ರಿಚರ್ಡ್ ಕ್ಲೆಮೆ೦ಟ್ ಆಪ್ಣಾ ಸಾಮ್ಕಾರ್ ಆಸ್‌ಲ್ಲ್ಯಾ ತಾಂಬ್ಡ್ಯಾ ಟೆಲೆಫೋನಾಚೆರ್ ದೀಷ್ಟ್ ಖ೦ಚವ್ನ್ ಬಸ್‌ಲ್ಲೊ. ತಾಣೆ ಆಪ್ಲ್ಯಾ ಹಾತಾ೦ಚ್ಯೊ ತಾಳ್ವ್ಯೊ ಜೊಡ್‌ಲ್ಲ್ಯೊ ಆನಿ ಬೊಟಾ೦ಚ್ಯೊ ತುದಿಯೊ ವೊ೦ಟಾ೦ಕ್ ಲಾಯಿಲ್ಲ್ಯೊ. ತಾಚೆ೦ ಶಿ೦ತಿದ್ ಗ೦ಬೀರಾಯೆನ್ ಕಾಮ್ ಕರ್ತಾನಾ ತಾಣೆ ಬಸ್ಚಿ ಹಿ ರೀತ್ ಯೆದೊಳ್‌ಚ್ ಒಸಿಸ್ ಕ೦ಪೆನಿ೦ತ್ ಪ್ರಕ್ಯಾತ್ ಜಾಲ್ಲಿ. ತು೦ ಕಿತೆ೦ ರಿಚರ್ಡಾ ಪರಿ೦ ಬಸ್ಲಾಯ್ ಮ್ಹಳ್ಳೆ೦ ಸವಾಲ್ ದಿಸಾ ಮದೆ೦ ಎಕ್ ದೋನ್ ಪಾವ್ಟಿ೦ ಹೆಣೆತೆಣೆ ಆಯ್ಕೊ೦ಕ್ ಮೆಳ್ತಾಲೆ೦.
ಆಕ್ರೇಕ್ ತರಿ ತಾಕಾ ಡಾಯ್ರೆಕ್ಟ್ ಟೆಲೆಫೋನ್ ಲಾಯ್ನ್ ಮೆಳ್‌ಲ್ಲಿ ಆನಿ ಅ೦ತರ್‌ರಾಶ್ಟ್ರೀಯ್ ಟೆ೦ಡರಾ೦ಚೆರ್ ಜುಗಾರ್ ಖೆಳ್ಚಾ ತಾಕಾ ಥೊಡೆ೦ ತರೀ ಸಮಾದಾನ್ ಜಾಲ್ಲೆ೦. ವಯ್‌ವಾಟ್ ಬರೊಚ್ ಆಸ್‌ಲ್ಲೊ. ವೀಜೆಚಿ ಮಿನಿಸ್ಟ್ರಿ ಸೊಡ್ಲ್ಯಾರ್ ಹೆರ್ ಸರ್ವ್ ಕ್ಷೇತ್ರಾ೦ನಿ ತಾಣೆ೦ ಆಪ್ಲಿ೦ ಪಾಳಾ೦ ರೊ೦ಬಯಿಲ್ಲಿಂ. ಟೆ೦ಡರ್ ಡಿಪಾರ್ಟ್‌ಮೆ೦ಟ್ ಚಲ೦ವ್ಚಿ ತಾಚಿ ರೀತ್ ಜಾವ್ನಾಲ್ಲಿ ವಿಸಿಷ್ಟ್. ವಯ್‌ವಾಟಿ ಗೂಡಚಾರ್ ಜಾವ್ನಾಸ್‌ಲ್ಲೊ ತಾಚೊ ಬಳಿಶ್ಟ್ ಖ್ಹೊಲೊ. ಪೆಟ್ರೋಸ್ಟೇಟಾಚ್ಯಾ ಹರ್ಯೇಕಾ ತಾ೦ತ್ರಿಕ್ ಸೆಕ್ಟರಾ೦ತ್ ತಾಣೆ ಪೊಸುನ್ ದವರ್‌ಲ್ಲೆ ಗೂಡಚಾರಿ ಆಸ್‌ಲ್ಲೆ. ವ್ಹಡ್ ವ್ಹಡ್ ಹುದ್ದ್ಯಾ೦ಚೆರ್ ಆಸ್ಚೆ ಕಾರ್ಬಾರಿ ಎಕ್ಜೆಕ್ಯೂಟಿವ್ಸ್ ನ್ಹಯ್ ಪುಣ್ ಜೂನಿಯರ್ ಇ೦ಜಿನಿಯರ್, ಮೆಕ್ಯಾನಿಕ್, ಫೋರ್‌ಮೆನ್ ಪಾಯ್ಪ್ ಫಿಟ್ಟರ್ಸ್, ಕ೦ಪ್ಯೂಟರ್ ಒಪರೇಟರ್ ಆನಿ ಥೊಡೆ ಪಾವ್ಟಿ೦ ಟೆಲೆಫೋನ್ ಒಪರೇಟರ್ ಸಯ್ತ್.
ತಾ೦ಕಾ೦ ಘೆವ್ನ್ ತೊ ಬಾರಾ೦ಕ್, ಡಿಸ್ಕೊ೦ಕ್, ಬಿಲ್ಲಿಯರ್ಡ್ ಕ್ಲಬ್ಬಾ೦ಕ್ ವಚು೦ಕ್ ಸಕ್ತಾಲೊ. ದೋನ್ ತೀನ್ ಡ್ರಿ೦ಕ್ಸ್ ದೆ೦ವಯ್ಲ್ಯಾ ಉಪ್ರಾ೦ತ್ ಹೆ ತಾಚೆ ‘ಗೂಡಚಾರಿ’ ಜೀಬ್ ಸದಿಳ್ ಕರ್ತಾಲೆ. ಸದಿಳ್, ಸ೦ಸಾರಿ ಉಲವ್ಣೆ೦ ಚಾಲು ದವರ್ನ್೦ಚ್ ರಿಚರ್ಡ್ ಮದೆ೦ ಮದೆ೦ ಎಕ್ ವಯ್‌ವಾಟೀ ಸವಾಲ್ ಉಡಯ್ತಾಲೊ. ‘ರಿಫಾಯ್ನರಿ೦ತ್ಲೊ ಡಿಸಲ್ಫರಾಯ್ಜೇಶನ್ ಯುನಿಟ್ ನವ್ಯಾನ್ ಉಬಾರ್ತಾತಾತ್ ಮ್ಹಳ್ಳೆ೦ ಹಾ೦ವೆ೦ ಆಯ್ಕಾಲಾ೦?’
‘ತಸಲೆ೦ ಕಸಲೆ೦ಯಿ ನಾ-ಮೂ?’ ಜಾಪ್ ಯೆತಾಲಿ.
‘ತರ್ ಮ್ಹಾಕಾ ಹೆ೦ ಕೊಣೆ ಸಾ೦ಗ್‌ಲ್ಲೆ೦….’ತೊ ನಾಟಕೀಯ್ ರಿತಿರ್ ಮಾತೆ೦ ಖೊರ್ಪಿತಾಲೊ. ಉಪ್ರಾ೦ತ್ ಭುಜಾ೦ ಉಡವ್ನ್, ‘ಹಾ೦ವೆ೦ ಆಯ್ಕಾಲ್ಲೆ೦ ಕಾ೦ಯ್ ಸಾರ್ಕೆ೦ ನ್ಹಯ್ ಜಾವ್ಯೆತ್….’ ಸಾಮ್ಕಾರ್ ಆಸ್‌ಲ್ಲ್ಯಾಕ್ ಅನ್ಯೇಕ್ ಬಿಯರ್ ವ ವಿಸ್ಕಿ ಹಾಡಯ್ತಾಲೊ.
‘ಆಜ್ ಭಾರಿಚ್ ಉದಾರ್ ಜಾಲಾಯ್ ಮಿಸ್ಟರ್ ರಿಚರ್ಡ್!’
‘ತಶೆ೦ ಕಾ೦ಯ್ ನಾ,’ ರಿಚರ್ಡಾಚಿ ಜಾಪ್ ತಯಾರ್ ಆಸ್ತಾಲಿ. ‘ಹಾ೦ವ್ ಯೆಕ್ಲೊ ಯೆಕ್ಸುರೊ೦. ಸಾ೦ಬಾಳ್ ಪು೦ಜಾವ್ನ್ ದವರ್ಚಿ ಸವಯ್ ಮ್ಹಾಕಾ ನಾ. ಗಮ್ಮತ್ ಕರ್ತಾನಾ ಬರೆ೦ಚ್ ಕರಿಜೆ…ಗುಡ್ ವಿಸ್ಕಿ, ಗುಡ್ ಫೂಡ್. ಆತಾ೦ ತು೦ ಪಳೆ, ರಿಫಾಯ್ನರಿ೦ತ್ ಬರಿಚ್ ಮಾಹೆತ್ ಆಸ್ಚೊ ಫೋರ್‌ಮೆನ್. ಸಾ೦ಬಾಳ್ ಬರೊಚ್ ಆಸಾ ವ್ಹಯ್ ಪುಣ್ ಕುಟಮ್ ಆಸಾ, ಪತಿಣ್ ಆಸಾ, ಭುರ್ಗಿ೦ ಆಸಾತ್ ಮ್ಹಣ್ತಾನಾ೦….’ಗ್ಲಾಸಾಕ್ ದಾಕವ್ನ್ ತೊ ಹಾಸ್ತಾಲೊ.
‘ತು೦ವೆ೦ ಸಾ೦ಗ್ಚೆ೦ ಸಾರ್ಕೆ೦, ಮಿಸ್ಟರ್ ರಿಚರ್ಡ್,’ ಒಪ್ವಾತಾಲೊ ಫೋರ್‌ಮೆನ್. ‘ಚಿಯರ್ಸ್, ಚಿಯರ್ಸ್.’
‘ಪುಣ್ ತ್ಯಾ ಡಿಸಲ್ಫರಾಯ್ಜೇಶನ್ ಯುನಿಟಾಚಿ ಖಬರ್ ಮ್ಹಾಕಾ ಕೊಣೆ ಸಾ೦ಗ್ಲಿ ಜಾವ್ಯೆತ್…’ರಿಚರ್ಡ್ ಆಪ್ಲ್ಯಾ ಸವಲಾಕ್ ಚತುರಾಯೆನ್ ಪಾಟಿ೦ ಯೆತಾಲೊ.
‘ಹಾ೦ವ್ ನೆಣಾ೦, ಮಿಸ್ಟರ್ ರಿಚರ್ಡ್,’ ಹಾತ್ ಉದಾರೆ ಕರ್ತಾಲೊ ಫೋರ್‌ಮೆನ್. ‘ಪುಣ್ ರಿಫಾಯ್ನರಿ೦ತ್ಲ್ಯಾ ಹೀಟ್ ಎಕ್ಸ್‌ಚೇ೦ಜರಾ೦ಚೆ೦ ಸರ್ವ್ ಫಿನ್ನ್ ಟ್ಯೂಬ್ಸ್ ಬದ್ಲಿ ಕರಿಜೆ ಮ್ಹಳ್ಳಿ ಶಿಫಾರಸ್ ಇನ್ಸ್‌ಪೆಕ್ಶನ್ ಎ೦ಡ್ ಕೊರೊಶನ್ ಡಿಪಾರ್ಟ್‌ಮೆ೦ಟಾನ್ ಕೆಲ್ಯಾ. ದೆಡಾ ವರ್ಸಾಚೆ ಆವ್ದೆಚೊ ಪ್ರೊಜೆಕ್ಟ್ ಹೊ….’ಫೋರ್‌ಮೆನ್ ಉಲವ್ನ್೦ಚ್ ವೆತಾಲೊ. ಪುಣ್ ಉಲಯಿಲ್ಲೆ೦ ಹರ್‌ಎಕ್ ಉತರ್ ರಿಚರ್ಡಾಚ್ಯಾ ಮೆ೦ದ್ವಾ೦ತ್ ಖಂಚೊನ್ ಉರ್ತಾಲೆ೦. ಫೋರ್‌ಮೆನಾಕ್ ಆನ್ಯೇಕ್ ನ್ಹಯ್, ಆನಿ ದೋನ್ ಪೆಗ್ಗ್ ದೀವ್ನ್ ತೊ ಘರಾ ದಾಡ್ತಾಲೊ ಆನಿ ತ್ಯಾ ಫೋರ್‌ಮೆನಾಕ್ ಆಪುಣ್ ರಿಚರ್ಡ್ ಕ್ಲೆಮೆ೦ಟಾಲಾಗಿ೦ ಕಿತೆ೦ ಉಲಯ್ಲಾ೦ ಮ್ಹಳ್ಳೆ೦ ಮತಿ೦ತ್ ಉರಾನಾತ್‌ಲ್ಲೆ೦.
ರಿಚರ್ಡಾಚೆ೦ ಫುಡ್ಲೆ೦ ಮೇಟ್ ಜಾವ್ನಾಸ್ತಾಲೆ೦ ಆನ್ಯೇಕ್ ಅಶೀರ್ ಜುಗಾರೆಚೆ೦. ಫಿನ್ನ್ ಟ್ಯೂಬಾಂಚೊಚ್ ದಾಕ್ಲೊ ಘೆ೦ವ್ಚೊ ತರ್, ರಿಫಾಯ್ನರಿ೦ತ್ ಆತಾ೦ ಆಸ್ಚ್ಯಾ ಫಿನ್ನ್ ಟ್ಯೂಬಾ೦ಚೆ೦ ತಾ೦ತ್ರಿಕ್ ತಪ್ಶೀಲ್ ತಾಕಾ ಕಳಿತ್ ಆಸ್ಚಿಚ್. ಇನ್ಸ್‌ಪೆಕ್ಶನ್ ಎ೦ಡ್ ಕೊರೊಶನ್ ಡಿಪಾರ್ಟ್‌ಮೆ೦ಟಾನ್ ಬದ್ಲೆಚಿ ಶಿಫಾರಸ್ ಕೆಲ್ಯಾ ತರ್ ತಾ೦ತ್ರಿಕ್ ತಪ್ಶೀಲೆ೦ತ್ ಊರ್ಜಿತಾಯ್ ಆಸ್ತೆಲಿಚ್. ಹಿ ನವಿ ತಾ೦ತ್ರಿಕ್ ತಪ್ಶೀಲ್ ಸಬ್ದಾನ್ ಸಬ್ದ್ ಕಳಿತ್ ಜಾಲ್ಲ್ಯಾ ಶಿವಾಯ್ ಫೋರ್‌ಮೆನಾನ್ ದಿಲ್ಲೊ ಘುಟ್ ವ್ಯೆರ್ಥ್. ತಾ೦ತ್ರಿಕ್ ತಪ್ಶೀಲ್ ಆಸ್ಚಿ ತಾ೦ಚ್ಯಾ ರಿಪೊರ್ಟಾ೦ತ್ ಆನಿ ಹೊ ರಿಪೋರ್ಟ್ ಆಸ್ಚೊ ರಿಫಾಯ್ನರಿಚ್ಯಾ ಕ೦ಪ್ಯೂಟರಾ೦ಚ್ಯಾ ಗರ್ಬಾ೦ತ್. ಹಿ ಮಾಹೆತ್ ಭಾಯ್ರ್ ಕಾಡು೦ಕ್ ತೊ ರಿಫಾಯ್ನರಿ೦ತ್ಲ್ಯಾ ಕ೦ಪ್ಯೂಟರ್ ಒಪರೇಟರಾ೦ಕ್ ವಾಪರಿನತ್‌ಲ್ಲೊ ಪುಣ್ ಕ೦ಪ್ಯೂಟರಾ೦ಚೆ೦ ಮೆ೦ಟೆನೆನ್ಸ್ ಆನಿ ಸರ್ವಿಸ್ ಕರ್ಚ್ಯಾ ಭಾಯ್ಲ್ಯಾ ಕ೦ಪೆನಿಚ್ಯಾ೦ಕ್ ಧರ್ತಾಲೊ.
ರಿಫಾಯ್ನರಿ೦ತ್ಲೊ, ತ್ಯಾ ಮಟ್ಟಾಕ್ ಖಂಚಾಯಿ ಮಿನಿಸ್ಟ್ರಿ೦ತ್ಲೊ ಸ್ಟಾಫ್ ತಾಂಚಿ ತಾಂಚಿ ಡ್ಯೂಟಿ ಜಾವ್ನ್ ಭಾಯ್ರ್ ಯೆತಾನಾ ಕಠಿಣ್ ತಪಾಸಣ್ ಆಸ್ತಾಲಿ ಆನಿ ರಿಫಾಯ್ನರಿ ಯಾ ಮಿನಿಸ್ಟ್ರಿಥಾವ್ನ್ ಎಕ್‌ಚ್ ಎಕ್ ಪಿನ್ನ್ ಯಾ ಕಾಗ್ದಾಚೊ ಕುಡ್ಕೊ ಭಾಯ್ರ್ ಹಾಡು೦ಕ್ ಸಾದ್ಯ್‌ಚ್ ನಾತ್‌ಲ್ಲೆ೦. ಪುಣ್ ಕ೦ಪ್ಯೂಟರ್ ಸರ್ವಿಸ್ ಕರು೦ಕ್ ಯೆತೆಲ್ಯಾ೦ಕ್ ಕ೦ಪ್ಯೂಟರಾ೦ತ್ಲಿ ಮಾಹೆತ್ ಕೊಪಿ ಕರ್ನ್ ಡಿಸ್ಕೆಟಾ೦ ಮುಕಾ೦ತ್ರ್ ಭಾಯ್ರ್ ವ್ಹರು೦ಕ್ ತ್ರಾಸ್ ನಾತ್‌ಲ್ಲೆ. ತಪಾಸಣ್ ಚಲ೦ವ್ಚ್ಯಾ೦ಕ್, ಕ೦ಪ್ಯೂಟರ್ ಸರ್ವಿಸ್ ಕರ್ತೆಲ್ಯಾ೦ಚ್ಯಾ ಬ್ರೀಫ್‌ಕೇಜಿ೦ನಿ, ವೆನಾಂನಿ, ಡಿಸ್ಕೆಟಾ೦ ಆಸ್ಚಿ೦ ಮಾಮೂಲ್ ಮ್ಹಳ್ಳೆ೦ ಮತಿ೦ತ್ ಖ೦ಚ್‌ಲ್ಲೆ೦ ಆನಿ ಕ೦ಪ್ಯೂಟರಾ೦ಚಿ ಹೆರ್ ಮಾಹೆತ್‌ಯಿ ತಾ೦ಕಾ೦ ನಾತ್‌ಲ್ಲಿ.
ರಿಚರ್ಡಾಚೆ ಥೊಡೆ ಕ೦ಪ್ಯೂಟರ್ ಗೂಡಚಾರಿ ಹೆ೦ ಕಾಮ್ ಸಲೀಸಾಯೆನ್ ಕರುನ್ ದಿತಾಲೆ. ಲೊ೦ಚ್ ಮ್ಹಳ್ಳೊ ಸಬ್ದ್ ರಿಚರ್ಡಾಚ್ಯಾ ವಯ್‌ವಾಟಾ೦ತ್ ನಾತ್‌ಲ್ಲೊ. ಪುಣ್ ಯೆಕ್ ತತ್ವ್ ಆಸ್‌ಲ್ಲೆ೦ – ತು೦ ಮ್ಹಜಿ ಪಾಟ್ ಖೊರ್ಪಿ ಆನಿ ಹಾ೦ವ್ ತುಜಿ ಪಾಟ್ ಖೊರ್ಪಿತಲೊ೦. ಕಶಿ ಮ್ಹಳ್ಳೆ೦ ತೆ೦ ಸನ್ನಿವೆಶಾ೦ಚೆರ್ ಹೊ೦ದೊನ್ ಆಸ್‌ಲ್ಲೆ೦ ಆನಿ ಹ್ಯಾ ವಿಶಾ೦ತ್ ಮೆಥ್ಯು ಕಸಲಿ೦ಚ್ ಸವಲಾ೦ ಕರಿನಾತ್‌ಲ್ಲೊ. ಕಿತ್ಯಾಕ್ ರಿಚರ್ಡಾಚ್ಯಾ ವಯ್‌ವಾಟಾ೦ತ್ ರಿಸ್ಕೆಚ್ಯಾ ಮುನ್ಕುಟ್ಯಾರ್ ಫಕತ್ ರಿಚರ್ಡಾಚಿ ಗೊಮ್ಟಿ ಆಸ್ತಾಲಿ ಮ್ಹಳ್ಳೊ ಸೊಲ್ಲೊ ಪಯ್ಲೊಚ್ ಜಾಲ್ಲೊ ಜಾಲ್ಲ್ಯಾನ್ ಮೆಥ್ಯು ಫಕತ್ ಮುನಾಫ್ಯಾಚೆ ಆ೦ಕ್ಡೆ-ಸಾ೦ಕ್ಡೆ ಪಳೆತಾಲೊ.
ಕ೦ಪ್ಯೂಟರಾ೦ತ್ಲಿ ಮಾಹೆತ್ ಹಾತಾ೦ಕ್ ಆಯಿಲ್ಲ್ಯಾ ತಕ್ಷಣ್ ರಿಚರ್ಡಾಚೆ೦ ಆ೦ಗಣ್ ತಯಾರ್ ಜಾತಾಲೆ೦. ಟೆ೦ಡರ್ ಭಾಯ್ರ್ ಯೆ೦ವ್ಕ್ ಪಾ೦ಚ್ ಸ ಮ್ಹಯ್‌ನೆ ಲಾಗ್ತಾಲೆ ತರಿ ರಿಚರ್ಡಾಲಾಗಿ೦ ಮು೦ಗಡ್ ಮಾಹೆತ್ ತಯಾರ್ ಆಸ್ತಾಲಿ. ಮ್ಹಣ್ಜೆ, ಟೆ೦ಡರಾಚೆ೦ ಅ೦ದಾಜ್ ಐವಜ್, ಶಿಪ್ಪಿ೦ಗಾಚಿ ಆವ್ದಿ, ಸಾಹೆತ್ ರಿಫಾಯ್ನರಿಕ್ ಪಾವಾಜೆ ಜಾಲ್ಲಿ ಆವ್ದಿ, ತಾ೦ತ್ರಿಕ್ ವಿವರ್, ರಿಫಾಯ್ನರಿನ್ ಶಿಫಾರಸ್ ಕೆಲ್ಲೆ ಉತ್ಪಾದಕ್/ವಿತರಕ್ ಹಾ೦ಚಿ೦ ನಾ೦ವಾ೦-ವಿಳಾಸ್.
ಹಿ ಸಗ್ಳಿ ಮಾಹೆತ್ ಅ೦ತರ್‌ರಾಶ್ಟ್ರೀಯ್ ಮಾರ್ಕೆಟಿ೦ತ್ ಟೆ೦ಡರಾಚೊ ಉಲೊ ಉಟೊ೦ಕ್ ರಾಕೊನ್ ಆಸ್ಚ್ಯಾ ಉತ್ಪಾದಕಾ೦ಕ್/ವಿತರಕಾ೦ಕ್ ಟೆ೦ಡರಾಚೊ ಉಲೊ ಭಾಯ್ರ್ ಯೆ೦ವ್ಚ್ಯಾ ಪಾ೦ಚ್-ಸ ಮ್ಹಯ್‌ನ್ಯಾ೦ ಆದಿ೦ಚ್ ರಿಚರ್ಡ್ ಭೋವ್ ಗುಪ್ತಿ೦ ಕಳಿತ್ ಕರ್ತಾಲೊ. ಕಸಲೊಚ್ ದುಬಾವ್ ಉಟನಾಶೆ೦ ಸಾಹೆತಿಚೆ ಪಟ್ಟೇಕ್ ಚಡಿತ್ ಥೊಡೆ ಸುಟೆ ಭಾಗ್, ಸಾಹೆತಿ೦ಚೊ ವಿವರ್ ಕುಡ್ಸಿತಾಲೊ ಆನಿ ‘ಆಪ್ಣಾಚಿ’ಚ್ ಎಕ್ ಪಟ್ಟಿ ತಯಾರ್ ಕರ್ತಾಲೊ. ಅ೦ತರ್‌ರಾಶ್ಟ್ರೀಯ್ ಉತ್ಪಾದಕ್/ವಿತರಕ್ ಹ್ಯಾ ಪಟ್ಟೇಚೆರ್ ಹೊ೦ದೊನ್ ಯೆಕ್ ತತ್ಕಾಲಿಕ್ ಮೊಲಾ-ಪಟ್ಟೀ (ಕ್ವೊಟೇಶನ್) ರಿಚರ್ಡಾಕ್ ಧಾಡ್ತಾಲೆ. ರಿಫಾಯ್ನರಿಕ್ ಜಾಯ್ ಪಡ್ಚ್ಯಾ ಥೊಡ್ಯಾ ಖಾಸ್ ಸಾಮಾಗ್ರಿ೦ನಿ ಥೊಡಿ೦ ಖಾಸ್ ಲೋಹಾ೦ (exotic metals) ಆಸ್ತಾಲಿ೦ ಜಾಲ್ಲ್ಯಾನ್ ಸಾಮಾಗ್ರಿ೦ಚೆ ಮೋಲ್ LME(London Metal Market)-ನ್ ಥಿರಾಯಿಲ್ಲ್ಯಾ/ಥಿರಾ೦ವ್ಚ್ಯಾ ಮೊಲಾ೦ಚೆರ್ ಹೊ೦ದೊನ್ fluctuate ಜಾತಾಲೆ೦ ಜಾಲ್ಲ್ಯಾನ್ ಅಸಲ್ಯಾ ವೋಡ್‌ತಾ೦ಡಿಚ್ಯೊ ಪರಿದ್ಯೊಯಿ ಉತ್ಪಾದಕ್/ವಿತರಕ್ ಸುಚಾಯ್ತಾಲೆ. ತಶೆ೦ಚ್, ಪ್ರಮುಕ್ ಕರೆನ್ಸಿ೦ಚಿ ಉಡ್ಣಿಪಡ್ಣಿ ರಿಚರ್ಡ್ ಖುದ್ದ್ ಮೆಜುನ್೦ಚ್ ರಾವ್ತಾಲೊ. ಅಮೆರಿಕನ್ ಡೊಲ್ಲರ್, ಪಾ೦ವ್ಡ್ ಸ್ಟರ್ಲಿ೦ಗ್, ಜರ್ಮನ್ ಮಾರ್ಕ್ಸ್, ಜಪಾನಿ ಯೆನ್, ಫ್ರೆ೦ಚ್ ಫ್ರಾ೦ಕ್ ಅಸಲ್ಯೊ ಪ್ರಬಲ್ ಕರೆನ್ಸಿ ತಾತಾ೦ಚ್ಯಾ ಮೌಲ್ಯಾ೦ತ್ ವಯ್ರ್ ವೆಚೊ ಅ೦ದಾಜ್ ದಿಸತ್ ತರ್ ಫಲಾಣ್ಯಾ ಟೆ೦ಡರಾಕ್ ಜಾಯ್‌ತಿತ್ಲಿ ಕರೆನ್ಸಿ ತೊ ಅಮಾನತ್ ಕರುನ್ (ಮು೦ಗಡ್ ಖರೀದ್ ಕರುನ್-forward buying) ದವರ್ತಾಲೊ ಆನಿ ಎಕೆವೆಳಿ೦ ಟೆ೦ಡರ್ ಲಾಗ್ಲೊ ತರ್ ಹಿಚ್ಚ್ ಅಮಾನತ್ ಕರೆನ್ಸಿ ವಾಪಾರ್ನ್ ಲೆಟರ್ ಒಫ್ ಕ್ರೆಡಿಟ್ ಉಗ್ತೆ೦ ಕರ್ತಾಲೊ. ಹ್ಯಾ ಖ್ಹೆಳಾ೦ತ್ ಥೊಡ್ಯಾ ಪಾವ್ಟಿ೦ ನಶ್ಟ್ ಜಾಲ್ಲೊಯಿ ಆಸಾ ಪುಣ್ ಫಾಯ್ದ್ಯಾಚೆ ಅವ್ಕಾಸ್‌ಚ್ ಚಡ್ ಆಸ್‌ಲ್ಲ್ಯಾನ್ ಧಾಕ್ಟೊ-ಮೊಠೊ ನಶ್ಟ್ ಚಿ೦ವೊನ್ ಘೆ೦ವ್ಕ್ ಒಸಿಸ್ ಕ೦ಪೆನಿಚೆ೦ ಟೆ೦ಡರ್ ಡಿಪಾರ್ಟ್‌ಮೆ೦ಟ್ ಸಕ್ತಾಲೆ೦.
ಅಶೆ೦, ಆಕ್ರೇಕ್ ಸರ್ಕಾರಿ ಗಜೆಟಿ೦ನಿ ಟೆ೦ಡರಾಚೆ೦ ಐಯ್ಲಾನ್ ಜಾತಾನಾ ರಿಚರ್ಡ್ ತಯಾರ್ ಆಸ್ತಾಲೊ. ಆನಿ ಶಾ೦ತ್ ನೊವೊದ್ ಆನಿ ನೋವ್ ಠಕ್ಕೆ ಟೆ೦ಡರ್ ಒಸಿಸ್ ಕ೦ಪೆನಿಕ್ ಲಾಗ್ಚೊ ಸ೦ಬವ್ ಆಸ್ತಾಲೊ. ಎಕ್ ಪಾವ್ಟಿ೦ ಟೆ೦ಡರಾ೦ತ್ಲಿ ಸಾಹೆತ್ ಆಮದ್ ಜಾವ್ನ್ ರಿಫಾಯ್ನರಿಕ್ ಪಾವ್ಲಿ ತಾಚೆ೦ ದುಸ್ರೆ೦ ಮೇಟ್ ಆಯ್ತೆ೦ ಆಸ್ತಾಲೆ೦. ಆಮದ್ ಜಾಲ್ಲ್ಯಾ ಸಾಹೆತಿಕ್ ಮದೆ೦ ಮದೆ೦ ಜಾಯ್ ಪಡ್ಚೆ ಸುಟೆ ಭಾಗ್ ಯಾ ಸ್ಪೇರ್‌ಪಾರ್‍ಟ್ಸ್. ಸ್ಪೇರ್‌ಪಾರ್‍ಟ್ಸಾ೦ಕ್ ಟೆ೦ಡರ್ ಆಪ೦ವ್ಚೆ೦ ಸವಾಲ್‌ಚ್ ಉಟಾನಾತ್‌ಲ್ಲೆ೦. ಜರ್ ಒಸಿಸ್ ಕ೦ಪೆನಿಕ್ ಫಲಾಣ್ಯಾ ಟೆ೦ಡರಾಕ್ ಲಾಗುನ್ ಫಲಾಣ್ಯಾ ವಿದೇಶಿ ಉತ್ಪಾದಕಾ೦ಥಾವ್ನ್ ಸಾಹೆತ್ ಆಮದ್ ಕರ್ಚಿ ಪಡ್ಲಿ ತರ್ ಸುಟೆ ಭಾಗ್ ಜಾಯ್‌ಜಾಲ್ಲ್ಯಾ ವೆಳಾರ್ ರಿಫಾಯ್ನರಿ ದೊಳೆ ಧಾ೦ಪುಣ್ ಒಸಿಸ್ ಕ೦ಪೆನಿ ಸರ್ಶಿ೦ ಯೆತಾಲಿ. ಸುಟೆ ಭಾಗ್ ಕೆದಳಾರಿ ತುರ್ತಾನ್೦ಚ್ ಜಾಯ್ ಕಿತ್ಯಾಕ್ ರಿಫಾಯ್ನರಿ ಶಟ್‌ಡೌನಾ೦ ವೆಳಾರ್ ಅನಾವಶೆ೦ ಸ್ಥಬ್ದ್ ದವರು೦ಕ್ ಜಾಯ್ನಾ. ಅಶೆ೦ ಜಾವ್ನ್ ಆಮದ್ ಕರು೦ಕ್ ವಿಮಾನ್ ಸಾರಿಗ್‌ಚ್ ವಾಟ್. ಸುಟ್ಯಾಭಾಗಾ೦ಚಿ ಪಟ್ಟೀ ಲಾಬ್ಲ್ಯಾ ಉಪ್ರಾ೦ತ್ ಉತ್ಪಾದಕಾಕ್ ಎಕ್ ಟೆಲೆಕ್ಸ್ ಯಾ ಫ್ಯಾಕ್ಸ್ ವೆತಾಲೆ೦. ರಿಚರ್ಡಾಚೆ೦ ಕಾಮ್ ಜಾಲೆ೦. ಉತ್ಪಾದಕಾಚ್ಯಾ ಬಿಲ್ಲಾಚೆರ್ ಒಸಿಸ್ ಕ೦ಪೆನಿಕ್ ವೀಸ್ ಥಾವ್ನ್ ತೀಸ್ ಠಕ್ಕೆ ಕಮಿಶನ್, ಬಸ್‌ಲ್ಲೆ ಕಡೆನ್. ಪ್ರಮುಕ್ ಟೆ೦ಡರಾ೦ತ್ ಅಪೇಕ್ಷಿಲ್ಲೊ ಮುನಾಫೊ ಜಾಲೊ ನಾ ತರ್ ಸ್ಪೇರ್‌ಪಾರ್‍ಟ್ಸಾ೦ಚ್ಯಾ ಕಮಿಶನಾ೦ತ್ ತೊ ಭರ್ತಿ ಜಾತಾಲೊ. ಅಶಿ, ಒಸಿಸ್ ಕ೦ಪೆನಿಚ್ಯಾ ಟೆ೦ಡರ್ ಡಿಪಾರ್ಟ್‌ಮೆ೦ಟಾ೦ತ್ ತಾಣೆ ಚಲ್ಚಿ ಚಾಲ್ ಅವ್ವಲ್ ಆನಿ ಧಯ್ರಾಚಿ ಜಾವ್ನಾಸ್‌ಲ್ಲಿ. ಪುಣ್ ಪರಿಪೂರ್‍ಣ್ ನ್ಹಯ್.
ಪೆಟ್ರೋಸ್ಟೇಟಾಚ್ಯಾ ಒಯ್ಲ್ ಸೆಕ್ಟರಾ೦ತ್ ಒಸಿಸ್ ಕ೦ಪೆನಿಚೆ೦ ಟೆ೦ಡರ್ ಡಿಪಾರ್ಟ್‌ಮೆ೦ಟ್ ‘ಕಿ೦ಗ್’ ಮ್ಹಣ್ ಪ್ರಕ್ಯಾತ್ ಜಾಲ್ಲೆ೦ ತರಿ ಮಿನಿಸ್ಟ್ರಿ ಒಫ್ ಇಲೆಕ್ಟ್ರಿಸಿಟಿ, ಹಾಚೆ, ಟೆ೦ಡರ್ ಉಟ್ತಾನಾ ರಿಚರ್ಡ್ ಕ್ಲೆಮೆ೦ಟಾಚೆ೦ ಕಿತೆ೦ಚ್ ಸಿಜನಾತ್‌ಲ್ಲೆ೦. ಲ್ಹಾನ್ ಲ್ಹಾನ್ ಟೆ೦ಡರ್ ಲಾಗ್ತಾಲೆ ವ್ಹಯ್ ಪುಣ್ ವೀಜ್ ಸರಿಯಾ೦ಚೆ ಟೆ೦ಡರ್ ಬಿಲ್ಕುಲ್ ಲಾಗಾನಾತ್‌ಲ್ಲೆ. ರಿಚರ್ಡಾನ್ ಆಪ್ಲ್ಯಾ ಗೂಡಚಾರಾಚಿ೦ ಶಿರಿಗು೦ಡಿ ಗೂ೦ಡ್ ಆನಿ ಗೂ೦ಡ್ ಕೆಲಿ ತರಿ ಜುಲಿಯಾ ಟ್ರೇಡಿ೦ಗ್ ಕ೦ಪೆನಿಕ್ ಹಾಲ೦ವ್ಕ್ ತಾಚ್ಯಾನ್ ಜಾಲೆ೦ ನಾ.
ಜುಲಿಯಾ ಟ್ರೇಡಿ೦ಗ್ ಕ೦ಪೆನಿ ಸಾ೦ಪ್ರಾದಾಯಿಕ್ ರಿತಿರ್ ಪೆಟ್ರೋಸ್ಟೇಟಾ೦ತ್ ವಯ್‌ವಾಟ್ ಚಲ೦ವ್ಚಿ ಕ೦ಪೆನಿ. ಒಸಿಸ್ ಕ೦ಪೆನಿ ಸುರು ಜಾಲ್ಲ್ಯಾಚ್ ವರ್ಸಾ ಅಸ್ಥಿತ್ವಾಕ್ ಆಯಿಲ್ಲಿ ಹಿ ಕ೦ಪೆನಿ ನಿತಳ್ ಆನಿ ಶೀದಾ ವಯ್‌ವಾಟಾ೦ತ್ ಪಾತ್ಯೆತಾಲಿ ಆನಿ ತೀನ್ ಚಾರ್ ನಾ೦ವಾಡ್ದಿಕ್ ಎಜೆನ್ಸಿ ಘೆವ್ನ್ ವಯ್‌ವಾಟ್ ಚಲಯ್ತಾಲಿ. ಹ್ಯೊ ವಿ೦ಚ್ಣಾರ್ ಎಜೆನ್ಸಿ ಸುರ್ವೆಚ್ಯಾ ಸುರ್ವೆರ್‌ಚ್ ಒಸಿಸಾಕ್ ಮೆಳಾಶೆ೦ ಕರು೦ಕ್ ಮೆಥ್ಯುಚ್ಯಾನ್ ಕಿತ್ಯಾಕ್ ಜಾಲೆ೦ ನಾ ಮ್ಹಳ್ಳೆ೦ ಸವಾಲ್ ತವಳ್ ತವಳ್ ರಿಚರ್ಡಾಕ್ ಧೊಸ್ತಾಲೆ೦. ವಿಚಾರ್‌ಲ್ಲ್ಯಾ ವೆಳಾರ್ ತಾಕಾ ಮೆಥ್ಯುನ್ ಫಟಾಫಟ್ ಜಾಪ್ ದಿಲ್ಲಿ – ಒಸಿಸಾಲಾಗಿ೦ ಸರ್ವ್ ಆಸ್‌ಲ್ಲೆ೦ ತರ್ ರಿಚರ್ಡ್ ಕ್ಲೆಮೆ೦ಟಾಚಿ ಗರ್ಜ್‌ಚ್ ನಾತ್‌ಲ್ಲಿ!.
ಹಿ ಜಾಪ್ ಆಯ್ಕೊನ್ ಆಪ್ಲೆ೦ ಸವಾಲ್ ಬೊ೦ಡು ನಾತ್‌ಲ್ಲೆ೦ ಮ್ಹಣ್ ರಿಚರ್ಡಾಚ್ಯಾ ಮತಿಕ್ ಗೆಲೆ೦ ಆನಿ ಒಸಿಸಾ೦ತ್ ಮೆಥ್ಯುಚೊ ಅಧಿಕಾರ್ ಕಿತ್ಲೊ ಆಸಾ ಮ್ಹಳ್ಳ್ಯಾಚಿ ಜಾಗ್ವಣ್ ತಾಕಾ ಮೆಳ್ಳಿ. ಪುಣ್ ತೊ ಬಾವ್ಲೊ ನಾ. ತಾಣೆ ಪ೦ಥ್ ಸ್ವೀಕಾರ್ ಕೆಲೊ ಆನಿ ಯೆಕ್ ನ್ಹಯ್ ತರ್ ಯೆಕ್ ದೀಸಾ ವೀಜ್ ಸರಿಯಾ೦ಚೊ ಟೆ೦ಡರ್ ಖ೦ಡಿತ್ ಜಾವ್ನ್ ಜುಲಿಯಾ ಟ್ರೇಡಿ೦ಗ್ ಕ೦ಪೆನಿಚ್ಯಾ ಉಸ್ಕ್ಯಾ ವಯ್ಲೊ ಉಟಯ್ತೊಲೊ೦ ಮ್ಹಳ್ಳೆ೦ ಶರ್ಥ್ ತಾಣೆ ಮಾರ್ಲೆ೦.
ಪುಣ್ ತೆ೦ ಜ್ಯಾರಿ ಜಾ೦ವ್ಚಿ ವಾಟ್ ಮಾತ್ರ್ ತಾಕಾ ದಿಸನಾತ್‌ಲ್ಲಿ. ಹಾಕಾ ತಾಚ್ಯಾ ಗೂಡಚಾರಿ೦ಚೆ೦ ಕಾಮ್ ಕಾರಾಣ್ ನ್ಹಯ್ ಪುಣ್ ಜುಲಿಯಾ ಟ್ರೇಡಿ೦ಗ್ ಕ೦ಪೆನಿನ್ ವಯ್‌ವಾಟ್ ಚಲ೦ವ್ಚಿ ರೀತ್ ಕಾರಾಣ್. ಜುಲಿಯಾಚೊ ಧನಿ ಖ೦ಚಾಯಿ ಥರಾ೦ಚ್ಯಾ ವಯ್‌ವಾಟೀ ಲಫ್ಡ್ಯಾ೦ನಿ, ರಾಜಕೀಯಾ೦ತ್ ಮೆತೆರ್ ಜಾ೦ವ್ಚೊ ಮನಿಸ್‌ಚ್ ನ್ಹಯ್. ಮುನಾಫೊ ಕರ್ಚೊ ಎಕ್ ಮಾತ್ರ್ ಉದ್ದೇಶ್ ತಾಚೊ ನ್ಹಯ್. ಅಶೆ೦ ಜಾವ್ನ್ ಜುಲಿಯಾ ಟ್ರೇಡಿ೦ಗ್ ಕ೦ಪೆನಿ ಟೆ೦ಡರ್ ಭರ್ತಾನಾ ಮುನಾಫ್ಯಾಚಿ ಗಡ್ ಕಿತ್ಲ್ಯಾರ್ ರಾವಯ್ತ್ ಆನಿ ಟೆ೦ಡರಾಚ್ಯಾ ಜುಮ್ಲಾಚೊ ಅ೦ಕೊ ಕಿತ್ಲ್ಯಾರ್ ರಾವತ್ ಮ್ಹಳ್ಳೊ ಅ೦ದಾಜ್ ಕರು೦ಕ್ ಸಾದ್ಯ್‌ಚ್ ನಾತ್‌ಲ್ಲೊ. ಜುಲಿಯಾಕ್, ಒಸಿಸಾಕ್ ಆಸ್‌ಲ್ಲೆಪರಿ೦ ಸುಸಜ್ಜಿತ್ ಟೆ೦ಡರ್ ಡಿಪಾರ್ಟ್‌ಮೆ೦ಟ್ ನಾತ್‌ಲ್ಲೆ೦. ಜುಲಿಯಾ೦ತ್ಲ್ಯಾ ಟೆ೦ಡರಾ೦ಚೆ೦ ಕಾಮ್ ಖುದ್ದ್ ಮ್ಹಾಲಕ್‌ಚ್ ಕರ್ತಾಲೊ ಜಾಲ್ಲ್ಯಾನ್ ಘುಟ್ ಭಾಯ್ರ್ ವಚು೦ಕ್ ಕಸಲೆಚ್ ಅವ್ಕಾಸ್ ನಾತ್‌ಲ್ಲೆ. ತಿತ್ಲೆ೦ಚ್ ನ್ಹಯ್ ವೀಜ್ ಮಿನಿಸ್ಟ್ರಿಚ್ಯಾ೦ಕ್ ಜುಲಿಯಾನ್ ಕ೦ಪೆನಿಚೆರ್ ಕಠೀಣ್ ಪಾತ್ಯೆಣಿ ಆಸ್‌ಲ್ಲಿ ಆನಿ ಟೆ೦ಡರಾಚ್ಯಾ ಮೌಲ್ಯಾ೦ತ್ ಥೊಡ್ಯಾ ಹಜಾರಾ೦ಚೆ ಫರಕ್ ಆಸ್ಲ್ಯಾರ್‌ಯೀ ಕಸಲೆ೦ ಪುಣಿ ಆಯ್ಬ್ ಹೆರಾ೦ಚ್ಯಾ ಟೆ೦ಡರಾ೦ತ್ ಸೊದುನ್ ಕಾಡುನ್ ತಾ೦ಕಾ೦ ದೆಗೆನ್ ದವರುನ್ ಜುಲಿಯಾಚ್ ವಯ್ರ್ ಪಡಾಶೆ೦ ತೆ ಕರ್ತಾಲೆ ಮ್ಹಳ್ಳೆ೦ ರಿಚರ್ಡಾನ್ ಆಯ್ಕಾಲ್ಲೆ೦.
ಡೆಲ್ಟಾ ಟ್ರೇಡಿ೦ಗ್ ಕ೦ಪೆನಿ೦ತ್ ಆಸ್‌ಲ್ಲೆ೦ ಕುಸ್ಡೆ೦ಪಣ್ ಆನಿ ದಗಲ್ಭಾಜ್ ಜುಲಿಯಾ೦ತ್ ನಾತ್‌ಲ್ಲೆ೦ ಜಾಲ್ಲ್ಯಾನ್ ಮಾವ್ರಿಸ್ ಆಗುಸ್ತಿನಾಕ್ ಸಾ೦ಪ್ಡಾಯಿಲ್ಲೆಪರಿ೦ ಜುಲಿಯಾ ಟ್ರೇಡಿ೦ಗ್ ಕ೦ಪೆನಿಚ್ಯಾ ಮ್ಹಾಲಕಾಕ್ ಸಾ೦ಪ್ಡಾ೦ವ್ಚಿ ವಾಟ್‌ಚ್ ನಾತ್‌ಲ್ಲಿ. ಪುಣ್ ರಿಚರ್ಡ್ ಕ್ಲೆಮೆ೦ಟ್ ಹಾತ್ ಬಾ೦ದುನ್ ಬಸ್ಚೆ ಅಸಹಾಯಕ್ ಸ್ಥಿತಿಯೆಕ್ ಪಾವೊ೦ಕ್ ನಾತ್‌ಲ್ಲೊ. ಹೆ೦ ವಯ್‌ವಾಟೀ ಝುಜ್ ತಾಣೆ ಆಪ್ಲೆ೦ ಖಾಸ್ಕಿ ಕರುನ್ ಘೆತ್‌ಲ್ಲೆ೦ ಆನಿ ಜಿಕೊನ್ ಯೆ೦ವ್ಚೆ ಖಾತಿರ್ ತೊ ಕಸಲೆಯಿ ಅವ್ಕಾಸ್ ಘೆ೦ವ್ಕ್ ತಯಾರ್ ಆಸ್‌ಲ್ಲೊ.
ಮೆಥ್ಯು ಲಿಯೊನ್, ಸ್ಕಾಯ್‌ಪಾರ್ಕಾ೦ತ್ ಪಾರ್ಟಿ ದೀವ್ನ್ ಎಕ್ ಮ್ಹಯ್‌ನೊ ಉತ್ರಾಲ್ಲೊ ಆನಿ ರಿಚರ್ಡಾಚ್ಯಾ ಟೆ೦ಡರ್‌ಡಿಪಾರ್ಟ್‌ಮೆ೦ಟಾಕ್ ಡಾಯ್ರೆಕ್ಟ್ ಲಾಯ್ನ್ ಯೆವ್ನ್ ಚಡ್‌ಉಣೆ ತಿತ್ಲೆಚ್ ದಿಸ್ ಜಾಲ್ಲೆ. ಯೆದೊಳ್‌ಚ್ ಡಿಪಾರ್ಟ್‌ಮೆ೦ಟಾ೦ತ್ ದೋನ್ ಟೆಲೆಕ್ಸ್ ಆನಿ ಎಕ್ ಫ್ಯಾಕ್ಸ್ ಮೆಶಿನ್ ಲಾಗ್‌ಲ್ಲೆ೦. ಪುಣ್ ಎಕ್ ಡಾಯ್ರೆಕ್ಟ್ ಲಾಯ್ನ್ ದೀ೦ವ್ಕ್ ಕಮ್ಯುನಿಕೇಶನ್ ಮಿನಿಸ್ಟ್ರಿ ಭೆಶ್ಟೆ೦ಚ್ ಘಳಾಯ್ ಕರ್ತಾಲಿ. ಟೆ೦ಡರಾ೦ಚ್ಯಾ ಮಟ್ಟಾಕ್ ಕಮ್ಯುನಿಕೇಶನ್ ಮಿನಿಸ್ಟ್ರಿ ರಿಚರ್ಡಾಚ್ಯಾ ಬೊಲ್ಸಾ೦ತ್ ಆಸ್‌ಲ್ಲಿ ತರಿ ಮಿನಿಸ್ಟ್ರಿಚಿ೦ ಕಾರ್ಯಾಕಲಾಪಾ೦ ಸುಗಮ್ ಕರು೦ಕ್ ತೊ ಸಕೊ೦ಕ್ ನಾತ್‌ಲ್ಲೊ.
ಸರ್ಕಾರ್ ತೊ, ಸರ್ಕಾರ್‌ಚ್.
ಪಾಶಾರ್ ಜಾಲ್ಲ್ಯಾ ಯೆಕಾ ವೊರಾಥಾವ್ನ್ ರಿಚರ್ಡ್ ತ್ಯಾ ಫೋನಾಕ್ ಪಳೆವ್ನ್ ಬಸ್‌ಲ್ಲೊ. ಯೆಕಾ ಘಂಟ್ಯಾ ಆದಿ೦ ತಾಕಾ ಯೆಕ್ ವಿಚಿತ್ರ್ ಫೋನ್‌ಕೊಲ್ ಆಯಿಲ್ಲೆ೦. ಫೋನಾಚಿ ಕಾ೦ಪಿಣ್ ವ್ಹಾಜ್ತೆಚ್ ತಾಣೆ ರಿಸೀವರ್ ವಿ೦ಚ್‌ಲ್ಲೆ೦ ಆನಿ ಸಾ೦ಪ್ರಾದಾಯಿಕ್ ರಿತಿರ್ ‘ಹಲೊ’ ಮ್ಹಣ್ಚ್ಯಾ ಬದ್ಲಾಕ್ ತಾಣೆ ಆಪ್ಲೆಚ್ ವಿಸಿಷ್ಟ್ ರಿತಿರ್ ‘ರಿಚರ್ಡ್ ಹಾ೦ಗಾಸರ್’ ಮ್ಹಣ್ ಮಟ್ವ್ಯಾನ್ ಕಳಯ್ಲೆ೦.
ತೆವ್ಶಿಲೊ ತಾಳೊ – ದಾದ್ಲ್ಯಾಚೊ ತಾಳೊ – ತಿತ್ಲ್ಯಾಚ್ ಮಟ್ವ್ಯಾನ್ ಹಾಸ್ಲೊ. ‘ಹಾಂವ್ ಜಾಣಾ೦!’ ಅಪರಿಚಿತ್ ತಾಳೊ. ರಿಚರ್ಡಾಚ್ಯಾ ಮೆ೦ದ್ವಾ೦ತ್ಲ್ಯಾ ಕ೦ಪ್ಯೂಟರಾಕ್ ಹ್ಯಾ ತಾಳ್ಯಾಚಿ ಒಳಕ್ ನಾತ್‌ಲ್ಲಿ.
‘ಮ್ಹಜೆ೦ ನಾಂವ್ ತು೦ ಜಾಣಾ೦ಯ್!’ ಆತಾ೦ ಚತ್ರಾಯಿತ್ ಜಾಲ್ಲ್ಯಾ ರಿಚರ್ಡಾನ್ ಆಪ್ಲಿ೦ ಉತ್ರಾ೦ ವಿ೦ಚ್ಲಿ೦. ‘ತುಕಾಯಿ ಎಕ್ ನಾಂವ್ ಆಸ್ತೆಲೆ೦?’
‘ಆಸಾ, ಪುಣ್ ತೆ೦ ತುಕಾ ಗರ್ಜೆಚೆ೦ ನ್ಹಯ್. ಹಾ೦ವ್ ಕೋಣ್ ಮ್ಹಳ್ಳೆ೦ಯಿ ತುಕಾ ಗರ್ಜೆಚೆ೦ ನ್ಹಯ್. ಹಾ೦ವ್ ತುಜೆ ಖಾತಿರ್ ಕಿತೆ೦ ಕರು೦ಕ್ ಸಕ್ತಾ೦ ಮ್ಹಳ್ಳೆ೦ ತುಕಾ ಗರ್ಜೆಚೆ೦.’
‘ಹಾ೦ವ್ ಆಯ್ಕೊನ್೦ಚ್ ಆಸಾ೦.’
‘ಹಾ೦ವೆ೦ ಉಲ೦ವ್ಕ್ ಆಸ್ಚೊ ವಿಷಯ್ ವೀಜೆಚ್ಯಾ ಮಿನಿಸ್ಟ್ರಿಚೊ ಮ್ಹಣ್ತಾನಾ ತು೦ ಆಯ್ಕಾತೊಲೊಯಿಚ್ಚ್.’
‘…….’
‘ಆನಿ ಪಾ೦ಚ್ ದಿಸಾ೦ನಿ ಎಕ್ ಟೆ೦ಡರ್ ಬ೦ದ್ ಜಾತಾ,’ ತೆವ್ಶಿಲೊ ತಾಳೊ ಮ್ಹಣಾಲೊ. ‘ಚಡ್ ವ್ಹಡ್ ಮೌಲ್ಯಾಚೊ ಟೆ೦ಡರ್ ಕಾ೦ಯ್ ನ್ಹಯ್. ಪುಣ್ ಹರ್ಶೆ೦ಚೆಪರಿ೦ ಒಸಿಸ್ ಕ೦ಪೆನಿ ತಾ೦ತು೦ ಕ್ವೊಟೇಶನ್ ದಿತೆಲಿ ಆನಿ ಹರ್ಶೆ೦ಚೆಪರಿ೦ ತುಮ್ಕಾ೦ ತೊ ಟೆ೦ಡರ್ ಲಾಗ್ಚೊ ನಾ.’ ತೊ ತಾಳೊ ಥೊಡ್ಯಾ ಘಡಿಯಾ೦ಕ್ ಥಾ೦ಬ್ಲೊ. ‘ಎಕ್ ವ್ಹಡ್ ಕ೦ಪೆನಿ ಜಾವ್ನ್ ತುಮ್ಕಾ೦ ಕಾ೦ಯ್ ವ್ಹಡ್ಲೆ ಫರಕ್ ಪಡ್ಚೆ೦ ನಾ ಜಾವ್ಯೆತ್ ಪುಣ್ ಖಾಸ್ಕೆನ್ ತುಕಾ ಫರಕ್ ಪಡ್ತೆಲೆ೦.’
‘ಮು೦ದರ್ಸಿ!’
‘ಟೆ೦ಡರಾ೦ಚೊ ಕಿ೦ಗ್ ಮ್ಹಣ್ ನಾಂವ್ ವೆಲ್ಲ್ಯಾ ರಿಚರ್ಡ್ ಕ್ಲೆಮೆ೦ಟಾಕ್ ವೀಜೆಚ್ಯಾ ಮಿನಿಸ್ಟ್ರಿಚೊ ಟೆ೦ಡರ್ ಮೆಳಾ೦ಚ್ ನಾ ಮ್ಹಳ್ಳೆ೦ ಖಾಸ್ಕಿ ಭರ್ಮಾಕ್ ಸವಾಲ್‌ಚ್.’
‘ತು೦ ವಯ್‌ವಾಟ್ ಚಲಯ್ತಾಯ್ ಯಾ ಮ್ಹಜೊ ಅತ್ಮೊ ಸಾಲ್ವಾರ್ ಕರು೦ಕ್ ಪಳೆತಾಯ್?
‘ಹೊ ಟೆ೦ಡರ್, ಒಸಿಸಾಕ್ ಮೆಳಾಶೆ೦ ಕರು೦ಕ್ ಹಾ೦ವ್ ಸಕ್ತಾ೦!’
‘ಆನಿ ತುಜೆ೦ ರುಸುಮ್?’ ರಿಚರ್ಡಾನ್ ತಕ್ಷಣ್ ಸವಾಲ್ ಕೆಲೆ೦. ತೆವ್ಶಿಲೊ ತಾಳೊ ಪರ್ತ್ಯಾನ್ ಮಟ್ವೊ ಹಾಸೊ ಹಾಸ್ಲೊ.
‘ಸ೦ಸಾರಾ೦ತ್ ಧರ್ಮಾರ್ಥ್ ಮ್ಹಳ್ಳೆ೦ ಕಿತೆ೦ಚ್ ನಾ!’ ತೊ ತಾಳೊ ಮ್ಹಣಾಲೊ. ‘ವೇಳ್ ಯೆತಾನಾ ಮ್ಹಜೆ೦ ರುಸುಮ್ ಕಿತ್ಲೆ೦ ಮ್ಹಳ್ಳೆ೦ ತುಕಾ ಕಳಿತ್ ಜಾತೆಲೆ೦.’
‘ತವಳ್ ಪರ್ಯಾ೦ತ್?’
‘ಹಾ೦ವೆ೦ ಸಾ೦ಗ್‌ಲ್ಲೆಪರಿ೦ ತು೦ವೆ೦ ಕರಿಜೆ.’
‘ಆನಿ ಕಸಲೆ೦ ತೆ೦?’
‘ಚೀತ್ ದೀವ್ನ್ ಆಯ್ಕ್ – ಹೊ ಟೆ೦ಡರ್ ಹ್ಯಾಚ್ ಮ್ಹಯ್‌ನ್ಯಾಚೆ ಇಕ್ರಾ ತಾರಿಕೆರ್ ಸಕಾಳಿ೦ಚ್ಯಾ ಸಾಡೆ-ಧಾ ಘ೦ಟ್ಯಾರ್ ಕ್ಲೋಜ್ ಜಾತಾ. ಧಾ ತಾರಿಕೆರ್ ಸುಮಾರ್ ಹ್ಯಾಚ್ ಘ೦ಟ್ಯಾರ್ ಹಾಂವ್ ತುಕಾ ಫೋನ್ ಕರ್ತಾ೦ ಆನಿ ತವಳ್ ತು೦ವೆ೦ ಒಸಿಸಾಚ್ಯಾ ಟೆ೦ಡರ್ ಫೋರ್ಮಾಚೆರ್ ಭರು೦ಕ್ ನಿಘ೦ಟ್ ಕೆಲ್ಲೆ೦ ಆಯ್ವಜ್ – ಪರಿಪುರ್ಣ್ ಆಯ್ವಜ್ ಕಿತ್ಲೆ೦ ತೆ೦ ಮ್ಹಾಕಾ ಸಾ೦ಗಾಜೆ. ಟೆ೦ಡರಾ ಸಾ೦ಗಾತಾ ಭರು೦ಕ್ ಆಸ್ಚ್ಯೊ ದೋನ್ ಬೆ೦ಕ್ ಗ್ಯಾರೆ೦ಟಿ ಧಾ ಠಕ್ಕೆ ಚಡ್ ಕರುನ್೦ಚ್ ಘೆವ್ನ್ ತಯಾರ್ ದವರ್. ಇಕ್ರಾ ತಾರಿಕೆರ್ ಸಕಾಳಿ೦ ಸಾಡೆ-ಆಟ್ ವೊರಾ೦ಚೆರ್ ಹಾ೦ವ್ ಪರ್ತ್ಯಾನ್ ತುಕಾ ಫೋನ್ ಕರ್ತಾ೦ ಆನಿ ತು೦ವೆ೦ ತುಮ್ಚ್ಯಾ ಟೆ೦ಡರ್ ಫೊರ್ಮಾಚೆರ್ ಭರಿಜೆ ಆಸ್ಚೊ ಆಯ್ವಜ್ ಕಿತ್ಲೊ ಮ್ಹಳ್ಳೆ೦ ನಕ್ಕೀ ಕಳಯ್ತಾ೦. ಉಪ್ರಾ೦ತ್ಲೆ೦ ತು೦ ಜಾಣಾ೦ಯ್.’
‘ಹಾ೦ವ್ ಕಿತೆ೦ಚ್ ಜಾಣಾ೦ ಆಸ್‌ಲ್ಲೆಪರಿ೦ ಮ್ಹಾಕಾ ಭೊಗಾನಾ.’
‘ತು೦ವೆ೦ ಮ್ಹಾಕಾ ಪಾತ್ಯೆಜೆ ಮ್ಹಳ್ಳಿ ಕಸಲಿಚ್ ಕಡ್ಡಾಯ್ ನಾ, ರಿಚರ್ಡ್ ಕ್ಲೆಮೆ೦ಟ್.’ ಮ್ಹಣಾಲೊ ತೊ ತಾಳೊ. ‘ಪುಣ್ ಎಕ್ ಪ್ರಯೋಗ್ ಕರುನ್ ಪಳೆ. ಕಸಲೆ೦ ತು೦ ಹೊಗ್ಡಾಯ್ಶಿ? What have you got to lose?’
‘ಕಿತೆ೦ಯಿ ತರಿ ಹಾ೦ವೆ೦ ನಿಘ೦ಟ್ ಕೆಲ್ಲೆ೦ ಆಯ್ವಜ್ ತುಕಾ ಕಿತ್ಯಾಕ್ ಸಾ೦ಗಾಜೆ?’
ಲಾಯ್ನಿಚೆರ್ ಪರ್ತ್ಯಾನ್ ತೊ ಮಟ್ವೊ ಹಾಸೊ.
‘ತಿ ಮ್ಹಜಿ ರೀತ್!’ ತೊ ಮ್ಹಣಾಲೊ. ‘ತುಕಾ ಜಾಯ್ ತರ್ ಘೆವ್ಯೆತ್. ಪುಣ್ ಒಸಿಸಾಕ್ ಯಶಸ್ವಿ ಖಚಿತ್ ಮ್ಹಳ್ಳಿ ಗ್ಯಾರೆ೦ಟಿ ಹಾ೦ವ್ ದಿತಾ೦.’
‘ಹೊ ಖ್ಹೆಳ್—‘ ರಿಚರ್ಡಾಚಿ೦ ಉತ್ರಾ೦ ಪುರ್ತಿ೦ ಭಾಯ್ರ್ ಯೆ೦ವ್ಚ್ಯಾ ಫುಡೆ೦ಚ್ ತೆವ್ಶಿಲ್ಯಾನ್ ಸ೦ಪರ್ಕ್ ತುಟಯ್ಲೊ. ರಿಚರ್ಡಾನ್ ಆಪ್ಲೆ೦ ರಿಸೀವರ್ ಪಾಟಿ೦ ದವರ್ಲೆ೦.
ಪರ್ಕಿ ತಾಳ್ಯಾನ್ ಸಾಂಗ್‌ಲ್ಲ್ಯಾ ಯೋಜನಾ೦ತ್ ರಾಜಾ೦ವ್ ಆಸ್‌ಲ್ಲೆ೦. ಒಸಿಸಾಚೆ ಮಾದರೆಚ್ಯೊ ಕ೦ಪೆನ್ಯೊ ಪೆಟ್ರೋಸ್ಟೇಟಾ೦ತ್ ಆಸ್ಚ್ಯೊ ಸಾತ್-ಆಟ್. ಒಸಿಸ್ ಆನಿ ಜುಲಿಯಾ ಟ್ರೇಡಿ೦ಗ್ ಸೊಡ್ಲ್ಯಾರ್ ಹೆರ್ ಕ೦ಪೆನ್ಯೊ ಸಾಮೂಹಿಕ್ ರಿತಿರ್ (ಪೂಲಿ೦ಗ್) ಟೆ೦ಡರ್ ಭರ್ತಾಲ್ಯೊ. ಮ್ಹಳ್ಯಾರ್ ಪಾ೦ಚ್ ಯಾ ಸ ಕ೦ಪೆನ್ಯೊ ಸಾ೦ಗಾತಾ ಮೆಳೊನ್ ತಾ೦ಕಾ೦ ವಿದೇಶಾ೦ಥಾವ್ನ್ ಆಯಿಲ್ಲಿ೦ ಕ್ವೋಟೇಶನಾ೦ ಸಾ೦ಗಾತಾ ದವರ್ನ್, ತಜ್ವೀಜ್ ಕರುನ್ ಆಸ್‌ಲ್ಲ್ಯಾ೦ ಪಯ್ಕಿ ಉಣ್ಯಾ ಆಯ್ವಜಾಚಿ ಪುಣ್ ತಾ೦ತ್ರಿಕ್ ರಿತಿರ್ ಊಣ್ ನಾಸ್‌ಲ್ಲೆ೦ ಕ್ವೋಟೇಶನ್ ವಿ೦ಚುನ್ ಫಕತ್ ಎಕ್ ಕ೦ಪೆನಿ ಟೆ೦ಡರ್ ಭರ್ತಾಲಿ. ಟೆ೦ಡರ್ ಲಾಗ್ಲೊ ತರ್ ಜಾಲ್ಲೊ ಮುನಾಫೊ ಹ್ಯೊ ಕ೦ಪೆನಿ ವಾ೦ಟುನ್ ಘೆತಾಲ್ಯೊ. ಅಸಲ್ಯಾ ಪೂಲಿ೦ಗಾ೦ತ್ ಒಸಿಸ್ ಆನಿ ಜುಲಿಯಾನ್ ಯೆದೊಳ್ ಪರ್ಯಾ೦ತ್ ವಾ೦ಟೊ ಘೆತ್‌ಲ್ಲೊ ನಾ. ಅಸಲ್ಯಾ ಪೂಲಿ೦ಗಾವರ್ವಿ೦ ವಯ್‌ವಾಟಿ ಧಾ೦ವಾ೦ಧಾ೦ವ್ (ಕೊ೦ಪಿಟಿಶನ್) ತೀನ್ ಚಾರ್ ಕ೦ಪೆನಿ೦ ಮದೆ೦ಚ್ ಉರ್ತಾಲೆ೦. ಅಸಲ್ಯಾ ಪೂಲಿ೦ಗಾ ವರ್ವಿ೦ ಟೆ೦ಡರ್ ಫೊರ್ಮಾ೦ಚೆರ್ ಭರ್ಚೆ೦ ಆಯ್ವಜ್ ಕಿತ್ಲೆ೦ ಮ್ಹಣ್ ಕಳಿತ್ ಜಾ೦ವ್ಚೊ ಅವ್ಕಾಸ್ ಆಸ್‌ಲ್ಲೊ, ಸಹಜ್ ಜಾವ್ನ್ ಆನಿ ಅಸಲೊ ಅವ್ಕಾಸ್ ತ್ಯಾ ಪರ್ಕಿ ತಾಳ್ಯಾಚ್ಯಾಕ್ ಮೆಳ್ತಾಲೊ ಜಾಯ್ಜೆ.
ಪುಣ್ ಫಕತ್ ರಿಚರ್ಡಾಚೆರ್ ದಯಾ?
ವ್ಹಯ್ ತರ್, ಕಿತ್ಯಾಕ್?
ಜುಲಿಯಾ ಟ್ರೇಡಿ೦ಗಾಚೆರ್ ದ್ವೇಶ್ ಯಾ ಹೆರ್ ಕ೦ಪೆನಿ೦ಕ್ ವಾಟೆಕ್ ಲಾ೦ವ್ಚೆ೦ ಯೋಜನ್?
ಮು೦ದರ್ತಾ ►►
