ಪಾಟಾಪಾಟ್ ದೋನ್ ಪಬ್ಲಿಕ್ ಹೊಲಿಡೇಸ್ ದೆಶಾಂತ್ ಉದೆ೦ವ್ಚೆ ಆಪ್ರೂಬ್ ಆನಿ ತ್ಯೆ ಸಾಂಜೆರ್ ಒಸಿಸ್ ಕ೦ಪೆನಿಥಾವ್ನ್ ಆಪ್ಲ್ಯಾ ಗ್ರೀನ್‌ಗ್ರೂವ್ ಎಪಾರ್ಟ್ಮೆ೦ಟಾಕ್ ಆಯಿಲ್ಲ್ಯಾ ಹೆಲೀನಾಚ್ಯಾ ಮತಿಂತ್ ಸುಡಳಾಯ್ ಆಸಾಜೆ ಆಸ್‌ಲ್ಲಿ. ತೆ೦ ಸ೦ತುಷ್ಟ್ ಆನಿ ಪ್ರಫುಲ್ಲ್ ಆಸ್‌ಲ್ಲೆಂ ಪುಣ್ ಸುಡಾಳ್ ನಾತ್‌ಲ್ಲೆಂ. ತಾಚೆ೦ ರೂಮ್‌ಮೇಟ್ ದೋನ್ ದಿಸಾ೦ಕ್ ಆಪ್ಲ್ಯಾ ಬೊಯ್‌ಫ್ರೆ೦ಡಾ ಸಾಂಗಾತಾ ಖ೦ಯ್ ಗೆಲ್ಲೆ೦ ತೆ೦ ದೇವ್‌ಚ್ ಜಾಣಾ೦. ಹೆಲೀನಾ ಆಪ್ಲ್ಯಾ ಎಪಾರ್ಟ್ಮೆ೦ಟಾ೦ತ್ ರಿಗ್ತಾನಾ ದಾರಾಕ್ ಎಕ್ ಚೀಟ್ ಚಿಡ್ಕಾವ್ನ್ ಆಸ್‌ಲ್ಲಿ – ದೋನ್ ದಿಸಾ೦ ಉಪ್ರಾ೦ತ್ ಮೆಳ್ಯಾ೦ ಆನಿ ಯೆಕಾಮೆಕಾಚೆ ಅನ್ಬೊಗ್ ಉಲೊವ್ಯಾ೦. ಸಾ೦ತಿಣ್ ಜಾಯ್ನಾಕಾ, ಡಾರ‍್ಲಿ೦ಗ್, ತು೦ವೆ೦ಚ್ ತಾಕಾ ಆಹ್ವಾನ್ ದಿಲಾ೦ಯ್! ಚಿಟಿ ವಯ್ಲೆ೦ ವಾಚುನ್ ತೆ೦ ಖಟ್ಲ್ಯಾರ್ ಬಸ್ಲೆ೦ ಆನಿ ಖೊಟಾವ್ನ್ ತಾಣೆ ಆಪ್ಲೆ ಮೊಚೆ ಪಯ್ಸ್ ಪಡಾಶೆಂ ಕೆಲೆ. ಉಪ್ರಾ೦ತ್ ತೆ೦ ಉದಾರೆ೦ಚ್ ಬೆಡ್ಡಾರ್ ಪರ‍್ತಾಲೆ೦.
ವ್ಹಯ್, ರಿಚರ‍್ಡಾಕ್ ತಾಣೆ೦ಚ್ ಆಹ್ವಾನ್ ದಿಲ್ಲೆ೦.
ಆನಿ ತೊ ವೊಪುಲ್ಲೊ.
ಹಾ೦ತು೦ ನವಾಲ್ ಕಸಲೆ೦, ಮತ್ಲಬ್ ಕಸಲೊ?
ದೋನ್ ದಿಸಾ೦ ಬಿತರ್ ಹಾ೦ವ್ ಮ್ಹಾಕಾಚ್ ರಿಚರ‍್ಡಾಕ್ ಅರ‍್ಪಿತೆಲಿ೦? ಹ್ಯಾ ಮ್ಹಜ್ಯಾ ರೂಮ್‌ಮೆಟಾಚ್ಯಾ ತಕ್ಲೆಂತ್ ಹೆರ್ ಕಾಂಯ್ ಉದೆನಾ?
ತೆಂ ಹಾಸ್ಲೆಂ.
ಕಸಲ್ಯಾ ಪ್ರೇರಣಾಕ್ ಲಾಗುನ್ ತಾಣೆ ರಿಚರ‍್ಡಾಕ್ ಆಪಯಿಲ್ಲೊ? ತಾಚೆ ಲಾಗಿಂ ಜಾಪ್ ನಾತ್‌ಲ್ಲಿ ಕಿತ್ಯಾಕ್ ಆಹ್ವಾನ್ ತಾಚೆಥಾವ್ನ್ ತಾಚೆ ಹೆಳ್ಕೇವಿಣೆಂಚ್ ಭಾಯ್ರ್ ಆಯಿಲ್ಲೆಂ. ಪಾವನಾತ್‌ಲ್ಲ್ಯಾಕ್ – ತುಕಾ ಸಮ್ಜೊನ್ ಘೆಂವ್ಕ್ ಸಕ್ತೆಲಿಂ ಮ್ಹಳ್ಳಿಂ ಚಡಿತ್ ಉತ್ರಾಂ. ವ್ಹಯ್, ಮ್ಹಾಕಾ ಗರ‍್ಜೆಚೆಂ ಎಕ್ ಸ್ಪಶ್ಟೀಕರಣ್.
ವಾಸ್ತವ್ ಜಾವ್ನ್ ರಿಚರ‍್ಡಾಕ್ ಸಮ್ಜೊನ್ ಘೆಂವ್ಕ್ ತಾಕಾ ಜಾಯ್ ಆಸ್‌ಲ್ಲೆಂ? ಕಸಲ್ಯಾ ಕಾರಾಣಾಕ್ ಲಾಗುನ್? ಆಕ್ರೇಕ್ ತರಿ ತೊ ಕೋಣ್? ಫಕತ್ ಒಸಿಸ್ ಕ೦ಪೆನಿ೦ತ್ಲೊ ಹುದ್ದೆದಾರ್. ತಾಚೊ ಸ್ವಬಾವ್ ನಿಗೂಡ್ ತರ್ ಕೊಣಾಕ್ ಪಡೊನ್ ಗೆಲಾ೦?
ತೆ೦ ಘು೦ವೊನ್ ವೊಮ್ತೆ೦ಚ್ ನಿದ್ಲೆ೦.
ತರಿ ಹಾಂವೆಂ ತಾಕಾ ಆಮ್ಚ್ಯಾ ಬಂಗ್ಲ್ಯಾಕ್ ಆಪಯ್ಲೊ.
ಮಾತೆ೦ ಆರ‍್ವಾಸ್ ಉಕ್ಲೊನ್ ಧರುನ್ ತಾಣೆ ಟೆಲೆಫೋನಾಕ್ ಪಳೆಲೆ೦. ‘ಹೆಂ ಆಪವ್ಣೆಂ ರದ್ದ್ ಕರುಂ?’ ತಾಣೆ ಹಾಸೊನ್೦ಚ್ ಆಪ್ಣಾಕ್‌ಚ್ ಸವಾಲ್ ಕೆಲೆ೦. ‘ಬಿಲ್ಕುಲ್ ನಾ!’ ತೆ೦ ವೊ೦ಟ್ ಚಾಬಲಾಗ್ಲೆ೦. ವರ್ಸಾ೦ ಆದಿ೦ ವಿಲ್ಲಿ ಆಯಿಲ್ಲೊ ಆನಿ ರಿತ್ಯಾ ಹಾತಾಂನಿ ಪಾಟಿ೦ ಗೆಲ್ಲೊ. ಆತಾ೦ ಒಸಿಸಾ೦ತ್ಲ್ಯಾ ಚಿಟ್ಟ್ಯಾ-ವಾಗಾ ಪಿಲಾಕ್ ತಾಣೆ೦ಚ್ ಆಪವ್ಣೆ೦ ದಿಲ್ಲೆ೦. ‘How exciting!’ ತೆ೦ ಉದ್ಗಾರ‍್ಲೆ೦.
ಖ೦ಡಿತ್ ಜಾವ್ನ್ ಮಿರ‍್ಮಿರೆ೦ ಸನ್ನಿವೆಶ್ ಹೆ೦. ಯೆಕೆ ಚಲಿಯೆನ್ ಎಕಾ ದಾದ್ಲ್ಯಾಕ್ ಆಪವ್ಣೆ೦ ದಿ೦ವ್ಚೆ೦? ತೆ೦ ಯೆಕಾಚಾಣೆ ಉಟ್ಲೆ೦ ಆನಿ ರುಮಾ೦ತ್ಲ್ಯಾ ಆರ‍್ಸ್ಯಾ ಸಾಮ್ಕಾರ್ ವಿವಸ್ತ್ರ್ ಜಾಲೆ೦. ಸ್ತ್ರೀಯೆಚ್ಯಾ ವಿಶ್ವ್ಯಾ೦ಚ್ಯಾ ಕಸಲ್ಯಾಯಿ ಮಾಪಾ೦ನಿ ತುಕುನ್ ಪಳೆಲ್ಯಾರಿ ತಾಕಾ ಯೆಕ್ ಸು೦ದರ್ ಅನಿ ನಾಜೂಕ್ ಕೂಡ್ ಆಸ್‌ಲ್ಲಿ. ಯೆಕ್ ವಿಶಿಷ್ಟ್ ನಾಜೂಕಾಯ್ ಆಸ್‌ಲ್ಲಿ ತಾಚ್ಯಾ ಹರ್ ವಿಸ್ವ್ಯಾ೦ತ್. ಜಾವ್ಯೆತ್, ಖ೦ಚಾಯಿ ಸೊಬಾಯೆ-ಸ್ಪರ‍್ದ್ಯಾ ಮ೦ಚಾರ್ ತಾಕಾ ಚಡ೦ವ್ಚೆ ತಸಲಿ ಸೊಬಾಯ್ ಆನಿ ನಾಜೂಕಾಯ್ ತಾಚಿ ನ್ಹಯ್. ಪುಣ್ ತೆ೦ ಜಾಣಾ೦ ಆಸ್‌ಲ್ಲೆ೦ ತಾಚಿ ಕೋಮಲತಾ ಖ೦ಚಾಯಿ ದಾದ್ಲ್ಯಾ ವ ಸ್ತ್ರೀಯೆನ್ ಗಮನ್ ಕರಿನಾಸ್ತಾ೦ ರಾ೦ವ್ಚೆ ತಸಲಿ ನ್ಹಯ್.
ತರಿ ವಿಲ್ಲಿಚೆ೦ ಪ್ರಕರಣ್ ಜಾಲ್ಯಾ ಉಪ್ರಾ೦ತ್ ಖ೦ಚಾಯಿ ಚಲ್ಯಾನ್ ವ ದಾದ್ಲ್ಯಾನ್ ತಾಚಿ ಸಮೀಪಾಯ್ ಜೊಡ್ಚೆ೦ ಪ್ರೇತನ್ ಕೆಲ್ಲೆ೦ ನಾ. ಲ೦ಯ್ಗಿಕ್ ಸ೦ಕೇತಾ೦ ತೆ ಪಾಟಯ್ತಾಲೆ ಪುಣ್ ಪಯ್ಸ್ ರಾವ್ತಾಲೆ. ತೆ೦, ಹೆಲೀನಾ ಜೆನಿಸ್, ಲಿಲಿಯನ್ ಜೆನಿಸಾಚೆ೦ ಧುವ್ ಮ್ಹಳ್ಳೆ೦ ಜಾಣಾಸ್ಚೆ ಸಬಾರ್, ಖರೆ೦. ಪುಣ್ ಹೆ೦ ಕಳಿತ್ ನಾತ್‌ಲ್ಲೆ ಸಯ್ತ್ ತಾಕಾ ಅಸಲಿ೦ ಸ೦ಕೇತಾ೦ ಪಾಟಯ್ತಾಲೆ. ತಾಕಾ ಆನಿ ತಾಚ್ಯಾ ನಾಜೂಕಾಯೆಕ್ ಉದ್ರಿಕ್ತ್ ರಿತಿರ್ ಆ೦ವ್ಡೆತಾಲೆ ಪುಣ್ ಪಯ್ಸ್ ರಾವ್ತಾಲೆ.
ಅಶೆ೦ ಕಿತ್ಯಾಕ್? ಹೆ೦ ಸವಾಲ್ ಸಬಾರ್ ಪಾವ್ಟಿ೦ ತಾಣೆ೦ ಆಪ್ಣಾಕ್‌ಚ್ ವಿಚಾರ್‌ಲ್ಲೆ೦ ಆಸಾ. ತೆ೦ವೀ ಬರ‍್ಲೆಲ್ಯಾ ರಗ್ತಾಚಿ ಚಲಿ. ತಾಚಿ ಕೂಡ್ ಸಬಾರ್ ಪಾವ್ಟಿ೦ ಉನ್ಮಾದಿತ್ ಜಾಲ್ಲಿ, ಜಾತಾಲಿ. ಯೆಕೇಕ್ ಪಾವ್ಟಿ೦ ತಾಚ್ಯಾ ಹೆಳ್ಕೇನ್ ಆನಿ ಥೊಡೆ ಪಾವ್ಟಿ೦ ತಾಚೆ ಹೆಳ್ಕೇವಿಣೆ೦ಚ್. ತಾಚ್ಯಾ ಗುಲೊಬಿ ಸ್ಥನಾ೦ಚ್ಯೊ ತುದಿಯೊ ತಾಚಾ ಹಾತಾ೦-ತಾಳ್ವೆ೦ ಪ೦ದಾಕ್ ಮಿರ‍್ಮಿರೋನ್ ಉಟೊನ್ ಘಟ್ ಜಾತಾಲ್ಯೊ. ಅಸಲ್ಯಾ೦ ವೆಳಾರ್ ತಾಚ್ಯಾ ಜಾ೦ಗ್ಳಾ೦ನಿ ಚರ‍್ಲಲೊ ಉಜೊ ತಾಚ್ಯಾ ಸ್ತ್ರೀಪಣಾಕ್ ತೇವಬರಿತ್ ಕರ‍್ತಾಲೊ. ತಾಚ್ಯಾ ಕಾಳ್ಜಾಚ್ಯೊ ಉಡಿಯೊ ಚಡ್ತಾಲ್ಯೊ ಆನಿ ತಾಚೊ ಸ್ವಾಸ್ ಉಬೆನ್ ಬರೊನ್ ಭಾಯ್ರ್ ಯೆತಾಲೊ. ಶಿರಾ೦ನಿ ಮ೦ದ್ ಅಸ್ಕತ್‌ಕಾಯ್ ಚರ‍್ತಾಲಿ ಆನಿ ತೆ೦ ಆದಾರಾಕ್ ಆಪ್ಣಾಕ್‌ಚ್ ವೆ೦ಗೊ೦ಕ್ ಆಶೆತಾಲೆ೦. ಪುಣ್ ಹೆ೦ ಭೊಗಾಪ್ ಪಯ್ಸ್ ಕರು೦ಕ್ ಕಸಲೆ೦ಚ್ ಪ್ರೇತನ್ ಕರಿನಾತ್ಲೆ೦-ಹೆ೦ ಭೊಗಾಪ್ ತಾಕಾ ಬರೆ೦ ಲಾಗ್ತಾಲೆ೦.
ಸಮಾಜಿಕ್ ವರ‍್ತುಲಾ೦ನಿ ಭರ‍್ಪೂರ್ ಭರ‍್ಸುನ್ ವಳ್ಸಾಲ್ಲ್ಯಾ ತಾಕಾ ‘ಸಮೀಪಾಯ್’ ಮ್ಹಳ್ಳೊ ಸಬ್ದ್ ಆನಿ ತಾಚ್ಯೊ ಪರಿದ್ಯೊ ವಿಸ್ತಾರ್ ಆಸಾತ್ ಮ್ಹಳ್ಳೆ೦ ಗಮ್‌ಲ್ಲೆ೦. ತಿತ್ಲೆ೦ಚ್ ನ್ಹಯ್, ದಾದ್ಲ್ಯಾ೦ನಿ ಆಶೆ೦ವ್ಚಿ ಸಮೀಪಾಯ್ ಗಡ್ ನಾತ್‌ಲ್ಲ್ಯಾ ತಾ೦ಚ್ಯಾ ಪಾಶಾ೦ವಾಕ್ ಜಾಗಯ್ತಾ ಮ್ಹಳ್ಳೆ೦ಯಿ ತಾಕಾ ಕಳಿತ್ ಜಾಲ್ಲೆ೦. ಆಪ್ಣಾಕ್ ಪರಿಪೂರ‍್ಣ್ ದಯ್‌ಹಿಕ್ ಸುಖ್ ದಿ೦ವ್ಚ್ಯಾ ದಾದ್ಲ್ಯಾಚಿ ಸಮೀಪಾಯ್ ಆನಿ ಮಾನಸಿಕ್ ಥರಾನ್ ಆಪ್ಣಾಚೆರ್ ಆಕ್ರಮಣ್ ಚಲ೦ವ್ಚ್ಯಾ ದಾದ್ಲ್ಯಾಚಿ ಸಮೀಪಾಯ್ ವಿಬಿನ್ನ್ ಆನಿ ಬೊಲ್ತಿಚ್ ಮ್ಹಣ್ ತೆ೦ ಚಿ೦ತಾಲೆ೦. ಜಾವ್ಯೆತ್, ಹೆ೦ ತಾಚೆ ಚಿ೦ತಪ್ ತಾಚೆಚ್ ಭೊ೦ವಾರಿ೦ ಎಕ್ ಅದೃಶ್ ಪಾಗೊರ್ ಉಬೆ೦ ಕರ‍್ತಾಲೆ೦? ಹ್ಯೊ ದೋನ್ ಸಮೀಪಾಯೊ, ಸಮೀಪಾಯೊ ಜಾವ್ನ್‌ಯಿ ಯೆಕಾ ಅಗಾದ್ ಖ೦ದಕಾಚ್ಯೊ ದೋನ್ ತಡಿ ಜಾವ್ನಾಸ್‌ಲ್ಲ್ಯೊ? ಆನಿ ಹೊ ಖ೦ದಕ್ ಘಡ್ಸಾಜೆ ತರ್ ಎಕ್‌ಚ್ ವಾಟ್ ಆಸ್‌ಲ್ಲಿ-ಹ್ಯಾ ಸಮೀಪಾಯೆ೦ಕ್ ಎಕ್ ಕರ‍್ಚಿ. ಆನಿ ಹೊಚ್ ಜಾವ್ನಾಸ್‌ಲ್ಲೊ ಅರ‍್ಥ್ ಹೆಲೀನಾನ್ ಆಶೆ೦ವ್ಚ್ಯಾ ಪ್ರಥಮ್ ಲ೦ಯ್ಗಿಕ್ ಸ೦ಬೋಗಾಚೊ.
ಲಿಲಿಯನ್ ಜೆನಿಸಾಚಿ೦ ಉತ್ರಾ೦ ಫಾತ್ರಾ೦ತ್ ಖೊರಾಯಿಲ್ಲೆಪರಿ೦ ತಾಚೆ ಮತಿ೦ತ್ ಆಸ್‌ಲ್ಲಿ೦. ‘ದಾದ್ಲ್ಯಾ೦ಥಾವ್ನ್ ಪಯ್ಸ್ ರಾವ್ ಮ್ಹಣ್ ಹಾ೦ವ್ ತುಕಾ ಸಾ೦ಗಾನಾ. ಪುಣ್ ಭಾಯ್ಲ್ಯಾನ್ ದಾದ್ಲ್ಯಾ೦ಪರಿ೦ ದಿಸ್ತೆಲ್ಯಾ೦ ಥಾವ್ನ್ ಪಯ್ಸ್ ರಾವ್. ಕಿತ್ಯಾಕ್ ತೆ ತಾ೦ಚಿ ಅಸ್ಕತ್‌ಕಾಯ್ ಭಾವ್, ಭಯ್ಣ್, ಆವಯ್, ಬಾಪುಯ್ ಮ್ಹಳ್ಳ್ಯಾ ರಿಶ್ತ್ಯಾ೦ನಿ ಮಿಸ್ಳಾವ್ನ್ ತುಜೊ ಫಾಯ್ದೊ ಜೊಡು೦ಕ್ ಪಳೆತಾತ್. ಆವಯ್ಚ್ಯಾ ಹ್ಯಾ ಉತ್ರಾ೦ನಿ ಹೆಲೀನಾ ಥ೦ಯ್ ಎಕ್ ನವೊ ಸಿದ್ದಾ೦ತ್ ಉದೆಲ್ಲೊ-ಯೆಕಾ ಸ್ತ್ರೀಯೆ ಆನಿ ದಾದ್ಲ್ಯಾ ಮದೆ೦ ಫಕತ್ ಇಷ್ಟಾಗತ್ ಆಸು೦ಕ್ ಆಸಾದ್ಯ್. ಲ೦ಯ್ಗಿಕತೆಚೆ೦ ಕಿಸರ್ ನಾಸ್ತಾನಾ-ತೆ೦ ಕಿಸರ್ ಕಿಟಾಳ್ ಜಾವ್ನ್ ಆಗ್ಟೆ೦ ಜಾ೦ವ್ಚೆ ಪರ‍್ಯಾ೦ತ್ ಪಾವೊ೦ಕ್ ಸಲ್ವತ್ ತರೀ-ದಾದ್ಲ್ಯಾ ಆನಿ ಸ್ತ್ರೀಯೆ ಮದೆ೦ ಫಕತ್ ನಿರಾಳ್ ಇಷ್ಟಾಗತ್ ಆಸೊ೦ಕ್ ಅಸಾದ್ಯ್ ಮ್ಹಳ್ಳೆ೦ ತೆ೦ ಜಾಣಾ೦ ಆಸ್‌ಲ್ಲೆ೦. ಸಿದ್ದಾ೦ತ್ ತಾಚೆ ಥ೦ಯ್ ಉದೆಲ್ಲೊ ಪುಣ್ ಹೆ೦ ನೇಮ್ ಜಾವ್ನಾಸ್‌ಲ್ಲೆ೦ ಸ೦ಸಾರಾಚೆ೦. ಮುಳಾವ್ಯಾ ಜಿನೊಸಾಚಿ ಕಕ್ಶಾ ಲ೦ಯ್ಗಿಕತಾಚ್ ತರ್ ಹೆಲೀನಾ ತಸಲ್ಯಾ ಚಿ೦ತ್ಪಾ ಸಕತ್ ಆಸ್ಚ್ಯಾಕ್ ಹೆರ್ ಕಸಲೆ೦ಯಿ ಸುಸ್ತಾಲ್ಲೆ೦ ತರ್ ಅಪ್ವಾದ್ ಜಾತೊ.
ಆಪ್ಣಾಕ್ ಆಸ್ಚಿ ಹಿಚ್ಚ್ ಜಾಣ್ವಾಯ್ ಮ್ಹಜ್ಯಾ ವೆಕ್ತಿತ್ವಾ೦ತ್ ಪಾಜರ‍್ತಾ ಆನಿ ದಾದ್ಲ್ಯಾ೦ಕ್ ಪಯ್ಸ್ ದವರ‍್ತಾ? ಸಬಾರ್ ಪಾವ್ಟಿ೦ ಹೆ೦ ಸವಾಲ್ ತೆ೦ ಆಪ್ಣಾಕ್‌ಚ್ ವಿಚಾರ‍್ತಾಲೆ೦. ಚಲ್ಯಾ೦ಚಿ ಆನಿ ದಾದ್ಲ್ಯಾ೦ಚಿ ಸಮೀಪಾಯ್ ತಾಕಾ ಧಾರಾಳಾಯೆನ್ ‘ಲಾಬ್‌ಲ್ಲಿ’ ನಾಚಾಚ್ಯಾ ಸಾಲಾ೦ನಿ. ಕುಡಿಕ್ ಕೂಡ್, ವಿಸ್ವ್ಯಾ೦ಕ್ ವಿಸ್ವೆ ಲಾಗವ್ನ್, ಗೊಪ್ ಘಾಲುನ್ ಸಬಾರ್ ಪಾವ್ಟಿ೦ ತೆ೦ ನಾಚ್‌ಲ್ಲೆ೦. ತಾಚಿ೦ ಸ್ಥನಾ೦ ದಾದ್ಲ್ಯಾ೦ಚ್ಯಾ/ತರ‍್ನಾಟ್ಯಾ೦ಚ್ಯಾ ಹರ‍್ಧ್ಯಾ೦ಕ್ ಲಾಗ್‌ಲ್ಲಿ೦. ದಾದ್ಲ್ಯಾ೦ಚೆ ಹಾತ್ ತಾಚೆ ಪಾಟಿರ್, ಪೆ೦ಕ್ಟಾರ್ ಆನಿ ಕುಲ್ಯಾ೦ಚೆರ್ ಸಯ್ತ್‌ಯಿ ಚರ್‌ಲ್ಲೆ ಆನಿ ಥೊಡ್ಯಾ೦ನಿ ತಾ೦ಚಿ೦ ಬೊಟಾ೦ ತಾಚ್ಯಾ ‘ಬ್ರಾ’-ಚ್ಯಾ ಪಟ್ಟೇ೦ಚೆರ್/ಹುಕ್ಕಾಚೆರ್ ಚರಯಿಲ್ಲೆ ಸಯ್ತ್. ತಾ೦ಚೆ ವಿಸ್ವೆ ಜಾಗೃತ್ ಜಾಲ್ಲಿ ಉದ್ರಿಕ್ತಾಯ್ ಪಾಚಾರ‍್ನ್ ತಾಚ್ಯಾ ಜಾ೦ಗ್ಳಾ೦ಕ್ ಲಾಗ್‌ಲ್ಲೆ/ಲಾಗಯಿಲ್ಲೆ ಸಯ್ತ್. ಪುಣ್ ಹ್ಯಾ ‘ಸಮೀಪಾಯೆ’ ವರ‍್ವಿ೦ ತಾಚೆ ಕುಡಿ೦ತ್ ಕಸಲೊಯಿ ಮಿರ‍್ಮಿರೊ ಉದೆಲ್ಲೊ ನಾ. ತಾಚ್ಯಾ ಸ್ತ್ರೀಪಣಾ೦ತ್ ಕಸಲೊಚ್ ಉಜೊ ಪೆಟ್‌ಲ್ಲೊ ನಾ, ತಾಚ್ಯಾ ಸ್ಥನಾ೦ಚೆ ಶಿಖರ್ ಫಟ್ಪಟೋನ್ ಫುಲ್‌ಲ್ಲೆ ನಾ೦ತ್.
ತರ್ ಆಪುಣ್ ಎಕ್ ವಿಬಿನ್ನ್ ಕಾಮಿನಿ?
ವಿಲ್ಲಿಚ್ಯಾ ಪ್ರಕರಣಾ ಆನಿ ಹೊಸ್ಟೆಲಾಂತ್ಲ್ಯಾ ರ‍್ಯಾಗಿ೦ಗಾನ್ ಆಪ್ಲ್ಯಾ ಮಾನಸಿಕತೆಚೆರ್ ಕಸ್ಲೊ ದಾಗ್ ದವ್ರಿಲ್ಲ್ಯಾನ್ ಹಾಂವ್ ಅಶಿಂ ಜಾಲ್ಯಾ೦? ಹಿ೦ ಸವಲಾ೦ ತಾಕಾ ಧೊಸ್ತಾಲಿ೦. ತಾಣೆ ಜಾಪ್ ಸೊದುನ್ ಕಾಡಿಜೆ ಆಸ್‌ಲ್ಲಿ ಆನಿ ವೆಗಿ೦ಚ್!
ತೆ೦ ಖಟ್ಲ್ಯಾರ್ ಬಸ್ಲೆ೦. ರಿಚರ‍್ಡಾಚೆ ಸಮೀಪಾಯೆನ್ ಹೆಲೀನಾಥಂಯ್ ಕಸಲಿ೦ ಭೊಗ್ಣಾ೦ ಉಸ್ಕಾಯಿಲ್ಲಿ೦? ಹಾಚಿ ಜಾಪ್‌ಯಿ ತಾಚೆಲಾಗಿ೦ ನಾತ್‌ಲ್ಲಿ. ಮಾವ್ರಿಸಾಕ್ ಝಡ್ಪೊ೦ಚ್ಯಾ ದಿಸಾ ತಿ೦ ಪಯಿಲೆ ಪಾವ್ಟಿ೦ ಮೆಥ್ಯು ಮುಕಾ೦ತ್ರ್ ಯೆಕಾಮೆಕಾ ಪರಿಚಿತ್ ಜಾಲ್ಲಿ೦, ವಯ್ವಾಟೀ ದೃಷ್ಟೆನ್. ಪುಣ್ ತ್ಯಾ ಪಯ್ಲೆ೦ ಇ೦ಟರ್‌ವ್ಯುವಾ ದಿಸಾ ರಿಚರ‍್ಡಾನ್೦ಚ್ ತಾಚಿ೦ ದಸ್ತಾವೆಜಾ೦ ವಿ೦ಚುನ್ ದಿಲ್ಲಿ೦. ಪುಣ್ ಹೆ೦ ಕೆಲ್ಲ್ಯಾ ತಕ್ಷಣ್ ತಾಚೆ೦ (ರಿಚರ‍್ಡಾಚೆ೦) ಶಿ೦ತಿದ್ ಹೆಲೀನಾ ವಯ್ಲೆ೦ಚ್ ನ್ಹಯ್ ಬಗಾರ್ ಹೆರ್ ಸಬಾರ್ ಸ೦ಗ್ತಿ೦ ವಯ್ಲೆ೦ ಉಟ್‌ಲ್ಲೆ೦ ಜಾಯ್ಜೆ. ಮೆಥ್ಯುಚ್ಯಾ ಕೆಬಿನಾಚೆ೦ ದಾರ್ ಉಗ್ತೆ೦ ಕರುನ್ ತೊ ಬಿತರ್ ಗೆಲ್ಲೊ. ಉಪ್ರಾ೦ತ್ ಆಯಿಲ್ಲೊ ಅವ್ಕಾಸ್ ಕೆಫೆಟೇರಿಯಾಂತ್ಲ್ಯಾ ಸ೦ಭಾಶಣಾಕ್ ಇ೦ಬು ದೀ೦ವ್ಕ್ ಪಾವ್‌ಲ್ಲೊ. ತೆ೦ ಸ೦ಭಾಶಣ್ ಸಗ್ಳೆ೦ಚ್ ತಾಚ್ಯಾ ಮತಿ೦ತ್ ಆಸ್‌ಲ್ಲೆ೦. ‘ಚಲಿಯಾ೦ ಆನಿ ಸ್ತ್ರೀಯಾ೦ ಮದ್ಲೆ೦ ಫರಕ್ ಹೆ೦ಚ್!’. ರಿಚರ‍್ಡಾಚಿ ಹಿ ಪ೦ಚ್‌ಲಾಯ್ನ್ ನಿಜಾಯ್ಕಿ ಕಠಿಣ್.
ಆಪುಣ್ ಕೋಣ್?
ಚಲಿ ವ ಸ್ತ್ರೀ ಯಾ ಚಲಿ ಆನಿ ಸ್ತ್ರೀ?
ಕೆಫೆಟೇರಿಯಾ೦ತ್ ಆಪ್ಣೆ೦ ರಿಚರ‍್ಡಾಸ೦ಗಿ ಕಸಲೆ೦ಗಿ ಆದ್ಲೆ೦ ಹಟ್ ಚಲಯ್ತಾ೦ ಮ್ಹಣ್ ಭೊಗ್‌ಲ್ಲ್ಯಾ ತಾಕಾ ಸ್ಕಾಯ್‌ಪಾರ‍್ಕ್ ಟೆರೆಸಾರ್ ಪರ‍್ತ್ಯಾನ್ ಜಿವಾಳು೦ಕ್ ಅವ್ಕಾಸ್ ಮೆಳ್ಫೊ. ಜಾ೦ವ್ ಹೊ ಯೆಕ್ ಪ್ರಯೋಗ್ ತಾಣೆ ಆಪ್ಣಾಕ್‌ಚ್ ಸಾ೦ಗ್ಲೆ೦. ಪಳವ್ಯಾ೦ ಹ್ಯಾ ರಿಚರ‍್ಡ್ ಕ್ಲೆಮೆ೦ಟಾಚಿ ಗು೦ಡಾಯ್. ಹಾಕಾ ಮೆಜಿಜೆ ತರ್ ಆಪ್ಣೆ೦ ಚಿಕ್ಕೆಸೆ೦ ಲ್ಹಾನ್ ಜಾಯ್ಜೆ ಮ್ಹಳ್ಳ್ಯಾ ತ೦ತ್ರಾಕ್ ಲಾಗೊನ್‌ಚ್–ಭೋವ್‌ಶಾ, ತುಕಾ ಸಮ್ಜೊನ್ ಘೆ೦ವ್ಕ್ ಹಾ೦ವ್ ಸಕ್ತೆಲಿ೦ -ಮ್ಹಳ್ಳಿ೦ ಉತ್ರಾ೦ ಹೆಲೀನಾನ್ ಚಲಾಕೆನ್ ವಾಪರ್‌ಲ್ಲಿ೦. ಪುಣ್ ಹೆ೦ ಚಿ೦ತಪ್, ಆತಾ೦ಚೆ೦, ಸ್ವಸಮಾದಾನೆಕ್ ವಾಪರ್‌ಲ್ಲೆ೦.
ಮದ್ಯಾನೆರ್, ವೀಸ್-ತೀಸ್ ಪಕ್ವಾ೦ನಾ೦ಚೊ ‘ಬೂಫೆ’ ಉಗ್ತೊ ಜಾತಾನಾ ಆಮಾಲಾಂತ್ ಬುಡೊನ್ ಮತಿಭೃಷ್ಟ್ ಜಾಲ್ಲೆ ಸಯ್ರೆ ಮನ್ಜಾತಿ೦ ಪರಿ೦ ಭುಕೇಸ್ತ್ ಜಾಲ್ಲೆ. ತವಳ್ ಪರ‍್ಯಾ೦ತ್ ಟೆರೆಸಾರ್ ಆಸ್‌ಲ್ಲಿ೦ ರಿಚರ‍್ಡ್ ಆನಿ ಹೆಲೀನಾ ಆತಾ೦ ಸ್ಕಾಯ್ಪಾರ್ಕಾ ಭಿತರ್ ಆಯಿಲ್ಲಿ೦ ಆನಿ ಬೂಫೆ ಕೌ೦ಟರಾ ಭ೦ವ್ತಿ ಜಾ೦ವ್ಚೊ ಗಲಾಟೊ, ತಮಾಸೊ ಆನಿ ಭ೦ಗಸ್ತಳ್ ಕುತೂಹಲ್‌ಭರಿತ್ ದೊಳ್ಯಾ೦ನಿ ಪಳೆತಾಲಿ೦. ವಿಚಿತ್ರ್, ಸ್ಕಾಯ್ಪಾರ್ಕಾ೦ತ್‌ಚ್ ಬಸುನ್ ಆಸ್‌ಲ್ಲ್ಯಾ ಥೊಡ್ಯಾ೦ ಪಯ್ಕಿ೦ ಮೆಥ್ಯು, ರಮೋನಾ ಆನಿ ಈವಾ. ಪುಣ್ ತಿ೦ ಯೆಕಾಚ್ಚ್ ಮೆಜಾಭ೦ವ್ತಿ೦ ನಾತ್‌ಲ್ಲಿ೦-ಯೆಕೇಕ್ಲ್ಯಾನ್ ಎಕೇಕ್ ಮುಲೊ ಸೊದುಲ್ಲೊ. ಪುಣ್ ತ್ಯಾ೦ ಸರ‍್ವಾ೦ಚಿ ದೀಷ್ಟ್ ವಿವಿದ್ ಮತ್ಲಬಾ೦ಕ್ ಲಾಗುನ್ ಬೂಫೆ ಕೌ೦ಟರಾರ್ ಆಸ್‌ಲ್ಲಿ. ತಮಾಸೊ, ಗಲಾಟೊ ಆನಿ ಭ೦ಗಸ್ತಳ್ ಬಸುನ್ ಪಳೆ೦ವ್ಕ್ ಕೊಣಾಕ್ ನಾಕಾ?
ರಿಚರ‍್ಡಾನ್ ಆನಿ ಹೆಲೀನಾನ್ ತಾತಾ೦ಚ್ಯಾ ಪಸ೦ದೆಚಿ೦ ಪಕ್ವಾನಾ೦ ಘೆತ್ಲಿ೦ ಆನಿ ರಿತೆ೦ ಆಸ್ಚೆ೦ ಎಕ್ ಮೇಜ್ ಸೊದುನ್ ತಿ೦ ಬಸ್ತಾನಾ ತೆ೦ ಉಗ್ತ್ಯಾನ್ ಹಾಸ್ಲೆ೦. ರಿಚರ‍್ಡ್ ತಾಕಾ ಸುಕ್ಷಿಮಾಯೆನ್ ಪಳೆಲಾಗ್ಲೊ.
‘ಕೆಫೆಟೇರಿಯಾಚ್ಯಾ ಕುಪನಾ೦ಚೊ ಉಡಾಸ್ ಆಯ್ಲೊ?’ ತಾಣೆ ವಿಚಾರ‍್ಲೆ೦ ಮಯ್ಪಾಸಾನ್.
‘ತುಜೆ ಥಾವ್ನ್ ಕಿತೆ೦ಚ್ ಲಿಪಾನಾ, ವ್ಹಯ್?’
‘ಹಾ೦ವ್ ನೆಣಾ೦!’ ಆಪ್ಲಿ೦ ಭುಜಾ೦ ಉಡವ್ನ್ ತೊ ಮ್ಹಣಾಲೊ. ‘ಮ್ಹಾಕಾ ಸಮ್ಜೊನ್ ಘೆ೦ವ್ಚ್ಯಾ ಮಿಸಾ೦ವಾಕ್ ತು೦ವೆ೦ ಖಾ೦ದ್ ಮಾರ‍್ಲಾಯ್.’
ತಿ೦ ಜೆವ್ಲಿ೦.
ತಾ೦ಚೆ೦ ಜೆವಣ್ ಜಾತಾನಾ ಮೆಥ್ಯು, ರಮೋನಾ ಆನಿ ಈವಾ ಬೂಫೆ ಕೌ೦ಟರಾ ಸರ‍್ಶಿಂ ವಚುನ್ ಆಪಾಪ್ಣಾ೦ಕ್ ಪಸ೦ದೆಚೆ೦ ಘೆ೦ವ್ಚೆ೦ ಹಾಣಿ೦ ಪಳೆಲೆ೦. ಆಪ್ಣೆ೦ ಜೆವಣ್ ಘೆವ್ನ್ ಜಾತೆಚ್ ಈವಾನ್ ಎಕಾ ವೇಯ್ಟರಾಲಾಗಿ೦ ಉಲ೦ವ್ಚೆ೦ ಹಾ೦ಕಾ೦ ದಿಸ್ಲೆ೦. ತೊ ವೇಯ್ಟರ್ ಮಾತೆ೦ ಹಾಲವ್ನ್ ಸ್ಕಾಯ್ಪಾರ್ಕಾ೦ತ್ಲೊ ಭಾಯ್ರ್ ಗೆಲೊ. ಸಾತ್ ಆಟ್ ಮಿನುಟಾ೦ನಿ ಪಾಟಿ೦ ಆಯಿಲ್ಲ್ಯಾ ತಾಣೆ ಈವಾಚ್ಯಾ ಕಾನಾ೦ತ್ ಕಸಲೆ೦ಗಿ ಸಾ೦ಗ್ಲೆ೦. ತೆ೦ ಆಯ್ಕೊನ್ ಈವಾನ್ ಎಕ್ ಸಮಾದಾನೆಚೊ ಸ್ವಾಸ್ ಸೆವ್ಲೊ.
ಜೆವಣ್ ಜಾತೆಚ್ ಸಯ್ರೆ ಆನಿ ಒಸಿಸ್ ಕ೦ಪೆನಿಚೊ ‘ಸ್ಟಾಫ್’ ಚಲೊನ್, ಲಕೊನ್ ಆನಿ ಪಾ೦ಯ್ ವೊಡುನ್ ಸಯ್ತ್ ಸ್ಕಾಯ್ಪಾರ್ಕಾ೦ತ್ಲೆ ಭಾಯ್ರ್ ಸರ‍್ಲೆ. ವೆಚ್ಯಾ ಫುಡೆ೦, ಆತಾ೦ ದಾರ‍್ವಟ್ಯಾರ್‌ಚ್ ಉಬೊ ಆಸ್‌ಲ್ಲ್ಯಾ ಮೆಥ್ಯುಚೊ ಉಪ್ಕಾರ್ ಗೊದ್ದ್ಯಾ ಉತ್ರಾ೦ನಿ ಆನಿ ಲಳ್ಚ್ಯಾ ಜಿಬಾ೦ನಿ ಬಾವುಡ್ಲೊ, ಆಟಾಯ್ಲೊ ಆನಿ ರಮೋನಾಚ್ಯಾ ಹಾತಾ೦ಚೆ ಉಮೆ ಘೆತ್ಲೆ. ವರ‍್ಸಾಕ್ ಎಕ್ ಪಾವ್ಟಿ೦ ಮೆಳ್ಚೆ೦ ಹೆ೦ ಛಾನ್ಸ್, ಹು೦.
ಫಾ೦ತ್ಯಾಚಿ೦ ಅಡೇಜ್ ಜಾತಾನಾ ಸ್ಕಾಯ್‌ಪಾರ‍್ಕ್ ರಿತೆ೦ ಜಾಲೆ೦. ಒಸಿಸ್ ಕ೦ಪೆನಿನ್ ಉಟಯಿಲ್ಲ್ಯಾ ತುಫಾನಿ ರಾತಿಚಿ೦ ಖುಣಾ೦ ಮಾತ್ರ್ ಥ೦ಯ್ ಕಚ್ರೊ ಜಾವ್ನ್ ಉರ‍್ಲಿ೦-ಅವೆವಸ್ಥ್ ಜಾಲ್ಲಿ೦ ಮೆಜಾ೦, ಆಡ್ ಪಡ್‌ಲ್ಲೆ ಗ್ಲಾಸ್, ಧರ‍್ಣಿರ್ ಲೊಳ್ಚೆ ತುವಾಲೆ, ಭರ‍್ಲೆಲ್ಯಾ ಆಶ್-ಟ್ರೇಯಾ೦ನಿ ಆನಿಕಿ ಧು೦ವರ‍್ಚ್ಯೊ ಸಿಗ್ರೆಟ್ಯೊ…..
ವಿಚಿತ್ರ್ ಸನ್ನಿವೆಶಾಕ್ ಲಾಗುನ್ ಹಿ೦ ಪಾ೦ಚ್ ಜಣಾ೦-ಮೆಥ್ಯು, ಈವಾ, ರಮೋನಾ, ಹೆಲೀನಾ ಆನಿ ರಿಚರ‍್ಡ್ ಎಕ್ ಪ೦ಗಡ್ ಜಾವ್ನ್ ಸ್ಕಾಯ್ಪಾರ್ಕಾ೦ತ್ ಉಬಿ೦ ಜಾಲ್ಲಿ೦. ಮೆಥ್ಯುನ್ ಆಪ್ಲೆಚ್ ಹಾಳ್ವಾಯೆನ್ ಕ್ಯೂಬನ್ ಸಿಗಾರ್ ಪೆಟಯ್ಲೆ೦ ಆನಿ ಧು೦ವ್ರಾಚೆ೦ ಪ್ರಥಮ್, ಅಸ್ಕತ್ ಮೋಡ್ ಉಟಯ್ಲೆ೦. ತಾಣೆ ಆಮಾಲ್ ಸೆವ್‌ಲ್ಲೆ೦ ತರಿ ತೊ ಪರಿಪೂರ‍್ಣ್ ಸ್ವನಿಯ೦ತ್ರಣಾ೦ತ್ ಆಸ್‌ಲ್ಲೊ. ಸ್ಕಾಯ್ಪಾರ್ಕಾ೦ತ್ ದೀಷ್ಟ್ ಚರವ್ನ್ ತೊ ಹಾಸ್ಲೊ. ‘ಹೆ೦ ಸರ‍್ವ್,’ ತೊ ಮ್ಹಣಾಲೊ ಕಸಲೆಚ್ ಚುರ‍್ಚುರೆನಾಸ್ತಾ೦. ‘ಹೆ೦ ಸರ‍್ವ್ ಆನಿ ಫಾಲ್ಯಾ೦ ಯೆ೦ವ್ಚೆ೦ ಬಿಲ್ಲ್….’ತಾಣೆ ಆಪ್ಲಿ೦ ಭುಜಾ೦ ಉಡಯ್ಲಿ೦. ‘ಲಾ೦ಬ್ ಜಿಯೊ೦ ಒಸಿಸ್ ಕ೦ಪನಿ!’
‘ಆನಿ ಮೆಥ್ಯು ಲಿಯೊ!’ ರಮೋನಾನ್ ಕುಡ್ಸಿಲೆ೦ ಹಾಳ್ವಾಯೆನ್ ತಾಳಿಯೊ ಪೆಟುನ್. ಪುಣ್ ಹೆ೦ ಉಚಾರ‍್ತಾನಾ ತಾಚಿ ದೀಷ್ಟ್ ರಿಚರ‍್ಡಾಚೆರ್ ಆಸ್‌ಲ್ಲಿ ಹೆಲೀನಾಚ್ಯಾ ಗಮನಾಕ್ ಆಯ್ಲಿ. ರಮೋನಾಚಿ೦ ಉತ್ರಾ೦ ಹೆರಾ೦ನಿ ಕಶಿ೦ ಘೆತ್ಲಿ೦ ಮ್ಹಳ್ಳೆ೦ ಜಾಣಾ೦ ಜಾ೦ವ್ಕ್ ಸಕ್ಲೆ೦ ನಾ ತರಿ ರಿಚರ‍್ಡಾಚೆ೦ ಮುಕಮಳ್ ಪರಿಪೂರ‍್ಣ್ ಕೊರೊ ಆಸ್‌ಲ್ಲೆ೦ ತಾಚ್ಯಾ ಗಮನಾಕ್ ಗೆಲೆ೦.
‘ಜೆರೊಮ್ ಉಟ್ಚೆ ಪರಿಸ್ಥಿತಿಯೆ೦ತ್ ನಾ!’ ಹೆಲೀನಾಕ್ ದೆಗೆನ್ ಲೊಟುನ್ ಯೆಕಾಚಾಣೆ ಮುಕಾರ್ ಆಯ್ಲೆ೦ ಈವಾ. ತಾಣೆ ಆಪ್ಲೊ ಹಾತ್ ಮೆಥ್ಯುಚ್ಯಾ ಭುಜಾರ್ ದವರ‍್ಲೊ. ‘ಹಾ೦ವೆ೦ ವೇಯ್ಟರಾಕ್ ಧಾಡ್‌ಲ್ಲೊ ಆನಿ ತಾಣೆ೦ ವಚುನ್ ಪಾಟಿ೦ ಯೆವ್ನ್ ಮ್ಹಾಕಾ ಖಬರ್ ದಿಲಿ. ಆಮ್ಚ್ಯಾ ಕಾರಾಚ್ಯೊ ಚಾವಿಯೊ ಹಾ೦ವ್ ರಿಸೆಪ್ಶನಾ೦ತ್ ಸೊಡ್ಟಾ೦. ಯೆಕೆವೆಳಿ೦ ತೊ ಉಟೊನ್ ಘರಾ ಯೆ೦ವ್ಚೆ೦ ಪ್ರೇತನ್ ಕರಿತ್ ಜಾಲ್ಯಾರ್….’
‘ಹಾ೦ವ್ ತುಕಾ ಘರಾ ಪಾಯ್ತಾ೦,’ ತಾಚೊ ಹಾತ್ ಥಾಪ್ಡುನ್ ಮೆಥ್ಯುನ್ ಆಶ್ವಾಸನ್ ದಿಲೆ೦. ‘ಸಾ೦ಗಾತಾಚ್ ಹಾ೦ವ್ ವಿಶಾದ್ ಪಾವ್ತಾ೦…..’
‘ವಿಶಾದಾ೦ಚಿ ಗರಜ್ ನಾ!’ ಮೆಥ್ಯುಚಿ೦ ಉತ್ರಾ೦ ಈವಾನ್ ತಿತ್ಲ್ಯಾರ್‌ಚ್ ಕಾತರ‍್ಲಿ೦. ‘ಜೆರೊಮಾಕ್, ತು೦ವೆ೦ ಒಳ್ಕೊ೦ಚೆಪರಿ೦ ಹೆರ್ ಕೋಣ್‌ಯಿ ಒಳ್ಕಾನಾ೦ತ್!’
ಮೆಥ್ಯುನ್ ಜಾಪ್ ದಿಲಿ ನಾ ಪುಣ್ ಖಿಣ್‌ಭರ್ ತಾಚಿ ದೀಷ್ಟ್ ರಮೋನಾಚೆರ್ ಬಸ್ಲಿ. ರಮೋನಾನ್ ತಾಕಾ ಪಾಟಿ೦ ದಿಲ್ಲಿ ಮಿರ‍್ಮಿರಿ ಆನಿ ಮಾರ‍್ಮಿಕ್ ದೀಷ್ಟ್ ಹೆಲೀನಾಚೆ ಹೆಳ್ಕೇಕ್ ವಚಾನಾಸ್ತಾ೦ ರಾವ್ಲಿ ನಾ.
‘ಮ್ಹಾಕಾ ಗ್ರೀನ್‌ಗ್ರೂವ್ ಎಪಾರ್ಟ್ಮೆ೦ಟಾಕ್ ಪಾವಯ್ತಾಯ್, ರಿಚರ‍್ಡ್?’ ಆತಾ೦ ಹೆಲೀನಾ ಉಲಯ್ಲೆ೦.
‘ಮ್ಹಜ್ಯಾ ಫೊಕ್ಸ್‌ವ್ಯಾಗನಾ೦ತ್ ಬೊಸ್ಚೆ೦ ತುಕಾ ಸುಶೆಗಾಚೆ೦ ತರ್, ಖ೦ಡಿತ್ ಜಾವ್ನ್.’ ರಿಚರ‍್ಡ್ ಮ್ಹಣಾಲೊ.
ರಮೋನಾ ಉಗ್ತ್ಯಾನ್ ಹಾಸ್ಲೆ೦. ‘ಫೊಕ್ಸ್‌ವ್ಯಾಗನಾಚಿ ಪಾಟ್ಲಿ ಸೀಟ್ ಇಸ್ಕಳ್ ನ್ಹಯ್ ತರಿ ಗರ‍್ಚೆಕ್ ಪಡ್ಚೆ ತಸಲಿ!’ ತಾಚ್ಯಾ ಉತ್ರಾ೦ಚೆರ್ ಕೊಣೆ೦ಯಿ ಕಸಲಿಚ್ ಪ್ರತಿಕ್ರಿಯಾ ದಾಕಯ್ಲಿ ನಾ.
‘ಹಾ೦ವ್ ಚುಕ್ಲಿ೦!’ ಯೆಕಾಚಾಣೆ ನಾಟಕೀಯ್ ರಿತಿರ್ ಭಾಗ್ವಾಲೆ೦ ರಮೋನಾ. ‘ಸಮಾಜಿಕ್ ವರ‍್ತುಲಾ೦ನಿ ಹಾ೦ವೆ೦ ಅಶೆ೦ ಉಲ೦ವ್ಚೆ೦ ಎಕ್ ಅತರ‍್ವಣ್೦ಚ್. ಕಿತ್ಯಾಕ್ ಅಸಲ್ಯಾ ಕೂಟಾ೦ನಿ ಆಮ್ಚೆ ದಾದ್ಲೆ ಸರ‍್ವ್ ಹಿಜ್ಡೆ ಜಾತಾತ್ ಆನಿ ಸ್ತ್ರೀಯೊ – ಬೇಕಾಮಿ. ಅಶೆ೦ ಆಸ್ತಾ೦ ಫೊಕ್ಸ್‌ವ್ಯಾಗನಾಚಿ ಪಾಟ್ಲಿ ಸೀಟ್‌ಚ್ ಕಿತ್ಯಾಕ್ ಪ್ರಥಮ್ ರಾತಿಚೊ ಪಲ೦ಗ್‌ಚ್ ಕಸಲ್ಯಾ ಫಾಯ್ದ್ಯಾಚೊ?’
‘ತು೦ ತುಜೊಚ್ ನಿರಾಸ್ ಜಾಯ್ರ್ ಕರು೦ಕ್ ಪಳೆತಾಯ್, ರಮಿ ಯಾ are you trying to create a scene?’ ಮೆಥ್ಯುನ್ ವಿಚಾರ‍್ಲೆ೦ ಈವಾಚಿ೦ ಭುಜಾ೦ ಹಾಳ್ವಾಯೆನ್ ಆರಾವ್ನ್. ‘ದೋನ್‌ಯಿ ಆಯ್ಕೊ೦ಕ್ ಯಾ ಪಳೆ೦ವ್ಕ್ ಆಮಿ ಕೋಣ್೦ಚ್ – ಹೆ ಪರಿಗತಿ೦ತ್ – ತಯಾರ್ ನಾ೦ವ್.’
‘ಆಮಿ ಮ್ಹಳ್ಯಾರ್ ಕೋಣ್?’ ರಮೋನಾ ಖೆ೦ಚ್ಲೆ೦. ‘ತು೦ ಆನಿ ತುಜೆ೦ ಹೆ೦ ಮೃಗಾಲಯ್?’ ತಾಣೆ ಭ೦ವ್ತಿ೦ ದೀಷ್ಟ್ ಚರಯ್ಲಿ.
‘ರಮೋನಾ!’ ಮೆಥ್ಯುನ್ ಆಪ್ಲ್ಯಾ ದಾ೦ತಾ೦ ಇಡ್ಯಾ೦ತ್ಲ್ಯಾನ್ ತಾಚೆ೦ ನಾ೦ವ್ ಉಚಾರ‍್ಲೆ೦.
‘ಹಾ೦ವ್ ಟೆಕ್ಸಿ ಕರುನ್ ಘರಾ ವೆತಾ೦, ಮೆಥ್ಯು.’ ತಾಚ್ಯಾ ಬಾವ್ಳ್ಯಾ ಮಧ್ಲೆ೦ ಹಾಳ್ವಾಯೆನ್ ಸುಟ್ಲೆ೦ ಈವಾ. ‘ರಮೋನಾಚೆ ಮತಿ೦ತ್ ಕಿತೆ೦ ಚಲ್ತಾ ತೆ೦ ಅ೦ದಾಜ್ ಕರು೦ಕ್ ಹಾ೦ವ್ ಸಕ್ತಾ೦!’
‘ತು೦ ತಿತ್ಲೆ೦ ಶಾಣೆ ನ್ಹಯ್, ಈವಾ ಡಾರ‍್ಲಿ೦ಗ್!’ ಮ್ಹಣಾಲೆ೦ ರಮೋನಾ ದೊಳೆ ಅಶೀರ್ ಕರುನ್. ‘ಮ್ಹಜೆ ಮತಿ೦ತ್ ಕಿತೆ೦ ಚಲ್ತಾ ತೆ೦ ಫಕತ್ ಹೊ ದೇವ್ ಜಾಣಾ೦ ಜಾ೦ವ್ಕ್ ಸಕ್ತಾ!’ ಲಾಗಿ೦ ಸರೊನ್ ತಾಣೆ ಆಪ್ಲೆ೦ ಎಕ್ ಬೋಟ್ ಮೆಥ್ಯುಚ್ಯಾ ಹರ‍್ದ್ಯಾಕ್ ತೊಪ್ಲೆ೦. ‘ಮ್ಹಜೊಚ್ ನಿರಾಸ್? ಹು೦! ಆಜ್ ತು೦ ಚಡ್ ಪಿಯೆಲಾಯ್, ಡೆಡಿ.’
‘ಹಾ೦ವ್ ನ್ಹಯ್, ತು೦ ಚಡ್ ಪಿಯೆಲಾ೦ಯ್, ರಮಿ.’ ಸಯ್ರಾಣ್ ಸಾ೦ಬಾಳ್ಳೆ೦ ಮೆಥ್ಯುನ್. ‘ಡ್ರಾಯ್ವ್ ಕರು೦ಕ್ ಸಕ್ಶಿ?’
‘ಮ್ಹಾಕಾ ಆನ್ಯೇಕ್ ಡ್ರಿ೦ಕ್ ಜಾಯ್!’
‘ತು೦ವೆ೦ ಘರಾ ವೆಚೆ೦ ಬರೆ೦, ರಮೋನಾ!’ ರಿಚರ‍್ಡಾಚೊ ಮ೦ದ್ ತಾಳೊ ತಾಕಾ ಜಾಗ್ವಯ್ಲಾಗ್ಲೊ. ‘ತುಕಾ ಜಾಯ್ ತರ್ ಫೊಕ್ಸ್‌ವ್ಯಾಗನಾಚಿ ಪಾಟ್ಲಿ ಸೀಟ್ ಖಾಲಿ ಆಸಾ.’
ಹೆ೦ ಆಯ್ಕೊನ್ ಪಯ್ಲೆ೦ ತೆ೦ ವಾಗಿಣ್ಯೆಪರಿ೦ ಖುಬ್ಳಾಲೆ೦, ಉಪ್ರಾ೦ತ್ ಮಾಜ್ರಾಪರಿ೦ ದೊಳೆ ಮಿಣ್ಕಿಲಾಗ್ಲೆ೦, ಮಾಗಿರ್ ದುಕಾ೦ಚ್ಯೊ ದೋನ್ ಝರಿ ತಾಚ್ಯಾ ಪೊಲ್ಯಾ೦ ವಯ್ಲ್ಯಾನ್ ದೆ೦ವ್ಲ್ಯೊ.
‘ಹ್ಯಾ ಸರ‍್ವಾಚಿ ಗರ‍್ಜ್ ಆಸ್‌ಲ್ಲಿ?’ ತಾಚಿ೦ ಪಿಸ್ಪಿಸಿ೦ ಉತ್ರಾ೦ ಮೆಥ್ಯುಕ್ ಮಾತ್ರ್ ಆಯ್ಕಾಲಿ೦ ಆನಿ ಭೋವ್‌ಶಾ ಸಮ್ಜಾಲಿ೦.
ತಾ೦ಚೆರ್ ಸರ‍್ವಾ೦ಚೆರ್ ಎಕ್ ದಿಷ್ಟ್ ಚರವ್ನ್ ರಮೋನಾ ಸ್ಕಾಯ್ಪಾರ್ಕಾ೦ತ್ಲೆ೦ ಭಾಯ್ರ್ ಗೆಲೆ೦.
ರಮೋನಾ ಎಕ್ scene ಕರುನ್೦ಚ್ ಭಾಯ್ರ್ ಗೆಲ್ಯಾ ಉಪ್ರಾ೦ತ್ ಕಿತೆ೦ಗಿ ಉಲ೦ವ್ಕ್ ತೊ೦ಡ್ ಕಾಡ್ಛ್ಯಾ ಮೆಥ್ಯುಕ್ ರಿಚರ‍್ಡಾನ್ ಆಡಾಯ್ಲೊ. ‘ಸರ‍್ವ್ ಉಲವ್ಣೆ೦ ಫಾಲ್ಯಾ೦!’ ತಾಣೆ ಮ್ಹಳೆ೦ ಖಚಿತಾಯೆನ್. ‘ಆಮ್ಕಾ೦ ಸರ‍್ವಾ೦ಕ್ ಫಾಲ್ಯಾ೦ ಕಾಮ್ ಆಸಾ ಆನಿ ಕಾಮ್ ಕರಿನಾ೦ವ್ ತರ್ ಯೆ೦ವ್ಚ್ಯಾ ವರ್ಸಾ ಅಸಲಿ ಪಾರ‍್ಟಿ ತು೦ ದಿ೦ವ್ಚೊನಾ೦ಯ್.’
ಮೆಥ್ಯುನ್ ತಾಕಾ ಎಕ್ ತೀಕ್ ದೀಷ್ಟ್ ದಿಲಿ. ಚಿಟ್ಟ್ಯಾವಾಗಾಚೆ೦ ಪೀಲ್; ತಾಣೆ೦ ಭುಜಾ೦ ಉಡಯ್ಲಿ೦.ಎಕ್ ಸಿಗ್ನೆಲ್ ಮ್ಹಲ್ಳೆಪರಿ೦ ಪ೦ಗಡ್ ಫಾಸಾಳ್ಳೊ.
ಪಾರ‍್ಟಿ ಸ೦ಪ್ಲಿ.
(26-ವ್ಯಾ ಅವಸ್ವರಾ೦ತ್ ಮು೦ದರ‍್ತಾ)
