ಕೊಚ್ಚಿ ವಚಾಜೆ ಮ್ಹಣೊನ್ ಸಾಂಜೆರ್‌ ಸವಾಯ್‌ ಸ ವೊರಾರ್‌ ಕೊಡ್ಯಾಳ್‌ಥಾವ್ನ್‌ ಸುಟ್ಚ್ಯಾ ರೈಲಾರ್‌ ಬಸ್‌ಲ್ಲ್ಯಾಂವ್. ಮ್ಹಜೆ ಸಾಂಗಾತಾ ಪಶು ಆಸ್‌ಲ್ಲೊ. ಪಶು ಮ್ಹಳ್ಳ್ಯಾರ್‌ ಪ್ರಶಾಂತ. ದೊಗಾ ಜಣಾಂನಿ ಸಾಂಗಾತಾ ವಚುಂಕ್ ಕಾರಣ್‌ಯೀ ಆಸಾ. ಕಿತ್ಯಾಕ್‌ ಮ್ಹಳ್ಳ್ಯಾರ್‌ ದುರಸ್ತಿ ಕರ್ಚೆ ಖಾತಿರ್ ಲಗ್ಬಗ್‌ ಸಾಟ್ ಕಿಲೊ ಜಡಾಯೆಚೆಂ ಏಕ್‌ ಎಂಜಿನ್‌ ಕೊಚ್ಚಿ ಶ್ಹೆರಾಕ್‌ ವ್ಹರಿಜೆ ಆಸ್‌ಲ್ಲೆಂ.
ರೈಲ್‌ ಮಾಡಾ ತೊಟಾಂಕ್‌ ಆನಿ ತೆದಾಳಾ ತೆದಾಳಾ ಭೆಟ್‌ ದಿಂವ್ಚ್ಯಾ ನ್ಹಂಯಾಂಕ್‌ ಪಾಶಾರ್‌ ಜಾವ್ನ್ ವಚೊನ್‌ ಆಸ್‌ಲ್ಲೆಂ. ಆಮ್ಚೆಂ ಪಯ್ಣ್‌ ಸುರು ಜಾವ್ನ್ ಕಾಂಯ್‌ ದೇಡ್‌ ಘಂಟೆ ಜಾಲ್ಯಾತ್‌ ಕೊಣ್ಣಾ. ಜೊರಾನ್‌ ಭುಕ್‌ ಲಾಗೊಂಕ್‌ ಸುರು ಜಾಲಿ. ಆಜ್‌ ಕಾಲ್‌ ರೈಲಾರ್‌ ಸಕ್ಕಡ್‌ ಮೆಳ್ತಾ ನೆ. ಪರ್ತುನ್‌ ಖಾಣ್‌ ಕಿತ್ಯಾಕ್‌ ವರ್ಚೆಂ? ಅಶೆಂ ಚಿಂತುನ್ ಸಾಟ್ ಕಿಲೊ ಜಡಾಯೆ ಸವೆಂ ರೈಲಾರ್‌ ಚಡ್‌ಲ್ಯಾಂವ್.
ಪುಣ್ ಜೆವಾಣ್‌ ಸೊಡ್ಯಾಂ, ಚಾ-ಕಾಫಿ ವಿಕ್ತಲೊಯೀ ಹ್ಯಾ ರೈಲಾರ್‌ ಭೊಂವಾನಾಮೂ? ಹೆ ಸಕ್ಕಡ್‌ ಖಂಯ್‌ ಗೆಲ್ಯಾತ್‌? ನಾ ತರ್‌ ಆಮ್ಚ್ಯಾ ಡಬ್ಬ್ಯಾಂತ್‌ ಜಣ್ ಉಣೆ ಆಸಾತ್ ಮ್ಹಣೊನ್ ಹೆವ್ಶಿನ್‌ ಯೆತೆತ್‌ ನಾಂತ್‌ಗೀ ಕಿತೆಂ? ಅಸಲಿಂ ಸವಾಲಾಂ ಆಮ್ಕಾಂ ಧೊಸುನ್‌ಚ್‌ ಆಸ್‌ಲ್ಲಿಂ. ರೈಲ್‌ ಮಾತ್ರ್‌ ಹರ್ಯೆಕಾ ಲ್ಹಾನ್‌ ಲ್ಹಾನ್‌ ಸ್ಟೆಷನಾಂನಿ ರಾವೊನ್‌ಚ್‌ ಮುಕಾರ್‌ ವೆತಾಲೆಂ. ಪುಣ್ ಕೊಣೀ ʻʻಅಂಡಾ ಬಿರಿಯಾನಿ, ಚಿಕನ್‌ ಬಿರಿಯಾನಿ, ವೆಜ್ ಬಿರಿಯಾನಿʼʼ ಮ್ಹಣ್ ಬೊಬಾಟುನ್‌ ರೈಲಾ ಭಿತರ್‌ ರಿಗ್ಚೆಂ ದಿಸಾನಾಮು…
ಅಶೆಂಚ್‌ ಜಾಲ್ಯಾರ್‌ ಆಮಿ ಉಪಾಶಿಂಚ್‌ ರಾತ್‌ ಪಾಶಾರ್‌ ಕರಿಜೆ ಪಡತ್‌ ಮ್ಹಳ್ಳ್ಯಾ ಖಂತಿರ್‌ಚ್ ಹಾಂವ್ ರೈಲಾಚಾ ದುಸ್ರ್ಯಾ ಡಬ್ಬ್ಯಾಂನಿ ವಚೊನ್‌ ಜೆವಾಣ್‌ ವಿಕ್ತೆಲ್ಯಾಂಕ್‌ ಸೊಧುಂಕ್‌ ಲಾಗ್ಲೊಂ. ಖಂಯ್‌ ಸೊಧ್ಲ್ಯಾರೀ ಜೆವಾಣ್‌ ವಿಕ್ತೆಲೆ ದಿಸಾನಾಂತ್.
ರೈಲಾಚ್ಯಾ ಹರ್ಯೆಕಾ ಡಬ್ಬ್ಯಾಂನಿ ಸಕ್ಕಡ್‌ ಪಯ್ಣಾರಿ ಆಪ್ಲಿ ಆಪ್ಲಿ ಪೊಟ್ಲಿ ಉಗಡ್ನ್‌ ಜೇವ್ನ್‌ಚ್‌ ಆಸಾತ್. ಥೊಡಿಂ ಸ್ತ್ರೀಯೊ ಆಪ್ಲ್ಯಾ ಭುರ್ಗ್ಯಾಂಕ್‌ ಜೆವಾಣ್‌ ಖಾವವ್ನ್‌ ಆಸಾತ್. ಆಪ್ಲ್ಯಾ ಕುಟ್ಮಾಂಚಾ ಸಾಂದ್ಯಾಂ ಸವೆಂ ಚಿಕನ್‌ ಸುಕ್ಕ, ಪೊಳೆ, ಬೀಫ್-ಚಿಕನ್‌ ಬಿರಿಯಾನಿ – ಅಶೆಂ ಚಡಾವತ್‌ ಜಣ್ ನಾನ್‌ ವೆಜ್ ಜೆವಾಣ್‌ಚ್‌ ಜೇವ್ನ್‌ ಆಸಾತ್. ಕೇರಳಾಚ್ಯಾ ರೈಲಾಂನಿ ಜೆವ್‌ಲ್ಲ್ಯಾ ತಿತ್ಲೆಂ ನಾನ್‌ ವೆಜ್ ಜೆವಾಣ್‌ ದೆಶಾಚ್ಯಾ ಹೆರ್ ಖಂಚ್ಯಾ ಕೊನ್ಶ್ಯಾರೀ ಪಳೆಂವ್ಕ್‌ ಮೆಳ್ಚೆಂನಾಗೀ ಮ್ಹಣ್. ಹಾಂಚಿಂ ನಾನ್‌ ವೆಜ್ ಜೆವ್ಣಾ ಪಳೆವ್ನ್‌ ಮ್ಹಜಿ ಭುಕ್‌ ಆನಿಕೀ ವಾಡೊನ್‌ಚ್‌ ಗೆಲಿ.
ತಿತ್ಲ್ಯಾರ್‌ ಎಕಾ ಡಬ್ಬ್ಯಾರ್ ರೈಲ್ವೆ ಪೊಲಿಸಾಲಾಗಿಂ ಜೆವ್ಣಾಚೊ ಮಿಸ್ತೆರ್‌ ಹಾಂವೆಂ ಸೊಡಾಯ್ಲೊ. ರೈಲಾರ್‌ಚ್‌ ಜೆವಾಣ್‌ ತಯಾರ್‌ ಕರ್ಚೆಂ ಪ್ಯಾಂಟ್ರಿ ಕಾರ್‌ ನಾ ತರ್‌ ಹಾಂಗಾಚ್ಯಾ ರೈಲಾಂನಿ ಜೆವಾಣ್‌ಚ್‌ ಮೆಳಾನಾ. ಕೊರೊನಾ ಪಿಡೆವರ್ವಿಂ ರೈಲಾಭಾಯ್ರ್‌ ಥಾವ್ನ್‌ ಯೇವ್ನ್‌ ಜೆವಾಣ್‌ ವಿಕುಂಕ್‌ ಹ್ಯಾ ರಾಜ್ಯಾಂತ್ ಅಡ್ವಾರ್ಲಾಂ ಮ್ಹಣ್ ಸಾಂಗೊನ್‌ ತಾಣೆ ಮ್ಹಜಾ ಪೊಟಾಕ್‌ಚ್‌ ಏಕ್‌ ಬಾಂಬ್‌ ಘಾಲೊ. ಆನಿ ಕಿತೆಂ ಕರ್ಚೆಂ ಮ್ಹಣ್ ಚಿಂತಾನಾ, ಮುಕಾರ್‌ ಕಣ್ಣೂರ್‌ ಸ್ಟೇಷನ್‌ ಯೆತಾನಾ ರೈಲ್‌ ಸುಮಾರ್‌ ತೀನ್ ಮಿನುಟಾಂ ರಾವ್ತಾ. ತೆದಾಳಾ ಭಾಯ್ರ್‌ ವಚೊನ್‌ ಖಾಣ್‌ ಘೆವ್ನ್‌ ಹಾಡ್ಯೆತ್‌ ಮ್ಹಣೊನ್ ಪೊಲಿಸಾನ್‌ ಜಾಪ್‌ ದಿಲಿ.
ಥೊಡ್ಯಾ ತೆಂಪಾ ಆದಿ ಚೆನ್ನೈಥಾವ್ನ್‌ ಹ್ಯಾಚ್ ಕೇರಳ ಮುಕಾಂತ್ರ್‌ ಕೊಡ್ಯಾಳಾಕ್‌ ಆಯಿಲ್ಲೊಂ. ತಾಚೆ ಉಪ್ರಾಂತ್‌ ಮುಂಬಯ್‌ ಗೆಲ್ಲೊಂ. ಮುಂಬಯ್‌ ಥಾವ್ನ್‌ ಪಾಟ್ನಾ ಗೆಲ್ಲೊಂ. ಪ್ಯಾಂಟ್ರಿ ಕಾರ್‌ ಆಸೊಂದಿ, ಯಾ ನಾ ಆಸೊಂದಿ. ಜೆವಾಣ್‌ ಖಾಣ್‌ ದರಬಸ್ತ್‌ ಮೆಳ್ತೆಲೆಂ. ಪುಣ್ ಹ್ಯಾ ಕೇರಳಾಂತ್‌ ಕಾನೂನ್‌ ಮಾತ್ರ್‌ ವೆಗ್ಳೆಂಚ್‌. ಏಕಾಚ್‌ ದೆಶಾ ಭಿತರ್‌‌ಚ್ ವೆವೆಗ್ಳಿಂ ಕಾನೂನಾ ಕಶಿಂ ಬದ್ಲಾತಾತ್‌ ಮ್ಹಣೊನ್ ಚಿಂತುನ್ ಹಾಂವೆಂ ಮ್ಹಜ್ಯಾ ಮೊಬೈಲಾರ್‌ ವೇಳ್ ಪಳೆಲೊ. ರೈಲ್‌ ವೆಳಾರ್‌ ಪಾವ್ಲ್ಯಾರ್‌ ಕಣ್ಣೂರ್‌ ಪಾವೊಂಕ್ ಆನಿಕೀ ಅರ್ಧೊ ಗಂಟೊ ಆಸಾ. ವಯ್ಲ್ಯಾನ್ ಹೆಂ ರೈಲ್‌ ಸುಮಾರ್‌ ಅರ್ಧೊ ಗಂಟೊ ಘಳಾಯ್‌ ಕರ್ನ್‌ ಚಲ್ತೆತ್‌ ಆಸಾಮೂ! ಭುಕೆಲ್ಲ್ಯಾ ಪೊಟಾಂತ್‌ ಆನಿ ಏಕ್‌ ಗಂಟೊ ಪಾಶಾರ್‌ ಕರ್ಚೆಂ ತರೀ ಕಶೆಂ?
ಆನಿ ವೆಗಿಂಚ್‌ ಜೆವಾಣ್‌ ಮೆಳಾಜೆ ತರ್‌ ಕಾಂಯ್‌ ತರೀ ಆಜಾಪ್‌ಚ್‌ ಘಡಜೆ ಕೊಣ್ಣಾ ಮ್ಹಣೊನ್ ಚಿಂತುನ್ ಮ್ಹಜ್ಯಾ ಡಬ್ಬ್ಯಾ ತೆವ್ಶಿಂ ಚಲೊನ್‌ ಆಸ್ತಾನಾ ತಕ್ಷಣ್‌ ಎಕ್ಲ್ಯಾನ್‌ ʻʻತುಕಾ ಜೆವಾಣ್‌ ಜಾಯ್ಗೀʼʼ ಮ್ಹಣೊನ್ ಮ್ಹಾಕಾ ವಿಚಾರ್ಲೆಂ. ʻʻವ್ಹಯ್‌, ಹಾಂವ್ ಜೆವಾಣ್‌ಚ್‌ ಸೊಧುನ್‌ ಆಸಾಂ. ಪುಣ್ ಜೆವಾಣ್‌ ಖಂಯ್‌ ಮೆಳ್ತಾʼʼ ಮ್ಹಣೊನ್ ಹಾಂವೆಂ ತಾಕಾ ಸವಾಲ್‌ ಕೆಲೆಂ. ʻʻಜೆವಾಣ್‌ ಆಮ್ಚೆ ಲಾಗಿಂಚ್ ಆಸಾ. ಘರ್ಚ್ಯಾಂನಿ ಮೊಸ್ತು ರಾಂದುನ್‌ ಧಾಡ್ಲಾಂʼʼ ಮ್ಹಣತ್ತ್ ತಾಣೆ ಎಕಾ ಯೂಸ್‌ ಅಂಡ್‌ ತ್ರೋ ಪ್ಲೇಟಿಂತ್‌ ಜೆವಾಣ್‌ ಭರುಂಕ್‌ ಸುರು ಕೆಲೆಂಚ್‌. ಪುಣ್ ಆಮಿ ದೋಗ್ ಜಣ್ ಆಸಾಂವ್‌ ಮ್ಹಣ್ ಹಾಂವೆಂ ಸಾಂಗ್‌ಲ್ಲೆಂಚ್‌, ʻʻದೋಗ್ ಕಿತ್ಯಾಕ್‌, ಆನಿ ಚಾರ್‌ ಜಣಾಂಕ್‌ ಪಾವ್ಚೆಂ ತಿತ್ಲೆಂ ಜೆವಾಣ್‌ ಆಸಾʼʼ ಮ್ಹಣೊನ್ ತಾಣೆ ದೋನ್‌ ಪ್ಲೇಟಿಂನಿ ಜೆವಾಣ್‌ ಭರ್ಲೆಂಚ್‌.
ಸುಮಾರ್‌ ಸಾತ್‌ – ಆಟ್‌ ಜಣ್ ತರ್ನಾಟೆ ತೆ. ಸೌದಿ, ದುಬಾಯ್‌ ಅಶೆಂ ವೆವೆಗ್ಳ್ಯಾ ಗಾಂವಾಂಕ್‌ ಪಯ್ಣ್‌ ಕರ್ಚೆ ಖಾತಿರ್ ಕಲ್ಲಿಕೋಟೆ ವಚೊನ್‌ ವಿಮಾನ್ ಧರುಂಕ್‌ ಕೊಡ್ಯಾಳ್‌ಥಾವ್ನ್‌ ಭಾಯ್ರ್‌ ಸರ್‌ಲ್ಲೆ. ಘರ್ಚಾಂನಿ ದರಬಸ್ತ್‌ ಜೆವಾಣ್‌ ರಾಂದುನ್‌ ದಿಲ್ಲೆಂ ತಾಂಕಾಂ. ಬೀಫ್ ಸುಕ್ಕ (ಹಾಂವೆಂ ಮಾತ್ರ್‌ ಘೆತ್ಲೆಂ. ಪಶುಕ್‌ ದೀಂವ್ನ್‌ ನಾ), ಚಿಕನ್‌ ಮಾಕ್ರೊನಿ, ಸುಂಕ್ಟಾಂಚೆಂ ಘೀ ರೋಸ್ಟ್‌, ಶೆವ್ಯೊ, ಸನ್ನಾಂ ಪರೋಟ ಅಶೆಂ ಪ್ಲೇಟ್‌ ಭರ್‌ ಖಾಣ್‌ಚ್‌ ಖಾಣ್‌. ವಯ್ಲ್ಯಾನ್ ಸಾಧಾರಣ್‌ ಮುಟ್ಲ್ಯಾಂ ಬರಿಂ ದಿಸ್ಚೆಂ ಏಕ್‌ ಖಾಣ್‌ ಯೀ ಆಸ್‌ಲ್ಲೆಂ. ಆಮ್ಚ್ಯಾಂ ಮುಟ್ಲ್ಯಾಂಚಾಂಕೀ ಇಲ್ಲೆಶೆಂ ವ್ಹಡ್‌ಚ್‌ ಆಸ್‌ಲ್ಲೆಂ. ಇತ್ಲೆಂ ಸಕ್ಕಡ್‌ ಖೆಲ್ಲ್ಯಾ ಉಪ್ರಾಂತ್‌ ಇತ್ಲಿಂ ವ್ಹಡ್‌ ಮುಟ್ಲಿಂ ಕಶೆಂ ಖಾಂವ್ಚೆಂ ಮ್ಹಣ್ ಚಿಂತುನ್ ತಾಂಕಾಂ ಉಗ್ತೆಂ ಕರ್ತಾನಾ ಆಮ್ಕಾಂ ಅನ್ಯೇಕ್‌ ಆಜಾಪ್‌ ರಾಕೊನ್‌ ಆಸ್ಲೆಂ. ಹಿಂ ಮುಟ್ಲಿಂ ನ್ಹಂಯ್‌. ಭಿತರ್‌ ಸುಂಕ್ಟಾಂಚಾ ಸುಕ್ಕಾಚೊ ಮಸಾಲೊ ಭರ್ಲಾ ಆನಿ ತೆಂ ಇತ್ಲೆಂ ರುಚಿಕ್‌ ಆಸ್‌ಲ್ಲೆಂಗೀ, ಚಿಂತಾನಾ ಅಜೂನಿ ತೊಂಡಾಂತ್‌ ಲಾಳ್‌ ಗಳ್ತಾ.
ಇತ್ಲೆಂ ಸಕ್ಕಡ್‌ ಜೆವಾಣ್‌ ಪಳೆವ್ನ್‌ ಪಶುಯೀ ಆಜಾಪ್ಲೊ. ಇತ್ಲೆಂ ಬರೆಂ ಜೆವಾಣ್‌ ಆನಿ ಇತ್ಲಿ ವೆರೈಟಿ ಪಳೆವ್ನ್‌ ತೋಯೀ ಸಾತ್ವ್ಯಾ ಸರ್ಗಾಕ್‌ ಪಾವ್‌ಲ್ಲೊ.
ಸಬಾರ್‌ ಪಾವ್ಟಿಂ ಒಳೊಕ್‌ ನಾತ್‌ಲ್ಲ್ಯಾ ಗಾಂವಾಕ್‌ ವಚೊನ್‌ ಆಮಿ ಆಮ್ಚ್ಯಾ ಪಸಾಂದಾಯೆಚೆಂ ಖಾಣ್‌ ಆರ್ಡರ್‌ ಕರ್ತಾಂವ್‌. ಪುಣ್ ರುಚಿಕ್‌ ನಾ ಜಾಲ್ಯಾರ್‌ ಸೆವ್ತಾನಾ ನಿರಾಸ್‌ ಭೊಗ್ತಾ. ಆಮಿ ಪಯ್ಶೆ ವಿಬಾಡ್‌ ಕೆಲೆಂಗೀ ಮ್ಹಣ್ ಚುರ್ಚುರೆ ಭೊಗ್ತಾ. ಪುಣ್ ಹಾಂಗಾಸರ್‌ ಆಮ್ಚ್ಯಾ ಖುಶೆಚೆಂ ಖಾಣ್‌ ಜಾಯ್‌ ಮ್ಹಣೊನ್ ಆಮಿ ಕಾಂಯ್‌ ಪಯ್ಶೆ ದೀವ್ನ್ ಆರ್ಡರ್‌ ಕರುಂಕ್‌ ನಾ. ತಾಣಿ ದಿಲ್ಲೆಂ ತೆಂ ಆಮಿ ಘೆತ್ಲಾಂ. ಪುಣ್ ಆಮಿ ನಿರೀಕ್ಷಾ ಕೆಲ್ಲ್ಯಾಚಾಕೀ ಚಾರ್‌ ವಾಂಟೆ ರುಚಿಕ್‌ ಖಾಣ್‌ (ತೆಂಯೀ ಕಿತೆಂಚ್‌ ಮೆಳಾನಾಸ್ತಾಂ ಭುಕೆನ್ ಆಸ್‌ಲ್ಲ್ಯಾ ವೆಳಾರ್‌) ಆಮ್ಕಾಂ ಮೆಳ್ತಾನಾ ಸರ್ಗ್‌ಚ್‌ ಏಕ್‌ ಪಾವ್ಟಿಂ ಧರ್ಣಿಕ್‌ ದೆಂವೊನ್‌ ಆಯಿಲ್ಲ್ಯಾ ಬರಿಂ ಜಾಲೆಂ. ಆಸಲೆ ಬರೆ ಸಾಮಾರಿಯಾಗಾರ್‌ ಆಸ್‌ಲ್ಲ್ಯಾ ವರ್ವಿಂಚ್‌ ಸಬಾರ್‌ ನಕಾರಾತ್ಮಕ್‌ ಸಂಗ್ತಿಂ ಮಧೆಂಯೀ ಸಂಸಾರಾಂತ್‌ ಮನ್ಶಾಪಣಾಚಿ ಝರ್‌ ವ್ಹಾಳೊನ್‌ ಆಸಾ ನೈಂಗಿ?
► ಮೆಲ್ಕ ಮಿಯಾರ್
ತುವೆಂ ಜೆವ್ತಾನಾಂ, ಮ್ಹಜೆಂ ಪೋಟ್ ಬೊರ್ಲೆಂ.