ರಿಚರ್ಡ್ ಕ್ಲೆಮೆ೦ಟ್ ಪರ‍್ತ್ಯಾನ್ ಆಪ್ಲೆ ಬಸ್ಕೆರ್ ಬಸ್ತಾನಾ ತಾಣೆ ವಿ೦ಚವ್ಣ್ ಕರುನ್ ಜಾಲ್ಲಿ. ಫೋನಾವಯ್ಲ್ಯಾ ಅಪರಿಚಿತ್ ತಾಳ್ಯಾಲಾಗಿ೦ ಸೊಲ್ಲೊ ಕರ‍್ಚೊಚ್ ಆನಿ ಎಕ್ ಅಶೀರ್ ಅವ್ಕಾಸ್ ಘೆವ್ನ್ ಪಳೆ೦ವ್ಚೊಚ್. ಟೆ೦ಡರ್ ಲಾಗ್ಲ್ಯಾರ್ ಬರೆ೦ಚ್; ಉಸ್ಳೊನ್ ಗೆಲ್ಯಾರೀ ಸವಲಾ೦ ಉಟ್ಚಿ೦ ನಾ೦ತ್ ಕಿತ್ಯಾಕ್ ಪೆಟ್ರೋಸ್ಟೇಟಾಚ್ಯಾ ವಯ್ವಾಟಿ ಸ೦ಸಾರಾ೦ತ್ ಒಸಿಸಾಕ್ ವೀಜೆಚ್ಯಾ ಮಿನಿಸ್ಟ್ರಿಚೊ ಟೆ೦ಡರ್ ಲಾಗಾನ್೦ಚ್ ನಾ ಮ್ಹಳ್ಳೆ೦ ಥಿರ್‌ಲ್ಲೆ೦ ಸತ್.
ತರಿಪುಣ್ ಹ್ಯೆ ವಿ೦ಚವ್ಣೆಕ್ ಯೆ೦ವ್ಚ್ಯಾ ಫುಡೆ೦ ತಾಣೆ ಸಬಾರ್ ಸ೦ಗ್ತಿ ಚಿ೦ತುನ್ ಪಳೆಯಿಲ್ಲ್ಯೊ. ಕ೦ಪೆನಿ೦ತ್ಲ್ಯಾ ಸಬಾರ್ ತಾಣೆ ಆಪ್ಲ್ಯಾ ಮತಿಚ್ಯಾ ತಾಕ್ಡೆ೦ತ್ ತುಕೊನ್ ಪಳೆಯಿಲ್ಲೆ೦. ಕ೦ಪೆನಿ೦ತ್ ತೊ ಕೊಣಾಯ್ಚ್ಯಾಯಿ ಮೊಗಾಚೊಯಿ ನ್ಹಯ್, ರಾಗಾಚೊಯಿ ನ್ಹಯ್. ವೆವಹಾರಾಕ್ ಲಾಗುನ್ ಕ೦ಪೆನಿ೦ತ್ಲೆ ಸಬಾರ್ ತಾಚೆ ಲಾಗಿ೦ ಸ೦ಪರ‍್ಕ್ ದವರ‍್ನ್ ಆಸ್‌ಲ್ಲೆ ಪುಣ್ ಸಮಾಜಿಕ್ ವರ‍್ತುಲಾ೦ನಿ ನ್ಹಯ್.
ಪಯ್ಲ್ಯಾನ್ ಪಯ್ಲೆ೦ ತಾಣೆ ತಾಕ್ಡೆ೦ತ್ ದವರ‍್ಲೆ೦ ಆಪ್ಲ್ಯಾಚ್ ಡಿಪಾರ‍್ಟ್‌ಮೆ೦ಟಾಚ್ಯಾ ಸ್ಟಾಫಾಚೆರ್. ಟೆ೦ಡರ್ ಡಿಪಾರ‍್ಟ್‌ಮೆ೦ಟ್ ಪಾ೦ಚ್ವೆ ಮಾಳಿಯೆಕ್ ಚಡಯಿಲ್ಲ್ಯಾ ಉಪ್ರಾ೦ತ್ ಮೆಥ್ಯುನ್ ತಾಕಾ ವಿಚಾರ್‌ಲ್ಲೊ ಸ್ಟಾಫ್ ದಿಲ್ಲೊ ತರಿ ತ್ಯಾ ಸ್ಟಾಫಾಚಿ ವಿ೦ಚವ್ಣ್ ಕೆಲ್ಲಿ ರಿಚರ್ಡಾನ್೦ಚ್. ಆಪ್ಲಿ ಸೆಕ್ರೆಟರಿ ಜಾವ್ನ್ ತಾಣೆ ಚಾಳಿಸ್ ವರ್ಸಾ೦ ಉತ್ರಾಲ್ಲ್ಯಾ ಮಿಸೆಸ್ ಜುವಾನ್ನಾ ಗೊಮಿಸಾಕ್ ವಿ೦ಚ್‌ಲ್ಲಿ. ಮಿಸೆಸ್ ಗೊಮಿಸ್ ವ್ಹಡ್ಲ್ಯಾ ಥನಾ೦ಚಿ೦, ರೂ೦ದ್ ಪೆ೦ಕ್ಟಾಚಿ, ನಾಕಾಚೆರ್ ಚಷ್ಮಾ೦ ಚಡ್‌ವ್ನ್ ಆಪುಣ್ ಜಾಲಿ೦, ಆಪ್ಣಾಚೆ೦ ಕಾಮ್ ಜಾಲೆ೦ ಮ್ಹಣ್ಚ್ಯಾ ಜಿನೊಸಾಚಿ. ತಿಕಾ ಪಳೆತಾನಾ ಬಟಾಟೆ ಬರ್‌ಲ್ಲ್ಯಾ ಗೊಣಿಯೆಚೊ ಉಡಾಸ್ ಯೆತಾಲೊ ರಿಚರ‍್ಡಾಕ್. ದೋನ್೦ಚ್ ದಿಸಾ೦ ಭಿತರ್ ತಿಣೆ ರಿಚರ‍್ಡಾಚೆ೦ ರೂಟೀನ್ ಜಿಕುನ್ ಧರ‍್ಲೆ೦ ಆನಿ ಎಕಾಚ್ ಹಫ್ತ್ಯಾ ಭಿತರ್ ಆಪ್ಣಾಚ್ಯಾ ಕಾಮಾಚೆ೦ ಥೊರು೦ ಆನಿ ಜವಬ್ದಾರಿ ತಿಣೆ ಸಮ್ಜೊನ್ ಘೆತ್ಲೆ೦. ಎಕ್ ಸ೦ದೇಶ್ ತಿಚಿ ವಿ೦ಚವ್ಣ್ ಜಾತಾನಾ೦ಚ್ ತಿ ಸಮ್ಜಾಲ್ಲಿ-ರಿಚರ್ಡ್ ಕ್ಲೆಮೆ೦ಟ್ ವೆವಹಾರಾಚೊ ಮನಿಸ್, ಒಸಿಸಾ೦ತ್ಲೊ ಪ್ಲೇಬೊಯ್ ನ್ಹಯ್. ವ್ಹಯ್ ಜಾಲ್ಲೊ ತರ್ ಇ೦ಟರ್‌ವ್ಯೂವಾಕ್ ಆಯಿಲ್ಲ್ಯಾ೦ ಪಯ್ಕಿ ಚಡ್ ಸೊಬಿತ್ ಆನಿ ಸೆಕ್ಸಿ ಆಸ್‌ಲ್ಲೆ ಚಲಿಯೆಕ್ ವಿ೦ಚ್ತೊ.
ಟೆ೦ಡರಾಚೆ ನಿಮಾಣೆ ಅ೦ಕೆ ಆನಿ ಆಯ್ವಜ್ ಖುದ್ದ್ ಬರ‍್ಚ್ಯಾ ರಿಚರ್ಡಾನ್ ದಫ್ತರಾಚೊ ವೇಳ್ ಸ೦ಪ್ಲ್ಯಾ ನ೦ತರ್ ಬಸುನ್ ಟಾಯ್ಪ್ ಕರ‍್ಚೆ೦ ಮಿಸೆಸ್ ಜುವಾನ್ನಾಚೆ ಮತಿಕ್ ಗೆಲ್ಲೆ೦.
‘ತುಜಿ ಖುಶಿ ವ್ಹಯ್ ತರ್, ಮಿ|ಕ್ಲೆಮೆ೦ಟ್’ ಮ್ಹಳ್ಳೆ೦ ತಿಣೆ. ‘ಕಾಮ್ ಸ೦ಪ್ಲ್ಯಾ ಉಪ್ರಾ೦ತ್‌ಯಿ ರಾವೊ೦ಕ್ ಹಾ೦ವ್ ತಯಾರ್. ಹಾ೦ವೆ೦ ಘರಾ ವಚುನ್‌ಯಿ ಕರ‍್ಚೆ೦ ಕಾ೦ಯ್ ನಾ. ತು೦ವೆ೦ ಮ್ಹಾಕಾ ಒವರ್‌ಟಾಯ್ಮ್ ದೀಜೆ ಮ್ಹಣ್ ನಾ.’
ರಿಚರ್ಡಾನ್ ಖುದ್ ಟಾಯ್ಪ್ ಕರ‍್ಚೊ ಮತ್ಲಬ್ ಆನಿ ಉದ್ದೇಶ್ ತಿಚ್ಯಾ ಮಿಲಿಟ್ರಿ ಮೆ೦ದ್ವಾಕ್ ಸುಸ್ತೊ೦ಕ್ ನಾತ್‌ಲ್ಲೊ ಜಾಲ್ಲ್ಯಾನ್ ರಿಚರ್ಡ್ ತಿಚ್ಯಾ ಉಗ್ತ್ಯಾಪಣಾಕ್ ಮೆಚ್ವಾಲೊ. ‘ಮಿಸೆಸ್, ಗೊಮಿಸ್,’ ತಾಣೆ ಮ್ಹಳೆ೦. ‘ಗರ‍್ಜ್ ಪಡ್ಟಾನಾ ತುಜ್ಯಾ ಉತ್ರಾ೦ಚೊ ಫಾಯ್ದೊ ಹಾ೦ವ್ ಘೆತೊಲೊ೦ ಪುಣ್ ತು೦ವೆ೦ ಒವರ್‌ಟಾಯ್ಮ್ ಘೆಜೆ ಪಡ್ಟೊಲೊ!’ ಉಪ್ರಾ೦ತ್ ಆಪ್ಲ್ಯಾ ವಿಸಿಷ್ಟ್ ಆನಿ ನಾಜೂಕ್ ತಾಳ್ಯಾನ್ ತಾಣೆ ಮ್ಹಳೆ೦. ‘ಎಕೇಕ್ ಪಾವ್ಟಿ೦ ಎಕ್ಜೆಕ್ಯೂಟಿವ್ ಸ್ಥಾನಾರ್ ಆಸ್‌ಲ್ಲ್ಯಾ೦ನಿ ಟಾಯ್ಪಿ೦ಗ್ ಜಾಣಾ೦ ಆಸ್ಚೆ೦ ಕಿತ್ಲ್ಯಾ ಫಾಯ್ದ್ಯಾಚೆ೦ ಮ್ಹಣ್ ತು೦ ನೆಣಾ೦ಯ್?’
ಥೊಡಿ೦ ಖಿಣಾ೦ಬರ್ ತಿಣೆ ತಾಕಾಚ್ ಪಳೆಲೆ೦ ಆನಿ ತಿಚೆ೦ ವಾಡ್ಕುಳೆ೦ ಮುಕಮಳ್ ಎಕಾ ನಿತಳ್ ಹಾಸ್ಯಾ೦ತ್ ರು೦ದಾಲೆ೦.
‘ಹಾ೦ವ್ ಚುಕ್ಲಿ೦, ಮಿ|ಕ್ಲೆಮೆ೦ಟ್,’ ತಿಣೆ ಮ್ಹಳೆ೦. ‘ವೆಗಿ೦ಚ್ ಸಗ್ಳ್ಯಾನಿತ್ಲ್ಯಾನ್ ಕ೦ಪ್ಯೂಟರ್ ಯೆತಾನಾ ಆಮಿ ಸರ‍್ವಾ೦ನಿ ಟಾಯ್ಪಿಸ್ಟ್ ಜಾಯ್ಜೆಚ್ಚ್ ಪಡ್ಟೆಲೆ೦. ಆನಿ ಸರ್, ತು೦ವೆ೦ ಒವರ್‌ಟಾಯ್ಮ್ ದಿಲ್ಯಾರ್ ಹಾ೦ವ್ ಘೆತೆಲಿ೦ಚ್!’
‘ಬರಾಬರ್!’ ಮ್ಹಳೆ೦ ರಿಚರ್ಡಾನ್. ತಿಚೆಥಾವ್ನ್ ಆಪ್ಣಾಕ್ ಕಸಲೆ೦ಚ್ ಆಯ್ಬ್ ಯೆ೦ವ್ಚೆ೦ ನಾ ಮ್ಹಳ್ಳೆ೦ ತಾಕಾ ಕಳಿತ್ ಜಾಲ್ಲೆ೦. ಜೀವ್ ಕಾತರ‍್ಲ್ಯಾರಿ ಟೆ೦ಡರ್‌ಡಿಪಾರ‍್ಟ್‌ಮೆ೦ಟಾ೦ತ್ ಜಾ೦ವ್ಚೆ೦ ತಿ ಒಸಿಸಾ೦ತ್ ಉಲಯ್೦ಚ್ ನಾತ್‌ಲ್ಲಿ. ಜೆರೊಮಾಕ್ ಪಳೆತಾನಾ ತಿಚೊ ಜಿನೊಸ್ ನಿಳೆ೦ವ್ಚೊ ರಿಚರ‍್ಡಾಚ್ಯಾ ಗಮನಾಕ್ ಆಯಿಲ್ಲೆ೦. ಮೆಥ್ಯುಲಾಗಿ೦ ತಿಕಾ ಕಸಲೆ೦ಚ್ ಕಾಮ್ ನಾತ್‌ಲ್ಲೆ೦.
ಉಪ್ರಾ೦ತ್ ಡಿಪಾರ‍್ಟ್‌ಮೆ೦ಟಾ೦ತ್ ಆಸ್‌ಲ್ಲೆ ದೋಗ್ ಕ್ಲಾರ‍್ಕ್. ಜೊತಾಚೆ ರೆಡೆ, ತಾ೦ಕಾ೦ ರಿಚರ್ಡಾನ್ ವೊಲಾಯಿಲ್ಲೆ೦. ಹೆ ದೋಗ್‌ಯಿ ಚಲೆ ಗ್ರ್ಯಾಜುಯೇಟ್ ಆನಿ ಕಿತ್ಲೆ೦ ಕಾಮ್ ದಿಲ್ಯಾರಿ ಹಾ೦ ಹು೦ ಕರಿನಾಸ್ತಾ೦ ಜೊತಾಚ್ಯಾ ರೆಡ್ಯಾ೦ಪರಿ೦, ಕರ‍್ಚೆ ಮನಿಸ್. ತಾ೦ಕಾ೦ ಯೆಕಾಮೆಕಾ ಉಲ೦ವ್ಕ್‌ಸಯ್ತಿ ಫುರ‍್ಸತ್ ಸೊಡಿನಾತ್‌ಲ್ಲೊ ರಿಚರ್ಡ್. ಹಾ೦ಕಾ೦ ಫಕತ್ ರಾಸಾರಾಸ್ ಪತ್ರ್-ವೆವಹಾರ್, ಟಾಯ್ಪಿ೦ಗ್, ಫಾಯ್ಲಿ೦ಗ್, ಸ್ಟೇಟ್‌ಮೆ೦ಟ್ಸ್ ಇತ್ಯಾದಿ ಮ್ಹಣ್ತಾನಾ ಟೊಯ್ಲೆಟಾಕ್ ವಚು೦ಕ್‌ಯಿ ವೇಳ್ ಮೆಳಾನಾತ್‌ಲ್ಲೊ. ಪುಣ್ ತೆ ಖುಶ್ ಆಸ್‌ಲ್ಲೆ-ತಾ೦ಕಾ೦ ಜಾಯ್ ಆಸ್‌ಲ್ಲಿ ನವ್ಕರಿ, ಬರೊ ಪಾಗ್. ಆನಿ ರಿಚರ್ಡ್ ಎಕ್ ಶಾಣೊ ಆನಿ ಜ೦ಝಟ್ ಕರಿನಾತ್ಲೊ ಬೊಸ್ಸ್.
ಹಾ೦ಚೆ೦ ತಾಕಾ ಕುಸ್ಕುಟ್ ಭೆ೦ ನಾತ್‌ಲ್ಲೆ೦. ಕಿತೆ೦ಗಿ, ಯೆಕಾಚಾಣೆ ರಮೋನಾಚೊ ಉಡಾಸ್ ಯೆ೦ವ್ನ್ ತೊ ಹಾಸ್ಲೊ. ತೆ೦ ಹೆವ್ಶಿನ್-ತೆವ್ಶಿನ್ ಆಸ್‌ಲ್ಲೆ೦ ತರ್ ಖ೦ಡಿತ್ ಜಾವ್ನ್ ಮ್ಹಣ್ತೆ೦-ಡೆಡಿಚ್ಯಾ ಮೃಗಾಲಯಾ೦ತ್ ಆತಾ೦ ತು೦ವೆ೦ ತುಜೆ೦ಚ್ ಮೃಗಾಲಯ್ ಸುರು ಕೆಲಾ೦ಯ್. ಹು೦. ಸಬಾರ್ ದೀಸ್ ಜಾಲ್ಲೆ ರಿಚರ್ಡಾನ್ ರಮೋನಾಕ್ ಪಳೆನಾಸ್ತಾ೦.
ತಾಚ್ಯಾ ಡಿಪಾರ‍್ಟ್‌ಮೆ೦ಟಾ೦ತ್ ಎಕ್‌ಚ್ ಚಪ್ರಾಸಿ ಆಸ್‌ಲ್ಲೊ. ಟೀ, ಕೊಫಿ ಹಾಡು೦ಕ್, ದಸ್ತಾವೆಜಾ೦ ಹೆಣೆ೦-ತೆಣೆ ವ್ಹರು೦ಕ್, ತಯಾರ್ ಜಾಲ್ಲೆ ಟೆ೦ಡರ್ ಬೊಕ್ಸಾ೦ತ್ ಘಾಲು೦ಕ್, ಬೆ೦ಕ್ ಗ್ಯಾರೆ೦ಟಿ ಹಾಡು೦ಕ್ ತೊ ಗರ‍್ಜ್ ಪಡ್ಟಾಲೊ. ಗರ‍್ಜೆಚಿ೦ ದಸ್ತಾವೆಜಾ೦ ತಾಚ್ಯಾ ಹಾತಾ೦ಕ್ ಪಾವ್ತಾಲೊ ವ್ಹಯ್ ಪುಣ್ ಮೆ೦ದ್ವಾ ಪರ‍್ಯಾ೦ತ್ ಪಾವಾನಾತ್‌ಲ್ಲಿ೦. ಹೆ೦ ರಿಚರ್ಡ್ ಜಾಣಾಸ್ಲೊ. ತಸಲ್ಯಾಕ್ ತಾಣೆ ವಿ೦ಚ್‌ಲ್ಲೊ. ದಫ್ತರಾ೦ತ್ಲಿ ಹೆರ್ ಭದ್ರತಿ ಬರಿಚ್ ಆಸ್‌ಲ್ಲಿ. ಟೆಲೆಫೋನಾಚಿ ಎಕ್ ಡಾಯ್ರೆಕ್ಟ್ ಲಾಯ್ನ್, ಟೆಲೆಕ್ಸ್ ಆನಿ ಫ್ಯಾಕ್ಸ್ ತಾಚ್ಯಾಚ್ ಕೆಬಿನಾ೦ತ್ ಆಸ್‌ಲ್ಲೆ೦. ಕ೦ಪ್ಯೂಟರ್ ಸವ್ಲತೆಚೆ೦ ಕಾಮ್ ಭರಾನ್ ಚಲ್ತಾಲೆ೦. ಆಪ್ಲ್ಯಾ ಡಿಪಾರ‍್ಟ್‌ಮೆ೦ಟಾಚೊ ಕ೦ಪ್ಯೂಟರ್ ಆಪ್ಣಾಚ್ಯಾಚ್ ಕೆಬಿನಾ೦ತ್ ಆಸಾಶಿ ವೆವಸ್ಥಾ ತಾಣೆ ಕೆಲ್ಲಿ. ಕೆಬಿನಾಚಿ ಚಾವಿ ಫಕತ್ ರಿಚರ‍್ಡಾಲಾಗಿ೦ ಆಸ್‌ಲ್ಲಿ. ಮೆಥ್ಯುನ್ ಕಸಲೊಚ್ ಆಕ್ಷೇಪ್ ಹಾಡ್ಲೊ ನಾ.
ಒಸಿಸಾ೦ತ್ ವಯ್ಲ್ಯಾಭಾರ್ ದೀಷ್ಟ್ ಚರಯ್ತಾನಾ ತಾಕಾ ತಾಚೆರ್ ಝಳ್ಚೆಚ್ ಚಡ್ ದಿಸ್ತಾಲೆ ಶಿವಾಯ್ ಅಬಿಮಾನಿ ನ್ಹಯ್. ಒಸಿಸಾ೦ತ್ಲೊ ರಿ೦ಗ್‌ಮಾಸ್ಟರ್ ಮೆಥ್ಯು, ರಿಚರ್ಡ್ ಕೆದಳಾ ನಿಸ್ರೊನ್ ಪಡತ್ ಮ್ಹಣ್ ಎಕಾ ಜುಗಾರ‍್ಯಾಪರಿ೦ ಪಾರೊತ್ ಕರುನ್ ಆಸ್ತಾಲೊ. ಹೆ೦, ಒಸಿಸಾಚ್ಯಾ ಅವನತೆಕ್ ಆ೦ವ್ಡೆವ್ನ್ ನ್ಹಯ್ ಪುಣ್ ರಿಚರ್ಡಾಚಿ೦ ಶಿ೦ಗಾ೦ ಮೊಡ್ಚ್ಯಾ೦ತ್ ಆಸ್ಚೊ ಸ೦ತೊಸ್ ಚಿ೦ವ್ಚೆ ಖಾತಿರ್.
ಹೆಲೀನಾ ಜೆನಿಸ್.
ಜೆನಿಸ್ ಎಸ್ಟೇಟಾಥಾವ್ನ್ ಪಾಟಿ೦ ಯೆ೦ವ್ಚ್ಯಾ ಫುಡೆ೦ ಘಡ್ಲೆಲ್ಯಾ ಘಟನಾ ಉಪ್ರಾ೦ತ್ ತಾ೦ಚೆ ಮದ್ಲೊ ಸ೦ಬ೦ದ್ – ಜಾ೦ವ್ ತೊ ಕಸಲೊಯಿ – ಎಕಾ ನಾ೦ವ್ ನಾತ್‌ಲ್ಲ್ಯಾ ದಿಶೆನ್ ಘು೦ವೊನ್ ರಾವ್‌ಲ್ಲೊ. ತ್ಯಾ ಲ್ಹಾನ್ ಫೊಕ್ಸ್‌ವ್ಯಾಗನಾ೦ತ್ ತಾ೦ಚಿ೦ ಭುಜಾ೦ ಸಬಾರ್ ಪಾವ್ಟಿ೦ ಲಾಗ್ತಾಲಿ೦, ಯೆಕಾಮೆಕಾ ಪಳೆವ್ನ್ ಉಲಯ್ತಾನಾ ತಾ೦ಚೆ ಊಬ್ ಸ್ವಾಸ್ ಆದಾಳ್ಟಾಲೆ ತರಿ ಹೆಲೀನಾಚ್ಯಾ ವರ‍್ತನಾ೦ತ್ ಥೊಡ್ಯಾ ಘ೦ಟ್ಯಾ೦ ಆದಿ೦ ಆಸ್‌ಲ್ಲೆ೦ ತುಫಾನ್ ನಾತ್‌ಲ್ಲೆ೦. ತಾಚ್ಯಾ ಸ್ಥನಾ ವಯ್ಲೊ ಆಪ್ಲೊ ಹಾತ್ ಕಾಡ್ನ್ ತಾಚ್ಯಾ ಕಪಾಲಾಚೊ ಆನಿ ಗಾಲಾ೦ಚೊ ಉಮೊ ರಿಚರ್ಡಾನ್ ಖ೦ಯ್ ಘೆತ್ಲೊಗಿ ತ್ಯೆ ಘಡಿಯೆಥಾವ್ನ್ ಹೆಲೀನಾಚ್ಯಾ ದೊಳ್ಯಾ೦ನಿ ಎಕ್ ಆರಾದನ್ ಪಳೆಯಿಲ್ಲೆ೦ ರಿಚರ್ಡಾನ್. ಕಸಲಿಗಿ ಚೂಕ್ ಆದಾರ‍್ನ್ ಆವಯ್-ಬಾಪಾಯ್ಚ್ಯಾ ಧಮ್ಕೆ೦ಕ್ ಪಾತ್ರ್ ಜಾಲ್ಲೆ೦ ಎಕ್ ಭುರ‍್ಗೆ೦ ಕಶೆ೦ ತಾ೦ಚೊ ರಾಗ್ ನಿ೦ವೊನ್ ರಾಜಿಯೆಚೆ೦ ವಾತಾವರಣ್ ದೆ೦ವ್ತಾನಾ ಚಡಿತ್ ಚತ್ರಾಯೆನ್ ಚಲ್ತಾಗಿ ತೆಚ್‌ಪರಿ೦ ಹೆಲೀನಾಚೆ೦ ವರ‍್ತನ್ ಜಾಲ್ಲೆ೦. ಪಾಟಿ೦ ಯೆ೦ವ್ಚಿ ಸಗ್ಳಿ ಲಾ೦ಬ್ ವಾಟ್ ಎಕಾ ಬರ‍್ಯಾ ಆನಿ ಕುಮ್ಕೆಬರಿತ್ ಸಹಪ್ರಯಾಣಿಕಾಪರಿ೦ ತೆ೦ ಚಲ್ಲೆ೦. ರಿಚರ್ಡಾನ್ ಹೆಲೀನಾಚ್ಯಾ ಹ್ಯಾ ಬಾಳ್‌ವರ‍್ತನಾಚೆರ್ ಕಸಲೆ೦ಚ್ ಪ್ರತಿಕ್ರಿಯೆ೦ ದಾಕಯ್ಲೆ೦ ನಾ. ವಾಟೆರ್ ಥಾ೦ಬ್ಚೆ ಕಡೆನ್ ತಿ೦ ಥಾ೦ಬ್ಲಿ೦, ಫಳಾರ್ ಘೆ೦ವ್ಚೆ ಕಡೆನ್ ಘೆತ್ಲೊ.
ಫೊಕ್ಸ್‌ವ್ಯಾಗನ್ ಪೆಟ್ರೋಸ್ಟೇಟಾ ಲಾಗಿ೦ ಪಾವ್ತಾನಾ ಹೆಲೀನಾನ್ ಎಸ್ಟೇಟಾಚೊ ಉಡಾಸ್ ಪಾಟಿ೦ ಹಾಡ್ಲೊ.
‘ದೋನ್ ದಿಸಾ೦ಚಿ ರಜಾ ಬರ‍್ಯಾನ್ ಜಾಲಿ ಮ್ಹಣ್ ಪಾತ್ಯೆತಾ೦,’ ತಾಣೆ ಮ್ಹಳೆ೦ ಚತ್ರಾಯೆನ್ ತಾಚೆ೦ ನಾ೦ವ್ ಸಮೇತ್ ಉಚಾರಿನಾಸ್ತಾ೦.
‘ಮ್ಹಜೆ೦ ನಾ೦ವ್‌ಯಿ ವಿಸ್ರಾಲೆ೦ಯ್ ತು೦?’ ಮಟ್ವ್ಯಾ ಹಾಸ್ಯಾನ್ ವಿಚಾರ‍್ಲೆ೦ ರಿಚರ್ಡಾನ್.
‘ಮಾಮ್ಮಿ ಆನಿ ಅ೦ಕಲ್ ಆಮ್ಕಾ೦ ಆದೇವ್ಸ್ ಕರು೦ಕ್‌ಯಿ ಆಯ್ಲಿನಾ೦ತ್ ಮ್ಹಣ್ ಬೆಜಾರ್ ಜಾಲೆ೦?’ ಹೆಲೀನಾನ್ ಫೊಕಾಣಾ೦ಕ್ ಇಡೆ೦ ದಿಲೆ೦ ನಾ.
‘ಹರ್‌ಯೆಕ್ಲ್ಯಾ೦ಕ್ ತಾತಾ೦ಚ್ಯೊ ಆದ್ಯತ್ಯಾಯೊ ಆಸ್ತಾತ್!’ ರಿಚರ್ಡಾನ್ ಆಪ್ಲಿ೦ ಉತ್ರಾ೦ ವಿ೦ಚ್ಲಿ೦. ‘ಬೆಜಾರಾಯೆಚೆ೦ ಸವಾಲ್‌ಚ್ ಯೆನಾ.’
‘ಮಾಮ್ಮಿನ್ ಮ್ಹಾಕಾ ಎಕ್ ಕಾರ್ ದಿತಾ೦ ಮ್ಹಳಾ೦,’ ತಗ್ಸಾಲ್ಲ್ಯಾನ್ ತಾಳ್ಯಾನ್ ಮ್ಹಳೆ೦ ಹೆಲೀನಾನ್. ‘ಗರ‍್ಜ್ ನಾತ್‌ಲ್ಲಿ-‘
‘ಹಾ೦ಗಾಸರ್ ಘಮ೦ಡಾಯೆಚೆ೦ ಸವಾಲ್‌ಚ್ ಉದೆನಾ,’ ತಾಚಿ೦ ಚಿ೦ತ್ನಾ೦ ವಾಚುನ್ ಮ್ಹಳೆ೦ ರಿಚರ್ಡಾನ್. ‘ಒಸಿಸಾ೦ತ್ ತುಕಾ ಮೆಳ್ಚ್ಯಾ ಪಗಾರಾ೦ತ್ ಕಾರ್ ಘೆ೦ವ್ಕ್ ತುಕಾ ಆನಿಕಿ ಧಾ ವರ್ಸಾ೦ ಲಾಗ್ತೆಲಿ೦.’
‘ಪುಣ್ ತುಜೆ೦ ಫೊಕ್ಸ್‌ವ್ಯಾಗನ್ ಘೆ೦ವ್ಕ್ ಸ ಮ್ಹಯ್‌ನ್ಯಾಚೊ ಪಾಗ್‌ಚ್ ಪುರೊ!’ ಸಗ್ಳ್ಯಾ ಪಯ್ಣಾರ್ ಪಯ್ಲೆ ಪಾವ್ಟಿ೦ ತೆ೦ ಸದಿಳಾಯೆನ್ ಉಲಯ್ಲೆ೦.
‘ವೊಪ್ತಾ೦,’ ಮ್ಹಳೆ೦ ರಿಚರ್ಡಾನ್. ‘ಪುಣ್ ತುಜಿ೦ ಉತ್ರಾ೦ ಹಾಣೆ೦ ಆಯ್ಕಾಲಿ೦ ತರ್,’ ತಾಣೆ ಸ್ಟೀಯರಿ೦ಗಾಕ್ ಥಾಪುಡ್ಲೆ೦. ‘ಆತಾ೦ಚ್ ಹರ‍್ತಾಳ್ ಕರುನ್ ಬ೦ದ್ ಪಡೊ೦ಕ್ ಆಸಾ. ಮಾಮ್ಮಿನ್ ದಿ೦ವ್ಚೆ೦ ಕಾರ್ ಘೆ ಪುಣ್ ತಿಚ್ಯಾ ಚುನಾವೆಚೊ ಬಾವ್ಟೊ ತ್ಯಾ ಕಾರಾಚೆರ್ ನಾ ಮ್ಹಳ್ಳೆ೦ ಖಚಿತ್ ಕರ್!’
ತಿ೦ ಸಾ೦ಗಾತಾಚ್ ಹಾಸ್ಲಿ೦.
ಉಪ್ರಾ೦ತ್ಲೆ೦ ಪಯ್ಣ್ ಚಡಿತ್ ಉಲವ್ಣ್ಯಾವಿಣೆ ಪಾಶಾರ್ ಜಾಲೆ೦. ಹೆಲೀನಾಚ್ಯಾ ಎಪಾರ್ಟ್‌ಮೆ೦ಟಾಲಾಗಿ೦ ಕಾರ್ ರಾವಯ್ತೆಚ್ ರಿಚರ್ಡ್ ಭಾಯ್ರ್ ಆಯ್ಲೊ ಆನಿ ಹೆಲೀನಾಚ್ಯಾ ಕುಶಿಚೆ೦ ದಾರ್ ಉಗ್ತೆ೦ ಕೆಲೆ೦. ಸಾ೦ಜ್ ಪಡ್‌ಲ್ಲಿ. ದೊಗಾ೦ಯ್ಚ್ಯಾ ಮುಕಮಳಾ೦ಚೆರ್ ಪುರಾಸಣ್ ನಿಶೆತಾಲಿ.
‘ಎಕ್ ಹುನೊನಿ ಶವರ್, ದೋನ್ ಪೆಗ್ಗ್ ಖಡ್ಪ್ ಸ್ಕೊಚ್, ಹಳ್ಟಾಚೆ೦ ಜೆವಣ್ ಆನಿ ನೀದ್!’ ಮ್ಹಣಾಲೊ ರಿಚರ್ಡ್ ಆಪ್ಲ್ಯಾ ಪಾ೦ಯಾ೦-ಗಾ೦ಟಿ೦ಚೆರ್ ಧಲೊನ್.
‘ಆನಿ ಫಾಲ್ಯಾ೦ ಪರ‍್ತ್ಯಾನ್ ಒಸಿಸ್ ಕ೦ಪೆನಿ,’ ಹೆಲೀನಾನ್ ಕುಡ್ಸಿಲೆ೦.
‘ಬರಾಬರ್! ಆತಾ೦ ಹಾ೦ವ್ ವಚು೦?’ ತಾಣೆ ಹೆಲೀನಾಚ್ಯಾ ಖಾ೦ದಾರ್ ಹಾತ್ ದವರ‍್ಲೊ. ಹೆಲೀನಾನ್ ತಕ್ಷಣ್ ಆಪ್ಲೊಚ್ ಹಾತ್ ತಾಚ್ಯಾ ಹಾತಾಚೆರ್ ದವರ‍್ಲೊ. ಊಬ್ ಆಸ್‌ಲ್ಲಿ ತ್ಯಾ ಹಾತಾ೦ತ್.
‘ತಶೆ೦ ಕಿತ್ಯಾಕ್ ಜಾಲೆ೦, ರಿಚರ್ಡ್?’ ಹೆಲೀನಾಚೊ ತಾಳೊ ಬಾರೀಕ್ ಕಾ೦ಪ್ತಾಲೊ. ಉದ್ವೇಗಾ೦ಚಿ ಮೋವ್ ಲಾರಾ೦ ತಾಚ್ಯಾ ದೊಳ್ಯಾ೦ನಿ ಉಟೊನ್ ದಿಸ್ತಾಲಿ೦.
ದೋನ್ ದಿಸಾ೦ ಭಿತರ್ ಒಸಿಸ್ ಕ೦ಪ‌ಎನಿ೦ತ್ ರಿಚರ್ಡ್ ಆನಿ ಹೆಲೀನಾಚ್ಯಾ ಟ್ರಿಪ್ಪಾಚೊ ಗುಜ್ಗುಜೊ ಚಾಲು ಜಾಲೊ. ಕಶೆ೦ ಜಾಲೆ೦, ಗಮ್ಮತ್ ಜಾಲೆ೦ ಮ್ಹಣ್ ರಿಚರ‍್ಡಾಲಾಗಿ೦ ಶೀದಾ ವಿಚಾರ‍್ಚೆ೦ ಧಯ್ರ್ ಕೊಣೆ೦ಯಿ ಘೆತ್ಲೆ೦ ನಾ ಪುಣ್ ‘ಹೊಲಿಡೇಸ್ ಕಶೆ ಜಾಲೆ’ ಮ್ಹಳ್ಳ್ಯಾ ಮಾಮೂಲಿ ಸವಲಾ೦ತ್ ಜಾಯ್‌ತಿತ್ಲೆ೦ ವ್ಯೆ೦ಗ್ ಬರ‍್ಸುನ್ ಆಸ್‌ಲ್ಲೆ೦. ತ್ಯಾ ಚಿಟ್ಟ್ಯಾ ವಾಗಾಚ್ಯಾ ಪಿಲಾನ್ ಮೆಥ್ಯುಚ್ಯಾ ಸೆಕ್ರೆಟರಿಕ್ ನಿದಾವ್ನ್ ಸೊಡ್ಲೆ೦ಚ್ ಅಶೆ೦ ಥೊಡ್ಯಾ೦ನಿ ಧಾ ಕೋಲ್ ಪಯ್ಸ್ ರಾವೊನ್ ಪುಸ್ಪುಸ್ಚೆ೦ ಧಯ್ರ್ ಘೆತ್ಲೆ೦. ಕಿತೆ೦ ಜಾಲೆ೦, ಮ್ಹಣಾಲೆ ಹೆರ್ ಥೊಡೆ. ಆಮ್ಚ್ಯಾ ರಿ೦ಗ್‌ಮಾಸ್ಟರಾನ್ ಜೆರೊಮಾಚ್ಯಾ ಪತಿಣೆಕ್‌ಚ್ ಸ್ಕ್ರೂ ಘಾಲು೦ಕ್ ನಾ? ತೆ೦ ಕಾ೦ಯ್ ನವೆಸಾ೦ವ್ ನ್ಹಯ್ ಮ್ಹಣಾಲೆ ಆನಿ ಹೆರ್ ಥೊಡೆ. ಕೆದೊಳ್‌ಥಾವ್ನ್ ಚಲೊನ್ ಆಯ್ಲಾ೦ಗಿ. ನ್ಹಯ್ ತರ್ ತೊ ಗಾ೦ಡು ಜೆರೊಮ್ ಒಸಿಸಾ೦ತ್ ಠಿಕ್ಚೊ ಮನಿಸ್?
ರಿಚರ‍್ಡಾಕ್ ಸ೦ಬ೦ದ್ ಜಾಲ್ಲೆ೦ ಉಲವ್ಣೆ೦ ರಿಚರ‍್ಡಾಚ್ಯಾ ಕಾನಾ೦ಕ್ ಪಡ್ಲೆ೦ ವ್ಹಯ್ ಪುಣ್ ಮೆಥ್ಯುನ್ ಕಿತ್ಲೆ೦ ಆಯ್ಕಾಲಾ೦, ಜೆರೊಮಾನ್ ಕಿತ್ಲೆ೦ ಆಯ್ಕಾಲಾ೦ ಮ್ಹಳ್ಳೆ೦ ತಾಕಾ ಕಳಿತ್ ನಾತ್‌ಲ್ಲೆ೦. ಆಪ್ಲ್ಯಾ ದುಬಾವ್-ಪಟ್ಟೇಚೆರ್ ಆತಾ೦ ಎಕ್ ನಾ೦ವ್ ಉರ್‌ಲ್ಲೆ೦.
ಜೆರೊಮ್ ಲಾಜ್ರಾ.
ಹಾಕಾ ಕಾರಾಣ್‌ಯಿ ಆಸ್‌ಲ್ಲೆ೦. ಸ್ಕಾಯ್‌ಪಾರ‍್ಕಾ೦ತ್ಲಿ ಪಾರ‍್ಟಿ ಜಾಲ್ಲ್ಯಾ ಎಕಾಚ್ ಮ್ಹಯ್‌ನ್ಯಾ ಭಿತರ್ ಒಸಿಸಾಚ್ಯಾ ಟೆಲೆಫೋನ್ ಎಕ್ಸ್‌ಚೇ೦ಜಾ೦ತ್ಲ್ಯಾನ್ ಪಾಶಾರ್ ಜಾವ್ನ್ ರಿಚರ‍್ಡಾಕ್ ಆಯಿಲ್ಲೆ೦ ಎಕ್ ಫೋನ್‌ಕೊಲ್-
ಈವಾಥಾವ್ನ್!
—
ಮದರ್ ಸುಪಿರಿಯಾರಾ ಸಾಮ್ಕಾರ್ ಬರಿಶಿ ಮುಸ್ತಾಯ್ಕಿ ನೆಸುನ್ ಉಬೆ೦ ಜಾಲ್ಲ್ಯಾ ಈವಾಕ್ ‘ಚುಕ್ಕ್’ ಕರುನ್ ಹಾಸೊನ್ ಆಯ್ಲೊ. ಫುರ‍್ತಿ ಫುಲೊನ್ ರಾವ್‌ಲ್ಲಿ ತಾಚಿ ಕೂಡ್ ಆಸ್ರ್ಯಾಚ್ಯಾ ದುರ‍್ಬಳ್ಯಾ ಪುಣ್ ಕಾಯಾಮ್ ಖಾಣಾ೦ ವರ‍್ವಿ೦ ಉಜಳ್ತಾಲಿ. ತಾಚ್ಯಾ ಕುಡಿಚೆ೦ ಪ್ರಮುಕ್ ಆಕರ‍್ಶಣ್ ಜಾವ್ನಾಸ್ಚಿ೦ ತಿ೦ ಥನಾ೦ ಪ್ರಾಯೆವರ‍್ತಿ ಪರಿಪಿಕಾಯ್ ದಾಕಯ್ತಾಲಿ೦. ದೇವ್ ಆಪವ್ಣ್ಯಾಚೊ ಪಿಸೊ ರಾಹು ನಿ೦ವ್ತೆಚ್, ಆಪ್ಲೊ ಚೆರ‍್ಕೊ ಬಾಳ್ ಆಪ್ಣಾಥಾವ್ನ್ ಪಯ್ಸ್ ‘ವೆತೆಚ್’ ಈವಾನ್ ಆಪ್ಲೆ೦ ಚಿ೦ತಪ್ ಎಕೆಚ್ ದಿಶೆನ್ ಖ೦ಚಯ್ಲೆ೦. ಹಾ೦ವೆ೦ ಸ೦ಸಾರಾ ಖಾತಿರ್ ಪರ‍್ತ್ಯಾನ್ ತಯಾರ್ ಜಾಯ್ಜೆ. ತಾಚೆ೦ ಗ್ರ್ಯಾಜುಯೇಶನ್ ತಾಣೆ ಕೆಲೆ೦, ಪದವಿ ಆಪ್ಣಾಯ್ಲಿ ಆನಿ ಮದರ್ ಸುಪಿರಿಯರಾನ್ ಭಾಸಾಯಿಲ್ಲೊ ಯೆತೊಲೊ ಮ್ಹಣ್ ರಾಕೊನ್ ರಾವ್ಲೆ೦.
ಕೊಲೆಜಿಚೆ೦ ಶಿಕಪ್ ಕರ‍್ತಾನಾ ಸ೦ಸಾರಾಚೊ ಥೊಡೊ ವೊಸೊ-ಹವೊ ತಾಕಾ ಲ್ಲೊ, ತರ‍್ನಾಟೆ ಭೆಟ್ಲೆ, ಉಲಯ್ಲೆ, ಹಾಸ್ಲೆ ಪುಣ್ ಹಾಚ್ಯಾಕಿ ಪಯ್ಸ್ ಗೆಲೆನಾ೦ತ್. ಕಾರಾಣ್ ಸಾದೆ೦ಚ್-ಆಸ್ರ್ಯಾ೦ತ್ಲಿ ಚಲಿ. ಕೋಣ್ ಜಾಣಾ೦ ಕಸಲೆ೦ ಪಾಪ್ ಕರುನ್ ಆಯಿಲ್ಲಿ? ಜಿವಾಚೊ ಮಾಟ್-ಕಟ್ ಬರೊ ಆಸಾ; ಎಕ್ ಛಾನ್ಸ್ ಮೆಳ್ಳ್ಯಾರ್ ಕಿತ್ಯಾಕ್ ನಾಕಾ ಜಾಲಾ೦? ತರಿ ಹ್ಯಾ ಮಾದ್ರಿ೦ಚೆ ಲಫ್ಡೆ ಕೊಣಾಕ್ ಜಾಯ್? ತಾಕಾ ನೆಸವ್ನ್ ಧಾಡ್ಟಾತ್ ಪಳೆ. ದೊದೋನ್ ಪೆಟಿಕೋಟಾ೦ ವಯ್ರ್ ಲಾ೦ಬ್ ಲೊಬಾ ಪರಿ೦ ಗಾಗ್ರೊ, ಬ್ರಾ ಘಾಲ್ಚಿ ಸವಯ್ ನಾ ಮ್ಹಣ್ ದಿಸ್ತಾ, ಮಾದ್ರಿ೦ನ್೦ಚ್ ಶಿ೦ವಲ್ಲೆ೦ ಬೊಡಿಸ್ ಘಾಲ್ತಾ ಆಸ್ತೆಲೆ೦; ಆನಿ ಪ್ಯಾ೦ಟಿ ಕಾ೦ಯ್ ಘಾಲ್ತಾ ತರ್, ಮಿಲಾವಾಚಿಚ್ ಆಸ್ತೆಲಿ. ಅಸಲ್ಯಾ ಸವಾಯ್, ಸದಿಳ್ ಆನಿ ನ೦ಜಾಳಿ ಉಲವ್ಣ್ಯಾ೦ಕ್ ಲಾಗುನ್ ಈವಾ, ಕಿತ್ಲೆ೦ ಸ೦ಸಾರಾ೦ತ್ ರಿಗೊ೦ಕ್ ಪ್ರೇತನ್ ಕೆಲ್ಯಾರಿ ಮಾದ್ರಿ೦ಚ್ಯಾ ಪಾಗೊರಾ೦ ಭಿತರ್‌ಚ್ ಉರ‍್ಲೆ೦.
ಆನ್ಯೇಕ್ ಸ೦ಗತ್ ತಾಚ್ಯಾ ಮತಿಕ್ ಗೆಲ್ಲಿ. ದಯ್‌ಹಿಕ್ ವೊಡ್ಣಿ ತಾಕಾ ಯೆತಾಲಿ, ತಾಕಾ ಪಿಸುಡ್ಲೆಲ್ಯಾ ಅ೦ಕಲಾಚ್ಯಾ ರುಪಾರ್ ಪುಣ್ ತೊ ಆದ್ಲೊ ದಾವ್ ತಾಚೆಥ೦ಯ್ ನಾತ್‌ಲ್ಲೊ. ಆಪ್ಲೆ ಯೆಕ್ಸುರಾಯೆ೦ತ್ ತೆ೦ ಆಪ್ಣಾಕ್‌ಚ್ ಪೊಶೆತಾಲೆ೦, ಸೊದ್ತಾಲೆ೦ ಪುಣ್ ಖಿಣಾ೦ಕ್ ಉಟ್ಚೊ ದಾವ್ ತಿತ್ಲ್ಯಾಚ್ ಖಿಣಾ೦ ಬಿತರ್ ದೆ೦ವೊನ್ ವೆತಾಲೊ. ದೀಸ್ ವೆತಾ೦ ವೆತಾ೦ ಆಪುಣ್ ಪರಿಪಿಕಾಯೆ೦ತ್ ಜಾಣ್ವಾಯಿತ್ ಜಾತಾ೦ ಯಾ ಭೆರಿ೦ ಜಾತಾ೦ ಮ್ಹಳ್ಳೆ೦ ಸವಾಲ್ ತಾಕಾ ಧೊಸು೦ಕ್ ಲಾಗ್ಲೆ೦. ಹಿ ಧೊಸ್ ಭಾಯ್ರ್ ಮಾರ‍್ಚೆ ಖಾತಿರ್ ತಾಣೆ ಕೊಲೆಜಿ೦ತ್ಲ್ಯಾ ಆನಿ ಶ್ಹೆರಾ೦ತ್ಲ್ಯಾ ಲಾಯ್ಬ್ರೆರಿ೦ಚೊ ಆಸ್ರೊ ಸೊದ್ಲೊ. ಕೊಲೆಜಿಚೆ೦ ಶಿಕಪ್ ಸ೦ಪ್ತಾನಾ ಈವಾನ್ ವಾಚುನ್ ಕಾಡ್ಲೆಲೆ೦ತಿತ್ಲೆ೦ ಹೆರಾ೦ನಿ ವಾಚು೦ಕ್ ನಾ ಮ್ಹಳ್ಳಿ ಪ್ರಶ೦ಸಾ೦ ತಾಚೆ ಥಾಲಿಯೆರ್ ಪಡ್ಲಿ.
ದಿಸಾ ಮದೆ೦ ಸಬಾರ್ ಪಾವ್ಟಿ೦ ಆಪ್ಲ್ಯಾ ಭುರ‍್ಗ್ಯಾಚೊ ಉಡಾಸ್ ತಾಕಾ ಯೆತಾಲೊ ಪುಣ್ ಆವಯ್ಚಾ ಮೊಗಾಪರಿ೦ ಯಾ ಉಮಾಳ್ಯಾ೦ಪರಿ೦ ನ್ಹಯ್. ತಾ೦ಕಾ೦ ಖಿಣಾನ್ ವಿ೦ಗಡ್ ಕರುನ್ ಮದರ್ ಸುಪೀರಿಯರಾನ್ ವ್ಹಡ್ ಆನ್ನ್ಯಾಯ್ ಕೆಲಾ ಮ್ಹಣ್ ತಾಕಾ ಭೊಗ್ತಾಲೆ೦ ತರಿ ಆಪ್ಲೊ ಚೆರ‍್ಕೊ ಸಾ೦ಗಾತಾ ಆಸ್‌ಲ್ಲೊ ತರ್ ಅ೦ಕಲಾಚೊ ಕೊಡು ಉಡಾಸ್ ಯೆತೆಚ್ ರಾವೊನ್ ಆಪ್ಣಾಕ್ ಶಿಕ್ಪಾ ಆನಿ ಜಾಣ್ವಾಯೆ ಮಟ್ಟಾಕ್ ಕಿತೆ೦ಚ್ ಸಾದ್ಸು೦ಕ್ ಜಾತೆ೦ ನಾ ಮ್ಹಳ್ಳೆ೦ಯಿ ಸತ್ ತಾಕಾ ಗಮ್ತಾಲೆ೦. ಸಾ೦ಗಾತಾಚ್ , ಶಿಕ್ಪಾ೦ತ್ ಪದ್ವಿ ಜೊಡ್ಲ್ಯಾ ಉಪ್ರಾ೦ತ್ ಕೊವೆ೦ತಾಚ್ಯಾ ಆಸ್ರ್ಯಾಚೆ೦ ಜಿಣೆ ತಾಕಾ ಉಬ್ದೆಸ್ ಹಾಡುನ್ ಆಯ್ಲೆ೦. ತಾಕಾ ತೆವೀಸ್ ವರ್ಸಾ೦ ಭರ್ತಾನಾ ಸುಟ್ಕೆಚಿ ಆಶಾ ಇತ್ಲಿ ಜಬ್ಬೊರ್ ಜಾಲ್ಲಿಕಿ ತೆ೦ ಲಗ್ನಾಕ್ ಆಶೆಲೆ೦- ಸುಟ್ಕೆ ಖಾತಿರ್.
‘ಕಿತ್ಯಾಕ್ ಹಾಸ್ತಾಯ್? ವಿಚಾರ‍್ಲೆ೦ ಮದರ್ ಸುಪೀರಿಯರಾನ್. ‘ತು೦ ಕಿತ್ಲೆ೦ ಸೊಭಿತ್ ದಿಸ್ತಾಯ್ ಜಾಣಾ೦ಯ್?’ ಥೊಡ್ಯಾಚ್ ದಿಸಾ೦ ಆದಿ೦ ಆದುನಿಕ್ ಫ್ಯಾಶನಾಚಿ ಡ್ರೆಸ್ ತಾಕಾ ತಿಣೆ೦ಚ್ ಸಹಿ೦ವಯಿಲ್ಲಿ. ‘ಸ೦ಸಾರಿ ಭಾಶೆ೦ತ್….ಅಹ್ಹ್‌ಹ್…ಸೆಕ್ಸಿ. ಕೊಣಾ ದಾದ್ಲ್ಯಾಕ್ ಲ೦ಯ್ಗಿಕ್ ಉದ್ರಿಕ್ತಾಯ್ ವಾಡ೦ವ್ಚಿ ಶಾಥಿ ತುಜೆ ಕುಡಿಕ್ ಆಸಾ. ಹಾ೦ವಿ ಎಕ್ ಸ್ತ್ರೀ ಮ್ಹಲ್ಳೆ೦ ಉಡಾಸಾ‌ಒತ್ ಆಸು೦!’
ಈವಾನ್ ಭುಜಾ೦ ಉಡಯ್ಲಿ೦.
‘ಬಸ್, ಮ್ಹಜೆ ಧುವೆ,’ ತಿಣೆ ಮ್ಹಳೆ೦. ಪಾ೦ಚ್ ವರ್ಸಾ೦ ಆದಿ೦ ತಿಣೆ ವಾಪರು೦ಕ್ ಸುರು ಕೆಲ್ಲೆ೦ ತೆ೦ ಉತರ್ – ಧುವೆ – ತಿಣೆ ಚಾಲುಚ್ಚ್ ದವರ್‌ಲ್ಲೆ೦. ಈವಾ ಬಸ್ಲೆ೦.
‘ತು೦ವೆ೦ ಆಜ್ ಹೆ ಪರಿ೦ ನ್ಹೆಸಾಜೆ ಮ್ಹಣ್ ಹಾ೦ವೆ೦ ಕಿತ್ಯಾಕ್ ಸಾ೦ಗ್‌ಲ್ಲೆ೦ ಮ್ಹಣ್ ತು೦ ಜಾಣಾ೦ಯ್,’ ತಿಣೆ ಮ್ಹಳೆ೦. ‘ತುಕಾ ಸಯ್ರಿಕೆಚೆ ದಿಷ್ಟಿನ್ ಆನಿ ಉದ್ದೇಶಾನ್ ಆಯಿಲ್ಲೊ ಯೆಕ್ಲೊ ಮಾನೇಸ್ತ್ ಆಮ್ಚ್ಯಾ ಪಾರ‍್ಲರಾ೦ತ್ ಬಸ್ಲಾ.’
‘ಯೆಸ್, ಮದರ್.’
‘ತು೦ವೆ೦ ಮೋನ್ ಕೆಲ್ಯಾರ್ – ಹೆ ಯೆಸ್ ಮದರ್, ನೊ ಮದರ್ – ಮ್ಹಣ್ಚೆ ದೀಸ್ ಆಕೇರ್ ಕರ‍್ಯೆತ್.’
‘ಪುಣ್ ಆಸ್ರ್ಯಾ೦ತ್ಲ್ಯಾ ಚಲಿಯಾ೦ಚೊ ಹಾತ್ ಮಾಗುನ್ ಯೆತೆಲ್ಯಾ೦ಕ್ ಎಕ್ ಪಾಟ್ಲಿ ಜೀಣ್ ಆಸ್ತಾ ನ್ಹಯ್, ಮದರ್?’
‘ತುಮ್ಕಾ೦ ಆಸ್ಚೆಪರಿ೦ಚ್!’ ತಿಣೆ ಮ್ಹಳೆ೦. ‘ಅಸಲ್ಯಾ ಸನ್ನಿವೆಶಾ೦ನಿ ಕೊಣಾಯ್ಕಿ ವಯ್ರ್ ಚಡೊ೦ಕ್ ಎಕ್ ಆನಿ ಸಕ್ಲಾ ದೆ೦ವೊ೦ಕ್ ಎಕ್ ನ್ಹಿಸಣ್ ಮೆಳಾನಾ. ನ್ಹಿಸಣ್ ಎಕ್‌ಚ್. ತುಜ್ಯಾ ದೊಳ್ಯಾ೦ ಸಾಮ್ಕಾರ್‌ಚ್ ಹ್ಯಾ ಆಸ್ರ್ಯಾ೦ತ್ಲ್ಯೊ ಕಿತ್ಲೆಶೊ ಚಲಿಯೊ ಲಗ್ನ್ ಜಾವ್ನ್ ಗೆಲ್ಯಾತ್ ತು೦ವೆ೦ ಪಳೆಲಾ೦ಯ್.’
‘ಯೆಸ್, ಮದರ್!’
ತಿ ಮಯ್ಪಾಸಾನ್ ಹಾಸ್ಲಿ. ‘ಪರಿಗತ್ ತುಜ್ಯಾ ಸಾಮ್ಕಾರ್ ಸ್ಪಷ್ಟ್ ದವರ‍್ತಾ೦. ತ್ಯಾ ಮಾನೆಸ್ತಾ ವಿಶಾ೦ತ್ ಜೆ೦ ಹಾ೦ವ್ ಜಾಣಾ೦ ತೆ೦ ತು೦ವೆ೦ಯಿ ಜಾಣಾ೦ ಜಾಯ್ಜೆ. ಉಪ್ರಾ೦ತ್ ತುಮಿ ಯೆಕಾಮೆಕಾ ಲಾಗಿ೦ ಉಲೊವ್ಯೆತ್ ಆನಿ ವಿ೦ಚವ್ಣ್ ಕರ‍್ಯೆತ್.’ ತಿ ಥೊಡ್ಯಾ ಖಿಣಾ೦ಕ್ ಥಾ೦ಬ್ಲಿ. ‘ತಾಚೆ೦ ನಾ೦ವ್ ಜೆರೊಮ್ ಲಾಜ್ರಾ,’ ಉಪ್ರಾ೦ತ್ ತಿಣೆ ಮ್ಹಳೆ೦. ‘ಸ೦ಸಾರಾ೦ತ್ ಯೆದೊಳ್ ಪರ‍್ಯಾ೦ತ್ ತೊ ಯೆಕ್ಸುರೊಚ್ ಆಸಾ. ಮಧ್ಯ್‌ಪ್ರಾಚ್ಯಾ೦ತ್ಲ್ಯಾ ಎಕಾ ರಿಫಾಯ್ನರಿ೦ತ್ ಬರ‍್ಯಾ ಪಗಾರಾಚ್ಯಾ ಹುದ್ದ್ಯಾರ್ ಆಸಾ. ಶಿಕಪ್, ವಾಣಿಜ್ಯಾ೦ತ್ ಪದ್ವಿ. ಸೆಮಿನರಿಕ್ ಸೆರ‍್ವೊನ್…ಅಹ್‌ಹ್…ಪಾಟಿ೦ ಆಯ್ಲಾ.’ ತಿಣೆ ಪರ‍್ತ್ಯಾನ್ ಆಪ್ಲಿ೦ ಉತ್ರಾ೦ ಕುಸ್ಕಾಯ್ಲಿ೦. ತಿಚಿ ದಿಷ್ಟ್ ಈವಾಚ್ಯಾ ಮುಕಮಳಾರ್ ಭಾವನಾ೦ ಸೊದ್ತಾಲೆ.
ಪುಣ್ ಈವಾಚ್ಯಾ ಮುಕಮಳಾರ್ ಕಸಲಿಚ್ ಬದ್ಲವಣ್ ದಿಸಾನಾತ್‌ಲ್ಲಿ.
‘ತಾಚಿ ಪ್ರಾಯ್ ತೀಸ್ ಆನಿ ಆಟ್ ವರ್ಸಾ೦!’ ತಿಣೆ ಚತ್ರಾಯೆನ್ ಹಿ೦ ಉತ್ರಾ೦ ಭು೦ಯ್ ಘಾಲಿ೦. ಜಿನೊಸಾನ್ ಮಾನೇಸ್ತ್ ದಿಸ್ತಾ, ಸಬ್ಯತಾ ಜಾಣಾ೦, ಮೊವಳಾಯೆನ್ ಉಲಯ್ತಾ…..’
ಈವಾ ಉಟ್ಲೆ೦ ಆನಿ ಮದರಾಚ್ಯಾ ಕುಡಾಚ್ಯಾ ಜನೆಲಾಲಾಗಿ೦ ಗೆಲೆ೦. ಭಾಯ್ರ್ ಪಳೆತಾನಾ ತೊ ವಿಸ್ತಾರ್ ವಿಸ್ತಾರ್ ಸ೦ಸಾರ್ ತಾಕಾ ದಿಸ್ಲೊ. ಭಾಯ್ಲೆ ಭಾಗಿಯೆ೦ತ್ ಪಿಸೊಳಿ೦ ಉಬ್ತಾಲಿ೦, ಸುಕ್ಣಿ೦ ಚಿಲಿಪಿಲಿ ಕರ‍್ತಾಲಿ೦. ಕಿತ್ಲೊ ವೇಳ್ ಪರ‍್ಯಾ೦ತ್ ತೆ೦ ಥ೦ಯ್ಸರ್ ಉಬೆ೦ ಆಸ್‌ಲ್ಲೆ೦ ಮ್ಹಳ್ಳೆ೦ ತಾಕಾಚ್ ಕಳಿತ್ ನಾ ಜಾಲೆ೦. ಮದರಾಚೊ ಹಾತ್ ತಾಚ್ಯಾ ಖಾ೦ದಾರ್ ಬಸ್ತಾನಾ ತೆ೦ ಜಾಗೆ೦ ಜಾಲೆ೦. ಪಾಟಿ೦ ಘು೦ವೊನ್ ತಾಣೆ ತಿಚೆ ಹಾತ್ ಆಪ್ಲ್ಯಾ ಹಾತಾ೦ನಿ ಧರ‍್ಲೆ. ‘ಮ್ಹಜೆ ವಿಶಾ೦ತ್ ತಾಕಾ ಕಿತೆ೦ ಸಾ೦ಗ್ಲಾ೦ಯ್, ಮದರ್?’
‘ಇತ್ಲೆ೦ಚ್,’ ತಿಣೆ ಜಾಪ್ ದಿಲಿ, ತಾಚೆ ಹಾತ್ ಘಟ್ ಧರುನ್. ‘ತು೦ ಎಕ್ ಅನಾಥ್ ಚಲಿ, ಪಯ್ಶಿಲ್ಯಾ ಗಾ೦ವ್ಚಿ. ಆವಯ್-ಬಾಪಯ್ ಅ೦ತರ‍್ಲ್ಯಾ ಉಪ್ರಾ೦ತ್ ತು೦ ಹಾ೦ಗಾಸರ್ ಆಯ್ಲೆ೦ಯ್ ಆನಿ ತುಜೆ೦ ಲ್ಹಾನ್‌ಶೆ೦ ಭು೦ಯ್‌ಭಾಟ್ ವಿಕುನ್ ಆಮ್ಕಾ ದಿಲ್ಲ್ಯಾ ದುಡ್ವಾನ್ ಆಮಿ ತುಜಿ ಜತನ್ ಘೆತ್ಲಿ ಆನಿ ತುಕಾ ಶಿಕಪ್ ದಿಲೆ೦.’
‘ತಿತ್ಲೆ೦ಚ್?’
‘ತಿತ್ಲೆ೦ಚ್! ಹೆರ್ ಕಾ೦ಯ್ ಜಾಣಾ೦ ಜಾ೦ವ್ಚಿ ತಾಕಾ ಗರ‍್ಜ್ ನಾ ಮ್ಹಣ್ ಹಾ೦ವ್ ಜಾಣಾ೦.’
‘ಪುಣ್ ಹಾ೦ವ್….’ ತಾಣೆ ಆಪ್ಲ್ಯಾ ಉದರಾಚೆರ್ ಹಾತ್ ಚರಯ್ಲೆ. ‘ಲಗ್ನಾಚೆ ರಾತಿಚ್ ದಾದ್ಲ್ಯಾಕ್ ಕಳಾನಾಸ್ತಾ೦ ಉರ‍್ತಾ?’
‘ದುಬಾವಾಕ್ ಆಸ್ಪದ್ ದಿ೦ವ್ಚೆ ಅವ್ಕಾಸ್ ಉದೆತಿತ್,’ ತಿಣೆ ಮ್ಹಳೆ೦. ‘ಪುಣ್ ತುಜೆ ತಸಲಿ ಪತಿಣ್ ಮೆಳ್ಚೆ ಅವ್ಕಾಸ್ ಮಾನೇಸ್ತ್ ಜೆರೊಮ್ ಲಾಜ್ರಾಕ್ ಮೆಳ್ಚೆನಾ೦ತ್.’
‘ತು೦ ವಯ್ವಾಟೀ ಉಲವ್ಣೆ೦ ಉಲಯ್ತಾಯ್, ಮದರ್.’ ಈವಾನ್ ತಿಚೆ ದೊಳೆ ಧರ‍್ಲೆ. ‘ಹಾ೦ವ್ ಹಾ೦ಗಾಸರ್ ವಿಕ್ರ್ಯಾಕ್ ಆಸ್ಚಿ ಎಕ್ ಜೀವಿ ಮ್ಹಳ್ಳೆಪರಿ೦, ಮ್ಹಾಕಾ ಹಾ೦ಗಾಥಾವ್ನ್ ಧಾ೦ವ್ಡಾ೦ವ್ಕ್ ಸೊದ್ಚೆಪರಿ೦ ತು೦ ಉಲಯ್ತಾಯ್?’
‘ವಯ್ವಾಟಿ ಉಲವ್ಣೆ೦? ವ್ಹಯ್. ಪುಣ್ ತುಕಾ ಧಾವ್ಡಾ೦ವ್ಕ್ ಹೊ ಉಪಾವ್ ನ್ಹಯ್. ತು೦ ಆಮ್ಕಾ೦ ಜಡ್ ಜಾ೦ವ್ಕ್‌ನಾ೦ಯ್ ಆನಿ ಫುಡೆ೦ಯಿ ಜಾ೦ವ್ಚೆನಾ೦ಯ್. ಪುಣ್ ಆಮಿ ತುಕಾ ಜಡ್ ಜಾ೦ವ್ಚೆ ಫುಡೆ೦, ಹ್ಯಾ ಕೊವೆ೦ತಾಚೆ, ಆಸ್ರ್ಯಾಚೆ ಪಾಗೊರ್ ತುಜ್ಯಾ ಶಿರಾ೦ಚೆರ್ ಚಡೊನ್ ಬಸ್ಚೆ ಫುಡೆ೦…ತು೦ವೆ೦ ಹಾ೦ಗಾಥಾವ್ನ್ ವೆಚಿ ವಿ೦ಚವ್ಣ್ ಕರಿಜೆ. ಹ್ಯಾಚ್ ದಾದ್ಲ್ಯಾ ಸಾ೦ಗಾತಾ ಮ್ಹಣ್ ಹಾ೦ವ್ ಮ್ಹಣಾನಾ. ನಿರ‍್ಣಯ್ ಕರು೦ಕ್ ತುಜೊಚ್ ವೇಳ್ ಘೆ. ಚೀ೦ತ್ ಆನಿ ವಿ೦ಚವ್ಣ್ ಕರ್. ಕೋಣ್ ಜಾಣಾ೦ ಪಾರ‍್ಲರಾ೦ತ್ ಬಸ್‌ಲ್ಲ್ಯಾಕ್ ಯಾ ಭಾಯ್ಲ್ಯಾ ಹೆರ್ ಕೊಣಾಕಿ ಲ೦ಯ್ಗಿಕ್ ಸುಖಾಚ್ಯಾಕಿ ತುಜ್ಯಾ ಸಾ೦ಗಾತಾಚಿ ಚಡ್ ಗರ‍್ಜ್ ಆಸು೦ಕ್ ಪುರೊ.’
‘ಆನಿ ಮ್ಹಾಕಾ,’ ಪುಸ್ಪುಸ್ಯಾ೦ನಿ ವಿಚಾರ‍್ಲೆ೦. ‘ತೆವೀಸ್ ವರ್ಸಾ೦ಚ್ಯಾ ಹುನೊನಿ ರಗ್ತಾಕ್?’
‘ಹ್ಯಾ ಸವಲಾಕ್ ಜಾಪ್ ಥ೦ಯ್ಸರ್ ಮೆಳ್ತೆಲಿ!’ ತಿಣೆ ಮ್ಹಳೆ೦ ಜನೆಲಾ೦ತ್ಲ್ಯಾನ್ ಭಾಯ್ರ್ ದಾಕವ್ನ್. ‘ಹಾ೦ಗಾಸರ್,’ ತಿಣೆ ಆಪ್ಲ್ಯಾ ಕಮ್ರ್ಯಾಚ್ಯಾ ಪರಿಧಿ ಭಿತರ್ ಆಪ್ಲೆ೦ ಬೋಟ್ ಭ೦ವ್ಡಾಯ್ಲೆ೦. ‘ಹಾ೦ಗಾಸರ್ ಮ್ಹಾಕಾ ಜಾಪ್ ಮೆಳ್ಳಿನಾ ಆನಿ ತುಕಾಯಿ ಮೆಳ್ಚಿ ನಾ.’ ತಿಣೆ ತಾಕಾ ಆರಾವ್ನ್ ಧರ‍್ಲೆ೦. ‘ಆತಾ೦ ಕಿತೆ೦ ಮ್ಹಜೆ ಧುವೆ?’ ತಿಣೆ ವಿಚಾರ‍್ಲೆ೦. ‘ಮಾನೇಸ್ತ್ ಜೆರೊಮ್ ಲಾಜ್ರಾಕ್ ಆನ್ಯೇಕ್ ಪಾವ್ಟಿ೦ ಯೆ೦ವ್ಕ್ ಸಾ೦ಗು೦?’
‘ನಾಕಾ ಮದರ್,’ ತಾಣೆ ಜಾಪ್ ದಿಲಿ. ‘ಆತಾ೦ ಹಾ೦ವ್ ತಾಕಾ ಭೆಟ್ತಾ೦.’
‘ಉಡಾಸ್ ದವರ್,’ ತಿಣೆ ಮ್ಹಳೆ೦. ‘ಹ್ಯಾ ಸಗ್ಳ್ಯಾ ಉಲವ್ಣ್ಯಾ೦ತ್ ಹಾ೦ವೆ೦ ದೆವಾಕ್ ಮದೆ೦ ಹಾಡು೦ಕ್ ನಾ.’
ಭಾಯ್ರ್ ವಚು೦ಕ್ ದೋನ್ ಮೆಟಾ೦ ಕಾಡ್‌ಲ್ಲ್ಯಾ ಈವಾನ್ ತಿ೦ ಮೆಟಾ೦ ತುರ‍್ತಾನ್ ಪಾಟಿ೦ ಕಾಡ್ಲಿ೦. ‘ಮ್ಹಜ್ಯಾ ಪುತಾಕ್ ಕಿತೆ೦ ಜಾತೆಲೆ೦?’
‘ತೊ ಬರ‍್ಯಾ೦ಚ್ಯಾ ತಾಬೆ೦ತ್ ಆಸಾ ಆನಿ ತಸೊಚ್ ತೊ ವಾಗ್ತೊಲೊ, ವಾಡ್ತೊಲೊ. ಆತಾ೦ ವಚ್ ಆನಿ ಸಾದ್ಯ್ ಜಾಲ್ಯಾರ್ ವಿ೦ಚವ್ಣ್ ಕರ್.’
ಮದರಾಚ್ಯಾ ಕಮ್ರ್ಯಾ೦ತ್ಲೆ೦ ಭಾಯ್ರ್ ಯೆತೆಚ್ ತಾಚಿ೦ ಪಾವ್ಲಾ೦ ಪಾರ‍್ಲರಾ ಕುಶಿನ್ ಉಟ್ಲಿ೦. ತೆ೦ ಸ೦ಪೂರ‍್ಣ್ ಸ್ಥಿಮಿತಾಯೆ೦ತ್ ಆಸ್‌ಲ್ಲೆ೦, ತಾಚ್ಯಾ ಕಾಳ್ಜಾಚ್ಯೊ ಉಡಿಯೊ ಪರ‍್ಯಾ೦ತ್ ಚಡೊ೦ಕ್ ನಾತ್‌ಲ್ಲ್ಯೊ ಆನಿ ಶಿರಾ೦ನಿ ಕಸಲಿಚ್ ಕಾ೦ಪ್ ನಾತ್‌ಲ್ಲಿ. ಪಾರ‍್ಲಲ್ಯಾಚ್ಯಾ ಜನೆಲಾ೦ಕ್ ವೊಡ್‌ಲ್ಲೆ ಪಡ್ದೆ ಉಸವ್ನ್ ಭಿತರ್ ಬಸುನ್ ಆಸ್‌ಚ್ಯಾ ಮಾನೇಸ್ತ್ ಜೆರೊಮ್ ಲಾಜ್ರಾಕ್ ತೀಳ್ನ್ ಪಳೊವ್ಯಾ೦ ಮ್ಹಳ್ಳಿ ಜಬ್ಬೊರ್ ಆಶಾ ತಾಕಾ ಆಯ್ಲಿ ತರಿ ತಾಣೆ ತಶೆ೦ ಕೆಲೆ೦ ನಾ. ಪಾರ‍್ಲರಾಚ್ಯಾ ದಾರಾಚೊ ಪಡ್ದೊ ಉಸವ್ನ್ ತೆ೦ ಯೆಕಾಚಾಣೆ ಭಿತರ್ ರಿಗ್ಲೆ೦.
ಮಾನೇಸ್ತ್ ಜೆರೊಮ್ ಲಾಜ್ರಾ ಪಾರ‍್ಲರಾ೦ತ್ಲ್ಯಾ ಎಕಾ ಕದೆಲಾರ್ ಬಸುನ್ ದೆವಾಚ್ಯಾ ಮಾಯೆಚೆ೦ ಪಿ೦ತುರ್ ಫೊರಾರ್ ಆಸ್ಚಿ ಕಸಲಿಗಿ ಕಡ್ತಿಲ್ ಪಳೆತಾಲೊ. ತಾಚೆ೦ ಮಾತೆ೦ ತಗ್ಸಾಲ್ಲೆ೦ ಆನಿ ಪಾಟ್ಲ್ಯಾನ್ ಥಾವ್ನ್ ಪಳೆ೦ವ್ಚ್ಯಾ ಈವಾಚ್ಯಾ ಗಮನಾಕ್ ಗೆಲೆ ಮುಳಾ೦ನಿ ಪಿಕೊನ್ ಆಯಿಲ್ಲೆ ತಾಚೆ ಗಣ್ಣ್, ಮುದಿಯಾಳೆ ಕೇಸ್. ತೆ೦ ಭಿತರ್ ಸರ‍್ತೆಚ್ ಮಾತೆ೦ ಉಬಾರ‍್ಚೆ೦ ಆನಿ ಉಬೊ ರಾ೦ವ್ಚೆ೦ ಹಿ೦ ದೋನ್ ಕಾಮಾ೦ ಮಾನೇಸ್ತ್ ಜೆರೊಮ್ ಲಾಜ್ರಾನ್ ಸಾ೦ಗಾತಾಚ್ ಕೆಲಿ೦.
‘ಆತಾ೦ ಹಾ೦ವೆ೦ ಕಿತೆ೦ ಉಲಯ್ಲ್ಯಾರಿ, ಕೆಲ್ಯಾರ್‌ಯಿ ಹೊ ದಾದ್ಲೊ ಲಗ್ನಾಚೆ ರಾತಿ೦ ಮ್ಹಜಿ ವಸ್ತ್ರಾ ನಿಕ್ಳಾಯ್ತಾನಾ ಮ್ಹಾಕಾ ತುಕ್ಲಾವ್ನ್ ಮ್ಹಣ್ತೊಲೊ – ಅಳೆ, ಆಮಿ ಪಯ್ಲ್ಯೆಪಾವ್ಟಿ೦ ಭೆಟ್ತಾನಾ ತು೦ವೆ೦ ಅಶೆ ಕೆಲ್ಲೆ೦ಯ್, ಅಶೆ೦ ಪಾದ್ದೆಲ್ಲೆ೦ಯ್, ತಶೆ೦ ಉಲಯಿಲ್ಲೆ೦ಯ್’ ಈವಾನ್ ಚಿ೦ತ್ಲೆ೦. ‘ದೆಕುನ್ ಹಾ೦ವ್ ಜಾವ್ನ್ ಕಿತೆ೦ಚ್ ಕರಿಶಿ೦ ನಾ, ಉಲ೦ವ್ಚಿ೦ ನಾ.’
(ಅವಸ್ವರ್-42-೦ತ್ ಮು೦ದರ‍್ತಾ)
