ಬಿಸ್ಪ್ ಬಾಜಿಲ್ ಸಾಲ್ವಾದೊರ್ ಸೊಜಾನ್ 1965 ಥಾವ್ನ್ 1996 ಪರ್ಯಾಂತ್, 31 ವರ್ಸಾಂಚ್ಯಾ ಲಾಮ್ಬ್ ಆವ್ಧೆಕ್ ಮಂಗ್ಳುರ್ ದಿಯೆಸೆಜಿಚೊ ಬಿಸ್ಪ್ ಜಾವ್ನ್ ಶಾಥಿವಂತ್ ಮುಕೆಲ್ಪಣ್ ದಿಲ್ಲೆಂ. ತಾಚ್ಯಾ ಮುಕೆಲ್ಪಣಾಂತ್ ದಿಯೆಸೆಜಿಂತ್ ಉಡುಪಿ, ದಕ್ಷಿಣ ಕನ್ನಡ ಆನಿ ಕಾಸರಗೋಡು ಜಿಲ್ಲೆಆಟಾಪುನ್ ಆಸ್ಲ್ಲೆ. ಬಿಸ್ಪ್ ಬಾಜಿಲಾಚ್ಯಾ ಗೊವ್ಳಿಕ್ ವಾವ್ರಾ ಕಾಳಾರ್ ಸಭಾರ್ ನವ್ಯೊ ಫಿರ್ಗಜ್ಯೊ, ಸಭಾರ್ ಶಿಕ್ಪಾಸಂಸ್ಥೆ, ಸಾಮಾಜಿಕ್ ಸೆವೆಚೆ ಸಂಸ್ಥೆ ಸುರ್ವಾತ್ಲೆ. ನವ್ಯೊ ಆಸ್ಪತ್ರ್ಯೊ, ಮಿಸಾಂವ್ ಠಾಣಿಂ ತಾಚ್ಯಾ ಮುಕೇಲ್ಪಣಾಂತ್ ವಾಡ್ಲಿಂ. ತಾಚ್ಯಾ ವಾವ್ರಾಚೊ ಫಳ್ ಜಾವ್ನ್ ಉದೆಲ್ಲೆಂ ಬೀದರ್ ಮಿಸಾಂವ್ ತಾಚ್ಯಾ ಪ್ರೇರಣಾನ್ ವಾಡಾವಳಿಕ್ ಯೇವ್ನ್ ಗುಲ್ಬರ್ಗ ದಿಯೆಸೆಜ್ ಜಾಲಿ.
ದುಸ್ರ್ಯಾ ವಾತಿಕಾನ್ ವಿಶ್ವಸಭೆಚ್ಯಾ ಶಿಕೊವ್ಣೆ ಪರ್ಮಾಣೆಂ ತಾಣೆ ಸ್ಥಳೀಕ್ ಕೊಂಕ್ಣಿ ಭಾಸ್ ಲಿತುರ್ಜಿಂತ್ ಸ್ವೀಕಾರ್ ಕೆಲಿ. ತ್ಯಾ ಖಾತಿರ್ ಮಿಸಾಲ್ ಪುಸ್ತಕ್, ಮಿಸಾಂಚ್ಯಾ ವಾಚ್ಪಾಂಚೆ ಪುಸ್ತಕ್, ನವೊ ಸೊಲ್ಲೊ ಕೊಂಕಣಿ ಭಾಶೆಕ್ ಭಾಶಾಂತರ್ ಕರಯ್ಲೆ. ತೆಚ್ ಪರಿಂ ಚಡ್ ಆನಿ ಚಡ್ ಲೊಕಾಂಕ್ ಆನಿ ಚಡ್ ಕರ್ನ್ ಲಾಯಿಕಾಂಕ್ ಸ್ಥಳೀಕ್ ಪವಿತ್ರ್ ಸಭೆಚ್ಯಾ ಆಡಳ್ತ್ಯಾಂತ್ ಮೆತೆರ್ ಕರ್ಚ್ಯಾಕ್ ಭಾರತಾಂತ್ಚ್ ಪಯಿಲ್ಲೆ ಪಾವ್ಟಿಂ ಗೊವ್ಳಿಕ್ ಪರಿಷಧೆಂಕ್ ಸಂಸ್ಥಾಪಿತ್ ಕೆಲೆಂ.
ಬಿಸ್ಪ್ ಬಾಜಿಲ್ ಸಾಲ್ವಾದೊರ್ ಸೊಜ್ ತಾರೀಕ್ 5.9.1996 ವೆರ್ ದೆವಾದೀನ್ ಜಾಲೊ ಆನಿ ತಾಕಾ ರುಜಾಯ್ ಕಾಥೆದ್ರಲಾಂತ್ ತಾರೀಕ್ 9.9.1996 ವೆರ್ ನಿಕೆಪಿಲೊ. ತೊ ದೆವಾದೀನ್ ಜಾವ್ನ್ ಆಂವ್ದುಂಕ್ 25 ವರ್ಸಾಂ ಸಂಪ್ತಾತ್. ಮಂಗ್ಳುರ್ಚ್ಯಾ ಗೊವ್ಳಿಬಾಪಾಂನಿ 9.9.2021 ವೆರ್ ರುಜಾಯ್ ಕಾಥೆದ್ರಲಾಂತ್ ಸಂಸ್ಮರಣೆಚೆಂ ಮೀಸ್ ದವರ್ಲಾಂ ಆನಿ ತ್ಯಾ ದಿಸಾ ಮಿಸಾ ಉಪ್ರಾಂತ್ ಬಿಸ್ಪ್ ಬಾಜಿಲಾವಿಶಿಂ ತಾಚ್ಯಾ 50 ಸಾಂಗಾತ್ಯಾಂನಿ ಆನಿ ಅಭಿಮಾನಿಂನಿ ಲಿಕ್ಲಲ್ಯಾ ಬುಕಾಚೊ ಸಂಗ್ರಹ್ ಲೊಕಾರ್ಪಣ್ ಜಾತಲೊ ಕಳಯ್ಲಾಂ.
