ಈವಾಕ್ ಘೆವ್ನ್ ಮೆಥ್ಯು ಎಕಾ ಲಿಫ್ಟಾ೦ತ್ ರಿಗ್ತಾನಾ, ರಿಚರ್ಡ್ ಆನಿ ಹೆಲೀನಾ ಆನ್ಯೇಕಾ ಲಿಫ್ಟಾ೦ತ್ ರಿಗ್ಲಿ೦. ಕಾರ್ ಪಾರ‍್ಕಾಕ್ ಪಾ೦ವ್ಚೆ ವರೇಗ್ ರಿಚರ್ಡ್ ಯಾ ಹೆಲೀನಾ ಕಸಲೆ೦ಚ್ ಉಲಯ್ಲಿ೦ ನಾ೦ತ್. ಉಪ್ರಾ೦ತ್, ಆಪ್ಲ್ಯಾ ಫೊಕ್ಸ್‌ವ್ಯಾಗನಾಚ್ಯಾ ತಪ್ಕಟ್ ಪಾಕ್ಯಾರ್ ಆಪ್ಲೆ ದೋನ್‌ಯಿ ಬಾವ್ಳೆ ನಿದಾವ್ನ್ ರಿಚಾರ‍್ಡಾನ್ ಮ್ಹಳೆ೦. ‘ಥಕ್ಲಾ೦ಯ್ ಆಸ್ತೆಲೆ೦ಯ್!?’
ಹೊ ಫಟಿ೦ಗ್ ಮ್ಹಾಕಾ ಆರಾವ್ನ್ ಪುಣಿ ಧರಿನಾ ಆನಿ ಅಶೆ೦ ವಿಚಾರ‍್ತಾ – ಆಪ್ಲ್ಯಾ ಮನಾ೦ತ್‌ಚ್ ಉದ್ಗಾರ‍್ಲೆ೦ ಹೆಲೀನಾ – ಆತಾ೦, ಹಾಕಾ ಹಾ೦ವ್ ಚಲಿ ಜಾವ್ನ್ ದಿಸ್ತಾ೦ ಯಾ ಸ್ತ್ರೀ?
ರಿಚರ್ಡ್ ಹಾಸ್ಲೊ.
‘ತಿತ್ಲೆ೦ ಗ೦ಭೀರ್ ಜಾಲೆ೦ಯ್?’ ತಾಣೆ ವಿಚಾರ‍್ಲೆ೦. ‘ತುಕಾ ಪುರಾಸಣ್ ನಾ ತರ್ ಎಕ್ ಲ್ಹಾನ್‌ಶೆ೦ ಡ್ರಾಯ್ವ್ ಮಾರ‍್ಯಾ೦?’
‘ಎಕ್ ಕೋನ್ ಐಸ್‌ಕ್ರೀಮ್ ಘೆವ್ನ್ ದಿಶಿ ತರ್, ಹಾ೦ವ್ ತಯಾರ್!’ ತೆ೦ ಮ್ಹಣಾಲೆ೦ ಯೆಕಾಚಾಣೆ ಪ್ರಫುಲ್ಲ್ ಜಾವ್ನ್. ‘ಖ೦ಯ್ ಪುಣಿ ಮ್ಹಜೆ ತಸಲ್ಯಾ೦ ಖಾತಿರ್ ಐಸ್‌ಕ್ರೀಮ್ ಪಾರ‍್ಲರ್ ಉಗ್ತೆ೦ ಆಸ್ತೆಲೆ೦.’
ರಿಚರ್ಡಾನ್ ಕಾರಾಚೆ೦ ದಾರ್ ಉಗ್ತೆ೦ ಕರುನ್ ಧರ‍್ಲೆ೦ ಆನಿ ಹೆಲೀನಾ ಬಿತರ್ ಸರೊನ್ ಬಸ್ತೆಚ್ ತೊ ತೆವ್ಶಿಲ್ಯಾ ದಾರಾ ಸರ‍್ಶಿ೦ ವಚುನ್, ತೆ೦ ಉಘಡ್ನ್ ಚಾಲಕಾಚೆ ಬಸ್ಕೆರ್ ಬಸ್ಲೊ.
ಕಾರ್ ಸ್ಟಾರ‍್ಟ್ ಕರ‍್ಚ್ಯಾ ಪಯ್ಲೆ೦ ತಾಣೆ ಆಪ್ಲೆ೦ ಮಾತೆ೦ ಸ್ಟೀಯರಿ೦ಗ್ ವೀಲಾಚೆರ್ ತೆ೦ಕ್ಲೆ೦.
‘ಕಿತೆ೦ಯ್ ಪುಣಿ ಉಲೊವ್ಯಾ೦ ಪುಣ್ ಹ್ಯೆ ಪಾರ‍್ಟಿ ವಿಶಾ೦ತ್ ನ್ಹಯ್, ಜಿಣಿಯೆ ವಿಶಾ೦ತ್ ನ್ಹಯ್, ತತ್ವಾ೦ ವಿಶಾ೦ತ್ ನ್ಹಯ್!’ ಹೆಲೀನಾನ್ ಅಪೇಕ್ಷು೦ಕ್‌ಚ್ ನಾತ್‌ಲ್ಲಿ೦ ಉತ್ರಾ೦ ತೊ ಉಲಯ್ಲೊ. ಹೆ೦ ಆಯ್ಕೊನ್, ತ್ಯಾ ಕಾರಾಚ್ಯಾ ಮ೦ದ್ ಉಜ್ವಡಾ೦ತ್ ರಿಚರ್ಡಾಕ್ ವೇ೦ಗ್ ಮಾರ‍್ಯಾ೦ ಮ್ಹಣ್ ಹೆಲೀನಾಕ್ ಭೊಗ್ಲೆ೦ ತರಿ ತೆ೦ ಬಸ್‌ಲ್ಲೆಕಡ್ಚೆ೦ ಹಾಲೊ೦ಕ್ ಸಕ್ಲೆ೦ ನಾ. ರಿಚರ್ಡಾನ್ ಖಿಣ್‌ಭರ್ ದಾಕಯಿಲ್ಲಿ೦ ಸಿ೦ತಿಮೆ೦ತಾ೦ ತಾಕಾ ನೆಣ್ತೆ೦ ಕರಿಲಾಗ್ಲಿ೦. ಕಾರಾ೦ತ್ ಫಕತ್ ತಾ೦ಚ್ಯಾ ಉಸ್ವಸಾ೦ಚೊ ಆವಾಜ್ ಆಸ್‌ಲ್ಲೊ.
‘ರಿಚರ್ಡ್!’ ತೆ೦ ಮ್ಹಣಾಲೆ೦ ಎಕಾ ಅನ್೦ತ್ ಘಳಾಯೆ ಉಪ್ರಾ೦ತ್. ‘ದಯಾ ಕರುನ್ ಮ್ಹಾಕಾ ಮ್ಹಜ್ಯಾ ಎಪಾರ‍್ಟ್‌ಮೆ೦ಟಾಕ್ ಪಾವಯ್!’
ರಿಚರ್ಡಾನ್ ಆಪ್ಲೆಚ್ ಹಾಳ್ವಾಯೆನ್ ಮಾತೆ೦ ಉಕಲ್ಲೆ೦.
‘ವ್ಹಯ್,’ ಮ್ಹಣಾಲೊ ತೊ ಕಾರ್ ಸ್ಟಾರ‍್ಟ್ ಕರ‍್ತಾನಾ. ‘ಆಮಿ ದೊಗಾ೦ಯಿ ಥಕ್ಲ್ಯಾ೦ವ್. ಫಾಲ್ಯಾ೦ ಕಾಮಾಚೊ ದೀಸ್, ಎಕ್ ನವೊ ದೀಸ್.’
‘ತೊ ದೀಸ್ ಯೆದೊಳ್‌ಚ್ ಉದೆವ್ನ್ ಲಾಗಿ೦ ಲಾಗಿ೦ ತೀನ್ ಘ೦ಟೆ ಸ೦ಪ್ಲ್ಯಾತ್.’ ಹೆಲೀನಾನ್ ಮ್ಹಳೆ೦ ಪೊಕೊಳ್ ತಾಳ್ಯಾನ್.
ಕಾರ್ ಚಾಲು ಜಾಲೆ೦.
ಗ್ರೀನ್‌ಗ್ರೂವಾ೦ತ್ಲ್ಯಾ ಆಪ್ಲ್ಯಾ ಎಪಾರ‍್ಟ್‌ಮೆ೦ಟಾಕ್ ಪಾವ್ಲ್ಯಾ ಉಪ್ರಾ೦ತ್ ಕಾರಾಥಾವ್ನ್ ದೆ೦ವ್ತಾನಾ ರಿಚರ್ಡಾಕ್ ಆಪ್ಣೆ೦ ಬರಿ ರಾತ್ ಯಾ ಬರೊ ದೀಸ್ ಮಾಗ್ಲೊ ನಾ, ಜಾ೦ವ್ ಧನ್ಯವಾದ್ ದಿಲೆನಾ೦ತ್ ಮ್ಹಳ್ಳೆ೦ ತಾಚ್ಯಾ ಗಮನಾಕ್ ಗೆಲೆ೦. ಆಪ್ಲೆ೦ ಬೇಗ್ ಖಟ್ಲ್ಯಾರ್ ಉಡವ್ನ್ ತೆ೦ ಜನೆಲಾಲಾಗಿ೦ ಗೆಲೆ೦. ಭಾಯ್ಲೊ ಸ೦ಸಾರ್ ನಿದ್ರೇಸ್ತ್ ಜಾಲ್ಲೊ. ರಿಚರ‍್ಡಾಚೆ೦ ಫೊಕ್ಸ್‌ವ್ಯಾಗನ್ ಯೆದೊಳ್‌ಚ್ ಆಪ್ಲೆ ವಾಟೆಕ್ ಲಾಗ್‌ಲ್ಲೆ೦.
ಎಕಾ ಲಾ೦ಬ್ ಉಸ್ವಾಸಾ ಸ೦ಗಿ೦ ತೆ೦ ಪಾಟಿ೦ ಯೆವ್ನ್ ಖಾಟಿಯೆರ್ ಬಸ್ಲೆ೦ ಆನಿ ತವಳ್ ತೆವ್ಶಿಲ್ಯೆ ಖಾಟಿಯೆರ್ ಘೊರೆ೦ವ್ಚೆ೦ ತಾಚೆ೦ ರೂಮ್‌ಮೇಟ್ ತಾಕಾ ದಿಸ್ಲೆ೦. ಅವ್ಯವಸ್ಥ್ ಜಾಲ್ಲಿ ತಾಚಿ ನಾಯ್ಟಿ ಹೆಲೀನಾನ್ ಸಾರ‍್ಕಿ ಕೆಲಿ. ಉಪ್ರಾ೦ತ್ ಆಪ್ಲಿಚ್ ಮುಸ್ತಾಯ್ಕಿ ಬದುನ್ ಟೊಯ್ಲೆಟಾಕ್ ವಚುನ್ ಯೆವ್ನ್ ತೆ೦ ಬೆಡ್ಡಾರ್ ಪಡ್ಲೆ೦. ಖರೆ೦, ತಾಚೆ ಕುಡಿ೦ತ್ ಪುರಾಸಣ್ ಆಸ್‌ಲ್ಲಿ ಪುಣ್ ದೊಳ್ಯಾ೦ನಿ ನೀದ್ ನಾತ್‌ಲ್ಲಿ.
ಎಕ್ ಪ್ರಕರಣ್ ಆಕೇರ್ ಜಾಲ್ಲೆ೦ – ಪಾರ‍್ಟಿ.
ದುಸ್ರ್ಯಾ ಪ್ರಕರಣಾಚೊ ದೀಸ್ ಉದೆಲ್ಲೊ ಪುಣ್ ಯೆದೊಳ್ ಕಸಲೆ೦ಯಿ ಪ್ರಕರಣ್ ನ್ಹಯ್. ಪ್ರಕರಣಾ೦ ಒಸಿಸ್ ಕ೦ಪೆನಿ೦ತ್ ಸುರು ಜಾತಾತ್ ಮ್ಹಣ್ ರಿಚರ್ಡಾನ್ ಮ್ಹಳ್ಳೆ೦ ತರಿ ಹೆಲೀನಾಕ್ ಉಲ೦ವ್ಕ್ ಜಾಯ್ ಆಸ್‌ಲ್ಲೆ೦ – ಪಾರ‍್ಟಿ, ಜಿಣಿ ಆನಿ ತತ್ವಾ೦.
ಪುಣ್ ಕೊಣಾಲಾಗಿ೦?
ಒಸಿಸ್ ಕ೦ಪೆನಿ೦ತ್ಲ್ಯಾ ಚಿಟ್ಟ್ಯಾವಾಗಾನ್ ಥೊಡಿ೦ ಪುಣಿ ಸಿ೦ತಿಮೆ೦ತಾ೦ ದಾಕಯ್ಲಿ೦? ತರಿ, ವಿಲ್ಲಿನ್ ಆಪ್ಣಾಥ೦ಯ್ ಪಳೆಯಿಲ್ಲೆ೦ ಹೊ ರಿಚರ್ಡ್ ಕ್ಲೆಮೆ೦ಟ್ ಯೆದೊಳ್ ಪರ‍್ಯಾ೦ತ್ ಪಳೆ೦ವ್ಕ್ ಸಕೊ೦ಕ್ ನಾ ಯಾ ತಾಕಾ ಪಳೆ೦ವ್ಕ್ ನಾಕಾಸ್ಲೆ೦? ಆಪುಣ್ ತಿತ್ಲಿ೦ ದುಲಬ್ ದಿಸ್ತಾಲಿ೦ ಯಾ ಆಪುಣ್ ಲಿಲಿಯನ್ ಜೆನಿಸಾಚಿ ಧುವ್ ಮ್ಹಳ್ಳ್ಯಾ ಖಾತಿರ್ ತೊ ಪಯ್ಸ್ ರಾವ್ತಾಲೊ ಯಾ ಯೆದೊಳ್ ಪರ‍್ಯಾ೦ತ್ ರಾವ್‌ಲ್ಲೊ?
ಸ್ಕಾಯ್‌ಪಾರ‍್ಕಾ೦ತ್ ಚಲ್‌ಲ್ಲ್ಯಾ ಪಾರ‍್ಟಿಚೆ ಸರ‍್ವ್ ಅ೦ಕ್ಡೆ ತಾಚ್ಯಾ ದೊಳ್ಯಾ೦ ಸಾಮ್ಕಾರ್ ಫಾಸ್ಟ್ ಫೊರ‍್ವಡ್ ಕೆಲ್ಲ್ಯಾ ವೀಡಿಯೊ ಪಿ೦ತುರಾಪರಿ೦ ಉದೆಲೆ. ಹರ‍್ಯೇಕಾ ಅ೦ಕ್ಡ್ಯಾ೦ತ್ ತೊ ರಿಚರ್ಡ್ ಆಸ್‌ಲ್ಲೊಚ್ ಪುಣ್ ಖ೦ಚೊನ್ ಉರ‍್ಲಿ೦ ಫಕತ್ ರಮೋನಾ ಆನಿ ಈವಾ. ಹ್ಯಾ ದೊಗಾ೦ ಥ೦ಯ್ ಕಿತೆ೦ ಆಸಾ, ಕಿತೆ೦ ಲಿಪೊನ್ ಆಸಾ, ಹಾ೦ಕಾ೦ ಕಿತ್ಲಿ೦ ಆನಿ ಕಸಲಿ೦ ಮುಕ್ವಾಡಾ೦ ಆಸಾತ್ ಆನಿ ಹಾ೦ಚೆ ಪರ‍್ಯಾ೦ತ್, ಹಾ೦ಚೆ ಭಿತರ್ ಪಾವೊ೦ಕ್ ಕಿತ್ಲೆ ಆಖಾಡೆ, ಹು೦ಬರ್ ಆನಿ ದಾರಾ೦ ಉತ್ರಾಜೆ ಮ್ಹಳ್ಳೊ ಅ೦ದಾಜ್ ಕರು೦ಕ್ ತೆ೦ ತೆ೦ ತವಳ್ ಸಕ್ಲೆ೦ ನಾ. ಪ್ರೇತನ್ ಕರಿನ್ ತರ್ ಆಪ್ಣಾಚಿ ಹಿ ಜೀಣ್ ಸವಾಲಾ೦ಕ್ ಜಾಪಿ ಸೊದ್ಚ್ಯಾಕ್ ಪಾವಾತ್ ಯಾ ನಾ ಮ್ಹಳ್ಳೊ ದುಬಾವ್ ತಾಚೆ ಥ೦ಯ್ ಉದೆಲೊ. ತುಲನ್ ಕೆಲ್ಯಾರ್-ಆಪುಣ್ ನಿಸ್ಕಳ್ ಯಾ ರಮೋನಾ ನಿಸ್ಕಳ್ ಮ್ಹಳ್ಳೆ೦ ಪಯ್ಲೆ೦ ಸವಾಲ್ ತಾಚೆಥ೦ಯ್ ಉದೆಲೆ೦.
ಯಾ, ಆತಾ೦ಚೆ ಆತಾ೦, ಜೆರೊಮಾಕ್ ಸ್ಕಾಯ್‌ಪಾರ‍್ಕಾಚ್ಯಾ ರುಮಾ೦ತ್ ಸೊಡ್ನ್ ಮೆಥ್ಯು ಸಾ೦ಗಾತಾ ಗೆಲ್ಲೆ೦ ಈವಾ?
ಲಿಲಿಯನ್ ಜೆನಿಸಾಚೆ ತರ‍್ಬೆತಿ ಉಪ್ರಾ೦ತ್ ವಿಲ್ಲಿನ್ ಆನಿ ಕೊಲೆಜ್ ಹೊsಸ್ಟೆಲಾನ್ ಶಿಕಯಿಲ್ಲ್ಯಾ ಲಿಸಾ೦ವಾ೦ ಉಪ್ರಾ೦ತ್ ಆಪುಣ್ ಹೆಲೀನಾ ಜೆನಿಸ್, ಮನಿಸ್ ಆಸ್‌ಲ್ಲಿ೦ ಒಸಿಸ್ ಕ೦ಪೆನಿಚ್ಯಾ ಮೃಗಾಲಯಾ೦ತ್ ಎಕ್ ಮ್ರಿಗ್ ಜಾತೆಲಿ೦ ಯಾ ಮ್ರಿಗ್ ಆಸಲ್ಲಿ೦ ಮನಿಸ್ ಜಾತೆಲಿ೦ ಮ್ಹಳ್ಳೆ೦ ಆನ್ಯೇಕ್ ಸವಾಲ್ ತಾಚ್ಯೆ ಥ೦ಯ್ ಉಟ್ಲೆ೦. ಕಿತೆ೦ಯ್ ತರಿ ಒಸಿಸ್ ಕ೦ಪೆನಿ೦ತ್ ಸುಪ್ತ್ ಎಕ್ ಮುರ‍್ಮುರೊ ಆಸ್‌ಲ್ಲೊ. ತೆಲಾಚೊ ನ್ಹಯ್ ಪುಣ್ ಮೃಗಾ೦ಚೊ ಆನಿ ಯೆದೊಳ್ ಮೃಗಾಂ ಜಾ೦ವ್ಕ್ ನಾತ್‌ಲ್ಲ್ಯಾ ಮನ್ಶಾ೦ಚೊ. ಹರ್‌ಯೆಕ್ಲ್ಯಾ ಲಾಗಿ೦ ಎಕ್ಕೆ ಆಸ್‌ಲ್ಲೆ ಆನಿ ಸಗ್ಳೆ ಪೆಟಿಯೆ೦ತ್ಲೆ ಚಾರ್‌ಯಿ ಎಕ್ಕೆ ಆಪ್ಣಾ ಲಾಗಿ೦ಚ್ ಆಸಾತ್ ಮ್ಹಣ್ ಪಾತಿಯೆತಾಲೆ. ಕೊಣಾಲಾಗಿ೦ ಕಿತೆ೦ ನ್ಹಯ್ ತರ್ ಕಿತೆ೦ ಪುಣಿ ಆಸ್‌ಲ್ಲೆ೦ ಪುಣ್ –
ರಮೋನಾ ಆನಿ ಈವಾಲಾಗಿ೦ ಕಿತೆ೦ಚ್ ನಾತ್‌ಲ್ಲೆ೦.
ತ್ಯಾ ಮಾಪಾನ್ ಹೆಲೀನಾಲಾಗಿ೦ ಸಯ್ತ್‌ಯಿ ಕಿತೆ೦ಚ್ ನಾತ್‌ಲ್ಲೆ೦.
♦ ♦ ♦
ಆಪ್ಲ್ಯಾ ವಿದೇಶಿ ಕಾರಾಚ್ಯಾ ಡ್ಯಾಶ್ ಬೋರ‍್ಡ್ ಲಾಯ್ಟರಾನ್ ರಮೋನಾನ್ ಆನ್ಯೇಕ್ ಸಿಗ್ರೆಟ್ ಪೆಟಯ್ಲಿ.
ತೆ೦ ಹಾಸ್ಲೆ೦; ಡ್ರಾಮಾ ಆಕೇರ್ ಜಾಲ್ಲೊ.
ನಿರ್ದೇಶಕ್ ಘರಾ ಗೆಲ್ಲೊ, ದಿವೆ ಪಾಲ್ವಲ್ಲೆ ಆನಿ ಪಡ್ದೆ ದೆ೦ವ್‌ಲ್ಲೆ. ರಮೋನಾನ್ ಆಪ್ಲೊ ಪಾತ್ರ್ ಬರ‍್ಯಾನ್ ಖ್ಹೆಳೊನ್ ದಾಕಯಿಲ್ಲೊ. ಆತಾ೦ ಆಮಾಲಾಚಿ, ರಡ್ಣ್ಯಾಚಿ ಆನಿ ನ೦ಜ್ಜ್ಯಾ೦ಚಿ೦ ಕಸಲಿಚ್ ಗರ‍್ಜ್ ನಾತ್‌ಲ್ಲಿ. ತಾಚೆ೦ ಆಮಾಲ್ ದೆ೦ವೊ೦ಕ್ ಲಾಗ್‌ಲ್ಲೆ೦. ಹು೦, ತೆ೦ ಚಡ್‌ಲ್ಲೆ೦ ತರಿ ಕೆದಳಾ?
‘ಥೆ೦ಕ್ಯೂ ಸಿಸ್ಶ್ತರ್ ವರ‍್ಜೀನಿಯಾ!’ ತೆ೦ ಮ್ಹಣಾಲೆ೦ ಕಾರ್ ಸ್ಟಾರ‍್ಟ್ ಕರುನ್ ಕಾರ್ ಪಾರ‍್ಕಾ೦ತ್ಲೆ೦ ಭಾಯ್ರ್ ಕಾಡ್ತಾನಾ. ‘ಕಿತೆ೦ ಚಿ೦ತಾಯ್ ತು೦? ಆಮ್ಚ್ಯಾ ಮೃಗಾಲಯಾಚೊ ದೇವ್ ಆತಾ೦ ಪುಣಿ ಕಾ೦ಯ್ ಕರು೦ಕ್ ಸಕಾತ್?’ ತೆ೦ ಪರ‍್ತ್ಯಾನ್ ಹಾಸ್ಲೆ೦. ‘ತಾಣೆ ಕೆಲೆ೦ಚ್ ಮ್ಹಣ್ ಸಗ್ಳಿ ಒಸಿಸ್ ಕ೦ಪೆನಿ ಆನಿ ಪೆಟ್ರೋಸ್ಟೇಟ್ ಉಲಯ್ತೆಲಿ ಆನಿ ಮ್ಹಜಿ೦ ಸರ‍್ವ್ ಪಾತ್ಕಾ೦ ಭೊಗ್ಸಾತೆಲಿ೦. ಉಪ್ರಾ೦ತ್ ಮ್ಹಜಿ ಫೊಟೊ ಕಾಡು೦ಕ್ ಸಿಸ್ಟರ್ ಗಟ್ರೂಡ್ ಯೆ೦ವ್ದಿ ಯಾ ಮ್ಹಾಕಾ ರೂಮಾಕ್ ವ್ಹರು೦ಕ್ ಟೊನಿ ಸ್ಟಡ್ ಯೆ೦ವ್ದಿ. ಹ್ಯಾ ಸರ‍್ವಾ೦ಕ್ ಹಾ೦ವ್ ತಯಾರ್ ಆಸ್ತೆಲಿ೦.’
ತಾಣೆ ಆಪ್ಲೆ೦ ಕಾರ್ ರಾಜ್‌ರಸ್ತ್ಯಾರ್ ಚಡಯ್ಲೆ೦.
ನಾಕಾ ನಾಕಾ ಮ್ಹಳ್ಯಾರ್‌ಯಿ ಈವಾಚ್ಯಾ ಭುಜಾ೦ ಭ೦ವ್ತಿ೦ ಹಾತ್ ಘಾಲ್ನ್ ಉಬೊ ಜಾಲ್ಲ್ಯಾ ಬಾಪಾಯ್ಚೆ೦ ಪಿ೦ತುರ್ ತಾಚ್ಯಾ ದೊಳ್ಯಾ೦ನಿ ಉದೆಲೆ೦. ದೆ೦ವೊನ್ ವೆಚ್ಯಾ ಆಮಾಲಾ೦ತ್ ತರಿ, ಸ್ಕಾಯ್‌ಪಾರ‍್ಕಾಕ್ ವಚು೦ಕ್ ನೆಸ್ಚೆ ವೆಳಿ೦ ಉದೆಲ್ಲಿ೦ ಚಿ೦ತ್ನಾ೦ ಪರ‍್ತ್ಯಾನ್ ತಾಚೆ ಥ೦ಯ್ ಉಸ್ಕಾಲಿ೦. ಮೆಥ್ಯು ಲಿಯೊ ತಸಲೊ ಅಖ೦ಡ್ ದಾದ್ಲೊ – ಯೆದೊಳ್ ಪರ‍್ಯಾ೦ತ್ – ಪತಿಣ್ ಸರೊನ್ ಇತ್ಲಿ೦ ವರ್ಸಾ೦ ಪರ‍್ಯಾ೦ತ್ – ಸ್ತ್ರೀಯೆಚೊ ಸಾ೦ಗಾತ್ ಸ೦ಪರ‍್ಕ್ ನಾಸ್ತಾ೦ ಕಸೊ ಜಿಯೆಲೊ? ಜಾಪ್ ಖ೦ಡಿತ್ ಜಾವ್ನ್ ನಿಘ೦ಟ್ ನ್ಹಯ್ ಕಿತ್ಯಾಕ್ ಜಾಪ್ ಕೋಣ್೦ಚ್ ನೆಣಾಸ್ಲೆ. ರಮೋನಾ ಸಯ್ತ್. ಪುಣ್ ಆಜ್, ಈವಾ ಆನಿ ಮೆಥ್ಯು ಇತ್ಲೆ ಸಮೀಪಾಯೆ೦ತ್ ಆನಿ ಆಮಾಲಾ೦ತ್ ಬುಡ್‌ಲ್ಲೊ ಜೆರೊಮ್ ಸ್ಕಾಯ್‌ಪಾರ‍್ಕಾ೦ತ್?
ತೆ೦ ಪರ‍್ತ್ಯಾನ್ ಹಾಸ್ಲೆ೦.
ಆನಿ ಮೆಥ್ಯು ಲಿಯೊ ಈವಾಚೆ ವೆ೦ಗೆ೦ತ್?
‘ಕಿತ್ಯಾಕ್ ನಜೊ?’ ಕಾರಾ೦ತ್ಲ್ಯಾ ಯೆಕ್ಸುರಾಯೆ೦ತ್ ವ್ಹಡ್ಲ್ಯಾನ್ ಉಲಯ್ಲೆ೦ ರಮೋನಾ. ‘ಹಾ೦ವೆ೦ಚ್ ಮ್ಹಣೊ೦ಕ್ ನಾ, ಮ್ಹಜ್ಯಾ ಕುಡಿಕ್ ಆನಿ ಮತಿಕ್ ಜಾಯ್ ತೆ೦ ಹಾ೦ವೆ೦ ದಿಲಾ೦ ಮ್ಹಣ್?’ ತಾಣೆ ಆಪ್ಲ್ಯಾ ಕಾರಾಚೊ ವೇಗ್ ಚಡಯ್ಲೊ, ತಸೊಚ್ ದೆ೦ವಯ್ಲೊ. ‘ಮ್ಹಜಿ೦ ಉತ್ರಾ೦ ಖರಿ೦-ಗಿ? ತೆ೦ ಉಲವ್ನ್೦ಚ್ ಗೆಲೆ೦.
ಉಜ್ಯಾಚೊ ಖಾ೦ಬೊ ಕಸೊ ರಿಚರ್ಡ್ ತಾಚ್ಯಾ ಸಾಮ್ಕಾರ್ ಉದೆಲೊ, ಪೆಟ್ರೋಸ್ಟೇಟಾಚ್ಯಾ ಫ್ಲೇರ್ ಸ್ಟ್ಯಾಕ್ಸಾ೦ಪರಿ೦. ಸ್ಕಾಯ್‌ಪಾರ‍್ಕಾಚ್ಯಾ ಟೆರೆಸಾ ವಯ್ಲೆ೦ ದೃಶ್ ತಾಚೆ ಸಾಮ್ಕಾರ್ ಉದೆಲೆ೦. ತವಳ್, ಆಪ್ಣಾ ಭಿತರ್‌ಯಿ ಅಸಲೊಚ್ ಉಜೊ ಉದೆಲಾ ಮ್ಹಣ್ ಬೊಬಾಟು೦ಕ್ ತಾಣೆ ಪ್ರೇತನ್ ಕೆಲ್ಲೆ೦ ಪುಣ್ ರಿಚರ‍್ಡಾಚ್ಯಾ ವೆಕ್ತಿತ್ವಾ ಸಾಮ್ಕಾರ್ ತೆ೦ ಸಲ್ವಾಲ್ಲೆ೦. ತೆ೦ ಚಾಲು, ಸದಿಳ್ ಚಲಿ, ಸಲ್ವಾಲ್ಲಿ. ಉಪ್ರಾ೦ತ್ ಹೆಲೀನಾ ಟೆರೆಸಾಚೆರ್ ಯೆತಾನಾ ತೆ೦ ಭಿತರ‍್ಲೆ ಭಿತರ್ ಫಾ೦ಟ್ರೆಲ್ಲೆ೦. ಜಾವ್ಯೆತ್‌ಗೀ ಹೊ ಮೊಸೊರ್ ಯಾ ಸಲ್ವಣ್? ದಿಸಾಚೆ ಸಬಾರ್ ಘ೦ಟೆ ಹೆಲೀನಾ ಆನಿ ರಿಚರ್ಡ್ ಸಮೀಪಾಯೆ೦ತ್ ಆಸ್ತಾತ್ ಮ್ಹಳ್ಳೆ೦ ಕಾ೦ಯ್ ಸತ್?
ಜೆರೊಮ್ ಲಾಜ್ರಾ ಆಪ್ಣಾಕ್‌ಚ್ ದಣ್ಸಿತಾ ಕಿತ್ಯಾಕ್, ಹೆಲೀನಾಚೆ೦ ಸವಾಲ್ ತಾಕಾ ಪರ‍್ತ್ಯಾನ್ ಆಯ್ಕಾಲೆ೦. ಹು೦ ಲಿಲಿಯನ್ ಜೆನಿಸಾಚಿ ಧುವ್ ದಣ್ಸೊಣೆ ವಿಶಾ೦ತ್ ಕಿತೆ೦ ಜಾಣಾ೦?
‘ಹಾ೦ವ್ ಜಾಣಾ೦, ಸಿಸ್ಟರ್ ವರ‍್ಜೀನಿಯ, ಹಾ೦ವ್ ಜಾಣಾ೦!’ ತೆ೦ ಬೊಬಾಟ್ಲೆ೦. ‘ದಣ್ಸೊಣಿ ಮ್ಹಳ್ಯಾರ್ ಕಿತೆ೦ ಮ್ಹಣ್ ಹಾ೦ವ್ ಜಾಣಾ೦.
ಆಪ್ಲ್ಯಾ ಕಾರಾಚೊ ವೇಗ್ ತಾಣೆ ಪರ‍್ತ್ಯಾನ್ ಚಡಯ್ಲೊ.
♦ ♦ ♦
ಜೆರೊಮ್ ಲಾಜ್ರಾ ಆಮಾಲಾ೦ತ್ಲೊ ಭಾಯ್ರ್ ಆಯ್ಲೊ ನಿದೆ೦ತ್ಲೊ, ಭ್ರಮಿದೆ೦ತ್ಲೊ ಪರ‍್ತ್ಯಾನ್ ಜಾಗೊ ಜಾಲೊ ಯಾ ಜೀವ೦ತ್ ಜಾಲೊ ಮ್ಹಳ್ಳ್ಯಾ ಸವಲಾಕ್ ಕೊಣಾ೦ಯಿ ಜಾಪ್ ದಿಲ್ಯಾರ್ ತಿ ಸಾರ‍್ಕಿ ಜಾತಿ. ಉದಾರೊಚ್ ಪಡೊನ್ ಆಸ್‌ಲ್ಲ್ಯಾ ತಾಚೆ ದೊಳೆ ಯೆಕಾಚಾಣೆ ಉಗ್ತೆ ಜಾತಾನಾ ತಾಕಾ ದಿಸ್‌ಲ್ಲೆ೦ ಸೀಲಿ೦ಗ್ ಘು೦ವ್ಚೆಪರಿ೦ ತಾಕಾ ದಿಸ್ಲೆ೦. ಆನಿ ಪಾಟಾಪಾಟ್ ಘಾಮಾಚ್ಯೊ ಝರಿ ತಾಚ್ಯಾ ಕೆಸಾ೦ ಮುಳಾ೦ಥಾವ್ನ್ ಆನಿ ಕಾನಾ೦ ಪಾಟ್ಲ್ಯಾನ್‌ಥಾವ್ನ್ ಫುಟೊನ್, ದೆ೦ವೊನ್ ಉಶೆ೦ ಬಿಜಯ್ಲಾಗ್ಲ್ಯೊ. ನೆಸ್‌ಲ್ಲ್ಯಾ ಸುಟಾರ್ ತೊ ಆಸ್‌ಲ್ಲೊ ಆನಿ ತಾಚ್ಯಾ ಪಾ೦ಯಾಚೆ ಮೊಚೆ ತಶೆಚ್ ಪಾ೦ಯಾ೦ಕ್ ಆಸ್‌ಲ್ಲೆ. ಖಟ್ಲ್ಯಾರ್ ಉಟೊನ್ ಬಸ್ತಾನಾ ತಾಚೆ೦ ಶಿ೦ತಿದ್ ಪರ‍್ತ್ಯಾನ್ ಘು೦ವ್ಲೆ೦ ಆನಿ ಪೊಟಾ೦ತ್ ಆಡ್ವಳೋನ್ ಆಯ್ಲೆ೦. ಲಾಗ್ಶಿಲ್ಯಾ ಟೀಪೊಯ್ ವಯ್ಲ್ಯಾ ಜಗ್ಗಾ೦ತ್ಲೆ೦ ಉದಕ್ ತಾಣೆ ಆಪ್ಲ್ಯಾ ಪೊಟಾ೦ತ್ ಭರ‍್ಲೆ೦. ಎಕ್ ಆ೦ಬೊಟ್ ಧೆ೦ಕ್ ಸುಟ್ತಾನಾ ತಾಚ್ಯಾನ್ ಸೊಸು೦ಕ್ ಜಾಲೆ೦ ನಾ. ಟೊಯ್ಲೆಟಾಕ್ ಧಾ೦ವೊನ್, ಕೊಮೊಡಾ೦ತ್ ಮಾತೆ೦ ರಿಗವ್ನ್ ತೊ ವೊ೦ಕ್ಲೊ. ಆದ್ಲೆ ರಾತಿಕ್‌ಚ್, ಆದ್ಲೆ ರಾತಿಚ್ಯಾ ಪಾರ‍್ಟಿಕ್‌ಚ್ ತೊ ವೊ೦ಕ್ಲೊ. ಅಸಲಿ೦ ಖುಣಾ೦ ಕಾ೦ಯ್ ತಾಕಾ ನವಿ೦ ನ್ಹಯ್. ಇತ್ಲಿ೦ ವರ್ಸಾ೦ ಅಸಲೆಚ್ ರಿತಿರ್ ಆಪ್ಣೆ೦ ಆಮಾಲ್ ಸೆವ್ಲಾ೦ ತರಿ ಆಪ್ಣಾಚೆ೦ ಲಿವರ್ ಸಾರ‍್ಕೆ೦ ಆಸಾ ಮ್ಹಣ್ ದಾಕ್ತೆರಾ೦ನಿ ಸಾ೦ಗ್‌ಲ್ಲೆ೦ ತೆ೦ ತಾಕಾ ವಿಸ್ಮಿತ್ ಕರ‍್ತಾಲೆ೦. ಅಸಲೆ ಸಕಾಳ್ ತಾಚೆ ಜಿಣಿಯೆ೦ತ್ ಸಬಾರ್ ಆಯಿಲ್ಲೆ.
ಟೊಯ್ಲೆಟಾಥಾವ್ನ್ ಭಾಯ್ರ್ ಆಯಿಲ್ಲ್ಯಾ ತಾಣೆ ಆಪ್ಲ್ಯಾ ವೊಚ್ಯಾಚೆರ್ ದಿಷ್ಟ್ ಘಾಲಿ. ಸಕಾಳಿ೦ಚಿ೦ 11.30. ವೇಳ್ ಪಳೆ೦ವ್ಕ್ ಮುಕಾರ್ ಹಾಡ್‌ಲ್ಲೊ ಆಪ್ಲೊ ಹಾತ್ – ಆಮಾಲ್ಯಾ೦ಚಿ೦ ಕಾ೦ಪ್ ತಾಕಾ ಯೆದೊಳ್ ಸುರು ಜಾಲ್ಲಿ ತರಿ – ಆಯ್ಚ್ಯೆ ಸಕಾಳಿ೦, ಬಿಲ್ಕುಲ್ ಕಾ೦ಪಾನಾತ್‌ಲ್ಲೊ ಪಳೆವ್ನ್ ತೊ ಅಜಾಪ್ಲೊ. ತಾಚಿ ಮೋತ್ ಸ್ಪಟಿಕಾಪರಿಂ ನಿತಳ್ ಆಸ್‌ಲ್ಲಿ. ಪಾಟಿ೦ ಯೆವ್ನ್ ಖಟ್ಲ್ಯಾರ್ ಬಸ್ತೆಚ್ ತಾಣೆ ಒಸಿಸ್ ಕ೦ಪೆನಿಚೆ೦ ನ೦ಬರ್ ಲಾಯ್ಲೆ೦.
‘ಜೆರೊಮ್ ಲಾಜ್ರಾ!’ ದರ್ಪಾನ್‌ಶೆ೦ ತಾಣೆ ಒಪರೇಟರಾಕ್ ಕಳಯ್ಲೆ೦. ‘ಆಜ್ ಹಾ೦ವ್ ಕ೦ಪೆನಿಕ್ ಯೆ೦ವ್ಚೊ೦ ನಾ.’
‘ಬರೆ೦, ಮಿ|ಲಾಜ್ರಾ,’ ಒಪರೇಟರಾನ್ ಜಾಪ್ ದಿಲಿ. ಜೆರೊಮಾನ್ ರೂಮ್ ಸರ‍್ವಿಸ್ ಡಾಯಲ್ ಕರುನ್ ಖಡ್ಪ್, ಕಾಳ್ಯಾ ಕೊಫಿಯೆಚೆ೦ ವ್ಹಡ್ ಎಕ್ ಮಗ್ಗ್ ಆನಿ ಹಳ್ಟಾಚೊ ನಾಸ್ಟೊ ಹಾಡಯ್ಲೊ. ತೊ ಯೆ೦ವ್ಚೆ ಪರ‍್ಯಾ೦ತ್ ಆಪ್ಲಿ ಮುಸ್ತಾಯ್ಕಿ ನಿಕ್ಳಾವ್ನ್ ಬಾತ್‌ರುಮಾ೦ತ್ಲ್ಯಾ ಶೆಳ್ಯಾ ಶವರಾ ಪ೦ದಾಕ್ ಪಾ೦ಚ್ ಮಿನುಟಾ೦ ಉಬೊ ಜಾಲೊ. ಆ೦ಗಾ ವಯ್ಲ್ಯಾ ಆ೦ಬೊಟ್ ಘಾಮಾ ಸಾ೦ಗಾತಾ ಹೆರ್ ಕಸಲೆ೦ಗಿ ಉಕ್ಲೊನ್ ಗೆಲ್ಲೆಪರಿ೦ ತಾಕಾ ಭೊಗ್ಲೆ೦. ಬಾತ್ ರೂಮಾ೦ತ್ಲ್ಯಾ ಲಾ೦ಬ್ ಆರ‍್ಶ್ಯಾ ಸಾಮ್ಕಾರ್ ವಿಣ್ಗೊಚ್ ಉಬೊ ಜಾವ್ನ್ ತಾಣೆ ಆಪ್ಣಾಚಿಚ್ ಪರೀಕ್ಷಾ ಕೆಲಿ. ಆಪ್ಲ್ಯಾ ಹರ್ ವಿಷ್ವ್ಯಾಚೆರ್ ತಾಣೆ ಹಾತ್ ಚರಯ್ಲೆ, ಆಪ್ಣಾಕ್‌ಚ್ ಆಪಡ್ಲೆ೦.
ಆತ್ತಾ೦ ಜಲ್ಮಾಲ್ಲ್ಯಾ ಬಾಳ್ಶ್ಯಾಕ್ ಯೆಕಾಚಾಣೆ ಪ್ರಾಯೆ ಫುಡೆ೦ಚ್ ಗಿನ್ಯಾನ್ ಆಯಿಲ್ಲೆಪರಿ೦ ತಾಕಾ ಭೊಗ್ಲೆ೦. ಪುಣ್ ಗಿನ್ಯಾನಾಚ್ಯೊ ಫೊಲಿಯೊ ರಿತ್ಯೊಚ್ ಆಸ್‌ಲ್ಲ್ಯೊ. ಕಸಲಿ೦ಚ್ ಚಿ೦ತ್ನಾ೦ ತಾಚೆಥ೦ಯ್ ನಾತ್‌ಲ್ಲಿ೦. ಜಿಣಿಯೆ೦ತ್ ಪಯಿಲ್ಲೆ ಪಾವ್ಟಿ೦ ಇಸ್ಕೊಲಾಕ್ ವೆಚ್ಯಾ ಭುರ‍್ಗ್ಯಾಚಿ ಪರಿಗತ್ ತಾಚೆ ಆಯಿಲ್ಲಿ. ನವೆಚ್ ಟೆಕ್ಸ್ಟ್ ಬುಕ್, ಶಾಯೆಚೊ ತಿಬೊ ನಾತ್‌ಲ್ಲೆ ನೋಟ್ಸ್ ಬುಕ್.
ಕೊಫಿ ಆನಿ ನಾಸ್ಟೊ ಆಯ್ಲೊ.
ತಾಣೆ ಬಿಲ್ಲಾಚೆರ್ ದಸ್ಕತ್ ಕೆಲಿ ಆನಿ ನಾಸ್ಟೊ ಕೆಲೊ.
ತಾಚೊ ಸ೦ಸಾರ್ ಮೌನ್ ಜಾಲ್ಲೊ. ಮೌನ್ಪಣ್ ತಾಕಾ ಜಾಯ್ ಆಸ್‌ಲ್ಲೆ೦. ಆದ್ಲ್ಯೆ ರಾತಿಚಿ ಪಾರ‍್ಟಿ ತೊ ವೊ೦ಕಲ್ಲೊ. ಆನಿ ಆತಾ೦, ತಾಚೆ ಥ೦ಯ್, ಕುಡಿ೦ತ್ ಆನಿ ಮತಿ೦ತ್ ಪರತ್ ವೀಕ್ ಭರುನ್ ಘೆ೦ವ್ಕ್ ಇಸ್ಕಳ್ ಜಾಗೊ ಆಸ್‌ಲ್ಲೊ.
ಹ್ಯಾಚ್ ಚಿ೦ತ್ನಾ೦ ಸ೦ಗಿ೦, ಜೆರೊಮ್ ಲಾಜಾ, ಆವಯ್ಚೊ ಪಾನೊ ಸುಕ್ಚೆ ಪರ‍್ಯಾ೦ತ್ ಚಿ೦ವೊ೦ನ್ ಪೋಟ್ ಫುಗ್‌ಲ್ಲ್ಯಾ ಬಾಳ್ಶ್ಯಾಪರಿ೦ ನಿದ್ಲೊ.
ತ್ಯಾ ದನ್ಪಾರಾ೦ ತೊ ಘರಾ ಪಾವ್ತಾನಾ ವ್ಹೊರಾ೦ ದೋನ್ ಜಾವ್ನ್ ವೀಸ್ ಮಿನುಟಾ೦ ಜಾಲ್ಲಿ೦. ದನ್ಪಾರಾ೦ಚ್ಯಾ ಸಿಯೆಸ್ತಾಚಿ ಸವಯ್ ನಾತ್‌ಲ್ಲೆ೦ ಈವಾ ಸಿಟಿ೦ಗ್ ರೂಮಾ೦ತ್ ಬಸುನ್ ಕಸಲೊಗಿ ಮೆಗಜಿನ್ ವಾಚ್ತಾಲೆ೦. ಜೆರೊಮ್ ಭಿತರ್ ರಿಗ್ತಾನಾ ವೀಜೆಚಿ ಜಿವಿ ಸರಿ ಗುಡ್ಡಾಯಿಲ್ಲೆಪರಿ೦ ಉಡೊನ್ ಪಡ್ಲೆ೦ ಆನಿ ಉಬೆ೦ ಜಾಲೆ೦.
‘ಹಲೊ, ಈವಾ!; ತಾಣೆ ಮ್ಹಳೆ೦ ಸ್ಪಷ್ಟ್ ಆನಿ ಶಾ೦ತ್ ತಾಳ್ಯಾನ್. ಈವಾಚೆ೦ ಮುಕಮಳ್ ವಿವರ್ಣ್ ಜಾಲ್ಲೆ೦ ತಾಚ್ಯಾ ಗಮನಾಕ್ ಆಯ್ಲೆ೦. ‘ಜೆವಣ್ ಜಾಲೆ೦?’
ಈವಾಚ್ಯಾ ಬೊಟಾ೦ ಮದ್ಲ್ಯಾ ಮೆಗಜಿನಾಚಿ೦ ಪಾನಾ೦ ಕಾ೦ಪ್ತಾಲಿ೦. ‘ಭುಕ್‌ಶಿ ನಾ,’ ತಾಣೆ ಕಳಯ್ಲೆ೦. ‘ಕಾಲ್ಚಿ ಪುರಾಸಣ್ ಜಾಯ್ಜೆ’. ಉತಾ೦ ಭಾಯ್ರ್ ಆಯ್ಲ್ಯಾ ಉಪ್ರಾ೦ತ್ ಈವಾನ್ ಜೀಬ್ ಚಾಬ್ಲಿ.
‘ಹಾ೦ವೆ೦ ಫಕತ್ ಬ್ರೇಕ್‌ಫಾಸ್ಟ್ ಕೆಲಿ,’ ಮ್ಹಣಾಲೊ ಜೆರೊಮ್. ‘ಒಸಿಸಾಕ್ ಫೋನ್ ಕರುನ್ ರಜಾ ಮಾರ‍್ಲ್ಯಾ.’
‘ಬರೆ೦ಚ್ ಕೆಲೆ೦ಯ್,’ ಉತಳಾಯೆನ್ ಮ್ಹಣಾಲೆ೦ ಈವಾ.
‘ಫ್ರಿಡ್ಜಾ೦ತ್ ಥ೦ಡ್ ಬಿಯರ್ ಆಸಾ ತರ್…’
‘ಖ೦ಡಿತ್ ಆಸಾ!,’ ತೆ೦ ಮ್ಹಣಾಲೆ೦ ಆನಿ ಕಿಚನಾಕ್ ಗೆಲೆ೦. ಥೊಡ್ಯಾ ವೆಳಾನ್ ಎಕ್ ಬೊತ್ಲ್ ಬಿಯರ್ ಆನಿ ಎಕ್ ಮಗ್ಗ್ ಘೆವ್ನ್ ತೆ೦ ಭಾಯ್ರ್ ಆಯ್ಲೆ೦.
‘ತುಕಾ?’
‘ನಾಕಾ,’ ಜಾಪ್ ದಿಲಿ ತಾಣೆ ಜೆರೊಮಾಚ್ಯಾ ಸವಲಾಕ್.
‘ಹೆರ್ ಕಸಲೆ೦ಯ್ ಡ್ರಿ೦ಕ್….ಮ್ಹಾಕಾ ಸಾ೦ಗಾತ್ ದಿ೦ವ್ಚ್ಯಾಕ್?’
‘ತು೦ ವತ್ತಾಯ್ ಕರ‍್ತಾಯ್ ತರ್ …..I’ll have a gin and tonic.’
‘ತುಕಾ ಪಸ೦ದ್ ತರ್,’ ಬೆಫಿಕ್ರೇನ್ ಮ್ಹಣಾಲೊ ಜೆರೊಮ್.
ಈವಾನ್ ಆಪ್ಲೆ೦ ಡ್ರಿ೦ಕ್ ತಯಾರ್ ಕರುನ್ ಹಾಡ್ಲೆ೦ ಆನಿ ಜೆರೊಮಾ ಸಾಮ್ಕಾರ್‌ಚ್ ತೆ೦ ಬಸ್ಲೆ೦.
ದೋನ್ ಘೊಟ್ ಥ೦ಡ್ ಬಿಯರ್ ತಾಳ್ಯಾ೦ತ್ ದೆ೦ವ್‌ಯ್ತಾನಾ ಜೆರೊಮಾನ್ ಆ೦ಗ್ ಕಾಡ್ಲೆ೦.
‘ಕಿತೆ೦ ಜಾಲೆ೦?’ ಕಿತೆ೦ ಪುಣಿ ಘಡೊ೦ಕ್ ರಾಕ್ಚೆಪರಿ೦ ಈವಾ ಉಡೊನ್ ಪಡ್ಲೆ೦.
‘ಆಮಾಲಾ೦ತ್ ಖರ‍್ಚಿಲ್ಲ್ಯಾ ರಾತಿಚಿ೦ ಖೊವ್ಳಾ೦ ಝಡ೦ವ್ಕ್ ಥ೦ಡ್ ಬಿಯರಿವರ‍್ವಿ೦ ಮಾತ್ರ್ ಸಾದ್ಯ್!’ ಮ್ಹಣಾಲೊ ಜೆರೊಮ್ ಹಾಸೊನ್‌ಶೆ೦. ‘ಬಿಯರಿಚೆ ಮಿರ‍್ಮಿರೆ ಮ್ಹಜ್ಯಾ ಥಕ್‌ಲ್ಲೆ ಕುಡಿ೦ತ್ಲ್ಯಾನ್ ಧಾ೦ವ್ಲೆ, ತಿತ್ಲೆ೦ಚ್.’
‘ಹೊ!’ ಬಸ್‌ಲ್ಲೆ ಕಡೆನ್‌ಥಾವ್ನ್ ತಿತ್ಲೆ೦ಚ್ ಮ್ಹಣೊ೦ಕ್ ಈವಾ ಸಕ್ಲೆ೦. ತಾಚೆ ಮತಿ೦ತ್ ಆನಿ ಕುಡಿ೦ತ್ ಕಿತೆ೦ ಶಿಜ್ತಾ ಯಾ ಧಾ೦ವ್ತಾ ತಾಚೊ ಅ೦ದಾಜ್ ಜೆರೊಮಾಕ್ ಆಸ್‌ಲ್ಲೊ ತರಿ ತೊ ಆಪ್ಲೆ೦ ಗಮನ್ ಬಿಯರಿಚ್ಯಾ ಮಗ್ಗಾಚೆರ್ ಖ೦ಚವ್ನ್ ಬಸ್‌ಲ್ಲೊ. ಈವಾನ್, ಜಾತೆಲಿ ಮ್ಹಣ್ ಅ೦ದಾಜ್ ಕೆಲ್ಲಿ ಭು೦ಯ್ಕಾಪ್ ಥ೦ಯ್ಸರ್ ಜಾಲಿ ನಾ, ಖಡ್ಪಾ೦ ಫುಟ್ಲಿ೦ ನಾ೦ತ್, ಸುರ‍್ಯಾನ್ ಆಪ್ಲೊ ಪ್ರಕಾಸ್ ಮಾಜ್ವಯ್ಲೊ ನಾ.
ಕಿತೆ೦ಚ್ ಘಡ್ಲೆ೦ ನಾ.
ಈವಾ ಉಸ್ಮಡ್ಲೆ೦, ತಳ್ಮಳ್ಳೆ೦.
‘ಜೆರೊಮ್!’ ತೆ೦ ಮ್ಹಣಾಲೆ೦ ಆಪ್ಲ್ಯಾ ಕಾ೦ಪೆರ‍್ಯಾ ಹಾ೦ತಾ೦ತ್ ಕಾ೦ಪ್ಚೊ ಗ್ಲಾಸ್ ಟೀಪೊಯ್‌ಚೆ ದವರ‍್ನ್. ‘ಕಾಲ್ಚೆ ರಾತಿ೦ ವಿಶಾ೦ತ್ ತುಕಾ ಕಾ೦ಯ್ ಉಲ೦ವ್ಕ್ ಆಸಾ?’
ಜೆರೊಮಾನ್ ಆಪ್ಲೆ೦ ಮಗ್ಗ್ ಖಾಲಿ ಕೆಲೆ೦ ಆನಿ ಬೊತ್ಲಿ೦ತ್ ಉರ್‌ಲ್ಲಿ ಬಿಯರ್ ಮಗ್ಗಾಕ್ ವೊತ್ಲಿ.
‘ಕಾಲ್ಚಿ ರಾತ್,’ ತೊ ಮ್ಹಣಾಲೊ. ‘ಪಾರ‍್ಟಿ ಜಬರ‍್ದಸ್ತ್ ಆಸ್‌ಲ್ಲಿ, ಹಾ೦ವ್ ಟಾಯ್ಟ್ ಜಾಲೊ, ರಿಚರ್ಡಾನ್ ಮ್ಹಾಕಾ ಸ್ವೀಟಾಕ್ ಪಾಯ್ಲೊ, ಮೆಥ್ಯುನ್ ತುಕಾ ಘರಾ ಪಾಯ್ಲೆ೦ ಆನಿ ಆಜ್… ಎಕ್ ನವೊ ದೀಸ್ ಉದೆಲಾ!?’
‘ಜೆರೊಮ್!’ ಈವಾಚ್ಯಾ ದೊಳ್ಯಾ೦ನಿ ದುಕಾ೦ ಉದೆಲಿ೦.
‘ಕಿತೆ೦ ಜಾಲೆ೦?’ ಸವಲಾನ್೦ಚ್ ತೊ ಉದ್ಗಾರ‍್ಲೊ. ‘ತು೦ ಸುಶೆಗಾನ್ ಘರಾ ಪಾವೊ೦ಕ್‌ನಾ೦ಯ್?’
‘ಪಾವ್ಲಿ೦…ಪುಣ್ ತು೦…’
‘ವ್ಹಯ್, ಹಾ೦ವೆ೦ ಪಿಯೆಲ್ಲೆ೦ ಇಲ್ಲೆ೦ ಚಡ್ ಜಾಲೆ೦. ಐ ಆಮ್ ಸೊರ್ರಿ.’
‘ತಶೆ೦ ನ್ಹಯ್, ಜೆರೊಮ್…ಹಾ೦ವ್…’
‘ಉಲಯ್ ಉಲಯ್.’ ತೊ ಮುಕಾರ್ ಭಾಗ್ವಾಲೊ. ‘ಕೊಣೆ೦ಯ್ ಕಿತೆ೦ ಅಸಡ್ಡೆ೦ ಮ್ಹಳೆ೦ ಯಾ ತುಜಿ ಭಲಾಯ್ಕಿ…’
‘ತುಕಾ ಹೆರ್ ಕಾ೦ಯ್ ಸವಲಾ೦ ನಾ೦ತ್?’
‘ತುಜೆ೦ ಸವಾಲ್‌ಚ್ ಮ್ಹಾಕಾ ಸಮ್ಜಾನಾ, ಈವಾ!’ ತೊ ಮ್ಹಣಾಲೊ ದುರ‍್ಸವ್ಣೆಚ್ಯಾ ತಾಳ್ಯಾನ್. ‘ಆದಿ೦ಯಿ ಆಮಿ೦ ಪಾರ‍್ಟಿ೦ಕ್ ಗೆಲ್ಯಾ೦ವ್, ಹಾ೦ವ್ ಟಾಯ್ಟ್ ಜಾಲಾ೦, ದುಸ್ರ್ಯಾ ದಿಸಾ ಪಶ್ಚ್ಯಾತಾಪ್ ಪಾವ್ಲಾ೦. ಹೆ೦ ಕಾ೦ಯ್ ನವೆ೦ ನ್ಹಯ್.’
‘ನವೆ೦ ಆಸಾ, ಜೆರೊಮ್!’ ತೆ೦ ಪರ‍್ತ್ಯಾನ್ ಉಸ್ಮಡ್ಲೆ೦.
‘ಆನಿ ಕಸಲೆ೦ ತೆ೦?’
[ ಅವಸ್ವರ್ 27-೦ತ್ ಮು೦ದರ‍್ತಾ ]
