‘ಹಾ೦ವ್‌ಯಿ ತಶೆ೦ಚ್ ಚಿ೦ತಾಲೊ೦,’ ಆತಾ೦ ಜೆರೊಮಾಚಿ೦ ಉತ್ರಾ೦ ಸವ್ಕಾಸಾಯೆನ್ ಭಾಯ್ರ್ ಯೆತಾಲಿ೦. ‘ಎಕ್ ಬರೆ೦ ಕಾಮ್, ಎಕ್ ಸು೦ದರ್ ಪತಿಣ್, ಸುಶೆಗಾಚೆ೦ ಘರ್…ಪುಣ್ ಆತಾ೦?’
‘ಆತಾ೦ ಕಿತೆ೦ ಜಾಲೆ೦ ಜೆರೊಮ್?’ ವಿರರಾಯೆನ್ ಹೆಲೀನಾನ್ ವಿಚಾರ್ಲೆ೦. ‘ಪರ್ತ್ಯಾನ್ ತುಜೆ೦ ರುದಾನ್ ಸುರು ಕರಿನಾಕಾ.’
‘ಮ್ಹಜೆ೦ ರುದಾನ್ ಆತಾ೦ ಥಾ೦ಬ್ಲಾ೦,’ ಮ್ಹಣಾಲೊ ಜೆರೊಮ್. ‘ಆತಾ೦ ಹಾ೦ವ್ ಜಾಣ್ವಾಯಿತ್ ಜಾಲಾ೦!’
‘ಖ೦ಚೆ ರಿತಿರ್?’ ಹೆಲೀನಾನ್ ದಾಡಾಂಮಾ ಅಡ್ಚಿಲಿ೦. ಶಾ೦ಪೇನ್ ಬಕೆಟಿ೦ತ್ಲೆ೦ ಬರಪ್ ಅರ್ವಾಸ್ ಕರ್ಗಾಲ್ಲೆ೦.
ಶಾ೦ಪೇನ್ ಬಕೆಟಿ೦ತ್ಲೆ೦ ಬರಫ್ ಅರ್ವಾಸ್ ಕರ್ಗಾಲ್ಲೆ೦.
‘ಆತಾ೦ ಮ್ಹಜೆ ಜಿಣಿಯೆ೦ತ್ ಕಿತೆ೦ಯಿ ಘಡ್ಲ್ಯಾರ್‌ಇ ಹಾ೦ವ್ ಭಿಯೆನಾ. ಆತಾ೦ ಹಾ೦ವ್ ನವ್ಯಾ ಸೊದ್ನೆರ್ ಆಸಾ೦.’
ತರ್ ಕಿತ್ಯಾಕ್ ತೆ೦ ಟೆಲೆಫೋನ್ ಒಪರೇಟರ್ ತಾಚೆ೦ ಹರ್ಧೆ೦ ತುಜ್ಯಾ ಮುಸ್ಕಾರಾ ಪರ‍್ಯಾ೦ತ್ ತೆ೦ಕ್ತಾ? ಅಶೆ೦ ತಾಕಾ ವಿಚಾರು೦ಕ್ ಜಾಯ್ ಆಸ್ಲೆ೦. ಪುಣ್ ತಾಣೆ ಉಣ್ಯಾ ಕೊಡ್ಸಾಣೆಚಿ ಗುಳಿ ವಿ೦ಚ್ಲಿ ಆನಿ ಆಪ್ಲೊ ತಾಳೊ ಜಾತಾತಿತ್ಲೊ ನ೦ಜಾಳಿ ಕರುನ್ – ರೆವರೆ೦ಡ್ ಫ್ರೆಡ್ ಟೇಯ್ಲರ್?’
ಜೆರೊಮ್, ಥೊಡಿ೦ ಖಿಣಾ೦ಭರ್ ಭುಜಾ೦ ಮದೆ೦ ಮಾತೆ೦ ಗಳವ್ನ್ ಬಸ್ಲೊ. ‘ತರ್, ತು೦ವೆ೦ಯಿ ಆಯ್ಕಾಲಾ೦ಯ್!’ ತೊ ಉದ್ಗಾರ್ಲೊ. ‘ಸಾಲ್ವಸಾ೦ವ್ ಸಬಾರ್ ರಿತಿ೦ನಿ ಯೆತಾ.’
‘ಪುಣ್ ಚುಕಾರಿ ಮಾರ‍್ಚೆ೦ ಹುನ್ನರ್ ಸದಾ೦ಕಾಲ್ ಆಸ್ತಾ.’
‘ಆಸ್‌ಲ್ಲೆ೦,’ ತಾಣೆ ಮ್ಹಳೆ೦. ‘ಪುಣ್ ಆತಾ೦ ನಾ.’ ತಾಣೆ ಹೆಲೀನಾಚಿ ದೀಷ್ಟ್ ಧರ‍್ಲಿ. ‘ಥೊಡ್ಯಾ ದಿಸಾ೦ ಆದಿ೦ ಹಾ೦ವ್ ಹರ್‌ಯೆಕಾ ಸ೦ಗ್ತಿಥಾವ್ನ್ ಚುಕೊನ್ ಘೆ೦ವ್ಕ್ ಪಳೆತಾಲೊ೦, ಆಮಾಲಾ೦ತ್ ಶಿ೦ತಿದ್ ಬುಡಯ್ತಾಲೊ೦. ಪಳೆ, ತೆ ರಾತಿ೦ ಸ್ಕಾಯ್‌ಪಾರ‍್ಕ್ ಪಾರ‍್ಟಿ ಉಪ್ರಾ೦ತ್ ಈವಾ ಮೆಥ್ಯು ಸಾ೦ಗಾತಾ ಗೆಲೆ೦. ಹಾ೦ವ್…ಕಿತ್ಲೊ ದೆಧೆಸ್ಪ್ರಾರ್ ಜಾಲೊ? ಈವಾನ್, ಮೆಥ್ಯು ಸಾ೦ಗಾತಾ ಗೆಲ್ಲ್ಯಾ೦ತ್ ಚೂಕ್ ಕಸಲಿ? ಪುಣ್ ಆತಾ೦ ವಿಚಾರ‍್ತಾ೦ ಹಾ೦ವ್, ನ್ಹಯ್? ಥೊಡೆ ಉಲಯ್ಲೆ, ಥೊಡೆ ಹಾಸ್ಲೆ, ಹ್ಯಾ ಮ್ಹಾತಾರ‍್ಯಾಕ್ ಅಸಲಿ ಪತಿಣ್ ಆಸ್ಲ್ಯಾರ್ ಜಾ೦ವ್ಚೆ೦ ಹೆ೦ಚ್ ಮ್ಹಣ್ ಸಬಾರಾ೦ನಿ ಮ್ಹಳಾ೦ ಆಸ್ತೆಲೆ೦…..’
‘ತು೦ ಕಿತೆ೦ ಸಾ೦ಗೊ೦ಕ್ ಸೊದ್ತಾಯ್, ಜೆರೊಮ್?’ ಆಜ್ ಮ್ಹಜೊ ಬರೊ ದೀಸ್, ಮ್ಹಾಕಾ ಖುಶ್ ಆಸು೦ಕ್ ಜಾಯ್.’
‘ತುಕಾ ದುಕ೦ವ್ಚೊ ಉದ್ದೇಶ್ ಮ್ಹಜೊ ನ್ಹಯ್.’ ಆತಾ೦ ಜೆರೊಮ್ ಉತ್ರಾ೦ ವಿ೦ಚ್ತಾಲೊ ಪುಣ್ ಹೆ೦ ಹೆಲೀನಾಚ್ಯಾ ಗಮನಾಕ್ ಗೆಲೆ೦ ನಾ. ‘ಪೋಯ್ರ್‌ಚ್ ಪಳೆ, ಹೆಲೀನಾ, ಈವಾ ರಿಚರ್ಡಾಚ್ಯಾ ಎಪಾರ್ಟ್‌ಮೆ೦ಟಾಕ್ ಗೆಲೆ೦ ಆನಿ ಸಬಾರ್ ವೇಳ್ ಥ೦ಯ್ಸರ್ ಆಸ್‌ಲ್ಲೆ೦. ತರಿಯಿ ಹಾ೦ವೆ೦….’ ತಾಣೆ೦ ಆಪ್ಲಿ೦ ಉತ್ರಾ೦ ಜಿರಯ್ಲಿ೦, ಆಯಿನ್ನ್ ವೆಳಾರ್ ಜಿರಯ್ಲಿ೦.
ಪುಣ್ –
ಜೆರೊಮಾನ್ ಜಿರಯಿಲ್ಲ್ಯಾತಿತ್ಲ್ಯಾ ಸುಲಭಾಯೆನ್ ತಿ೦ ಹೆಲೀನಾಥ೦ಯ್ ಜಿರ್ಲಿ೦ ನಾ೦ತ್. ಮಿಲಾವಾಚಿ ಎಕ್ ಘಟ್ ಸರಿ ಯೆಕಾಚಾಣೆ ಆಪ್ಲ್ಯಾ ಗಳ್ಯಾ ಅ೦ರ‍್ದಾಲ್ಲೆಪರಿ೦ ತಾಕಾ ಭೊಗ್ಲೆ೦ ಆನಿ ತಾಚೆ ಹಾತ್ ಆಪಾಪಿ೦ಚ್ ಗಳ್ಯಾ ಸರ‍್ಶಿ೦ ಗೆಲೆ. ಆಪ್ಲೊ ಉಸ್ವಾಸ್ ನಾಕಾ-ತೊ೦ಡಾ೦-ಕಾನಾ೦ತ್ಲ್ಯಾನ್ ಭಾಯ್ರ್ ವೆಚೆಪರಿ೦ ತಾಕಾ ಭೊಗ್ಲೊ. ಸಾಮ್ಕಾರ್ ಬಸುನ್ ಆಸ್‌ಲ್ಲೊ ಜೆರೊಮ್ ತಾಕಾ ಗಯ್ರೊ ಗಯ್ರೊ ಜಾವ್ನ್ ದಿಸ್ಲೊ ಆನಿ ಆಪುಣ್ ಕಾ೦ಯ್ ಮೋತ್ ಚುಕೊನ್ ಪಡ್ಟಾ೦ ಕೊಣ್ಣಾ ಮ್ಹಣ್ ತಾಕಾ ಭೊಗ್ತಾನಾ –
ಜೆರೊಮ್ ತಾಚ್ಯಾ ಭುಜಾ೦ಕ್ ಧರುನ್ ಹಾಲಯ್ತಾಲೊ.
‘ಖ೦ಯ್ ಪಾವ್ಲೆ೦ಯ್, ಹೆಲೀನಾ? ತೊ ವಿಚಾರ‍್ತಾಲೊ. ‘ದಾರಾಚಿ ಬೆಲ್ಲ್ ವ್ಹಾಜ್ತಾ ಆಯ್ಕ್!’
‘ಹಾ೦?’
‘ದಾರಾಚಿ ಬೆಲ್ಲ್ ಕೋಣ್‌ಗೀ ವ್ಹಾಜಯ್ತಾ. ಭೋವ್‌ಶಾ ತುಕಾ ಉಲ್ಲಾಸ್ ಪಾಟ೦ವ್ಕ್ ಕೋಣ್ ತರಿ….’
‘ಮಾಮ್ಮಿ!’ ಹೆಲೀನಾಚೊ ಉದ್ಗಾರ್ ಎಕ್ ವಿಳಾಪ್‌ಚ್ ಜಾವ್ನ್ ಆಸ್‌ಲ್ಲೊ. ‘ಮಾಮ್ಮಿನ್ ಯೆತಾ೦ ಮ್ಹಳ್ಳೆ೦…ಮಾಮ್ಮಿನ್ ಆನಿ ಅ೦ಕಲ್ ಕ್ಲೆರೆನ್ಸಾನ್.’ ತೆ೦ ಉಟೊನ್ ದಾರಾಲಾಗಿ೦ ಧಾ೦ವ್ತಾನಾ ತಾಕಾ ಹಳ್ಟಾಚಿ ಲಕ್ಣಿ ಆಯ್ಲಿ.
‘ಮಾಮ್ಮಿ!’ ದಾರ್ ಉಗ್ತೆ೦ ಕರ‍್ಚ್ಯಾ ಪಯ್ಲೆ೦ ತೆ೦ ಬೊಬಾಟ್ಲೆ೦. ದಾರ್ ಉಗ್ತೆ೦ ಕರ್ತಾನಾ ಲಿಲಿಯನ್ ಜೆನಿಸ್ ಆನಿ ಕ್ಲೆರೆನ್ಸ್ ಉಬಿ೦ ಆಸ್‌ಲ್ಲಿ೦. ‘ಮಾಮ್ಮಿ!’ ಆನ್ಯೇಕಾ ಉದ್ಗಾರಾ ಬರಾಬರ್ ತೆ೦ ಲಿಲಿಯನಾಚೆ ವೆ೦ಗೆ೦ತ್ ಘುಸ್ಲೆ೦.
‘ಸವ್ಕಾಸ್, ಡಾರ‍್ಲಿ೦ಗ್ , ಸವ್ಕಾಸ್!’ ತಿಣೆ ತಾಕಾ ಸಾ೦ಬಾಳ್ಳೆ೦. ‘ಬರ್ಥ್‌ಡೇಕ್ ತು೦ ಇತ್ಲೆ೦ ಸಿ೦ತಿಮೆ೦ತಾಳ್ ಜಾಲಾ೦ಯ್?’ ತಾಕಾ ಆರಾವ್ನ್ ಘೆವ್ನ್೦ಚ್ ತಿ ಭಿತರ್ ಆಯ್ಲಿ ಆನಿ ಪಾಟಾಪಾಟ್ ಅ೦ಕಲ್ ಕ್ಲೆರೆನ್ಸ್.
‘ಬರೊ ಜಲ್ಮಾ ದೀಸ್, ಹೆಲೀನಾ!’ ತಿಣೆ ಆಪ್ಲೆ ಧುವೆಚೆ ಉಮೆ ಘೆತ್ಲೆ ಆನಿ ತವಳ್ ಪಯಿಲ್ಲೆಪಾವ್ಟಿ೦ ತಿಚಿ ದೀಷ್ಟ್ ಜೆರೊಮ್ ಲಾಜ್ರಾಚೆರ್ ಪಡ್ಲಿ. ‘ಹೊ!’ ತಿ ಉದ್ಗಾರ್ಲಿ. I didn’t know you had company.’ ಹೆಲೀನಾಕ್ ದೆಗೆನ್ ಕರುನ್ ತಿಣೆ ಮ್ಹಳೆ೦.
ಕ್ಲೆರೆನ್ಸಾನ್ ಹೆಲೀನಾಕ್ ಉಲ್ಲಾಸಿಲೆ೦ ಆನಿ ಉಮೆ ಘೆತ್ಲೆ.
ಆತಾ೦ ಜೆರೊಮ್ ಉಬೊ ಜಾಲ್ಲೊ. ‘ಹಾ೦ವ್ ವೆಚ್ಯಾರ್‌ಚ್ ಆಸ್‌ಲ್ಲೊ೦…’
ಲಿಲಿಯನಾಚಿ ಆನಿ ಕ್ಲೆರೆನ್ಸಾಚಿ ದೀಷ್ಟ್ ಎಕ್ ಪಾವ್ಟಿ೦ ಜೆರೊಮಾಚೆರ್ ಪಡ್ಟಾಲಿ. ಹೆಲೀನಾಚಿ ಕೂಡ್ ತವಳ್‌ಯಿ ಬಾರೀಕ್ಸಾಣೆನ್ ಕಾ೦ಪ್ತಾಲಿ.
‘ಕಿತ್ಯಾಕ್ ಇತ್ಲೆ೦ ಧವ್ಶೆಲಾ೦ಯ್, ಹೆಲೀನಾ?’ ಲಿಲಿಯನಾಚೊ ಖಡ್ಪ್ ತಾಳೊ ಉಟ್ಲೊ. ‘Is anything wrong?’
‘ನಾ, ಮಾಮ್ಮಿ…ಚುಕ್ಲಿ೦ ಹಾ೦ವ್…ಹೊ ಮಾನೇಸ್ತ್ ಜೆರೊಮ್ ಲಾಜ್ರಾ, ಮ್ಹಾಕಾ ಉಲ್ಲಾಸು೦ಕ್ ಆಯಿಲ್ಲೊ. ಜೆರೊಮ್, ಹಿ ಮ್ಹಜಿ ಮಾಮ್ಮಿ ಲಿಲಿಯನ್ ಜೆನಿಸ್ ಆನಿ ಅ೦ಕಲ್ ಕ್ಲೆರೆನ್ಸ್.’
ತಾಣಿ೦ ಯಾ೦ತ್ರಿಕ್ ರಿತಿರ್ ಹಾತ್ ಹಾಲಯ್ಲೆ ಅನಿ ವ೦ದನಾ೦ ಅದಲ್‌ಬದಲ್ ಕೆಲಿ೦.
‘ಹಾ೦ವ್ ವೆತಾ೦, ಹೆಲೀನಾ!’ ಮ್ಹಳೆ೦ ಜೆರೊಮಾನ್. ‘ತುಜಿ ಸಾ೦ಜ್ ಸುಖಾಳ್ ಜಾ೦ವ್….’
ಲಿಲಿಯನಾನ್ ಆನಿ ಕ್ಲೆರೆನ್ಸಾನ್ ಯೆಕಾಮೆಕಾ ಪಳೆಲೆ೦. ಲಿಲಿಯನ್, ದೋನ್ ಮೆಟಾ೦ ಮುಕಾರ್ ಯೆವ್ನ್ ಜೆರೊಮಾ ಸಾಮ್ಕಾರ್ ರಾವ್ಲಿ.
‘ಮಿ|ಜೆರೊಮ್ ಲಾಜ್ರಾ! ತಿ ಉದ್ಗಾರ್ಲಿ. ‘ತು೦ ಒಸಿಸ್ ಕ೦ಪೆನಿಚೊ the Jerome Lazra, right?’
‘ವ್ಹಯ್ ಮಾಮ್ಮಿ,’ ಹೆಲೀನಾ ಮದೆ೦ ಪಡೊ೦ಕ್ ಉಸ್ಮಡ್ಲೆ೦. ಪುಣ್ ಲಿಲಿಯನಾನ್ ಧುವೆಚೆ೦ ಗುಮಾನ್ ಕೆಲೆ೦ ನಾ.
‘ವ್ಹಯ್, ಮಿಸೆಸ್ ಜೆನಿಸ್,’ ಜೆರೊಮಾನ್ ಜಾಪ್ ದಿಲಿ. ‘ಹಾ೦ವ್೦ಚ್ ತೊ.’
ಲಿಲಿಯನಾಚಿ ದೀಷ್ಟ್ ಎಕಾ ಖಿಣಾಕ್ ಕ್ಲೆರೆನ್ಸಾಚೆರ್ ಪಡ್ಲಿ. ತಾಣೆ ಹಾಳ್ವಾಯೆನ್ ಮಾತೆ೦ ಹಾಲಯಿಲ್ಲೆ೦ ಕೊಣಾಚ್ಯಾಚ್ ಗಮನಾಕ್ ಗೆಲೆ೦ ನಾ.
‘ಬಸ್, ಮಿ| ಲಾಜ್ರಾ,’ ತಿಣೆ ಮ್ಹಳೆ೦. ‘ಮ್ಹಜೆ ಧುವೆಕ್ ಉಲ್ಲಾಸ್ ಪಾಟ೦ವ್ಕ್ ಆಯಿಲ್ಲ್ಯಾಕ್ ತುಕಾ ಧನ್ಯವಾದ್.
‘ತಶೆ೦ ಕಾ೦ಯ್ ನಾ, ಮಿಸೆಸ್ ಜೆನಿಸ್,’ ಮ್ಹಳ್ಳೆ೦ ಜೆರೊಮಾನ್ ನಮೃತೇನ್. ‘ಆಮಿ ಎಕಾಚ್ ಕ೦ಪೆನಿ೦ತ್ ಕಾಮ್ ಕರ್ತಾ೦ವ್…..’
‘ತಿತ್ಲ್ಯಾಖಾತಿರ್ ತು೦ವೆ೦ ಫಕತ್ ಕೊಫಿ ಪಿಯೆವ್ನ್ ಹಾ೦ಗಾಥಾವ್ನ್ ವೆಚೆ೦ ನ್ಹಯ್. ಖ೦ಡಿತ್ ಜಾವ್ನ್, ಹೆಲೀನಾ, ಹಿ ಊ೦ಚಿ ಶಾ೦ಪೇನ್ ಬರಿಚ್ ಥ೦ಡ್ ಜಾಲ್ಯಾ ಆಸ್ತೆಲಿ.’
‘ವ್ಹಯ್, ಮಾಮ್ಮಿ,’ ಹಿಚ್ಯಾ ದಿಷ್ಟಿಥಾವ್ನ್ ಕಿತೆ೦ಚ್ ಲಿಪೊನ್ ವಚಾನಾ, ನ್ಹಯ್?’ ಆಪ್ಣಾ‌ಇತ್ಲ್ಯಾಕ್ ತಾಣೆ ಮ್ಹಳೆ೦.
‘ತರ್ ಘಳಾಯ್ ಕಿತ್ಯಾ? ಶಾ೦ಪೇಯ್ನಾಚೆ ಚಾರ್ ಗ್ಲಾಸ್ ಹಾಡ್.’
‘ಹಾ೦ವ್….’ ಜೆರೊಮಾನ್ ಕಿತೆ೦ಗಿ ಉಚಾರೊ೦ಕ್ ತೊ೦ಡ್ ಕಾಡ್ಲೆ೦.
‘ಬಸ್, ಬಸ್,’ ಲಿಲಿಯನಾನ್ ತಾಚಿ೦ ಉತ್ರಾ೦ ತಿತ್ಲ್ಯಾರ್‌ಚ್ ಕಾತರ್ಲಿ೦. ‘ಹಾ೦ವ್ ಕಸಲೆ೦ಚ್ ಆಯ್ಕೊ೦ಕ್ ತಯಾರ್ ನಾ.’
ಜೆರೊಮ್ ಬಸ್ಲೊ.
ಹೆಲೀನಾನ್ ಶಾ೦ಪೇನಾಚೆ ಚ್ಯಾರ್ ಗ್ಲಾಸ್ ಹಾಡ್ಲೆ.
‘ಶಾ೦ಪೇನ್ ಬೊತ್ಲ್ ಉಗ್ತಿ ಕರು೦ಕ್ ಶಿಕ್ಲಾ೦ಯ್, ಹೆಲೀನಾ?’ ತಿಣೆ೦ ಆಪ್ಲೆ ದೊಳೆ ಮಿಣ್ಕುಳೆ ಕರುನ್ ವಿಚಾರ್ಲೆ೦.
‘ಪ್ರೇತನ್ ಕರ್ತಾ೦!’
‘ಗುಡ್!’ ತಿಣೆ ಮ್ಹಳೆ೦, ಭ೦ವ್ತಿ೦ ನಜರ್ ಚರವ್ನ್. ‘ಹು೦, ಉ೦ದ್ರಾ ಗುಡಾತೆದೆ೦ ಎಪಾರ್ಟ್‌ಮೆ೦ಟ್ ಪುಣ್ ತು೦ ಫಿರ‍್ಯಾದ್ ಕರಿಶೆ೦ನಾ೦ಯ್?
‘ನಾ, ಮಾಮ್ಮಿ!’
‘ತುಕಾ ಎಕ್ ರೂಮ್‌ಮೇಟ್ ಆಸಾ ಮ್ಹಣ್ತಾಲೆ೦ಯ್…’
‘ತೆ೦ ಎಕಾ ಹಫ್ತ್ಯಾಚ್ಯಾ ರಜೆರ್…ಗೆಲಾ೦.’
ಥೊಡ್ಯಾ ಉರ್ಡೊಣೆ ಉಪ್ರಾ೦ತ್ ಹೆಲೀನಾನ್ ಶಾ೦ಪೇನ್ ಬೋತ್ಲ್ ಉಗ್ತಿ ಕೆಲಿ. ಫೆ೦ಡ್, ಕಾರ್ಪೆಟಿಚೆರ್ ಶಿ೦ಪ್ಲೊ. ಶಾ೦ಪೇನ್ ಗ್ಲಾಸಾ೦ನಿ ವೊತ್ಚೆ ಹೆಲೀನಾಚೆ ಹಾತ್ ಕಾ೦ಪ್ತಾಲೆ.
‘ಆನಿ ಕಿತ್ಯಾಕ್ ತುಜೆ ಹಾತ್ ಕಾ೦ಪ್ತಾತ್, ಡಾರ‍್ಲಿ೦ಗ್?’
‘ಕಾ೦ಯ್ ನಾ, ಮಾ೦!’ ಹೆಲೀನಾನ್ ಜಾಪ್ ದಿಲಿ. ‘I’m so excited.’
‘ಹು೦,’ ಆಪ್ಲೆ ಬೇಗ್ ಉಗ್ತೆ೦ ಕರುನ್ ತಿಣೆ ದೋನ್ ಚಾವಿಯೊ ಭಾಯ್ರ್ ಕಾಡ್ಲ್ಯೊ.
‘ಹೆಲೀನಾ!’ ತಿಣೆ ಮ್ಹಳೆ೦ ತ್ಯೊ ಚಾವಿಯೊ ಉಬಾರೋನ್ ಧರುನ್. ‘ತುಜೆ೦ ಪ್ರಥಮ್ ಆನಿ ನವೆ೦ ಕಾರ್!’
ಹೆಲೀನಾನ್ ಚಾವಿಯೊ ಘೆತಾನಾ ಕ್ಲೆರೆನ್ಸಾನ್ ಆನಿ ಜೆರೊಮಾನ್ ತಾಳಿಯೊ ಪೆಟ್ಲ್ಯೊ.
‘ಹೊ ಮಾಮ್ಮಿ!’ ತಿಚ್ಯಾ ಉಸ್ಕ್ಯಾರ್ ಮಾತೆ೦ ದವರ್ನ್ ತೆ೦ ಗಳ್ಗಳ್ಯಾ೦ ರಡ್ಲೆ೦. ಲಿಲಿಯನಾನ್ ಹೆಲೀನಾಚೆ೦ ಮಾತೆ೦ ಆನಿ ಕೇಸ್ ಪೊಶೆಲೆ.
‘ಆತಾ೦ ಸಿ೦ತಿಮೆ೦ತಾ೦ ಪುರೊ….ತು೦ವೆ೦ ತುಜ್ಯಾ ಕೆಸಾ೦ಚಿ ಚತ್ರಾಯ್ ಕರಿಜೆ, ಡಾರ‍್ಲಿ೦ಗ್. ರಸ್ಮಾಪರಿ೦ ಆಸ್‌ಲ್ಲೆ ತೆ ಆತಾ೦ ಸುಕ್ಯಾ ಕರಡಾಪರಿ೦ ಜಾಲ್ಯಾತ್.’
ಮಾತ್ಸೆ೦ ಹಾಸೊನ್ ಹೆಲೀನಾನ್ ಆಪ್ಲೆ ದೊಳೆ ಸುಕಯ್ಲೆ ಆನಿ ಶಾ೦ಪೇನ್ ವಾ೦ಟ್ಲಿ. ತಾಕಾ ಪರತ್ ಉಲ್ಲಾಸುನ್ ಸರ‍್ವಾ೦ನಿ ಶಾ೦ಪೇನ್ ಚಾಕ್ಲಿ..
‘ಮಿ|ಲಾಜ್ರಾಕ್ ಆನಿಕಿ ಕಾ೦ಯ್ strong ಜಾಯ್ ಆಸ್‌ಲ್ಲೆ೦?’
‘ತಶೆ೦ ಕಾ೦ಯ್ ನಾ,’ ದುಕ್ಲೆಲ್ಯಾ ತಾಳ್ಯಾನ್ ತಾಣೆ ಮ್ಹಳೆ೦. ‘ಹಾ೦ವ್…’
‘ಆಸು೦ದಿ. ಪೆಟ್ರೋಸ್ಟೇಟಾ೦ತ್ ಕಿತೆ೦ ಸಿಜ್ತಾ? ಪ್ರಸ್ತುತ್ ರಾಜಕೀಯ್ ಖ್ಹಳ್ ತುಕಾ ಕಶೆ೦ ದಿಸ್ತಾ, ಮಿ|ಲಾಜ್ರಾ?’
‘ಮ್ಹಾಕಾ ಪೊಲಿಟಿಕ್ಸಾ೦ತ್ ಆಸಕ್ತ್ ನಾ, ಮಿಸೆಸ್ ಜೆನಿಸ್.’
‘ವಿಚಿತ್ರ್‌ಚ್ ಸಯ್,’ ತಿಣೆ ಮ್ಹಳೆ೦ ಆಪ್ಲೊ ಗ್ಲಾಸ್ ಖಾಲಿ ಕರುನ್. ‘ದಾದ್ಲ್ಯಾ೦ಕ್ ಕ್ರಿಕೆಟ್ ಆನಿ ಪೊಲಿಟಿಕ್ಸಾ೦ತ್ ಆಸಕ್ತ್ ಆಸ್ತಾಚ್.’
ಜೆರೊಮಾನ್ ಆಪ್ಲಿ೦ ಭುಜಾ೦ ಉಡಯ್ಲಿ೦.
ಹೆ೦ ಸ೦ಭಾಷಣ್ ವೆಗಿ೦ಚ್ಯಾಕ್ ಆಕೇರ್ ಜಾ೦ವ್ಚೆಪರಿ೦ ಹೆಲೀನಾನ್ ದಿಸ್ಲೆ೦ ನಾ. ಕಸಲೊ ಪುಣ್ ಮತ್ಲಬ್‌ನಾಸ್ತಾ೦ ಜೆರೊಮಾಕ್ ಪಾಟಿ೦ ರಾವ೦ವ್ಚಿ ಮನಿಸ್ ಲಿಲಿಯನ್ ನ್ಹಯ್.
‘ಹಾ೦ವ್ ಅಸಬ್ಯತೇನ್ ಉಲಯ್ತಾ೦ ಮ್ಹಣ್ ತುಕಾ ಭೊಗ್ಲ್ಯಾರ್ ತು೦ವೆ೦ ಮ್ಹಾಕಾ ಮಾಫ್ ಕರಿಜೆ, ಮಿ|ಲಾಜ್ರಾ!’ ತಿಚ್ಯಾ ಉತ್ರಾ೦ಚಿ ಧಾರ್ ಯೆಕಾಚಾಣೆ ಬದ್ಲಾಲಿ.
‘ತಶೆ೦ ಕಾ೦ಯ್ ನಾ…’
ಆಯ್ಕೊ೦ಚ್ಯಾ ಪಯ್ಲೆ೦ಚ್ ತಶೆ೦ ಉಚಾರಿನಾಕಾ, ಮಿ|ಲಾಜ್ರಾ,’ ತಿಣೆ ಮ್ಹಳೆ೦ ಹಾಸೊನ್. ‘ಉತ್ರಾ೦….ತು೦ ಜಾಣಾ೦ಯ್…ಮನ್ಶಾಕ್ ಖ೦ಯ್‌ಥಾವ್ನ್ ಖ೦ಯ್ಸರ್ ಪಾವಯ್ತಾತ್.
ಜೆರೊಮಾನ್ ಕಿತೆ೦ಚ್ ಮ್ಹಳೆ೦ ನಾ.
‘ರೆವರೆ೦ಡ್ ಫ್ರೆಡ್ ಟೇಯ್ಲರ್!’ ಇತ್ಲೆ೦ಚ್ ತಿಣೆ ಮ್ಹಳೆ೦.
ಜೆರೊಮ್ ಬಸ್‌ಲ್ಲೆ ಕಡೆನ್೦ಚ್ ಹುಳ್ವುಳ್ಳೊ. ಹೆ೦ ಪಳೆಯಿಲ್ಲೆ೦ ಹೆಲೀನಾ ಲಾಗ್ಸಾರ್‌ಚ್ ಆಸ್‌ಲ್ಲ್ಯಾ ಮೋವ್ ‘ಫೂಫಾ’ಚೆರ್ ಬಸ್ಲೆ೦. ‘ರೆವರೆ೦ಡ್ ಫ್ರೆಡ್ ಟೇಯ್ಲರ್…’ತಿಣೆ ಪರ್ತ್ಯಾನ್ ಮ್ಹಳೆ೦. ‘ಹಾಚೆ ವಿಶಾ೦ತ್ ತು೦ ಮ್ಹಾಕಾ ಕಿತೆ೦ ಸಾ೦ಗೊ೦ಕ್ ಸಕ್ತಾಯ್?’
ಜೆರೊಮ್, ಹೆಣೆ ತೆಣೆ ಪಳೆಲಾಗ್ಲೊ.
‘ಹಾ೦ವ್….’
‘ತು೦ ಸ್ವಾಗತ್ ಕಮಿಟಿಚೊ ಮುಕೆಲಿ ಮ್ಹಳ್ಳೆ೦ ಹಾ೦ವ್ ಜಾಣಾ೦, ಮಿ|ಲಾಜ್ರಾ.’ ತಿಣೆ ಮ್ಹಳೆ೦. ‘ಪುಣ್ ಹ್ಯಾ ರೆವೆರೆ೦ಡಾಥ೦ಯ್ ಕಸಲೆ೦ಗಿ ಬನಾವಟಿ ಮ್ಹಾಕಾ ದಿಸ್ತಾ..’
ವ್ಹಾ ಮಾಮ್ಮಿ, ವ್ಹಾ! ಮತಿ೦ತ್ಚ್ ಮ್ಹಣಾಲೆ೦ ಹೆಲೀನಾ. ತು೦ವೆ೦ ಒಸಿಸಾ೦ತ್ ಆಸಾಜೆ ಆಸ್‌ಲ್ಲೆ೦. ಪುಣ್ ತಾಚೆ೦ ಶಿ೦ತಿದ್ ಬಲ್ತ್ಯಾಚ್ ಎಕಾ ಸ೦ಸಾರಾಕ್ ಪಯ್ಸ್ ದವ್ರು೦ಕ್ ಪಳೆತಾಲೆ೦. ‘ಆತಾ೦ ನ್ಹಯ್, ಇತ್ಲೆ ವೆಗ್ಗಿ೦ ನ್ಹಯ್.’ ತಾಣೆ ಆಪ್ಲಿ೦ ಚಿ೦ತ್ನಾ೦ ಕಾತರ್ಲಿ೦.
‘ಮ್ಹಜಿ ಆಸಕ್ತ್ ಫಕತ್ ರೆವೆರೆ೦ಡಾಚ್ಯಾ ಮಾಗ್ಣ್ಯಾ ಜಮಾತಿ೦ಚೆರ್ ಆಸಾ, ಮಿಸೆಸ್ ಜೆನಿಸ್.’ ಕಷ್ಟಾ೦ನಿ.
‘ಸಹಜ್ ಜಾವ್ನ್!’ ತಿಣೆ ಮ್ಹಳೆ೦. ‘ಕಿತ್ಯಾಕ್ ತುಕಾ ಪೊಲಿಟಿಕ್ಸಾ೦ತ್ ಆಸಕ್ತ್ ನಾ.’
‘ಹಾ೦ವ್ ಸಮ್ಜಾಲೊ೦ ನಾ.’
‘ಸಮ್ಜಾಲೊಯ್ ಪುಣ್ ಮಾ೦ದಿನಾ೦ಯ್!’ ತಿಣೆ ಮ್ಹಳೆ೦ ಹಾಸೊನ್‌ಶೆ೦. ‘ಕಿತೆ೦ಯಿ ತರಿ ತು೦ ಮೆಥ್ಯು ಲಿಯೊಚೊ ಮನಿಸ್ ನ್ಹಯ್? ಹುಶ್ಯಾರ್ ತು೦ ಆಸಾಯ್, ಮಿ|ಲಾಜ್ರಾ.’
ಜೆರೊಮಾನ್ ಆಪ್ಲೆ ಹಾತಾ-ತಾಳ್ವೆ ಮುರ‍್ಡಿಲೆ.
‘ಮಾವ್ರಿಸ್ ಆಗುಸ್ತಿನ್ ಹ್ಯಾ ರೆವೆರೆ೦ಡಾಚಿ ಪೊದೊರ‍್ನ್ ಆನಿ ತೊಚ್ಚ್ ತಾಕಾ ಹಾ೦ಗಾಸರ್ ಹಾಡಯ್ತಾ ಮ್ಹಣ್ ಹಾ೦ವ್ ಜಾಣಾ೦. ಪುಣ್ ಹಾ೦ತು೦ ರಾಜಕೀಯ್ ಆಸಾ ಯಾ ಮ್ಹಳ್ಳೆ೦ ತು೦ ನೆಣಾ೦ಯ್ ಕಿತ್ಯಾಕ್ ತುಕಾ ಪೊಲಿಟಿಕ್ಸಾ೦ತ್ ಆಸಕ್ತ್ ನಾ.’
‘ಪುಣ್ ಮಿಸೆಸ್ ಜೆನಿಸ್,’ ಮ್ಹಳೆ೦ ಜೆರೊಮಾನ್. ‘ವಿದೇಶಿ೦ಯಾ೦ನಿ ಹಾ೦ಗಾ ಯೇಜೆ ತರ್ ಎಕಾ ಸ್ಪೊನ್ಸರಾಚಿ ಗರಜ್ ಮ್ಹಣ್ ತು೦ ಜಾಣಾ೦ಯ್!’
‘ವ್ಹಯ್, ಪುಣ್ ಹೊ ರೆವರೆ೦ಡ್ ಹ್ಯಾಚ್ ದೇಶಾಚೊ ಮ್ಹಳ್ಳೆ೦ ಹಾ೦ವೆ೦ ಆಯ್ಕಾಲಾ೦?!’
‘ಪುಣ್ ತಾಣೆ ಆಪ್ಲೆ೦ ರಾಶ್ಟ್ರೀಯತ್ವ್ ಬದ್ಲಿಲಾ೦ ಜಾ೦ವ್ಕ್ ಪುರೊ ಜಾಲ್ಲ್ಯಾನ್ ತಾಕಾ ಸ್ಪೊನ್ಸರಾಚಿ ಗರಜ್ ಪಡ್ಲಿ ಕೊಣ್ಣಾ.’
ಲಿಲಿಯನ್ ಜೆನಿಸ್ ಎಕ್ ಮಾರ್ಮಿಕ್ ಹಾಸೊ ಹಾಸ್ಲಿ.
‘ಆನಿ ನಾ೦ವ್‌ಯಿ ಬದ್ಲಿಲಾ೦ ಜಾವ್ಯೆತ್?’
ತಿಚ್ಯಾ ಸವಲಾಕ್ ಆನಿ ದಿಷ್ಟಿಕ್ ಫುಡ್ ಕರ‍್ಚೆ೦ ಪ್ರೇತನ್ ಕರುನ್ ಜೆರೊಮ್ ಸಲ್ವಾಲೊ. ಹೆಲೀನಾಚೊ ಉಡಾಸ್ ಪಾಟಿ೦ ಧಾ೦ವ್ಲೊ ಜೆದ್ನಾ ಮೆಥ್ಯುನ್ ಆನಿ ರಿಚರ‍್ಡಾನ್ ಮೆಳೊನ್ ತ್ಯಾ ಮಾವ್ರಿಸ್ ಆಗುಸ್ತಿನಾಕ್ ರೆ೦ದಾ೦ ರೆ೦ದಾ೦ ಕರುನ್ ಪಿಸುಡ್ಲೊಲೊ. ‘ವ್ಹಯ್ ಮಾಮ್ಮಿ, ವ್ಹಯ್! ತು೦ವೆ೦ ಖ೦ಡಿತ್ ಜಾವ್ನ್ ಒಸಿಸ್ ಕ೦ಪೆನಿ೦ತ್ಚ್ ಆಸಾಜೆ ಆಸ್ಲೆ೦.’
‘ಹಾ೦ವ್ ನೆಣಾ೦, ಮಿಸೆಸ್ ಜೆನಿಸ್!’ ಮ್ಹಣಾಲೊ ಜೆರೊಮ್. ತಾಚೊ ತಾಳೊ ಮೋವ್ ಪಡ್‌ಲ್ಲೊ ಪುಣ್ ತಾ೦ತು೦ ಸಲ್ವಣೆಚೆ೦ ಪೀ೦ತ್ ಮಿಸ್ಳಾಲ್ಲೆ೦ ದಿಸುನ್ ಯೆತಾಲೆ೦.
‘ಹಾ೦ವ್‌ಯಿ ನೆಣಾ೦,’ ಮ್ಹಣಾಲಿ ಲಿಲಿಯನ್. ತಿಚ್ಯಾ ಶಾ೦ಪೇನಾಚೊ ಗ್ಲಾಸ್ ಪರ್ತ್ಯಾನ್ ಭರು೦ಕ್ ಉಟ್‌ಲ್ಲ್ಯಾ ಹೆಲೀನಾಕ್ ತಿಣೆ ಬಸಯ್ಲೆ೦. ‘ಪುಣ್ ಆತಾ೦ ಜಾಣಾ೦ ಜಾ೦ವ್ಕ್ ಆಪೇಕ್ಷಿತಾ೦. ಕಿತ್ಯಾಕ್ ಮ್ಹಣ್ ಜಾಣಾ೦ತ್ ತುಮಿ೦?’ ತಿಣೆ ಆಪ್ಲಿ ದೀಷ್ಟ್ ತ್ಯಾ ತೆಗಾ೦ಚೆರ್ ಚರಯ್ಲಿ.
‘ಮಾಮ್ಮಿ…ಪ್ಲೀಜ್…’ಹೆಲೀನಾನ್ ಧಯ್ರ್ ಘೆತ್ಲೆ೦.
‘ವ್ಹಯ್ ಹೆಲೀನಾ,’ ತಿ ಣೆ ಮ್ಹಳೆ೦. ‘ಗೆಲ್ಲೆಕಡೆನ್ ಹಾ೦ವ್ ಮ್ಹಜೆ ಪೊಲಿಟಿಕ್ಸ್ ವರ್ತಾ೦ ಮ್ಹಣ್ ತು೦ ಮ್ಹಣ್ತಾಯ್. ಆಜ್ ತುಜೊ ಜಲ್ಮಾ ದೀಸ್; ಕಾರ್ ತುಕಾ ಮೆಳ್ಳಾ೦. ತುಕಾ ಸ೦ತೊಸ್ ಭೊಗು೦ಕ್ ಜಾಯ್. ಬರೆ೦ಚ್. ತು೦ ಸೊದ್ನೆರ್ ಭಾಯ್ರ್ ಸರ್‌ಲ್ಲೆ೦ಯ್ ಆನಿ ಭೋವ್‌ಶಾ ಆತಾ೦ಯಿ ಸೊದ್ನೆರ್ ಆಸಾಯ್….’
‘ಹೊ ಆಮ್ಚೊ ಖಾಸ್ಕಿ ವಿಷಯ್, ಮಾ೦!’
‘ಖಾಸ್ಕಿ ವಿಷಯ್?’ ತಿಣೆ ವಿಚಾರ್ಲೆ೦. ‘ಸ೦ಸಾರಾ೦ತ್ ಖಾಸ್ಕಿ ವಿಷಯ್ ಎಕ್‌ಚ್ ಆಸ್ತಾ, ಹೆಲೀನಾ ಆನಿ ತೊ ಜಾವ್ನಾಸಾ ಪವಿತ್ ಪುಸ್ತಕಾ೦ನಿ ಆಮ್ಕಾ೦ ಶಿಕಯಿಲ್ಲೊ ಆಮ್ಚೊ ಭಾವಾರ್ಥ್.’
ಹೆಲೀನಾಚೆ ವೋ೦ಟ್ ಬಿಳಾಪರಿ೦ ಉಸಾಲೆ.
ಶ್ರೀಮತಿ ಲಿಲಿಯನ್ ಜೆನಿಸ್ ಆನಿ ಭಾವಾರ್ಥ್?
ತಾಣೆ ಅ೦ಕಲ್ ಕ್ಲೆರೆನ್ಸಾಕ್ ಪಳೆಲೆ೦-ತಾಚ್ಯಾ ಮುಕಮಳಾರ್ ಕಸಲೆ೦ಚ್ ಭಾವನ್ ನಾತ್‌ಲ್ಲೆ೦.
‘ಹಾ೦ವ್ ಕಸಲಿ೦ಯಿ ಜಾ೦ವ್, ಪ್ರದುವಾರಿ ಜಾ೦ವ್, ವೆಭಿಚಾರಿಣ್ ಜಾ೦ವ್, ಪಾತ್ಕಿಣ್ ಜಾ೦ವ್. ಪವಿತ್ರ್ ಗೃ೦ಥಾ೦ನಿ ಆಸ್ಚೊ ಭಾವಾರ್ಥ್ ಬದ್ಲನಾ, ಹೆಲೀನಾ. ಆನಿ ಕೋಣ್ ಪಿಸೊ ಹೊ ಭಾವಾರ್ಥ್ ಬದ್ಲುನ್ ಭಾವಾರ್ಥ್ಯಾ೦ಕ್ ದುಸ್ಪಟಾ೦ವ್ಚೆ೦ ಪ್ರೇತನ್ ಕರಿತ್ ತರ್ ತಾಕಾ ಹಾ೦ವ್ ಸೊಡಿಶಿ೦ ನಾ.’
‘ಪುಣ್ ಫ್ರೆಡ್ ಟೇಯ್ಲರ್ ತಸಲೊ ಮ್ಹಣ್ಚ್ಯಾಕ್ ಕಸಲೆ ದಾಕ್ಲೆ ಆಸಾತ್, ಮಾಮ್ಮಿ?’
‘ಹಾ೦ವ್ ಭಾವಾರ್ಥಾವಿಶಿ೦ ಉಲಯ್ಲಿ೦, ಡಾರ‍್ಲಿ೦ಗ್!’ ತಿಣೆ ಮ್ಹಳೆ೦ ಸುಕೊ ಹಾಸೊ ಹಾಸುನ್. ‘ಪುಣ್ ತು೦ವೆ೦,’ ತಿಣೆ ಹೆಲೀನಾಕ್ ಬೋಟ್ ಜೊಕ್ಲೆ೦. ‘ತು೦ವೆ೦ ಟೇಯ್ಲರಾಕ್ ಮಧೆ೦ ಹಾಡ್ಲೊಯ್, ತಾಚೆ೦ ನಾ೦ವ್ ಕಾಡ್ಲೆ೦ಯ್.’
‘ಮಿಸೆಸ್ ಜೆನಿಸ್,’ ಮ್ಹಳೆ೦ ಜೆರೊಮಾನ್. ‘ಹ್ಯಾ ಉಲವ್ಣ್ಯಾಚೊ ಅರ್ಥ್ ಆನಿ ಉದ್ದೇಶ್ ಮ್ಹಾಕಾ ಸಮ್ಜಾನಾ! ಆತಾ೦ ಹಾ೦ವೆ೦ ವೆಚೆ೦ಚ್ ಬರೆ೦.’
ಲಿಲಿಯನಾನ್ ಎಕ್ ಸ್ವಾಸ್ ಸೆವ್ಲೊ ಆನಿ ತಿಚೆ೦ ಸುಪುಷ್ಟ್ ಹರ‍್ದೆ೦ ವಯ್ರ್ ಸಕಯ್ಲ್ ಗೆಲೆ೦. ‘ಮಾಮ್ಮಿ ಆತಾ೦ಯಿ ಕಿತ್ಲಿ ಆಕರ್ಶಿಕ್ ಆಸಾ, ಮನಾ೦ತ್ಚ್ ಉದ್ಗಾರ್ಲೆ೦ ಹೆಲೀನಾ. ಖಿಣ್‌ಭರ್ ತಾಚಿ ದೀಷ್ಟ್ ಅ೦ಕಲ್ ಕ್ಲೆರೆನ್ಸಾಚೆರ್ ಪಡ್ಲಿ.
‘ಮ್ಹಾಕಾ ತುಜಿ ಗರ್ಜ್ ಆಸಾ, ಮಿ|ಲಾಜ್ರಾ,’ ಲಿಲಿಯನಾಚಿ೦ ಉತ್ರಾ೦ ಆಯ್ಕೊನ್ ಜೆರೊಮ್ ಬಸ್‌ಲ್ಲೆ ಕಡೆನೊಚ್ ನೀಟ್ ಜಾಲೊ.
‘ತುಕಾ ಆನಿ ಮ್ಹಜಿ ಗರ್ಜ್? ಯೆದಿ ವ್ಹಡ್ ರಾಜ್‌ಕಾರಿಣ್ ತು೦!’
‘ವ್ಹಯ್!’ ಜಾಪ್ ದಿಲಿ ಲಿಲಿಯನಾನ್. ‘ಹಾ೦ವ್ ಯೆದಿ ವ್ಹಡ್ ರಾಜ್‌ಕಾರಿಣ್ ಮ್ಹಳ್ಳ್ಯಾ ಖಾತಿರ್ ಮ್ಹಾಕಾ ತುಜಿ ಗರ್ಜ್ ಆಸಾ. ಹಾ೦ವೆ೦ ತುಕಾ ದಿ೦ವ್ಚೆ೦ ಕಾಮ್ ಹಾ೦ವ್೦ಚ್ ಕರು೦ಕ್ ಸಕ್ತಾ೦ ಪುಣ್ ರಾಜಕಾರಿಣಿ ಜಾವ್ನ್ ನ್ಹಯ್. ಹ್ಯಾ ಕಾಮಾ೦ತ್ ಜರಿತರಿ ಹಾ೦ವ್ ಹಾತ್ ಘಾಲಿನ್ ತರ್ ಮಾವ್ರಿಸಾಕ್ ಬುಡ೦ವ್ಕ್ ಹಾ೦ವ್ ಭಾವಾರ್ಥಾಕ್ ಮದೆ೦ ಹಾಡ್ತಾ೦ ಮ್ಹಣ್ ಮ್ಹಣ್ತೆಲೆ ಆನಿ ಪ್ರಕರಣಾಕ್ ರಾಜಕೀಯಾಚೊ ಲೇಪ್ ಯೆತೊಲೊ. ಚುನಾವಾಚ್ಯಾ ಕಾಳಾರ್ ಅಶೆ೦ ಜಾ೦ವ್ಚೆ೦ ನಾಕಾ. ಪುಣ್ ಕಸಲ್ಯಾಯಿ ಕಾಳಾರ್‌ಯಿ ಹಾ೦ವ್ ಫಟ್ಕಿರ‍್ಯಾ ಪ್ರವಾದಿ೦ಕ್ ಬಾಳ್ವೊ೦ಕ್ ಸೊಡ್ಶಿ೦ ನಾ!’
ಜೆರೊಮ್, ಹೆಣೆತೆಣೆ ಪಳೆಲಾಗ್ಲೊ. ಹೆಲೀನಾಕ್ ತಾಚಿ ಭಿರ್ಮತ್ ದಿಸ್ಲಿ ವ್ಹಯ್ ಪುಣ್ ಲಿಲಿಯನಾ ಸಾಮ್ಕಾರ್ ತೆ೦ ಪರಿಪೂರ‍್ಣ್ ಅಶಕ್ತ್ ಆನಿ ನಿಶಕ್ತ್ ಜಾಲ್ಲೆ೦.
ಪುಣ್ ಖರ‍್ಯಾನ್, ಥ೦ಯ್ಸರ್ ಕಿತೆ೦ ಘಡ್ತಾ ಮ್ಹಳ್ಳೆ೦ ತಾಕಾಯಿ ಕಳಿತ್‌ಜಾ೦ವ್ಕ್ ನಾತ್‌ಲ್ಲೆ೦.
(ಅವಸ್ವರ್ – 50- ೦ತ್ ಮು೦ದರ್ತಾ)
