ಜಾಯ್ತ್ಯಾ ದಿಸಾಂಪಾಸುನ್ ಅತ್ರೆಗುನ್ ರಾಕೊನ್ ಅಸ್ಲ್ಲೊ ಕೊಂಕ್ಣಿ ಬೈಬಲ್ ಮ್ಯಾರಥಾನ್ – ಸಂಪೂರ್ಣ್ ಬೈಬಲ್ ಅಭಿಯಾನ್ ಹ್ಯಾಚ್ ಮಹಿನ್ಯಾಚಾ 26 ತಾರ್ಕೆರ್ ಸಕಾಳಿಂ 8.30 ವರಾಂಚೆರ್ ಉಗ್ತಾವಣ್ ಜಾತಲೊ. ಅಧಿಕ್ ಮಾನಾಧಿಕ್ ಆರ್ಚ್ ಬಿಸ್ಪ್ ಪೀಟರ್ ಮಚಾದೊ, ಆರ್ಚ್ ಬಿಸ್ಪ್ ಬೆಂಗ್ಳುರ್ ಸಂದೇಶ್ ದಿವ್ನ್ ಮಾಗ್ಣ್ಯಾ ಸವೆಂ ಮ್ಯಾರಥಾನ್ ಸುರ್ವಾತ್ ಕರ್ತಾಲೊ. ಉತ್ಪತ್ತಿ ಬುಕಾಂತ್ಲೊ ಪಯ್ಲೊ ಅಧ್ಯಾಯ್ ವಾಚುನ್ ಆರ್ಚ್ಬಿಸ್ಪ್ಚ್ ಪರ್ಗಟ್ಣಿ ಆರಂಭ್ ಕರ್ತಾಲೊ. ತ್ಯಾ ಉಪ್ರಾಂತ್ ಪರ್ಗಟ್ಣಿ ಕಳ್ಮಿತ್ ನಾಸ್ತಾಂ, ನಿರಂತರಿ ಪಾಂಚ್ ದೀಸ್, 48 ಪರ್ಗಟ್ಣಾರಾಂ ದ್ವಾರಿಂ ಜಾತೆಲಿ.
ಬೆಂಗ್ಳುರ್ ಆರ್ಚ್ ದಿಯೆಸೆಜಿಚೊ ಬೈಬಲ್ ಆಯೋಗ್, ಫೆಡರೇಶನ್ ಅಫ್ ಕೊಂಕಣಿ ಕ್ಯಾಥಲಿಕ್ ಅಸೋಸಿಯೇಶನ್ಸ್ (FKCA), ಬೆಂಗ್ಳುರ್ ಸವೆಂ ಹೆಂ ಸಂಪೂರ್ಣ್ ಬೆಬಲ್ ಪರ್ಗಟ್ಣಿ ಅಭಿಯಾನ್ ಮಾಂಡುನ್ ಹಾಡ್ತಾ. ಹಿ ಪರ್ಗಟ್ಣಿ ಅಂತರ್ಜಾಳಿಚೆರ್ ಚಲ್ಚಿ ದೆಕುನ್ ತಾಂತ್ರಿಕ್ ರಿತಿನ್ ಕುಮಕ್ ಕರುಂಕ್ 12 ನಿರ್ವಹಣ್ಗಾರ್ ( Admin ) ವಾವುರ್ತೆಲೆ. 48 ಪರ್ಗಟ್ಣಾರ್ ತಸೆಂ 12 ನಿರ್ವಹಣ್ಗಾರ್ ಬೆಂಗ್ಳುರಾಂತ್ ವಸ್ತಿ ಕರ್ಚೆ ಲಾಯಿಕ್ ಜಾವ್ನಾಸಾತ್.
ಸಗ್ಳೊ ಬೈಬಲ್ ಕೊಂಕ್ಣೆಂತ್ ಅಂತರ್ಜಾಳಿಚೆರ್ ನಿರಂತರ್ ಪರ್ಗಟ್ಣಿ ಕರ್ಚೆಂ ಅಖ್ಖ್ಯಾ ಸಂಸಾರಾರ್ ಹೆಂ ಪಯಿಲ್ಲೆಂ ಪ್ರಯತನ್. ದೆವಾಚಾ ಉತ್ರಾಚಿ ಪರ್ಗಟ್ಣಿ ದೆಕುನ್ ಹೆಂ ಏಕ್ ಭಕ್ತಿಕ್ ಕಾರ್ಯೆಂ. ದೆವಾಚೆಂ ಉತರ್ ಸಂಸಾರ್ಬರ್ ಸಗ್ಳ್ಯಾ ಕೊಂಕ್ಣಿ ಲೊಕಾಕ್ ಆಯ್ಕೊಂಕ್ ಮೆಳ್ಚಾಕ್, ನಿಯಾಳ್ಚಾಕ್ ಆನಿಂ ಜಿಣ್ಯೆಕ್ ಲಾಗು ಕರ್ಚಾಕ್ ಏಕ್ ಲ್ಹಾನ್ ಕುಮಕ್. ದೆವಾಚಾ ಉತ್ರಾಚಿ ರೂಚ್ ದಿಂವ್ಚಾ ರಿತಿನ್ ಪ್ರಯತ್ನ್ ಚಲ್ತೆಲೆಂ. ಹಿ ಪರ್ಗಟ್ಣಿ ಬೆಂಗ್ಳುರ್ ಆರ್ಚ್ ದಿಯೆಸೆಜಿಚಾ ಯುಟ್ಯೂಬ್ YouTube ಚ್ಯಾನಲಾಚೆರ್, ಫೆಡರೇಶನ್ ಅಫ್ ಕೊಂಕಣಿ ಕ್ಯಾಥಲಿಕ್ ಅಸೋಸಿಯೇಶನ್ಸ್ (FKCA) ವೆಬ್ಸೈಟಿಚೆರ್ 26 ಥಾವ್ನ್ 30 ತಾರಿಕ್ ಪರ್ಯಾಂತ್ ಪಾಂಚ್ ದೀಸ್ ನಿರಂತರ್ ಮೆಳ್ತೆಲೆಂ. ಸಂಪೂರ್ಣ್ ಪರ್ಗಟ್ಣಿ ಆಯ್ಕೊಂಕ್ ಸರ್ವ್ ಬಾವಾರ್ಥ್ಯಾಂಕ್ ಅಮಿ ಉಲೊ ದಿತಾಂವ್ ಅನಿ ಹ್ಯಾ ಚಾರಿತ್ರಿಕ್ ಘಡಿತಾಂತ್ ವಾಂಟೆಲಿ ಜಾವ್ನ್ ಅತ್ಮಿಕ್ ಫಾಯ್ದೊ ಜೊಡುಂಕ್ ವಿನಂತಿ ಕರ್ತಾಂವ್ ಮ್ಹಣ್ ಪತ್ರಾಪರ್ಗಟ್ಣೆಂತ್ ಕಳಯ್ಲಾಂ.
ಮಾನೆಸ್ತ್ ನೈಜಿಲ್ ಫೆರ್ನಾಂಡಿಸ್ (ATC Publishers) ಹಾಂಚಾ ಮುಕೆಲ್ಪಣಾರ್, ಬಾ| ಫಾವುಸ್ತಿನ್ ಎಲ್. ಲೋಬೊ (ನಿರ್ದೇಶಕ್ – ಕರ್ನಾಟಕ ಪ್ರಾಂತೀಯ್ ಗೊವ್ಳಿಕ್ ಕೇಂದ್ರ್) ಹಾಂಚಾ ಮಾರ್ಗದರ್ಶನಾಖಾಲ್ ಕೊಂಕ್ಣಿ ಬೆಬಲ್ ಮ್ಯಾರಥಾನ್ ಕಮಿಟಿ ವಾವ್ರ್ ಕರ್ನ್ ಆಸಾ. ಕಮಿಟಿಚೆ ಹೆರ್ ಸಾಂದೆ ಹ್ಯೆ ಪರಿಂ ಅಸಾತ್ – ಶ್ರೀಮಾನ್ ಸಿಲ್ವಿಯನ್ ನೊರೊನ್ಹಾ (ಅಧ್ಯಕ್ಷ್ FKCA), ಬಾ| ಜೋರ್ಜ್ ವಿನ್ಸೆಂಟ್ ಲೋಬೋ (ಕಾರ್ಯದರ್ಶಿ – ಲಾ. ಕ್ರಿ. ಸ. ಪ್ರಾಂತೀಯ್ ಆಯೋಗ್) ಶ್ರೀಮತಿ ನೋರಾ ಮಿನೇಜಸ್, ಶ್ರೀಮತಿ ಸಿಂತಿಯಾ ಲೋಬೊ, ಶ್ರೀಮತಿ ಐಡಾ ಸಿಕ್ವೇರಾ, ಶ್ರೀಮತಿ ಲವೀನಾ ಫೆರ್ನಾಂಡಿಸ್, ಶ್ರೀಮಾನ್ ಗೊಡ್ವಿನ್ ಕಾಸ್ತೆಲಿನೊ ಆನಿ ಶ್ರೀಮಾನ್ ಪೀಟರ್ ಡಿಸೋಜ.
