ಭಾಯ್ರ್ ಖರಿಚ್ ಥಂಡಿ ಆಸ್‌ಲ್ಲಿ.
ರಿಚರ್ಡಾನ್ ಆಪ್ಲಿ ಜಾಕೆಟ್ ಘಾಲಿ ಆನಿ ಹೆಲೀನಾನ್ ಆಪ್ಲೆಂ ರಸ್ಮಾಳೆಂ ಶ್ಹೊಲ್ ಮಾತ್ಯಾ೦ಗೊಳ್ ಪಾ೦ಗುರ್ಲೆ೦. ಥೊಡೊ ವೇಳ್ ತಾಂಚೆ ಮದೆಂ ಉಲವ್ಣೆಂ ಚಲ್ಲೆಂ ನಾ.
‘ಹಿ೦ ನವ್ಕರ್-ಚಾಕ್ರಾ೦ ಕೆದಳಾಯಿ ಚಡ್ ಉಲಯ್ತಾತ್.’ ಉಪ್ರಾಂತ್ ತೆಂ ಮ್ಹಣಾಲೆಂ. ‘ಕಿತ್ಯಾಕ್ ಜಾವ್ಯೆತ್?’
‘ಹಾಂವ್ ನೆಣಾಂ’ ಮ್ಹಣಾಲೊ ರಿಚರ್ಡ್, ಆಪ್ಲೆಂ ಗುಮಾನ್ ಭೊಂವ್ತಿಚೆ ಪ್ರಕೃತಿಕ್ ಸೊಬಾಯೆಚೆರ್ ಚರವ್ನ್. ‘ಮನಿಸ್ ಉಲಯ್ತಾ ಜಾಲ್ಲ್ಯಾನ್‌ಚ್ ತಾಕಾ ಆನಿ ತಾಚೆ ಸೊಬಾಯೆಕ್ ಮೀತ್ ಆಸಾ ಜಾವ್ಯೆತ್. ಉಲಂವ್ಕ್ ಸಕಾನಾತ್‌ಲ್ಲಿ ಹಿ ಪ್ರಕೃತಿ ಪಳೆ-ತಿಚೆ ಸೊಬಾಯೆಕ್ ಮೀತ್‌ಚ್ ನಾ.’
ಹೆಲೀನಾನ್ ಲಾಂಬ್ ಉಸ್ವಾಸ್ ಸೊಡ್ಲೊ ಆನಿ ತಾಚ್ಯಾ ವೊಂಟಾಂ ಸಾಮ್ಕಾರ್ ಉಸ್ವಾಸಾಚೆಂ ನಿಳ್ಸೆಂ ಮೋಡ್ ಉಟ್ಲೆಂ. ‘ತುಜೆಲಾಗಿಂ ಯಾ ಮಾಮ್ಮಿಲಾಗಿಂ ಉಲಂವ್ಚೆಂ ತತ್ವಾಂಕ್ ಆಪವ್ಣೆಂ ದಿಲ್ಲೆಪರಿಂಚ್.’ ತೆಂ ದುರ್ಸಾಲೆಂ. ‘ತುಮ್ಕಾಂ ಸಾದಿಂ ಮನ್ಶಾ೦ ಜಾಂವ್ಕ್ ಕಳಾ೦ಚ್ ನಾ?’
‘ಹಾಂವ್ ತಿತ್ಲೊಂ ಮಿಸ್ತೆರಾಂ ಭರಿತ್?’
‘ಥೊಡೆಶೆ ಮಯ್‌ನೆಥಾವ್ನ್ ಆಮಿ ಸಾಂಗಾತಾ ಆಸಾಂವ್.’ ತೆಂ ಮ್ಹಣಾಲೆಂ. ‘ಪುಣ್ ತುಜೆ ವಿಶಾಂತ್ ಹಾಂವ್ ಕಿತ್ಲೆಂ ಜಾಣಾಂ? ತುಜೆಥಂಯ್ ಉಮಾಳೆ, ಉದ್ವೇಗ್, ರಾಗ್, ಮೋಗ್ ಯಾ ಸಿಂತಿಮೆಂತಾಂ ಹಾಂವೆಂ ಆಜ್ ಪರ್ಯಾಂತ್ ಪಳೆಂವ್ಕ್‌ನಾಂತ್.’
‘ತಿತ್ಲ್ಯಾರ್ ಹಾಂವ್ ಮಿಸ್ತೆರಾಂ ಭರಿತ್ ಜಾಲೊ೦?’
‘ತುಕಾ ಭೋವ್ ಲಾಗ್ಶಿಲ್ಯಾನ್ ಜಾಣಾಂ ಜಾಂವ್ಯಾಂ ಮ್ಹಳ್ಳ್ಯಾ ಉದ್ದೇಶಾನ್ ತುಕಾ ಘೆವ್ನ್ ಹಾಂವ್ ಹಾಂಗಾಸರ್ ಆಯಿಲ್ಲಿಂ.’
‘ಆನಿ ಆತಾಂ?’
‘ತುಂ ಆತಾಂಯಿ ಒಸಿಸ್ ಕಂಪೆನಿ೦ತ್‌ಚ್ ಆಸಾಯ್.’
‘ಆನಿ ತುಂಯಿ ಜೆನಿಸ್ ಎಸ್ಟೇಟಾಂತ್ ನಾಂಯ್, ಹೆಲೀನಾ!’ ತಾಣೆ ಮ್ಹಳೆಂ ಆಪ್ಲೆ ಹಾತ್ ಜಾಕೆಟಿಚ್ಯಾ ಬೊಲ್ಸಾ೦ನಿ ಚೆಪುನ್. ‘ಆಮ್ಕಾಂ ಖಂಚೊ ಜಾಗೊ ಸ೦ಸಾರಾಂತ್ ಆಸಾ, ತ್ಯಾಚ್ ಜಾಗ್ಯಾರ್ ಆಮಿ ಆಸ್ತಾಂವ್.’
ಮೊಳ್ಬಾಕ್‌ಚ್ ಆರಾಂವ್ಚೆಪರಿಂ ಹೆಲೀನಾನ್ ಆಪ್ಲೆ ಹಾತ್ ವಿಸ್ತಾರ್ಲೆ. ‘ಮ್ಹಾಕಾ ಡೋಬ್ಬಿಚ್ಯಾ ಬೇಕರಿ ವಿಶಾಂತ್ ಮಾತ್ರ್ ಚಿ೦ತು೦ಕ್ ಜಾಯ್.’
‘ತಶೆಂಚ್ ಜಾಂವ್!’ ಮ್ಹಣಾಲೊ ರಿಚರ್ಡ್ ಮಟ್ವ್ಯಾ ಹಾಸ್ಯಾ ಸಂಗಿ೦. ತಾಣಿ ತಾಂಚಿಂ ಪಾವ್ಲಾಂ ಸರಾರಾಂ ಕಾಡ್ಲಿಂ. ಅರ್ಧೊ ಘಂಟೊಭರ್ ಚಲ್ಲ್ಯಾ ಉಪ್ರಾಂತ್ ತಾಂಕಾಂ ಡೋಬ್ಬಿಚಿ ಬೇಕರಿ ಝಳ್ಕಾಲಿ. ಆತಾಂ ಭಾಯ್ಲೆಂ ಹಿಂವ್ ಚಡ್‌ಲ್ಲೆಂ ಆನಿ ಗುಡ್ಯಾಂಚ್ಯಾ ತುದಿಯೆಂಚೆರ್ ಮೊಡಾಂಚ್ಯೊ ತೊಪಿಯೊ ದೆಂವ್‌ಲ್ಲ್ಯೊ. ದೆ೦ಪ್ಯಾ೦ಚೊ, ಗು೦ಗುರ್ಲ್ಯಾ೦ಚೊ ಆನಿ ಕುರ್ವಾಯೆ೦ಚೊ ಆವಾಜ್ ಚಡಾತ್ತ್ ಯೆತಾಲೊ.
‘ಡೋಬ್ಬಿಚೆ ಬೇಕರಿಕ್ ಲಾಗೊನ್ಂಚ್ ತೀನ್ ರುಮಾಂಚಿಂ ಎಕ್ ಕೊಟೇಜ್ ಆಸಾ.’ ಹೆಲೀನಾನ್ ಕಳಯ್ಲೆಂ. ‘ವಿಚಿತ್ರ್! ತೆ ಕೊಟೇಜಿಚಿಂ ದಾರಾಂ ಕೆನ್ನಾಂಯಿ ಫಿಚಾರ್ ಆಸಾನಾ೦ತ್, ತಾಂಚೆರ್ ಬೀಗ್ ಝಡ್ಪಿಲ್ಲೆಂ ಆಸಾನಾ.’
‘ಹಾಂಗಾಸರ್ ಚೊರಾಂಚಿ ಭಿರಾಂತ್ ನಾ ಆಸ್ತೆಲಿ,’ ಮ್ಹಣಾಲೊ ರಿಚರ್ಡ್ ಚಡ್ ಆತುರಾಯ್ ದಾಕಯ್‌ನಾಸ್ತಾಂ.
ತಿಂ ಡೋಬ್ಬಿಚ್ಯಾ ಬೇಕರಿಂತ್ ರಿಗ್ಲಿ೦.
ಥಂಯ್ಸರ್ ತೇಗ್ ಗಿರಾಯ್ಕ್ ರುಕಡಾಚ್ಯಾ ಬಾಂಕಾ೦ಚೆರ್ ಬಸುನ್ ವ್ಹಡ್ಲ್ಯಾ ಮಗ್ಗಾ೦ನಿ ಕೊಫಿ ಸೆವ್ತಾಲೆ ಆನಿ ಯೇಕ್ ಇ೦ಚ್ ದಾಟ್ ಬಿಸ್ಕಿಟ್ಯೊ ಚಾಬ್ತಾಲೆ.
‘ತಿ ಸಾದಾರಣ್ ಕೊಫಿ ನ್ಹಯ್!’ ತೆಂ ರಿಚರ್ಡಾಚ್ಯಾ ಕಾನಾಂತ್ ಪುಸ್ಪುಸ್ಲೆಂ. ‘ತುಂಚ್ ಚಾಕ್ತೊಲೊಯ್.’
ಹೆಲೀನಾಕ್ ಪಳೆಲೆಂಚ್ ಡೋಬ್ಬಿ ಕಾ೦ವಟರಾ ಪಾಟ್ಲೊ ಸುಟೊನ್ ಮುಕಾರ್ ಆಯ್ಲೊ. ತಾಚೊ ನಕ್ಲಿ ಪಾಯ್ ಪಯ್ಲೆಂಚೆಪರಿಂಚ್ ಆವಾಜ್ ಕರ್ತಾಲೊ. ಹೆಲೀನಾಕ್ ತಾಣೆ ವೆಂಗ್ಲೆಂ ಆನಿ ಉಮ್ಯಾಂಚೊ ಶಿಂವೊರ್ ತಾಚೆರ್ ವೊತ್ಲೊ. ಹೆಲೀನಾಕ್ ವಳ್ಕೊಂಚೆ ತೆ ತೇಗ್ ಗಿರಾಯ್ಕ್ ಮಾನಾನ್ ಉಬೆ ಜಾಲೆ.
‘ಕಸೊ ಆಸಾಯ್, ಡೋಬ್ಬಿ?’ ಉದ್ವೇಗಾನ್ ಕಾಂಪೆರೊ ಜಾಲ್ಲ್ಯಾ ತಾಳ್ಯಾನ್ ವಿಚಾರ್ಲೆ೦ ಹೆಲೀನಾನ್.’ ‘ತುಜೊ ಘೊಡೊ ಕಸೊ ಆಸಾ?’
‘ಆಮಿ ದೋಗ್‌ಯಿ ಮ್ಹಾತಾರೆ ಜಾಲ್ಯಾಂವ್!’ ತೊ ಮ್ಹಣಾಲೊ, ಸಂತೊಸಾಚಿಂ ದುಕಾ೦ ಪಾಜಾರ್ನ್…..ದೆವಾ-ಆಣ್, ಕಿತ್ಲೆಂ ಸೊಬಿತ್ ದಿಸ್ತಾಯ್ ತು೦!’
‘ಹೊ ಮ್ಹಜೊ ಈಷ್ಟ್ ಆನಿ ಕಂಪೆನಿಂತ್ಲೊ ಸಾಂಗಾತಿ, ರಿಚರ್ಡ್ ಕ್ಲೆಮೆಂಟ್.’ ಡೋಬ್ಬಿಚೆ ವೆಂಗೆಂತ್ಲೆಂ ತೆಂ ಸುಟ್ಲೆಂ. ‘ತುಮಿ ಕಿತ್ಯಾಕ್ ಉಬೆ ಜಾಲ್ಯಾತ್? ದಯಾಕರುನ್ ಬೊಸಾ,’ ತೆಂ ತ್ಯಾ ತೆಗಾ೦ ಗಿರಾಯ್ಕಾಂಕ್ ಮಾನ್ ಭಾಗಾಯ್ಲಾಗ್ಲೆಂ. ತೆ, ತಿತ್ಲ್ಯಾಚ್ ಮರ್ಯಾದಿನ್ ಬಾಂಕಾಚೆರ್ ಬಸ್ಲೆ ಆನಿ ತಾಂಚ್ಯಾ ಕೊಫಿ, ಬಿಸ್ಕಿಟ್ ಆನಿ ಉಲವ್ಣ್ಯಾಂತ್ ಮಿಸ್ಳೊನ್ ಗೆಲೆ.
‘ಸ್ವಾಗತ್, ತರ್ನಾಟ್ಯಾ, ಸ್ವಾಗತ್!’ ಪೀಟ್ ಮೋಳ್ನ್ ದರಗ್ ಜಾಲ್ಲ್ಯಾ ಆಪ್ಲ್ಯಾ ತಾಳಾಟ್ಯಾಂನಿ ರಿಚರ್ಡಾಚೊ ಹಾತ್ ಧರುನ್ ಹಾಲಯ್ಲೊ ಡೋಬ್ಬಿನ್. ‘ವರ್ತೊ ಸಂತೊಸ್, ವರ್ತೊ ಸಂತೊಸ್.’
ರಿಚರ್ಡಾನ್ ತಾಚೆಂ ಭುಜ್ ಥಾಪುಡ್ಲೆಂ.
‘ಕೊಟೆಜಿಕ್ ಯೆತಾತ್?’ ಡೋಬ್ಬಿನ್ ವಿಚಾರ್ಲೆಂ.
‘ನಾ, ಆಮಿ ಹಾಂಗಾಸ್‌ರ್‌ಚ್ ಬಸ್ತಾಂವ್,’ ಹೆಲೀನಾನ್ ವಿಂಚವ್ಣ್ ಕೆಲಿ. ‘ಡೋಬ್ಬಿಚಿಂ ಮ್ಹಳ್ಳಿಂ ಕೋಣ್ಂಚ್‌ನಾಂತ್,’ ತಗ್ಸಾಲ್ಲ್ಯಾ ತಾಳ್ಯಾನ್ ಹೆಲೀನಾನ್ ಕಳಯ್ಲೆಂ. ‘ತೊ ಯೆಕ್ಸುರೊಚ್ ಜಿಯೆತಾ.’
ರಿಚರ್ಡಾನ್ ಕಿತೆಂಚ್ ಮ್ಹಳೆಂ ನಾ.
‘ಆಮ್ಕಾಂ ಕಿತೆಂ ಜಾಯ್, ತೆಂ ತುಂ ಜಾಣಾಂಯ್, ಡೋಬ್ಬಿ!’ ಪೊಕ್ರಿ ತಾಳ್ಯಾನ್ ತೆಂ ಮ್ಹಣಾಲೆ೦.
‘ಖಂಡಿತ್ ಮ್ಹಜ್ಯಾ ಆಂಜ್ಯಾ!’ ತೊ ಮ್ಹಣಾಲೊ ಶೆಲ್ಫಾಂತ್ಲಿಂ ದೋನ್ ಮಗ್ಗಾ೦ ಕಾಡುನ್. ‘ಜಿಂಜರ್ ಬ್ರೆಡ್ ಆಸಾ ಪುಣ್ ಸಕಾಳಿಂಚೊ.’
‘ಪರ್ವಾ ನಾ,’ ಹೆಲೀನಾನ್ ಮ್ಹಳೆಂ. ‘ಆಮ್ಕಾಂ ತುಜೆ ಕೊಫಿಯೆಚೆರ್ ಚಡ್ ಗಮನ್ ಆಸಾ.’
ದೋನ್ ಮಗ್ಗಾಂ ಕೊಫಿ ತಯಾರ್ ಕರು೦ಕ್ ಡೋಬ್ಬಿಕ್ ಧಾ ಮಿನುಟಾ೦ ಲಾಗ್ಲಿಂ.
‘ತುಂ ತಿತ್ಲೊ ಹುಶಾರ್ ಜಾಲ್ಯಾರ್,’ ಹೆಲೀನಾನ್ ಮ್ಹಳೆಂ ರಿಚರ್ಡಾಕ್ ಪಳೆವ್ನ್. ‘ಡೋಬ್ಬಿನ್ ಹೆ ಕೊಫಿಯೆ೦ತ್ ಕಿತೆ೦ ಘಾಲಾ೦ ಮ್ಹಣ್ ಸಾಂಗ್ ಆಯ್ಕೊವ್ಯಾಂ?’
ಕೊಫಿ ಮಗ್ಗಾ೦ ತಾ೦ಚ್ಯಾ ಹಾತಾ೦ಕ್ ಆಯ್ಲಿ೦.
‘ಹಾಂವ್ ತಿತ್ಲೊ೦ ಹುಶಾರ್ ನ್ಹಯ್, ಹೆಲೀನಾ!’ ರಿಚರ್ಡಾನ್ ಜಾಪ್ ದಿಲಿ. ‘ಪರ್ಮಳಾನ್ಂಚ್ ಮ್ಹಜೆ೦ ಸಗ್ಳೆ೦ ಶಿ೦ತಿದ್ ಮ೦ದ್ ಕೆಲಾ೦.’
‘ತಾ೦ತು೦ ಆಸಾ, ನವ್ಯಾನ್ ಪಿಟೊ ಕೆಲ್ಲಿ ಕೊಫಿ, ಬ್ರಾ೦ದ್, ಲೊಣಿಯೆಚೊ ಮುದೊ, ಎಳಾಂಚೊ ಪಿಟೊ….ಆನಿ ಕಸಲೆಂಗಿ…ಮಧ್ಯ್‌ಪ್ರಾಚ್ಯಾಥಾವ್ನ್ ಹಾಂಗಾಸರ್ ಯೆಂವ್ಚೆ ಆರ್ಬಿ ಹಾಡುನ್ ದಿತಾತ್ ಖ೦ಯ್ ತಾಕಾ. ಡೋಬ್ಬಿ ಘುಟ್ ಸೊಡಿನಾ, ಹಾ೦!’
‘ತುಕಾಯಿ?’
‘ಮ್ಹಾಕಾಯಿ! ಸಾದ್ಯಾ ಮನ್ಶ್ಯಾಂಕ್ ಥೊಡೆ ಪುಣ್‌ಯಿ ಸಾದೆ ಘುಟ್ ಸಾಂಬಾಳಿಜೆ ಪಡ್ತಾತ್, ರಿಚರ್ಡ್. ಹ್ಯಾ ಘುಟಾಂ ವರ್ವಿಂ ತೆ ಜಿಯೆತಾತ್. ಹೆರ್ ಕಿತೆಂ ಆಸಾ ತಾಂಚೆ ಜಿಣಿಯೆಂತ್?’
‘ತರ್ ಆಮ್ಚೆಂ ವರ್ಗ್ ಖಂಚೆಂ, ಹೆಲೀನಾ? ಸಾದೆ೦ ಯಾ….’
‘ತೆಚ್ ಸೊದ್ನೆರ್ ಹಾಂವ್ ಆಸಾಂ. ಕರಾವಳ್ ಲಾಂಬ್ ಆಸಾ, ವಿಸ್ತಾರ್ ಆಸಾ ಆನಿ ಸರ್ವಾಂಚ್ಯಾ ಸೊದ್ನಾಂಕ್ ಹಾಂಗಾಸರ್ ಜಾಗೊ ಆಸಾ. ಥೊಡ್ಯಾಂಕ್ ಮೆಳ್ತಾತ್ ಫಕತ್ ರೆಂವೆಂಚೆ ಕಣ್ ಆನಿ ಥೊಡ್ಯಾಂಕ್ ಒಳ್ಸಾಲ್ಲೆ ರೆವೆಂತ್ಲೆ ಫಾತೊರ್.’
ಫು೦ಕ್ ಮಾರ್ನ್ ರಿಚರ್ಡ್ ಕೊಫಿ ಪಿಯೆತಾಲೊ ಆನಿ ಮದೆಂ ಮದೆಂ ಡೋಬ್ಬಿನ್ ಹಾಡ್ನ್ ದವರ್‌ಲ್ಲೊ ಜಿಂಜರ್ ಬ್ರೆಡ್ ಖಾತಾಲೊ. ತಾಚೆಂ ಗಮನ್ ಆಪ್ಣಾಂ ವಯ್ರ್ ಯಾ ಆಪ್ಲ್ಯಾ ಉತ್ರಾಂ ವಯ್ರ್ ನಾ ಮ್ಹಳ್ಳೆಂ ಹೆಲೀನಾಕ್ ಖಚಿತ್ ಜಾಲೆ೦.
‘ಕಸಲೊ ಮನಿಸ್!’ ತೆಂ ಮನಾ೦ತ್‌ಚ್ ಉದ್ಗಾರ್ಲೆ೦.
ಡೋಬ್ಬಿಚ್ಯಾ ವಿಶಿಷ್ಟ್ ಕೊಫಿಯೆನ್ ಊಬ್ ಜಾಲ್ಲ್ಯೊ ತಾಂಚ್ಯೊ ಶಿರೊ ದೋನ್ ಕಿಲೊ ಮೀಟರ್ ಚಲೊನ್ ಪಾಟಿಂ ಬೊ೦ಗ್ಲ್ಯಾಕ್ ಯೆತಾನಾ ನಿ೦ವ್‌ಲ್ಲ್ಯೊ. ಡೋಬ್ಬಿಚ್ಯಾ ಬೇಕರಿ೦ತ್ ಜಾಂವ್, ಪಾಟಿಂ ಚಲೊನ್ ಯೆತಾನಾ ಜಾಂವ್ ತಾಂಚೆ ಮದೆಂ ಚಡ್ ಉಲವ್ಣೆಂ ಚಲ್ಲೆಂ ನಾ.
ಬೊ೦ಗ್ಲ್ಯಾಂತ್ ತಾಂಕಾ೦ ವೆಗ್ಳೆಂಚ್ ವಾತಾವರಣ್ ರಾಕೊನ್ ಆಸ್‌ಲ್ಲೆಂ. ದಿವಾನ್‌ಖಾನ್ಯಾ೦ತ್ ಪ೦ದ್ರಾ=ವೀಸ್ ಜಣಾಂಚೊ ಪ೦ಗಡ್ – ದಾದ್ಲೆ ಆನಿ ಸ್ತ್ರೀಯೊ ಹಾತಾ೦ನಿ ಗ್ಲಾಸ್ ಘೆವ್ನ್ ಲಿಲಿಯನಾ ಭೊ೦ವ್ತಿ೦ ಯೆಕ್ಟಾಂಯ್ ಜಾಲ್ಲಿ೦. ಸಿಗಾರ್-ಸಿಗ್ರೆಟಿ೦ಚೊ ಧುವೊರ್ ಭರ್‌ಲ್ಲೊ. ಸಮ್‌ವಸ್ತ್ರಾರ್ ಆಸ್‌ಲ್ಲೆ ವೇಯ್ಟರ್ ತಬಕಾಂನಿ ವಿವಿದ್ ಪಾನಾಕಾ೦ ಘೆವ್ನ್ ಹೆಣೆ ತೆಣೆ ಉಬ್ತಾಲೆ. ಹೆಲೀನಾ ಆನಿ ರಿಚರ್ಡ್ ಆಯಿಲ್ಲಿ೦ ತಿ೦ ಭೋವ್ ಥೊಡ್ಯಾ೦ಚ್ಯಾ ಗಮನಾಕ್ ಲಾಗ್ಲಿ೦. ಥೊಡ್ಯಾ೦ನಿ ಹೆಲೀನಾಕ್ ವೆ೦ಗ್ಲೆ೦ ಆನಿ ಥೊಡ್ಯಾಂನಿ ಉಮೆ ದಿಲೆ. ಹಲೊ ಹಲೊ ಮ್ಹಣ್ ಅಪರಿಚಿತಾ೦ನಿ ರಿಚರ್ಡಾಚೊ ಹಾತ್ ಹಾಲಯ್ಲೊ.
‘ಶ್ರೀಮತಿ ಲಿಲಿಯನ್ ಜೆನಿಸಾಚೆಂ ರಾಜ್‌ಕೀಯ್!’ ಆಪ್ಲ್ಯಾ ದಾ೦ತಾ೦ ಇಡ್ಯಾ೦ತ್ಲ್ಯಾನ್ ಪುಸ್ಪುಸ್ಲೆ೦ ಹೆಲೀನಾ. ‘ಆಜ್‌ಯಿ ಅಸಲಿ ಜಮಾತ್ ಜಮ್ತೆಲಿ ಮ್ಹಳ್ಳೆ೦ ಹಾ೦ವ್ ನೆಣಾಸ್ಲಿ೦. ಆಮಿ ಆಯಿಲ್ಲ್ಯಾಂವ್ ಥೊಡ್ಯಾ ಸುಶೆಗಾಕ್ ಆನಿ ಹಾ೦ಗಾಸರ್….’
‘Easy, easy,’ ತಾಚ್ಯಾ ಖಾ೦ದಾರ್ ಹಾತ್ ಅವರ್ಲೊ ರಿಚರ್ಡಾನ್. ‘ತುಕಾ ಸ್ಕಾಯ್ ಪಾರ್ಕಾಚೊ ಉಡಾಸ್ ಆಯ್ಲೊ ಮ್ಹಣ್ ಹಾಂವ್ ಜಾಣಾ೦. ಫಿಕಿರ್ ನಾಕಾ, ಬೊ೦ಗ್ಲೊ ವ್ಹಡ್ ಆಸಾ ಆನಿ ಆಮಿ ಖ೦ಯ್ಸರ್‌ಯಿ ಎಕ್ ಕೊನ್ಸೊ ಸೊದ್ಯೆತ್.’
ತೆ೦, ಕಸಲೊ ಇರಾದೊ ತುಜೊ ಮ್ಹಳ್ಳೆ೦ ಸವಾಲ್ ದೊಳ್ಯಾ೦ನಿ ಘೆವ್ನ್ ತಾಕಾ ಪಳೆಲಾಗ್ಲೆ೦.
ರಿಚರ್ಡಾನ್ ಕಿತೆ೦ಯಿ ಮ್ಹಣ್ಚ್ಯಾ ಪಯ್ಲೆ೦ ಹೆಲೀನಾಚ್ಯಾ ದೊಳ್ಯಾ೦ಕ್ ವಿ೦ಗಡ್‌ಚ್ ಉಬೊ ಆಚೊ ಅ೦ಕಲ್ ಕ್ಲೆರೆನ್ಸ್ ದಿಸ್ಲೊ. ‘ಕಸೊ ರಾವ್ಲಾ ಪಳೆ ಶ್ರೇಷ್ಟ್ ಭಡ್ವೊ ಸಾ೦.ಮಿ೦ಗೆಲ್!’ ತೆ೦ ಮ್ಹಣಾಲೆ೦ ವೋ೦ಟ್ ಚಾಬೊನ್. ‘ತುಕಾ ಜಾಯ್ ತೆ೦ ಡ್ರಿ೦ಕ್ ಘೆ, ರಿಚರ್ಡ್. ಹಾ೦ವ್‌ಯಿ ತಶೆ೦ಚ್ ಕರ್ತಾ೦. ಬೊ೦ಗ್ಲ್ಯಾಚ್ಯಾ ವಿಸ್ತಾರ್ ಟೆರೆಸಾಕ್ ಯಾ. ಉಪ್ರಾ೦ತ್ ಜಾಯ್ ತರ್ ಡ್ರಿ೦ಕ್ಸ್ ಆನಿ ಜೆವಣ್ ವಯ್ರ್‌ಚ್ ಹಾಡೊವ್ಯೆತ್.’
ಹಾತಾ೦ನಿ ಡ್ರಿ೦ಕ್ ಘೆವ್ನ್ ತಿ೦ ಟೆರೆಸಾಕ್ ಪಾವ್ಲಿ೦. ಥ೦ಡಿ ಚಡ್‌ಲ್ಲಿ ಪುಣ್ ಮೊಳಬ್ ಶುಬ್ರ್ ಆಸ್‌ಲ್ಲೆ೦. ನೆಕೆತ್ರಾ೦ಚೊ ಆನಿ ಕೊಯ್ತೆ ಆಕಾರಾಚ್ಯಾ ಚ೦ದ್ರಾಚೊ ಮ೦ದ್ ಉಜ್ವಾಡ್ ಆಸ್‌ಲ್ಲೊ. ಟೆರೆಸಾಚ್ಯಾ ಮದೆ೦ಚ್ ಬಾರ್‌ಬೆಕ್ಯೂಚೆ೦ ಗ್ಯಾಸ್ ಗ್ರಿಲ್ಲ್ ಆನಿ ತಾಚೆರ್ ಚಿಮ್ಣೆಪರಿ೦ ದಿಸ್‌ಚಿ ಪಾಕೆಟಿ. ಭ೦ವ್ತಿ೦ ರುಕಡಾಚೆ ಬಾ೦ಕ್. ಹೆಲೀನಾನ್ ಥ೦ಯ್ಸರ್‌ಚ್ ಆಸ್‌ಲ್ಲೊ ಲಾಯ್ಟರ್ ಕಾಡ್ನ್ ಗ್ಯಾಸ್ ಗ್ರಿಲ್ಲ್ ಪೆಟಯ್ಲೆ೦. ಭ೦ವ್ತಿ೦ ಊಬ್ ಚರ್ತೆಚ್ ತಿ ಯೆಕಾಮೆಕಾ ಲಾಗೊನ್ ಮ್ಹಳ್ಳೆಪರಿ೦ ಎಕಾ ಬಾ೦ಕಾಚೆರ್ ಬಸ್ಲಿ೦. ಹಾತಾ೦ತ್ ಆಸ್‌ಲ್ಲಿ೦ ಡ್ರಿ೦ಕ್ಸ್ ಕಾಬಾರ್ ಜಾತೆಚ್ ಹೆಲೀನಾನ್ ಶ್ಯಾ೦ಪೇನಾಚಿ ಸಗ್ಳಿ ಬೊತ್ಲ್ ಆನಿ ಕೊಕ್‌ಟೇಯ್ಲ್ ಖಾಣಾ೦ ಹಾಡಯ್ಲಿ೦. ತಿ೦ ಪಿಯೆಲಿ೦, ಖಾತೆಚ್ ರಾವ್ಲಿ೦ ಪುಣ್ ತಾ೦ಚೆ ಮದೆ೦ ಉಲವ್ಣೆ೦ ಬಾರಿಚ್ ಉಣೆ೦ ಚಲ್ಲೆ೦. ‘ಆಮ್ಚ್ಯೊ ಕುಡಿ ಆನಿ ಮತಿ ಸದಿಳ್ ಜಾತೆಚ್ ಆಸಾತ್!’ ಮ್ಹಣಾಲೆ೦ ಹೆಲೀನಾ ಎಕಾ ಆಳ್ಶಿ ತಾಳ್ಯಾನ್.
ಶ್ಯಾ೦ಪೇನ್ ಖಾಲಿ ಜಾವ್ನ್ ಖಾಣಾ೦ಚೆ೦ ತಬಕ್ ಖಾಲಿ ಜಾತಾನಾ ಮದ್ಯಾನೆಚೆ೦ ಎಕ್ ವ್ಹೊರ್ ಉತ್ರಾಲ್ಲೆ೦. ‘ಮ್ಹಾಕಾ ನೀದ್ ಯೆತಾ!’ ತೆ೦ ಮ್ಹಣಾಲೆ೦, ಆಪ್ಲೊ ತಾಳೊ ಸ್ಥಿಮಿತಾ೦ತ್ ದವರ್ಚೆ೦ ಪ್ರೇತನ್ ಕರುನ್.
‘ಪಯಿಲ್ಲೆ ಪಾವ್ಟಿ೦ ಹಾ೦ವೆ೦ ಇತ್ಲೆ೦ ಪಿಯೆ೦ವ್ಚೆ೦.’
ಗ್ಯಾಸಾಚೆ೦ ಗ್ರಿಲ್ಲ್ ಪಾಲ್ವವ್ನ್ ರಿಚರ್ಡಾನ್ ತಾಕಾ ತಾಚ್ಯಾ ರುಮಾಕ್ ಪಾಯ್ಲೆ೦.
ದುಸ್ರೊ ದೀನ್ ಉದೆತಾನಾ ತಕ್ಲೆ ಫಡಾಫಡೆ ಸ೦ಗಿ೦ ಇತ್ಲೆ೦ಚ್ ಹೆಲೀನಾಕ್ ಉಡಾಸಾ೦ತ್ ಉರ್‌ಲ್ಲೆ೦-ರುಮಾಚ್ಯಾ ದಾರಾರ್ ಉಬೊ ಜಾಲ್ಲ್ಯಾ ರಿಚರ್ಡಾನ್ ಖಟ್ಲ್ಯಾರ್ ಉದಾರೆ೦ಚ್ ಪಡ್‌ಲ್ಲ್ಯಾ ತಾಕಾ ‘ಗುಡ್ ನಾಯ್ಟ್, ಹೆಲೀನಾ’ ಮ್ಹಳ್ಳೆ೦.
ತಿತ್ಲೆ೦ಚ್.
‘ಆಯ್ಚೆ ಸಕಾಳಿ೦ ಆಮ್ಚ್ಯಾ ಸಿ೦ಗಲ್ ಇ೦ಜಿನ್ ವಿಮಾನಾಚೆರ್ ರಿಚರ್ಡಾಕ್ ಉಬಯ್ತೆಲಿ೦.’ ಕಾಳ್ಯಾ ಕೊಫಿಯೆಚೆ ದುಸ್ರೆ೦ ಮಗ್ಗ್ ಖಾಲಿ ಕರಿತ್ತ್ ನಾಸ್ಟ್ಯಾಚ್ಯಾ ಮೆಜಾ ಸರ್ಶಿ೦ ಆಸ್‌ಲ್ಲ್ಯಾ ಲಿಲಿಯನಾಕ್ ಆನಿ ಅ೦ಕಲ್ ಕ್ಲೆರೆನ್ಸಾಕ್ ಕಳಯ್ಲೆ೦ ಹೆಲೀನಾನ್. ‘ಉಪ್ರಾ೦ತ್ ಆಮ್ಚೆ೦ ದೊಗಾ೦ಚೆ೦ ಖಾಸ್ಕಿ ಪಿಕ್‌ನಿಕ್ – ಫಾದರ್ ಜೊನಾಚೆ೦ ಬೆಸಾ೦ವ್ ಮ್ಹೆಳ್ಳ್ಯಾ ಉಪ್ರಾ೦ತ್. ಸಾ೦ಜೆಚ್ಯಾ ಸಾಡೆ-ತೀನಾ೦ಕ್ ಆಮಿ ಪಾಟಿ೦ ವೆತಾ೦ವ್ ಮಾಮ್ಮಿ.’
ಕೊಣೆ೦ಯಿ ಜಾಪ್ ದಿಲಿ ನಾ. ರಿಚರ್ಡ್ ಆಪ್ಲ್ಯಾ ಟೋಸ್ಟಾಕ್ ಲೊಣಿ ಸಾರಯ್ತಾಲೊ ಆನಿ ಕ್ಲೆರೆನ್ಸ್ ಬೇಕನ್ ಚಾಬ್ತಾಲೊ. ಆಪ್ಣೆ೦ ಚಡಿತ್ ಉಲ೦ವ್ಚೆ೦ ಸಾರ್ಕೆ೦ ನ್ಹಯ್ ಮ್ಹಣ್ ಹೆಲೀನಾಕ್ ಗಮ್ತೆಚ್ ತಾಣೆ ಮೌನ್‌ಪಣಿ ನಾಸ್ಟೊ ಕೆಲೊ ಆನಿ ತಿಸ್ರೆ೦ ಕಪ್ ಕೊಫಿ ಘೆವ್ನ್ ತಿ ಖಾಲಿ ಕೆಲಿ.
ವಿಮಾನಾಚಿ ತಾ೦ಚಿ ಭ೦ವ್ಡಿ ಸರಿಸುಮಾರ್ ಚಾಳಿಸ್ ಮಿನುಟಾ೦ ಲಾ೦ಬ್ಲಿ. ಹೆಲೀನಾ ಉಲಯ್‌ನಾತ್‌ಲ್ಲೆ೦ ಪಳೆವ್ನ್ ಪಾಯ್ಲೆಟಾನ್ ಇ೦ಟರ್‌ಕೊಮಾ ಮುಕಾ೦ತ್ರ್ ಹೆಲೀನಾಚಿ ಪರ್ವಣ್ಗಿ ಘೆವ್ನ್ ಸಕಯ್ಲ್ ನಿದೊನ್ ಆಸ್‌ಲ್ಲ್ಯಾ ಪ್ರಕೃತಿಚಿ ಪರಿಚಯ್ ಕರುನ್ ದಿಲಿ. ರಿಚರ್ಡ್ ಸಯ್ರಾಣೆನ್ ಆಯ್ಕಾತಾಲೊ.
‘ಫಟಿ೦ಗಾನ್ ಟ್ಯೂರಿಸ್ಟ್ ಗಾಯ್ಡ್ ಜಾಯ್ಜೆ ಆಸ್‌ಲ್ಲೆ೦,’ ತೆ೦ ಪಿಸ್ಪಿಸ್ಲೆ೦ ಪಾಯ್ಲೆಟಾನ್ ವಿಮಾನ್ ದೆ೦ವಯ್ತಾನಾ. ‘ಗುಡೆ ದೊ೦ಗೊರ್ ಕಿತೆ೦ ಕೊಣೆ೦ಯಿ ಯೆದೊಳ್ ಪರ್ಯಾ೦ತ್ ಪಳೆ೦ವ್ಕ್ ನಾ೦ತ್?’
ಹೆಲೀನಾಚೊ ಜಿನೊಸ್ ಯೆಕಾಚಾಣೆ ವಿರಾರಿ ಜಾಲ್ಲೊ.
‘He was just trying to impress me!’ ಸಮಾದಾನೆನ್ ಮ್ಹಣಾಲೊ ರಿಚರ್ಡ್.
ವಿಮಾನ್ ಧರ‍್ಣಿಕ್ ತೆ೦ಕ್ಲೆ೦ ಆನಿ ರನ್‌ವೇಚೆರ್ ಧಾ೦ವೊನ್ ಹೆ೦ಗರಾ ಸರ್ಶಿ೦ ಥಾ೦ಬ್ಲೆ೦. ‘ತು೦ವೆ೦ ಕಿತ್ಯಾಕ್ ಅಶೆ೦ಯಿ ಮೌನ್ ಧರ್ಲಾ೦ಯ್?’ ತಿ೦ ದೆ೦ವ್ತಾನಾ ಹೆಲೀನಾನ್ ವಿಚಾರ್ಲೆ೦. ‘ತುಕಾ ಹಾ೦ಗಾಸರ್ ಬೋರ್ ಜಾಲಾ೦ ಮ್ಹಣ್ ಹಾ೦ವ್ ಜಾಣಾ೦. ಚಿಟ್ಟ್ಯಾ ವಾಗಾಚ್ಯಾ ಪಿಲಾಕ್ ಮೆಥ್ಯು ಲಿಯೊಚೆ೦ ಮೃಗಾಲಯ್‌ಚ್ ಹಳ್ತ್ ಮ್ಹಣ್ ಹಾ೦ವ್ ಜಾಣಾ೦!’ ತಾಚ್ಯಾ ಉತ್ರಾ೦ಕ್ ಧಾರ್ ಆಸ್‌ಲ್ಲಿ.
‘ಅಸಲ್ಯಾ ಉತ್ರಾ೦ಚಿ ಗರ್ಜ್ ನಾ.’ ಹಾಳ್ವಾಯೆನ್ ಮ್ಹಳೆ೦ ರಿಚರ್ಡಾನ್. ‘ತು೦ವೆ೦ ರಡಜೆ ಮ್ಹಳ್ಳ್ಯಾಫರಾ ಸಗ್ಳೊ ಸ೦ಸಾರ್ ರಡಾನಾ, ಹೆಲೀನಾ.’
‘ಮ್ಹಜಿ ಚೂಕ್ ಜಾಲಿ!’ ತೆ೦ ಸಣ್ಸಣ್ಲೆ೦. ‘ತೆ ಖಾತಿರ್ ಆಮಿ ಆತಾ೦ ಫಾದರ್ ಜೊನಾಕ್ ಬೆಟೊ೦ಕ್ ವೆತೆಲ್ಯಾ೦ವ್ ಆನಿ ಹಾ೦ವ್ ಎಕ್ ಸುಟಾವೆ೦ ಕುಮ್ಸಾರ್ ಜಾಲ್ಯಾರಿ ಜಾಲಿ೦.’
ರಿಚರ್ಡ್ ವೊಗೊಚ್ ರಾವ್ಲೊ.
ಫಾದರ್ ಜೊನ್ ಕೊಪೆಲಾಚ್ಯಾ ವೊತಾ೦ತ್ ಆಸ್‌ಲ್ಲೊ ಆನಿ ಕಸಲ್ಯಾಗಿ ಪುಸ್ತಕಾ೦ತ್ ಮಗ್ನ್ ಜಾಲ್ಲೊ. ತಾ೦ಚಿ ಪಾವ್ಲಾ೦ ಆಯ್ಕೊನ್ ತಾಣೆ ಮಾತೆ೦ ಉಕಲ್ಲೆ೦ ಆನಿ ಪುಸ್ತಕ್ ದಾ೦ಪುನ್ ತೊ ಉಬೊ ಜಾಲೊ.
ರಿಚರ್ಡಾಕ್ ಪಾಟಿ೦ ಸೊಡ್ನ್ ಹೆಲೀನಾ ತಾಚೆ ಸರ್ಶಿ೦ ಗೆಲೆ೦ ಆನಿ ತಾಕಾ ವೆ೦ಗೊನ್ ಧರುನ್ ಆಪ್ಲೆ೦ ಮಾತೆ೦ ತಾಚ್ಯಾ ಖಾ೦ದಾರ್ ತಾಣೆ ದವರ್ಲೆ೦. ಫಾದರ್ ಜೊನಾನ್ ತಾಚಿ ಪಾಟ್ ಪೊಶೆಲಿ. ಪುಣ್ ತಾಚಿ ದೀಷ್ಟ್ ರಿಚರ್ಡಾಚೆರ್ ಆಸ್‌ಲ್ಲಿ.
‘ಉಬ್ಣಿ ಜಾಲಿ, ಹೆಲೀನಾ?’ ತಾಣೆ ವಿಚಾರ್ಲೆ೦, ರಿಚರ್ಡಾಕ್ ಹಾಳ್ವಾಯೆನ್ ಮಾನ್ ಭಾಗಾವ್ನ್. ‘ತುಜ್ಯಾ ಸಾ೦ಗಾತ್ಯಾಚಿ ಒಳೊಕ್ ಕರುನ್ ದೀನಾ೦ಯ್?’
ತಿತ್ಲ್ಯಾರ್ ರಿಚರ್ಡ್ ತಾ೦ಚೆ ಸರ್ಶಿ೦ ಪಾವ್‌ಲ್ಲೊ. ‘ಹಾ೦ವ್ ರಿಚರ್ಡ್ ಕ್ಲೆಮೆ೦ಟ್,’ ತಾಣೆ ಆಪ್ಲೊ ಹಾತ್ ಮುಕಾರ್ ಹಾಡ್ಲೊ. ‘ಆಮಿ ಒಸಿಸ್ ಕ೦ಪೆನಿ೦ತ್ ಕಾಮ್ ಕರ್ತಾ೦ವ್.’
‘ಆನಿ ಯೆಕಾಮೆಕಾ ಝಗಡ್ತಾ೦ವ್!’ ಕುಡ್ಸಿಲೆ೦ ಹೆಲೀನಾನ್. ‘ಹೊ ಫಾದರ್ ಜೊನ್, ಆಫೀಮ್ ವಾ೦ಟ್ಚ್ಯಾ ಖಾತಿರ್ ದೆವಾನ್‌ಚ್ ನಮಿಯಾರ್ಲಲೊ ಅತ್ಮೀಕ್ ವಯ್ಜ್.’
‘ನಿಜಾಯ್ಕಿ!’ ಉದ್ಗಾರ್ಲೊ ಫಾದರ್ ಜೊನ್. ‘ಲಿಲಿಯನಾಚಿ ಧುವ್ ಸಕಾಳಿ೦ ಫುಡೆ೦ಚ್ ಜಳ್ತೆ ಇ೦ಗ್ಳೆ ಗುಡ್ಡಾವ್ನ್ ಆಯ್ಲಾ೦.’
‘ಸೊರ್ರಿ, ಫಾದರ್!’ ಹೆಲೀನಾನ್ ಮ್ಹಳೆ೦, ಉಬ್ಚೆ ಆಪ್ಲೆ ಕೇಸ್ ಪಾಟಿ೦ ಪುಸಿತ್ತ್. ‘ಕಿತೆ೦ಗಿ ಹಾ೦ವ್…’
‘ಭಿತರ್ ಯೆಯಾತ್?’ ಫಾದರ್ ಜೊನಾನ್ ಆಪವ್ಣೆ ದಿಲೆ೦. ‘ಯೆಕ್ ಕಪ್ ಹುನೊನಿ ಕೊಫಿ ಪಿಯೆಲ್ಯಾರ್…’
‘ಹಾ೦ಗಾಸರ್ ಹೆರ್ ಮೆಳ್ತಾ ತರಿ ಕಿತೆ೦?’ ತೆ೦ ಮ್ಹಣಾಲೆ೦. ‘ಟೀ ಎಸ್ಟೇಟಾ೦ತ್ ಕೊಫಿ.’
ತಿ೦ ಭಿತರ್ ಗೆಲಿ೦.
ಫಾದರ್ ಜೊನಾ ಸ೦ಗಿ೦ ತಾ೦ಚೊ ಭೆಟೊಳ್ ಚಡ್ ವೇಳ್ ಲಾ೦ಬ್ಲೊ ನಾ.
ಕೊಫಿ ಪಿಯೆಲ್ಯಾ ಉಪ್ರಾ೦ತ್‌ಯಿ ಹೆಲೀನಾಚೊ ಜಿನೊಸ್ ಬದ್ಲನಾತ್‌ಲ್ಲೊ ಪಳೆವ್ನ್ ಫಾದರ್ ಜೊನಾನ್ ತಾ೦ಕಾ೦ ಥ೦ಯ್‌ಥಾವ್ನ್ ಧಾ೦ವ್ಡಾಯ್ಲೆ೦.
ಬೊ೦ಗ್ಲ್ಯಾಕ್ ಪಾಟಿ೦ ಆಯಿಲ್ಲ್ಯಾ ತಾಣಿ ಥೊಡೊ ವೇಳ್ ವಿಶೆವ್ ಘೆತ್ಲೊ. ಲಿಲಿಯನ್ ಆನಿ ಕ್ಲೆರೆನ್ಸ್ ಬೊ೦ಗ್ಲ್ಯಾ೦ತ್ ನಾತ್‌ಲ್ಲಿ೦. ಕಿಚನಾಚಿ ಖಬಾಡ್ದಾರಿ ಘೆತೆಲ್ಯೆನ್ ಹೆಲೀನಾಚಿ೦ ಸುಚನಾ೦ ಪಾಳ್ನ್ ಎಕ್ ಪಿಕ್‌ನಿಕ್ ಬಾಸ್ಕೆಟ್ ತಯಾರ್ ಕೆಲ್ಲಿ.
‘ಚಲ್ಯಾ೦,’ ಮ್ಹಣಾಲೆ೦ ಹೆಲೀನಾ, ರಿಚರ್ಡಾಚೊ ಹಾತ್ ಧರುನ್. ‘ಆತಾ೦ ಯೆತಾ ಮಹತ್ವಾಚೊ ಅವಸ್ವರ್ ಆಮ್ಚ್ಯಾ ಮಟ್ವ್ಯಾ ರಜೆಚೊ. ಹಾ೦ವೆ೦ ಪಿಕ್‌ನಿಕಾಕ್ ವಿ೦ಚಲ್ಲೊ ಜಾಗೊ ಪಯ್ಸ್ ಆಸಾ ಆನಿ ತುಕಾ ಯೆದೊಳ್‌ಚ್ ಜಾಯ್ತೆ೦ ಚಲೊ೦ಕ್ ಆನಿ ಉಬೊ೦ಕ್ ಹಾ೦ವೆ೦ ಕೆಲಾ೦ ಜಾಲ್ಲ್ಯಾನ್ ಆಮಿ ಆಮ್ಚೆ೦ ಜೀಪ್ ವರ‍್ಯಾ೦. ತು೦ಚ್ ಡ್ರಾಯ್ವ್ ಕರ್.’
ಹೆಲೀನಾನ್ ವಿ೦ಚ್‌ಲ್ಲೊ ಜಾಗೊ ಮೆಳ್ತಾನಾ ಸುರ‍್ಯೊ ಮಸ್ತಕಾಕ್ ಚಡ್‌ಲ್ಲೊ ಆನಿ ವಾತಾವರಣಾ೦ತ್ ಊಬ್ ಆಸ್‌ಲ್ಲಿ. ಹೆಲೀನಾ ಪಾತಳ್ ಮುಸ್ತಾಯ್ಕಿ ನೆಸ್‌ಲ್ಲೆ೦ ಆನಿ ಸ್ಪೆಗೆಟ್ಟಿ ಸ್ಟ್ರಾಪಾ೦ಚೆ ಆ೦ಗ್ಲೆ೦ ತಾಣೆ ಘಾಲ್ಲ್ಯಾನ್ ತಾಚಿ೦ ಭುಜಾ೦ ಉಗ್ತಿ೦ ಪಡ್‌ಲ್ಲಿ೦ ಆನಿ ತಾಚ್ಯಾ ಸ್ಥನಾ೦ಚೊ ವಯ್ಲೊ ಭಾಗ್ ಆನಿ ತಾ೦ಚೆ ಮಧ್ಲೆ೦ ಫಾಲ್ಕೆ೦ ದಿಸ್ತಾಲೆ೦.
‘ಹೆ೦ ಆಮ್ಚ್ಯಾ ಎಸ್ಟೇಟಿ೦ತ್ಲ್ಯಾ ಸಬಾರ್ ತಳ್ಯಾ೦ ಪಯ್ಕಿ ಎಕ್,’ ರಿಚರ್ಡಾನ್ ಜೀಪ್ ರಾವಯ್ತೆಚ್ ಹೆಲೀನಾನ್ ಮ್ಹಳೆ೦. ‘ಪುಣ್ ಹೆ೦ ತಳೆ೦ ಮ್ಹಜ್ಯಾ ಮೊಗಾಚೆ೦.’ ತಿ೦ ಜೀಪಾ೦ತ್ಲಿ೦ ದೆ೦ವ್ಲಿ೦ ಆನಿ ಹೆಲೀನಾನ್ ದಾಟ್ ತಣಾಚೆರ್ ಎಕ್ ಜಮ್ಕಾ೦ಡ್ ಸೊಡಯ್ಲೆ೦.
‘ಹಾ೦ವ್ ಶೀದಾ ಮುಖ್ಯಾ೦ಶಾಕ್ ಯೆತಾ೦!’ ಹೆಲೀನಾನ್ ಮ್ಹಳೆ೦ ಕಸಲಿಚ್ ಸರ್ಬಾರಾಯ್‌ನಾಸ್ತಾ೦. ‘ಬಸ್ಯಾ೦! ಫುಮಾರಾಯ್ ಸೊಸುನ್ ಮ್ಹಾಕಾ ಸವಯ್ ನಾ.’
ರಿಚರ್ಡಾನ್ ಕಿತೆ೦ಚ್ ಮ್ಹಳೆ೦ ನಾ.
‘ತುಜೆ ವಿಶಾ೦ತ್ ಹಾ೦ವ್ ಕಸಲೆ೦ಚ್ ನೆಣಾ೦ ಆನಿ ಕಸಲೆ೦ಯಿ ಜಾಣಾ೦ ಜಾ೦ವ್ಚಿ೦ ಲಕ್ಷಣಾ೦ ಮ್ಹಾಕಾ ದಿಸುನ್ ಯೆನಾ೦ತ್ ಆನಿ ತಸಲೊ ಭರ್ವಸೊಯಿ ಮ್ಹಾಕಾ ನಾ. ಪುಣ್ ತು೦ವೆ೦ ಮ್ಹಜೆ ವಿಶಾ೦ತ್ ಸರ್ವ್ ಜಾಣಾ೦ ಜಾಯ್ಜೆ.’
‘ಕಿತ್ಯಾಕ್?’
‘ಕಾರಾಣಾ೦ ಮ್ಹಜೆಲಾಗಿ೦ ನಾ೦ತ್ ಪುಣ್ ಸಾ೦ಗ್ಚಿ ಆತುರಾಯ್ ಆಸಾ. ತು೦ ಆಯ್ಕೊ೦ಕ್ ತಯಾರ್ ಆಸಾಯ್?’
‘ಹೊ ಮಹತ್ವಾಚೊ ಅವಸ್ವರ್ ಮ್ಹಣ್ ತು೦ವೆ೦ ಮ್ಹಳ್ಯಾ ಉಪ್ರಾ೦ತ್ ಮ್ಹಾಕಾ ಹೆರ್ ವಾಟ್ ಆಸ್ಚೆಪರಿ೦ ದಿಸನಾ.’
‘ತುಕಾ ಹೆರ್ ವಾಟ್ ನಾ, ವಿ೦ಚವ್ಣ್‌ಯಿ ನಾ!’ ತಾಣೆ ಖಚಿತಾಯೆನ್ ಮ್ಹಳೆ೦.
ಆನಿ ಆಪ್ಲಿ ತವಳ್ ಪರ್ಯಾ೦ತ್ಲಿ ಜಿಣಿ ತಾಣೆ ರಿಚರ್ಡಾ ಸಾಮ್ಕಾರ್ ಉಗ್ತಿ ಕೆಲಿ ಫಕತ್ – ವಿಲ್ಲಿಚೆ೦ ಎಕ್ ಪ್ರಕರಣ್ ಸೊಡ್ನ್.
‘ಆನಿ ಹೆ೦ಚ್ ಜಾವ್ನಾಸಾ, ಲಿಲಿಯನ್ ಜೆನಿಸಾಚೆ೦ ಧುವ್, ಹೆಲೀನಾ ಜೆನಿಸ್!’ ಆಪ್ಣಾಚೆರ್‌ಚ್ ಹಾತ್ ಭ೦ವ್ಡಾವ್ನ್ ತಾಣೆ೦ ಮ್ಹಳೆ೦. ‘ಆನಿ ಆತಾ೦….’ದೆಗೆಚೊ ಎಕ್ ತೆಲ್ತೊ ಫಾತರ್ ವಿ೦ಚುನ್ ತಾಣೆ ತಳ್ಯಾ೦ತ್ ಉಡಯ್ಲೊ. ‘ರೊಸಾಳ್ ಪ್ರಕರಣ್ ಹಾ೦ವೆ೦ ನಿಮಾಣೆ೦ ದವರ್ಲಾ೦!.’
ತವಳ್, ರಿಚರ್ಡಾಚ್ಯಾ ಮುಕಮಳಾರ್ ಕಸಲಿಚ್ ಬದ್ಲವಣ್ ಜಾಲಿ ನಾ ಆನಿ ವಿಲ್ಲಿಚೆ೦ ಪ್ರಕರಣ್ ಆಯ್ಕಾಲ್ಯಾ ಉಪ್ರಾ೦ತ್‌ಯಿ ಕಸಲಿಚ್ ಬದ್ಲವಣ್ ಜಾಲಿ ನಾ.
‘ಆಜ್ ಹಾ೦ವೆ೦ ಟು ಪೀಸ್ ಬಿಕಿನಿ ಘಾಲು೦ಕ್ ನಾ!’ ತೆ೦ ಕಿ೦ದ್ರಿ ತಾಳ್ಯಾನ್ ಮ್ಹಣಾಲೆ೦. ‘ತ್ಯಾ ವಿಲ್ಲಿಚ್ಯಾ ದೊಳ್ಯಾ೦ಕ್ ದಿಸ್‌ಲ್ಲೆ೦ ತುಕಾಯಿ ದಿಸ್ತಾ ಯಾ ನಾ? ನಾ ತರ್ ಹಾ೦ವ್ ವಿವಸ್ತ್ರ್ ಜಾ೦ವ್?’ ತಾಣೆ ಆಪ್ಲ್ಯಾ ಖಾ೦ದಾ೦ ವಯ್ಲೆ ನಾಡೆ ಸುಟಯ್ಲೆ ಆನಿ ಉಬೆ೦ ಜಾಲೆ೦. ತಾಚೆ೦ ಪಾತಳ್ ಆ೦ಗ್ಲೆ೦ ಎಕ್ ಮೋವ್ ಮುದೊ ಜಾವ್ನ್ ತಾಚ್ಯಾ ಪಾ೦ಯಾ೦ ಮುಳಾ೦ತ್ ಪಡ್ಲೆ೦. ಕಾಳ್ಯಾ ವರ್ಣಾಚ್ಯಾ ಬ್ರಾ ಆನಿ ಪ್ಯಾ೦ಟಿಚೆರ್ ತೆ೦ ಉಬೆ೦ ಆಸ್‌ಲ್ಲೆ೦.
‘ಆತಾ೦ ತುಕಾ ಎಕ್ ಸ್ತ್ರೀ ದಿಸ್ತಾ ಯಾ ಚಲಿ?’ ತಾಣೆ ರಿಚರ್ಡಾ ಸಾಮ್ಕಾರ್ ದಿ೦ಬಿ ಘಾಲಿ. ‘ಯಾ ತುಕಾ ಉದ್ರಿಕ್ತ್ ಕರು೦ಕ್ ರಮೋನಾ ತಸಲಿ ನಾಗಿಣ್ ಜಾಯ್, ಯಾ ಕಾಮುಕತೆನ್ ತೊವಲ್ಲೆ೦ ಈವಾ ಜಾಯ್?’
ರಿಚರ್ಡಾಚಿ ದೀಷ್ಟ್ ಹೆಲೀನಾಚೆರ್ ಚರ್ಲಿ.
ತೆ೦ ಕಿ೦ದ್ರೊನ್೦ಚ್ ಗೆಲೆ೦.
‘ಹಾ೦ವೆ೦ಯಿ ವಿಚಾರ‍್ಯೆತ್ ಮಿಸ್ಟರ್ ರಿಚರ್ಡ್ ಕ್ಲೆಮೆ೦ಟ್, ಉಬೊ ರಾವೊನ್ ಆಪ್ಣಾಯಿತ್ಲ್ಯಾಕ್ ಸುಸು ಕರು೦ಕ್ ಶಿಕ್ಚೊ ಭುರ‍್ಗೊ ತು೦ ಯಾ ಪರಿಪಿಕಾಯೆಕ್ ಪಾವ್‌ಲ್ಲೊ ದಾದ್ಲೊ? ವಿಸ್ರಾಲೊಯ್? ಟೆರೆಸ್, ಮ್ಹಜೆ೦ ಬೆಡ್‌ರೂಮ್…ಹೆರ್ ಕಿತ್ಲೆ ಅವ್ಕಾಸ್ ತುಕಾ ಜಾಯ್?’ ಝೊ೦ಪಯ್ ಮಾರುನ್ ತಾಣೆ ರಿಚರ್ಡಾಚೊ ಹಾತ್ ಆಪ್ಲ್ಯಾ ಹಾತಾ೦ತ್ ಘೆತ್ಲೊ ಆನಿ ಆಪ್ಲ್ಯಾ ಉಜ್ವ್ಯಾ ಸ್ಥನಾಚೆರ್ ದವರ್ಲೊ.
ರಿಚರ್ಡಾಚೆ ದೊಳೆ ಹೆಲೀನಾಚ್ಯಾ ದೊಳ್ಯಾ೦ಕ್ ಖಿಳಾಲೆ. ತಾಣೆ ಹೆಲೀನಾಚ್ಯಾ ಉಜ್ವ್ಯಾ ಸ್ಥನಾವಯ್ಲೊ ಆಪ್ಲೊ ಹಾತ್ ನಿಸ್ರಾಯ್ಲೊ ಆನಿ ತಾಚ್ಯಾ ಖಾ೦ದಾರ್ ದವರ್ಲೊ. ದಿ೦ಬಿಯೆರ್ ಆಸ್‌ಲ್ಲ್ಯಾ ತಾಚಾ ಕುಶಿನ್ ತೊ ಭಾಗ್ವಾಲೊ ಆನಿ ತಾಚ್ಯಾ ಪೊಲ್ಯಾ೦ಚೊ ಆನಿ ಕಪಾಲಾಚೊ ಕ್ರಮಾನ್ ತಾಣೆ ಉಮೊ ಘೆತ್ಲೊ.
ಉಪ್ರಾ೦ತ್ ಜೀಪಾಚೆರ್ ಚಡೊನ್ ತೊ ಬಸ್ಲೊ.
( 33 – ವ್ಯಾ ಅವಸ್ವರಾ೦ತ್ ಮು೦ದರ್ತಾ)
