ಶೆಳೆಂ ಶಿತ್

ಸುರ್ಯೊ ಹರ್ಶೆಂಚೆಬರಿಂಚ್ ಉದೆಲ್ಲೊ. ಆಮ್ಚ್ಯಾ ಘರ‍್ಚೆ ದಿನಚರಿಂತ್ ಕಾಂಯ್ ವ್ಯತ್ಯಾಸ್ ನಾತ್‌ಲ್ಲೊ. ಟಿ.ವಿಂತ್ ಸಕಾಳಿಂಚ್ಯೊ ಖಬ್ರೊ ಯೇವ್ನ್ಂಚ್ ಆಸ್‌ಲ್ಲ್ಯೊ. ಸಕ್ಕಡ್ ಸದಾಂಚೆಂಚ್. ಥಂಯ್ ಕೋವಿಡ್ – 19 ಇತ್ಲ್ಯೊ ಕೆ.ಸಿ. ಹಾಂಗಾ ಇತ್ಲ್ಯೊ, ಥಂಯ್ ಇತ್ಲೆ ಮೆಲೆ, ಹಾಂಗಾ ಕಿತ್ಲೆ. ತರೀ ಆಮ್ಚ್ಯಾ ಮಾಂಯ್ಕ್ ಮಾತ್ರ್ ಏಕ್ ಖಬಾರ್ ತಕ್ಲೆಕ್ ಆವಡ್ಲಿ. ತಿ ಖಂಚಿ ಮ್ಹಣ್ತಾತ್‌ಗೀ? ತಿಚ್ಚ್ ತಿ ‘ಶೆಳೆ ಶಿತಾಚಿ’. ಶೆಳೆಂ ಶಿತ್ ಜೆವ್‌ಲ್ಲ್ಯಾನ್ ಕೊರೊನಾ ವೆಗಿಂಚ್ ಗೂಣ್ ಜಾಲೆಂ. ಮ್ಹಾತಾರಿಂ ಘಡಿಯೆನ್ ಗೂಣ್ ಜಾಂವ್ಕ್ ಹೆಂಚ್ ಕಾರಣ್!

ಮ್ಹಜಿ ಬಾಯ್ ಎಂ.ಕೊಮ್ ಕರ್ತಾ, ಹಾಂವ್ ಬಿ.ಬಿ.ಎಮ್. ಪಪ್ಪ ಕುವೈಟ್ ಆನಿ ಮಮ್ಮಿಂಯ್ ಥಂಯ್ಚ್ ಕಾಮ್ ಕರ್ತಾ. ಘರಾ ಆಮಿ  ಚೊವ್ಗಾಂ ಆಸಾಂವ್ – ಹಾಂವ್, ಬಾಯ್, ಆಬು ಆನಿ ಮಾಂಯ್, ಮ್ಹಳ್ಯಾರ್ ಪಪ್ಪಚೊ ಪಪ್ಪ ಆನಿ ಮಮ್ಮಿ.  ಕೊವಿಡ್ ಆಸ್‌ಲ್ಲ್ಯಾನ್ ಆನ್‌ಲೈನ್ ಕ್ಲಾಸ್. ಘರಾ ಹಿತಾಲ್ ಆಸಾ. ಆಮಿ ಹಿತ್ಲಾಂತ್ ಆನಿ ಮಾಂಯ್ ರಾಂದ್ಪಾಂತ್, ಘರಾ ಮಾಂಯ್ಚೆಂ ಉತರ್ ವೇದ್-ವಾಕ್ಯ್. ಆಮಿ ತಿಚೆ ಮುಕಾರ್ ‘ಪುಸ್ಕ್’ ಆನಿ ಹ್ಯಾ ವಗ್ತಾ ಮಾಂಯ್ಚ್ಯಾ ತಕ್ಲೆಕ್ ಹೆಂ ಶೆಳೆಂ ಶಿತ್ ರಿಗ್ಲೆಂ. ತಿಕಾ ಇಲ್ಲೆಶೆ ಥೈರೋಯ್ಡ್ ಉಪಾದ್ರ್ ಆಸಾತ್ ಆನಿ ಸಕಾಳಿಂ ಫುಡೆಂ ಹೆಂ ಶೆಳೆಂ ಶಿತ್ ತಕ್ಲೆಂತ್ ರಿಗ್‌ಲ್ಲ್ಯಾನ್ ಹಾಂವೆಂ ಚಿಂತ್ಲೆಂ ಆನಿ ಜಾಲಿ ಆಬುಚಿ ಗತ್!  ಆನಿ ಜಾಲೆಂಯ್ ತಶೆಂಚ್…

“ವಚ್‌ರೆ ಆಬು ಖಂಯ್ ಆಸಾ ಪಳೆ ಆಪಯ್”

ತೊ ಹಿತ್ಲಾಂತ್ ಆಸ್‌ಲ್ಲೊ ಕಾಂಯ್ ಇಲ್ಲಿಶಿಂ, ಪಡ್‌ಲ್ಲಿಂ ಪೊಪ್ಳಾಂ ವಿಂಚ್ತಾಲೊ. ಹಾಂವೆಂ ಆಪಯ್ಲೆಂ ಚ್ಹಾ ತಯಾರ್ ಜಾಲಿ ಆಸ್ತೆಲಿ ಮ್ಹಣೊನ್ ಚಿಂತುನ್ ತೊ ಆಯ್ಲೊ. ಆಮಿ ಭಾವ್ ಆನಿ ಭಯ್ಣ್ ಹ್ಯಾ ಕ್ಲಾಶಿ ಧರ್ಮಾನ್ ಲ್ಯಾಪ್‌ಟಾಪ್ ಮುಕಾರ್ ದವರ‍್ನ್ ಆಸ್ತಾಂವ್ ಜಾಲ್ಲ್ಯಾನ್ ಆಮ್ಚ್ಯಾ ವೆಳಾ ಪರ್ಮಾಣೆ ನಾಸ್ಟೊ ಘೆತೆಲ್ಯಾಂವ್.

ಆಬು ಏಕ್ ಖಡಕ್ಕ್ ಚ್ಹಾ ಮೆಳ್ತಾ ಮ್ಹಣೊನ್ ಯೇವ್ನ್ ಬಸ್ಲೊ. ಮಾಂಯ್ ಎಕಾ ವಾಟ್ಲೆಂತ್ ಶೆಳೆಂ ಶಿತ್ ಆನಿ ಎಕಾ ಗೊಬ್ಳ್ಯಾಂತ್ ಶೆಳೆ ಶಿತಾಚೊ ನೀಸ್ ಹಾಡ್ನ್ ಆಯ್ಲಿ ಆನಿ ಆಬುಕ್ ಮ್ಹಣಾಲಾಗ್ಲಿ. “ಆನಿ ತುವೆಂ ಚ್ಹಾ ಪಿಯೆಂವ್ಕ್ ನಜೊ. ಸಕಾಳಿಂ ಕಶೆಂಯ್ ಹಾಂವ್ ಅಮೃತ್ ವಾಲ್, ಲಿಂಬೊ, ತಿಕೆ ಸಾಲ್ ಆನಿ ಹೆರ್ ಕೂಟ್ ಘಾಲುನ್ ಕಸಾಯ್ ಕರುನ್ ದಿತಾಂ.”

ಮಾಂಯ್ ಅಶೆಂ ಸಾಂಗ್ತಾನಾ ಹಾಂವೆಂ ಚಿಂತ್ಲೆಂ. ಆಬು ಕಾಂಯ್ ತರೀ ಮ್ಹಣ್ತಲೊ, ಪೂಣ್ ತಶೆಂ ಜಾಲೆಂ ನಾ. ಆಬು ಶೆಳೆಂ ಶಿತ್ ಜೇವ್ನ್ ಉಟ್ಲೊ.

ಆಮ್ಗೆರ್ ಗೀಮಾಂತ್ ತಶೆಂ ಪಾವ್ಸಾಂತ್ ವರ‍್ಸಾಚೆ ಬಾರಾ ಮಹಿನೆಂಯೀ ಸೊಪಾಚಿ ಚ್ಹಾ ಮ್ಹಣ್ಜೆ ತುಳ್ಸಿ ಪಾನಾಂ, ಸಂಬಾರ್‌ಪಳಿ, ಕಸ್ರಿ ಪಾನಾಂ, ತಿಕೆ ಪಾನಾಂ ಆನಿ ಕಿತೆಂ ಕಿತೆಂ ಪಾನಾಂ ಘಾಲ್ನ್ ಚ್ಹಾ. ಹಿ ಚ್ಹಾ ಶೆಳಿಕ್, ತಾಪಾಕ್, ಖೊಂಕ್ಲೆಕ್ ಆಂಗ್ ದುಖಿಕ್ ಆನಿ ಕಿತ್ಯಾಕ್ ಸಕ್ಕಡ್ ಬರಿ ಮ್ಹಣೊನ್ ಎಕಾ ವ್ಹಡ್ ಬುಡ್ಕುಲ್ಯಾಂತ್ ಚ್ಹಾ ಕರ‍್ಚಿ. ಹಿ ಪಿಯೆವ್ನ್ ಆಮ್ಕಾಂ ಘರ‍್ಚ್ಯಾಂಕ್ ಖಂಚಿಯೀ ಪಿಡಾ ನಾ ಮ್ಹಣೊನ್ ನ್ಹಯ್. ಹವ್ಯಾಕ್ ತೆಕಿದ್ ಸಕ್ಕಡ್ ನಮುನ್ಯಾಚಿ ಪಿಡಾ ಆಮ್ಗೆರ್ ಯೆತಾಚ್ಚ್. ಪೂಣ್ ಆಮ್ಚಿ ಹೈಕಮಾಂಡ್ “ಮಾಂಯ್” ಮಾತ್ರ್ ಸೆಜಾರಾ ತಶೆಂ ಕಾಮಾಕಡೆ ಆಪ್ಣಾಚಾ ಚ್ಹಾಯೆವಿಶಿಂ ಆನಿ ಕಸಾಯಾವಿಶಿಂ ಬಡಾಯ್ ಉಲವ್ನ್ಂಚ್ ಆಸ್ತಾ.

ಬಾಯೆಕ್ ಶಿಕೊಂಕ್ ಚಡ್ ಆಸ್‌ಲ್ಲ್ಯಾನ್ ಹಾಂವೆಂಚ್ ಸಬಾರ್ ಪಾವ್ಟಿಂ ಘುಟಾನ್ ಆಬುಕ್ ಚ್ಹಾ ಕರ‍್ನ್ ದಿಂವ್ಚಿ ಆಸಾ ಆನಿ ಕಸಾಯ್ ಭಾಯ್ರ್ ವೊತುನ್ ‘ಆಬು ಪಿಯೆಲೊ’ ಮ್ಹಣೊನ್ ಸಾಂಗ್ಚೆಂ ಆಸಾ. ಆಮ್ಗೆರ್ ಸಯ್ರಿಂ ಆಯ್ಲ್ಯಾರ್ ಹಿ ‘ಸೊಡಾಚಿ ಚಾ’ ಪಿಯೆವ್ನ್ ಮುಸ್ಮುಸೆಂ ಹಾಸೊನ್ ‘ಭಾರೀ ಬರಿ ಆಸಾ’ ಮ್ಹಣೊನ್ ಮಾಂಯ್ಕ್ ಫುಗಾರ್‌ಲ್ಲೆಂ ಆಸಾ ಆನಿ ಹಾಚೊ ಪರಿಣಾಮ್ “ಹಾಂವೆಂ ಇತ್ಲೆಂ ವದ್ದಾಡುನ್ ಕೆಲ್ಯಾರೀ, ಆಮ್ಗೆಲೊ ಖೊಡಿ ಕಾಡ್ತಾ. ತಾಕಾ ಮೆಳಾಜೆ ಆಸ್‌ಲ್ಲಿ ಕಸಲಿ ಬಾಯ್ಲ್ ಗೊತ್ತಾಯೆ?” ಮ್ಹಣೊನ್ ಆಬುಚಿಂ ಆತಾಂಚಿಂ ಆನಿ ಆದ್ಲಿಂ ದುರಾಂಚಿ ಪಟ್ಟಿಚ್ಚ್ ಸುಟಯ್ತಾ.

ಮಾಂಯ್ ಅಶೆಂ ಕರ್ತಾ ಮ್ಹಣೊನ್ ಆಬು ಕಾಂಯ್ ಬುದ್ದು ನ್ಹಯ್. ತಾಚೆ ಕಡೆಯ್ ಜಾಯ್ ಪುರ್ತಿಂ ತಾಲೆಂತಾಂ ಆಸಾತ್. ಪೂಣ್  ಮಾಂಯ್ ಖಂಚಾಕೀ ಕ್ಯಾರ್ ಕರಿನಾ. ಘರ‍್ಚ್ಯಾ ಉತ್ರಾಂವರ್ನಿ ಭಾಯ್ಲ್ಯಾಂಚೆ ಉತರ್ ಮಾಂಯ್ಕ್ ಸತ್ ದಿಸ್ತಾ. ಅಶೆಂ ಜಾಲ್ಲ್ಯಾನ್ ಆಮಿ ಕಿತೆಂಯ್ ಸಲಹಾ ದಿಲ್ಯಾರ್ ತಾಂತುಂ ತಿಕಾ ಚುಕಿಚ್ಚ್ ದಿಸ್ತಾತ್. ಮ್ಹಾಕಾ ತಿಣೆಂ ‘ಬಾಬು’ ಮ್ಹಣ್ಚೆಂ. ಮ್ಹಾಕಾ ಕಿತೆಂಯ್ ಜಾಲ್ಯಾರ್ ತಿ ಸಗ್ಳೊ ದೀಸ್ ಜಾಲ್ಯಾರೀ ಮ್ಹಜೆ ಸಾಂಗಾತಾ ರಾವ್ತಾ. ಮ್ಹಾಕಾ ಕಿತೆಂ ಜಾಯ್ ತಕ್ಷಣ್ ಕರ‍್ನ್ ದಿತಾ. ಅಶೆಂ ಜಾಲ್ಲ್ಯಾನ್ ಹಾಂವೆಂ ತಿಚೆ ಮುಕಾರ್ ಆಬುಚಿ ಪಾಡ್ತ್ ಘೆಂವ್ಕ್ ಜಾಯ್ನಾಂನೆ?

ಕೊರೊನಾ ಆನಿಕೀ ಮೊರೊಂಕ್ ನಾ. ತ್ಯಾ ವರ್ವಿಂ ಆಮ್ಗೆರ್ ಮಾಂಯ್ಚಿಂ ಖಡಕ್ಕ್ ನಿಯಮಾಂ ಆತಾಂಯ್ ಆಸಾತ್. ಆಮಿ ಮೆಡಿ-ಮಾಸ್ಕ್ ಉಪಯೋಗ್ ಕರ‍್ಚ್ಯಾಕ್ ಏಕ್ ಬಂಡಲ್ ಮಾಸ್ಕ್ ಘರಾ ಆಸಾ. ಸ್ಯಾನಿಟೈಸರಾಚಿ ವ್ಹಡ್ಲಿ ಬೋತ್ಲ್ ಘರಾ ಭಿತರ್ ರಿಗ್ತಾನಾಂಚ್ ಆಸಾ. ತಿತ್ಲೆಂ ನ್ಹಯ್ ಆಸ್ತಾಂ ಬೊಲ್ಸಾಂತ್ ವಾ ಬ್ಯಾಗಾಂತ್ ಭಾಯ್ರ್ ವೆತಾನಾ ವ್ಹರುಂಕ್ ಸ್ಯಾನಿಟೈಸರ್ ಲ್ಹಾನ್ ಸಿಸ್ಲೆಂಚಿ ರಾಸ್ ತಯಾರ್ ಆಸಾ. ಕೊಣಾಚೆಂಯ್ ಮೋರ್ನ್ ಜಾಲ್ಯಾರ್ ಆಬುನ್ ಸೊಡ್ನ್ ಹೆರಾಂನೀ ವಚೊಂಕ್ ನಾ. ತೊ ವಚೊನ್ ಆಯ್ಲ್ಯಾ ಉಪ್ರಾಂತೀ ತಾಕಾ ಕಾಯ್ಬೇವ್ ಪಾನಾಂ ಆನಿ ಹೆರ್ ಪಾನಾಂ ಘಾಲುನ್ ತಯಾರ್ ಕೆಲ್ಲೆಂ ನಾಂವ್ಕ್ ಕಾಣೇರಾಚೆಂ ಉದಾಕ್ ತಯಾರ್ ಆಸ್ತಾ. ಹ್ಯಾ ಸರ‍್ವ್ ಉಬ್ದೆಸಾಂಕ್ ಸಬಾರ್ ಪಾವ್ಟಿಂ ಆಬುನ್ ಪ್ರತಿಭಟನ್ ಕೆಲ್ಯಾರೀ ಫೈನಲ್ ತೀರ್ಪ್ ಮಾತ್ರ್ ಮಾಂಯ್ಚೆಂ.

ಮಾಂಯ್ ಭಾಯ್ರ್ ಕಾಮಾಕ್ ವೆತಾ ಜಾಲ್ಯಾರೀ ಘರಾ ಯೇವ್ನ್ ರುಚಿಕ್ ರಾಂದಾಪ್ ಕರ್ತಾ. ಇತ್ಲೆಂಚ್ ನ್ಹಯ್ ಕಾಮಾಕಡೆ ಮೆಳ್‌ಲ್ಲೆ ಹಿಶಾರೆ ತಶೆಂ ಸಲಹಾ ಘರಾ ಯೇವ್ನ್ ಪ್ರಯೋಗ್ ಕರ್ತಾ. ಇತ್ಲೆಂಚ್ ನ್ಹಯ್ ಆಸ್ತಾಂ ಟಿ.ವಿ. ಮುಕಾಂತ್ರ್ ಮೆಳ್‌ಲ್ಲೆ ಹಿಶಾರೆ ಯಾ ಜಾಣ್ವಾಯ್ ಪರ್ಯಾಂತ್ ಪ್ರಯೋಗ್ ಕರ್ತಾ. ಅಸಲ್ಯಾ ವೆಳಾರ್ ಆಮ್ಚ್ಯಾ ವಾಡ್ಯಾಂತ್ಲ್ಯಾ ಫೆಲ್ಸಿಬಾಯೆಕ್ ಇಲ್ಲೆಶೆಂ ಜಿವಾಕ್ ಹುಶಾರ್ ನಾ. ಪೊಟ್ಕಾಣಿ ಆಸಾ ಮ್ಹಳ್ಳಿ ಖಬಾರ್ ಮಾಂಯ್ಕ್ ಕೊಣೆಂಗಿ ಸಾಂಗ್ಲಿ ಆನಿ ಹಿ ತಾಂಗೆರ್ ಭಾಯ್ರ್ ಸರ್ಲಿ.

ತಿ ಗೆಲ್ಯಾ ಉಪ್ರಾಂತ್ ಆಬು ಹಿತ್ಲಾಂತ್ ಥಾವ್ನ್ ಘರಾ ಆಯ್ಲೊ. ತೊ ಆಯಿಲ್ಲೆಂಚ್ ಮ್ಹಜೆಲಾಗಿಂ ಸವಾಲ್ ವಿಚಾರ‍್ಲೆಂ “ಬಾಬು ಆಜ್ ಕಶೆಂರೆ ಘರಾ ರಾವ್ಯೆತ್‌ಗೀ? ಸುಕುರ್ ಸಾಯ್ಭಿಣಿ ಸರ್ಶಿನ್ ಮೆರ್ಸಿ ಸಾಯ್ಬಿಣ್ ಗೆಲ್ಯಾ. ಮಾಗ್ಣೆಂ ಕಂತಾರಾಂ ಸುರು ಜಾತಾತ್‌ಗೀ ಕೊಣ್ಣಾ” ಆಬುನ್ ಸಾಂಗ್ತಾನಾ ಮ್ಹಾಕಾಯ್ ತಶೆಂಚ್ ಭೊಗ್ಲೆಂ. ಹ್ಯಾ ಕೊರೊನಾ ಧರ‍್ಮಾನ್ ಆನಿ ಕಿತೆಂ ಕಸಾಯ್, ಲೇಪ್, ಧುಂವರ್ ಘರಾ ಭಿತರ್ ಯೆತಿತ್ ಮ್ಹಳ್ಳೆ ಚಿಂತ್ಪಾಕೀ ಮಿಕ್ವಾಲ್ಲೆಂ. ಹಾಚಾ ಪಯ್ಲೆಂಯ್ ಅಶೆಂಚ್ ಜಾಲಾಂ. ಏಕ್ ಪಾವ್ಟಿಂ ಮಾಂಯ್ ಸೆಜಾರಾ ವಚೊನ್ ಆಯ್ಲ್ಯಾ ಉಪ್ರಾಂತ್ ಸದಾಂ ಸಾಂಜೆರ್ ಲಿಂಗ್ಡಿಚ್ಯಾ ಪಾನಾಂಚೊ ಧುಂವರ್ ಘಾಲಾ. ಡೆಂಗ್ಯು, ಚಿಕುನ್‌ಗುನ್ಯಾ, ಮಲೇರಿಯಾ ಯೇನಾ ಜಾಂವ್ಚ್ಯಾಕ್ ಸಂಬಾರ್‌ಪಿಲೆಚಿಂ ಪಾನಾಂ ಚಿರ್ಡುನ್ ಹಾತಾ ಪಾಂಯಾಕ್ ಸಾರಯ್ಲಾಂ. ಹಳ್ದಿ ಪಾಳ್ ಪೆಟವ್ನ್ ಧುಂವರ್ ಹುಂಗ್ಲಾ, ಧುಂಪ್ ಕಸೊಯ್ ಸುಕ್ರಾರಾ ಮಂಗ್ಳಾರಾ ಆಮ್ಗೆರ್ ಸಾಮಾನ್ಯ್. ಆನಿ ಆಜ್ ಪರತ್ ಮಾಂಯ್ ಫೆಲ್ಸಿಬಾಯೆಕರ್ ಗೆಲ್ಯಾ ಮ್ಹಣ್ತಾನಾ ಆನಿ ಕಿತೆಂ ನವೆಸಾಂವ್‌ಗಿ, ಜಿಂಗ್ರಿಫಿಸಾಂವ್‌ಗಿ ಯೆತಾ ಮ್ಹಳ್ಳೆಂ ನಿಘಂಟ್!

ಸುಮಾರ್ ದೋನ್ ಘಂಟೆ ಪಾಶಾರ್ ಜಾಲ್ಯಾ ಉಪ್ರಾಂತ್ ಮಾಂಯ್ ಘರಾ ಆಯ್ಲಿ. ಬಾಯ್ ಕಶೆಂಯ್ ಲ್ಯಾಪ್-ಟಾಪ್ ಮುಕಾರ್ ದವರ‍್ನ್ ಕಿತೆಂಗಿ ಕರ್ತಾಲೆಂ. ಹಾಂವೆಂಯ್ ಮೊಬೈಲ್ ಆನ್ ಕರ‍್ನ್ ಶಿಕ್ಚೊ ನಾಟಕ್ ಕೆಲೊ. ತರೀ ಮಾಂಯ್ನ್ ಮ್ಹಾಕಾ ಆಪಯ್ಲೆಂ. “ಬಾಬೂ… ಚಿಕ್ಕೆ ಹಾಂಗಾ ಯೆ” ತಿಣೆಂ ಆಪಯ್ತಾನಾ ‘ಮ್ಹಾಕಾ ಶಿಕೊಂಕ್ ಆಸಾ’ ಮ್ಹಳ್ಳೆಂ ನೀಬ್ ದೀಂವ್ಕ್ ಜಾಲೆಂ ನಾ.

“ಕಿತೆಂ ಮಾಂಯ್?” ಮ್ಹಣೊನ್ ವಿಚಾರ‍್ಲೆಂ.

ತಿಚೆಂ ಸವಾಲ್ “ಆಬು ಖಂಯ್ ಆಸಾ?”

“ಗೊಟ್ಯಾಕ್ ಸೊಪ್ ಹಾಡುಂಕ್ ಗುಡ್ಯಾಕ್ ಗೆಲಾ”

“ತೊ ವಚೊಂದಿ, ಮ್ಹಾಕಾ ಬಾಲ್ದೆಂತ್ ಇಲ್ಲೆಶೆಂ ಗೊಟ್ಯಾಂತ್ಲೆಂ ಶೆಣ್ ಹಾಡುನ್ ದಿ”

“ಜಾಯ್ತ್ ಮಾಂಯ್”

ಹಾಂವೆಂ ಗೊಟ್ಯಾಕ್ ವಚೊನ್ ಇಲ್ಲೆಂ ಗೊರ‍್ವಾಂಚೆಂ ಶೆಣ್ ಹಾಡುನ್ ದಿಲೆಂ.

ಮ್ಹಜ್ಯಾ ಮತಿಕ್ ಸಮಾಧಾನ್ ಜಾಲೆಂ. ಆಜ್ ಕಿತೆಂಗೀ ಫುಲಾಂ ಝಡಾಂಚೊ ಮೋಗ್ ಉಬ್ಜಾಲಾ. ತಾಂಕಾಂ ಮುಳಾಕ್ ಈಟ್ ಘಾಲುಂಕ್ ಆಸ್ಲ್ಯಾರ್ ಮಾತ್ರ್ ತಿಣೆಂ ಶೆಣ್ ಹಾಡಂವ್ಚೆಂ.

“ಆನಿ ಕಿತೆಂ ಕರುಂಕ್ ಆಸಾ ಮಾಂಯ್?” ವಿಚಾರ‍್ಲೆಂ.

“ಆನಿ ತುಜೆಂ ಲಿಸಾಂವ್ ಕರ್ ಪುತಾ. ಗರ್ಜ್ ಆಸ್ಲ್ಯಾರ್ ಆಪಯ್ತಾಂ”

ಮ್ಹಾಕಾಯ್ ಹೆಂಚ್ ಜಾಯ್ ಆಸ್‌ಲ್ಲೆಂ. ಹಾಂವ್ ಮೊಬೈಲಾಂತ್ ಕ್ರಿಕೆಟ್ ಮ್ಯಾಚ್ ಪಳಂವ್ಚ್ಯಾಂತ್ ಮಗ್ನ್ ಜಾಲೊಂ.

‘ಕೊರೊನಾ ಉಣೆಂ ಜಾವ್ನ್ ಯೆತಾ’ ಅಶೆಂ ಖಬರ್ ಯೇವ್ನ್ಂಚ್ ಆಸ್‌ಲ್ಲಿ. ಥೊಡ್ಯಾಚ್ ದಿಸಾಂನಿ ಓಫ್‌ಲೈನ್ ಕ್ಲಾಸ್ ಸುರು ಜಾತಾ ತೆಂ ನಖ್ಖಿ ಜಾಲ್ಲೆಂ. ಮತಿಕ್ ಏಕ್ ಥರಾಚೊ ಉಲ್ಲಾಸ್ ಆಸ್‌ಲ್ಲೊ. ಹಾಂವೆಂ ಮ್ಹಜ್ಯಾ ಕ್ಲಾಸ್‌ಮೆಟಾಂಕ್ ಫೋನ್ ಕೆಲ್ಲೆಂ. ತಾಂಕಾಂಯ್ ಭಾರಿಚ್ಚ್ ಸಂತೊಸ್ ಜಾಲ್ಲೊ. ಇತ್ಲೆಂಚ್ ನ್ಹಯ್ ಆಮ್ಗೆರ್ ಆಸ್ಚೊ ಕಸಾಯ್, ಲೇಪ್ ಆನಿ ಧುಂವ್ರಾಕ್ ರಜಾ ಮೆಳ್ತಲಿ ಮ್ಹಳ್ಳೆಂ ಏಕ್ ಆಶಾಕಿರಣ್ ಮ್ಹಜೆ ಥಂಯ್ ಆಸ್‌ಲ್ಲೆಂ. ದೋನ್ ದೀಸ್ ಪಾಶಾರ್ ಜಾಲೆ ಆನಿ ಕ್ಲಾಸಿಕ್ ಹಾಜಿರ್ ಜಾಂವ್ಕ್ ಮ್ಹಾಕಾ ಮೆಸೆಜ್ ಆಯಿಲ್ಲಿ ಆನಿ ಹಾಂವ್ ಪುರ್ತಿ ತಯಾರಾಯ್ ಕರುನ್ ಕ್ಲಾಸಿಕ್ ಹಾಜರ್ ಜಾಂವ್ಕ್ ಘರಾ ಥಾವ್ನ್ ಭಾಯ್ರ್ ಪಡ್ಲೊಂ.

ಹಾಂವ್ ಕ್ಲಾಸ್ ಜಾವ್ನ್ ಘರಾ ಯೆತಾನಾ ಕಿತೆಂಗಿ ಏಕ್ ಥರಾಚೊ ಘಾಟ್ ಯೆತಾಲೊ. ಹ್ಯಾ ಮಾಂಯ್ನ್ ಕಿತೆಂಗಿ ನವೊಚ್ಚ್ ಈಟ್ ತಯಾರ್ ಕರುನ್ ಫುಲಾಂ ಝಡಾಂಕ್ ಘಾಲಾ ಆಸ್ತಲೊ ಮ್ಹಣೊನ್ ಚಿಂತ್ಲೆಂ ಹಾಂವೆಂ ಆನಿ ಘರಾ ಭಿತರ್ ರಿಗ್ತಾನಾ ಹೊ ಘಾಟ್ ಭಾರಿಚ್ಚ್ ಚಡ್ ಆಸ್‌ಲ್ಲೊ. ಕಿತೆಂ ಗಜಾಲ್ ಮ್ಹಣೊನ್ ಸಮ್ಜೊಂಕ್ ಮ್ಹಾಕಾ ಇಲ್ಲೊಸೊ ವೇಳ್ ಗರ್ಜ್ ಪಡ್ಲೊ. ಸಮಾ ವಿಷಯ್ ಸಮ್ಜಾತಾನಾ ಆಮ್ಗೆರ್ ಕೊರೊನಾ ನಿರ್ಬಂಧ್ ಪೂರಾ ಮುಗ್ದೊಂಚಾರ್ ಆಸ್‌ಲ್ಲೆ.

ಜಾಲ್ಲೆಂ ಇತ್ಲೆಂಚ್ … ಹಾಂವೆಂ ಹಾಡ್‌ಲ್ಲೆಂ ಗೊಟ್ಯಾಂತ್ಲೆಂ ಶೆಣ್ ಮಾಂಯ್ನ್ ತಾಕಾ ಮೀಟ್ ಭರ‍್ಸುನ್, ತೀನ್ ದೀಸ್ ದವರ್‌ಲ್ಲೆಂ ಆನಿ ಹೆಂ ಮಿಶ್ರಣ್ ಆಂಗಾಕ್ ಲೇಪ್ ಘಾಲ್ನ್ ತೀನ್ ಘಂಟೆ ರಾವ್ಲ್ಯಾರ್ ಕೊರೊನಾ ತಶೆಂ ಹೆರ್ ಪಿಡೆಂಕ್ ಭಾರೀ ಬರೆಂ ಮ್ಹಣೊನ್ ನ್ಯಾಚುರೋಪತಿಂತ್ ಸಾಂಗ್ಲಾಂ ಮ್ಹಳ್ಳಿ ಹುನೊನಿ ಖಬಾರ್ ಫೆಲ್ಸಿಬಾಯೆಗೆರ್ ಗೆಲ್ಲ್ಯಾ ಮಾಂಯ್ಕ್ ಮೆಳ್‌ಲ್ಲಿ. ಹಾಚೊ ಪರಿಣಾಮ್ ಆಬುಕ್ ಮಾಂಯ್ನ್ ವಾಶ್ ರುಮಾಂತ್ ರಾವವ್ನ್ ಆಂಗ್‌ಭರ್ ಲೇಪ್ ಘಾಲ್ಲೊ. ಆನಿ ಆಬುನ್ ರಾಗಾನ್‌ಗಿ ಮೊಗಾನ್‌ಗಿ ಹಾಂವ್ ನೆಣಾಂ, ‘ತುಕಾಯ್ ಹೊ ಲೇಪ್ ಭಾರೀ ಬರೊ’ ಮ್ಹಣೊನ್ ಮಾಂಯ್ಚ್ಯಾ ಮಾತ್ಯಾ ಸಯ್ತ್ ಹೆಂ ಮಿಶ್ರಣ್ ವೊತ್‌ಲ್ಲೆಂ. ದೊಗಾಂಯ್ ಆತಾಂ ನಾವ್ನ್ ಬಸ್‌ಲ್ಲಿಂ ತರೀ ಘಾಟ್ ವಚೊಂಕ್ ಮಾತ್ರ್ ಸ್ಪೆಶಲ್ ಶಿಕಾಯೆಚೊ ಶ್ಯಾಂಪೂ ಜಾಯ್ ಪಡಾತ್ ಆಸ್ತಲೊ.

ಮ್ಹಾಕಾ ಮತಿಂತ್ ಹಾಸೊ ಯೆತಾಲ್ಯೊ ಜಾಲ್ಯಾರೀ ಆಬುಲಾಗಿಂ ವಿಚಾರ‍್ಲೆಂ “ಹೆಂ ಕಿತೆಂ ಆಬು ಅಶೆಂ?”

ಆಬುನೀ ಜಾಪ್ ದಿಲಿ “ಎದೊಳ್ ಶೆಳೆಂ ಶಿತ್ ಪೂತಾ ಆನಿ ಮುಕಾರ್ ಶೆಣಾಚೆಂ ಶಿತ್ ಆನಿ ಆಮ್ಕಾಂ ಪಳೆವ್ನ್ಂಚ್ ಕೊರೊನಾ ಧಾಂವಾನಾಯೆರೆ”

ಘರ‍್ಚಿಂ ಸಕ್ಡಾಂ ಹಾಸ್ಲ್ಯಾಂವ್ ಜಾಲ್ಯಾರೀ, ಮಾಂಯ್ ಮಾತ್ರ್ ‘ಅಶೆಂ ಜಾಯ್ತ್’ ಮ್ಹಣೊನ್ ಚಿಂತಿನಾತ್‌ಲ್ಲ್ಯಾನ್ ದಾಂತ್ ವೋಂಟ್ ಚಾಬ್ತಾಲಿ.

► ಚಾರ್ಲಿ ಕುಲ್ಶೇಕರ್