2014 ವರ್ಸಾಚ್ಯಾ ಮಾರ್ಚ್ ಮಯ್ನ್ಯಾಚಿ ಗಜಾಲ್. ವಿಜ್ಞಾನಾಚಿ ವಿದ್ಯಾರ್ಥಿ/ ಪ್ರಾಧ್ಯಾಪಿಕಾ, ಕವಯತ್ರಿ ವಿಲ್ಮಾ,ಬಂಟ್ವಾಳ್ ಹಿಣೆ ಏಕ್ ತಸ್ವಿರೆ ಲೇಖನ್ ಕಿಟಾಳಾಕ್ ಧಾಡುನ್ ದಿಲ್ಲೆಂ – ಕಣ್ಕೆಕ್ ಫುಲ್ ಆಯ್ಲಾಂ. ಲೇಖನಾಚ್ಯಾ ಸುರ್ವೆರ್ ವಿಲ್ಮಾನ್ ಅಶೆಂ ಮ್ಹಳ್ಳೆಂ – ಹಿ ಬರಿ ಖಬಾರ್‌ಗೀ ಪಾಡ್ ಖಬರ್‌ಗೀ ಕಳಿತ್ ನಾ! ಆಮ್ಚ್ಯಾ ಗಾಂವಾಂತ್ ಕಣ್ಕೆಕ್ ಫುಲ್ ಆಯ್ಲಾಂ!
ಪಾಟ್ಲ್ಯಾ ದಿಸಾಂನಿ ದುಬಯ್ ಥಾವ್ನ್ ರಜೆರ್ ಗಾಂವಾಕ್ ಆಯಿಲ್ಲೊ, ತರುಣ್ ಕವಿ ಕಿರಣ್, ನಿರ್ಕಾಣ್ ಹಾಣೆ ಬರಯಿಲ್ಲಿ ಕವಿತಾ ಧಾಡುನ್ ದಿತಾನಾಂಯ್ ಚಡುಣೆಂ ಅಸಲಿಚ್ ಅಭಿಪ್ರಾಯ್ ಮ್ಹಜೆಲಾಗಿಂ ವಾಂಟುನ್ ಘೆತ್ಲಿ – ಕಣ್ಕೆಕ್ ಫುಲ್ ಪಡ್ಚೆಂ ಮ್ಹಳ್ಯಾರ್ ಮಾಗಿರ್ ಖಾಂವ್ಕ್ ಉರ್ಚೆಂ ತಿತ್ಲೆಂ ಮಾತ್ ಮ್ಹಣ್ ಮಾಂಯ್ ಮ್ಹಣ್ತಾಲಿ.
ಆಪ್ಲ್ಯಾ ತಸ್ವಿರೆ ಲೇಖನಾಂತ್ ಮುಂದರುನ್ ವಿಲ್ಮಾನ್ ಮ್ಹಳ್ಳೆಂ – ” ಕಣ್ಕೆಕ್ ಫುಲ್ ಆಯಿಲ್ಲಿ ಗಜಾಲ್ ಬರಿಗೀ ಪಾಡ್‌ಗೀ ಮ್ಹಳ್ಳೊ ದುಬಾವ್ ಉಚಾರ್ಲೊ ಹಾಂವೆಂ. ಬರಿ ಕಿತ್ಯಾಕ್ ಮ್ಹಳ್ಳ್ಯಾರ್, ಜಿಣ್ಯೆಂತ್ ಏಕ್ ಪಾವ್ಟಿಂ ಪಳೆಂವ್ಕ್ ಮೆಳ್ಚೆಂ ಆಜಾಪ್ ದೊಳ್ಯಾನಿಂ ಪಳೆಲೆಂ ಮ್ಹಣ್. ಪಾಡ್ ಮ್ಹಣೊಂಕ್ ಕಾರಣಾಂ ಆಸಾತ್. ಆದಿಂ ಕಣ್ಕೆಚೆಂ ಭಾತ್ ಜಾತಾನಾ, ಉಂದ್ರಾಂಚಿ ಸಂತತ್ ಚಾರ್ ವಾಂಟ್ಯಾನಿಂ ವಾಡೊನ್, ಪ್ಲೇಗ್ ಸುರು ಜಾತಾಲೊ ಖಂಯ್! ಹೆಂ ಏಕ್ ಕಾರಣ್ ತರ್, ಹೆಂ ಬೊರ್ಗೊಳಾಚೆಂ ಲಕ್ಶಣ್ ಮ್ಹಣೊನ್‌ಯೀ ಮಾಲ್ಘಡಿಂ ಸಾಂಗ್ತಾತ್. ಭುಂಯ್ಚ್ಯಾ ಮಾತ್ಯೆಂತ್ ಜಾಂವ್ಚಿ ಬದ್ಲಾವಣ್ ಕಣ್ಕೆಕ್ ಕಳ್ತಾ ಜಾಲ್ಲ್ಯಾನ್, ಅನ್ವಾರಾಂಚೆಂ ಮುನ್ಸೂಚನ್ ಯೆತಾನಾ ವಾಡಾವಳ್ ಕಶ್ಟ್ ಜಾತಾನಾ ಕಣಕ್ ಫುಲ್ ಸೊಡ್ನ್ ಮೊರ್ತಾ ಮ್ಹಣ್ತಾತ್. ಕಣಕ್ ಫುಲ್ ಸೊಡ್ತಾನಾ ತ್ಯಾ ಗಾಂವ್ಚಿ ಸಕ್ಕಡ್ ಕಣಕ್ ಸಾಂಗಾತಾ ಫುಲ್ ದಿತಾತ್. ಹೆಂ ಪಳೆಯ್ತಾನಾ ವಯ್ಲೆಂ ರಾಜಾಂವ್ ಸತ್ ಮ್ಹಣ್ ಭೊಗ್ತಾ.”
2014 ವ್ಯಾ ವರ್ಸಾ ಕಿಟಾಳಾರ್ ವಿಲ್ಮಾಚೆಂ ಬರಪ್ ಫಾಯ್ಸ್ ಜಾಲ್ಲ್ಯಾ ಥೊಡ್ಯಾಚ್ ದಿಸಾಂನಿ ಹ್ಯಾ ದೆಶಾಂತ್ ಜೆರಾಲ್ ಎಲಿಸಾಂವ್ ಜಾವ್ನ್ ‘ಏಕ್ ಮುಕೆಲಿ’ ವಿಂಚೊನ್ ಆಯಿಲ್ಲೊ ಸೊಡ್ಲ್ಯಾರ್ ಪ್ಲೇಗ್ ತಸಲಿ ಸಾಂಕ್ರಾಮಿಕ್ ಪಿಡಾ ಜಾಂವ್, ದುಕೊಳ್ ಜಾಂವ್ ಗಾಂವಾರ್ ಪಡೊಂಕ್ ನಾ. ಪೂಣ್ ಆಜ್, ತವಳ್ ಕಣ್ಕೆನ್ ಹ್ಯಾ ದೆಶಾಚ್ಯಾ ಪರ್ಜೆಕ್ ಮುಕಾರ್ ಫುಡ್ ಕರುಂಕ್ ಆಸ್ಚ್ಯಾ ಅನ್ವಾರಾಚೆಂ ಮುನ್ಸೂಚನ್ ದಿಲ್ಲೆಂಗಾಯ್ ? ಮ್ಹಳ್ಳೊ ದುಬಾವ್ ಧೊಸ್ತಾ.
ವೇದ ಸುಳ್ಳಾದರೂ ಗಾದೆ ಸುಳ್ಳಾಗದು ಮ್ಹಣ್ತಾತ್. ಗಾದಿ ಮಾಲ್ಘಡ್ಯಾಂಚ್ಯಾ ಅನ್ಭೊಗಾಂತ್ಲ್ಯೊ, ತೆ ಫಟಿ ಜಾಂವ್ಚೆ ತರೀ ಕಶೆಂ ?
2014 ವರ್ಸಾ ವಿಲ್ಮಾನ್ ತಿಚ್ಯಾ ಘರಾ ಪಾಟ್ಲ್ಯಾ ಕಣ್ಕೆ ಗುಡ್ಯಾರ್ ಕಣ್ಕೆಕ್ ಆಯಿಲ್ಲಿಂ ಫುಲಾಂ ಪಳೆವ್ನ್ ‘ಹೆಂ ಬೊರ್ಗೊಳಾಚೆಂ ಲಕ್ಷಣ್ ಮ್ಹಣ್ ಮಾಲ್ಘಡಿಂ ಸಾಂಗ್ತಾತ್.’ ಮ್ಹಳ್ಳೆಂ ಉಡಾಸ್ ಯೆತಾನಾ, ಬರೊಬ್ಬರಿ ಸಾತ್ ವರ್ಸಾಂ ಉಪ್ರಾಂತ್, ಅಪ್ರೂಪಾನ್ ತರೀ ಆಪುರ್ಬಾಯೆಚ್ಯೊ ಕವಿತಾ ಬರಂವ್ಚೊ ತರುಣ್ ಕವಿ ಕಿರಣಾನ್ ಹ್ಯಾ 2021 ವ್ಯಾ ಚಾಲು ವರ್ಸಾ ತಾಚ್ಯಾ ಹಿತ್ಲಾಂತ್ಲ್ಯಾ ಕಣ್ಕೆಕ್ ಆಯಿಲ್ಲಿಂ ಫುಲಾಂ ಪಳೆವ್ನ್ ಬರಯಿಲ್ಲಿ ಕವಿತಾ ವಾಚ್ತಾನಾ, ಪಾವ್ಟಿಂಚ್ಯಾಕ್ ಆಂಗ್ ಶಿರ್ಶಿರ‍್ತಾ, ಮನ್ ಕಾವ್ಜೆತಾ.
ಹ್ಯಾ ದೆಶಾಕ್ ಆನಿ ಹ್ಯಾ ದೆಶಾಚ್ಯಾ ಪರ್ಜೆಕ್ ಪರತ್ ಕಸಲೆಂ ಅನ್ವಾರ್ ರಾಕೊನ್ ಆಸಾಗಾಯ್? ಬರೊಬ್ಬರಿ ಸಾತ್ ವರ್ಸಾಂ ಉಪ್ರಾಂತ್ ಆಯಿಲ್ಲಿಂ ಕಣ್ಕೆ ಫುಲಾಂ ಕಸಲ್ಯಾ ಸಾಡೆಸಾತಿಚೆಂ ಮುನ್ಸೂಚನ್ ಹಾಡ್ನ್ ಆಯ್ಲ್ಯಾಂತ್‌ಗಾಯ್ ?
ವಿಲ್ಮಾಚ್ಯಾ ಬರ್ಪಾಮುಳಾಂತ್ ವಾಂಟುನ್ ಘೆತ್‌ಲ್ಲೆಪರಿಂ, ಹಾಂಗಾಯ್ ಕಿರಣಾಚ್ಯಾ ಕವಿತೆಚೆರ್ ದಯಾಕರುನ್ ತುಮ್ಚಿ ಅಭಿಪ್ರಾಯ್ ವಾಂಟುನ್ ಘೆಯಾ. ಆಯ್ಚಿ ದೆಶಾಚಿ ಪರಿಸ್ಥಿತಿ ಪಳಯ್ತಾನಾ, ಹ್ಯಾ ದೆಶಾಕ್ ಆನಿ ದೆಶಾಚ್ಯಾ ಪರ್ಜೆಕ್ ಕಸಲೆಂಗೀ ವ್ಹಡ್ ಅನ್ವಾರ್ ರಾಕೊನ್ ಆಸಾ ಮ್ಹಳ್ಳೆಂ ನೆಗಾರುಂಕ್ ಜಾಯ್ನಾ. 2014 ವರ್ಸಾಚಿಂ ‘ಕಣ್ಕೆ ಫುಲಾಂ’ ಅನ್ವಾರಾಂವಿಣೆಂ ಪಾಶಾರ್ ಜಾವ್ನ್ ಗೆಲ್ಲೆಪರಿಂ, ಹ್ಯಾ ವರ್ಸಾಚಿಂ ‘ಕಣ್ಕೆಫುಲಾಂ’ ಯ್ ಅನ್ವಾರಾವೀಣ್ ಪಾಶಾರ್ ಜಾವ್ನ್ ಆಮ್ಕಾಂ ಸರ್ವಾಂಕ್ ಭಾಸಾಯಿಲ್ಲೆ ‘ಬರೆ ದೀಸ್’ ಪಳೆಂವ್ಚೆಂ ಭಾಗ್ ಫಾವೊ ಜಾಂವ್ ಮ್ಹಣ್ ಆಶೆವ್ಯಾಂ.
ಮಾರ್ಚ್ 2014 ವ್ಯಾ ವರ್ಸಾ ಕಿಟಾಳಾರ್ ಫಾಯ್ಸ್ ಜಾಲ್ಲೆಂ ವಿಲ್ಮಾ,ಬಂಟ್ವಾಳ್ ತಸ್ವಿರೆ ಲೇಖನ್ ವಾಚುಂಕ್ ಕ್ಲಿಕ್ ಕರಾ :
► ಎಚ್ಚೆಮ್
ಗಾವಾಂತ್ ಆನಿ ದುಕೊಳ್
ಪಡ್ತಾರೇ ಪುತಾ…
ಮ್ಹಣೊನ್ ಕಣ್ಕೆಚ್ಯಾ ಭಾತಾಚೊ
ತಾಂದು ಕಾಂಡ್ಚಿ ಮಾಂಯ್
ಮ್ಹಣ್ತಾನಾಂ ಹಾಂವ್
ಕುರಾರ್ ವೊಮ್ತಿ ದವರ್ಲೆಲಿ
ಮೊಡ್ಕಿ ಚೊಯ್ತಾಲೊಂ
ಮಾಂಯ್ ಮ್ಹಣ್ತಾಲಿ
ಕಣ್ಕೆಕ್ ಫುಲಾಂ ಪಡ್ಲ್ಯಾರ್
ಗಾಂವಾಕ್ ದುಕೊಳ್ ಯೆತಾ.
ಮರ್ಚ್ಯಾ ಪಯ್ಲೆಂ ಉರ್ಚೆಂ ಖಾಂವ್ಕ್
ಕಣ್ಕೆಚೆಂ ಭಾತ್ ಮಾತ್ರ್.
ಫುಲಾಂ ಪಡೊನ್ ಭಾತ್ ಜಾವ್ನ್
ಕಣಕ್ ಮೆಲಿ
ತಾಚೆ ಬಾರಾಬರ್ ಮಾಂಯ್ ಸಯ್ತ್…
ಮೆಲ್ಲ್ಯಾ ಕಣ್ಕೆ ಮುಳಾಂತ್
ನವೆ ಕೀರ್ಲ್ ವಾಡ್ಲೆ
ಆನಿ ಮಾಂಯ್‌ವಿಣೆಂ ಹಾಂವ್…
ಆಜ್ ಪರತ್ ಮೊಡ್ಕೆಕ್ ಚೊವುನ್ ಬಸ್ಲಾಂ
ಭಾಯ್ರ್ ಕಣ್ಕೆಕ್ ಫುಲಾಂ ಪಡ್ಲ್ಯಾಂತ್.
► ಕಿರಣ್ ನಿರ್ಕಾಣ್
