ಭಾರತ್ ದೇಶಾಚಿ ಪರ್ಜಾ ಚಡಾವತ್ ಅಶಿಕ್ಪಿ. ಪೂಣ್ ಆತಾಂ ಪ್ರಗತಿ ಜೊಡುನ್ ಆಸಾ ತರೀ ಅಜೂನ್ ಜಾಯ್ತಿ ದುಬ್ಳ್ಯಾ ವರ್ಗಾಚಿ. ದೆವಾಸ್ಪಣಾನ್ ಭರ್ಲೆಲಿ. ಫಿತಿಸ್ಪನಾನ್ ರೆಂವೊಡ್ಲೆಲಿ. ಭಾರತ್ – ಜಾಯ್ತ್ಯಾ ಜಾತಿ ಕಾತಿ, ವಿವಿಧ್ ಧರ್ಮ್, ಕುಳಿಯಾಂಚೆಂ ಕುಳಾರ್. ಧಾರ್ಮಿಕ್ ದೆವಾಂ ಸವೆಂ ನಾಂವಾಡ್ದಿಕ್ ಕಲಾಕಾರಾಂ, ರಾಜಕೀಯ್ ಮುಕೆಲ್ಯಾಂಚೊ ತಸ್ವಿರ್ಯೊ ಮೂರ್ತಿ ಕರುನ್ ತಾಂಕಾಂಯ್ ದೆವಾಚೊ ಮಾನ್ ಆನಿ ಆರಾಧನ್. ಶಹರಾಂನಿ ಉದ್ಯೋಗ್ ಜಿವಿತಾ ಸ್ಥಿತಿ ಊರ್ಜಿತ್ ಕರ್ಯೆತಾ ಜಾಲ್ಲ್ಯಾನ್ ಹಳ್ಳೆಂತ್ಲೊ ಲೋಕ್ ಶಹರಾಂನಿ ವಸ್ತಿ ಕರ್ನ್, ವೃತ್ತಿ ಆಪ್ಣಾವ್ನ್, ಊಂಚ್ಲೆಂ ಶಿಕಾಪ್ ಜೊಡುನ್ ಬರೆಂ ಜಿವಿತ್ ರೂಪಿತ್ ಕರ್ಚ್ಯಾಂತ್ ಯಶಸ್ವಿ ಜಾತಾತ್. ಪೂಣ್ ಸರ್ವಾಂಚಿ ಸ್ಥಿತಿ ಏಕ್ ಲೇಕ್ ಆಸಾನಾ. ದುರ್ದಾಶಾ ಮ್ಹಳ್ಯಾರ್ – ಗ್ರೇಸ್ತ್ ಆಸ್ಲಲೊ ಆಪ್ಲೆಂ ಭಂಡಾರ್ ವಾಡೊವ್ನ್ ಆಸ್ತಾ, ತರ್ ದುಬ್ಳೊ ಎಕಾ ಜೆವ್ಣಾಕ್ ವೊದ್ದಾಡ್ಚೊ ಜಾಯ್ತೊ ಲೋಕ್ ಆಸಾ. ಮಾತ್ಯಾ ವಯ್ರ್ ಪಾಕೆಂ ನಾತ್ಲೆಲಿಂ, ಧಣ್ಸಾಲ್ಲ್ಯಾ ಕುಡಿಕ್ ಸುಶೆಗ್ ದೀಂವ್ಕ್ ಭಿಛಾಣೆಂ ನಾತ್ಲೆಲಿಂ ಕೆದಾಳಾ ಆಪ್ಲೊ ಫುಡಾರ್ ಉದ್ದಾರ್ ಜಾಯ್ತ್ ಮ್ಹಣ್ ರಾಕೊನ್ ಆಸಾತ್. ಪೂಣ್ ಪರಿಸ್ಥಿತಿ ಬದ್ಲೊನ್ ಆಸಾ ಖಂಡಿತ್.
ವಿವಿದ್ ಕ್ಷೇತ್ರಾಂತ್ ಭಾರತ್ ಆಜ್ ಊರ್ಜಿತ್ ಜಾಲಾ. ಗರ್ಜೆಚೆಂ ಶಿಕಾಪ್ ಆಪ್ಣಾವ್ನ್ ಘನಾ-ಮಾನಾಚೆ ಬರೆ ಹುದ್ದೆ ಜೊಡುನ್ ಸಾಮಾಜ್ ಸುದ್ರೊಂಕ್ ಕಾರಣ್ ಜಾಲಾಂ. ಶಿಕಾಪ್ ಜೊಡುಂಕ್ಯೀ ದುಡು ಜಾಯ್. ಶಿಕ್ಪಾ ಮಹತ್ವ್ ಜಾಣಸ್ಲಿಂ ರೀಣ್ ಕಾಡ್ನ್ ಊಂಚ್ಲೆಂ ಶಿಕಾಪ್ ಜೊಡ್ತಾತ್. ಆಜ್ ಕಾಲ್ ಸ್ಕೊಲರ್ಶಿಪ್ ವ್ಯವಸ್ಥಾ ಬರ್ಪೂರ್ ಆಸಾ. ವಿದೇಶಿ ಶಿಕ್ಪಾ ಸಂಸ್ಥೆ ಆಧುನಿಕ್ ಶಿಕಾಪ್ ದಿತಾತ್ ಆಸ್ತಾಂ ತೆಂ ಆಪ್ಣಾಂವ್ಕ್ ಭಾರತೀ ವಿದ್ಯಾರ್ಥಿ ಅಮೆರಿಕಾ, ಕೆನಾಡಾ, ಯುರೋಪಾಕ್ ಪಾವ್ಲಾ ಆನಿ ಥಂಯ್ಚ್ ವೃತ್ತಿ ಆಪ್ಣಾಂವ್ಕ್ ಲಾಗ್ಲಾ. ಹೆವ್ಶಿಲ್ಯಾನ್ ಭಾರತಾಂತ್ ಶಿಕಾಪ್ ಜೊಡ್ಲೆಲಿಂಯೀ ಬರೆ ಉದ್ಯೋಗ್ ಸೊಧುನ್ ವಿದೆಶಾಕ್ ಪಾವ್ತಾತ್ ಆನಿ ಥಂಯ್ಚ್ ಫುಡಾರ್ ಬಾಂದುಂಕ್ ಪಾವ್ತಾತ್. ಅಸಲ್ಯಾ ರಾಶ್ಟ್ರಾಂನಿ ಪಾವ್ಲೆಲಿಂ ಪಾಟಿಂ ಯೆಂವ್ಕ್ ತಯಾರ್ ಆಸಾನಾಂತ್. ಹಾತ್ ಭರ್ ಸಾಂಬಾಳ್ , ವಿವಿಧ್ ಸರ್ಕಾರಿ ಸವ್ಲತ್ಯೊ, ಸುಖಾಳ್ ಜಿವಿತ್ ಆಸ್ತಾಂ ಥಂಯ್ಚ್ ಪಾಳಾಂ ರೊಂಬಂವ್ಕ್ ಸಕ್ತಾತ್. ನಾಗರಿಕ್ಪಣ್ [ಗ್ರೀನ್ ಕಾರ್ಡ್] ಆಪ್ಣಾಯ್ತಾತ್. ಜಾಯ್ತೊ ಭಾರತೀ ಲೋಕ್ ಉದ್ಯೋಗ್ ಆರಾವ್ನ್ ಗಲ್ಫ್ ರಾಷ್ಟ್ರಾಂನಿ ಪಾವ್ಲಾ ಆನಿ ಜೊಡ್ಲಾಂ. ತರೀ ನಾಗರಿಕ್ಪಣ್ ಜೊಡುಂಕ್ ಸಕಾನಾ. ಪೂಣ್ ಅರ್ವಿಲ್ಯಾ ದಿಸಾಂನಿ ಯು.ಎ.ಇ. ಸರ್ಕಾರಾನ್ ವ್ಯವಹಾರ್ ಕರ್ತೆಲ್ಯಾಂಕ್, ಉನ್ನತ್ ಹುದ್ದೆ ಆಪ್ಣಾಯಿಲ್ಲ್ಯಾಂಕ್ ಗವ್ರವ್ (ಗೊಲ್ಡನ್ ರೆಸಿಡೆನ್ಸಿ /ವಿಜಾ) ನಾಗರಿಕ್ಪಣ್ ದೀಂವ್ಕ್ ಸುರ್ವಾತಿಲಾಂ. ಧಾ ವರ್ಸಾಂಚಿ ವಿಜಾ ಆನಿ ಹರ್ಯೆಕ್ ಪಾವ್ಟಿಂ ಅಟೊಮೆಟಿಕ್ ಜಾತಾಂ. ವ್ಯಾಪಾರ್ ವಹಿವಾಟ್ ಕರ್ತೆಲ್ಯಾಂಕ್ ಸ್ವತಂತ್ರ್. ಹ್ಯಾ ವಗ್ತಾ ಜಾತ್, ಕುಳಿ, ಧರ್ಮ್ ಆಡ್ ಯೇನಾ. ಪೌರತ್ವ್ ಲಾಭಾನಾ ತರೀ ಜಾಯ್ತೊ ಬಾರತೀ ಲೋಕ್ ಜಾಯ್ತ್ಯಾ ವರ್ಸಾಂ ಥಾವ್ನ್ ಗಲ್ಫಾಂತ್ ಜಿಯೆವ್ನ್ ಆಸಾ. ಆಮ್ಚೆ ಮಂಗ್ಳುರಿ ಕಾಂಯ್ ಉಣೆಂ ನಾಂತ್.
ಯುರೋಪ್ ಅಮೇರಿಕಾ ಪಾವ್ಲೆಲಿಂ ದೇಶವಾಸಿ, ಥಂಯ್ಸರ್ ಪಾವ್ಲೆಲಿಂ ಪೌರತ್ವ್ ಜೋಡ್ನ್ ಆಪ್ಲಿ ನಿಪುಣಾಯ್ ದಾಕಂವ್ಚೆಂ ಪ್ರಯತ್ನ್ ಕರುನ್ ಆಸಾತ್. ಹರ್ಯೆಕಾ ಕ್ಷೇತ್ರಾಂನಿ ವ್ಹಡ್ ಹುದ್ದೆ ಆಪ್ಣಾವ್ನ್ ಗುರ್ಕಾರ್ಪಣ್ ದಾಕಯ್ತಾತ್. ಸುಂದರ್ ಪಿಚ್ಚೈ – ಗೂಗಲ್, ಸತ್ಯ ನಡೆಲ್ಲಾ – ಮೈಕ್ರೋಸೋಪ್ಟ್, ಇಂದ್ರ ನೂಯಿ – ಪೆಪ್ಸಿ ಕಂಪೆನಿಂತ್, ಅಶೆಂ, ಪಟ್ಟಿ ಬೋವ್ ಲಾಂಬ್ ಆಸಾ. ಸಂಸಾರ್ ಭರ್ ರಾಜ್ವಟ್ಕಿ ಚಲಯಿಲ್ಲ್ಯಾ, ಆಪ್ಲೆಂ ಬಳ್ ದಾಕಯಿಲ್ಲ್ಯಾ ಗೊರ್ಯಾ ಕಾತಿಚ್ಯಾಂಕ್ ಆಪ್ಲ್ಯಾ ಸಂಸ್ಥ್ಯಾಚೆ ಉನ್ನತ್ ಹುದ್ದೆ ಏಶಿಯಾ ಖಂಡಾಚ್ಯಾಂಕ್ ದಿತಾನಾ ಉಣೆಪಣ್ ಭಗನಾಂಗಿ? ರಾಜಕೀಯಾಂತ್, ಗೌಪ್ಯ್ ಸಂಸ್ಥೆ ಜಾವ್ನಾಸ್ಚಾ ರಕ್ಷಣಾ ವ್ಯವಸ್ಥೊ ಪೆಂಟಗಾನಾ, ಬಾಹ್ಯಾಕಾಶ್ ಸಂಸ್ಥೊ ನಾಸಾಂತ್ಯೀ ಭಾರತೀಯ್ ಶಾತಿ ದಾಕಂವ್ಕ್ ಲಾಗ್ಲ್ಯಾತ್. ಭಾರತೀ ಮುಳಾಚಾ ಅಮೇರಿಕಾಂತ್ ಜಲ್ಮಾಲ್ಲ್ಯಾ ಸುನಿತಾ ವಿಲಿಯಮ್ಸ್, ಅಮೇರಿಕಾಚೆಂ ಪೌರತ್ವ್ ಜೊಡ್ಲೆಲ್ಯಾ ದೆ.ಕಲ್ಪನಾ ಚಾವ್ಲಾನ್ ಬಾಹ್ಯಾಕಾಶ್ ನಿಲ್ದಾಣಾಂತ್ ಭೆಟ್ ಕೆಲ್ಯಾ. ಆನಿ ಶರಿಫಾ ಬಾಂಡ್ಲಾ ಹ್ಯಾಚ್ಚ್ ವರ್ಸಾ ಬಾಹ್ಯಾಕಾಶಾಕ್ ಭೆಟ್ ದೀವ್ನ್ ಆಯ್ಲಿ. ಭಾರತೀಯಾಂಕ್ ಹಿ ಸಂತೊಸಾಚಿ ಗಜಾಲ್.
ಭಾರತೀಯ್ ರಾಜಕೀಯಾಂತೀ ಪಾಟಿಂ ನಾಂತ್. ‘ಪೊಲಿಟಿಕ್ಸ್’ ಮ್ಹಳ್ಳೊ ಸಬ್ದ್ ಥೊಡ್ಯಾ ಭಾರತೀಯಂಚಾ ರಗ್ತಾಂತ್ಚ್ ಮಿಸ್ಳಾಳ್ಳೊ ಆಸಾ ತೆಂ ಹಾಂಚಿಂ ಕರ್ತುವಾಂ ಪಳೆತಾನಾ ಕಳ್ತಾ. ಥೊಡ್ಯಾ ಮುಖೆಲ್ಯಾಂಕ್ ಬುರ್ಶಾ ಕಸ್ತಳಾಕ್ , ಕುಸೊನ್ ಘಾಣ್ ಯೆಂವ್ಚ್ಯಾ ಮೊಡ್ಯಾಕ್ ಸರಿ ಕರ್ಯೆತಾ. ಹುದ್ದೊ, ಮಾನ್, ಗೌರವ್, ದುಡು ಜೊಡುಂಕ್ ಖಂಚಿಂಯೀ ಹಲ್ಕಟ್ ಕಾಮಾಂ ಕರುಂಕ್ ಪಾಟಿಂ ನಾಂತ್. ಆಮ್ಚೊ ಕರ್ನಾಟಕ ದೃಷ್ಟಾಂತ್ ಘೆವ್ಯಾಂ. ಅಸಲ್ಯಾ ದೇಶಾಚೆ ನಾಗರಿಕ್ ವಿದೇಶಾಂನಿ ನಾಗರಿಕ್ಪಣ್ ಆಪ್ಣಾವ್ನ್ ಥಂಯ್ಚಾ ರಾಜಕೀಯಾಂತ್ ಜರ್ಲ್ಯಾಂಬರಿ ಮಿಶಿ ರಿಗವ್ನ್ ಉಪ್ರಾಂತ್ ಸಂಪೂರ್ಣ್ ಭಿತರ್ ವೊಚೊನ್ ಥಂಯ್ಚೆ ಹುದ್ದೆ ಆಪ್ಣಾಯ್ತಾನಾ, ಥಂಯ್ಚಾ ಮುಳಾವ್ಯಾ ಲೊಕಾಕ್ ಕಿತ್ಯಾಕ್ ಖೊರ್ಜನಾ ಮ್ಹಳ್ಳೆಂ ಸಮ್ಜಾನಾ. ಸಂವಿಧಾನಾಂತ್ ತಸಲೆ ಆವ್ಕಾಸ್ ಆಸಾತ್ ಜಾಂವ್ಕ್ ಪುರೊ, ಆನಿ ಥಂಯ್ಚ್ಯಾ ಲೊಕಾ ಥಂಯ್ ಬರೊ ಉದ್ದೇಶ್ ಆಸೊಂಕ್ ಪುರೊ.
ಅಮೇರಿಕಾಂತ್ ಡೆಮೊಕ್ರೆಟಿಕ್ ಪಾರ್ಟಿ ಮುಖಾಂತ್ರ್ ಜಿಕೊನ್ ಆಯ್ಲೆಲ್ಯಾ ಜೊ ಬಿಡೆನ್ ಸರ್ಕಾರಾಂತ್ ಉಪಾಧ್ಯಕ್ಷಿಣ್ ಜಾವ್ನ್ ವಿಂಚುನ್ ಆಯಿಲ್ಲಿ ಕಮಾಲಾ ಹ್ಯಾರಿಸ್ ಜಲ್ಮಾನ್ ಅಮೇರಿಕನ್ ನಾಗರಿಕ್ ತರೀ ಆವಯ್ ಶ್ಯಾಮೆಲಾ ಗೋಪಾಲನ್ ಭಾರತೀ ಹಿಂದು. ಕಮಲ ಹ್ಯಾರಿಸ್ಯೀ ಹಿಂದು ಧರ್ಮಾಂತ್ ಆಸಕ್ತ್ ದಾಕಯ್ತಾ ಆನಿ ಪಾಳ್ತಾ. ಪ್ರಸ್ತುತ್ ಉಪಾಧ್ಯಕ್ಷಿಣ್ ಜಾವ್ನಾಸ್ತಾ, ಮುಖ್ಲಿ ರಾಷ್ಟ್ರಾಧ್ಯಕ್ಷಿಣ್ ಜಾಂವ್ಕ್ ಸಾಧ್ಯ್ ಆಸಾ, ಮ್ಹಳ್ಳೆಂ ಭಾರತೀಯಾಂಚೆಂ ಲೇಕ್. ಏಕುಣೆ ಪನ್ನಾಸಾವೊ ಉಪಾಧ್ಯಕ್ಷ್ ಹುದ್ದೊ ಜಾವ್ನಾಸೊನ್ ಪಯ್ಲಿ ಸ್ತ್ರೀ ಉಪಾಧ್ಯಕ್ಷಿಣ್. ಅಮೇರಿಕಾಚಾ ಎಲಿಸಾಂವಾಂ ವೆಳಾರ್ ಭಾರತೀಯಾಂಚೆ ವೋಟ್ ಆರಾಂವ್ಕ್ ರಾಜಕೀಯ್ ಪಾಡ್ತಿ ಪೆಚಾಡ್ತಾತ್. ಪ್ರಸ್ತುತ್ ಜೋ ಬಡೆನಾಚಾ ಆಡಳ್ತ್ಯಾಂತ್ ವಿಸಾಂಚಾಕೀ ಚಡಿತ್ ಭಾರತೀಯ್ ಮುಳಾಚ್ಯಾಂಕ್ ಬರೆ ಹುದ್ದೆ ಲಾಭ್ಲ್ಯಾತ್. ವಿಶೇಷ್ ಕಿತೆಂಗೀ ಮ್ಹಳ್ಯಾರ್ ಹಾಂಗಾಯ್ ಸ್ತ್ರೀಯೊ ಮುಖಾರ್. ಭಾರತೀಯ್ ಮುಳಾಚಿ ನಮೃತ ನಿಕ್ಕಿ ಹ್ಯಾಲೆ ರಿಪಬ್ಲಿಕ್ ಪಾಡ್ತಿಂತ್ ಮುಕ್ಲ್ಯಾ ಪಂಕ್ತೆರ್ ಆಸಾ. ಮುಕಾರ್ ಅಧ್ಯಕ್ಷೀಯ್ ಸ್ಥಾನಾಕ್ ಉಮೆದ್ವಾರ್ ಜಾಂವ್ಕೀ ಸಾಧ್ಯ್ ಆಸಾ. ಆಮ್ಚ್ಯಾ ಜಾಯ್ತ್ಯಾ ಮಂಗ್ಳುರ್ಗಾರಾಂನಿ ಅಮೇರಿಕನ್ ನಾಗರಿಕತ್ವ್ ಜೊಡ್ಲಾಂ ತರೀ ಕೊಣೀ ರಾಜಕೀಯಂತ್ ಝಳ್ಕನಾಂತ್.
ಬ್ರಿಟನಾಂತ್ ಭಾರತೀಯಾಂಚೊ ಪ್ರಭಾವ್ ಆಸಾ. ಪ್ರಸ್ತುತ್ ಆಡಳ್ತ್ಯಾಂತ್ ತೆಗಾಂಕ್ ಕ್ಯಾಬಿನೆಟ್ ದರ್ಜಾ ಪ್ರಾಪ್ತ್ ಜಾಲ್ಯಾ. ಉದ್ಯೋಗ್ ವ್ಯಾಪಾರ್ ವಹಿವಾಟಾಂತ್ ಭಾರತೀಯ್ ಮುಕಾರ್ ಆಸಾತ್.
ಆಸ್ಟ್ರೇಲಿಯಾಂತ್ ಭಾರತೀಯ್ 2.8%. ತ್ಯಾ ಪಯ್ಕಿ ಹಿಂದು ಸಮುದಾಯ್ 1.9%. ತರೀ ವೆಗಾನ್ ವಾಡ್ಚೊ ಭಾರತೀಯ್ ಲೋಕ್ ದುಸ್ರ್ಯಾ ಸ್ಥಾನಾರ್ ಆಸಾ. ವಿಶ್ವ ಯೋಗ ದಿಸಾ ಸಂಸತ್ತಾಂತ್ ಯೋಗಾಭ್ಯಾಸ್ ಚಲವ್ನ್ ವರುಂಕ್ ಯಶಸ್ವಿ ಜಾಲ್ಯಾತ್. ಆಸ್ಟ್ರೆಲಿಯಾಚಾ ಶಿಕ್ಷಣ್ ವ್ಯವಸ್ಥೆಂತ್ ಯೋಗ ಮಾಂಡುನ್ ಹಾಡುಂಕ್ ಮನವಿಯೀ ದಿಲ್ಯಾ.
ಜಾತ್, ಧರ್ಮ್ ಪಳೆನಾಸ್ತಾನಾ ಕ್ರಿಸ್ತಾಂವ್ ರಾಷ್ಟ್ರಾಂ ಪರ್ದೆಶಾಂತ್ ನಾಗರಿಕ್ಪಣ್ ದಿತಾತ್. ಮಾನವೀಯ್ ದೃಷ್ಟೆನ್ ಥೊಡ್ಯಾಂಕ್ ಆಸ್ರೊ, ಪೌರತ್ವ್ ಲಾಭ್ತಾ ತರ್, ಥೊಡ್ಯಾಂಕ್ ನಿಪುಣಾಯೆ ಖಾತಿರ್, ಔದ್ಯೋಗಿಂಕ್ಯೀ ಲಾಭ್ತಾ. ಪೂಣ್ ಹ್ಯಾ ವರ್ವಿಂ ಫುಡೆಂ ಕಂಠಕಾಂ ಉಬಿಂ ಜಾಂವ್ಕ್ ಸಾಧ್ಯ್ ಆಸಾ. ದೃಷಾಟಾಂತ್ ದಿಂವ್ಚೆಂ ತರ್, ಕ್ರೀಸ್ತೀ ರಾಷ್ಟ್ರ್ ಜಾವ್ನಾಸ್ಚಾ ಫ್ರಾನ್ಸ್ ದೇಶಾಂತ್ ಗೆಲೆತ್ಯಾ ಅಕ್ಟೋಬಾರಾಂತ್ ಜಾಲ್ಲೊ ಹಿಂಸಾತ್ಮಕ್ ಗಲಾಟೊ. ಎಕಾ ಪ್ರಾದ್ಯಾಪಾಕಾನ್ ಲಿಸಾಂವಾ ವೆಳಾ ಮೊಹಮ್ಮದ್ ಪ್ರವಾದ್ಯಾಚೊ ಆಕ್ಮಾನ್ ಕೆಲೊ ಮ್ಹಣ್ ಚಲಿಯೆನ್ ಮಾಂಡ್ಲ್ಲೊ ಆರೋಪ್. ಪರಿಣಾಮ್ ತ್ಯಾ ಚಲ್ಯೆಚಾ ಭಾವಾನ್ ತ್ಯಾ ಪ್ರಾದ್ಯಾಪಾಕಾಚೊ ಜೀವ್ ಕಾಡ್ಲೊ. ಹ್ಯಾ ವರ್ವಿಂ ಹಿಂಸಾಚಾರ್ ವಾಡ್ಲೊ. ಇಗರ್ಜಾಂಚೆರ್ ಹಲ್ಲೊ ಜಾಲೊ. ಪಾವಾನಾತ್ಲ್ಯಾಕ್ ಸಗ್ಳ್ಯಾ ಸಂಸಾರಾರ್ ತ್ಯಾ ಸಮುದಾಯೆನ್ ಪ್ರತಿಭಟನ್ ಚಲಯ್ಲೆಂ. ಉಪ್ರಾಂತ್ ಕಳಿತ್ ಜಾಲ್ಲಿಂ ಸತ್ ಗಜಾಲ್, ತ್ಯಾ ಚಲಿಯೆನ್ ಫಟಿ ಮಾರ್ಲ್ಲೆಂ. ಹೆಂ ಕುಟಮ್ ಕಾಂಯ್ ಮೂಳ್ ನಿವಾಸಿ ನಂಯ್. ನಿರಾಶ್ರಿತ್ ಜಾವ್ನ್ ಆಯಿಲ್ಲೆಂ.
ಆನಿಂ ಆತಾಂ ಅಫ್ಘಾನಿ ನಿರಾಶ್ರಿತ್ ಆಸ್ರೊ ಸೊದುನ್ ಆಸಾತ್. ಮಾವವೀಯ್ ದೃಷ್ಟೆನ್ ಕೆನಾಡಾ, ಅಮೇರಿಕಾ, ಬ್ರಿಟನ್, ಫ್ರಾನ್ಸ್ ಆನಿ ಇತರ್ ರಾಷ್ಟ್ರಾಂನಿ ಹ್ಯಾ ನಿರಾಶ್ರಿತಾಂಕ್ ಆಸ್ರೊ ದಿಲಾಂ. ಥೊಡ್ಯಾ ವರ್ಸಾಂ ನಂತರ್ ಹಿಂ ಆಪ್ಲಿ ಹಕ್ಕಾ ವಿಚಾರುಂಕ್ ಸುರು ಕರ್ತೆಲಿಂ. ಹ್ಯಾ ವೆಳಾ ಇತರ್ ಸಮುದಾಯಾಂಕ್, ಸರ್ಕಾರಾಕ್ ಸೊಸುಂಕ್ ಪಡ್ತಲೆಂ. ವಿಚಿತ್ರ್ ಕಿತೆಂಗೀ ಮ್ಹಳ್ಯಾರ್, ಕ್ರಿಸ್ತಾಂವಾಂಚಿ ರಾಷ್ಟ್ರಾಂ ಜಾವ್ನಾಸ್ಚಿಂ, ಕೆನಡಾ, ಅಮೆರಿಕಾ, ಆನಿ ಇತರ್ ರಾಷ್ಟ್ರಾಂನಿ ಕ್ರಿಸ್ತಾವಾಂಚಿ ದೇವ್ ತೆಂಪ್ಲಾಂ, ಹುಲ್ಫಾಂವ್ಚೆಂ, ಅನ್ಯಾಯ್ ಕರ್ಚೆಂ ಚಡೊನ್ ಯೆತಾ. ಜಾಯ್ತ್ಯೊ ಪರ್ನ್ಯೊ ಇಗರ್ಜ್ಯೊ ದೆಸ್ವಾಟ್ ಜಾಲ್ಯಾತ್.
ಲಗ್ಭಗ್ ತೀನ್ ಕೊರೊಡಾಂಚಾಕೀ ಚಡಿತ್ ಭಾರತೀಯ್ ವಿದೇಶಾಂನಿ ಪಾವ್ಲ್ಯಾತ್. ಆನಿ ಸಂಸಾರಾಚಾ ಚಡಾವತ್ ರಾಷ್ಟ್ರಾಂನಿ ವ್ಹಡ್ ಹುದ್ದೆ ಆಪ್ಣಾಂವ್ಚಾಂತ್ ಯಶಸ್ವಿ ಜಾಲ್ಯಾತ್. ಪ್ರಸ್ತುತ್ ಭಾರತೀ ಮುಳಾಚೆಂ ಪ್ರಧಾನಿ ಜಾವ್ನ್ ಆಂಟನಿ ಕೋಸ್ತಾ ಪೋರ್ಚುಗಲ್, ಪ್ರವಿಂದ್ ಜಾಗ್ನಾತ್ ಮಾರಿಷಷ್ ಪ್ರಧಾನಿ ಜಾವ್ನ್ ಆನಿ ಅಧ್ಯಕ್ಷ್ ಪೃಥ್ವಿರಾಜ್ ಸಿಂಗ್, ಗಯಾನಾ ಅಧ್ಯಕ್ಷ್ ಇರ್ಫಾನ್ ಆಲಿ ಆನಿ ಇತರ್ ರಾಷ್ಟ್ರಾಂನಿ ಉಪ ಪ್ರಧಾನಿ, ಉಪ ರಾಷ್ಟ್ರಪತಿ ಜಾವ್ನ್ ಆಡಳ್ತೆ ಚಲಯ್ತಾತ್. ಸಾಧಾರ್ಣ್ ಪಂದ್ರಾ ರಾಷ್ಟ್ರಾಂನಿ ಸಾಟ್ ಜಣಾಂಚ್ಯಾಕೀ ಚಡಿತ್ ಕ್ಯಾಬಿನೆಟ್ ದರ್ಜಾ ಆಪ್ಣಾವ್ನ್ ಗುರ್ಕಾರ್ಪಣ್ ಜೊಡ್ಲಾಂ ಭಾರತೀಯಾಂನಿ.
ಅಮೇರಿಕಾ, ಕೆನಡಾ, ಯುರೋಪಾಕ್ ವೊಚೊಂಕ್ ಭಾರತೀ ಲೋಕ್ ಚಡ್ ಹುಮೆದ್ ದಾಕಯ್ತಾತ್. ವಿದ್ಯಾರ್ಥಿಂಕ್, ಶಿಕ್ಪ್ಯಾಂಕ್ ಸುಲಭಾಯೆನ್ ರೀಗ್ ಮೆಳ್ತಾ ತರ್, ಪಯ್ಶೆ ಯೆಟುನ್ ವಾಂಕ್ಡ್ಯಾ ವಾಟೆನ್ ವೆಚೆ ಕಾಂಯ್ ಉಣೆ ನಾಂತ್. ಶಿರ್ಕೊನ್ ಪಡ್ಲ್ಯಾರ್ ಶಿಕ್ಷಾ ಭೊಗುನ್ ತಡಿಪಾರ್ ಕರ್ತಾತ್. ವಿದೇಶಾಕ್ ಪಾವ್ಲ್ಲೆ ಹಿಂದು ಥಂಯ್ಚ್ಯಾ ಸ್ತ್ರೀಯಾಂಕ್ ಭುಲ್ ಘಾಲುನ್ ಲಗ್ನ್ ಜಾತಾತ್. ಅಶೆಂ ಸುಲಭಾಯೆನ್ ಥಂಯ್ಚೆಂ ನಾಗರಿಕ್ಪಣ್ ಜೊಡ್ಚೊ ಉಪಾಯ್ ಸೊಧ್ತಾತ್. ಅಮೇರಿಕಾ, ಇಂಗ್ಲೆಂಡಾಚಾ ಸಂಸದಾನಿ ಭಾರತೀ ಹಿಂದು ಫೆಸ್ತಾಂ ಆಚರಣ್ ಕರ್ಚಾಕ್ ಸುರ್ವಾತಿಲಾಂ. ಸಾರ್ವಜನಿಕ್ ಜಾಗ್ಯಾಂನಿ ಭಾರತೀಯ್ ಆಪ್ಲಿಂ ಫೆಸ್ತಾಂ, ಸಂಸ್ಕ್ರತಿಕ್ ಕಾರ್ಯೆಂ ಸಾದರ್ ಕರ್ತಾತ್. ಆನಿ ಸರ್ಕಾರಾಚಿ ಕಬ್ಲಾತ್ ಆಸ್ತಾ. ಮೋದಿ ಸಗ್ಳ್ಯಾ ಸಂಸಾರಾರ್ ಹಿಂದು ಮೂಳ್ ಧರ್ಮಾ ಥಾವ್ನ್ ಉಬ್ಜಾಲ್ಲ್ಯಾ ‘ಯೋಗ’ ಕ್ ವೊಳಕ್ ಕರ್ನ್ ದಿಂವ್ಚಾತ್ ಸುಫಳ್ ಜಾಲಾ. ಆನಿ ಜೂನ್ 21 ತಾರಿಕ್ ಜಾಗತಿಕ್ ಯೋಗ ದಿವಸ್ ಕರಂವ್ಚಾಂತ್ ಯಶಸ್ವಿ ಜಾಲಾ. ಯೋಗ್ ಏಕ್ ವ್ಯಾಯಾಮ್ ನಯ್, ಆನಿಂ ಕ್ರಿಸ್ತಾಂವಾಂಕ್ ಹೆಂ ಲಾಗು ಜಾಯ್ನಾ ಮ್ಹಳ್ಳೊ ವಾದ್ಯೀ ಆಸಾಂ. ಪೂಣ್ ಕಥೊಲಿಕ್ ಸಮಡ್ತ್ ಶ್ಹೆಳೆವ್ನ್ ಯೆಂವ್ಚೊ ಧರ್ಮ್ ಜಾವ್ನಾಸ್ತಾಂ, ಹ್ಯಾ ವಿಶಿಂ ಜಾಗ್ವಣ್, ಉಜ್ವಾಡ್ ದೀಂವ್ಕ್ ಕೊಣೀ ನಾಂತ್ ಮ್ಹಣ್ ಪ್ರೊಟೆಸ್ಟೆಂಟ್ ಪಂಗಡ್ ಚತ್ರಾಯ್ ದಿತಾತ್.
ಎಕಾ ಸಂದರ್ಭಾರ್ ಹಿಂದು ಸಮೊಡ್ತ್ ಸಂಸಾರ್ ಭರ್ ಪ್ರಸಾರ್ತೆಲಿ ಆನಿ ಹಿಂದುತ್ವವಾದಿ ಆಡಳ್ತೆಂ ಚಲಯ್ತೆಲೆ ಮ್ಹಳ್ಳಿ ಭವಿಷ್ಯವಾಣಿ ಲಿಯೊ ಟೊಲ್ಸ್ಟೊಯ್, ಮೈಕಲ್ ನೋಸ್ಟ್ರಾಡಾಮಸ್ ಆನಿ ಹೆರಾಂನಿ ಉಚಾರ್ಲ್ಲಿ ಆಸಾ.
ವಿದೇಶಾಂಕ್ ಪಾವ್ಲೆಲ್ಯಾ ಭಾರತೀಯಾಂಕ್ ಧರ್ಮ್, ಕಾತ್, ಜಾತ್ ಲೆಕಿನಾಸ್ತಾಂ, ಬರೆ ಹುದ್ದೆ ಲಾಬ್ತಾತ್ ತರ್, ಭಾರತಾಂತ್ಲ್ಯಾ ಕ್ರಿಸ್ತಾಂವಾಂಕ್ ಯೆದೊಳ್ ಹುದ್ದೆ ಮೆಳೊಂಕ್ ನಾಂತ್. ಭಾರತಾಚಾ ಸಂವಿದಾನಾ ಪ್ರಕಾರ್ 2004 ತ್ ಜಾಲ್ಲ್ಯಾ ಎಲಿಸಾಂವಾಂತ್ ಶ್ರೀಮತಿ ಸೋನಿಯಾ ಗಾಂಧಿಕ್ ಭಾರತಾಚಿ ಪ್ರಧಾನ್ ಮಂತ್ರಿ ಜಾಂವ್ಕ್ ಸಾಧ್ಯ್ ಆಸ್ಲ್ಲೆಂ. ಮುಳಾನ್ ಇಟೆಲಿ ತರೀ ತಿಣೆ ಭಾರತೀಯ್ ನಾಗರಿಕ್ಪಣ್ ಆಪ್ಣಾಯಿಲ್ಲೆಂ ಆಸ್ತಾನಾ ವಿರೊದ್ಪಣ್ ಚಡ್ ಆಸ್ಲೆಲ್ಯಾನ್ ಪ್ರದಾನ್ ಮಂತ್ರಿಚಿ ಪದ್ವಿ ಸಾಂಡಿಜೆ ಪಡ್ಲಿ. ತಿ ವಿದೇಶಿ ಮುಳಾಚಿಂ ಮ್ಹಳ್ಳೆಂ ಮಾನುನ್ ಘೆವ್ಯಾಂ. ಆತಾಂ ಸವಾಲ್, ಭಾರತೀಯ್ ಕ್ರಿಸ್ತಾಂವಾಂಕ್ ಪ್ರಧಾನ್ ಮಂತ್ರಿಚಾ ಕದೆಲಾರ್ ಬಸೊಂಕ್ ಸಾಧ್ಯ್ ಆಸಾಗೀ? ಮ್ಹಜ್ಯಾ ಅಂದಾಜಾ ಪ್ರರ್ಮಾಣೆ ಸದ್ದ್ಯಾಕ್ ತರೀ ಬಿಲ್ಕುಲ್ ಸಾಧ್ಯ್ ನಾ. ಆನಿ ಹಾಕಾ ಕ್ರಿಸ್ತಾಂವಾಂನಿ ಸದ್ದ್ಯಾಕ್ ಸ್ವಪ್ಣೆಂವ್ಚೆಯೀ ನಾಕಾ. ಸಗ್ಳ್ಯಾ ಧರ್ಮಿಯಾಂಕ್ ರಾಷ್ಟ್ರಾಧ್ಯಕ್ಷ್, ಉಪ ರಾಷ್ಟ್ರಾಧ್ಯಕ್ಷ್ ಸ್ಥಾನ್ ಲಾಭ್ಲಾಂ ತರೀ ಕ್ರಿಸ್ತಾಂವಾಂಕ್ ಯೆದೊಳ್ ಕಸಲಿಚ್ ಬರಿ ಖಬಾರ್ ಯೇಂವ್ಕ್ ನಾಂ. ಸಮುದಾಯಾಂತ್ ಸಾಮರ್ತೆವಂತ್ ಕೊಣೀ ನಾಂತ್ ಮ್ಹಣ್ ನಯ್. ಪೂಣ್ ಅಡ್ಕಳಿ ಸಬಾರ್ ಆಸಾತ್. ಅಜೂನ್ ವೇಳ್ ಯೇಂವ್ಕ್ ನಾ? ಪ್ರಯತ್ನ್ ಕೆಲ್ಯಾರ್, ಏಕ್ ದೀಸ್ ಖಂಡಿತ್ ಉದೆತಲೊ.
► ಹೆನ್ರಿ ಡಿ’ಸೊಜಾ, ಕಾಟಿಪಳ್ಳ
