ಕರೋನಾಂತ್ಲೆಂ ಕ್ರಿಕೆಟ್

ಕರೋನಾ ಖರ್ಗಾನ್ ಬ್ರೇಕ್ ದಿಲ್ಲ್ಯಾ ಉಪ್ರಾಂತ್  ಆಖ್ಖೊ ಜಗ್ ಕ್ರಿಯಾಳ್ ಜಾಲ್ಲೊ. ಕ್ರಿಕೆಟ್ ಪಂದ್ಯಾವಳ್ಯೊ ತ್ಯಾ ‘ರೇಸಾಂತ್’ ಪಯಿಲ್ಲೆಂ  ಮಳ್ಳೆ ಬರಿಂ  ಸಕ್ಕಡಾಂ ಪ್ರಾಸ್ ಮುಕಾರ್.  ಕರೋನಾ ನಿಮ್ತಿ ಆನ್ ಲೈನ್  ಕ್ಲಾಸಸ್. ಇಸ್ಕೊಲಾಚಾ ಭುರ್ಗ್ಯಾಂಕ್ ಮಸ್ತ್ ಮಜಾ ಜಾವ್ನ್ ಗೆಲ್ಲೆಂ.   ಟಿ.ವಿ. ನಾಂತರ್  ಮೊಬಾಯ್ಲ್ , ಫಿಲ್ಮಾಂ ಖಂಯ್, ಮೆಚಾಂ ಖಂಯ್ ಆನಿಂ ಕಿತೆಂ  ಕಿತೆಂ . . .

ಆಂಮ್ಚೆ ಭಾರತೀಯ್ ಕ್ರಿಕೆಟ್ ಟೀಮ್  ಆಸ್ಟ್ರೇಲಿಯಾ ಟೂರ್ ಮುಗ್ದುಂವ್ನ್  ಪಾಟಿಂ ಆಯ್ಲೆಂಚ್  ಇಂಗ್ಲೆಂಡ್ ಆಂಮ್ಚಾ ರಾಷ್ಟ್ರಾಕ್ ಟೂರಾರ್  ಹಾಜರ್ ಜಾಲ್ಲೆಂ.  ಇಂಗ್ಲೆಂಡಾನ್ ಪಯಿಲ್ಲ್ಯಾ ಟೆಸ್ಟ್ ಮೆಚಾಂತ್ ಆಂಮ್ಕಾ ಸೋಲ್ಸಿಲ್ಯಾ ಮಾಗಿರ್ ದುಸ್ರ್ಯಾ ಮೆಚಾಕ್ ಇಲ್ಲೊ ಇಂಟ್ರೇಸ್ಟ್ ವಾಡಲ್ಲೊ.  ತಾಂಚಾ ಪಯ್ಲೆ ಇನ್ನಿಂಗ್ಸಾಂತ್ ಪಟಾಪಟ್  ಚಾರ್  ಬೆಟ್ಸ್ಮನ್ ಫೆವಿಲಿಯನಾಕ್ ಪಾಟಿಂ ಪಾವ್ಲೆ.  ಪಾಂಚ್ವೊ  ಬೆನ್ ಸ್ಟೋಕ್ಸ್ ಔಟ್ ಜಾವ್ನ್ ಫೆವಿಲಿಯನ್  ಸರ್ಶಿಂ ಮೆಟಾಂ  ಕಾಡ್ತಾಲೊ ತ್ಯಾ ವೆಳಿಂ ರಾಲ್ಫ್ ಆಪ್ಲೆ ಭಯ್ಣ್ ಜಾಸಿಲಾಲಾಗಿ,  ” ಆತಾಂ ಯೆಂವ್ಚೊ ಪೋಪ್, ಹೊ ಬರೊ ಖೆಳ್ತಾ ಹಾಂ…”   ಮ್ಹಣ್ಚೆಂ  ತಾಂಚಿ ಆಮಾಂಯ್ಕ್ ಆಯ್ಕಾಲೆಂ.   ಆನಿಂ  ತಿ ಧಾಂವೊನ್ ಆಯ್ಲಿ,  “ಆಮ್ಚಾ ಖಾಲ್ತ್ಯಾ ಭೊಳ್ಯಾ ಪಾಪಾ ಸಾಯ್ಬಾಕ್ ಕಸ್ಲ್ಯಾ ಕಸ್ಲ್ಯಾ ಕಾಮಾಕ್ ಲಾಯ್ತಾತ್ ರೇ ಪುತಾ? ”   ಮ್ಹಣ್ ಚುರ್ಚುರುಂಕ್ ಲಾಗ್ಲಿ.

ಮುದ್ವರ್ಸುಂವ್ನ್   “ಹಾವೆಂ ಆಯ್ಕಲ್ಲೆಂ ಪರ್ಮಾಣೆಂ ಪಾಪಾ ಸಾಯ್ಬಾ ಪೈಯ್ಕಿಂ ಆತ್ತಾಂಚೊ ಖೂಪ್ ಬರೊ ಮ್ಹಣ್ ಆಯ್ಕಲಾಂ. ತೊ ಶಾಂತಿಚೊ ಕುವರ್, ಆನಿಂ ಖಾಲ್ತೊ. ತಾಣೆಂ ಜಗಾಚಾ ಗರೀಬ್ ರಾಷ್ಟ್ರಾಂ, ವಿವಾದಾತ್ಮಕ್ ಜಾಗ್ಯಾನಿಂ ಭೇಟ್ ಕರ್ನ್ ಥಂಯ್ಸರ್  ಶಾಂತಿ-ಸಮಾದಾನ್ ಸ್ಥಾಪನೆ  ಖಾತಿರ್  ಜಾಯ್ತೆಂ ವಾರ್ವ್ ಕರ್ನ್ ಆಸಾ ಖಂಯ್.   ತಾಚೆಂ ಮಾಗ್ಣಿಂ, ಮೀಸಾಂವ್  ಪಳಯಿತಾನಾ ಕಸಲ್ಲೆಂಚೆಯಿ ಮನಾಂ ಪರಿವರ್ತನ್ ಜಾವುಂಕಚ್  ಜಾಯ್.   ತಸಲ್ಯಾ ದೇವತಾ ಮನ್ಶ್ಯಾಕ್ ಮುರ್ಖಾಂಚೆ ಖೇಳಾಂತ್  ವೋಡ್ನ್  ಹಾಡ್ತಾತ್ ಮ್ಹಳ್ಯಾರ್ ಕಿತೆಂ ಸಾಗ್ಚೆಂ?  ದೇವಾ… ದೇವಾ…”  ಎಕಚ್ ಸ್ವಾಸಾಕ್ ತಿಣೆಂ ಮ್ಹಣುನ್  ಆಕೆರ್ ಕರ್ಚೆಂ ಪಯ್ಲೆಂ  “ಆಜ್ ಕಾಲ್ ಕ್ರಿಕೆಟ್ ಜೂಜ್  ಜಾವ್ನ್ ಗೆಲಾ, ತಿತ್ಲೆಂಚ್ ನಂಯ್ ತಾಕಾ ಮೀತ್ ಮ್ಹಳ್ಳೆಂ ನಾ.  ಮೆಚಾ ಪಯ್ಲೆಂಚ್  ತೆಂ ಬುಕ್ ಜಾಲ್ಲೆಂ ಆಸ್ತಾ. ಬುಕ್ಕಿಸ್ ಆನಿಂ  ಖೆಳ್ಘಾಡ್ಯಾಂ ಮದೆಂ  ಕೊಂಟ್ರ್ಯಾಕ್ಟ್ ಜಾಲ್ಲೆಂ ಆಸ್ತಾ ಖಂಯ್.  ಆತಾಂ ಪಳೈಲ್ಯಾರ್ ಹ್ಯಾ ‘ಇಂಗ್ಲಿಷ್ಕಾರಾನಿಂ’  ಆಮ್ಚ್ಯಾ ಪಾಪಾ ಸಾಯ್ಬಾಕ್ ಖೆಳಾ ಮೈದಾನಾಕ್ ಹಾಡ್ಚೆಂ ಕಿತ್ಲೆಂ ಸಾರ್ಕೆಂ? ”  ಮ್ಹಣ್ ಭಿಗಡ್ಲಿ.

“ತಶೆಂ ನಯ್ ಮಾಯ್ ”   ಮ್ಹಣುನ್  ತಿಕಾ ನಾತು ರಾಲ್ಫ್  ಸಮ್ಜುಂವ್ನ್  ಸಾಂಗ್ಚೆಂ ಮ್ಹಣ್ತಾನಾ,

” ನಯ್ರೆ ಪುತಾ, ತುಜೊ ಪಪ್ಪಾ , ತುಜೆಚ್  ಪ್ರಾಯೆಚೊ ಆಸ್ಲೊ ತ್ಯಾ ಕಾಳಾರಚ್   ತುಜ್ಯಾ   ಆಪಾಯ್ಕ್   ಕ್ರಿಕೆಟ್ ಮಳ್ಯಾರ್ ಪಿಶೆಂ ಕಿ ಪಿಶೆಂ.  ರೆಡಿಯೊ ಕುಟ್ಟೊನ್ ಕುಟ್ಟೊನ್ ಕಾಮೆಂಟ್ರಿ ಅಯ್ಕೊಂವ್ಚೆ ಸವಯ್.   ತೊ  ಇಂಡಿಯಾ ಆನಿಂ ವೆಸ್ಟ್ಇಂಡಿಸ್ ಮೆಚಾಂ  ಚಲ್ತಾನಾ  ಕೆದ್ನಾಂ  ಪಳೈತಾಂ  ‘ಬಿಶಪ್’ ‘ಬಿಶಪ್’ . . .  ಮ್ಹಣ್ ಪದೆಂ ಪದೆಂ ಸಾಂಗ್ಚೆ   ಕಿತ್ಯಾಕ್ ಮ್ಹಣ್ ವಿಚಾರ‍್ಯಾಂ ಮಳ್ಯಾರ್ ಮಧೆಂ ಉಲೊಂವ್ಚೆ ವಾಟ್ ನಾತಲ್ಲಿ!  ತೊ ಕಿತೆಕಿಂ ಬಿಸ್ಪ್ ಸಾಯ್ಬಾಲಾಗಿಂ ಆಂಗೊವ್ಣೆ ಕರ್ನ್  ಘೆತಾಸ್ಲೊ ಕಿ?  ತಾಚೊ ಜಪ್ ಕರ್ತಾಲ್ಲೊ ಕಿಂ?….  ಕಿತೆಂಕಿ  ದೇವ್ ಜಾಣಾಂ. ಪುಣ್ ಸತ್ ಹೆಂ ಕಿಂ ಆಂಮ್ಚೆ ಭಾರತಾನ್ ಏಕಚ್  ಏಕ್ ಮೆಚ್ ಸಯ್ತ್   ಜಿಕ್ಲೆಂ ಕಾಂಯ್ ಹಾವೆಂ ಆಯ್ಕುನಾಂ ”  ಮ್ಹಣ್ ಸಾಂಗಿಲಾಗ್ಲಿ.

“ಮಾಂಯ್ ತೊ ಆತಾಂಯಿ ಆಸಾಗೆ”  ಮ್ಹಣೊನ್ ಜಾಸಿಲಾನ್ ಮ್ಹಣ್ತಾನಾ, “ಕಿತೆಂ… ಕಿತೆಂ ?  ತೆದ್ನಾಂಚೊ ಬಿಸೊಪ್ ಮಾನಾದಿಕ್ ವಿಲಿಯ್ಂ ಡಿಮೆಲ್ಲೊ ಮೊರ್ನ್  ಪಾವ್ನ್  ಮಸ್ತ್ ವರ್ಸಾಂ ಜಾಲಿಂ. ಆನಿಕಿ ಆಸಾ ಮಣ್ತಾಯ್ .  ‘ಆಜ್ಯೆಕ್ ನಾತ್ ಶಿಕೈತಾಲೆಂ ಖಂಯ್’  ಮ್ಹಣ್  ರಾಗಾನ್ ಜಳುಂಕ್  ಲಾಗ್ಲಿ .

ಆಮಾಯ್ಚೆಂ ವಟಾ ವಟಾ ಆಯ್ಕಲ್ಲೊ  ರಾಲ್ಫ್  “ಮಾಂಯ್ಕ್ ಕೊಯ್ಲಿ, ಧೋನಿ, ಸಚಿನ್ ಸೊಡ್ನ್ ಚೌತೊ ಕೊಣಚ್ ಗೊತ್ತು ನಾ” ಮ್ಹಣುನ್  ಮನಾಂತ್ ಗುಣ್ ಗುಣತಚ್ ಮೆಚಾಂತ್  ಮಗ್ನ್ ಜಾಲೊ.    ತಿತ್ಲೆರ್ ಜಾಸಿಲ್ “ಕಿತೆಂರೆ ರಾಲ್ಫ್ ,  ಸಗ್ಳೊ ದಿಸ್ ತುಜೆಂಚ್ ಕ್ರಿಕೆಟ್, ಕ್ರಿಕೆಟ್. ಮಾಕಾ  ‘ತಾರಕ್ ಮೆಹ್ತಾ ಕಿ ಉಲ್ಟಾ ಚಶ್ಮಾ’  ಪಳೆಂವ್ಕ್ ಸೊಡ್.  ಕ್ರಿಕೆಟ್ ಖಂಯ್ ಕ್ರಿಕೆಟ್,  ಕಸ್ಲೆಂ ಹೆಂ ಕ್ರಿಕೆಟ್? ಏಕ್ ಬೊಲಾ ಪಾಟ್ಲೆನ್ ಬೆಟ್ ಆನಿಂ ಸಗ್ಳೆಂ ಟೀಮ್.  ಫನ್ನಿ ಗೇಮ್ ಮ್ಹಳ್ಯಾರ್ ಫನ್ನಿ ಗೇಮ್”  ಮಣುನ್ ಎಕಾ ಮೆಕಾಕ್ ಜಗ್ಡೊಂವ್ಕ್ ಲಾಗ್ಲಿಂ.  ತ್ಯಾ ಕಿರ್ಕಿರೆಕ್ ಮಮ್ಮಿಮ್ ಯೆವ್ನ್   “ತುಂಮ್ಚೆ  ಜಗ್ಡೆಂ ಫುರೊಂ,  ಟಿ.ವಿ.ಯಿ ಫುರೊ” ಮ್ಹಣ್ತಚ್   ಟಿ.ವಿ.ಚ್ ಬಂದ್ ಕೆಲಿ.

***

ಇಂಗ್ಲೆಂಡ್ ಟೂರಾ ಮಾಗಿರ್ ಕ್ರಿಕೆಟ್ ಕುಂಭಮೇಳ್ ‘ಐಪಿಎಲ್’  ಗಪ್ ಚುಪ್ ಶುರು ಜಾಲ್ಲೆಂ.   ಕರೋನಾ ದುಸ್ರ್ಯಾ ಭಾಗಾಂತ್ ಕರೋನಾನಿಂ  ‘ಮಖ್ಖನ್ ಮಾರ್ಕೆ ‘  ಮಸ್ತ್ ತಯಾರಾಯೆನ್  ಆಪ್ಲೆಂ ಪಯ್ಣ್ ಆರಂಭ ಕೆಲ್ಲೆಂ. ಜಾಲ್ಯಾರ್  ತಾಚೆ  ಪರ್ವಾ ‘ಬಿಸಿಸಿಐ’ಕ್  ಜಾಂವ್ ತಾಚೆ  ಪೈಲೆಂ ಸರ್ಕಾರಾಕ್ ಕಾಯಿಂ ನಾತ್ಲೆಂ ದಿಸುವ್ನ್  ಯೆತಾಲೆಂ.  ತಾಂಚೆ ತಾಂಚೆ ಪಾಯ್ದೆಂತ್  ತೆ ತೆ ಮಗ್ನ್!  ಹಾಂ … ಫಾಯ್ದೊ ಮ್ಹಣ್ತಾನಾ ಯಾದ್ ಆಯ್ಲೆಂ  ‘ಕಾಳ್ಜಾಕ್ ಶಾಬಿತ್ಕಾಯೆನ್ ರಾಕ್ಚೆಂ, ಭಾರಿ ಬರೆಂ ತೇಲ್, ಬರೆಂ ತೇಲ್’ ಮ್ಹಣುನ್   ಜಾಹೀರಾತ್ ದಿಂವ್ಚೊ ‘ಫೊರ್ಚುನ್’  ತೇಲಾಚೊ    ಬ್ರಾಂಡ್ ಅಂಬಾಸಿಡರ್ ಬೆಂಗಾಲ್ ಟೈಗರ್ ,ದಾದಾ ಸೌರವ್ ಗಂಗೂಲಿಚ್ ಕಳ್ಜಾಘಾತಾಕ್ ಒಳಗ್ ಜಾಲಾ ತರ್ ತೇಲಾನ್ ಫಾಯ್ದೊ ಕೊಣಾಕ್? ಮ್ಹಣ್ಚೆಂ ಆಜುನಿಂ ಮಿಸ್ತೆರ್ ಜಾವ್ನ್ ರಾವ್ಲಾ.  ‘ಅಚ್ಛೆ ದಿನ್ ಆಯೆಂಗೆ ‘  ಮಣ್ಚಾ ಸರ್ಕಾರಾ ಬಾಪ್ತೆಂತ್ ದೇಶಾಚೆ ಪರಿಸ್ಥತಿ ಇತ್ಲೆ ವಯ್ಲ್ಯಾ ಮಟ್ಟಾಕ್ ಪಾವ್ಲಾಕಿಂ ಮಳ್ಯಾರ್ ಆಕ್ಸಿಜನಾಚೆ ಉಣೆಂಪಣ್  ದಿಸುಂಕ್ ಲಾಗ್ಲಾ!   ತೆಂ  ಎಕಾ ಬಗ್ಲೆನ್ ರಾವುಂದಿ   ಥೊಡೆ ಘೆಳ್ಗಾಡಿ ಕೊರೊಂಟೈನ್, ಆನಿಂ  ಫೆವಿಲಿಯನ್ ಸಗ್ಳೆಂ ಖಾಲಿ ಖಾಲಿ.  ಅಸಲ್ಲ್ಯಾ ಪರಿಸ್ಥಿತಿಂತ್ ‘ಐಪಿಎಲ್’  ಕೌಂಟ್ ಡೌನ್ ಶುರು. ಏಕ್, ದೋನ್, ತೀನ್ … ಖೇಲ್ ಚಾಲು.

‘ಹಾಡಿದ್ದೆ ಹಾಡು ಕಿಸ್ಬಾಯಿ ದಾಸಾ…’ ಹ್ಯಾ  ಸಾಂಗ್ಣೆ ಬಾಶೆನ್.   ‘ಕಪ್ಪು ನಂಮ್ದೆ……. ಕಪ್ಪು ನಂಮ್ದೆ’  ಮ್ಹಣ್ ಟೀಮಾನ್ ತೊಂಡ್ ಪಾಟ್ ಸಾಂಗ್ಚೆ ಸೊಡ್ಲಾರ್ ಇತ್ಲೆಂ ವರ್ಸಾಂ  ಕಾಂಯ್ಚ್ ಕರುಂಕ್ ಜಾಲ್ಲೆಂ ನಾ  ಆಂಮ್ಚಾ  ಬೆಂಗ್ಳುರ್ಚಾ ‘ಆರ್.ಸಿ.ಬಿ.’ ಟೀಮಾ ಲಾಗಿಂ.   ಜಾಲ್ಲ್ಯಾರ್ ರಾಲ್ಫ್ ಆನಿಂ ತಾಚಾ ಡ್ಯಾಡಿಕ್   ‘ಈಟ್ ಕ್ರಿಕೆಟ್, ಸ್ಲೀಪ್ ಕ್ರಿಕೆಟ್’  ನ್ಹಯ್ ನ್ಹಯ್  ‘ಈಟ್   ಆರ್ ಸಿ ಬಿ,  ಸ್ಲೀಪ್   ಆರ್ ಸಿ ಬಿ’. ಹ್ಯಾ  ಪಾವ್ಟಿಂ ಟೀಮ್ ಸ್ಟ್ರೋಂಗ್ ಆಸಾ ಮ್ಹಣ್ಚೆಂ  ತಾಂಚೆ ಚಿಂತಾಪ್ .

ಖಂಚ್ಯಾ ಸಾಂತಾಲಾಗಿಂ ಕೊಹ್ಲಿನ್  ಆಂಗೊವ್ಣ್  ಕೆಲ್ಲೆ ಕಿ ಕಿತೆಂ  ಕಿಂ. ತಾಚೆ ಖೆಳ್ಘಾಡಿ ಬರೆಂ ಪ್ರದರ್ಶನ್ ದಿವ್ನ್ ಆಸ್ಲೆ. ‘ಆರ್ ಸಿ ಬಿ’  ಆನಿಂ  ‘ರಾಜಸ್ಥಾನ್ ರೊಯಲ್ಸ್’  ಮದ್ಲೆಂ ಇಂಟ್ರೆಸ್ಟಿಂಗ್ ಮೇಚ್ ತೆಂ.  ‘ಆರ್ ಸಿ ಬಿ ‘  ಧಮಾಕೆದಾರ್ ಆರಂಭ್  ಜಾರಿ ಕರ್ನ್  ಆಸ್ಲೆಂ.  ತ್ಯಾ ದಿಸಾ  ರಾಲ್ಫ್ ತಾಚೆ ಬರ್ಪುರ್ ಮಜಾ ಕಾಣ್ಘೆತಾನಾ ತಾಚೆ  ಬಗ್ಲೆನ್ ಜಾಸಿಲ್ ದುಸ್ರೆಂ ವಾಟ್ ನಾಸ್ತಾನಾ ಉಗೆಂಚ್ ಮೇಚ್ ಪಳಯಿತಾಲೆ.  ತಾಂಚೊ ತೊ ಆರಂಬಿಕ್ ಜೊಡ್ಯೆಚೊ ಖೇಳ್   ಪಳೈವ್ನ್  ಗೇಮಾರ್  ತಾಚೆಯಿಂ  ಹುಮೇದ್ ಚಡತ್ ಗಲ್ಲೆಂ.  ಆನಿಂ ತೆಂ ಆಪ್ಲ್ಯಾ ಭಾವಾಲಾಗಿಂ  “ಕೊಹ್ಲಿ ಸಾಂಗಾತಾ ಬ್ಯಾಟಿಂಗ್ ಕರ್ನಾರೊ ಕೊಣ್ ರೆ ? ”  ಮ್ಹಣ್ ವಿಚಾರಿಲಾಗ್ಲೆಂ.  ಖೇಳ್ ಪಳೆವ್ಚೆಂತ್  ಮಗ್ನ್ ಜಾಲ್ಲೊ ತೊ  ” ಸಾರ್ಕೆಂ ಟಿ.ವಿ. ಪಳಯ್  ಸಗ್ಳೆಂ ಕಳ್ತಾ”  ಮ್ಹಣ್ತಾನಾ ತಾಚಾ ಟೀ ಶರ್ಟಾಚಾ ಪಾಟ್ಲೆನ್ ಬರೈಲ್ಲೆಂ ವಾಚುನ್  ”ಯೆ, ಯೆ… ದೇವದೂತ್, ದೇವದೂತ್  ”  ಮ್ಹಣ್ ದೆವ್ಚಾರ್ ಮಾರ್ಲೆಲ್ಲ್ಯಾ ಬರಿ ಕರುಂಕ್ ಲಾಗ್ಲೆಂ.  ”ದೇವದೂತ್ ನ್ಹಯ್ಗೊ ಸಾಯ್ಬಿಣಿಂ ಸಮಾ ಪಳಯ್ ಮಣಾಲೊ ” ರಾಲ್ಫ್. ”ತೆಂ ಕಿತೆಂ ಸಮಾ ಪಳೊಂವ್ಚೆಂ, ಕೊಮೆಂಟ್ರಿ ಸಯ್ತ್  ಬರೆಂ ಕರ್ನ್ ಆಯ್ಕತೆ ಆಸಾ, ತಿ  ಸಯ್ತ್ ದೇವ್ ದೂತ್ ಮಣುಂಕ್ ಲಾಗ್ಲಾ” ತಕ್ಷಣ್ ಮ್ಹಣಾಲೆಂ ಜಾಸಿಲ್.

‘ದೇವದೂತ್’ ಮಣ್ಚೆಂ  ಥಂಯ್ಚ್ ಲಾಗಿಂ ಆಪ್ಲ್ಯಾ ಕಾಮಾಂತ್ ಮಗ್ನ್  ಜಾವ್ನಾಸಲ್ಯಾ ಮಾಂಯ್ಚೆ ಕಾನಾರ್ ಪಡ್ಲೆ.  ಅನಿಂ ತಿ  ತಕ್ಷಣ್ “ಹೆಂ ಪಳಯ್,  ದೇವ್ದೂತಾಕ್ ಸಯ್ತ್ ಖೇಳಾ  ಮೈದಾನಾರ್  ವೊಡ್ಲಾ.  ಸಾಯ್ಬಾ ಸಾಯ್ಬಾ ,  ಅನಿಂ ಕೆದ್ನಾಂ ಜೆಜು ಕ್ರಿಸ್ತಾಕ್ ಹಾಡ್ಚೆ ಆಸ್ಸಾ ಕೊಣ್ಣಾ . ದೋನ್ ಹಜಾರ್ ವರ್ಸಾ ಆದಿಂ  ಹ್ಯಾ ಭುಂಯ್ಚೆರ್  ಮೀತ್ ನಾಸ್ತಾನಾ ವಾಡಲ್ಲ್ಯಾ ಅನ್ಯಾಯ್, ಅನಾಚಾರ್,ಪಾತ್ಕಾಂ  ಭೊಕ್ಸುಂಕ್  ದೆವಾನ್ ಆಪ್ಲ್ಯಾ ಎಕಚ್ ಪುತಾಕ್ ಜೆಜು ಕ್ರಿಸ್ತಾಕ್ ಧಾಡ್ಚೆಂ ಪೊಡ್ಲೆಂ.  ತಾಚಾ ಉಪ್ರಾಂತ್ ಆತಾಂ ಮಣಾಸರ್ ಪಾತ್ಕಾಂ ಜಾಯ್ತೆ ವಾಡ್ಲಾತ್. ವಿವಿಧ್ ಅವ್ಘಡಾಂ ಪರ್ತುನ್ ಪರ್ತುನ್ ಘಡ್ತೆ ಆಸಾತ್. ಕರೋನಾ  ಮಹಾಮಾರ್ ವೇತೆ ಯೆತೇ ಆಸಾ.  ಜಾಲ್ಯಾರ್ ಮೇಚ್ ಜಿಕ್ಚಾ ಸ್ವಾರ್ಥಾ  ಖಾತಿರ್ ಜೆಜುಕ್ ಹಾಡ್ಲೆರ್  ಜಾssssಲ್ಲೆಂ”  ಮಣಾಲಿ.   ತಾಕಾ ತೊ “ಸಾಯ್ಬಿಣಿನೊಂ  ತಿ ಕಾಮೆಂಟ್ರೆಟರ್ ಆಸ್ಟೇಲಿಯಾಚಿ ಫಾಮಾದ್ ಸ್ತ್ರೀ ಕ್ರಿಕೆಟ್ ಖೆಳ್ಘಾಡಿ, ಥೈಂಚಿ ಸ್ಪೊಡ್ಸ್ ಡೈರೆಕ್ಟರ್  ‘ಮೆಲ್ ಜೋನ್ಸ್’    ಭಾಯ್ಲಿ   ಮಣ್ತಾನಾ ಆಮ್ಚಿಂ ಭಾರತೀಯ್ ನಾವಾಂ ಉಚ್ಛಾರ್ ಕರ್ಚೆಂ ಇಲ್ಲೆಂ ಕಷ್ಟ್ ಮಾರ್ತಾ ತಾಂಕಾ, ಜೀಬ್ ಸುಲಭಾಯೆನ್ ಫಿರ್ನಾಂ.   ತೆಕಾಚ್ ತಿ ತಶೆಂ ಮಣ್ತಾ.    ತೊ ದೇವ್ ದೂತ್ ನ್ಹಯ್  ‘ದೇವದತ್ತ ಪಡಿಕಲ್ ‘ –  ಮ್ಹಣುನ್ ತಾಣೆ ಆಜಿ  ಆನಿಂ ನಾತ್ಯೆಕ್ ತಿದ್ವುನ್ ಸಾಂಗ್ಲೆಂ.

ಸಾಂಗಾತಾ  ಆಮಾಂಯ್ಕ್  “ತುಂ,  ಆಪಾಯ್ ರೆಡಿಯೊರ್ ಕಾಮೆಂಟ್ರಿ ಆಯ್ಕತಾನಾ ಬಿಷಪ್, ಬಿಷಪ್ ಮಣ್ತಾಸ್ಲೊ ಮಣ್ ಸಾಂಗ್ತಾಸಲ್ಲಿನ್ಹಯ್  ತೊ ಪಳಯ್  ಕಾಮೆಂಟ್ರಿ ಟೀಮಾಂತ್ ಆಸಾ  ‘ಇಯಾನ್   ಬಿಷಪ್ ‘  ಆದ್ಲೊ ವೆಸ್ಟಿಂಡಿಸ್ ಕ್ರಿಕೆಟ್ ಪ್ಲೆಯರ್ ಮ್ಹಣುನ್  ಟಿ.ವಿ. ದಾಕೊಂವ್ಕ್ ಲಾಗ್ಲೊ.   ತ್ಯಾ ಘಡಿಯೆ  ದೇವದತ್ತಾನ್ ಬೌಂಡರಿ  ಸಾಂಗಾತಾ ಸೆಂಚುರಿ  ಪೂರ್ತಿ ಕೆಲ್ಲೆಂ. ಥೊಡ್ಯಾಚ್ ವೆಳಾನ್  ‘ಅರ್ ಸಿ ಬಿ ‘ಚ್ಯಾ ಹಾತಿಂತ್ ಮೇಚ್ ಆಯಿಲ್ಲೆಂ, ಸೊಪಾಣ್ ನೀಜ್ ಜಾಲ್ಲೆಂ.

‌‌‌????️ ಆಗಸ್ಟಿನ್ ಪ್ರಕಾಶ ಕುರಿಯನ್,ಕಾರ್ವಾರ್.