾ ಭಾವಾಡ್ತ್ಯಾಂಕ್ ಮಾತ್ ನಯ್ ಸಂಸಾರ್ಭರ್ ಶಿಂಪಡ್ಲೆಲ್ಯಾ ಆಮ್ಚ್ಯಾ ಪಾದ್ರ್ಯಾಬಾಚ್ಯಾ ಭಕ್ತಿಕಾಂಕ್ ಹಿ ಗಜಾಲ್ ಚಾರಿತ್ರಿಕ್ ಮಹತ್ವಾಚಿ ಜಾಂವ್ಕ್ ಪಾವ್ತೆಲಿ.
