ದೊಗಾ೦ಯಿ ದಾದ್ಲ್ಯಾ೦ನಿ ಹಾತ್ ಮೆಳಯ್ಲೆ.
‘ಒಸಿಸ್ ಕ೦ಪೆನಿ, ನ್ಹಯ್‌ಗೀ?’ ಮ್ಹಣಾಲೊ ಕ್ಲೆರೆನ್ಸ್ ರಿಚರ‍್ಡಾಚೊ ಹಾತ್ ಸೊಡುನ್. ‘ಎಕ್ ದೋನ್ ಪಾವ್ಟೀ೦ ಮೆಥ್ಯು ಲಿಯೊಕ್ ಮೆಳ್ಚೊ ಅವ್ಕಾಸ್ ಮ್ಹಾಕಾ ಲಾಬ್ಲಾ.’
ರಿಚರ್ಡಾನ್ ಭುಜಾ೦ ಹಾಲಯ್ಲಿ೦.
‘ಆತಾ೦,’ ಮ್ಹಣಾಲಿ ಲಿಲಿಯನ್. ‘ರಿಚರ್ಡ್ ಆಮ್ಚೊ ಸಯ್ರೊ ತರ್‌ಯಿ ತಾಚ್ಯಾ ಸುಶೆಗಾಚಿ ಜವಾಬ್ದಾರಿ ಹೆಲೀನಾಚಿ!’ ತಿಣೆ ಕಳಯ್ಲೆಂ. ‘ಹೆಲೀನಾ ತುಜೆ೦ ಕಾಮ್ ತು೦ ಜಾಣಾ೦ಯ್.’
‘ಯೆಸ್, ಮಾಮ್ಮಿ,’ ಹೆಲೀನಾನ್ ಜಾಪ್ ದೀವ್ನ್ ಜ್ಯೋ-ಕ್ ಆಪಯ್ಲೊ ಆನಿ ತುರ‍್ತಾನ್ ತಾಕಾ ಥೊಡಿ೦ ಸುಚನಾ೦ ದಿಲಿ೦. ಜ್ಯೋ, ರಿಚರ್ಡಾಚೆ೦ ಒವರ್‌ನಾಯ್ಟ್ ಬೇಗ್ ಘೆವ್ನ್ ತಾಕಾ ಗೆಸ್ಟ್ ರುಮಾಚಿ ವಾಟ್ ದಾಕಯ್ತಾನಾ ತ್ಯಾ ದಿವಾನ್‌ಖಾನ್ಯಾ೦ತ್ ತಿ೦ ತೆಗಾ೦ಚ್ ಉರ‍್ಲಿ೦.
‘ಮ್ಹಾಕಾ ಟಾವ್ನಾ೦ತ್ ಥೊಡೆ೦ ಕಾಮ್ ಆಸಾ,’ ಮ್ಹಣಾಲೊ ಕ್ಲೆರೆನ್ಸ್.
‘ಜೆವಣ್ ಕರ‍್ನ್೦ಚ್ ವೆತೊಯ್.’
‘ನಾ ಲಿಲಿಯನ್, ಜೆವಣ್ ಟಾವ್ನಾ೦ತ್‌ಚ್ ಕರ್ತಾ೦. ಕಶೆ೦ಯಿ ಥೊಡ್ಯಾ ಮ್ಹಯ್‌ನ್ಯಾ೦ ಉಪ್ರಾ೦ತ್ ಆವಯ್ ಆನಿ ಧುವ್ ಸಾ೦ಗಾತಾ ಮೆಳ್ಳ್ಯಾ೦ತ್, ಯೆಕಾ೦ತಾ೦ತ್ ಉಲ೦ವ್ಚೆ೦ ಸಬಾರ್ ಆಸ್ತೆಲೆ೦.
ಲಿಲಿಯನಾನ್ ಎಕಾ ಲಾ೦ಬ್ ಉಸ್ವಾಸ್ ಸೊಡ್ಲೊ.
‘ಹಿ೦ ರಜೆರ್ ಆಯ್ಲ್ಯಾ೦ತ್ ಮ್ಹಣ್ ತುವೆ೦ಯಿ ರಜಾ ಘೆ೦ವ್ಚಿ ನಾಕಾ, ಕ್ಲೆರೆನ್ಸ್.’ ತಿಣೆ ಜಾಗಯ್ಲೆ೦. ‘ವೆಗಿ೦ ಪಾಟಿ೦ ಯೆ. ಪೊರ‍್ವಾ೦ಚೆ೦ ಕಾರ‍್ಯಕ್ರಮ್ ಇತ್ಯರ‍್ಥ್ ಕರು೦ಕ್ ಆಸಾ.’
ಕ್ಲೆರೆನ್ಸಾನ್ ಆಪ್ಲೆ೦ ಮಾತೆ೦ ಹಾಲಯ್ಲೆ೦. ಹೆಲೀನಾಚ್ಯಾ ಗಾಲಾಕ್ ಹಾಳ್ವಾಯೆನ್ ಥಾಪ್ಡುನ್ ತೊ ಭಾಯ್ರ್ ಗೆಲೊ.
ಆತಾ೦ ಆವಯ್ ಆನಿ ಧುವ್‌ಚ್ ಉರ‍್ಲಿ೦.
‘ಹೂ೦೦,’ ಲಾ೦ಬಾಯೆನ್ ಹು೦ಕಾರ‍್ಲಿ ಲಿಲಿಯನ್. ‘ರಾಜ್‌ಕಾರಿಣ್ ಲಿಲಿಯನ್ ಜೆನಿಸಾಚಿ ಧುವ್, ಮೆಥ್ಯು ಲಿಯೊಚೆ೦ ಸೆಕ್ರೆಟರಿ.’ ತಿಣೆ ಹೆಲೀನಾಚೆರ್ ದೀಷ್ಟ್ ಚರಯ್ಲಿ. ‘ಪೆಟ್ರೋಸ್ಟೇಟಾಚೊ ಹವೊ ತುಕಾ ಬರೊಚ್ ಒ೦ಬ್‌ಲ್ಲೆಪರಿ೦ ದಿಸ್ತಾ.’
ಹೆಲೀನಾ, ಲಾಗ್ಶಿಲ್ಯಾ ದಿವಾನಾಚೆರ್ ಕೊಸ್ಳೊನ್ ಬಸ್ಲೆ೦.
‘ಹೊ, ಮಾಮ್ಮಿ,’ ತೆ೦ ಮ್ಹಣಾಲೆ೦. ‘ದೀಸ್ ವೆತಾ೦ ವೆತಾ೦ ತುಜಿ೦ ಭಾಷಣಾ೦ ಬೊ೦ಗ್ಲ್ಯಾ೦ತ್‌ಯಿ ಘಾಜೊ೦ಕ್ ಲಾಗ್ಲ್ಯಾ೦ತ್.’ ತೆ೦ ದುರ‍್ಸಾಲೆ೦. ‘ದೋನ್ ದೀಸ್ ಪರ್ಯಾ೦ತ್ ಹ್ಯಾ ಸಗ್ಳ್ಯಾ ಸ೦ಸಾರಾಚಿ ಪರ್ವಾ ಕರು೦ಕ್‌ಚ್ ಮ್ಹಾಕಾ ನಾಕಾ.’
‘ತಿತ್ಲೆ೦ಯಿ ಥಕ್ಲ್ಯಾ೦ಯ್?!’ ತಿ ತಾಚ್ಯಾ ಸಾಮ್ಕಾರ್ ಬಸ್ಲಿ. ‘ಸ೦ಸಾರಾ೦ತ್ ಸ೦ಸಾರಿ ಜಾವ್ನ್ ಜಿಯೆ೦ವ್ಕ್ ತುಕಾ ಜಾಯ್ ಆಸ್ಲೆ೦!’
‘ಆತಾ೦ಯಿ ಜಾಯ್!’ ದಿವಾನಾಕ್ ಮಾತೆ೦ ತೆ೦ಕೊನ್ ಹೆಲೀನಾನ್ ದೊಳೆ ಧಾ೦ಪ್ಲೆ. ‘ಪಳೆ೦ವ್ಕ್ ಗೆಲ್ಯಾರ್ ತುಜ್ಯಾಕಿ ಹಾ೦ವ್೦ಚ್ ಭಾಗಿ. ಹಾ೦ವ್ ರಜಾ ಘೆ೦ವ್ಕ್ ಸಕ್ತಾ೦.’
‘ಸಾ೦ಗಾತಾ ಯೆಕಾ ಧೆಡ್ಯಾಕ್‌ಯಿ ಹಾಡು೦ಕ್ ಸಕ್ತಾಯ್!’ ತಿ ಮ್ಹಣಾಲಿ, ಪುಣ್ ತಿಚ್ಯಾ ತಾಳ್ಯಾ೦ತ್ ಹಾಸ್ಯ್ ಆಸ್‌ಲ್ಲೆ೦. ‘ಕೋಣ್ ಹೊ ರಿಚರ್ಡ್ ಕ್ಲೆಮೆ೦ಟ್?’
‘ಒಸಿಸ್ ಕ೦ಪೆನಿ೦ತ್ ತಾಕಾ ಚಿಟ್ಟ್ಯಾ ವಾಗಾಚೆ೦ ಪೀಲ್ ಮ್ಹಣ್ ಒಳ್ಕಾತಾತ್.’
‘ತೊ ಮ್ಹಾಕಾ ತಸೊ ದಿಸನಾ.’
‘ತೊ ಬೊಕ್ಡೆಚೆ೦ ಪೀಲ್ ಖ೦ಡಿತ್ ನ್ಹಯ್.’
‘ಹು೦, ಬರಿಚ್ ವಕಾಲಾತ್ ಕರ್ತಾಯ್,’ ತಿಣೆ ಮ್ಹಳೆ೦. ‘ತು೦ವೆ೦ ಪಳೆಯಿಲ್ಲೆ೦ ಬೊಕ್ಡೆಚೆ೦ ಪೀಲ್ ಎಕ್‌ಚ್-ವಿಲ್ಲಿ.’
ಹೆಲೀನಾನ್ ದೊಳೆ ಉಗ್ತೆ ಕೆಲೆ.
‘ಫಾದರ್ ಜೊನಾನ್ ಮ್ಹಾಕಾ ಕಿತೆ೦ಚ್ ಸಾ೦ಗೊ೦ಕ್ ನಾ, ಹೆಲೀನಾ!’ ತಿಣೆ ಮ್ಹಳೆ೦, ಆಪ್ಣಾಕ್‌ಚ್ ತಿದ್ವು೦ಚೆಪರಿ೦. ಪುಣ್ ಹೆಲೀನಾಚಿ ಮೋತ್ ಖ೦ಯ್ಸರ್‌ಗಿ ಆಸ್‌ಲ್ಲಿ. ‘ಮಾಮ್ಮಿ ಕಿತ್ಲಿ ಸೊಬಿತ್ ದಿಸ್ತಾ, ಆತಾ೦ಯಿ,’ ತಿಚೆ ಫಳ್ಪಳೆ ದೊಳೆ ಪಳೆವ್ನ್ ತಾಣೆ ಚಿ೦ತ್ಲೆ೦.
‘ಕಸೊ ಆಸಾ, ಫಾದರ್ ಜೊನ್?’ ಗಳಾಯೆನ್ ತಾಣೆ ವಿಚಾರ್ಲೆ೦.
‘ತಾಕಾ ಆನಿ ಡೋಬ್ಬಿಕ್ ತು೦ ಭೆಟ್ತೆಲೆ೦ಯ್‌ಚ್.’ ತಿಣೆ ಚತುರಾಯೆನ್ ಜಾಪ್ ದಿಲಿ. ‘ನಾ ತರ್ ತುಜಿ ರಜಾ ಬರಿ ಜಾಯ್ತ್, ಹೆಲೀನಾ?’
‘ಹಾ೦ವ್ ತುಜೆ ಸರ್ಶಿ೦ ರಾವೊ೦ಕ್ ಆಯಿಲ್ಲಿ೦ ಮಾಮ್ಮಿ.’
‘ತೆ೦ ಹಾ೦ವ್ ಜಾಣಾ೦. ಪುಣ್…ತೊ?’ ಮೆಟಾ೦ ಚಡೊನ್ ಗೆಸ್ಟ್ ರೂಮಾಕ್ ರಿಚರ್ಡ್ ಗೆಲ್ಲ್ಯಾ ದಿಶೆನ್ ತಿಣೆ ಪಳೆಲೆ೦. ‘ಹು೦, ಒಸಿಸ್ ಕ೦ಪೆನಿ೦ತ್ಲೆ೦ ಚಿಟ್ಟ್ಯಾ ವಾಗಾಚೆ೦ ಪೀಲ್?’
‘ಚಿಟ್ಟ್ಯಾ ವಾಗಾಚ್ಯಾ ಪಿಲಾಕ್ ಪುಣಿ ಹಾ೦ವ್ ಘೆವ್ನ್ ಆಯ್ಲಿ೦!’
‘ವಿಲ್ಲಿ ಉಪ್ರಾ೦ತ್ ಹ್ಯಾ ಎಸ್ಟೇಟಾಕ್ ಯೆ೦ವ್ಚೊ ಪಯ್ಲೊ ತರ‍್ನಾಟೊ ಹೊ.’ ತಿಚ್ಯಾ ತಾಳ್ಯಾ೦ತ್ ಮಿರ‍್ಮಿರೆ ಆಸ್‌ಲ್ಲೆ. ‘ಪುಣ್ ನಿಮಾಣೊ ನ್ಹಯ್ ಜಾವ್ಯೆತ್.’
‘ಮತ್ಲಬ್?’
‘ಮ್ಹಜ್ಯಾಕಿ ಬರ‍್ಯಾನ್ ತು೦ ಜಾಣಾ೦ಯ್, ಹೆಲೀನಾ.’ ತಿಣೆ ಧುವೆಕ್‌ಚ್ ಪಳೆಲೆ೦. ‘ಶವರ್ ಘೆವ್ನ್ ಥೊಡೊ ವೇಳ್ ಆರಾಮ್ ಕರ್. ಉಪ್ರಾ೦ತ್ ಲಿವಿ೦ಗ್ ರೂಮಾ೦ತ್ ಆಯ್ಲ್ಯಾರ್ ಆಮಿ ಸುಶೆಗಾನ್ ಬಸುನ್ ಉಲೊವ್ಯೆತ್.’
‘ಪುಣ್, ರಿಚರ್ಡ್ ಯೆ೦ವ್ಚಾಕಿ ಫುಡೆ೦ ತುಕಾ ಕಿತೆ೦ ತರಿ ಮಹತ್ವಾಚೆ೦ ಉಲ೦ವ್ಕ್ ಆಸ್ತೆಲೆ೦!’
ಲಿಲಿಯನಾನ್ ಮೆಚ್ವಣೇನ್ ಮಾತೆ೦ ಹಾಲಯ್ಲೆ೦.
‘ಆಸಾ,’ ತಿಣೆ ಮ್ಹಳೆ೦ ಆಪ್ಲಿ೦ ಉತ್ರಾ೦ ಕಾ೦ಪಯ್‌ನಾಸ್ತಾ೦. ‘ತುಜ್ಯಾ ಆನಿ ರಿಚರ್ಡಾ ಮದೆ೦ ಕಿತೆ೦ ಚಲ್ತಾ ಮ್ಹಳ್ಳೆಂ ಸವಾಲ್ ಹಾಂವ್ ವಿಚಾರಿನಾ. ಕಿತೆ೦ಯಿ ಚಲ್ತಾ ತರ್ ಮ್ಹಜ್ಯಾ ಎಲಿಸಾ೦ವಾಕ್ ತಿಬೊ ಯಾ ಆಯ್ಬ್ ಹಾಡಿನಾ ಜಾ೦ವ್. ಹಾಂವೆಂ ತುಕಾ ತರ್ಭೆತ್ ಕೆಲಾ೦ ಆನಿ ಹಾಂವೆಂ ದಿಲ್ಲ್ಯಾ ತರ್ಭೆತಿ೦ತ್ ಕಾ೦ಯ್ ಉಣೆ ಪಡ್ಲ್ಯಾರ್ ತೆ೦ ಪ್ರೀಮಿಯರ್ ಕೊಲೆಜಿಚ್ಯಾ ಹೊಸ್ಟೆಲಾನ್ ಭರ್ತಿ ಕೆಲಾ೦ ಮ್ಹಣ್ ಹಾಂವ್ ಪಾತ್ಯೆತಾ೦. ತಶೆ೦ ಮ್ಹಣ್ತಾನಾ, ತುಜ್ಯಾ ನಿಸ್ಕಳ್ಪಣಾ ವಿಶಾ೦ತ್‌ಯಿ ಮ್ಹಾಕಾ ವಿಚಾರೊ೦ಕ್ ನಾ.’
ತಾ೦ಚ್ಯೊ ದಿಷ್ಟಿ ಯೆಕಾಮೆಕಾ ಖಿಳಾಲ್ಯೊ.
‘ತರ್ ತುಕಾ ಕಿತೆ೦ ಉಲ೦ವ್ಕ್ ಜಾಯ್ ?’
‘ಮಾವ್ರಿಸ್ ಆಗುಸ್ತಿನ್!’
ಹೆಲೀನಾನ್ ಆಪ್ಲೆ ಲಾ೦ಬ್ ತೆಲ್ತೆ ಪಾ೦ಯ್ ದೊಡುನ್ ದಿವಾನಾಚೆರ್ ದವರ್ಲೆ.
‘ಮಾವ್ರಿಸ್ ಆಗುಸ್ತಿನ್,’ ತಾಣೆ ತೆ೦ ನಾ೦ವ್ ಉಚಾರ್ಲೆ೦. ‘ರಾಜಕೀಯಾ೦ತ್ ತುಜೊ ಎದ್ರಿ, ಪ್ರತಿಸ್ಪರ್ಧಿ.’
‘ಬರಾಬರ್,’ ತಿಣೆ ಆಪ್ಲೆ೦ ಸಗ್ಳೆ೦ ಶಿ೦ತಿದ್ ಆನಿ ಗಮನ್ ಹೆಲೀನಾಚೆರ್ ಖ೦ಚಯ್ಲೆ೦. ‘ಹ್ಯಾ ದಿಸಾ೦ನಿ ತಾಕಾ ಭೆಟ್ಚೊ ಅವ್ಕಾಸ್ ತುಕಾ ಲಾಬ್ಲಾ?’
‘ಯೆಕ್ ಯಾ ದೋನ್ ಪಾವ್ಟಿ೦, ವ್ಹಯ್.’
‘ಮ್ಹಾಕಾ ವಿವರ್ ದಿಶಿ?’
‘ತು೦ ನೆಣಾ೦ ಆಸ್ಚೆ೦ ಹಾ೦ವ್ ಜಾಣಾ೦ ಮ್ಹಳ್ಳಿ ಹಮಿದಾರಿ ಮ್ಹಾಕಾ ನಾ.’ ಹೆಲೀನಾನ್ ಆಪ್ಲೆ ಮೊಚೆ ನಿಕ್ಳಾವ್ನ್ ಗಳಯ್ಲೆ. ‘ಆಮಿ ಭೆಟ್‌ಲ್ಲ್ಯಾ೦ವ್ ವಯ್ವಾಟಾಕ್ ಲಾಗುನ್ ಮಾತ್ರ್.’
‘ಕಸಲಿಯಿ ಲ್ಹಾನ್ ಮಾಹೆತ್ ಪರ್ಯಾ೦ತ್ ಮ್ಹಾಕಾ ಉಪ್ಕಾರಾಕ್ ಪಡತ್.’
‘ತಶೆ೦ಚ್ ತುಜೆ ವಿಶಾ೦ತ್ ಮಾಹೆತ್ ಘೆ೦ವ್ಕ್ ತೊ ಮಾವ್ರಿಸ್‌ಯಿ ಪ್ರೇತನ್ ಕರ್ತಾ ಆಸ್ತೊಲೊ.’
‘ಭೇಶಕ್! ತಸಲೆ೦ ಶಿ೦ತಿದ್ ನಾತ್‌ಲ್ಲ್ಯಾ೦ನಿ ರಾಜಕೀಯಾ೦ತ್ ಆಸ್ಚೆ೦ ನ್ಹಯ್, ಬಗಾರ್ ಡೋಬ್ಬಿಪರಿ೦ ಜಿ೦ಜರ್ ಬ್ರೆಡ್ ಕರುನ್ ವಿಕ್ಚೆ೦.’ ತಿಚೊ ತಾಳೊ ಪಾಜುನ್ ಯೆತಾಲೊ.
‘ಹೆ೦ ಸರ್ವ್ ತುಕಾ ಪಸ೦ದ್, ಮಾಮ್ಮಿ?’ ಆಪ್ಲ್ಯೊ ಆಸ್ಡ್ಯೊ ಅಶೀರ್ ಕರುನ್ ಹೆಲೀನಾನ್ ವಿಚಾರ್ಲೆ೦. ‘ತುಕಾ ಖ೦ಚಾ೦ತ್ ಉಣೆ ಆಸಾ? ಎಸ್ಟೇಟಾ೦ತ್ಲ್ಯಾ ಮುನಾಫ್ಯಾ೦ತ್ಲೊ ಎಕ್ ಠಕ್ಕೊ ಖರ್ಚಿಸಿ ತರ್ ವೋಟ್ ಆಪಾಪಿ೦ಚ್ ತುಜ್ಯಾ ಡಬ್ಬ್ಯಾಕ್ ಪಡ್ತೆಲೆ.’
‘ತಿತ್ಲೆ೦ ಮೋವ್ ಜಾಯ್ನಾಕಾ, ಹೆಲೀನಾ!’ ತಿಣೆ ಮ್ಹಳೆ೦. ‘ಬಸುನ್ ಆಸ್ಚ್ಯಾ ಶಿಕಾರೆಚೆರ್ ಫಾರ್ ಮಾರ್ಚೊ ಜಿನೊಸ್ ಮ್ಹಜೊ ನ್ಹಯ್ ಮ್ಹಣ್ ತು೦ ಜಾಣಾ೦ಯ್. ತುಕಾಯೀ ಕಿತೆ೦ ಉಣೆ೦ ಆಸಾ, ಹೆಲೀನಾ? ತರಿ ತು೦ ತ್ಯಾ ಮೆಥ್ಯು ಲಿಯೊಚ್ಯಾ ಹಾತಾ೦ ಪ೦ದಾಕ್ ನವ್ಕರಿ ಕರ್ತಾಯ್!?’
‘ತ್ಯಾ ಮೆಥ್ಯು ಲಿಯೊಚ್ಯಾ ಹಾತಾ೦ ಪ೦ದಾಕ್ ಮ್ಹಳ್ಳ್ಯಾಚೊ ಮತ್ಲಬ್?’ ಹೆಲೀನಾಚೊ ತಾಳೊ ವಿರರಾಯ್ ಸುಚಾಯ್ತಾಲೊ. ‘ತೊ ಕಸಲೊ ಮೆಥ್ಯು ಲಿಯೊ?’
‘ಹು೦!’ ತಿ ಮ್ಹಣಾಲಿ ಮೆಚ್ವಣೆನ್‌ಶೆ೦. ‘ಬೊಸ್ಸಾಚೊ ಬರೊಚ್ ಘಮ೦ಡ್ ಆಸಾ ತುಕಾ. ಆಸೊ೦. ಆತಾ೦, ಮಾವ್ರಿಸ್ ಆಗುಸ್ತಿನ್?’
ಉಪಾವ್‌ನಾಸ್ತಾ೦ ಹೆಲೀನಾನ್ ತಿಕಾ ವಿವರ್ ದಿಲೊ.
‘ಕುತೂಹಲ್ಭರಿತ್!’ ತಿ ಉದ್ಗಾರ್ಲಿ.
‘ಕಿತ್ಲೆ ವೊಟ್ ಡಬ್ಬ್ಯಾ೦ತ್ ಪಡ್ಲೆ?’ ವೊ೦ಟ್ ವೊಳಾವ್ನ್ ಹೆಲೀನಾನ್ ವಿಚಾರ್ಲೆ೦.
‘ತುಜೊ ಚುಕ್ಲೊ ಮ್ಹಣ್ ಇಸ್ತಾ,’ ತಿಣೆ ಜಾಪ್ ದಿಲಿ ಆನಿ ತವಳ್ ರಿಚರ್ಡ್ ದಿವಾನ್‌ಖಾನ್ಯಾ೦ತ್ ಆಯ್ಲೊ. ತಾಣೆ ಸದಿಳ್ ಸ್ಲ್ಯಾಕ್ಸ್ ಘಾಲ್ಲೆ ಆನಿ ಪ್ರಫುಲ್ಲ್ ದಿಸ್ತಾಲೊ.
‘ಹಾ೦ವೆ೦ ಮದೆ೦ ಯೆವ್ಯೆತ್?’ ತಾಣೆ ವಿಚಾರ್ಲೆ೦, ಲಿಲಿಯನಾಕ್ ಹಾಳ್ವಾಯೆನ್ ಮಾತೆ೦ ಭಾಗಾವ್ನ್.
‘ಖ೦ಡಿತ್!’ ಉಟೊನ್ ಉಬೆ೦ ಜಾಲೆ೦ ಹೆಲೀನಾ. ‘ಮ್ಹಾಕಾ ಅರ್ಧೆ೦ ವೊರ್ ಪುಣ್‌ಯಿ ಹುನ್ ಉದ್ಕಾಚ್ಯಾ ಟಬ್ಬಾ೦ತ್ ಬಸಜೆ. ಹಾಚ್ಯಾ ಫೊಕ್ಸ್ ವ್ಯಾಗನಾ೦ತ್ ಬಸ್ಚೆ೦ ಆನಿ ರಿಫಾಯ್ನರಿಚ್ಯಾ ದೆಡಾ ಇ೦ಚಾ೦ಚ್ಯಾ ಪಾಯ್ಪಾ೦ತ್ ಘುಸ್ಚೆ೦ ಯೆಕ್‌ಚ್ಚ್.’
ರಿಚರ್ಡ್ ಆನಿ ಲಿಲಿಯನ್ ಸಾ೦ಗಾತಾಚ್ ಹಾಸ್ಲಿ೦.
‘ಬಸ್, ರಿಚರ್ಡ್ ಕ್ಲೆಮೆ೦ಟ್, ಬಸ್.’ ಲಿಲಿಯನಾನ್ ಆಪವ್ಣೆ೦ ದಿಲ್ಲೆ೦, ಮೆಟಾ೦ ಚಡೊನ್ ವೆಚ್ಯಾ ಹೆಲೀನಾಚ್ಯಾ ಕಾನಾ೦ಕ್ ಪಡ್ಲೆ೦. ‘ಆತಾ೦, ಹೆ೦ ಪೀಲ್ ಕಿತ್ಲೆ೦ ತೊ೦ಡ್ ಸೊಡ್ತಾ ಪಳೊವ್ಯಾ೦,’ ಮತಿ೦ತ್‌ಚ್ ಹಾಸೊನ್ ತೆ೦ ಆಪ್ಲ್ಯಾ ರೂಮಾ೦ತ್ ರಿಗ್ಲೆ೦.
ರೂಮ್ ಸುಸಜ್ಜಿತ್ ಆಸ್‌ಲ್ಲೆ೦ ತರಿ ಮನ್ಶ್ಯಾ ರಾವ್ಪಾಚೊ ವಾಸ್ ನಾತ್‌ಲ್ಲ್ಯಾನ್ ಫು೦ರ್ಗೆಲ್ಲೆ೦ ವಾರೆ೦ ತಾಚ್ಯಾ ನಾಕಾಕ್ ಮಾರ್ಲೆ೦. ಬಾತ್ ರುಮಾಕ್ ವಚುನ್ ತಾಣೆ ಟಬ್ಬಾ೦ತ್ ಉದಕ್ ಸೊಡ್ಲೆ೦ ಆನಿ ಕುಡಾಕ್ ಪಾಟಿ೦ ಯೆವ್ನ್ ಆ೦ಗಾವಯ್ಲಿ ಮುಸ್ತಾಯ್ಕಿ ನಿಕ್ಳಾಯ್ಲಿ ಆನಿ ಲಾ೦ಬ್ ಆರ್ಶ್ಯಾ ಸಾಮ್ಕಾರ್ ರಾವ್ಲೆ೦.
‘ಮ್ಹಾಕಾ ಹೆಪರಿ೦ ರಿಚರ್ಡ್ ಪಳೆತ್ ತರ್ ಕಿತೆ೦ ಕರಿತ್?’ ತಾಚಿ೦ ಚಿ೦ತ್ನಾ೦ ಉಸ್ಕಾಲಿ೦. ‘ಬಿಕಿನಿರ್ ಆಸ್‌ಲ್ಲ್ಯಾ ಮ್ಹಾಕಾ ಪಳೆವ್ನ್ ತೊ ವಿಲ್ಲಿ ಪಿಸೊಚ್ಚ್ ಜಾಲ್ಲೊ ತರ್ ಒಸಿಸ್ ಕ೦ಪನಿ೦ತ್ಲೊ ಹೊ ದುಸ್ರೊ ದೇವ್ ಕಿತೆ೦ ಕರಿತ್?’
ತಾಕಾ ಜಾಪ್ ಮೆಳ್ಳಿ ನಾ; ಫಕತ್ ಬಾತ್‌ಟಬ್ಬಾ೦ತ್ ಭರ್ಚ್ಯಾ ಉದ್ಕಾಚೊ ಆವಾಜ್ ತಾಕಾ ಆಯ್ಕಾತಾಲೊ. ಕಿತ್ಯಾಕ್ ಆಪುಣ್ ರಿಚರ್ಡಾ ವಿಶಾ೦ತ್ ಅಶೆ೦ ಚಿ೦ತಾ೦ ಜಾವ್ಯೆತ್? ಸ್ತ್ರೀಯೆನ್ ಸ್ವತ೦ತ್ರ್ ದಿಲ್ಯಾರ್ ಖ೦ಚೊ ದಾದ್ಲೊ ವೊಗೆಚ್ ಬಸತ್? ಯೆಕ್‌ಚ್ ತಾಣೆ ಹಿಜ್ಡೊ ಜಾಯ್ಜೆ ಯಾ ಜೆರೊಮ್ ಲಾಜ್ರಾಪರಿ೦ ಸರ್ವ್ ಸ್ತ್ರೀಯಾ೦ಕ್ ಆನಿ ಚಲಿಯಾ೦ಕ್ ಭಯ್ಣ್ ಆನಿ ಧುವ್ ಮ್ಹಣ್ ಲೆಕ್ತೊಲೊ ಜಾಯ್ಜೆ. ತೆ೦ ಉಗ್ತ್ಯಾನ್ ಹಾಸ್ಲೆ೦ ಆನಿ ಬಾತ್‌ಟಬ್ಬಾ೦ತ್ ಬುಡ್ಲೆ೦.
ಲಾಗಿ೦ ಲಾಗಿ೦ ಚಾಳೀಸ್ ಮಿನುಟಾ೦ ಉಪ್ರಾ೦ತ್ ನಿರ್ಮಳ್ ಜಾವ್ನ್ ಲಿವಿ೦ಗ್ ರುಮಾ೦ತ್ ತೆ೦ ರಿಗ್ತಾನಾ ಲಿಲಿಯನ್ ಆನಿ ರಿಚರ್ಡ್ ಕಸಲ್ಯಾಗಿ ಫೊಕಾಣಾಚೆರ್ ಹಾಸ್ತಾಲಿ೦. ಲಿಲಿಯನಾಚ್ಯಾ ಬೊಟಾ೦ ಮದೆ೦ ತಿಚ್ಯಾ ಪಸ೦ದೆಚ್ಯಾ ವೊಡ್ಕಾಚೊ ಗ್ಲಾಸ್ ಆಸ್‌ಲ್ಲೊ ಆನಿ ರಿಚರ್ಡ್ ಸ್ಕೊಚ್ ಸೆವ್ತಾಲೊ. ಸದ್ದ್ಯಾಕ್ ರಾಜಕೀಯ್ ಯಾ ಫಿಲೊಸೊಫಿ ಹಾ೦ಗಾಸರ್ ನಾ೦ತ್, ಆಪ್ಣಾಕ್‌ಚ್ ಸಮಾದಾನ್ ಕೆಲೆ೦ ಹೆಲೀನಾನ್.
ಲಿವಿ೦ಗ್ ರೂಮಾ೦ತ್ ಹೆರ್ ಕೋಣ್೦ಚ್ ನಾತ್‌ಲ್ಲೆ. ನವ್ಕರಾ೦ಕ್ ಆನಿ ಬೊ೦ಗ್ಲ್ಯಾ೦ತ್ಲ್ಯಾ ಖ೦ಚಾಯಿ ಕಾಮೆಲ್ಯಾಕ್ ಲಿವಿ೦ಗ್ ರೂಮಾ೦ತ್ ಉಲವ್ಣೆ೦ ಚಲ್ತಾನಾ ಪ್ರವೇಸ್ ನಾತ್‌ಲ್ಲೊ. ದೆಕುನ್ ಎಕ್ ಬುತಾ೦ವ್ ದಾ೦ಬುನ್ ಹೆಲೀನಾನ್ ಸಮವಸ್ತ್ರಾರ್ ಆಸ್‌ಲ್ಲ್ಯಾ ಎಕಾ ನವ್ಕರಾಕ್ ಆಪಯ್ಲೊ ಆನಿ ಆಪ್ಲ್ಯಾ ಪಸ೦ದೆಚೆ೦ ಪಾನಕ್ – ಕ್ಯಾ೦ಪಾರಿ – ಹಾಡು೦ಕ್ ಸಾ೦ಗ್ಲೆ೦.
‘ಬಸ್, ಡಾರ್ಲಿ೦ಗ್,’ ಮ್ಹಣಾಲಿ ಲಿಲಿಯನ್, ಆಪ್ಣಾಚ್ಯಾ ಉಜ್ವ್ಯಾಕ್ ಆಸ್‌ಲ್ಲಿ ಬಸ್ಕಾ ಥಾಪುಡ್ನ್. ‘ಜೆವಣ್ ತಯಾರ್ ಜಾ೦ವ್ಕ್ ಥೊಡೊ ವೇಳ್ ಆಸಾ-‘
‘ಪರ್ವಾ ನಾ, ಲಿಲಿಯನ್,’ ತಿಚಿ೦ ಉತ್ರಾ೦ ಮದೆ೦ಚ್ ಕಾತರ್ಲಿ೦ ರಿಚರ್ಡಾನ್. ‘ಆಮ್ಕಾ೦ ಧಾರಾಳ್ ಉಲೊವ್ಯೆತ್. ತು೦ ಕಶೆ೦ಯಿ ಎಕ್ ಕುತೂಹಲ್ಭರಿತ್ ಸ್ತ್ರೀ.’
‘ಹೆ೦ ಹೊಗ್ಳಪ್, ಮೆಳ್‌ಲ್ಲ್ಯಾ ಸರ್ವ್ ಸ್ತ್ರೀಯಾ೦ಕ್ ದಿತಾಯ್ ಆಸ್ತೊಲೊಯ್!’
‘ದಿತಾ೦ ತೆ೦ ಖರೆ೦ ಪುಣ್ ತಿ೦ ಮ್ಹಾಕಾ ಪಾತ್ಯೆತಾನಾ ಹಾ೦ವ್ ನಿರಾಶಿ೦ ಜಾತಾ೦.
ತಿ೦ ತೆಗಾ೦ಯಿ ಹಾಸ್ಲಿ೦.
‘ತು೦ ಅಶೆ೦ಯಿ ಉಲ೦ವ್ಕ್ ಸಕ್ತಾಯ್ ಮ್ಹಳ್ಳೆ೦ ಹಾ೦ವ್ ನೆಣಾಸ್ಲಿ೦, ರಿಚರ್ಡ್.’ ಹೆಲೀನಾನ್ ಮ್ಹಳೆ೦.
‘ಆಪ್ಣಾಕ್, ಹೆರಾ೦ನಿ ತುಕುನ್ ಪಳೆ೦ವ್ಚೊ ಅವ್ಕಾಸ್ ದೀನಾತ್‌ಲ್ಲೊ ದಾದ್ಲೊಚ್ ಖರೊ ದಾದ್ಲೊ!’ ಮ್ಹಣಾಲಿ ಲಿಲಿಯನ್. ‘ಕೊಣೆ೦ಗಿ ಮ್ಹಳಾ೦, a woman is a woman is a woman. ಪುಣ್ ಹಾ೦ವ್ ಮ್ಹಣ್ತಾ೦ a man is a man is a man!’
ಹೆಲೀನಾನ್ ಹಾಳ್ವಾಯೆನ್ ತಾಳಿಯೊ ಪೆಟ್ಲ್ಯೊ.
‘Bravo!’ ತಾಣೆ ನಾಟಕೀಯ್ ತಾಳ್ಯಾನ್ ಉದ್ಗಾರ್ ಸೊಡ್ಲೊ. ‘ಆಯ್ಕಾ, ಆಯ್ಕಾ. ಶ್ರೀಮತಿ ಲಿಲಿಯನ್ ಜೆನಿಸ್, ದಾದ್ಲ್ಯಾ೦ಚ್ಯಾ ಕುಳಾಚಿ ಫೊಡ್ಣಿಶಿ ಕರ್ತಾ.’
ಲಿಲಿಯನಾನ್, ತಿತ್ಲ್ಯಾಚ್ ನಾಟಕೀಯ್ ರಿತಿರ್ ಹೆಲೀನಾಕ್ ಮಾನ್ ಭಾಗಾಯ್ಲೊ. ‘ದೆವಾನ್ ಹೊ ಸ೦ಸಾರ್ ರಚುನ್ ಕಾ೦ಯ್ ಬರೆಪಣ್ ಕೆಲೆ೦ ತರ್ ಸ್ತ್ರೀಯೆಕ್ ಆನಿ ದಾದ್ಲ್ಯಾಕ್ ರಚುನ್ ಮಾತ್ರ್. ದಾದ್ಲ್ಯಾಕ್ ತಾಣೆ ಪಯ್ಲೊ ರಚ್ಲೊ ತರೀ ತಾಕಾ ಉಣೆಪಣ್ ದಿಸ್‌ಲ್ಲ್ಯಾನ್ ತಾಣೆ ಸ್ತ್ರೀಯೆಕ್ ರಚ್ಲೆ೦.’
‘ಆನಿ ರಚ್ಲೆ೦ ತರೀ ಕಸಲೆ ಜೀವಿ೦ಕ್!’ ಉದ್ಗಾರ್ಲೊ ರಿಚರ್ಡ್, ಹೆಲೀನಾಕ್ ಪಳೆನಾಸ್ತಾ೦.
‘ತೊ, ಮೆಥ್ಯು ಲಿಯೊಚೆ ಧುವೆಚೊ, ರಮೋನಾಚೊ ಉಲ್ಲೇಕ್ ಕರ್ತಾ, ಮಾಮ್ಮಿ,’ ಹೆಲೀನಾನ್ ಮ್ಹಳೆ೦ ನಕ್ಲಿಪಣ್ ಮಿಸ್ಳಾಲ್ಲ್ಯಾ ದುರ್ಸವ್ಣೆನ್.
‘ಜಾವ್ಯೆತ್!’ ಲಿಲಿಯನ್ ಮ್ಹಣಾಲಿ. ‘ರಿಚರ್ಡ್‌ಯಿ ಬಸುನ್ ಆಸ್‌ಲ್ಲ್ಯಾ ಸುಕ್ಣ್ಯಾಚೆರ್ ಫಾರ್ ಮಾರಿನಾ ಕೊಣ್ಣಾ.’
ತಿಚ್ಯಾ ಉತ್ರಾ೦ನಿ ಹೆಲೀನಾ ಭಿತರ್ಲೆ ಭಿತರ್ ಥೊಡೆ೦ ಕುಸ್ಕಾಲೆ೦ ಜಾಲ್ಲ್ಯಾನ್ ತಾ೦ಚ್ಯಾ ಉಲವ್ಣ್ಯಾಚೆ೦ ಪಥ್ ಬದ್ಲಾಲೆ೦ ಆನಿ ಜೆವ್ಣಾಚೆ೦ ಐಯ್ಲಾನ್ ಜಾತಾ ಪರ್ಯಾ೦ತ್ ತಾ೦ಚೆ ಮದೆ೦ ಸದಿಳ್-ಸುಡಾಳ್ ಉಲವ್ಣೆ೦ ಚಾಲು ಉರ್ಲೆ೦.
ಜೆವ್ಣಾ ಉಪ್ರಾ೦ತ್ ಹೆಲೀನಾನ್ ಲ್ಹಾನ್ ಎಕಾ ಸಿಯೆಸ್ತಾಚಿ ಸುಚಾವ್ಣಿ ದಾಕಯಿಲ್ಲ್ಯಾನ್ ತಿ೦ ತಾತಾ೦ಚ್ಯಾ ರುಮಾ೦ಕ್ ಗೆಲಿ೦.
ಹೆಲೀನಾಕ್ ಜಾಗ್ ಜಾತಾನಾ ಸಾ೦ಜೆಚಿ೦ ಸಾಡೆಚಾರ್ ಉತ್ರಾಲ್ಲಿ೦. ಸುರ‍್ಯಾಚೆ೦ ವೋತ್ ಮೋವ್ ಪಡ್‌ಲ್ಲೆ೦ ಮಾತ್ರ್ ನ್ಹಯ್, ಗುಡ್ಯಾ೦ಚ್ಯೊ ಸಾವ್ಳ್ಯೊ ಯೆದೊಳ್‌ಚ್ ಲಾ೦ಬ್ ಜಾವ್ನ್ ಯೆತಾಲ್ಯೊ. ಖ೦ಡಿತ್, ಭಾಯ್ರ್ ಥ೦ಡಿ ಆಸ್‌ಲ್ಲಿ. ತೆ೦ ವೆಗಿ೦ಚ್ ಊಬ್ ವಸ್ತ್ರಾ೦ ನೆಸ್ಲೆ೦ ಆನಿ ದೆ೦ವೊನ್ ದಿವಾನ್‌ಖಾನ್ಯಾಕ್ ಆಯ್ಲೆ೦.
ರಿಚರ್ಡ್ ಯೆಕ್ಲೊಚ್ ಬಸುನ್ ಆಸ್‌ಲ್ಲೊ. ತಾಣೆ ಸಾದಾರಣ್ ಸ್ಲ್ಯಾಕ್ಸ್ ಘಾಲ್ಲೆ ಪುಣ್ ಆಪ್ಲಿ ಕಾಳ್ಯಾ ಚಾಮ್ಡ್ಯಾಚಿ ಜಾಕೆಟ್ ಆಪ್ಲ್ಯಾ ಬಗ್ಲೆನ್ ದವರ್‌ಲ್ಲಿ.
‘ತುಕಾ ಭೊ೦ವ್ಡೆಕ್ ಆಪವ್ನ್ ಹಾಡುನ್ ಹಾ೦ವ್೦ಚ್ ನಿದ್ರೇಸ್ತ್ ಜಾಲಿ೦.’ ಹೆಲೀನಾನ್ ಮ್ಹಳೆ೦ ರಿಚರ್ಡಾ ಸರ್ಶಿ೦ ಬಸುನ್. ‘ಯೆಕ್ಸುರಾಯ್ ಜಾಲಿ?’
‘ಅಸಲ್ಯಾ ಸುವಾತೆ೦ನಿ ಮನಿಸ್ ಎಕ್ಸುರೊ ಜಾಯ್ನಾ, ಹೆಲೀನಾ,’ ತಾಣೆ ಮ್ಹಳೆ೦ ಫ್ರೆ೦ಚ್‌ವಿ೦ಡೋಸಾ೦ತ್ಲ್ಯಾನ್ ಭಾಯ್ರ್ ಪಳೆವ್ನ್. ‘ಅಸಲ್ಯಾ ನಿಸರ್ಗಾ೦ತ್ ಮನಿಸ್ ಆಪ್ಣಾಕ್‌ಚ್ ಮೆಳ್ತಾ.’
‘ಆಸೊ೦ದಿ,’ ಹೆಲೀನಾನ್ ಮ್ಹಳೆ೦, ತಾಚ್ಯಾ ಉತ್ರಾ೦ಚೆರ್ ಗಮನ್ ಕರಿನಾಸ್ತಾ೦. ‘ತು೦ ತಯಾರ್ ಆಸಾಯ್ ತರ್, ದೋನ್ ಕಿಲೊಮೀಟರ್ ಚಲೊನ್ ಆಮಿ ಡೋಬ್ಬಿಚ್ಯಾ ಬೇಕರಿಕ್ ಯಾ.’
ರಿಚರ್ಡಾನ್ ಆಪ್ಲ್ಯಾ ದೊಳ್ಯಾ೦ಚ್ಯೊ ಭ೦ವ್ರ್ಯೊ ವಯ್ರ್ ಕೆಲ್ಯೊ.
‘ಡೋಬ್ಬಿ ಎಕ್ ಅಬಾಹಿತ್ ಸೈನಿಕ್,’ ವಿವರಿಲೆ೦ ಹೆಲೀನಾನ್. ‘ಝುಜಾ೦ತ್ ತಾಚೊ ಪಾ೦ಯ್ ಉಸಳ್ಳೊ. ಡೆಡಿನ್ ತಾಕಾ ಆಸ್ರೊ ದಿಲೊ ಆನಿ ಎಕ್ ಬೇಕರಿ ಉಗ್ತಿ ಕರು೦ಕ್ ಮಜತ್ ಕೆಲಿ. ಡೋಬ್ಬಿನ್ ತಯಾರ್ ಕರ್ಚೊ ಬ್ರೆಡ್ ರಾಯಾಳ್ ಜೆವ್ಣಾ೦-ಮೆಜಾ೦ಕ್‌ಚ್ ಫಾವೊ ಮ್ಹಣ್ ಹಾ೦ವೆ೦ ಮ್ಹಳ್ಯಾರ್ ಅತಿಶಯ್ ಜಾ೦ವ್ಚೆ೦ ನಾ.’
‘ತರ್ ಸಾ೦ಜೆಚೆ೦ ಜೆವಣ್ ಸುಕೊ ಉ೦ಡೊಚ್ಚ್ ಮ್ಹಣ್ ಜಾಲೆ೦!’ ಭುಜಾ೦ ಉಡಯ್ಲಿ೦ ರಿಚರ್ಡಾನ್. ತೆ೦, ತಾಕಾ ಮಿಶ್ರಿತ್ ಅಭಿಮಾನಾನ್ ಪಳೆಲಾಗ್ಲೆ೦.
‘ಯೆಕೇಕ್ ಪಾವ್ಟಿ೦ ತುಜೆ೦ ಉಲವ್ಣೆ೦ ಆಯ್ಕಾತಾನಾ ಮಾಮ್ಮಿಚಿ೦ ಉತ್ರಾ೦ ಸತ್ ಮ್ಹಣ್ ಮ್ಹಾಕಾ ದಿಸ್ತಾತ್.’
‘ಆನಿ ಕಸಲಿ೦ ತಿ೦?’
‘ದಾದ್ಲೊ ತೊ ದಾದ್ಲೊ ತೊ ದಾದ್ಲೊ!’
ರಿಚರ್ಡಾನ್ ಆಪ್ಲಿ ಜಾಕೆಟ್ ವಿ೦ಚ್ಲಿ ಆನಿ ಖಾ೦ದಾರ್ ಘಾಲಿ. ‘ಹಾ೦! ಮಾಮ್ಮಿ ಭಾಯ್ರ್ ಗೆಲ್ಯಾ ಆನಿ ತಿ ಅ೦ಕಲ್ ಕ್ಲೆರೆನ್ಸಾ ಸಾ೦ಗಾತಾ ಸಾ೦ಜೆಚ್ಯಾ ಆಟಾ೦ ಭಿತರ್ ಪಾಟಿ೦ ಯೆತೆಲಿ. ಫಸ್ಟ್ ಕ್ಲಾಸ್ ಜೆವ್ಣಾಚೊ ಆನಿ ಊ೦ಚಿ ವಾಯ್ನಾ೦ಚೊ ಸೊಲ್ಲೊ ಆಮಿ ಯೆದೊಳ್‌ಚ್ ಕೆಲಾ!’
‘ತುಕಾ ಎಕ್ಲ್ಯಾಕ್‌ಚ್ ಸೊಡ್ಲ್ಯಾರ್ ಕಸಲ್ಯೊ ಸರ್ವ್ ಫಿತುರ‍್ಯೊ ತು೦ ಕರ್ಶಿ ತೆ೦ ದೇವ್‌ಚ್ ಜಾಣಾ೦.’
ಹಾತಾ೦ತ್ ಹಾತ್ ಘಾಲುನ್ ತಿ೦ ಭಾಯ್ರ್ ಆಯ್ಲಿ೦.
ಜ್ಯೋ-ನ್ ರಿಚರ್ಡಾಚೆ೦ ಫೊಕ್ಸ್ ಶೆಡ್ಡಾ೦ತ್ ದವರ್‌ಲ್ಲೆ೦. ‘ಜೀಪ್ ಹಾಡು೦ಗಿ, ಮಿಸ್ಸ್ ಹೆಲೀನಾ?’ ತೊ ನಮೃತೇನ್ ವಿಚಾರಿಲಾಗ್ಲೊ.
‘ನಾಕಾ, ಜ್ಯೋ. ಆಮಿ ಚಲೊನ್೦ಚ್ ಡೋಬ್ಬಿಚ್ಯಾ ಬೇಕರಿಕ್ ವೆತಾ೦ವ್.’
‘ಭಾಯ್ರ್ ಥ೦ಡಿ ಆಸಾ, ಮಿಸ್ಸ್.’ ಜ್ಯೋ-ನ್ ಚತ್ರಾಯ್ ದಿಲಿ. ‘ಆಮ್ಚ್ಯಾ ಸಯ್ರ್ಯಾ ಮಾನೆಸ್ತಾನ್ ಸಾ೦ಬಾಳಿಜೆ.’
‘ಥೆ೦ಕ್ಯೂ, ಜ್ಯೋ.’ ತಾಚೆ೦ ಭುಜ್ ಥಾಪುಡ್ಲೆ೦ ಹೆಲೀನಾನ್. ‘ಆಮಿ ಚತ್ರಾಯ್ ಘೆತೆಲ್ಯಾ೦ವ್.’
ಭಾಯ್ರ್ ಖರಿಚ್ ಥ೦ಡಿ ಆಸ್‌ಲ್ಲಿ.
(32-ವ್ಯಾ ಅವಸ್ವರಾ೦ತ್ ಮು೦ದರ್ತಾ)
