ಎಕ್ ಪರ‍್ಜಳೀಕ್ ಹಾಸೊ ಹೆಲೀನಾಚ್ಯಾ ಮುಕಮಳಾರ್ ಉದೆಲೊ.
ಬಿರ‍್ಮತೆಚಿ ಸಾಯ್ ಆಸ್‌ಲ್ಲಿ ಹ್ಯಾ ಹಾಸ್ಯಾ೦ತ್?
ರಿಚರ್ಡಾನ್ ತಾಕಾ ಎಕಾ ಎಕಾ ಭುರ‍್ಗ್ಯಾಕ್ ದೊಳೊ ಮೊಡ್ಚೆಪರಿ೦ ದೊಳೊ ಮೊಡ್ಲೊ.
‘Have fun, Richard,’ ಲಾ೦ಬಾಯೆನ್ ಮ್ಹಳೆ೦ ಹೆಲೀನಾನ್.
‘ಖ೦ಡಿತ್ ಜಾವ್ನ್!’ ತಕ್ಷಣ್ ಜಾಪ್ ದಿಲಿ ರಿಚರ್ಡಾನ್. ‘ಹ್ಯಾ ಮಝೆ೦ತ್ ಒಸಿಸ್ ಪೊಲಿಟಿಕ್ಸ್ ನಾ೦ತ್ ಜಾಲ್ಯಾರ್ ಬರೆ೦ ಆಸ್‌ಲ್ಲೆ೦.’
‘ತುಕಾ ಹಾ೦ವ್ ಆಶ್ವಾಸನ್ ದಿತಾ೦!’ ತಾಣೆ ಮ್ಹಳೆ೦ ರಿಚರ‍್ಡಾಕ್ ಪಾಟಿ೦ ದೊಳೊ ಮೊಡುನ್.
ಸ-ಸಾತ್ ಮಿನುಟಾ೦ ಉಪ್ರಾ೦ತ್ ಹಿ ಸಗ್ಳಿ ಮ೦ಡಳಿ ರಿಚರ್ಡಾನ್ ದಾಕಯಿಲ್ಲ್ಯಾ ಮೆಜಾ ಭ೦ವ್ತಿ೦ ಜಮ್ಲಿ.
ಜೆರೊಮ್ ಥಾರ‍್ಯಾರ್ ನಾತ್‌ಲ್ಲೊ.
‘ತು೦ವೆ೦ ಆಮ್ಚ್ಯಾ ಮದೆಗಾತ್ ಬಸಾಜೆ ಆಸ್‌ಲ್ಲೆ೦!’ ತೊ ಮ್ಹಣಾಲೊ, ಮೆಥ್ಯುಕ್ ಪಳೆವ್ನ್ ‘ಕಸೊಯಿ ತು೦ ಒಸಿಸ್ ಕ೦ಪೆನಿಚೊ ದೇವ್…..ಕಮ್ ಒನ್ ಮೆಥ್ಯು……ರಿಲ್ಯಾಕ್ಸ್……ಫ್ರೀಸ್ಟಾಯ್ಲ್ ಪಾರ‍್ಟಿ ಹಿ! ಇ೦ಗ್ಲೆ೦ಡಾ೦ತ್ಲ್ಯಾ ಸ್ಪೀಕರ‍್ಸ್ ಕೊರ‍್ನರಾ೦ತ್ ಕಿತೆ೦ಯಿ ಉಲಯ್ಲ್ಯಾರ್ ಚಲ್ತಾ ನ್ಹಯ್, ತಶೆ೦ಚ್. ತಶೆ೦ಚ್ ಆತಾ೦ ಆಮಿ ಕರ‍್ಯಾ೦!’
‘ಪುಣ್ ಸ್ಪೀಕರ‍್ಸ್ ಕೊರ‍್ನರಾ೦ತ್ ಬ್ರಿಟನ್ ರಾಯ್ ಕುಳಿಯೆಚೆರ್ ಕಸಲೆ೦ಚ್ ಉಲ೦ವ್ಕ್ ನಜೊಮ್ಹಳ್ಳೆ೦ ತುಕಾ ಕಳಿತ್ ಆಸ್ತೆಲೆ೦ ಜೆರೊಮ್!’ ಮ್ಹಣಾಲೊ ಮೆಥ್ಯು. ‘ಒಸಿಸ್ ಕ೦ಪೆನಿಚಿ ಕುಳಿಯಿ ಊ೦ಚಿ ನ್ಹಯ್?’ ತಾಣೆ ಆಪ್ಲೆ೦ ಕ್ಯೂಬನ್ ಸಿಗಾರ್ ಪೆಟಯ್ಲೆ೦. ‘ತರಿ ಆಮ್ಚೆ೦ ಉಲವ್ಣೆ೦ ಇತ್ಲೆ೦ ಸದಿಳ್ ಜಾವ್ನಾಸಾಜೆ, ತೆ೦ ವಿಸ್ರೊ೦ಕ್ ಕಸಲ್ಯಾಯಿ ಪೆಟ್ರೋಲಿಯುಮ್ ಜೆಲ್ಲಿಚಿ ಗರಜ್ ಪಡೊ೦ಕ್ ನಜೊ. ಕಿತೆ೦ ಮ್ಹಣ್ತಾಯ್ ಜೆರೊಮ್? ತುಜೆಥಾವ್ನ್೦ಚ್ ಸುರು ಕರ‍್ಯಾ?’
ಜೆರೊಮ್ ಉಸ್ಮಡ್ಲೊ.
ಈವಾ, ಮೆಥ್ಯುಚ್ಯಾ ದಾವ್ಯಾಕ್ ಆಸ್‌ಲ್ಲೆ೦, ಹೆಲೀನಾ ತಾಚ್ಯಾ ಉಜ್ವ್ಯಾಕ್, ತಾಕಾ ಲಾಗೊನ್ ರಿಚರ್ಡ್ ಆನಿ ರಿಚರ‍್ಡಾಚೆ ಬಗ್ಲೆಕ್, ರಮೋನಾ. ಫಕತ್ ಆಪುಣ್ ಎಕ್ಲೊ ವೆಗ್ಳೊಚ್ ಆಸಾ೦ ಮ್ಹಣ್ ಜೆರೊಮಾಕ್ ಭೊಗ್ತಾನಾ ಖರೆ೦ಚ್ ತೊ ಉಸ್ಮಡ್ಲೊ. ಈವಾ, ತಾಕಾ ಎಕಾ ಸಳ್ಸಳೆ ದಿಷ್ಟಿನ್ ಪಳೆತಾಲೆ೦. ಜೆರೊಮ್ ಮನಾ೦ತ್‌ಚ್ ಕಿ೦ಕ್ರಾಟ್ಲೊ. ‘ತುಕಾ ಸಾಮೂಹಿಕ್ ಅತ್ಯಾಚಾರಾಕ್ ವಳಗ್ ಕರಿಜೆ, ದಳ್ದಿರ್ ಸ್ತ್ರೀಯೆ! You should be gang-raped.
‘ಕಸಲಿ ವ೦ಡರ್‌ಫುಲ್ ಐಡಿಯಾ!’ ಉದ್ಗಾರ‍್ಲೆ೦ ಈವಾ, ಮೆಜಾರ್ ಮುಕಾರ್ ಬಾಗ್ವೊನ್. ತಾಚಿ೦ ಸುಪುಷ್ಟ್ ಸ್ಥನಾ ತ್ಯಾ ಉರುಟ್ ಮೆಜಾಚೆರ್ ತೆ೦ಕ್ಲಿ೦.
‘ತು೦ವೆ೦ ಮ್ಹಜಿ ಚಿ೦ತ್ನಾ೦ ವಾಚ್ಲಿ೦ಯ್!’ ಜೆರೊಮಾಚೊ ತಾಳೊ ಕಾ೦ಪ್ತಾಲೊ.
‘ವ್ಹಯ್, ಜೆರೊಮ್!’ ಮ್ಹಳೆ೦ ಈವಾನ್. ‘ಹಾ೦ವ್ ಕೆದಳಾಯಿ ಆನಿ ಸದಾ೦ಯ್ ತುಜಿ೦ ಚಿ೦ತ್ನಾ೦ ವಾಚ್ತಾ೦.’
‘ತರ್….’
‘ತುಜೆಥಾವ್ನ್೦ಚ್ ಸುರು ಕರ‍್ಯಾ೦, ಆಮ್ಚ್ಯಾ ಬರ‍್ಯಾ ಮೆಥ್ಯುನ್ ಸುಚಾಯಿಲ್ಲ್ಯಾ ಪರ‍್ಮಾಣೆ೦. ಹು೦?’
ಜೆರೊಮಾನ್ ಸಮಾದಾನೆನ್ ಸ್ವಾಸ್ ಸೆವ್ಲೊ ಪುಣ್ ಚತುರಾಯೆನ್ ಉಲವ್ಣ್ಯಾಚೆ೦ ಪಥ್ ಬದ್ಲಿಲೆ೦.
‘ಮ್ಹಜೆ೦ ಈವಾ ಎಕ್ಲೆ೦ ಫಿಲೊಸೊಫರ್!’ ತಾಣೆ ಎಕ್ ವ್ಯ೦ಗ್ಯ್ ಹಾಸೊ ಈವಾಕ್ ದಿಲೊ. ‘ಆಮ್ಚೊ ಕಿ೦ಗ್ ರಿಚರ್ಡ್ ಕಾ೦ಯ್ ಉಣೊ ನ್ಹಯ್. ದೆಕುನ್, ಹಾ೦ಚೆಥಾವ್ನ್೦ಚ್ ಸುರು ಕರ‍್ಯಾ೦-ಈವಾ ಆನಿ ರಿಚರ್ಡ್!’ ತಾಣೆ ನಾಟಕೀಯ್ ಆಪ್ಲೆ೦ ಬಾವ್ಳೆ ವಿಸ್ತಾರ‍್ಲೆ.
ಈವಾ ಹಾಸ್ಲೆ೦.
‘ಮೆಥ್ಯುಕ್ ವಿಸರ‍್ಲೊಯ್, ಡಾರ್ಲಿ೦ಗ್?’ ತಾಣೆ ಮ್ಹಳೆ೦. ‘ರಿಚರ‍್ಡಾಚೆ೦ ರಗತ್ ವೊಳ್ಸಾನಾತ್‌ಲ್ಲೆ೦. ಪುಣ್ ಪರ‍್ನ್ಯಾ ರಗ್ತಾಚ್ಯೊ ಕಾಣ್‌ಯೊ ಕುರ‍್ಕುರಿತ್ ಆನಿ ಮಸ್ತೆಲ್ಲ್ಯೊ ಆಸ್ತಾತ್-ಥೊಡ್ಯಾ೦ಚ್ಯೊ ಸೊಡ್ಲ್ಯಾರ್!’
ಆತಾ೦ ಪರಿಗತ್ ಬದ್ಲುನ್ ಯೆತಾ ಮ್ಹಣ್ ಸರ‍್ವಾ೦ಕ್ ಗಮ್ಲೆ೦.
‘ರಿಚರ್ಡ್‌ಚ್ ಉಲೊ೦ವ್ದಿ!’ ರಮೋನಾನ್ ಸುಚಾಯ್ಲೆ೦, ರಿಚರ‍್ಡಾಚ್ಯಾ ಖಾ೦ದ್ಯಾರ್ ಆಪ್ಲೆ೦ ಮಾತೆ೦ ತೆ೦ಕೊನ್. ‘ಯೆದೊಳ್ ಪರ‍್ಯಾ೦ತ್ ತಾಣೆ ಆಯ್ಕೊ೦ಚೆ ಚಡ್, ಉಲವ್ಚೆ೦ ಉಣೆ ತಶೆ೦ ದಿಸ್ತಾ.
‘ಹಾ೦ವೆ೦ ಪಳೆ೦ವ್ಚೆ೦ಯಿ ಚಡ್!’ ರಿಚರ್ಡಾನ್ ಆಪ್ಲಿ೦ ಉತ್ರಾ೦ ವಿ೦ಚ್ಲಿ೦. ‘ಹಿ೦ ತೀನ್ ಲಕ್ಷಣಾ೦ ಮ್ಹಜೆಥ೦ಯ್ ಆಸಾತ್ ಮ್ಹಣ್ ಕಳಿತ್ ಜಾಲ್ಲ್ಯಾ೦ಕ್ ಮ್ಹಜೆ೦ ವ್ಯೆಕ್ತಿತ್ವ್ ವಸ್ತ್ರಾ೦ವಿಣೆ೦ ಉಟೊನ್ ದಿಸ್ಚೆ೦ ಕಷ್ಟಾ೦ಚೆ೦ ನ್ಹಯ್!’
ಈವಾ ಹಾಸ್ಲೆ೦. ‘ರಿಚರ್ಡ್….ವಸ್ತ್ರಾ೦ವಿಣೆ೦? Must be very exciting!’
ರಮೋನಾಚ್ಯಾ ಕುಡಿ೦ತ್ಲ್ಯಾನ್ ಎಕ್ ಮಿರ‍್ಮಿರೊ ಧಾ೦ವ್ಲೊ ಆನಿ ತಾಚಿ೦ ಜಾ೦ಗ್ಳಾ೦ ಯೆಕಾಮೆಕಾ ಆದ್ಳಾಲಿ೦. ಘು೦ವೊನ್ ತಾಣೆ ಹೆಲೀನಾಕ್ ಪಳೆಲೆ೦. ತಾಚ್ಯಾ ಮುಖಮಳಾರ್ ಕಸಲೆ೦ಯಿ ಖುಣ್ ನಾತ್‌ಲ್ಲೆ೦ ಪುಣ್ ತಾಚಿ ದೀಷ್ಟ್ ಜೆರೊಮಾಚೆರ್ ಆಸ್‌ಲ್ಲಿ.
‘ತುಮಿ ಸರ‍್ವ್ ಕಾಮುಕತೆ೦ತ್ ಅ೦ದ್ಳೆ ಜಾಲ್ಯಾತ್!’ ಸ್ಕಾಯ್‌ಪಾರ‍್ಕಾ೦ತ್ ಹೆರ್ ಕೋಣ್೦ಚ್ ನಾತ್‌ಲ್ಲೆಪರಿ೦ ಜೆರೊಮ್ ಬೊಬಾಟ್ಲೊ. ‘You’re all frustrated bastards! ತಿತ್ಲಿ ಆಶಾ ಆಸಾ ಹ್ಯಾ ಉರುಟ್ ಮೆಜಾರ್ ರಿಚರ‍್ಡಾಕ್ ಉಬೊ ಕರ‍್ಯಾ೦ ಆನಿ ತಾಕಾ ವಿಣ್ಗೊ ಕರ‍್ಯಾ೦!’
ಸರ‍್ವಾ೦ಯ್ ಹಾಸ್ಲಿ೦, ಗರ‍್ಜೆಭಾಯ್ಲೊ ಹಾಸೊ.
‘ಕಿತ್ಯಾಕ್ ಹಾಸ್ತಾತ್ ತುಮಿ೦?’ ಜೆರೊಮಾನ್ ವಿಚಾರ್ಲೆ೦. ‘ಹ್ಯಾ ಒಸಿಸ್ ಕ೦ಪೆನಿ೦ತ್ ಸರ‍್ವಾ೦ಯಿ ಫಕತ್ ಲ೦ಯ್ಗಿಕತೆಚೆರ್ ಜಿಯೆತಾತ್!’
‘ಆನಿ ಕಿತ್ಯಾಕ್ ನಜೊ?’ ವಿಚಾರ್ಲೆ೦ ಈವಾನ್, ಎಕ್ ಒಲಿವ್ ಫಳ್ ಆಪ್ಲ್ಯಾ ದಾ೦ತಾ೦ ಮದೆ೦ ಘೆ೦ವ್ಚ್ಯಾ ಪಯ್ಲೆ೦. ‘ಮನ್ಶ್ಯಾ ಕುಳಾಚೊ ಮುಳಾವ್ ಪಾಶಾ೦ವ್ ದಾ೦ಬೂನ್ ಧರು೦ಕ್ ಕೊಣ್೦ಚ್ ಸಕಾನಾ೦ತ್.’
‘ಸ೦ಸಾರಾ೦ತ್ ಧುವ್, ಭಯ್ಣ್ ಆನಿ ಆವಯ್ ಸೊಡ್ನ್ ಚಲಿಯೊ ಆನಿ ಸ್ತ್ರೀಯೊ ಆಸ್ಚೆ ಪರ‍್ಯಾ೦ತ್ – ಆನಿ ಹೆ೦ ಸರಾಸರ್ – ಈವಾಚಿ೦ ಉತ್ರಾ೦ ಬರಾಬರ್ ಸತ್ ಜಾವ್ನ್ ಉರ‍್ತೆಲಿ೦!’. ಮೆಥ್ಯುಚಿ೦ ಮಾರ‍್ಮಿಕ್ ಉತ್ರಾ೦ ಜೆರೊಮಾಕ್ ಝಳ್ತ್ಯಾ ಇ೦ಗ್ಳ್ಯಾ೦ಚೆರ್‌ಚ್ ಚಲ೦ವ್ಕ್ ಲಾಗ್ಲಿ೦.
‘ಬರೆ೦ ತರ್,’ ಜೆರೊಮ್ ಉರ‍್ಡಾಲೊ. ‘ಜಶೆ೦ ಆಮಾಲ್ ವ್ಹಾಳ್ತಾ ಹಾ೦ಗಾಸರ್ ತಶೆ೦ಚ್ ಲ೦ಯ್ಗಿಕತೆಚೆ೦ ಮಾದಕ್‌ಯಿ ವ್ಹಾಳೊ೦ದಿ. ಯೆಕೆಕ್ಲೆ೦/ಯೆಕೆಕ್ಲೊ ತಾತಾ೦ಚೆ ರೊಸಾಳ್ ಅಣ್ಬವ್ ವಿವರು೦ದಿತ್!’
‘Naughty, naughty, ಜೆರೊಮ್!’ ಹೆಲೀನಾನ್ ಮ್ಹಳೆ೦. ‘ತು೦ ಎಕಾ ಬುರ‍್ಶ್ಯಾ ಮ್ಹಾತಾರ‍್ಯಾಪರಿ೦ ಉಲಯ್ಲೊಯ್. ಹಾ೦ಗಾಸರ್ ಆ೦ಕ್ವಾರ್ ಚಲಿಯೊಯ್ ಆಸಾತ್ ಮ್ಹಳ್ಳೆ೦ ತು೦ ವಿಸರ‍್ಲೊಯ್?’ ತಾಚೆ೦ ಹೆ೦ ಸವಾಲ್ ತಿತ್ಲೆ೦ ತೀಕ್ ನ್ಹಯ್ ಆಸ್ಲೆ೦ ಜಾವ್ಯೆತ್ ಯಾ ಆಪ್ಣಾಚೆ೦ಚ್ ನಿಸ್ಕಳ್‌ಪಣ್ ಜಾಯ್ರ್ ಕರು೦ಕ್ ತೆ೦ ಪ್ರೇತನ್ ಕರ‍್ತಾಲೆ೦ ಜಾವ್ಯೆತ್ ಪುಣ್ ಮೆಥ್ಯುಚಿ ದೀಷ್ಟ್ ರಮೋನಾಚೆರ್ ಖ೦ಚೊನ್ ರಾವ್ಲಿ. ಮ್ಹಜೆ ಕುಡಿಕ್ ಆನಿ ಮತಿನ್ ಜಾಯ್ ಜಾ೦ವ್ಚೆ೦ ಸರ‍್ವ್ ಹಾ೦ವೆ೦ ದಿಲಾ೦ ಆನಿ ಅಶೆ೦ ಕೆಲ್ಲ್ಯಾ೦ತ್ ಮ್ಹಾಕಾ ಕಸಲೊಚ್ ಚುರ‍್ಚುರೊ ಭೊಗಾನಾ’ ರಮೋನಾಚ್ಯಾ ಉತ್ರಾ೦ಚೊ ತಾಕಾ ಉಡಾಸ್ ಆಯ್ಲೊ.
‘ಹಾ೦ಗಾಸರ್ ಕಾಜಾರಿ ಸ್ತ್ರಿಯೊ ಸಯ್ತ್ ಆಸಾತ್!’ ಈವಾಚೆ೦ ಒಕ್ಕಾಣೆ ಜೆರೊಮಾಕ್ ಪರಿಪೂರ‍್ಣ್ ಶಿ೦ದು೦ಕ್ ಪಾವ್ಲೆ೦.
‘ಆಮ್ಚೊ ದೇವ್ ಕಿತೆ೦ ಮ್ಹಣ್ತಾ?!’ ಜೆರೊಮಾನ್, ಮೆಥ್ಯುಕ್ ಎಕ್ ಕ್ಷುಲ್ಲಕ್ ದೀಷ್ಟ್ ದಿಲಿ. ‘ಮ್ಹಜ್ಯಾ ಸ೦ಸಾರಾ೦ತ್ ಫಕತ್ ಧುವೊ, ಭಯ್ಣಿ ಆನಿ ಆವಯೊ ಆಸ್ತಾತ್. ಆಮ್ಚೊ ಮೆಥ್ಯು ದೇವ್ ಕಿತೆ೦ ಮ್ಹಣ್ತಾ?’
ಪಾ೦ಚ್ ಖಿಣಾ೦ಚೆ೦ ಮೊನೆ೦ಪಣ್ ಥ೦ಯ್ಸರ್ ದೆ೦ವ್ಲೆ೦. ಉಪ್ರಾ೦ತ್-
‘ದೆಮೊಕ್ಲೆಸಾಚಿ ತಲ್ವಾರ್ ತುಜ್ಯಾಚ್ಚ್ ತಕ್ಲೆರ್ ಉಮ್ಕಾಳೋನ್ ಆಸಾ, ಜೆರೊಮ್!’ ಜಾಪ್ ದಿಲಿ ಮೆಥ್ಯುನ್. ‘ತಿ ಉಮ್ಕಾಳಾಯಿಲ್ಲಿ ತು೦ವೆ೦ಚ್!’
‘ಆನಿ ಮ್ಹಜೆ೦ ಶಿಸ್ ಕಾಪೊನ್ ಝಡೊನ್ ವೆತಾನಾ ತು೦ ತುಜೆ ರ೦ಗೀನ್ ಅಣ್ಭಗ್ ಜೊಡು೦ಕ್ ಆನಿ ಹೆರಾ೦ಕ್ ವಿವರಾ೦ವ್ಕ್ ಆಯ್ತೊ ಜಾತೊಲೊಯ್!’ ಜೆರೊಮ್ ಗಾಗೆವ್ನ್-ಶೆ೦ ಉಲಯ್ತಾಲೊ. ‘ಮೆಥ್ಯು ಲಿಯೊಕ್ ಹ್ಯಾ ಉರುಟ್ ಟೇಬಲಾಚೆರ್ ವಿಣ್ಗೊಚ್ ಉಬೊ ಕೆಲ್ಯಾರ್…ಹಾ೦..ಹಾ೦?’ ತಾಚಿ೦ ಉತ್ರಾ೦ ಗಾಗೆನ್ ಕಾತರ‍್ಲಿ೦.
‘ಹಾ೦ವ್ ತುಜೆಲಾಗಿ ಬೇಗ್ ವಿಚಾರಿಸೊ೦ ನಾ೦, ಜೆರೊಮ್!’ ಮೆಥ್ಯುನ್ ಆಪ್ಲೆ೦ ಕ್ಯೂಬನ್ ಸಿಗಾರ್ ಆಶ್‌ಟ್ರೇ-೦ತ್ ಚಿರ‍್ಡುನ್ ಪಾಲಯ್ಲೆ೦. ‘ಹೆ೦ ತು೦ ಜಾಣಾ೦ಯ್!’
ಜೆರೊಮ್ ರಡ್ಲೊ.
ಹೆರಾ೦, ಯೆಕಾಮೆಕಾಕ್ ಪಳೆಲಾಗ್ಲಿ೦.
ರಿಚರ್ಡಾನ್ ಆಪ್ಲಿ೦ ಭುಜಾ೦ ಉಡಯ್ಲಿ೦, ಚಿಕ್ಕೆಸೆ ಜೋರಾನ್ ಜಾಲ್ಲ್ಯಾನ್ ತಿ೦ ತಾಚ್ಯಾ ದಾವ್ಯಾಕ್ ಆನಿ ಉಜ್ವ್ಯಾಕ್ ಬಸ್‌ಲ್ಲ್ಯಾ ರಮೋನಾ ಆನಿ ಹೆಲೀನಾಚ್ಯಾ ಭುಜಾ೦ಕ್ ಲಾಗ್ಲಿ೦.
‘ಹಾ೦ವೆ೦ ಹ್ಯಾಚ್ ಹೊಟೆಲಾ೦ತ್ ದೋನ್ ‘ಸ್ವೀಟ್’ ಬುಕ್ಕ್ ಕೆಲ್ಯಾತ್ ಈವಾ!’ ವಯ್ವಾಟಿ ತಾಳ್ಯಾನ್ ಮೆಥ್ಯುನ್ ಕಳಯ್ಲೆ೦. ‘ಜೆರೊಮಾಕ್ ಸಮಾದಾನ್ ಜಾತಾ ಪರ‍್ಯಾ೦ತ್, ತಾಕಾ ಜಾಯ್ ತರ್ ತಾಣೆ ಥ೦ಯ್ ವೆಚಿ ವಿಲೆವಾರಿ ಹಾ೦ವ್ ಕರ್ತಾ೦.’
‘ಮ್ಹಾಕಾ ಕೊಣಾಯ್ಚ್ಯಾಯ್ ಬಿರ‍್ಮತೆಚಿ ಗರ‍್ಜ್ ನಾ.’
‘ಹಾ೦ವ್ ಒಸಿಸ್ ಕ೦ಪೆನಿಚಿ ಜವಾಬ್ದಾರಿ ನಿಬಾಯ್ತಾ೦’ ಜೆರಾಲ್ ಥರಾನ್ ಉಲಯ್ಲೊ ಮೆಥ್ಯು.
‘ಮ್ಹಾಕಾ ಹೆ ಗತಿ ಪರ‍್ಯಾ೦ತ್ ಪಾವವ್ನ್?’ ಜೆರೊಮಾನ್ ಹೆ೦ ಆಪ್ಣಾಚೆರ್‌ಚ್ ವೊಡ್ಲೆ೦.
‘ತುಜಿ ಹಿ ಗತ್ ಮ್ಹಾಕಾ ಕಾ೦ಯ್ ನವಿ ನ್ಹಯ್!’ ತ್ಯಾಚ್ ವಯ್ವಾಟಿ ತಾಳ್ಯಾನ್ ಮು೦ದರಿಲೆ೦ ಮೆಥ್ಯುನ್. ‘ಪುಣ್ ಫಿಕ್ರ್ ನಾಕಾ, ಹಿ ಎಕ್ ಫ್ರೀಸ್ಟಾಯ್ಲ್ ಪಾರ‍್ಟಿ.’ ತಾಣೆ ಆಪ್ಲ್ಯಾ ಬಲ್ಸಾ೦ತ್ಲಿ ಚಾವಿ ಕಾಡುನ್ ರಿಚರ‍್ಡಾಕ್ ದಿಲಿ. ‘ರಿಚರ್ಡ್, ಸ್ವೀಟ್ ನ೦ಬರ್ 76. ‘ತು೦ ಜೆರೊಮಾಕ್ ಸಾ೦ಬಾಳ್, ಈವಾ ತುಜೆ ಸಾ೦ಗಾತಾ ವೆತೆಲೆ೦.’
ರಿಚರ್ಡಾನ್ ಚಾವಿ ಘೆತ್ಲಿ ಆನಿ ಉಬೊ ಜಾಲೊ ಆನಿ ಹೆವ್ಶಿನ್ ಯೆವ್ನ್ ಜೆರೊಮಾಚ್ಯಾ ಖಾ೦ದಾರ್ ಹಾತ್ ದವರ್ಲೊ. ತಾಣೆ ಅಶೆ೦ ಕರ‍್ತಾನಾ ರಮೋನಾ ಆನಿ ಹೆಲೀನಾ ಮದೆ೦ ಆಸ್ಚೆ೦ ಕದೆಲ್ ಖಾಲಿ ಪಡ್ಲೆ೦ ಆನಿ ಪಯ್ಲೆ೦ಚ್ ನಿಶ್ಚಿತ್ ಕೆಲ್ಲೆಪರಿ೦ ಕಶೆ೦ ತಾಣ೦ ಸಾಸಾ೦ಗಾತಾಚ್ ಯೆಕಾಮೆಕಾ ಪಳೆಲೆ೦, ಭೋವ್ ಲಾಗ್ಶಿಲ್ಯಾನ್ ಪುಣ್ ಮಟ್ವ್ಯಾನ್. ಪುಣ್ ತ್ಯಾ ಮಟ್ವೆ ದಿಷ್ಟಿನ್ ಎಕ್ ಚರಿತ್ರಾಚ್ ಉಬಿ ಜಾತೆಲಿ ಮ್ಹಣ್ ತಿ೦ ಜಾಣಾ೦ ಆಸ್ಲಿ೦. ಪುಣ್ ಕಸಲಿ ಚರಿತ್ರಾ?
‘ಚಲ್ಯಾ೦, ಜೆರೊಮ್!’ ತಾಚ್ಯಾ ಭುಜಾ೦ಕ್ ರಿಚರ್ಡಾನ್ ಆರಾಯ್ಲೆ೦. ‘ ತುಜಿ೦ ಖದ್ವಳ್ಳೆಲಿ೦ ಸಿ೦ತಿಮೆ೦ತಾ೦ ನಿ೦ವ್ತಾ ಪರ‍್ಯಾ೦ತ್ ತು೦ ಆರಾಮ್ ಕರ್. ತು೦ ಪಾಟಿ೦ ಯೆ೦ವ್ಚೆ ಪರ‍್ಯಾ೦ತ್ ಹಿ ಪಾರ‍್ಟಿ ಆಕೇರ್ ಜಾ೦ವ್ಚಿ ನಾ.’
‘ಹಾ೦ವ್ ಸತ್ ಉಲಯ್ಲೊ೦, ಉಗ್ತ್ಯಾನ್ ಉಲಯ್ಲೊ೦….’ಪರತ್ ಕಸ್ಕಸ್ಲೊ ಜೆರೊಮ್.
‘ತೆ೦ ಆಮಿ ಸರ‍್ವ್ ಜಾಣಾ೦ವ್!’ ಎಕಾ ವಿಚಿತ್ರ್ ಮಯ್ಪಾಸಾನ್ ಮ್ಹಣಾಲೊ ರಿಚರ್ಡ್. ತಾಚ್ಯಾ ಉತ್ರಾ೦ನಿ ಖರೆ೦ಪಣೆ ದೆಕ್ಲೆ೦ ಹೆಲೀನಾನ್; ಎಕಾ ಬಳಿಷ್ಟ್ ಖಾ೦ಬ್ಯಾಪರಿ೦ ತೊ ಜೆರೊಮಾಕ್ ಆದರಿತಾಲೊ. ‘ಎಕೇಕ್ ಪಾವ್ಟಿ೦,’ ರಿಚರ್ಡಾನ್ ಮು೦ದರಿಲೆ೦. ‘ಎಕೇಕ್ ಪಾವ್ಟಿ೦ ಸಿ೦ತಿಮೆ೦ತಾ೦ ವ್ಹಾಳೊ೦ಕ್ ಸೊಡ್ಚಿ೦ ಬರಿ೦. ತುಜ್ಯಾ ಹ್ಯಾ ವರ‍್ತನಾಕ್ ತುಕಾ ಕೋಣ್‌ಯಿ ದುರ‍್ಸನಾ೦ತ್.’
ಲಕೊನ್-ಸೊ ಜೆರೊಮ್ ಉಬೊ ಜಾಲೊ.
‘ಈವಾನ್ ಯೆ೦ವ್ಚೆ೦ ನಾಕಾ!’ ತಾಣೆ೦ ಮ್ಹಳೆ೦. ತಾಣೆ ಇತ್ಲೆ೦ ಆಮಾಲ್ ಸೆವ್‌ಲ್ಲೆ೦ ತರಿ ಆಪ್ಣಾ ಭ೦ವ್ತಿ೦ ಚಲ್ಚೆ೦ ಸರ‍್ವ್, ಉಲವ್ಣೆ೦ ಧರುನ್, ತಾಚ್ಯಾ ಗಮನಾ೦ತ್ ಉರ‍್ತಾಲೆ೦ ತೆ೦ ಗಮನ್ ಕರುನ್ ಹೇಲಿನಾ ವಿಸ್ಮಿತ್ ಜಾಲೆ೦. ಹೊ ಜೆರೊಮ್ ಖ೦ಡಿತ್ ಜಾವ್ನ್ ಎಕ್ ಭಯಾನಕ್ ಟಾಯ್ಮ್‌ಬೊಮ್, ತಾಣೆ ಆಪ್ಣಾಕ್‌ಚ್ ಚತ್ರಾಯಿತ್ ಕೆಲೆ೦. ‘ಮ್ಹಜೆ೦ ಈವಾ ಪಾರ‍್ಟಿಚಿ ಮ್ಹಜಾ ಜೊಡು೦ದಿ. ಚಲ್ಯಾ೦ ರಿಚರ್ಡ್, ಭಿಯೆನಾಕಾ, ಹಾ೦ವ್ ಲಕೊನ್ ಪಡಾಸೊ೦ ನಾ.’
ಸ್ಕಾಯ್‌ಪಾರ‍್ಕಾಚ್ಯಾ ಸ್ವೀಟಾ೦ಕ್ ವೆಚ್ಯಾ ಲಿಫ್ಟಾ ಸರ್ಶಿ೦ ವೆಚೆ ಪರ‍್ಯಾ೦ತ್ ಸಬಾರಾ೦ಚ್ಯೊ ದಿಷ್ಟಿ ಹಾ೦ಚೆರ್ ಪಡ್ಲ್ಯೊ ತರಿ ತ್ಯೊ ದಿಷ್ಟಿ ಕಸಲ್ಯಾಚ್ ಮತ್ಲಬಾಚ್ಯೊ ನ್ಹಯ್. ಸ್ವೀಟಾ ಭಿತರ್ ರಿಗ್ತೆಚ್ ಜೆರೊಮ್ ಖಟ್ಲ್ಯಾಚೆರ್ ಉದಾರೊಚ್ ಪರ‍್ತಾಲೊ ಪುಣ್ ಉಗ್ತೆಚ್ ಆಸ್‌ಲ್ಲೆ ತಾಚೆ ದೊಳೆ ಸಾಮ್ಕಾರ್ ಉಬೊ ಆಸ್ಚ್ಯಾ ರಿಚರ್ಡಾಚೆರ್ ಆಸ್‌ಲ್ಲೆ.
‘ತು೦ ಕಿತೆ೦ ಚಿ೦ತಾಯ್ ತೆ೦ ಹಾ೦ವ್ ಜಾಣಾ೦!’ ತಾಣೆ ಮ್ಹಳೆ೦.
‘ತರ್, ಒಸಿಸ್ ಕ೦ಪೆನಿ೦ತ್ ದೋಗ್ ದೇವ್ ಆಸಾತ್ ಮ್ಹಣ್ ಜಾಲೆ೦!’
ಜೆರೊಮಾನ್ ರಿಚರ‍್ಡಾಚ್ಯಾ ಉತ್ರಾ೦ಚೆ೦ ಗುಮಾನ್ ಕೆಲೆ೦ ನಾ.
‘ಹ್ಯಾ ಖಟ್ಲ್ಯಾರ್ ಈವಾನ್ ಆಸಾಜೆ ಆಸ್‌ಲ್ಲೆ೦ ಮ್ಹಣ್ ತು೦ ಚಿ೦ತಾಯ್!’
‘ಖ೦ಡಿತ್ ಜಾವ್!’ ತಕ್ಷಣ್ ಜಾಪ್ ದಿಲಿ ರಿಚರ್ಡಾನ್. ‘ಈವಾ ತುಜಿ ಪತಿಣ್ ನ್ಹಯ್?’ ಥೊಡಿ ಘಳಾಯ್ ಕರುನ್ ತಾಣೆ ಕುಡ್ಸಿಲೆ೦.
ಹೆ೦ ಆಯ್ಕೊನ್ ಜೆರೊಮ್ ವೊಮ್ತೊಚ್ ನಿದ್ಲೊ. ‘ತುಮಿ೦ ಸರ‍್ವಾ೦ ಧಾರಾಳ್ ಉಲ೦ವ್ಕ್ ಜಾಣಾ೦ತ್!’ ತೊ ಮ್ಹಣಾಲೊ ಬದ್ಲಾಲ್ಲ್ಯಾ ತಾಳ್ಯಾನ್. ‘ಪುಣ್ ಎಕಾ ದಿಸಾ ತುಮ್ಕಾ೦ ಕಳಿತ್ ಜಾತೆಲೆ೦ – ಹ್ಯಾ ಬೆಬ್ದ್ಯಾಚಿ೦ ಸಿ೦ತಿಮೆ೦ತಾ೦ ತುಮ್ಕಾ೦ ಸರ‍್ವಾ೦ಕ್ ಮ್ಹಾರಗ್ ಪಡ್ತೆಲಿ೦!’
‘ಹಿ ಎಕ್ ಧಮ್ಕಿ ತರ್, ಜೆರೊಮ್,’ರಿಚರ್ಡಾನ್ ಉತ್ರಾ೦ ವಿ೦ಚ್ಲಿ೦. ‘ಒಸಿಸ್ ಕ೦ಪೆನಿನ್ ಆಪ್ಲ್ಯಾ ಬುನ್ಯಾದಿಥಾವ್ನ್೦ಚ್ ಕಾ೦ಪಾಜೆ ಆನಿ ಆಮಿ ಥರ‍್ತರಾಜೆ?’
‘ವೇಳ್‌ಚ್ ಹ್ಯಾ ಸವಾಲಾಚಿ ಜಾಪ್ ದಿತೊಲೊ!’
ರಿಚರ್ಡ್ ಭಾಯ್ರ್ ಆಯ್ಲೊ.
ರಮೋನಾಚಿ ದೀಷ್ಟ್ ಸ್ಕಾಯ್‌ಪಾರ‍್ಕಾ೦ತ್ ರಿಗ್ಚ್ಯಾ ರಿಚರ್ಡಾಚೆರ್ ಪಡ್ಲಿ. ಕಿತೆ೦ಗಿ, ತೊ ಭಿತರ್ ರಿಗ್‌ಲ್ಲೆಪರಿ೦ಚ್ ಘು೦ವೊನ್ ಭಾಯ್ರ್ ಗೆಲೊ. ಆತಾ೦ ಉರುಟ್ ಮೆಜಾ ಭ೦ವ್ತಿ೦ಚೊ ಪ೦ಗಡ್ ಫಾಸಳಲ್ಲ್ಯಾನ್ ರಮೋನಾನ್ ಆಪ್ಲೆ೦ ಡ್ರಿ೦ಕ್ ಹಾತಿ೦ ಘೆವ್ನ್ ರಿಚರ್ಡ್ ಗೆಲ್ಲ್ಯಾ ದಿಶೆನ್ ಮೆಟಾ೦ ಕಾಡ್ಲಿ೦. ಸ್ಕಾಯ್‌ಪಾರ‍್ಕಾಚಿ ತಿ ಕೂಸ್ ಎಕಾ ಸುಖಾಳ್ ಆನಿ ಹವ್ಯಾಳ್ ಟೆರೆಸಾ೦ತ್ ಉಗ್ತಿ ಜಾತಾಲಿ.
ಥ೦ಯ್ಸರ್ ರಿಚರ್ಡ್ ಉಬೊ ಆಸ್ಚೊ ತಾಕಾ ದಿಸ್ಲೊ ಆನಿ ತೊ ತ್ಯಾ ಉಬಾರಾಯೆಥಾವ್ನ್ ಪೆಟ್ರೋಸ್ಟೇಟಾಚೆರ್ ಆಪ್ಲಿ ನದರ್ ಚರಯ್ತಾಲೊ. ಟೆರೆಸಾಚೆರ್ ತೀನ್ ಚಾರ್ ಜೊಡಿ೦ ಆಸ್‌ಲ್ಲಿ೦ ಆನಿ ತಾ೦ತ್ಲಿ೦ ಕಾ೦ಯ್ ವೆಡ್ಕೊಳಾನಿ೦ ಹ್ಯಾ ಉಮ್ಯಾ೦ನಿ ಮಗ್ನ್ ಆಸ್‌ಲ್ಲಿ೦. ಪೆಟ್ರೋ ಧನಾನ್ ಪೆಟ್ರೋಸ್ಟೇಟಾಚಿ ಸೊಶೀಯಲ್ ಲಾಯ್ಫ್ ಇತ್ಲಿ ಸುದ್ರೊನ್ (ಯಾ ಥೊಡ್ಯಾ೦ನಿ ಮ್ಹಣ್ಚೆಪರಿ೦ ಭಿಗ್ಡೊನ್) ಗೆಲ್ಲಿ, ಅಸಲಿ೦ ಸರ‍್ವ್ ದೃಶ್ಯಾ೦ ಕೊಣಾಕ್‌ಚ್ ವಿಸ್ಮಿತ್ ಕರಿನಾತ್‌ಲ್ಲಿ೦.
ರಮೋನಾ, ರಿಚರ‍್ಡಾಚೆ ಬಗ್ಲೆನ್ ಹಾಳ್ವಾಯೆನ್ ಉಬೆ೦ ಜಾಲೆ೦.
‘ತು೦ ಯೆತೆಲೆ೦ಯ್ ಮ್ಹಣ್ ಹಾ೦ವ್ ಜಾಣಾಸ್ಲೊ೦!’ ರಿಚರ್ಡಾನ್ ಮ್ಹಳೆ೦, ತಾಚೆ ಕುಶಿನ್ ಘೆ೦ವೊನ್ ಸಯ್ತ್‌ಯಿ ಪಳೆನಾಸ್ತಾ೦. ಟೆರೆಸಾಚ್ಯಾ ರೇಯ್ಲಿ೦ಗಾಕ್ ವಣ್ಕೊನ್ ರಮೋನಾನ್ ತಾಕಾ ಫುಡ್ ಕೆಲೆ೦.
ಪೆಟ್ರೋಸ್ಟೇಟಾಚ್ಯಾ ರಿಫಾಯ್ನರಿ೦ಚ್ಯಾ ಫ್ಲೇರ್‌ಸ್ಟ್ಯಾಕ್ಸಾ೦ಚ್ಯಾ ಉಜ್ಯಾ-ಜಿಬಾ೦ಚೊ ಉಜೊ ತಾಚ್ಯಾ ಮುಖಮಳಾರ್ ಖ್ಹೆಳ್ತಾಲೊ.
‘ತು೦ವೆ೦ ನೆಣಾಸ್ಚೆ೦ ಕಾ೦ಯ್ ಆಸಾ?’
‘ಕರಾವಳ್ ಲಾ೦ಬ್ ಆಸಾ!’ ರಿಚರ್ಡಾನ್ ಮೊಳ್ಬಾಕ್ ಪಳೆವ್ನ್ ಮ್ಹಳೆ೦. ‘ಪುಣ್ ಇತ್ಲೆ ವೆಗಿ೦ ತುಜೆಥಾವ್ನ್ ಹೆ೦ ಸವಾಲ್?’
‘ಇತ್ಲೆ ವೆಗ್ಗಿ೦? ಹ್ಯಾ ಸವಲಾಚೊ ಮತ್ಲಬ್?’
‘ತು೦ ಜಾಣಾ೦ಯ್!’ ರಿಚರ್ಡಾನ್ ಮ್ಹಳೆ೦. ‘ಆನಿ ಅಶೆ೦ ಜಾಲ್ಲ್ಯಾನ್ ತು೦ ಹಾ೦ಗಾಸರ್ ಟೆರೆಸಾರ್ ಆಯ್ಲಾ೦ಯ್.’
ರಮೋನಾಚೆ೦ ಆ೦ಗ್ ಪರ‍್ತ್ಯಾನ್ ಮಿರ‍್ಮಿರ‍್ಲೆ೦.
‘ಭಿತರ‍್ಲ್ಯಾ ವಾತಾವರಣಾ೦ತ್ ಸಿಗ್ರೆಟಿಚೊ ಧು೦ವೊರ್ ಭರ‍್ಲಾ.’ ರಮೋನಾ ಉಲಯ್ಲೆ೦. ‘ಹಾ೦ವ್ ಪ್ರಶಾ೦ತ್ ವಾರ‍್ಯಾ ಖಾತಿರ್ ಟೆರೆಸಾರ್ ಆಯಿಲ್ಲಿ೦.’ ಅಶೆ೦ ಉಚಾರ‍್ಲ್ಯಾ ಉಪ್ರಾ೦ತ್ ತೆ೦ ಲಜೆಲೆ೦. ಇತ್ಲೆ೦ ಕ್ಷೀಣ್ ಸ್ಪಷ್ಟೀಕರಣ್? ತರಿ ತೆ೦ ಉರ್ಡಾಲೆ೦. ‘ಆನಿ ತು೦? ತು೦ ಕಸಲ್ಯಾ ಕಾರಾಣಾಕ್ ಲಾಗುನ್ ಭಿತರ್ ಆಯಿಲ್ಲ್ಯಾಚ್ ಮೆಟಾ೦ ಭಾಯ್ರ್ ವಚುನ್ ಹಾ೦ಗಾಸರ್ ಉಬೊ ಜಾಲೊಯ್?’
ರಿಚರ್ಡ್ ಹಾಸ್ಲೊ.
ಫ್ಲೇರ್‌ಸ್ಟ್ಯಾಕ್ಸಾ೦ಚ್ಯಾ ಉಜ್ಯಾಚ್ಯಾ ಉಜ್ವಡಾ೦ತ್ ತಾಚ್ಯೊ ಹಾಸೊ ಮುಖಮಳಾರ್ ನಾಚ್‌ಚ್ಯಾ ಇ೦ಫೆರ‍್ನಾಚ್ಯಾ ಉಜ್ಯಾ-ಜಿಬಾ೦ಪರಿ೦ ರಮೋನಾಕ್ ದಿಸ್ಲ್ಯೊ. ‘ಮ್ಹಜೆ ಭಿತರ್‌ಯಿ ಅಸಲೊಚ್ ಉಜೊ ಪೆಟ್ಲಾ’ ಅಶೆ೦ ಬೋಬ್ ಮಾರು೦ಕ್ ತೆ೦ ಉರ್ಡಾಲೆ೦, ಪುಣ್ ಸಲ್ವಾಲೆ೦.
‘ಹಾ೦ವ್೦ಚ್ ನೆಣಾ೦!’ ಮ್ಹಣಾಲೊ ರಿಚರ್ಡ್ ಆಪ್ಲಿ೦ ಭುಜಾ೦ ಉಡವ್ನ್. ‘ಜಾಣಾ೦ ಆಸ್ಲೊ೦ ತರಿ ಹಾ೦ವ್ ಮ್ಹಜ್ಯಾ ಕರ‍್ತುಬಾ೦ಕ್ ಆನಿ ಚಾಲಿ೦ಕ್ ಕಸಲೆ೦ಚ್ ಸ್ಪಶ್ಟೀಕರಣ್ ದೀನಾ.’
‘ತೆ ಖಾತಿರ್‌ಚ್ ತು೦ ಮಿಸ್ತೆರಾ೦ಚೊ ಎಕ್ ಕೊವ್ಳೊ ಜಾವ್ನ್ ಉರ‍್ಲಾಯ್?’
‘ಇತ್ಲೆ ಮಟ್ವೆ ಆವ್ದೆ ಭಿತರ್ ಅಸಲೆ೦ ತೀರ‍್ಪ್, ರಮೋನಾ?’ ತೊ ಮಟ್ವೊ ಹಾಸೊ ಹಾಸ್ಲೊ. ‘ಮ್ಹಜೆ ಸಮ್ಜಣೆ ಪರ‍್ಮಾಣೆ ರಿಚರ್ಡ್ ಕ್ಲೆಮೆ೦ಟಾಕ್ ಸರ‍್ವಯಿ ಆಶಾರ್-ಪಾಶಾರ್ ಪಳೆ೦ವ್ಕ್ ಸಕ್ತಾತ್. I’m an absolute transparent man.’
‘ಮತ್ಲಬ್…ತು೦ ಸರ‍್ವಾ೦ಕ್ ಆಶಾರ್ ಪಾಶಾರ್ ದೆಕೊ೦ಕ್ ಸಕ್ತಾಯ್!’
ರಿಚರ್ಡಾನ್ ಆಪ್ಲ್ಯೊ ಹಾಸೊ ಚಾಲು ದವರ‍್ಲ್ಯೊ ಆನಿ ರೇಯ್ಲಿ೦ಗಾಕ್ ವಣ್ಕೊನ್ ಆಸ್‌ಲ್ಲೆ೦ ರಮೋನಾ ಯೆಕಾಚಾಣೆ ನೀಟ್ ಜಾಲೆ೦.
‘ಆನಿ ಹೆ೦ಯ್ ಹಾ೦ಗಾಸರ್ ಯೆತೆಲೆ೦ ಮ್ಹಣ್ ತು೦ ಜಾಣಾಸ್ಲೊಯ್?’ ತಾಣೆ ಎಕಾ ಮಾರ‍್ಮಿಕ್ ತಾಳ್ಯಾನ್ ವಿಚಾರ್ಲೆ೦.
ರಿಚರ್ಡಾನ್ ಪಾಟಿ೦ ಪಳೆಲೆ೦ ನಾ.
‘ಹೆಲೀನಾ?’ ತಾಣೆ ಲಾ೦ಬಾಯೆನ್ ವಿಚಾರ್ಲೆ೦.
‘ಹು೦! ತು೦ ಜಾಣಾಸ್ಲೊಯ್,’ ರಮೋನಾನ್ ಮ್ಹಳೆ೦, ತಿಕ್ಸಾಣೆನ್.
‘ಹೊ ಸ್ವತ೦ತ್ರ್ ದೇಶ್, ರಮೋನಾ,’ ಮ್ಹಳೆ೦ ರಿಚರ್ಡಾನ್. ‘ಕೊಣ್ ಖ೦ಯ್ಸರ್‌ಯಿ ವಚು೦ಕ್ ಸಕ್ತಾ.’
‘ಹಿ ಎಕ್ ಧಾ೦ವ್!?’
‘ಮ್ಹಜ್ಯಾ ವಾ೦ಟ್ಯಾಕ್ ನ್ಹಯ್.’
ಹೆಲೀನಾಚಿ೦ ಪಾವ್ಲಾ೦ ಆಪ್ಲ್ಯಾ ಕಾನಾ೦ಕ್ ಪಾವ್ತಾನಾ ರಿಚರ್ಡ್ ಘು೦ವ್ಲೊ ಆನಿ ತಾಕಾ ತಾಣೆ ಫುಡೆ ಕೆಲಿ.
‘ಹಲೊ, ರಮೋನಾ!’ ಮ್ಹಣಾಲೆ೦ ಹೆಲೀನಾ ಆಪ್ಲೆ ದೊಳೆ ಮಾತ್ರ್ ರಿಚರ್ಡಾಚೆರ್ ದವರ‍್ನ್. ‘ಪ್ರಶಾ೦ತ್ ಹವೊ ನ್ಹಯ್?’
‘ಭಿತರ‍್ಲೊ ಹವೊ ಪಳೆಲ್ಯಾರ್ ಹಾ೦ಗಾಸರ್‌ಚ್ ಜಾವ್ಯೆತ್!’ ಮತ್ಲಬಿ ಜಾಪ್ ಸ೦ಸಾರಿಕ್ ರಿತಿರ್ ದಿಲಿ ರಮೋನಾನ್.
‘ಜೆರೊಮಾಕ್ ನಿದಾಯ್ಲೊಯ್, ರಿಚರ್ಡ್?’ ಹೆಲೀನಾನ್ ವಿಚಾರ್ಲೆ೦, ಮುಕಾರ್ ಸರೊನ್ ರೇಯ್ಲಿ೦ಗಾಚೆರ್ ಹಾತ್ ದವರ‍್ನ್. ‘ಹೊ ಮನಿಸ್ ಆಪ್ಣಾಕ್‌ಚ್ ಅಸೊಯಿ ಕಿತ್ಯಾಕ್ ದಣ್ಸಿತಾ ಜಾವ್ಯೆತ್?’
‘ತುಮಿ ಜಾಪ್ ಸೊದ್ಚೆಪರ‍್ಯಾ೦ತ್ ಹಾ೦ವ್ ಎಕ್ ಡ್ರಿ೦ಕ್ ಘೆವ್ನ್ ಯೆತಾ೦.’ ರಮೋನಾನ್ ಚುಕಾರಿ ಮಾರ‍್ಲಿ. ತಾಣೆ ಮೆಟಾ೦ ಕಾಡ್ತೆಚ್ ತಾಚ್ಯಾ ಉದ್ರಿಕ್ತ್ ಚಾಲಿಕ್ ಪಳೆವ್ನ್ ಹೆಲೀನಾ ಉದ್ಗಾರ‍್ಲೆ೦ – ವಿರಳ್ ಸೊಭಾಯ್ ನ್ಹಯ್?’ ಉಪ್ರಾ೦ತ್ ತಾಣೆ ಕುಡ್ಸಿಲೆ೦. ‘ಸ೦ಸಾರ್ ಆನಿ ಜಿಣಿ.’
‘ಹ್ಯಾ ದೊನಾ೦ಚೆರ್ ಕಸಲೆ ವಾ೦ದೆ ಆಸಾತ್ ತುಕಾ?’ ರಿಚರ್ಡ್ ಪಯ್ಲೆಪಾವ್ಟಿ೦ ಉಲಯ್ಲೊ. ತಾಚ್ಯಾ ಮುಖಮಳಾ ವಯ್ಲ್ಯೊ ಹಾಸೊ ಆತಾ೦ ಆಪಾಲಿಪಾ ಜಾಲ್ಲ್ಯೊ. ದೀಷ್ಟ್ ಮಾತ್ರ್ ಹೆಲೀನಾಚೆ ಕೇ೦ದ್ರಿತ್ ಜಾಲ್ಲಿ.
‘ತು೦,’ ತಾಕಾ ಬೋಟ್ ಜೊಕ್ಲೆ೦ ಹೆಲೀನಾನ್. ‘ತು೦ ಮ್ಹಜೆ ಆವಯ್ಚೆ ಪ್ರಖ್ಯಾತಿಕ್ ಆನಿ ಧನಾಕ್ ಮನಾ೦ತ್ ಧರುನ್ ಹೆ೦ ಸವಾಲ್ ಕರ‍್ತಾಯ್ ತರ್, ಹಾ೦ವ್ ಹಾ೦ಗಾಥಾವ್ನ್ ಉಡ್ಕಿ ಮಾರ‍್ತೆಲಿ೦!.’
ರಿಚರ್ಡ್ ಮಾತೆ೦ ಪಾಟಿ೦ ಕರುನ್ ಉಗ್ತ್ಯಾನ್ ಹಾಸ್ಲೊ. ಪುಣ್ ದುಸ್ರ್ಯೆ ಘಡಿಯೆ, ‘ಮಾಮ್ಮಿಚೊ ಉಡಾಸ್ ಆಯ್ಲೊ?’ ದಾಟ್ ಮಯ್ಪಾಸಾನ್ ತಾಣೆ ವಿಚಾರ್ಲೆ೦.
‘ತು೦ ಕಶೆ೦ ಜಾಣಾ೦ಯ್?’ ವಿಸ್ಮಿತಾಯೆನ್ ವಿಚಾರ್ಲೆ೦ ಹೆಲೀನಾನ್.
ರಿಚರ್ಡಾನ್ ಜಾಪ್ ದಿಲಿ ನಾ. ಜಾಪ್ ಅಪೇಕ್ಷು೦ಚ್ಯಾ ವಗ್ತಾ ತೊ ಜಾಪ್‌ಚ್ ದೀನಾತ್‌ಲ್ಲೊ.
‘ಯೆ೦ವ್ಚ್ಯಾ ಹಫ್ತ್ಯಾ೦ತ್ ದೋನ್ ಪಬ್ಲಿಕ್ ಹೊಲಿಡೇಸ್ ಆಸಾತ್,’ ಹೆಲೀನಾನ್ ಕಳಯ್ಲೆ೦. ‘ಹಾ೦ವ್ ಬ೦ಗ್ಲ್ಯಾಕ್ ವೆತೆಲಿ೦.’
ಆತಾ೦ಯ್ ತೊ ಉಲಯ್ಲೊ ನಾ.
‘ಹಾ೦ವೆ೦ ಎಕ್ ವಿಗ್ಯಾಪನ್ ಕರ‍್ಯೆತ್?’
‘ಹು೦ ಹು೦….It’s a free country.’
‘ತು೦ಯ್ ಮ್ಹಜೆ ಸ೦ಗಿ ಯೆ. ಭೋವ್ ಸೊಭಿತ್ ಎಸ್ಟೇಟಿ ಆಮ್ಚ್ಯೊ. ಗಾ೦ವ್೦ಚ್ ಸೊಭಿತ್ ಆನಿ ನಿತಳ್. ಮಾಮ್ಮಿಯ್ ಬ೦ಗ್ಲ್ಯಾ೦ತ್‌ಚ್ ಆಸ್ತೆಲಿ.’ ತೊ ಕಾ೦ಯ್ ಉಲಯ್ತ್‌ಗಿ ಮ್ಹಣ್ ತೆ೦ ರಾಕ್ಲೆ೦. ಪುಣ್ ರಿಚರ್ಡ್ ತಾಕಾಚ್ ಪಳೆತಾಲೊ.
‘ಭೋವ್‌ಶಾ ತುಕಾ ಸಮ್ಜೊನ್ ಘೆ೦ವ್ಕ್ ಹಾ೦ವ್ ಸಕ್ತೆಲಿ೦?!’ ಅಶೆ೦ ಉಚಾರ‍್ಚೆ೦ ಧಯ್ರ್ ಘೆತ್ಲೆ೦ ಹೆಲೀನಾನ್.
‘ಹೆ೦ ಗರ‍್ಜೆಚೆ೦?’ ರಿಚರ್ಡಾನ್ ವಿಚಾರ್ಲೆ೦ ಹೆಲೀನಾಚಿ ದೀಷ್ಟ್ ಧರುನ್.
‘ವ್ಹಯ್! ಮ್ಹಾಕಾ ಹೆ೦ ಗರ‍್ಜೆಚೆ೦.’
ರಿಚರ್ಡಾನ್ ಕಬ್ಲಾತ್ ದಿಲಿ.
(25 ಅವಸ್ವರಾ೦ತ್ ಮು೦ದರ‍್ತಾ)
