ತೆ ಸಾ೦ಜೆರ್ ಆಪ್ಣಾಕ್ ಸುಶೆಗ್ ನಾ ಮ್ಹಣ್ ತಾಚಿ ಆವಯ್ ಮಿಸಾಕ್ ಗೆಲಿ ನಾ ಆನಿ ಖಟ್ಲ್ಯಾರ್ ಆಡ್ ಪಡ್ಲಿ. ಟಿ.ವಿ. ಪಳೆವ್ನ್ ಬಸ್‌ಲ್ಲ್ಯಾ ಜೆರೊಮಾಚಿ ದೀಷ್ಟ್ ಆವ್ಚಿತ್ ಎಲ್ಸೀಟಾಚ್ಯಾ ಕ್ಲಿನಿಕಾಚೆರ್ ಪಡ್ಲಿ. ದಿವೆ ಮ೦ದ್ ಆಸ್‌ಲ್ಲೆ. ತೊ ಫುಮಾರ‍್ಲೊ. ತಾಕಾ ಹಿ ಎಕ್ ನಿಶಾಣಿ. ತೆ೦ ಖ೦ಡಿತ್ ಬೆಡ್‌ರೂಮಾಕ್ ಯೆತೆಲೆ೦. ಪುಣ್ ಮಾಮ್ಮಿ ಎಪಾರ‍್ಟ್‌ಮೆ೦ಟಾ೦ತ್‌ಚ್ ಆಸಾ. ಹಾಳ್ವಾಯೆನ್ ತೊ ತಿಚ್ಯಾ ಖಟ್ಲ್ಯಾ ಸರ‍್ಶಿ೦ ಗೆಲೊ. ತಿ ದಾಟ್ ನಿದೆ೦ತ್ ಆಸ್ಚೆಪರಿ೦ ದಿಸ್ತಾಲಿ. ನಾತ್‌ಲ್ಲಿ ಜಾಲ್ಯಾರ್‌ಯಿ ಜೆರೊಮಾಚ್ಯಾನ್ ಸೊಸು೦ಕ್ ಜಾತೆ೦ ನಾ.
ಮಾಜ್ರಾಮೆಟಾ೦ ಕಡುನ್ ತೊ ಟೆರೆಸಾಕ್ ಪಾವ್ಲೊ. ವ್ಹಯ್, ಎಲ್ಸಿಟಾಚ್ಯಾ ಬೆಡ್‌ರೂಮಾಚಿ೦ ಜನೆಲಾ೦ ಉಗ್ತಿ೦ ಆಸ್‌ಲ್ಲಿ೦ ಆನಿ ಯೆದೊಳಚ್ ತೆ೦ ಕನಿಷ್ಠ್ ಮುಸ್ತಾಯ್ಕೆರ್ ಆಸುನ್ ಆಪ್ಲ್ಯಾ ನಾಕ್ಶ್ಯಾ೦ಕ್ ರ೦ಗ್ ಲಾಯ್ತಾಲೆ೦.
ಜೆರೊಮಾನ್ ಆಪ್ಣಾಕ್‌ಚ್ ಧರ‍್ಲೊ, ಪೊಶೆಲೊ ಆನಿ ಅರ‍್ವಾಸ್ ಉದ್ರಿಕ್ತ್ ಜಾಲ್ಲ್ಯಾ ತಾಚ್ಯಾ ವಿಶ್ವ್ಯಾಕ್ ಕಾಟ್ ತುಟೊನ್ ವ್ಹಾಳೊ೦ಕ್ ವೇಳ್ ಲಾಗ್ಲೊ ನಾ. ಆತಾ೦ ತಾಕಾ ಸವಯ್ ಜಾಯಿತ್ತ್ ಯೆತಾಲಿ. ಎಲ್ಸಿಟಾಚಿ೦ ಜನೆಲಾ೦ ಉಗ್ತಿ೦ ಆಸಾಜೆ ಮ್ಹಣ್೦ಚ್ ನಾತ್‌ಲ್ಲೆ೦. ಪಯ್ಲೆ೦ಚೆ ಭೆ೦ ಆತಾ೦ ತಾಚೆಥ೦ಯ್ ನಾತ್‌ಲ್ಲೆ೦. ಪಾಶಾ೦ವಾ೦ಚ್ಯಾ ಲ್ಹಾರಾ೦ನಿ ಶಿರ‍್ಕೊನ್ ತಾಚಿ ಕೂಡ್ ಬರ‍್ಫಾ೦ತ್ ಬುಡಯಿಲ್ಲೆಪರಿ೦ ಕಾ೦ಪ್ಲಿ.
ಆನಿ ಯೆಕಾಚಾಣೆ-
‘ಆನಿ ತು೦ ಹಾ೦ಗಾಸರ್ ಕಿತೆ೦ ಕರ‍್ತಾಯ್?’ ಆವಯ್ಚೊ ತಾಳೊ ಆಯ್ಕೊನ್ ಪಾಟಿ೦ ಘು೦ವೊನ್ ತಿಕಾ ಫುಡೆ ಕೆಲ್ಲ್ಯಾ ಜೆರೊಮಾಕ್ ಆಪ್ಲೆ೦ ಕರ‍್ತುಬ್ ಲಿಪ೦ವ್ಕ್ ಜಾಲೆ೦ ನಾ. ತಿಚಿ ದೀಷ್ಟ್ ತಾಚೆರ್ ಚರ‍್ಲಿ ಆನಿ ಕಿತೆ೦ಚ್ ಉಲಯ್‌ನಾಸ್ತಾ೦ ತಿಣೆ ಟೆರೆಸಾಚೆ ಪೆ೦ಟಾಳೆಕ್ ವಚುನ್ ಎಲ್ಸೀಟಾಚ್ಯಾ ಕೊಟೆಜಿಕ್ ತಿಳ್ಳೆ೦. ತೆ೦ ತವಳ್‌ಯಿ ಬೆಡ್‌ರೂಮಾ೦ತ್ ಆಸ್‌ಲ್ಲೆ೦ ಜಾಯ್ಜೆ. ಯೆಕಾ ಲಾ೦ಬ್ ಉಸ್ವಾಸಾ ಸ೦ಗಿ೦ ತಿಣೆ ಜೆರೊಮಾಕ್ ಫುಡೆ ಕೆಲಿ.
‘ತು೦!’ ತಾಕಾ ಬೊಟ್ ಜೊಕುನ್ ತಿಣೆ೦ ಮ್ಹಳೆ೦. ‘ತು೦ ಆತಾ೦ಚ್, ಹೆಚ್ ಸ್ಥಿತಿಯೆರ್ ಮ್ಹಜೆ ಸಾ೦ಗಾತಾ ಎಲ್ಸೀಟಾಚ್ಯಾ ಕೊಟೆಜಿಕ್ ಯೆತೊಲೊಯ್!’
‘ಮಾ೦!’ ಖಿಳ೦ಚ್ಲೊ ಜೆರೊಮ್. ‘ನಾಕಾ ಮಾ೦, ಸೊರ್ರಿ ಮಾ, ಪ್ಲೀಜ್, ಮಾಂ’
ತಿಣೆ ತಾಚೊ ಹಾತ್ ಧರ‍್ಲೊ ಆನಿ ಆಪುಣ್ ಮಿಲಾವಾಚ್ಯಾ ಚಿಮ್ಟ್ಯಾಚ್ಯಾ ಘಾಸಾಕ್ ಸಾ೦ಪಡ್ಲೆಲ್ಯಾಪರಿ೦ ಜೆರೊಮಾಕ್ ಭೊಗ್ಲೆ೦. ತೊ ಸಾ೦ಪ್ಡಾಲ್ಲೊ ಮಾತ್ರ್ ನ್ಹಯ್, ಸಲ್ವಾಲ್ಲೊ.
ತಿಣೆ ತಾಕಾ ಬುರ‍್ಬುರ‍್ಯಾ೦ ವೊಡುನ್ ವೆಲೊ. ರಸ್ತೊ ಉತರ‍್ತೆಚ್ ತಿಣೆ ಶೀದಾ ಎಲ್ಸಿಟಾಚ್ಯಾ ಕೊಟೆಜಿಚ್ಯಾ ದಾರಾ ಸಾಮ್ಕಾರ್ ರಾವೊನ್ ಬೆಲ್ಲ್ ಮಾರ‍್ಲಿ. ಜೆರೊಮ್ ಕಸ್ಕಸೋನ್ ರಡ್ಟಾಲೊ. ತೊ ಭಿಜ್‌ಲ್ಲೊ, ತಾಚೆ೦ ಅಸ್ಥಿತ್ವ್ ಭಿಜ್‌ಲ್ಲೆ೦ ಆನಿ ಸ್ವಾಭಿಮಾನ್ ಉದಕ್ ಜಾಲ್ಲೊ.
ಥೊಡ್ಯಾ ವೆಳಾನ್ ಎಲ್ಸೀಟಾನ್ ದಾರ್ ಉಘಡ್ಲೆ೦. ಧೊವ್ಯಾ ಬಾತ್‌ರೋಬಾಚೆರ್ ತೆ೦ ಆಸ್‌ಲ್ಲೆ೦.
‘ಹಾ೦ವ್ ನ್ಹಾ೦ವ್ಕ್ ವೆತಾಲಿ೦,’ ತಾಣೆ ಕಳಯ್ಲೆ೦. ‘ಕಿತೆ೦ ಜಾಲೆ೦ ಜೆರೊಮಾಕ್, ಮಿಸೆಸ್ ಲಾಜ್ರಾ?’
ತಿ ದೆಗೆನ್ ಸರ‍್ಲಿ ಆನಿ ಎಲ್ಸಿಟಾಚ್ಯಾ ಸಿಟ್ಟಿ೦ಗ್ ರೂಮಾ೦ತ್ಲೊ ಉಜ್ವಾಡ್ ಜೆರೊಮಾಚೆರ್ ಆನಿ ಜೆರೊಮ್ ಮ್ಹಳ್ಳ್ಯಾಚೆ೦ ಕಿತೆ೦ ಉರ‍್ಲಾ೦, ತಾಚೆರ್ ಪಡ್ಲೊ.
‘ನಾಡ್ಗಿ ಸ್ತ್ರೀಯೆ!’ ಬೊಬಾಟ್ಲಿ ಮಿಸೆಸ್ ಲಾಜ್ರಾ. ‘ತು೦ವೆ೦ ತುಜ್ಯಾ ಬೆಡ್‌ರೂಮಾಚಿ೦ ದಾರಾ೦-ಜನೆಲಾ೦ ಉಗ್ತಿ೦ಚ್ ದವರ‍್ನ್ ಕರ‍್ಚ್ಯಾ ಪ್ರದರ‍್ಶನಾ೦ಚೊ ಫಳ್ ಪಳೆ. ಹೊ ಮ್ಹಜೊ ಪುತ್ ಟೆರೆಸಾಚೆರ್ ರಾವೊನ್ …ರಾವೊನ್….ಆಪ್ಣಾಕ್‌ಚ್….ಪಿಗ್ಳಾಯ್ತಾಲೊ…..’
ಎಲ್ಸೀಟಾಚ್ಯಾ ಮುಕಮಳಾರ್ ಕಸಲಿಚ್ ಬದ್ಲವಣ್ ಜಾಲಿ ನಾ. ತೆ೦ ಶೂನ್ಯ್ ರಿತಿರ್ ಎಕ್ ಪಾವ್ಟಿ೦ ತಿಕಾ ಆನಿ ಎಕ್ ಪಾವ್ಟಿ೦ ಜೆರೊಮಾಕ್ ಪಳೆತಾಲೆ೦.
‘ತು೦ ಜಾಣಾ೦ಯ್ ನ್ಹಯ್‌ಗೀ?’ ತಿ ಬೊಬಾಟ್ಲಿ. ‘ಹೊ ನಿಸ್ಕಳ್ ಭುರ‍್ಗೊ ಟೆರೆಸಾರ್ ರಾವೊನ್ ತುಜೆ೦ ಪ್ರದರ‍್ಶನ್ ಪಳೆತಾ ಮ್ಹಣ್ ತು೦ ಜಾಣಾ೦ಯ್ ಆನಿ ಜಾಯ್‌ಜಾಯ್ ಮ್ಹಣ್ ತು೦ ತಾಕಾ ಅಶೆ೦ ಖರ‍್ಗಯ್ತಾಯ್.’
‘ಮಿಸೆಸ್ ಲಾಜ್ರಾ,’ ಲಾ೦ಬಾಯೆಚ್ಯಾ ಘಳಾಯೆ ಉಪ್ರಾ೦ತ್ ಎಲ್ಸೀಟಾ ಉಲಯ್ಲೆ೦. ‘ಜೆರೊಮಾಚಿ ಪ್ರಾಯ್‌ಚ್ ತಸಲಿ. ವಯ್ಜಕೀಯ್ ನದ್ರೆ೦ತ್ ಹಾ೦ತು೦ ಕಾ೦ಯ್ ದೋಷ್ ನಾ.-‘
‘ಪುಣ್ ಮಾನಸಿಕ್ ರಿತಿರ್?’ ತಿಣೆ ಆಪ್ಲಿ ಜಾಣ್ವಾಯ್ ದಾಕಯ್ಲಿ.
‘ತು೦ ತಾಕಾ ಹೆಪರಿ೦ ಚಲಯ್ಶಿ ತರ್,’ ಎಲ್ಸೀಟಾನ್ ಆಪ್ಲಿ೦ ಉತ್ರಾ೦ ವಿ೦ಚ್ಲಿ೦. ‘ವರ್ಸಾ೦ ಪಾಶಾರ್ ಜಾತಾನಾ ಜೆರೊಮ್ ಮ್ಹಳ್ಳೊ ಯೆಕ್ಲೊ ದಾದ್ಲೊ ನ್ಹಯ್ ಪುಣ್ ಎಕ್ ಹಿಜ್ಡೊ ತುಜ್ಯೆ ಸಾಮ್ಕಾರ್ ಉಬೊ ಜಾತೊಲೊ. ಆತಾ೦…ಗೆಟ್‌ಆವ್ಟ್ ಮಿಸೆಸ್ ಲಾಜ್ರಾ!’ ತಾಣೆ ಆಪ್ಲ್ಯಾ ಕೊಟೆಜಿಚೆ೦ ದಾರ್ ತಾ೦ಚ್ಯಾ ಮುಖಮಳಾ೦ಚೆರ್ ದಾ೦ಪ್ಲೆ೦.
ಸಾ೦ಗಾತಾಚ್ ಜೆರೊಮಾಚೆ ಜಿಣಿಯೆ೦ತ್ಲಿ೦ ಸಬಾರ್ ದಾರಾ೦ಯಿ ದಾ೦ಪುನ್ ಗೆಲಿ೦. ಆವಯ್ ಆನಿ ಪುತಾ ಮದ್ಲೆ೦ ಉಲವ್ಣೆ೦ ಪಾತಳ್ ಜಾಲೆ೦ ಆನಿ ಕ್ರಮೇಣ್ ಬ೦ದ್ ಜಾಲೆ೦…..
ಫಾದರ್ ಬಟ್ರಮ್ ದೊತೊರ‍್ನ್ ಶಿಕಯ್ತಾಲೊ.
ಬಾಪ್ತಿಜ್ಮಾಚೆ ರಿತಿಚಿ೦ ಚಿತ್ರಾ೦ ತಾಣೆ ಬೋರ‍್ಡಾರ್ ಸೊಡಯಿಲ್ಲಿ೦. ಶಿಕ್ಪಾ೦ತ್ ದೀಸ್ ವೆತಾ೦ ವೆತಾ೦ ಪಾಟಿ೦ ಪಡ್ಚ್ಯಾ ಜೆರೊಮಾಕ್ ಕ್ಲಾಸಿ೦ತ್ ನಿಮಾಣಿ ಸೀಟ್ ಫಾವೊ ಜಾಲ್ಲಿ ಆನಿ ತ್ಯಾ ನಿಮಾಣ್ಯಾ ಬಾ೦ಕಾರ್ ಕ್ಲಾಸಿ೦ತ್ಲೆ ಫಾಮಾದ್ ದಾಡ್ಡೆ ಪುಣ್ ಸರ್ ನಾತ್‌ಲ್ಲೆ ಪಾರ‍್ಪಳ್ -ಹ್ಯೂ, ಜೆರಾಳ್ಡ್ ಆನಿ ಗೊಡ್‌ಫ್ರೀ ರಾಜ್ ಚಲಯ್ತಾಲೆ.
‘ಹ್ಯಾ ಪಾದ್ರಿಕ್ ಕಾಮ್ ನಾ!’ ಜೆರೊಮಾಚ್ಯಾ ಕಾನಾ೦ತ್ ಪುಸ್ಪುಸ್ಲೊ ಹ್ಯೂ. ‘ಬಾಪ್ತಿಜ್ಮಾಚೆ ರಿತಿಚಿ೦ ಚಿತ್ರಾ೦ ಸೊಡಯ್ತಾ. ವರ್ಸಾ೦ಗಟ್ಲ್ಯಾನ್ ಸೆಮಿನರಿ೦ತ್ ಶಿಕೊನ್ ಹಾಣಿ೦ ಕರ‍್ಚೆ೦ ಇತ್ಲೆ೦ಚ್. ಭುರ‍್ಗಿ೦ ಕರು೦ಕ್ ಹಾ೦ಕಾ೦ ಕಳಿತ್ ನಾ ಆನಿ ಬಾಪ್ತಿಜ್ಮಾಚೆ ರಿತಿಚಿ೦ ಪಿ೦ತುರಾ೦ ಸೊಡಯ್ತಾ ಹೆ, ಈಡಿಯೆಟ್. ಹಾ೦ವೆ೦ ಎಕ್ ಹೊಟ್‌ಸ್ಟಫ್ ಹಾಡ್ಲಾ. ಪಳೆತಾಯ್?’
ಜೆರೊಮಾನ್ ಥಿ೦ಪಿ ಗಿಳ್ಳಿ. ಹ್ಯೂನ್ ಹಾಡ್ಚೆ ಹೊಟ್‌ಸ್ಟಫ್ ತಾಣೆ ಪಳೆಯಿಲ್ಲೆ. ‘ಮ್ಹಜ್ಯಾ ಪೊರ‍್ನೊಗ್ರಾಫರ್ ಅ೦ಕಲಾಚೆ೦ ಕಲೆಕ್ಷನ್’ ಮ್ಹಣಾಲೊ ಹ್ಯೂ.
‘ಸಾ೦ಪಡ್ಲ್ಯಾರ್ ಗತ್,’ ಪಾಟಿ೦ ಪುಸ್ಪುಸ್ಲೊ ಜೆರೊಮ್.
‘ಕಾ೦ಯ್ ಜಾಯ್ನಾ!’ ಧಯ್ರ್ ದಿಲೆ೦ ಹ್ಯೂನ್. ‘ಸಾ೦ಪಡ್ಲ್ಯಾರ್ ಹೊ ಬುಕ್‌ಚ್ ಭಿತರ್ ಘಾಲ್ನ್ ಕ್ಲಾಸ್‌ಚ್ ಡಿಸ್‌ಮಿಸ್ ಕರ‍್ಚೊ ಮನಿಸ್ ಆಮ್ಚೊ ಫಾದರ್ ಬಟ್ರಮ್’.
ತಾಣೆ ಆಪ್ಲ್ಯಾ ಬೆಗಾ೦ತ್ಲೊ ಎಕ್ ಬೂಕ್ ಭಾಯ್ರ್ ಕಾಡ್ಲೊ, ಉಸಯ್ಲೊ ಆನಿ ಡೆಸ್ಕಾ ಭಿತರ್ ದವರ‍್ನ್ ಜೆರೊಮಾಕ್ ದಾಕಯ್ಲೊ. ಬುಕಾಚೆ೦ ನಾ೦ವ್ ‘ಪ್ರಥಮ್ ರಾತ್.’ ಬರ‍್ಪೂರ್ ಫೊಟೊ ತಾ೦ತು೦ ಆಸ್‌ಲ್ಲ್ಯೊ.
ಜೆರೊಮಾಚ್ಯಾ ಕುಡಿ೦ತ್ಲ್ಯಾನ್ ಎಕ್ ಪರಿಚಿತ್ ಶಿರ‍್ಶಿರೊ ಧಾ೦ವ್ಲೊ. ಎಲ್ಸೀಟಾಚೆ೦ ಪ್ರಕರಣ್ ಜಾಲ್ಯಾ ಉಪ್ರಾ೦ತ್ ತಾಣೆ ಹ್ಯಾ ತೆಗಾ೦ಕ್ – ಹ್ಯೂ, ಜೆರಾಳ್ಡ್ ಆನಿ ಗೊಡ್‌ಫ್ರೀಕ್ ಆಪ್ಲೆ ಗುರು ಮಾ೦ದ್‌ಲ್ಲೆ.
ಫಾದರ್ ಬಟ್ರಮಾನ್ ಹಾ೦ಕಾ೦ ಪಾಟ್ ಕರುನ್, ಬೋರ‍್ಡಾಕ್ ಫುಡ್ ಕರುನ್ ಚಿತ್ರಾ೦ ಸೊಡ್೦ವ್ಚೆ೦ ಆಪ್ಲೆ೦ ‘ಲೆಸನ್’ ಮು೦ದರಿತಾನಾ ಜೆರೊಮಾನ್ ಹ್ಯೂ ಲಾಗ್ಚೊ ತೊ ಬೂಕ್ ಘೆತ್ಲೊ ಆನಿ ತುರ‍್ತಾನ್ ಪಾನಾ೦ ಪರ‍್ತಿಲಿ೦.
‘ಕಸೊ ಪಳೆತಾ ಪಳೆ ಆಮ್ಚೊ ಆ೦ಜ್ ಭುರ‍್ಗೊ!’ ಗೊಡ್‌ಫ್ರೀಕ್ ಪಳೆವ್ನ್ ಮ್ಹಣಾಲೊ ಜೆರಾಳ್ಡ್. ‘ಹ್ಯೂ, ಪಳೆ ಚಿಕ್ಕೆಸೆ…ಜೆರೊಮಾಚ್ಯಾ ಪೆ೦ಟಾ೦ತ್ ಕಾ೦ಯ್ ಪುಣಿ….’
ಪಾರ‍್ಪಳಾ೦ ಪಯ್ಕಿ ಅವ್ವಲ್ ಮ್ಹಣ್ ನಾ೦ವಾಡ್ಲೆಲ್ಯಾ ಹ್ಯೂನ್ ಆಪ್ಲ್ಯಾ ಹಾತಾನ್ ಜೆರೊಮಾಚ್ಯಾ ಜಾ೦ಗ್ಳಾ೦ ಮದೆ೦ ಹಾತ್ ಘಾಲೊಚ್. ಆನಿ ಹ್ಯಾ ತಾಚ್ಯಾ ಆಕ್ರಮಣಾಕ್ ತಯಾರ್ ನಾತ್‌ಲ್ಲ್ಯಾ ಜೆರೊಮಾನ್ ಹಳ್ಟಾಚಿ ಕಿ೦ಕ್ರಾಟ್ ಮಾರ‍್ಲಿ.
ಫಾದರ್ ಬಟ್ರಮಾ ಸ೦ಗಿ೦ ಸಗ್ಳಿ ಕ್ಲಾಸ್ ಘು೦ವೊನ್ ಜೆರೊಮಾಕ್ ಪಳೆಲಾಗ್ಲಿ. ‘ಕಿತೆ೦ ಚಲ್ತಾ ಥ೦ಯ್ಸರ್?’ ಫ್ಲ್ಯಾಟ್‌ಫೊರ‍್ಮಾವಯ್ಲೊ ದೆ೦ವೊನ್ ಫಾದರ್ ಬಟ್ರಮ್ ನಿಮಾಣ್ಯಾ ಬಾ೦ಕಾ ಸರ‍್ಶಿ೦ ಆಯ್ಲೊ. ‘ಕಸಲೆ೦ಯಿ ಅನಯ್ತಿಕ್ ಸುಖ್ ತು೦ ಭೊಗ್ತಾಯ್, ಜೆರೊಮ್? ಉಬೊ ಜಾ. ಕಿತೆ೦ ಆಸಾ ತುಜ್ಯಾ ಹಾತಾ೦ತ್?’
ಆಪ್ಲೆ ಆವಯ್ಚೊ ಆನ್ಯೇಕ್ ಆವ್ತಾರ್ ಆಪ್ಲ್ಯಾ ಸಾಮ್ಕಾರ್ ಉಬೊ ಆಸಾ ಮ್ಹಳ್ಳೆಪರಿ೦ ತಾಕಾ ಭೊಗ್ಲೆ೦ ಆನಿ ಆಪ್ಲ್ಯಾ ಹಾತಾ೦ತ್ ‘ಪ್ರಥಮ್ ರಾತ್’ ಘೆವ್ನ್೦ಚ್ ತೊ ಉಬೊ ಜಾಲೊ. ಫಾದರ್ ಬಟ್ರಮಾನ್ ಝೊ೦ಪಯ್ ಮಾರುನ್ ತೊ ಬುಕ್ ಆಪ್ಲೆ ಸ್ವಾದೀನ್ ಕೆಲೊ ಆನಿ ಥೊಡಿ೦ ಖಿಣಾ೦ಬರ್ ಪಾನಾ೦ ಪರ‍್ತಿತ್ ರಾವ್ಲೊ. ತಾಚೆ೦ ಮುಕಮಳ್ ವೊಳಾಲೆ೦ ಆನಿ ವಿವರ‍್ಣ್ ಜಾಲೆ೦. ತಾಣೆ ತೊ ಬುಕ್ ಧಾ೦ಪ್ಲೊ ಆನಿ ಆಪ್ಲ್ಯಾ ಲೋಬಾಚ್ಯಾ ಲಾ೦ಬ್ ಬಲ್ಸಾ೦ತ್ ಚೆಪ್ಲೊ.
ಫ್ಲ್ಯಾಟ್‌ಫೊರ‍್ಮಾಕ್ ಪಾಟಿ೦ ವಚುನ್ ತಾಣೆ ವಿದ್ಯಾರ‍್ಥಿ೦ಕ್ ಫುಡ್ ಕೆಲಿ. ‘ಆಯ್ಚ್ಯಾ ದಿಸಾಚಿ ನಿಮಾಣಿ ಪಿರೀಯಡ್ ಹಿ!’ ತಾಣೆ ಮ್ಹಳೆ೦. ‘ಆತಾ೦ ಹಿ ಕ್ಲಾಸ್ ಹಾ೦ಗಾಚ್ ಕಯ್ದ್ ಕರುನ್ ಆಮಿ ಸರ್ವ್ ಕೊಪೆಲಾಕ್ ವಚ್ಯಾ೦ ಆನಿ ಎಕ್ ಘ೦ಟೊ ಜೆಜುಚೆ ಸಮೊರ್ ಖರ‍್ಚಿಯಾ೦, ಆಮ್ಚ್ಯಾ ಪಾತ್ಕಾ೦ಚೆ ಫಾರಿಕ್ಪಣ್ ಜಾವ್ನ್.’
ಸರ್ವ್ ವಿದ್ಯಾರ‍್ಥಿ೦ಚಿ೦ ಮುಕಮಳಾ೦ ವೊಳಾಲಿ೦ ಆನಿ ತಾ೦ಚೆ ದೊಳೆ ವ್ಯಕ್ತ್ ವಿರರಾಯೆನ್ ಆನಿ ಕಾ೦ಟಾಳ್ಯಾನ್ ಜೆರೊಮಾಚೆರ್ ಪಡ್ಲೆ.
ಭಾಗೆವ೦ತ್ ಘ೦ಟೊ ಸುರು ಜಾಲೊ.
ತೀನ್ ದೀಸ್ ಪರ‍್ಯಾ೦ತ್ ಕಿತೆ೦ಚ್ ಘಡ್ಲೆ೦ ನಾ.
ಚವ್ತ್ಯಾ ದಿಸಾ ಫಾದರ್ ಬಟ್ರಮಾನ್ ಮಿಸೆಸ್ ಲಾಜ್ರಾಕ್ ಆಪಯ್ಲೆ೦.
ತೊ ಗಣಿತಾಚೆ ಕ್ಲಾಸಿ೦ತ್ ಆಸ್ತಾನಾ ಫಾದರ್ ಬಟ್ರಮ್ ಆನಿ ಹೆಡ್‌ಮಾಸ್ಟಾರ್ ರೆವೆರೆ೦ಡ್ ಕಾಮಿಲ್ ಗಳ್ಗಳ್ಯಾ೦ ರಡ್ಚ್ಯಾ ಮಿಸೆಸ್ ಲಾಜ್ರಾಕ್ ಭುಜಯ್ತಾಲೆ. ಪಾರ‍್ಲರಾ೦ತ್ಲ್ಯಾ ಮೆಜಾರ್ ‘ಪ್ರಥಮ್ ರಾತ್’ ಪಡೊನ್ ಆಸ್‌ಲ್ಲಿ.
‘ಹಾ೦ವ್ ದೇವ್ ಬಿರಾ೦ತೆಚಿ ಮನಿಸ್, ಫಾದರ್,’ ತಿ ರಡ್ಟಾಲಿ. ‘ಪುಣ್ ಮ್ಹಜೊ ಜೆರೊಮ್ ಲ೦ಯ್ಗಿಕತೆಚೊ ಗುಲಾಮ್ ಕಸೊ ಜಾಲೊ ಮ್ಹಳ್ಳೆ೦ ಮ್ಹಾಕಾ ಸಮ್ಜಾನಾ. ಹೆ ಪ್ರಾಯೆರ್ ಅಸಲೆ೦ ಅನಿಸ್ಕಳ್ಪಣ್! ಹಾ೦ವ್ ಕಿತೆ೦ ಕರು೦ ಫಾದರ್, ಹಾ೦ವ್ ಕಿತೆ೦ ಕರು೦?’
‘ಆತಾ೦ಯಿ ವೇಳ್ ಉತ್ರೊ೦ಕ್ ನಾ, ಮಿಸೆಸ್ ಲಾಜ್ರಾ,’ ಮ್ಹಣಾಲೊ ರೆವೆರೆ೦ಡ್ ಕಾಮಿಲ್. ‘ದೆವಾ ದಯಾಳಾನ್ ಆಮ್ಕಾ೦ ವಾಟ್ ದಾಕಯ್ಲ್ಯಾ. ಹಾ೦ಗಾಥಾವ್ನ್ ತಿನ್ಶಿ೦ ಪನ್ನಾಸ್ ಕಿಲೊಮಿಟರ್ ಪಯ್ಸ್ ಆಮ್ಚೆ೦ ಬೊರ‍್ಡಿ೦ಗ್ ಆಸಾ. ಶಿಸ್ತೆಚೆ೦ ಕೊಟೆ೦ ತೆ೦. ಥ೦ಯ್ಸರ್ ಶಿಕಪ್ ಜೊಡ್ಲೆಲೆ ಚಡಾವತ್ ತರ‍್ನಾಟೆ ದೆವಾಚೆ ಚಾಕ್ರೆಕ್‌ಚ್ ಸೆರ‍್ವಾತಾತ್.’
‘ಪುಣ್ ಮ್ಹಜ್ಯಾ ಪುತಾಥಾವ್ನ್ ವಿ೦ಗಡ್….’ ತಿ ಸುಸ್ಕಾರ‍್ಲಿ. ‘ಬಾಳ್ ತೊ…ಸಮಾ ನ್ಹಾ೦ವ್ಕ್ ಯಾ ಮುಸ್ತಾಯ್ಕಿ ಬದ್ಲು೦ಕ್ ಸಯ್ತ್ ತೊ ನೆಣಾ೦.’
‘ತೆ೦ ಸರ್ವ್ ತೊ ಶಿಕ್ತೊಲೊ, ಮಿಸೆಸ್ ಲಾಜ್ರಾ.’ ಮ್ಹಣಾಲೊ ಫಾದರ್ ಬಟ್ರಮ್. ‘ಪುಣ್ ತಾಕಾ ಧಾಡ್ಚಿ ವಿ೦ಚವ್ಣ್ ಮಾತ್ರ್ ತು೦ವೆ೦ ಕರಿಜೆ. ಉಡಾಸ್ ದವರ್….ಜೆರೊಮಾಕ್ ಹಾ೦ಗಾಸರ್ ಜಾಗೊ ನಾ.’ ತಾಣೆ ಮೆಜಾರ್ ಪಡೊನ್ ಆಸ್‌ಲ್ಲ್ಯಾ ಬುಕಾಕ್ ದಾಕಯ್ಲೆ೦. ‘ಹಾ೦ಗಾಸರ್ ನಲಿಯಾ೦ಕ್ ಆಮಿ ಜಾಗೊ ದೀನಾ೦ವ್.’
‘ತೊ ಗೆಲ್ಯಾರ್ ಮ್ಹಜಿ ಗತ್ ಕಿತೆ೦ ಜಾತೆಲಿ?’
‘ತೊ ಹಾ೦ಗಾ ಆಸ್ಲ್ಯಾರ್ ತುಜಿ ಗತ್ ಕಿತೆ೦ ಜಾತೆಲಿ ಮ್ಹಳ್ಳೆ೦ ಚಿ೦ತುನ್ ಪಳೆ ಮದಾಮ್.’ ಆಪ್ಣಾಕ್ ಹೆರ್ ಕಾ೦ಯ್ ಉಲ೦ವ್ಕ್ ನಾ ಮ್ಹಣ್ಚೆಪರಿ೦ ರೆವೆರೆ೦ಡ್ ಕಾಮಿಲ್ ಉಬೊ ಜಾಲೊ. ‘ತುಕಾ ಫಾಲ್ಯಾ೦ ಸಾ೦ಜೆಪರ‍್ಯಾ೦ಯ್ ವೇಳ್ ಆಸಾ.’
‘ಜೆರೊಮಾಲಾಗಿ೦ ಉಲಯ್ತಾಯ್ ತರ್ ಸೊಡ್‌ದೊಡ್ ಕರಿನಾಕಾ!’ ಜಾಗ್ವಣ್ ದಿಲಿ ಫಾದರ್ ಬಟ್ರಮಾನ್. ‘ಸಯ್ತಾನಾ೦ಚ್ಯೊ ತಾಳ್ಣ್ಯೊ ಅಸಲ್ಯಾಚ್ ಸೊಡ್‌ದೊಡಿ೦ಕ್ ರಾಕೊನ್ ಆಸ್ತಾತ್.’
ಮಿಸೆಸ್ ಲಾಜ್ರಾ ಉಬಿ ಜಾಲಿ.
‘ದೇವ್ ತುಜೆ ಸ೦ಗಿ೦ ಆಸು೦!’ ಮ್ಹಣಾಲೊ ರೆವೆರೆ೦ಡ್ ಕಾಮಿಲ್. ‘ಆನಿ ಸಾರ‍್ಕಿ ವಿ೦ಚವ್ಣ್ ಕರು೦ಕ್ ತುಕಾ ಕುರ‍್ಪಾ ದೀ೦ವ್.’
ತೆ ಸಾ೦ಜೆರ್ ಮಿಸೆಸ್ ಲಾಜ್ರಾನ್ ಜೆರೊಮಾಕ್ ಪಸ೦ದೆಚೆ೦ ರಾ೦ದಪ್ ತಯಾರ್ ಕೆಲೆ೦. ಚಾಯ್ನೀಸ್ ಸೂಪ್, ಬಿಫಾಚಿಂ ಕಾಪಾ೦ ಆನಿ ಬಟಾಟ್ಯಾ೦ಚೆ ಚಿಪ್ಸ್ ತಯಾರ್ ಕೆಲೆ; ಕೆಪ್ಸಿಕಮ್ ಮಿರ‍್ಸಾ೦ಗ್ಯೆ೦ ಬಿತರ್ ಖಿಮಾ ಭರ‍್ನ್ ಗ್ರಿಲ್ಲ್ ಕೆಲ್ಯೊ ಆನಿ ಜೆವ್ಣಾ ಉಪ್ರಾ೦ತ್ ಖಾ೦ವ್ಕ್ ಕ್ಯಾರಮೆಲ್ ಕಸ್ಟರ‍್ಡ್ ತಯಾರ್ ಕರುನ್ ಫ್ರಿಡ್ಜಾ೦ತ್ ದವರ‍್ಲೆ೦.
ಸಾ೦ಜೆಚ್ಯಾ ಸಾತಾ೦ಕ್‌ಚ್ ತಿ೦ ಜೆವಣ್ ಕರ‍್ತಾಲಿ೦ ಜಾಲ್ಲ್ಯಾನ್ ಜೆರೊಮಾಚೆ೦ ಹೋಮ್‌ವರ‍್ಕ್ ಆನಿ ನ್ಹಾಣ್ ಜಾತೆಚ್ ತಿಣೆ ಮೇಜ್ ಮಾ೦ಡ್ಲೆ೦. ರಾ೦ದ್ಪಾಚೊ ಕುರ‍್ಕುರಿತ್ ಪರ‍್ಮಳ್ ಯೆದೊಳ್‌ಚ್ ಕಿಚನಾ೦ತ್ ಫಯ್ಲಾಲ್ಲೊ.
‘ಆಜ್ ಕಿತೆ೦ ವಿಶೇಸ್ ಆಸಾ, ಮಾ೦?’ ಜೆರೊಮಾನ್ ವಿಚಾರ‍್ಲೆ೦ ತರಿ ತಾಚ್ಯಾ ಕಾಳ್ಜಾ೦ತ್ ಫಾರ್ ಜಾತಾಲೆ. ಕ್ಲಾಸಿ೦ತ್ ಅಸಲೆ೦ ಕರ‍್ತುಬ್ ಕರುನ್ ಸಾ೦ಪಡ್ಲೆಲ್ಯಾ೦ಕ್ ಫಾದರ್ ಬಟ್ರಮ್ ಸೊಡ್ಚೊ ಮನಿಸ್ ನ್ಹಯ್.
ಮಿಸೆಸ್ ಲಾಜ್ರಾ ರೆವೆರೆ೦ಡ್ ಕಾಮಿಲಾಚ್ಯಾ ಆಫೀಸಾಕ್ ವೆಚೆ೦ ಹೆರಾ೦ನಿ ಪಳೆವ್ನ್ ತಾಕಾ ಸಾ೦ಗ್‌ಲ್ಲೆ೦.
ತಿಣೆ ಜಾಪ್ ದಿನಾಸ್ತಾ೦ ಖುರ‍್ಸಾಚೊ ಘುರ‍್ತ್ ಕಾಡ್ಲೊ ಆನಿ ಸುಪಾಕ್ ಕುಲೆರ್ ಮಾರ‍್ಲೆ೦. ‘ದೆವಾಚ್ಯೊ ವಾಟೊ ವಿಚಿತ್ರ್,’ ತಿ ಮ್ಹಣಾಲಿ ಜೆರೊಮಾನ್‌ಯಿ ತಶೆ೦ಚ್ ಕೆಲ್ಯಾ ಉಪ್ರಾ೦ತ್. ‘ದೆ೦ವ್ಚಾರಾ೦ಚ್ಯಾ ತಾಳ್ಣ್ಯಾ೦ ಥಾವ್ನ್ ಸಯ್ತಿ ತೊ ಬರೆಪಣ್ ಹಾಡು೦ಕ್ ಸಕ್ತಾ.’
‘ಹಾ೦ವ್ ಸಮ್ಜಾಲೊ ನಾ, ಮಾ೦.’
‘ದೆವಾಚ್ಯೊ ವಾಟೊ ಸಮ್ಜೊ೦ಕ್ ಸುಲಬ್ ನ್ಹಯ್, ಜೆರೊಮ್. ತುಕಾ ತಾಣೆ ತಾಚೆ ಸೆವೆಕ್ ವಿ೦ಚ್ಲಾ ಮ್ಹಣ್ ತು೦ ಪಾತ್ಯೆತಾಯ್?’
‘ಮ್ಹಳ್ಯಾರ್ ಹಾ೦ವೆ೦ ಪಾದ್ರಿ ಜಾಯ್ಜೆ?’
‘ಜಾಯ್ಜೆ ನ್ಹಯ್, ತು೦ ಜಾತೊಲೊಯ್!’ ತಿಣೆ ಮ್ಹಳೆ೦ ದೊಳ್ಯಾ೦ನಿ ಪರ‍್ಜಳ್ ಘೆವ್ನ್. ‘ಮ್ಹಜೆಥಾವ್ನ್ ಪಯ್ಸ್ ಸರ‍್ಲ್ಯಾರಿ ತು೦ ದೆವಾಕ್ ಲಾಗಿ೦ ಜಾತೊಲೊಯ್.’
‘ತು೦ ಮ್ಹಾಕಾ ಪಯ್ಸ್ ದಾಡ್ತಾಯ್, ಮಾ೦?’
‘ವ್ಹಯ್! ತು೦ ಎಕಾ ಬೋರ‍್ಡಿ೦ಗ್ ಹಾವ್ಜಾ೦ತ್ ದಾಖಲ್ ಜಾತೊಲೊಯ್. ರೆವೆರೆ೦ಡ್ ಕಾಮಿಲಾನ್ ಆನಿ ಫಾದರ್ ಬಟ್ರಮಾನ್ ಸರ್ವ್ ವಿಲೆವಾರಿ ಕೆಲ್ಯಾ.’
ಜೆರೊಮಾನ್ ಆಪ್ಲೆ೦ ಕುಲೆರ್ ಮೆಜಾರ್ ಗಳಯ್ಲೆ೦. ‘ಆನಿ ಮುಕಾರ್ ಹಾ೦ವ್ ಚೂಕ್ ಕರಿಸೊ ನಾ, ಮಾ೦!’ ತೊ ರಡ್ಲೊ. ‘ಮ್ಹಾಕಾ ಪಯ್ಸ್ ದಾಡಿನಾಕಾ.’
‘ತು೦ವೆ೦ ಚೂಕ್ ಕರು೦ಕ್‌ನಾ ಮ್ಹಳ್ಳೆ೦ ಮತಿ೦ತ್ ಘೆ.’ ತಿಣೆ ತಿದ್ವಿಲೆ೦. ‘ದೆ೦ವ್ಚಾರಾಚ್ಯಾ ತಾಳ್ಣ್ಯಾ ಮುಕಾ೦ತ್ರ್‌ಚ್ ತುಜೆ ಖಾತಿರ್ ಕಸಲಿ ವಾಟ್ ಆಪ್ಣೆ೦ ವಿ೦ಚ್ಲ್ಯಾ ಮ್ಹಳ್ಳೆ೦ ದೆವಾನ್‌ಚ್ ದಾಕವ್ನ್ ದಿಲಾ೦.’
‘ಮ್ಹಾಕಾ ವಚು೦ಕ್ ನಾಕಾ, ಮ್ಹಾಕಾ ಪಾದ್ರಿ ಜಾ೦ವ್ಕ್‌ಯಿ ನಾಕಾ!’ ಹಳ್ಟಾಚಿ ಬೊಬಾಟ್ ಮಾರ‍್ಲಿ ಜೆರೊಮಾನ್.
‘ತೊ೦ಡ್ ಧಾ೦ಪ್, ದೆ೦ವ್ಚಾರಾ!’ ತಿ ಮ್ಹಣಾಲಿ. ‘ತುಕಾ ನ್ಹಯ್ ಜೆರೊಮ್, ತುಜೆ ಬಿತರ‍್ಲ್ಯಾ ದೆ೦ವ್ಚಾರಾಕ್ ಹಾ೦ವ್ ಫರ‍್ಮಾಯ್ತಾ೦. ಕಸಲೆ ವಾಟೆಕ್ ತಾಕಾ ತು೦ ನಾಡ್ತಾಯ್ ಏ ದೆ೦ವ್ಚಾರಾ? ಎಕೆ ಸ್ತ್ರೀಯೆಲಾಗಿ೦ ಲಗ್ನ್ ಜಾವ್ನ್ ತಾಣೆ ಲ೦ಯ್ಗಿಕತೆಚ್ಯಾ ಮ್ಹೆಳ್ಯಾ೦ತ್ ಲೊಳಾಶೆ೦ ಕರ‍್ತಾಯ್? ಸೊಮಿಯಾಕ್‌ಚ್ ತು೦ವೆ೦ ನಾಡ್ಲೊಯ್ ಪುಣ್ ಮ್ಹಜ್ಯಾ ಪುತಾಕ್ ಪಿಡ್ಡ್ಯಾರ್ ಕರು೦ಕ್ ತುಕಾ ಹಾ೦ವ್ ಸೊಡಿಶಿ೦ ನಾ.’
‘ತು೦ಯಿ ಡೆಡಿಲಾಗಿ೦ ಲಗ್ನ್ ಜಾಲ್ಲಿಯ್!’
‘ವ್ಹಯ್! ಪುಣ್ ಆತಾ೦ ಖ೦ಯ್ ಆಸಾ ತೊ? ಪಿಡ್ಡ್ಯಾರ್ ಜಾವ್ನ್ ಗೆಲೊ. ತಾಚಿ ಆಶಾ ಕೆದಿ೦ಚ್ ಭಾಗಾನಾತ್‌ಲ್ಲಿ. ಹಾ೦ವ್ ನ್ಹಯ್ ತರ್ ದುಸ್ರಿ೦, ಕೋಣ್ ನಾ ತರ್ ಗಟರಾ೦ತ್ಲ್ಯಾ ವೆಬಿಚಾರಿಣಿ೦ಚ್ಯಾ ವೆ೦ಗೆ೦ತ್ ತೊ ಲಿಪ್ತಾಲೊ. ತು೦ವೆ೦ ತಶೆ೦ ಕರು೦ಕ್ ಹಾ೦ವ್ ಸೊಡಿಶಿ೦ ನಾ. ಆತಾ೦ ಉಲವ್ಣೆ೦ ಪುರೊ, ಜೆವಣ್ ಕರ್. ಯೆಕಾಚ್ ಹಫ್ತ್ಯಾ ಬಿತರ್ ತು೦ ಬೋರ‍್ಡಿ೦ಗಾಕ್ ವೆತೊಲೊಯ್.
ಆಪುಣ್ ಸಲ್ವಾಲೊ೦ ಮ್ಹಣ್ ಜೆರೊಮಾಕ್ ಕಳಿತ್ ಜಾಲೆ೦.
ಕಿತ್ಲೆ೦ ಲಿಪಯ್ಲ್ಯಾರಿ ಜೆರೊಮ್ ಪಯ್ಶಿಲ್ಯಾ ಶ್ಹೆರಾ೦ತ್ ಎಕಾ ಬೋರ‍್ಡಿ೦ಗಾಕ್ ಸೆರ‍್ವತಾ ಮ್ಹಳ್ಳಿ ಖಬರ್ ಶಾಳೆ೦ತ್ ಪ್ರಸರ‍್ಲಿ. ತಾಕಾ ಒಳ್ಕೊ೦ಚೆ ಸರ್ವ್ ತಾಚೆರ್ ತಿರಸ್ಕಾರಾಚಿ ದಿಷ್ಟ್ ಘಾಲು೦ಕ್ ಲಾಗ್ಲೆ. ತಾಚೆ ತೇಗ್ ಗುರು ತಾಚಿ೦ ಖೆಳ್ಕುಳಾ೦ ಕರ‍್ತಾಲೆ. ಬೋರ‍್ಡಿ೦ಗಾ೦ತ್ ಘಾಲ್ಚೆ೦ ಆನಿ ಯೆಕಾ ಗುನ್ಯಾ೦ವ್ಕಾರಾಕ್ ತಡಿಪಾರ್ ಕರ‍್ಚೆ೦ ಯೆಕ್‌ಚ್ ಮ್ಹಳ್ಳೆ೦ ಹೆರಾ೦ ವಿದ್ಯಾರ‍್ಥಿ೦ಚೆ ಚಿ೦ತಪ್ ಜಾವ್ನಾಸ್‌ಲ್ಲೆ೦.
ವೆಚ್ಯಾ ಆದ್ಲ್ಯಾ ದಿಸಾ ಜೆರೊಮಾನ್ ಆಪ್ಲ್ಯಾ ಕುಡಾಚ್ಯಾ ಯೆಕ್ಸುರಾಯೆ೦ತ್ ಬಸುನ್ ಡೊಕ್ಟರ್ ಎಲ್ಸೀಟಾಕ್ ಪತ್ರ್ ಲಿಖ್ಲೆ೦.
‘ಮೊಗಾಚ್ಯಾ ಡೊಕ್ಟರ್ ಎಲ್ಸೀಟಾ,
ಮ್ಹಾಕಾ ಪಯ್ಸ್ ದಾಡ್ತಾತ್. ಕಿತ್ಯಾಕ್ ಮ್ಹಳ್ಳೆ೦ ಹಾ೦ವ್ ಜಾಣಾ೦ ತರಿ ಅಶೆ೦ ಪಯ್ಸ್ ಕಿತ್ಯಾಕ್ ಮ್ಹಳ್ಳೆ೦ ಮ್ಹಾಕಾ ಸಮ್ಜಾನಾ. ತು೦, ಎಕ್ ಕಾರಾಣ್ ಬಿಲ್ಕುಲ್ ನ್ಹಯ್. ಹಾ೦ವೆ೦ ಪಳೆಯಿಲ್ಲ್ಯಾ ಸ್ತ್ರೀಯಾ೦ ಪಯ್ಕಿ ತು೦ಚ್ ಸೊಬಿತ್. ತುಕಾ ಕಾ೦ಯ್ ವಾಯ್ಟ್ ಕರು೦ಕ್ ಮ್ಹಾಕಾ ನಾಕಾ. ಪುಣ್ ಯೆಕ್ ಪಾವ್ಟಿ೦ ತುಕಾ ವೆ೦ಗ್ ಮಾರು೦ಕ್ ಮೆಳ್‌ಲ್ಲೆ೦ ಜಾಲ್ಯಾರ್. ಹಾ೦ವ್ ಶಿಕಪ್ ಜಾವ್ನ್ ಪಾಟಿ೦ ಯೆತಾನಾ ತು೦ ಕಾ೦ಯ್ ಲಗ್ನ್ ಜಾವ್ನ್ ಪಯ್ಸ್ ವೆತೆಲೆ೦ಯ್ ಕೊಣ್ಣಾ. ಸಾ೦ಗ್ ಮ್ಹಾಕಾ ಡೊಕ್ಟರ್, ಹಾ೦ವ್ ಅನಿಸ್ಕಳ್ ಭುರ‍್ಗೊ? ಹಾ೦ವೆ೦ ಪಾಪ್ ಆದಾರ‍್ಲೆ೦ಗಿ? ತುಜೊ ಕೆಲ್ಲೆಪರಿ೦ ಹಾ೦ವೆ೦ ಕೊಣಾಯ್ಚೊಯಿ ಮೋಗ್ ಕರು೦ಕ್ ನಾ.
ಗುಡ್‌ಬಾಯ್ ಡೊಕ್ಟರ್, ಗುಡ್ ಬಾಯ್.
ಜೆರೊಮ್ ಲಾಜ್ರಾ’
ಹೆ೦ ಪತ್ರ್ ಬೋವ್ ಚತ್ರಾಯೆನ್ ತಾಣೆ ಪೋಸ್ಟ್ ಕೆಲೆ೦ ಆನಿ ಹ್ಯಾ ಸ೦ಗಿ೦ ಆಪ್ಲ್ಯಾ ಜೀವನಾಚ್ಯಾ ಸರ್ವ್ ಸುಖಾ೦ಚೆರ್ ವ್ಹಡ್ ಯೆಕ್ ಥಾಲೆ೦ ಮಾರ‍್ಲೆ೦ ಆನಿ ತ್ಯಾ ಥಾಲ್ಯಾಚಿ ಚಾವಿ ಪಯ್ಸ್ ಉಡಯ್ಲಿ. ಇತ್ಲ್ಯಾ ಪಯ್ಸ್‌ಗಿ, ತಿ ಚಾವಿ ಮೆಳ್ಚೆಪರಿ೦ ನಾತ್‌ಲ್ಲಿ.
(29 ಅವಸ್ವರಾ೦ತ್ ಮು೦ದರ‍್ತಾ)
ಆದ್ಲ್ಯಾ ಅವಸ್ವರಾಂಕ್ ಹೊ ಗಾಂಚ್ ಚಿಚಾಯಾ :
ರೆವೆಂತ್ಲೆ ಫಾತೊರ್ : ಅವಸ್ವರ್ 1 ತೆ 28
