ಎಕಾ ಪಿಶ್ಯಾಚಿ ದಿಸ್ಪಡ್ತಿ

ಹಾಂವ್ ಹೈಸ್ಕೂಲಾಂತ್ ಶಿಕ್ತಾನಾ ಮ್ಹಾಕಾ ದೋಗ್ ಭಾವ್ ಬರೇ ಈಷ್ಟ್ ಜಾವ್ನಾಸ್‌ಲ್ಲೆ. ತಾಂಚಿಂ ನಾಂವಾಂ ಸಾಂಗ್ಚಿ ಗರ್ಜ್ ನಾ. ಸಭಾರ್ ವರ್ಸಾಂ ವಿಂಗಡ್ ಜಾಲ್ಲ್ಯಾನ್ ತಾಂಚೊ ಸಂಪರ್ಕ್ ನಾತ್‌ಲ್ಲೊ. ಕಿತ್ಲ್ಯಾಗೀ ತೆಂಪಾ ಉಪ್ರಾಂತ್ ತಾಂತ್ಲ್ಯಾ ಎಕ್ಲ್ಯಾಚಿ ಭಲಾಯ್ಕಿ ಬರಿ ನಾ ಮ್ಹಳ್ಳಿ ಖಬಾರ್ ಮೆಳ್ಳಿ. ಹಾಂವ್ ಮ್ಹಜ್ಯಾ ಗಾಂವಾಕ್ ಪಯ್ಣ್ ಕರ್ತಾಲೊಂ. ಮಧೆಂಚ್ ಪಯ್ಣ್ ರಾವವ್ನ್, ಮ್ಹಜ್ಯಾ ಈಷ್ಟಾಂಕ್ ಪಳೆಂವ್ಕ್ ಗೆಲೊಂ. ಥೈಂ ಏಕ್ಲ್ಯಾಕ್ ಮಾತ್ರ್ ಭೆಟ್ಲೊಂ. ಉಪ್ರಾಂತ್ ಕಳ್ಳೆಂ. ಹುಶಾರ್ ನಾತ್‌ಲ್ಲೊ ತಾಚೊ ಧಾಕ್ಟೊ ಭಾವ್ ಮ್ಹಣ್.

“ತಿತ್ಲ್ಯಾ ಪಯ್ಸ್ ಥಾವ್ನ್ ತೂಂ ಆಮ್ಕಾಂ ಪಳೆಂವ್ಕ್ ಆಯಿಲ್ಲ್ಯಾನ್ ಮ್ಹಾಕಾ ಮೊಸ್ತು ಸಂತೊಸ್ ಜಾತಾ. ಥೊಡ್ಯಾ ದಿಸಾ ಅದಿಂ ತಾಚಿ ಭಲಾಯ್ಕಿ ಬರಿ ನಾತ್‌ಲ್ಲಿ. ಆತಾಂ ಸುದ್ರಾಲ್ಯಾ. ವರ್ಗ್ ಜಾವ್ನ್ ದುಸ್ರ್ಯಾ ಜಾಗ್ಯಾಕ್ ಗೆಲಾ. ” ಮ್ಹಣ್ ಹಾಸೊನ್ ವ್ಹಡ್ಲ್ಯಾನ್ ಮ್ಹಜ್ಯಾ ಹಾತಿಂ ಧಾಕ್ಟ್ಯಾನ್ ಬರಯಿಲ್ಲೆ ದೋನ್ ಡಾಯ್ರಿಚೆ ಬೂಕ್ ದಿಲೆ. ಹೆ ವಾಚ್ಲ್ಯಾರ್ ತಾಚ್ಯಾ ಪಿಡೆಚೆಂ ಸ್ವರೂಪ್ ಕಳ್ತೆಲೆಂ. ಪರ್ನ್ಯಾ ಈಷ್ಟಾಕ್ ಹೆ ದಾಖಂವ್ಚಾಂತ್ ತಸಲೆ ತೊಂದ್ರೆ ಕಾಂಯ್ ಜಾಂವ್ಚೆ ನಾಂತ್ ಮ್ಹಣ್‌ಯ್ ತಾಣೆಂ ಮ್ಹಳೆಂ. ಹಾಂವೆಂ ತೆ ಕಾಣ್ಘೆಲೆ ಆನಿ ವಾಚ್ಲೆ. ತೊ ಏಕಾ ಥರಾನ್ ದಗ್ದೊಣಿಚಾ ಗೊಂದೊಳಾಂತ್ (persecution complex) ಆಸ್ಚಾ ಪಿಡೆನ್ ವಳ್ವಳ್ತಾಲೊ ಮ್ಹಣ್ ಹಾಂವ್ ಸಮ್ಜಾಲೊಂ. ಬರಪ್ ಅಸಂಬದ್ದ್ ಜಾವ್ನಾಸ್‌ಲ್ಲೆಂ. ಪಿಶ್ಯಾ ಬರಿ ಬರಯಿಲ್ಲ್ಯೊ ಸಾಂಗ್ಣ್ಯೊ ಆಸ್‌ಲ್ಲ್ಯೊ. ಮಾತ್ರ್ ನ್ಹಯ್, ಘಡಿತಾಂ ಪಾಟ್ಲ್ಯಾನ್ ತಾರೀಖ್ ನಾತ್‌ಲ್ಲಿ. ವೆವೆಗ್ಳಿ ಶಾಯಿ ವಾಪಾರ್ಲೆಲ್ಯಾನ್ ಏಕಾಚ್ ಆವ್ದೆಂತ್ ಬರಂವ್ಕ್ ನಾ ಮ್ಹಳ್ಳೆಂ ಕಳ್ತಾಲೆಂ. ಬರವ್ಣೆಚ್ಯಾ ಥೊಡ್ಯಾ ಭಾಗಾಂ ಮಧೆಂ ಇಲ್ಲೊಸೊ ತರೀ ಸಂಬಂಧ್ ಆಸ್‌ಲ್ಲೊ. ವೈದ್ಯಕೀಯ್ ಸಂಶೊಧನ್ ಕರುಂಕ್ ಅನ್ಕೂಲ್ ಜಾತಾ ಮ್ಹಣ್ ಏಕ್ ಭಾಗ್ ಹಾಂವೆಂ ನಕಲ್ ಕರುನ್ ಘೆತ್ಲೊ. ಹಾಂವೆಂ ತಾಣೆಂ ಬರಯಿಲ್ಲೆಂ ಕಸಲೆಂಚ್ ಅಸಂಬದ್ದ್ ಬದ್ಲುಂಕ್ ನಾ. ನಾಂವಾಂ ಮಾತ್ರ್ ಬದ್ಲಿಲಿಂ. ಹಳ್ಳೆಚಾ ಲೋಕಾಂಚಿಂ ನಾಂವಾ ಜಾವ್ನಾಸ್ಲೆಲ್ಯಾನ್ ತಾಂಕಾಂ ಸಂಸಾರಾಂತ್ ಕೊಣೀ ಒಳ್ಕಾನಾತ್ಲೆಲ್ಯಾ ಕಾರಣಾನ್ ತಸಲೆ ತೊಂದ್ರೆ ಕಿತೇಂಯ್ ಜಾಂವ್ಚೆ ನಾಂತ್. ದಿಸ್ಪಡ್ತಿ ಬರಯಿಲ್ಲ್ಯಾ ತಾಣೆಂ ಆಪ್ಣಾಚಿ ಪಿಡಾ ಬರಿ ಜಾಲ್ಯಾ ಉಪ್ರಾಂತ್ ಶಿರ್ಷಿಕ್ ದಿಲ್ಲೆಂ. ದೆಕುನ್ ಹಾಂವ್ ತೆಂ ಬದ್ಲುಂಕ್ ಗೆಲೊಂ ನಾ.

-1-

ಆಯ್ಚ್ಯಾ ರಾತಿಂ ಚಂದ್ರ್ ಬರೊಚ್ ಪರ್ಜಳ್ತಾಲೊ. ತೀಸ್ ವರ್ಸಾಂ ಥಾವ್ನ್ ತಾಕಾ ಪಳೆಂವ್ಕ್ ನಾ. ತಾಕಾ ಪಳೆತಾನಾ ಮ್ಹಜೆ ಥೈಂ ಕಸಲೊಗೀ ಉತ್ಸಾಹ್ ಭಗ್ಲೊ. ತೀಸ್ ವರ್ಸಾಂ ಕಿತೆಂಚ್ ಕಳಿತ್ ನಾಸ್ತಾನಾ ಕಾಳೊಕಾಂತ್ ಆಸ್‌‌ಲ್ಲೊಂ. ಪೂಣ್ ಆತಾಂ ಜಾಗ್ರೂತ್ಕಾಯೆನ್ ಆಸುಂಕ್ ಜಾಯ್ ಮ್ಹಣ್ ಚಿಂತ್ಲೆಂ. ನಾ ತರ್ ಕಿತ್ಯಾಕ್ ಚಾವೋಚಾ ಪೆಟ್ಯಾನ್ ಮ್ಹಾಕಾ ದೋನ್ ಪಾವ್ಟಿಂ ದೊಳೆ ವಾಟಾರ್ನ್ ಪಳೆಲೆಂ?

ಮ್ಹಜ್ಯಾ ಭಿಯಾಕ್ ಕಾರಣ್ ಆಸಾ.

-2-

ಆಯ್ಚಾ ರಾತಿಂ ಚಾಂದ್ನೆ ನಾತ್‌ಲ್ಲೆಂ. ಹೆಂ ಪಾಡ್ ಸಂಕೇತ್ ಮ್ಹಣ್ ಭಗ್ಲೆಂ. ಸಕಾಳಿಂ ಜಾಗ್ರೂತ್ಕಾಯೆನ್ ಭಾಯ್ರ್ ಗೆಲ್ಲ್ಯಾ ವೆಳಿಂ ಮ್ಹಾಕಾ ಚಾವೋಚಾ ದೊಳ್ಯಾಂತ್ಲಿ ದೀಷ್ಟ್ ವಿಚಿತ್ರ್ ತಸೆಂ ದಿಸ್ಲಿ. ಮ್ಹಜ್ಯಾ ಭಿಯಾನ್‌ಗೀ ಮ್ಹಳ್ಳ್ಯಾ ಬರಿ, ಮ್ಹಾಕಾ ಖುನಿ ಕರುಂಕ್ ಆಶೆಂವ್ಚಾ ಬರಿ ತಾಚಿ ದೀಷ್ಟ್ ಆಸ್‌ಲ್ಲಿ. ಅನಿಕೀ ಸಾತಾಟ್ ಜಣ್ ಥೈಂಸರ್ ಆಸ್‌ಲ್ಲೆ. ಮ್ಹಜ್ಯಾ ವಿಶಿಂ ಪುಸ್ಪುಸೊನ್ ಚರ್ಚಾ ಕರ್ತಾಲೆ. ಮ್ಹಾಕಾ ಪಳೆಂವ್ಕ್ ತೆ ಭಿಯೆತಾತ್ ತಸೆಂ ಭಗ್ಲೆಂ. ಮ್ಹಾಕಾ ಪಳೆಯಿಲ್ಲೊ ಹರ್ಯೆಕ್ ಲೋಕ್ ಮ್ಹಜ್ಯಾ ವಿಶಿಂ ಹ್ಯಾಚ್ ಥರಾನ್ ಚಲ್ತಾಲೊ. ತಾಂಚ್ಯಾ ಪೈಕಿ ಭಿರಾಂಕೂಳ್ ದಿಸ್ಚೊ ಏಕ್ಲೊ ಮನಿಸ್ ಮ್ಹಾಕಾ ಪಳೆವ್ನ್ ನಂಜಿ ಹಾಸೊ ಹಾಸ್ಲೊ. ತಾಂಚಿ ತಯಾರಾಯ್ ಪೂರಾ ಜಾಲ್ಯಾ ಮ್ಹಣ್ ಚಿಂತೂನ್ ಹಾಂವ್ ತಕ್ಲೆ ಥಾವ್ನ್ ಪಾಂಯಾಂ ಮ್ಹಣಾಸರ್ ಕಾಂಪ್ಲೊಂ.

ತರೀ ಭಿಯೆನಾಸ್ತಾನಾ ಮುಖಾರ್ ಚಲ್ಲೊಂ. ಭುರ್ಗ್ಯಾಂಚೊ ಏಕ್ ಜಮೊ ಸಯ್ತ್ ಮ್ಹಜ್ಯಾ ವಿಶಿಂ ಚರ್ಚಾ ಕರ್ತಾಲೊ. ತಾಂಚಾ ದೊಳ್ಯಾಂತ್ಲಿ ದೀಷ್ಟ್ ಚಾವೋಚಾ ದಿಷ್ಟಿ ಬರಿಚ್ ಆಸ್‌ಲ್ಲಿ ಆನಿ ತಾಂಚಿಂ ತೋಂಡಾಂ ಭಿಯಾನ್ ಧವ್ಸೆಲ್ಲಿಂ. ಹ್ಯಾ ಭುರ್ಗ್ಯಾಂಕ್ ಮ್ಹಜೆರ್ ಕಸಲೆಂ ಹಗೆಂ ಆಸೊಂಕ್ ಪುರೊ ಮ್ಹಣ್ ಹಾಂವ್ ಚಿಂತೂಂಕ್ ಲಾಗ್ಲೊಂ. ತಡ್ವುಂಕ್ ಜಾಯ್ನಾಸ್ತಾಂ ” ಸಾಂಗಾ ಮ್ಹಾಕಾ!” ಮ್ಹಣ್ ಬೊಬಾಟ್ಲೊಂ. ಪೂಣ್ ಭುರ್ಗಿಂ ಸಕ್ಕಡ್ ಧಾಂವ್ಲಿಂ.

ಚಾವೋಕ್ ಜಾಂವ್ ಯಾ ವಾಟೆ ವಯ್ಲ್ಯಾ ಲೋಕಾಕ್ ಜಾಂವ್ ಮ್ಹಜೆರ್ ಕಸಲೆಂ ಹಗೆಂ ಆಸಾ ಮ್ಹಣ್ ಹಾಂವ್ ಚಿಂತುಂಕ್ ಲಾಗ್ಲೊಂ. ವೀಸ್ ವರ್ಸಾದಿಂ ಮಿಷ್ಟರ್ ಕುಚಿಯಾಚಾ ಲೆಕ್ಕಾಚಾರ್ ಬೂಕಾಂಚೆರ್ ಪಾಯ್ ದವರ್‌ಲ್ಲೊ  ಸೊಡ್ನ್ ದುಸ್ರೆಂ ಕಸಲೆಂಚ್ ಕಾರಣ್ ಮ್ಹಾಕಾ ದಿಸ್ಲೆಂ ನಾ. ಹ್ಯಾ ವರ್ವಿಂ ಕುಚಿಯಾಕ್ ಮೊಸ್ತು ಬೆಜಾರ್ ಜಾಲ್ಲೆಂ. ಪೂಣ್ ಚಾವೋ ಕುಚಿಯಾಕ್ ಒಳ್ಕಾನಾತ್‌ಲ್ಲೊ. ತರೀ, ಬಹುಶ್ಯಾ ಕೊಣೆಂಗೀ ಸಾಂಗ್ ಲ್ಲೆಂ ಆಯ್ಕೊನ್ ಮ್ಹಜೆರ್ ಹಗೆಂ ತಿರ್ಸುಂಕ್ ಚಿಂತ್ಲಾಸ್ತೆಲೆಂ. ದೆಕುನ್ ವಾಟೆ ವಯ್ಲ್ಯಾ ಲೋಕಾ ಸಾಂಗಾತಾ ತೊ ಮ್ಹಜ್ಯಾ ವಿರೋಧ್ ಶಿಂತ್ರ್ಯೊ ಕರುನ್ ಆಸಾ. ಪೂಣ್ ಭುರ್ಗಿಂ? ತೆಂ ಘಡಿತ್ ಜಾಲ್ಲ್ಯಾ ವೆಳಾ ಹಿಂ ಜಲ್ಮೊಂಕ್ ಸಯ್ತ್ ನಾಂತ್. ತರ್, ಮ್ಹಜ್ಯಾ ಭಿಯಾನ್ ಆನಿ ಮ್ಹಾಕಾ ಖುನಿ ಕರ್ಚ್ಯಾ ಬರಿ ಕಿತ್ಯಾಕ್ ಆಜ್ ತಸೆಂ ವಿಚಿತ್ರ್ ನದ್ರೆನ್ ಪಳೆಲೆಂ? ಹೆಂ ಮ್ಹಾಕಾ ನಿಜಾಯ್ಕೀ ಭಿಯೆಂವ್ಕ್ ಲಾಯ್ತಾ. ಗಾಭ್ರೆವ್ನ್ ಬೆಜಾರಾಯ್ ಹಾಡ್ತಾ.

ಹಾಂವ್ ಜಾಣಾಂ. ತಾಂಕಾಂ ತಾಂಚ್ಯಾ ಆವಯ್ ಬಾಪಯ್ ಥಾವ್ನ್ ಕಳ್ಳಾಂಸ್ತೆಲೆಂ!

-3-

ಮ್ಹಾಕಾ ರಾತಿಂಚೆಂ ನಿದೊಂಕ್ ಜಾಯ್ನಾ. ಹರ್ಯೆಕಾ ಸಂಗ್ತಿಂಕ್ ಜಾಗ್ರೂತ್ಕಾಯೆನ್ ಪಳೆವ್ನ್ ಆರ್ಥ್ ಕರಿಜಾಯ್ ಪಡ್ತಾ. ತೊ ಲೋಕ್, ತಾಂತ್ಲ್ಯಾ ಥೊಡ್ಯಾಂಕ್ ನ್ಯಾಯಾಧೀಶಾನ್ ಮೊರ್ನಾಚಿ ಶಿಕ್ಷಾ ದಿಲ್ಲ್ಯಾ ವೆಳಾರ್, ಅಧಿಕಾರಿಂನಿ ತಾಂಚಾ ಬಾಯ್ಲಾಂಕ್ ವೋಡ್ನ್ ವರ್ತಾನಾ, ಯಾ ರೀಣ್ ದಿಲ್ಲೆಲ್ಲ್ಯಾಂನಿ ತಾಂಚ್ಯಾ ಆವಯ್ ಬಾಪಂಯ್ಕ್ ಜಿವ್ಗಾತ್ ಕರ್ಚ್ಯಾ ಮಟ್ಟಾಕ್ ದಗ್ದಿಲ್ಲ್ಯಾ ವೆಳಾರ್ ನಾತ್ಲೆಲೆಂ ಭ್ಯೆಂ ತಾಂಚೆಂ ಕಾಲ್ ಪಳೆಲೆಂ.

ಸಕ್ಡಾಂಚ್ಯಾಕೀ ಚಡ್ ವಿಶೇಷ್ ಮ್ಹಳ್ಯಾರ್, ವಾಟೆ ವಯ್ಲ್ಯಾ ಸ್ತ್ರೀಯೆನ್ ಆಪ್ಲ್ಯಾ ಪೂತಾಕ್ ದೋನ್ ಥಾಪ್ಡಾವ್ನ್, ” ಸೈತಾನಾ, ತುಕಾ ಪಾಪ್ಸುನ್ ಖಾತಾ ಮ್ಹಣಾಸರ್ ಮ್ಹಾಕಾ ಸಮಾಧಾನ್ ಜಾಂವ್ಚೆಂ ನಾ” ಮ್ಹಣ್ ಸಾಂಗೊನ್ ಮ್ಹಾಕಾಚ್ ಸಭಾರ್ ಪಾವ್ಟಿಂ ಪಳೆಯಿಲ್ಲೆಂ. ಹಾಂವ್ ಮ್ಹಾಕಾಚ್ ಸಾಂಬಾಳುಂಕ್ ಸಕ್ಲೊಂ ನಾ. ತಿತ್ಲ್ಯಾರ್ ಪಾಚ್ವ್ಯಾ ತೊಂಡಾಚೆ, ಲಾಂಬ್ ದಾಂತಾಚೆ ತೆ ಸಕ್ಕಡ್ ಏಕಾ ವ್ಯಂಗ್ ರಿತಿನ್ ಹಾಸೊಂಕ್ ಲಾಗ್ಲೆ. ಮುಖಾರ್ ಯೇವ್ನ್ ಮ್ಹಾತಾರೊ ಚೆನ್ ಮ್ಹಾಕಾ ವೆವೆಗ್ಗಿಂ ವೋಡ್ನ್ಂಚ್ ಗೆಲೊ.

ಘರಾ ಆಸ್ಲೆಲ್ಯಾನಿ ಮ್ಹಜಿ ವಳಕ್‌ಚ್ ನಾ ಮ್ಹಳ್ಳೆ ಬರಿ ಕೆಲೆಂ. ತಾಂಚಾ ದೊಳ್ಯಾಂತೀ ತಿಚ್ಚ್ ದೀಷ್ಟ್ ಆಸ್‌ಲ್ಲಿ. ಮ್ಹಜ್ಯಾ ಕೂಡಾಕ್ ಗೆಲೊಂ. ತಕ್ಷಣ್ ತಾಣಿಂ ಕುಂಕ್ಡಾಂಕ್ ಧಾಂಪುನ್ ಘಾಲ್ಚೆ ಬರಿ ಭಾಯ್ಲ್ಯಾನ್ ಥಾಲೆಂ ಮಾರ್ಲೆಂ. ಹ್ಯಾ ವರ್ವಿಂ ಹಾಂವ್ ಅನಿಕೀ ಗೊಂದೊಳಾಂತ್ ಪಡ್ಲೊಂ.

ಥೊಡ್ಯಾ ದಿಸಾಂ ಆದಿಂ ಲಾಗ್ಸಿಲ್ಯಾ ವುಲ್ಫ್ ಕ್ಲಬ್ ಹಳ್ಳೆ ಥಾವ್ನ್ ಆಮ್ಚೊ ಏಕ್ಲೊ ಭಾಡ್ಯಾಗಾರ್ ಹ್ಯಾ ವರ್ಸಾ ಬೆಳೆಂ ಮೊಸ್ತು ಪಾಡ್ ಜಾಲಾಂ ಮ್ಹಣ್ ಸಾಂಗೊಂಕ್ ಆಯ್ಲೊ. ಆಪ್ಲ್ಯಾ ಹಳ್ಳೆಕ್ ಆಯ್ಲೆಲ್ಯಾ ಏಕಾ ಕುಖ್ಯಾತ್ ವ್ಯಕ್ತಿಕ್ ಮೊರ್ತಾ ಮ್ಹಣಾಸರ್ ಮಾರ್ಲೆಂ ಆನಿ ಮಾರ್ಲೆಲ್ಯಾ ಪಯ್ಕಿಂತ್ಲ್ಯಾ ಥೊಡ್ಯಾಂನಿ ತಾಚೆಂ ಊಂದ್,  ಕಾಳಿಜ್ ಕಾಡ್ನ್ ತೆಲಾಂತ್ ಭಾಜುನ್, ಆಪ್ಲೆಂ ಧೈರ್ ಚಡ್ಚಾ ಖಾತಿರ್ ಖೆಲೆಂ ಮ್ಹಣ್‌ಯ್ ವಿವರ್ಸಿಲಾಗ್ಲೊ. ಮಧೆಂ ಹಾಂವೆ ಉಲಂವ್ಕ್ ಪಳೆತಾನಾ ತಾಣೆಂ ಆನಿ ಮ್ಹಜ್ಯಾ ದಾಟ್ಟುನ್ ದೊಳೆ ವಾಟಾರುನ್ ಪಳೆಲ್ಲೆಂ. ಆಜ್ ಮ್ಹಾಕಾ ಕಳ್ಳೆಂ. ವಾಟೆ ವಯ್ಲ್ಯಾ ಲೋಕಾ ಥೈಂ ಪಳೆಲ್ಲಿ ದೀಷ್ಟ್ ಚ್ ಹಾಂಚೀಯ್ ಜಾವ್ನಾಸ್‌ಲ್ಲಿ.

ಹೆಂ ಚಿಂತ್ಲ್ಯಾರ್ ಪುರೊ, ಸಕ್ಲಾ ಥಾವ್ನ್ ವಯ್ರ್ ಮ್ಹಣಾಸರ್ ಹಾಂವ್ ಕಾಂಪ್ತಾಂ.

ತೆ ಮನ್ಶ್ಯಾಂಕ್ ಖಾತಾತ್, ತರ್ ಮ್ಹಾಕಾಯ್ ಖಾತಿತ್.

“ತುಕಾ ಪಾಪ್ಸುನ್ ಖಾತಾಂ” ಮ್ಹಳ್ಳ್ಯಾ ತ್ಯಾ ಸ್ತ್ರೀಯೆಚಿಂ ಉತ್ರಾಂ, ಪಾಚ್ವ್ಯಾ ತೊಂಡಾಚಾ ಲಾಂಬ್ ದಾಂತಾಂಚಾ ತ್ಯಾ ಲೋಕಾಂಚೊ ಹಾಸೊ, ತ್ಯಾ ಭಾಡ್ಯಾಗಾರಾಚಿಂ ತ್ಯಾ ದಿಸಾಂಚಿಂ ಕಾಣಿ, ಸಕ್ಕಡ್ ಮಿಸ್ತೆರಾಂಚೊ ಸಂಕೇತ್. ತಾಂಚಾ ಉಲವ್ಣ್ಯಾಂತ್ ಆಸ್ಚೆಂ ವೀಕ್, ತಾಂಚಾ ಹಾಸ್ಯಾಂತ್ ಆಸ್ಲೆಲಿ ಸುರಿಯೆಚಿ ಧಾರ್ ಸಕ್ಕಡ್ ಮ್ಹಾಕಾ ಆರ್ಥ್ ಜಾತಾ. ತಾಂಚೆಂ ದಾಂತ್ ಧವೆಚ್ ಪರ್ಜಳ್ತಾತ್: ತೆ ಮನ್ಶ್ಯಾಂಚೆಂ ಮಾಸ್ ಖಾಂವ್ಚೆ.

ಮ್ಹಾಕಾ ಗೊತ್ತಾಸ್ಚೆ ಬರಿ, ಹಾಂವ್ ಪಾಡ್ ತಸಲೊ ನ್ಹಯ್. ಮಿಷ್ಟರ್ ಕುಚೀಯಾಚಾ ಲೆಕಾಂಚಾ ಬೂಕಾಚೆರ್ ಪಾಯ್ ದವರ್‌ಲ್ಲೊ, ಮ್ಹಳ್ಯಾರ್ ಭೆಷ್ಟೆಂಚ್ ಉತ್ರೊನ್ ಗೆಲ್ಲೊಂ ಮಾತ್ರ್.  ತ್ಯಾ ದಿಸಾಂ ಥಾವ್ನ್ ಮ್ಹಾಕಾ ಪಾಡ್ ಮ್ಹಣ್ ಲೆಖ್ಲೆಂ. ತಾಂಚಾಂ ಥೈಂ ಕಸಲೆಂ ಪೂರಾ ಮಿಸ್ತೆರ್ ಆಸಾತ್, ಮ್ಹಜ್ಯಾನ್ ಚಿಂತುಂಕ್ ಸಾಧ್ಯ್ ನಾ. ತಾಂಕಾಂ ರಾಗ್ ಆಯ್ಲ್ಯಾರ್ ಪುರೊ, ಕೊಣಾಯ್ಕೀ ಪಾಡ್ ಮ್ಹಣ್ತಾತ್. ಮ್ಹಜೊ ದಾಟ್ಟು ಮ್ಹಾಕಾ ಪ್ರಬಂದ್ ಕಸೊ ಬರಂವ್ಚೊ ಮ್ಹಣ್ ಶಿಕಾಯ್ತಾಲೊ. ಮ್ಹಾಕಾ ಆತಾಂ ಉಗ್ಡಾಸಾಕ್ ಯೆತಾ. ಏಕ್ ವ್ಯಕ್ತಿ ಕಿತ್ಲೀಯ್ ಬರಿ ಆಸ್ಲ್ಯಾರೀ, ಹಾಂವೆ ತ್ಯಾ ವ್ಯಕ್ತಿ ವಿರೋಧ್ ಬರಯ್ಲ್ಯಾರ್ ದಾಟ್ಟು ತೆಂ ಒಪ್ವಾತಾಲೊ. ಪಾಡ್ ಕೆಲ್ಲ್ಯಾಂಕ್ ಹಾಂವ್ ಭಗ್ಸಿತಾಂ ಮ್ಹಣ್ ಸಾಂಗ್ಲೆಲ್ಯಾ ವೆಳಾ, ” ಹೆಂ ತುಜ್ಯಾ ವಿಶಿಂ ಬರೆಂಚ್. ತುಜೆಂ ಆಪ್ಲೆಂ ಪಣ್ ದಾಖಯ್ತಾ.” ಮ್ಹಣ್ತಾಲೊ.

ಮನ್ಶ್ಯಾಂಕ್ ಚ್ ಖಾಂವ್ಕ್ ತಯಾರ್ ರಾವ್ಲೆಲ್ಯಾ ತಾಂಚಾ ಮಿಸ್ತೆರಾಭರಿತ್ ಆಲೊಚಾನಾಂಕ್ ಹಾಂವ್ ಕಸೆಂ ಪಾರ್ಕುಂ?

ಸಕ್ಕಡ್ ಆರ್ಥ್ ಕರಿಜಾಯ್ ತರ್ ಮೊಸ್ತು ಸೂಕ್ಷ್ಮ್ ಥರಾನ್ ಪಳೆಂವ್ಕ್ ಜಾಯ್. ಮ್ಹಜ್ಯಾ ಉಗ್ಡಾಸಾ ಪ್ರಕಾರ್ ಆದ್ಲ್ಯಾ ಕಾಳಾರ್ ಮನಿಸ್ ಮನ್ಶ್ಯಾಕ್ ಖಾತಾಲೆ ಖೈಂ.ಪೂಣ್ ಹೆಂ ಮ್ಹಾಕಾ ಅಸ್ಪಷ್ಟ್ ದಿಸ್ಲೆಂ. ಹೆಂ ಸಮ್ಜೊಂಕ್ ಹಾಂವೆ ಪ್ರಯತನ್ ಕಲೆಂ. ಬೂಕಾಚಾ ಪಾನಾ ಪಾನಾಂನಿ “ಶೆಗುಣ್ ಆನಿ ನೈತಿಕಾಯ್” ಮ್ಹಣ್ ಗಿಚ್ಚುನ್ ಗಿಚ್ಚುನ್ ಬರಯಿಲ್ಲೆಂ. ನೀದ್ ಅಯ್ಲಿ ನಾ ಮ್ಹಣ್ ಮಧ್ಯಾನೆ ರಾತಿಂ ಮ್ಹಣಾಸರ್ ವಾಚ್ಚ್ಯಾಂತ್  ಮಗ್ನ್ ಜಾಲ್ಲೊಂ. ಸಗ್ಳೊ ಬೂಕ್ ಚ್  ‘ಮನ್ಶ್ಯಾಕ್ ಖಾ’ ಮ್ಹಳ್ಳ್ಯಾ ದೊನ್ಂಚ್ ಸಬ್ದಾನಿ ಭರ್‌ಲ್ಲೊ.

ಬೂಕಾಂತ್ ಬರಯಿಲ್ಲೆ ಹೆ ಸಬ್ದ್ ಆಮ್ಚ್ಯಾ ಭಾಡ್ಯಾಗಾರಾನ್ ಸಾಂಗ್ಲೆಲೆ ಸಬ್ದ್ ಸಕ್ಕಡ್ ವಿಚಿತ್ರ್ ಜಾವ್ನ್, ಘುಟಾನ್ ಮ್ಹಾಕಾ ಹಾಸುನ್ ಪಳೆತಾತ್.

ಹಾಂವ್ಂಯ್ ಮನಿಸ್‌ಚ್ ಆನಿ ತೆ ಮ್ಹಾಕಾ ಖಾಂವ್ಕ್ ಆಶೆತಾತ್.

-4-

ಸಾಕಾಳಿಂ ಥೊಡೊ ವೇಳ್ ಭೆಷ್ಟೆಂಚ್ ಬಸ್‌ಲ್ಲೊಂ. ಮ್ಹಾತಾರೊ ಚೆನ್ ಜೆವಾಣ್ ಹಾಡ್ನ್ ಅಯ್ಲೊ. ಉಕಡ್ಲೆಲಿ ಏಕ್ ಬೊಶಿ ರಾಂದ್ವಯ್ ಆನಿ ಏಕ್ ಬೊಶಿ ಮಾಸ್ಳಿ. ಮಾಸ್ಳೆಚೆ ದೊಳೆ ಧವೆಚ್, ಗಟ್ಟ್ ಆಸ್‌ಲ್ಲೆ. ತಾಚೆ ತೋಂಡ್, ಮನ್ಶ್ಯಾಚೆಂ ಮಾಸ್ ಖಾಂವ್ಕ್ ಮ್ಹಣ್ ಉಗ್ತೆಂ ಕೆಲ್ಲ್ಯಾ ಮನ್ಶ್ಯಾಂಚಾ ತೊಂಡಾ ಭರಿಚ್ ಆಸ್‌ಲ್ಲೆಂ. ದೋನ್ ಘಾಸ್ ಕೆಲ್ಯಾ ಮಾಗಿರ್ ತೆಂ ಮಾಸ್ಳೆಚೆಂ ಮಾಸ್‌ಗೀ, ಮನ್ಶ್ಯಾಚೆಂ ಮಾಸ್‌ಗೀ ಮ್ಹಣ್ ಕಳ್ಳೆಂ ನಾ. ದೆಕುನ್ ಸಕ್ಕಡ್ ವೊಂಕ್ಲೊಂ.

“ಚೆನ್, ಮ್ಹಜ್ಯಾ ದಾಟ್ಟುಕ್ ಸಾಂಗ್. ಮ್ಹಾಕಾ ಹಾಂಗಾ ಉಸ್ವಾಸ್ ಭಾಂದ್ಲೆಲ್ಯಾ ಬರಿ ಜಾತಾ. ಭಾಯ್ರ್ ಇಲ್ಲೆಂ ವೊಡ್ತಾಂತ್ ಭಂವೊನ್ ಯೆತಾಂ” ತೊ ಜಾಪ್ ದಿನಾಸ್ತಾನಾ ಭಾಯ್ರ್ ಗೆಲೊ.  ಉಪ್ರಾಂತ್ ಯೇವ್ನ್ ತಾಣೆಂ ಗೇಟ್ ಉಗ್ತಿ ಕೆಲಿ.

ಹಾಂವ್ ಹಾಲ್ಲೊಂ ನಾ. ಮ್ಹಜ್ಯಾ ವಿಶ್ಯಾಂತ್ ತಾಂಚೆಂ ವರ್ತನ್ ಕಸಲೆಂ ಮ್ಹಣ್ ಪಳೆವ್ಯಾಂ ಮ್ಹಣ್ ರಾಕ್ಲೊಂ. ಮ್ಹಾಕಾ ಗೊತ್ತಾಸಾ. ತೆ ಮ್ಹಾಕಾ ವಚೊಂಕ್ ಸೊಡಿನಾಂತ್. ಮ್ಹಜೊ ದಾಟ್ಟು ಏಕಾ ಮ್ಹಾತಾರ‍್ಯಾಕ್ ಸಾಂಗಾತಾ ಆಪವ್ನ್ ಹಾಡ್ನ್ ಆಯ್ಲೊ. ಮ್ಹಾತಾರ‍್ಯಾಚಾ ದೊಳ್ಯಾಂನಿ ಖುನಿಗಾರಾಚಿ ಝಳಕ್ ಅಸ್‌ಲ್ಲಿ. ಹಾಂವ್ ಪಾರ್ಕಿತಾಂ ಮ್ಹಣ್ ತಾಣೆಂ ತಕ್ಲಿ ಬಾಗ್ವಾಯ್ಲಿ. ಪೂಣ್ ವೊಕ್ಲಾ ಇಡ್ಯಾಂತ್ಲ್ಯಾನ್ ಮ್ಹಾಕಾಚ್ ಚೊರಾ ಭಾಷೆನ್ ಪಳೆಲಾಗ್ಲೊ.

“ಆಜ್ ಆರಾಮಾಯೆನ್ ಆಸ್ಚಾ ಬರಿ ದಿಸ್ತಾ” ದಾಟ್ಟು ಮ್ಹಣಾಲೊ.

“ವ್ಹಯ್”

“ತುಜಿ ಪರೀಕ್ಷಾ ಕರುಂಕ್ ಹಾಂವೆ ಹೋಕ್ ಆಜ್ ಅಪವ್ನ್ ಹಾಡ್ಲಾಂ” ತೊ ಮ್ಹಣಾಲೊ.

ಹಾಂವ್ ಹಾಲ್ಲೊಂ ನಾ. ಮ್ಹಜ್ಯಾ ವಿಶ್ಯಾಂತ್ ತಾಂಚೆಂ ವರ್ತನ್ ಕಸಲೆಂ ಮ್ಹಣ್ ಪಳೆವ್ಯಾಂ ಮ್ಹಣ್ ರಾಕ್ಲೊಂ. ಮ್ಹಾಕಾ ಗೊತ್ತಾಸಾ. ತೆ ಮ್ಹಾಕಾ ವಚೊಂಕ್ ಸೊಡಿನಾಂತ್. ಮ್ಹಜೊ ದಾಟ್ಟು ಏಕಾ ಮ್ಹಾತಾರ‍್ಯಾಕ್ ಸಾಂಗಾತಾ ಆಪವ್ನ್ ಹಾಡ್ನ್ ಆಯ್ಲೊ. ಮ್ಹಾತಾರ‍್ಯಾಚಾ ದೊಳ್ಯಾಂನಿ ಖುನಿಗಾರಾಚಿ ಝಳಕ್ ಆಸ್‌ಲ್ಲಿ. ಹಾಂವ್ ಪಾರ್ಕಿತಾಂ ಮ್ಹಣ್ ತಾಣೆಂ ತಕ್ಲಿ ಬಾಗಾಯ್ಲಿ. ಪೂಣ್ ವೊಕ್ಲಾ ಇಡ್ಯಾಂತ್ಲ್ಯಾನ್ ಮ್ಹಾಕಾಚ್ ಚೊರಾ ಭಾಷೆನ್ ಪಳೆಲಾಗ್ಲೊ.

“ಆಜ್ ಆರಾಮಾಯೆನ್ ಆಸ್ಚಾ ಬರಿ ದಿಸ್ತಾ” ದಾಟ್ಟು ಮ್ಹಣಾಲೊ.

“ವ್ಹಯ್”

“ತುಜಿ ಪರೀಕ್ಷಾ ಕರುಂಕ್ ಹಾಂವೆ ಹೋಕ್ ಆಜ್ ಅಪವ್ನ್ ಹಾಡ್ಲಾಂ” ತೊ ಮ್ಹಣಾಲೊ.

“ಜಾಂವ್ದಿ” ಹಾಂವೆ ಮ್ಹಳೆಂ. ಹಾಂವ್ ಬರೆಂಚ್ ಕರುನ್ ಜಾಣಾಂ. ಹೊ ವೇಷ್ ಬದ್ಲುನ್ ಆಯಿಲ್ಲೊ ಖುನಿಗಾರ್! ಮ್ಹಜಿ ಚರ್ಬಿ ಕಿತ್ಲಿ ಆಸಾ ಮ್ಹಣ್ ಸಮ್ಜೊಂಕ್ ಮ್ಹಜ್ಯಾ ಹಾತಾಂಚಿ ನಾಡ್ ಪಳೆಂವ್ಚಾ ಬರಿ ಭೆಷ್ಟೆಂಚ್ ನಾಟಕ್ ಕರ್ತಾ. ಆಸೆಂ ಕೆಲ್ಲ್ಯಾನ್ ಮ್ಹಜ್ಯಾ ಮಾಸಾಚೊ ವಾಂಟೊ ತಾಕಾಯ್ ಮೆಳ್ತಾ ನೇ! ಹಾಂವ್ ಭಿಯೆಲೊಂ ನಾ. ಮನ್ಶ್ಯಾಂಚೆಂ ಮಾಸ್ ಹಾಂವ್ ಖಾಯ್ನಾ ದೆಕುನ್ ತಾಂಚ್ಯಾಕೀ ಧೈರಾಧೀಕ್ ಆಸ್‌ಲ್ಲೊಂ. ತೊ ಕಿತೆಂ ಕರ್ತಾ ಮ್ಹಣ್ ಪಳೆಂವ್ಕ್ ಹಾಂವೆಂಯ್ ಮ್ಹಜೆ ದೊನೀ ಹಾತ್ ಮುಖಾರ್ ಕೆಲೆ. ಮ್ಹಾತಾರೊ ಸಕ್ಲಾ ಬಸ್ಲೊ. ದೊಳೆ ಧಾಂಪುನ್ ಥೊಡೊ ವೇಳ್ ಕಿತೆಂಗೀ ಗುಣ್ಗುಣ್ಲೊ. ಉಪ್ರಾಂತ್ ದೊಳೆ ಸೊಡ್ನ್ ಮ್ಹಣಾಲೊ – “ನಾಕಾ ಜಾಲ್ಲೆಂ ಪೂರಾ ಚಿಂತಿನಾಕಾ. ಇಲ್ಲೆ ದೀಸ್ ಆರಾಮ್ ಕರ್, ಸಕ್ಕಡ್ ಸಮಾ ಜಾತಾ” ಮ್ಹಣಾಲೊ.

“ನಾಕಾ ಜಾಲ್ಲೆಂ ಚಿಂತಿನಾಕಾ! ಇಲ್ಲೆ ದೀಸ್ ಆರಾಮ್ ಕರ್!…” ಮ್ಹಳ್ಯಾರ್ ಹಾಂವ್ ಅನಿಕೀ ಮೊಟೊ ಜಾಲ್ಯಾರ್ ತಾಂಕಾಂ ಚಡ್ ಮಾಸ್ ಖಾಂವ್ಕ್ ಮೆಳ್ತಾ ನೇ!.. ಪೂಣ್ ಹಾಂತು ಮ್ಹಾಕಾ ಕಿತೆಂ ಬರೆಂ ಆಸಾ? ಕಸೆಂ ಸಮಾ ಜಾತಾ? ಹೆ ಪೂರಾ ಮನ್ಶ್ಯಾಂಚೆಂ ಮಾಸ್ ಖಾಂವ್ಕ್ ಬರೆ ಮ್ಹಣ್ ದಿಸ್ಚಾಕ್ ಪಳೆತಾತ್. ಚಿಂತುನ್ ಮ್ಹಾಕಾ ಹಾಸುನ್ ಹಾಸುನ್ ಮೊರ್ತಾಂ ಮ್ಹಣ್ ಭಗ್ಲೆಂ. ಕಿಟ್ಕಿಟೊನ್ ಹಾಸಾನಾಸ್ತಾನಾ ರಾವೊಂಕ್ ಜಾಲೆಂ ನಾ. ಮ್ಹಾಕಾ ಏಕಾ ಥರಾಚೊ ತಮಾಸೊ ಮ್ಹಣ್ ಭಗ್ಲೆಂ. ಮ್ಹಜ್ಯಾ ಹ್ಯಾ ಹಾಸ್ಯಾಂತ್ ಬಳ್ ಆನಿ ಧೈರ್ ಆಸಾ ಮ್ಹಣ್ ಹಾಂವ್ ಜಾಣಾಂ.  ಮ್ಹಜಿ ಹಿ ಅವಸ್ತಾ ಪಳೆವ್ನ್ ತೊ ಮ್ಹಾತಾರೊ ಆನಿ ದಾಟ್ಟುಂಚೆಂ ತೋಂಡ್ ಸಾವ್ಳೆಲೆಂ.

ಪೂಣ್ ಹಾಂವ್ ಧೈರಾಧಿಕ್ ಆಸ್ಲೆಲ್ಯಾನ್ಂಚ್ ಮ್ಹಾಕಾ ಖಾಂವ್ಕ್ ತಾಂಕಾ ಚಡ್ ಆತುರಾಯ್. ಖಾವ್ನ್ ತಾಂಕಾಂಯ್ ಇಲ್ಲೆಂ ಧೈರ್ ಆಪ್ಣಾಂವ್ಚಿ ತಯಾರಾಯ್. ಮ್ಹಾತಾರೊ ಗೇಟಿ ಭಾಯ್ರ್ ಗೆಲೊ. ಪೂಣ್ ಮೊಸ್ತು ಪಯ್ಸ್ ವೆಚಾ ಪಯ್ಲೆಂ ದಾಟ್ಟು ಕುಶಿಂ ಘುಂವೊನ್ ಮ್ಹಣಾಲೊ- “ಏಕ್‌ಚ್ ಪಾವ್ಟಿಂ ಖಾವ್ನ್ ಸೊಡಿಜಾಯ್”. ದಾಟ್ಟುನ್ ತಕ್ಲಿ ಹಾಲಯ್ಲಿ. ತರ್, ತೂಂಯ್ ಹಾಂತು ಭಾಗಿಧಾರ್! ಹೆಂ ಅಯ್ಕೊನ್ ಮ್ಹಾಕಾ ಆಘಾತ್ ಜಾಲೊ ತರೀ ಗುಟ್ ಕಳ್ಳೊ. ಹೆಂ ಮ್ಹಜ್ಯಾ ಚಿಂತ್ಪಾ ಭಾಯ್ಲೆಂ. ಮ್ಹಜೊ ದಾಟ್ಟುಚ್ ಮ್ಹಾಕಾ ಖಾಂವ್ಚೊ ತಾಂಚೊ ಸಾಂಗಾತಿ ಜಾವ್ನಾಸ್‌ಲ್ಲೊ!

ಮನ್ಶ್ಯಾಂಚೆಂ ಮಾಸ್ ಖಾಂವ್ಚೊ ದಾಟ್ಟು ಮ್ಹಜೊ!

ಮನ್ಶ್ಯಾಂಚೆಂ ಮಾಸ್ ಖಾಂವ್ಚ್ಯಾ ಅಸಲ್ಯಾ ದಾಟ್ಟುಕ್ ಹಾಂವ್ ಧಾಕ್ಟೊ ಭಾವ್!

ಉರ್‌ಲ್ಲೆ ಪೂರಾ ಮ್ಹಾಕಾ ಖಾತಾತ್ ವ್ಹಯ್. ಪೂಣ್ ಮನ್ಶ್ಯಾ ಮಾಸ್ ಖಾಂವ್ಚಾ ದಾಟ್ಟುಕ್ ಹಾಂವ್ ಭಾವ್!

-5-

ಹ್ಯಾ ಧೊಡ್ಯಾ ದಿಸಾಂ ಥಾವ್ನ್ ಹಾಂವ್ ಪರ್ತುನ್ ಚಿಂತುನ್ ಆಸಾಂ. ತೋ ಮ್ಹಾತಾರೊ, ವೇಸ್ ಬದ್ಲಿಲ್ಲ್ಯಾ ಖುನಿಗಾರಾ ಬದ್ಲಾಕ್, ನೀಜ್ ವಯ್ಜ್ ಜಾವ್ನಾಸ್ಲ್ಯಾರೀ, ಮನ್ಶ್ಯಾಂಚೆಂ ಮಾಸ್ ಖಾಂವ್ಚೊಚ್.

ಝಡಾಂ ಪಾಳಾಂಚಾ ಒಕ್ತಾಂ ವಿಶಿಂ ಬರಯಿಲ್ಲ್ಯಾ ಬೂಕಾಂತ್ ಲೀಷಿನಾಚಾ ಪೂರ್ವಜಾನಿ ಮನ್ಶ್ಯಾಂಚೆಂ ಮಾಸ್ ಖಾವ್ಯೆತ್ ಮ್ಹಣ್ ಬರಯ್ಲಾಂ. ಆಸೆಂ ಆಸ್ತಾಂ, ಹೊ ಮನಿಸ್ ಮನ್ಶ್ಯಾಂಚೆಂ ಮಾಸ್ ಖಾಯ್ನಾ ಮ್ಹಣ್ ಸಾಂಗಿತ್ಗೀ?

ಮ್ಹಜ್ಯಾ ದಾಟ್ಟು ವಿಶಿಂ ಸಾಂಗ್ಚೆಂ ತರ್ ತಾಚೆರ್ ಮ್ಹಾಕಾ ದುಭಾವ್ ಆಸಾ. ತೊ ಮ್ಹಾಕಾ ಲಿಸಾಂವ್ ಶಿಕಯ್ತಾಸ್ತಾನಾ, ತಾಣೆಂಚ್ ಆಪ್ಲ್ಯಾ ಜಿಬೆನ್ ಸಾಂಗ್‌ಲ್ಲೆಂ ಆಸಾ. “ಲೋಕ್ ಖಾಂವ್ಕ್ ಮ್ಹಣ್ ಆಪ್ಲ್ಯಾ ಭುರ್ಗ್ಯಾಂಕ್ ವಿನಿಮಯ್ ಕರ್ತಾತ್”. ಏಕ್ ಪಾವ್ಟಿಂ ಪಾಡ್ ವ್ಯಕ್ತಿಂ ವಿಶಿಂ ಉಲಯ್ತಾನಾ “ತಸಲ್ಯಾಂಕ್ ಫಕತ್ತ್ ಜಿವೆಶಿಂ ಮಾರ್ಲ್ಯಾರ್ ಪಾವಾನಾ. ತಾಂಚೆಂ ಮಾಸ್‌ಚ್ ಪಾಪ್ಸುನ್ ಖಾಯ್ಜಯ್, ಚಾಮ್ಡೆಂ ಸೊಡಾವ್ನ್ ನಿದಾಜಾಯ್” ಮ್ಹಣ್ ತಾಣೆಂ ಮ್ಹಳ್ಳೆಂ. ತೆದಾಳಾ ಹಾಂವ್ ಮೊಸ್ತು ಧಾಕ್ಟೊಂ ಆಸ್‌ಲ್ಲೊಂ. ಮ್ಹಜೆಂ ಹರ್ಧೆಂ ಜೊರಾನ್ ಆವಾಜ್ತಾಲೆಂ. ಭಾಡ್ಯಾಗಾರಾಚಿಂ ಉತ್ರಾಂ ಆಯ್ಕೊನ್ ತಾಕಾ ಆಜ್ಯಾಪ್‌ಚ್ ಜಾಲೆಂ ನಾ. ಮೆಲ್ಲ್ಯಾಚೆಂ ಕಾಳಿಜ್ ಅನಿ ಅನ್ಕಿಟಿ ಖೆಲಿ ಮ್ಹಣ್ ಆಯ್ಕಾತಾನಾ ತಕ್ಲಿ ಹಾಲಯಿಲ್ಲಿ ತಾಣೆಂ. ತೊ ಕ್ರೂರಿ ಜಾವ್ನಾಸುಲ್ಲೊ. ಸ್ವಂತ್ ಭುರ್ಗ್ಯಾಂಕ್‌ಚ್ ಖಾಂವ್ಕ್ ಮ್ಹಣ್ ಬದ್ಲಿತಾನಾ ಕೊಣಾಯ್ಕೀ ಬದ್ಲುವ್ಯೆತಾ. ಪಯ್ಲೆಂ ಹೆಂ ಪೂರಾ ಆಯ್ಕಾತಾನಾ ಹಾಂವೆ ಚಡ್ ಗಮನ್ ದೀಂವ್ಕ್ ನಾ. ಪುಣ್ ಆತಾಂ ತಾಣೆಂ ವಿವರ್ಸುನ್ ಸಾಂಗ್ತಾನಾ, ತಾಚಾ ವೊಂಟಾಚೆರ್ ಮನ್ಶ್ಯಾಚಿ ಚರ್ಬಿ ಆಸ್ಚಿ ದಿಸ್ತಾಲಿ. ಮಾತ್ರ್ ನ್ಹಯ್, ಮನ್ಶ್ಯಾಂಕ್ ಖಾಯ್ಜೆಚ್ ಮ್ಹಣ್ ಮನ್ ಕೆಲ್ಲ್ಯಾ ಬರಿ ದಿಸ್ತಾಲೆಂ.

-6-

ದಾಟ್ ಕಾಳೊಕ್. ಸಾಕಾಳ್ ಗೀ, ರಾತ್ ಗೀ ಮ್ಹಳ್ಳೆಂ ಕಳ್ಳೆಂ ನಾ. ಚಾವೊಚಾ ಪೆಟ್ಯಾನ್ ಪರ್ತುನ್ ಘೊಂಕುಂಕ್ ಸುರು ಕೆಲ್ಲೆಂ.

ಸಿಂಹಾಚಿ ಉಗ್ರತಾಯ್, ಸೊಂಶ್ಯಾಚೆಂ ಭ್ಯೆಂ, ಕೊಲ್ಯಾಚಿ ಬೂದ್….

-7-

ತೆ ಸಕ್ಕಡ್ ಕಿತೆಂ ಕರ್ತಾತ್ ಮ್ಹಣ್ ಹಾಂವ್ ಜಾಣಾಂ. ತೆ ಖಂಚ್ಯಾಯ್ ಮನ್ಶ್ಯಾಕ್ ಏಕೆಚ್ ಪಾವ್ಟಿಂ ಮಾರುಂಕ್ ವಚಾನಾಂತ್. ಪರಿಣಾಮ್ ಕಿತೆಂ ಜಾತೊಲೊ ಮ್ಹಳೆಂ ಭ್ಯೆಂ. ದೆಖುನ್ ಹಾಂವೆಂಚ್ ಮ್ಹಾಕಾ ಜಿವೆಶಿಂ ಮಾರಿಜಾಯ್ ಮ್ಹಣ್ ಸಕ್ಕಡ್ ಸಾಂಗಾತಾ ಮೆಳುನ್ ಥೈಂ ಹಾಂಗಾ ತಾಣಿಂ ಭಾಲೆ ದವರ್ಲ್ಯಾತ್. ಥೊಡ್ಯಾ ದಿಸಾಂ ಆದಿಂ ವಾಟೆರ್ ಬಾಯ್ಲಾಂನಿ ಆನಿ ದಾದ್ಲ್ಯಾಂನಿ ಮ್ಹಾಕಾ ಪಳೆವ್ನ್ ಚಲ್ಚಿ ರೀತ್, ದಾಟ್ಟುಚೊ ಹ್ಯಾ ಥೊಡ್ಯಾ ದಿಸಾ ಆದಿಂಚೊ ಸ್ವಭಾವ್ ಸಕ್ಕಡ್ ಮ್ಹಜ್ಯಾ ದುಭಾವಾಕ್ ಪಾಟಿಂಬೊ ದಿತಾ. ತೆಂ ಆಶೆಂವ್ಚೆಂ ಇತ್ಲೆಂಚ್. ವ್ಯಕ್ತಿನ್ ಆಪ್ಲೆಂ ಬೆಲ್ಟ್ ಕಾಡ್ನ್ ಗಳ್ಪಾಸ್ ಘೆಜಾಯ್. ಖುನ್ಯೆಚಾ ಅಪ್ರಾಧಾಕ್ ಪಡಾನಾಶೆಂ, ಮನ್ ಭರ್ ಖುಶಿ ಪಾವ್ಯೆತ್ ಮ್ಹಣ್ ತಾಣಿಂ ಹೆ0 ಪೂರಾ ಕರ್ಚೆಂ. ಜೊರಾನ್ ಸಕ್ಕಡ್ ಹಾಸೊಂಕ್ ಸುರು ಕರ್ತಾತ್.  ಏಕಾದಾವೆಳಾ ವ್ಯಕ್ತಿ ಮೊರ್ನಾಕ್ ಭಿಯೆವ್ನ್, ಲಾಚಾರ್ ಜಾಲ್ಯಾರೀ ಪರ್ವಾ ನಾ. ತಾಂಕಾಂ ಸರ್ವಾಂಕ್ ಹೆಂ ಮಾನ್ವಾತಾಲೆಂ.

ಮೆಲ್ಲ್ಯಾಂಚೆಂ ಮಾಸ್ ಮಾತ್ರ್ ಖಾತಾತ್ ಮ್ಹಣ್ ಖಂಯ್ಗೀ ವಾಚ್‌ಲ್ಲೊ ಉಗ್ಡಾಸ್. ಖಂಯ್ಚಿಗೀ ಏಕ್ ಮನ್ಜಾತ್ “ಹೈನಾ” ಮೊಡ್ಯಾಚೆಂ ಮಾಸ್‌ಚ್ ಖಾತಾ ಖೈಂ! ಮಾತ್ರ್ ನ್ಹಯ್, ವ್ಹಡ್ ವ್ಹಡ್ ಗಟ್ಟ್ ಆಸ್ಚಿಂ ಹಾಡಾಂ ಪೂರಾ ಪಿಟೊ ಪಿಟೊ ಕರುನ್ ಗಿಳ್ತಾ ಖೈಂ. ಚಿಂತ್ಲ್ಯಾರ್‌ಚ್ ಆಂಗ್ ಕಾಂಪ್ತಾ. ಹೈನಾ ಆನಿ ವಾಗಾಟ್ ಎಕಾಚ್ ಜಾತಿಚಿಂ ಖೈಂ. ತ್ಯಾ ಏಕಾ ದಿಸಾ ಚಾವೊಚಾ ಘರ್ಚಾ ಪೆಟ್ಯಾನ್ ಮ್ಹಾಕಾ ಪರ್ತುನ್ ಪರ್ತುನ್ ಪಳೆಲೆಂ. ಹಾಂಚ್ಯಾ ಶಿಂತ್ರಾಳ್ಯಾಂತ್ ತೋಯ್ ವಾಂಟೆಲಿ ಜಾವ್ನಾಸಾ. ತೊ ಮ್ಹಾತಾರೊ ತಕ್ಲಿ ಬಾಗಾವ್ನ್ ದೊಳೆ ಚುಕಾಯ್ಲ್ಯಾರೀ ಮ್ಹಾಕಾ ಮೋಸ್ ಕರುಂಕ್ ಜಾಲೆಂ ನಾ!

ಚಡ್ ವಾಯ್ಟಾಚೊ ಮ್ಹಳ್ಯಾರ್ ಮ್ಹಜೊ ದಾಟ್ಟು. ತೋಯ್ ಮನಿಸ್ ನೈಂವೇ? ತಾಕಾ ಕಿತ್ಯಾಕ್ ಭ್ಯೆಂ ನಾ. ಹೆರಾಂ ಸಾಂಗಾತಾ ಮೆಳೊನ್ ಆಪುಣ್ ಸಯ್ತ್ ಕಿತ್ಯಾಕ್ ಶಿಂತ್ರಾಳ್ಯಾಂತ್ ವಾಂಟೆಲಿ ಜಾಲಾ? ಯಾ ಹೆಂ ಸಕ್ಕಡ್ ಕರುನ್ ಸವಯ್ ಜಾಲ್ಲ್ಯಾನ್, ಆಪ್ಣೆಂ ಕರ್ಚೆಂ ಚೂಕ್ ಮ್ಹಣ್ ತಾಕಾ ಕಿತ್ಯಾಕ್ ಭಗಾನಾ? ನಾ ತರ್, ಆಪ್ಣೆಂ ಕರ್ಚೆಂ ಚೂಕ್ ಮ್ಹಣ್ ಕಳೊನೀ ಕಾಳಿಜ್ ಫಾತೊರ್ ಕೆಲಾಂ ಜಾಂವ್ಕ್ ಪುರೊಗೀ?

ಮನ್ಶ್ಯಾಂಕ್ ಖಾಂವ್ಚಾಂಕ್ ಶಿರಾಪ್ತಾನಾ, ಆನಿ ಮನ್ಹ್ಯಾಂಕ್ ಖಾಂವ್ಚಾಂಕ್ ಆಡಾಯ್ತಾನಾ ಸಯ್ತ್ ಮ್ಹಜ್ಯಾ ದಾಟ್ಟು ಥಾವ್ನ್ಂಚ್ ಸುರು ಕರ್ತಾಂ.

-8-

ವಾಸ್ತವಿಕ್ ಥರಾನ್ ಪಳೆಲ್ಯಾರ್ ಅಸಲಿ ಚರ್ಚಾ ಎದೊಳ್‌ಚ್ ತಾಂಕಾಂ ಆರ್ಥ್ ಜಾಲ್ಯಾ ಜಾಂವ್ಕ್ ಪುರೊ.

ಏಕಾಚ್ಚಾಣೆ ಕೋಣ್‌ಗೀ ಆಯ್ಲೊ. ಆಯ್ಲೆಲ್ಯಾಕ್ ವೀಸ್ ವರ್ಸಾಂ ಜಾಂವ್ಕ್ ಪುರೊ. ತಾಚೆಂ ರುಪ್ಣೆಂ ಸ್ಪಷ್ಟ್ ಥರಾನ್ ಮ್ಹಾಕಾ ದಿಸ್ಲೆಂ ನಾ. ತಾಚ್ಯಾ ತೊಂಡಾರ್ ಹಾಸೊ ದಿಸ್ಲೊ. ಮ್ಹಾಕಾ ಪಳೆತಚ್ ತಾಣೆಂ ದುಸ್ರ್ಯಾಚ್ ಥರಾಚೊ ಹಾಸೊ ದಿಲೊ. ಪುಣ್ ತ್ಯಾ ಹಾಸ್ಯಾಂತ್ ಪ್ರಾಮಾಣಿಕತಾ ನಾತ್‌ಲ್ಲಿ. ಹಾಂವೆ ತಾಕಾ ವಿಚಾರ್ಲೆಂ -” ಮನ್ಶ್ಯಾಂಚೆಂ ಮಾಸ್ ಖಾಂವ್ಚೆಂ ಸಮಾಂಗೀ?”

“ಬರ್ಗಾಲ್‌ಚ್ ನಾ ಜಾಲ್ಯಾರ್, ಮನಿಸ್ ಮನ್ಶ್ಯಾಕ್ ಕಸೆಂ ತರೀ ಖಾತಾ?” ಹಾಸೊನ್ಂಚ್ ತೊ ಮ್ಹಣಾಲೊ.

ತಕ್ಷಣ್ ಮ್ಹಾಕಾ ಕಳ್ಳೆಂ, ಹೊ ಸಯ್ತ್ ತಾಂಚಾ ಪೈಕಿ ಏಕ್ಲೊ ಮ್ಹಣ್. ಹಾಂವೆ ಧೈರಾನ್ ಪರ್ತುನ್ ವಿಚಾರ್ಲೆಂ – “ಸಮಾಂಗೀ?”

“ಅಸಲೆಂ ಸವಾಲ್ ಕಿತ್ಯಾಕ್ ವಿಚಾರ್ತಾಯ್ಗಾ? ತುಕಾ ತಮಾಸೊ ಬರೊ ಲಾಗ್ತಾಗೀ?. ಆಜ್ ಮೊಸ್ತು ಬರೆಂಚ್ ಆಸಾ ತಸೆಂ ದಿಸ್ತಾ.”

“ವ್ಹಯ್.ಆಜ್ ಮೊಸ್ತು ಬರೆಂ ಆಸಾ, ಚಾಂದ್ನೆ ಸಯ್ತ್ ಬರೆಂಚ್ ಪರ್ಜಾಳ್ತಾ. ಪುಣ್ ತೂಂ ಮ್ಹಜ್ಯಾ ಸವಾಲಾಕ್ ಜಾಪ್ ದೀ. ಹೆಂ ಸಮಾಂಗೀ?”

ತೊ ವಿಸ್ಮಿತ್ ಜಾಲ್ಲೆ ಬರಿ ದಿಸ್ಲೊ. ಉಪ್ರಾಂತ್ ಮ್ಹಣಾಲೊ, “ನಾ”

“ನಾ, ನ್ಹಯ್ಂಗೀ?…..ಪೂಣ್ ಹೆ ಸಕ್ಕಡ್ ಕಿತ್ಯಾಕ್ ತಸೆಂ ಕರ್ತಾತ್?”

“ತೂಂ ಕಿತೆಂ ಉಲವ್ನ್ ಆಸಾಯ್ಗಾ?”

“ಕಿತೆಂ ಉಲವ್ನ್ ಆಸಾಂ?….ತೆ ಸಕ್ಕಡ್ ವುಲ್ಫ್ ಕ್ಲಬ್ ಹಳ್ಳೆಂತ್ ಮನ್ಶ್ಯಾಂಕ್ ಖಾತಾತ್. ತೂಂವೆ ಜಾಯ್ ಜಾಲ್ಯಾರ್ ಪಳೆವ್ಯೆತ್. ಬೂಕಾಂತ್ ಪೂರಾ ತಾಂಬ್ಡ್ಯಾ  ಶಾಯೆನ್ ಬರಯ್ಲಾಂ”

ತಾಚ್ಯಾ ತೊಂಡಾಚೊ ಚಾರೊ ಬದ್ಲಾಲೊ. ಧವ್ಸೆಲೊ ಸಯ್ತ್.

“ಆಸ್ಲ್ಯಾರೀ ಆಸುಂಕ್ ಪುರೊ” ಮ್ಹಾಕಾಚ್ ಪಳೇತ್ತ್ ಮ್ಹಣಾಲೊ. “ಆಸೆಂ ಸದಾಂಚ್ ಚಲ್ತಾ…”

“ಸದಾಂಚ್ ಚಲ್ತಾ ಮ್ಹಣ್ ತಸೆಂ ಕರ್ಚೆಂ ಸಮಾಂಗೀ?”

“ಹ್ಯಾ ವಿಶಿಂ ತುಜ್ಯೆ ಲಾಗಿಂ ಹಾಂವ್ ಕಿತೆಂಚ್ ಉಲಯ್ನಾ. ಪುಣ್ ಏಕ್ ವಿಷಯ್. ತೂಂವೆ ಹ್ಯೆ ವಿಶಿಂ ಖೈಂಸರೀ ಉಲಂವ್ಕ್ ನಜೊ. ಕೋಣ್ ಹ್ಯೆ ವಿಶಿಂ ಉಲಯ್ತಾಗೀ, ತಾಚೀಚ್ ಚೂಕ್ ಜಾತಾ!”

ಹಾಂವ್ ಏಕಾಚ್ ಫರಾ ಉಭೊ ಜಾಲೊಂ. ದೊಳೆ ವಾಟಾರುನ್ ಪಳೆಲ್ಯಾರ್ ತೊ ನಪಂಯ್ಚ್ ಜಾಲ್ಲೊ. ಹಾಂವ್ ಘಾಮೆವ್ನ್ ಮುದೊ ಜಾಲ್ಲೊಂ. ಮ್ಹಜ್ಯೆ ದಾಟ್ಟುಚಾಕೀ ತೊ ಮೊಸ್ತು ಲ್ಹಾನ್. ತರೀ ತೋಯ್ ಹಾಂತು ಭಾಗಿದಾರ್. ಬಹುಶ್ಯಾ ತಾಚ್ಯೆ ಆವಯ್ ಬಾಪಯ್ನ್ ತಾಕಾ ಶಿಕಾಯ್ಲಾಂಸ್ತೆಲೆಂ. ತಾಣೆಂ ಏದೊಳ್‌ಚ್ ಆಪ್ಲ್ಯಾ ಪೂತಾಕೀ ಶಿಕಯ್ಲಾಂ ಜಾಂವ್ಕೀ ಪುರೊ. ದೆಕುನ್‌ಚ್ ತ್ಯಾ ದಿಸಾ ಭುರ್ಗಿಂ ಸಯ್ತ್ ಮ್ಹಾಕಾ ಕ್ರೂರ್ ರಿತಿನ್ ಪಳೆತಾಲಿಂ!

-9-

ಮನ್ಶ್ಯಾಂಕ್ ಖಾಯ್ಜಯ್ ಮ್ಹಳ್ಳಿ ಆಶಾ ಪುಣ್ ಆಪ್ಣಾಂಕೀ ಕೊಣೀ ತರೀ ಖಾಂವ್ಕ್ ಪುರೊ ಮ್ಹಳ್ಳೆಂ ಭ್ಯೆಂ.ತಾಂಚ್ಯಾ ಮಧೆಂಚ್ ಏಕ್ಲ್ಯಾ ವಯ್ರ್ ಆನ್ಯೆಕ್ಲ್ಯಾಕ್ ದುಭಾವ್…

ಅಸಲ್ಯೊ ಅಲೊಚನ್ಯೊ ಪೂರಾ ಸೊಡ್ನ್, ಕಾಮಾಕ್ ವೆಚೆಂ, ಚಲ್ಚೆಂ, ಖಾಂವ್ಹೆಂ, ನಿದ್ಚೆಂ ಕೆಲ್ಯಾರ್ ಕಿತ್ಲ್ಯಾ ಆರಾಮಾಯೆನ್ ಆಸ್ಯೆತ್ ಪಳೆಯಾ.  ಪುಣ್ ಕಿತೆಂ ಕರ್ಚೆಂ. ಹಿಂ ಸರ್ವಾಂ, ಬಾಪಯ್, ಭುರ್ಗಿಂ, ಘೊವ್, ಬಾಯ್ಲಾಂ, ಭಾಭಾವ್, ಶಿಕ್ಷಕ್, ವಿದ್ಯಾರ್ಥಿ, ದುಸ್ಮಾನ್ ಆನಿ ಪರ್ಕಿ ಸಯ್ತ್ ಹ್ಯಾ ಘುಟ್ಮೊಳ್ಯಾಂತ್ ಭಾಗಿದಾರ್.

– 1೦ –

ಫಾಂತ್ಯಾರ್ ದಾಟ್ಟುಕ್ ಸೊಧುನ್ ಗೆಲೊಂ. ತೊ ಸೊಪ್ಯಾಚಾ ದಾರಾ ಭಾಯ್ರ್ ರಾವೊನ್ ಮೊಳ್ಬಾಕ್ ಪಳೆತಾಲೊ. ಹಾಂವ್ ವಚೊನ್ ತಾಚ್ಯೆ ಪಾಟ್ಲ್ಯಾನ್ ರಾವ್ಲೊಂ ಆನಿ ಖಾಲ್ತ್ಯಾಪಣಾನ್ ಮ್ಹಳೆಂ –

“ದಾಟ್ಟು, ತುಜ್ಯೆಲಾಗಿಂ ಇಲ್ಲೆಂ ಉಲಂವ್ಕ್ ಆಸಾ”

“ಜಾಯ್ತ್, ಸಾಂಗ್ ಕಿತೆಂ?” ಮ್ಹಾಕಾಚ್ ಪಳೆವ್ನ್ ಮ್ಹಣಾಲೊ.

“ದೊನ್ಂಚ್ ಉತ್ರಾಂ. ಸಾಂಗೊಂಕ್ ಕಷ್ಟ್ ಜಾತಾತ್. ದಾಟ್ಟೂ, ಸುರ್ವೇರ್ ಹರ್ಯೆಕಾ ಆದಿವಾಸಿ ಮನ್ಶ್ಯಾನ್ ಇಲ್ಲೆಂ ಇಲ್ಲೆಂ ಮನ್ಶ್ಯಾಂಚೆಂ ಮಾಸ್ ಖೆಲಾಂ ಜಾಂವ್ಕ್ ಪುರೊ. ಉಪ್ರಾಂತ್ ತಾಂಚೆ ಥೈಂ ಬದ್ಲಾವಣ್ ಯೇವ್ನ್ ಥೊಡ್ಯಾಂನಿ ಖಾಂವ್ಚೆಂ ಸೊಡ್ಲೆಂ ಆನಿ ತೆ ಬರೆ ಜಾವ್ನ್, ನಿಜಾಯ್ಕೀ ಮನಿಸ್ ಜಾವ್ನ್ ರೂಪಾಂತರ್ ಜಾಲೆ ಜಾಂವ್ಕ್ ಪುರೊ. ಪುಣ್ ಥೊಡೆ ಜಿವ್ದಾಳಿ ಬರಿ ಅನಿಕೀ ಮನ್ಶ್ಯಾಂಚೆಂ ಮಾಸ್ ಖಾವ್ನ್‌ಚ್ ಆಸಾತ್. ಥೊಡೆ ಮಾಸ್ಳಿ ಜಾವ್ನ್, ಸುಕ್ಣೆಂ ಜಾವ್ನ್, ಮಾಂಕೊಡ್ ಜಾವ್ನ್, ಅನಿ ಅಖ್ರೇಕ್ ಮನಿಸ್ ಜಾವ್ನ್ ವಿಕಾಸ್ ಜಾಲ್ಯಾತ್. ಪುಣ್ ಥೊಡೆ ಅನಿಕೀ ಬರೆ ಜಾಯ್ನಾಸ್ತಾನಾ ಜಿವ್ದಾಳಿ ಬರಿಚ್ ಉರ್ಲ್ಯಾತ್. ಮನ್ಶ್ಯಾಂಚೆಂ ಮಾಸ್ ಖಾತೆಲ್ಯಾಂನಿ ಆಪ್ಣಾಕ್‌ಚ್ ಖಾಯ್ನಾತ್ಲೆಲ್ಯಾ ಸಾಂಗಾತಾ ತುಲನ್ ಕೆಲ್ಯಾರ್ ತಾಂಕಾಂ ಲಜ್ ಜಾತೆಲಿಚ್. ಬಹುಶ್ಯಾ ಜಿವ್ದಾಳಿಂಚ್ಯಾಂಕೀ  ಚಡ್ ಲಜ್.”

“ಪುರ್ವಿಲ್ಯಾ ಕಾಳಾರ್ ಈ ಯಾನಾನ್ ಆಪ್ಲ್ಯಾ ಪುತಾಕ್ ಉಕ್ಡುನ್ ಚೀ ಆನಿ ಚಾ ಕ್ ವಾಡ್ಲೆಂ. ಹಿ ಪರ್ನಿ ಕಾಣಿ. ಪುಣ್ ಸರ್ಗ್ ಆನಿ ಸಂಸಾರಾಚೊ ಜಲ್ಮ್ ಜಾಲ್ಯಾ ಉಪ್ರಾಂತ್ ಸಯ್ತ್ ಪಾನ್ ಕೂ ದಾದ್ಲೆ ಖಾವ್ನ್ಂಚ್ ಆಸಾತ್. ಈಯಾಚಾ ಕಾಳಾ ಥಾವ್ನ್ ಸೂಸಲಿನ್ ಆನಿ ಸೂಸಲಿನ್ ಕಾಳಾ ಥಾವ್ನ್ ವುಲ್ಫ್ ಕ್ಲಬ್ ಹಳ್ಳೆಂತ್ ಜಾಲ್ಲ್ಯಾ ಘಡಿತಾ ಮ್ಹಣಾಸರ್ ಹಿ ಮನ್ಶ್ಯಾಚಿ ರಿವಾಜ್ ಮುಖಾರ್ಸುನ್ ಆಯ್ಲ್ಯಾ. ಆದ್ಲ್ಯಾ ವರ್ಸಾ ಶರಾಂತ್ ಏಕಾ ಆಪ್ರಾಧ್ಯಾಕ್ ಶಿಕ್ಷಾ ಜಾಲಿ. ಖೆವಾದ್ ಆಸ್ಚಾ ಏಕ್ಲ್ಯಾನ್ ಭಾಕ್ರಿ ತಾಚಾ ರಗ್ತಾಂತ್ ಬುಡವ್ನ್ ಖೆಲಿ.”

“ತಾಂಕಾಂ ಮ್ಹಾಕಾ ಖಾಂವ್ಕ್ ಜಾಯ್. ತುಕಾ ಏಕ್ಲ್ಯಾಕ್‌ಚ್‌ ಕಿತೇಂಯ್ ಕರುಂಕ್ ಜಾಯ್ನಾ. ಪುಣ್ ತೂಂಯ್ ತಾಂಚಾ ಸಾಂಗಾತಾ ಕಿತ್ಯಾಕ್ ಸೆರ್ವಾಲಾಯ್? ಮನ್ಶ್ಯಾಂಕ್ ಖಾಂವ್ಚೆ ತೆ ಕಿತೇಂಯ್ ಕರ್ತಿತ್. ಮ್ಹಾಕಾ ಖೆಲ್ಯಾ ಉಪ್ರಾಂತ್ ತುಕಾಯ್ ಖಾತಿತ್. ಏಕಾಚ್ ಪಂಗ್ಡಾಂತ್ ಆಸ್ಚೆ ಸಯ್ತ್ ಏಕಾ ಮೆಕಾಕ್ ಖಾತಿತ್. ತೂಂವೆ ತಕ್ಷಣ್ ತುಜಿ ರೀತ್ ಬದ್ಲಿಲ್ಯಾರ್ ಸಕ್ಡಾಂಕ್ ಸಮಾಧಾನ್ ಜಾತಾ. ಹಿ ರಿವಾಜ್ ಮೊಸ್ತು ಆದಿಂ ಥಾವ್ನ್ ಚಲೊನ್ ಆಯ್ಲ್ಯಾ ಜಾಂವ್ಕ್ ಪುರೊ. ಪುಣ್ ಆಮಿ ಆತಾಂ ಬರೆಂ ಜಾಂವ್ಕ್ ಪ್ರಯತನ್ ಕರ್ಯೆತ್. ಅಸಲೆಂ ಪೂರಾ ಕರಿನಾಯೆ ಮ್ಹಣ್ ತಾಂಕಾಂ ಸಾಂಗ್! ತುಕಾ ಆಸೆಂ ಸಾಂಗೊಂಕ್ ಖಂಡಿತ್ ಸಾಧ್ಯ್ ಆಸಾ. ದಾಟ್ಟು, ಪಯ್ರ್ ಆಮ್ಚೊ ಭಾಡ್ಯಾಗಾರ್, ಭಾಡೆಂ ಉಣೆಂ ಕರ್ ಮ್ಹಣ್ ಸಾಂಗ್ತಾನಾ, ತೂಂವೆ ಜಾಯ್ನಾ ಮ್ಹಳ್ಳೆಂಯ್”

“ಪಯ್ಲೆಂ ತೊ ಏಕ್ ವಿಚಿತ್ರ್ ಹಾಸೊ ಹಾಸ್ಲೊ. ಉಪ್ರಾಂತ್ ಖುನಿಗಾರಾಚಿ ಸಾವ್ಳಿ ತಾಚ್ಯೆ ದೊಳ್ಯಾಂನಿ ದಿಸ್ಲಿ. ತಾಚೆಂ ತೋಂಡ್ ಧವ್ಸೆಲೆಂ. ಗೇಟಿ ಭಾಯ್ರ್ ಲೋಕಾಚೊ ಏಕ್ ಜಮೊ ಏಕ್ಟಾಂಯ್ ಜಾಲ್ಲೊ. ತಾಂಚಾ ಮಧೆಂ ಚಾವೋ ಆನಿ ತಾಚೊ ಪೆಟೊ ಸಯ್ತ್ ಆಸ್‌ಲ್ಲೊ. ಸಕ್ಕಡ್ ಗೊಮ್ಟಿ ಲಾಂಬ್ ಕರುನ್ ಭಿತರ್ ಪಳೆತಾಲೆ. ತಾಂಚಿಂ ತೊಂಡಾ ಲುಗ್ಟಾನ್ ಭಾಂದ್ಲೆಲ್ಯಾನ್ ಮ್ಹಾಕಾ ಸಾರ್ಕಿಂ ದಿಸ್ಲಿಂ ನಾಂತ್. ಥೊಡೆ ಆಪ್ಲೊ ಹಾಸೊ ಲಿಪಂವ್ಚೆಂ ಪ್ರಯತನ್ ಕರ್ತಾಲೆ. ಆನಿ ಥೊಡೆ ಧವೆ ಜಾವ್ನ್ ಭಯಾನಕ್ ದಿಸ್ತಾಲೆ. ಪುಣ್ ಹಾಂವ್ ಜಾಣಾಂ. ತೆ ಸಕ್ಕಡ್ ಮನ್ಶ್ಯಾಂಚೆಂ ಮಾಸ್ ಖಾಂವ್ಚ್ಯಾ ಏಕಾಚ್ ಪಂಗ್ಡಾಚೆ. ಪುಣ್ ತಾಂಚ್ಯೊ ಅಲೊಚ್ಯಾನೊ ಮಾತ್ರ್ ಏಕಾಚ್ ಥರಾಚೆ ನ್ಹಯ್ ಮ್ಹಣ್ ಮ್ಹಾಕಾ ಭಗ್ಲೆಂ. ತಾಂತ್ಲೆ ಥೊಡೆ ಆದಿಂ ಥಾವ್ನ್ ಆಯ್ಲೆಲ್ಯಾ ರಿವಾಜಿ ಪ್ರಕಾರ್ ಮ್ಹನ್ಶ್ಯಾಂಚೆಂ ಮಾಸ್ ಖಾಯ್ಜಾಯಿಚ್ ಮ್ಹಳ್ಳ್ಯಾ ಬರಿ ದಿಸ್ಲ್ಯಾರ್, ಆನಿ ಥೊಡೆ ಖಾಯ್ನಾಯೆ ಮ್ಹಣ್ ಗೊತ್ತಾಸೊನೀ ಖಾತಾಂವ್ ಮ್ಹಳ್ಳ್ಯಾ ಬರಿ ಅಸ್‌ಲ್ಲೆ. ಲೋಕಾಕ್ ಆಪ್ಲೊ ಘುಟ್ ಕಳ್ಟಾ ಮ್ಹಣ್ಂಚ್ ಮ್ಹಜಿಂ ಉತ್ರಾಂ ಆಯ್ಕಾಲಿಂಚ್ ತೆ ಭಿಯೆಲೆ. ರಾಗಿಸ್ಟ್ ಸಯ್ತ್ ಜಾಲೆ. ತರೀ ವಿಚಿತ್ರ್ ಥರಾನ್ ಮ್ಹಾಕಾ ಪಳೇತ್ತ್ ನಂಜಿ ಹಾಸೊ ಹಾಸ್ಲೆ.”

ಏಕಾಚ್ ಫರಾ ಮ್ಹಜೊ ದಾಟ್ಟು ಮೊಸ್ತು ರಾಗಾನ್ ಜೊರಾನ್ ಬೊಬಾಟ್ಲೊ.

“ವಚಾರೇ, ಸಕ್ಕಡ್ ತೆಣೆಂ ವಚಾರೇ! ಪಿಶ್ಯಾಕ್ ಪಳೆಂವ್ಚ್ಯಾಂತ್ ತುಮ್ಕಾಂ ಕಾಲೆಂ ಮೆಳ್ತಾ?”

ತಾಂಚೊ ಉಪಾವ್ ಮ್ಹಾಕಾ ಕಳ್ಳೊ. ತೆ ಕೆದಿಂಚ್ ಆಪ್ಲೆಂ ಧೋರಣ್ ಬದ್ಲಿನಾಂತ್. ತಾಣಿಂ ಆಪ್ಲಿಂ ಸರ್ವ್ ಯೋಜನಾಂ ತಯಾರ್ ಲ್ಯಾಂತ್. ಮ್ಹಾಕಾ ಪಿಸೊ ಮ್ಹಳ್ಳಿ ಪಟ್ಟಿ ಭಾಂದ್ಲಿ. ಮುಖಾರ್ ಮ್ಹಾಕಾ ಖಾವ್ನ್ ಸೊಡ್ಲ್ಯಾರ್ ಉಪಾದ್ರ್‌ಚ್ ನಾಂತ್. ಲೋಕ್ ತಾಂಕಾಂ ಬಹುಶ್ಯಾ ಆಬಾರಿ ಜಾವ್ನಾಸ್ತೊಲೊ. ಆಮ್ಚಾ ಭಾಡ್ಯಾಗಾರಾನ್ ಏಕಾ ಪಾಡ್ ಮನ್ಶ್ಯಾಕ್ ತಾಚಾ ಗಾಂವ್ಚಾ ಲೋಕಾನ್ ಖೆಲ್ಲ್ಯಾ ಪಾಟ್ಲ್ಯಾನೀ ಹೊಚ್ ಉಪಾವ್ ಆಸ್‌ಲ್ಲೊ. ಹಿ ತಾಂಚಿ ಪರ್ನಿ ಕುಯುಕ್ತಿ.

ಮ್ಹಾತಾರೊ ಚೆನ್ ರಾಗಾನ್ಂಚ್ ಭಿತರ್ ಆಯ್ಲೊ. ಪೂಣ್ ತಾಕಾ ಯಾ ತಾಂಚ್ಯಾನ್ ಮ್ಹಜೆಂ ತೋಂಡ್ ಧಾಂಪಂವ್ಕ್ ಜಾಲೆಂ ನಾ. ಲೋಕಾಕ್ ಹಾಂವೆ ಸಾಂಗಿಜಾಯಿಚ್ಚ್.

“ತುಮಿ ಬದ್ಲಾಜಾಯ್. ಕಾಳ್ಜಾ ಥಾವ್ನ್ ಬದ್ಲಾಜಾಯ್! ಆನಿ ಮುಖಾರ್ ಮನ್ಶ್ಯಾಂಚೆಂ ಮಾಸ್ ಖಾಂವ್ಚಾಂಕ್ ಹ್ಯಾ ಸಂಸಾರಾಂತ್ ಜಾಗೊ ಆಸ್ಚೊ ನಾ ಮ್ಹಳ್ಳೆಂ ತುಮಿ ಸಮ್ಜಾಜಾಯ್”

“ತುಮಿ ಬದ್ಲಾನಾತ್ಲ್ಯಾರ್, ತುಮ್ಚ್ಯಾ ಮಧೆಂ ತುಮಿಂಚ್ ಏಕಾಮೆಕಾಕ್ ಖಾವ್ನ್ ಮುಗ್ದಿತಾತ್. ಆಸೆಂ ಜಾಲ್ಯಾರ್ ಕಿತ್ಲೊ ಲೋಕ್ ಜಲ್ಮಾಲ್ಯಾರೀ ಸಕ್ಕಡ್ ನಿರ್ನಾಮ್ ಜಾತೆಲೆ. ನೀಜ್ ಮನ್ಶ್ಯಾಂ ಥಾವ್ನ್ ಕೊಣ್ಂಚ್ ಉರಾನಾಯೆ ಮ್ಹಳ್ಳೆ ಬರಿ, ಶಿಕಾರೆಗಾರ್ ವಾಗ್ಟಾಂಕ್ ಶಿಕಾರಿ ಕರ್ಚೆ ಬರಿ ಮಾರ್ತೆಲೆ, ಜಿವ್ದಾಳಿಂ ಬರಿ!”

ಸಕ್ಡಾಂಕ್ ಚೆನಾನ್ ಪಯ್ಸ್ ಧಾಡ್ಲೆಂ. ಮ್ಹಜೊ ದಾಟ್ಟು ದಿಸ್ಲೊ ನಾ. ಚೆನ್ ಮ್ಹಾಕಾ ಕೂಡಾಕ್ ವಚ್ ಮ್ಹಣಾಲೊ. ಕೂಡಾಂತ್ ದಾಟ್ ಕಾಳೊಕ್. ಮ್ಹಜ್ಯೆ ತಕ್ಲೆ ವಯ್ಲೆ ಪಕ್ಕಾಸ್ ಆನಿ ಅಡೆಂ ಹಾಲ್ಚಾ ಬರಿ ಭಗ್ಲೆಂ. ಇಲ್ಲೊ ವೇಳ್ ಹಾಲ್ತಚ್ ಸಕ್ಕಡ್ ಮ್ಹಜ್ಯೆ ವಯ್ರ್ ರಾಸ್ ಜಾವ್ನ್ ಪಡ್ಲೆಂ.

ಜಡಾಯ್ ಚಡ್‌ಚ್ ಆಸ್‌ಲ್ಲಿ. ಮ್ಹಾಕಾ ಹಾಲೊಂಕ್ ಜಾಲೆಂ ನಾ. ಹಾಂವೆ ಮೊರಾಜಾಯಿಚ್ಚ್ ಮ್ಹಣ್ ತಾಂಚಿ ಆಶಾ ಜಾವ್ನಾಸ್‌ಲ್ಲಿ. ತರೀ ಹಾಂವ್ ಕಷ್ಟಾನಿ ಭಾಯ್ರ್ ಆಯ್ಲೊಂ. ಆಂಗ್ ಪೂರಾ ಘಾಮಾನ್ ಭಿಜೊನ್ ಗೆಲ್ಲೆಂ. ಪುಣ್ ಹಾಂವೆ ಸಾಂಗಿಜಾಯ್.

“ತುಮಿ ಪೂರಾ ಆತಾಂಚ್ ಬದ್ಲಾಜಾಯ್. ತುಮ್ಚ್ಯಾ ಕಾಳ್ಜಾ ಥಾವ್ನ್ ಬದ್ಲಾಜಾಯ್! ಆನಿ ಮುಖಾರ್ ಮನ್ಶ್ಯಾಂಚೆಂ ಮಾಸ್ ಖಾಂವ್ಕ್ ಹ್ಯಾ ಸಂಸಾರಾಂತ್ ಜಾಗೊ ನಾ ಮ್ಹಳ್ಳೆಂ ತುಮಿ ಸಮ್ಜಾಜಾಯ್”

-11-

ಸುರ್ಯೊ ಉದೆಲೊ ನಾ. ದಾರ್ ಉಗ್ತೆಂ ಜಾಲೆಂ ನಾ. ಹರ್ಯೆಕಾ ದಿಸಾ ದೋನ್ ಜೆವ್ಣಾಂ ಮೆಳ್ತಾಲಿಂ. ದಾಟ್ಟುಚೊ ಉಡಾಸ್ ಅಯ್ಲೊ. ಮ್ಹಜೆಂ ಭಯ್ಣ್ ಕಸೆಂ ಮೆಲೆಂ ಮ್ಹಣ್ ಮ್ಹಾಕಾ ಆತಾಂ ಕಳ್ಳೆಂ. ಸಕ್ಕಡ್ ದಾಟ್ಟು ವರ್ವಿಂಚ್. ತೆದ್ನಾಂ ಭಯ್ಣಿಕ್ ಫಕತ್ತ್ ಪಾಂಚ್ ವರ್ಸಾಂ. ತೆಂ ಕಿತ್ಲೆಂ ಮುಗ್ದ್ ಆನಿ ಅಸಾಹಾಯಕ್ ಜಾವ್ನಾಸ್ ಲ್ಲೆಂ ಮ್ಹಳ್ಳೊ ಉಡಾಸ್ ಅಯ್ಲೊ. ಮಾಂಯ್ ರಡೊನ್ ರಡೊನ್ ಥಕ್‌ಲ್ಲಿ. ದಾಟ್ಟುನ್ ತಿಕಾ ರಡ್ನಾಕಾ ಮ್ಹಣ್ ಸಾಂಗ್ಲೆಂ. ಕಿತ್ಯಾಕ್ ಮ್ಹಳ್ಯಾರ್ ತಾಣೆಂಚ್ ಭಯ್ಣಿಕ್ ಖೆಲಾಂ ಜಾಯ್ಜಯ್. ತಾಕಾ ಮಾಂಯ್ನ್ ರಡ್ಚೆಂ ಲಜೆಚೆಂ ಮ್ಹಣ್ ಭಗ್ಲಾಸ್ತೆಲೆಂ. ದೆಕುನ್ಂಚ್ ರಡ್ನಾಕಾ ಮ್ಹಳ್ಳೆಂ. ತಾಕಾ ಲಜ್ ಮ್ಹಳ್ಳಿ ಆಸ್ಲ್ಯಾರ್…

ಮ್ಹಜ್ಯೆ ಭಯ್ಣಿಕ್ ತಾಣೆಂಚ್ ಖೆಲಾಂ. ಮಾಂಯ್ಕ್ ಹೆಂ ಸಕ್ಕಡ್ ಗೊತ್ತಾಸ್‌ಲ್ಲೆಂಗೀ, ನಾಂಗೀ, ಪುಣ್ ಬಹುಶ್ಯಾ ಗೊತ್ತಾಸ್‌ಲ್ಲೆಂ ಜಾಂವ್ಕ್ ಪುರೊ. ಭಯ್ಣ್ ರಡ್ತಾನಾ ಏಕ್ ಉತರ್ ಸಯ್ತ್ ತಿ ಉಲಯ್ಲಿ ನಾ. ಕಿತ್ಯಾಕ್ ಮ್ಹಳ್ಯಾರ್ ತಿಕಾಯ್ ತೆಂ ಸಾರ್ಕೆಂ ಮ್ಹಣ್ ಭಗ್ಲಾಸ್ತೆಲೆಂ.

ಮ್ಹಾಕಾ ಅನಿಕೀ ಉಡಾಸ್ ಆಸಾ. ಬಹುಶ್ಯಾ ಮ್ಹಾಕಾ ತೆದಾಳಾ ಚಾರ್ ವರ್ಸಾಂಚಿ ಪ್ರಾಯ್ ಆಸೊಂಕ್ ಪುರೊ. ಸೊಫ್ಯಾಚೆರ್ ಥಂಡ್ ಬಸ್ ಲ್ಲೊಂ. ದಾಟ್ಟುಚಿಂ ಉತ್ರಾಂ – ಆವಯ್ ಬಾಪುಯ್ ಪಿಡೇಸ್ತ್ ಜಾಲ್ಲೆ ವಗ್ತಾ ತಾಂಚಾ ಪುತಾನ್ ಆಪ್ಲ್ಯಾ ಕೂಡಿಚೊ ಏಕ್ ಕುಡ್ಕೊ ಕಾತ್ರುನ್ ಉಕ್ಡುನ್ ತಾಂಕಾ ಖಾವಯ್ಜಾಯ್. ತೆದಾಳಾ ತೊ ಬರೊ ಪೂತ್ ಜಾತಾ. ಮಾಂಯ್ನ್ ತಾಣೆಂ ತಸೆಂ ಮ್ಹಳ್ಳ್ಯಾಕ್ ಅಡ್ಕಳ್ ಕೆಲಿ ನಾ. ಏಕ್ ಕುಡ್ಕೊ ಖಾತಾನಾ, ಸಗ್ಳಿ ಕೂಡ್‌ಚ್ ಖಾವ್ಯೆತ್! ಪುಣ್ ಭಯ್ಣಿಚಾ ಮೊರ್ನಾ ವಿಶಿಂ ರಡ್ಚಾ ತಾಂಚೊ ಉಡಾಸ್ ಕೆಲ್ಯಾರ್ ಮ್ಹಜೆಂ ಕಾಳಿಜ್ ಮುಡ್ಡಿಲ್ಲೆ ಬರಿ ಜಾತಾ.  ಹೊಚ್ಹ್ ಏಕ್ ಅಸಾಧಾರಣ್ ವಿಷಯ್!

-12-

ಹ್ಯಾ ವಿಶಿಂ ಚಿಂತುಂಕ್‌ಚ್ ಮ್ಹಜ್ಯಾನ್ ಜಾಯ್ನಾ. ಮ್ಹಾಕಾ ಆತಾಂಚ್ ಕಳ್ಳೆಂ. ಸುಮಾರ್ ಚಾರ್ ಹಜಾರ್ ವರ್ಸಾಂ ಥಾವ್ನ್ ಮನಿಸ್ ಮನ್ಶ್ಯಾಂಚೆಂ ಮಾಸ್ ಖಾವ್ನುಂಚ್ ಆಸ್ಲೆಲ್ಯಾ ಜಾಗ್ಯಾರ್ ಹಾಂವ್ ಅಸಾಂ. ಮ್ಹಜೆಂ ಭಯ್ಣ್ ಮೊರ್ತಾನಾ ದಾಟ್ಟುನ್ ಘರ್ಚಿ ಜವಾಬ್ದಾರಿ ಆಪ್ಣಾಯಿಲ್ಲಿ. ಶಿತಾಂತ್ ಮ್ಹಜ್ಯೆ ಭಯ್ಣಿಚೆಂ ಮಾಸ್ ಭರ್ಸುನ್ ಖೆಲಾಂಸ್ತೆಲೆಂ.  ಆಮ್ಕಾಂಯ್ ಕಳಿತ್ ಜಾಯ್ನಾಸ್ತಾಂ ಖಾಂವ್ಕ್ ದಿಲಾಂಸ್ತೆಲೆಂ. ಮ್ಹಾಕಾ ಕಳಿತ್ ನಾಸ್ತಾನಾ ಹಾಂವೆ ಮ್ಹಜ್ಯೆ ಭಯ್ಣಿಚೆ ಮಾಸಾಚೆ ಮೊಸ್ತು ಕುಡ್ಕೆ ಖೆಲ್ಯಾತ್ ಕೊಣ್ಣಾ… ಅತಾಂ ಮ್ಹಜಿ ಸರ್ತಿ.

ಅಸೆಂ ಮ್ಹಜ್ಯೆ ತಸಲೊ ಮನಿಸ್, ಚಾರ್ ವರ್ಸಾಂ ಥಾವ್ನ್ ಮನ್ಶ್ಯಾಂಚೆಂ ಮಾಸ್ ಖಾವ್ನ್ಂಚ್ ಆಯ್ಲೆಲ್ಯಾ ಉಪ್ರಾಂತ್, ಮ್ಹಾಕಾ ಹಾಚ್ಯೆ ವಿಶಿಂ ಕಿತೆಂಚ್ ಕಳಿತ್ ನಾತ್ಲ್ಯಾರೀ ನೀಜ್ ಮನ್ಶ್ಯಾಂಕ್ ಕಳ್ಚೆಂ ತರೀ ಕಸೆಂ?

ಮನ್ಶ್ಯಾಂಚೆಂ ಮಾಸ್ ಖಾವ್ನ್ಂಚ್ ಅಯೆಲ್ಯಾ ,ಚಾರ್ ಹಜಾರ್ ವರ್ಸಾಚಾ ಇತಿಹಾಸಾ ಉಪ್ರಾಂತ್, ಮ್ಹಜ್ಯೆ ತಸಲ್ಯಾಕ್, ತಾಚ್ಯೆ ವಿಶಿಂ ಪಯ್ಲೆಂ ಕಿತೆಂಚ್ ಕಳಿತ್ ನಾತ್ಲ್ಯಾರೀ, ನೀಜ್ ಮನ್ಶ್ಯಾಂಕ್ ಮುಖಾಮುಖಿ ಕಸೆಂ ಕರುಂ?

-13-

ಬಹುಶ್ಯಾ ಮನ್ಶ್ಯಾಂಚೆಂ ಮಾಸ್ ಖಾಯ್ನಾತ್‌ಲ್ಲಿಂ ಭುರ್ಗಿಂ ಆಸೊಂಕೀ ಪುರೊ! ದೆವಾ, ತಾಂಕಾಂ ರಾಕ್…

► ಮೂಳ್ : ಲೂಷನ್ (LU HSUN), ಕೊಂಕ್ಣೆಕ್ : ಉಬ್ಬಾ, ಮೂಡ್ ಬಿದ್ರಿ