ಇಂಡಿಯನ್ ಐಡಲ್ ಬಾರಾವ್ಯಾ ಆವೃತ್ತೆಚ್ಯಾ ನಿಮಾಣ್ಯಾ ಪಾಂವ್ಡ್ಯಾರ್ ಪಾಂಚ್ವೆಂ ಸ್ಥಾನ್ ಆಪ್ಣಾವ್ನ್ ಅಖ್ಖ್ಯಾ ಕರ್ನಾಟಕಾಕ್ ಆನಿ ಮಂಗ್ಳುರಿ ಕ್ರೀಸ್ತಾಂವ್ ಸಮುದಾಯಾಕ್ ಕೀರ್ತ್ ಹಾಡ್ಲ್ಲ್ಯಾ ಅಲಂಗಾರ್ ಫಿರ್ಗಜೆಚ್ಯಾ ನಿಹಾಲ್ ತಾವ್ರೊಕ್ ಉಡುಪಿ ದಿಯೆಸೆಜ್ ಆನಿ ಉಡುಪಿ ಪ್ರದೇಶ್ ಕಥೊಲಿಕ್ ಸಭಾ, ಐ.ಸಿ.ವೈ.ಎಮ್ ಆನಿ ವೈ.ಸಿ.ಎಸ್. ಸಂಗಟನಾಂ ತರ್ಫೆನ್, ಉಡುಪಿ ಬಿಸ್ಪಾಚ್ಯಾ ಘರ್ಚ್ಯಾ ಸಭಾಸಾಲಾಂತ್, ಆಯ್ತಾರಾ, 29 ಅಗೋಸ್ತ್ 2021 ವೆರ್, ಉಡುಪಿ ದಿಯೆಸೆಜಿಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಜೆರಾಲ್ಡ್ ಐಸಾಕ್ ಲೋಬೊ ಹಾಣಿ ಸನ್ಮಾನ್ ಕೆಲೊ.
ನಿಹಾಲ್ ತಾವ್ರೊಕ್ ಉಲ್ಲಾಸುನ್ ಉಲಯಿಲ್ಲ್ಯಾ ಅ| ಮಾ| ದೊ| ಜೆರಾಲ್ದ್ ಐಸಾಕ್ ಲೋಬೊ ಹಾಣಿ ನಿಹಾಲ್ ಫಿರ್ಗಜ್ ಗಾಯನ್ ಮಂಡಳೆಚೊ ಸಾಂದೊ ಆನಿ ತಾಚೊ ಬಾಪುಯ್ ಹೆರಾಲ್ಡ್ ತಾವ್ರೊ ಗಾಯನ್ ಮೆಸ್ತ್ರಿ ಮ್ಹಳ್ಳೆಂ ನಮೂದ್ ಕರುನ್, ಮ್ಹಿನತೆನ್ ಆನಿ ಸಮರ್ಪಣಾನ್ ಆಜ್ ತೋ ಹ್ಯಾ ಪಾಂವ್ಡ್ಯಾಕ್ ಪಾವ್ಲಾ ಮ್ಹಣ್ ಮ್ಹಣ್ ಅಭಿಮಾನ್ ಉಚಾರ್ಲೊ. ನಿಹಾಲಾನ್ ಜಾಯ್ತಿಂ ಭಕ್ತಿಕ್ ಗಿತಾಂಯ್ ಗಾಯ್ಲ್ಯಾಂತ್, ಥಳೀಯ್ ಭಾಸಾಂನಿ ಗಾಯ್ಲಾಂ, ಥಳೀಯ್ ಸಂಗೀತ್ ಸ್ಪರ್ಧ್ಯಾಂನಿ ವಾಂಟೊ ಘೆತ್ಲಾ, ಇನಾಮಾಂ ಜೊಡ್ಲ್ಯಾಂತ್. ಪೂಣ್ ತಿತ್ಲ್ಯಾರ್ ಥಾಂಬಾನಾಸ್ತಾನಾ ಪ್ರಯತ್ನಾನ್ ಆನಿ ಪರಿಶ್ರಮಾನ್ ತೋ ಮುಕಾರ್ ಚಮ್ಕಾಲಾ. ತಾಲೆಂತ್ ಆಸ್ಚ್ಯಾ ತರ್ನಾಟ್ಯಾಂನಿ ತಾಚಿ ದೇಕ್ ಘೆಂವ್ಕ್ ಜಾಯ್ ಆನಿ ನಿಹಾಲ್ ತಾವ್ರೊ ಮಾರಿಫಾತ್ ಆಮ್ಚ್ಯಾ ಸಮುದಯಾಚೊ ತಾಳೊ ವ್ಹಡ್ಲ್ಯಾ ಪಡ್ದ್ಯಾರ್, ಪ್ಲೇ ಬ್ಯಾಕ್ ಸಿಂಗರಾ ರುಪಾರ್ ಆಮ್ಕಾಂ ವೆಗಿಂಚ್ ಆಯ್ಕೊಂಕ್ ಮೆಳೊಂಕ್ ಜಾಯ್ ಮ್ಹಣ್ ಬಿಸ್ಪ್ ಅ|ಮಾ|ದೊ| ಲೋಬೊ ಹಾಣಿ ಅಭಿಪ್ರಾಯ್ ಉಚಾರ್ಲಿ.
ಸನ್ಮಾನಾಕ್ ಜಾಪ್ ದೀವ್ನ್ ಆಪ್ಲಿಂ ಭೊಗ್ಣಾಂ ಉಚಾರ್ಲ್ಲ್ಯಾ ನಿಹಾಲ್ ತಾವ್ರೊನ್ ಆಪ್ಲ್ಯಾ ಸಂಗೀತ್ ಪಯ್ಣಾಂತ್ ಶಿಕಪ್, ಸಾಂಗಾತ್ ಆನಿ ಸಹಕಾರ್ ದಿಲ್ಲ್ಯಾ ಸಮೆಸ್ತಾಂಚೊಂ ಉಪ್ಕಾರ್ ಭಾವುಡ್ಲೊ.
ಹ್ಯಾ ಸುವಾಳ್ಯಾರ್, ಕಥೊಲಿಕ್ ಸಭೆಚೊ ಆತ್ಮೀಕ್ ನಿರ್ದೇಶಕ್ ಮಾ| ಬಾ| ಫರ್ಡಿನಾಂಡ್ ಗೊನ್ಸಾಲ್ವೀಸ್, ಉಡುಪಿ ಫಿರ್ಗಜೆಚೊ ವಿಗಾರ್ ಮಾ| ಬಾ| ಚಾರ್ಲ್ಸ್ ಮಿನೇಜಸ್, ಉಡುಪಿ ದಿಯೆಸೆಜಿಚೆ ಯಾಜಕ್, ಧರ್ಮ್ ಭಯ್ಣಿಂ, ನಿಹಾಲ್ ತಾವ್ರೊಚಿ ಆವಯ್ – ಭಾಪುಯ್ – ಭಾಂವ್ಡಾಂ ಹಾಜರ್ ಆಸ್ಲಿಂ.
ಕಾರ್ಯಕ್ರಮಾಚ್ಯಾ ಅಕೇರಿಕ್ ನಿಹಾಲ್ ತಾವ್ರೊನ್ ಏಕ್ ಭಕ್ತಿಕ್ ಗೀತ್ ಆನಿ ಏಕ್ ಹಿಂದೀ ಪದ್ ಗಾವ್ನ್ ಲೊಕಾಕ್ ಮನೊರಂಜನ್ ದಿಲೆಂ.
ತಸ್ವಿರ್ಯೊ / ವರ್ದಿ : ಅಲ್ಪೋನ್ಸ್ ಮೆಂಡೋನ್ಸಾ, ಪಾಂಗ್ಳಾ
