ಟೇಯ್ಲರ್, ಪರ್ತ್ಯಾನ್ ವೇದಿಚೆರ್ ಯೆತಾನಾ ಜಮ್ಯಾಂತ್ ನವೊ ಜಿವಾಳ್ ದಿಸುನ್ ಯೆತಾಲೊ. ಜೆರೊಮ್ ಲಾಜ್ರಾ ಆಪ್ಲೆ ಬಸ್ಕೆರ್ ಬಸುನ್ ಆಸ್‌ಲ್ಲೊ ಆನಿ ಟೇಯ್ಲರಾಕ್ ಪಳೆತೆಚ್ ಪಾಟ್ಲ್ಯಾನ್ ಖೊಟ್ ಮಾರ್‌ಲ್ಲೆ ಜಿನ್ಸಾರ್ ಉಬೊ ಜಾಲೊ ಆನಿ ಧಾಂವೊನ್ ವಚುನ್ ಟೇಯ್ಲರಾಚ್ಯಾ ಪಾಂಯಾಂಕ್ ಪಡ್ಲೊ.
‘ಮ್ಹಾಕಾ ಸುಟ್ಕಾ ದೀ, ಸೊಡ್ವಣ್‌ದಾರಾ,’ ತೊ ಬೊಬಾಟ್ಲೊ. ‘ಮ್ಹಜ್ಯಾ ಮೊಗಾಚಿಂ ಮನ್ಶ್ಯಾಂಚ್ ಮ್ಹಾಕಾ ಧಗೊ ಕರ್‍ತಾತ್; ಆನಿ ಮ್ಹಜ್ಯಾನ್ ಸೊಸುಂಕ್ ಜಾಯ್ನಾ, ಮ್ಹಜೆ ವಯ್ಲಿ ಹಿ ಕಾಲ್ಸ್ ನಿವಾರ್.’
ಟೇಯ್ಲರಾನ್ ತಾಚ್ಯಾ ಭುಜಾಂಕ್ ಧರುನ್ ಉಟಯ್ಲೊ.
‘ಎಕಾ ಮಿಸಾಂವಾಂಕ್ ಲಾಗುನ್, ನಿರ್ದಿಷ್ಟ್ ಮಿಸಾಂವಾಂಕ್ ಲಾಗುನ್ ತುಂ ಹ್ಯಾ ಸಂಸಾರಾಂತ್ ಆಯ್ಲಾಯ್. ತುಜೆಂ ತೆಂ ಮಿಸಾಂವ್ ಸುಫಳ್ ಜಾಂವ್ಚಾರ್ ಆಸಾ. ತುಂವೆಂ ಯೆದೊಳ್ ಜಾಯ್ತೆಂ ಸೊಸ್ಲಾಂಯ್ ಮ್ಹಣ್ ಹಾಂವ್ ಜಾಣಾಂ.’
‘ವ್ಹಯ್, ವ್ಹಯ್!’ ಜೆರೊಮ್ ರಡ್ಲೊ. ‘ಹಾಂವ್ ಪಾತ್ಕಿ.’
‘ಆಮಿ ಸರ್‍ವ್ ಪಾತ್ಕಿ….ಹಾಕಾ ತುಂ ಸಾಕ್ಸ್ ದಿತಾಯ್?’
‘ವ್ಹಯ್, ವ್ಹಯ್…ಅಳೆ ಥಂಯ್ಸರ್ ಮ್ಹಾಕಾ ಯೆಮ್ಕೊಂಡ್ ದಿಸ್ತಾ, ಉಜ್ಯಾಚ್ಯೊ ಜಿಬೊ ಮ್ಹಾಕಾ ಲೆಂವ್ತಾತ್.’
‘ಪಾತ್ಕಾಕ್ ಶಿಕ್ಷಾ ಜಾವ್ನಾಸಾ ಮರಣ್’
‘ವ್ಹಯ್, ವ್ಹಯ್, ಮ್ಹಜೊ ಅತ್ಮೊ ಮೆಲಾ. ಮ್ಹಾಕಾ ಆತಾಂ ಯೆಮ್ಕೊಂಡಾಂತ್ ದೆಂವಯ್ತಾತ್.’
‘ಪಾತಿಯೆ ಆನಿ ಭರ್‍ವಸ್!’ ತಾಚಿಂ ಭುಜಾಂ ಟೇಯ್ಲರಾನ್ ಹಾಲಯ್ಲಿಂ. ‘ಉಡಾಸ್ ದವರ್ ಪವಿತ್ ಅತ್ಮ್ಯಾನ್ ಆಮ್ಕಾಂ ಹಾಂಗಾಸರ್ ಆಪಯ್ಲಾಂ. ಪಾತಿಯೆ ಆನಿ ಭರ್‍ವಸ್.’ ಆಪ್ಲೆ ಬಾವ್ಳೆ ವಿಸ್ತಾರಾವ್ನ್ ತೊ ಬೊಬಾಟ್ಲೊ. ‘ಕಿತ್ಯಾಕ್-‘
‘ಪವಿತ್ ಅತ್ಮ್ಯಾನ್ ಆಮ್ಕಾಂ ಆಪಯ್ಲಾಂ!’ ಜಮ್ಯಾನ್ ಜಾಪ್ ದಿಲಿ.
‘ಆತಾಂ, ಜೊ ಕೋಣ್ ಪಾತಿಯೆತಾ ತಾಂಚ್ಯಾ ದೊಳ್ಯಾಂಕ್ ಎಕ್ ಅಜಾಪ್ ದಿಸ್ತೆಲೆಂ ಪಳೆಯಾ, ಭಾವಾ ಜೆರೊಮಾಚೊ ಅತ್ಮೊ ಕಸೊ ಸಾಲ್ವಾರ್ ಜಾತಾ ತೆಂ ಪಳೆಯಾ. ಹಾಕಾ ಸಾಕ್ಸ್ ಜಾವ್ನ್ ಜೆರೊಮಾಚಿ ನಶ್ವರ್ ಕೂಡ್ ಧರ್‍ಣಿಥಾವ್ನ್ ವಯ್ರ್ ವೆತೆಲಿ. ಪಾತಿಯೆತೆಲ್ಯಾಂನೊ ಮ್ಹಜ್ಯಾ ಸಂಗಿಂ ಪವಿತ್ ಅತ್ಮ್ಯಾಕ್ ಹಾಕ್ ಮಾರಾ….ಪಳೆಯಾ….ತೊ ಆಮ್ಚೆ ಮಧೆಂ ದೆಂವ್ಲೊಚ್…ತುಮ್ಚ್ಯಾಚ್ ಸಾಮ್ಕಾರ್ ತೊ ಆಸಾ, ತೊ ತುಮ್ಚ್ಯಾ ಬಸ್ಕೆಂ ಮಧ್ಲ್ಯಾನ್ಂಚ್ ಚಲ್ತಾ. ಸಾಕ್ಸ್ ದಿಯಾ, ಸಾಕ್ಸ್ ದಿಯಾ….’
ಜಮ್ಯಾಂತ್ ಥರಾವಳ್ ಬೋಬೊ ಆನಿ ಕಿಂಕ್ರಾಟ್ಯೊ ಜಾಲ್ಯೊ. ರಡ್ಣೆಂ, ವಿಳಾಪ್ ಆನಿ ಸುಸ್ಕಾರ್ ಉಟ್ಲೆ. ಥೊಡಿಂ ಉಬಿಂ ಜಾವ್ನ್, ಹರ್‍ಧೆಂ ಪೆಟುನ್ ಕಸಲೊಗಿ ‘ಲಬಾಲಬಾಲಾಬಾ’ ಆವಾಜ್ ಕರುಂಕ್ ಲಾಗ್ಲಿಂ, ಥೊಡೆ ತಾಳಿಯೊ ಪೆಟುನ್ ನಾಚುಂಕ್ ಲಾಗ್ಲೆ. ‘ಆಮಿ ಪಾತಿಯೆತಾಂವ್, ಸಾಕ್ಸ್ ದಿತಾಂವ್, ಪವಿತ್ ಅತ್ಮ್ಯಾನ್ ಆಮ್ಕಾಂ ಆಪಯ್ಲಾಂ.’ ಖಳ್ಮಿತ್ ನಾಸ್ತಾಂ ಬೋಬೊ ಚಾಲು ಆಸ್‌ಲ್ಲ್ಯೊ.
‘ಆತಾಂ ಪಳೆಯಾ ಆಮ್ಚ್ಯಾ ಭಾವಾ ಜೆರೊಮಾಕ್!’ ತಾಕಾ ಬೋಟ್ ಜೊಕುನ್ ಮ್ಹಣಾಲೊ ಟೇಯ್ಲರ್. ‘ತಾಚ್ಯೊ ತೆಮೆಟ್ಯೊ ಧರ್‍ಣಿಥಾವ್ನ್ ಸ ಇಂಚಾಂ ಪುಣೀ ವಯ್ರ್ ಆಸಾತ್. ಪಳೆಯಾ, ಸಾಕ್ಸ್ ದಿಯಾ ಆನಿ ಪಾತಿಯೆಯಾ.’
ಜಮ್ಯಾಂತ್ ಪರ್ತ್ಯಾನ್ ವೆಗ್ಳ್ಯಾಚ್ ರಿತಿಚ್ಯೊ ಬೋಬೊ ಜಾಲ್ಯೊ. ‘ಆಮ್ಕಾಂ ದಿಸ್ತಾ ಆನಿ ಆಮಿ ಪಾತಿಯೆತಾಂವ್. ಹೊಗ್ಳಾಪ್ ತುಕಾ ಪವಿತ್ ಅತ್ಮ್ಯಾ.’
‘ಹಾಂವ್ ಸಾಲ್ವಾರ್ ಜಾಲೊ!’ ಟೇಯ್ಲರಾಚ್ಯಾ ಹಾತಾಂತ್ಲೆಂ ಮಾಯ್ಕ್ ವೋಡ್ನ್ ಕಾಡ್ನ್ ಜೆರೊಮಾನ್ ಮ್ಹಳೆಂ. ‘ಮ್ಹಜೊ ಅತ್ಮೊ ಇಂಚಾನ್ ಇಂಚ್ ಯೆಮ್ಕೊಂಡಾಥಾವ್ನ್ ವಯ್ರ್ ಯೆತಾ, ಭಾಯ್ರ್ ಯೆತಾ. ಸರ್‍ವ್ ಬಂದಡ್ಯೊ ಸುಟ್ಲ್ಯೊ, ಮ್ಹಜೆಂ ಮಿಸಾಂವ್ ಜ್ಯಾರಿ ಜಾತೆಲೆಂ……’
ಹ್ಯಾ ಉತ್ರಾಂ ಬರಾಬರ್ ಜೆರೊಮ್ ಪರ್ತ್ಯಾನ್ ಧರ್‍ಣಿಕ್ ಶೆವ್ಟಾಲೊ.
‘ಘಾಬರ್ನಾಕಾತ್ ತುಮಿ!’ ಜೆರೊಮಾನ್ ಗಳಯಿಲ್ಲೆಂ ಮಾಯ್ಕ್ ವಿಂಚ್ಲೆಂ ಟೇಯ್ಲರಾನ್. ‘ತುಮ್ಚ್ಯಾ ಭಾವಾಕ್ ಕಾಂಯ್ ಜಾಂವ್ಕ್ ನಾ. ಪವಿತ್ ಅತ್ಮ್ಯಾಚೊ ದಾವ್ ಇತ್ಲೊ ಆಸಾಕಿ ತುಮ್ಚೊ ಭಾವ್ ಸಗ್ಳೊಚ್ ತೊವುನ್ ಗೆಲಾ.’ ಎಕ್ ಲಾಂಬ್ ಉಸ್ವಾಸ್ ತಾಣೆ ಸೊಡ್ಲೊ. ‘ಹಾಂವ್ ಆತಾಂ ವಿನತಿ ಕರ್‍ತಾಂ ತುಮ್ಚೆಲಾಗಿಂ….ಮೌನ್ ಜಾಯಾ……ಹಾಂಗಾಸರ್ ಭಲಾಯ್ಕೆಚಿಂ ಅಜಾಪಾಂ ಜಾಂವ್ಚ್ಯಾರ್ ಆಸಾತ್….ಪವಿತ್ ಅತ್ಮ್ಯಾ ದೀ ಮ್ಹಾಕಾ ತುಜೆಂ ತ್ರಾಣ್.’ ಜಮ್ಯಾಂತ್ ಪರಿಪೂರ್‍ಣ್ ಮೊನೆ ದೆಂವ್ಲೆಂ. ‘ಆಸಾ ಹ್ಯಾ ಜಮ್ಯಾಂತ್ ಎಕ್ಲಿ,’ ಆಪ್ಲ್ಯಾ ಲಾಂಬ್ ದಗ್ಲ್ಯಾಚ್ಯಾ ಬಲ್ಸಾಂನಿ ಹಾತ್ ಘಾಲುನ್ ಟೇಯ್ಲರಾನ್ ಪರ್ತ್ಯಾನ್ ಸುರು ಕೆಲೆಂ. ‘ತಿ ಗೊಯ್ಟರ್ ಪಿಡೆನ್ ಕಷ್ಟತಾ. ತಿಚೊ ಗೊಮ್ಟೊ ಸುಜ್ಲಾ. ಧಯ್ರ್ ಘೆ ಭಯ್ಣಿ, ಪವಿತ್ ಅತ್ಮೊ ತುಜೆರ್ ದೆಂವ್ಲಾ ಆನಿ ತುಜಿ ಪಿಡಾ ನಪಂಯ್ಚ್ ಜಾತೆಲಿ. ಮುಕಾರ್ ಯೆ ಆನಿ ಸಾಕ್ಸ್ ದೀ.’
ಜಮ್ಯಾಂತ್ಲ್ಯಾನ್ ಮೊಟಿಚ್ಚ್ ಎಕ್ಲಿ ಫುಡೆಂ ಸರ್‍ಲಿ. ತಿಚಿ ಮೊಟಾಯ್ ಅಶಿ ಆಸ್‌ಲ್ಲಿಕಿ ಭುಜಾಂ ಥಾವ್ನ್ಂಚ್ ತಿಚೊ ಗೊಮ್ಟೊ ಕಿರ್‍ಲಾಲ್ಲೆಪರಿಂ ದಿಸ್ತಾಲೊ. ಟೇಯ್ಲರಾನ್ ತಿಕಾ ವಯ್ರ್ ಆಪಯ್ಲೆಂ ಆನಿ ಮಾಯ್ಕ್ ತಿಚ್ಯಾ ಹಾತಾಂತ್ ದಿಲೆಂ. ‘ಆತಾಂ ಸಾಕ್ಸ್ ದಿ!’ ತಿಚ್ಯಾ ಗೊಮ್ಟ್ಯಾರ್ ಹಾತ್ ದವರುನ್ ತಾಣೆ ಹುಕುಮ್ ದಿಲಿ.
‘ಪವಿತ್ ಅತ್ಮ್ಯಾನ್ ಮ್ಹಾಕಾ ಆಪಡ್ಲಾಂ,’ ತಿ ಮ್ಹಳೆಂ. ‘ಹಾಂವ್ ಪಾತಿಯೆತಾಂ. ಮ್ಹಜಿ ಸುಜ್ ಆತಾಂ ಖಿರೊನ್ ತಾಳ್ಯಾಂತ್ಲ್ಯಾನ್ ದೆಂವೊನ್ ವೆಚಿ ಮ್ಹಾಕಾ ಕಳ್ಟಾ. ಹಿಚ್ಚ್ ಮ್ಹಜಿ ಸಾಕ್ಸ್.’
‘ಸಮಾಧಾನಾನ್ ವಚ್!’ ತಾಣೆ ಮ್ಹಳೆಂ.
ತಿತ್ಲ್ಯಾರ್, ಜೆರೊಮ್ ಪರ್ತ್ಯಾನ್ ಸನಿನ್ ಜಾವ್ನ್ ಆಪ್ಲೆ ಬಸ್ಕೆರ್ ಬಸ್‌ಲ್ಲೊ.
‘ಹಾಂಗಾಸರ್ ಸಯ್ತಾನ್ ಲಾಗ್‌ಲ್ಲಿ ಎಕ್ಲಿ ಆಸಾ!’ ನವ್ಯಾನ್ ಸುರು ಕೆಲೆಂ ಟೇಯ್ಲರಾನ್. ‘ಹಿ ತಿಚಿ ಚೂಕ್ ನ್ಹಯ್ ಪುಣ್ ಕುಟ್ಮಾಂತ್ ಆಸ್‌ಲ್ಲ್ಯಾ ಮೂಡ್ ಪಾತ್ಯೆಣ್ಯೊ ತಿಚ್ಯಾ ಕಷ್ಟಾಂಕ್ ಕಾರಾಣ್ ಜಾವ್ನಾಸಾ. ಮುಕಾರ್ ಸರ್ ತಿಕಾ ಧೊಸ್ಚ್ಯಾ ಸಯ್ತಾನಾ!’ ಟೇಯ್ಲರಾಚೊ ತಾಳೊ ಆತಾಂ ಬಿರಾಂಕುಳ್ ಜಾಲ್ಲೊ ಆನಿ ತಾಚೆಂ ಸರ್‍ವಾಂಗ್ ಕಾಂಪ್ತಾಲೆಂ. ‘ಪವಿತ್ ಅತ್ಮ್ಯಾಚ್ಯಾ ನಾಂವಾನ್ ಹಾಂವ್ ತುಕಾ ಫರ್‍ಮಾಯ್ತಾಂ…ಮುಕಾರ್ ಯೆ.’
ಜಮ್ಯಾ ಮದೆಂ ಎಕ್ ಬಿರಾಂಕುಳ್ ಕಿಂಕ್ರಾಟ್ ಉಟ್ಲಿ ಆನಿ ಎಕ್ಲಿ ತರ್‍ನಾಟಿ ಚಲಿ, ಕೇಸ್ ಬಿಸ್ಳೆ ಕರುನ್ ಪಂತಾಟ್ ಧಾಂವ್ಚೆಪರಿಂ ವೇದಿಲಾಗಿಂ ಧಾಂವೊನ್ ಆಯ್ಲಿ. ತಿಕಾ ತಾಬೆಂತ್ ಧರುಂಕ್ ತಿಚೆ ಪಾಟ್ಲ್ಯಾನ್ ಧಾಂವೊನ್ ಆಯಿಲ್ಲೆ ದೋಗ್ ತರ್‍ನಾಟೆ ಸಲ್ವೊನ್ ಪಾಟಿಂ ಉರ್‍ಲೆ.
‘ಸೊಡಾ ತಿಕಾ!’ ಟೇಯ್ಲರಾನ್ ಮ್ಹಳೆಂ. ‘ಯೆಂವ್ ತಿ ಮ್ಹಜೆ ಸರ್‍ಶಿಂ. ಚಡೊಂದಿ ವೇದಿಚಿಂ ಮೆಟಾಂ.’ ತಿ ಚಲಿ ವೇದಿಚಿಂ ಮೆಟಾಂ ಚಡ್ಲಿ ಆನಿ ದಾಂತ್ ಖಿರ್‍ಲೊನ್ ಟೇಯ್ಲರಾ ಸಾಮ್ಕಾರ್ ಉಬಿ ಜಾಲಿ.
‘ಕೋಣ್ ತುಂ?’ ಛಾಟಿಯೆಚ್ಯಾ ಮಾರಾಪರಿಂ ಟೇಯ್ಲರಾನ್ ಸವಾಲ್ ಉಡಯ್ಲೆಂ.
‘ತುಜೊ ಬಾಪಯ್, you motherfucker!’ ತಾಚ್ಯಾ ಮುಕಮಳಾಕ್ ಥುಕೊನ್ ಜಾಪ್ ದಿಲಿ ತ್ಯೆ ಚಲಿಯೆನ್.
‘ಸಯ್ತಾನಾಚಿ ಭಾಸ್ ತಿ ಉಲಯ್ತಾ!’ ಜಮ್ಯಾಕ್ ಕಳಯ್ಲೆಂ ಟೇಯ್ಲರಾನ್. ‘ಭಿಯೆಂವ್ಚಿ ಗರಜ್ ನಾ. ಮನಾಂತ್‌ಚ್ ಪವಿತ್ ಅತ್ಮ್ಯಾಕ್ ಉಲೊ ಮಾರಿತ್ತ್ ರಾವಾ.’ ಉಪ್ರಾಂತ್ ತಾಣೆ ಆಪ್ಲೆಂ ಗಮನ್ ತ್ಯೆ ಚಲಿಯೆಚೆರ್ ಖಂಚಯ್ಲೆಂ.
‘ಹೆ ಚಲಿಯೆಕ್ ಕಿತ್ಯಾಕ್ ಧೊಸ್ತಾಯ್?’
‘ಮ್ಹಾಕಾ ಬರೆಂ ಲಾಗ್ತಾ! ತಿಚಿ ಪುಸ್ಸಿ ಮ್ಹಾಕಾ ಬರಿ ಜಾತಾ.’
‘ತೊಂಡ್ ಧಾಂಪ್, ಸಯ್ತಾನಾ!’
ತಿ ಚಲಿ ಕಿಟಿಕಿಟಿ ಕರುನ್ ಹಾಸ್ಲಿ. ‘ತುಜೆ ಮತಿಂತ್ ಕಿತೆಂ ಘುಂವ್ತಾ ಮ್ಹಣ್ ಹಾಂವ್ ಜಾಣಾಂ, ರೆವರೆಂಡ್ ಫ್ರೆಡ್ ಟೇಯ್ಲರ್. ಕಿತೆಂಯಿ ಮ್ಹಳ್ಯಾರೀ ತುಂ ಮ್ಹಜೊಚ್ಚ್ ಪುತ್. ಹ್ಯೆ ಘಡಿಯೆ ಮ್ಹಾಕಾ ಸೊಲ್ನ್ ಖಾಂವ್ಚೆಪರಿಂ ಪಳೆತಾಯ್. ಕೊಣಾಕ್ ಫಟಯ್ತಾಯ್ ದಗಲ್ಬಾಜ್ಯಾ?’
‘ತುಂ ವೆತಾಯ್ ಯಾ ನಾ?’
‘ವಚಾನಾ. ಕಿತೆಂ ಕರ್‍ತಾಯ್?’ ತಿಣೆ ವಿಚಾರ್‍ಲೆಂ ತ್ಯಾ Exorcist ಫಿಲ್ಮಾಂತ್ ಕೆಲ್ಲೆಪರಿಂ ಸಾಂತಾಂಚೆಂ ಮೂತ್ – ಆಗ್ಮೆಂತ್ – ಮ್ಹಜೆರ್ ಶಿಂಪ್ಡಾಯ್ತಾಯ್?’
‘ಪವಿತ್ ಅತ್ಮ್ಯಾಚಿ ಸಕತ್ ಖಂಚಾಯಿ ಆಗ್ಮೆಂತಾಕ್ ವಿಕ್ವಾತಾ ಮ್ಹಣ್ ಜಾಣಾಂ ಜಾ!’ ಹಿಂ ಉತ್ರಾಂ ಆಕೇರ್ ಜಾಯ್ಜೆ ಜಾಲ್ಯಾರ್ ಝಗ್ಲಾಣ್ಯಾ ವೇಗಾನ್ ಟೇಯ್ಲರಾನ್ ತಿಚೊ ಗೊಮ್ಟೊ ಧರ್‍ಲೊ. ಪಾಂಚ್‌ಚ್ ಖಿಣಾಂ ಬಿತರ್ ತಿ ಚಲಿ ಮತಿಹೀನ್ ಜಾವ್ನ್ ಶೆವ್ಟಾಲಿ.
‘ತಿಕಾ ಸುಟ್ಕಾ ಲಾಬ್ಲಿ!’ ಬೊಬಾಟ್ಲೊ ಟೇಯ್ಲರ್.
‘ತುಜೊ ಜೂಡೋ ಹೋಲ್ಡ್ ಫಲ್ಸಾಲೊ!’ ಆಪ್ಲೆ ಮತಿಂತ್‌ಚ್ ಉದ್ಗಾರ್‍ಲೊ ಸಿಸೆರೊ.
‘ಆತಾಂ ತಿಕಾ ವ್ಹರಾ,’ ಟೇಯ್ಲರಾನ್ ಸುಚನ್ ದಿಲೆಂ. ತಿಚ್ಯಾ ಘರ್ದಾರಾಂಚ್ಯಾಂನಿ ತಿಕಾ ಉಕ್ಲೊನ್ ವೆಲೆಂ.
ಹೆಚ್‌ಪರಿಂ ಟೇಯ್ಲರಾಚಿಂ ‘ಅಜಾಪಾಂ’ ಎಕ್ ಘಂಟೊಭರ್ ಚಲ್ಲಿಂ. ಉಪ್ರಾಂತ್ ನಿರ್ವಾಹಕ್ ಸಿಸೇರೊನ್ ಮಾಯ್ಕ್ ಘೆತ್ಲೆಂ. ‘ಆಯ್ಚಿ ಜಮಾತ್ ಸಂಪ್ಲಿ!’ ತಾಣೆ ಕಳಯ್ಲೆಂ ‘ಆತಾಂ ರೆವರೆಂಡ್ ಟೇಯ್ಲರ್, ಫಾಲ್ಯಾಂಚಿ ತಯಾರಾಯ್ ಕರ್‍ಚೆ ಖಾತಿರ್ ವೇದಿಚೆರ್ ಆಸ್‌ಲ್ಲ್ಯಾಂ ಸಾಂಗಾತಾ ಆಪ್ಲ್ಯಾ ಕೆಬಿನಾಕ್ ವೆತೊಲೊ.’
ಜಮ್ಯಾಚೆರ್ ಹಾತ್ ಉಬಾರೋನ್ ಟೇಯ್ಲರ್ ಬಿತರ್ ಗೆಲೊ. ವೇದಿಚೆರ್ ಆಸ್‌ಲ್ಲೆ, ಸಿಸೇರೊಕ್ ಸೊಡ್ನ್ ಟೇಯ್ಲರಾಚೊ ಪಾಟ್ಲಾವ್ ಕರಿತ್ ಬಿತರ್ ಗೆಲೆ.
‘ಪವಿತ್ ಅತ್ಮ್ಯಾನ್ ಭರ್‌ಲ್ಲ್ಯಾಂನೊ,’ ಮುಂದರಿಲೆಂ ಸಿಸೇರೊನ್. ‘ಹೆಂ ಮಿಸಾಂವ್ ಚಾಲು ದವರಿಜೆ ತರ್ ದುಡ್ವಾಚಿ ಗರಜ್ ಆಸಾ ಕಿತ್ಯಾಕ್ ಹೆಂ ಮಿಸಾಂವ್ ಸಂಸಾರಾಂತ್‌ಚ್ ಆಮಿ ಚಲಯ್ತಾಂವ್. ಆಮ್ಚೆ ಸ್ವಯಂ ಸೇವಕ್-ಸೇವಕಿಂ ಧವೆ ಕಂರ್‍ಡೆ ಘೆವ್ನ್ ತುಮೆ ಮಧೆಂ ಯೆತೆಲಿಂ….’
ಪೆಟ್ರೋಸ್ಟೇಟಾನ್ ಭಾವಾರ್ಥಾಚಿ ಉಡ್ಕಿ ಮಾರ್‌ಲ್ಲಿ!
‘ತುಂ ಯೆಂವ್ಕ್‌ನಾಂಯ್?’ ಮೊದ್ಯಾನೆ ನಂತರ್, ಮೆಲ್ಕಮ್ ಆನಿ ತೆಲ್ಮಾಲಾಗಿಂ ಗುಪಿತ್ ಕಸಲೆಂಗೀ ಉಲವ್ನ್ ಜಾತೆಚ್ ಜೆರೊಮ್ ಘಾರಾ ಆಯಿಲ್ಲೊ ಆನಿ ತವಳ್ ಈವಾಲಾಗಿಂ ತಾಚೆಂ ಪ್ರಥಮ್ ಸವಾಲ್ ಹೆಂಚ್.
‘ಆಯಿಲ್ಲಿಂ ಪುಣ್ ನಿಮಾಣ್ಯಾ ಫಂಗ್ತೆರ್ ಆಸ್‌ಲ್ಲಿಂ.’
‘ಕಿತೆಂ ಪಳೆಲೆಂಯ್? ಕಾಂಯ್ ಖೂಬ್ ಹಾಸ್ಲೆಂಯ್ ದಿಸ್ತಾ.’
‘ತುಜೆಂ ಸಾಲ್ವರ್‍ಪಣ್ ಪಳೆಲೆಂ,’ ತಾಣೆ ಮ್ಹಳೆಂ ಶಾಂತ್ ತಾಳ್ಯಾನ್. ‘ಹಾಂವ್ ತುಜೆ ಸಂಗಿಂ ಆಸಾಂ ಮ್ಹಣ್ ಹಾಂವೆಂ ಪಯ್ಲೆಂಚ್ ತುಕಾ ಸಾಂಗ್ಲಾಂ, ಜೆರೊಮ್.’
‘ಆಮಾಲಿಂಕ್ ಆಪಯ್ತಾನಾ ಮುಕಾರ್ ಕಿತ್ಯಾಕ್ ಆಯ್ಲೆಂನಾಂಯ್?’
‘ಮ್ಹಜೆಂ ಆಮಾಲ್ ದೆಂವ್ಲಾಂ, ಜೆರೊಮ್.’
‘ದೆಂವ್ಲಾಂ ಪುಣ್ ಸುಟೊಂಕ್ ನಾ.’
‘ಪುಣ್ ತುಜಿ ಜೀಬ್ ಆಡ್ ಪಡ್ತಾ, ಜೆರೊಮ್!’ ಈವಾಚೆಂ ದುರ್‍ಸವ್ಣೆ ಆಯ್ಕೊನ್ ಜೆರೊಮ್ ಉಸ್ಮಡ್ಲೊ.
‘ಪವಿತ್ ಅತ್ಮ್ಯಾಚ್ಯಾ ಆಮಾಲಾನ್!’ ತಾಣೆ ಮ್ಹಳೆಂ. ‘ಫುಡ್ಲ್ಯಾ ಸ ಜಮಾತಿಂಕ್ ತುಂವೆಂ ಯೇಜೆ.’
‘ಜಾಯ್ತ್, ಜೆರೊಮ್.’ ಶಾಂತ್ ತಾಳ್ಯಾನ್ ಮ್ಹಣಾಲೆಂ ಈವಾ.
ಈವಾಚೆ ವಿದೇಯ್‌ಪಣ್ ಜೆರೊಮಾಕ್ ಭಿರಾಂತ್ ಹಾಡಿಲಾಗ್ಲೆಂ.
***
‘ತುಂ ಯೆಂವ್ಕ್‌ನಾಂಯ್?’ ಆಪ್ಲ್ಯಾ ಮುಕಮಳಾರ್ ಜಾತಾತಿತ್ಲೊ ಪೊಕ್ರಿ ಹಾಸೊ ಘೆವ್ನ್ ಒಸಿಸಾಕ್ ಆಯಿಲ್ಲ್ಯಾ ಹೆಲೀನಾನ್ ರಿಚರ್ಡಾಕ್ ಸವಾಲ್ ಉಡಯ್ಲೆಂ. ತೊ ಸಕಾಳಿಂಚಿ ಕೊಫಿ ಸೆವ್ತಾಲೊ ಆನಿ ‘ಪೆಟ್ರೋಟಾಯ್ಮ್ಸ್’ ವಾಚ್ತಾಲೊ. ಆಪ್ಲೆಚ್ ಹಾಳ್ವಾಯೆನ್ ತಾಣೆ ಹೆಲೀನಾಕ್ ಪಳೆಲೆಂ
‘ನವೆಂ ಸರ್‍ಕಸ್ ಆಯ್ಲಾಂ?’
‘ಹೊ ಪರ್‍ದೆಶಾ!’ ತಾಣೆ ಮ್ಹಳೆಂ ಕಳ್ವಳೋನ್. ‘ಫ್ರೆಡ್ ಟೇಯ್ಲರ್, ಫ್ರೆಡ್ ಟೇಯ್ಲರ್, ಭೆಂಕ್ರ್ಯಾ.’
‘ಹೊ ತೊ? ಆಯಿಲ್ಲೊಂ ಆಯಿಲ್ಲೊಂ’ ರಿಚರ್ಡಾನ್ ಮ್ಹಳೆಂ. ತಿತ್ಲ್ಯಾರ್ ಕಪ್ ವ್ಹರುಂಕ್ ಮಿಸೆಸ್ ಗೊಮಿಸ್ ಭಿತರ್ ಆಯ್ಲಿ. ‘ಪುಣ್ ಇಂಟವಲ್ ಜಾತಾನಾ ಉಟೊನ್ ಗೆಲೊಂ.’ ತೊ ಹಾಸ್ಲೊ.
‘ಕಿತ್ಯಾಕ್? ಭಾವಾರ್ಥಾ ವಿರೋದ್ ತೊ ಕಾಂಯ್ ಉಲಂವ್ಕ್ ನಾ.’ ಆಪ್ಲೆ ದೊಳೆ ಪರ್‍ಜಳೀಕ್ ಕರುನ್ ಮ್ಹಣಾಲೆಂ ಹೆಲೀನಾ.
‘ಮಾಮ್ಮಿ ಕಿತೆಂ ಮ್ಹಣಾಲಿ?’ ರಿಚರ್ಡಾನ್ ಉತ್ರಾಂನಿ ತಾಕಾ ತೊಪ್ಲೆಂ. ‘ಫಾದರ್ ಜೊನಾಕ್ ಆಪಯ್ಜೆ ಆಸ್‌ಲ್ಲೆಂ.’
‘ನಾಸ್ತಿಕ್ ತುಂ!’ ತೆಂ ದುರ್‍ಸಾಲೆಂ ವ್ಯಕ್ತ್ ನಕ್ಲಿಪಣಾನ್. ‘ಸಗ್ಳೆಂ ಪೆಟ್ರೋಸ್ಟೇಟ್ ಉಮಾಳ್ತಾನಾ ತುಂ….’
‘ತುಜ್ಯಾ ಫ್ರೆಡ್ ಟೇಯ್ಲರಾಚೆಂ ನಕ್ಲಿಪಣ್ ಪಾಂಚ್‌ಚ್ ಮಿನುಟಾಂ ಭಿತರ್ ಪ್ರಗಟ್ ಕರುಂಕ್ ಹಾಂವ್ ಸಕ್ತಾಂ, ಹೆಲೀನಾ!’ ತಾಣೆ ಮ್ಹಳೆಂ. ‘ಅಶೆಂ ಕರುಂಕ್ ಸಕ್ಚೆ, ಜಮ್ಯಾಂತ್ ಹೆರ್ ಆಸ್‌ಲ್ಲೆ, ಖಂಡಿತ್.’
ಮಿಸೆಸ್ ಗೊಮಿಸಾನ್ ಹಳ್ಟಾಚಿ ಖೊಂಕ್ಲಿ ಕಾಡ್ಲಿ.
‘ಹಾಂವ್ ತುಜೆತಿತ್ಲಿಂ ಶಿಕ್ಪಿ ನ್ಹಯ್, ಜಾಣಾರಿಯಿ ನ್ಹಯ್, ಮಿ|ಕ್ಲೆಮೆಂಟ್.’ ತಿಣೆ ಮ್ಹಳೆಂ. ‘ಪುಣ್ ಮ್ಹಾಕಾ ಪವಿತ್ ಅತ್ಮ್ಯಾನ್ ಆಪಡ್ಲೆಲೆಪರಿಂಚ್ ಭೊಗ್ಲೆಂ.’
ರಿಚರ್ಡಾನ್ ಆನಿ ಹೆಲೀನಾನ್ ಯೆಕಾಮೆಕಾ ದಿಷ್ಟಿ ದಿಲ್ಯೊ ಪುಣ್ ಕಿತೆಂಚ್ ಮ್ಹಳೆಂ ನಾ. ತಿ ಭಾಯ್ರ್ ವೆತೆಚ್ ತಿಚ್ಯಾ ಪಾಟ್ಲ್ಯಾನ್ ಕಿತೆಂಯಿ ಉಲಂವ್ಚೆಂ ಸಭ್ಯ್ ನ್ಹಯ್ ಮ್ಹಳ್ಳೆಂ ಪ್ರಞಾನ್ ಆಸ್ಚೆಂ ಹೆಲೀನಾ ರಿಚರ್ಡಾಕ್ ಬರೊ ದೀಸ್ ಮಾಗುನ್ ಭಾಯ್ರ್ ಗೆಲೆಂ.
***
ದನ್ಪಾರ್ ಜಾತಾ ಪರ್‍ಯಾಂಯ್ ತೀನ್ ಪಾವ್ಟಿಂ ಜೆರೊಮ್ ರಿಚರ್ಡಾಕ್ ಮುಕಾಮುಖಿಂ ಮೆಳ್ಳೊ ತರಿ ತಾಂಚೆ ಮಧೆಂ ‘ಹಲ್ಲೊ’ ಸೊಡ್ಲ್ಯಾರ್ ಹೆರ್ ಕಸಲೆಂಚ್ ಉಲವ್ಣೆಂ ಚಲ್ಲೆಂ ನಾ. ಮೆಥ್ಯುಚ್ಯಾ ದಫ್ತರಾಕ್ ರಿಚರ್ಡ್ ದೋನ್ ಪಾವ್ಟಿಂ ಗೆಲ್ಲೊ ಆನಿ ಚುಕೊನ್ ಗೆಲ್ಲ್ಯಾ ಟೆಂಡರಾಚೊ ಉಲ್ಲೇಕ್ ತಾಣೆ ಕೆಲ್ಲೊ, ವಯ್ಲ್ಯಾಭಾಯ್ರ್. ಪುಣ್ ಮೆಥ್ಯುನ್ ರಾಗಾನ್ ಗಾಲ್ಪುಟಾಂ ಫುಗಯ್ಲಿಂ ನಾಂತ್. ಟೆಂಡರ್ ಮ್ಹಳ್ಳೆ ಜುಗಾರೆಂತ್ ಅಶೆಂ ಘಡ್ತಾತ್‌ಚ್, ತಾಣೆ ಮ್ಹಳೆಂ. ಹೆರ್ ವಯ್ವಾಟ್ ಬರೊ ಆಸ್‌ಲ್ಲ್ಯಾನ್ ಒಸಿಸಾಕ್ ಕಸಲೆಚ್ ವಾಂದೆ ನಾತ್‌ಲ್ಲೆ. ಕಿತೆಂಗೀ, ಟೇಯ್ಲರಾಚೊ ಉಲ್ಲೇಕ್ ಮೆಥ್ಯುನ್ ಕೆಲೊ ನಾ.
ದನ್ಪಾರಾಂಚಿಂ ಸಾಡೆ-ಬಾರಾ ಉತರ್‍ತಾನಾ ಸ್ವಿಚ್‌ಬೋರ್‍ಡಾಥಾವ್ನ್ ಫೋನ್‌ಕೊಲ್ ಆಯ್ಲಾಂ ಮ್ಹಣ್ ಸುಚಾವ್ನ್ ರಿಚರ್ಡಾಚ್ಯಾ ಟೆಲಿಫೋನಾಚೊ ದಿವೊ ಜಳ್ಳೊ. ಬುತಾಂವ್ ದಾಂಬೂನ್ ತಾಣೆ ರಿಸೀವರ್ ಕಾನಾಕ್ ಲಾಯ್ಲೆಂ.
‘ಯೆಸ್, ತೆಲ್ಮಾ!’ ತಾಣೆ ಮ್ಹಳೆಂ.
‘ಫೋನ್‌ಕೊಲ್ ಮಿ|ಕ್ಲೆಮೆಂಟ್’ ತೆಲ್ಮಾನ್ ಕಳಯ್ಲೆಂ, ಆಪ್ಲ್ಯಾ ಸದಾಂಚ್ಯಾ ಸಾಕ್ರಿ-ಮೆಲಾ ತಾಳ್ಯಾನ್. ‘ಮಿಸ್ ರಮೋನಾ ಲಾಯ್ನಿರ್ ಆಸಾ!’ ಎಕೇಕ್‌ಚ್ ಉತಾರ್, ಮೆಜುನ್ ಮ್ಹಳ್ಳೆಪರಿಂ ತಾಣೆ ಗಳಯ್ಲೆಂ.
ಪಾಂಚ್ ಖಿಣಾಂ ಪರ್ಯಾಂತ್ ರಿಚರ್ಡ್ ಉಲಯ್ಲೊ ನಾ.
ರಮೋನಾ ಲಿಯೊ?
‘Give the line, Thelma.’ ಉಪ್ರಾಂತ್ ತಾಣೆ ಮ್ಹಳೆಂ.
ಕ್ಲಿಕ್
‘ರಿಚರ್ಡ್ ಹಾಂಗಾಸರ್!’ ಆಪ್ಲಿ ತಾಳೊ ಚಿಕ್ಕೆಸೆ ದಾಟ್ ಜಾಲ್ಲೆಪರಿಂ ತಾಕಾ ಭೊಗ್ಲೆಂ.
‘ಹಾಂವ್ ರಮಿ; ಹಾಯ್ ರಿಚರ್ಡ್!’
‘ಹಾಯ್, ರಮಿ!’ ತಾಣೆ ಚತ್ರಾಯೆನ್ ಜಾಪ್ ದಿಲಿ.
‘ತುಂ ಯೆಂವ್ಕ್‌ನಾಂಯ್?’
ತೊ ಹಾಸ್ಲೊ. ‘ಹೆಂ ಸವಾಲ್ ಆಜ್ ದುಸ್ರ್ಯೆ ಪಾವ್ಟಿಂ ಹಾಂವೆಂ ಆಯ್ಕೊಂಚೆಂ.’ ತಾಣೆ ಮ್ಹಳೆಂ.
‘Oh! com’on man!’ ರಮೋನಾನ್ ಮ್ಹಳೆಂ. ‘ಪಯ್ಲೆಂ ಕೊಣಾಥಾವ್ನ್?’
‘ಹೆಲೀನಾ.’
‘How sweet, miss goody-shoes! ತಾಕಾ ದಿಲ್ಲಿಚ್ ಜಾಪ್ ದಿತಾಯ್?’
‘ಆಯಿಲ್ಲೊಂ ಪುಣ್ ಇಂಟರ್‌ವಲ್ ಜಾತಾನಾ ಉಟೊನ್ ಗೆಲೊಂ.’
‘ಕಿತ್ಯಾಕ್? ಹಾಂವ್ ಸೆಕ್ಸಿ ದಿಸನಾತ್‌ಲ್ಲಿಂ?’
‘Come on, Ramona!’
‘I’m coming!’ ರಮೋನಾನ್ ಜಾಪ್ ದಿಲಿ. ‘ಆಯ್ಚಿ ಜಮಾತ್ ಜಾಲ್ಯಾ ಉಪ್ರಾಂತ್ ಮ್ಹಾಕಾ ತುಕಾ ಮೆಳಾಜೆ.’
‘ಮ್ಹಾಕಾ ಜಮಾತೆಕ್ ಯೆಂವ್ಚಿ ಕಸಲಿಚ್ ಆಲೋಚನ್ ನಾ.’
‘ನೊ ಪ್ರೊಬ್ಲೆಮ್! ಸಾಡೆ-ಧಾ-ಂಕ್ ಡೆಡಿಚ್ಯಾ ಬೀಚ್ ಕೊಟೆಜಿಕ್ ಯೆ.’
‘ಮತ್ಲಬ್ ಕಸಲೊ, ರಮಿ?’
‘I won’t rape you!’ ರಮೋನಾನ್ ಮ್ಹಳೆಂ ಆಪ್ಲ್ಯಾ ಖಿಣ್ಕುಳ್ಯಾ ತಾಳ್ಯಾನ್.
‘ಟೇಯ್ಲರಾಚೊ ಪ್ರಭಾವ್ ಚಡ್ ಜಾಲೊ?’
‘ಹಾಂವ್ ನೆಣಾಂ ಪುಣ್ ಆಜ್ ಮ್ಹಾಕಾ ತುಜೊ ಸಾಂಗಾತ್ ಜಾಯ್.’
ಕ್ಲಿಕ್
ಆಪ್ಲ್ಯಾ ಗೊವೆತಾಂತ್ಲೆ ಲಂಚ್ ಕುಪನ್ ಕಾಡುನ್, ಶೂನ್ಯ್ ಮೋತ್ ಘೆವ್ನ್ ರಿಚರ್ಡ್ ಕೆಫೇಟೇರಿಯಾಕ್ ಗೆಲೊ.
***
ರಮೋನಾನ್ ಲಾಯ್ನ್ ತುಟಯಿಲ್ಲ್ಯಾ ಪಾಂಚ್‌ಚ್ ಮಿನುಟಾಂ ಭಿತರ್ ತೆಲ್ಮಾ, ಜೆರೊಮಾಚ್ಯಾ ಕೆಬಿನಾಕ್ ಆಯ್ಲೆಂ.
‘You are a lucky bastard!’ ತಾಣೆ ಮ್ಹಳೆಂ. ‘ಆಯ್ಚೆ ರಾತಿಂ ರಿಚರ್ಡ್ ಆನಿ ರಮೋನಾ ಸಾಂಗಾತಾ ಮೆಳ್ತಾತ್.’
ಜೆರೊಮಾಚೆ ದೊಳೆ ಭಾಯ್ರ್ ಆಯ್ಲೆ.
‘ಖಂಯ್ಸರ್?’
‘ಮೆಥ್ಯುಚ್ಯಾ ಬೀಚ್ ಕೊಟೆಜಿಂತ್!’
‘ಥೆಂಕ್ಸ್.’
‘ವ್ಹಾ! ಆಕ್ರೇಕ್ ತರಿ ತುಜ್ಯಾ ವೊಂಟಾಂಥಾವ್ನ್ ಥೆಂಕ್ಸ್?’ ತೆಂ ಆಂಬೊಟ್ಲೆಂ. ‘ತ್ಯಾ ಟೇಯ್ಲರಾನ್ ಖಂಡಿತ್ ಜಾವ್ನ್ ತುಕಾ ಸಾಲ್ವಾರ್ ಕೆಲಾ.’ ತೆಂ ಕಿತೆಂಗೀ ಸೊದ್ಚೆಪರಿಂ ಹೆಣೆತೆಣೆ ಪಳೆಲಾಗ್ಲೆಂ. ‘ಆಮಿ ಖಂಯ್ಸರ್ ಮೆಳ್ಚೆಂ, ಡಾರ್‍ಲಿಂಗ್?’
‘Get out you bitch!’
ತೆಲ್ಮಾ ಆಪ್ಲಿಂ ಭುಜಾಂ ಆನಿ ಸ್ಥನಾಂ ಹಾಲವ್ನ್ ಭಾಯ್ರ್ ಗೆಲೆಂ.
ತೆಂ ವಚುನ್ ಧಾ ಮಿನುಟಾಂ ಉತರ್ಲ್ಯಾ ಉಪ್ರಾಂತ್ ಸಕಯ್ಲ್ ವಚುನ್ ಎಕಾ ಪಬ್ಲಿಕ್ ಫೋನ್ ಬೂತಾಥಾವ್ನ್ ಜೆರೊಮ್, ಮೆಲ್ಕಮಾಲಾಗಿಂ ಉಲಯ್ಲೊ.
‘ಆನಿ ಚಾರ್ ದಿಸಾಂ ಭಿತರ್ ಸರ್‍ವ್ ತಯಾರ್ ಆಸಾಜೆ!,’ ತಾಣೆ ಹುಕುಮ್ ದಿಲಿ ಮೆಲ್ಕಮಾಕ್. ‘ಆಯ್ಚೆ ರಾತಿಂ ತುಂವೆಂ ಬೀಚ್ ಕೊಟೆಜಿಕ್ ಧಾಡ್ಚೊ ಫೊಟೊಗ್ರಾಫರ್ ಎಕ್ದಮ್ ಪ್ರೊಫೆಶನಲ್ ಆಸಾಜೆ.’
‘ಆಸ್ತೊಲೊ,’ ಮೆಲ್ಕಮಾನ್ ಮ್ಹಳೆಂ. ‘ಚಾರ್ ದಿಸಾಂ ಭಿತರ್ ತುಜಿಂ ಸರ್‍ವ್ ಮಿಸಾಂವಾಂ ಸುಫಳ್ ಜಾಂವ್ಚೆಪರಿಂ ದಿಸ್ತಾತ್.’
‘ಮತ್ಲಬ್?’
‘ಫೋನಾಚೆರ್ ಸಾಂಗೊಂಕ್ ಜಾಯ್ನಾ.’ ಮೆಲ್ಕಮಾನ್ ಲಾಯ್ನ್ ತುಟಯ್ಲಿ.
***
ಹೆಲೀನಾ, ಜೆರೊಮಾಚ್ಯಾ ಕೆಬಿನಾಚೆರ್ ದೀಷ್ಟ್ ದವರ್‍ನ್ ಆಸ್‌ಲ್ಲೆಂ. ತೆಲ್ಮಾನ್, ಜೆರೊಮಾಚ್ಯಾ ಕೆಬಿನಾಕ್ ವೆಚೆಂ ತಾಣೆಂ ಪಳೆಯಿಲ್ಲೆಂ. ತಾಂಚೆಂ ಉಲವ್ಣೆಂ ತಾಕಾ ಆಯ್ಕಾಲೆಂ ನಾ. ಧಾ ಮಿನುಟಾಂ ನಂತರ್ ಜೆರೊಮ್ ಉಟೊನ್ ಭಾಯ್ರ್ ವೆತಾನಾ ತಾಚೊ ಪಾಟ್ಲಾವ್ ಕರ್‍ಯಾಂ ಮ್ಹಣ್ ತೆಂ ಉಟ್ಲೆಂ ಸಯ್ತ್. ಪುಣ್ ಪಾಟ್ಲಾವ್ ಕರುನ್ ಕಿತೆಂ ಕರ್‍ತೆಲೆಂ? ರಿಚರ್ಡಾಲಾಗಿಂ ಇಂಟರ್‌ಕೊಮಾಚೆರ್ ಉಲಯಾಂ ಮ್ಹಣ್ ತಾಕಾ ಭೊಗ್ಲೆಂ ಪುಣ್ ಕಿತೆಂ ಉಲಂವ್ಚೆಂ? ಈವಾಕ್ ಫೋನ್ ಕರ್‍ಯಾಂ, ಮೆಥ್ಯುನ್ ಭೆಟ್ಯಾಂ, ರಮೋನಾಕ್ ಭೆಟ್ಯಾಂ ಮ್ಹಣ್ ತಾಕಾ ಭೊಗ್ಲೆಂ.
ಪುಣ್ ಕಿತ್ಯಾಕ್, ಕಿತ್ಯಾಕ್ ಆನಿ ಕಿತ್ಯಾಕ್?
ತ್ಯೆ ಘಡಿಯೆ ಆಪುಣ್ ಕಿತ್ಲಿಂ ಅಸ್ಕತ್ ಜಾಲ್ಯಾಂ ಮ್ಹಳ್ಳೆಂ ತಾಕಾ ಬರ್‍ಯಾನ್ ಕಳಿತ್ ಜಾಲೆಂ.
***
ಸಾಂಜೆಚಿಂ ಸಾಡೆ-ಚಾರ್ ಜಾತಾನಾ ಜೆರೊಮಾನ್ ಎಕ್ ನಂಬರ್ ಘುಂವ್ಡಾಯ್ಲೆಂ. ಟೇಯ್ಲರಾಚಿ ಜಮಾತ್ ಜಾಂವ್ಚೆ ಪರ್ಯಾಂತ್, ಚಾರ್ ವೊರಾಂ ಉಪ್ರಾಂತ್, ಆಪುಣ್ ತ್ಯಾ ನಂಬ್ರಾಚೆರ್ ಆಸ್ತೆಲಿಂ ಮ್ಹಣ್ ರಮೋನಾನ್ ತಾಕಾ ಕಳಯಿಲ್ಲೆಂ.
ರಿಸೀವರ್ ರಮೋನಾನ್ಂಚ್ ಉಕಲ್ಲೆಂ.
‘ರಮಿ,’ ತಾಣೆ ವರ್‍ತ್ಯಾ ಮಯ್ಪಾಸಾನ್ ಮ್ಹಳೆಂ. ‘ಸಾಂಜೆಚ್ಯಾ ಜಮಾತೆಕ್ ಸರ್‍ವ್ ತಯಾರಾಯ್ ಜಾಲ್ಯಾ?’
‘ಶುವರ್!’ ತಾಣೆ ಸಾಂಗ್ಲೆಂ ‘ಒಸಿಸಾನ್ ತುಕಾ ರಜಾ ದಿಲ್ಯಾರ್ ಬರೆಂ ಆಸ್‌ಲ್ಲೆಂ.’
‘ಪರ್‍ವಾ ನಾ!’, ಜೆರೊಮ್ ಆಪ್ಲೆ ಖೊಲೆ ಖೆಳ್ಳೊ ‘ಮ್ಹಜೊ ಅತ್ಮೊ ಕಾಪ್ಸಾಪರಿಂ ಹಳು ಜಾಲಾ. ಕಾಲ್ಚೆ ಜಮಾತಿ ಉಪ್ರಾಂತ್ ಸಬಾರ್ ದೀಸ್ ಥಾವ್ನ್ ಮ್ಹಾಕಾ ಕಾಂತವ್ನ್ ಆಸ್‌ಲ್ಲೊ ದುಬಾವ್ ಪರಿಹಾರ್ ಜಾಲೊ.’
‘ಕಸಲೊ ಉಬಾವ್?’ ತೆವ್ಶಿಲ್ಯಾನ್ ಕಸಲ್ಯಾಗೀ ವಾವ್ರಾರ್ ಆಸ್‌ಲ್ಲ್ಯಾ ರಮೋನಾನ್ ಹೆಂ ಸವಾಲ್ ಚಿಂತಿನಾಸ್ತಾಂ ವಿಚಾರ್‍ಲೆಂ ಮ್ಹಣ್ ಜೆರೊಮ್ ಸಮ್ಜಾಲೊ. ತಾಕಾ ಜಾಯ್ ಆಸ್‌ಲ್ಲೆಂಯಿ ತೆಂಚ್.
‘ಥೊಡ್ಯಾ ದಿಸಾಂ ಆದಿಂ ರಮಿ,’ ತಾಣೆ ಮ್ಹಳೆಂ ಆಪ್ಲಿಂ ಉತ್ರಾಂ ವಿಂಚುನ್. ‘ಈವಾನ್, ರಿಚರ್ಡಾಚ್ಯಾ ಸ್ಟುಡಿಯೊ ಎಪಾರ್ಟ್‌ಮೆಂತಾಕ್ ಭೆಟ್ ದಿಲ್ಲಿ. ತಾಂಚೆ ಮಧೆಂ ಕಸಲೆಂಯಿ ಅನಯ್ತಿಕ್ ಆಸಾ ಕೊಣ್ಣಾ ಮ್ಹಣ್ ಹಾಂವ್ ದುಬಾವ್ತಾಲೊಂ. ಕಾಲ್ಚ್ಯಾ ಜಮಾತಿ ಉಪ್ರಾಂತ್ ಮ್ಹಜೊ ದುಬಾವ್ ಪರಿಪುರ್ಣ್ ಉಬೊನ್ ಗೆಲೊ.’
ತೆವ್ಶಿಲ್ಯಾನ್ ಕಸಲಿಂಚ್ ಉತ್ರಾಂ ಆಯ್ಲಿಂ ನಾಂತ್.
ತ್ಯೆ ಘಡಿಯೆ, ರಮೋನಾಚೆಂ ಮುಕಮಳ್ ಪಳೆಂವ್ಕ್ ಆಪುಣ್ ಆಪ್ಲೊ ಉಜ್ವೊ ಹಾತ್‌ಚ್ ಕಾತ್ರುಂಕ್ ತಯಾರ್ ಆಸಾಂ ಮ್ಹಳ್ಳಿ ಆಬ್ಳಾಯ್ ಮನಾಂತ್‌ಚ್ ಘೊಳಯ್ಲಿ ಜೆರೊಮಾನ್. ಸ್ಕಾಯ್‌ಪಾರ್‍ಕ್ ಪಾರ್ಟಿ ಉಪ್ರಾಂತ್, ಈವಾ ಮೆಥ್ಯು ಸಾಂಗಾತಾ ಗೆಲ್ಲೆಂ ಪ್ರಕರಣ್ ತಾಣೆ ವಾರ್‍ಯಾರ್ ಖಿಳಾವ್ನ್ ದವರ್‍ಲೆಲೆಂ.
‘ಸಾಂಜೆರ್ ಮೆಳ್ತಾಂ, ಜೆರೊಮ್!’ ವೆಕ್ತ್ ಘಳಾಯೆ ಉಪ್ರಾಂಯ್ ರಮೋನಾನ್ ಸಂಪರ್‍ಕ್ ಕಾತರ್‍ಲೊ.
***
ಜಮಾತಿಚೆ ಉಪ್ರಾಂತ್ಲೆ ಚಾರ್ ದೀಸ್ ಕಸಲ್ಯಾಚ್ ಘಟನಾವಿಣೆ ಪಾಶಾರ್ ಜಾಲೆ. ಮೆಲ್ಕಮಾಚೊ ಪತ್ತೊ ನಾತ್‌ಲ್ಲೊ; ಜೆರೊಮ್ ದೆದೆಸ್ಪ್ರಾರ್ ಜಾಲೊ. ರಮೋನಾ ಸದಾಂಚೆಪರಿಂಚ್ ಆಸ್‌ಲ್ಲೆಂ. ಪಯ್ಲ್ಯಾ ದಿಸಾಚ್ಯಾ ಜಮಾತೆಕ್ ಆಯಿಲ್ಲಿಂ, ದೋನ್ ಸಾಂಜೆಂ ಉಪ್ರಾಂತ್ ದಿಸ್ಲಿಂ ನಾಂತ್. ಲಿಲಿಯನ್, ಮೆಥ್ಯು ಆನಿ ಹೆಲೀನಾನ್ ಯೆಂವ್ಚೆಂ ಬಂದ್ ಕೆಲೆಂ. ಈವಾ ಯೆತಾಲೆಂ ಪುಣ್ ಜೆರೊಮಾಚ್ಯಾ ದೊಳ್ಯಾಂಕ್ ಪಡಾನಾತ್‌ಲ್ಲೆಂ.
ತ್ಯೆ ಸಾಂಜೆರ್ ಜಮಾತ್ ಜಾವ್ನ್ ಟೇಯ್ಲರಾಲಾಗಿಂ ಫುಡ್ಲ್ಯಾ ಸಾಂಜೆಚೆಂ ಪ್ರೋಗ್ರಾಮ್ ಇತ್ಯರ್ಥ್ ಕರ್‍ತೆಚ್ ಜೆರೊಮ್ ಆಪ್ಲ್ಯಾ ಕಾರಾಲಾಗಿಂ ವೆತಾನಾ ಕಾರಾಂತ್ ಬಸುನ್ ಕೋಣ್‌ಗಿ ಸಿಗ್ರೆಟ್ ವೊಡ್ತಾ ತೊ ಜೆರೊಮಾಚ್ಯಾ ಗಮನಾಕ್ ಆಯ್ಲೊ. ತೊ ಕಾವ್ಜೆಲೊ ತರಿ ಲಾಗಿಂ ವಚುನ್ ತಾಣೆ ಭಿತರ್ ತಿಳ್ಳೆಂ.
ಮೆಲ್ಕಮ್!
ಚಾಲಕಾಚ್ಯಾ ಕುಶಿಚೆಂ ದಾರ್ ಉಗ್ತೆಂ ಕರುನ್ ಭಿತರ್ ರಿಗ್‌ಲ್ಲ್ಯಾ ಜೆರೊಮಾನ್ ಬೊಬಾಟ್‌ಚ್ ಘಾಲಿ. ‘ಕೆದೆಂ ಧಯ್ರ್ ತುಜೆಂ! ಮ್ಹಜೆಂ ಕಾರ್ ಉಗ್ತೆಂ ಕರುನ್ ಭಿತರ್ ಬಸ್ಲಾಯ್ ಆನಿ ಧುಂವೊರ್ ಸೊಡ್ಟಾಯ್?’
‘ಸರ್‍ಗಾಚ್ಯೊ ಗೇಟಿ ಉಗ್ತ್ಯೊ ಕರುಂಕ್‌ಯಿ ಮ್ಹಜೆಲಾಗಿಂ ಚೋರ್ ಚಾವಿಯೊ ಆಸಾತ್.’ ಆಪ್ಲೆಚ್ ಹಾಳ್ವಾಯೆನ್ ಮ್ಹಳೆಂ ಮೆಲ್ಕಮಾನ್. ‘ಆತಾಂ ಕಾರ್ ಸ್ಟಾರ್‍ಟ್ ಕರ್.’
‘ಖಂಯ್ ಆಸ್‌ಲ್ಲೊಯ್ ಚಾರ್ ದೀಸ್‌ಥಾವ್ನ್?’
‘ಹಾಂವೆಂ ತುಕಾ ಸಾಂಗೊಂಕ್ ಆಸ್ಚೆಂ ಆಯ್ಕಾಶಿ ತರ್, You’ll drop your balls!’
(ಅವಸ್ವರ್ – 59 – ಂತ್ ಮುಂದರ್‍ತಾ)
