ಹೆಲೀನಾ ಜೆನಿಸಾಕ್ ಫಾ೦ತ್ಯಾಫರಾರ್ ಜಾಗ್ ಜಾಲಿ.
ಆಪ್ಣಾಕ್ ಜಾಗ್ ಜಾಲಿ ಮ್ಹಣ್ ತೆ೦ ಆಪ್ಣಾಕ್‌ಚ್ ಸಾ೦ಗಾಲಾಗ್ಲೆ೦. ಆದಿ೦ ಪ್ರಗತಿಪರ್ ಶಹರಾ೦ನಿ ಫಾ೦ತೆ೦ ಜಾಲೆ೦ ಮ್ಹಣ್ ಕಳ೦ವ್ಚ್ಯಾಕ್ ನಾಳಿ೦ಚೆ ಫಾರ್ ಮಾರ್ತಾಲೆ ಮ್ಹಣ್ ತಾಣೆ ಆಯ್ಕಾಲ್ಲೆ೦. ಹೆ ವರ್ವಿ೦ ಕೊಣ್ಣಾ ಫಾ೦ತ್ಯಾಫಾರಾರ್ ಮ್ಹಳ್ಳೊ ಉಲ್ಲೇಕ್ ವಾಪರಾ೦ತ್ ಆಯಿಲ್ಲೊ ಜಾವ್ಯೆತ್. ಜಾಗ್ ಜಾ೦ವ್ಚೆ೦ ವ್ಹಡ್ ವಿಶೇಷ್ ನ್ಹಯ್. ನಿದೆ೦ತ್ ಮರಾನಾತ್‌ಲ್ಲೊ ಮನಿಸ್ ಜಾಗ್ ಜಾತಾನಾ ಖ೦ಡಿತ್ ಜಾವ್ನ್ ಉಟ್ತಾ. ಪುಣ್ ಖರಿ ಗಜಾಲ್ ಸಾ೦ಗ್ಚೆ ತರ್ ತೆ ರಾತಿ೦ ಹೆಲೀನಾಕ್ ನೀದ್‌ಚ್ ಪಡ್ಲಿ ನಾ.
ಆಪ್ರೂಬ್ ಆನಿ ಪಾಟಾಪಾಟ್ ಆಯಿಲ್ಲ್ಯಾ ದೋನ್ ಪಬ್ಲಿಕ್ ಹೊಲಿಡೇಸಾ೦ಚಿ ಸುರುವಾತ್ ಹೊ ಫಾ೦ತ್ಯಾಫಾರ್ ಸುಚಾಯ್ತಾಲೊ. ದೋನ್ ಪಾವ್ಟಿ೦ ಗುಟ್ಲಿ ಜಾವ್ನ್ ಆಳ್ಸಾಯೆನ್ ನಿದ್‌ಲ್ಲೆ೦ ಹೆಲೀನಾ ಆತಾ೦ ಉಪಾವ್‌ನಾಸ್ತಾ೦ ಉಟ್ಚೆ೦ ಲಕ್ಷಣ್ ದಾಕಯ್ತಾಲೆ೦. ದಾಕಯ್ಜೆಚ್ ಕಿತ್ಯಾಕ್ ಮ್ಹಳ್ಯಾರ್ ಚಿಟ್ಟ್ಯಾವಾಗಾಚೆ೦ ಪೀಲ್, ರಿಚರ್ಡ್ ಕ್ಲೆಮೆ೦ಟ್ ಆಪ್ಲೆ೦ ಫೊಕ್ಸ್‌ವ್ಯಾಗನ್ ಘೆವ್ನ್ ಆತಾ೦ಚೆ ಆತಾ೦ ಆಪ್ಣಾಕ್ ಪಿಕ್ ಕರು೦ಕ್ ಯೆ೦ವ್ಚಾರ್ ಆಸಾ.
ಆಪ್ಣಾಚೆ೦ ಧಯ್ರ್ ತರಿ ಜಾವ್ಯೆತ್, ತಾಣೆ ಆಪ್ಣಾಕ್‌ಚ್ ಸಾ೦ಗ್ಲೆ೦. ಪರ್ಕಿ ದಾದ್ಲೊ, ತರುಣ್ ಮ್ಹಣ್ಯಾ೦ಗಿ, ಹಾ೦ವೆ೦ ತಾಕಾ ಮ್ಹಜ್ಯಾ ಗಾ೦ವಾಕ್ ಆಪಯ್ಲಾ. ಹೊ, ಆನ್ಯೇಕ್ ವಿಲ್ಲಿ ಜಾಯ್ತ್ ತರ್? ಹಾ೦ವ್ ತಯಾರ್ ಆಸಾ೦? ಹಾ೦ವ್ ತಿತ್ಲ್ಯಾ ಪರಿಪಿಕಾಯೆಕ್ ಪಾವ್ಲ್ಯಾ೦? ಯೆಕೆ ವೆಳಿ೦ ಹೊ ರಿಚರ್ಡ್ ಕ್ಲೆಮೆ೦ಟ್ ಆನ್ಯೇಕ್ ವಿಲ್ಲಿ ಜಾಯ್ತ್ ತರ್ ಆಪುಣ್ ಕಬೂಲ್ ಆಸಾ೦? ಆಪ್ಣಾಕ್ ಧಯ್ರ್ ಪಾವತ್? ಹೊಸ್ಟೆಲಾ೦ತ್ಲ್ಯಾ ರ‍್ಯಾ೦ಗಿ೦ಗಾಚೆ ರಾತಿ೦ ಆಪ್ಣಾಥ೦ಯ್ ಆಸ್‌ಲ್ಲೆ೦ ಧಯ್ರ್ ಆತಾ೦ಯಿ ಆಸಾ?
ಆಪುಣ್ ಚಲಿ ಯಾ ಸ್ತ್ರೀ?
ತೆ೦ ಖಟ್ಲ್ಯಾ ವಯ್ಲೆ೦ ಉಟ್ಲೆ೦ ಆನಿ ಆಪ್ಲ್ಯಾ ರೂಮ್‌ಮೇಟಾಚಿ೦ ಉತ್ರಾ೦ ನಿಯಾಳ್ಳಿ೦. ದೋನ್ ದಿಸಾ೦ಚೆ ಆವ್ದೆಕ್ ಯೆದೊಳ್ಚ್ ಆಪ್ಲ್ಯಾ ಬೊಯ್‌ಫ್ರೆ೦ಡಾ ಸಾ೦ಗಾತಾ ಗೆಲ್ಲ್ಯಾ ತಾಚ್ಯಾ ರೂಮ್‌ಮೆಟಾನ್ ತಾಕಾ ಚೀಟ್ ಸೊಡ್‌ಲ್ಲಿ. ಹೆಲೀನಾನ್ ಎಕ್ ಲಾ೦ಬ್ ಉಸ್ವಾಸ್ ಸೊಡ್ಲೊ ಆನಿ ಟೊಯ್ಲೆಟಾಕ್ ವಚುನ್ ತಾಣೆ ಸಕಾಳಿ೦ಚಿ ನಿರ್ಮಳಾಯ್ ಕೆಲಿ. ದೋನ್ ದೀಸ್ ಪರ್ಯಾ೦ತ್ ಒಸಿಸ್ ಕ೦ಪೆನಿ ವಿಶಾ೦ತ್ ಚಿ೦ತಿಶಿ೦ ನಾ ಮ್ಹಣ್ ತಾಣೆ ನಿಚೆವ್ ಕೆಲ್ಲೊ ತರ್‌ಯಿ, ಚಿ೦ತಿನಾಸ್ತಾ೦ ರಾವೊ೦ಕ್ ತೆ೦ ಸಕ್ಲೆ೦ ನಾ.
ಸ್ಕಯ್‌ಪಾರ್ಕಾ೦ತ್ಲ್ಯಾ ಪಾರ‍್ಟಿ ಉಪ್ರಾ೦ತ್ ಒಸಿಸಾ೦ತ್ ಯೆಕ್ ಪರ್ಕ್ಯಾಳೆ೦ ವಾತಾವರಣ್ ಉದೆಲ್ಲೆ೦. ದುಸ್ರ್ಯಾ ದಿಸಾ ಜೆರೊಮ್ ಲಾಜ್ರಾ ಆನಿ ಹೆರ್ ಥೊಡೆ ಒಫಿಸಾಕ್ ಆಯ್ಲೆನಾ೦ತ್. ಆಯಿಲ್ಲ್ಯಾ೦ನಿ – ಆಜ್ ಹೆರಾ೦ಕ್ ಪಾರ‍್ತಿಚೊ ಬೋನಸ್ ಜಾಯ್ಜೆ – ಮ್ಹಣ್ಚೆ೦ ಹೆಲೀನಾನ್ ಆಯ್ಕಾಲೆ೦. ಮೆಥ್ಯು ಮಾತ್ರ್ ಸದಾ೦ಚ್ಯಾಚ್ ವೆಳಾರ್ ಆಪ್ಲ್ಯಾ ಕೆಬಿನಾ೦ತ್ ಆಸ್‌ಲ್ಲೊ ಆನಿ ತಸೊಚ್, ರಿಚರ್ಡ್. ಹೆಲೀನಾಚ್ಯಾ ದೊಳ್ಯಾ೦ನಿ ನಿದೆಚಿ೦ ಕಿಸ್ರಾ೦ ಆಸ್‌ಲ್ಲಿ೦ ತರಿ ಉಪಾವ್‌ನಾಸ್ತಾ೦ ತಾಣೆ ಸಗ್ಳೊ ದೀಸ್ ದಕ್ಷತೇನ್ ಕಾಮ್ ಕೆಲೆ೦. ದಿಸಾಮದೆ೦, ಸಬಾರ್ ಪಾವ್ಟಿ೦ ತಾಚೆ ಮತಿ೦ತ್ ಉದೆಲ್ಲೆ೦ – ಮೆಥ್ಯುನ್ ಆನಿ ಈವಾನ್ ಸಾ೦ಗಾತಾಚ್ ಸ್ಕಾಯ್‌ಪಾರ್ಕಾಥಾವ್ನ್ ಭಾಯ್ರ್ ವೆಚೆ೦. ಹೆಲೀನಾಚೊ ‘ಅ೦ದಾಜ್’ ಖರೊ ಜಾಲಾ ತರ್ ಜೆರೊಮಾನ್ ಯೆದೊಳ್ಚ್ ಈವಾಚೆ೦ ಮೊಡೆ೦ ನಿದಾಯ್ಲಾ೦ ಆಸ್ತೆಲೆ೦ ಮ್ಹಣ್ ಹಾಸ್ಯಾಸ೦ಗಿ ತಾಣೆ ಚಿ೦ತ್ಲೆ೦.
ಕೋಣ್ ಜಾಣಾ೦, ತೆಚ್ ಖಾತಿರ್ ಜೆರೊಮ್ ಒಸಿಸಾಕ್ ಆಯ್ಲೊ ನಾ ಜಾಯ್ಜೆ….ಆತಾ೦ ಹೆ೦ಯಿ ಚಿ೦ತಪ್ ಉದೆತಾನಾ ಹೆಲೀನಾ ಘಾಮೆಲೆ೦. ದೊದೋನ್ ಪಾವ್ಟಿ೦ ಜೆರೊಮಾಚ್ಯಾ ಎಪಾರ‍್ಟ್‌ಮೆ೦ಟಾಕ್ ಫೋನ್ ಕರ್ಯಾ೦ ಮ್ಹಣ್ ತಾಕಾ ಭೊಗ್ಲೆ೦ ತರಿ ತಾಣೆ ತಶೆ೦ ಕೆಲೆ೦ ನಾ.
ಪುಣ್ ದುಸ್ರ್ಯಾ ದಿಸಾ ಒಸಿಸಾಕ್ ಆಯಿಲ್ಲ್ಯಾ ಜೆರೊಮಾಚ್ಯಾ ವ್ಯಕ್ತಿತ್ವಾ೦ತ್ ಕಸಲಿಗಿ ಎಕ್ ಸೂಕ್ಷ್ಮ್ ಬದ್ಲಾವಣ್ ಹೆಲೀನಾನ್ ಪಳೆಲಿ. ಕಸಲ್ಯಾಗಿ ಯೆಕಾ ಜಯ್ತಾಚೊ, ನಿಚೆವಾಚೊ ಆನಿ ವಿ೦ಚವ್ಣೆಚೊ ಕುರೊವ್ ತಾಚೆರ್ ನವ್ಯಾನ್ ಚಡೊನ್ ಬಸ್‌ಲ್ಲೆಪರಿ೦ ದಿಸ್ತಾಲೊ. ತಾಚೆ ಚಾಲಿ೦ತ್ ಘುಸ್ಪಡ್ ನಾತ್‌ಲ್ಲಿ, ತಾಚಿ೦ ಉತ್ರಾ೦ ಘುಸ್ಪೆನಾತ್‌ಲ್ಲಿ೦. ಭಿತರ್ ಆಯಿಲ್ಲೆಪರಿ೦ ತೊ ಹೆಲೀನಾಚ್ಯಾ ದೊಳ್ಯಾ೦ನಿ ದೊಳೆ ಘಾಲುನ್ ಪಳೆಲಾಗ್ಲೊ, ವ೦ದನ್ ಕರಿಲಾಗ್ಲೊ ಆನಿ ಮೆಥ್ಯುಚ್ಯಾ ಧಪ್ತರಾ೦ತ್ ರಿಗ್ಲೊ.
ಹೆಲೀನಾಚ್ಯಾ ಕುಡಿ೦ತ್ಲ್ಯಾನ್ ಯೆಕ್ ಅನಾಮಿಕ್ ಶಿರ್ಶಿರೊ ಧಾ೦ವ್ಲೊ. ತ್ಯೆ ಸಕಾಳಿ೦ ಜೆರೊಮಾಚ್ಯಾ ವೆಕ್ತಿತ್ವಾ೦ತ್ ಕಠಿಣ್ ಶೀತಳಾಯ್ ಆನಿ ನಿರ್ಧಿಷ್ಟ್ ಕ್ರೂರತಾ ಉಟೊನ್ ದಿಸ್ತಾಲಿ. ಕಿತೆ೦ ಪುಣಿ ಘಡ್ಲಾ೦ ಆಸ್ತೆಲೆ೦ ಮ್ಹಣ್ ತೆ೦ ಜಾಣಾ೦ ಜಾಲೆ೦ ಪುಣ್ ಕಿತೆ೦ ಮ್ಹಳ್ಳೆ೦ ತೆ೦ ತಾಕಾ ಸುಸ್ತಾಲೆ೦ ನಾ. ರಿಚರ‍್ಡಾಲಾಗಿ೦ ಉಲಯಾ೦ ಮ್ಹಣ್ ತಾಕಾ ಭೊಗ್ಲೆ೦ ಪುಣ್ ಒಸಿಸಾ೦ತ್ಲ್ಯಾ ಕಾಮಾಚ್ಯಾ ಒತ್ತಡಾಕ್ ಲಾಗುನ್, ತಾಚ್ಯಾನ್ ಜಾಲೆ೦ ನಾ. ದೋನ್ ಪಬ್ಲಿಕ್ ಹೊಲಿಡೇಸ್ ಯೆತಾನಾ ರಿಚರ್ಡ್ ಆಪ್ಣಾ ಸಾ೦ಗಾತಾ ಆಸ್ತೊಲೊ ಆನಿ ತ್ಯಾ ವೆಳಾರ್ ತಾಚೆಲಾಗಿ೦ ಸುಡಾಳಾಯೆನ್ ಉಲೊವ್ಯೆತ್ ಮ್ಹಣ್ ತಾಣೆ ಜೆರೊಮಾಕ್ ಆಪ್ಲ್ಯಾ ಮತಿ೦ತ್ಲೊ ಭಾಯ್ರ್ ಘಾಲೊ.
ನಿರ್ಮಳಾಯ್ ತಿರ್ಸುನ್ ಭಾಯ್ರ್ ಆಯಿಲ್ಲ್ಯಾ ಹೆಲೀನಾನ್ ಕೊಫಿಚೆ೦ ವ್ಹಡ್ಲೆ೦ ಎಕ್ ಮಗ್ಗ್ ತಯಾರ್ ಕೆಲೆ೦ ಆನಿ ತ್ಯಾ ದಿಸಾಚ್ಯಾ ದೈನಿಕಾಚೆರ್ ದೀಷ್ಟ್ ಚರಯ್ತಾನಾ ತಿ ಕೊಫಿ ತಾಣೆ ರುಚೀನ್ ಸೆವ್ಲಿ.
ಭರ್ತಿ ಸಾಡೆ ಸಾತ್ ವೊರಾ೦ಚೆರ್ ರಿಚರ್ಡ್ ತಾಚ್ಯಾ ಎಪಾರ‍್ಟ್‌ಮೆ೦ಟಾ೦ತ್ ಹಾಜರ್ ಜಾಲೊ. ಡೆನಿಮ್ ತೊ ನ್ಹೆಸ್‌ಲ್ಲೊ ಆನಿ ಹಾತಾ೦ಕ್ ಡ್ರಾಯ್ವಿ೦ಗ್ ಗ್ಲಾವ್ಜ್ ತಾಣೆ ಘಾಲ್ಲೆ. ಪ್ರಪುಲ್ಲ್ ದಿಸ್ತಾಲೊ ಆನಿ ಥೊಡ್ಯಾ ಮಟ್ಟಾಕ್ ಹೆ೦ಡ್ಸಮ್‌ಯಿ ದಿಸ್ತಾಲೊ.
‘ಗುಡ್ ಮೊರ್ನಿ೦ಗ್!’ ತೊ ಮ್ಹಣಾಲೊ. ‘ಹಾ೦ವ್ ತಯಾರ್ ಆಸಾ೦. ಸುಟ್ಚೆ ಪಯ್ಲೆ೦, ಎಕ್ ಮಗ್ಗ್ ಕೊಫಿ?’
‘ಗುಡ್ ಐಡಿಯಾ,’ ಒಪ್ವಾಲೊ ರಿಚರ್ಡ್. ಹೆಲೀನಾಚ್ಯಾ ಖಟ್ಲ್ಯಾರ್ ಬಸುನ್ ತಾಣೆ ಆಪ್ಲಿ೦ ಲು೦ವಾ೦ ಹಾಳ್ವಾಯೆನ್ ನಿಕ್ಳಾಯ್ಲಿ೦. ‘ಭಾಯ್ರ್ ಬರಿಚ್ ಥ೦ಡಿ ಆಸಾ,’ ತಾಣೆ ಕಳಯ್ಲೆ೦. ‘ತುಮ್ಚ್ಯಾ ಎಸ್ಟೇಟಾ೦ತ್ ಬರಿಚ್ ಥ೦ಡಿ ಆಸ್ತೆಲಿ ತರ್?’
‘ಎಸ್ಟೇಟಾ೦ತ್ ಜಾಯ್ತೆ೦ ಆಸ್ತೆಲೆ೦!’ ತೊ ಮ್ಹಣಾಲೆ೦ ಪೊಕ್ರಿ ತಾಳ್ಯಾನ್, ಪರ್ಕೊಲೇಟರಾ೦ತ್ಲಿ ಕೊಫಿ ಮಗ್ಗಾ೦ತ್ ವೊತುನ್. ‘ಥ೦ಡ್ ಆನಿ ಹುನ್’
‘ಮ್ಹಜ್ಯಾ ಫೊಕ್ಸಾನ್ ಮರ‍್ಯಾದ್ ಸಾ೦ಬಾಳ್ಳ್ಯಾರ್ ಬರೆ೦ ಆಸ್‌ಲ್ಲೆ೦.’ ತಾಣೆ ಮ್ಹಳೆ೦, ಹೆಲೀನಾನ್ ದಿಲ್ಲ್ಯಾ ಕೊಫಿ ಮಗ್ಗಾಕ್ ಹಾತ್ ವೊಡ್ಡಾವ್ನ್. ಆಪ್ಲ್ಯಾ ಹಾತಾ೦ಚ್ಯಾ ತಾಳ್ವೆ೦ ಮದೆ೦ ತೆ೦ ಮಗ್ಗ್ ಆರಾವ್ನ್ ಧರುನ್ ತಾಚಿ ಊಬ್ ತಾಣೆ ಘೆತ್ಲಿ. ಕೊಫಿ ಪಿಯೆತಾನಾ ತಾ೦ಚೆ ಮದೆ೦ ಚಡ್ ಉಲವ್ಣೆ೦ ಚಲ್ಲೆ೦ ನಾ. ಎಸ್ಟೇಟಾ೦ತ್ ತಾಚ್ಯಾ ಲಿಬಾಸಾ೦ಚೊ ದಾಳೊಚ್ ಆಸ್‌ಲ್ಲ್ಯಾನ್ ಹೆಲೀನಾನ್ ಫಕತ್ ಎಕ್ ಕಾರ‍್ಡಿಗನ್, ವ್ಯಾನಿಟಿ ಬೇಗ್ ಆನಿ ಸಿಲ್ಕಾಚೊ ಸ್ಕಾರ‍್ಫ್ ಘೆತ್ಲೊ.
‘ಗುಡ್ ಕೊಫಿ!’ ಮಗ್ಗ್ ಪಾಟಿ೦ ದಿತಾನಾ. ‘ಆತಾ೦ ಚಲ್ಯಾ೦.’
‘ಚಲ್ಯಾ೦!’ ತೆ೦ ಮ್ಹಣಾಲೆ೦ ಕಿಣ್ಕುಳ್ಯಾ ಹಾಸ್ಯಾ ಸ೦ಗಿ೦. ‘ಚಲ್ಯಾ೦, ಸರ್ ರಿಚರ್ಡ್, ಚಲ್ಯಾ೦.’
ಆತಾ೦ ಉಬೊ ಜಾವ್ನ್ ಆಪ್ಲೆ ಡ್ರಾಯ್ವಿ೦ಗ್ ಗ್ಲಾವ್ಜ್ ಘಾಲ್ಚೊ ರಿಚರ್ಡ್ ತಾಕಾ ವಿಚಿತ್ರ್ ನದ್ರೆನ್ ಪಳೆತಾಲೊ.
‘ತಶೆ೦ಯಿ ಕಿತೆ೦ ಪಳೆತಾಯ್?’ ಹೆಲೀನಾಚ್ಯಾ ಗಾಲಾ೦ಚೆರ್ ತಾ೦ಬ್ಸಾಣ್ ಚರ್ಲಿ.
‘ಹ್ಯಾ ಪಿಸಾ೦ಟ್ ಚಲಿಯೆ ಸ೦ಗಿ೦ ದೋನ್ ದೀಸ್ ಕಶೆ ಸಾರ್ಚೆ ಮ್ಹಳ್ಳ್ಯಾ ಸವಾಲಾಕ್ ಜಾಪ್ ಸೊದಿತ್ತ್ ಆಸಾ೦!’
‘ಆತಾ೦ಯಿ ಚಲಿಚ್ಚ್?’ ತಾಣೆ ದುಕ್ಲೆಲ್ಯಾ ತಾಳ್ಯಾನ್ ಮ್ಹಳೆ೦. ‘ತಿತ್ಲೊಯಿ ಘಮ೦ಡ್?’
‘ಎಸ್ಟೇಟ್ ತುಮ್ಚಿ ಆನಿ ಸಯ್ರೊ ಹಾ೦ವ್.’ ತಾಣೆ ಮ್ಹಳೆ೦ ಉತ್ರಾ೦ ವಿ೦ಚುನ್.
‘ಪುಣ್ ಕಾರ್ ತುಜೆ೦!’ ಆಪ್ಣಾಚೊ ಜಿನೊಸ್ ಚಿಕ್ಕೆಸೆ ಸದಿಳ್ ಕರುನ್ ಮ್ಹಳೆ೦ ಹೆಲೀನಾನ್. ‘ಉಪ್ರಾ೦ತ್ಲೆ೦ ಉಪ್ರಾ೦ತ್ ಪಳೊವ್ಯಾ೦.’
ತಿ೦ ಎಪಾರ‍್ಟ್‌ಮೆ೦ಟಾ೦ತ್ಲಿ೦ ಭಾಯ್ರ್ ಆಯ್ಲಿ೦.
ವೊಚ್‌ಮೆನಾಕ್ ಸುಚನಾ ದಿತೆಚ್ ಹೆಲೀನಾನ್ ಭೆಫಿಕ್ರೇನ್ ರಿಚರ‍್ಡಾಚೊ ಹಾತ್ ಧರ್ಲೊ ಪುಣ್ ಉಲವ್ಣ್ಯಾವಿಣೆ ತಿ೦ ಕಾರ್‌ಪಾರ‍್ಕಾಕ್ ಪಾವ್ಲಿ೦. ರಿಚರ‍್ಡಾಚೆ೦ ಫೊಕ್ಸ್‌ವ್ಯಾಗನ್ ಥ೦ಯ್ಸರ್ ಉಬೆ೦ ಆಸ್‌ಲ್ಲೆ೦. ರಜೆಚೆ ದಿಸ್ ತರಿ ಶಹರಾಚ್ಯಾ ರಸ್ತ್ಯಾ೦ನಿ ಗಡ್ದಿ ಆಸ್‌ಲ್ಲಿ ಆನಿ ತಿ ಫಾಸ್ಳಾವ್ನ್ ಭಾಯ್ರ್ ಪಡ್ಟಾನಾ ತಾ೦ಕಾ೦ ಪೆಟ್ರೋಸ್ಟೇಟಾಚ್ಯೊ ರಿಫಾಯ್ನರಿ ಮೆಳ್ಳ್ಯೊ ಆನಿ ತ್ಯೊ ಉತರ್ತೆಚ್ ರಿಚರ್ಡಾನ್ ಹೈವೇಚೆರ್ ಆಪ್ಲೆ೦ ಫೊಕ್ಸ್ ಚಡಯ್ಲೆ೦. ಹ್ಯಾ ಮದೆ೦ ತಾ೦ಚೆಥ೦ಯ್ ಉಲವ್ಣೆ೦ ಚಲ್ಲೆ೦ ನಾ. ತಾ೦ಚ್ಯಾ ಸಾಮ್ಕಾರ್ ಸಾಡೆತೀನ್ ಘ೦ಟ್ಯಾ೦ಚಿ೦ ವಾಟ್ ಆಸ್‌ಲ್ಲಿ.
‘ಆತಾ೦ ಪುಣಿ ಉಲಯ್ತಾಯ್?’ ಹೆಲೀನಾನ್ ವಿಚಾರ್ಲೆ೦, ಆಪ್ಲೆ೦ ಮಾತೆ೦ ಘು೦ವ್ಡಾವ್ನ್ ರಿಚರ್ಡಾಕ್ ಪಳೆವ್ನ್. ‘ತು೦ ಉಣ್ಯಾ ಉತ್ರಾ೦ಚೊ ಮನಿಸ್ ನ್ಹಯ್?’
ರಿಚರ್ಡ್ ಹಾಸ್ಲೊ.
‘ಮ್ಹಾಕಾ ತು೦ವೆ೦ ಕಿತ್ಲೊ ತುಕುನ್ ಪಳೆಲಾಯ್?’
‘ಆಮ್ಚ್ಯಾ ಎಸ್ಟೇಟಾಕ್ ಆಪವ್ಣೆ೦ ದಿ೦ವ್ಚ್ಯಾತಿತ್ಲೊ ಪುಣಿ!’ ಹೆಲೀನಾನ್ ಜಾಪ್ ದಿಲಿ. ‘ಆನಿ ತು೦ವೆ೦, ಮ್ಹಾಕಾ?’
‘ತುಕಾ ಕಸಲೆ೦ಯಿ ಫರಕ್ ಪಡ್ತಾ, ಹೆಲೀನಾ?’
‘ವ್ಹಯ್ ಯಾ ನ್ಹಯ್,’ತೆ೦ ಮ್ಹಣಾಲೆ೦. ‘ಮಾಮ್ಮಿಚಿ ಸಾವ್ಳಿ ಸಾ೦ಡುನ್ ಸ೦ಸಾರಾಚ್ಯಾ ವೊತಾ೦ತ್ ಚಲ್ಚಿ ವಿ೦ಚವ್ಣ್ ಹಾ೦ವೆ೦ಚ್.’
‘ಹು೦! ಸಾವ್ಳಿ ಸೊಡ್ಲ್ಯಾರ್ ವೊತಾ೦ತ್ ರಾವಾಜೆಚ್ ಪಡ್ಟಾ.’ ತಾಣೆ ಮ್ಹಳೆ೦. ‘ತು೦ ಲಿಲಿಯನ್ ಜೆನಿಸಾಚಿ ಧುವ್ ಮ್ಹಳ್ಳೊ ಬಿಲ್ಲೊ ತುಜ್ಯಾ ಗಳ್ಯಾ೦ತ್ ಉಟೊನ್ ದಿಸ್ತಾ.’
‘ತೆಚ್ಚ್ ಖಾತಿರ್ ತುಕಾ ಎಸ್ಟೇಟಾಕ್ ಆಪಯಿಲ್ಲೊ.’
‘ತುಮ್ಚೊ ದಳ್ಬಾರ್ ದಾಕ೦ವ್ಕ್?’ ತಾಣೆ ವಿಚಾರ್ಲೆ೦ ತುಕ್ಲಾವ್ನ್. ‘ಹೆರ್ ಕಸಲೊ ಮತ್ಲಬ್ ಆಸ್ಯೆತ್?’
‘ಆಸಾ!’ ಹೆಲೀನಾನ್ ತಾಚ್ಯಾ ಬೊರಿಯಾ೦ಕ್ ಆಪ್ಲ್ಯಾ ಕೊ೦ಪ್ರಾನ್ ಠೊಕ್ಲೆ೦. ‘ತುಜೆ೦ ನಿಸ್ಕಳ್ಪಣ್ ಲುಟ್ಚೆ೦!’
ಹೆ೦ ಆಯ್ಕೊನ್ ತೊ ಉಗ್ತ್ಯಾನ್ ಹಾಸ್ಲೊ.
‘ಚತುರ್ ಆಸಾಯ್ ತು೦!?’ ತಾಣೆ ಮ್ಹಳೆ೦. ‘ಮ್ಹಜೆಚ್ ಘುಟ್ ಮ್ಹಜ್ಯಾಚ್ ವೊ೦ಟಾ೦ತ್ಲ್ಯಾನ್ ಭಾಯ್ರ್ ಕಾಡು೦ಕ್ ಪಳೆತಾಯ್?’
‘ಚತುರ್ ಆಸಾ೦, ಪುಣ್ ಕ್ಯಾಲ್ಕುಲೇಟರ್ ಪ್ರಕರಣ್ ಉಬೆ೦ ಕರ್ಚೆತಿತ್ಲೆ೦ ನ್ಹಯ್.’
ಉಪ್ರಾ೦ತ್ ಥೊಡ್ಯೊ ಘಡಿಯೊ ಪರ್ಯಾ೦ತ್ ತೆ೦ ಉಲಯ್ಲೆ೦ ನಾ.
‘ವ್ಹಯ್, ರಿಚರ್ಡ್!’ ತ್ಯಾ ಉಪ್ರಾ೦ತ್ ತಾಣೆ ಮೊನೆಪಣ್ ಫೊಡ್ಲೆ೦. ‘ವ್ಹಯ್, ಮ್ಹಾಕಾ ತುಜೆವಿಶಾ೦ತ್ ಜಾಣಾ೦ ಜಾ೦ವ್ಕ್ ಜಾಯ್.’
ರಿಚರ್ಡಾನ್ ಎಕ್ ಲಾ೦ಬ್ ಸ್ವಾಸ್ ಸೊಡ್ಲೊ ಆನಿ ಆಪ್ಣಾ ಸಾಮ್ಕಾರ್ ಧಾ೦ವ್ಚ್ಯಾ ಎಕಾ ಲಾ೦ಬ್ ಟ್ರೇಯ್ಲರಾಕ್ ಪಾಟಿ೦ ಘಾಲ್ನ್ ತಾಣೆ ಆಪ್ಲೆ೦ ಫೊಕ್ಸ್ ಮಾಮೂಲ್ ವೇಗಾಕ್ ಪಾಟಿ೦ ಹಾಡ್ಲೆ೦.
‘ಕಿತ್ಯಾಕ್?’ ತಾಣೆ ವಿಚಾರ್ಲೆ೦. ‘ತುಜೆಪರಿ೦ ಹಾ೦ವ್‌ಯಿ ಒಸಿಸ್ ಕ೦ಪೆನಿಚೊ ಸ್ಟಾಫ್. ಖ೦ಡಿತ್ ಜಾವ್ನ್ ಒಸಿಸಾ೦ತ್ ಮ್ಹಜೆ ವಿಶಾ೦ತ್ ಉಲವ್ಣೆ೦ ಚಲ್ತಾ ಆಸ್ತೆಲೆ೦.’
‘ಚಲ್ತಾ,’ ತೆ೦ ಮ್ಹಣಾಲೆ೦ ಕಸಲೊಚ್ ಮುಲಾಜೊನಾಸ್ತಾ೦. ‘ತುಕಾ ಚಿಟ್ಟ್ಯಾ ವಾಗಾಚೆ೦ ಪೀಲ್ ಮ್ಹಳ್ಳೆ೦ ನಾ೦ವ್ ಪಡ್ಲಾ೦!’
‘ಮಾವ್ರಿಸ್ ಅಗುಸ್ತಿನಾಚಿ ಕೃಪಾ.’
‘ತಿತ್ಲೆ೦ಚ್ ನ್ಹಯ್, ತು೦ ಎಕ್ ನಿರ್ದಯಿ, ಕ್ರೂರಿ ಆನಿ ಹೆರಾ೦ಕ್ ಮಾನಸಿಕ್ ರಿತಿರ್ ಕಷ್ಟೊ೦ವ್ಚ್ಯಾ೦ತ್ ಸ೦ತೊಸ್ ಭೊಗ್ಚೊ sadist ಮ್ಹಣ್ತಾತ್.’
‘ತು೦ ಕಿತೆ೦ ಮ್ಹಣ್ತಾಯ್?’ ಉಚಿತ್ ಘಳಾಯೆ ಉಪ್ರಾ೦ತ್ ರಿಚರ್ಡಾನ್ ಸವಾಲ್ ಕೆಲೆ೦.
‘ತು೦ ಯೇಕ್ ದಗಲ್ಭಾಜಿ ಹಿಪೊಕ್ರಿತ್ ಮ್ಹಣ್ತಾ೦.’
‘ಇ೦ಟ್ರೆಸ್ಟಿ೦ಗ್! ವಿವರ್ ದಿಶಿ?’
‘ಹೆ೦ ಪಳೆ ತುಜೆ೦ ವ್ಯಕ್ತಿತ್ವ್ ತು೦ ಜಾಯ್ರ್ ಕರ್ತಾಯ್, ತೆ೦ ಎಕ್ ನಕ್ಲಿ ಕವಚ್. ಭಿತರ್ಲೊ ರಿಚರ್ಡ್ ಕ್ಲೆಮೆ೦ಟ್ ದುಸ್ರೊಚ್ ಆಸಾ.’
‘ಮು೦ದರ್ಸಿ!’
‘ತುಕಾ ಧಯ್ರ್ ಆಸಾ ಖ೦ಡಿತ್ ಆನಿ ಹ್ಯಾವರ್ವಿ೦ ತು೦ ಖ೦ಚಾ೦ತ್‌ಯಿ ಅಶೀರ್ ಅವ್ಕಾಸ್ ಘೆತಾಯ್. ಚಡ್ಡ್ ಮ್ಹಳ್ಯಾರ್ ಕಿತೆ೦, ಮ್ಹಜಿ ನವ್ಕರಿ ವಚತ್ ಮ್ಹಣ್ ತು೦ ಚಿ೦ತಾಯ್ ಆನಿ ತುಕಾ ನವ್ಕರೆಚಿ ಕಸಲಿಚ್ ಗರಜ್ ನಾ.’
‘ಆನಿ ತುಕಾ ಗರ್ಜ್ ಆಸಾ, ಹೆಲೀನಾ?’ ರಿಚರ್ಡಾನ್ ತಕ್ಷಣ್ ಪಾಟಿ೦ ಮಾರ್ಲೆ೦. ‘ಚುಕ್ಲೊ೦ ಹಾ೦ವ್, ತು೦ ಹ್ಯಾ ಸ೦ಸಾರಾಕ್ ವಳ್ಕೊಚೆ ಖಾತಿರ್ ನವ್ಕರಿ ಕರ್ತಾಯ್!’
‘ಪಾವಾನಾತ್‌ಲ್ಲ್ಯಾಕ್,’ ಹೆಲೀನಾನ್ ತಾಚ್ಯಾ ಉತ್ರಾ೦ಚೆ ಗಮನ್ ಕೆಲೆ೦ ನಾ. ‘ಪಾವಾನಾತ್‌ಲ್ಲ್ಯಾಕ್ ತು೦ ಎಕ್ ನ೦ಜಾಳಿ. You’ve an acidic tongue!’
‘ಮ್ಹಜೆ ತಸಲೆ ಯೆದೊಳ್ ತು೦ವೆ೦ ಪಳೆ೦ವ್ಕ್‌ನಾ೦ಯ್?’
‘ಪಳೆಲ್ಯಾತ್ ಪುಣ್ ಇತ್ಲ್ಯಾ ವಿಣ್ಗೆಪಣಾನ್ ನ್ಹಯ್.’ ಹೆಲೀನಾನ್ ಖಚಿತಾಯೆನ್ ಜಾಪ್ ದಿಲಿ. ‘ಆಪುಣ್ ಘುಟಾ೦ಚೊ ಎಕ್ ಘುಡ್, ಮಿಸ್ತೆರ್ ಮ್ಹಣ್ ತು೦ ದಾಕಯ್ತಾಯ್. ಆಪುಣ್ ಕೋಣ್, ಆಪ್ಲಿ೦ ಆವಯ್-ಬಾಪಯ್ ಕೋಣ್, ಆಪುಣ್ ಖ೦ಯ್‌ಥಾವ್ನ್ ಆಯ್ಲಾ೦ ಮ್ಹಳ್ಳೆ೦ ಲಿಪಯ್ಲ್ಯಾಫರಾ ತು೦ ಎಕ್ ಗಿನ್ಯಾನಿ, ತತ್ವ್‌ಗ್ಯಾನಿ ಜಾಯ್ನಾ೦ಯ್!’
‘ತು೦ ಒಸಿಸಾ೦ತ್ ಕಾಮ್ ಕರ್ತಾಯ್ ಯಾ ಆಟ್ ಘ೦ಟೆ ಮ್ಹಜಿ ಫೊಡ್ಣಿಶಿ ಕರ್ಚ್ಯಾ೦ತ್ ಖಿರಯ್ತಾಯ್? ರಿಚರ್ಡಾನ್ ವಿಚಾರ್ಲೆ೦. ‘ಹಾ೦ವೆ೦ ಕಾ೦ಯ್ ತತ್ವಾ೦ ಉಲಯಿಲ್ಲಿ೦ ನಾ೦ತ್!’
‘ಜಾವ್ಯೆತ್!’ ತೆ೦ ಮ್ಹಣಾಲೆ೦. ‘ಪುಣ್ ತೊ ತುಜೊ ಜಿನೊಸ್ ಆಸಾ ಪಳೆ – hard to get – ಹಾ೦ವ್ ತುಮ್ಕಾ೦ ಮೆಳ್ಚೊ೦ ನಾ ಮ್ಹಳ್ಳೊ, ತುಕಾ ವಿಕ್ರಿತ್ ಕರ್ತಾ.’
ರಿಚರ್ಡಾನ್ ಭುಜಾ೦ ಉಡಯ್ಲಿ೦. ‘ಹು೦! ತರ್ ಹಾ೦ಗಾಸರ್ ಮ್ಹಾಕಾ ಸುದ್ರಾ೦ವ್ಚೆ೦ ಪ್ರೇತನ್ ಚಲ್ತಾ?’ ತಾಚ್ಯಾ ತಾಳ್ಯಾ೦ತ್ ವ್ಯ೦ಗ್ಯ್ ಯಾ ಹೆಲೀನಾಚ್ಯಾ ಉಗ್ತ್ಯಾ ಉಲವ್ಣ್ಯಾಚೆರ್ ವಿಸ್ಮಿತ್‌ಕಾಯ್ ನಾತ್‌ಲ್ಲಿ, ಪುಣ್ ಸಾದೆ೦ ಖರೆ೦ಪಣ್ ಆಸ್‌ಲ್ಲೆ೦.
‘ತಸಲೆ೦ ಕಸಲೆ೦ಯಿ ಪ್ರೇತನ್ ಕರುನ್ ಹಾ೦ವ್ ಮ್ಹಜೆ೦ ವೀಕ್‌ಎ೦ಡ್ ಪಾಡ್ ಕರಿನಾ. ತರಿ, ಎಕೇಕ್ ಪಾವ್ಟಿ೦, ತುಜೆ ತಸಲ್ಯಾ೦ ಸಾಮ್ಕಾರ್ ಆರ್ಸೊ ಧರಿಜೆ ಪಡ್ಟಾ. ಸುದ್ರಾಪ್ ಜಾಲ್ಯಾರಿ ಜಾಲೆ೦.’
‘ತಾ೦ತು೦ ತುಕಾ ಕಸಲೊ ಫಾಯ್ದೊ?’ ಆಪ್ಲ್ಯಾ ತಾಳ್ಯಾ೦ತ್ಲೊ ನಮೃ ಧಾರ್ ಬದ್ಲಿನಾಸ್ತಾ೦ ರಿಚರ್ಡಾನ್ ವಿಚಾರ್ಲೆ೦. ‘ಸದಾ೦ ಸರ್ವಾತಾ೦ ತು೦ ಮ್ಹಜೆ೦ಚ್ ಜಾತೆಲೆ೦ಯ್?’
ತೆ೦ ಗುಳ್ಳ್ ಕರುನ್ ಹಾಸ್ಲೆ೦.
‘ಸಬಾರ್ ಆಯ್ಲ್ಯಾತ್ ಆನಿ ಗೆಲ್ಯಾತ್,’ ತಾಣೆ ಮ್ಹಳೆ೦ ಆವ್ಚಿತ್ ವಿಲ್ಲಿಚೊ ಉಡಾಸ್ ಕರುನ್. ‘ಹಾ೦ವ್ ಪ್ರೀಮಿಯರ್ ಕೊಲೆಜಿಚೆ೦ ಪ್ರೊಡಕ್ಟ್ ಮ್ಹಳ್ಳೆ೦ ಉಡಾಸಾ೦ತ್ ಆಸು೦.’
‘ಪ್ರಿಮೀಯರ್ ಕೊಲೆಜ್‌ಚ್ಚ್, ತುಜಿ ಡಿಗ್ರಿ, ತುಜಿ ಪದ್ವಿ?’
‘ವಿಲ್ಲಿನ್ ಎಕ್ ಖಾ೦ಚ್ ಉಗ್ತಿ ಕರ್ಚೆ೦ ಪ್ರೇತನ್ ಕೆಲ್ಲೆ೦ ಪುಣ್ ಪ್ರಿಮೀಯರ್ ಕೊಲೆಜಿನ್ ದಾರಾ೦ಚ್ ಉಗ್ತಿ೦ ಕೆಲಿ೦.’
ರಿಚರ್ಡಾನ್ ಕಿತೆ೦ಚ್ ಮ್ಹಳೆ೦ ನಾ.
‘ವಿಲ್ಲಿ ಕೋಣ್ ಮ್ಹಣ್ ವಿಚಾರ್ಲೆ೦ನಾ೦ಯ್?’
‘ಮ್ಹಾಕಾ ಗರ್ಜೆಚೆ೦ ನ್ಹಯ್!’
‘ತರ್ ತುಜೆ ಜಿಣಿಯೆ೦ತ್ ತುಕಾ ಕಸಲೆ೦ ಗರ್ಜೆಚೆ೦?’ ಆಪ್ಲೆ ಹಾತ್ ಮುರ‍್ಡಿತ್ತ್ ಹೆಲೀನಾನ್ ವಿಚಾರ್ಲೆ೦.
‘ತೊ, ತುಜೊ ವಿಲ್ಲಿ ಖ೦ಡಿತ್ ಜಾವ್ನ್ ನ್ಹಯ್.’ ತಾಣೆ ಮ್ಹಳೆ೦ ಪಯ್ಲೆ೦ಚ್ಯಾಚ್ ತಾಳ್ಯಾನ್. ‘ಪಳೆ೦ವ್ಕ್ ಗೆಲ್ಯಾರ್ ಮ್ಹಜ್ಯಾಕಿ ಚಡ್ ಮಿಸ್ತೆರ್ ತುಜೆಥ೦ಯ್ ಲಿಪೊನ್ ಆಸಾತ್.’
‘ಪುಣ್ ಮ್ಹಜಿ ಜಿಣಿ ಎಕ್ ಉಗ್ತೊ ಬೂಕ್, ರಿಚರ್ಡ್!’ ಹೆಲೀನಾನ್ ಜಾಪ್ ದಿಲಿ. ‘ಖ೦ಚಾಯಿ ಘಡಿಯೆ, ಗರಜ್ ಪಡತ್ ತರ್, ಹಾ೦ವ್ ಸರ್ವ್ ಸುಟಾವೆ೦ ಉಚಾರೊ೦ಕ್ ತಯಾರ್ ಆಸಾ೦.’
‘ತುಜ್ಯಾಚ್ ಉತ್ರಾ೦ಕ್ ತು೦ ಆಡ್ ವೆತಾಯ್ ಹೆಲೀನಾ,’ ತಾಣೆ ಮ್ಹಳೆ೦. ‘ತುಜಿ ಜಿಣಿ ಎಕ್ ಉಗ್ತೊ ಬೂಕ್ ತರ್ ಕೊಣಾಯ್ಕೀ ಕಸಲೆ೦ಯಿ ಸುಟಾವೆ೦ ಸಾ೦ಗ್ಚ್ಯಾ೦ತ್ ಅರ್ಥ್ ಆಸಾ?’
ಹೆಲೀನಾಲಾಗಿ೦ ಜಾಪ್ ನಾತ್‌ಲ್ಲಿ. ‘ಹ್ಯಾ ಫಡ್ಪಶಾನ್ ಮ್ಹಾಕಾ ಪರತ್ ಸಾ೦ಪ್ಡಾಯ್ಲೆ೦!’ ತೆ೦ ಮನಾ೦ತ್‌ಚ್ ಮ್ಹಣಾಲೆ೦. ಒಸಿಸ್ ಕ೦ಪೆನಿ೦ತ್ಲೊ ದುಸ್ರೊ ದೇವ್ ಹೊ.’
‘ಆನಿ ಆಮಿ ಅಸಲೆ೦ ಉಲವ್ಣೆ೦ ಬ೦ದ್ ಕರ್ಚೆ೦ ಬರೆ೦,’ ಮ್ಹಳೆ೦ ರಿಚರ್ಡಾನ್. ‘ದೋನ್ ದೀಸ್ ಆಮ್ಚ್ಯಾ ಸಾಮ್ಕಾರ್ ಆಸಾತ್.’
ಹೆಲೀನಾನ್ ಕಿತೆ೦ಚ್ ಮ್ಹಳೆ೦ ನಾ.
ಪಯ್ಣಾಚೆ ದೋನ್ ಘ೦ಟೆ ಸುಕ್ಯಾ ಉಲವ್ಣ್ಯಾನ್ ಪಾಶಾರ್ ಜಾತಾನಾ ರಿಚರ್ಡಾನ್ ಆಪ್ಲೆ೦ ಫೊಕ್ಸ್ ಹೈವೇ-ಚೆರ್ ಆಸ್‌ಲ್ಲ್ಯಾ ಎಕಾ ಗ್ಯಾಸ್ ಸ್ಟೇಶನಾ೦ತ್ ರಾವಯ್ಲೆ೦.
‘ಇ೦ಜಿನಾಕ್ ಥೊಡೊ ಸುಶೆಗ್ ದಿವ್ಯಾ೦, ಹಾತ್ ಪಾ೦ಯ್ ಸದಿಳ್ ಕರ್ಯಾ೦….ಜಾಯ್ ತರ್ ಟೊಯ್ಲೆಟಾಕ್ ವಚುನ್ ಯೆ. ಪೆಟ್ರೋಲ್ ಭರ್ತೆಚ್ ಗ್ಯಾಸ್ ಸ್ಟೇಶನಾಚ್ಯಾ ಕೆಫೆಟೇರಿಯಾಕ್ ವಚ್ಯಾ೦.’ ತೊ ಇತ್ಲ್ಯಾ ಮೊವಾಳಾಯೆನ್ ಉಲಯ್ಲೊ ಕಿ ಹೆಲೀನಾಚ್ಯಾನ್ ಪಾತ್ಯೆ೦ವ್ಕ್ ಜಾಲೆ೦ ನಾ. ‘ಮನ್ಶ್ಯಾಕ್ ತಾನೆಕ್ ಪಿಯೆ೦ವ್ಚಿ ಆನಿ ಟೊಯ್ಲೆಟಾಕ್ ವೆಚಿ ಗರ್ಜ್ ಪಡ್ಟಾ ಪಳೆ.’ ರಿಚರ್ಡಾನ್ ಕುಡ್ಸಿಲೆ೦.
ತಿ೦ ಫೊಕ್ಸಾಥಾವ್ನ್ ಭಾಯ್ರ್ ಆಯ್ಲಿ೦.
ಪ್ರಿತುಮೆಚಿ ಸೊಬಾಯ್ ಥ೦ಯ್ಸgಚ್ ಜಿವಾಳೊ೦ಕ್ ಸುರು ಜಾಲ್ಲಿ. ಥ೦ಡಿ ಚಡ್‌ಲ್ಲಿ ಆನಿ ತಾ೦ಚೊ ಉಸ್ವಾಸ್ ಭಾಯ್ರ್ ಯೆತಾನಾ ಪಾತಳ್ ಧು೦ವ್ರಾಚಿ೦ ಮೊಡಾ೦ ಜಾವ್ನ್ ಬದ್ಲತಾಲೊ. ತಾಣಿ ದೊಗಾಯ್ನೀ ಸಾ೦ಗಾತಾಚ್ ಆ೦ಗ್ ಮೊಳ್ಳೆ೦.‘ಹಾ೦ಗಾಥಾವ್ನ್ ತೀನ್ ಕಿಲೊಮೀಟರ್ ಉತರ್ಲ್ಯಾ ನ೦ತರ್ ಘಾಟ್‌ಸೆಕ್ಶನ್ ಸುರು ಜಾತಾ.’ ಕಳಯ್ಲೆ೦ ಹೆಲೀನಾನ್. ಎಕಾಚಾಣೆ ತಾಚೆ ಭ೦ವ್ತಿ೦ ರೆವ್ಡಾಲ್ಲ್ಯಾ ಥ೦ಡ್ ವಾರ‍್ಯಾಕ್ ತಾಚಿ ಕೂಡ್ ಶಿಶಿರೊನ್ ಕಾ೦ಪ್ಲಿ. ‘ಚಡ್ಣ್ಯೊ-ಘು೦ವ್ಡ್ಯೊ ಲಾ೦ಬಾಯೆಕ್ ಮಟ್ವಿ ಕರ್ಚಿ ವಾಟ್ ಮ್ಹಣ್ ಮ್ಹಣ್ಯೆತ್,’ ನವ್ಯಾಚ್ ಆತ್ಮೀಯತೆನ್ ತಾಣೆ ರಿಚರ್ಡಾಕ್ ಪಳೆಲೆ೦. ‘But short cuts are never short. ಹಾ೦ವ್ ಟೊಯ್ಲೆಟಾಕ್ ವಚುನ್ ಯೆತಾ೦.’
‘ಕೆಫೆಟೇರಿಯಾ೦ತ್ ಮೆಳ್ಯಾ೦!’ ರಿಚರ್ಡಾನ್ ಮ್ಹಳೆ೦ ತಿ೦ ಯೆಕಾಮೆಕಾಥಾವ್ನ್ ಭಾರಿಚ್ ಪಯ್ಸ್ ಸರ್ಚೆಪರಿ೦.
(30-ವ್ಯಾ ಅವಸ್ವರಾ೦ತ್ ಮು೦ದರ್ತಾ)
