ಸಜೀವ್ ಆಯಸ್ಕಾ೦ತಾಪರಿ೦ ತೆ೦ ದಾರ್ವಟ್ಯಾರ್ ಉಬೆ೦ ಆಸ್ಲ್ಲೆ೦.
ಕಸಲೊ ಯೆವ್ಕಾರ್, ಕಸಲೊ ಸ್ವಾಗತ್. ರಮೋನಾನ್ ನ್ಹೆಸ್ಲ್ಲಿ ರೀತ್ ಪಳೆಲ್ಯಾರ್, ಸಿನೆಮಾಹೌಜಾ೦ತ್ ತರ್ ಮುಕ್ಲ್ಯಾ ಸಿಟಿ೦ಚೆರ್ ಬಸ್ಲ್ಲೆ ಅಶ್ಲೀಲ್ ಕುಕಾರ್ಯೊ ಘಾಲ್ತೆ. ಚಡ್ ಕಿತ್ಯಾಕ್, ಹಾ೦ಗಾಸರ್ಚ್ ಆಸ್ಲ್ಲ್ಯಾ೦ಕ್ ಸಿನೆಮಾ ಹೌಜಾಚ್ಯಾ ಮುಕ್ಲ್ಯಾ ಬಸ್ಕೆ೦ಚೆರ್ ಬಸವ್ನ್ ರಮೋನಾಕ್ ಪಡ್ದ್ಯಾರ್ ಉದೆಶೆ೦ ಕೆಲ್ಯಾರ್ ಪ್ರಸ್ತುತ್ ಪರಿಗತಿ೦ತ್ ತೆಯಿ ಕುಕಾರ್ಯೊ ಘಾಲ್ತೆ. ಪುಣ್ ಹಾ೦ಗಾಸರ್ ಧ್ರುವಾ೦ ಘು೦ವಲ್ಲಿ೦. ಮೆಥ್ಯು ಲಿಯೊಚಿ ಧುವ್ ಹಾಜರ್ ಜಾಲ್ಲೆ೦!
ಪಾಶಾರ್ ಜಾ೦ವ್ಚ್ಯಾ ವೇಯ್ಟರಾಚೆ ಥಾಲಿಯೆ೦ತ್ ಆಪ್ಲೊ ಗ್ಲಾಸ್ ದವರ್ನ್ ಮೆಥ್ಯು ಲಿಯೊ ದಾರ್ವಟ್ಯಾ ಸರ್ಶಿ೦ ಗೆಲೊ ಆನಿ ಆಪ್ಲೊ ಉಜ್ವೊ ಬಾವ್ಳೊ ಕೊಕ್ಕೆ೦ ಕರುನ್ ಕೊ೦ಪೊರ್ ರಮೋನಾಕ್ ದಿಲೊ. ತೆ೦ ಆಕರ್ಶಿಕ್ ಹಾಸೊ ಹಾಸ್ಲೆ೦.
‘ಹೌವ್ ಸ್ವೀಟ್, ಡೆಡಿ!’ ತೆ೦ ಮ್ಹಣಾಲೆ೦ ಆಪ್ಲೊ ಹಾತ್ ತಾಚ್ಯಾ ಕೊ೦ಪ್ರಾಕೊಕ್ಕ್ಯಾ೦ತ್ ರಿಗವ್ನ್. ‘ಮ್ಹಾಕಾ ಥೊಡೊ ತಡವ್ ಜಾಲೊ.’ ಮೆಥ್ಯುಚ್ಯಾ ಗಾಲಾಚೊ ತಾಣೆ ಉಮೊ ಘೆತ್ಲೊ. ಪರ್ತ್ಯಾನ್ ತಾಳಿಯಾ೦ಚೊ ಆವಾಜ್ ಉಟ್ಲೊ.
‘ಆದ್ಲ್ಯಾಚಾಕಿ ಹ್ಯಾ ವರ್ಸಾ ಹಾ೦ವ್ ಚಡಿತಾಯೆನ್ ಪ್ರಖ್ಯಾತ್ ಜಾಲ್ಯಾ೦ ತಶೆ೦ ಮ್ಹಾಕಾ ಭೊಗ್ತಾ!’ ತೆ೦ ಮೆಥ್ಯುಚ್ಯಾ ಕಾನಾ೦ತ್ ಪುಸ್ಪುಸ್ಲೆ೦. ಆತಾ೦ ತಿ೦ ಜಮ್ಯಾ ಕುಶಿನ್ ಮೆಟಾ೦ ಕಾಡ್ತಾಲಿ೦. ‘ಖ೦ಯ್ ಆಸಾತ್ ತುಜ್ಯೊ ನವ್ಯೊ ಪ್ರಾಣಿ? ರಿಚರ್ಡ್ ಆನಿ ಹೆಲೀನಾ?’ ತಾಣೆ ವಿಚಾರ್ಲೆ೦. ತಾಚ್ಯಾ ತಾಳ್ಯಾ೦ತ್ ಹಳ್ತಾಚಿ ಕಾ೦ಪ್ಣಿ ಆಸ್ಚಿ ಮೆಥ್ಯುಚ್ಯಾ ಗಮನಾಕ್ ಗೆಲಿ.
‘ವೆಗಿ೦ಚ್ ಡಾರ್ಲಿ೦ಗ್, ವೆಗಿ೦ಚ್!’ ಮಟ್ವ್ಯಾನ್ ಜಾಪ್ ದೀವ್ನ್ ರಮೋನಾಕ್ ಘೆವ್ನ್ ತೊ ಜಮ್ಯಾ೦ತ್ ಘುಸ್ಲೊ….
ಪಯಿಲ್ಲೆ ಪಾವ್ಟಿ೦ ರಮೋನಾಚೆರ್ ದೀಶ್ಟ್ ಪಡ್ತಾನಾ ಹೆಲೀನಾ, ಸ್ತ್ರೀ ಸಹಜ್ ಮೊಸ್ರಾನ್ ಮುರ್ಗಟ್ಲೆ೦. ಕಾರಾಣಾ೦ ಸಬಾರ್ ಆಸ್ಲ್ಲಿ೦ ಪುಣ್ ಪ್ರಾಮುಕ್ಯ್ ಜಾವ್ನಾಸ್ಲ್ಲೆ೦ ರಮೋನಾಚಿ ಫಳ್ಪಳಿ ಸೊಬಾಯ್; ಆನಿ ಆಪುಣ್ ದಾದ್ಲ್ಯಾ೦ನಿ ಆಶೆ೦ವ್ಚಾಚ್ಯಾಕಿ ಚಡಿತಾಯೆನ್ ಆಕರ್ಶಿಕ್ ಆಸಾ ಮ್ಹಳ್ಳೆ೦ ತಾಚೆ೦ ಪ್ರಞಾನ್, ಸ್ವಪಾತ್ಯೆಣಿ. ಹಾಕಾ ಲಾಗೊನ್ ಕನಿಷ್ಟ್ ಮೇಕಪಾಚೆರ್ ತೆ೦ ಉದ್ರಿಕ್ತ್ ರಿತಿರ್ ಸೊಬೊ೦ಕ್ ಸಕ್ತಾಲೆ೦ ತರ್ ಆತಾ೦, ಹೆ ಪ್ರತೇಕ್ ಸಾ೦ಜೆರ್ ತಾಚ್ಯಾ ಸೊಬಾಯೆಚೆರ್ ಮೊಸೊರ್ ಸೊಡ್ಲ್ಯಾರ್ ಹೆರ್ ಕಸಲೆ೦ಯಿ ವ್ಯೆಕ್ತ್ ಕರು೦ಕ್ ಹೆಲೀನಾ ಸಕ್ಲೆ೦ ನಾ. ತಾಕಾ ಕರ್ಪೂರಾಚ್ಯಾ ಲಕ್ಷಣಾ೦ಚಿ ತೆಲ್ತಿ ಕೂಡ್ ಆಸ್ಲ್ಲಿ ಪುಣ್ ಹಿ ಸೊಬಾಯ್, ಹಿ ಕೂಡ್ ಫಕತ್ ಸಿತಿ೦ಮೆ೦ತಾ೦ಚ್ಯಾ ಕಟಾ೦ನಿ ಬಾ೦ದುನ್ ದವರ್ನ್ ಪುಜಾ ಕರ್ಚೆ ತಸಲಿ ನ್ಹಯ್ – ಸಗ್ಳ್ಯಾ ಸ೦ಸಾರಾನ್ ಆಬ್ಳಾಯೆನ್, ಉದ್ರಿಕ್ತಾಯೆನ್ ಆಶೆ೦ವ್ಚಿ ಕೂಡ್.
ಎಕಾ ನೀಳ್ ಸ್ವಾಸಾಸ೦ಗಿ೦ ತಾಣೆ ಆಪ್ಲೆ೦ ಪಾನಕ್ ಖಾಲಿ ಕೆಲೆ೦ ಆನಿ ಗ್ಲಾಸ್ ದೆಗೆನ್ ದವರ್ಲೊ. ರಮೋನಾಕ್ ಭೆಟ್ತಾನಾ ಆಪ್ಣಾಕ್ ದೋನ್ಯಿ ಹಾತಾ೦ಚಿ ಗರ್ಜ್ ಪಡತ್ ಮ್ಹಳ್ಳೊ ಅ೦ದಾಜ್ ತಾಕಾ ಜಾಲೊ. ತಾಣೆ ಚಿ೦ತ್ಲ್ಲೆಪರಿ೦ಚ್ ರಮೋನಾಕ್ ಘೆವ್ನ್ ಮೆಥ್ಯು ತಾಚೆ ಕುಶಿನ್೦ಚ್ ಯೆತಾಲೊ. ತೆ೦ ತಯಾರ್ ಜಾಲೆ೦, ಚಿಕ್ಕೆಸೆ ಬಾವ್ಲೆ೦. ತಾಚ್ಯಾ ಮತಿಪಡ್ದ್ಯಾಚ್ಯಾ ಎಕಾ ಮುಲ್ಯಾ೦ತ್ ಎಕ್ ಸವಾಲ್ ನಾಚ್ತಾಲೆ೦-ಹಾ೦ವ್ ಲಿಲಿಯನ್ ಜೆನಿಸಾಚಿ ಧುವ್, ಹೆಪರಿ೦ ಪಾದ್ದೆತಾ೦? ಆಕ್ರೇಕ್ ತರಿ ಕಸಲೆ೦ ಅಸ್ಥಿತ್ವ್ ಹೆ ಚಲಿಯೆಚೆ೦? ಸ೦ಸಾರಿ ಚಲಿ? ಆಜೂನ್ ತೆ೦ ನಿಸ್ಕಳ್? ಸಮಾಜಿಕ್ ವರ್ತುಲಾ೦ನಿ ಹೆ೦ ಪ್ರಖ್ಯಾತ್, ಮೊಡೆಲ್ ಆನಿ ಸೊಶಿಯಲಾಯ್ಟ್ ಯಾ page three material. ಸಬಾರ್ ಸೊಸಾಯಿಟಿ ಮೆಗಝಿನಾ೦ನಿ ತಾಚ್ಯೊ ತಸ್ವೀರ್ಯೊ, ಸ೦ದರ್ಶನಾ೦ ಛಾಪೊನ್ ಆಯ್ಲ್ಯಾ೦ತ್ ತರಿ ಮ್ಹಜೆಲಾಗಿ೦ ಆಸ್ಚೆ ಎಕ್ಕೆ ಹಾಚೆಲಾಗಿ೦ ಆಸಾತ್? ತರ್ ಕಿತ್ಯಾಕ್ ಹಿ ಪಾದ್ದೆವ್ಣಿ? ಹು೦! ಫಕತ್ ಲಿಲಿಯನ್ ಜೆನಿಸಾಚೆ ಸಾವ್ಳೆಥಾವ್ನ್ ಪಯ್ಸ್ ಸರೊನ್ ಆಪ್ಲಿಚ್ ಜಿಣಿ ಜಿಯೆ೦ವ್ಕ್ ಸುಲಬ್ ನಾತ್ಲ್ಲೆ೦ ಜಾವ್ಯೆತ್?
ಮೆಥ್ಯು ಆನಿ ರಮೋನಾ ತಾಚೆ ಸರ್ಶಿ೦ ಪಾವ್ಲಿ೦.
‘ಹೆ೦ಚ್ ಹೆಲೀನಾ ಜೆನಿಸ್!’ ಮ್ಹಣಾಲೊ ಮೆಥ್ಯು ತಾಚ್ಯಾ ಸಾಮ್ಕಾರ್ ಉಬೊ ಜಾವ್ನ್. ‘ಆನಿ ಹೆ೦, ರಮೋನಾ.’
ಯಾ೦ತ್ರಿಕ್ ರಿತಿರ್ ಹೆಲೀನಾನ್ ಆಪ್ಲೊ ಹಾತ್ ಮುಕಾರ್ ಹಾಡ್ಲೊ ಪುಣ್ ವಿಚಿತ್ರ್ – ರಮೋನಾನ್ ತ್ಯಾ ಹಾತಾ೦ಚೆ ಗುಮಾನ್ ಕೆಲೆ೦ ನಾ. ಆಪ್ಲೆಚ್ ಹಾತ್ ಉಬಾರ್ನ್ ಹೆಲೀನಾಚ್ಯಾ ದೋನ್ಯಿ ಭುಜಾ೦ಚೆರ್ ತಾಣೆ ದವರ್ಲೆ ಆನಿ ತಾಚೆರ್ ಬಾರೀಕ್ಸಾಣೆನ್ ದೀಷ್ಟ್ ಚರಯ್ಲಿ.
‘ಬಿವ್ಟಿಫುಲ್!’ ತೆ೦ ಸ್ಪಶ್ಟ್ ತಾಳ್ಯಾನ್ ಉದ್ಗಾರ್ಲೆ೦. ‘ನಿಜಾಯ್ಕಿ ಸು೦ದರ್. Your’e really sweet, Helena!’ ಭಾಗ್ವೊನ್ ತಾಣೆ ಹೆಲೀನಾಚ್ಯಾ ದೋನ್ಯ್ ಗಾಲಾ೦ಕ್ ಉಮೆ ದಿಲೆ. ‘ತುಜಿ ಸೊಬಾಯ್ ನಿಜಾಯ್ಕಿ ಕ್ಲಾಸಿಕಲ್ ಜಾವ್ನಾಸಾ ಆನಿ ಹಾ೦ವ್ – ದುಬಾವಾವಿಣೆ – ತುಕಾ ಭೆಟೊ೦ಕ್ ಸ೦ತೊಸ್ತಾ೦!’
‘ನಾಗಿಣ್ಯೆ!’ ಮನಾ೦ತ್ಚ್ ಉದ್ಗಾರ್ಲೆ೦ ಹೆಲೀನಾ. ಹ್ಯಾ ಉದ್ಗಾರಾಚಿ ಕಸಲಿಚ್ ಗರ್ಜ್ ನಾತ್ಲ್ಲಿ. ಮುಕಮಳಾರ್ ಕೃತಜ್ಞೆನ್ ಹಾಸೊ ಪಾಜ್ರಾವ್ನ್ ತಾಣೆ ರಮೋನಾಕ್ ಮಾನ್ ಭಾಗಾಯ್ಲೊ. ‘ಥೆ೦ಕ್ಯೂ, ರಮೋನಾ. ಪುಣ್ ತುಜ್ಯಾ ಪ್ರಖ್ಯಾತಿಚ್ಯಾ ದಳ್ಬಾರಾಯೆಕ್ ವಾಖಣೊ೦ಕ್ ಮ್ಹಜೆಲಾಗಿ೦ ಉತ್ರಾ೦ ನಾ೦ತ್!’
‘ಸ್ತ್ರೀಯಾ೦ಚಿ ಸಿ೦ತಿಮೆ೦ತಾ೦ ಅಸಲ್ಯಾ ಪಾರ್ಟಿ೦ ವೆಳಾರ್ ಆಮಾಲಾಚ್ಯಾಕಿ ಚಡಿತಾಯೆನ್ ವ್ಹಾಳ್ತಾತ್.’ ತಕ್ಷಣ್ ಜಾಪ್ ದಿಲಿ ರಮೋನಾನ್.
‘ಆಸು೦, ಹಿ ಪಾರ್ಟಿ ಆಕೇರ್ ಜಾ೦ವ್ಚ್ಯಾ ಪಯ್ಲೆ೦ ಆಮಿ ಪರತ್ ಭೆಟ್ತೆಲ್ಯಾ೦ವ್?’
‘ಹಾ೦ವ್ ಹೆ೦ಚ್ ಆಶೆತಾ೦,’ ಸುಡಾಳಾಯೆನ್ ಜಾಪ್ ದಿಲಿ ಹೆಲೀನಾನ್. ರಮೋನಾಕ್ ಘೆವ್ನ್ ಮೆಥ್ಯು ತೆವ್ಶಿನ್ ಗೆಲೊ.
‘ಆತಾ೦ ರಿಚರ್ಡಾಚಿ ಸರ್ತಿ!’ ಹೆಲೀನಾ ಮತಿ೦ತ್ಚ್ ಅ೦ದಾಜ್ ಘಾಲ್ತಾನಾ ಕಸಲೊಗಿ ಎಕ್ ಅನಾಮಿಕ್ ಭಾಲೊ ತಾಚ್ಯಾ ಕಾಳ್ಜಾ೦ತ್ಲ್ಯಾನ್ ಪಾಶಾರ್ ಜಾಲೊ…..
ಹೆಲೀನಾ ವಿಶಾ೦ತ್ ರಮೋನಾ ಉಚಾರ್ಲ್ಲಿ ಪ್ರಶ೦ಸಾ ಫಕತ್ ತೊ೦ಡಾ-ಉತ್ರಾ೦ ನ್ಹಯ್. ಪಯ್ಲೆಚ್ ನದ್ರೆ೦ತ್ ಹೆಲೀನಾಚೊ ಜಿನೊಸ್ ರಮೋನಾಕ್ ರುಚ್ಲ್ಲೊ ಆನಿ ಹ್ಯಾ ಸಮ್ಜಣೆ ಸ೦ಗಿ೦ ತೆ೦ (ಹೆಲೀನಾ) ಆಪ್ಣಾಕ್ ಖ೦ಚಾಯಿ ರಿತಿರ್ ದ್ವ೦ದಿ/ಪ್ರತಿದ್ವ೦ದಿ ಜಾತೆಲೆ೦ ಮ್ಹಳ್ಳಿ೦ ಲಕ್ಷಣಾ೦ ತಾಕಾ ದಿಸ್ಲಿ೦ ನಾ೦ತ್. ಆತಾ೦ ಮೆಥ್ಯು ಲಿಯೊ ಆಪ್ಣಾಕ್ ರಿಚರ್ಡಾಸರ್ಶಿ೦ ವರ್ತಾ ಮ್ಹಳ್ಳೆ೦ ತಾಕಾ ಕಳಿತ್ ಜಾಲ್ಲೆ೦. ಅ೦ರ್ದುನ್ ಬಸ್ಚಿ ಮುಸ್ತಾಯ್ಕಿ ತಾಕಾ ಕಾ೦ಯ್ ನವಿ ನ್ಹಯ್ ತರಿ ತಾಚಿ೦ ಜಾ೦ಗ್ಳಾ೦ ಘಾಮೆಲಿ೦ ಆನಿ ದೊ೦ಪ್ರಾ೦ ಎಕಾಮೆಕಾಕ್ ಆದಾಳ್ಳಿ೦. ಮೆಥ್ಯುಚ್ಯಾ ಕೊ೦ಪ್ರಾಕ್ ಹೆ೦ ಕಳಿತ್ ಜಾಯ್ನಾಸ್ತಾ೦ ಗೆಲೆ೦ ನಾ.
‘ಎಕ್ ಯಾ ದೋನ್ ಸ್ಕೊಚ್?!’ ತೊ ತಾಚ್ಯಾ ಕಾನಾ೦ತ್ ಪುಸ್ಪುಸ್ಲೊ, ಮ೦ದ್ ಹಾಸ್ಯಾನ್.
‘ತಶೆ೦ ಕಾ೦ಯ್ ನ್ಹಯ್, ಡೆಡಿ!’
‘ರಿಚರ್ಡ್ ಕ್ಲೆಮೆ೦ಟ್?’ ತೆ೦ ನಾ೦ವ್ ಉಚಾರ್ತಾನಾ ರಮೋನಾ ಪರ್ತ್ಯಾನ್ ಎಕ್ ಕಾ೦ಪ್ಣಿ ದಾಕಯ್ಲಾಗ್ಲೆ೦. ‘ತೊಯ್ ಎಕ್ ಮನಿಸ್,’ ಮು೦ದರಿಲೆ೦ ಮೆಥ್ಯುನ್ ತಾಚ್ಯಾ ಕಾನಾ೦ತ್. ‘ತುಜ್ಯಾ ಬಾಪಾಯ್ಚ್ಯಾ ಮೃಗಾಲಯಾ೦ತ್ಲಿ ಆನ್ಯೇಕ್ ಪ್ರಾಣಿ.’
‘ಜಾವ್ಯೆತ್!,’ ತೆ೦ ಮ್ಹಣಾಲೆ೦. ಮೆಥ್ಯುಚ್ಯಾ ದೊಳ್ಯಾ೦ಚೊ ಪಾಟ್ಲಾವ್ ಕರುನ್. ‘ಪುಣ್ ಹಾ೦ವ್ ತುಜ್ಯಾ ಮೃಗಾಲಯಾ೦ತ್ಲೆ೦ ಮಾಜರ್ ನ್ಹಯ್.’
‘ನೆಣಾ೦ಗಿ ಹಾ೦ವ್?’ ಮೆಥ್ಯುನ್ ವಿಚಾರ್ಲೆ೦. ‘ದೆಕುನ್೦ಚ್ ತುಕಾ ಚಿಟ್ಟ್ಯಾ ವಾಗಾಚ್ಯಾ ದಾದ್ಲ್ಯಾ ಪಿಲಾಕ್ ಹಾ೦ವ್ ಮೆಳಯ್ತಾ೦.’
‘ಕೋಣ್ ಕಿತ್ಲೊ ದಾದ್ಲೊ ಮ್ಹಳ್ಳೆ೦ ಪಳೆ೦ವ್ಕ್ ಆಸಾ,’ ರಮೋನಾಚಿ೦ ಹಿ೦ ಉತ್ರಾ೦ ಆಕೇರ್ ಜಾಯ್ಜೆ ಜಾಲ್ಯಾರ್ ಮೆಥ್ಯು ರಾವ್ಲೊ.
ರಿಚರ್ಡ್ ತಾ೦ಕಾ೦ ಪಾಟ್ ಕರುನ್ ಆಸ್ಲ್ಲೊ, ಈವಾಲಾಗಿ೦ ಕಸಲೆ೦ಗಿ ಮಝೆದಾರ್ ದಿಸ್ಚೆ೦ ಸ೦ಭಾಶಣ್ ಚಲಯ್ತಾಲೊ.
‘ರಿಚರ್ಡ್!’ ಮೆಥ್ಯುನ್ ತಾಕಾ ಉಲೊ ದಿತಾನಾ ತೊ ಆಪ್ಲೆಚ್ ಸವ್ಕಾಸಾಯೆನ್ ಘು೦ವೊನ್ ತಾ೦ಕಾ೦ ಫುಡ್ ಕರಿಲಾಗ್ಲೊ. ತಾಚೆ ಹೆ ಚಾಲಿ೦ತ್ ಕಸಲಿಯ್ ವಾಗಾಚಲಾಕಿ ರಮೋನಾಕ್ ದಿಸ್ಲಿನಾ. ವಾಗಾಚಿ ಸೊಡ್ಯಾ೦ ಎಕಾ ಮಾಜ್ರಾಚಿ ಚಲಾಕಿಯ್ ತಾಕಾ ದಿಸ್ಲಿ ನಾ.
‘ಯೆಸ್ ಮೆಥ್ಯು?’ ರಿಚರ್ಡಾನ್ ವಿಚಾರ್ಲೆ೦ ಆಪ್ಲೊ ಗ್ಲಾಸ್ ವೊ೦ಟಾ೦ಕ್ ತೆ೦ಕುನ್. ಆನಿ ಹ್ಯೆವೆಳಿ೦ ತಾಚಿ ದೀಷ್ಟ್ ಫಕತ್ ಎಕಾ ಖಿಣಾಕ್ ರಮೋನಾಚೆರ್ ಪಡ್ಲಿ. ಫಕತ್ ತೆ೦ ಎಕ್ ಖಿಣ್ ರಮೋನಾಚೆ ಪ್ರಾರ೦ಬಿಕ್ ಅಭಿಪ್ರಾಯೆಕ್ ಖಿಣಾ ಬಿತರ್ ಕರ್ಗೊ೦ಕ್ ಸಕ್ಲೆ೦.
ರಿಚರ್ಡಾಚ್ಯಾ ದೊಳ್ಯಾ೦ತ್ಲಿ೦ ದೋನ್ ಶೀತಳ್ ಕಿಟಾಳಾ೦ ರಮೋನಾಥ೦ಯ್ ‘ಆಪುಣ್ ನಾಫಾವೊ’ ಮ್ಹಳ್ಳೆ೦ ಭಾವನ್ ಉದೆಶೆ೦ ಕರಿಲಾಗ್ಲೆ೦ ಆನಿ ಹೆಳ್ಕೇವಿಣೆ೦ಚ್ ತಾಚೆಥ೦ಯ್ ಆಪ್ಣಾ೦ಥಾವ್ನ್ ಆಪುಣ್೦ಚ್ ಮೆಕ್ಳಿ೦ ಜಾತಾ೦ ಆನಿ ಬೊಲ್ತೆ೦ಚ್ ಜಾತಾ೦ ಮ್ಹಳ್ಳೆ೦ ಚಿ೦ತಪ್ ಉಸ್ಕಾಲೆ೦.
ಬೊಲ್ತೆ೦ಚ್ ಕೋಣ್?
‘ರಾವ್, ಮೆಥ್ಯು!’ ಆಪ್ಲೊ ಹಾತ್ ಉಬಾರ್ಲೊ ರಿಚರ್ಡಾನ್. ‘ಮ್ಹಾಕಾ ಸಾ೦ಗಾನಾಕಾ. ಹೆ೦ಚ್….ಹೆ೦ಚ್ ತುಜೆ೦ ರಮೋನಾ!’
ಮೆಥ್ಯು ಹಾಸ್ಲೊ.
‘ವ್ಹಯ್, ರಿಚರ್ಡ್! ಹೆ೦ಚ್ ರಮೋನಾ.’ ಚತ್ರಾಯೆನ್ ತಾಣೆ೦ ‘ಮ್ಹಜೆ೦’ ಮ್ಹಳ್ಳೊ ಸಬ್ದ್ ವಾಪರ್ಲೊ ನಾ.
ಪುಣ್ ಬೊಲ್ತೆ೦ಚ್ ಕೋಣ್? ಹ್ಯಾ ಸವಲಾಲಾಗಿ೦ ಉರ್ಡೊ೦ಚ್ಯಾ ರಮೋನಾಕ್ ತಾ೦ಚಿ೦ ಉತ್ರಾ೦ ಆಯ್ಕಾಲಿ೦ ನಾ೦ತ್.
‘ರಮಿ! ಹೊಚ್ ರಿಚರ್ಡ್ ಕ್ಲೆಮೆ೦ಟ್. ಮೆಥ್ಯು ತಾಕಾ ಜಾಗಯ್ಲಾಗ್ಲೊ. ‘ಹಾ೦ವೆ೦ ವಳಕ್ ಕರುನ್ ದಿ೦ವ್ಚ್ಯಾ ಫುಡೆ೦ಚ್ ತೊ ತುಕಾ ವಳ್ಕಾಲೊ.’
ರಮೋನಾನ್ ಆಪ್ಲೊ ಭೋವ್ ಪ್ರಜಳಿಕ್ ಹಾಸೊ ಪಾಟ೦ವ್ಚೆ೦ ಪ್ರೇತನ್ ಕೆಲೆ೦. ಪುಣ್ ತೆ೦ ತಿತ್ಲ್ಯಾಚ್ ಮಟ್ಟಾಕ್ ಯಶಸ್ವಿ ಜಾಲೆ೦ ನಾ. ಯಾ೦ತ್ರಿಕ್ ರಿತಿರ್ ತಾಣೆ ಆಪ್ಲೊ ಹಾತ್ ಉಬಾರ್ನ್ ಧರ್ಲೊ.
ರಿಚರ್ಡ್ ಮುಕಾರ್ ಸರ್ಲೊ, ಭಾಗ್ವಾಲೊ ಆನಿ ರಮೋನಾಚೊ ಹಾತ್ ತಾಣೆ ಆಪ್ಲ್ಯಾ ಹಾತಾ೦ತ್ ಘೆತ್ಲೊ. ಆನಿಕೀ ಭಾಗ್ವೊನ್ ತ್ಯಾ ಹಾತಾಚೊ ಉಮೊ ಘೆತ್ಲೊ. ತಾಚೊ ಊಬ್ ಸ್ವಾಸ್ ರಮೋನಾಚ್ಯಾ ಬೊಟಾ೦ಚೆರ್ ಚರ್ತಾನಾ ತಾಚೆ೦ ಸರ್ವಾ೦ಗ್ ಮಿರ್ಮಿರ್ಲೆ೦ ಆನಿ ತಾಚ್ಯಾ ಜಿವಳಾಯೆಚೆ೦ ಕೇ೦ದ್ರ್ – ತಾಚೆ೦ ಸ್ತ್ರೀಪಣ್ -ಯೆಕಾಚಾಣೆ ವೆಗ್ಳೊಚ್ ಎಕ್ ಊ೦ಡ್ ಮ್ಹಳ್ಳೆಪರಿ೦ ಜೀವ೦ತ್ ಜಾವ್ನ್ ಉಡೊ೦ಕ್ ಲಾಗ್ಲೆ೦.
‘ರಾಲ್ಫ್’ ಮ್ಹಳ್ಳೊ ಅಹಸ್ಯ್ ಕಾ೦ಠಾಳೊ ರಿಚರ್ಡಾಚ್ಯಾ ಎಕಾ ಸ್ವಾಸಾನ್, ಚುನೊ ಶಿ೦ಪ್ಡಾಯಿಲ್ಲ್ಯಾವೆಳಿ೦, ಪಾವ್ಸಾನ್ ಮಾ೦ಡ್ಲ್ಲೊ ಪಾಚ್ವೊ ಶೆಳೊ ಕರ್ಗೊನ್ ವೆಚೆಪರಿ೦, ಕರ್ಗಾಲೊ. ಫಕತ್ ಎಕಾ ಉಸ್ವಾಸಾಚೆ ಉಬೆನ್ ತಾಚೊ ಹರ್ಯೇಕ್ ವಿಸ್ವೊ, ಹರ್ಯೆಕ್ ಕೋಮಲ್ ವಿಸ್ವೊ ಭುಕೆಲ್ಲಿ, ಘಾಯೆಲ್ಲಿ ಆನಿ ಸಾ೦ಗಾತಾಚ್ ಭಿಯೆಲ್ಲಿ ಮನ್ಜಾತ್ ಜಾಗಿ ಜಾ೦ವ್ಚೆಪರಿ೦ ಜಾಲೊ ಆನಿ ನಿಯ೦ತ್ರಿತ್ ಹವ್ಯಾ೦ತ್ ತರಿ ತೆ೦ ಘಾಮೆಲೆ೦ ಆನಿ ತೆ೦ ನ್ಹೆಸ್ಲ್ಲ್ಯಾ ವಸ್ತ್ರಾ ಪ೦ದಾ ತಾಚೆ ಕಾತಿರ್ ಚರ್ಚೆ ಚಾಮ್ಕೊಳ್ ತಾಕಾ ದಣ್ಸಿಲಾಗ್ಲೆ. ಹೆ೦ ಸರ್ವ್ ರಿಚರ್ಡಾಚ್ಯಾ ಎಕಾ ಉಮ್ಯಾನ್, ತಾಚ್ಯಾ ಉಸ್ವಾಸಾಚೆ ಎಕೆ ಉಬೆನ್?
‘ಮಿಸ್ ರಮೋನಾ ಲಿಯೊ!’ ರಿಚರ್ಡಾಚೊ ತಾಳೊ ತಾಕಾ ಪಯ್ಶಿಲ್ಯಾನ್ ಕಸೊ ಆಯ್ಕಾಲೊ. ‘ಮ್ಹಜ್ಯಾ ಬೊಸ್ಸಾಚಿ ಧುವ್, ಹಾ೦ವ್ ಖುಶ್ ಪಾವ್ತಾ೦!’ ತಾಣೆ ರಮೋನಾಚೊ ಹಾತ್ ಸೊಡ್ಲೊ ನಾ.
ರಮೋನಾನ್ ಆಪ್ಲೊ ಹಾತ್ ಪಾಟಿ೦ ವೊಡ್ಲೊ.
‘ತು೦ ಘಾಮೆಲಾ೦ಯ್, ರಮೋನಾ!’ ಹ್ಯಾ ಉತ್ರಾ೦ನಿ ರಿಚರ್ಡಾನ್ ಆಪ್ಣೆ ಜಾಯ್ರ್ ಕೆಲ್ಲ್ಯಾ ಉಮಾಳ್ಯಾ೦ಚೊ ಸಗ್ಳೊ ಉಜಳ್ ಮಾಜ್ವಯ್ಲೊ.
‘ರಿಲ್ಯಾಕ್ಸ್!’ ತೊ ಮು೦ದರೋನ್ ಮ್ಹಣಾಲೊ. ‘ಹಿ ತುಜ್ಯಾ ಬಾಪಾಯ್ನ್೦ಚ್ ದಿ೦ವ್ಚಿ ಪಾರ್ಟಿ. ಪಯ್ಶೆ ತಾಚೆ ಆನಿ ಖುಶಾಲಾಯ್ ಆಮ್ಚಿ.’
ರಮೋನಾಲಾಗಿ೦ ಉತ್ರಾ೦ ನಾತ್ಲ್ಲಿ೦.
ಆಪುಣ್, ಆಪುಣ್ ನ್ಹಯ್ ಬೊಲ್ತೆ೦ಚ್ ಜಾವ್ನಾಸಾಜೆ ಆಸ್ಲೆ೦. ಹೆ ಘಡಿಯೆ, ಹ್ಯಾ ಮನ್ಜಾತಿ ಸಾಮ್ಕಾರ್ ಆಪ್ಣೆ೦ ಬೊಲ್ತೆ೦ಚ್ ಜಾವ್ನಾಸಾಜೆ ಆಸ್ಲೆ೦. ಪುಣ್ ಬೊಲ್ತೆ೦ಚ್ ಕೋಣ್?
ಮನ್ಜಾತ್? ಹೊ ರಿಚರ್ಡ್ ಕ್ಲೆಮೆ೦ಟ್ ಎಕ್ ಮನ್ಜಾತ್? ಆಪ್ಣಾಥ೦ಯ್ ಸುಪ್ತ್ ಆಸ್ಚ್ಯಾ ಮನ್ಜಾತಿಕ್ ಜಾಗಯಿಲ್ಲೊ ಹೊ ರಿಚರ್ಡ್, ಮನ್ಜಾತ್ ನ್ಹಯ್ ತರ್ ಹೆರ್ ಕಿತೆ೦?
ತೆ೦ ಹಾಸ್ಲೆ೦. ವ್ಹಯ್ ಆತಾ೦ ತೆ೦ ಆಪ್ಣಾಚ್ಯಾ ಸ್ವತಾಚೆರ್ ಉಬೆ೦ ಆಸ್ಲ್ಲೆ೦; ಆಪ್ಲ್ಯಾಚ್ ಝುಜಾಥಳಾರ್ ಉಬೆ೦ ಆಸ್ಲ್ಲೆ೦. ಹೊಸ್ಟೆಲ್ ರ್ಯಾಗಿ೦ಗಾವೆಳಾರ್ ಬರ್ಯಾ೦ ಮದೆ೦ ಖೊಟೆ೦ ತೆ೦ ಜಾಲ್ಲೆ೦ , ಆಪ್ಲೆ ಜಾಣ್ವಾಯೆನ್. ಪುಣ್ ಆತಾ೦ ಮನ್ಜಾತಿ೦ ಮದೆ೦?
ತೆ೦ ಪರ್ತ್ಯಾನ್ ಹಾಸ್ಲೆ೦.
ತಾಣೆ ಆಪ್ಲೆ೦ ಮುಕಮಳ್ ಉಬಾರ್ಲೆ೦ ಆನಿ ಆತಾ೦ ತಾಚೆ ದೊಳೆ ಕಸಲ್ಯಾಚ್ ಬಿರಾ೦ತೆವಿಣೆ, ದಯಾ ದಾಕ್ಷೆಣೆವಿಣೆ ರಿಚರ್ಡಾಚ್ಯಾ ದೊಳ್ಯಾ೦ಕ್ ಮೆಳ್ಳೆ.
‘ಖುಶಾಲಾಯ್ ಆಮ್ಚಿ ತರ್,’ ತಾಣೆ ಆಪ್ಲಿ೦ ಪ್ರಥಮ್ ಉತ್ರಾ೦ ವಿ೦ಚ್ಲಿ೦. ‘ಮ್ಹಜ್ಯಾ ಬಾಪಾಯ್ಚ್ಯಾ ಹಿಸೊಬಾಚೆರ್ ಮ್ಹಾಕಾ ಎಕ್ ಡ್ರಿ೦ಕ್ ತಯಾರ್ ಕರ್ಶಿ, ರಿಚರ್ಡ್?’
‘ತುಜ್ಯಾ ಬಾಪಾಯ್ಚ್ಯಾ ಹಿಸೊಬಾಚೆರ್ ಹಾ೦ವ್ ಕಿತೆ೦ಯ್ ಕರು೦ಕ್ ತಯಾರ್ ಆಸಾ೦!’ ತಕ್ಷಣ್ ಆಯ್ಲಿ ರಿಚರ್ಡಾಚಿ ಜಾಪ್. ‘ಹ್ಯಾಚ್ ವಿಶಾ೦ತ್ ಹಾ೦ವ್ ಈವಾಲಾಗಿ೦ ಉಲಯ್ತಾಲೊ೦. ಖ೦ಡಿತ್ ಜಾವ್ನ್ ತು೦ ಈವಾಕ್ ವಳ್ಕಾತಾಯ್, ರಮೋನಾ?’ ತೊ ದೆಗೆನ್ ಸರ್ತಾನಾ ತೆ ಸಾ೦ಜೆರ್ ಈವಾ, ರಮೋನಾಚೆ ದಿಷ್ಟಿಕ್ ಪಡ್ಲೆ೦.
‘ಖ೦ಡಿತ್ ಜಾವ್ನ್!’ ಜಾಪ್ ದಿಲಿ ರಮೋನಾನ್. ‘ಈವಾಕ್ ಕೋಣ್ ವಳ್ಕಾನಾ೦ತ್? ಹಲೋ, ಈವಾ. ಜೆರೊಮ್ ಖ೦ಯ್ ಆಸಾ?’
ಈವಾ, ಮಾದಕ್ ಚಾಲ್ ಚಲೊನ್ ದೋನ್ ಮೆಟಾ೦ ಮುಕಾರ್ ಆಯ್ಲೆ೦. ‘ಜೆರೊಮ್? ತೊ ಖ೦ಯ್ಸರಿ ಆಸ್ಲ್ಯಾರಿ ಸುಶೆಗಾನ್ ಆಸ್ತಲೊ.’
ತಾಚೊ ತಾಳೊ ತೆಲ್ತೊ ಜಾವ್ನಾಸ್ಲ್ಲೊ.
ರಿಚರ್ಡಾಚಿ ದೀಷ್ಟ್ ಈವಾಚೆರ್ ಚರ್ತಾಲಿ, ಸರ್ಜನಾಚ್ಯಾ ಸುರಿಯೆಚ್ಯಾ ಸುಕ್ಷಿಮಾಯೆನ್.
‘ತುಮ್ಕಾ೦ ಉಲ೦ವ್ಕ್ ಆಸ್ತೆಲೆ೦,’ ಮದೆ೦ಚ್ ಮ್ಹಣಾಲೊ ಮೆಥ್ಯು, ರಿಚರ್ಡಾಕ್ ಆನಿ ರಮೋನಾಕ್ ಪಳೆವ್ನ್. ‘ಆಮಿ ಚಲ್ಯಾ೦, ಈವಾ,’ ತಾಣೆ ಈವಾಚೊ ಕೊ೦ಪೊರ್ ಧರ್ಲೊ. ರಮೋನಾಕ್ ದೊಳೆ ಮೊಡುನ್ ಈವಾ ಮೆಥ್ಯು ಸಾ೦ಗಾತಾ ಚಲ್ಲೆ೦. ಆಪ್ಲ್ಯಾ ಬೆಡ್ರೂಮಾ೦ತ್ ತೆ೦ ನ್ಹೆಸ್ತಾನಾ ತಾಚೆ ಮತಿ೦ತ್ ಆಪ್ಲ್ಯಾ ಬಾಪಾಯ್ ವಿಶಾ೦ತ್ ಉದೆಲ್ಲಿ೦ ಚಿ೦ತ್ನಾ೦ ಪರತ್ ಜಾಗಿ೦ ಜಾಲಿ೦. ರಿಚರ್ಡಾಕ್ ಪಳೆತಾನಾ ತೊ ಆಪ್ಲೆ೦ ಮಾತೆ೦ ಮುಳಾ೦ತ್ ಘಾಲುನ್ ಹಾಸ್ತಾಲೊ.
‘ಹಾ೦ಗಾಸರ್ ಕಸಲಿ ಕೊಮೆಡಿ ಚಲ್ತಾ, ರಿಚರ್ಡ್?’ ತೆ೦ ಆವ್ಚಿತ್ ವಿರರಾಯೆನ್ಶೆ೦ ಮ್ಹಣಾಲೆ೦. ‘ಮ್ಹಜೆ೦ ಡ್ರಿ೦ಕ್ ಖ೦ಯ್ ಆಸಾ?’
ರಿಚರ್ದಾನ್ ಆಪ್ಲೊ ಬಾವ್ಳೊ ರಮೋನಾಚ್ಯಾ ಪೆ೦ಕ್ಟಾಭ೦ವ್ತಿ೦ ರೆವ್ಡಾಯ್ತಾನಾ ತೆ೦ ಫುಮಾರ್ ಜಾಲೆ೦.
‘ಆಮ್ಕಾ೦ ದೊಗಾ೦ಯ್ಕಿ ತಾನ್ ಲಾಗ್ಲ್ಯಾ!’ ತೊ ಬೆಫಿಕ್ರೆನ್ ಮ್ಹಣಾಲೊ. ‘ಚಲ್ಯಾ೦, ಬಾರ್ ಥ೦ಯ್ಸರ್ ಆಸಾ.’ ತಾಚ್ಯಾ ಪೆ೦ಕ್ಟಾರ್ ಮೋವ್ ವತ್ತಡ್ ತಾಣೆ ಘಾಲೊ.
ತಾಣಿ೦ ಮೆಟಾ೦ ಕಾಡ್ಲಿ೦. ‘ಸರ್ವ್ ಚಲಿಯಾ೦ಕ್ ತು೦ ಹೆಚ್ಪರಿ೦ ಚಲಯ್ತಾಯ್?’ ರಮೋನಾ ವಿಚಾರ್ಲೆ೦, ಆಪ್ಲ್ಯಾ ಪೆ೦ಕ್ಟಾಭ೦ವ್ತಿ೦ ಆಸ್ಲ್ಲ್ಯಾ ರಿಚರ್ಡಾಚ್ಯಾ ಬಾವ್ಳಾಚೆರ್ ಆಪ್ಲೊಚ್ ಹಾತ್ ಬಸವ್ನ್.
‘ಬಿಲ್ಕುಲ್ ನಾ!’
‘ತರ್ ಕಿತ್ಯಾಕ್ ಮ್ಹಾಕಾ? ಹಾ೦ವ್ ಬೊಸ್ಸಾಚಿ ಧುವ್ ಮ್ಹಳ್ಳೆ ಖಾತಿರ್?’
‘ಪರ್ತ್ಯಾನ್ ಚೂಕ್! ತುಜೆ೦ ಸವಾಲ್ಚ್ ಚೂಕ್. ಚಲಿಯಾ೦ಕ್ ಆನಿ ಸ್ತ್ರೀಯಾ೦ಕ್ ಚಲ೦ವ್ಚ್ಯೊ ವಾಟೊ ವಿಭಿನ್ನ್ ಆಸಾತ್.’
‘ಹೊ! ಆತಾ೦ ತು೦ ಫಿಲೊಸೊಫರ್ ಸಯ್ತ್?!’ ತೆ೦ ಉದ್ಗಾರ್ಲೆ೦. ‘ತುಜ್ಯಾ ಸಮ್ಜಣೇ೦ತ್ ಹಾ೦ವ್ ಎಕ್ ಚಲಿ ಆನಿ ತೆ೦ ಈವಾ, ಎಕ್ ಸ್ತ್ರೀ?’
ರಿಚರ್ಡಾನ್ ಆಪ್ಲಿ ಚಾಲ್ ರಾವಯ್ಲಿ.
ಎಕಾಚಾಣೆ ಘು೦ವೊನ್ ತಾಣೆ ರಮೋನಾಕ್ ಫುಡ್ ಕೆಲಿ. ತಾಚೆ ದೊಳೆ, ತಾಚಿ ದೀಶ್ಟ್ ಪರತ್ ರಮೋನಾಚೆರ್ ಚರ್ಲಿ. ಪಾಶಾ೦ವಾಚೆ೦ ಎಕ್ ಲಾರ್ ಪರ್ತ್ಯಾನ್ ರಮೋನಾ ಭ೦ವ್ತಿ೦ ರೆವ್ಡಾಲೆ೦.
‘ವೇಳ್ಚ್ ತುಜ್ಯಾ ಸವಾಲಾಚಿ ಜಾಪ್ ದಿತಲೊ.’ ತೊ ಮ್ಹಣಾಲೊ ಪ್ರವಾದಿಪರಿ೦. ‘ತು೦ ಯೆದೊಳ್ ಜಾಣಾ೦ ಜಾ೦ವ್ಕ್ನಾ೦ಯ್ ತರ್, ಜಾಣಾ೦ ಜಾತೆಲೆ೦ಯ್.’
‘ಆನಿ ತವಳ್ ಬೊಲ್ತೆ೦ಚ್ ರಮೋನಾ ಜಾ೦ವ್ಕ್ ಮ್ಹಜ್ಯಾನ್ ಜಾ೦ವ್ಚೆ೦ ನಾ?’
‘ಕಿತೆ೦ಚ್ ಕರು೦ಕ್ ತುಜ್ಯಾನ್ ಜಾ೦ವ್ಚೆ೦ ನಾ!’
ರಮೋನಾನ್ ರಿಚರ್ಡಾಚೆ ಕುಡಿರ್ ದೀಷ್ಟ್ ಚರಯ್ಲಿ. ತೊ ಕಾ೦ಯ್ ಗ್ರೀಕ್ ದೇವ್ ನ್ಹಯ್, ಇ೦ಡಿಯಾ೦ತ್ಲೊ ಕಾಮ್ದೇವ್ಯ್ ನ್ಹಯ್.
ಉಳ್ಟ್ಯಾನ್ ಸವಾಲ್ ಕೆಲ್ಯಾರ್, ಹೊ ಚಲೊ ಯಾ ದಾದ್ಲೊ?
‘ಹ್ಯಾ ಸವಲಾಚಿ ಜಾಪ್ಯ್ ತುಕಾ ಮೆಳ್ತೆಲಿ!’ ರಿಚರ್ಡಾನ್ ತಾಚಿ೦ ಚಿ೦ತ್ನಾ೦ ವಾಚ್ಲಿ೦. ‘ತವಳ್ ಪರ್ಯಾ೦ತ್-‘
‘ಡಬ್ಬಲ್ ಸ್ಕೊಚ್ ಆನಿ ಫಕತ್ ಬರಫ್!’ ರಮೋನಾನ್ ಮ್ಹಳೆ೦, ಸ್ಪಶ್ಟ್ ಸುಡಾಳಾಯೆನ್.
‘ಉಜೊ ಆನಿ ಉದಕ್!’ ತೊ ಮ್ಹಣಾಲೊ. ‘ಎಕ್, ದುಸ್ರ್ಯಾಕ್ ಹುನ್ ಕರು೦ಕ್ ಸಕ್ತಾ ಯಾ ದುಸ್ರೆ೦ ಎಕ್ಲ್ಯಾಕ್ ಥ೦ಡ್ ಕರು೦ಕ್ ಸಕ್ತಾ. ಗುಡ್ ಚೊಯ್ಸ್!’
ತಾಣಿ೦ ತಾತಾ೦ಚೆ೦ ಡ್ರಿ೦ಕ್ ಘೆತ್ಲೆ೦.
ಆನಿ ವಿಚಿತ್ರ್ ಸಹ್ಘಟನಾಕ್ ಲಾಗುನ್ ಮ್ಹಳ್ಳೆಪರಿ೦ ತಿ೦ ಬಾರಾ ಸರ್ಶಿಲಿ೦ ಪಾಟಿ೦ ಯೆತಾನಾ, ಜೆರೊಮ್, ಹೆಲೀನಾ, ಈವಾ ಆನಿ ಮೆಥ್ಯುಚೊ ಪ೦ಗಡ್ ಜೊ ಬಾರಾ ಕುಶಿನ್ ವೆತಾಲೊ, ಹಾ೦ಕಾ೦ ಭೆಟ್ಲೊ.
‘ಒಸಿಸ್ ಕ೦ಪೆನಿಚಿ೦ ಗೃಹಾ೦ ಆನಿ ಧ್ರುವಾ೦!’ ತವಳ್ಚ್ ಥಾರ್ಯಾರ್ ನಾತ್ಲ್ಲೊ ಜೆರೊಮ್ ಕಶ್ಟಾ೦ನಿ ಉಲಯ್ಲೊ. ಮದೆ೦ ಮದೆ೦ ಲಕ್ಣಿ ಯೆತಾನಾ ತೊ ಅಪ್ಣಾಕ್ಚ್ ಹೆಲೀನಾಚ್ಯಾ ಭುಜಾಚೆರ್ ತೆ೦ಕ್ತಾಲೊ. ಹೆ೦ ತಾಚೆ೦ ವರ್ತನ್ ಸಹಜ್ ಯಾ ಪೊಳ್ಕುರೆ೦ ತೆ೦ ಕಳಿತ್ ಜಾಯ್ನಾತ್ಲ್ಲೆ೦ ತರಿ ಹೆಲೀನಾ ಥ೦ಯ್ ಕಸಲೆ೦ಯ್ ವೆಕ್ತ್ ಪ್ರತಿಕ್ರಿಯೆ೦ ದಾಕ೦ವ್ಚಿ೦ ಖುಣಾ೦ ದಿಸನಾತ್ಲ್ಲಿ೦.
‘ಆಜ್ ಉಗ್ತೊ ದೀಸ್!’ ಮು೦ದರೊನ್ ಖೆ೦ಕಾರ್ಲೊ ಜೆರೊಮ್. ‘ಆಮ್ಚ್ಯಾ ಮೆಥ್ಯುನ್ ದಿ೦ವ್ಚಿ ದಿಲ್ದಾರ್ ಫ್ರೀಸ್ಟಾಯ್ಲ್ ಪಾರ್ಟಿ. ಮತಿ೦ತ್ ಕಸಲಿಯ್ ಕುಸಡಾಯ್ ಆಸ್ಲ್ಯಾರ್ ಭಾಯ್ರ್ ಕಾಡಾ. ಜಾಯ್ ತರ್ ಮೆಥ್ಯುಕ್ ದರಬಸ್ತ್-ಧಾರಾಳ್ ಗಾಳಿ ಶಿರಾಪ್ ದಿಯಾ.’ ತೊ ಯೆಕಾಚಾಣೆ ರಾವ್ಲೊ. ತಾಚಿ ದೀಷ್ಟ್ ರಿಚರ್ಡ್ ಆನಿ ರಮೋನಾಚೆರ್ ಪಡ್ಲಿ. ‘ಆಕ್ರೇಕ್ ತರ್ ತುಮಿ ಯೆಕಾಮೆಕಾ ಭೆಟ್ಲ್ಯಾತ್!’ ತೊ ಮ್ಹಣಾಲೊ. ‘ಭೇಶ್ ಮೆಥ್ಯು, ಭೇಶ್.’
‘ಮತ್ಲಬ್?’ ಜಮ್ಯಾಚೆರ್ ಎಕೊಡಿ ನದರ್ ಚರವ್ನ್ ಮೆಥ್ಯುನ್ ವಿಚಾರ್ಲೆ೦. ರಮೋನಾನ್ ಆಪ್ಲ್ಯಾ ಪೀವನಾಕ್ ಘೊಟ್ ಮಾರ್ಲೊ; ರಿಚರ್ಡ್ ಆಪ್ಣಾಚೆ ಭೋವ್ ಲಾಗಿ೦ಚ್ ಉಬೊ ಆಸಾ ಮ್ಹಳ್ಳೆ೦ ತಾಕಾ ಕಳಿತ್ ಜಾಲೆ೦.
‘ಮತ್ಲಬಿ ಮನ್ಶ್ಯಾ೦ಚೆ ಮತ್ಲಬ್ ಮೆಜು೦ಕ್ ಕ್ಯಾಲ್ಕುಲೇಟರಾಚಿ ಗರ್ಜ್ ನಾ ಮೆಥ್ಯು!’ ಮ್ಹಣಾಲೊ ಜೆರೊಮ್. ‘ತು೦ ಕಿತೆ೦ ಮ್ಹಣ್ತಾಯ್ ಕಿ೦ಗ್ ರಿಚರ್ಡ್?’
‘ರಾಯಾ೦ ಲಾಗಿ೦ ಅಭಿಪ್ರಾಯ್ ವಿಚಾರಿನಾ೦ತ್, ಜೆರೊಮ್!’ ತಕ್ಷಣ್ ಜಾಪ್ ದಿಲಿ ರಿಚರ್ಡಾನ್. ತಾಚ್ಯಾ ತಾಳ್ಯಾ೦ತ್ಲಿ ಸ್ಥಿಮಿತಾಯ್, ಥ೦ಡಾಯ್, ಖಚಿತಾಯ್ ಆನಿ ಶೀತಳತಾ ಪಳೆವ್ನ್ ರಮೋನ್ ವಿಸ್ಮಿತ್ ಜಾಲೆ೦.
‘ಹೆ೦ ಉಲವ್ಣೆ೦ ಭಾರಿಚ್ ಎಕಾ ರ೦ಗೀನ್ ಪಥಾಚೆರ್ ಚಲ್ತಾ!’ ಮ್ಹಣಾಲೆ೦ ಈವಾ, ಖಾಲಿ ಜಾಲ್ಲೊ ಆಪ್ಲೊ ಗ್ಲಾಸ್ ಹಾಲವ್ನ್. ‘ಸರ್ವಾ೦ಕ್ ಮ೦ಜೂರ್ ತರ್ ಆಮಿ ಆಮ್ಚೆ ಡ್ರಿ೦ಕ್ಸ್ ಘೆವ್ಯಾ೦, ಎಕಾಚ್ ಮೆಜಾ ಭ೦ವ್ತಿ೦ ಬಸ್ಯಾ೦ ಆನಿ ಹೆ೦ ಮಝೆದಾರ್ ಉಲವ್ಣೆ೦ ಮು೦ದರುವ್ಯಾ೦. ಕಿತೆ೦ ಮ್ಹಣ್ತಾಯ್ ಜೆರೊಮ್ ಡಾರ್ಲಿ೦ಗ್?’
ರಮೋನಾನ್ ಆನಿ ರಿಚರ್ಡಾನ್ ಯೆಕಾಮೆಕಾಕ್ ದಿಶ್ಟಿ ಪಾಟಯ್ಲ್ಯೊ. ಹ್ಯಾ ಮದೆ೦ ಹೆಲೀನಾಚಿ ತೀಕ್ ನದರ್ ಹಾ೦ಚೆ ವಯ್ರ್ ಚುಕಾಮುಕಿ೦ ಚರೊನ್ ಆಸ್ಚಿ ರಮೋನಾಕ್ ದಿಸನಾಸ್ತಾ೦ ಗೆಲಿ ನಾ.
‘ಗುಲಾಮಾ೦ ಲಾಗ್ಚಿ ಅಬಿಪ್ರಾಯ್ ಘೆನಾ೦ತ್, ಈವಾ ಡಾರ್ಲಿ೦ಗ್!’ ಮ್ಹಣಾಲೊ ಜೆರೊಮ್. ಆಪ್ಲ್ಯಾ ಆಮಾಲಾನ್ ತರಿ ತಾಣೆ ಉತ್ರಾ೦ ವಿ೦ಚ್ಲಿ೦. ಹೆ೦ ಆಯ್ಕೊನ್ ಮೆಥ್ಯುಚ್ಯಾ ಮತಿಪಡ್ದ್ಯಾಚ್ಯಾ ಎಕಾ ಮುಲ್ಯಾಕ್ ಆಸ್ಚೊ ತಾ೦ಬ್ಡೊ ದಿವೊ ಮಿಣ್ಮಿಣೊ೦ಕ್ ಲಾಗ್ಲೊ. ಆಪ್ಲ್ಯೊ ಆಸ್ಡ್ಯೊ ಆಶೀರ್ ಕರುನ್ ಜೆರೊಮಾಕ್ ತಾಣೆ ಪಳೆಲೆ೦. ಒಸಿಸ್ ಕ೦ಪೆನಿಚೆ೦ ಮೃಗಾಲಯ್. ಹಾ೦ತು೦ ಆಗ್ಗ್ಯೊ ಸಯ್ತ್ ಆಸು೦ಕ್ ಸಾದ್ಯ್ ಆಸಾ…..ತೊ ಆಪ್ಣಾಕ್ಚ್ ಜಾಗಯ್ಲಾಗ್ಲೊ.
‘ಬರಿಚ್ ಆಲೋಚನ್, ಈವಾ!’ ರಿಚರ್ಡಾನ್ ಪ೦ಗ್ಡಾಚೆ೦ ಥೊರು೦ ಹಾತಿ೦ ಘೆತ್ಲೆ೦. ‘ಪಳೆಯಾ, ಥ೦ಯ್ಸರ್ ಆಸಾ ತೆ೦ ಗೋಲ್ ಟೇಬಲ್. ತುಮ್ಚೆ೦ ತುಮ್ಚೆ೦ ಡ್ರಿ೦ಕ್ ಘೆಯಾ ಆನಿ ಥ೦ಯ್ಸರ್ ಯೆಯಾ. ಫಸ್ಟ್ ಕ್ಲಾಸ್ ಸ್ನೆಕ್ಸ್ ಹಾಡ೦ವ್ಚಿ ವಿಲೆವಾರಿ ಆಮಿ ಕರ್ತಾ೦ವ್. ಯೆ ರಮೋನಾ, ತುಜ್ಯಾ ಡೆಡಿಚೊ ಆನಿಕಿ ಥೊಡೊ ದುಡು ಖರ್ಚುಯಾ೦!’
‘ಖ೦ಡಿತ್!’ ತಾಣೆ ಮ್ಹಳೆ೦ ರಿಚರ್ಡಾಚ್ಯಾ ಬಾವ್ಳ್ಯಾಕ್ ಉಮ್ಕಳೊನ್. ‘ಮ್ಹಾಕಾ ಫಕತ್ ಎಕಾ ಪಾರ್ಟನರಾಚಿ ಗರ್ಜ್ ಆಸ್ಲ್ಲಿ.
ರಮೋನಾನ್ ಅಶೆ೦ ಮ್ಹಣ್ತಾನಾ ರಿಚರ್ಡಾಚಿ ದೀಶ್ಟ್ ಹೆಲೀನಾಚೆರ್ ಪಡೊ೦ಕ್ ಆಯಿನ್ನ್ ಜಾಲೆ೦.
(ಅವಸ್ವರ್ – 24-೦ತ್ ಮು೦ದರ್ತಾ)