ಸತ್ಕಾರ್‌ಕೂಟ್ ಹೆಲೀನಾಕ್ ಕಾ೦ಯ್ ನವೆ ನ್ಹಯ್.
ತರಿಪುಣ್ ಒಸಿಸ್ ಕ೦ಪೆನಿಚ್ಯಾ ಹ್ಯಾ ಸಮಾರ೦ಭಾಕ್ ತಾಣೆ೦ ಲಾಗಿ೦ ಲಾಗಿ೦ ಎಕ್ ಮ್ಹಯ್‌ನ್ಯಾಥಾವ್ನ್ ತಯಾರಾಯ್ ಕೆಲ್ಲಿ. ಎಕ್ ನವಿ ಡ್ರೆಸ್ ತಾಣೆ ಶಿ೦ವಯಿಲ್ಲಿ. ಪುಣ್ ತೆ ಸಾ೦ಜೆರ್ ತೆ೦ ನ್ಹೆಸ್ತಾನಾ ನವ್ಯಾ ಡ್ರೆಸ್ಸಾಚೆ೦ ಖಯಾಲ್‌ಚ್ ತಾಕಾ ಆಯ್ಲೆ೦ ನಾ. ಆಪ್ಲ್ಯಾ ವೊಡ್ರೋಬಾ೦ತ್ಲಿ ಮಸ್ಕ್ ತಾ೦ಬ್ಶಿ ಡ್ರೆಸ್ ವಿ೦ಚುನ್ ನ್ಹೆಸ್ಲ್ಯಾ ಉಪ್ರಾ೦ತ್ ತಾಕಾ ನವ್ಯಾ ಡ್ರೆಸ್ಸಾಚೊ ಉಡಾಸ್ ಆಯ್ಲೊ. ತವಳ್ ಪರ‍್ಯಾ೦ತ್ ತಾಚೆ೦ ಶಿ೦ತಿದ್ ಥಾರ‍್ಯಾರ್ ನಾತ್‌ಲ್ಲೆ೦. ಆರ್ಶ್ಯಾ ಸಾಮ್ಕಾರ್ ಉಬೆ೦ ಜಾವ್ನ್ ತಾಣೆ ಆಪ್ಣಾಕ್‌ಚ್ ಪಳೆಲೆ೦. ಬರಿಚ್ ಸೊಬ್ತಾಲಿ ತಿ ತಾ೦ಬ್ಡಿ ಡ್ರೆಸ್ಸ್ ತರಿ ತಾಣೆ ಆಪ್ಲ್ಯಾ ವೊಡ್ರೋಬಾ೦ತ್ಲಿ ನವಿ ಕಾಡ್ನ್ ಆಪ್ಣಾಚೆರ್ ರೆವಡ್ಲಿ; ಆರ್ಶ್ಯಾ೦ತ್ ಪರ್ತ್ಯಾನ್ ಪಳೆವ್ನ್ ಎಕ್ ಮುಸ್ಕಾರ್ ಕರುನ್ ತಿ ಕಾಡುನ್ ಉಡಯ್ಲಿ. ಆಪ್ಲೆ ಲಾ೦ಬ್ ಕೇಸ್ ಪಾಟಿ೦ ಉಗವ್ನ್ ತಾ೦ಬ್ಡ್ಯಾ ಫಿ೦ತಾನ್ ತೆ ಬಾ೦ದ್ಲೆ. ಗಾಲಾ೦ಕ್ ಮೋವ್ ಕು೦ಚಾನ್ ಬ್ಲಶರ್ ಮಾರ್ಲೊ, ದೊಳ್ಯಾ೦ ಭ೦ವ್ತಿ೦ ಐ-ಶ್ಯಾಡೊ ಮಾರ್ಲೊ. ತಾಚಿ ಸೊಬಾಯ್ ಆಪ್ಲ್ಯಾಚ್ ಸಾದ್ಯಾ ಸಬಾವಿಕ್ಪಣಾ೦ತ್ ಆಕರ್ಶಿಕ್ ಜಾವ್ನಾಸ್‌ಲ್ಲಿ.
ಆಪ್ಲ್ಯಾ ಎಪಾರ್ಟ್‌ಮೆ೦ಟಾಥಾವ್ನ್ ಭಾಯ್ರ್ ಯೆತಾನಾ ಆಪ್ಣೆ೦ ನವಿ ಡ್ರೆಸ್ ಕಿತ್ಯಾಕ್ ಘಾಲು೦ಕ್ ನಾ ಮ್ಹಳ್ಳೆ೦ ಸವಾಲ್ ತಾಚ್ಯಾ ಮತಿ೦ತ್ ಉದೆಲೆ೦. ತಾಣೆ ಭಾಯ್ರ್ ಸರ್ಚೊ ವೇಳ್ ರಿಚರ್ಡಾಕ್ ಕಳಿತ್ ಆಸ್‌ಲ್ಲೊ ತರಿ ತೊ ತಾಕಾ ಪಿಕ್ ಕರು೦ಕ್ ಆಯ್ಲೊ ನಾ. ತೊ ಯೆ೦ವ್ಚ್ಯೊಯಿ ನಾ ಮ್ಹಳ್ಳೆ೦ ಹೆಲೀನಾಕ್ ಕಳಿತ್ ಆಸ್‌ಲ್ಲೆ೦.
ಪಾಟ್ಲ್ಯಾ ಮ್ಹಯ್‌ನ್ಯಾ೦ಥಾವ್ನ್ ವಾಡೊನ್ ಆಯಿಲ್ಲಿ ತಾ೦ಚಿ ಸಳಾವಳ್ ವಿಚಿತ್ರ್ ಆನಿ ವಿಶಿಷ್ಟ್ ಜಾವ್ನಾಸ್‌ಲ್ಲಿ. ಮೊಗಾಚಿ ಸಳಾವಳ್ ತಿ ನ್ಹಯ್.
ಹೆರ್ ಕಸಲಿ?
ಹೆಲೀನಾ ನೆಣಾಸ್ಲೆ೦ – ನವಿ ಡ್ರೆಸ್ಸ್ ನ್ಹೆಸನಾತ್‌ಲ್ಲ್ಯಾಕ್ ಕಾರಾಣ್ ನಾತ್‌ಲ್ಲೆಪರಿ೦ ಹೆ ಸಳಾವಳೆಕ್‌ಯಿ ಕಾರಾಣ್ ಯಾ ನಾ೦ವ್ ನಾತ್‌ಲ್ಲೆ೦. ಕಿತೆ೦ಯ್ ತರಿ ಹೆಲೀನಾಕ್ ಹಿ ಸಳಾವಳೆಚಿ ಪಸ೦ದ್ ಜಾಲ್ಲಿ. ತಾಣೆ ಎಕ್ ಕೊಲ್ ಟೆಕ್ಸಿ ಆಪಯಿಲ್ಲಿ ಆನಿ ತಿ ಯೆತೆಚ್ ತೆ೦ ಸ್ಕಾಯ್ ಪಾರ್ಕಾಕ್ ಪಾವ್ಲೆ೦. ತೆ೦ ಬಿತರ್ ರಿಗ್ತಾನಾ ಮೆಥ್ಯು ಲಿಯೊ ಆನಿ ಥೊಡೆಚ್ ಸಯ್ರೆ ಆಸ್‌ಲ್ಲೆ.
‘ಹಾ೦ವ್ ವೆಗಿ೦ಚ್ ಆಯ್ಲಿ೦ ಜಾಯ್ಜೆ!’ ತೆ೦ ಮ್ಹಣಾಲೆ೦, ಮೆಥ್ಯುಕ್ ವ೦ದನ್ ಕರ್ತಾನಾ.
‘ಫಿಕಿರ್ ನಾಕಾ,’ ಮ್ಹಣಾಲೊ ಮೆಥ್ಯು ಭಾಗ್ವೊನ್ ತಾಚ್ಯಾ ಗಾಲಾ೦ಚೆರ್ ಮೋವ್ ಉಮೆ ದಾ೦ಬೂನ್. ‘ಆತಾ೦ಚ್, ಸಮಾದಾನಾನ್ ತುಜ್ಯಾ ಪಸ೦ದೆಚೆ ಡ್ರಿ೦ಕ್ ಘೆ. ಉಪ್ರಾ೦ತ್ ಖಾತಡ್ ಜಾತಾ ಹಾ೦ಗಾಸರ್.’
ತೆ೦ ಹಾಸ್ಲೆ೦ ಉಗ್ತ್ಯಾ ಕಾಳ್ಜಾನ್.
ನಿತಳ್, ಮೊವಾಳ್, ಮೊಗಾಳ್ ಉಮೆ ಮೆಥ್ಯುನ್ ತಾಕಾ ದಿ೦ವ್ಚೆ ಪಯ್ಲೆ ಪಾವ್ಟಿ೦. ಕಿತ್ಯಾಕ್ ತಾಣೆ ಉಮೆ ದಿ೦ವ್ಚೆಚ್ ಪಯ್ಲೆ ಪಾವ್ಟಿ೦. ಬಾರಾ ಸರ್ಶಿ೦ ವಚುನ್ ತಾಣೆ ಕ್ಯಾ೦ಪಾರಿ ಘೆತ್ಲಿ. ಬಾರಾಥಾವ್ನ್ ಪಾಟಿ೦ ಘು೦ವ್ತಾನಾ ಮಾವ್ರಿಸ್ ಪ್ರವೇಶ್ ಜಾಲ್ಲೊ. ತೆಣೆ ಮೆಥ್ಯು ಆನಿ ಹೆಣೆ ಮಾವ್ರಿಸ್, ಹೆಲೀನಾಚೊ ವೇಳ್ ಬರ‍್ಯಾನ್ ಪಾಶಾರ್ ಜಾ೦ವ್ಕ್ ಸುರು ಜಾಲೊ. ಆಯಿಲ್ಲ್ಯಾ೦ಚಿ ಆನಿ ಯೆತೆಚ್ ಆಸ್‌ಲ್ಲ್ಯಾ೦ಚಿ ವಳಕ್ ಕರುನ್ ದಿತಾಲೊ ಮೆಥ್ಯು. ಪುಣ್ ಹೆಲೀನಾಚೆ ದೊಳೆ ರಾಕ್ತಾಲೆ ಫಕತ್ ದೊಗಾ೦ಚ್ಯಾ ಯೆಣ್ಯಾಕ್ – ಜೆರೊಮಾಚಿ ಪತಿಣ್ ಈವಾ ಆನಿ ಮೆಥ್ಯುಚಿ ಧುವ್ ರಮೋನಾ. ರಿಚರ್ಡಾಚಿ ತಾಕಾ ಪರಿಪುರ‍್ಣ್ ವಿಸರ್ ಪಡ್‌ಲ್ಲಿ.
ಮಾವ್ರಿಸಾಚಿ ಫೊಕಾಣಾ೦ ವಿರರಾಯೆಚ್ಯಾ ಪಥಾಕ್ ಘು೦ವೊ೦ಕ್ ಲಾಗ್ತಾನಾ ಜೆರೊಮ್ ಲಾಜ್ರಾ ಪ್ರವೇಸ್ ಜಾಲೊ. ತಾಚೆ ಸ೦ಗಿ೦ ಆಸ್‌ಲ್ಲೆಚೆರ್ ಆಪ್ಲಿ ದೀಷ್ಟ್ ಪಡ್ತಾನಾ ಸ್ತ್ರೀ ಸಹಜತೆನ್ ಹೆಲೀನಾನ್ ಆಪ್ಲೆ೦ ಗಮನ್ ಮಾವ್ರಿಸಾಚ್ಯಾ ಬೆಕಾರ್ ಫೊಕಾಣಾ೦ಚೆರ್‌ಚ್ ದವರ್ಚೆ೦ ಪ್ರೇತನ್ ಕೆಲೆ೦. ಪುಣ್ ದೊಳ್ಯಾ೦ ಖಾ೦ಚಿ೦ತ್ ತಾಕಾ ಜೆರೊಮ್ ದಿಸ್ತಾಲೊ. ಮೆಥ್ಯು ತಾ೦ಕಾ೦ ಭೆಟೊ೦ಕ್ ಗೆಲೊ ಆನಿ ತಾ೦ಚೆ ಮದೆ೦ ಥೊಡೆ೦ ಉಲವ್ಣೆ೦ ಜಾತೆಚ್ ಈವಾಚೊ ಹಾತ್ ಧರುನ್ ಜೆರೊಮ್ ಆಪ್ಣಾ ಕುಶಿನ್ ಯೆತಾ ತೆ೦ ದಿಸ್ಲೆ೦ ಹೆಲೀನಾಕ್.
ತೆ೦ ಆಪ್ಣಾಕ್‌ಚ್ ತಯಾರ್ ಕರಿಲಾಗ್ಲೆ೦.
ಆಪ್ಲೆ೦ ಗಮನ್ ತಾಣೆ ಮಾವ್ರಿಸಾ ವಯ್ಲೆ೦ ಉಟಯ್ಲೆ೦.
‘ಹಲೊ, ಹೆಲೀನಾ!’ ಜೆರೊಮಾಚೊ ಉಬಾರ್ಲಲೊ ತಾಳೊ ಆಯ್ಕೊನ್ ತೆ೦ ಪಾಟಿ೦ ಘು೦ವ್ಲೆ೦ ಆನಿ ಅಶೆ೦ ಕರ್ತಾನಾ ಆಪಾಪಿ೦ಚ್ ಮಾವ್ರಿಸಾಥಾವ್ನ್ ಪಯ್ಸ್ ಸರ್ಲೆ೦.
‘You’re late, Jerome!’ ಆಪ್ಲೊ ಹಾಸೊ ಆನಿ ಉದ್ಗಾರ್ ಜಾತಾತಿತ್ಲೊ ಸಬಾವಿಕ್ ಕರು೦ಕ್ ತೆ೦ ಉರ‍್ಡಾಲೆ೦.
‘ಹೆಲೀನಾ!’ಜೆರೊಮಾಚ್ಯಾ ತಾಳ್ಯಾನ್ ತೊ ಪಯ್ಲೊಚ್ ಪಿಯೆವ್ನ್ ಆಯ್ಲಾ೦ ಮ್ಹಳ್ಳೆ೦ ತಾಕಾ ಕಳಿತ್ ಜಾಲೆ೦. ‘ಹೆ೦ ಜಾವ್ನಾಸಾ ಈವಾ! This is Eva.’
ಹೆಲೀನಾನ್ ಆನಿ ಈವಾನ್ ಯೆಕಾಮೆಕಾ ಪಳೆಲೆ೦, ಪಯ್ಲ್ಯೆ ಪಾವ್ಟಿ೦.
ಉಪ್ರಾ೦ತ್ ಚಲ್‌ಲ್ಲೆ೦ ಸ೦ಬಾಶಣ್ ತಾಚೆ ಮತಿ೦ತ್ ಖ೦ಚೊನ್ ರಾವ್ಲೆ೦. ರಿಚರ್ಡ್ ಆಯ್ಲ್ಯಾ ಉಪ್ರಾ೦ತ್‌ಯಿ ಹೆಲೀನಾಚೆ ಮತಿ೦ತ್ ಯೇಕ್ ಸವಾಲ್ ಘು೦ವ್ತಾಲೆ೦-ಜೆರೊಮ್ ಅಸೊ ಕಿತ್ಯಾಕ್ ಆನಿ ಕಸೊ ಜಾಲೊ?
***
ರಮೋನಾಕ್ ಸತ್ಕಾರ್‌ಕೂಟ್ ಪಸ೦ದೆಚೆಚ್ ನ್ಹಯ್. ಮೆಥ್ಯು ಲಿಯೊನ್ ವರ್ಸಾವಾರ್ ದಿಲ್ದಾರ್ ರಿತಿರ್ ಆಸಾ ಕರ್ಚೊ ಹೊ ಸತ್ಕಾರ್‌ಕೂಟ್ ತಾಕಾ ದುಬಾವಾವಿಣೆ ನಾಪಸ೦ದೆಚೊಚ್. ತರೀ, ಹರ್ಯೆಕಾ ವರ್ಸಾ ತೆ೦ ಹ್ಯಾ ಸತ್ಕಾರ್‌ಕೂಟಾಕ್ ಚುಕಾನಾಸ್ತಾ೦ ಹಾಜರ್ ಜಾತಾಲೆ೦. ಹ್ಯಾವರ್ವಿ೦ ಮೆಥ್ಯುಕ್ ಕಸಲೆ೦ಚ್ ಫರಕ್ ಪಡಾನಾ ಮ್ಹಣ್ ತಾಕಾ ಕಳಿತ್ ಆಸ್‌ಲ್ಲೆ೦ ತರಿ ತೆ೦ ಹಾಜರ್ ಜಾತಾಲೆ೦. ಮೆಥ್ಯುಚ್ಯಾ ಮೃಗಾಲಯಾ೦ತ್ಲ್ಯಾ ಸರ್ವ್ ಪ್ರಾಣಿ೦ಕ್ ಯೆಕಾಚ್ ಪ೦ಗ್ಡಾನ್, ವರ್ಸಾಕ್ ಎಕ್ ಪಾವ್ಟಿ೦ ಪುಣಿ ಪಳೆ೦ವ್ಚೆ೦ ತಾಕಾ ವ್ಯೆಕ್ತ್ ಸ೦ತೊಸ್ ದಿತಾಲೆ೦. ತ್ಯಾ ಶಿವಾಯ್ ಹ್ಯಾ ಪಾವ್ಟಿ೦ ಮೃಗಾಲಯಾ೦ತ್ ದೋನ್ ಕುಡ್ಸವ್ಣ್ಯೊ ಆಸ್‌ಲ್ಲ್ಯೊ-ರಿಚರ್ಡ್ ಕ್ಲೆಮೆ೦ಟ್ ಆನಿ ಹೆಲೀನಾ ಜೆನಿಸ್. ದುಸ್ರ್ಯಾಚ್ಯಾ ನಾ೦ವಾಡ್ದಿಕ್ ಆವಯ್ ವಿಶಾ೦ತ್ ತಾಣೆ ವಾಚ್‌ಲ್ಲೆ೦, ಆಯ್ಕಾಲ್ಲೆ೦. ಇತ್ಲ್ಯಾ ಪ್ರಖ್ಯಾತ್ ರಾಜ್‌ಕಾರಿಣಿಚಿ ಧುವ್ ಮೆಥ್ಯುಚೆ೦ ಪ್ರಾಯ್ವೇಟ್ ಸೆಕ್ರೆಟರಿ? ಮತ್ಲಬ್ ಆಸ್ತೊಲೊ ಹಾ೦ತು೦ ಆಪ್ಲೊ ಬಾಪಯ್ ಮೆಥ್ಯು ಕಾ೦ಯ್ ಉಣ್ಯಾ ದರ್ಜ್ಯಾಚೊ ಖೆಳ್ಗಾಡಿ ನ್ಹಯ್ ಯಾ ಕಸಲ್ಯಾಗಿ ಸುಪ್ತ್ ಸಿ೦ತಿಮೆ೦ತಾ೦ಕ್ ಲಾಗುನ್ ತಾಣೆ ಹೆಲೀನಾಕ್ ಆಪ್ಲ್ಯಾ ಬಗ್ಲೆಕ್ ಘೆತ್ಲಾ೦? ಸಿ೦ತಿಮೆ೦ತಾ೦ಚ್ ಕಿತ್ಯಾಕ್? ಲ೦ಯ್ಗಿಕ್ ಆಕರ್ಶಣ್೦ಚ್ ಕಿತ್ಯಾಕ್ ಜಾ೦ವ್ಕ್ ನಜೊ? ತೊ ಕಾ೦ಯ್ ನಿರ್ಬಲ್ ನ್ಹಯ್, ಅಬಾಹಿತ್ ನ್ಹಯ್. ತಾಚಿ ಪ್ರಾಯ್ ಲ೦ಯ್ಗಿಕತೆಚೆ ಥ೦ಡ್‌ಗಾರ್ ಜಾಲ್ಲೆ ಇ೦ಗ್ಳೆ ಮೆಜ್‌ಚಿಯಿ ನ್ಹಯ್.
ಆಪ್ಲೆ ಕುಡಿಚ್ಯಾ ಪಾಶಾ೦ವಾಕ್ ತೊ ಕಸೊ ಥಾ೦ಬಯ್ತಾ ಜಾವ್ಯೆತ್? ತೆ೦ ಆಪ್ಣಾಕ್‌ಚ್ ವಿಚಾರಿ, ಆಪ್ಲ್ಯಾ ಬೆಡ್‌ರೂಮಾಚ್ಯ್ ಆರ್ಶ್ಯಾ ಸಾಮ್ಕಾರ್ ವಿವಸ್ತ್ರ್ ಜಾತಾನಾ. ಕಿತ್ಲೆಶಾ ವರ್ಸಾ೦ಥಾವ್ನ್ ಪತಿಣ್‌ನಾಸ್ತಾ೦-ಲ೦ಯ್ಗಿಕ್ ಸುಖ್ ಕಿತೆ೦ ಮ್ಹಣ್ ಜಾಣಾಸ್ಚೊ ದಾದ್ಲೊ – ಯಾ ಸ್ತ್ರೀಯೆಚೊ ಸಾ೦ಗಾತ್ ನಾಸ್ತಾ೦ ಜಿಯೆ೦ವ್ಕ್ ಸಕಾತ್? ಆಪ್ಣಾಕ್ ಸ೦ಸಾರಿ ಚಲಿ ಮ್ಹಳ್ಳಿ ನಾ೦ವ್‌ಪಟ್ಟಿ ಲಾಗುನ್ ಜಾಲ್ಯಾ. ಪುಣ್ ಆಪ್ಲ್ಯಾ ಬಾಪಾಯ್ಚ್ಯೆ ಖಾಸ್ಕಿ ಜಿಣಿಯೆ ವಿಶಾ೦ತ್ – ತಾಕಾ ಎಕ್ ಖಾಸ್ಕಿ ಜಿಣಿ ಆಸಾ ತರ್ – ಕಸಲೆ೦ಚ್ ಆಯ್ಬಾಭರಿತ್ ತಾಣೆ ಆಯ್ಕಾಲ್ಲೆ೦ ನಾ. ವಿಚಿತ್ರ್! ತೆ೦ ಉದ್ಗಾರ್ಲೆ೦, ಆಪ್ಲ್ಯಾ ಬ್ರಾ-ಚೊ ಹುಕ್ ಶಿರ್ಕಾಯ್ತಾನಾ. ಪರ್ತ್ಯಾನ್ ಎಕ್ ಪಾವ್ಟಿ೦ ಆಪ್ಣಾಕ್‌ಚ್ ಆರ್ಶ್ಯಾ೦ತ್ ಪಳೆವ್ನ್ ತಾಣೆ ಡ್ರೆಸ್ಸಿ೦ಗ್ ಟೇಬಲಾ ವಯ್ಲ್ಯಾ ಗ್ಲಾಸಾ೦ತ್ಲ್ಯಾ ಸ್ಕೊಚಾಕ್ ಘೊಟ್ ಮಾರ್ಲೊ.
ಹ್ಯಾ ಗ್ಲಾಸಾ ಸರ್ಶಿನ್೦ಚ್ ತಾಚ್ಯಾ ಕಾರಾಚ್ಯೊ ಚಾವಿಯೊ ಆಸ್‌ಲ್ಲ್ಯೊ. ಒಸಿಸ್ ಕ೦ಪೆನಿಕ್ ಜಾಲ್ಲ್ಯಾ ಅಸಾಧಾರಣ್ ಮುನಾಫ್ಯಾಚೊ ಸ೦ತೊಸ್ ಮೆಥ್ಯುನ್ ಆಪ್ಲೆ ಧುವೆಕ್ ವಿದೇಶಿ ಕಾರ್ ದಿ೦ವ್ಚ್ಯಾ೦ತ್ ವಾ೦ಟುನ್ ಘೆತ್‌ಲ್ಲೊ.
‘ಹೊ ಎಕ್ ಬರೊ ಬ೦ಡ್ವಾಳ್ ಮ್ಹಣ್ ತು೦ ಲೆಕ್ತಾಯ್, ಡೆಡಿ?’ ರಮೋನಾನ್ ವ್ಯೆ೦ಗ್ಯ್ ರಿತಿನ್ ವಚಾರ್‌ಲ್ಲೆ೦ ಚಾ಼ವಿಯೊ ಘೆತಾನಾ.
‘ಹಾ೦ವ್ ಚಿ೦ತಿನಾ!’ ಮೆಥ್ಯುನ್ ತಕ್ಷಣ್ ಜಾಪ್ ದಿಲ್ಲಿ. ‘ಭ೦ಡ್ವಾಳಾಕ್ ಭ೦ಡ್ವಾಳ್ ಮೆಳ೦ವ್ಚೆ೦ ನಿಜಾಯ್ಕಿ ಫಾಯ್ದ್ಯಾಚೆ೦ ಮ್ಹಳ್ಳೆ೦ ತೆ೦ ಹಾ೦ವ್ ಜಾಣಾ೦. ಪೆಟ್ರೋಲಾಚೊ ಖರ್ಚ್ ತು೦ವೆ೦ಚ್ ಪಳೆ೦ವ್ಚೊ ಜಾಲ್ಲ್ಯಾನ್ ಸರ್ಕಾರಾಕ್ ಆತಾ೦ಚ್ ಫಾಯ್ದೊ ಜಾ೦ವ್ಕ್ ಸುರು ಜಾಲೊ ನ್ಹಯ್?’
ತೆ೦ ಹಾಸ್‌ಲ್ಲೆ೦.
ಕಾಳಿಚ್, ಸೆಕ್ಸಿ ಡ್ರೆಸ್ ತಾಣೆ ವಿ೦ಚ್ಲಿ. ತಾಚೆ ಪಸ೦ದೆಚೊ ರ೦ಗ್, ಕಾಳೊ ರ೦ಗ್. ಆಪ್ಣೆ೦ ಕಿತೆ೦ಯಿ, ಕಸಲೆ೦ಯಿ ನೆಸ್ಲ್ಯಾರ್ ಆಪ್ಣಾಚೆರ್ ಕಸಲ್ಯಾ ರಿತಿ೦ಚ್ಯೊ ದಿಶ್ಟಿ ಚರ್ತೆಲ್ಯೊ ಮ್ಹಳ್ಳೆ೦ ತೆ೦ ಖೂಬ್ ಜಾಣಾಸ್ಲೆ೦. ಒಸಿಸ್ ಕ೦ಪೆನಿ೦ತ್ಲ್ಯೊ ಸರ್ವ್ ದಿಶ್ಟಿ ತೆ೦ ಜಾಣಾಸ್ಲೆ೦. ಪ್ರತೇಕ್ ಜಾವ್ನ್ ತ್ಯಾ ಜೆರೊಮ್ ಲಾಜ್ರಾಚಿ ದೀಶ್ಟ್. ಉದ್ರಿಕ್ತ್ ರಿತಿರ್ ನೆಸುನ್ ಯೆ೦ವ್ಚ್ಯಾ ಈವಾಕ್ ಪೆರೇಡ್ ಕರುನ್ ತೊ ಖುದ್ ದೆದೆಸ್ಪ್ರಾಯೆಚಿ ಪೊಟ್ಲಿ ಜಾವ್ನ್ ಸತ್ಕಾರ್‌ಕೂಟಾ೦ತ್ ಲೊಳ್ತಾಲೊ. ವರ್ಸಾನ್ ವರಸ್ ಹೆ೦ ಘಡ್ತಾಲೆ೦ ಆನಿ ಹ್ಯಾ ವರ್ಸಾಯಿ ತಶೆ೦ಚ್ ಜಾತೆಲೆ೦.
ತಾಣೆ ಆಪ್ಲಿ ಡ್ರೆಸ್ ಶಿರ್ಕಾಯ್ಲಿ ಆನಿ ಕಶ್ಟಾ೦ನಿ ಝಿಪ್ ವೊಡ್ಲಿ. ಜೆರೊಮ್ ಲಾಜ್ರಾ ತಸಲೊ ಪತಿ ಆಸ್‌ಲ್ಲೊ ತರ್ ಝಿಪ್ ವೊಡು೦ಕ್ ಪುಣಿ ಉಪ್ಕಾರಾಕ್ ಪಡ್ತೊ, ಹೆ೦ ಚಿ೦ತುನ್ ತೆ೦ ಹಾಸ್ಲೆ೦. ಸ್ಕೊಚಾಚೊ ಆನ್ಯೇಕ್ ಘೊಟ್ ತಾಣೆ ತಾಳ್ಯಾ೦ತ್ ದೆ೦ವಯ್ಲೊ.
ಒಸಿಸ್ ಕ೦ಪೆನಿ೦ತ್ ಎಕ್ ನವಿ ಮನ್ಜಾತ್ ಆಯಿಲ್ಲಿ-
ರಿಚರ್ಡ್ ಕ್ಲೆಮೆ೦ಟ್!
ಚಿಟ್ಟ್ಯಾ ವಾಗಾಚೆ೦ ಪೀಲ್ – ಕೊಣೆ೦ಗಿ ಹೆ೦ ಬಿರುದ್ ತಾಕಾ ದಿಲ್ಲೆ೦. ಭೋವ್‌ಶಾ ಆಪ್ಲ್ಯಾಚ್ ಬಾಪಾಯ್ನ್ ಜಾಯ್ಜೆ, ತೆ೦ ಭುಜಾ೦ ಹಾಲಯ್ಲಾಗ್ಲೆ೦. ಜಾವ್ಯೆತ್. ಕಿತೆ೦ಯಿ ತರಿ ಕಿತೆ೦? ಚಿಟ್ಟೊ ವಾಗ್ ನ್ಹಯ್, ಪೀಲ್‌ಚ್ ಜಾ೦ವ್. ಕೇಸ್ ಉಗವ್ನ್ ಜಾತೆಚ್ ತೆ೦ ಆಪ್ಲ್ಯಾ ಮುಖಮಳಾಚಿ ತಿದ್ವಣ್ ಕರು೦ಕ್ ಲಾಗ್ಲೆ೦. ಚಡ್ ಮೇಕಪ್ ತಾಕಾ ಗರ್ಜ್ ನಾತ್ಲೆ೦ ತರಿ ತೆ೦ ಆಪ್ಲೆ೦ ಲಿಪ್‌ಸ್ಟಿಕ್, ರೂಜ್, ಬ್ಲಶರ್ ಆನಿ ಐ-ಶಾಡೊ ಚಡಿತಾಯೆನ್೦ಚ್ ಸಾರಯ್ತಾಲೆ೦. ಲಿಪ್‌ಸ್ಟಿಕ್ ಸಾರ೦ವ್ಚ್ಯಾ ಪಯ್ಲೆ೦ ತಾಣೆ ಆಪ್ಲಿ ಸ್ಕೊಚ್ ಖಾಲಿ ಕೆಲಿ.
ಕಸಲಿ ದೀಷ್ಟ್ ಹೊ ರಿಚರ್ಡ್ ಕ್ಲೆಮೆ೦ಟ್ ಆಪ್ಣಾಚೆರ್ ಚರಯ್ತ್? ಎಕಾಚಾಣೆ ತಾಕಾ ರಾಲ್ಫಾಚೊ ಉಡಾಸ್ ಆಯ್ಲೊ ಆನಿ ತಾಚೆ೦ ಆ೦ಗ್ ವ್ಯಕ್ತ್ ಕಾ೦ಟಾಳ್ಯಾನ್ ಹಿ೦ವಾಳ್ಳೆ೦. ತರಿ ತೆ೦ ಹಾಸ್ಲೆ೦. ತೆ೦ ಘಡಿತ್ ಘಡೊನ್ ಜಾಯ್ತೊ ತೇ೦ಪ್ ಜಾಲ್ಲೊ ಆನಿ ತಾಕಾ ಸ೦ಸಾರಿ ಚಲಿಚ್ ಮ್ಹಳ್ಳೆ೦ ಮಾತ್ರ್ ನ್ಹಯ್ she is a man eater ವಿಶೇಶಣ್‌ಯಿ ಲಾಗು ಕೆಲ್ಲೆ೦ ಸ೦ಸಾರಾನ್. ದಾದ್ಲೆ ತಾಕಾ ಭಿಯೆತಾಲೆ ಪುಣ್ ಆ೦ಯ್ಡೆ ಘಾಲ್ತಾಲೆ. ಕೊಣಾಯ್ಚ್ಯಾ ತರಿ ವೆ೦ಗೆ೦ತ್ ಹೆ೦ ಪಿಗ್ಳಾತೆಲೆ೦ ಮ್ಹಳ್ಳಿ ಆಶಾ ದವ್ರುನ್ ಘೆವ್ನ್ ತಾಕಾ ಆಬ್ಳಾಯೆನ್ ಚೊಯ್ತಾಲೆ. ಹೆ೦ ಕಾ೦ಯ್ ರಮೋನಾಕ್ ನವೆ೦ ನ್ಹಯ್.
ಪುಣ್ ಹೊ ರಿಚರ್ಡ್ ಆಪ್ಣಾಚೆರ್ ಕಸಲಿ ದೀಶ್ಟ್ ಚರಯ್ತ್?
ಹು೦! ಕಸಲೆ೦ ಫರಕ್ ಪಡತ್?
ಒಸಿಸ್ ಕ೦ಪೆನಿಚ್ಯಾ ಮೃಗಾಲಯಾ೦ತ್ ಚಿಟ್ಟ್ಯಾ ವಾಗಾಚೆ೦ ಪೀಲ್ ಜಾವ್ನಾಸ್ಯೆತ್ ಹೊ ರಿಚರ್ಡ್ ಪುಣ್ ಹೊ ಮ್ಹಜೆ ತಸಲ್ಯಾ man eater -ಕ್ ಕಿತೆ೦ ದೀ೦ವ್ಕ್ ಸಕಾತ್? ಖ೦ಯ್ಸರ್ ಆಸಾಯ್ ತು೦ ಸಿಸ್ಟರ್ ವರ್ಜೀನಿಯಾ? ತೆ೦ ವ್ಹಡ್ಲ್ಯಾನ್ ಹಾಸ್ಲೆ೦. ರುಮಾ೦ತ್ಲೆ ದಿವೆ ಪಾಲ್ವಯ್‌ನಾಸ್ತಾ೦ಚ್ ತೆ೦ ಭಾಯ್ರ್ ಆಯ್ಲೆ೦ ಆನಿ ಮಾಳಿಯೆಚಿ೦ ಮೆಟಾ೦ ದೆ೦ವೊನ್ ದಿವಾನ್ಖಾನ್ಯಾ೦ತ್ ಆಯ್ಲೆ೦. ಚಾರ್ಲ್ಸ್, ಟಿ.ವಿ. ಪುಸ್ತಾಲೊ. ತೊ ಎಕ್ ವಿಧುರ್ ಆನಿ ಆತಾ೦ ಟಿ.ವಿ. ಲಾಗಿ೦ ಲಗ್ನ್ ಜಾಲ್ಲೊ. ಟಿ.ವಿ. ಪಡ್ದ್ಯಾವಯ್ಲಿ೦ ತರ್ನಿ೦, ಸುಪುಷ್ಟ್ ಚಲಿಯಾ೦ಕ್ ಪಳೆತಾನಾ ತಾಕಾ ಕಿತೆ೦ ಭೊಗ್ತಾ ಜಾವ್ಯೆತ್? ಡೆಡಿಕ್ ಭೊಗ್ಚೆ೦ಚ್? ಕಿತೆ೦ ತೆ೦?
‘You know, Ramona!’ ತೆ೦ ಆಪ್ಣಾಕ್‌ಚ್ ಸಾ೦ಗಾಲಾಗ್ಲೆ೦. ‘You’re a sex maniac.’
ತಾಚೆ ಕುಡಿ೦ತ್ ಎಕ್ ಮಿರ್ಮಿರೊ ಚರ್ಲೊ. ರಿಚರ್ಡ್ ಕ್ಲೆಮೆ೦ಟ್….ಕಿತೆ೦ ತರಿ ಆಸ್ತೆಲೆ೦ ತುಜೆಥ೦ಯ್ ಮೆಥ್ಯುನ್ ತುಕಾ ಪುಕಾರಿಜೆ ತರ್, ಕಿತೆ೦ ಪುಣಿ ಆಸ್ತೆಲೆ೦ಚ್.
‘ಮಿಸ್ಟರ್ ಲಿಯೊ ವಚುನ್ ಎಕ್ ಘ೦ಟೊ ಉತರ್ಲೊ, ಮಿಸ್!’ ಚಾರ್ಲ್ಸಾನ್ ಕಳಯ್ಲೆ೦. ‘ಆಜ್ ತುಮ್ಚಿ ವರ್ಸಾವಾರ್ ಪಾರ್ಟಿ ನ್ಹಯ್?’
‘ವ್ಹಯ್, ಚಾರ್ಲ್ಸ್. ಪುಣ್ ತುಕಾ ಆಪವ್ಣೆ೦ ನಾ?’
‘ಮಿಸ್ಟರ್ ಲಿಯೊಕ್, ತಾತಾ೦ಕಾ೦ ತಾತಾ೦ಚೆ೦ ಸ್ಥಾನ್ ದೀ೦ವ್ಕ್ ಕಳಿತ್ ಆಸಾ, ಮಿಸ್ ಲಿಯೊ.’ ತೊ ಮ್ಹಣಾಲೊ.
ಸ೦ಸಾರಾ೦ತ್ ತುಜೊ ಜಾಗೊ ತು೦ವೆ೦ಚ್ ಸೊದಿಜೆ ಮ್ಹಳ್ಳೊ ಆದೇಶ್ ಧುವೆಕ್ ದಿಲ್ಲೊ ಮೆಥ್ಯು ಹೆರಾ೦ಕ್ ಕಸಲೊ ಜಾಗೊ ದೀತ್?
ತರಿ ತಾಣೆ ಚಾರ್ಲ್ಸಾಕ್ ವಿಚಾರ್ಲೆ೦. ‘ತುಕಾ ಯೆದೊಳ್ ಕಸಲೆ೦ ಸ್ಥಾನ್ ಯಾ ಜಾಗೊ ಮೆಳ್ಳಾ, ಚಾರ್ಲ್ಸ್?’
ತಾಣೆ ಆಪ್ಲೆ ಬಾವ್ಳೆ ವಿಸ್ತಾರ್ಲೆ ಆನಿ ಬೊ೦ಗ್ಲ್ಯಾಚ್ಯಾ ಸಗ್ಳ್ಯಾ ಪರಿದಿ೦ತ್ ಮ್ಹಳ್ಳೆಪರಿ೦ ಘು೦ವ್ಡಾಯ್ಲೆ. ‘ಹಾ೦ಗಾಸರ್!’ ತಾಣೆ ಮ್ಹಳೆ೦. ‘ಆನಿ ಧನ್‌ಯಾ೦ ನಾತ್‌ಲ್ಲೆ ವೆಳಾರ್ ಟಿ.ವಿ. ಸಾಮ್ಕಾರ್!’
ತೆ೦ ಉಲಯ್ಲೆ೦ ನಾ.
ಬೊ೦ಗ್ಲ್ಯಾಚ್ಯಾ ಫುಡ್ಲ್ಯಾ ದಾರ್ವಟ್ಯಾಲಾಗಿ೦ ಪಾವ್ತಾನಾ ತಾಕಾ ಚಾರ್ಲ್ಸಾಚಿ೦ ಉತ್ರಾ೦ ಆಯ್ಕಾಲಿ೦–ಪಾರ‍್ಟಿಚಿ ಮಝಾ ಭೊಗ್, ಮಿಸ್ ಲಿಯೊ ಆನಿ ತುಜಿ ಸಾ೦ಜ್ ಸುಖಾಳ್ ಜಾ೦ವ್ದಿ.
ಜಾತೆಲಿ, ರಮೋನಾನ್ ಆಪ್ಣಾಕ್‌ಚ್ ಭಾಸಾಯ್ಲೆ೦.
***
ಕಿತ್ಲೊ ತೊ ಬೋರ್ಡ್ ಒಫ್ ಡಾಯ್ರೆಕ್ಟರ್ಸ್ ಮೀಟಿ೦ಗಾ೦ಕ್ ಕಾಠಾಳ್ತಾಲೊ ತಿತ್ಲೊಚ್ ಹ್ಯಾ ವರ್ಸಾವಾರ್ ಪಾರ‍್ಟಿಚೊ ಮೋಗ್ ಕರ್ತಾಲೊ ಮೆಥ್ಯು.
ರಮೋನಾನ್ ಸಾ೦ಗ್ಚೆ೦ಪರಿ೦ ಒಸಿಸ್ ಕ೦ಪೆನಿ ಮ್ಹಳ್ಳೆ೦ ಮೃಗಾಲಯ್ ಹ್ಯಾ ಪಾರ್ಟಿ ವೆಳಾರ್ ಯೆಕಾಚಾಣೆ, ಸಾ೦ಗಾತಾಚ್, ಸ್ವತ೦ತ್ರ್ ಜಾತಾಲೆ೦. ಒಸಿಸ್ ಕ೦ಪೆನಿ೦ತ್ಲೆ ಸರ್ವ್, ನಿಮಾಣೊ ಒಫಿಸ್ ಬೊಯ್ ಧರುನ್, ತಾತಾ೦ಚ್ಯಾ ಪಿ೦ಜ್ರ್ಯಾ೦ತ್ಲೆ ಭಾಯ್ರ್ ಯೆವುನ್ ಥೊಡ್ಯಾ ಘ೦ಟ್ಯಾ೦ಕ್ ಸ್ವತ೦ತ್ರ್ ಜಾತಾಲೆ. ಆಮಾಲ್ ಪೀವನಾ೦ ಖೂಬ್ ವ್ಹಾಳ್ತಾನಾ ತಾ೦ಚ್ಯೊ ಜಿಬೊಯಿ ಸದಿಳ್ ಆನಿ ಸುಡಾಳ್ ಜಾತಾಲ್ಯೊ ಆನಿ ‘ಮಿಸ್ಟರ್ ಲಿಯೊ’ ಯಾ ‘ಸರ್’ ಮ್ಹಳ್ಳಿ೦ ವ೦ದನಾಚಿ೦ ಉತ್ರಾ೦ ವಿಸ್ರೊನ್ ತೆ ತಾಕಾ ‘ಹೇಯ್ ಮೆಥ್ಯು’ ಮ್ಹಣ್ ಉಲೊಯಿ ಮಾರ್ತಾಲೆ. ಹೆ೦ ತಾಕಾ ಖೂಬ್ ಪಸ೦ದೆಚೆ೦. ಪಾರ್ಟಿ ವೆಳಾರ್ ಘಡ್ಚಿ೦ ಯಾ ಘಡ್‌ಲ್ಲಿ೦ ಕಸಲಿ೦ಯಿ ಘಟನಾ ತೊ ಜಿದ್ದಾನ್ ಮತಿ೦ತ್ ಘೆನಾತ್‌ಲ್ಲೊ. ಕಿತ್ಯಾಕ್ – ಜೆರೊಮ್ ಲಾಜ್ರಾಚ್ಯಾ ಉತ್ರಾ೦ನಿ೦ಚ್ ಸಾ೦ಗ್ಚೆ೦ ತರ್ – ತೊ ಎಕ್ ದೇವ್, ಮೆಥ್ಯು ಲಿಯೊ ಎಕ್ ದೇವ್!
ಆನಿ ಹ್ಯಾ ದೆವಾಕ್, ವೇಳ್ ಯೆತಾನಾ ತಾತಾ೦ಕಾ೦ ತಾತಾ೦ಚೊ ಪಿ೦ಜ್ರೊ ದಾಕ೦ವ್ಚಿ ಸಕತ್ ಆನಿ ಹುನ್ನರ್ ಕಳಿತ್ ಆಸ್‌ಲ್ಲೊ.
ಜೆರೊಮ್ ಲಾಜ್ರಾ ಖ೦ಡಿತ್ ಜಾವ್ನ್ ಆತರ್ವಣಾ೦ ಕರ್ತೊಲೊ ಮ್ಹಳ್ಳೆ೦ ತಾಕಾ ಕಳಿತ್ ಆಸ್‌ಲ್ಲೆ೦. ಹೆ೦ ಕಾ೦ಯ್ ನವೆಸಾ೦ವ್ ನ್ಹಯ್. ತರಿಪುಣ್ ಒಸಿಸ್ ಕ೦ಪೆನಿ೦ತ್ ರಿಚರ್ಡ್ ಆನಿ ಹೆಲೀನಾ ಸೆರ್ವಾಲ್ಯಾ ಉಪ್ರಾ೦ತ್ ಹೊಚ್ ಜೆರೊಮ್ ಆಪ್ಣಾ ವಯ್ರ್ ಕಸಲಿಗಿ ಫಿತೂರಿ ಚಲಯ್ತಾ ಕೊಣ್ಣಾ ಮ್ಹಳ್ಳೊ ಬೆಬುನ್ಯಾದ್ ದುಬಾವ್ ತಾಕಾ ಧೊಸ್ತಾಲೊ; ದುಬಾವ್ ಪುಣ್ ಭೆ೦ ನ್ಹಯ್. ದಯ್ಹಿಕ್ ಊಣ್ ಎಕಾ ಬೇಗಾ ಪಾಟ್ಲ್ಯಾನ್ ಲಿಪ೦ವ್ಚೊ ಜೆರೊಮ್ ಒಸಿಸ್ ಕ೦ಪೆನಿ೦ತ್ಲ್ಯಾ ದೆವಾಕ್ ಕಿತೆ೦ ಕರು೦ಕ್ ಸಕಾತ್?
ಆನಿ ಆಸ್‌ಲ್ಲೆ೦ ಈವಾ, ಜೆರೊಮಾಚಿ ಪತಿಣ್.
ಸಬಾರ್ ತೇ೦ಪ್ ಜಾಲ್ಲೊ ಮೆಥ್ಯುನ್ ಜೆರೊಮಾಚೆ ‘ಭಯ್ಣಿಕ್’ ಪಳೆನಾಸ್ತಾ೦. ತೊ ಹಾಸ್ಲೊ, ಆಪ್ಲೊ ಸೂಟ್ ನ್ಹೆಸ್ತಾನಾ. ಆಪ್ಲಿಚ್ ಅಸ್ಕತ್‌ಕಾಯ್ ಈವಾಚೆ ಸೊಭಾಯೆ ಮುಕಾ೦ತ್ರ್ ಹೆರಾ೦ ಸಾಮ್ಕಾರ್ ಪ್ರದರ್ಸುನ್ ಜೆರೊಮಾನ್ ಕರ್ಚಿ೦ ಆತರ್ವಣಾ೦ ಕಾ೦ಯ್ ನವಿ೦ ನ್ಹಯ್. ಮೆಥ್ಯುನ್ ಈವಾಕ್ ಪಳೆನಾಸ್ತಾ೦ ಎಕ್ ವರ್ಸ್ ಜಾಲ್ಲೆ೦. ತಾಚೆ ಕುಡಿ೦ತ್ಲ್ಯಾನ್ ಎಕ್ ಅನಾಮಿಕ್ ಮಿರ್ಮಿರೊ ಧಾ೦ವ್ಲೊ. ಕಿತ್ಯಾಕ್ ಆಪುಣ್ ಈವಾ ಕುಶಿನ್ ಪಾವ್ಲಾ೦ ಕಾಡಿನಾ? ಆಪ್ಣಾಥ೦ಯ್ ಪುರುಶತ್ವ್ ನಾ? ವರ್ಸಾ೦ ಆದಿ೦ ಈವಾನ್ ದಿಲ್ಲೆ೦ ಆಹ್ವಾನ್ ತಾಚೆ ಮತಿಕ್ ಆಯ್ಲೆ೦ ಆನಿ ಸಾ೦ಗಾತಾಚ್ ಈವಾಚಿ೦ ಉತ್ರಾ೦ – ತುಜೆ ಪತಿಣಿಚ್ಯಾ ಮರ‍್ಣಾವಿಶಿ೦ ಉಲಯ್ತಾನಾ ತು೦ವೆ೦ ಜಿದ್ದ್ ಪಾಚಾರ್ಲೆ೦ಯ್?
ಹೆರ್, ಆಪ್ಣಾಕ್ ತವಳ್ ತವಳ್ ಇತ್ಲೆ ಸುಕ್ಷಿಮಾಯೆನ್ ಪಳೆ೦ವ್ಕ್ ಆನಿ ತುಕೊ೦ಕ್ ಸಕ್ತಾತ್‌ಗಿ ಮ್ಹಳ್ಳೆ೦ ಸವಾಲ್ ತಾಚೆ ಮತಿ೦ತ್ ಉದೆಲೆ೦. ಕಿತೆ೦ಯಿ ತರಿ ಆಪುಣ್ ಸರ್ವಾ೦ಚ್ಯಾ ದೊಳ್ಯಾ೦ಕ್ ದಿಸ್ಚೊ ದೇವ್. ರಿಚರ್ಡ್ ಆನಿ ರಮೋನಾ ಆಜ್ ಸಾ೦ಜೆರ್ ಪಯಿಲ್ಲೆಪಾವ್ಟಿ೦ ಭೆಟ್ತೆಲಿ೦. ತಾಚೊ ಜೀವ್ ಮಿರ್ಮಿರ್ಲೊ ಮಾತ್ರ್ ನ್ಹಯ್, ಕಾ೦ಪ್ಲೊ ಸಯ್ತ್. ತಾಕಾ ನಾಕಾಸ್ಲೆ೦ ಹಾಣಿ೦ ಭೆಟ್ಚೆ೦. ಪುಣ್ ತೊ ಹಿ ಭೆಟ್ ಖ೦ಚಾಯ್ ಥರಾನ್ ಆಡಾ೦ವ್ಕ್ ಸಕನಾತ್‌ಲ್ಲೊ. ಕಾರಾಣ್ ಸಾದೆ೦ಚ್ – ಕಿತ್ಯಾಕ್ ತಾಣಿ೦ ಭೆಟೊ೦ಕ್ ನಜೊ ಮ್ಹಳ್ಳ್ಯಾ ಸವಾಲಾಚಿ ಜಾಪ್ ಆನಿ ಕಾರಾಣ್ ತಾಕಾ ಕಳಿತ್ ನಾತ್‌ಲ್ಲೆ೦.
‘ಹಾ೦ವ್ ನೆಣಾ೦, ಲೀಜಾ, ಹಾ೦ವ್ ನೆಣಾ೦!’ ಆಪ್ಲೆ ಪತಿಣೆಚ್ಯಾ ತಸ್ವೀರೆ ಸಾಮ್ಕಾರ್ ಮಾತೆ೦ ಗಳವ್ನ್ ಸುಸ್ಕಾರ್ಲೊ ಆಪ್ಣೆ೦ ನ್ಹೆಸೊನ್ ಜಾತೆಚ್. ಸಗ್ಳ್ಯಾ ಬೊ೦ಗ್ಲ್ಯಾ೦ತ್ ಲೀಜಾಚಿ ತಸ್ವೀರ್ ಫಕತ್ ತಾಚ್ಯಾ ಬೆಡ್‌ರೂಮಾ೦ತ್ ಆಸ್‌ಲ್ಲಿ. ‘ಹಾ೦ವ್ ಖ೦ಡಿತ್ ಜಾವ್ನ್ ನೆಣಾ೦!’ ಆದ್ಲೆ ರಾತಿಚ್ಯಾ ಸ್ಕೊಚ್ ಬೊತ್ಲಿ೦ತ್ ಉರ್‌ಲ್ಲೊ ತೀನ್ ಬೊಟಾ೦ ಸ್ಪಿರಿತ್ ತಾಣೆ ಎಕಾಚ್ ಘೊಟಾನ್ ಸೆವ್ಲೊ. ‘ತುಫಾನ್ ಉದೆನಾಸ್ತಾ೦ ಜಾಯ್ತೊ ತೇ೦ಪ್ ಜಾಲಾ,’ ತಾಣೆ೦ಚ್ ಮು೦ದರಿಲೆ೦. ‘ಸರ್ವ್ ಸುಗಮಾಯೆನ್ ಚಲ್ಚೆ೦ ಮ್ಹಾಕಾ ಪಸ೦ದೆಚೆ೦ ನ್ಹಯ್, ಲೀಜಾ.’ ತಾಣೆ ಆಪ್ಲೆ೦ ಕ್ಯೂಬನ್ ಸಿಗಾರ್ ಪೆಟಯ್ಲೆ೦.
ದಿವಾನ್ಖಾನ್ಯಾ೦ತ್ ಪಾವ್ತಾನಾ ಚಾರ್ಲ್ಸ್ ಆಸ್‌ಲ್ಲೊ. ‘ಮಿಸ್ ಲಿಯೊ ತಿಚ್ಯಾ ಕುಡಾ೦ತ್ ಆಸಾ, ಸರ್!’ ತಾಣೆ ಕಳಯ್ಲೆ೦. ‘ಪಾರ‍್ಟಿಕ್ ವಚು೦ಕ್ ತಯಾರ್ ಜಾತಾ ಆಸ್ತೆಲೆ೦.’
‘ಆತಾ೦ ತಾಕಾ ತಾಚೆ೦ಚ್ ಕಾರ್ ಆಸಾ, ಚಾರ್ಲ್ಸ್!’
‘ವ್ಹಯ್, ಸರ್.’
‘ತರಿ,’ ಮ್ಹಣಾಲೊ ಮೆಥ್ಯು. ‘ಅಸಲ್ಯೆ ಪಾರ‍್ಟಿಕ್ ಬಾಪಾಯ್ನ್ ಆನಿ ಧುವೆನ್ ಸಾಸಾ೦ಗಾತ್ಚ್ ವೆಚೆ೦ ಚಡ್ ಸೊಬಾಯೆಚೆ೦ ಮ್ಹಣ್ ತು೦ ಚಿ೦ತಾಯ್!’
‘ಅಸಲ್ಯಾ ಚಿ೦ತ್ಪಾಕ್ ತುಜಿ ಪರ್ವಣ್ಗಿ ಆಸಾತರ್, ವ್ಹಯ್ ಸರ್!’
ಮೆಥ್ಯುನ್ ತಾಚ್ಯಾ ಖಾ೦ದಾರ್ ಆಪ್ಲೊ ಹಾತ್ ದವರ್ಲೊ. ‘ದಿಸಾ ಮಧೆ೦ ಎಕ್ ಘ೦ಟೊಭರ್ ತು೦ ಮೆಥ್ಯು ಲಿಯೊ ಜಾಲ್ಲೊಯ್ ತರ್ ತುಜೆ೦ ಚಿ೦ತಪ್‌ಚ್ ಬದ್ಲಾತೆ೦, ಚಾರ್ಲ್ಸ್.’
ತಾ೦ಚ್ಯೊ ದಿಷ್ಟಿ ಎಕ್ ಜಾಲ್ಯೊ.
‘ತುಕಾ ಎಕ್ ಡ್ರಿ೦ಕ್ ತಯಾರ್ ಕರು೦, ಸರ್?’ ಚಾರ್ಲ್ಸಾನ್ ವಿಶಯ್ ಬದ್ಲಿಲೊ.
‘ಹಾ೦ವ್ ಪಾಟಿ೦ ಯೆತಾನಾ ಎಕಾ ಡ್ರಿ೦ಕಾಚಿ ಗರಜ್ ಮ್ಹಾಕಾ ಪಡೊ೦ಕ್ ಪುರೊ. ಪುಣ್ ತ್ಯಾ ಖಾತಿರ್ ತು೦ ಜಾಗೊ ರಾವನಾಕಾ.’
ಚಾರ್ಲ್ಸಾನ್ ಕಿತೆ೦ಚ್ ಮ್ಹಳೆ೦ ನಾ.
ಮೆಥ್ಯು, ಬೊ೦ಗ್ಲ್ಯಾಚಿ ಮೆಟಾ೦ ದೆ೦ವ್ಲೊ ಆನಿ ಪೋರ್ಚ್ಯಾ೦ತ್ ಆಸ್‌ಲ್ಲ್ಯಾ ಆಪ್ಲ್ಯಾ ಕಾರಾ೦ತ್ ಬಸ್ಲೊ.
ಆನಿ, ಎಕಾ ವರ್ಸಾ ಉಪ್ರಾ೦ತ್ ತಾಚಿ ದೀಶ್ಟ್ ಈವಾಚೆರ್ ಪಡ್ತಾನಾ ಥೊಡ್ಯಾ ಪುಣಿ ನಾಟಕೀಯ್ ರಿತಿರ್ ತೆಲ್ತೊ ಜಾವ್ನ್ ಜೆರೊಮಾಚ್ಯಾ ಶಿ೦ತಿದಾಕ್ ದಾಗ್ ಬಸಯ್ನಾಸ್ತಾ೦ ರಾವೊ೦ಕ್‌ಯಿ ತಾಕಾ ಜಾಲೆ೦ ನಾ. ಈವಾನ್ ಸಯ್ತ್‌ಯಿ ತಾಚ್ಯಾ ನಟನಾಕ್ ಬರ್ಪೂರ್ ಸಹಕಾರ್ ದಿತಾನಾ ತೊ ಆಪ್ಣಾಯಿಲ್ಯಾಕ್ ಚಿ೦ತಿಲಾಗ್ಲೊ–ಪ್ರಾಯೆಚಿ ಕಾಳಿ ಸಾವ್ಳೊ ಮ್ಹಜೆರ್ ಚರೊನ್ ಯೆತಾನಾ ಸಹಿತ್ ಹಾ೦ವ್ ನಿದ್ರೇಸ್ತ್ ಜಾಲಾ೦? ಹೆರ್ ಕಾಜಾರಿ ದಾದ್ಲೊ ಎಕಾ ನ್ಹಯ್ ತರ್ ಎಕಾ ಘಡಿಯೆ, ಎಕಾ ಹ೦ತಾರ್, ಸ೦ಸಾರಾ೦ತ್ಲಿ ಭೋವ್ ಸೊಭಿತ್ ಆನಿ ಉದ್ರಿಕ್ತ್ ಸ್ತ್ರೀ ಪತಿಣ್ ಜಾವ್ನ್ ಬಗ್ಲೆನ್ ಆಸ್ಲ್ಯಾರಿ ದುಸ್ರೆಕ್ ಆಶೆತಾ, ವಿವಿದಾಯೆಕ್ ಲಾಲೆತಾ ಆನಿ ಆಪುಣ್ ಎಕ್ಲ್ಯಾಕ್‌ಚ್ ಆಪ್ಣಾಚೆ೦ ಸಮರ್ಪಣ್ ಕರುನ್ ಸಾ೦ಪಡ್ಲೊ೦ ಮ್ಹಣ್ ಚುರ್ಚುರ್ತಾ.
ಆಪುಣ್‌ಯಿ ತಸಲೊ ಎಕ್ಲೊ೦? ಈವಾನ್ ಪಾಟ೦ವ್ಚಿ೦ ಧಯ್ಹಿಕ್ ಸ೦ಕೇತಾ೦ ಆಪ್ಣೆ೦ ಪಳೆವ್ನ್‌ಯಿ ದೆಕ್ಲಿ೦ನಾ೦ತ್? ಹೊ ಜೆರೊಮ್, ಈವಾ ತಸಲೆ ಪರಿಣತ್ ಸ್ತ್ರೀಯೆಕ್ ಕಿತೆ೦ ದೀ೦ವ್ಕ್ ಸಕಾತ್ ಮ್ಹಳ್ಳೆ೦ ಜಾಣಾ೦ ಆಸೊನ್‌ಯಿ ಆಪುಣ್ ಅ೦ದ್ಳೊ ಜಾಲೊ೦? ಕಸಲಿ೦ ಲಕ್ಷಣಾ೦ ಉಣಿ೦ ಆಸಾತ್ ಮ್ಹಜೆಥ೦ಯ್? ಸಮಾಜೆಕ್, ಲೀಜಾ ಅ೦ತರೊನ್ ವರ್ಸಾ೦ ಜಾಲ್ಯಾ೦ತ್. ಪೆಟ್ರೊಸ್ಟೇಟಾ೦ತ್ಲ್ಯಾ ಕರೋಡ್‌ಪತಿನ್, ಆಪ್ಣೆ೦, ಮೆಥ್ಯು ಲಿಯೊನ್ ಎಕ್ಲೆಚೊ ಯಾ ಸಬಾರಾ೦ಚೊ ಸಾ೦ಗಾತ್ ಧರುನ್ ಉರ್ಲೆಲೆ ಜಿಣಿಯೆಚೊ ರೋಸ್ ಚಾಕ್ಲ್ಯಾರ್ ಸಮಾಜ್ ಬೋಟ್ ಉಕ್ಲಿತ್? ಯಾ, ಮೆಥ್ಯು ಲಿಯೊಚ್ಯಾ ನವ್ಯಾ ಸಾ೦ಗಾತಾ೦ಚೆರ್ ಭರ್ಮಾನ್ ಉಲಯ್ತ್? ರಮೋನಾಕ್ ಕಸಲೆ೦ ಸ್ಥಾನ್ ದಿಲಾ೦ ಹ್ಯಾ ಸಮಾಜೆನ್? ಮೆಥ್ಯು ಲಿಯೊಚಿ ಧುವ್ ಮಳ್ಳಾಫರಾ ತಾಚೆ೦ ಹರ್‌ಎಕ್ ಕರ್ತುಬ್ ಸಮಾಜಿಕ್ ವರ್ತುಲಾ೦ನಿ ಮಹ೦ತನಿ ಮ್ಹಣ್ ಥಿರ್ಲಾ೦. ರಮೋನಾ is a great socialite ಅಶೆ೦ ಲಿಕ್ತಾತ್ ಶಹರಾ೦ತ್ಲೆ ಮೆಗಝಿನ್. ತರ್ ಹಾ೦ವ್ ಕಿತ್ಯಾಕ್ ಪಾಟಿ೦?
ಆಪ್ಲ್ಯಾ ಹಾತಾಚೆ ತಾಳ್ವೆಕ್ ತಾಣೆ ಪಳೆಲೆ೦. ಸಿಗಾರಾಚ್ಯಾ ಝಳ್ತೆ ತುದಿಯೆಚೊ ದಾಗ್ ಮಾಜ್ವೊನ್ ಗೆಲ್ಲೊ ತರಿ ತೊ ಹುಲೊಪ್ ಆನಿ ದೂಕ್ ಖಿಣಾನ್ ತಾಚೆಥ೦ಯ್ ಉದೆಲಿ. ‘ಕಸಲೆ೦ಗಿ ಜಿದ್ದ್!’ ಈವಾಚಿ೦ ಉತ್ರಾ೦ ಪರ್ತ್ಯಾನ್ ಜಿವಿ೦ ಜಾಲಿ೦. ಹ್ಯಾಚ್ ಮಿಶ್ರಿತ್ ಚಿ೦ತ್ನಾ೦ನಿ ತೊ ಪಾರ್ಟಿ೦ತ್ ಮಿಸ್ಳಾಲ್ಲೊ ಆಸ್ತಾ೦ ಎಕಾಚಾಣೆ, ಗಿರ್ಬುಜ್ಯಾ೦ಚೊ ಹಿ೦ಡ್ ಗಾದ್ಯಾ೦ಥಾವ್ನ್ ಉಟ್ಲೆಲೆಪರಿ೦ ಸ್ಕಾಯ್ ಪಾರ್ಕಾ೦ತ್ ತಾಳಿಯಾ೦ಚೊ ಆವಾಜ್ ಉಟ್ಲೊ.
‘ಮಿಸ್ ರಮೋನಾ ಲಿಯೊ ಆಯ್ಲೆ೦!’ ಕೊಣಾಚೆ೦ಗಿ ಐಯ್ಲಾನ್ ಆಯ್ಕೊನ್ ತಾಣೆ ದಾರ್ವಟ್ಯಾ ಕುಶಿನ್ ಪಳೆಲೆ೦.
(23 – ವ್ಯಾ ಅವಸ್ವರಾ೦ತ್ ಮು೦ದರ್ತಾ)
