ನಿಮಾಣೊ ಗೃಂಥ್ “ಝಡ್ತೆಚಿಂ ಝುಜಾಂ”
(ವಾಚ್ಪ್ಯಾಂಕ್ ಗಾಂಚ್ ಅವಸ್ವರ್ – 59ಥಾವ್ನ್ )
………………..ಜಮಾತಿಚಿ ಸ-ವಿ ಸಾಂಜ್.
ಮೆಥ್ಯು ಲಿಯೊಚ್ಯಾ ಸವಿಸ್ತಾರ್ ಬಂಗ್ಲ್ಯಾಚ್ಯಾ ಗೇಟಿಲಾಗಿಂ ಆಸ್ಚೆಂ ಇಂಟರ್‌ಕೊಮ್ ಜೆರೊಮ್ ಲಾಜ್ರಾನ್ ದಾಂಬ್ತಾನಾ ಮೊಧ್ಯಾನ್ ರಾತ್ ಜಾವ್ನ್ ದೇಡ್ ಘಂಟೊ ಉತ್ರಾಲ್ಲೊ. ತೀನ್ ಚಾರ್ ಪಾವ್ಟ್ಂ ಬುತಾಂವ್ ದಾಂಬ್ತೆಚ್ ಚಾರ್ಲ್ಸಾಚೊ, ನಿದೆನ್ ದಾಟ್‌ಲ್ಲೊ ತಾಳೊ ಸ್ಪೀಕರಾಚೆರ್ ಆಯ್ಲೊ.
‘ಕೋಣ್? ದಯಾ ಕರುನ್ ಹಾಂವೆಂ ಜಾಣಾಂ ಜಾವ್ಯೆತ್?’
‘ಜಾಣಾಂ ಜಾವ್ಯೆತ್, ಚಾರ್ಲ್ಸ್!’ ಜಾಪ್ ದಿಲಿ ಜೆರೊಮಾನ್. ‘ಹಾಂವ್ ಜೆರೊಮ್ ಲಾಜ್ರಾ. ಮೆಥ್ಯುಲಾಗಿಂ ಗರ್ಜೆಚೆಂ ಉಲಂವ್ಕ್ ಹಾಂವ್ ಆಯ್ಲಾಂ.’ ಎಕಾ ನವ್ಕರಾಲಾಗಿಂ ಭೆಶ್ಟಿಚ್ ಘಮಂಡಾಯ್ ಗರ್ಜೆಚಿ ನ್ಹಯ್ ಮ್ಹಣ್ ತಾಕಾ ಕಳಿತ್ ಆಸ್‌ಲ್ಲೆಂ.
‘ಪುಣ್ ಮಿ|ಲಿಯೊ ಆನಿಕಿ ವಿಶೆವ್ ಘೆತಾ, ಸರ್.’
‘ತೊ ಸಾಸ್ಣಾಚೊ ವಿಶೆವ್ ಘೆತಾ ತರಿ ಉಟ್ತೊಲೊ,’ ಮನಾಂತ್‌ಚ್ ಮ್ಹಳೆಂ ಜೆರೊಮಾನ್. ‘ಭೋವ್ ಗರ್ಜೆಚಿ ಸಂಗತ್, ಚಾರ್ಲ್ಸ್.’ ತಾಣೆ ಸಂಯಮ್ ಸಾಂಬಾಳ್ಳೆಂ. ‘ತಾಕಾ ಜಾಗಯಿಲ್ಲ್ಯಾನ್ ತುಕಾ ಕಾಂಯ್ ಧಮ್ಕಿ ಮೆಳ್ಚಿ ನಾ.’
‘ಭೋವ್ ಬರೆಂ ಸರ್.’
ಪಾಂಚ್-ಸ ಖಿಣಾಂ ಭಿತರ್ ಬಂಗ್ಲ್ಯಾಚಿ ಒಟೊಮ್ಯಾಟಿಕ್ ಗೇಟ್ ಉಗ್ತಿ ಜಾಲಿ. ಪಾಟಿಂ ಕಾರಾಂತ್ ಬಸುನ್ ಜೆರೊಮಾನ್ ಆಪ್ಲೆಂ ಕಾರ್ ಬಂಗ್ಲ್ಯಾಚ್ಯಾ ಸಾಮ್ಕಾರ್ ಆಸ್ಚ್ಯಾ ತಣಾಚ್ಯಾ ವಾಡಾವಳಿಚೆರ್ ಚಲವ್ನ್ಂಚ್ ಭೆಟೆಕ್ ಆಯ್ಲೆಲ್ಯಾಂಕ್ ಆಸಾ ಕೆಲ್ಲ್ಯಾ ಪಾರ್ಕಾಂತ್ ತಾಣೆ ರಾವಯ್ಲೆಂ.
ಆಪ್ಲಿ ಭ್ರೀಫ್‌ಕೇಜ್ ಘೆವ್ನ್ ತೊ ದೆಂವ್ಲೊ.
ಫುಡ್ಲ್ಯಾ ದಾರ್‍ವಟ್ಯಾಲಾಗಿಂ ಪಾವ್ತಾನಾ ದಾರ್ ಉಗ್ತೆಂ ಕರುನ್ ಚಾರ್ಲ್ಸ್ ತಯಾರ್ ಆಸ್‌ಲ್ಲೊ. ದಾರ್ವಟ್ಯಾಚ್ಯಾ ಚವ್ಕಾ ಭಿತರ್ ಪಿಜಾಮಾ ಸುಟಾವಯ್ರ್ ಈವ್ನಿಂಗ್ ಗೌನಾಚ್ಯಾ ಬಲ್ಸಾಂ ಭಿತರ್ ಆಪ್ಲೆ ಹಾತ್ ಚೆಪುನ್ ಮೆಥ್ಯು ಉಬೊ ಆಸ್‌ಲ್ಲೊ.
‘ತುಜ್ಯಾ ಹ್ಯಾ ಯೆಣ್ಯಾಕ್ ಬರೆಂ ಕಾರಾಣ್ ಆಸ್ಲ್ಯಾರ್ ತುಜಿ ಭಲಾಯ್ಕಿ ಉರ್ತೆಲಿ, ಜೆರೊಮ್!’ ಘಣ್ಗಣೀತ್ ತಾಳ್ಯಾನ್ ಮ್ಹಳೆಂ ಮೆಥ್ಯುನ್. ‘ತುಜೆಂ ಬಿಂಗ್ರಿಸಾಂವ್ ಹ್ಯಾ ದಿಸಾಂನಿ ಖಂಯ್‌ಥಾವ್ನ್ ಖಂಯ್ ಪಾವ್ಲಾಂ ಯಾ ಪಾವ್ತಾ ಮ್ಹಣ್ ಹಾಂವ್ ಜಾಣಾಂ.’
ಜೆರೊಮ್ ಹಾಸ್ಲೊ.
‘ಮ್ಹಾಕಾ ತುಜೆಲಾಗಿಂ ಎಕಾಂತಾಂತ್ ಉಲಂವ್ಕ್ ಆಸಾ.’ ತಾಣೆ ಮ್ಹಳೆಂ. ‘ಬಂಗ್ಲ್ಯಾಂತ್ ಹೆರ್ ಕೋಣ್ ಆಸಾ?’
‘ಮ್ಹಜ್ಯಾ ಸ್ಟಡಿ ರೂಮಾಕ್ ಯಾ,’ ಜಾಪ್ ದಿಲಿ ಮೆಥ್ಯುನ್ ಆಪ್ಲೊ ತಾಳೊ ಬದ್ಲಿನಾಸ್ತಾಂ. ಚಾರ್ಲ್ಸಾಕ್ ಇಸಾರೊ ದಿತೆಚ್ ತಾಣೆ ಫುಡ್ಲೊ ದಾರ್ವಟೊ ದಾಂಪ್ಲೊ. ಜೆರೊಮ್, ಮೆಥ್ಯು ಸಾಂಗಾತಾ ಶಿಡಿಯೆಚಿಂ ಮೆಟಾಂ ಚಡ್ಲೊ.
ಸ್ಟಡಿ ರುಮಾಚೆಂ ದಾರ್ ಉಗ್ತೆಂ ಕರ್ತಾನಾ ತೆ ದೋಗ್‌ಯಿ ಎಕ್ದಮ್ ಲಾಗಿಂ ಆಯ್ಲೆ.
‘ತುಂ ಘಾಣ್ತಾಯ್, ಜೆರೊಮ್!’ ಮ್ಹಣಾಲೊ ಮೆಥ್ಯು. ‘ಕಿತ್ಲೆಂ ತಾಳ್ಯಾಂತ್ ದೆಂವವ್ನ್ ಮಾತ್ಯಾರ್‌ಯಿ ವೊತುನ್ ಆಯ್ಲಾಯ್? ಯಾ ತುಕಾ ಟೇಯ್ಲರಾನ್ ಕುರ್ಪೆಂತ್‌ಚ್ ನ್ಹಾಣಯ್ಲಾ?’
‘ತಾಚೆ ಕುರ್ಪನ್ಂಚ್ ಹಾಂವ್ ಹಾಂಗಾಸರ್ ಆಸಾಂ, ಮೆಥ್ಯು!’ ನಂಜಾಳಿ ಹಾಸ್ಯಾಸಂಗಿಂ ಮ್ಹಣಾಲೊ ಜೆರೊಮ್. ‘ಹಾಂವೆಂ ಆಂವ್ಡೆಲ್ಲೊ ದೀಸ್ ಆಜ್ ಉದೆಲಾ. ತುಜೊ ಸಗ್ಳೊ ಬಾರ್ ಖಾಲಿ ಕೆಲ್ಯಾರ್‌ಯಿ ಮ್ಹಾಕಾ ಹೆ ರಾತಿಂ ಆಮಾಲ್ ಚಡ್ಚೆಂ ನಾ.’
ಸ್ಟಡಿ ರುಮಾಂತ್ಲೊ ಬಾರ್ ಉಗ್ತೊ ಕರುನ್ ಮೆಥ್ಯುನ್ ತಾಂತ್ಲ್ಯೊ ಬೊತ್ಲಿ ಜೆರೊಮಾಕ್ ದಾಕಯ್ಲ್ಯೊ. ‘ಕಿತೆಂ ಜಾಯ್ ತೆಂ ಪಿಯೆ ಆನಿ ಕಿತೆಂ ಬೊಗ್ಳುಂಕ್ ಆಸ್ಚೆಂ ಜಾಂಕುಳ್ನ್ ವಚ್!’
‘ಹಿ ರಾತ್ ಮ್ಹಜಿ, ಮೆಥ್ಯು!’ ಹಾಳ್ವಾಯೆನ್ ಮ್ಹಳೆಂ ಜೆರೊಮಾನ್. ‘ಹಾಂವೆಂ ಮ್ಹಜ್ಯಾ ಜಾಂಗಾಂ ಸಾಮ್ಕಾರ್ ಧರ್ಚೆಂ ಬೇಗ್ ಕಾಡ್‌ಯಿಲ್ಲ್ಯಾ ದಿಸಾಥಾವ್ನ್ ಹಾಂವ್ ತುಜೊ ಗುಲಾಮ್ ಜಾಲೊಂ ಮ್ಹಳ್ಳೆಪರಿಂ ಕರಿತ್ತ್ ತುಂ ಆಯ್ಲಾಯ್, ಮ್ಹಾಕಾ ದುಕಯಿತ್ತ್ ಆಯ್ಲಾಯ್. ತೊ ರಿಚ್ಚರ್ಡ್, ತೆಂ ಹೆಲೀನಾ, ಮ್ಹಾಕಾ ದಣ್ಸುಂಚೆ ಖಾತಿರ್‌ಚ್ ಹಾಂಕಾಂ ತುಂವೆಂ ಒಸಿಸಾಂತ್ ಹಾಡ್ಲೆಂಯ್. ಪುಣ್ ಹಾಂವೆಂ ಕಿತೆಂಚ್ ಮ್ಹಳೆಂ ನಾ.’
ಬಾರಾ ಸರ್ಶಿ ವಚುನ್ ಜೆರೊಮಾನ್ ವೊಡ್ಕಾಚಿ ಬೊತ್ಲ್ ವಿಂಚ್ಲಿ ಆನಿ ಎಕ್ ಬಳಿಷ್ಟ್ ಡ್ರಿಂಕ್ ತಯಾರ್ ಕೆಲೆಂ. ಕಾಯಿಂಚ್ ಭರ್ಸಿನಾಸ್ತಾಂ ಎಕ್ ಘೊಟ್ ತಾಣೆ ಮಾರ್ಲೊ ಆನಿ ತೊ ಘೊಟ್ ತಾಳ್ಯಾಂತ್ ದೆಂವಯ್ತೆಚ್ ತಾಣೆ ಆಪ್ಲೆ ವೋಟ್ ಲೆಂವ್ಲೆ.
‘ಆಕ್ರೇಕ್ ಜಾಂವ್ಕ್ ಆಸ್ಚೆಂ ಜಾಲೆಂಚ್!’
‘ಕಿತೆಂ ಜಾಲೆಂ?’ ಮೆಥ್ಯುನ್ ಸಿಗಾರ್ ಪೆಟಯ್ಲೆಂ.
‘ಸ್ಕಾಯ್‌ಪಾರ್ಕ್ ಪಾರ್ಟಿ ಜಾಲ್ಯಾ ಉಪ್ರಾಂತ್…..you…you…fucked my wife!’
ಉಪ್ರಾಂತ್ ಘಡ್‌ಲ್ಲೆಂ ಕ್ಷಣಿಕ್ ಜಾವ್ನಾಸ್‌ಲ್ಲೆಂ ಪುಣ್ ಅನಾಪೇಕ್ಷಿತ್ ನ್ಹಯ್.
ಆಪ್ಲ್ಯಾ ಉಜ್ವ್ಯಾ ಹಾತಾಚ್ಯಾ ಬೊಟಾಂ ಮಧೆಂ ಆಸ್‌ಲ್ಲೆ ಸಿಗಾರ್ ಮೆಥ್ಯುನ್ ದಾವ್ಯಾಕ್ ವರ್ಗಾಯಿಲೆಂ ಆನಿ ತಾಣೆ ಉಜ್ವ್ಯಾ ಹಾತಾನ್ ಭಿಜಾಯಿಲ್ಲಿ ಮುಟ್ ಜೆರೊಮಾಚೆ ಖಾಡ್ಕೇರ್ ಫುಟ್ಲಿ. ಜೆರೊಮ್ ಪಾಟಿಂ ಉಸಳ್ಳೊ ಆನಿ ತಾಚ್ಯಾ ಹಾತಾಂತ್ಲೊ ಗ್ಲಾಸ್ ಕಾರ್‍ಪೆಟಿಚೆರ್ ಪಡ್ಲೊ ಆನಿ ವೊಡ್ಕಾ ಶಿಂಪ್ಲೊ.
ಕಿತ್ಲ್ಯಾ ವರ್ಸಾಂಥಾವ್ನ್ ಹ್ಯಾ ಅವ್ಕಾಸಾಕ್ ಹಾಂವ್ ರಾಕೊನ್ ಆಸ್‌ಲ್ಲೊ!’ ಮ್ಹಣಾಲೊ ಮೆಥ್ಯು ಆಪ್ಲ್ಯಾ ಬೊಟಾಂಚೆರ್ ಸಮಾಧಾನೆಚೊ ಸ್ವಾಸ್ ಫುಂಕೊನ್. ‘ಸ್ಕಾಯ್‌ಪಾರ್ಕ್ ಪಾರ್ಟಿ ಉಪ್ರಾಂತ್ ಕಿತೆಂ ಜಾಲೆಂ ತೆಂ ಜಾಣಾಂ ಜಾಂವ್ಚೆಂ ಪುರುಷತ್ವ್ ತುಜೆಲಾಗಿಂ ನಾ.’
‘ಪುರುಷತ್ವಾಚೆಂ ಉಲವ್ಣೆಂ ಉಲಯ್ನಾಕಾ, ಮೆಥ್ಯು ಲಿಯೊ!’ ಕಾರ್ಪೆಟಿರ್‌ಚ್ ಉಟೊನ್ ಬಸುನ್ ಮ್ಹಣಾಲೊ ಜೆರೊಮ್. ತಾಚೆ ವೊಂಟ್ ಫುಟ್‌ಲ್ಲೆ ಆನಿ ನಾಕಾಚ್ಯಾ ಫುಡಾಂನಿ ರಗತ್ ದೆಂವ್ತಾಲೆಂ. “ಡಾಯ್ನಿಂಗ್ ಟೇಬಲಾಚೆರ್ ಹಾಂವೆಂ ಕಿತೆಂ ಕೆಲೆಂ ಆನಿ ಹಾಂವ್ ಕಿತೆಂ ಕರುಂಕ್ ಸಕ್ಲೊಂ ಮ್ಹಳ್ಳೆಂ ಈವಾಲಾಗಿಂ ವಿಚಾರ್, ಒಸಿಸಾಂತ್ಲ್ಯಾ ದೆವಾ ಸರ್ವೇಸ್ಪರಾ!’ ಬೊಬಾಟ್ಲೊ ಜೆರೊಮ್. ‘ಸ್ಕಾಯ್‌ಪಾರ್ಕಾಂತ್ಲ್ಯಾ ಪಾರ್ಟಿ ಉಪ್ರಾಂತ್ ತುಮಿ ಕಿತೆಂ ಕೆಲೆಂ ಮ್ಹಳ್ಳೆಂ ಹಾಂವ್ ದೃಶಾನ್ ದೃಶ್ ಜಾಣಾಂ, ದಳ್ದಿರ್‍ಯಾ. ಆಕ್ರೇಕ್ ತರಿ ತುಂವೆಂ ತುಜಿ ಆಶಾ ಜ್ಯಾರಿ ಕೆಲಿಯ್. ಕಿತ್ಲೆಂ ಪಿಸುಡ್ಲೆಂಯ್ ಮ್ಹಜ್ಯಾ ಈವಾಕ್?’
‘ತುಜ್ಯಾ ಈವಾಕ್?’ ಖೆಂಚ್ಲೊ ಮೆಥ್ಯು. ‘ಮ್ಹಜ್ಯಾ ತಸಲ್ಯಾ ದಾದ್ಲ್ಯಾಕ್ ಸಾಂಗ್‌ಲ್ಲ್ಯಾ ಈವಾಕ್ ಮ್ಹಣ್!’
‘ಮೆಥ್ಯು, ಬ್ಲಡಿ ಬಾಸ್ಟರ್ಡ್!’ ಮ್ಹಳೆಂ ಜೆರೊಮಾನ್ ತಾಚ್ಯಾ ಸಾಮ್ಕಾರ್ ಬೋಟ್ ಹಾಲವ್ನ್. ‘ಹಾಂವೆಂ ಸಾಂಗೊಂಕ್ ಆಸ್ಚೆಂ ಆಯ್ಕಾತಾನಾ ತುಜೆಂ ದಾದ್ಲೆಂಪಣ್ ಖಿರೊನ್ ವೆತೆಲೆಂ ಮಾತ್ರ್ ನ್ಹಯ್, ಈವಾ ತಸಲಿಂ ಹಜಾರ್ ಜಣಾಂ ತುಜೆ ಸಾಮ್ಕಾರ್ ವಿಣ್ಗಿಂ ನಾಚ್ಲ್ಯಾರ್‌ಯಿ ತುಂ ಕಿತೆಂ ಕರ್ಚೆಂ ಮ್ಹಳ್ಳೆ ಕಳಿತ್ ಜಾಯ್ನಾಸ್ತಾನಾ ಮೂಟ್ ಮಾರ್ತೊಲೊಯ್.’
‘ತರ್ ಜಾಂಕುಳ್ ಆತಾಂ!’ ಮೆಥ್ಯುನ್‌ಯಿ ಕೀಳ್ ಉತ್ರಾಂ ವಾಪರ್ಲಿಂ. ಜೆರೊಮಾನ್ ಕಾರ್ಪೆಟಿರ್ ಪಡ್‌ಲ್ಲೊ ಗ್ಲಾಸ್ ವಿಂಚುನ್ ಪರ್ತ್ಯಾನ್ ಭರ್ಲೊ. ಮೆಥ್ಯುಚ್ಯಾ ಸಿಗಾರಾಚೊ ಧುಂವರ್ ಸ್ಟಡಿ ರುಮಾಂತ್ ಭರೊನ್ ಯೆತಾಲೊ.
‘ಬೊಸ್ ಮೆಥ್ಯು ಬೊಸ್,’ ಜೆರೊಮಾನ್ ಮ್ಹಳೆಂ ಎಕಾ ದಿವಾನಾಚೆರ್ ಬಸುನ್. ‘ಹಾಂವೆಂ ಸಾಂಗೊಂಕ್ ಆಸ್ಚೆಂ ಉಬೊ ರಾವೊನ್ ಆಯ್ಕೊಂಚೆಂ ತ್ರಾಣ್ ಆನಿ ಶಾಥಿ ತುಕಾ ಆಸ್ಚಿ ನಾ.’
ಮೆಥ್ಯು, ಆಪ್ಲ್ಯಾ ಸ್ಟಡಿ ಡೆಸ್ಕಾಚ್ಯಾ ಕದೆಲಾರ್ ಬಸ್ಲೊ.
ಪಾಂಚ್ ಖಿಣಾಂಚ್ಯಾ ಮೌನಾ ಉಪ್ರಾಂತ್ ಜೆರೊಮಾನ್ ಸುರು ಕೆಲೆಂ.
‘ತುಂವೆಂ ಪೊಸುನ್ ದವರ್ಲ್ಲ್ಯಾ ಚಿಟ್ಟ್ಯಾ ವಾಗಾಚ್ಯಾ ಪಿಲಾಕ್ ಪಯ್ಶ್ಯಾಂಚಿ ರೂಚ್ ಲಾಗ್ಲ್ಯಾ!’ ತಾಣೆ ಮ್ಹಳೆಂ. ‘ತೊ ಒಸಿಸ್ ಕಂಪೆನಿಕ್ ದಿಸಾ ಉಜ್ವಾಡೆಂಚ್ ವಿಕ್ರಿತ್ ಕರ್ತಾ. ಮ್ಹಜೆಲಾಗಿಂ ರುಜ್ವಾತಿ ಆಸಾತ್.’
‘ಕಸಲ್ಯೊ ರುಜ್ವಾತಿ?’
‘ಕಿತೆಂಯಿ ತರಿ ಹಾಂವ್ ಮ್ಹಜ್ಯಾ ನವ್ಕರೆಕ್ ಧಗೊ ಕರಿನಾ.’ ಆಪ್ಲಿಂ ಉತ್ರಾಂ ವಿಂಚ್ಲಿಂ ಜೆರೊಮಾನ್. ‘ಮ್ಹಜೆಲಾಗಿಂ ದಸ್ತಾವೆಜಾಂ ಆಸಾತ್, ಟೇಪ್ ಕೆಲ್ಲಿಂ ಸಂಭಾಷಣಾಂ ಆಸಾತ್, ಬೆಂಕ್ ಎಕೌಂಟ್ ನಂಬ್ರಾಂ ಆಸಾತ್.’
‘ಮತ್ಲಬ್, ತುಜೆಲಾಗಿಂ ಸರ್ವಾಂಚ್ಯಾ ಕೆಬಿನಾಂಚ್ಯೊ ಚೋರ್ ಚಾವಿಯೊ ಆಸಾತ್, ಹರ್ಯೆಕ್ ಫೋನ್ ಲಾಯ್ನ್ ತುಂವೆಂ ಟ್ಯಾಪ್ ಕೆಲ್ಯಾಯ್ ಆನಿ ಭೋವ್‌ಶಾ ಎಕಾ ಪ್ರಾಯ್ವೇಟ್ ಡಿಟೆಕ್ಟಿವಾಕ್ ತುಂವೆಂ ಸಹಾಯಕ್ ಜಾವ್ನ್ ನೆಮ್ಲಾಯ್.’
‘ಖಂಡಿತ್ ಜಾವ್ನ್!’ ಹರ್ದೆಂ ಪೆಟ್ಲೆಂ ಜೆರೊಮಾನ್. ‘Never under estimate Jerome Lazra, Sir, never! ಒಸಿಸ್ ಕಂಪೆನಿ ವಿಕ್ರಿತ್ ಜಾಂವ್ಕ್ ಹಾಂವ್ ಸೊಡಿಸೊಂ ನಾ.’
ತಾಣೆ ಬ್ರೀಫ್‌ಕೇಜ್ ಉಗ್ತಿ ಕೆಲಿ. ‘ತುಕಾ ರುಜ್ವಾತಿ ಆಯ್ಕೊಂಕ್ ಆನಿ ಪಳೆಂವ್ಕ್ ಜಾಯ್?’
‘ಗರ್ಜ್ ನಾ!’ ಮೆಥ್ಯುನ್ ಮ್ಹಳೆಂ. ‘ರಿಚ್ಚರ್ಡ್ ಆನಿ ಮ್ಹಜೆ ಮದ್ಲಿ ಸಮ್ಜಣಿ ಕಸಲ್ಯಾಯಿ ರುಜ್ವಾತಿಂಕ್ ಆಪವ್ಣೆಂ ದೀನಾ.’
‘ತುಂ ಅಶೆಂ ಮ್ಹಣ್ತೊಲೊಯ್ ಮ್ಹಣ್ ಹಾಂವ್ ಜಾಣಾಸ್ಲೊಂ!’ ಮ್ಹಳೆಂ ಜೆರೊಮಾನ್, ಬ್ರೀಫ್‌ಕೇಜ್ ದಾಂಪುನ್. ‘ಬರೆಂ. ಆತಾಂ ಎಕ್ ನವಿ ಸಂಗತ್–ಪಾಟ್ಲ್ಯಾ ದೋನ್ ರಾತಿಂಥಾವ್ನ್ ತುಜ್ಯಾಚ್ ಬೀಚ್‌ಕೊಟೆಜಿಂತ್ ರಿಚ್ಚರ್ಡ್ ತುಜೆ ಧುವೆಕ್, ರಮೋನಾಕ್, ಸ್ಕ್ರೂ ಘಾಲಿತ್ತ್ ಆಸಾ. ದಾಕ್ಲೆ ಹಾಂಗಾಸರ್‌ಚ್ ಪಳೆಂವ್ಕ್ ಜಾಯ್ ಯಾ ಈವಾ ಸಾಂಗಾತಾ ಪಳೆತಾಯ್? ಈವಾಚಿ ರೂಚ್ ರಿಚ್ಚರ್ಡಾನ್‌ಯಿ ಪಳೆಲ್ಯಾ, ಚಾಕ್ಲ್ಯಾ ಆನಿ ಲೆಂವ್ಲ್ಯಾ.’
ಮೆಥ್ಯುಚ್ಯಾ ಮುಕಮಳಾರ್ ಕಸಲಿಚ್ ಬದ್ಲವಾಣ್ ಜಾಲಿ ನಾ.
‘ತುಜೆಂ ಪ್ರತಿಕ್ರಿಯೆಂ ಅಸಲೆಂಚ್ ಆಸ್ತೆಲೆಂ ಮ್ಹಣ್ ಹಾಂವ್ ಜಾಣಾಸ್ಲೊಂ!’ ಮ್ಹಳೆಂ ಜೆರೊಮಾನ್ ಆಪ್ಲೊ ಗ್ಲಾಸ್ ಖಾಲಿ ಕರುನ್. ಆನ್ಯೇಕ್ ವೊಡ್ಕಾ ಘೆಂವ್?’
ಮೆಥ್ಯುನ್ ಜಾಪ್ ದಿಲಿ ನಾ.
‘ರಮೋನಾಕ್ ಪ್ರಸೂತ್ ಜಾತಾನಾ ತುಜೆ ಪತಿಣೆನ್ ಜೀವ್ ದಿಲೊ ಯಾ ಕೊಣೆಂಗೀ ತಿಚೊ ಜೀವ್ ಕಾಡ್ಲೊ.’ ಬಾರಾಥಾವ್ನ್ ಪಾಟಿಂ ಆಯಿಲ್ಲೊ ಜೆರೊಮ್ ಪರ್ತ್ಯಾನ್ ದಿವಾನಾಚೆರ್ ಬಸುನ್ ಮ್ಹಣಾಲೊ. ‘ತಿಚ್ಯಾ ಮರಣಾಚೆಂ ಕಾರಾಣ್ ಜಾವ್ನಾಸ್‌ಲ್ಲೊ ಎಕ್ಲೊ ಕಾಮುಕಿ ಆನಿ ಆಮಾಲಿ ಡೊಕ್ಟರ್.’
‘ಚತ್ರಾಯ್, ಜೆರೊಮ್!’ ದಾಂತಾಂ ಇಡ್ಯಾಂತ್ಲ್ಯಾನ್ ಪುಸ್ಪುಸ್ಲೊ ಮೆಥ್ಯು. ‘ಹೊ ಮ್ಹಜೊ ಖಾಸ್ಕಿ ಘಾಯ್. ತಾಚೆ ಮೀಟ್ ರಗ್ಡುಂಕ್ ಕೊಣಾಕೀ ಹಕ್ಕ್ ನಾ.’
‘ಮ್ಹಾಕಾ ಹಕ್ಕ್ ಆಸಾ!’ ಸಟ್ಟ್ ಕರುನ್ ಜಾಪ್ ದಿಲಿ ಜೆರೊಮಾನ್. ‘ಪುಣ್ ಆತಾಂ ಮೀಟ್ ನಾಕಾ. ಘಾಯ್ ಮಾಜ್ವಂವ್ಕ್ ಹಾಂವೆಂ ಮುಲಾಮ್ಂಚ್ ಹಾಡ್ಲ್ಯಾ.’
ಮೆಥ್ಯು ಮೊನೊ ಜಾಲೊ.
‘ತುಜಿ ಪತಿಣ್ ಮರ್ತಾನಾ ತುಂ ಗಲ್ಫಾಂತ್ ಆಸ್‌ಲ್ಲೊಯ್. ತಿ ಅಂತರ್ಲಿ ಮ್ಹಳ್ಳಿ ಖಬರ್ ಕಳ್‌ಲ್ಲ್ಯಾಫರಾ ತುಂ ಪಾಟಿಂ ಯೆತಾನಾ ತ್ಯಾ ಡೊಕ್ಟರಾಚಿ ಪಿತುಳ್ ಭಾಯ್ರ್ ಪಡ್‌ಲ್ಲಿ ಆನಿ ರಾಜಕೀಯ್ ಫುಡಾರಿಂಚ್ಯಾ ಮಜತೇನ್ ತಾಣೆ ಪಳಾಪಳ್ ಘೆತ್‌ಲ್ಲಿ. ತ್ಯಾ ಡೊಕ್ಟರಾಚೆಂ ನಾಂವ್ ಡೊಕ್ಟರ್ ಫ್ರಾನ್ಸಿಸ್ ಕ್ಲೆಮೆಂಟ್.’
‘ಜೆರೊಮ್!’ ಮೆಥ್ಯು ಖಿಳಂಚ್ಲೊ.
‘ಕಾಂಯ್ ಮತಿಕ್ ಗೆಲೆಂ, ಮೆಥ್ಯು?’
‘ನಾ!’
‘ವೆಚೆಂ ನಾ,’ ಮ್ಹಳೆ ಜೆರೊಮಾನ್. ‘ತಿತ್ಲೊ ಸ್ಮಾರ್ಟ್ ಮನಿಸ್ ತುಂ ನ್ಹಯ್. ಹೊ ತುಜೊ ರಿಚ್ಚರ್ಡ್ ಕ್ಲೆಮೆಂಟ್ ಜಾವ್ನಾಸಾ ಎಕ್ಲೊಚ್ ಪುತ್ ತುಂವೆಂ ಸೊದ್ಚ್ಯಾ ಡೊಕ್ಟರ್ ಫ್ರಾನ್ಸಿಸ್ ಕ್ಲೆಮೆಂಟಾಚೊ!’
ಕಿತೆಂ ಜಾಲೆಂ, ಕಿತೆಂಚ್ ನಾ.
ಮೆಥ್ಯು ಲಿಯೊಚಿ ದೀಷ್ಟ್ ಖಿಳ್ಯಾಂಪರಿಂ ಜೆರೊಮಾಚೆರ್ ಖಂಚೊನ್ ರಾವ್ಲಿ.
ಎಕ್ ವಿಸ್ಪೋಟ್, ಧಮಾಕೊ ಯೆತೊಲೊ ಜಾತೊಲೊ ಮ್ಹಣ್ ಆಂವ್ಡೆಂವ್ಚ್ಯಾ ಜೆರೊಮಾಕ್ ಶ್ಹೆಳೆಂ ಉದಕ್ ನ್ಹಯ್, ಬರ್ಫ್‌ಚ್ ಬ್ರೀಫ್ಸಾಂನಿ ಚೆಪ್‌ಲ್ಲೆಪರಿಂ ಜಾಲೆಂ.
‘ಕಸಲೊ ಮನಿಸ್ ತುಂ?’ ಖಿಳಂಚ್ ಮಾರ್ಲಿ ಜೆರೊಮಾನ್. ‘ಇತ್ಲೊ ತೇಂಪ್….ಮ್ಹಜ್ಯಾ ಪತಿಣೆಚೊ ಖುನಿಗಾರ್ ಮೆಳ್ಳ್ಯಾ ಖೆರಿತ್ ಆಪುಣ್ ಸುಶೆಗಾನ್ ಆಸ್ಚೊ ನಾ ಮ್ಹಣ್ಚೊ ಮೆಥ್ಯು ಲಿಯೊ ತುಂ, ಆತಾಂ ರುಜ್ವಾತಿಂ ಸಮೇತ್ ಲೀಜಾಚ್ಯಾ ಖುನಿಗಾರಾಕ್….’
‘ಕಸಲ್ಯೊ ರುಜ್ವಾತಿ, ಜೆರೊಮ್?’ ಮೆಥ್ಯುಚೊ ತಾಳೊ ಸ್ಪಷ್ಟ್ ಆಸ್‌ಲ್ಲೊ ಕಾಂಪೆರೊ ನಾತ್‌ಲ್ಲೊ. ‘ಮಾತೆಂಗೊಳ್ ಆಮಾಲ್, ಫ್ರೆಡ್ ಟೇಯ್ಲರಾಚಿ ಸ-ವಿ ಜಮಾತಿಕ್ ಹಾಜರ್ ಜಾವ್ನ್ ಆಯಿಲ್ಲ್ಯಾ ತುಂವೆಂ ಕಸಲ್ಯೊ ರುಜ್ವಾತಿ ಹಾಡುನ್ ಆಯ್ಲಾಯ್? ಜಾಣಾಂಯ್ ತುಂ ಸಂಸಾರಾಂತ್ ಕಿತ್ಲೆ ಡೊ|ಫ್ರಾನ್ಸಿಸ್ ಕ್ಲೆಮೆಂಟ್ ಆಸ್ತಿ, ಕಿತ್ಲೆ ಜೆರೊಮ್ ಲಾಜ್ರಾ ಆಸ್ತಿತ್, ತ್ಯಾ ಮಾಪಾನ್ ಕಿತ್ಲೆ ಮೆಥ್ಯು ಲಿಯೊ ಆಸ್ತಿತ್ ಮ್ಹಣ್?’
‘ತೆಂ ಹಾಂವ್ ನೆಣಾಂ!’ ಬೊಬಾಟ್ಲೊ ಜೆರೊಮ್. ‘ಪುಣ್ ಒಸಿಸಾಂತ್ ಫಕತ್ ಎಕ್ ರಿಚ್ಚರ್ಡ್ ಕ್ಲೆಮೆಂಟ್ ಆಸಾ ಮ್ಹಣ್ ಜಾಣಾಂ ಆನಿ ತೊ ಯೆದೊಳ್ ಪರ್ಯಾಂತ್ ಆನಿ ಆತಾಂಯಿ ತುಕಾ ಆನಿ ಒಸಿಸಾಕ್ ಸ್ಕ್ರೂ ಘಾಲಿತ್ತ್ ಆಸಾ, ಟೆಂಡರ್ ಡಿಪಾರ್ಟ್‌ಮೆಂಟಾಂತ್ಲೆ ಘುಟ್ ಭಾಯ್ರ್ ಪಾಜ್ರಾಯ್ತ್ ಆಸಾ ಆನಿ….ತಾಣೆ ತುಜೆ ಧುವೆಕ್….’
‘ಮ್ಹಜೆ ಧುವೆಕ್ ಕಿತೆಂ, ಜೆರೊಮ್?’ ಮೆಥ್ಯುಚೊ ತಾಳೊ ಆನಿ ಸವಾಲ್ ಇತ್ಲೆಂ ತೀಕ್ಷ್ಣ್ ಆಸ್‌ಲ್ಲೆಂಕಿ ಜೆರೊಮಾಚೆಂ ಆಮಾಲ್ ಪುರ್ತೆಂ ಫಿರ್ವಾಲೆಂ.
‘ತ್ಯಾ ತುಜ್ಯಾ ಚಿಟ್ಟ್ಯಾ ವಾಗಾಚ್ಯಾ ಪಿಲಾನ್ ತುಜೆ ಧುವೆಕ್‌ಯಿ ಸೊಡ್ಲೆಂ ನಾ,’ ಹಟಾಕ್ ಪಡೊನ್ ಮ್ಹಣ್ಚೆಪರಿಂ ಮುಂದರಿಲೆಂ. ‘ತುಜ್ಯಾ ಬೀಚ್ ಕೊಟೆಜಿಂತ್ ಚಲ್‌ಲ್ಲ್ಯಾ ತಾಂಚ್ಯಾ ಮುಲಾಕತೆಚ್ಯೊ ತಸ್ವೀರ್‍ಯೊ ಮ್ಹಜೆಲಾಗಿಂ ಆಸಾತ್. ಮಾಲ್ಕಮಾನ್ಂಚ್ ತೊ ಕಾಡಯಿಲ್ಲ್ಯೊ.’
ಜೆರೊಮಾಚ್ಯಾ ಕಾನಾಂಕ್ ಯಾ ಶಿಂತಿದಾಕ್ ಹೆಂ ಗೆಲೆಂ ನಾ ಪುಣ್ ಮೆಥ್ಯುಚೆ ಕಾನ್ ಲಟ್ಟ್ ಕರುನ್ ನೀಟ್ ಜಾಲೆ.
‘ಆನಿ ಕೋಣ್ ಹೊ ಮಾಲ್ಕಮ್?’ ಮೆಥ್ಯುಚ್ಯಾ ವೊಂಟಾಂ ಇಡ್ಯಾಂನಿ ಹಾಸೊ ಆಸ್‌ಲ್ಲೊ.
ಮೆಥ್ಯುನ್ ಥಂಯ್ಚ್ ಜೆರೊಮಾಕ್ ದಾಂಬೂನ್ ದರ್ಲೊ. ಜೆರೊಮಾಚ್ಯಾ ಕುಡಿಂತ್ಲ್ಯಾ ಎಕ್ ಶ್ಹೆಳೊ ಶಿರ್‍ಶಿರೊ ಧಾಂವ್ಲೊ. ಆಪುಣ್ ದರ್ವಡ್ಲೊಂ ಆನಿ ‘ಗ್ಲೋಬ್ ಪರ್ಸನಲ್ ಸರ್ವಿಸಸ್’ ಚಲಂವ್ಚ್ಯಾ ಮಾಲ್ಕಮಾಚೆಂ ನಾಂವ್ ಆಪ್ಣೆಂ ಉಚಾರ್ಲೆಂ ಮ್ಹಣ್ ತೊ ಚುರ್‍ಚುರ್‍ಲೊ.
‘ಖಂಯ್ ಆಸಾತ್ ತ್ಯೊ ತಸ್ವೀರ್‍ಯೊ, ಜೆರೊಮ್?’ ವಿಚಾರ್ಲೆಂ ಮೆಥ್ಯುನ್, ಆಪ್ಲೊ ಉಜ್ವೊ ಹಾತ್ ಮುಕಾರ್ ಹಾಡುನ್. ‘ಪಳೆತಾಂ ಹಾಂವ್ ಮ್ಹಜಿ ಧುವ್ ದುಸ್ರ್ಯಾಂಚೆ ವೆಂಗೆಂತ್ ಕಶೆಂ ಚಡ್ಪಡ್ತಾ ಮ್ಹಣ್?’
‘ಹೆಂ ಸವಾಲ್ ವಿಚಾರುಂಕ್ ತುಕಾ ಲಜ್ ದಿಸನಾ, ಮೆಥ್ಯು?’
‘ತಸ್ವೀರ್‍ಯೊ, ಪ್ಲೀಜ್!’
ಸಗ್ಳೊಚ್ ಕಾಲುಬುಲೊ ಜಾಲ್ಲೊ ಜೆರೊಮ್ ಆಮಾಲಾಚ್ಯಾ ಕಬಾಟ್ ಪಳೆಲಾಗ್ಲೊ.
‘ಆತಾಂ ನ್ಹಯ್, ಜೆರೊಮ್!’ ಮ್ಹಳೆಂ ಮೆಥ್ಯುನ್ ಆಪ್ಲ್ಯಾ ವೊಂಟಾಂ ಇಡ್ಯಾಂತ್ ಹಾಸೊ ಪಾಜ್ರಾವ್ನ್. ಜೆರೊಮಾಚೆಂ ಶಿಂತಿದ್ ಪರ್ತ್ಯಾನ್ ಆಮಾಲಾಕ್ ಆಶೆತಾ ಮ್ಹಣ್ ತಾಕಾ ಸಮ್ಜಾಲ್ಲೆಂ. ‘ತಸ್ವೀರ್‍ಯೊ?’
ಜೆರೊಮಾನ್ ಭುಜಾಂ ಉಡಯ್ಲಿಂ. ‘ಪ್ರಸ್ತುತ್ ಮ್ಹಜೆಲಾಗಿಂ ನಾಂತ್!’
‘ಆನಿ ಕೆದಳಾ ತ್ಯೊ ತುಜೆ ತಾಬೆಂತ್ ಯೆತೆಲ್ಯೊ?’
ಜಾಪ್ ನಾ. ‘ತ್ಯಾ ಮೆಲ್ಕಮಾಚೆಂ ರುಸುಂ ದಿಲಾಂಯ್ ಯಾ ತಾಕಾ ರಮಿಕ್, ರಿಚ್ಚರ್ಡಾಕ್ ಆನಿ ಮ್ಹಾಕಾ ಬ್ಲ್ಯಾಕ್‌ಮೇಯ್ಲ್ ಕರುಂಕ್ ತ್ಯಾ ತಸ್ವೀರ್‍ಯಾಂಚೆಂ ಮ್ಹಾಲಕತ್ವ್ ವಿಕ್ಲಾಂಯ್?’
‘ಪುಣ್ ರಿಚ್ಚರ್ಡಾ ವಿಶಾಂತ್ ಹಾಂವೆಂ ಹಾಡ್ಲೆಲಿ ಖಬರ್ ಶೆಂಬರ್ ಠಕ್ಕೆ ಖರಿ. ಮ್ಹಜೆಲಾಗಿಂ ಪುರಾವೆ ಆಸಾತ್….’
‘ಆನಿ ವೇಳ್ ಯೆತಾನಾ ತುಂ ತೆ ಭಾಯ್ರ್ ಕಾಡ್ತೊಲೊಯ್?’
‘ತುಜ್ಯಾ ಮಲ್ಕಮಾನ್ ಕಿತೆಂ ಹಿ ಖಬರ್ ಕಾಡುಂಕ್ ರೆವರೆಂಡಾಚಿ ಮಜತ್ ಸೊದ್ಲಿ? ಭಾವಾರ್ಥಾಚಿ ಉಡ್ಕಿ ಮಾರುಂಕ್ ಪೆಟ್ರೋಸ್ಟೇಟಾಕ್ ಆಯಿಲ್ಲೊ ತೊ ರೆವರೆಂಡ್ ಅಜಾಪಾಂ ಕರುಂಕ್ ಸಕ್ತಾ ತರ್ ತುಕಾ ಮಾಲ್ಕಮಾಚಿ ಗರ್ಜ್ ಪಡ್ತಿ ನಾ.’
‘ತುಂ ಮಾಲ್ಕಮಾಕ್ ವಳ್ಕಾತಾಯ್?’
‘ಹಾಂವ್ ಸಬಾರ್ ಸಂಗ್ತಿಂಕ್ ವಳ್ಕಾತಾಂ!’ ಮೆಥ್ಯು ಉಬೊ ಜಾಲೊ. ತಾಣೆ ಎಕಾ ಟೊಲ್‌ಬೊಯ್ (ಪಾಂಚ್-ಸ ಗೊವೆತಾಂಚೆಂ ನೀಟ್‌ಚ್ ಆಸ್ಚೆಂ ಎಕ್ ಕಬಾಟ್) ಸರ್ಶಿಂ ವಚುನ್ ಹ್ಯೂಮಿಡೊರಾಂತ್ಲೆಂ ಎಕ್ ಸಿಗಾರ್ ವಿಂಚ್ಲೆಂ. ‘ಹಾಂವ್ ಸಬಾರ್ ವ್ಯಕ್ತಿಂಕ್‌ಯಿ ವಳ್ಕಾತಾಂ. ಪುಣ್ ತುಂ, ಇತ್ಲಿಂ ವರ್ಸಾಂ ಮ್ಹಜೆ ಸಂಗಿಂ ಆಸುನ್‌ಯಿ ಮ್ಹಾಕಾ ವಳ್ಕೊಂಕ್ ಸಕ್ಲೊನಾಂಯ್.’
‘ಆನಿ ತುಂ ಮ್ಹಾಕಾ ವಳ್ಕಾತಾಯ್ ತರ್?’
‘ವಳ್ಕೊಂಚೆಂ ತಸಲೆಂ ತುಜೆ ಥಂಯ್ ಕಾಂಯ್ ಉರೊಂಕ್ ನಾ.’ ಆಪ್ಲಿಂ ಉತ್ರಾಂ ವಿಂಚ್ಲಿಂ ಮೆಥ್ಯುನ್.
‘ಮ್ಹಜ್ಯಾ ಈವಾಕ್ ಸ್ಕ್ರೂ ಘಾಲ್ಯಾ ಉಪ್ರಾಂತ್ ತುಂ ಅಶೆಂ ಉಲಯ್ತಾಯ್, ಬ್ಲಡಿ ಬಾಸ್ಟರ್ಡ್?’
ಮೆಥ್ಯುನ್ ಕಿತೆಂಚ್ ಮ್ಹಳೆಂ ನಾ ಪುಣ್ ಸಿಗಾರಾಚೆರ್ ಧಮ್ಮ್ ಚಿಂವೊನ್ ತುದಿ ಉಜ್ಯಾಚ್ಯಾ ಕೆಂಡಾಪರಿಂ ಕೆಲಿ.
‘ಆತಾಂ ಆಪ್ಣಾಕ್‌ಚ್ ದಾಗುನ್ ದೀ.’ ಜೆರೊಮ್ ಕಾಂಪ್ತಾಲೊ. ‘ಪುಣ್ ಮ್ಹಜೆಲಾಗಿಂ ಪೆಟ್ರೋಲಿಯುಮ್ ಜೆಲ್ಲಿ ನಾ.’
‘ಹಾಂವೆಂ ಈವಾಕ್ ಸ್ಕ್ರೂ ಘಾಲಾ ಮ್ಹಣ್ ಮೆಲ್ಕಮಾನ್ ತುಕಾ ಸಾಂಗ್ಲಾಂ?’
‘ಸಗ್ಳಿ ಒಸಿಸ್ ಕಂಪೆನಿ ಉಲಯ್ತಾ!’ ಬೊಬಾಟ್ಲೊ ಜೆರೊಮ್. ‘ಒಸಿಸ್ ಕಂಪೆನಿಂತ್ ಮ್ಹಜಿ ನವ್ಕರಿ ಉರ್ಲ್ಯಾ ತರ್ ಫಕತ್ ಈವಾಚೆರ್ ಆಸ್ಚಿ ಆಬ್ಳಾಯ್ ಮ್ಹಣ್ ಸರ್ವ್ ಉಲಯ್ತಾತ್.’
‘ಆನಿ ತುಂ ಕಿತೆಂ ಉಲಯ್ತಾಯ್?’ಮೆಥ್ಯು ಪಾಟಿಂ ಯೆವ್ನ್ ಆಪ್ಲೆ ಬಸ್ಕೆಚೆರ್ ಬಸ್ಲೊ. ‘ತುಜಿ ನವ್ಕರಿ ಉಸಳ್ಚಾರ್ ಆಸಾ ನ್ಹಯ್, ಜೆರೊಮ್? ಮ್ಹಜೆಂ ಕಾಮ್ ಜಾಲೆಂ ಮ್ಹಜಿ ಆಬ್ಳಾಯ್ ಥಾಂಬ್ಲಿ ಆನಿ ತುಜಿ ಕಿತೆಂ ಮ್ಹಾಕಾ ಗರ್ಜ್? ತುಂ ಕಸೊಯಿ ಈವಾಕ್ ಭಯ್ಣಿಪರಿಂ ಲೆಕ್ಚೊ ದಾದ್ಲೊ. ಅಶೆಂ ಆಸ್ತಾನಾ ಹಾಂವೆಂಚ್ ಈವಾಚೊ ಖರೊ ಭಾವ್ ಜಾಂವ್ಕ್ ನಜೊ?’
ಹೆಂ ಸವಾಲ್ ಜೆರೊಮಾಕ್ ಬಿಲ್ಕುಲ್ ಸಮ್ಜಾಲೆಂ ನಾ. ‘ತುಂ ಆನಿ ಈವಾಚೊ ಭಾವ್! ಕಸಲೆಂ ಫೊಕಾಣ್ ಹೆಂ? ಪುಣ್ ಕೋಣ್ ಜಾಣಾಂ, ತುಜ್ಯಾಚ್ ಭಯ್ಣಿಕ್ ಸ್ಕ್ರೂ ಘಾಲ್ಚೆಂ ವಿಕೃತ್ ಸಪಣ್ ತುಂ ಪೊಶಿತ್ತ್ ಆಸ್‌ಲ್ಲೊಯ್ ಕೊಣ್ಣಾ. ತುಂ ಎಕ್ ಗಲೀಜ್ ಮನಿಸ್ ಮೆಥ್ಯು ಲಿಯೊ, ರಿಂಗ್‌ಮಾಸ್ಟರ್. ತುಜಿ ಸರ್ವ್ ಶಿಂವಾಂ ಆನಿ ಆಸ್ವೆಲಾಂ ತುಕಾ ಪಾಟ್ಲ್ಯಾನ್ ಮುಕ್ಲ್ಯಾನ್ ಸ್ಕ್ರೂ ಘಾಲ್ತಾತ್, ಒಸಿಸ್ ಕಂಪೆನಿಕ್ ಫುಂಕ್ಯಾ ಸವಾಯ್ ವಿಕ್ತಾತ್… ಆನಿ ತುಂ ಕಿತೆಂ ಕರ್ತಾಯ್? ಆತಾಂ ಕಾಂಯ್ ತುಜಿ ನದರ್ ಹೇಲಿನಾಚೆರ್ ಚರ್ಲ್ಯಾ ಕೊಣ್ಣಾ?’
‘ಜಾಂವ್ಕ್‌ಯಿ ಸಾದ್ಯ್ ಆಸಾ!’ ಮ್ಹಳೆಂ ಮೆಥ್ಯುನ್. ‘ತುಕಾ ಕಿತೆಂ ಫಿಕ್ರ್, ತುಕಾ ಧುವ್ ನಾ ನ್ಹಯ್? ಯಾ ಹೆಲೀನಾಕ್ ತುಂವೆಂ ಧುವ್ ಕರುನ್ ಘೆತ್ಲಾಂಯ್ ಆಸ್ತೆಲೆಂ.’
ಅಸಲ್ಯಾ ಸವಲಾಂನಿ ಮೆಥ್ಯು ಲಿಯೊ, ಜೆರೊಮಾಕ್ ಕಸಲ್ಯಾ ಶಿರಿಗುಂಡಿಕ್ ವೊಡ್ತಾಲೊ ಮ್ಹಳ್ಳೊ ಅಂದಾಜ್ ಜೆರೊಮಾಕ್ ನಾತ್‌ಲ್ಲೊ.
‘ಹಾಂವೆಂ ಆತಾಂ ಲಜ್ ಸಾಂಡುನ್ ಮ್ಹಜೆಂ ಹಿಜ್ಡೆಂಪಣ್ ತುಜ್ಯಾ ಸಾಮ್ಕಾರ್ ಉಗ್ತೆಂ ಕರಿಜೆ ಪಡ್ತಾ…’
‘ಯೆದೊಳ್ ಉಗ್ತಡಾಕ್ ಪಡಾನಾತ್‌ಲ್ಲೆಂ ಕಸಲೆಂಯಿ ಆಸಾ ತರ್?’
‘ಆಸಾ!’ ಪರ್ತ್ಯಾನ್ ಲಿಕ್ಕರ್ ಕ್ಯಾಬಿನೆಟಾ ಕುಶಿನ್ ಪಳೆಲಾಗ್ಲೊ ಜೆರೊಮ್. ರಿಚ್ಚರ್ಡ್ ಕ್ಲೆಮೆಂಟ್ ಆನಿ ಮ್ಹಜೆಂ ಈವಾ ರಿಚ್ಚರ್ಡಾಚ್ಯಾ ಸ್ಟುಡಿಯೊ ಎಪಾರ್ಟ್‌ಮೆಂಟಾಂತ್ ಭೆಟ್ಲ್ಯಾಂತ್.’
ಮೆಥ್ಯುನ್ ಕಿತೆಂಚ್ ಮ್ಹಳೆಂ ನಾ.
‘ತುಕಾ ಕಿತೆಂಚ್ ಭೊಗ್ಲೆಂ ನಾ?’
‘ಮ್ಹಾಕಾ ಕಿತೆಂ ಭೊಗಾಜೆ, ಜೆರೊಮ್?’ ವಿಚಾರ್ಲೆಂ ಮೆಥ್ಯುನ್. ‘ತಾಚೊ ತಾಳೊ ಯೆಕಾಚಾಣೆ ನರಮ್ ಜಾಲ್ಲೊ. ‘ಈವಾ ತುಜಿ ಪತಿಣ್…ಊಟ್….ಡ್ರಿಂಕ್ ಘೆ.’
‘ತುಂವೆಂ ಮ್ಹಾಕಾ ಆಮಾಲಾಚ್ಯಾ ಸಾಗೊರಾಂತ್ ಬುಡವ್ನ್ ಬುಡವ್ನ್, ಭಾಯ್ರ್ ಕಾಡುನ್ ಕಾಡುನ್ ಪೀಳ್ನ್ ಪೀಳ್ನ್ ನಿತ್ರಾಣಿ ಕೆಲಾ. ಪುಣ್ ಮ್ಹಜೆಂ ತ್ರಾಣ್ ಮಾಜ್ವಾಲೆಂ ನಾ, ಗೆಲೆಂ ನಾ. ಈವಾಲಾಗಿಂಚ್ ವಿಚಾರ್, ಡಾಯ್ನಿಂಗ್ ಟೇಬಲಾ ವಯ್ಲೆಂ eroticism. ಮಾಗಿರ್‌ಯಿ ತೆಂ ರಿಚ್ಚರ್ಡಾ ಸರ್ಶಿ ಗೆಲೆಂ. ಹಾಂವ್ ತಾಕಾ ಪಾವ್ಲೊಂ ನಾ?’
‘ತೆಂ ಸವಾಲ್ ತುಜೆಂ, ಜೆರೊಮ್! ಪರ್ತ್ಯಾನ್ ಈವಾ ತುಜಿ ಪತಿಣ್-‘
‘ಆನಿ ರಿಚ್ಚರ್ಡ್ ತುಜೊ ಖಾಸ್ ಮನಿಸ್.’
‘ಒಸಿಸಾಂತ್, ವ್ಹಯ್! ಪುಣ್ ತೊ ಗೆಲ್ಲ್ಯಾ ಕಡೆನ್ ಸ್ತ್ರೀಯಾಂಕ್ ಸ್ಕ್ರೂ ಘಾಲ್ತಾ ತರ್ ತಾಕಾ ಹಾಂವ್ ಜವಾಬ್ದಾರ್ ನ್ಹಯ್.’
‘ಸಾರ್ಕೆಂ ಪುಣ್ ತೊ ತಾಕಾ ಪಾಗ್ ದಿಂವ್ಚ್ಯಾ ಒಸಿಸಾಕ್‌ಚ್ ಕುದೊಳ್ ಮಾರಿತ್ ತರ್?’
‘ಹಾಂಗಾಂ ಆಮಾಲಾಂತ್ ಬುಡೊನ್ ಆಯಿಲ್ಲ್ಯಾ ತುಂವೆಂ ಹೊ ಅಪಾದ್ ತೀನ್ ಚಾರ್ ಪಾವ್ಟಿಂ ಉಚಾರ್ಲೊಯ್. ಬರೆಂ, ತುಂವೆಂ ಸಾಂಗ್ಚೆಂ ಸತ್‌ಚ್ಚ್ ಮ್ಹಣ್ ಲೆಕ್ಯಾಂ, ತುಜೆಲಾಗಿಂ ಪುರಾವೆ ಆಸಾತ್ ಮ್ಹಣ್ ಪಾತ್ಯೆವ್ಯಾಂ. ತುಜೊ ಮೆಲ್ಕಮ್ ಎಕ್ ಬರೊ ಡಿಟೆಕ್ಟಿವ್ ಜಾವ್ನಾಸ್ಯೆತ್…’
‘ತೊ ಎಕ್ ಪ್ರಾಯ್ವೇಟ್ ಡಿಟೆಕ್ಟಿವ್ ಮ್ಹಣ್ ಹಾಂವೆಂ ಸಾಂಗ್ಲೆಂ ನಾ ಯೆದೊಳ್?’
‘ಆತಾಂ ಸಾಂಗ್ಲೆಂಯ್!’ ಮ್ಹಣಾಲೊ ಮೆಥ್ಯು. ‘ಫಾಂತೆಂ ಜಾವ್ನ್ ಯೆತಾ, ತುಕಾ ಎಕಾ ಡ್ರಿಂಕಾಚಿ ಗರ್ಜ್ ಆಸಾ. ಎಕ್ ತಯಾರ್ ಕರುಂ?’
‘ಪರತ್ ಮ್ಹಾಕಾ ಆಮಾಲಾಂತ್ ಬುಡವ್ನ್ ಜಾತಾತಿತ್ಲೆಂ ಮ್ಹಜ್ಯಾ ವೊಂಟಾಂಥಾವ್ನ್ ಭಾಯ್ರ್ ಕಾಡ್ಚೊ ಉದ್ದೇಶ್ ತುಜೊ ಜಾಲ್ಯಾರ್, ಮೆಥ್ಯು, ಮ್ಹಾಕಾ ಡ್ರಿಂಕ್ ನಾಕಾ.’
‘ಬರೆಂ ತರ್,’ ಮ್ಹಳೆಂ ಮೆಥ್ಯುನ್. ‘ತುಂವೆಂ ಚಾರ್ಲ್ಸಾಚಿ ಆನಿ ಮ್ಹಜಿ ನೀದ್ ಪಾಡ್ ಕೆಲಿಯ್. ಫಾಲ್ಯಾ ಆಮ್ಕಾಂ, ಮತ್ಲಬ್, ತುಕಾ ಆನಿ ಮ್ಹಾಕಾ ಒಸಿಸಾಕ್ ವಚುಂಕ್ ಆಸಾ. ಫ್ರೆಡ್ ಟೇಯ್ಲರಾಚ್ಯೊ ಜಮಾತಿ ಮ್ಹಣ್ ತುಕಾ ಆನಿ ಹೆರಾಂಕ್ ಸಳ್ಗಿ ದಿಲ್ಲಿ ಚಡ್ ಜಾಲ್ಯಾ. ರಮೋನಾ ಕಶೆಂಯಿ ಹಾಂಗಾಸರ್ ನಾ, ತೆಂಯಿ ಹ್ಯಾ ಜಮಾತಿಂನಿ ಇತ್ಲೆಂ ಬುಡೊನ್ ಗೆಲಾಂ….ತುಂ ಹಾಂಗಾಸರ್‌ಚ್ ನಿದೆ, ಜೆರೊಮ್. ಹಾಂವ್ ಚಾರ್ಲ್ಸಾಕ್ ಸಾಂಗ್ತಾಂ ತುಜೆಂ ಬೆಡ್ಡ್ ತಯಾರ್ ಕರುಂಕ್. ಗೆಸ್ಟ್ ರುಮಾಂತ್‌ಚ್ ನಿದೆ. ಫಾಲ್ಯಾ ತಡವ್ ಕರುನ್ ಒಸಿಸಾಕ್ ಆಯ್ಲ್ಯಾರ್ ಪರ್ವಾ ನಾ.’
‘ಆನಿ ಒಸಿಸಾಕ್ ಯೆವ್ನ್?’
‘ಸದಾಂಚೊ ವಾವ್ರ್ ಕರ್ಚೊ!’
‘ಕಸಲೊ ಮನಿಸ್ ತುಂ, ಕಸಲೊ ರಿಂಗ್‌ಮಾಸ್ಟರ್ ತುಂ?’
‘ಕಿತೆಂ ಜಾಲೆಂ?’
‘ಇತ್ಲ್ಯಾ ಮಹತ್ವಾಚ್ಯೊ ಸಂಗ್ತಿ – ಘುಟ್‌ಚ್ ಮ್ಹಣ್ಯಾಂ – ತುಜ್ಯಾ ಸಾಮ್ಕಾರ್ ಲಜೆವಿಣೆ ಉಗ್ಡಾಪೆ ಕೆಲೆ. ಪುಣ್ ತುಜೆಥಂಯ್ ಕಸಲೊಚ್ ಪರಿಣಾಮ್ ಜಾಲೊ ನಾ. ಕಿತೆಂ ತ್ಯಾ ರಿಚ್ಚರ್ಡಾಕ್ ತುಂ ಪೊಲಿಸಾಂಚೆ ತಾಬೆನ್ ದೀನಾಂಯ್, ಟೆಂಡರಾಂಚೆ ಘುಟ್- ಸಂಕೆ ತಾಣೆ ಎದ್ರಿ ಕಂಪೆನಿಂಕ್ ದಿಲ್ಯಾತ್. ತಾಕಾ ಉಣ್ಯಾರ್ ಉಣೆ ಸ ವರ್ಸಾಂಚೆಂ ಜಯ್ ಜಾಯ್ಜೆಯಿಚ್. ತಾಚ್ಯಾ ಲಂಯ್ಗಿಕ್ ಆತರ್ವಣಾಂಕ್ ಕಸಲಿ ಶಿಕ್ಷಾ ನಿಶ್ಚಿತ್ ಕರ್ಚಿ ಮ್ಹಣ್ ಹಾಂವ್ ನೆಣಾಂ. ಪುಣ್ ತುಂ ಕಿತೆಂಚ್ ಘಡಾನಾತ್‌ಲ್ಲೆಪರಿಂ ಕರ್ತಾಯ್.’
‘ಕಿತೆಂ ಘಡ್ಲಾಂ, ಜೆರೊಮ್?’ ವಿಚಾರ್ಲೆಂ ಮೆಥ್ಯುನ್ ಆಪ್ಲೆಂ ಸಿಗಾರ್ ಪಿರಿಂತ್ ಚಿರ್ಡುನ್. ‘ಕಾನೂನಾಕ್ ರುಜ್ವಾತಿ ಜಾಯ್, ಅಖಂಡ್ ರುಜ್ವಾತಿ. ತ್ಯೊ ತುಂವೆಂ ಪೇಶ್ ಕರುಂಕ್‌ನಾಂಯ್. ‘ತುಂವೆಂ ಸಾಂಗ್‌ಲ್ಲ್ಯೊ ಕಥಾ ಸತ್ ಜಾತಿತ್ ತರ್ ರಿಂಗ್‌ಮಾಸ್ಟರಾಚಿ ದಿಶಾ ಬದ್ಲಾತೆಲಿ. ಪುಣ್ ತುಂ ಯೆದೊಳ್ ಪರ್ಯಾಂತ್ ಫಟ್ವಾದ್ ಝಾಂಕುಳ್ನ್ಂಚ್ ಆಯ್ಲಾಯ್… ಚಿಂತ್, ಕಿತ್ಲಿಂ ಕುಟ್ಮಾಂ, ಕಿತ್ಲೆ ಜಣ್ ಕಸಲ್ಯಾ ಕಸಲ್ಯಾ ವಾಂದ್ಯಾಂಕ್ ವಳಗ್ ಜಾತಾತ್ ಮ್ಹಳ್ಳೊ ಅಂದಾಜ್ ಕರ್. ಇಲೆಕ್ಷನ್ ಲಾಗಿಂ ಆಯ್ಲೆಂ. ಲಿಲಿಯನ್ ಜೆನಿಸ್ ಆನಿ ಮೌರಿಸ್ ಆಗುಸ್ತಿನ್ ಸ್ಪರ್ದಿ ಜಾವ್ನ್ ರಾವ್ಲ್ಯಾಂತ್. ಮೌರಿಸ್ ಆಗುಸ್ತಿನಾಚಿ ಕಂಪೆನಿ ಆಮಿ ಸ್ವಾದೀನ್ ಕೆಲ್ಯಾ, ಹೆಲೀನಾ ಜೆನಿಸ್ ಒಸಿಸಾಂತ್ ನವ್ಕರಿ ಕರಿತ್ ಆಸಾ; ಪೆಟ್ರೊಸ್ಟೇಂತ್ ತ್ಯಾ ಫ್ರೆಡ್ ಟೇಯ್ಲರಾಚೊ ತಾಪ್ ಫಯ್ಲಾಲಾ ಆನಿ ಹ್ಯಾ ಆಯಿನ್ನ್ ವಗ್ತಾ ತುಂ, ಮಾತ್ಯಾಂಗೊಳ್ ಆಮಾಲ್ ವೊತುನ್ ಘೆವ್ನ್ ಮಧ್ಯಾ ರಾತ್ ಉತರ್ಲ್ಯಾ ಉಪ್ರಾಂತ್ ಮ್ಹಜೊ ವಿಶೆವ್ ಪಿಸುಡ್ಣ್ ಹಾಂಗಾ ಬಸ್ಲಾಯ್.’ ತಾಣೆ ಟೊಲ್‌ಬೊಯಾಚೆ ದೆಗೆನ್ ಆಸ್‌ಲ್ಲೊ ಎಕ್ ಬುತಾಂವ್ ದಾಂಬ್ಲೊ. ಥೊಡ್ಯಾ ಘಡಿಯಾಂನಿ ಚಾರ್ಲ್ಸ್ ಹಾಜರ್ ಜಾಲೊ. ‘ಕಾಳಿ ಫುಟಿ ಕೊಫಿ ಕರುನ್ ಹಾಡುಂ, ಸರ್?’
ಮೆಥ್ಯುನ್ ಮಾತೆಂ ಹಾಲಯ್ಲೆಂ. ‘ಖಡ್ಪ್ ಆಸುಂದಿ!’
ತೊ ವೆತೆಚ್ ತಾಣೆ ಜೆರೊಮಾಲಾಗಿಂ ವಿಚಾರ್ಲೆಂ. ‘ಡಿಟೆಕ್ಟಿವ್ ಮಾಲ್ಕಮ್ ಆನಿ ಗ್ಲೋಬ್ ಪರ್ಸನಲ್ ಸರ್ವಿಸಸ್, ಕರೆಕ್ಟ್, ಜೆರೊಮ್?’
‘ಕರೆಕ್ಟ್!’ ಮ್ಹಳೆಂ ಜೆರೊಮಾನ್ ಮೆಥ್ಯುಚೊ ಕಸಲೊಯಿ ಮತ್ಲಬ್ ಸಮ್ಜಾನಾಸ್ತಾಂ.
(ಅವಸ್ವರ್ – 82 – ಂತ್ ಮುಂದರ್‍ತಾ)
