ಆಶಾವಾದಿ ಪ್ರಕಾಶನ್, ಅಖಿಲ್ ಭಾರತೀಯ್ ಕೊಂಕಣಿ ಪರಿಶದ್ ಆನಿ ಉಜ್ವಾಡ್ ಪಂದ್ರಾಳೆಂ ಹಾಂಚ್ಯಾ ಜೋಡ್ ಪಾಲವಾಂತ್ ಚಲ್ಲ್ಲ್ಯಾ ಕಥಾಪಾಠ್ ದುಸ್ರ್ಯಾ ಶಿಂಕಳೆಂತ್, ವಿಲ್ಫಿ ರೆಬಿಂಬಸಾನ್ 1970-ವ್ಯಾ ದಾಕ್ಡ್ಯಾಂತ್ ಬರಯಿಲ್ಲ್ಯಾ ಫಾತಿಮಾಚೆಂ ಕಾಜಾರ್ ಕಥೆಚೆರ್ ಅಧ್ಯಯನ್, ಪಯ್ಣಾರಿ ಸಂಪಾದಕ್ ವಲ್ಲಿ ಕ್ವಾಡ್ರಸಾನ್ ಚಲವ್ನ್ ವೆಲೆಂ.
ಮಂಗ್ಳುರ್, ಗೊಂಯ್ ಕೊಲೆಜಿಂನಿ ಶಿಕ್ಚಿಂ ವಿಧ್ಯಾರ್ಥಿಂ, ಪ್ರಾಧ್ಯಾಪಕ್, ತಶೆಂಚ್ ಹೆರ್ ಪ್ರಾಂತ್ಯಾಥಾವ್ನ್ ಸಾಹಿತಿಕ್ ಅಭಿರುಚ್ ಆಸ್ಚ್ಯಾಂನಿ ಹಾಜರ್ ಆಸ್ಲ್ಲ್ಯಾ ಹ್ಯಾ ವೆಬಿನಾರಾಚಿ ಸುರ್ವಾತ್ ಬಾಯ್ ಸ್ಮಿತಾ ಶೆಣಯ್ ಹಿಣೆಂ ಜೆರಾಲ್ ಯೆವ್ಕಾರ್ ಮಾಗುನ್, ಹ್ಯಾ ಕಥಾಪಾಠಾಚ್ಯಾ ಮಿಸಾಂವಾವಿಶಿಂ ಮಟ್ವೊ ವಿವರ್ ದಿಲೊ. ಅಖಿಲ್ ಭಾರತೀಯ್ ಕೊಂಕಣಿ ಪರಿಶದೆಚ್ಯಾ ಗವ್ರೀಶ್ ವೆರ್ಣೇಕರಾನ್ ಯೆವ್ಕಾರ್ ಕೆಲ್ಲೆಂಚ್, ಆಯ್ಲೆವಾರ್ ದೆವಾದೀನ್ ಜಾಲ್ಲೊ ರಾಕ್ಣೊ ಪತ್ರಾಚೊ ಆದ್ಲೊ ಸಂಪಾದಕ್ ಬಾ| ವಿಶೆಂತ್ ವಿತೊರ್ ಮಿನೆಜ್ ಹಾಂಕಾ ಶ್ರದ್ದಾಂಜಲಿ ಪಾಟವ್ನ್ ಎಕಾ ಮಿನುಟಾಚೆಂ ಮಾವ್ನ್ ಸಾಂಬಾಳ್ಳೆಂ.
ವಲ್ಲಿ ಕ್ವಾಡ್ರಸಾನ್ 1970ವ್ಯಾ ಕಾಳಾರ್ ಕಥೆಚಿ ಪಾಠ್ಭುಂಯ್ಚೆರ್ ವಿವರ್ ದಿವುನ್ ಮಂಗ್ಳುರ್ಚಿ, ಘಾಟಾಚಿ ಆರ್ಥಿಕ್, ಸಾಮಾಜಿಕ್ ಪರಿಗತ್ ಕಸಲಿ ಆಸ್ಲಿ ಮ್ಹಳ್ಳ್ಯಾಚೆರ್ ಮಟ್ವೊ ವಿವರ್ ದಿತಚ್, ಹಿಲರಿ ಡಿ’ಸಿಲ್ವಾ, ಮೀರಾ ರೋಡ್ ಹಾಣಿ ಸುಮಾರ್ 10,000 ಸಬ್ದಾಂಚಿಂ ನೀಳ್ಗತಾ ಮಟ್ವ್ಯಾನ್ ವಾಚುನ್ ಸಾಂಗ್ಲಿ. ಉಪ್ರಾಂತ್ ಕಥೆಚ್ಯಾ ಪಾಂಚ್ ಅಂಶಾಂಚೊ ಉಲ್ಲೇಕ್ ಕರುನ್, ‘ಫಾತಿಮಾಚೆಂ ಕಾಜಾರ್’ ಕಥೆಚೆರ್ ಖೊಲಾಯೆನ್ ವಿಶ್ಲೇಷಣ್ ಕೆಲೆಂ.
ಬಾಬ್ ವಿಲ್ಲಿ ಗೋಯೆಸಾನ್ ಅಪ್ಲ್ಯಾ ಸಮೀಕ್ಶೆಂತ್ ‘ಫಾತಿಮಾಚೆಂ ಕಾಜಾರ್’ ಕಥಾ ತಶೆಂಚ್ ತ್ಯಾ ಕಥೆಚ್ಯಾ ಪಾಠ್ಭುಂಯ್ಚ್ಯಾ ಸವಿಸ್ತಾರ್ ವಿವರಣಾಚಿ ಥೊಕ್ಣಾಯ್ ಕೆಲಿ. ದುಸ್ರೊ ಸಮೀಕ್ಶಕ್ ಎಚ್ಚೆಮ್ ಪೆರ್ನಾಲಾನ್ ವಿಲ್ಫಿ ರೆಬಿಂಬಸ್ ಆಜ್ ಸಯ್ತ್ ಅಪ್ಲ್ಯಾ ಸಾಹಿತ್ಯಾಮುಖಾಂತ್ರ್ ಪ್ರಸ್ತುತ್ ಮ್ಹಣಾಲೊ.
ಉಜ್ವಾಡ್ ಪಂದ್ರಾಳ್ಯಾಚ್ಯಾ ಸಂಪಾದಕಾನ್ ಧಿನ್ವಾಸ್ ಆಟಯ್ಲೆ. ಬಾಯ್ ಸ್ಮಿತಾ ಶೆಣಯ್ನ್ ಹೆಂ ವೆಬಿನಾರ್ ಚಲವ್ನ್ ವ್ಹೆಲೆಂ.
