‘ಮ್ಹಾಕಾ ಪಯ್ಶಿಲಿ ಸಯ್ರಿಕ್ ಲಾಗ್ಲಿ ಆನಿ ಲಗ್ನ್ ಜಾಲೆಂ. ಶ್ಹೆರಾ ಭಾಯ್ಲಿ ಚಲಿ ಮ್ಹಣ್ ಮ್ಹಜ್ಯಾ ಸತ್ತ್ಯಾನ್ ಹಾಂವೆಂ ಸಗ್ಳಿ ಕಥಾ ತಾಕಾ ಸುಟಾವಿ ಸಾಂಗ್ಲಿ ಪುಣ್ ತುಜೆ ವಿಷಾಂತ್ ಮಾತ್ರ್ ಸಾಂಗೊಂಕ್ ನಾ. ತುಂ ಮ್ಹಜೊ ಖಾಸ್ ಖೊಲೊ, ಎಕ್ಕೊಚ್ಚ್.
‘ಮ್ಹಜೆ ಸತ್ ಮ್ಹಾಕಾಚ್ ಉಳ್ಟೆಂ ಜಾಲೆಂ. ಕುಟ್ಮಾಚ್ಯಾಂನಿ ಆನಿ ಸೆಜಾರ್ಚ್ಯಾಂನಿ ಮ್ಹಜೆ ಪತಿಣೆಚೆ ಕಾನ್ ಭೊರ್ಲೆ ಆನಿ ತೀನ್ಂಚ್ ಮ್ಹಯ್‌ನೆ ಗಾಂವಾಂತ್ ರಾವ್‌ಲ್ಲ್ಯಾ ತಾಣೆ ಎಸ್ತೆರಾಲಾಗಿಂ, ಸದಾಂನೀತ್ ಮ್ಹಳ್ಳೆಪರಿಂ ಲಡಾಯ್ ಕೆಲಿ ಆನಿ ಹಾಂಗಾಸರ್ ಯೆವ್ನ್ ಫಕತ್ ಸ ವರ್ಸಾಂ ಬಿತರ್ ಮ್ಹಜ್ಯಾ ಕಾಜಾರಿ ಜಿಣಿಯೆಚಿ ದೆಸ್ವಾಟ್ ಕರುನ್ ಮ್ಹಜ್ಯಾ ಪುತಾಕ್ ಘೆವ್ನ್ ಚಲ್ತೆಚ್ ರಾವ್ಲೆಂ.’
‘ಧಯ್ರಾಧಿಕ್ ಸ್ತ್ರೀ!’ ಮೆಥ್ಯು ಉದ್ಗಾರ್ಲೊ.
ಗ್ರೆಗರಿಚೆಂ ದುಸ್ರೆಂ ಥಾಪಾಡ್ ತಾಚ್ಯಾ ಕಾನ್ಪಟ್ಯಾರ್ ಬಸ್ಲೆಂ. ಮೆಥ್ಯುಚೊ ಜೀವ್ ಕಾಣ್ಸಿರ್ಲೊ.
‘ವೆಚ್ಯಾ ಫುಡೆಂ ತಿಣೆ ಕಿತೆಂ ಮ್ಹಳೆಂ ಜಾಣಾಂಯ್?’
‘ಜಾಣಾಂ!’
‘ತೆಂವೀ ತುಜ್ಯಾ ಆವಯ್ ವಿಷಾಂತ್? ತುಕಾ ಕಸಲೆಂಚ್ ಫರಕ್ ಪಡಾನಾ?’
‘ಮ್ಹಾಕಾ ಮ್ಹಜೊ ಜಲ್ಮ್ ಮುಖ್ಯ್, ಮ್ಹಾಕಾ ಜಲ್ಮ್ ದಿಲ್ಲಿಂ ನ್ಹಯ್.’
‘ತೆಚ್ ಖಾತಿರ್ ತುಕಾ ಹಾಂವೆಂ ಜೀವಂತ್ ದವರ್ಲೊ!’ ಗ್ರೆಗರಿನ್ ಆಪ್ಲೆಂ ಹರ್ಧೆಂ ಪೆಟ್ಲೆಂ. ‘ತುಕಾ ಆವಯ್ ಆಸುನ್‌ಯಿ ನಾ ಜಾಲಿ ಆನಿ ಆವಯ್ಕ್ ಪುತ್ ಆಸುನ್‌ಯಿ ನಾ ಜಾಲೊ. ಕಿತೆಂ ಭೊಗ್ತಾ ತುಕಾ ಎಸ್ತೆರ್ ತುಜಿ ಆವಯ್ ಮ್ಹಣ್ ಕಳ್ಟಾನಾ?’
‘ಕಿತೆಂಚ್ ಭೊಗಾನಾ!’ ಮ್ಹಣಾಲೊ ಮೆಥ್ಯು, ಆಪ್ಲ್ಯಾ ಮತಿಂತ್ ಜಾಂವ್ಚೆಂ ತುಮುಲ್ ದಾಂಬೂನ್ ಧರುನ್. ಗ್ರೆಗರಿಕ್ ಸಲ್ವೊಂಕ್ ಹಾಚ್ಯಾಕಿ ವರ್ತಿ ವಾಟ್ ಹೆರ್ ನಾತ್‌ಲ್ಲಿ.
‘ತುಕಾ ಕಿತೆಂಚ್, ಕಾಂಯ್ಚ್ ಭೊಗಾನಾ?’ ತೊಂಡ್ ಭರ್ನ್ ಥಿಂಪಿ ತಾಣೆ ಮೆಥ್ಯುಚ್ಯಾ ಮುಕಮಳಾರ್ ಥುಕ್ಲಿ. ‘ತುಂ ದೆಂವ್ಚಾರ್ ಮ್ಹಣ್ಚ್ಯಾಚ್ಯಾ ದುಬಾವ್‌ಚ್ ನಾ.’
‘ಸಾರ್ಕೆಂ ಮ್ಹಳೆಂಯ್ ಪುಣ್ ಹಾಂವ್ ತುಜೆ ತಾಬೆಂತ್ ಯೆಂವ್ಕ್ ನಾತ್‌ಲ್ಲೊ ದೆಂವ್ಚಾರ್. ತುಜಿಂ ತಾಯಿತಾಂ, ಉರ್ಕು, ಮಂತ್ರಾಂ ಆನಿ ಧುಂವ್ರಾಂ ಕಾಡಿಯೊ ಆನಿ ಪಂಟ್ಯೊ ಮ್ಹಾಕಾ ತುಜೆ ಆಧೀನ್ ಹಾಡುಂಕ್ ಸಕಾನಾಂತ್.’
‘ಉಜ್ಯಾ ಪೆಟೆಂತ್ಲ್ಯಾ ಕಾಡಿಯೆಪರಿಂ ತುಕಾ ಮೊಡುಂಕ್ ಹಾಂವ್ ಸಕ್ತಾಂ. ತಿತ್ಲಿ ಸಕತ್ ಮ್ಹಜೆ ಥಂಯ್ ಆಸಾ. ತಿತ್ಲೆ ಸ್ಪಿರಿತ್ ಮ್ಹಾಕಾ ಖಾಲ್ ಜಾತಾತ್.’
‘ಪುಣ್ ತುಂ ತಶೆಂ ಕರಿಸೊನಾಂಯ್!’
‘ಕಸಲ್ಯಾ ಭರ್ವಸ್ಯಾನ್ ತುಂ ಸಾಂಗ್ತಾಯ್?’
‘ಮ್ಹಾಕಾ ನಾಸ್ ಕೆಲ್ಯಾರ್ ತುಕಾ ಹೆರ್ ಕಿತೆಂ ಉರ್ತೆಲೆಂ?’ ಎಕಾ ಮಂದ್ ಹಾಸ್ಯಾ ಸಂಗಿ ಆಪ್ಲೆ ಖ್ಹೊಲೆ ಚತ್ರಾಯೆನ್ ಖ್ಹೆಳ್ಟಾಳೊ ಮೆಥ್ಯು. ‘ಆತಾಂ ಮ್ಹಜೆಂ ನಾಸ್ ಹಂತಾನ್ ಹಂತ್ ಪಳೆಂವ್ಚೆ ಖಾತಿರ್ ಪುಣಿ ತುಂ ಜೀವಂತ್ ಆಸಾಯ್. ಮ್ಹಾಕಾ ಕಾಡಿಯೆಪರಿಂ ಮೊಡ್ಶಿ ತರ್ ತುಕಾ ಕಿತೆಂ ಉರ್ತಾ? ತುಜ್ಯಾ ಹ್ಯಾ ಮಾಟ್ ಮಂತ್ರಾಂನಿ ತುಜಿ ಪತಿಣ್ ಆನಿ ಪುತ್ ಪಾಟಿಂ ಯೆಂವ್ಚೆಪರಿಂ ನಾಂತ್.’
‘ಮ್ಹಜೆಥಂಯ್ ಯೆಕ್ಟಾಂಯ್ ಜಾವ್ನ್ ಯೆಂವ್ಚ್ಯಾ ಸಕ್ತೆಚೊ ಅಂದಾಜ್ ತುಕಾ ನಾ.’
‘ಆಸಾ!’ ಜಾಪ್ ದಿಲಿ ಮೆಥ್ಯುನ್ ಆಪ್ಲ್ಯಾ ಮುಕಮಳಾಯ್ಲಿ ಥಿಂಪಿ ಆನಿ ವೊಂಟಾಂಥಾವ್ನ್ ಪಾಜ್ರೊಂಚೆ ರಗತ್ ಪುಸುನ್ ಕಾಡಿತ್ತ್. ‘ಚಡ್ ಮ್ಹಳ್ಯಾರ್ ಮ್ಹಾಕಾ ಹ್ಯಾ ಎಪಾರ‍್ಟ್‌ಮೆಂಟಾಥಾವ್ನ್ ಭಾಯ್ರ್ ಘಾಲ್ಶಿ, ಮ್ಹಜಿ ನವ್ಕರಿ ಉಸ್ಳಾಯ್ಶಿ, ಮ್ಹಜಿ ವೀಜಾ ಬರ್ಕಾಸ್ತ್ ಕರುನ್ ಮ್ಹಾಕಾ ಪಾಟಿಂ ಧಾಡ್ಶಿ. ತುಜಿ ಸಕತ್ ಹಾಚ್ಯಾಕಿ ವರ್ತೆಂ ಕಿತೆಂಚ್ ಕರುಂಕ್ ಸಕಾನಾ. ಹ್ಯೊ ಸಂಗ್ತಿ ಹಾಂವೆಂ ಜಾಣಾಸ್ಚ್ಯೊಚ್ಚ್.’
‘ತುಂ ಮ್ಹಾಕಾ ಕಿತೆಂ ಕರ್ಶಿ?’ ಎಕ್ ಆವ್ಚಿತ್ ಭೆಂ ಗ್ರೆಗರಿಚ್ಯಾ ತಾಳ್ಯಾಂತ್ ಆತಾಂ ನಿಶೆತಾಲೆಂ.
‘ತೆಂ ಹಾಂವ್ ಜಾಣಾಂ ಪುಣ್ ತುಂ ನೆಣಾಂಯ್!’ ಆತಾಂ ಮೆಥ್ಯು ಉಬೊ ಜಾಲೊ.
‘ಗುಂಡಾಗಿರಿ ಕರ್ತೊಲೊಯ್?’
ಮೆಥ್ಯುನ್ ಜಾಪ್ ದಿಲಿ ನಾ.
‘ಹೆಂ ಎಪಾರ‍್ಟ್‌ಮೆಂಟ್ ತುಂವೆಂ ಚೊವೀಸ್ ಘಂಟ್ಯಾಂ ಭಿತರ್ ಸೊಡಿಜೆ.’
‘ಆನಿ ಪಾಂಚ್‌ಚ್ ಘಂಟ್ಯಾಂನಿ ಸೊಡ್ತಾಂ!’ ಮೆಥ್ಯುನ್ ಮ್ಹಳೆಂ ಆಪ್ಲ್ಯಾ ವೊಚ್ಯಾಕ್ ಪಳೆವ್ನ್.
‘ತುಜೆಂ ನ್ಹಯ್ ಆಸ್‌ಲ್ಲೆಂ ಕಸಲೆಂಚ್ ತುಂವೆಂ ವ್ಹರುಂಕ್ ನಜೊ.’
‘ಎಕಾ ವರ್ಸಾ ವಯ್ರ್ ಥಾವ್ನ್ ಹಾಂಗಾಸರ್ ತುಂವೆಂ ಮ್ಹಾಕಾ ದಿಲ್ಲ್ಯಾ ಮಾನಸಿಕ್ ದಗ್ದೊಣೆನ್ ಮ್ಹಾಕಾ ದೆಂವೆಂ ಕೆಲ್ಲೆಂ ತೆಂ ಹಿಸ್ಬಾನ್ ಹಾಂವ್ ವರ್ತೊಲೊಂ!’
‘ಮ್ಹಜೆ ಪಾಂಯ್ ಲೆಂವೊಂಕ್ ತುಂ ಪಾಟಿಂ ಯೆತೊಲೊಯ್.’ ಆತಾಂ ಗ್ರೆಗರಿಯಿ ಉಬೊ ಜಾಲೊ.
‘ತವಳ್ ತುಕಾ ಪಾಂಯ್ ಆಸ್ತೆಲೆಗೀ ಮ್ಹಳ್ಳೆಂ ಸವಾಲ್.’
‘ಶಿರಾಪ್, ಶಿರಾಪ್, ಶಿರಾಪ್!’ ದೆಧೆಸ್ಪ್ರಾರ್ ಜಾವ್ನ್ ತೊ ಬೊಬಾಟ್ಲೊ. ‘ಶಿರಾಪ್ ತುಜೆರ್ ಆನಿ ತುಜ್ಯಾ ಲೀಜಾಚೆರ್.’
‘ಪರ್ತ್ಯಾನ್ ಲೀಜಾಚೆಂ ನಾಂವ್ ತುಜ್ಯಾ ವೊಂಟಾಂಚೆರ್ ಯೆನಾ ಜಾಂವ್!’ ಮೆಥ್ಯುಚಿಂ ಉತ್ರಾಂ ಕಡ್‌ಲ್ಲೆಂ ಲೋಹ್ ಪಡ್ಚೆಪರಿಂ ಗ್ರೆಗರಿಚ್ಯಾ ಕಾನಾಂಚೆರ್ ಪಡ್ಲಿಂ. ‘ತೆಂ ನಾಂವ್ ಪರ್ತ್ಯಾನ್ ತುಜ್ಯಾ ವೊಂಟಾಂಚೆರ್ ಉದೆಲೆಂ ತರ್-‘
ತೊ ತಿತ್ಲ್ಯಾರ್‌ಚ್ ರಾವ್ಲೊ.
ತಾಂಚ್ಯೊ ದಿಷ್ಟಿ ಎಕ್ ಜಾಲ್ಯೊ. ಮೆಥ್ಯುಚಿ ದೀಷ್ಟ್ ಧರುನ್ ರಾವ್‌ಲ್ಲೊ ಗ್ರೆಗರಿ ಪಾಂಚ್‌ಚ್ ಖಿಣಾಂ ಭಿತರ್ ಸಲ್ವಾಲೊ ಆನಿ ಮಾತೆಂ ಮುಳಾಂತ್ ಘಾಲುನ್ ಮೆಥ್ಯುಚ್ಯಾ ರುಮಾಚೆಂ ದಾರ್ ತಾಂಕ್ತಾತಿತ್ಲ್ಯಾ ಬಳಾನ್ ಆಪ್ಟಾವ್ನ್ ಬಂದ್ ಕರುನ್ ಭಾಯ್ರ್ ಗೆಲೊ.
ತೊ ಭಾಯ್ರ್ ವೆತೆಚ್ ಆಪುಣ್ ಕಿತ್ಲೊಂ ಶಾಂತ್ ಆನಿ ಸ್ಥಿಮಿತಾಯೆಂತ್ ಆಸಾ ತೆಂ ಸಮ್ಜೊನ್ ಮೆಥ್ಯು ಆಪ್ಣಾಥಂಯ್ಂಚ್ ವಿಸ್ಮಿತ್ ಜಾಲೊ. ಆಪ್ಲ್ಯಾ ಖಟ್ಲ್ಯಾ ವಯ್ಲಿ ಗಜ್ಡಿ ಸಾರ್ಕಿ ಕೆಲಿ, ಮುಸ್ತಾಯ್ಕಿ ಬದ್ಲಿಲಿ ಆನಿ ಕಬಾಟಾಚ್ಯಾ ವಯ್ರ್ ಆಸ್‌ಲ್ಲಿ ಆಪ್ಣಾಚಿ ಸೂಟ್‌ಕೇಜ್ ಸಕಯ್ಲ್ ದೆಂವಯ್ಲಿ. ಎಕಾ ಘಂಟ್ಯಾ ಭಿತರ್ ತಾಣೆ ಆಪ್ಲೆಂ ಪ್ಯಾಕಿಂಗ್ ಸಂಪಯ್ಲೆಂ.
ಟೊಯ್ಲೆಟಾಕ್ ವಚುನ್ ಆಪ್ಲೆಂ ಮುಕಮಳ್ ಧುಲೆಂ ಆನಿ ತವಳ್ ಗ್ರೆಗರಿನ್ ಫುಟಯಿಲ್ಲೊ ತಾಚೊ ವೊಂಟ್ ಹುಲ್ಪಾಲೊ. ತಾಣೆ ಎಕ್ ಸಿಗ್ರೆಟ್ ಪೆಟಯ್ಲಿ ಆನಿ ನಾಕಾ ತೊಂಡಾಂತ್ಲ್ಯಾ ಧುಂವರ್ ಸೊಡ್ಲೊ. ತಾಕಾ ಹುಲ್ಪಾಲೆಂ. ‘ತರ್ ಹಾಂವ್ ಎಸ್ತೆರ್ ಆಂಟಿಚೊ ಪುತ್!’ ಕಸಲ್ಯಾಚ್ ಸಿಂತಿಮೆಂತಾಂ ವಿಣೆಂ ತಾಣೆ ಮಾನುನ್ ಘೆತ್‌ಲ್ಲಿ ತಿ ಖಚಿತಾಯ್ ಆನಿಕಿ ಥಿರಾಯ್ಲಿ. ‘ತುಂ ಕಿತ್ಯಾಕ್ ರಡನಾಂಯ್, ಮೆಥ್ಯು? ತುಜೆಂ ಕಾಳಿಜ್ ಕಿತ್ಯಾಕ್ ಅಶೆಂಯಿ ಫಾತ್ರೆಲಾಂ?’ ತಾಚೆ ಭಿತರ‍್ಲೊ ತಾಳೊ ಜಾಗೊ ಜಾವ್ನ್ ಯೆತಾನಾ ತಾಣೆ ಆಪ್ಲ್ಯಾ ಮೊನೆಪಣಾಚ್ಯಾ ಹಾತೆರಾನ್ ತ್ಯಾ ತಾಳ್ಯಾಕ್ ಥಾಂಬಯ್ಲೊ.
ಫಕತ್ ಎಕಾ ದಿಸಾ ಭಿತರ್ ಕಿತೆಂ ಸರ್ವ್ ಘಡ್‌ಲ್ಲೆಂ ಕಿತೆಂ ಸರ್ವ್ ಬದ್ಲಾಲ್ಲೆಂ. ಹೆಂ ಮ್ಹಜೆಂ ಝುಜ್, ಹಾಂತುಂ ಕೊಣಾಯ್ಚಿಯಿ ಮ್ಹಾಕಾ ಸಸಾಯ್ ನಾಕಾ, ಲೀಜಾಚಿ ಪರ್ಯಾಂತ್? ಲೀಜಾ ಕಾಂಯ್ ಸಾಂಪ್ರದಾಯಿಕ್ ಪತಿಣ್ ಜಾವ್ನ್ ಮ್ಹಜೆ ಜಿಣಿಯೆಂತ್ ಯೆಂವ್ಚೆಂ ನಾ. ತಾಚೆಂ ಸ್ಥಾನ್ ವಿಸಿಷ್ಟ್ ಆಸ್ತೆಲೆಂ.
ಫುಡೆಂ ಕಿತೆಂ?
ಫುಡೆಂ? ಫಾಲಾಂ ಎಕ್ ನವೊ ದೀಸ್ ಉದೆತೊಲೊ ಆನಿ ಹಾಂವ್ ಜಿಯೆತೊಲೊಂ. ಮ್ಹಜ್ಯಾಕಿ ಉಣೆ ಶಿಕಪ್, ಸವ್ಲತ್ಯೊ ಆನಿ ಹಾತೆರಾಂ ಆಸ್‌ಲ್ಲೆಯಿ ಹ್ಯಾ ಸಂಸಾರಾಂತ್ ಜಿಯೆತಾತ್. ಪುಣ್ ಮ್ಹಾಕಾ ದಿಸ್ತಾ, ಮ್ಹಣಾಲೆಂ ತಾಚೆಂ ಶಿಂತಿದ್. ಪುಣ್ ತುಂವೆಂ ಆತಾಂ ಥೊಡಿಂ ದುಕಾಂ ಪುಣಿ ಗಳಯ್ಜೆಯ್. ತುಜೆಂ ಶಿಂತಿದ್ ಕಾಂಯ್ ಥೊಡ್ಯಾ ಮಟ್ಟಾಕ್ ಪುಣಿ ಸುಡಾಳ್ ಜಾಯ್ತ್.
ನ್ಹಯ್ ತರ್? ಶಿಂತಿದಾಕ್ ಪಾಟಿಂ ಸವಾಲ್ ಕೆಲೆಂ ಮೆಥ್ಯುನ್. ಹಾಂವೆಂ ರಡಾಜೆ ನ್ಹಯ್? ಸಿಗ್ರೆಟಿಚ್ಯಾ ಮುಳ್ಕಾಟಾಕ್ ಎಕಾ ಬಳಿಷ್ಟ್ ಧಮ್ಮಾಚಿ ಚಿಂವ್ಣಿಂ ದಿತಾನಾ ತಾಚಿ ತುದಿ ಉಜ್ಯಾಚ್ಯಾ ಝಳ್ತ್ಯಾ ಕೆಂಡಾಪರಿಂ ಧುಂವರ್ಲಿ. ಮೆಥ್ಯುನ್ ಆಪ್ಲ್ಯಾ ದಾವ್ಯಾ ಹಾತಾಚಿ ತಾಳು ಉಸಯ್ಲಿ ಆನಿ ಸಿಗ್ರೆಟಿಚಿ ಝಳ್ತಿ ತುದಿ ಆಪ್ಲ್ಯಾ ಹಾತಾ-ತಾಳ್ವೆರ್ ಚಿರ‍್ಡಿಲಿ. ಕಾತ್ ಹುಲ್ಪಾಲ್ಲೊ ವಾಸ್ ಆನಿ ಮಾಸ್ ಚರ‍್ಚರ್‌ಲ್ಲೊ ಆವಾಜ್ ತಾಕಾ ಆಯ್ಕಾಲೊ. ಕುಡಿಚಿ ದುಕ್ ಮೆಂದ್ವಾಕ್ ಪಾವಿತ್ ಕರ‍್ಚ್ಯೊ ಸರ್ವ್ ಶಿರೊ ಜಾಗ್ಯೊ ಜಾಲ್ಯೊ ತರಿ ಎಕ್‌ಚ್ ಎಕ್ ದೂಕ್ ತಾಚ್ಯಾ ದೊಳ್ಯಾಂ-ಖಾಂಚಿಂನಿ ಉದೆಲೆಂ ನಾ.
ದುಸ್ರೊ ದೀಸ್ ಸುಕ್ರಾರ್.
ಆಪ್ಲಿ ಎಕ್ ಸುಟ್‌ಕೇಜ್ ಆನಿ ಕಾಳಿ ಬ್ರೀಫ್‌ಕೇಜ್ ಘೆವ್ನ್ ಮೆಥ್ಯುನ್ ಭರ್ತಿ ಸಾತ್ ವೊರಾಂಚೆರ್ ಗ್ರೆಗರಿಚೆಂ ಎಪಾರ‍್ಟ್‌ಮೆಂಟ್ ಸೊಡ್ಲೆಂ. ವೆಚ್ಯಾ ಫುಡೆಂ ಎಪಾರ‍್ಟ್‌ಮೆಂಟಾಚಿ ಚಾವಿ ಪಾಟಿಂ ದಿಂವ್ಚೆ ಖಾತಿರ್ ತೊ ಗ್ರೆಗರಿಚ್ಯಾ ಬೆಡ್‌ರೂಮಾಕ್ ಗೆಲೊ. ಉದಾರೊಚ್ಚ್ ನಿದುನ್ ಗ್ರೆಗರಿ ಘೊರೆತಾಲೊ. ಹಿ ಆನಿ ಅಸಲಿ ತಾಚಿ ನೀದ್ ಸಭಾವಿಕ್ ಯಾ ಮಾಟ್-ಮಂತ್ರಾಂನಿ ಪಿಕಯಿಲ್ಲಿ ಮ್ಹಳೆಂ ಚಿಂತುನ್ ಮೆಥ್ಯುಕ್ ಹಾಸೊ ಆಯ್ಲೊ. ತಾಕಾ ಜಾಗಂವ್ಚೆಂ ಕಸಲೆಂಚ್ ಪ್ರೇತನ್ ಕರಿನಾಸ್ತಾ ಚಾವಿ ತಾಚ್ಯಾ ಉಗ್ತ್ಯಾ ಹರ್ಧ್ಯಾರ್ ದವರ್ನ್ ತೊ ಭಾಯ್ರ್ ಆಯ್ಲೊ.
ಎಪಾರ‍್ಟ್‌ಮೆಂಟ್ ಬಿಲ್ಡಿಂಗಾಥಾವ್ನ್ ರಸ್ತ್ಯಾಕ್ ಯೆತಾನಾ ಪಾಶಾರ್ ಜಾಂವ್ಚೆಂ ಎಕ್ ಪಿಕ್‌ಅಪ್ ರಾವವ್ನ್ ತೊ ಶೀದಾ ಕಂಪೆನಿಕ್ ಗೆಲೊ. ಸುಕ್ರಾರಾಚೊ ದೀಸ್ ಆನಿ ಥಂಯ್ಸರ್ ವಸ್ತಿ ಕರ‍್ತೆಲೆ ಸಖಾಳಿಂಚ್ಯಾ ಧಾ-ಇಕ್ರಾ ಪರ್ಯಾಂತ್ ನಿದೊನ್ ಪಡ್ಟಾಲೆ. ಹೆಂ ಜಾಣಾಂ ಆಸುನ್‌ಯಿ ಮೆಥ್ಯುನ್ ಕಾಂಪಿಣ್ ಮಾರ‍್ಲಿ. ಥೊಡ್ಯಾ ಮಿನುಟಾಂ ಉಪ್ರಾಂತ್ ಯೆಕ್ಲ್ಯಾನ್ ದಾರ್ ಉಘಡ್ಲೆಂ. ಸುಟ್‌ಕೇಜ್ ಆನಿ ಬ್ರೀಫ್‌ಕೇಜ್ ಘೆವ್ನ್ ಉಬೊ ಜಾಲ್ಲ್ಯಾ ಮೆಥ್ಯುಕ್ ತಾಣೆ ವಯ್ರ್ ಸಕ್ಲಾ ಪಳೆಲೆಂ ಆನಿ ತೊ ಹಾಸ್ಲೊ.
‘ಮ್ಹಾಕಾ ಆಸ್ರೊ ಜಾಯ್!’ ಮೆಥ್ಯುನ್ ಇತ್ಲೆಂಚ್ ಮ್ಹಳೆಂ.
ಕಂಪೆನಿ ಭಿತರ್ ಸರ್ತೆಚ್ ತೊ ಶೀದಾ ಆಪ್ಲ್ಯಾ ಕೆಬಿನಾಕ್ ಗೆಲೊ ಆನಿ ಅಲೆಕ್ಸಾಚೆಂ ನಂಬರ್ ಲಾಗಯ್ಲೆಂ. ಶಿಸ್ತೆಚ್ಯಾ ಅಲೆಕ್ಸಾಕ್ ಬ್ರೇಸ್ತಾರ್ ಸುಕ್ರಾರ್ ಮ್ಹಳ್ಳೆಂ ಲೇಖ್ ನಾತ್‌ಲ್ಲೆಂ.
‘ಮೆಥ್ಯು ಹಾಂಗಾಸರ್, ಅಲೆಕ್ಸ್’ ತೊ ಶೀದಾ ಮುಖ್ಯಾಂಶಾಕ್ ಆಯ್ಲೊ. ‘ಹಾಂವೆಂ ಎಪಾರ‍್ಟ್‌ಮೆಂಟ್ ಸೊಡ್ಲಾಂ. ವಸ್ತಿ ಕರುಂಕ್ ಮ್ಹಾಕಾ ಎಕ್ ಠಿಕಾಣೊ ಜಾಯ್.’
‘ಠಿಕಾಣೊ ತುಂವೆಂ ಯೆದೊಳ್‌ಚ್ ವಿಂಚ್ಲಾಯ್ ತಶೆಂ ದಿಸ್ತಾ!’ ಮ್ಹಣಾಲೊ ಅಲೆಕ್ಸ್ ಮಟ್ವ್ಯಾನ್ ಹಾಸೊನ್. ‘ಕಂಪೆನಿಥಾವ್ನ್ ಫೋನ್ ಕರ್ತಾಯ್?’
‘ವ್ಹಯ್.’
‘ವಿಭಿನ್ನ್ ಕಾಲೆತಿಚೆ ಆನಿ ವೆವೆಗ್ಳ್ಯಾ ಸಮಾಜಿಕ್ ಪಾಟ್ಪೊಡ್ದ್ಯಾಂಚೆರ್ ಖ್ಹೆಳ್ಚೆ ಮನಿಸ್ ಥಂಯ್ಸರ್ ವಸ್ತಿಚ್ ನ್ಹಯ್ ಜಿಣಿ ಸಾರುನ್‌ಯಿ ಆಸಾತ್, ಮೆಥ್ಯು!’ ಛೆತಾವ್ಣೆನ್ ಮ್ಹಳೆಂ ಅಲೆಕ್ಸಾನ್. ‘ಸಾಂಗಾತಾ ವಸ್ತಿ ಕರ್ಚೆಂ ಆನಿ ಸಾಂಗಾತಾ ಕಾಮ್ ಕರ್ಚೆಂ ಎಕ್‌ಚ್ ನ್ಹಯ್. ಫಾಲ್ಯಾಂ ಕಾಂಯ್ ಗ್ರೆಗರಿಚಿಂ ಕುಸಾಂ ತಾಂಚೆಥಂಯ್ ತುಕಾ ದಿಷ್ಟಿಕ್ ಪಡ್ಲ್ಯಾರ್‌ಯಿ ಪಡ್ಲಿಂ?’
‘ಪರಿಗತ್ ತಶಿ ಘುಂವ್ಲ್ಯಾರ್ ಹಾಂವ್ ತುಜ್ಯಾ ದಾರ‍್ವಟ್ಯಾರ್ ಉಬೊಂ ಜಾತೊಲೊಂ!’ ಆತಾಂ ಹಾಸ್ಚಿ ಸರ್ತಿ ಮೆಥ್ಯುಚಿ.
‘ಬರೆಂ ತರ್, ತ್ಯಾ ಡೇವಿಸಾಕ್ ಫೋನ್ ದಿ.’ ಮ್ಹಳೆಂ ಅಲೆಕ್ಸಾನ್. ಡೇವಿಸ್, ಸೀನಿಯರ್ ಸೇಲ್ಸ್‌ಮೆನ್. ಕಂಪೆನಿಂತ್‌ಚ್ ವಸ್ತಿ ಕರ್ತಾಲೊ. ‘ಹುಂ. ಆನಿ ಪುಣಿ ಮನ್ಶ್ಯಾಪರಿಂ ಜಿಯೆಂವ್ಕ್ ಶಿಕೊಂದಿ, ದುಕೊರ್ ಖಂಚೊ.’
ತ್ಯಾ ಫುಡೆಂ, ಅಲೆಕ್ಸ್,’ ಮಧೆಂ ಉಲಯ್ಲೊ ಮೆಥ್ಯು. ‘ಹಿ ಎಕ್ ಸಂಗತ್ ಹಾಂವ್ ಆತಾಂಚ್ ಮುಕಾರ್ ಹಾಡ್ಟಾಂ. ಗ್ರೆಗರಿಥಾವ್ನ್ ರಿಫಾಯ್ನರಿಂಚ್ಯಾ ಖರೀದೆಂಚೆ ಮುಂಗಡ್ ಇಸಾರೆ ಆನಿ ಸುರಾಗ್ ತುಜ್ಯಾ ಕಂಪೆನಿಕ್ ಮೆಳ್ತಲೆ ಮ್ಹಣ್ ತುಂವೆಂ ಮ್ಹಾಕಾ ನವ್ಕರಿ ದಿಲ್ಲಿಯ್ ಖಂಯ್. ಹೆಂ ಸತ್?’
‘ಮ್ಹಾಕಾ ಟಾಯ್ಪಿಸ್ಟಾಚಿ ಗರ‍್ಜ್ ಆಸ್‌ಲ್ಲಿ.’ ತಕ್ಷಣ್ ಜಾಪ್ ದಿಲಿ ಅಲೆಕ್ಸಾನ್. ‘ಡಜನಾಗಟ್ಲ್ಯಾನ್ ಟಾಯ್ಪಿಸ್ಟ್ ಆಸಾತ್.’
‘ಹಿ ಮ್ಹಜ್ಯಾ ಸವಾಲಾಚಿ ಜಾಪ್ ನ್ಹಯ್, ಅಲೆಕ್ಸ್.’
‘ವ್ಹಯ್! ಪರ್ಚೇಸಿಂಗಾಂತ್ ಆಸ್ಚ್ಯಾ ಗ್ರೆಗರಿಥಾವ್ನ್ ವಯ್ವಾಟಾಚೆ ಮುಂಗಡ್ ಇಸಾರೆ ಮ್ಹಳ್ಳ್ಯಾ ಖಾತಿರ್ ಹಾಂವೆಂ ತುಕಾ ನವ್ಕರಿ ದಿಲ್ಲಿ. ವಯ್ವಾಟ್, ಬಿಜ್‌ನೆಸ್ ಜಾವ್ನಾಸಾ ಟು-ವೇ ಟ್ರಾಫಿಕ್, ಮೆಥ್ಯು. ಹೆಂ ಕೆದಳಾರಿ ಉಡಾಸಾಂತ್ ದವರ್.’
‘ಬರೆಂ ತರ್, ಆತಾಂ ಕಿತೆಂ?’
‘ಆತಾಂ ಕಾಂಯ್ ನಾ ಪುಣ್ ಫಾಲ್ಯಾಂ ಸನ್ವಾರ್. ತುಕಾ ಹಾಂವ್ ಕಾಮಾಂತ್ಲೊ ಉಸ್ಳಾಂವ್ಕ್ ಸಕ್ತಾಂ, ತುಜಿ ವರ್ಕ್ ಪರ್ಮಿಟ್ ಬರ್ಕಾಸ್ತ್ ಕರುನ್ ತುಕಾ ಪಾಟಿಂ ಧಾಡುಂಕ್ ಸಕ್ತಾಂ……’
‘ಆನಿ ಅಶೆಂ ಕರಿನಾಸ್ತಾಂ ರಾವೊಂಕ್‌ಯಿ ಸಕ್ತಾಯ್.’
‘ವ್ಹಯ್ ಪುಣ್ ಕಿತ್ಯಾಕ್ ಮ್ಹಳ್ಳ್ಯಾಕ್ ಎಕ್ ಕಾರಾಣ್ ಪುಣಿ ಮ್ಹಾಕಾ ದೀ.’
‘ಖಂಡಿತ್ ಜಾವ್ನ್! ಮ್ಹಾಕಾ ಕಾಮಾಂತ್ಲೊ ನಿಕ್ಳಾಯ್ಶಿ ತರ್ ತುಜ್ಯಾ ಕೆಬಿನಾಂತ್ ಹಾಂವ್ ಕಸೊ ಬಸ್ತೊಲೊಂ?’
ಅಲೆಕ್ಸಾಚೆಂ ಮೌನ್ಂಚ್ ಜಾವ್ನಾಸ್‌ಲ್ಲೆಂ ಅಖಂಡ್ ಜಾಪ್ ಮೆಥ್ಯುಚ್ಯಾ ಸವಲಾಕ್.
ತೊ ಸಗ್ಳೊ ದೀಸ್ ಡೇವಿಸಾಚ್ಯಾ ಸಾಂಗಾತಾ ಮೆಳೊನ್ ತಾಂಚ್ಯಾ ವಸ್ತೆಚೆಂ ಕೂಡ್ ಸಾಫ್‌ಸುಫ್ ಕರ್ಚ್ಯಾಂತ್ ಮೆಥ್ಯುನ್ ಖರ‍್ಚಿಲೊ. ರಾತಿಚ್ಯಾ ನೋವ್ ವರಾಂಚೆರ್ ಲಾಗ್ಸಾರ್‌ಚ್ ಆಸ್‌ಲ್ಲ್ಯಾ ಮೆಸ್ಸಾಂತ್ ಜೆವಣ್ ಕರುನ್ ಯೆತಾನಾ ಕಂಪೆನಿಚೆಂ ಫೋನ್ ವ್ಹಾಜ್ತಾಲೆಂ. ಡೇವಿಸಾನ್ ತೆಂ ಉಕಲ್ಲೆಂ. ‘ವ್ಹಯ್ ಆಸಾ,’ ರಿಸೀವರಾಂತ್ ತಾಣೆಂ ಮ್ಹಳೆಂ ಆನಿ ರಿಸೀವರ್ ಮೆಥ್ಯುಕ್ ದಿಲೆಂ. ‘ಲಾಯ್ನಿಚೆರ್ ಅಲೆಕ್ಸ್ ಆಸಾ.’ ತಾಣೆ ಕಳಯ್ಲೆಂ.
‘ಯೆಸ್, ಅಲೆಕ್ಸ್.’ ರಿಸೀವರ್ ಘೆವ್ನ್ ಉಲಯ್ಲೊ ಮೆಥ್ಯು.
‘ತುಂವೆಂ ಗ್ರೆಗರಿಚ್ಯಾ ಎಪಾರ‍್ಟ್‌ಮೆಂಟಾಕ್ ಪಾಟಿಂ ವೆಚೆಂ ಬರೆಂ ಮ್ಹಣ್ ದಿಸ್ತಾ.’
‘ಆನಿ ಕಿತ್ಯಾಕ್?’
‘ತಾಚೆಂ ಮ್ಹಾಕಾ ಕೊಲ್ ಆಯಿಲ್ಲೆಂ. ಮತಿಭೃಷ್ಟ್ ಜಾಲೊ ಕಸೊ ದಿಸ್ತಾ. ಆಮಾಲಾನ್ಂಚ್ ಜಾಯ್ಜೆ. ತುಂವೆಂ ಪಾಟಿಂ ಯೇಜೆ ಖಂಯ್ ನಾ ತರ್ ತೊ ಜೀವ್ಘಾತ್ ಕರ್ತಾ ಖಂಯ್.’
‘ಹಾಂವ್ ಹಾಂಗಾಸರ್ ಆಸಾ ಮ್ಹಣ್ ತಾಕಾ ಕಶೆಂ ಕಳಿತ್?’
‘ಸಾದೆಂ ರಾಜಾಂವ್. ತುಂ ಖಂಯ್ ವೆಶಿ? ಮುನೀರ್‌ಖಾನ್ ನ್ಹಯ್ ತರ್ ಮ್ಹಜೆ ಸರ್ಶಿಂ.’
‘ಹುಂ. ಜೀವ್ಘಾತ್ ಮ್ಹಣಾಲೊಯ್?’
‘ತೊ ಮ್ಹಣಾಲೊ.’
‘ತುಂ ನಿಶ್ಚಿಂತ್ ರಾವ್, ಅಲೆಕ್ಸ್.’
‘ಕಿತ್ಯಾಕ್?’
‘ಜೀವ್ಘಾತ್ ಕರುಂಕ್ ಧಯ್ರ್ ಜಾಯ್, ಗಟ್ಸ್ ಜಾಯ್,’ ಮೆಥ್ಯುನ್ ಉತ್ರಾಂ ವಿಂಚ್ಲಿಂ. ‘ಆನಿ ತಸಲೆ ಗಟ್ಸ್ ಗ್ರೆಗರಿಲಾಗಿಂ ನಾಂತ್.’
‘ಪುಣ್ ತಾಣೆ ತುಕಾ ಹಾಂಗಾಸರ್ ಹಾಡ್ಲೊ-‘
‘ಸಂಸಾರಾಂತ್ ಹಾಡುಂಕ್ ನಾ ನ್ಹಯ್, ಅಲೆಕ್ಸ್?’
‘ಫಾಲ್ಯಾಂ ಮೆಳ್ಯಾಂ!’ ಎಕಾ ಮಟ್ವ್ಯಾ ಹಾಸ್ಯಾ ಸಂಗಿಂ ಅಲೆಕ್ಸಾನ್ ಸಂಪರ್ಕ್ ತುಟಯ್ಲೊ.
ವಯ್ಲೆಂ ಘಡಿತ್ ಘಡೊನ್ ಭರ್ತಿ ಸ ಮ್ಹಯ್‌ನ್ಯಾಂನಿ ಮೆಥ್ಯು ಗಾಂವಾಕ್ ಭಾಯ್ರ್ ಸರ್ಲೊ. ಕಾಂಯ್ ಸದೆಂ ಶೊಪಿಂಗ್ ಕರುಂಕ್ ರಜೀಯಾನ್ ತಾಕಾ ಮಜತ್ ಕೆಲಿ ಆನಿ ಕಂಪೆನಿ ತರ್ಫೆನ್ ಅಲೆಕ್ಸಾನ್ ತಾಕಾ ತೀನ್ ಮ್ಹಯ್‌ನ್ಯಾಂಚೊ ಪಾಗ್ ಮುಂಗಡ್ ದಿಲೊ. ತಾಕಾ ಎರ್‌ಪೊರ‍್ಟಾಕ್ ಪಾವಂವ್ಕ್ ಮುನಿರ್ ಖಾನ್, ರಜೀಯಾ ಆನಿ ಸುಲ್ತಾನಾ ಆಯಿಲ್ಲಿಂ.
‘ಲ್ಹಾನ್ ಎಕಾ ಎಪಾರ‍್ಟ್‌ಮೆಂಟಾಚಿ ವಿಲೆವಾರಿ ಕರ್, ಖಾನ್ ಸಾಹೇಬ್,’ ವೆಗ್ಳಾಚಾರಾಚಿ ಘಡಿ ಯೆತಾನಾ ಮೆಥ್ಯುನ್ ವಿನತಿ ಕೆಲಿ.
‘ಫಿಕಿರ್ ಕರುನಾಕಾ,’ ಭರ್ವಸೊ ದಿಲೊ ಖಾನ್ ಸಾಹೇಬಾನ್. ರಜೀಯಾನ್ ಮೆಥ್ಯುಕ್ ಉಗ್ತ್ಯಾನ್ ವೆಂಗ್ಲೊ. ‘ಪಯ್ಲೆಚ್ ರಾತಿಂ ಲೀಜಾಕ್ ತಿತ್ಲೆಂ ಸತಯ್ನಾಕಾ ಹಾಂ!’ ತಾಣೆಂ ಮ್ಹಳೆಂ ದೊಳ್ಯಾಂನಿ ದುಕಾಂ ಘೆವ್ನ್. ‘ಆಮ್ಚೆಂ ಸುನ್ ತೆಂ.’ ಆನಿ ತವಳ್ ಮೆಥ್ಯುಚ್ಯಾ ದೊಳ್ಯಾಂನಿ ಆಪಾಪಿಂಚ್ ದುಕಾಂ ಉದೆಲಿಂ ಆನಿ ವ್ಹಾಳ್ಳಿಂ. ಆಪ್ಲೆ ಯೆದೊಳ್ಚೆ ಜಿಣಿಯೆಂತ್ ಹೆಪರಿಂ ದೊಳೆ ಭರೊನ್ ಆಯಿಲ್ಲೆ ಆನಿ ದುಕಾಂ ದೆಂವ್‌ಲ್ಲಿಂ ಪಯ್ಲೆ ಪಾವ್ಟಿಂ ಮ್ಹಣ್ ತಾಕಾ ಗಮ್ತಾನಾ ತೊ ವಿಮಾನಾ ಭಿತರ್ ಅಸ್‌ಲ್ಲೊ. ತಾಚಿ ಮೋತ್ ರಿತಿ ಆಸ್‌ಲ್ಲಿ ಆನಿ ಕಸಲಿಂಯಿ ನಿರ್ಧಿಷ್ಟ್ ಚಿಂತ್ನಾಂ ತಿಚೆರ್ ಉದೆಂವ್ಕ್ ಆಯ್ಕಾನಾತ್‌ಲ್ಲಿಂ.
ತ್ಯಾ ಉಬ್ಚ್ಯಾ ಯಂತ್ರಾಂತ್ ಬಸುನ್ ಆಪುಣ್‌ಯಿ ಯಾಂತ್ರಿಕ್ ರಿತಿರ್ ಉಬ್ತೊಲೊಂ ಮ್ಹಳ್ಳೆಂ ತಾಕಾ ಕಳಿತ್ ಆಸ್‌ಲ್ಲೆಂ.
ಉಬ್ಣೆಚಿಂ ಪಂದ್ರಾ ಮಿನುಟಾಂ ಉತರ್ತಾನಾ ಆನಿ ಕ್ಯಾಪ್ಟನಾನ್ fasten seat belts ನಿಶಾಣಿ ಪಾಲ್ವಯ್ತೆಚ್ ವಿಮಾನಾಂತ್ ಜಿವಾಳ್ ಉಟ್ಲೊ; ಆನಿ ಮಧ್ಯ್‌ಪ್ರಾಚ್ಯಾಂತ್ಲ್ಯಾ ತ್ಯಾ ರಾಷ್ಟ್ರಾಂತ್ ವಾವುರ್ತೆಲ್ಯಾಂನಿ ತಾಂಚೊ ಆಮಾಲಾಚೊ ಹೊರ್ಬೊಸ್ ನಿವ್ಹಂವ್ಚೆ ಖಾತಿರ್ ವೆವೆಗ್ಳಿಂ ಆಮಾಲಾಂ ಹಾಡಯ್ಲಿಂ. ಗಗನ್‌ಸಖಿಯಾಂ ತೆಮೆಟ್ಯಾಂಚೆರ್ ಮ್ಹಳ್ಳೆಪರಿಂ ಹೆಣೆತೆಣೆ ಉಬ್ತಾಲ್ಯೊ. ಮೆಥ್ಯುನ್ ಆಪ್ಲ್ಯಾ ಪಸಂದೆಚಿ ಸ್ಕೊಚ್ ಹಾಡಯ್ಲಿ. ಡ್ರಿಂಕ್ ಯೆತೆಚ್ ತಾಣೆ ಸಿಗ್ರೆಟ್ ಪೆಟಯ್ಲಿ.
ವೇಳ್ ಪಾಶಾರ್ ಜಾತಾಂ ಜಾತಾಂ ತೊ ಆಪ್ಲ್ಯಾ ಲೀಜಾಕ್ ಲಾಗಿ ಲಾಗಿಂ ಸರ್ತಾಲೊ.
ತೊ ಮನಾಂತ್‌ಚ್ ಹಾಸ್ಲೊ. ಆಪ್ಣಾಚಿ ಮೋತ್ ಕಾಂಯ್ ಆತಾಂ ಕಾಮ್ ಕರ್ತಾಲಿಗಾಯ್? ಹಾಂವ್ ಲಗ್ನಾಕ್ ಭಾಯ್ರ್ ಸರ್ಲಾಂ; ಕಸಲೊ ಠಿಕಾಣೊ ಆಸಾ ಮ್ಹಾಕಾ ಗಾಂವಾಂತ್ ಯಾ ಗಲ್ಫಾಂತ್? ಗ್ರೆಗರಿಚ್ಯಾ ಬಂಗ್ಲ್ಯಾಂತ್ ಪ್ರವೇಸ್ ನಾ, ಗಲ್ಫಾಂತ್ ನಿವಾಸಾಚಿ ಯೆದೊಳ್ ವಿಲೆವಾರಿ ಜಾಲ್ಲಿ ನಾ.. ಪುಣ್ ಥಂಯ್ಸರ್ ಮುನಿರ್ ಖಾನಾಚೆರ್ ಪುಣಿ ಭರ್ವಸೊ ದವರ‍್ಯೆತ್ ಪುಣ್ ಗಾಂವಾಂತ್? ಲೀಜಾಚ್ಯಾ ಖಾಂದಾರ್ ಮಾತೆಂ ತೆಂಕುಂ? ಘರಾಚೊ ಖಾಂಬೊ ಹಾಂವೆಂ ಜಾಯ್ಜೆ ಪುಣ್ ಹಾಂವ್ಂಚ್ ಆವ್ಯಾ ಮಾತಿಯೆಚೊ ತರ್?
ನ್ಹಂಯ್ ಉತರ್ಚೊ ವೇಳ್ ಯೆತಾನಾ ಪಳೊವ್ಯಾಂ ಮ್ಹಣ್ಚ್ಯಾಂ ಪಯ್ಕಿ ತೊ ನ್ಹಯ್. ತರ್ ಹಾಂವ್ ಕಸಲ್ಯಾಗಿ ಹಠಾಕ್ ಲಾಗುನ್ ಫಾವೊತಿ ತಯಾರಾಯ್‌ನಾಸ್ತಾಂ ಲಗ್ನಾ ಖಳಾಕ್ ದೆಂವ್ಲಾಂ? ಎಕಾ ಲಾಂಬ್ ಉಸ್ವಾಸಾ ಸಂಗಿಂ ತಾಣೆ ವಿಮಾನಾಚ್ಯಾ ಜನೆಲಾಂತ್ಲ್ಯಾನ್ ಭಾಯ್ರ್ ಪಳೆಲೆಂ. ಎಕಾ ಸುತಾಕ್ ಉಮ್ಕಾಳಾಯಿಲ್ಲ್ಯಾ ಕಾಜುಲ್ಯಾಂ ಪರಿಂ ತಾಕಾ ಲ್ಹಾನ್ ಲ್ಹಾನ್ ದಿವೆ ದಿಸ್ತಾಲೆ. ಆಪ್ಲ್ಯಾ ದೇಶಾಚಿ ಕರಾವಳ್. ವೊಚ್ಯಾಚೆರ್ ದೀಷ್ಟ್ ಘಾಲ್ತಾನಾ ಉಬ್ಣೆಚೊ ವೇಳ್ ಆಕೇರ್ ಜಾಯಿತ್ತ್ ಯೆಂವ್ಚೊ ತಾಚ್ಯಾ ಗಮನಾಕ್ ಆಯ್ಲೊ. ವಿಮಾನ್ ಆಪ್ಲ್ಯಾ ಉಬ್ಣೆಚಿ ಉಂಚಾಯ್ ಕಳ್ವೊನ್ ಘೆತಾಲೆಂ.
ಪರ್ತ್ಯಾನ್ ತಾಚಿ ಮೋತ್ ಮಂದ್ ಜಾಲಿ.
ಆನಿ ಥೊಡ್ಯಾಚ್ ವೆಳಾನ್ ಲೀಜಾಕ್ ಆಪುಣ್ ವೆಂಗೆಂತ್ ಘೆತೊಲೊಂ ಮ್ಹಳ್ಳೆಂ ತಾಕಾ ಕಳಿತ್ ಆಸ್‌ಲ್ಲೆಂ ಪುಣ್ ಯೆಕಾಚಾಣೆ ತಿ ಹುಮೆದ್ ನಿಂವ್ಲಿ. ತಾಚ್ಯಾ ಶಿಂರಾಂನಿ ಆಮಾಲ್ ಆಸ್‌ಲ್ಲೆಂ ಪುಣ್ ಮೆಂದ್ವಾ ಪರ್ಯಾಂತ್ ಪಾವೊಂಕ್‌ನಾಸ್‌ಲ್ಲೆಂ. ವಿಮಾನ್ ಧರ‍್ಣಿಕ್ ತೆಂಕ್ತಾನಾ ಜಾಲ್ಲ್ಯಾ ಝಟ್ಕ್ಯಾಕ್ ತಾಕಾ ಜಾಗ್ ಜಾಲಿ ಆನಿ ಹೆರಾಂ ಪ್ರಯಾಣಿಕಾಂಚ್ಯಾ ಅನಾವಶ್ ಉರ‍್ಡಾ‌ಉರ‍್ಡಿಂತ್ ಖುದ್ದ್ ಉರ‍್ಡೊನ್ ತೊ ವಿಮಾನಾಥಾವ್ನ್ ದೆಂವ್ಲೊ. ವೊರಾಂ ಫಾಂತ್ಯಾಚಿ ಪಾಂಚ್ ಜಾಲ್ಲಿಂ. ಇಮ್ಮಿಗ್ರೇಶನ್, ಕಸ್ಟಮ್ಸ್ ಇತ್ಯಾದಿ ಮ್ಹಣ್ತಾನಾ ತೊ ಸಾತಾಂಕ್‌ಶೆಂ ಭಾಯ್ರ್ ಪಡ್ಲೊ.
ಹಾತಾಂತ್ ಬ್ರೀಫ್‌ಕೆಜ್ ಘೆವ್ನ್ arrival lounge -ಜ್ಯಾಚ್ಯಾ ಆರ್ಶ್ಯಾಂಚ್ಯಾ ವಣದಿಂ ಪಾಟ್ಲ್ಯಾನ್ ಜಮೊ ಜಾಲ್ಲ್ಯಂ ಮಧೆಂ ಲೀಜಾಚಿ ವಳಕ್ ಧರುಂಕ್ ತಾಕಾ ತ್ರಾಚ್ ಮಾರ‍್ಲೆ. ಉಪ್ರಾಂತ್, ತೆಂ ತಾಕಾ ದಿಸ್ಲೆಂ. ಲೀಜಾಚಿ ದೀಷ್ಟ್ ತಾಚೆರ್ ಪಡ್ಲಿ ಯಾ ನಾ ಮ್ಹಳ್ಳೆಂ ತಾಕಾ ಕಳಿತ್ ಜಾಲೆಂ ನಾ ತರಿ ತಾಣ್ದೆ ಹಾತ್ ಹಾಲಯ್ಲೊ. ಭೋವ್‌ಶಾ ಲೀಜಾಕ್ ತೊ ದಿಸ್ಲೊ ನಾ ಜಾಯ್ಜೆ. ಗಡ್ದಿ ವಿಷೇಸ್ ಆಸ್‌ಲ್ಲಿ, ತೀನ್ ಫ್ಲಾಯ್ಟಾಂ ಸಾಂಗಾತಾ ದೆಂವ್‌ಲ್ಲಿಂ.
ತೊ arrival lounge – ಜ್ಯಾಚ್ಯಾ ಭಾಯ್ರ್ ಆಯ್ಲೊ ಆನಿ ಲೀಜಾ ಖಂಚೆ ಕಡೆನ್ ಆಸಾ ಮ್ಹಳ್ಳೊ ಅಂದಾಜ್ ತಾಕಾ ಆಸ್‌ಲ್ಲ್ಯಾನ್ ತೊ ಜಮ್ಯಾಕ್ ಶಿಂದುನ್ ತಾಚೆ ಸರ್ಶಿಂ ಪಾವ್ಲೊ. ತೆಂ ತಾಕಾ ಪಾಟ್ ಕರುನ್ ಆಸ್‌ಲ್ಲೆಂ. ತಾಚ್ಯಾ ಖಾಂದಾರ್ ಬಸ್‌ಲ್ಲೊ ಮೆಥ್ಯುಚೊ ಹಾತ್ ಮಾತ್ಸೊ ಕಾಂಪ್ಲೊ.
‘ಲೀಜಾ!’ ತಾಚ್ಯಾ ಕಾನಾಲಾಗಿಂ ಮೆಥ್ಯುನ್ ಆಪ್ಲೆ ವೊಂಟ್ ವ್ಹರುನ್ ನಾಂವ್ ಉಚಾರ್ಲೆಂ. ಲೀಜಾನ್ ಪಯ್ಲೆಂ ಆಪ್ಣಾಚೆಂ ಮಾತೆಂ ತಾಚೆ ಕುಶಿಕ್ ಘುಂವ್ಡಾಯ್ಲೆಂ ಆನಿ ಉಪ್ರಾಂತ್ ಆಪ್ಣಾಚಿ ಕೂಡ್.
‘ತುಂ ಆಯ್ಲೊಯ್!’ ತೆಂ ಉದ್ಗಾರ್ಲೆಂ ಸಂತೊಸಾಚ್ಯಾ ಪುಸ್ಪುಸ್ಯಾಂನಿ. ಆನಿ ತವಳ್ ತೊ ಸಗ್ಳೊ ಜಮೊ ನಪಂಯ್ಚ್ ಜಾಲ್ಲೆಪರಿಂ ಆನಿ ಸಗ್ಳಾ ಏರ್‌ಪೊರ‍್ಟಾಂತ್ ತಿಂ ದೊಗಾಂಚ್ ಆಸ್‌ಲ್ಲೆಪರಿಂ ತಾಂಕಾಂ ಭೊಗ್ಲೆಂ. ಲೀಜಾಚಿಂ ಉತ್ರಾಂ ತಾಕಾ ಸ್ಪಷ್ಟ್ ಆಯ್ಕಾಲಿಂ.
‘ಹಾಂವ್ ಆಯ್ಲಾಂ ಪುಣ್ ಖಂಯ್ಸರ್ ಯೆವುನ್ ದೆಂವ್ಲಾಂ ಮ್ಹಳ್ಳೆಂ ಮ್ಹಾಕಾಚ್ ಕಳಿತ್ ನಾ.’
ತೆಂ ಹಾಸ್ಲೆಂ.
‘ತುಜೆಂ after shave lotion ಬದ್ಲಾಲಾಂ.’ ಲೀಜಾನ್ ಮ್ಹಳೆಂ ತಾಚ್ಯಾ ಹರ್ಧ್ಯಾರ್ ಮಾತೆಂ ತೆಂಕೊನ್. ‘ಪುಣ್ ತುಂ ನ್ಹಯ್.’ ಮೆಥ್ಯುನ್ ತಾಚ್ಯಾ ಕಪಾಲಾಚೊ ಉಮೊ ಘೆತ್ಲೊ ಆನಿ ಭೋವ್ ಹಾಳ್ವಾಯೆನ್ ತಾಕಾ ವೆಂಗ್ಲೆಂ. ಎಕಾ ಅಸ್ಕತ್ ಪಾರ್ವ್ಯಾಕ್ ವೆಂಗೆಂತ್ ಘೆತ್‌ಲ್ಲೆಪರಿಂ ತಾಕಾ ಭೊಗ್ಲೆಂ.
‘ಆಮಿ ಟೆಕ್ಸಿ ಪಾರ್ಕಾಕ್ ವೆಚೆಂ ಬರೆಂ!’ ಎಕೆ ಸ್ತ್ರೀಯೆಚೊ ಅಪರಿಚಿತ್ ತಾಳೊ ಆಯ್ಕೊನ್ ಮೆಥ್ಯುನ್ ತೆವ್ಶಿನ್ ಪಳೆಲೆಂ. ‘That is if you love-birds are ready!?’
‘ಮ್ಹಜಿ ಆಂಟಿ,’ ಪರಿಚಯ್ ಕರುನ್ ದಿಲಿ ಲೀಜಾನ್. ‘ಪಾಪ್ಪಾಚಿ ಭಯ್ಣ್ ಹಾಂವ್ ತಿಚೆ ಸಂಗಿಂ ರಾವ್ತಾಂ’
ಮೆಥ್ಯುನ್ ತಿಕಾ ಮಾನ್ ಭಾಗಾಯ್ಲೊ. ಆನಿ ಲೀಜಾಕ್ ಆರಾವ್ನ್ ಧರುನ್ಂಚ್ ತೊ ಟೆಕ್ಸಿ ಪಾರ್ಕಾಕ್ ಪಾವ್ಲೊ. ಮುಂಗಡ್ ಅಮಾನತ್ ಕೆಲ್ಲಿ ಟೆಕ್ಸಿ ಹಾಂಕಾಂ ಪಳೆತೆಚ್ ಲಾಯ್ನ್ಂತ್ಲಿ ಸುಟೊನ್ ಮುಕಾರ್ ಆಯ್ಲಿ. ಆಪ್ಲ್ಯಾ ಹಾತಾಂತ್ಲಿ ಬ್ರೀಫ್‌ಕೇಜ್ ಧರ‍್ಣಿರ್ ದವರುನ್ ಮೆಥ್ಯುನ್ ಲೀಜಾಕ್ ಫುಡ್ ಕೆಲಿ ಆನಿ ತಾಚ್ಯಾ ನಾಜೂಕ್ ಭುಜಾಂಚೆರ್ ಆಪ್ಲೆ ಹಾತ್ ದವರ್ಲೆ.
‘ಹಾಂವ್ ಖಂಯ್ಸರ್ ಯೆವ್ನ್ ಪಾವ್ಲಾಂ ಮ್ಹಳ್ಳೆಂ ಮ್ಹಾಕಾ ಕಳಿತ್ ನಾ, ಲೀಜಾ.’ ಪರ್ತ್ಯಾನ್ ತಾಣೆ ಮ್ಹಳೆಂ.
ಲೀಜಾನ್ ತಾಚೆ ಹಾತಾ-ತಾಳ್ವೆ ಆಪ್ಲ್ಯಾ ತಾಳ್ವ್ಯಾಂನಿ ಘೆತ್ಲೆ.
‘ಪುಣ್ ಹಾಂವ್ ಸರ್ವ್ ಜಾಣಾಂ!’
ಮೆಥ್ಯು ಸಗ್ಳೊಚ್ ವಿಸ್ಮಿತ್ ಜಾಲೊ. ಆಪ್ಲ್ಯಾ ಖಂಚಾಯಿ ಎಕಾ ಪತ್ರಾಂತ್ ಗ್ರೆಗರಿಚ್ಯಾ ದಾವ್ಲ್ಯಾಂನಿ ಆಪ್ಣೆ ಸೊಸ್‌ಲ್ಲೆಂ ತಾಣೆ ಲೀಜಾಕ್ ಬರವ್ನ್ ಕಳಂವ್ಕ್‌ನಾತ್‌ಲ್ಲೆಂ.
‘ಹಾಂವ್ ಫಂಗ್ತ್ಯಾಂಚ್ಯಾ ವೋಳಿಂ ಮಧೆಂ ವಾಚುಂಕ್ ಸಕ್ತಾಂ, ಮೆಥ್ಯು!’ ಲೀಜಾನ್ ಮ್ಹಳೆಂ. ‘ಮತಿಂತ್ಲಿಂ ಚಿಂತ್ನಾಂಯಿ ವಾಚುಂಕ್ ಸಕ್ತಾಂ.’
ಮೆಥ್ಯುಲಾಗಿಂ ಉತ್ರಾಂ ನಾತ್‌ಲ್ಲಿಂ.
ತವಳ್ ಆಂಟಿನ್ ಪರಿಗತ್ ಹಾತಿಂ ಘೆತ್ಲಿ. ‘ತುಂ ಆಮ್ಚೆಸಂಗಿ ರಾವ್ತೊಲೊಯ್,’ ತಿಣೆ ಮ್ಹಳೆಂ ಮೆಥ್ಯುಚ್ಯಾ ಬಾವ್ಳ್ಯಾಚೆರ್ ಹಾತ್ ದವರ್ನ್. ‘ಫಾಲ್ಯಾಂ ಲೀಜಾಚಿಂ ವ್ಹಡಿಲಾಂ ಹಾಂಗಾಸರ್ ಯೆತೆಲಿಂ ಆನಿ ತಾಂಚೆ ಸಾಂಗಾತಾ ತೆಂ ಎಸ್ಟೇಟಿಕ್ ವೆತೆಲೆಂ. ಉಪ್ರಾಂತ್ ಲಗ್ನಾಚ್ಯೊ ರಿತಿರಿವಾಜಿ ಆಮಿ ಸುರು ಕರ‍್ಯಾಂ. ಲಗ್ನ್, ಸರ್ವ್ ಸಾಂಪ್ರದಾಯೊ ಆಮಿ ಪಾಳ್ಟೆಲ್ಯಾಂವ್ ಪುಣ್ ಸಾದ್ಯೆ ರಿತಿರ್.’
ಮೆಥ್ಯುಕ್, ಕಿತೆಂ ಮ್ಹಣ್ಚೆಂ ಮ್ಹಣ್ ಕಳೊಂಕ್ ನಾ.
‘ತುಂವೆಂ ಕಾಂಯ್ ಮ್ಹಣಾಜೆ ಮ್ಹಣ್ ನಾ!’ ತಾಚಿಂ ಚಿಂತ್ನಾಂ ವಾಚ್ಲಿ ಲೀಜಾನ್. ‘ಆತಾಂಥಾವ್ನ್ ತುಂ ಆಮ್ಚೆ ತಾಬೆಂತ್.’ ತೆಂ ಹಾಸ್ಲೆಂ.
ತಿಂ ಟೆಕ್ಸೆಂತ್ ಬೊಸ್ಲಿಂ.
ಮುಂದರ್ತಾ ►►
