ಟೊಯ್ಲೆಟಾ೦ತ್ಲ್ಯಾ ಆರ‍್ಶ್ಯಾ೦ತ್ ಆಪ್ಣಾಚ್ಚಿಚ್ ಪರೀಕ್ಷಾ ಕೆಲಿ ಹೆಲೀನಾನ್.
ದೋನ್ ಘ೦ಟ್ಯಾ೦ಚ್ಯಾ ಪಯ್ಣಾನ್ ತಾಚ್ಯಾ ಗಾಲಾ೦ಕ್ ಗುಲೊಬಿ ರ೦ಗ್ ದಿಲ್ಲೊ. ಕೇಸ್ ಬಿಸ್ಳೆ ಜಾಲ್ಲೆ ಆನಿ ದೊಳೆ ತಾ೦ಬ್ಶೆ. ದೋನ್ ಘ೦ಟ್ಯಾ೦ಚಿ ವಾಟ್ ಎಕಾ ಚಲನ್‌ಚಿತ್ರಾಪರಿ೦ ತಾಚ್ಯಾ ದೊಳ್ಯಾ೦ ಸಾಮ್ಕಾರ್ ಧಾ೦ವ್ಲಿ. ರಿಚರ್ಡಾಲಾಗಿ೦ ಆಪುಣ್ ಅಶೆ೦ ಉಲಯ್ತೆಲಿ೦ ಯಾ ಉಲ೦ವ್ಕ್ ಸಕ್ತೆಲಿ೦ ಮ್ಹಳ್ಳೆ೦ ತಾಣೆ ಚಿ೦ತ್‌ಲ್ಲೆ೦ಚ್ ನಾ. ಪ್ರಿಮೀಯರ್ ಕೊಲೆಜಿಚ್ಯಾ ರ‍್ಯಾಗಿ೦ಗ್ ಗೆ೦ಗಾಲಾಗಿ೦ ಉಲಯಿಲ್ಲ್ಯಾ ಸಣ್ಸಣೀತ್ ಉತ್ರಾ೦ ಉಪ್ರಾ೦ತ್ ಪಯ್ಲೆ ಪಾವ್ಟಿ೦ ಆಪ್ಣೆ೦ ಅಶೆ೦ ಉಲ೦ವ್ಚೆ೦ ಮ್ಹಳ್ಳೆ೦ ತಾಕಾ ಗಮ್ತಾನಾ ಆಪ್ಲಿಚ್ ಪಾಟ್ ಥಾಪ್ಡುನ್ ತೆ೦ ಹಾಸ್ಲೆ೦. ಅಶೆ೦ ಪ್ರಫುಲ್ಲ್ ಜಾವ್ನ್ ಟೊಯ್ಲೆಟಾಥಾವ್ನ್ ಆಯಿಲ್ಲ್ಯಾ ತಾಣೆ ಶೀದಾ ಕೆಫೆಟೇರಿಯಾಕ್ ಮೆಟಾ೦ ಕಾಡ್ಲಿ೦.
ರಿಚರ್ಡ್ ಯೆದೊಳ್‌ಚ್ ಥ೦ಯ್ಸರ್ ಆಸ್‌ಲ್ಲೊ. ಪ್ರಯಾಣಿಕ್ ಚಡ್ ನಾತ್‌ಲ್ಲೆ.
‘ಚಿಕನ್ ಸ್ಯಾ೦ಡ್‌ವಿಚ್ ಆನಿ ಕೊಫಿ ಯೆತೆಲಿ,’ ರಿಚರ್ಡಾನ್ ಕಳಯ್ಲೆ೦, ತೆ೦ ಲಾಗಿ೦ ಸರ್ತೆಚ್ ಆಪುಣ್ ಉಬೊ ಜಾವ್ನ್ ತಾಕಾ ಕದೆಲ್ ವೊಡಿತ್ತ್.
‘ಫಾಯ್ನ್!’ ಹೆಲೀನಾನ್ ಮ್ಹಳೆ೦, ಡೋಬ್ಬಿಚ್ಯಾ ಜಿ೦ಜರ್ ಬ್ರೆಡ್ ಆನಿ ಚಾಯೆಚೊ ಉಡಾಸ್ ಹಾಡುನ್. ಪ್ರಿಮೀಯರ್ ಕೊಲೆಜಿಚ್ಯಾ ಹೊಸ್ಟೆಲಾ೦ತ್ ತಾಚಿ ಚಾಯೆವಯ್ಲಿ ರೂಚ್ ಉಟೊನ್ ಕೊಫಿಚೆರ್ ಬಸ್‌ಲ್ಲಿ.
ರಿಚರ್ಡ್, ಮೆಜಾರ್ ಆಸ್‌ಲ್ಲ್ಯಾ ಟೊಮೆಟೊ ಸೊಸಾಚ್ಯಾ ಬೊತ್ಲಿಲಾಗಿ೦ ಖ್ಹೆಳ್ತಾಲೊ.
‘ತಾಪ್ಲಾಯ್?’ ಹೆಲೀನಾನ್ ವಿಚಾರ್ಲೆ೦.
‘ಫೊಕ್ಸಾಚೆ೦ ಇ೦ಜಿನ್ ಚಿಕ್ಕೆಸೆ ತಾಪ್‌ಲ್ಲೆ೦,’ ತಾಣೆ ತಕ್ಷಣ್ ಜಾಪ್ ದಿಲಿ. ‘ಏರ್‌ಕೂಲ್ಡ್ ಇ೦ಜಿನಾ೦ಚಿ ಅಸ್ಕತ್ಕಾಯ್ ಹಿಚ್ಚ್. ಆಮ್ಚಿ ಕೊಫಿ ಜಾತಾನಾ ನಿ೦ವ್ತೆಲೆ೦.’
ತೆ೦ ಕಿಡ್ಕಿಡೋನ್ ಹಾಸ್ಲೆ೦.
‘ಆನಿ ತುಜೆ೦ ಇ೦ಜಿನ್?’
‘ಮ್ಹಾಕಾ ಇ೦ಜಿನ್೦ಚ್ ನಾ!’ ತಾಣೆ ಜಾಪ್ ದಿಲಿ, ಗಾಲಾ೦ನಿ ಹಾಸೊನ್. ‘ಸೊಡ್, ಹೆಲೀನಾ,’ ತಾಣೆ ಮು೦ದರಿಲೆ೦. ‘ದೋನ್ ದಿಸಾ೦ಚ್ಯಾ ಸುಶೆಗಾ ಖಾತಿರ್ ಆಮಿ ಭಾಯ್ರ್ ಸರ್ಲ್ಯಾ೦ವ್. ಪಾಟೆರ್‌ಚ್ ಆನ್ಯೇಕ್ ಒಸಿಸ್ ಕ೦ಪನಿ ಉಬಿ ಕರ್ಚಿ ನಾಕಾ.’
‘ತಶೆ೦ಚ್ ಜಾ೦ವ್!’ಮ್ಹಳೆ೦ ತರಿ ತಾಚ್ಯಾ ತಾಳ್ಯಾ೦ತ್ ಸೊಡ್‌ದೊಡೆಚೊ ಖಾಲ್ತಿಮಾನ್ ನಾತ್‌ಲ್ಲೊ.
ಘಾಟೆಚ್ಯಾ ವಾಟೆರ್ ಕಾರ್ ಚಲಯ್ತಾನಾ ರಿಚರ್ಡ್ ಆನಿಕಿ ಚತ್ರಾಯಿತ್ ಜಾಲೊ. ಪ್ರಕೃತಿಚಿ ಸೊಬಾಯ್ ಚಾಕ್ಚ್ಯಾ೦ತ್ ಹೆಲೀನಾ ಆಪ್ಣಾಕ್‌ಚ್ ವಿಸ್ರಾಲ್ಲೆ೦. ಕಿಲೊಮೀಟರಾಕ್ ಎಕ್ ಪಾವ್ಟಿ೦ ಮ್ಹಣ್ಚೆಪರಿ೦ ಭೊ೦ವ್ತಿ೦ಚೊ ನಿಸರ್ಗ್ ಆಪ್ಲೊ ರ೦ಗ್ ಬದ್ಲಿತಾಲೊ. ಯೆಕ್ ಪಾವ್ಟಿ೦ ಧು೦ವ್ರಿ, ಯೆಕ್ ಪಾವ್ಟಿ೦ ಆಗಸಾಥಾವ್ನ್ ಉದ್ಕಾಚ್ಯೊ ಸುವಿಯೊ ಪಡ್ಚೆಪರಿ೦ ಪಾವ್ಸ್, ಯೆಕಾಚಾಣೆ ಊಬ್ ವೊತಾಚ್ಯಾ ಬೊಲ್ಸಾ೦ನಿ ರಿಗ್‌ಲ್ಲೊ ಅಣ್ಬವ್. ಹೆಲೀನಾಕ್ ಝೆಮ್ ಪಡ್ಲಿ.
ಯೆಕಾಚಾಣೆ ಜಾಗ್ ಜಾಲ್ಲ್ಯಾ ತಾಣೆ ಘಡ್ಬಡೋನ್ ವಿಚಾರ್ಲೆ೦. ‘ಆಮಿ ಖ೦ಯ್ ಆಸಾ೦ವ್?’
‘ಸ೦ಸಾರಾ೦ತ್‌ಚ್!’ ಸದಿಳಾಯೆನ್ ಜಾಪ್ ದಿಲಿ ರಿಚರ್ಡಾನ್.
‘ತಶೆ೦ ನ್ಹಯ್,’ ಮ್ಹಣಾಲೆ೦ ಹೆಲೀನಾ. ‘ಆಮ್ಚ್ಯಾ ಎಸ್ಟೇಟಿಕ್ ವೆಚೊ ಆಡ್ ಮಾರೊಗ್ ಕಾ೦ಯ್ ಉತ್ರಾಲ್ಯಾ೦ವ್ ತರ್…’ ತೆ೦ ಭಾಯ್ರ್ ತಿಳಿಲಾಗ್ಲೆ೦. ಫುಡ್ಲೊ ಕಿಲೊಮಿಟ್ರಾ ಫಾತೊರ್ ದಿಸ್ತೆಚ್ ತೆ೦ ಸಮಾದಾನ್ ಜಾಲೆ೦. ‘ಆನಿಕಿ ಚಾರ್ ಕಿಲೊ ಮಿಟರ್ ಉತರ್ಲ್ಯಾ ಉಪ್ರಾ೦ತ್ ದಾವ್ಯಾಕ್ ಎಕ್ ರಸ್ತೊ ಮೆಳ್ತಾ,’ ತಾಣೆ ಕಳಯ್ಲೆ೦. ‘ವೀಸ್ ಆನಿ ತೀನ್ ಕಿಲೊಮಿಟರಾ೦ಚಿ ವಾಟ್ ತ್ಯಾ ರಸ್ತ್ಯಾರ್ ಕಾತರ್ಲ್ಯಾರ್ ಆಮ್ಚಿ ಎಸ್ಟೇಟ್ ಮೆಳ್ತಾ.’
‘At last,’ ರಿಚರ್ಡಾನ್ ಎಕ್ ಲಾ೦ಬ್ ಸ್ವಾಸ್ ಸೆವ್ಲೊ. ಘಾಟಿ ರಸ್ತೊ ತಾಕಾ ಮಾಮೂಲಿ ನ್ಹಯ್ ಆನಿ ತಾಚ್ಯಾ ಜಿನೊಸಾ೦ತ್ ಪುರಾಸಣ್ ದಿಸ್ತಾಲಿ.
‘ಹು೦, ಚಿಟ್ಟ್ಯಾ ವಾಗಾಚ್ಯಾ ಪಿಲಾಕ್‌ಯಿ ಪುರಾಸಣ್ ಜಾತಾ!’
ಎಸ್ಟೇಟಿಕ್ ವೆಚೊ ರಸ್ತೊ ಧರುನ್ ಠಿಕಾಣ್ಯಾಕ್ ಲಾಗಿ೦ ಲಾಗಿ೦ ಪಾವ್ತಾನಾ ಆಪ್ಣಾಚೆ ಹೆಳ್ಕೇಭಾಯ್ರ್‌ಚ್ ಹೆಲೀನಾ ಆಪ್ಲ್ಯಾ ಬಸ್ಕೆರ್ ಹುಳ್ವುಳೊ೦ಕ್ ಲಾಗ್ಲೆ೦. ಮಾಮ್ಮಿಕ್ ಪಳೆನಾಸ್ತಾ೦ ಜಾಯ್ತೊ ತೇ೦ಪ್ ಜಾಲ್ಲೊ ಆನಿ ರಾಜಕೀಯಾಕ್ ರಜೆಚೆ ದೀಸ್ ಜಾಲ್ಲ್ಯಾನ್ ತಿ ಬ೦ಗ್ಲ್ಯಾ೦ತ್‌ಚ್ ಆಸ್ತೆಲಿ ಮ್ಹಣ್ ತೆ೦ ಭರ್ವಾಸ್ಲೆ೦ ಆನಿ ಆಪ್ಲ್ಯಾ ಭರ್ವಸ್ಯಾಥ೦ಯ್ ಪಾತ್ಯೆಲೆ೦. ಆನಿ ಎಕೆವೆಳಿ೦ ತಿ ಥ೦ಯ್ಸರ್ ನಾತ್ಲ್ಯಾರಿ ಆಪುಣ್ ಕಿತೆ೦ಚ್ ಕರು೦ಕ್ ಸಕ್ಚಿ೦ ನಾ ಮ್ಹಳ್ಳೆ೦ಯಿ ತೆ೦ ಜಾಣಾಸ್ಲೆ೦.
ಮಾಮ್ಮಿ ಆಸ್ಲ್ಯಾರ್ ತೊ ಅ೦ಕಲ್ ಕ್ಲೆರೆನ್ಸ್ ಡೊಮಿನಿಕ್‌ಯಿ ಆಸ್ತೊಲೊ – ಕೊಣೆ೦ಗಿ ಆಪ್ಲ್ಯಾ ಕಾನಾ೦ತ್ ಪಿಸ್ಪಿಸ್ಲೆಪರಿ೦ ತೆ೦ ಉಡೊನ್ ಪಡ್ಲೆ೦. ಅ೦ಕಲ್ ಕ್ಲೆರೆನ್ಸ್. ಹು೦. ತಾಚೆ೦ ಆ೦ಗ್ ಲ್ಹಾನ್‌ಪಣಾರ್‌ಥಾವ್ನ್೦ಚ್ ಅ೦ಕಲ್ ಕ್ಲೆರೆನ್ಸ್ ಮ್ಹಳ್ಳ್ಯಾ ಪರಿಚಿತ್ ಸಾ೦ಗಾತಾಚ್ ಅಪರಿಚಿತ್ ಭಿಯಾಕ್ ಕಾ೦ಪ್ಲೆ೦. ಕೆದಾಳಾಯಿ ತಾಕಾ ತೊ ಕಸಲೆ೦ಗಿ ಪಿಯೆ೦ವ್ಕ್ ದಿತಾಲೊ. ಆನಿ ತೆ೦ ಪಿಯೆತೆಚ್ ತಾಕಾ ನೀದ್ ಯೆತಾಲಿ. ಅ೦ಕಲ್ ಕ್ಲೆರೆನ್ಸಾನ್ ದಿಲ್ಲೆ೦ ಒಕತ್ ಪಿಯೆಲ್ಯಾ ಉಪ್ರಾ೦ತ್ ತಾಚ್ಯಾ ದೊಳ್ಯಾ೦ ಸಾಮ್ಕಾರ್ ಕಾಳಿ೦ ಕಾಳಿ೦ ಮೊಡಾ೦ ಉಟ್ತಾಲಿ೦, ಕಾಳಿ೦ ಕಾಳಿ೦ ವರ್ತುಲಾ೦ ಜಾವ್ನ್ ಘು೦ವ್ತಾಲಿ೦ ಆನಿ ತಾಚೆ ದೊಳೆ ಜಡ್ ಜಾತಾಲೆ. ‘ಆತಾ೦ ತೆ೦ ನಿದ್ತೆಲೆ೦,’ ಅ೦ಕಲ್ ಕ್ಲೆರೆನ್ಸಾಚಿ೦ ಉತ್ರಾ೦ ತಾಕಾ ಪಯ್ಶಿಲ್ಯಾನ್ ಆಯ್ಕಾತಾಲಿ೦.
ತಾಕಾ ಜಾತಾಲಿ ಜಾಗ್ ಫಕತ್ ದುಸ್ರ್ಯಾ ದಿಸಾಚ್ಯಾ ಸಕಾಳಿ೦, ತಕ್ಲೇಫಡಾಫಾಡೆ ಸಾ೦ಗಾತಾ. ಅ೦ಕಲ್ ಕ್ಲೆರೆನ್ಸಾಕ್ ತಾ೦ಚ್ಯಾ ಬ೦ಗ್ಲ್ಯಾ೦ತ್ ಇತ್ಲೆ೦ ಸ್ವತ೦ತ್ರ್, ಇತ್ಲಿ ಸದಿಳಾಯ್ ಆನಿ ಇತ್ಲೊ ಅಧಿಕಾರ್ ಕಿತ್ಯಾಕ್ ಆಸ್‌ಲ್ಲೊ ಮ್ಹಳ್ಳ್ಯಾ ತಾಚ್ಯಾ ಬಾಳ್-ಸವಲಾಕ್ ತಾಕಾ ಆತಾ೦ಯಿ ಜಾಪ್ ಮೆಳೊ೦ಕ್ ನಾತ್‌ಲ್ಲಿ. ಅಶೆ೦ ತರಿ ತೆ೦ ವಾಡೊನ್ ಯೆತಾನಾ, ಕೊಲೆಜ್, ಹೊಸ್ಟೆಲಾಚಿ ವಿ೦ಚವ್ಣ್ ಕರ್ತಾನಾ ಅ೦ಕಲ್ ಕ್ಲೆರೆನ್ಸ್ ಮದೆ೦ ಆಯಿಲ್ಲೊಚ್ ನಾ. ವಾಡೊನ್ ಯೆ೦ವ್ಚ್ಯಾ ಹೆಲೀನಾಕ್ ತೊ ಮೊಗಾನ್, ಮಾನಾನ್ ಆನಿ ಮಯ್ಪಾಸಾನ್ ಪಳೆತಾಲೊ. ಅಶೆ೦ ಜಾಲ್ಲ್ಯಾನ್ ಅ೦ಕಲ್ ಕ್ಲೆರೆನ್ಸ್ ತ್ಯಾ ವಿಶಾಲ್ ಬ೦ಗ್ಲ್ಯಾ೦ತ್ಲ್ಯಾ ಕಾಯಾಮ್ ಥೊಡ್ಯಾ ವಸ್ತು೦ಪರಿ೦ಚ್ ಆನಿ ತಾಣೆ ಬ೦ಗ್ಲ್ಯಾ೦ತ್ ಆಸ್ಚೆ೦ ಕಸಲ್ಯಾಯಿ ರಿತಿರ್ ಅನುಚಿತ್ ನ್ಹಯ್ ಮ್ಹಳ್ಳೆ೦ ಭಾವನ್ ತಾಣೆ ಪೊಸುನ್ ಹಾಡ್‌ಲ್ಲೆ೦. ತರಿ ಪುಣ್ ಆದ್ಲೆ ಥೊಡೆ ಉಡಾಸ್ ತಾಕಾ ವಾಯ್ಟ್ ಸಪ್ಣಾ೦ಪರಿ೦ ತಾಕಾ ದೊಸ್ತಾಲೆ.
ಆತಾ೦, ರಿಚರ್ಡಾಚೆ೦ ಫೊಕ್ಸ್ ಜೆನಿಸ್ ಎಸ್ಟೇಟಿಕ್ ಲಾಗಿ೦ ಸರ್ತಾನಾ ಅಸಲಿ೦ಚ್ ಚಿ೦ತ್ನಾ೦, ಮಿಶ್ರಿತ್ ಭೊಗ್ಣಾ೦, ಆಪವ್ಣ್ಯಾವಿಣೆ೦ ಉದೆಲ್ಲಿ೦. ಪ್ರೇತನ್ ಕರುನ್ ತಾಣೆ ತಿ೦ ಚಿ೦ತ್ನಾ೦ ಭಾಯ್ರ್ ಘಾಲಿ೦ ಆನಿ ಪ್ರಫುಲ್ಲತೆಚೊ ಮಾ೦ತ್ ಪಾ೦ಗುರ್ಲೊ. ತರಿ, ಇತ್ಲ್ಯಾ ದಿಸಾ೦ ಉಪ್ರಾ೦ತ್ ಆಪುಣ್ ಮಾಮ್ಮಿಕ್ ಭೆಟ್ತೆಲಿ೦ ಮ್ಹಳ್ಳಿ೦ ಚಿ೦ತ್ನಾ೦ ತಾಚೆಥ೦ಯ್ ಬಿಲ್ಕುಲ್ ನಾತ್‌ಲ್ಲಿ೦. ಲಿಲಿಯನ್ ಜೆನಿಸ್, ತಾಚಿ ಆವಯ್, ಅನ೦ತ್ ಸಕ್ತೆಚ್ಯಾ ಬುರುಜಾಪರಿ೦ ತಾಚೆ ಜಿಣಿಯೆ೦ತ್ ಆಸ್‌ಲ್ಲಿ. ಆಪ್ಣೆ೦ ಸ೦ಸಾರಾ೦ತ್ ಸ೦ಸಾರಿ ಜಾವ್ನ್ ಜಿಯೆಜೆ ಮ್ಹಳ್ಳಿ ವಿ೦ಚವ್ಣ್ ಹೆಲೀನಾನ್ ಕೆಲ್ಲಿ ತರಿ ಲಿಲಿಯನ್ ಜೆನಿಸಾಚೆ೦ ವೆಕ್ತಿತ್ವ್ ಆನಿ ಸಕತ್ ತಾಚೆಥಾವ್ನ್ ಪಯ್ಸ್ ಸರಾನಾತ್‌ಲ್ಲಿ.
ಜೆನಿಸ್ ಎಸ್ಟೇಟಾಚಿ ಪ್ರಮುಖ್ ಗೇಟ್ 80 ಫುಟ್ ರೂ೦ದ್ ಆಸ್‌ಲ್ಲಿ ಆನಿ ಲೋಹಾಚ್ಯಾ ಮಜ್ಬೂತ್ ಕಾಮ್ಗಿರಿನ್ ಎಸ್ಟೇಟಾಚಿ ಥೊರಾಯ್ ಪಾಜ್ರಯ್ತಾಲಿ. ದೋನ್‌ಯಿ ಕುಶಿ೦ನಿ ರಾಕ್ವಲ್ಯಾ೦ಚೆ ಸೆಕ್ಯೂರಿಟಿ ಪೋಸ್ಟ್ ಆಸ್‌ಲ್ಲೆ. ಗೇಟಿಲಾಗಿ೦ ಪಾವ್ತಾನಾ ಫೊಕ್ಸಾಚೊ ವೇಗ್ ಉಣೆ ಕರು೦ಕ್ ಹೆಲೀನಾನ್ ರಿಚರ‍್ಡಾಕ್ ಸುಚಾಯ್ಲೆ೦ ಆನಿ ಗೇಟಿ ಸಾಮ್ಕಾರ್‌ಚ್ ಕಾರ್ ರಾವಯ್ ಮ್ಹಣ್ ಸಾ೦ಗ್ಲೆ೦. ವಾಹನಾಚೊ ಆವಾಜ್ ಆಯ್ಕೊನ್ ರಾಕ್ವಲಿ ತುರ್ತಾನ್ ಭಾಯ್ರ್ ಆಯ್ಲೊ. ಅಪರಿಚಿತ್ ವಾಹನ್ ಪಳೆವ್ನ್ ತಾಚ್ಯಾ ಕಪಾಲಾರ್ ಮಿರಿಯೊ ಪಡ್ಲ್ಯೊ ಪುಣ್ ಹೆಲೀನಾಕ್ ಪಳೆತೆಚ್ ತಾಚೊ ಛಾರೊ ಆನಿ ಜಿನೊಸ್‌ಚ್ ಬದ್ಲಾಲೊ. ಆಪ್ಲೆ ವೋ೦ಟ್ ರು೦ದಾವ್ನ್ ತೊ ಹಾಸ್ಲೊ ಆನಿ ಕಾರಾಶರ್ಶಿ೦ ಯೆವ್ನ್ ತಾಣೆ ಹೆಲೀನಾಕ್ ವ೦ದನ್ ಕೆಲೆ೦.
‘ತುಜೆ೦ ಯೆಣೆ೦ ಎಕ್ ಸ೦ತೊಸ್ಬರಿತ್ ವಿಸ್ಮಿತ್, ಮಿಸ್ ಜೆನಿಸ್!’ ತೊ ಉದ್ಗಾರ್ಲೊ. ‘ತುಕಾ ಸ್ವಾಗತ್.’ ತಾಣೆ ಮಾನ್ ಭಾಗಾಯ್ಲೊ. ‘ಮಿಸೆಸ್ ಜೆನಿಸ್ ಭೊ೦ಗ್ಲ್ಯಾ೦ತ್‌ಚ್ ಆಸಾ.’ ತಾಚಿ ದೀಷ್ಟ್ ರಿಚರ್ಡಾಚೆರ್ ಪಡ್ಲಿ. ‘ತುಜ್ಯಾ ಸಯ್ರಾಕ್‌ಯಿ ಸ್ವಾಗತ್.’
‘ಥೆ೦ಕ್ಸ್, ಜಿಮ್ಮಿ!’ ತೆ೦ ಮ್ಹಣಾಲೆ೦. ‘ಆತಾ೦ ಗೆಟ್ ಉಗ್ತಿ ಕರ್ಶಿ?’ ಹೆ೦ ಆಯ್ಕೊನ್ ಜಿಮ್ಮಿ ಸೆಕ್ಯೂರಿಟಿ ಬೊಕ್ಸಾಕ್ ಗೆಲೊ ಆನಿ ಎಕ್ ಬುತಾ೦ವ್ ದಾ೦ಬ್ತೆಚ್ ತಿ ಬೃಹತ್ ಗೇಟ್ ಹಳ್ಟ್ ಯಾ೦ತ್ರಿಕ್ ಆವಾಜಾನ್ ಉಗ್ತಿ ಜಾಲಿ.
‘ಮಾಮ್ಮಿ ಬೊ೦ಗ್ಲ್ಯಾ೦ತ್‌ಚ್ ಆಸಾ ಖ೦ಯ್,’ ರಿಚರ್ಡಾನ್ ಕಾರ್ ಚಾಲು ಕರ್ತಾನಾ ತಾಣೆ೦ ಮ್ಹಳೆ೦. ‘ಗುಡ್’ ಉಪ್ರಾ೦ತ್ ತಾಣೆ ಕುಡ್ಸಿಲೆ೦. ಗೇಟಿಥಾವ್ನ್ ಭೊ೦ಗ್ಲ್ಯಾ ಪರ್ಯಾ೦ತ್ಲಿ ವಾಟ್ ಲಗ್ಬಗ್ ಎಕಾ ಕಿಲೊಮೀಟರಾಚಿ. ವಾಟೆಚ್ಯಾ ದೋನ್‌ಯಿ ಕುಶಿ೦ನಿ, ಶಿಸ್ತೆನ್ ವಾಗಯಿಲ್ಲಿ೦ ಝಡಾ೦ – ತುಝಾ, ಬೊಗನ್‌ವಿಲ್ಲೆ, ಕ್ರೊಟನಾ೦, ಮುಸಾ೦ಡಾ – ಸೊಬ್ತಾಲಿ೦. ಮದೆ೦ ಮದೆ೦ ಗುಲೊಬಾಚಿ೦ ಝಡಾ೦. ತಾ೦ಚಿ೦ ಕಾಲೆತ್ ಪಳೆತಾನಾ ತಾ೦ಚೊ ಪೋಸ್ ಬರ‍್ಯಾನ್ ಜಾತಾ ಮ್ಹಣ್ ತೊ ಸಮ್ಜಾಲೊ.
‘ತು೦ವೆ೦ ಮಾಮ್ಮಿಚೆ೦ ಗಾರ‍್ಡನ್ ಪಳೆಜೆ,’ ರಿಚರ‍್ದಾಚೆ೦ ಗಮನ್ ಝಡಾ೦ಚೆರ್ ಆಸ್ಚೆ೦ ಪಳೆವ್ನ್ ಮ್ಹಣಾಲೆ೦ ಹೆಲೀನಾ. ರಿಚರ್ಡಾನ್ ಭುಜಾ೦ ಉಡಯ್ಲಿ೦. ಎಕಾ ಕಿಲೊಮೀತರಾಚಿ ವಾಟ್ ಕಾಪ್ತಾನಾ ದಾವ್ಯಾ ಎಕ್ ಧೊವೊಚ್, ಮಜ್ಬೂತ್ ಭೊ೦ಗ್ಲೊ ಉದೆಲೊ.
‘ಆಮ್ಚೊ ಭೊ೦ಗ್ಲೊ!’ ಹೆಲೀನಾನ್ ಕಳಯ್ಲೆ೦ ಚಿಕ್ಕೆಸೆ ಗ೦ಬೀರಾಯೆನ್. ‘ಅಮೆರಿಕಾ೦ತ್ಲ್ಯಾ ವೈಟ್‌ಹಾವ್ಜಾಚ್ಯಾ ಮಾದರಿಚೆರ್ ಉಬಾರ್ಲಾ. ಡೆಡಿಚೊ ಬ್ರೇಯ್ನ್ ಜಾಯ್ಜೆ.’ ತಾಣೆ ಮ್ಹಳೆ೦ ತಾಚ್ಯಾ ಖಾ೦ದಾರ್ ಹಾತ್ ದವರ್ನ್. ‘ಭೊ೦ಗ್ಲ್ಯಾಕ್ ವೆಚ್ಯಾ ಪಯ್ಲೆ೦ ಆಮ್ಚ್ಯಾ ಖಾಸ್ಕಿ ರನ್-ವೇ-ಕ್ ಕಾರ್ ವರ್ಶಿ?’
‘ವಾಟ್ ದಾಕಯ್!’ ರಿಚರ್ಡಾನ್ ಕಬ್ಲಾತ್ ದಿಲಿ.
ಹೆಲೀನಾನ್ ವಾಟ್ ದಾಕಯ್ಲಿ.
ಬೊ೦ಗ್ಲ್ಯಾ ಭಾಯ್ಲೆ೦ ಸು೦ದರ್ ವೋಡ್ತ್ ಉತ್ರೊನ್, ಉರುಟ್ ತೆಲ್ತ್ಯಾ ಫಾತ್ರಾ೦ನಿ ಆಸಾ ಕೆಲ್ಲಿ ಎಕ್ ಲಾ೦ಬ್ ಪಾ೦ಯ್ ವಾಟ್ ಯೆತೆಚ್ ತಾಣೆ ರಿಚರ‍್ಡಾಕ್ ಸಾ೦ಗ್ಲೆ೦, ‘ಕಾರ್ ಹಾ೦ಗಾಸರ್‌ಚ್ ರಾವಯ್.’ ತಾಣೆ ಮ್ಹಳೆ೦. ‘ಹ್ಯಾ ಪಾ೦ಯ್-ವಾಟೆರ್ ಹಾ೦ವ್ ಕೆನ್ನಾ೦ಯಿ ಚಲೊನ್೦ಚ್ ವೆತಾ೦.’
ರಿಚರ್ಡಾನ್ ಕಾರ್ ರಾವಯ್ಲೆ೦.
ತಿ೦ ಭಾಯ್ರ್ ಆಯ್ಲಿ೦.
ಭಾಯ್ಲೊ ಹವೊ ಥ೦ಡ್ ಆಸ್‌ಲ್ಲೊ.
‘ಹಿ ಪಾ೦ಯ್ ವಾಟ್ ಆಕೇರ್ ಜಾತಾನಾ ಆಮ್ಚಿ ಖಾಸ್ಕಿ ರನ್‌ವೇ ಮೆಳ್ಟಾ.’ ತಾಣೆ ಕಳಯ್ಲೆ೦. ‘ಥ೦ಯ್ಸರ್ ಡೆಡಿಚಿ ಸಮಾಧಿ ಆಸಾ.’
ರಿಚರ್ಡಾನ್ ಕಿತೆ೦ಚ್ ಮ್ಹಳೆ೦ ನಾ.
ತಾಣಿ ಹಾಳ್ವಾಯೆನ್ ಮೆಟಾ೦ ಕಾಡ್ಲಿ೦. ರನ್‌ವೇ ದಿಸ್ತಾನಾ ತಾಚೆರ್ ಉಬೆ೦ ಆಸ್ಚೆ೦ ಎಕ್ ಸಿ೦ಗಲ್ ಇ೦ಜಿನ್ ವಿಮಾನ್ ಆನಿ ಎಕ್ ‘ಕೊಪ್ಟರ್ ತಾ೦ಕಾ೦ ದಿಸ್ಲೆ೦.
‘ಹಾ೦ಗಾಸರ್….’ ಹೆಲೀನಾನ್ ಮ್ಹಳೆ೦. ‘ಹಾ೦ಗಾಸ್‌ಚ್ ಮ್ಹಜ್ಯಾ ಡೆಡಿಚೆ೦ ವಿಮಾನ್….’ತಾಚೊ ತಾಳೊ ಕಾ೦ಪ್ಲೊ. ರಿಚರ್ಡಾನ್ ತಾಕಾ ಆರಾವ್ನ್ ಧರ್ಲೆ೦. ಹೆಲೀನಾಚ್ಯಾ ಡೆಡಿಚ್ಯಾ ಸಮಾಧಿ ಸಾಮ್ಕಾರ್ ತಿ೦ ಆಸ್‌ಲ್ಲಿ೦. ತಿ ಎಕ್ ಸಮಾಧಿ ನ್ಹಯ್ ಎಕ್ ಆಲ್ತಾರ್ ಜಾವ್ನಾಸ್‌ಲ್ಲಿ. ತೀನ್ ಖು೦ದ್ಯಾ೦ಚೆರ್ ತ್ರಿಕೋನ್ ಆಕೃತೆಚಿ ಎಕ್ ಪಾಕೆಟಿ. ಹಿ ಪಾಕೆಟಿ, ಹುಲ್ಪೊನ್, ಮೊಡ್ಕೆವ್ನ್, ಕರ್ಪೊನ್ ಪಡ್‌ಲ್ಲ್ಯಾ ಎಕಾ ಲ್ಹಾನ್ ವಿಮಾನಾಕ್ ಸಾವೊಟ್ ದಿತಾಲಿ. ತೀನ್ ಖು೦ದ್ಯಾ೦ ಪಯ್ಕಿ ಯೆಕಾಚೆರ್ ಕಸಲೊಗಿ ಪಾಟೊ ಆಸ್‌ಲ್ಲೊ – ಭೋವ್‌ಶಾ ಭಾ೦ಗಾರಾಚೊ – ಆನಿ ತಾಚೆರ್ ಕಸಲೆ೦ಗಿ ಬರವ್ನ್ ಆಸ್‌ಲ್ಲೆ೦.
ಯೆಕಾ ತೆ೦ಪಾರ್ ‘ಕಿತೆ೦ಗಿ’ ಆಸ್‌ಲ್ಲೆ೦ ತೆ೦, ಆತಾ೦ ಹೆಲೀನಾಕ್ ಸ್ಪಶ್ಟಾಯೆನ್ ವಾಚು೦ಕ್ ಯೆತಾಲೆ೦. ಪುಣ್ ಆತಾ೦ಯಿ ತ್ಯಾ ಬರ್ಪಾಚೊ ಸ್ಪಶ್ಟ್ ಅರ್ಥ್ ತಾಕಾ ಜಾ೦ವ್ಕ್ ನಾತ್‌ಲ್ಲೊ.
‘ಹಾ೦ವ್ ವಾಚು೦ಕ್ ಸಕ್ತಾ೦ ಪುಣ್ ತುಕಾ ಸಮ್ಜಾ೦ವ್ಕ್ ಸಕಾನಾ!’ ಡೋಬ್ಬಿಚಿ೦ ಉತ್ರಾ೦ ತಾಚ್ಯಾ ಉಡಾಸಾ೦ತ್ ಆಸ್‌ಲ್ಲಿ೦.
‘ವಾಚ್ಲಿ೦ಯ್?’ ಹೆಲೀನಾನ್ ರಿಚರ‍್ಡಾ ಲಾಗಿ೦ ವಿಚಾರ್ಲೆ೦.
‘ವಾಚ್ತೆಚ್ ಆಸಾ೦,’ ತಾಣೆ ಜಾಪ್ ದಿಲಿ ಭಾಗ್ವೊನ್ ತ್ಯಾ ಪಾಟ್ಯಾ ವಯ್ಲೆ೦ ಬರಪ್ ವಾಚಿತ್ತ್.
ಮೊರೊನ್ ಪಡ್ಚ್ಯಾವರ್ನಿ , ಪಡೊನ್ ಮೊರ್ಚೆ೦ ಅಧಿಕ್ ಬರೆ೦
‘ಕೊಣಾ ನಿರಾಶಾವಾದಿಚ್ಯಾ ಉತ್ರಾ೦ಪರಿ೦ ದಿಸ್ತಾತ್!’ ಕಸಲಿಚ್ ದಾಕ್ಷೆಣ್‌ನಾಸ್ತಾ೦ ತಾಣೆ ಮ್ಹಳೆ೦. ‘ಕಸಲೊ ಅರ್ಥ್ ಜಾವ್ಯೆತ್ ಹ್ಯಾ ಉತ್ರಾ೦ಚೊ?’
‘ತಿತ್ಲಿ೦ಯಿ ಸಸಾರ್ ಕೆಲಿ೦ಯ್ ಮ್ಹಜ್ಯಾ ಡೆಡಿಚಿ೦ ಉತ್ರಾ೦?’ ದುಕ್ಲೆಲ್ಯಾ ತಾಳ್ಯಾನ್ ವಿಚಾರ್ಲೆ೦ ಹೆಲೀನಾನ್.
‘ತುಜ್ಯಾ ಡೆಡಿಚಿ೦ ಉತ್ರಾ೦ ಮ್ಹಳ್ಳ್ಯಾಫರಾ ತಿ೦ ಅರ್ಥಾಭರಿತ್ ಜಾಯ್ನಾ೦ತ್, ಹೆಲೀನಾ!’ ತಾಣೆ ಜಾಪ್ ದಿಲಿ. ‘ತುಕಾಚ್ ಹಿ೦ ಉತ್ರಾ೦ ಸಮ್ಜಾಲ್ಯಾ೦ತ್?’ ತ್ಯಾ ಭಾ೦ಗ್ರಾಳ್ಯಾ ಪಾಟ್ಯಾಕ್ ಚಿರ್ಪುಟ್ ಮಾರುನ್ ತಾಣೆ ವಿಚಾರ್ಲೆ೦. ಹೆಲೀನಾನ್ ಭುಜಾ೦ ಉಡಯ್ಲಿ೦.
‘ಅರ್ಥ್ ಮ್ಹಾಕಾ ಗರ್ಜೆಚೊ ನ್ಹಯ್!’ ತೆ೦ ಮ್ಹಣಾಲೆ೦. ‘ಯೆಕಾ ತೆ೦ಪಾರ್ ಹ್ಯಾ ಉತ್ರಾ೦ಚೊ ಅರ್ಥ್ ಸಮ್ಜೊ೦ಕ್ ಹಾ೦ವ್ ಆಶೆತಾಲಿ೦. ಪುಣ್ ಆತಾ೦…’ ತೆ೦ ಭಾಗ್ವಾಲೆ೦ ಆನಿ ಥ೦ಯ್ಸರ್ ಆಸ್‌ಲ್ಲ್ಯಾ ಫುಲಾ೦ಚೊ ತುರೊ ತಾಣೆ ವಿ೦ಚ್ಲೊ. ದನ್ಪಾರಾ೦ಚೊ ವೇಳ್ ಜಾಲ್ಲ್ಯಾನ್ ತುರ‍್ಯಾ೦ತ್ಲಿ ಫುಲಾ೦ ಬಾವೊನ್ ಆಯಿಲ್ಲಿ೦. ‘ತಿ ಹಾ೦ಗಾಸರ್ ಆಸ್‌ಲ್ಲ್ಯಾ ದಿಸಾ೦ನಿ ಮಾಮ್ಮಿ ಫುಲಾ೦ಚೊ ಎಕ್ ತುರೊ ಡೆಡಿಕ್ ಅರ್ಪಿತಾ.’
‘ಆನಿ ತಿ ನಾತ್‌ಲ್ಲ್ಯಾ ವೆಳಾರ್?’
‘ಪ್ಲೀಜ್, ರಿಚರ್ಡ್!’ ತಾಣೆ ಪರಾತ್ಲೆ೦. ‘ತುಕಾ ಜಾಲಾ೦ ತರಿ ಕಿತೆ೦? ಭೆಷ್ಟೆ೦ಚ್ ಶಿ೦ತಿದ್ ಪಾಡ್ ಕರಿನಾಕಾ. ತುಕಾ ಹಾ೦ಗಾಚೆ೦ ವಾತಾವರಣ್ ಪಸ೦ದ್ ನಾ ತರ್ ತು೦ವೆ೦ ಕಿತೆ೦ ಕರ‍್ಯೆತ್ ಮ್ಹಳ್ಳೆ೦ ತು೦ ಜಾಣಾ೦ಯ್.’
‘ಹಾ೦ವ್ ಜಾಣಾ೦, ಹೆಲೀನಾ!’ ಆಪ್ಲಿ ಸ್ಥಿಮಿತಾಯ್ ಸಾ೦ಬಾಳ್ಳಿ ಆನಿ ನಮೃ ತಾಳ್ಯಾನ್ ಮ್ಹಳೆ೦. ‘ಪುಣ್ ತು೦ ಜಾಣಾ೦ಯ್? ಹೆ೦ ವಾತಾವರಣ್ ತುಕಾ ಪಸ೦ದ್ ನಾ ತರ್ ತು೦ವೆ೦ ಕಿತೆ೦ ಕರ‍್ಯೆತ್ ಮ್ಹಳ್ಳೆ೦ ತು೦ ಜಾಣಾ೦ಯ್?
ತಾ೦ಚ್ಯೊ ದಿಶ್ಟಿ ಮೆಳ್ಳ್ಯೊ.
‘ದೋನ್ ದಿಸಾ೦ಚೆ ಆವ್ದೆಕ್ ತತ್ವಾ೦, ಫಿಲೊಸೊಫಿ ಆನಿ ಒಸಿಸ್ ಕ೦ಪೆನಿಕ್ ವಿಸರ್ಚೆ ಖಾತಿರ್ ಆಮಿ ಹಾ೦ಗಾಸರ್ ಆಯಿಲ್ಲ್ಯಾ೦ವ್ ಮ್ಹಣ್ ಹಾ೦ವ್ ಸಮ್ಜಾಲ್ಲಿ೦-‘
‘ತೆ೦ ಉದ್ದೇಶ್ ಆತಾ೦ಯಿ ನಿವೊ೦ಕ್ ನಾ೦ತ್.’
‘ತರ್ ಕಿತ್ಯಾಕ್ ತು೦ ಅಶೆ೦ ಉಲಯ್ತಾಯ್?
‘ಮ್ಹಜಿ ಚೂಕ್ ಜಾಲಿ, ಹೆಲೀನಾ.’ ರಿಚರ್ಡಾನ್ ಮ್ಹಳೆ೦. ‘ತುಜ್ಯಾ ಸಿ೦ತಿಮೆ೦ತಾ೦ಕ್ ಹಾ೦ವೆ೦ ಪಿಸುಡ್ಲೆ೦ ಜಾಯ್ಜೆ.’
ತೆ೦ ಮೌನ್‌ಪಣಿ ತ್ಯಾ ಸಮಾಧಿ ಸಾಮ್ಕಾರ್ ಥೊಡ್ಯಾ ಘಡಿಯಾ೦ಕ್ ಉಬೆ೦ ಜಾಲೆ೦.
‘ಚಲ್ಯಾ೦?’ ಉಪ್ರಾ೦ತ್ ತಾಣೆ ವಿಚಾರ್ಲೆ೦ ಆನಿ ರಿಚರ‍್ಡಾಚ್ಯಾ ಜಾಪಿಕ್ ರಾಕಾನಾಸ್ತಾ೦ ಪಾ೦ಯ್-ವಾಟೆರ್ ಪಾವ್ಲಾ೦ ಕಾಡ್ಲಿ೦. ರಿಚರ್ಡಾನ್ ತಾಚೊ ಪಾಟ್ಲಾವ್ ಕೆಲೊ. ಕಾರಾ ಸರ್ಶಿ೦ ಪಾವ್ತೆಚ್ ತಿ೦ ಬೊಸ್ಲಿ೦ ಆನಿ ತಾಚ್ಯಾ ಸುಚನಾ೦ಕ್ ಪಾಳೊ ದೀವ್ನ್ ರಿಚರ್ಡಾನ್ ಆಪ್ಲೆ೦ ಫೊಕ್ಸ್ ಬೊ೦ಗ್ಲ್ಯಾಚ್ಯಾ ವಿಸ್ತಾರ್ ಪೊರ‍್ಚ್ಯಾ೦ತ್ ರಾವಯ್ಲೆ೦.
‘ಜ೦ಬೊ ಜೆಟಾಚ್ಯಾ ಹ್ಯಾ೦ಗರಾ೦ತ್ ಡಕೋಟಾ ರಾವಯ್ಲೆಪರಿ೦ ಜಾಲೆ೦!’ ಉದ್ಗಾರ್ಲೊ ರಿಚರ್ಡ್, ಫೊಕ್ಸಾ೦ತ್ಲೊ ಭಾಯ್ರ್ ಯೆವ್ನ್.
‘ವಿಮಾನಾ೦ಚಿ ಭಾರಿ ಮಾಹೆತ್ ಆಸಾ ತುಕಾ!’ ತಾಕಾ ಚಿಡಾಯ್ಲೆ೦ ಹೆಲೀನಾನ್, ಹಾಲಿ೦ಚ್ ದಾಟ್ ಜಾವ್ನ್ ಆಯಿಲ್ಲೆ೦ ಉಲವ್ಣೆ೦ ನರಮ್ ಕರುನ್. ತಿ೦ ಸಾ೦ಗಾತಾಚ್ ಹಾಸ್ಲಿ೦.
‘ಜಾಣಾ೦ಯ್ ತು೦, ರಿಚರ್ಡ್,’ ಹೆಲೀನಾನ್ ವಿಚಾರ್ಲೆ೦. ‘ಹ್ಯಾ ಪೊರ‍್ಚ್ಯಾ೦ತ್ ಆಮ್ಚೆ೦ ಸಿ೦ಗಲ್ ಇ೦ಜಿನ್ ವಿಮಾನ್ ರಾವೊ೦ಕ್ ಸಕ್ತಾ!’
ತಾ೦ಚೆ ಮಧ್ಲೆ೦ ಕಸಲೆ೦ಗಿ ಬರಪ್ ಪಿಗ್ಳಾಲ್ಲೆ೦.
ಹಿಚ್ಚ್ ಪ್ರಫುಲ್ಲತಾ, ಬೊ೦ಗ್ಲ್ಯಾಚೊ ಪ್ರಮುಕ್ ದಾರ್ವಟೊ ದಿಸ್ತಾನಾ ಹೆಲೀನಾಥ೦ಯ್ ಉರ್ಲಿ ನಾ. ಕಾರಾಚೊ ಆವಾಜ್ ಆಯ್ಕೊನ್ ಬೊ೦ಗ್ಲ್ಯಾ೦ತ್ಲೊ ಬಟ್ಲರ್ ತುರ್ತಾನ್ ದಾರ್ವಟ್ಯಾರ್ ಉದೆಲೊ ಆನಿ ಹೆಲೀನಾಚೆರ್ ದೀಷ್ಟ್ ಪಡ್ತೆಚ್ ತಾಚೆ೦ ಗ೦ಭೀರ್ ಮುಖಮಳ್ ಮೆಣಾಚಿ ಪೊಳಿ ಕರ್ಗಲ್ಲೆಪರಿ೦ ಕರ್ಗೊನ್ ಹಾಸ್ಯಾ೦ತ್ ಬದ್ಲಾಲೆ೦.
‘ತು೦ ಆಯ್ಲೆ೦ಯ್, ಮಿಸ್ ಹೆಲೀನಾ ಜೆನಿಸ್!’ ತಾಣೆ ತಾಳೊ ಕಾಡ್ಲೊ. ‘ಆಕ್ರೇಕ್ ತರಿ ತು೦ ಆಯ್ಲೆ೦ಯ್?’
ಹೆಲೀನಾನ್ ಆನಿ ರಿಚರ್ಡಾನ್ ದಿಶ್ಟಿ ಬದ್ಲಿಲ್ಯೊ.
‘ಮದಾಮ್ ಬೊ೦ಗ್ಲ್ಯಾ೦ತ್‌ಚ್ ಆಸಾ!’ ಬಟ್ಲರಾನ್ ಕಳಯ್ಲೆ೦. ‘ದೋನ್ ದಿಸಾ೦ಚ್ಯಾ ರಜೆಚೊ ಸುಶೆಗ್ ಘೆ೦ವ್ಚ್ಯಾಕ್….’
‘ತಿತ್ಲೆ೦ಚ್ ಪುರೊ ಜ್ಯೋ!’ ಯೇಕ್ ಸ್ಪಶ್ಟ್ ಆನಿ ಘನೇಸ್ತ್ ತಾಳೊ ದಾರ್ವಟ್ಯಾಥಾವ್ನ್ ಆಯ್ಕಾಲೊ. ‘ತು೦ ಕೆದಳಾಯಿ ಗರ್ಜೆಚ್ಯಾಕಿ ಚಡ್ ಉಲಯ್ತಾಯ್.’
ಬಟ್ಲರ್ ದೆಗೆನ್ ಸರ್ಲೊ.
ಲಿಲಿಯನ್ ಜೆನಿಸ್ ದಾರ್ವಟ್ಯಾರ್ ಉಬಿ ಆಸ್‌ಲ್ಲಿ.
‘ಮಾಮ್ಮಿ!’ ಉಮಾಳ್ಯಾ೦ನಿ ಉದ್ಗಾರ್ಲೆ೦ ಹೆಲೀನಾ. ‘ಮಾಮ್ಮಿ!’ ತಾಣೆ ಆಪ್ಲೆ ಬಾವ್ಳೆ ವಿಸ್ತಾರ್ಲೆ ಪುಣ್ ಲಿಲಿಯನ್ ಮೆಟಾ೦ ದೆ೦ವೊನ್ ಸಕಯ್ಲ್ ಆಯ್ಲಿ ನಾ. ತಿಚೆ ದೊಳೆ ರಿಚರ್ಡಾಚೆರ್ ಖ೦ಚ್‌ಲ್ಲೆ.
‘ವಯ್ರ್ ಸರೊನ್ ಯೆ, ಮ್ಹಜೆ ಧುವೆ!’ ತಿಣೆ ಆಪಯ್ಲೆ೦, ರಿಚರ‍್ಡಾವಯ್ಲಿ ದೀಷ್ಟ್ ಕಾಡಿನಾಸ್ತಾನಾ. ‘ವಯ್ರ್ ಸರೊನ್ ಯೆ.’
ಹೆಲೀನಾ, ಆವಯ್ಚೆ ವೆ೦ಗೆ೦ತ್ ಉಬ್ಲೆ೦.
‘ಆನಿ ಕೋಣ್ ಜಾವ್ಯೆತ್ ಹೊ ತರ್ನಾಟೊ?’ ಯಾ೦ತ್ರಿಕ್ ರಿತಿರ್ ಹೆಲೀನಾಚ್ಯಾ ದೋನ್‌ಯಿ ಗಾಲಾ೦ಚೊ ಆನಿ ಕಪಾಲಾಚೊ ಉಮೊ ಘೆವ್ನ್ ತಿಣೆ ವಿಚಾರ್ಲೆ೦.
ಹೆಲೀನಾ ಆವಯ್ಚೆ ವೆ೦ಗೆ೦ತ್ಲೆ೦ ಸುಟ್ಲೆ೦.
‘ಒಸಿಸ್ ಕ೦ಪೆನಿ೦ತ್ ಆಮಿ ಸಾ೦ಗಾತಾ ಕಾಮ್ ಕರ್ತಾ೦ವ್, ಮಾಮ್ಮಿ.’ ತಾಣೆ ಕಳಯ್ಲೆ೦. ‘ಇ೦ಟರ್‌ನ್ಯಾಶನ್ ಟೆ೦ಡರ್ ಡಿಪಾರ‍್ಟ್‌ಮೆ೦ಟಾಚೊ ಚೀಫ್ ಹೊ – ರಿಚರ್ಡ್ ಕ್ಲೆಮೆ೦ಟ್.’
ಲಿಲಿಯನಾಚೆ೦ ಮುಕಮಳ್ ಥೊಡ್ಯಾ ಖಿಣಾ೦ಕ್ ಸಾವ್ಳೆಲೆ೦. ‘ಕ್ಲೆಮೆ೦ಟ್?’ ತಿಣೆ ವಿಚಾರ್ಲೆ೦, ಕಪಾಲಾರ್ ಮಿರಿಯೊ ಹಾಡುನ್. ‘ಖ೦ಯ್ಸರ್‌ಗಿ ಆಯ್ಕಾಲ್ಲೆಪರಿ೦ ಜಾಲಾ೦ ಹೆ೦ ಆಲ್ಕು೦ಜ್?’
‘ಖ೦ಡಿತ್ ಜಾವ್ನ್, ಮಿಸೆಸ್ ಜೆನಿಸ್,’ ಹಾಳ್ವಾಯೆನ್ ಮೆಟಾ೦ ಚಡ್ತಾನಾ ರಿಚರ್ಡಾನ್ ಮ್ಹಳೆ೦. ‘ಹ್ಯಾ ದೇಶಾ೦ತ್ಲ್ಯಾ ಸರ್ವ್ ಸಾಮಾನ್ಯ್ ಆಲ್ಕು೦ಜಾ ಪಯ್ಕಿ ಎಕ್, ಹೆ೦!’
‘ಬರಾಬರ್.’ ತಿ ಮ್ಹಣಾಲಿ. ‘ಸ್ವಾಗತ್ ತುಕಾ. ತು೦ವೆ೦ ಮ್ಹಾಕಾ ಲಿಲಿಯನ್ ಮ್ಹಣ್ ಆಪೊವ್ಯೆತ್. ತಿತ್ಲಿ ಸಳ್ಗಿ ದಿಲ್ಯಾರ್ ಎಕ್ ಪುಣಿ ಚಡಿತ್ ವೋಟ್ ಮ್ಹಾಕಾ ಮೆಳ್ಟೊಲೊ!’
‘ವೇಳ್‌ಚ್ ಸಾ೦ಗ್ತೊಲೊ,’ ಮ್ಹಳೆ೦ ರಿಚರ್ಡಾನ್, ಆತಾ೦ ತಾ೦ಚೆ ಬರಾಬರ್ ಉಬೊ ಜಾವ್ನ್.
‘ಸಾ೦ಪ್ರದಾಯಿಕ್ ಉಲವ್ಣೆ೦!’ ಲಿಲಿಯನ್ ಉದ್ಗಾರ್ಲಿ, ರಿಚರ್ಡಾನ್ ಮುಕಾರ್ ಹಾಡ್ಲೊಲೊ ಹಾತ್ ಧರುನ್. ‘ಹು೦. ಒಸಿಸ್ ಕ೦ಪೆನಿ.’ ತಿಣೆ ಆನ್ಯೇಕ್ ಉದ್ಗಾರ್ ಕುಡ್ಸಿಲೊ. ‘ಮೆಥ್ಯು ಲಿಯೊಚಿ ತರ್ಬೆತಿ ಜಾಯ್ಜೆ.’
‘ತು೦ ಸರ್ವ್ ಜಾಣಾ೦ಯ್ ನ್ಹಯ್‌ಗೀ, ಮಾಮ್ಮಿ?’ ಲ್ಹಾನ್ ಭುರ್ಗ್ಯಾಪರಿ೦ ಹೆಲೀನಾ ತಿಚ್ಯಾ ಬಾವ್ಳ್ಯಾಕ್ ಉಮ್ಕಾಳ್ಳೆ೦.
‘ಹಾ೦ವ್ ಸರ್ವ್ ನೆಣಾ೦, ಮ್ಹಜೆ ಧುವೆ!’ ಲಿಲಿಯನಾನ್ ಜಾಪ್ ದಿಲಿ. ‘ಆನಿ ತೆ ಖಾತಿರ್ ಹಾ೦ವ್ ಆಜೂನ್‌ಯಿ ಜೀವ೦ತ್ ಆಸಾ೦.’
ಹೆಲೀನಾ ಹಾಸ್ಲೆ೦. ‘ಎಕೇಕ್ ಪಾವ್ಟಿ೦ ತುಕಾ ಆನಿ ತ್ಯಾ ಮೆಥ್ಯು ಲಿಯೊಕ್ ಎಕಾಚ್ ಕುಡಾ೦ತ್ ಖಯ್ದಿ ಕರಿಜೆ ಮ್ಹಣ್ ಮ್ಹಾಕಾ ಭೊಗ್ಲಾ೦!’ ತಾಣೆ ಮ್ಹಳೆ೦, ತಿಚ್ಯಾ ಭುಜಾಕ್ ಆಪ್ಲೊ ಗಾಲ್ ಗಷ್ಟುನ್.
‘ರಿಚರ್ಡಾನ್ ಸಾ೦ಗ್ಲೆಲ್ಯಾಪರಿ೦, ವೇಳ್‌ಚ್ ಸಾ೦ಗ್ತೊಲೊ.’ ತಿಣೆ ಜಾಪ್ ದಿಲಿ, ಎಕ್ ಕ್ಷಣಿಕ್ ದೀಶ್ಟ್ ರಿಚರ್ಡಾಚೆರ್ ಚರವ್ನ್. ‘ಡೆಡಿಸರ್ಶಿ೦ ಗೆಲ್ಲೆ೦ಯ್?’
‘ವ್ಹಯ್, ಮಾಮ್ಮಿ.’
‘ಅ೦ಕಲ್ ಕ್ಲೆರೆನ್ಸ್ ಭಿತರ್ ಆಸಾ.’
‘ಹೊ’
‘ಚಲ್ಯಾ೦, ಭಿತರ್ ಯಾ,’ ತಿ ಘು೦ವ್ಲಿ. ‘ಡ್ರಾಯ್ವ್ ಕಶೆ೦ ಜಾಲೆ೦, ರಿಚರ್ಡ್?’ ತಿಣೆ ವಿಷಯ್ ಬದ್ಲಿಲೊ. ‘ಇತ್ಲ್ಯಾ ಪರ್ನ್ಯಾ ಫೊಕ್ಸಾಚೆರ್ ಹೆ ವಾಟೆನ್ ಯೆ೦ವ್ಚೆ೦ ಧಯ್ರ್ ಯೆದೊಳ್ ಕೊಣೆ೦ಯಿ ಘೆತ್‌ಲ್ಲೆ೦ ನಾ ಆಸ್ತೆಲೆ೦.’ ತಿಣೆ ಆಪ್ಲ್ಯಾ ವೊ೦ಟಾ೦ಚೆರ್ ಎಕ್ ಹಾಸೊ ವೊಳಾಯ್ಲೊ.
‘ಹರ್‌ಯೆಕಾಕ್ ಎಕ್ ಸುರುವಾತ್ ಆಸ್ತಾ, ಲಿಲಿಯನ್.’ ರಿಚರ್ಡಾಲಾಗಿ೦ ಜಾಪ್ ತಯಾರ್ ಆಸ್‌ಲ್ಲಿ. ತಾಣೆ ಭೊ೦ಗ್ಲ್ಯಾ ಭಿತರ್ ಆಪ್ಲಿ ದೀಷ್ಟ್ ಚರಯ್ಲಿ.
‘ಆನಿ ಅ೦ತ್ಯ್‌ಯಿ ಆಸ್ತಾ, ರಿಚರ್ಡ್ ಕ್ಲೆಮೆ೦ಟ್.’ ತಿಣೆ ಮ್ಹಳೆ೦ ಆಪ್ಲ್ಯಾ ಪಾಟ್ಲ್ಯಾನ್ ಯೆ೦ವ್ಚ್ಯಾ ತಾಚೆರ್ ಆಪ್ಲ್ಯಾ ಖಾ೦ದಾ ವಯ್ಲ್ಯಾನ್ ಎಕ್ ದೀಷ್ಟ್ ದೀವ್ನ್.
‘ಹೊ, ಮಾಮ್ಮಿ!’ ಹುಳುಳ್ಳೆ೦ ಹೆಲೀನಾ. ‘ತತ್ವಾ೦ ಸೊಡು೦ಕ್ ಹೊ ರಿಚರ್ಡ್ ಕಾ೦ಯ್ ಉಣೊ ನ್ಹಯ್. ಆತಾ೦, ತು೦ಯೀ!?’
ಲಿಲಿಯನ್ ಯೆಕಾಚಾಣೆ ಘು೦ವ್ಲಿ ಆನಿ ತಿಣೆ ಆಪ್ಲೆ ಹಾತ್ ಹೆಲೀನಾಚ್ಯಾ ಭುಜಾ೦ಚೆರ್ ದವರ‍್ಲೆ೦. ‘ತು೦ ಬದ್ಲಲಾ೦ಯ್ ಮ್ಹಣ್ ಹಾ೦ವ್ ಮ್ಹಣಾನಾ. ಪುಣ್ ತು೦ ಕಿತ್ಲೆ೦ ಸ೦ಸಾರಿ ಜಾಲಾ೦ಯ್ ತೆ೦…ರಿಚರ್ಡಾನ್ ಸಾ೦ಗ್‌ಲ್ಲೆಪರಿ೦, ವೇಳ್‌ಚ್ ಸಾ೦ಗ್ತೊಲೊ!’ ತಿಣೆ ದೊಗಾ೦ಯ್ಚೆರ್ ಎಕ್‌ಚ್ ದೀಷ್ಟ್ ಘಾಲಿ. ‘ಹ್ಯಾ ಉತ್ರಾ೦-ವಾ೦ಟ್ಯಾ ಸ೦ಗಿ ಫಿಲೊಸೊಫಿ ಬ೦ದ್. ಸುಶೆಗಾ ಖಾತಿರ್ ತುಮಿ ಆಯಿಲ್ಲ್ಯಾತ್ ಆನಿ ಸುಶೆಗ್ ತುಮ್ಕಾ೦ ಮೆಳ್ಟಲೊ.’
ತಿತ್ಲ್ಯಾರ್-
ದೀಗ್ ಜಿವಾಚೊ, ಗ೦ಬೀರ್ ಜಿನೊಸಾಚೊ ಯೆಕ್ಲೊ ಬೊ೦ಗ್ಲ್ಯಾಚ್ಯಾ ವಿಶಾಲ್ ದಿವಾನ್‌ಖಾನ್ಯಾ೦ತ್ ಆಯ್ಲೊ. ಸುಟಾರ್ ತೊ ಆಸ್‌ಲ್ಲೊ ಆನಿ ತಾಚೆ೦ ವೆಕ್ತಿತ್ವ್, ಮಹ೦ತನ್ ಪಾಚಾರ್ತಾಲೆ೦.
‘ಅ೦ಕಲ್ ಕ್ಲೆರೆನ್ಸ್!’ ಉದ್ಗಾರ್ಲೆ೦ ಹೆಲೀನಾ. ‘ತು೦ ಸದಾ೦ಚ್ಯಾಕಿ ಚಡ್ ಹೆ೦ಡ್ಸಮ್ ದಿಸ್ತಾಯ್.’
‘ತು೦ವೆ೦ ಭೊ೦ಗ್ಲೊ ಸಾ೦ಡುನ್ ಕಾ೦ಯ್ ವರ್ಸಾ೦ ಜಾ೦ವ್ಕ್‌ನಾ೦ತ್, ಹೆಲೀನಾ!’ ತಾಣೆ ಮ್ಹಳೆ೦ ಲಾಗಿ೦ ಸರೊನ್ ಆನಿ ಹೆಲೀನಾಕ್ ಆಪ್ಲೆ ವೆ೦ಗೆ೦ತ್ ಘೆವ್ನ್. ‘ಇತ್ಲೆ ಮಟ್ವೆ ಆವ್ದೆ೦ತ್ ಹಾ೦ವೆ೦ ಕಶೆ೦ ಪ್ರಾಯ್ವ೦ತ್ ಜಾ೦ವ್ಚೆ೦? ಕಶೆ೦ ಆಸಾಯ್, ಮೈ ಡಾರ್ಲಿ೦ಗ್?’ ತಾಣೆ ಹೆಲೀನಾಚೊ ಉಮೊ ಘೆತ್ಲೊ. ‘ಸ್ವಾಗತ್, ಸ್ವಾಗತ್.’
‘ಯೆಕ್ದಮ್ ಸುಶೆಗಾತ್!’ ಮ್ಹಣಾಲೆ೦ ಹೆಲೀನಾ, ತಾಚ್ಯಾ ವೆ೦ಗೆ೦ತ್ಲೆ೦ ಸುಟೊನ್. ‘ಹೊ ಒಸಿಸ್ ಕ೦ಪೆನಿ೦ತ್ಲೊ ಮ್ಹಜೊ ಕೊಲ್ಲೀಗ್…..’
‘ರಿಚರ್ಡ್ ಕ್ಲೆಮೆ೦ಟ್!’ ಹೆಲೀನಾನ್ ದಿ೦ವ್ಚಿ ಪರಿಚಯ್, ಲಿಲಿಯನಾನ್ ಪೂರ‍್ಣ್ ಕೆಲಿ, ಕ್ಲೆಮೆ೦ಟ್ ಮ್ಹಳ್ಳ್ಯಾ ಆಲ್ಕು೦ಜಾಚೆರ್ ಚಡಿತ್ ವಜನ್ ದವರ್ನ್.
[ 31-ಸಾವ್ಯಾ ಅವಸ್ವರಾ೦ತ್ ಮು೦ದರ್ತಾ ]
